قيود عشك الشيخ

قيد الخامس والعشرون

طلعونا من المستشفى ثاني يوم وايو بقت بالخدج جنت ابجي ما حابة اطلع واعوف بنيتي وحيدها

اجة ثقيف وابتسم::- اطلعي يروحي كم يوم ونجي انا وبنيتنا للبيت

نزلو دموعي::- راح يشربوها حليب وانا صدري يدر عليها ما اريد اطلع ثقيف ما اريد اريد بنيتي تطلع وياي

ابتسم وباس راسي::- وعد كم يوم وارجعلج انا وياها ماشي عمري?

هزيت راسي بتعب وانا كلبي عدها طلعت للبيت وانا دموعي تصب والحجية كلساع تسكت بية ما تقبل تكول انتي نفسة

العملية موتتني موت المها يضاهي الم الطلوك وجع يذبح اظرب ابر مسكن من يروح المفعول اظل افرفح من الالم

لحد 15 يوم صرت احسن من شلت الخياطات صح توجعني بالحركة والتعب بس اشوة وجع ينحمل ولا اول ايام الموت شفتة بعيوني

اليوم يجون ثقيف ويجيب بنيتنا وياه فرحانة كمت بواهس احظر روحي واطبخ الاكل اليحبة هو

مشتاقتلة ولهفانة ع بنيتي حيل جميلة اعترضت وكالت انا اساعدج ما قبلت وحدة تساعدني اريد كلشي انا اسوي

والحجية تصيح من الصالة::- خايبة زهيران دكعدي يمعودة عمليتج خايبة هسة يجي الشيخ ويشوفنج واكفة شيخلصنا

ابتسمت ع كلامها طبعا الشيخ جايب ذبايح ثنين وكلهن وزعهن ع فقرة من الصبح وايسر تكفل بالموضوع ويكول مرتي من هسة ساحلتني وانا اضحك علية

هدرت التمن باوعت للساعة ب10 ونص الصبح نفخت بملل يربي الساعة ما جاي تمشي

دخلت سبحت واخذت سمورة سبحتلها ومشطت الها وطلعتها

فاطمة دخلت بشهر السادس وبطنها حيل حيل جبيرة تحسها بشهر التاسع وكوة تكوم فهاي الفترة محد يخليها تشتغل

خلصت وخليت العطر وطلعت باوعت ب12 الا ربع

دخل ايسر فرحان ويضحك صاح::- اجة ابوي

طرت من الفرح اول ما دخل تقدمت اركض نسيت وجع العملية وشمرت روحي بحظنة وهو حظني ويضحك

باوعتلة ودنكت بست ايدة واخذ ايو من عندة وابوس بيها واشم بيها والحجية اطش جكليت ع روسنا

اية صرخت من كامت تجعر طبعا متعودة ع سمر هادئة ما شايفتلي هيج طفل شمرتها ع الحجية خايفة والدمعة بطرف عيني حجيت::- حجية شوفيها شبيها شو تصرخ

ابتسمت وحجت::- طبيعي يا يمة وبعدين البواجي زين للفرخة يكوي كليبها

ضليت اباوع الها بخوف تقدم الشيخ وحظن اكتافي رفعت راسي اباوعلة لان انا اطول من عندة::- صايرة حلوة ع امومة

ضحكت بخجل ودنكت راسي تقدم بدون لا احد ينتبه وعظ خدي دفعتة بهدوء وحجيت::- اكعد راحة

::- هو اليشوفج يكعد لا ولله ما يكعد مشتاقلج حيل ثنايا كلبي

ابتسمت رفعت راسها الحجية النا وكالت::- تعاي يمة رضعيها

هزيت راسي ورحت حتى ارضعها وسمر تفتر وراي وتباوع لاية بكل هدوء باوعتلها ودنكت بستها::- سمورة منو هاي

::- دادا

ضحكت::- هاي اختج

::- دادا

ضحكت مصرة ع دادا ع كولتها اية نامت بعد ما شبعتني خراميش عود الحجية مكمطتها وهي تعصر بروحها وتفلت نفسها من الكماط ما شايفه هيج طفلة وكحة ههه

طلعت لبرة وسمر وياي خليتها بحظني واشرت ع جدها ابو سلام::- منو هذا

::- ببه(بابا)

ثقيف::- وانا منو?

