الاطلس "دمليج أسود"

Part 3

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

• ━━━━━━❪♣❫━━━━━━ •

غصت دعاء بشهگتهه جريتهه بسرعة وكلني ارجف من السمعته، احتدت المناقشة بين الرجال وابوية بس دعاء فضحتنه اضطريت اسحبهه للغرفة واجر خواتي ويايه..

-دعاء: مررريم سمعتي!! ولج يردون يتاجرون بينه!!

-مريم: اششش اششش دعاء اششش الله يخليج بعدين نحجي

ماريد احجي كدام خواتي، اباوعلهن واقره الخوف بعيونهن رغم ما عرفن شصار بالضبط ولا شافن شي بس رجفة دعاء ورجفتي دليل واضح الشفناه والسمعناه طركاعة..

سحبت دعاء لصدري اسكتهه ورجع تردد بأذاني صوت الرجال وهو يكول "اني شراي وهذا سعر بناتك اربعتهم" بلعت ريگ ناشف ونفضت صوته من عقلي روحي ساحت من الفكرة.. لميت خواتي الباقيات لحضني اطمنهن آملة رجفة صوتي متفضحني..

-مريم: بنات شبيكم خايفين يروحي ماكو شي

-بسملة: اني سمعته مريم شنو يقصد هو يشترينه شلون يعني؟

-نور: مريم فهمينه

-مريم: يااا شوف ذني لا گلبي شنو يشترينه شهالحجي

-دعاء: مريم واذا ابوية وافق

همستهه بصوت مرعوب، گلبي نغزني وعيوني كامت تطلع نار ممتخيلة يخطر على بال دعاء هيجي شي شنو يبعينه بنات ليل احنه؟؟؟

-مريم: دعاء!! هاي عود انتِ الجبيرة من كل عقلج ابوية يبيعنه ولج شنو هالعقل الشايلته

-بسملة: صح صح ميسويهه بابا يحبنه

-نور: اي اتفق عيب نفكر هيج بأبونه هو ذاك ميستحي مو مريم مو؟؟

هزيت راسي مؤيدة، السؤال الوجيه والي حيرنه اني ودعاء هو شمعنه اجه لأبوية بالذات وشمعرفه ابوية محتاج فلوس وشلون عرفنه اربعة بنات؟!..

احتل الهدوء المكان محد نطق حرف الصدمة بلعتنه لساناتنه الي سمعناه چبير ومرعب، سمعنه صوت ابوية يرعد بالبيت يعيط كمت اشوف شصار وكمشو بيه خواتي يجون ورايه..

-احمد: گلت هسةة فهمتي هسسسة!!!

-ام مريم: يا رجال عيب ساعة عبرت العشرة ونص

-احمد: هسة تتصلين ببيت الاطلس وتكوليلهم احنه موافقين بااااجر يجون يعقدون قرانهه وياخذوهه فهمتيي

-مريم: ماما شصاير

-احمد: حضري روحج مريممم باجر زواجچ

-مريم: شلوون

-احمد: ماكووووو شلووون ماااااكووو لا تلاسنوووون

-ام مريم: اي غير نفتهم شبيك طلعت من الاستقبال تعيط منو هذا الاجه وشيريد؟؟

تخبل ابوية عيونه تگلبو وبقى يصيح هوايه ويغلط ويدوس بالحجي دفر صينية العشا الي بالكاع وتعده راح لغرفته، رادت امي تروح وراه وصحتلهه تجينه..

-مريم: ماما بابا شبي شنو باجر عرسي ليش احنه افتهمنه منو همه وشنو همه!!

-شمدريني ماعرف شكول للعالم شيحجون علينه هسة

-دعاء: شنو ما مصدكين ثاني يوم الخطبة تردون زواج!

