رجعنا من السوك .... غسلت الملابس وصعدت فوك للسطح بحجة أشر الملابس حتى اتصل على صاحب الرقم واعرفة منو هذا ليش لح علية وكلما اروح ويا الحجية للسوك يتابعني ويحاول يتقبب من عندي وينطيني الرقم .؟!
اتلفت يمنى ويسرى ... خايفة وكلبي يدك سريع
زين شنو الجابرني ؟ليش اسوي هيج ...
اكو شي يدفعني ويكلي يلة خابري ! منو راح يحاسبج ! جربي هذا الشعور حالج حال البنات ..
ما كذبت خبر بسرعة كتبت الرقم واتصلت علية
__ ألو
__ ألوووو يا هلة و100 هلة
__ عرفتني
__ طبعاً عرفتج
__ بس شلون ؟ شنو رقمي عندك مثلاً
__ لا بس اني مانطيت رقمي بس ألج ... اي شلونج ... شنو أسمج من وين
__ شيخصك
__ هههههه تمام نغير موضوع !
__ شتريد من عندي ليش كل مرة تطلع بوجهي
__ ليش احجيلج شرايد وانتي أبسط شي ما راضية تكولين أسمج
(( بهاي اللحظة صاحتلي الحجية ... وينج رحمة وين صرتي ... اني بسرعة سديت الخط وحطيت ايدي على حلكي ... عزززة بس لا انكشف ...ضميت الموبايل بصدري واخذت السلة ونزلت ))
الحجية..... شبيج رحمة
رحمة ..... ما بية شي يلة شسوي عشة
الحجية.... ترة نزلتي الهدوم وياج ماشريتيهن وين عقلج
رحمة .... اوو نسيت والله ههههههه
(( كلش خايفة ..ارجف اباوع ايدي من شايلة السلة ترجف ما تثبت ...رجعت للسطح .. موبايلي صامت مااسمع من يتصل علية ... طلعتة من صدري وفتحت الشاشة شفت جايتني رسالتين sms ....ضميت الموبايل بسرعة وىحت اشر الملابس وافكر ... من كد ما عقلي متشوش باوعت اني شارة الملابس شي فوك شي ... لان اسوي خطأ واضح علية واني راح افضح روحي يمكن لازم انتبه على تصرفاتي شوية ...
وكفت وغمضت عيني ... اخذت نفس ... فتحت عيني ورجعت من جديد شريت الملابس ...
كملت وهم رجعت طلعت الموبايل .. فتحت الرسائل ..
الاولى مكتوب ....(( رحمة عاشت الاسامي ))
والثانية مكتوب ...(( صوتج حلو ))
سديت الموبايل بين الفرحانة اسمع هيج كلام لاول مرة بحياتي ..
وبين الخوف الشديد والتوتر ...
زين هذا شيريد من عندي !؟
معقولة معجب بية اكيد جذاب .
شنو بية يعجبة .! بنية مثلي معقولة ينعجبون بيها ...؟
كافي رحمة طلعي هاي الافكار من راسج واتجاهلي يضحك عليج ليش اخذتي رقمة واتصلتي علية ...
بسرعة فتحت الجهاز ومسحت الرقم والرسائل وقفلت الموبايل وضميتة بصدري ونزلت ...
شفتهم جوة مخبوصين بتحضير العشة
اني بالي مو يمهم ..
يتحركون ويحجون كدامي صح
اشوفهم بس مااسمعهم ...
بنفس اليوم بالليل بحجة اروح للحمام ورحت فتحت موبايلي لكيت ١٠ رسائل من هذا لولد ...
ضربت على خدي عزة هم رجع دزلي ...
قفلت باب الحمام وكتبتلة رسالة
(( بعد لا تراسلني ماشي اعتبرني اختك ))
رجع كتبلي (( اساساً معتبرج اختي وماعندي نية موزينة وياج ..))
اي صح معتبرني اختة اكيد اني مو بالشكل المطلوب ليش خايفة على نفسي ...
رجع كتبلي (( باجر انتظر اتصلج يلة تصبحين على خير ..))
جاوبتة (( تمام ...وانت من اهل الخير ))
مرت الايام وتواصلت ويا الولد اكثر ..