::- ببه

الكل ضحكو

سلام::- وانا سمورة منو انا??

::- ببه

ايسر::- وانا يا حلوه الحلوات?

ضحكت وبينت سنونها وصاحت::- ببه

ضحكو الكل كلهم تصيحلهم بابا وكل احنا تصيحلنا مامة سمورة مدللة ما اطيح من ايد واحد الكل بالبيت يحبها لا هادئة وما يطلع الها صوت عكس الاطفال البقية

اجة اثير لزمها من ايدها::- ثموره نلعب

ضحكو علية لان ما يكدر يكول سمورة بعدة صغيرة

هي رفعت راسها باوعتلي اشرتلها تروح وياه هي عمرها سنتين واربع اشهر راحو سوة يلعبون واصيل كاعد يباوع الهم من بعيد

تقربت من عندة وكتلة::- كوم العب وياهم

هز راسة وكال::- لا عمة انا زلمة جبير راح اسجل بالمدرسة خيولون ذولة صغار

ضحكت علية ودنكت بستة بخدة وهة دنك راسة خجلان مني ضحكت وعفتة ورحت بالمطبخ

بعدين اجو جماعة يباركون للشيخ راحو كلهم شوية واجة الشيخ وايسر وكفو بالباب مال المطبخ

بعدهم واكفين وسمعنا صوت طلق بسرعة انا دنكت لجوة وصرخت بخوف::- ثقيف لا تطلع عليك الله لا تطلع

ما سمعني طلع يركض هو وايسر واما اركض وراه وصلنا لنص الطارمة وتوقف الرمي

طلع يركض وانا كلبي ملاه الخوف دخلت لجوة الكل وجهم اصفر تلكتني الحجية تبجي وتلطم::- يمة راحو ولدي يمة عمت عيني يمة

كعدت مهدود حيلي حجيت::- محد،صارلة شي لا تخافون

سكتو بس الخوف بين ع وجوهم صرخت اية كمت الها مهدود حيلي رفعتها لحظني وبجيت جسمي كلة يرجف

صار صياح بالصالة نهد حيلي رادت اية توكع من ايدي ولزمتها وطلعت اركض

تجمدت بمكاني وانا اشوف سلام واكف وشايلة بنية ووجها محروك وجسمها هزيل لا ايد ولا رجل تحرك

صرخت ام سلام هو نزلها لجوة ع كاع وكام ينحب دخل ثقيف ونزل لمستواها وحجة::- بيها نبض كول شيلها بوية كوم انا ما اكدر اشيلها كوم

باوعت للبنية نص وجها محروك التفتت من الجهة الثانية واشوفها هاي سهى

منظرها قشعر جسمي من الخوف انطيت اية لفاطمة وركضت للحمام تقيئت شكو شي ب بطني

متت طلعت روحي كلما اتذكر منظرها صايرة جلد وعظم ونص من وجها محروك وملفوفة ب بطانية

رجلية ما كمت احس بيهن اندكت الباب وصوت فاطمة تبجي وتحجي وياي::- زهرة البت نطت من البواجي تعاي ليها راح اوكع انا

طلعت بسرعة اخذت فاطمة وصحت لسمر ودخلت لجوة بالغرفة اشهك وسمر ع بجيتي بجت وخافت خطية

انكسر خاطري عليها و مسحت دموعي وجريتها بستها ومسحت دموعها حاولت ابتسم بوجها جريتها للجرباية ونيمتها

اخذت اية وضليت اهز بيها وهي ع فرد بجية حسيت كلبها راح يوكف عاد كمت وكفت بيها وكمت اهز بيها منا لمن نامت طاحن ادية