-نور: عووع عووعع لعبت روحي شنو هالخربطة

-ام مريم: كااااافييي لا تثبرني خليني اروح افتهم من ابوچن شصار

-دعاء: اني اكلج شصار هذا الرجال اجه يريد يشترينه ماما

دگت صدرهه امي بقوة وبحلقت عيونهه ما مستوعبه، سكتنه ننتظرهه ترجع لوعيهه وكملت نور..

-نور: ماما هسة باعنه بابا لو لا غير نفتهم

-بسملة: وانتِ شبيچ تحجيهه عبالك مكيفة

-دعاء: الجفاف ليا مراحل واصل عندج نويرة

-نور: اي بلكت نشوف عالم دنيا نطلع من جحر الافاعي العايشين بي

-مريم: احنه افاعي!!

-ام مريم: وسممم ولجن شتكولن انتن شنو باعوكم شنو هالخرطط

-بسملة: والله يا يمة روحي شوفي رجلچ هو يحجيلج

كفخت امي بسملة على راسهه وعافتنه وراحت تركض لغرفتهه، كل وحدة رجعت لمكانهه واخذتنه السوالف والتحقيقات والتوقعات لغير عالم..

-نور: تخيلو نتفرق وكل وحدة تروح لمكان بعدما ابويه يبيعنه

-دعاء: نورررر تعرفين شنو يعني يبيعنه لو متعرفيننن

-نور: اي غير كلمن تعيش ببيت

-بسملة: اشتعل عمي وياهم صماخچ المحجر

-مريم: ياا والغسل انتِ وين عايشة

-دعاء: يا فهميه البيع يعني لو نصير خدامات لو بنات ليل!!

شهكت نور وياهه بسملة وگعدن على حيلهن صارن يلطمن على رجليهن وصدرهن وخدودهن ونور تصيح..

-عمت عينيي شرفي يضيع عمت عينيي

-بسملة: ياخذونه رقاصاات عمت عينيي

-نور: يله تحقق حلمج بسملة تحقق يبوووو

-بسملة: الله اي صح اتمنى اصير رقاصة

باوعن لبعضهن وماتن ضحك واني ودعاء صافنات عليهن ذني معقولة ممستوعبات خطورة الموضوع، مر وقت لا بأس بي وبسملة نامت على رجليه وسرحت بخيالهه تنهدت وكالت..

-بسملة: اني صح اتمنى اصير رقاصة بس عمري ماعنيتهه

-دعاء: الحمد لله من رجعتي لوعيچ

بعدنه دنسولف ودخلت امي لغرفتنه ماقبلت نسألهه على شي طمنتنه ان ابوية طرد الرجال الي عرض عليه فلوس وفوراً بدت بالتعليمات وشنو راح يصير..

-مرايم اتصلت ببيت الاطلس وحددو عقد القران والدخلة بنفس اليوم لان مستعجلين يردوهه اسبوع الجاي

-مريم: لا اكيد تشاقوووون

-ام مريم: ماعدهم وقت بنتي الرجال يريد يسافر ديلا مريم لا تعكرين الاجواء

اللتمو عليه خواتي يقنعوني واني قافلة، ليش كل هالاستعجال شنو ورانه، على الاقل خليني اتعرف على الرجال اكعد وياه احجي اشوف شنو اسلوبه منطقه ثقافته ليش هذا مو من حقي؟ مو كل بنية الهه حق بالشوفة الشرعية؟

-مريم: عوفكم مني هو شنو ميريد يشوفني يتعرف عليه بله طلعت مو ستايله بله مو نفس التفكير بله بيه عيب غيررر يجي يشوف بعيونه ماما اني ممرتاحة ممرتاااحة

-ام مريم: لا لا امه كالت شاف صورتج وعجبتي كلش

-مريم: ومنين جاب صورتي؟؟

-ابوج كال دزيلهم يشوفون حتى نختصر الشوفة

-مريم: ماما تره الشكل مو كلشي شبيهم ذوله

بعد مناوشات وكومة وقت اقتنعت بكلام امي وهي تكول ابوية راح يحجي ويه الولد ويلتقي وياه، صح استغربت لان اهل الولد ميقبلون نتشاوف والسبب گالو ابننا خجول واكتفى بصورة بس يله على الاقل ابوية ما راح يقبل يزوجني بياهو الچان.. لو راح يقبل؟...

