نبدأ بذكر الله ﷽🤎✨
اسكوبار
بارت 11
ميان أل مالكي
قراءة ممتعة
🚫لا تنسون التصويت والتعليق بين الفقرات حبايبي..
.
.
أحببتكِ مرة واحدة، لكنها للأبد.
.
.
ابوج باعج ألي الأسبوع الجاي زواجنا
هل كلماته خلتني بحالة صدمة وشلل
كامل لجسمي وعقلي وكل تفكيري
وكفت اباوع علي يقابلني بإبتسامة
مختلة همست من بين اسناني
ديار :- شكاعد تمسلت انتَ؟
باهر - للأسف كلامي حقيقي
ديار :- شنو باعوني الك سلعة اني
تنباع ؟
اصلآ بابا مستحيل يسويها يمكن ماما
تسويها لأن ما تحبني بس بابا
مستحيل
باهر - هو اصـلآ ما يحبج
ديار :- هسه اشوف كلامك صح او لا
نطيته ضهري اريد اروح اسأل بابا
لزمني من ايدي جراني ناحيته بقوة
شهكت خازرته
ابتسم واردف بتهكم
باهر - اذا هسه تفتحين هل موضوع
وي ابوج احتمال يزوجج بهل لحظة
ما ينتظر لباجر
نصيحة مني من ينجمعون اهلج وحدهم
سوا بغرفة او بصالة اوكفي انتِ بمكان
تكدرين تسمعين كلامهم
راح تعرفين امور هوااي اسرار
خطيرة وانه اشوف تعرفين من القريب
احسن من الغريب مو صح ؟؟
ديار :- انه اشوف لو تروح من بيتنا
احسن
باهـر - رايح بس ما راح تتخلصين
مني للأبد !
تركته ودخلت للبيت كل جسمي يرجف
حرفيآ خوف وتوتر كلامه ما يروح
من بالـي
هو دخل وراي اسمع كلامه وي بابا
اجيت ادخل غرفتي نجريت من ايدي
هل مرا أحمد
نترت ايدي خازرته واحجي بعصبية
ديار :- شكوو كل شوي واحد جارني
احمد - شيريد منج هذا ؟؟
ديار :- اخر واحد يحقلة يدخل
بحياتي فاهم لو لا
احمد - اخ
ديار :- اعرففف هسه تكلي اخوج
انه ومن حقلي ادخل بس اكلك هل كلمتين
انتَ بنسبة الي صرت واحد غريب ما اعرفه
مو اخوية فهمت لو لا
احمد - شهل حجي هذا شبيج ؟
احجي عدل احسن الج دياار
رفعت حاجبي
ديار :- انه احجي الـ اريدة مالك
دخل بيه طالما اشوفه مناسب فـ ميحقلك
تدخل عاجبك اهلآ وسهلآ ما عاجبك
شايف هذا الحايط طك راسك
بي
احمد - وعلي ادوس على راسج ونعل
والديج هواي تجاوزتي بالكلام
ديار :- انتَ الـ بديت احمد لا تنسى
انتَ طحت من عيني وصرت ما اشوفك
اصلآ رجال
احمد - جنت سكران مو بوعيي
كل السويته والحجيته انه مو قصدي
ترا انتِ اختي نسيتي لو شنو
ديار :- انتَ غلطت بحقي ومو بسهولة
اكــدر اسامحك
قبل لا اسمع رده تركته ودخلت لغرفتي
سديت الباب بوجها كل حيلي
كلبي يدك سريعع خليت ايدي على كلبي
اتنفس بهمجية رفعت راسي للسماء
ديار :- يارب شكاعد يصير بحياتي
خايفة انه مو شوية او خوف عادي
لااا كلشش خايفة لدرجة ليلي كله ما نمته
حايرة شسوي
انهزم؟
طبعآ لا مو قبل ما اعرف حقيقة
كلامه
هل فعلآ اهلي مستعدين يفرطون بيه
في سبيل الفلوس ومصالحهم الشخصية ؟.