خليتها بالكاروك وكعدت ع جرباية جسمي كل ينفض بخوف

غطيت سمورة عدل وطلعت لبرة ام سلام تبجي وتولول والحجية مكابلتها وتبجي

دخلت للمطبخ جميلة وفاطمة كاعدات حجيت::- راحو كلهم

هزت راسها جميلة وحجت::- الله ينتقم منة عادم البنية عدم الله ياخذك يا سرمد وين والله تطلع حوبتنا بيك

اول مرة جميلة تدعي علية وتحجي بكل حركة كلب ومقهورة حيل

دخل ايسر تلكيناه::- ها بشر

::- بسرعة جيبن بطانية ومخدة ولبسة الها الكلب اب الكلبة ذابها ولا قطعة لبسة ع جسمها هنا الوادم لفوها

شهكت جميلة وفاطمة راحت تجيب الغراض حجيت::- شنو الصار شنو جابها

::- محد شاف بس الحرس يكولون شخطت سيارة ونفتخت الباب ونذب شي منها تكول رفعنا سلاحنا ردنا نرمي كام هو يرمي

::- زين ما عرفو هو سرمد??

هز راسة وكال::- لا غريب مو هو الخنيث ما يتجرأ يدخل لهنا بعد غير نزرفة زرف بالشاجور وحق هو علي

سكتنا اجت فاطمة جابت الغراض و انطتهن هو اخذهن وراد يروح صحت وراه::- ايسر فدوة دير بالك خاف مراقبين البيت هاي انتبه

ابتسم وحجة::- اول مرة اشوف نسيبة تحب رجل بتها

ضحكت علي وهو راح ولله ايسر فلم بنص الضيم ويحشش دخلت لجوة

البيت كما هو منا لحد ساعة 11 بليل انا لا اكل ولا شرب دخلو كلهم وجايبين سهى

دخلوها بغرفة اهلها وطلعو حالتها يرثى لها

كعد ابو سلام يم باب الغرفة وكام ينحب بصوت يفجع الكلب الكل بالبيت كام يبجي ع دموعة. رجال جبير هضيمة تنزل دموعة ولله هضيمة

سكتة سلام وثقيف وبقو يصبرون بي بعدها كلمن راح لغرفتة دخلت للغرفة لكيت ثقيف منتهي رايح تعبان بشكل بحيث اول مرة اشوفة متمدد بملابسة

تقدمت ونزعتة الجواريب ورفعت ادية بديت افتح دكم دشداشتة وهو ساكن ما انطة ردة فعل

خلصت رفعت راسة ونزعتة الدشداشة وهاي ثاني مرة اشوف الحرك خليت ايدي علية فتح عيونة وكام يباوعلي عبالة تلعب روحي

الحرك من صدرة لحد بطني وكتوفة هم تنهدت ودنكت ع حرك بستة سرت رجفة بجسمة

تقربت دحست راسي بحظنة وحجيت::- احظني حيل

لماني بحظنة حيل دفنت راسي بركبتة وحجيت::- كلها فترة وكلشي يتصلح

سكت ما حجة وانا ع انفاسة نمت كعدت ع بواجي اية باوعت للساعة ب12 ونص بليل تنهدت وكمت اخذتها ارضعها

ثقيف جاي يصلي وهي كعدت صاحية وانا تعبانة كوة علية مفتحة عيوني

حللتها وتورطت نوب ما اعرف اكمطها وهي كامت تصرخ تريد تنام وما تنام الا بالكماط

وكف ثقيف حجة::- شبيها تبجي

حجيت وانا ارفعها واكوم من اهز بيها::- تريد كماط وانا ما اعرف اكمطها

::- وديها للحجية

::- نايمة ما تكدر خطية اليوم ضغطها وسكرها علكو من ورة الصار

جر حسرة واخذها من ايدي وكام يقرة قران وهي تصرخ خبصتنا خبص اندكت الباب فتحتها

لكيت جميلة بوجهي حجت::- مالها الفرخة تصرخ

::- تريد كماط وما اعرف اكمطها

::- جيبيها خية خل اكمطها

اخذتها من ثقيف وكمطتها ورضعتها ونامت نهد حيلي باوعت ساعة ب3 رجعت نمت ذبيت روحي للساعة ب 5 كعدت