بعد مرور خمسة ايام ابوية اللتقى بالرجال ورجع مذهول من اسلوبه وشخصيته وطموحاته وعقله، ضحكت من حچى بوسامته واكيد حچى بفلوسه على گولته يملكون مال قارون..

-نور: وهي متشوفه بله طلع ازرك وملثگ بالوصخ!

-ام مريم: لا ماتوقع ابوچ يكول عنه كلش حلو ومرتب

-دعاء: وانتِ تصدكين بحچي ابوية ماما تره هو حتى الضفدع يكول عن جماله اورپي

زفرت امي وطلعت من الغرفة تدردم وختمت نقاشنه من جابتلي صورة اله، ما عجبني الوضع واعترضت وحتى عيطت بعدم رضاتي بس عصبية ابوية خلتني اسكت واتقبل الامر الواقع..

جابتلي امي موبايلهه والضحكة شاگة وجهها وهي تكول..

-شوفي شوفي هذا الولد..

قدمت الجهاز ناحيتي واذا اشوف صورة "رجال وسيم لدرجة تخليكم تصفنون بملامحه" فتحت حلگهه دعاء وكالت بصيغة تضحك..

-دعاء: لاااااااا مستحححححححيل

-بسملة: اشتعل عميييييي

-ام مريم: مو كتلج مرايم ابوج مينطيج لياهو الجان هم حلو وهم مثقف وهم محترم شتردين اكثر يا امي

-مريم: اريد اشوفه بعيوني

-ام مريم: انتِ تعرفين ابوج حبابه لا تسويلنه سالفة

سكتت ما علقت مالي خلگ ابوية يرجع يعصب، هزيت راسي متقبله وذبيت نفس وكعدت على سريري گلبي مقبوض ومتضايقة بس اكيد خواتي ما عافوني واجت بسملة وبيدهه صينية وجدر وسوولي حفلة "توديع عزوبية" بطريقتهن..

مرت يومين ودزو اهل الاطلس النيشان والشبكة على گولة امه، انبهرنه بجمال كلشي چان مثالي وانيق يناسب حالتهم المادية وكشختهم، اخيراً اجه اليوم المنشود "يوم عرسي" من فارس الاحلام يمكن، نسيت كلشي وسلمت امري لله اني اثق بأبوية واثق بذوقه..

صحيت من النوم على لمسات امي، گمت على حيلي اباوعلهه واشوف وجهها مبتسم ودموع بعيونهه قبل لا احجي شي كالت وهي تكوم من فراشي..

-يله مرايم ناخذج للحمام المغربي

لحظات متنسي مليانة سعادة وفرح وهلاهل ورگص، تونست ونسة بحياتي كلهه ممتونسة هيج واهلي طايرين فرح.. بعدما خلصت من الحمام رجعت للبيت شفت مرة منتظرتنه بالبيت افتهمت هاي صالون دازيهه اهل الاطلس من المدينة حتى تمكيجني..

-بسملة: ايييي عيني شوف الدلال

ضحكت وضربت كتفهه، كعدت على الكرسي وبدت تشتغلي وكل شويه دعاء متدخله بالمكياج ورسمهه للحنة المغربية على ايدي، اختصاراً للصار طلعت اخبل لدرجة بقيت صافنة بالمراية مبهورة بالتسريحة والمكياج..

سألتني ام الصالون باللهجة المغربية عن عقد قراني وتفاجأت ان عقد القران والعرس بيوم واحد، ماستفسرت هوايه او بالاحرى اني مانطيتهه مجال لان اني حالي حالهه ماعرف شلون راح تصفى..