عرفت أسمة (( صادق ))
اسلوبة لطيف وياية ..
صار صديق مو أكثر ..
يطمئن عني واطمئن عنة ماكو شي ثاني بينا ..
..
بعد مدة من بقائي يم الحجية ..
صارت تسألني هوايه عن عمي واهلي وشنو ردة فعلة لو رحت واعتذرت من عندة ...
بحجة الحوار تسأل هذا السؤال اكثر من مرة واني مااجاوبها خايفة ما مطمئنة ابد لهاي أسئلتها الى ان بيوم من الايام طرحت علية فكرت وبالفعل كان خوفي بمحلة ...
الحجية .... زين يمة اني رايدة اروح لعمج واسوي صلح بينكم
رحمة .... خالة شتحجين ! اتصور ما تعرفين عمي زين ... اي صلح هذا ... يقتلني والله وؤقتلكم بحجة تسترتوا علية ... الموضوع ما هين مثل ما تتصورين ...
ألحجية .... ندخل ناس كبار بالموضوع وننزل على رجلة ونراضيكم
رحمة ... خالة ضجتي من عندي مو ؟
الحجية ....يمة شنو هالحجي ! تفكسين عيوني هسه وماكلج لا انتي بمعزة بناتي لا تفكرين هيج وحتى لو راضيتي عمج هم ابقيج يمي رايدتج عمر ..
رحمة .... خالة اذا تحبيني لا تعيدين هذا الكلام ... اترجاج
( تركتها ورحت للغرفة ابجي ... خايفة تبقى تشتغل من ورا ظهري وتوصل لعمو حازم ... هي ما تعرف حجم السوء بشخصيتة تتصورة انسان عادي ويسامح بسهولة ...
صرت انتبه على كل كلامها وياية ... اراقبها اريد اسمع كلامها ويا زوجها وبناتها .! احس بكل لحظة تخطط شلون توصل لعمي وتحجيلة علية ....))
بأحد الايام البنات بالدوام ..بس اني والحجية والحجي بالبيت ... بقيت بالغرفة ما طلعت ..سمعت صوت شي يتكسر رحت ركض ...لكيتهم بالغرفة يحجون ...
دارجع للغرفة بس شي سحبني ورجعني ..احس شي يكلي اوكفي اسمعي لا تروحين ...
حطيت أذني على الباب وسمعت الحجي يكول ...
__ هم اريد ولد لكبرتي ليش تعاندين
__ شسويلك انت رزقك بس بنات مو ذنبي وبعدين بناتك جمال وذكاء ليش تتبطر عليهن
__ما متبطر بس رايد ولد ! قبلتي ام لا اني اتزوج يعني اتزوج ورا محرم ..
__ شتحجي ما توكف بعينك العشرة تزوج علية وتجيب مريتك للبيت
___ مامقصر وياج ولا ويا البنات بس رايد ولد ! راااااايد ولد ...
(( رجعت ركض للغرفة ....كعدت وصفنت شديحجي شيسوي بالولد بيتهم هادئ وحياتهم شكد حلوة ! ياريت لو جدو ما مخلف ولدة بشنو يفيدون ! ليش يجرح زوجتة بهاي الطريقة ولد ولد ولد كافي شوكت نخلص من هذا المجتمع الذكوري هذا 😭 .. رجل .سبب هروبي وتعقيدي بالحياة ... خلف كل وجع ودمعة نزلت من عيني رجل ... او ذكر ... صرت اتعقد من اسمع شخص يفضل ولد على بنت او يريد ولد ويتعارك علمود الولد كااافي كاافي ...))
صحيت على روحي وكلت خلص اني معلية ليش انقهر وابين على روحي متوترة ...
فتحت موبايلي لكيت صادق متصل علية ومراسلني اكثر من مرة ..
كمت قفلت باب الغرفة وراسلتة
ها شلونك العصر اصعد اشر الملابس واخابرك
ماشي على راحتج بس حبيت اطمئن عليج ديري بالج على نفسج ....
صادق كان بمثابة أخ وصديق
طول فترة تواصلنا يعتبرني اختة
شاركني كل أسرارة ... يحجيلي عن حياتة الخاصة ومشاكلة ..
