عافني يم الباب وراح
بيبي تباوع علية وتلطم ! كأني جايبة العار الهم ..
مااهتمت لوجهي كلة دم ! او عيني مورمة ومااكدر افتحها ! رجلي اعرج بيها من امشي وكأن الوجع رجع من جديد بعد ماضربني طه عليها ..كل هذا مايهمها
الي يهمها شي واحد .....!!!
__ ولججج عزة بعيني شكول لعمج حازم اذا يردي بيج رجعتيلنا مطلكة ! ولج والله يكتلج ..ليش خليتي يطلكج شصار احجيلي ياا المصايب
__تلوميني وتفكرين بأبنج ! بس تفكرين تسأليني شصار بيج وليش اجيتي بهذا حالج
__ ولج يمه تعرفين عمج ميتفاهم والله يكتلج خلاص مايبقيج دقيقة هنا
**عفتها تحجي ورحت للغرفة ... باوعت على اخواتي نايمات ... صفنت عليهم ونزلت دمعتي ... اجتي بيبي وراية كلش خايفة ..
__ روحي يم سعاد بنت خالتج مو تندلين بيتها ..
__ اي شعندي يمها هسه من الصباحيات
__ كومي روحي يمها بين ما نكول لعمج ونهدئة وترجعين هنا
__ مااروح خليني هنا وشيصير خلي يصير كافي تعبت مااخاف من الموت ! ياريت تموتوني ...
بيبي ضلت تخرمش بوجها من سمعتني احجي هيج ... لزمتني من ايدي وتتوسل بيه حتى اروح يم سعاد...
___ يله عيوني روحي فدوة لعينج .... يلة سويها لخاطري وتچفينا شر المشكلة ...هاج هاي كروة اخذيها وياج ...
( اخذت المستمسكات من جنطتي وهم حطتهم بكيس ولفتهم على خصري ....
__بقيهن وياج عيوني كلشي يصير ابد ماتذبيهن اذا انتي مو بيتج على لحظة يجي عمج ياخذج حتى ما تنسيهن
__ قصدج يجي يقتلني مو ؟
__ لااا يمة كولي ان شاءالله ميسوي شي
طلعت فلوس من جيب دشداشتها.... حطتها بأيدي واخذتني يم باب الحوش ... لاخر لحظة تتوسل بية اروح ...طلعت وبيبي سدت الباب وراية ..ما طلعت الشارع ليجي عمي من عندة ... رحت من جهة ثانية ...اخذت تكسي ورحت لبيت سعاد ...
دكيت الباب ما تفتحها ..
بقيت ربع ساعة او اكثر اني برة ..
سمعت صوت سعاد تكول منو ...
__ اني رحمة بنت خالتج خديجة
__ صدك جذب .(( فتحت سرگي الباب وضحكت ... حضنتني وهي ما مصدكة اجيت يمها ..باوعت علة وجهي شافتة مورم ...شافت عيوني بيها دموع ماسألتني حاولت تلطف الجو وتفتح موضوع ثاني ..)*
تعالي عيوني .. تفضلي هلة بيج والله ممصدكة
__ خاف كعدتكم من النوم
__ يمعودة عادي موزين حصلت شوفتج ..امشي الجهال نايمين بعدهم
__ شلونج اخبارج .. خالد شلونة
__ الحمدلله طلع للشغل بليل يجي واني والجهال نبقى وحدنا ...
__ سعاد اريد اكلج شي
__ كولي عيوني
__اني باقية يمج مااعرف لشكد بيبي دزتني لان صارت سالفة ..
__ كولي رحمة ! تره وضعج كلة مايطمن
__ باعي (( حجيتلها كلشي...ضلت تضربت على راسها وتبجي ..))
__ عزة بعينج يرحمة ولج شوكت ترتاحين عيوني انتي
__ مااعرف مامقسوملي ارتاح . حتى هذا المو رجال قبلت بي وتحملتة وفوك هذا شمرني وهو ابو الراهي .
__ اوووف اسكتي وخليها ...يعمري سهلة بلكي حازم هالمره تندم على السوا بيج ويجيج ندمان دمرج سودة عليه شوفي شصاير بيج عزة باعي الدم والزراك بچفنج ...تعاالي انطيج ثلج مرري علية