ضحكت ضحك ويه خواتي وتونست ونسة كلت الله يستر وراهه، لبستني امي بدلة العرس الخرافية ماعرف هي فعلاً هيج جميلة لو لان اني مشايفة هواي بدلات وهذا السبب دا انبهر بكلشي..

بعدني دا ارتب نفسي وانطرقت باب غرفتي سمحتلهم بالدخول وابتسمت من شفتهه ام الاطلس ووياهه غدير، افتهمت ابوية فاتحلهم الباب واحنه مندري هنا بالغرفة ملتهيات..

-حصة: الف الصلااااة والسلااااام عليك يا حبيب الله محمدددد كلللللللوووشش

الهلاهل والفرح الي بنبرة صوتهه زادتني سعادة بس غدير ماتغيرت ملامحهه واكفة على جهة ورافعة تك حاجب مبين معاجبهه شي..

عدلتني امه وطلعت من جنطتهه تخم اللماس حرفياً يخطف الانفاس ضحكت من شفته تذكرت قصص امي، بعدهه لبستني خاتم هم اللماس وكالت هذا ويه حلقتي الذهب، تشكرت امي منهه هواية واثناء حديثهم ابوية دگ باب الغرفة وگال.. 

-وصل الشيخ يا نساوين!

-ام الاطلس: يله جايين حجي جايين

طلعتني للصالة كعدتني على الكوشة البسيطة الي سونهه خواتي ابتسمت للمعازيم مو هوايه ينعدون على الاصابع وبين ما همه يرتبوني هي ترخصت وراحت للحمام وصاحت وياهه غدير، اجه ابوية حچى من الشباك اليفصل الصالة عن الاستقبال..

-يلة مرايم راح تعقدون بابا

حچت امي بفرحة واضحة..

-حجي تعال شويه نحاچيك

طلعلنه بوجه ميتفسر استغربنه حاله، سألته امي شبي وكال مابيه شي..

-ام مريم:الكل هنا حجي الكل وصل؟

-احمد: اء.. اي اي

-ام مريم: شصاير احمد شبيك؟

-احمد: ولاشي مريم من يسألج الشيخ بساع جاوبي لا تشلعين گلبهم مستعجلين الجماعة

هزيت راسي بهدوء بدون لا اتسائل عن ملامحه المعبسة بس امي ماخلته بحاله وجرته على جهة تسأل شبي، دار بيناتهم حديث بسيط وانتبهت لبسملة اذنهه يمهم، اشرتلهه تجيني وسوت حركة بيدهه بمعنى اوكفي..

شويه وامي خزرت مصدومة وباوعت لأبوية، كال ابوية بطريقة مستعجل وكأن ديبرر..

-اي اي مو صار عنده شغل ضروري

-ام مريم: عود صدك تحجي!

-احمد: كاافيي يعني حاصلتنلنه هيج قسمة وكاعدات تشرطننن

حچاهه بحس عالي حمدت الله وشكرته امه واخته مو يمنه، عافهه ورجع للاستقبال، رجعت أأشر لبسملة الي ظلت صافنه مستغربة اجت يمي وهمست بصوت ناصي بدون ما اسألهه..

-السيد الصغير مجاي

باوعتلهه وعگدت حاجبي مافهمت منو السيد الصغير، رجعت كالت بعدما بلعت ريگهه..

-الاطلس ما جاي

-مريم بهمس: شلون؟ شنو يعني؟

-بسملة: يعني ما جاي اصلاً للعرس

-مريم: يعني شنوووو

تدخلت امي واجت تركض ناحيتي تهدأني والضوجة مبينه على وجهها..

-ام مريم: صار عنده شغل ماما حبيبتي

-مريم: شنو شغل ماما شبيكم انتو شلون يعني لعد شجاب امه واخته؟! اني ليش لابسة بدلة العرس اصلاً!!!