اكو أهل عدهم الجرأة يزوجون بناتهم
لشخص هيه ما تريدة !؟
صرت كل ما ينجمعون اهلي اصير ورا
الباب اسمع كلامهم
جنت اضوج من نفسي بس ما بيدي
حيلة صار الشك يراودني بكل مكان
عقلي افكارة متناقضة
حرب داخلي بس اريد جواب واحد
يقنعني بكلامه الغلط
العصر جنت توني نازلة من غرفتي
دورت البيت كله ما لكيت أحد
استغربت
بس ما حجيت شيء لليل رجعو بابا
وماما سلمو عادي وصعدو فوك
ما سألتهم وين جانو بس صعدو وسدو
الباب
ركضت بكل هدوءء اصعد الدرج
وكفت يم باب غرفتهم خليت راسي
على الباب استمع لكلامهم
انتصار - انتَ قنعها الولد خوش ولد
وين تلكى واحد مثلة فلوس وجمال
- الله كريم عود اكللها بس مو هسه
خلي يقرب موعد العقد احسن حتى
نخليها كدام الأمر الواقع
انتصار :- هواي منطيها اكبر من حجمها
نسيت منين جبتها ؟
- تبقى وحدة ربت عدنا سنين طويلة
ما نبت بكلبج ولو شوي حب تجاها ترا
هيه تحبج راح تتألم اذا تعرف بالحقيقة
انتصار - بس ما طلعت من رحمي
ابني احمد وبس حملته ابطني
دمي يمشي بدمه عكسها
طفلة ما نعرف اصلها من فصلها
واذا جانت بت زنــا لو حلال
- كااافي يا مره هوااي تكبرين الأمور
ماكدرت اسمع بعد شنو يحجون
حسيت بلحضتها مثل السجين ودخلتها
بكلبي
كلامها ما يروح من بالي
بت زنا او حلال !
يعني هسه انه مو بتهم !
ومو معروف اصلي من فصلي
ومنين جيت ومنو اهلي ؟؟
بكل هدوء رجعت لغرفتي اريد اصرخخ
اريد ابجيي لحد ما يخلصن دموعي
اريد ادك على وجهي لحد ما تختفي معالمه
حسيت نفسي عاجزة اسوي كل هذا
كل كلامه صح !
انه غريبه ما عايشة ابيت اهلي
الجنت اكلها ماما مو امي
والجنت اكله بابا مو ابوي
والأخ الجنت مفتخرة بي مو اخوي
اثبتولي بأفعالهم ان كلامهم صح
اخوي من حكه يتحرش بيه لأن مو اخوي
وهو يعرف
امي ال تكرهني من حكها لأن ما طلعت
من رحمها ودمها ما يمشي بدمي !
ابوي برغم سكوته عن هواي امور
انضلمت بيها اله الحك طلعت مو بته
على شنو يدافعلي ؟؟
ما بجيت
ما صرخت
ما لطمت
كل السويته لميت كم قطعة ملابس
ونتضرت بالغرفة لحد ما صار الليل
صافنه بغير عالم بلكي يطلع حلم
بس صوت عقارب الساعة يدل على
الحقيقة
بلعت ريكي حتى محد كال خل نشوفها
ميته عدله من العصر ما طلعت
سمعت صوتها العالي الي تمنيت اصير
خرسة وما اسمعه
انتصار - عشاءءء ديااار
بس هل كلمتين ضحكت حتى ما صعدت
انه شايفة الأمهات يدكون باب غرفت بناتهم
يسألون على صحتهم يومهم
تمسح على ضهرها تشجعها تكمل بالحياة
بس انه عكس والحمدلله عرفت الحقيقة
طول هل سنين ضامين عليه هل سر
جنت ادعي اعرف ليش هيج يعاملوني
والحمدلله عرفت وشي اكيد مستعدة
انام بالشارع ولا ابقى ابيت كل عمري جنت
ما مرحبه بي
جنت اكول اهلي شسوي يعني
بس هسه لااا اختلف كلشي طلعو
مو اهلي يحقلي اتصرف
كمت بس حتى محد يحس نزلت وكعدت
وياهم عادي اكل بس شني داخلي والله
احس نار وشتعلت بيه
شلووون كل هل سنين ياكلون
و يضحكون وهمه ضالميني !
حتى لو مو بتهم الحقيقية المفروض
ما يعاملوني بهل طريقة واذا جانو ما يحبوني
فـ ليش ربوني اصلآ ؟.
بلعت الغصة وسكتت اكل بهدوء
وكل شوي اعض شفتي حتى لا انفجر
بيهم
انتصار - اخر سنة الك شد حيلك حتى
تتخرج وافتخر بيك كدام الجيران
والناس
احمد :- ان شاءالله يمه لا تشيلين هم
انتصار - عفية بابني السبع
احمد - على طاري الدراسة ان شاءالله
السنه الجايه ديار ترجع مو ؟
رفعت راسي والدموع تجمعت بعيني
باوعت عليها صفنت بعيوني ورجعت
باوعت علي كايله بنبرة باردة
انتصار - الله كريم يمكن بعد سنه
ميته لو متزوجة ياهو يدري بالغيب
عيوني نطن من العصبية ما نطقت
بحرف صبرت
احمد - شهل حجي يمه ان شاءالله عمرها
طويل بعدين هيه وينها وين الزواج !
عمرها 18
انتصار - البارحة دخلت 19
احمد - مادري والله ع قبال المية سنة
ديورة
ماكدرت ابقى كاعدة بعد دفعت
الكرسي كل حيالي وكفت
غمضت عيوني اهدي بنفسي
منااااافقين
هيج ردت اصرخ بس كل عادة
بلعت لساني ردت هو يدخل على الأقل
احسه احسن منهم
بقى ساكت ما نطق بحرف
نزلت نضري الهم هامسه بصوت
خافت
ديار :- سـفرة دايمة
اجيت اصعد الدرج بس ستوقفني
صوته الهادء
- ما اكلـتي شيء !