__ سعاد اني تعبت ماكو مكان بجسمي ماورم هسه
__اوووف حوبتج ماتروح يتيمة وربج يشوف
__ ونعم بالله.. (( مسحت دموعي ..سعاد نطتني قطع ثلج امررها فوك عيني ...وراحت تسوي ريوك ..))
__ يله رحوم هسة راح نسوي ريوك ... ولج والله مشتاقتلج .. مانكدر نجي عمج حازم وصل خبر للكل ممنوع احد يطب بيتكم
___ هو حقير مايريد احد يفوت بيتنا
___ اي والله دائماً نذكرج ...صدك نماء وامل ورونق وفروسي شلونهم
__ شفتهم نايمين ... تعرفين شكد مشتاقتلهم
___ حبيبتي سودة علية انتو ممتفاركين الله ليوفقك يحازم شسويت شعملت بحياتك ..
__ راح ازحمج بوجودج هنا
__يمعودة هذا بيتج صدك جذب هلة بيج شكد ماتبقين هلة بيج ...
__ اريد اساعدج خطية
__ دكعدي ولج انتي تعرجين منو ينطي كلبة يخليج تسوين شي ... اكعدي راح اسويلج ريوك معدل ماتنسي طول عمرج ...
___ هههههههه تمام راح اكعد مدللة هالمرة
(( كعدت بالمطبخ وسعاد تسوي ريوك ... بعد الريوك حبيت اساعدها مااحب اكعد واشوف غيري يشتغل او ما متعلمة على الدلال اشوفة هواية علية ...اصريت اغسل الصحون ... وهي راحت تنظف البيت وكعدت اطفالها حتى يتريكون ...يوم ممتع ونسيت كلشي ... عالم ثاني يم سعاد ... كل مكان بعيد عن حازم وزينة يكون لطيف وممتع ....
مر اليوم واحنا نضحك ونسولف ...
كملنا غداء..
نظفنا البيت ..
شربنا جاي
كل هذا واحنه نسولف لقاء من بعد سنين طويلة اكيد راح يكون محمل بالاخبار ... سألتها عن خوالي وخالاتي واطفالهم كلهم ....سعاد استمرت بنقل الاخبار عنهم فرداً فرداً
سعاد عجنت نجانة ..
والمغرب خبزنا..
احب هيج حياة هادئة او عوائل متصافية ..
اكثر شي مفتقدتة هاي الاجواء ....
عائلة متفاهمة ما تتمشكل كل شوية ..
محد يتنمر عالثاني وينتقص منة ..
محد يضرب الثاني
هاي اشياء بسيطة بس بالنسبة الي كانت امنية ...
رجع زوج سعاد من الشغل
سلمت علية
كانت سعاد موصيتة على سمك مشوي ..
مدينا السفرة واكلنا .
بعد العشاء سعاد راح تنظف المطبخ
واني احضر الشاي ..
كعدنا اني وسعاد وزوجها نشرب الشاي والجهال يمنا يلعبون ..
وسمعنا صوت ضربة قوية بالباب ..
كأن انفجار ! او اقتحام .... بهاي اللحظات توقعنا المليشيات دخلت للمنطقة وبتلك السنين طائفية والقتل عشوائي الشي الخطر الوحيد والاحتمال الاكبر عند كل صوت رصاصة او ضربة قوية نصرخ (( دخلت المليشيات ))
كلنا نصرخ ...
الاطفال خايفين ومتمسكين بأمهم وأبوهم .
حتى زوج سعاد يريد يطلع يشوف شكو مايكدر اطفالة لازمي حيل وزوجتة تتوسل بي مايطلع ..
راح يقفل باب الهول حتى ميدخلون وحسينا الباب اندفعت قوي ...
دخلوا اثنين ملثمين وبيدهم أسلحة ..
لزموني من أيدي حيل وطلعوني للسيارة .
صوتهم مو غريب علية ! سامعة هذا الصوت من قبل ..
بس لخوف مسيطر علية ماكدرت اركز زين واعرف منو هم ! ..
طلعوني للسيارة وصعدوني بيها
باوعت عمو حازم كاعد ...
بصق بوجهي ...ولزمني من زندي حيل وعصرها خلاني اعيط من الوجع ..
___ انتي الظاهر لايبة روحج على منيتج ... بسيطة ..
(( ضليت ابجي .. اتوسل بي ما يأذيني ..احجي ويا واكله والله بيبي دزتني ... ما يجاوبني ولا يرد علية ...كأنما مايسمعني ..بس السلاح بأيدة وموجهة على خاصرتي ...
تمشي السيارة ..
مسافة بعيدة مو لبيتنا واضح ماخذيني لمكان ثاني ...
اكيد راح يقتلني هالمرة 😭.
باوعت شارع بس بساتين واظلم ..
تقريباً 45 .دقيقة احنا بالسيارة.
اني ابجي وافكر شلون راح تكون الطريقة ليقتلني بيها !؟
راح احس بجسدي اذا طلعت روحي منة ...
خلص هاي نهايتي هذا الطريق المخيف يحيط بي النخل العالي والاشجار من كل جانب ...اكيد يريد يقتلني ويذبني هنا ...
وصلنا لمكان مااعرف وين مشايفتة قبل ...
دخلوا السيارة للبيت
كلبي صار يدك أسرع ..
احس راح يغمى علية من الخوف ...
نزلوني من السيارة ..
دخلوني من باب المطبخ فتح الباب ودفعني حيل وكعت للارض ...
سد الباب وراحوا لمكان ثاني ...
باوعت شفت امرأة كاعدة ويمها اطفالها 3 . واحد بحضنها والبقية يلعبون..
ابداً مااستغربت .. باوعت عليها ابتسمت ..
__ اهلاً وسهلاً حبيبتي هلة بيج ..
__ اني وين ! انتي منو ..وين اخذوني
__ هههههه كولي يالله شبيج
__ عفية شنو راح يسوولي
__ شكو منو وياج
__ راح يقتلوني مو
__ اشش لتكولين هيج ارتاحي انتي هنا يعني بأمان..
بهاي اللحظة اجة زوجها .قفل الباب الخارجية مال المطبخ ... اندار على زوجتة وكال ...