-ام مريم: جاب وكيل بداله

باوعتلهه بغباء وداخلي محترگة حررگ ردت انفجر وگوة لزمت روحي خصوصاً من شفت امه واخته يتقدمون عليه، ماتحملت اسكت وحچيت بنرفزة..

-مريم: خالة ابنچ مو هنا؟؟

استغربت من نبرة صوتي وكالت بأبتسامة بشوشة..

-حصة: ايه، ههه شوي صارت عنده ظروف وسافر بره البلد

-مريم: شلون هيج شـ...

قاطع جملتي صوت الشيخ وهو يبدي بالعقد، ماعرف شلون افسر وضعي وحالتي الدمعة حاصرتهه بعيوني وراح انفجر بأي ثانية، بلعت ريگ وبلعت وياه غصتي بيه عيطة تفزز النايم بگبره..

باوعت لحالي لابسة فستان ناعم دانتيل ابيض كلشي مثالي بس داخلي ميته من القهر، حاولت اسيطر على ملامحي ماريد ابين ضايجة هذا يومي ولازم افرح مهما كانت الظروف اني راضية ومقتنعة مية بالمية بهذا الزواج وحابته وان شاء الله ارتاح بي..

بده الشيخ يعقدلنه ابتسمت واني اشوف نظرات امي وامه الفرحانة، حطو شال على راسي والقران بيدي اقره سورة "الفتح" واسمع للشيخ يردد كلام عن الزواج وبعدهه بده يسألني عن موافقتي..

بعد ثالث مرة رديت بـ "نعم انتَ وكيلي" وعلت الهلاهل من خواتي وامي والنسوان الوياهه عدى اخته غدير، نزلت راسي خجلانة وامي تبوسني وتباركلي وام الولد سوت نفس الشي..

فجأة الكل سكت من سمعنه الشيخ يحجي نيابة عن الاطلس وكأن ديعقد نيابة عنه، رجعت انكتمت والضوجة اعتلت ملامحي امي حاولت تسيطر على دموعهه وماكدرت واني شفتهه هيج لو انمردت روحي مرد وصرت ابچي وياهه..

من شافت امه الوضعية وشافت حالنه الي انقلب قلاب حچت وهي تبرر..

-حصة: اليوم الفجر سافر ابني لسبب مستعجل وعلساس يوصل بالوقت المناسب للعقد وما لحگ سودة عليه كلش زعل وانقهر بس بعد شنسوي

-دعاء: خالة لعد شلون تم العقد؟؟

-حصة: انطى الوكالة للشيخ ويعقد نيابة عنه لا تخافون مجهزين كلشي

-نور: ليش اكو هيج شي؟؟ هاي اول مرة اسمع الولد ينطي الوكالة لاحد ثاني

-غدير: كلشي يصير عدنه ارتاحي حبي

هزت امي براسهه واضح ما عاجبهه بس ما رادت تأذيني اكثر، گوموني ورحت لغرفتي ذبيت الشال من راسي واول كلمة عطتهه هي..

-مريم: شنو هاللعبان نفس!!!!

-نور: اشششش مريم امه واكفة برة والزلم هم

-مريم: بنات دتشوفون شديصير؟؟ شنو الموضوع لازم افتهم

بلحظة سريعة دخلت امي وكالت بصيغة مستعجلة..

-يلة مريم يردون يزفوچ

-مريم: ماما ما طايقة روحي انييي والله لوما العيب جان طردتهم منا

-ام مريم: ليش يا امي تصير هاي الحالات شيسوي الرجال اذا صارله ظرف

-دعاء: اويلي منك يلسانيي

-ام مريم: دعاء بلا لغوة زايدة يله مرايم يله يروحي امه كالت هو هناك بالمدينة يعني هناك تتلاكون همه ياخذوج اله

-مريم: ماريد اروح ماروح

زلغت امي خدهه بأظافرهه وكالت وهي تعض على شفتهه..

-ولج كومي شيخلصنه من ابوج كومي

رجعن يقنعوني وگوة لبست بسرعة متأفأفة وبداخلي مزعوجة كلش، باست امي خدي وكالت بصوت ناصي مليان حنية..

