قمت اليوم الثاني الظهر وأنا كلي كسل ,,, طالعت الساعه الحين هنتين أنش أصلي الظهر قبل ما تطوفني
تسبحت وتلبست كشخت شوي .. ونزلت عسب أتغدى .. شفت جواهر قاعده ,,
قلت لها : غريبه شاللي موعنج قبلي ..
جواهر وهي تاكل : ماشي بس ما ياني رقاد ،، اقربي ,,
قعدت يمبها وتميت آكل : والله البيت بدون الجوهره هب شي مول ..
جواهر : تخيلي الصبح شفت منوه ..؟
قلت لها : منووه ..؟
جواهر : ولد ييرانا ,,
قلت لها : ليكون هاااك اللي متخبله عليه ,,
جواهر : لا لا هب .... هذا ..واحد.. غاوي ..
قلت لها : هههه عينج زايغه ,, كل اللي تشوفينهم غاويين ... ها خبريني شقايل شفتيه ..؟
جواهر : يخبل هااا والله العظيم ,, شكله بيموتني بحلاته ..
قلت لها : أمييييه حرصج .. عن تضيعين فهود
جواهر : لا عــــــاد فهود غير ..القلب ما يهوى اثنين ..
قلت لها : صرتي شاعره ,,
جواهر : عنلااته هـا يوميا أشوفه ويذكرني بـ منصور زايد
قلت لها : انتي كل حبايبج يشبهون ها .. منصور زايد ههههه
جواهر : بس فهود أحلى وأحلى وأحلى
قلت لها : تدرين حنيت للشارجه وايد ..
جواهر بحركه تقهر : اندوك انته توج تذكرتي انج مال الشارجه ,,
قلت لها : من يوم يومي شرجاويه وأفتخر فديتج
جواهر تقلد رمستيه : مال شارجه لاااه هي لاااه هكو لاااه ,,,
ضربتها : جب لاااه أصلا انتي توصلينا ..
جواهر : لا صدق بس في خاطريه نروح صوب صحارى ..
قلت لها : فديت باباتيه الله يرحمه دوم كان يطلعنا ,,
جواهر : فديته الله يرحمه ويغمد روحه الينه ,,
قلت لها : تعالي تعالي نروح نحدر نور الامارات
جواهر : أوكي يلا ..
..........................
رحنا حدرنا .. العصر ... سمعنا صوت باب الصاله
جان نربع أنا وجواهر صوب الصاله .. رحنا صوب الجوهره سلمنا عليها ..
بصراحه مبين عليها خلاااص وحدة عوده ومعرسه ..
سلمنا عليها ويلسنا ..
الجوهره : اشحالكن ,,.؟
قلت : والله البيت هب شي بدونج موووووول ..
الجوهره : هههه صدق الحين ولا رمسه وبس .. وانتي جوجو ..؟
جواهر : واييييييييد حلو .. خلاص اروم أصيع ع كيفي ههههه
طالعت جواهر بـ نظره فهمتني بس بينت روحها هب مهتمه لرمستيه ,,
قلت : وين عمو صح ..؟؟
الجوهره : في بيت عمتيه .. كانو مسويين عزيمه الظهر ,, والحين هي هناك تساعدها ..
جواهر : اويـــــــــه جيه ما خبرتنا كنا نسير وياها ..
الجوهره : تقول الساعه عشر صوتها بح وهي توعيكن ..
قلت : هههه عاد نحن أمسات مسوين مناحه لازم ما نحس
الجوهره : هههه فديتكن كل ها عشاني ..؟
جواهر : لا هب حقج حق حمد هع ..
قلت : شخباره حمد
الجوهره جنها استحت : عـــــسل والله عـــــســــــــل
جواهر : ماما نحن بنات عن تخربينا هع .. عقب بقول زوجوني قمت أغار من أختيه ..
ضحكنا على تعليقات جواهر اللي في حياتها ما بتخلص ..
الجوهره : يلا عاد فديتكن ,, أنا سايره ..
قلت : وين تمي بعدج ما تميتي عندنا
الجوهره : ههه حمد قاعد مع الشباب في الميلس .. طيارتنا عقب ثلاث ساعات ,,
جواهر : حظها الحرمه رايحه ايطاليا هب نحن معفنين فالحر ..