__ الامير يكول لان نحبسها وتقفل عليها اخذيها للغرفة...
__ خطية والله مبينة مسكينة وفقيرة ... خليها كاعدة هنا يمي ..
__ الكلام واحد ...[[ جاوبها بعصبية وبطريقة جافة وحادة هي سكتت هزت براسها يعني صار ...طلع زوجها من المطبخ ...باوعت علية ))
__ لتزعلين حبيبتي والله هسه اسويلج اكل واجيبة ليمج يله اخذج للغرفة كومي
__ مااريد كلشي ... راح اموت خايفة والله راح يموتوني ..
__ يمعودة طولي بالج ... ميريدون يكتلوج والله جاوبوج هنا حتى ترتاحين
__ منو يفكر براحتي ! تعرفين شكد شفت عذاب
__ احجيلي شبيج ويا الامير انتي من اي طائفة ! شصاير
__ يصير عمي
__ شنو
__ والله عمي اخو ابوية
__يا يمه عزة بعيني ....( كلش خافت ... بعدين حاولت تكون طبيعية حتى لا تزيد خوفي ... اخذتني للغرفة وكعدت يمي هي واطفالها تسولف وياية ...))
دخل زوجها ... هي فزت ونزلت ابنها الصغير من حضنها ..
__ شعندج كاعدة هنانه !
__ هااا هيج والله بس خطية البنية تخاف واسولف وياها شوية لعد وين اروح ..
(( كلها تعالي اكلج شغلة ....طلعت ورا ... اني بسرعة رحت ورا الباب وسمعتة يكلها ...
__ راح يكتلها الامير ورا العملية
__ خطية صغيرة البنية بعدها .. خايفة حيل
((من سمعت هذا كلامها ... ماضجت بالعكس .. معناها عندج وقت يا رحمة ... تكدرين تنقذين نفسج ... يله صيري سباعية كافي ضعف ... الحياة مرة وحدة نعيشها لازم احاول حتى ابقى عايشة ليش استسلم لعمو حازم القذر المجرم ...
رجعت كعدت بمكاني بسرعة ... حتى الاطفال يباوعون علية ويضحكون ...رجعت المرة وتباوعلي بنظرة شفقة ...))
__ يصير اروح اتوضى ؟
__ لا عفية والله رجلي هنا يطلع واخذج للحمام ميقبل واالله
(( اووفف هاي مو خوش فكرة ..توقعت من اكولها اتوضئ راح تحن علية وتاخذني لان هي كانت تعرف هاي ساعاتي الاخيرة ..))
__ اريد اصلي... واعبد الله ..احس محتاجة اتجه لربي هسه
__ والله يحبيبة مااكدر.... هسه راح يطلعون واخذج فدوة لعينج ...يله اترخص اخذ جهالي انومهم ميسهرون اكثر .... (( طلعت وقفلت الباب وراها ... بقيت كاعدة للفجر وهي ماكو ... اذني يم الباب بس اريدها تجي ... بعد الاذان سمعت صوت برة ...دكيت الباب وصحتلها ..))
__حبابة فتحي الباب اريد اروح للتواليت
(( ماكو رد ...اني جنت اسمع صوت برة اكيد هي موجودة ...رجعت دكيتها مرة ثانية ))
__ افتحيلي الباب صار الاذان اريد اصلي فدوة .
(( يلة رحمة كوني قوية ... دافعي عن حياتج ... لازم اهرب منا باسرع وقت ... خلص انقذي نفسج ...))
بقيت ادك الباب واصيح عليها
بعد وقت اجتي وحجت وياية من ورا الباب تخاف تفتحها ..
__ عيوني والله مااكدر افتح الباب زوجي مايقبل طالع ويا الامير بعملية ومامعلوم شوكت يرجع باي لحظة يطب
__ عفية تفهميني لو لا .... محصورة اريد اروح للتواليت
__ والله لو بيدي مااسوي هيج اعذريني والله مااكدر
__ ترضيها تتأخر صلاتي... ومحصورة كلش احس مثانتي راح تنفجر ..
__ فدوة لعينج لتكسرين كلبي والله مو بأيدي..
__ يله حبابة بداعة جهالج ..
__ باعي راح افتحلج الباب واخذج للحمام بس لتكولين لزوجي الله عليج اذا يجي لتحجين شي ابد
__ خية لتخافين مستحيل اسوي شي يضرج والله
__ ماشي ..( فتحت الباب .. اخذتني للحمام .... بقت ورا الباب جنت اشوف دشداشتها من جوة الباب واضحة .... ))
اجيب ابني واجيج دقيقة
اني سمعتها كالت هيج ...حسيت هسه صار وقت انهزم ....
يله هاي فرصتج الذهبية يا رحمة . بقيت البوري مفتوح ...فتحت الباب علكيف وباوعت يسرى ويمنى محد اكو ..... طلعت ركض .....
ركض فتحت باب المطبخ وطلعت للطرمة .