خطية ثقيف جان وياها بالمستشفى لا نوم ولا راحة وهسة اجة هم سلبت راحتة وسمورة كلساع تكعد وترجع تنام من النعاس

عاد اخذتها وطلعت للصالة اهز بيها وهي تعصر بروحها طلعت اديها من الكماط ولا تكعد خبصت الجو خبص

انا نتبهت ع جميلة شلون تكمطها فحللتها ظلت تلعب وتلعب وما تمل وانا نعسانة وكلساع اريد انام وانا كاعدة

للسبعة كعدو كلهم وانا كمطتها رجعت نامت كعدت فاطمة شافتني عيوني حمر وما نايمة كالتلي رجعي نايمة هسة تكعد جميلة وتساعدني

انا ما قبلت خطية جميلة هم تعبت كمت اساعدها بالريوك تريكو صارت التعسة كمت ما اشوف ردت اروح انام كعدت اية

وضليت وياها ل12 راسي صدع لمن اخذتها جميلة نمت من ساعة بالوحدة للساعة ب 3 كعدتني اية تبجي تريد ترضع

كعدت كوة علية رضعتها وردتها تنام صاحية ضليت كاعدة وياها

وهيج مرن ايامي انا لا ليلي ليل ولا نهاري نهار الليل كلة انا ما انام ولا اشوف النوم تعبت حيل واية اذا بجت تخبصني خبص

ضعفت وراسي دوم ياذيني من قلة النوم والتعب والسهر

وبيوم جنت منشولة وراسي حيل يوجعني بداية ال10 بداية شتة

واية مسهرتني طبعا صار عمرها ست اشهر وهي ما تبطل كعداتها باللليل تسهرني الليل كلة وكبرت كامت تتنغوص علية

جنت شايلتها وهي تبجي مرضتها لا جوعانة ولا بيها شي بس هي هاي تتنغوض بشكل وعصبية وتبجي

وانا منا روحي رايحة بحيث نزلت ست كيلوات بهاي الست اشهر حيل ضعفت وانسليت سل

صرخت بيها بتعب::- اييييةة كاافيي تعااايي خللل ننااام

ابتليت ع عمري اصلا صوتي ما كان عالي بس تعبت وهي تتنغوص علية لا جوعانة لا مريضة لا بيها شي

كامت تصرخ كابلتها وكمت ابجي تعبت ولله حيلي مهدود هد

دخل ثقيف شافنا ثنينا نبجي ظل صافن ونوب احتار يسكت منو

هي شافتة وفتحت البوري وكامت تصرخ ونرفع باديها عود شيلني شالها يبوس بيها ويدغدغ بيها وهي تضحك

خلاها ع صدرة ويهز بيها لمن نامت ع اكتافة خلاها ع جرباية

طلعت حتى اشوف بنت فاطمة عمرها شهر طبعا فاطمة جابت بنية وسمتها ابتهال

وهم طبعها مثل طبع اية نحسة وبس تبجي وشالعة كلبها

دكيت الباب هدوء عفتهم لان خطية هم ما تنام بالليل من تكعد وتسهر وياها

نزلت لجوة لكيت جميلة جاي تحظر اكل لسهى كتلها عوفي لا تسوين اكل انا اسوي

خطية هي تعبانة البيت بقة بس عليها واحنا ملتهيات بهذني الشاذيات

المهم كملت الاكل واخذتة ورحت لغرفة سهى دخلت ورديت الباب ما سديتة

باوعتلها خطية سلام خذاها لدكتور وعالج الحروق الي بوجها بس بقن خدودها متشوهات وهذني الا عملية ما يصيرن بالعلاجات صح خافات بس هذنيج ياهن مبينات