ابداً ما تجاوز او قلل ادبة بيوم لهالسبب جنت ارتاحلة حيل حتى شعور الذنب والخوف زال من احجي ويا عكس البداية اموت الف موتة من اتواصل ويا واحس داسوي شي خطأ وما مقبول ...
مرت الايام وصادف عاشوراء ...
اجواء حلوة اول مرة اشوفها ..
طبخ .. مواكب .. ملاية ... زيارة ..
جنت اشاركهم كلشي ..
صرت مثلهم بنت المنطقة مااحس نفسي غريبة ..
الشي الوحيد ليزعجني هو اسئلة الحجية بأستمرار عن عمي وطبعة وشنو يحب وشلون يرضى ... صار هذا حديثها طول الوقت ...
بأحد الايام بس اني والحجية بالبيت سألتني سؤال غريب واني فهمت قصدها ..
الحجية ... اكلج رحمة اذا يتقدملج واحد جبير بالعمر تزوجين لو الا بعمرج
رحمة .... خالة اني ماريد اتزوج ومامفكرة بالزواج بعد لشفتة
الحجية .... بس اذا خوش رجال ويصونج شكو بيها العمر مجرد رقم
رحمة ... خاله شتحجين ؟ ضامتلي عريس هههههههه
الحجية .... ههههههه لا ولج استغفرالله بس هيج اسألج
((حتى ضحكتها جانت غريبة .... مااعرف ليش اول شي اجة ابالي تزوجني للشايب ! معقولة انسان كلش كبير شلون تفكر تزوجني الة ! بعدني بمقتبل العمر ! مستحيل اقبل بي ليش هيج تفكر ... تعرف اني وياهم بنفس البيت شلون تفكر هيج تفكير ! زين معقولة كالت لزوجها ! لا ياربي ....))
اخذت الملابس وصعدت اشرهن .
مثل خطة كل مرة ... اتصل على صادق ...
صادق .... ها رحمة شلونج صار هوايه مامتصلة
رحمة .... والله ماصارلي مجال شلونك
صادق ... زين ..لكيت شغل بسليمانية وباجر الصبح اطلع
رحمة ... صدك .. الله يرزقك وين تشتغل
صادق ... مطعم .. واحد كرايبي خطية شاف محتاجين عمال وبسرعة خابرني
رحمة .... الله شكد حلوة هناك مو
صادق ... تجنن وحياة ثانية وامان اكثر .. بس سبورتية حيل عكس هنا بكربلاء
رحمة ...صدك يعني شلون
صادق .... يعني ما يلبسون عبايات راس والبنات يشتغلون اكثر من الولد ولبسهم عادي قصير وضيق ومحد يباوع على بنية كلمن علية بنفسة
رحمة .... وشعجب اهلهم يخلوهم يشتغلون
صادق .... رحمة تره البنات هناك مو اصلهن مناك ذني مهزومات من اهلهن ويشتغلن حتى يعيشن تلكين هوايه بنات بالمطاعم بالكوفيات كلة بنات
رحمة ... ليش اهلهن مايوصلوهم معقولة اذا يطلعن ويطبن مايخافن
صادق .... منو يوصلهن ؟كل عقلج لج هناك دولة ثانية تحسيها أمان ونظام وقانون
(( بقى يحجيلي على الشمال اكثر ... اني تمنيت اروح ويا بس ما بينت الة .. سدينا الخط ...اشر الملابس وافكر بكلامة صحيح اني شنو مصيري هنا ... اذا يصير شي على الحجية والبناات يتزوجون وين اروح ..؟ وهنا من المستحيل اكدر اشتغل واعيش نفسي ...
استغفرت الله حتى تطلع هاي الافكار من راسي ...
اخذت السلة ونزلت ...
بليل هن صعدت فوك بحجة انزل الملابس .. حجيت ويا صادق ديحضر ملابسة حتى يسافر لسليمانية باجر ... ما طولت حتى لا يشكون بية لان البنات بالبيت.... اخذت سلة الملابس ونزلت صارت نرجس كدامي وكلش ضايجة ...