-ربي يسعدج يمة بنيتي ويفتحهه بوجهج وميضوگچ التعب والاذية

نزلت دمعتي وحضنتهه بقوة، شهكت بدون ماحس على روحي وصرت انحب وابچي وامي والبنات ويايه، صاحت بيه دعاء لان خربت مكياجي، حچت وهي تداهرني..

-ولج شنو رايحتله هيج يكول جابولي بومة تعالي نرتبج شويه

-مريم: الا اطلع هالدموع من عيونه خلي يصبرلي

-نور: هههههه اي عود نشوف مو اول متشوفي تتسرسحين

-مريم: وره ما اكمل تسرسح اطيح حظه

ضحكن وترست الهلاهل المكان، ودعت المعازيم كلهم غربة ماعدنه لا عمام ولا خوال هنا عايشين وحيدين فريدين..

اخيراً اجه دور وداع اهلي الحقيقي، شلعوني منهم بصعوبة واريد اسيطر على دموعي ماكدر، غمتنه امي وهي تمسح بدموعهه وتكول..

-باع المخاطين ولچن فشلتنه

-دعاء: ميخالف ماما تحملينه شوية

-مريم: ماما خليني اخذ دعاوي ويايه حبابه

-ام مريم: اي نيموهه بنصكم امشي ولج

ضحكت دعاء بين دموعهه وهي تحرك حواجبهه بخباثة وتكول..

-دعاء: اي اي حتى احضر كل السوالف

-مريم: ادبسزز يا سوالف....

قطع كلامي دخول ام اطلس مبتسمة، حچت بأسلوبهه الراقي والنبرة الهادئة تستعجلني حتى اطلع گالت الطريق طويل..

دمعت وهستوني دا افتح البواري بعيني وحسيت بـ نور تقرصني من زندي وتعض شفه..

-كافي تبچين مرايم مو زين

-دعاء: دنچبي اصلاً مريم لازم تبچي دم دممم

-بسملة: ليش يمة عايفه كوكش جهال وراهه ورايحة تتزوج

سكتتهم امي وطلعتني، ودعت ابوية وما سكت لسانه وهو يدعيلي بالسعادة مسح على راسي وتشكر مني على هدوئي واحترامي لكلامه ولان ماسويت مشكلة بعد الصار، ركبت السيارة ولاحظت لمرة كاعدة بجانبي اول مرة اشوفهه، ابتسمت بوجهي ببشاشة وكالت بفرحة..

-يا هلا

امرأة بلون بشرة سمراء داكنة وعيون كبار شكلهه جميل بشكل، ملامحهه تأسر العيون رغم عمرهه الچبير الي ترسمه تجاعيد وجهها، ابتسمت واني اعدل الحجاب الي على راسي ورديت التحية..

-هلو خالة

-هههه يا بعد خالة، عروستنا الحلووة

نزلت راسي خجلانة لكن سرعان ما لزمت ايدية بين ايديهه الخشنة وكالت بعيون لامعة..

-سميني "نانا" راح اكون وياچ خطوة بخطوة مريم

هزيت راسي موافقة ورجعت انزله والافكار تلعب بعقلي..

گلبي مقموت وممرتاحة عصرت صدري حيل وافركه واقره المعوذات عسى اهدأ لكن ما هدأت بالخصوص واني انطلقت للمجهول، لحياة، لعادات، لمجتمع، لبيئة متشبهني، بيئة غيرتني وخلتني اخوض تجارب دمرتني واخذت من حيلي وعافيتي..

الطريق طويل ومتعب فعلاً بعدنه بنص الطريق ووگف السايق على صفحة، تسائلت نانا بحيرة..

-ها شو وكفت

صفن على الستيرن وصار يفرك بوجهه متوتر، رفعت الكبوس من وجهي مستغربة وضعه هذا شبي..