شلت شحاطة المرة بأيدي وطلعت ركض للشارع فتحت السركي بسرعة .... وطلعت مشيت افرع هواية ابتعدت عن بيتهم ..
مااعرف وين جاي اروح ..
منطقة جديدة علية ماشايفتها قبل ..
صرت كوة اتنفس من كد ما تعبت ورغم هذا ما وكفت اركض بالشوارع الفجر حتى ليشوفني هم يستغرب !
صادفتني وتكسي من بعيد ...
صرت كدامة ولوحت بأيدي ..
وكف السيارة ويباوع علية متعجب
حجيت ويا واني أنهت واتلفت من الخوف اتوقع راح اشوف عمو حازم كدامي يطلع من اي فرع
__ اخذني لكراج بغداد
__ شبيج يابة ....شتحجين وينج وين كراج بغداد
__ عمو ابوس رجلك اخذني لكراج بغداد
__ شيودينا يا عمو
__ اخذني الله يخليك ... فدوة ابوس رجلك بسرعة سويها لله
__ يله اصعدي امرنا لله ...
(( من صعدت بالسيارة كلش فرحاانة وكلبي هالمرة يدك سريع من السعادة مو من الخوف ....اباوع عالشوارع مامصدكة خلصت منهم .... اتلمس بأيدي معقولة خاف اني قتلوني وهاي روحي ترفرف حالياً .... ياربي الحمدلله والشكر مامصدكة ابد ...وصلنا لكراج بغداد .. من وصلني شافنة طايرة من الفرحة ..ضحك وكال يله انزلي عمو هذا كراج بغداد ...
__شافني امد ايدي بجيب الصاية
__ روحي عمو مسويها لله مااريد كروة
نزلت من السيارة والدنيا كلها تضحكلي ... سمعت واحد واكف يم كية ويصيح نفر بغداد ...نفر بغداد وطالع ... نفر بغداد ....
احس كلشي وياية ويمشي بصالحي ...
نفر واحد وتطلع الكية ماراح انتظر ابد ...
رحت ركض وصعدت بالسيارة ...
كعدت يمي بنية ...
هي صارت يم الجامة
واني يمها ..
__ يبنية ..عادي اكعد يم الجامة احبها
__ يبو عفية شيكومني
__ كومي حبابة يلة
__يلة تعالي ..
(( كعدت يم الجامة ...تضحك بصوت ماكدرت اكتم فرحتي ...لزمت ايدي معقولة اني كاعدة هنا وانكتبلي عمر جديد.... مرة ثانية فكرت هاي روحي اكيد مو اني ... لزمت رجلي كرصتها حيل ... البنية وامها أمراة كبير بالعمر يباوعون علية ..او منتبهين الي شكد فرحانة ومامصدكة ))
الحجية .. هههههههه شبيج يمه چنچ اول مرة رايحة لبغداد ...
(( باوعت عليها ... اجتني خوفة قوية ... توقعت هاي عمي دازها ....سكتت رجعت ضحكت وسألتني مرة ثانية ))
الحجية ... هههههههه من وين انتي يمة من ديالى مو
رحمة .... اي خالة
الحجية ... منو جاي وياج
رحمة ..... اجيت وحدي
الحجية... يا يمة ! بنية شابة تجين وحدج ليش
رحمة ... عندي شغل هنا
الحجية ....شغليش هذا يخلي اهل يدزون بنتهم حديثة وحدها لبغداد ...
( سكتت ما جاوبتها ..درت وجهي اباوع من الجامة ... وكل شوية تفتح موضوع وياية... هاي المرأة كانت لطيفة بشكل لا يصدق ...وبشوشة ...تسأل هواية بس احس حتى اسألتها وتدخلاتها ما تغث المقابل بالعكس طبيعي كنت اتجاوب وياها وعادي .. سألتني من وين وشنو ت
عشيرتي وشكد عمري اسئلة سطحية عادية .... وصل بينا الحديث ..
___ اني يتيمة وماعندي اهل
__ مبين عليج حبيبتي ... وجهج شصاير بي واثر الضرب سودة علية بس الماعدها اهل هيج تتبهذل
___ ايي هذا شي بسيط يم الباقي العشتة
__ وهسه وين رايحة
__ مااعرف خالة تايهة
__ مااهدج مستحيل مااخليج تروحين وحدج وتضيعين يمة تره هالزمن الناس وحوش ابقيج وياية
__ يعني تاخذيني وياج ..
___ ايي بس هسه رايحة لبغداد واخذج وياية للكاظم
__ اي اروح وياج ... اريد احجي ويا حتى يساعدني
__ بس أنخي وشوفي شلون ينطيج مراداج ..
__ اريد احجي وياج ضروري تكدرين خالة تخليني اشوفة
__ ههههههه يمه تره هذا مزار الرايحيلة يعني امام ... مرقد مقدس مالته ورايحين نزوررة مو بشر يكعد كبالنة
__ شنو اني توقعتة شيخ عشيرة او شخص كبير وكلمتة مسموعة
(( ضحكت الحجية وبنتها هم ضلت تضحك ومستغربة شلون اني مااعرف الامام الكاظم ))