نرجس ... تعالي للغرفة
رحمة ..... شكو صاير شي
نرجس.... لا ماصاير شي بس تعالي للغرفة
((( هنا جمدت بدمي من الخوف ... توقعت خلص انكشفت علاقتي ويا صادق وعرفوني احجي ويا ...رحت للغرفة وراها وكلبي يدك سريع وارجف ...))
دخلتني لغرفة ثانية .... سدت الباب ...
نرجس.... رحمة اريد احجي وياج بموضوع
رحمة .... اي تفضلي احجي
نرجس ... باعي من الاخير ترة ماما تريد تزوجج لابويه
رحمة .... شتدحجين ! (( اني جنت اعرف كلشي .. سويت روحي مااعرف وتفاجأت ...))
نرجس ... اي والله انتي لا تقبلين احنة نحبج ونعتبرج اختنا .
رحمة .... بس انتي تعرفين اني اعتبر عمو بمثابة ابوية شلون هيج تفكر
نرجس.... اني بعد كلتلج ... لا تقبلين ... تريد تاخذج لبابا بحجة تخلفين ولد لان بابا يريد يزوج عليها تكول انتي احسن من وحدة ما نعرفها
رحمة .... لا عفية لاتحجين هيج تره انقرفت والله ! مستحيل ليش هيج تفكر حرام عليها تعرف احنا بنفس البيت شلون تفتح عينة عليه
نرجس .... أني حجيتلج حتى تسدين الموضوع من البداية ! لا تنطيها مجال ولا تفكرين
رحمة ... اكيد نرجس والله مستحيل مامفكرة ابد بأبوكم والله احترمة واقدرة بمثابة والدي ماانسى حتى مصروفي يومي مسويلي حالي حالكم
نرجس ... احنة كلنا نحبج وحتى ماما تحبج واختارتج بس هي دتغلط هواية بهيج تصرف تخيلي تريد توصل لعمج وتخطبج منة وتسوي صلح بينكم
رحمة ..... عزة بعيني .. عززززة.. كلشي ولا عمي .... لااا مستحيل عفية مستحيل هذا مجرم واللة يقتلكم ويقتلني بنفس اللحظة ... عفية لا .. (( كلش خفت ... ضليت ابجي ... بعد كلشي صار شلون ارجع لعمي ... خاف المرة الاخيرة صارتلي فرصة وهربت ونقذت روحي هالمرة خلص كل فرصي خلصت لازم اشوف حل ..))
تركت نرجس وطلعت من الغرفة ..شافتني الحجية
الحجية .... ها يمة وين رايحة
رحمة .... هاا خالة اجيب موبايلي نسيتة فوك من اشر الملابس
الحجية ...يله مو تتأخرين
رحمة ... لا هسه انزل بسرعة
(( صعدت فوك ... بسرعة فتحت موبايلي واتصلت على صادق ..))
رحمة .... صادق اريد اروح وياك
صادق ....السلام عليكم عليكم السلام هههههههه شنو وين ! شبيج
رحمة ....صادق اريد اروح وياك لسليمانية
صادق ....خيرج رحوممم ! اهلج ! غير يكتلوج
رحمة ...ذولة مو اهلي
صادق .... شنووو
رحمة .... مثل ماسمعت هربت يمهم واحتووني وساعدوني ماانسى فضلهم بس مو اهلي
صادق.... صدك ! شنو قصتج ! مو تكولين هاي امج !
رحمة .... كذبت عليك وهسة احجيلك ليش ..
(( حجيت على ظلم عمي باختصار وزوجني غصب ومن طلكني زوجي راد يقتلني وهربت باخر اللحظات...ضل مصدوم ...جنت احجي ويا وعيني على باب السطح خايفة لا يصعد احد ويسمعني ..))
رحمة .... اريد منك تاخذني لسليمانية هناك اشتغل المهم اريد اطلع منا ساعدني الله يخليك خايفة ممكن اي لحظة يوصلني عمي ويقتلني بس هناك امان ومحد يكدر يأذيني اخذني وياك اشتغل هناك بالمطعم مو تكول اكو بنات يشتغلون ؟
صادق ... شتحجين رحمة مستحيل اكدر !