الجوهره : هههه بتم أسبوعين وبرد حشا .. كل ها غيره جوجو
جواهر : بسوي اضراب عن الطعام الين ما ييوزوني ..
قلت : عنلااتج جوجو شو هالرمسه ..
الجوهره باستنا : يلا في أمان الله
أنا وجواهر : في أمان الكريم
قلت : الجوهره ديري بالج ع روحج
الجوهره ابتسمت : انــــــــــشاااالله وانتن بعد ..
طلعت الجوهره .. طالعت صوب الباب ,, ما تمنيت في حياتي أفارقج يا الجوهره بس هذا طبع الزمن ,, دوم يفرقنا ..
جواهر قعدت تتنهد : أوووووف ملل الحين شو بنسوي ..
قلت لها : طلعات بنطلع اليوم باجر وعقب بيملون ما يتفيجون يطلعونا ..
جواهر : نسااااافر
قلت لها : نروح السعوديه ..
جواهر : في الصيف وايد زحمه مكه شهر ثلاثه أحلى ..
قلت لها : صدقج عاااد البحرين ,,
جواهر : شرات الامارات دول الخليج ,,
قلت لها : احلمي يودونا بلاد برا ,,
جواهر : جيييييييه انزين
قلت لها : لو رحنا بلاد برا ع الأقل نتم أسبوع أسبوعين والرياييل يالله يالله يتمون اربع خمسة ايام
جواهر : صدقج عاد وين ..
قلت لها : عمان قريبه عن الامارات ..
جواهر : حررر شرات الامارات ..
قلت لها : الحين شهر سبعه وصلاله حلوه هالفتره وجوها خباااال
جواهر : فكره شقايل راحت عن بالي ..
قلت لها : أوكي عاااد يلا نخطط عسب السفره ..
جواهر : يبالنا نرمس بابا لو برمس يسور ويسوف بيتفلون في ويهي ..
قلت لها : عاد مولـ هالدرجه .. ريلي هب جذا ..
جواهر بنص عين : بدينا من الحين ريلي وريلي الله المستعان
قلت لها : بلا هذر جوجو يلا فكري ..
جواهر : ماشي حل غير نرمس باباتيه ,,
قلت لها : أوكي اليوم بليل نرمسه ,,
جواهر : أوكي اتفقنا ..
سمعنا صوت الباب ينفتح ,,
وعدول وعلاوي يركضون بسررررررررعه ويتنفسون بسرعه ..
تخرعت رحت ركض صوب عدول وعلاوي ..
يودتهم وقلت : بلاكم شو صايـــــــر ..؟
علاوي يضحك ويأشر برا : هذا عموري فاتح ماي الزراعه ويرش علينا ..
قلت : ترييو أنا براويه ..
طلعت ويمبي جواهر وعدول وعلاوي .. يضحكون بصوت عالي ومتمسكين بـ جواهر ..
طالعت صوب عموري كان قاعد .. فجأأأأأأأأأأأأأه لف بسرعه .. وارتفع البيب والماي كله طش علي .. وجان >< أخييييس عدل
طالعته فالبدايه بس كنت بنازعه بس الحين شكلي بضربه بعد هب بنازعه..
جواهر تباغم : يالحيوان خيستنا غربلاتك ..
عموري تم يضحك وميود بطنه استوا طماط ,,
رحت صوبه على حرارة الجو الا اني أحس بالبروده لأني مبلله وخرسانه ماي ..
رحت صوبه عموري ركض بعيد وابتعد عنيه شوي
قلت له : وين بـتروح عني يالشيطون ..
عموري يضحك : هههههه نورو شكلج طر وانتي خرسانه ماي ..
طالعته : انززين تنكت علي أنا .. هاه براويك يالعصوص ياللي بعدك ما فقصت من البيضه
رحت صوب بيب الماي وجواهر يمبي .. جان أيود البيب والف عسب ارش الماي صوبه
يودت البيب باصابعي عسب تزداد قوة الماي ,,,
رشيت عليه .....وقلت : يؤيؤيؤيؤيؤ تستاهل ولا تحط دوبك بدوب نواري مره ثانيه فاهم
جواهر تصفق : عاشت حرمة أخويه عاشت ..