__ ودخيل بختة ميقصر ابو طلبة بس اطلبي منة مرادج وشوفي شلون يحل مشاكلج ...
(( فعلاً بهذا عمري كنت جاهلة لهواي اشياء ماعندي معرفة بيها ... بحكم عايشة داخل منطقة مغلقة على نفسها ... ما كنت اعرف ثقافات او عادات او تقاليد باقي المحافظات او الطوائف ...احس كلشي جديد علية ... حتى الناس الاشوفها بالشارع وجوها جديدة ... كلشي يختلف يا ناسسسس ماممصدكة ... هنا كلشي يختلف .. هواء ..البشرية .. اللهجة ... الملابس ... تعامل الناس ويا بعض ... ايقنت تماماً اني سابقاً عايشة بوسط بيئة قذرة مليئة بعديمي الرحمة .. متروسة قلوبهم حقد وقساوة ... اشوف الناس بشوارع بغداد مايشبهون عمو حازم ! او حتى ابوية ...
بديت اتستأل نفسي ! ليش ما صرت بنت واحد من ذولة الناس ....
شيصير لو اني ما نخلقت بذاك المكان ...
حطيت راسي عالجامة وصافنة .
افكر بحضي ؟
لو بمصيري المجهول ؟
او بحياتي لكدرت انقذها وازيد شحنها بالسنين بأخر لحظات
نزلت من الكية (( سيارة العبرية ))
الحجية لزمتني من ايدي وكالت يلة امشي وياية ... (( كانت تخاف لا اتركها ...)) صعدنا تكسي تاخذنا للأمام الكاظم ( عليه السلام )
اني صافنة طول الطريق ....
احس هاي لحظات الجاي اعيشها كلها اضافية ..
هدية من الخالق الي .
الحجية انتبهت علية وضربتني على فخذ رجلي ...
الحجية ....لا تصفنين يمة ... ومنتظ
رحمة ....صار خالة
الحجية ..... كلها بالتفصيل تحجيها ... كلبي مكسور عليج لازم اعرف شبيج وشنو قصتج
رحمة .... تمام خالة تدللين راح احجيلج كلشي
(( وصلنا للكاظمية ... نزلنا بعد مسافة نتمشى .. من اشوف ناس هواية ارتاح اكول حتى لو اجة عمو حازم هسه ماراح يشوفني بنص هاي العالم .... الله شلون لحظات حلوة هوايه عليه ممصدكة ....))
دخلنا الحجية تزور وتأخرت ساعتين او اكثر ...
بقينا اني وبنتها نسولف ماتركتني ابد متمسكة بية امها وصتها ماتعوفني بين ما تكمل زيارة ...
من طلعت الحجية كالت جوعانة امشن ناكل لفات .....
كنت فرحانة لاهتمامهم بية وتعاطفهم وياية
يمكن اول مرة بحياتي اشوف ناس تعاملني بهاي الطريقة !
طول حياتي واني انضرب واسمع ابشع الكلمات
( طاوة محتركة ... زريكة ... عبدة ...سودة ..))
كنت مستغربة الحجية وبنتها عاملوني بشكل طبيعي ماحسسوني اني سمرة وشكلي اقل من البسيط ...
كنت اتصور كل الناس تتنمر ..
اعتقدت ومااعرف ليش هاي صفة مشتركة بالبشرية كلها .يتنمرون على من هم اقل منهم جمالاً ..
كنت اشوف اقرب الناس الي يغثوني بهاي الكلمات بشكل متكرر ويومياً ... أمي ... ابوية ... ماراح اسامحهم هم اول من اطلق علية هاي الكلمات .. واول من سمح لنفسهم وللمحيطين بية يتنمرون والوضع طبيعي ...
كملنا أكل ....
الحجية كالت ..
__ يلة هسه خلص نرجع لأهلنا ...
من كالت هيج ... كلبي انقبض ... فكرت خلص راح يتركوني هنا وابقى وحدي وراح يجيني الليل سودة بوجهي وين راح اروح وين انطي وجهي ... كلتلها بطريقة تلقائية حتى مااعرف شلون حجيت هيج ..
__ يعني خلص راح تتركوني وتروحون ...
(( ضحكت الحجية ))
__ وين اتركج يمه رجلي على رجلج ويانة اليوم ... اخذج وياية .. يبنيتي هنا ذيابة تاكلج وتنهش بلحمج
__ اشكرج خالة ... ماتعرفين شكد نقذتيني ..
(( هسه اطمئنيت اكثر ....لكيت مكان استقر بي . مكان اكون بأمان بي ... راح اكدر انام براحتي .. اضحك من كل كلبي . خلص اني راح اكون بعيدة عن عمو حازم ... بديت اشوف الدنيا بلون ثاني ... كلشي صرت احس بطعمة حتى المي الأشربة ...رحنا للكراج وركبنا سيارات كربلاء ... اني اغفي طول الطريق جسدي انهلك من التعب ليلتين سابقة اني ما نايمة ...الحجية كل شوية وتسألني اجاوبها واني مغمضة عيني .. اخر كال حسيت بيها تكعد بية ..))