رحمة .... اسمع عليك الحسين اخذني ...((من اقسمت علية بالحسين تراجع شوية وصار بي مجال يساعدني ))
صادق ... خليني افكر ... احتاج وقت
رحمة ... شتفكر انت باجر تسافر الله عليك اقبل يلة
صادق .... انطيني وقت .. ساعة واردلج خبر بس ليش ماحجيتي عن قصتج قهرتيني هسه شصاير بيج
رحمة.... .... وبعد اكثر من هذا .. عود دز رسالة بعد مااكدر اخابرك ماشي
صادق ..... الله يعينج يلة شوية واردلج خبر ماشي
(( سدينا الخط ...نزلت جوه .. منتظرة أهتزاز موبايلي بمعنى رسالة من صادق ..... انتظرتة ساعة ماكو رد ... ساعتين هم ماكو ...صارت الساعة ب ١١ بليل وماوصلني شي منة ... ب ١١ ونص حسيت اهتز الموبايل بسرعة طلعتة وفتحت الرسالة ...
(( باجر ب 2 الظهر نطلع حضري كلشي بس ارمشلج الكاع طالعة للباب تكسي صفرة راح توكفلج ونروح بيها ))
ضحكت بكل عفوية ... البنات انتبهوا علية .. باوعت عليهم وضحكت وياهم ...
معقولة اروح لسليمانية وارتاح بعد مستحيل عمو حازم يكدر يوصلني ...
خلي اكوم احضر مستمسكاتي
بس شنو ألبس ! ( يله ألبس العباية افضل عالسريع ))
باوعت على البنات انقهرت ..بس غيرت افكاري بسرعة لااا لا تنقهرين خلص اطلعي ذولة مو اهلج .. كلشي يصير ممكن اذا ترفضين الشايب تصير الحجية ضدج او هو يطردج من البيت ..! والشي الاصعب ومجرد التفكير بي يقشعر بدني من افكر يوصلون لعمو حازم ويندل مكاني ...
لااا كافي مال انقهر ابد اريد اخلص ...ارتاح واطمئن اكثر ..
ميخالف اشتغل اي شي واعيش المهم ماابقى هنا ابد ...))
طول الليل مااكدر انام ..
انام وافز من نومتي وافكر ... يسرح عقلي بهواية افكار ...
بش اختمها بأخذ نفس واردد يارب توكلت عليك ....
صليت الفجر ودعيت رب العالمين يسهل طريقي وينور دربي وتكون هاي بدايتي لحياة جديدة خالية من لمشاكل والصفع ....بعد الصلاة ارتاح قلبي وكأنما نزلت كل السكينة والطمأنينية علية ...تأكدت اني امشي صح ولازم اكمل طريقي وابقى على موقفي مااضعف ..لان الافكار تراودني هواية من اباوع على بنات الحجية وافكر راح اتركهن وهن بمثابة اخواني طول 11 شهر وياهن مااعتبروني غريبة حسسوني اني فعلاً اختهم شاركوني اسرارهم .. ملابسهم ... مصرفهم ... اكلاتهم ... .
كعدت الصبح على صوت الحجية بالمطبخ تسوي ريوك ..
سلمت عليها وغسلت ايدي وبلشت اساعدها ..
يمكن لو ملاحظيني راح يعرفون اني شكد خايفة ومتوترة .. حتى القوري حطيتة على الكاونتر ونسيت مكانة على للطباخ ! ... بعدين انتبهت ورجعتة على الطباخ ...
الموبايل بصدري كل شوية اراقبة واتأكد خاف صادق يراسلني ويغير الموعد بقيت اتابع اول بأول .....
كملنا ريوك وماكدرت اكل شي .. تركتهم ينظفون المطبخ ورحت للغرفة بحجة الم الفراش ..
فتحت الخانة من الكنتور الخاصة بية
طلعت فلوسي واو اني جامعة مبلغ زين من مصروفي اليومي مااشتري اعرف راح احتاجة للزمن ...طلعت مستمسكاني طبعاً الجنسية يم طه اخذها يمة مااعرف ليش بعد مااجيت لبيت للحجية اكتشفت هذا الشي ... مو مشكلة اكو شهادة الجنسية وبقية اوراق الصليب الاحمر ومراكز الشرطة وكل الاوراق لتثبت تضررنا من الامريكان وقصف بيتنا ... ماتركت شي حطيتهن بجنطة اليد وحطيت الفلوس وياهن ...عبايتي موجودة ... تمام بس يرن صادق اطلع بسرعة ...