رديت منطيته ضهري
ديار :- ما اشتهي
- بيج شيء ؟؟
ديار :- لا شكرآ ع السؤال
بابا
شمرت روحي على السرير داعسه
راسي بالمخدة
صرخت كل حيلي طلعت كلشي
داخلي من عواصف
بس بصمت محد سمع شيء
وشاف غير رب العالمين
بجيت اشهك وضرب براسي وشلع
شعري حرفيآ نجنيت
ياربي شنو سويت بحياتي حتى هيج
اتعاقب ؟
ضلمت
ضربت
كفرت
حقدت
كلهن ما سويتهن لعد ليش هيج
دا يصير بيه !
اختبار مثلآ ؟
بس هذا صعب اتحملة
صعب
احس بوجهي حااار من الدموع
مسحت عيوني بكفوف اديه
بقت بس الشهكة تـطلع مني
حتى بلاعيمي تجرحت
الله لا يسامحكم ولا يعفي عنكم
كسرتو كلبي دمرتو حياتي
هيج احجي بكلبي ماعرفت شلون
اتصرف وشنو ادعـي
بس بعز انكساري اخذت قراري !
كمت لفيت شال عندي على شعري
شلون ما جان دكيت على تبارك ما تجاوب
عضيت شفايفي بحيرة
جنطة كلش صغيرة خليت بيها بس
لبسه اذا حتاجيت اغير ملابسي ومبايلي
وياها كم فلس هذا الأخذته وياي
شمرت الجنطه من الشباك ونزلت بعد ما
تأكدت كل واحد بغرفته كاعد طلعت
بدون صوت
دموعي تنزل بصمت امسحهن بقوة
وينزلن مو بيدي ما صيطرت على دموعي
هنه ينزلن كل ما اتذكر المواقف العشتها
بهذا البيت
وكفت سيارة ونطيته عنوان بيت تبارك
ماكدرت اواجهم بالحقيقة خفت لا
يحبسوني
خفت لا يجبروني اتزوج بس حتى
يسترجعون سمعتهم وانه اروح فداء
لفلوسهم
طول الطريق دموعي تصب
حتى السايق استغرب سألني كم
مرا اكتفيت بالصمت او اهز راسي
لحد ما وصلنا نطيته الفلوس ونزلت
راح وبقيت بالشارع محتارة ادك عليها
ما تجاوب
ردت هيه تفتحلي الباب ماريد ادكه
بس ما جان بيدي غير هل حل
تمشيت ثواني سمعت صوت سيارة
جايه وراي درت وجهي بخوف
وكفت يمي سوده مضللة
بلعت ريكي من نزل منها نفس الشخص
باهـر !
فتحت عيوني بصدمة تراجعت بخوف
لورا تقدم عليه مبتسم عدل ملابسة
واردف بابتسامة خبيثة
باهر :- شتسوي الحلوة بالشارع بهل وقت
من الليل ؟؟
رجفت من نبرة صوته قويت نفسي
راده علي برفعة حاجب
ديار :- شعليكك ؟
روح منا لا اصرخ ولم عليك الوادم
ابتسم وتقدم اكثر شفتي ترجف
من الخوف ارجع خطوه هو يتقدم
خطوة
باهـر - صرخـي خلي اسمع صوتج
وأنتِ تصرخين
حجاها مبتسم غمزلي بطرف
عينه نيته خايسة مثلة بلعت ريك
ماعرف شسوي
ديار :- والله اسويها تـرا وصرخ
باهـر - اسمعج
ضغط عليه ماعرف ليش هيج عادي
عنده وانه هم فتحت حلكي اريد اصرخ
ما حسيت اله كمز عليه
مخلي ايد على شفايفي وايدة الثانية
ورا راسي جعصني على السياج فتحت عيوني
بصدمة
جسمه الضخم ضيع جسمي تمامآ
اثناء ما انه اتحـرك بعصبية همس
بأذني بخفوت
باهـر - سهلتي عليه مهمتـي
اخر كلامه سمعته منه قبل لا يضربني
على ركبتي بحركة سريعة منه اغمى عليه !
ماعرف شلون هيج بأصابع واحد ضغط على
ركبتي سببتلي اغمى كامل !
من كعدت حسيت نفسي عاجـزة عن الحركة
كأنما انشليت تمامآ !
عيوني تتجول على كل ركن موجود
وكل زاوية بهل غرفة
ماعرفت شنو اوصفها هل هيه غرفة
تبديل ملابس ؟
او غرفة نوم
او غرفة مكياج !
بيها كل ذني الشغلات بس بغرفة وحدة !