جان الف بالبيب وارشها ماي : ان سمعتج تقولين حرمة أخويه بدخلج في هالبيب فاهمه ..
جواهر : ههههه خلاص فهمت
عدول يطالع علاوي : قلت لك أنا أختي قويه ..
علاوي : هي وايد قويه أقوى عن يسوف بعد
أنا وجواهر نقعنا من الضحك شوي وبموت من الضحك ..
جواهر ميوده روحها : هههههه نورو طلعتي أقوى عن يسوف عند اليهال هههه
قلت لها : ولا عدول أونه أختي قويه جني سوبر سستر هههه
عدول : اذا الاولاد سو لنا شي نقول لهم عندنا أخت اسمها نواري تفلع
عاد اهني أنا وجواهر ما قدرنا قعدنا ع الأرض وتمينا نضحك ,,, شوي وننسدح اهني خلاص هههه
فجأأأأة سمعنا صوت واحد وقف الدم بـ عروقي من الزيغه ..
......... : شو مستوي ..؟؟
صخينا وقفنا وعدلت شيلتي .. طالعنا بعض كلنا ,,
علاوي : لا تصارخ يسوف نواري أقوى عنك ..
حسيت روحي بنقع من الضحك خلاص شوي وبموت .. يودت روحي غصب ..
يوسف : محد يرمس .. سألتكن شو مستوي .. ضحكونا وياكن ..
جواهر بتردد: ااآ ........
يوسف معصب: ارمسي جييييه الحوي خرسان ماي ..
جواهر : رشينا ع بعض ماي ,,
يوسف : ما تعرفون ها تبذير حرام
جواهر بهمس : بدا شريف مكه ,,
كنت بنقع خلاص ,,, من الضحك ,,
جواهر : بس كنا نلعب ,,
يوسف بتهديد: صخي انتي وياها ودرو سوالف اليهال مالكم .. و دشو داخل ,,
تونا بنتحرك عسب ندش ,,
سمعنا صوت سويج السياره والسياره صوتت دليل انها مفتوحه الحين ..
جان أصد وراي .. وشفت شي ما تتوقعونه ,,
السياره خرسانه ماي عموري يوم رشيته كان واقف يدامها ,,
على طول أبا أركض عن أكل هزبه ,,
يوسف صارخ حسيت أذوني بتنطر ,,
يوسف : منوه راش ماي عالموتر ..؟
صدينا سمعت عدول يقول : نواري ,,,,,,
بغيت اروح افلعه اذبحه اسوي به شي وقته ها عسب يفضحني ,,
يوسف طالع صوبي ,, ياه تقدم منا أنا وجواهر ,,
حسيت لـ لحظه انه ياي يفلعني لأنه موتره غالي وايـــــــــــد وهو يحب سيارته نظيفه وشكله مستعيل يبا يطلع ,,
نزلت راسي ..
دموعي على طول نزلت خانتني العبره ,,
زين بس جواهر يمبي واليهال بعاد يلعبون فالحوي ,,
يوسف تقرب ابتسم : بلاج تصيحين ,,...؟؟؟
للأسف عبراتي خانتني و قلت له : والله هب قصدي .. بس كنت أبا أخيس عموري لأنه خيسني والله مب قصدي ,, ( وبديت أكح ع الخفيف )
يوسف ابتسم : عادي صار خير .. تراني كنت ياي بقول لج .. ادواج عندي عقب .. لا أكثر
نزلت راسي ودموعي بعدها تنزل .. وقلت : آسفه والله مب قصدي والله العظيم ( وازدادت الكحه ) حسيت روحي بختنق لو يمبي طماط ما بيفرقون بينا باللون ..
يوسف : مصدقنج حياتي ... دشي داخل عن تمرضين .. يلا ..
وروح صوب سيارته ,,
طالعت جواهر ،،البنيه فاتحه ثمها ,, جنها أول مره تشوف موقف جذا ,,
دخلت داخل بسرعه ورحت الحجره عسب اتسبح لأني خست ,,
يوسف قال لي حياتي .. أول مره يقولها .. يوسف قال حياتي .. اااااااا خاطري أصارخ من اليوم الين باجر .. يوسف ما تدري اش كثر أحبك أحبك ,,, فرحتني وايــد ..