كملت الشغل وياهم...
بالي مو يمهم ابد افكر شلون انهزم .
وشلون ممكن ميكشفوني ! وميحسون علية
ب1 ونص اجتني رسالة من صادق ..
(( نصف ساعة واني بالباب اسويلج مسكول اطلعي تمام ))
__ ماشي انتظرك ..
بدوم مايحسون علية وبالخفية طلعت عبايتي وجنطتي حطيتهم عالمبردة ...
انتظرتة ويا المسكول بسرعه لبست العباية واخذت الجنطة وطلعت ركض للشارع ....باوعت سيارة صفرة واكفة شفت صادق صاعد بيها فتحت الباب وصعدت ..))
رحمة ... الف الحمدلله الف الحمدلله ماممصدكة ..
صادق .... هههههه شلونج رحمة
رحمة .... تمام الحمدلله زينة كلش زينة
صادق .... ههههههه وحدة وحدة علكيفج يلة هسه رايحين لكراج بغداد اكو جماعة هناك تنتظرنا
رحمة .... اوك مو مشكلة لكل مكان اروح المهم راح اروح للشمال وارتاح
رحنا للكراج .. انتظرنا تقبط السيارة يلة يحرك السايق ..صادق طول الوقت يسولف وياية وشرحلي عن طبيعة الحياة هناك وشنو راح نشتغل ...
صادق ... خوش يعني تعرفين تشتغلين
رحمة .... وشيرادلة ! شغل مطبخ اكو واحد ميعرف ..
صادق ..... تمام سهلة لعد بس ممكن يكون شغلنا ثرم تنظيف صحون او بالكوفيات مامعلوم
رحمة .... اي شي ميخالف اشتغل بس اخلص ...
صادق .... ايي شوية الرواتب هناك زينة بس الشغل صعب
رحمة .... بس اني ما عندي جواز
صادق .... ههههههههههه مايحتاج ....
رحمة ... هسه احنة وين رايحين ( الكية قبطت عبرية وتحركت ))
صادق ... رايحين لبغداد هناك الجماعة كتلج ينتظرونا ياخذونا بسيارة لسليمانية نطلع
رحمة .... ايي زين ....
(( حطيت راسي على الجامة .... صافنة على الشوراع شكد حلوة .. صفنت على البيوت كلت اكيد خلف هاي الابواب والحائط اكيد اكو بنت تتعذب مثلي من تعنفت سنين طويلة جوة ايد بابا وماما وعمو حازم والكل محد رحم بية من صغري .... اكيد اكو اشخاص خلفها يتعرضون للتنمر وينكسر قلبهم ونفسيتهم تصير بيها خدوش قوية ما ممكن تتعالج بيوم ...اثناء صفنتي سمعت صادق يحجي وياية ..))
صادق .. .... رحمة شبيج هههههههه راح نوصل يمعودة ..
رحمة .... هاا ايي (( لبست الجنطة عدل وعدلت عبايتي ))
(( نزلنا بمكان عام ..... صعدنا لسيارة ثانية ينتظرونابيها سلم صادق عليهم وصعدت ويا .. من كعدت باوعت بالسيارة اكو هواية بنات مو بس اني ... بس شنو ! م
بنات مايشبهوني ابد .. لبسهم كلش سبورت وبدون حجاب... يضحكون بصوت عالي ...يشاقون ويا الولد لدرجة يلزمون ايديهم !! ....عززززة شديصير ..فتحت عيني ... ..
يبووو معقولة هاي احنا وين عايشين ... باوعت عبايتي وشحاطتي وشالي الاسود ما يشبه لبسهم ابد ...
درت وجهي عنهم وضليت اباوع على الشارع بس مستغربة حيل ....