بمساعدة الحايط سندت جسمي عدلت
كعدتي امسح على راسي
مرورآ لرقبتي بللت طــرف لساني
حسيته خشبة على كد ما يابس جنت
جــوعانه و عطشانه
هدوءء ما اسٌـمع شيء خليت ايدي
على راسي ابجي بصمت فترة انفتح
الباب رفعت راسي
وأذا ببنية شابة وراها وحدة ثانية
لابسات مخصر على جسمهن و المكياج
واضح عليهن بس جميلات
تفاصيل اجسامهن واضحة وحدة قدمت
الي الأكل شعرها طويل وأسود يجنن
والثانية واكفه فوك راسي بس تباوع
شعرها كصير بس احلى دنكت عليه
رفعت راسي بيدها عقدت حاجبي
- ما راح تسألين انتِ وين؟
ومنو جابج هنا احنا منو وشنريد؟؟
هزيت الها راسي راده عليها بسرعة
ديار :- امبلا بس ثواني اشرب ماي
شربت الكلاص كله اخذت نفس
طوييل بعدها حجيت
ديار :- نمونه جايبه كلاص واحد
هذا حتى الطير ما يشبع منه
رفعت حاجبها
- تتشاقين صح ؟
ديار :- ليش عيني اتشاقه اعرفج
تعرفيني بس اكول الحقيقة يعني قابل
جذبـت
- هل مـرا الريس جايب وحدا مجنونة
ديار :- اريدد بعد مااي
- لو تموتين ونصي صوتج احسن الج
ديار :- يزيــد اعوذ بالله
فتحت عيونها دنكت اريد اخلي الكلاص
بالصينية ما حسيت اله ضربة على
خدي شعلته شعل بحيث حسيت نار
وشتعلت بوجهي
ماعرف من العصبية لو من الراجدي
باوعت عليها ناطة عيوني ضحكت
وستفزتني اكثر
منا انه كلبي محترك حرك اهد عليها
من شعرها وجرها صوبي واخذلي
عضة منها بخدها
ضلت ترافس وتصـرخ جواي ذيج
اباوعلها تضحك بس بسكوت
وكض شعرها اجرا كل حيلي وجان يجي
وياي
فتحت حلـكي عبالي شلعت شعرها والله
طلعت لابسة باروكة !
رفعت راسي الها تغلط وتفشر وتمسح
بخدها ما تدري بشعرها لمن
تحسست راسها
ماكدرت اكض روحي متت ضحك
خرب والله ضحكت من كل كلبي منظرها
يموت ضحك من شافت الباروكة بيدي
اخذتها مني لبستها بسرعة تغطي
كرعتها رفعت اصبعها تأشر عليه وتحجي
بعصبية
- بسيطة والله اذا ما خليتج
مضحكة للكل ما اطلع سندس
ديار :- قصدج سندانة بس ما بيها نبته
هههههه
خزرتني رفعت اديه
:- استغفرالله انه ما حب التنمر
بس مو بيدي انتِ بيج طن تنمر !
هسه كليلي انه وين ؟
- بجهنم ان شاءالله
:- اذا اكو هيج شكولات مثلج
فـ اكيد انه بجهنم
- موصين عليج المشكلة بس بسيطة
تصيرين بيدي واعرف شلون اتصرف
چلبة
ديار :- طلعوني منا ترا اشتكي عليكم
ضحكت
سندس - عيني انتِ بضيافة ريس باهر
لازم نضيفج عدل حتى ما تنسين
هل مكان بحياتج كله
ديار :- وداعتج انه عشاي ما اتذكرة
- سخيفة
ديار :- انتِ اكرع
ااقصد اسخف
خزرتني وطلعت اسمع قفـل الباب
دنكت مسحت خدودي وطكيتها بجيه
اكل وأبجي
ساعة اندب حضي ساعة اعاتب اهلي
صفنت مو أهلي ذوله
لازم ادور على أهلــي الحقيقيين
على الأقل اعرف ليش تركوني ليش
تخلو عني ؟؟
اتمنى اشوفهم حتى اعاتبهم لويش،
جابونـي للدنيا اذا ما يردوني ؟؟
بيومها نمت قـريب الصبح بمكان غريب
يمكن صار عـندي كلشي عادي وما يهمني
شي
انفتح الباب ودخلن مجموعة من البنات
بقيت اباوع بفضول عليهن شيسون ذني ؟!