-نانا: محمود شبيك انتَ زين؟؟

-محمود: مو بيدي والله مو بيدي هددوني

-نانا: شنووو منو هددك شكو ولك احجيي

اللتفت بكل جسمه علينه وكال بعيون يترجانه حتى نسكت ومنحجي شي ونزل من السيارة، گلبي ماع ماحس بي بعد باوعت لنانا الي وجهها گام ينطي اللوان وعيونهه على السايق..

-مريم: شصاير وين باقي الزفة

-تيهم متعمد النذذذل

عاطت بصوت عالي وطلعت موبايلهه بسرعة اتصلت على شخص يددگ وميشيله اشوف اطرافهه ترجف من العصبية وتتوعد بنظرات عيونهه..

حطيت ايدي على صدري اداري دقات گلبي المجنونة وبالي انمسح من كلشي مدا افهم شديصير وشنو راح يصير، قاطع صفنتي للمجهول صوت نانا تحجي بنتر وتوعد..

-متفقين علينه ولد الكلبببب العروس ويااااي شلون تجازفون بينه شلوون... هسسةة تلگه حل والله اكلب الدنيا على روسهمم!!

سدت الاتصال وعيونهه ناطه ذبت نفس واللتفتت تباوعلي حجت بأبتسامة تحاول تطمني يمكن..

-هسة اتصلت راح يدزولنه غير سيارة

-هذا شبي السايق وليش وگفنه هنا نانا هذا طريق مقطووع منو الهدده شديصيرر

-لا بنتي لا يظل ببالج هذا يسولف بكيفه اني اللوي اذانه معليج انتِ

ظلت تهدأ بيه وتطمني وتمسح على ظهري وتقره ايات قرآنية، بعدنه على هالوضع وانضربت جامتهه حيل، جفلت من شفت رجال يدك على الجامة حيل لابس كفوف جلد اسود..

-مريم: عززه منوو هذااا

-لا تخافين ولج

فتحت الجامة مالتهه واشرتله شكو جاوبهه بسرعة..

-الشاف يكول ركبو وياي

ابتسمت نانا منتصرة وكأن هذا انتصار چبير وهمست شي جوه انفاسهه ماكدرت اذاني تلقطه، اشرتلي ننزل من السيارة وتتردد بأذني كلمة "شاف" شنو هاي شنو معناهه..

خطفت عيني للجهة الثانية من الشارع الفارغ لسايقنه القديم واذا اشوفه مچتف من قبل زلم ثنين ضخام وحاطين راسه بين ركباته وجبينه على الرصيف، صوته عالي وهو يبجي ويتوسل يعوفو ويردد "هددوني اخذهه مو بيدي"..

ما خلتني نانا اسمع ولا خلتني اركز وياه بسرعة جرتني ودخلتني لسيارة ثانية وداخلي يلطم من الخوف هذا شبي يبجي ومنو يهدد بي وياخذ منو؟؟؟

-نانا: مريم انتِ وياي مررريم

-هاا.. ها اي وياچ

-شبيچ سرحتي

-شنو صار منو هذا وين خالة حصة وغدير وليش ركبنه غير سيارة وذولة ليش مچتفين سايقنه؟؟

ابتسمت بدون لتجاوب وعصرت ايدي بين ايديهه بقوة، نفسي كامت تلعب وعيوني شخصت گلبي راح يوگف عن البعض احساسي يكول اكو شي غلط واحساسي ميخيب وفعلاً ما خاب.......

يتبع 💸....

• ━━━━━━❪♣❫━━━━━━ •

اني كاعدة بمكاني ومالي علاقة وگلبي يدگ من التوتر 🥲
حرفياً هذا عرس وزفة مينسون 🙁

نرجع ونكول ماردت انزل برتوت اليوم عندي خطار بس ياخي تخجلوني بتفاعلكم ما شاء الله احبكم وااايد 😩💖

التصويت مهم 🥹💖