صادق... رحمة ... باعي راح اكول انتي تعوديلي حتى محد يكدر يندك بيج لو يفكر غير شي
رحمة .... ايي احسن
(( بقينا نمشي بالسيارة ساعات والطريق جداً طويل ومتعب ... بنصف الطريق وكفوا يم احد المطاعم ونزلنا ناكل .... اني بقيت ويا صادق ... اشترالي لفة وشاي على حسابة ما قبل ادفع شي باعتبار هو زلمة وعيب يخلي بنت تصرف اذا تطلع ويا ..))
صادق .... ارتاحي شوية هنا بالمطعم اني رايح اكعد يم الولد انتي ابقي يم البنات شوية ونرجع للسيارة تعبنا
رحمة ... ماشي .. ( كعدت يم البنات ... نظرتهم الي قرفانات وماعاجبتهم ابد ..
__ هههههههههههه هاي انتي بعباتج تروحين للسليمانية !!
__ لاا وتخيلي تريد تشتغل هيج
(( اني ماعندي هاي اللباقة بالكلام رغم كل المحطات الصعبة مريت بيها بس بعدني خجولة وفقيرة واتلبك اذا اتكلم يم مجموعة .... جاوبتهن بصوت ناصي عكس صوتهن كلش عالي اثناء الكلام وضحكتهن تهز المكان كلة))
رحمة .... اي
__ ههههههههههههههه اوووووي نوب تستحي تحجي تحجي يالله
__ اكلج تره رايحة تشتغلين وبمكان واو مارايحة للمسجد بهذا لبسج ههههههههههههه
__ وانتي ميشغلوج تره هههههههه
رحمة .... ليش
__ لازم يحطوج بمسجد تجدين وتلمين فلوس ههههههههههههههه
__ مو بس هاي حطي مكياج شي وجهج شلونة عفية انتي محتاجة طن مكياج ههههههههههههه
(( ما جاوبتهن ... شفتهن كلهن متحدات وأسلوبهن ووقحاتهم نفس الشي .. حتى مواضيعهن سخيفة ! كل شوية يجيهم اتصال ويتفقن ويا عشيقهم ... وتسد الخط تضحك ويا البنات عليه تكول اجر منة فلوس .! يفشرن ويتلفظت كلمات مو حلوة بينهن ... تركتهن ورجعت صعدت للسيارة انتظرتهم لحد مايرجعون ....الى ان رجعوا كلهم وحركنا السيارة نكمل طريقنا للسليمانية ...))
قبل الدخول وكفتنا سيطرة تفتيش دقيق... طالبوا بجناسي الكل واني ماعندي جنسية
نطيت شهادة الجنسية بدل الجنسية والحمدللة تمت على خير ....وصلنا للسليمانية ... فرحانة من كل كلبي ... مامصدكة صرت بأمان هنا ... خلص عمو حازم من المستحيل يوصلني او احد يساعدة ويوصلني الة ....
توزعنا بتكسيات كل 4 بتكسي ونتوجه للمطعم من المقرر راح نشتغل بي ...
وصلنا للمطعم بعد معاناة لان صادق مايعرف كوردي اضطر يتصل على شخص يعرفة كوردي ويحجي ويا السائق .... اني كلبي نار من شدة خوفي افكر ممكن ما يعرفون اسم المطعم ويرجعوني لكربلاء ! واكيد الحجية بعد ماتستقبلني وترجعني لعمو حازم بكل الطرق توصل اله ... افكاري جداً سلبية ... اخلق من ابسط شي مشكلة ودائماً اربط نهاية مشكلتي بعمو حازم ....
نزلنا للمطعم ....
اخذونا لغرفة ننتظر بيها المدير
بعدة ما موجود ...
مر وقت قليل ووصل المدير ...
فتح الباب ... باوعت علية .
طويل القامة ...شعرة ناعم وأسود ...عيونة مسحوبة ...حاجبة مجرور بطريقة تجنن .. صاحب وجه دائري ابيض .
باوعت جداً انيق ونظيف .. لابس قاط اسود .. ورباط زيتوني ...ساعتة تلفت النظر ...مااعرف كم سعرها ! شي اكيد سعرها ثمين ....
بقيت اباوع علية ... ماشايفة رجل بهذا الجمال والاناقة ..
من دخل عطر احتل المكان كلة ...