ههههه ولا أنا الغبيه صحت .. بس يلا زين صحت .. يوميا بصيح عسب يقول حياتي ..
تسبحت وغيرت .. وصليت المغرب ورحت صوب جواهر ..
جواهر تطالعني مستغربه : نواري ... يسوف رومنسي ..
قلت لها بسخريه : وايد .. لو اني هب صايحه جان فلعني بنعاله هههه
جواهر : لا لا أول مره أخوي يرمس بـ هــالأسلوب ,, عبالي ما يعرف
قلت لها : انسي اللي صار خلاص بعدج بيبي ههههه
جواهر : حظج نواري بـ يسوف وايد لايقين ع بعض ..
قلت : جوجو ان ما صخيتي ترا بيييج هاك السطار اللي يأدبج فاهمه ..
جواهر تحط ايدها ع حلجها : هه سكتت خلاص
فجأأه تذكرت يوسف يوم قال ياي أقول لج دواج عندي لا أكثر .. شو قصده .. كيف بيداويني يعني ..؟ وشو اللي بيسويه .. ؟؟ ..اممم يا ربيييه والله احترت معاك يا يوسف ..
بس أنا هـ الجمله ما همتني كثر ما همتني كلمة حياتي مو بس همتني الا هيمتني والهمتني به أكثر وأكثر .. كلماله حبي لك يا يوسف يزيد ويزيد ..
مر الوقت ونحن نطالع برامج في التلفزيون الين حزة العشا ,,
جواهر : تعالي نروح نطلع عشا ,,
قلت : أوكي .. يلا شباب نروح نتعشا ,,
عموري : مابا ..
قلت له : عموري بلا سخافه ولا تراني بخلي عمي ياخذ عنك هالبي اس بي ..
عموري يتأفف : انزيـــــــــــن ..
قلت : يهالوه آخر زمن ..
رحنا المطبخ .. تمينا انا وجواهر نطلع الأكل ,, ونرتبه ,,
جواهر : ماما تأخرت ,,
قلت لها : لازم ,, الحين عموتي مره وحده ولدها وبنتها تزوجو أكيييد بتتعب ,,
جواهر : الله يعينها .. صعب فراق العيال ..
قلت لها وأنا اتنهد : بس هذا مجرد فراق أيام وبيرجعون .. هب فراق يدوم طول العمر ..
جواهر تغير السالفه : يا ريت اليوم رحنا بيت عمو
قلت لها : هي اليوم مسوين عزيمه عوده بيت عمو ..
جواهر : ميثاني بتحتشر ليش ما ييتو ..
قلت لها : هاي لما تشوف بنات عمها تنسانا ,,
جواهر : هههه صدقج ,, مصلحجيه ميثاني ,,
طلعنا العشا تعشينا ,, وكل واحد راح حجرته يرقد بس أنا وجواهر تمينا سهرانين ..
صيفيه شو ورانا .,. عقب جامعه وبننسى أيامنا الحلوه هاي هههه
جواهر : نواري بقول لج شي بس لا تزعلين ..
قلت لها : قولي ,,
جواهر : خوالج يو هاك الأسبوع ,,
قلت لها بتعجب : شي طيب ,,
جواهر : يوم درو يوسف خاطبنج احتشرو .. بس بابا قال انه هو ولي أمرج الحين لأنه عمج هب هم وعلى كيفه يسوي اللي يسويه .. وانتي راضيه ,,
قلت لها : برايهم .. زين سوا عمي ,,
جواهر : الله يعينج في حياتج
قلت لها : أمين ,, شو دراج انهم يو ..
جواهر : سمعت صوت يوسف وبابا يرمسون ..
تميت ساكته وأقول في خاطري .. أكيد بيخبون علي أشيا أكثر وأكثر .. دوم يخبون عني معنه هـ الأشيا تخصني ولازم أعرف عنها ..
جواهر : قمنا نرقد شكلهم بيتأخرون ..
قلت لها : هي بعده فيني تعب من كعب أمس هههه
جواهر : وأنا بعد ..
يتبع ......