كل وحدة دخلت باوعت عليه تتبسبس وي
الثانية اجن بملابس مستورة تقريبآ
ومن دخلن الغرفة هاي غيرن كلشي بيهن
كل وحدة لبست بدلة غير عن الثانية بس
الشي الأكيد هنه نفس العمل ونفس
القذارة
دخلت سندس تعلج صفكت بأيدها
كايله بنبرة عالية
- ع سريع باقي نص ساعة حتى نفتح
همن رواحجن بعد بيتي
ردت وحدة وهيه تخلي المكياج
- قليل نص ساعة ما نلحك
- لا تلحكين عيني تلحكين بس كون
تشتغلن ع سريع حركن جسمجن
كل وحدة ط*** صاير شكبرة
ضحكن و بكل وقاحة ردت وحدة
من الموجودات
- انه من اجيت جان هل كدودته
بسرعة كبر ما لحكت حتى اركب اصطناعي
- أي عيني طبيعـي يكبر يومية نايمتلج
وي واحد
- صلي على النبي عيني ترا العين
تصيب خصوصا عينج تصيب وما تخيب
- عليمن احسدج قابل العدج يختلف
كلنا نفس الشي
- ههههه لا بس اكــو احجام
ما تحملت حجيهن وكفت وحجيت
بعصبية ونفاذ صبر
ديار :- شهل تمضرط هذا كل وحدة تفتخر
بأخطائها تعرفن هذا كلامجن شكد تافه
وما بي ذرة أخـلاق
- ذرة مشوية لو مسلوكة
- ههههههاي
هزيت ايدي ومشيت اريد اطلع
دفعتني سندانة خزرتها وجسمي كله
يرجف ضحكت اطك بعلجها وتحجي
- وين عيني بعده سراج ما وصل
ديار :- بعدي من طريقي هواي صبرت
عليج اريدد اطلععع
- انتِ هنا مخطوفة محبوسة بأمر
من ريس يعني جبير وكلمته مسموعة
اذا طلعتي كلنا نروح بيها مو بس انتِ عيني
استري علينا ورجعي لمكانج
ديار :- ريس عليج مو عليه وكليله
اذا هو فعلآ رجال خلي يواجهني
مو جابني هنا وختفى
- ان شاءالله عود اكله اذا تذكرت
هسه رجعي لمكانج
رجعت كعدت بمكاني راسي موتني
صداع قويي كمت اباوع عليهن كل وحدة
تساعد الثانية
تخلي مكياج تعدل ملابسها تسرح
شعرها تقدمت وحدا مني اعتقد هيه
خبيرة بالميكاج والبس كالت بتسأول
- سنداوة وهاي البسها لا ؟؟
ردت وعيونها عليه
- لا هـاي للعصر مخصوصة
- اممم خوش
لزمت قلبي يدك بقوة والله احس
حتى اصابع ايدي ورجليه يرجفن
صح اتضاهر بالقوة وغير مُبالية بس
داخلـي عكس
و فعلآ كلهن طلعن ورجعت انحبست
بالغـرفة مرا ثانية تنهدت خليت راسي
على الأرض مددت رجليه غمضت عيوني
مستسلمة لألم راسي والنوم القوي
بين النايمة والصاحية حسيت بريحة
شامتها من قبل مو غريبة عليه ولمسات
على وجهي مرورآ لرقبتي
فتحت عيوني بخمول شهكت مخترعة
عدلت كعدتي امسح على وجهي و رقبتي
بتقزز
باهـر - سمـعت تردين تشوفيني للأسف
عدي شغل تونـي تفرغت كلت اجي
اشوفج
مرتاحة بأقامتج ؟؟
ديار :- على فكرة شوفتك لو جانت النجاة
من الموت افضل الموت على أن اشوفك
بس مو بيدي شسوي اذا انتَ حبستني هنا
وشردت مثل المرة
باهـر - هوااي تعصبين على كيفج بالكلام
ترا حاليآ انتِ الخسرانة
ديار :- بس مو للأبـد
باهـر - شوفي يا روليـــت
انتِ بضيافة باهـر لا تشيلين هم راح
تتونسين هواااي
ديار :- أسمي ديار وشوف يا ذكر
انه مو مثل ذني الـ يلبسن ويركصن عادي
انه اشرف منهن
باهـر :- تتعودين بس على الأقل عصرونية
صغيرة مرا وحدة بس بعدها اطلعج
من هذا المكان
ديار :- انتَ خطفتني عبالك راح اسكتلك
اذا ما خليتك بالسجن فلا اطلع ديار
ابتسم شال ايده ربت على خدي
نترت ايده خازرته طلع جكارة ورثها زفر
انفاسة بوجهي
تقدم مني مسافة كلش قريبةة
رجعت جسمي للحايط مد ايده عت
شعري من ورا راسي
صرخـت بألم لزمه بقوة الدموع تجمعت
بعيوني عضيت شفايفي قربني من وجها
ويحجي صــاك على سنونة
باهـر :- راح احرك گلبة عليج ههههه
راح اخلي يفور ومحد يطفي اخلي يصير