كلت بداخلي (( ياربي هذا شكد نظيف بشنو غاسل بقاصر ! ))
كعد عالمكتب مالتة ... باوع علينة ..
___ انتي الوجبة لوصلتنا من بغداد مو !
(( كلهم جاوبوا نعم ..بس اني فكرت مااجيت من بغداد خاف ميصير لازم اكلة الحقيقة ))
__ احنا اجينا من كربلاء
__ ميهم .... كلكم عرب اعتبركم من بغداد ..(( استغربت من يحجي ويانة مايباوع على وجوهنا ...شايلة قلم بأيدة ويشخبط على ورقة كدامة.... طريقتة كلامة ونظراتة وكعدتة توحي هو مغرور ومتعجرف ...))
(( قسم مكاناتنه للعمل ... قصم بهذا المطعم وقسم بمطعمهم الثاني وقسم اخر بأحد الكوفيات ايضاً وكلها تعود لصاحب هذا المطعم ...
...صادق عملة بمطعمهم الفرع الثاني مو وياية ..))
__شقق موجودة فوك المطعم هذا ومخصصة للبنات فقط كل ٣ بغرفة ... ومطعمنا الثاني شقق للولد
وهاي فلوس ..(( طلع لكل واحد 100 دولار وزعها علينة))
تشترون بيها ملابس للشغل تعرفون طبيعة شغلنا تحتاج اناقة ونظافة ولباقة بالكلام وسرعة وتركيز وابتسامة ما تغيب من وجهكم .... انتو راح تكونون عاملين بمطعم ميحتاج اشرحلكم شلون لازم تكونون لان شي طبيعي داخلين مطاعم وتعرفون شنو المطلوب ....بالاخص مطعمنا هذا فخم ونشتغل على أسمة من سنين طويلة وانتو راح تكون واجهة الة .... يلة اكتبوا اسمائكم بهاي الورقة و توكلوا هسه باجر تباشرون ..))
طلعنا من غرفة المدير ... ودعت صادق وراح لمكانة الجديد ..
صعدنا للغرف ... استأذنت ودخلت لاحد الغرف بيها بنات اثنين وسمحولي ادخل واسكن وياهم
رحمة .... بس سؤال
___ تفضلي
رحمة .... اذا اريد اشتري ملابس شلون وين السوك وشوكت اجيب
__ بس يصير اني اسألج سؤال
رحمة ..... تفضلي
__ انتي مقتنعة تشتغلين بهذا اللبس !! وبعدين شغلة ثانية شلون قبل المدير تعرفين ممنوع محجبة تشتغل هنا !
رحمة .... ليش بس ما كال ممنوع
__ لان ماانتبه ! مستحيل اذا ينتبه اكيد يطردج روحي تأكدي افضل ...
رحمة ..... شنو يطردني عفية اني محتاجة هذا الشغل
__ انزلي وتأكدي بنفسج علية بلغتج ...
((اخذت جنطتي من الجرباية ونزلت بسرعه ... شفت المدير يفتر بالمطعم ... تقربت علية .. ))
رحمة ....بس بدون زحمة ممكن أسالك سؤال !
___ اي ممكن تفضلي ..
رحمة ... اني مااقبل انزع الحجاب ليش قبلت تشغلي اذا ماتريدون محجبة البنية فوك كالتلي صدك تطردني باجر ! بس انت شفتني اني هاي ملابسي
* باوع علية بنظرة استغراب ..عرفت هو هسه شافني زين بهذا لبسي ومظهري ! فر أيدة .... ابتسم بأستهزاء بتك خد ....
اني اباوع عليه ومكسورة منتظرة كلمتة تحدد مصيري يااما ابقى اشتغل بهذا المطعم يااما انطرد واسكن بالشوارع وما اعرف شنو مصيري ..!
شتوقعون المدير وسيم راح يقبل يشغل رحمة وهي بهذاا لمنظر لو يطردها ؟ وشنو راح يصير .!!
يتبع البارت القادم ....
قراءة ممتعة يااحلى متابعات لاتنسون التصويت على هذا البارت والبارتات السابقة ومتابعة الحساب فضلاً وليس امراً ....