رغم الكل سامحها ويحجون وياها طبيعي بس هي اعتزلت عن الكل ومن تحجي وي واحد ما ترفع عينها بعينة وكلما نطلب منها تحجيلنا الصار وياها ما تقبل تنهار بطريقة تخوف توصل بيها مرحلة تشلع بشعرها وتلطم

حظرت الها صينية اكل ورحت الها دكيت الباب مرة ومرتين ما اجاني صوتها تنهدت ودخلت لجوة

لكيتها كاعدة وصافنة بالفراغ دموعها تنزل بهدوء ع خدودها بس شافتني مسحتهن وعدلت كعدتها

تنهدت ابتسمت بوجها وخليت الصينية ع بالكاع وحجيت::- سويتلج شلون صينية تفتح النفس

باوعتلي ودارت وجها وحجت::- وما اريد شيليها

::- ليش تردين تفشليني ولله انا سويتها ليش مجاي تاكلين

سكتت اخذت الخاشوكة وكتلها::- راح اكل وياج ع واهس انتي هم اكلي

تنهدت واخذت الخاشوكة وكامت تاكل بكل هدوء بعد كل لكمة تغص وتشرب ماي ما اعرف شبيها

خلصت كمت شلت الصينية ردت اطلع جان تكول بخفوت::- شفت اخوج حسن

جمدت بمكاني صابتني الرجفة بحيث ما كدرت اسيطر ع نفسي وكعت الصينية مني وتكسرن الماعين

دموعي نزلو واخذو مسارهم لخدودي بعدني اريد احجي دخل ثقيف باوعلها وباوعلي راح باتجاها وحجة::- بوية سهاوي حبيبتي بنيتي وين تعرفين حسن اخوها شايفتة??!

هزت راسها بأي ودموعها تنزل تباوعلي وترجع تباوع الة تنهد وحجة::- اعرف المريتي بي صعب يا بوية وكل احنا وياج بس يا بنيتي ما نكدر نساعدج اذا ما تساعدين روحج

سكتت دنكت راسها اخذ اديها وباسهن وحجة::- احجيلنا شنو صار وياج علمود ياخذ جزاتة ما تردين سرمد ياخذ جزاتة هو قتل اخوج وخطفج وكتل اختج ما تردين تحاسبي

بجت بصوت ودنكت راسها ظلت بالنص ساعة تبجي بصوت ايس منها ثقيف وراد يكوم لزمت ايدة وحجت::- راح احجيلكم

ابتسم ودنك باس راسها وحجة::- احجي بوية

سهى::- جنت حيل خايفة وقلقة بعد ما عرفت هو متصاوب بضهرة وزهرة هي الي ضاربتة ما عرفت السبب بس حيل كرهت زهرة وهي سبق وحذرتني منه كل ظني تغار او تخبث علينا جان حبة عامي كلبي

بيوم جنت كاعدة اقرة عندي امتحان ودك الموبايل رفعة اصيل محد جاوب سداه اتصل مرة ثانية رفعتة امي ما حجو شي سدتة

الكل نام اتصلو مرة ثالثة كمت انا رديت::- ما تستحون تتصلون شتردون منو انتو??

::- سهى هاي انا سرمد لا تبينين تحجين وياي اخذي الموبايل لغرفتج بسرعة

بدون تفكير اخذت الموبايل الارضي لغرفتي وقفلتها وحجيت::- ها سرمد طمني شلون صرت ظل بالي يمك طول هذا الاسبوع الفات

حجة بسرعة مقاطعني::- عوفج من هل تسربت اكلج سهى انتي تحبيني??!!