رماد وحده يتشعل ويطفى
اخـلي يدفع ثمن خيانته النا ونومنة
بالشارع بعد ما جنا نام بالسكن وراح
اخلي يدفع ثمن سنة من حياتي سجن
وخـلي يدفع ثمن تشردي من بيت
لبيت وبداية عذابي وأجرامي وسرقة
أحلامي
ههههه صح حققيت احلامي بس يبقى
ابالي هل مشهد ما ينمحي بيوم واكفين
تباوعون شلون الجيش يجرونا واحد
ورا الثاني
انه وبسام ودعلج كل واحـد بينا
اله حقد وكرة تجاهكم ما يبرد اله من
نشوفكم ذليلين جوه رجلينا
ادفع بي وحجي بألم
ديار :- شدا تحجيي والله ما دا افهم
عليك منو بسام منو دعلج يا سكن
يمكن انتَ مشتبه اخ شعريي
باهـر - شلون اشتبه بالعيون ذني ؟
متأكد مية بالمية لا تخافين
ترك شعري شهكت امسد علي و دموعي
تنزل بصمـت رفع راسي بيدة زفر اخر
نفس بوجهي
عيونه بعيوني اباوع علي بخوف
اول مرا اخاف منه من صدك جان شكلة
يخوف
وبحركة سريعة ضربني على وجهي
رجع عت شعري هامس بنبرة مخيفة
باهـر - تعرفين لو بسام هسه هنا
ههه يمكن تفقدين عذريتج بأقل من
نص ساعة
تفلت بوجها
ديار :- واحد مريــض
دا اكلك ماعرفكم منييين طلعتلي انتَ
باهـر - تعـلمي شلون تحترمين اسيادج
بس مو مشكلة تتعلمين شوي شوي
هسه اخليج براحتج وراج مشوار حافل
بـ الأجرام
غمزلي بطرف عينه لاعق شفته
بلعت ريــك ومسح بوجهي طلع
ضليت ادك على رجليه
وأبجي حرفيآ ما ضل براسي عقل
منو هذااا وليش هيج يعاملني منو
بسام حياتي كلها ما سامعة بهذا الأسم
قريب عليه
رجعت راسي للحايط دايـخة
الله لا يوفقك كون احس بوجهي نار
و دمــوعي تزيد الطين بله
ندمت ع ساعة الطلعت بيها من البيت
وندمت ع الساعة ال نزلت بيها وسلمت
علي جان لازم اعرف السالفة من يوم
ما حسيت بنضراتة عليه
بس شيفيد الندم وكع الفــاس بالراس
يمكن هسه همه يرتاحون مني او يمكن
يحجون عليه لأن خربت عليهم مخططاتهم
مر الــوقت أنه بنفس الغرفة ماكو اصوات
ما اسمع أي شيء لــدرجة اذا شمرت
الأبرة اسمعها
بين صفنتي و دموعي انفتح الباب
مسحت دموعي ع سريع درت وجهي
دخلن كل البنات الجانن موجودات الصبح
شيء تسبح وشي تبدل وأنه مكتفية
بالنـضرات تقدمت مني سندانه دنكت
لمستواي تحجي
- يله عيني دورج وصل لا تخافين
ثنينا ع المنصة سوية ادير بالي عليج
و ديرين بالج عليه
ديــار :- تاكليــن خرا احسن
- سماااح تعالي وياي ساعديني حتى
نحضرها باقــي ساعة بس
تحجي وعيونها عليه تتحداني بنضراتها
وانه هم نفسها اجتي وحده سمينه شوي
لزمتني من ايدي اليمين
و سندانه من ايدي اليسار جرني جر
للحمام اصرخ وعيط بعلو صوتي بس
ردت يتركنـــي ماكو
جلبن بيه تجلب وحده تنزع بمـلابسي
والثانية تفتح بالماي ما تحملت اكثر
صرخت بقهر وأحجي بصوت عالي
ديــار :- انه اسبححح بس عوفنييي
باوعت على سندانة هزت راسها طلعت
وهيه هم تفلت وراهن و كفت التقط
أنفاسي
اهفي على وجهــي اقاتل حتى لا تنزل
دمعة مني احس بعيوني صارن منتفخات
من البجي
سبحت رجعت على ملابسي وطلعت
جرتني هاي الـ تسوي مكياج وتنسق ملابس
- عيني ذبي ملابــسج مبللات لا
تتمرضين
ديــار :- ما عنــدي غيرهن
- اجتنا ملابــس مخصوص ألج
ديــار :- مخصوصة الي ؟
ليش عيني انه اميرة وزيرة
- ههههه لا هاي ولا هاي بس استاذ باهـر
اصر تلبسين الملابس ذني لأن هو ختارهن
اباوع عليهن بدلة رقص بيها وشاح
يغطي الوجه فقط العين تضهر
و باقي تفاصيل الجسم تقريبآ نص
جسمي يطلع
ديــار :- ملابس رقصة ذني !
- اي اعرف قابل ملابس بياعة خضرة
تردين تلبسيهن لو اخليلج مكياج اول ؟.