__ يلة اكعدي وصلنا يمة ...
سمعت بنتها تقربت عليها وتكللها ..
(( ماما انتي مكايلة لبابا شي ؟ خاف يتعارك ومايقبل ..))
_ اشش معليج .. خليها علية ..
بقينا يم الكراج تنتظر زوجها يجي .... تلمست الكيس بي مستمسكاتي بعدة بخصري .. اجتي سيارة من بعيد وطبكت يمنه ..طلع هذا زوج الحجية اجة ياخذنا من الكراج لبيتهم ... سلمت علية
__ السلام عليكم عمو
__ وعليكم السلام ورحمة الله وبركاته ..
صعدت الحجية وبنتها بالسيارة وصعدت اني هم ... زوجها انصدم او استغرب لان صعدت وياهم ...سأل زوجتة ..
__ البنت ويانه
__ اييي حجي ويانة
__هله بيها ...
اني ارتاحيت ... توقعت راج يطردني ومايريدني اروح وياهم ...
احساسي يكول انتي ثقيلة عليهم مامجبورين ناس يحيرون بيج ..وهذا الشعور رافقني طول مااني يمهم ولا لحظة تركني ...
وصلنا لبيتهم ... طبك السيارة يم الباب
اني استحيت افتح الباب وانزل ... الحجية باوعت علية ..
__ يله حبيبة انزلي هذا بيتنا شنو تريدين تبقين بالسيارة ههههههه
__ ههههه تمام ..
نزلت وكلش مستحية ! شنو شعورهم . اني زايدة عليهم ... فشلة يا رحمة راح تدخلين بيوت العالم ... حسبي الله ونعم الوكيل بيك يا عمو حازم ... اني ساكتة كدامهم ..بس بداخلي مااسكت اتكلم بأستمرار ..
دخلنا للبيت ... احس حتى بيوتهم ما تشبه بيوتنا ...
كلشي يختلف الانارة ...ريحة البخور ... المساحة ... طلاء الجدران ... شي احلى واجمل من بيوتنا ....
والشي الاجمل ضحكتهم ... لطافتهم ...ترحيبهم بية بضحكة ووجوه بشوشة تحسيها فعلاً فرحانة ...
الحجية .... تعالي ادخلي حبيبتي ...
(( دخلتني للغرفة الجوا ... اجني كل بناتها ورانا ويضحكن ..))
شوفي يمة هذني بناتي ... عندي 5 بنات وانتي صرتي السادسة
رحمة .... اتشرف اصير من اختهن
نرجس .... (( البنت الاكبر للحجية ))
شنو أسمج ..... اجتنة اخت جديدة ههههه
الحجية .... عوفن البنت هسه تعبانة خطية ... باجر تحجيلنا كلشي ..(( اني صح حجيت للحجية بس ما حجيت كلشي هي اصرت تحب تعرف كلشي بالتفصيل الممل ..))
رحمة .... اكيد .. بس هسه تعبانة عفية اريد اتحمم
الحجية .... يلة كومي يمة حضرن ملابس للبنية خلي تسبج وترتاح ..
رقية ..... اي هي بكدي راح انطيها من ملابسي ..
الحجية .... يلة بسرعه خلنها ترتاح خطية .. هسه تسبحين وترتاحين حبيبة ذاك الحمام تلكين بي شامبو ومكيف وصابون وشتحتاجين كولي ويجيبلج البنات ..
رحمة .... شكراً خالة .. (( اجتي رقية نطتني الدشداشة رحت للحمام ... طلعت المستمسكات خاف تتبلل حطيتهم على جهة ... فتحت الدوش وكعدت بالكاع ابجي بدون مااطلع صوت واحسسهم اني ابجي ...
وين وصل بية الحال ..
اني وين
معقولة هذا حلم لو حقيقة .
شديصير منو ذولة الناس .. اني وين . ... او اني منو ... شوصلني لهنا ...
شعور غريب صراحة ... او يمكن حاسين بهذا الشعور من اكون فجأة بوسط ناس مااعرفهم وادخل بيتهم والبس ملابسهم وانام وسطهم ...
أخواتي واخوية وين هسه شديسوون .!؟
شنو صار من عرف عمو حازم اني انهزمت ...!
نصف ساعة اني على نفس الكعدة والتفكير ..
احس فصلت عن الواقع .. سمعت الباب اندكت حسيت على روحي عززة اني هنا بيت الحجية وداخلة حمامهم ...
الحجية .... ها شو تأخرتي
رحمة .... ايي خالة هسه اطلع
سبحت بسرعة ...تقريباً ارتاحيت بعد البجي ... خلص انتي بأمان هسة ومحد يكدر يوصلج ... جنت أفرك شعري حيل بالشامبو واضحك .... فجأة ونزل شعور الطمئنينة على قلبي ... كملت ... نشفت جسمي ...لبست دشداشة رقية وطلعت ..شفتهم حاطين صينية العشة وينتظروني الحجية وبناتها ...
الحجية .... يله تعالي تعشي ويانة ..
رحمة .... مااشتهي خالة اكلوا الف عافية ..