استغربت من سؤالة بس ما ترددت اجاوبة::- اموت بيك حبيبي

::- بلوحدة بليل تجين وتلمين كلشي واذا عندج مبلغ جوة ايدج جيبي حتى ذهبج اخذي وياج

::- ليش شكو

::- جيبي وانا افهمج

::- ما عندي بس فلوس مهري الي انطيتو الي

::- جيبي وياج

::- جا ليش الم ملابسي خير جاي تخوفني

::- انتي تثقين بية

::- اي

::- ثقيف امرنا نطلع منا باسرع وقت وهو واخوج سلام بس لا تحجين

::- ليش ما احجي

::- راح تجبريني احجي كلشي

::- احجي لان بديت اخاف ولله شكو شصاير

::- زهرة اجتني بنص الليل بملابس النوم وطلبت مني ليلة وحدة منو رفضت رادت تنتقم مني بس انطيتها ضهري ضربتني

شهكت وحجيت::- شكد حقيرة وبلا اخلاق هي سبق وحذرتني منك الجلبة

::- اي والشيخ كشفها ووداها لهلها واهلها مصدكينها ويردون يقتلوني بحجة الشرف والشيخ طلب مني اخذج وابعد

::- هذا اليوم بليل اجيك

::- انتظرج براس الفرع

هيج انضحك ع عقلي ونعمت عيوني وطلعت وياه حجتها وشهكت بالبجي

تنهد ثقيف وحجة::- زين شلون تاكدي انا طالب من عندة تختفون ما حاولتي تسالين احد

::- انت جنت بالمستشفى فاقد وسلام جان ب بغداد يدور غ زهرة ما كدرت اسئل احد بيكم وهو وصاني ما احجي ل احد

بجت الشيخ جر حسرة وحجة::- كملي

::- صار موعد بالليل طلعت الة وسويت مثل ما كالي اخذت الذهب والمهر مالتي ورحنا

جنا ينتظرني بسيارتة صعدت وسلمت كلشي الة صعدنا ومشت بينا السيارة طلعت من العمارة كلها تقريبا ثلاث ساعات او اكثر هيج نمشي

وصلنا للمكان بنص صحراء مجهول تباوع ماكو اي بيت كمنا نمشي شوية تقريبا ربع ساعة وجان تبين البيوت وبين كل بيت و بيت مسافة كلش طويل بالسيارة البيت حيل متفرقة وبعيدة عن بعض

نزلنا يم بيت طابقين اول ما دخل الة باوعلي وابتسم وحجة::- وين ما تردين ترحين روحي

صفنت بوجه صدمني من ضحك وكال::- عمي شكد قشمر

تجمدت بكاعي وانا اباوعلة صعد لفوك صعدت وراه تعصبت وحاولت اعرف معنى كلامة وصارت بيناتنا كلام حاد لحد ما نهد علية بالضرب المبرح انتهيت جوة ايدة

بجيت حاولت استنجد باحد ما كدرت يوم عن يوم اكتشف حقارتة اكثر لحد ما فد يوم كل عادة حابسني بالطابق الثاني وهو غايب علية مدة اربع ايام وانا اربع ايام لا اكل ولا شرب البيت ما بي لا ثلاجة لا طباخ لا اي شي  البيت فارغ وانا خويت من الجوع

كمت بروح مسلوبة وحاولت افتح الباب والصدمني لاول مرة الباب يتركة مفتوح

بسرعة طلعت من البيت للباب الخارجية ماكو مقفولة كعدت ياسانة وابجي

سمعت صوت ونين كانو شخص جاي يبجي بس منين هذا الصوت مجاي اعرف

اتبعت هذا الصوت بخوف ودكات كلبي يرعدن وصلت يم حايط اختفة الصوت

رجعت خطواتي كلت احتمال يتهألي من المرض رجعت لكن قوة الصوت وصار نحيب

انفجعت وكمت ادور مصدر الصوت وطلعت بسسسرعة اركض للغرفة الثانية شفت بيها باب صغير حيل صغير

كلما اتقرب يزيد الصوت تقربت وادية ترجف فتحت الباب وتجمدت رجلية وانا اشوف........يتبع

الـنـهـايـة 🌚❤️

الكاتبة شوك 🧚‍♂️❤️

الفاتحة ع روح المرحوم عبد ابن هدية يرحمكم الله💔💔

اقرو الفاتحة واهدوها لروحة واكون ممنونة منجن 💔

حسابي الانستا ❤️

قناة التليكرام نشرت بيها تغشوشات ❤️