ديــار :- كل عقلج تردين مني البس
هيج مــلابس كدامج ؟
- انتِ تعرفين انو بعد تقريبآ ساعة راح
تصعدين على منصة الرقص ؟؟
ديــار :- بطرانات والله لو أموت او يسلخون
جــلدي هم ما البس
- همه عدهم طريقة غير تخليج تلبسين
ملابسج و تصعدين بّــدون أي حركة غلط
منج فـ الأفضل توافقين بدون مشاكل
اصرارج وعنادج راح يوديج بداهية
صدكيني
ديــار :- مااالبس كتلججج مستحيللل
رفعت اكتافها ساكته تركتــني وراحت
لغيري نص ساعة دخلت سندانة
شافتني كاعدة تسودنت
سندانة - اليوم يا انه يا انتِ صبريلي
ديار :- أعلى ما بخيلج اركبي
حجت وحدة من الموجودات
- الكلمة الأخيرة عليها علامة استفهام
شلت مقص موجود على الميز شمرته
عليها اجه برجلها ضلت تكمز وتفشر عليه
خــزرتها وبدلي اكوم اذبحها
انه وين وهيه وين بت النعال طلعت
سندانة دقايق وردت مبتسمة
سندانة - لزمنها بعد بيتي
جانن كلهن حقودات وكرهني لأن معادية
التمن فوكي يمكن بيهن ستة كل وحدة
يكول هايشة
ثنين لزمني من اديه ثبتني على الكرسي
وثنين فتحن ثغري و الباقيات
لازماتني حتى لا اتحرك حرفيآ حتى الهوة
ما دخل ريتي
بقيت اصرخ بس ما يطلع صوتي اتحرك
بس ما اتحرك اصلآ
وبكل سهولة دخلت حباية بثغري
وراها خلت ماي وسدت ثغري بيدها
رادفة بحقارة
- شربيها لا تخافين ما تسوي شيء بس
ادوخج شوي
ما وخرت ايدها لحــد ما شربتها
وتأكدت بدى مفعولها عليه تركني
مثل السكرانة اطوطح
اجي منا وارجع منا بسرعة لبستني
وخلتلي مكياج صفت يمي تهمس
بصوت خافت
- بعدج ما شايفة شيء مني
فعلآ هاي شيطانة طلعت اول وحدة
وراها طلعني امشي مدنكه من كثر ما
دايخة
جانن بنات هوااي وحدة منهم لزمتني
لحد ما وصلنا للمنصة اغانـي وأصوات
مزعجة امشي وأتعثر
جسمي يرجف اريد اشرد ارادة جواي
تحثني على الركض والهروب بس ماكدر
انه مشي يا دوب امشي دربي ما اشوفه
زين
صعدت على المنصة ساكته واكفه مثل الصنم
انه اصلآ ماعرف اركص رفعت راسي
اباوع بخوف
انواع الرجــال كل شخص عيونه فاضحتة
يباوعون علينا مثل السلع الرخيصة
معروضة للبيع
جان اكو مقاعد مخصصة بس للكبار
الشي الشفتة هواااي عليه جد تبارك هارون
و باهر كاعدين سوا !
يمهم نفس الشخص الشفته من اجتي
تبارك السايق مالتهم !.
كمت ارجف من الخوف والخجل
ماعرف شنو اتصرف مربطة دقائق
حجه هارون كلام بنسبة الي غريب
خلا باهـر والسايق واحد يباوع للثاني
بذهــول
اثناء ما همه صافنين على بعض شفت هارون
همس بأذن سندانة خلاها تهز راسها وتجمع
البنات طلعو من المنصة
هيه وصلت يمي ضربت كتفها بكتفي
وكعت بالكاع رفعت راسي اباوع عليها
اختفت هيه والبنات كلهن
صوت الموسيقى اختفـى بقى قليل من
الرجال اباوع بخوف
تقدم الأسمه باهـر صوبي كومني من ايدي
قربني منه وحجه بصوت عالي بي
مكر وخبث
باهـر - مو بس انه الوحيد هنا
اقدملك طفلتك المتمردة
روليــت
عيونه صارن عليه رمش عدت مرات بذهول
نزع مني الوشاح وبين وجهي
بس شاف وجهي بثانية وحدة بس ثانية وحدة
سحب سلاح بأدي الثنين واحد من ورا
ضهرة والثاني من شاب واكف يمه
وجها ناحية باهـر
خلاني كدامه هذا تخبل ضرب طلقة
فوك صاح بعلو صوته
اسكو :- وحــق من خلق السموات السبع
اكتلك ونتضرك بالجحيم
بااااهر لا تلعب وياي الحرب بينا
عوفهااا هيه ما دخلهااا
ضحـك ورد بستفزاز
باهـر :- هسه هيه صارت من املاكي
مو مثل قبل يعني تغير الوضع ودارت الدنيا
ما تكدر تسوي شيء حبيبي اما انه بيدي
كلشي حياتك وحياة
رولـّيت
حاولت اخلص روحي منه
اثناء ما احجي
ديار :- اسمييي ديااار مو روليــت
عوفوني بحااالي جدوو هارون انتَ بمثابة
جدو والله ساعدني انه صديقة تبارك
ديار تعرفني انتَ ساعــدني فدوة
بـقى ساكت ما نطق بحرف واحد تخبلت
بزايد ليش هيج دا يصير وياي ؟
اسكو :- واجهني برجولة عوفها تروح
ايدككك عنهاااا
باهـر - تؤ عصبيتك زايدة لا يطك الك
عرج وتموت حاليآ انتَ بنص بيتي
يعنـي بالمختصر المفيد اكدر انطي أوامر
اتخلص منك بطلقة وحدة
اسكو :- منتظرك هذا انه كدامك عوفها
وتعال نفذ كلامك
هارون - كافي يا ولدد احترمو وجودي
على الأقل تتعاركون على مود بنية !