الحجية ... تعالي لا تعاندين ننتظرج شنو ماتاكلين يلة حبيبة
رحمة ... صدكي مااريد شبعانة ...( اني جوعانة بس استحي اكعد اكل وياهم ... قنعتهم اني شبعانة كعدت على جهة وكلش مستحية ...غريبة بنصهم .. اخخ من الوقت لجبرني وفرضني على ناس غريبة عني ومااعرفها 😭 ))
جانت الحجية تسألني اسئلة طبيعية واجاوبها ... وبناتها يباعون علية ومستغربين من لهجتي ...
رحمة ..... خالة عفية نعسانة والله اريد انام وين انام مااكدر ابقى اكثر
الحجية ..... هههههههه ليش هيج تحجين .. تتوسلين علمود النومة يا يمة ... يله كومن افرشلها بغرفتجن ...
اخذوني لغرفتهم .... حطوا الفراش والمخدة ... اني كلش نعسانة وتعبانة يومين اني ما نايمة هلكت حتى من يسألوني مااعرف اجاوب ...مااسمع زين يسالوني سؤال اجاوب على موضوع ثاني ....
اول ما حطيت راسي على المخدة غفيت ...
بعد يوم صعب وطويل ومتعب ...
نامت رحمة البريئة ... حطت راسها على المخدة بمكان اول مرة تكون بي ... زمانها جبرها وفرض عليها تكون حياتها معقدة وصعبة وبعيدة عن اخوانها والبيت لكبرت وترعرعت بي ....
نمت جرة وحدة بدون مااكعد ولا اتحرك ...
حسيت الفجر على صوت البنات ...
يصلون ...
رفعت راسي .. اول شي لحظة ادراك اني وين ! منو ذني البنات .. شوصلني يمهم ... تذكرت كلشي .. كمت من الفراش ... استقبلوني بضحكة وكلمة حلوة ..
(( صباح الخير رحومة شنو هالنوم هذا هههههه))
رحمة .... صباح النور . هههههه وبعدني نعسانة ... بس عادي اريد اتوضة
نرجس ... اكيد عادي حبيبتي روحي
رحمة ... سويلي طريق خاف عمو موجود ..
نرجس ... ابوية كمل صلاتة ونام ...يلة روحي توضي ..
(( توضيت .... هسه استوعبت كلشي .. البارحه احس جنت فاقدة وفاصلة رسمياً مااعرف شنو سويت ... غسلت وجهي توضيت ورحت اصلي..
الشي الحلو بهاي العائلة متقبلين الطرف الثاني بكل اختلافاتة وطقوسة .. ومذهبة .. وصلاتة .. وكلامة ...
شافوني اصلي وصلاتي تختلف عنهم بحكم اختلاف الطوائف بس مااهتموا ولا سألوني ... توقعت هذا الشي راح يخليهم يضوجون من عندي ويغيرون من معاملتهم وياية ....بس هم بالعكس رجعن لفراشهن واني بقيت اصلي .. تذكرت البارحة ماصليت طول اليوم اي بمعنى فاتتني 5 فرائض ... صليتهم كلهم وكملت ورجعت لفراشي ...
مرة ثانية صفنت وافكر مرة ثانية بنفس الافكار
بس هالمرة احس بشعور راحة مو طبيعي ..
قلبي مطمئن من هاي العائلة ...
حاولت انام ماكدرت ..
بقيت اتكلب بفراشي اريد اكمل نومتي ما رهمت اني متعلمة اكعد من الصبح ماكدرت اتغير ابد ...
لحد 7 صباحاً اجتي الحجية
شافتني كاعدة ما نايمة ...
الحجية .... صباح الخير
رحمة .... صباح النور خالة شلونج اني كاعدة من وقت الصلاة
الحجية .... اي مبين يلة كومي نتريك ..
رحمة ... تمام خالة ..
(( سوينا ريوك اني وياها .. راحت الحجية تكعد بناتها .. اجوي بناتها كعدنا بالمطبخ داير ماداير الصينية ..))
الحجية .... هسه سولفي كلشي النا
رحمة .... بس (( باوعت على بناتها بمعنى خالة بيتي وبينج لان اعرف قصتي والصار وياية مو سهل ))
الحجية .... اطمئني حبيبة .. انتي هنا بأمان ومحد يكدر يوصلج .... ماكو رجال وعلية شاربة يكدر يوصلج .. احجي الي وللبنيات سر بيناتنة اطمئني نموت والسر يبقى ويانة ..وراح اكول للجيران هاي بنت اخوية جاية يمي يله عيوني احجيلنا ..
(( البنات هم طمنوني ... اوك خلص حجيتلهم كلشي صار وياية .. عمي زوجني غصب .. وزوجي ماتقربلي .. وطلكني ورجعني لاهلي وعمي يريد يقتلني لوما انهزم منة وانكتبلي عمر جديد ..كلهم تأثروا ... )
الحجية .... تمام يمة ... باعي ..ذني خواتج ..(( أشرت على بناتها ..)) واني امج هنا... اعتبر رب العالمين ناطيني 6 بنات مو 5 ...سرج سرنا .. من اليوم حالج حالنا بكلشي ... هذني اخواتج ... وانتن هاي اختجن الجديدة تحبنها وتشاركنها كلشي عدجن ..