اسكو :- انتَ شيطان اقسم بالله شيطان
على هيئة انسان كلشي كاعد يصير
بسببك
هارون - خلينا نروح منا افهمك بالطريق
اسكو :- خطوة وحدة ما اتحرك
باهـر - اظاهر عجبك المكان ؟
اسكو :- تلعب بالنار وأنتَ مو كدها !
عوفها تروح وخذني بدالها
باهـر - للأسف اول شي نحرك دمك عليها
بعدين اخذ روحك وروحها سوية حتى
ما تتعذبون بفراك واحد منكم وعد مني
اسكو :- اقسم بالله يا باهـر موتك على
أيــدي يصير
باهـر - انتظرك بفارغ الصبر
هارون - عامر اخذ سلاحك منه
و انتَ لازم تتعلم شلون تحافظ على هدوئك
وأعصابك
اسكو :- روليــت ترجع ويانا مستحيل اخليها
هنا
باهـر - ابوها المزيف باعها الي يعني هسه
هيه تخصني افهم هل كلام اطلع منا
قبل لا انطي خبر للحرس يجروك جر
تعصب حيلل صرخ ضارب راسه بالسلاح
خفيف حرفيآ صار نارر ما عرف ليش هيج
يسوي ؟؟
وبحركة ذكية منه بثانية وحدة ضرب طلقة
استقرت بيدة الازمني بيها باهـر
ركضو علي الأسمه عامر وهارون
اما باهـر يصرخ من الألم دخلو مجموعة
من الرجال مسلحين صاح عليهم باهـر
:- طلعوهم برااااا الحساب بعدة ما خلص
الي وياك هواي لقائات
صرخت لحد ما تعبت عليهم طلعو غصبآ
علي تمنيت لو كدر ياخذني مو مهم هو منو
وليش هيج حاروك روحه عليه اهم شي
يطلعني من هذا المكان
بس للأسف اول ما طلعو انضربت على
راسي شهكت وكعت بالكاع مغمى عليه
.
.
.
ضربت باب السيارة بكعب حذائي
نداريت علي خازرة دمي يفور مثل النار
رايح راجع
اسكو :- اقسم بالي رفع سابع سماء لدفعكم
الثمن غالي انه اسكووو ينلعب عليه
بسيطة
رفعت راسي ابتسمت دخلت جوا
امشي قابض على كف ايدي
عامر - الأنسة تبارك مفقودة
اسكو :- للجحيم انه شعلية
عامر - الأستاذ شاك بيك
اسكو :- هل مرا اشك ط*** وعلي
عامر - بلا كلام زايد روح لشقتك ارتاح
بعدين احجي من تهدأ
اسكو : شلووون اهدأ وهيه عد هذا الحقيررر
انه متأكد هو متفق ويا عليه ثنينهم متفقين
عليه حتى يحركون دمي عليها
عامر - تنحل لا تشيل هم
اسكو :- خلي ابالك اذا صار عليها شيء
اسويها دم للركب وأول واحد
بيناتهم هارون اخرب كلشي والله
عامر - اهدأ روح لشقتك لا تحجي
حجي انتَ ما تفهم معنى
سكتت خزرته ورحت للشقة
فتحت الباب بهمجية احس بنبضات كلبي
شوي شوي تختفي
اخذت نفس طويللل رفعت راسي
شفتها واكفه كدامي تباوع بخوف الدموع
بعيونها
تبارك :- انه سويت الـ كتلي علي هسه شنسوي ؟
ابتسمت بجنون تقدمت كم خطوة
طلعت سلاحي هامس بصوت خافت
اسكو :- الراح اسوي كل أتي
روحج مقابل
روح
.
.
روليــت
.
.
.
يتبــــــــــــع
هل مرا البارت طويل لحد تكول قصير !
ان شاءالله كل عام وانتم بخير
والله يرحم الأموات والأحياء اجمعين
قناتي التلي
🚫لا تنسون التصويت والتعليق بين الفقرات
مع ألف سلامة
الكاتبة ميان أل مالكي