أسماء ..... ماما اني كلش فرحانين بيها والله
نرجس ...هلة بيج رحمة .. بس ماما ...بابا شلون؟ حجيتيلة
الحجية .... معليجن بأبوجن حجيت ويا وعادي تفهم كلشي
نرجس ... بس انتي هسه عرفتي ويانة شوكت حجيتي لابوية
الحجية ..... ههههههه ولجن رحمة حجتلي البارحة بالكية شوية اسألها وتجاوبني المهم فهمت هي متعذبة شوفن شصاير بيها خطية طالعة من حلك الموت ...
نرجس... تمام طلعتي تعرفين كلشي قبلنة ههههههه اكول امي تحب تسأل فضولية مامعقولة ماعرفت شي هههههه
الحجية ..... هههههههه يلة كملن ريوك اني رايحة لام حميد اكعد يمها شوية بين ماروح للسوك تجين رحمة وياية
رحمة .... لا خالة حابة اكوم انظف واساعد البنات
الحجية .... دكعدي ارتاحي عوفي التنظيف اليوم ..
رحمة .... مااحب اكعد والله هههههه اكوم اغسل المواعين
(( نظفت وياهم .. الشي الحلو البنات مسوين جدول للتنظيف عكس اني وخواتي لتكعد قبل تسوي اي شغلة .... اتفقت وياهم يعيدون ترتيب جدولهم ويضيفوني وياهم ...
احلى شي بهاي الايام بالي مرتاح
اعرف اني بمكان أمين من المستحيل يوصلولي ويندلوني وين ...
مرت الايام .. وتعلقت ببيت الحجية اكثر
والبنات صاروا اخواتي ..
صارت الحجية تنطيني يومية 500 دينار مصرف يومي حالي حال بنات نشتري العصر ..
اني جنت اجمع مااحب اشتري شي ..
وصارت تاخذني للسوق وياها ...
تعلمت على منطقتهم وحياتهم ...
احلى مابيهم ماحسسوني اني اختلف عنهم بالشكل والبشرة .بالعكس محتضنيني والامر طبيعي بالنسبة الهم ...
جنت اخذ موبايل نرجس العب لعبة الحية بي وارجعة الها ..
الى ان اجة يوم ونرجس غيرت موبايلها واخذت موبايلها القديم ..
نرجس .... هاج موبايلي وبي شريحة هم لتخافين محد يتصل عليج لان محد يعرف رقمي ههههه
رحمة .... عادي مو مشكلة حبيبتي شكراً ماممصدكة صار عندي موبايل
نرجس .... شوفي تره جديد مابي شي والله بس اني جمعت مبلغ وحبيت اشتري غيرة ...
(( بقت تشرحلي شلون استخدمة بالتفصيل . اني اعرف بس اكو كم شغلة مااعرفها ضليت اسألها وتجاوبني ... واخيراً صار عندي موبايل اقضي وقتي بي ..))
بعد ايام من سكني يمهم لاحظت من اروح للسوق ويا الحجية اكو ولد عامل بمحل مال اقمشة يباوع علية واكثر من مرة يحاول يلفت انتباهي بكل الطرق ...اني صرت اتجاهلة ... الى ان اجة يوم ...
الحجية ... يلة امشي وياية للسوك اريد اشتري بردات جديدة للهول
رحمة ... اي خالة بس البس الصاية والحجاب
الحجية ...انتظرج ...(لبست صايتي والحجاب ... وكفت كدام المرايا واكول معقولة هم راح اشوف هذا الولد زين شعجبة بية ؟؟ وشيريد من عندي كل مرة اشوفة يسوي حركة بأيدة على أذنة يعني اتصلي علية ويحاول ينطيني قصاصة صغيرة مسدودة واني اتجاهلة مااخذها واسوي نفسي ماشفتة ...
رحمة ... يلة خاله
الحجية ..... يله يمة امشي ...(( الحجية صار تكول للجيران هاي بنت اخوية اجتي يمي ...الكل اقتنعت اني اقاربها وصار محد يسألها منو هاي رحمة ؟؟! ))
وصلنا للسوق وهم شفت الولد ..
راحت الحجية تختار القماش ..
تجرأ هالمرة وتقرب يمي وحط القصاصة بأيدي وراح ..
اني مااعرف شنو الدفعني اخذها وماارميها بالأرض ..
خفيتها بأيدي... وقررت اخذ رقمة ... صح كنت خايفة واحس شايلة جبل مو ورقة صغيرة ..شعور جديد وغريب لاول مرة .... رجعنا للبيت ....
اخذت الرقم وخزنتها بجهازي . ... ما كنت اعرف هذا الولد راح يساعدني ويغير مصير حياتي كلة ...
شتتوقعون ! شنو راح يكون مصير رحمة ومعقولة راح ترتاح من بعد هذا الكم من العذاب .....))
يتبع البارت القادم ...
فضلاً وليش أمراً تصويت على هذا البارت والبارتات السابقة ...
وترك تعليقاتكم اللطيفة على فقرات القصة ...."