بسمه من شفآتك تموتني وتحييني ..

فصل دون عنوان 16

يوم الأحد داومت حسيت روحي مستانسه مع البنات الكل سأل عن حالي .. حسيت بـ حبهم لي .. حسيت اني بالفعل عايشه وسط ناس يحبوني ويبون راحتي ..

كلهم واحد واحد شخص شخص .. سواء فـ البيت أو المدرسه أو المستشفى بعد ..

رجعت البيت يوم الأحد بس تفاجئت ....... يتني الصاعقه ...
يوم رحت الحجره عشان أغير ...

سمعت مرت عمي تقول لي : نواري غيري وتعالي خوالج تحت ...........
هاه خوالي ... خوالي أنا ... أنا ما عندي خوال ... أنا ما با يكون عندي خوال .. أعيش جذا أحسن لي وايـــــــــــــد .. بدونهم عايشه بأمان ع الأقل ..

شاللي ذكرهم فينا أبا أعرف .. شاللي رجعهم .. ،،، ,,,, أكيييييييد فلوس هي نعم فلوس وبيزات .. بس أنا ما عندي لا ورث من أمي ولا أبوي .. أبوي ما اعرف عن بيزاته شي وأمي سجلت بيزاتها مادري باسم منوه .....؟؟ اش حقه يايين .. يبون يذبحونا شرات ما ذبحو أمي وأبوي ..

..............

غيرت ملابسي ولا جنه صاير أي شي ........
صليت الظهر .. نزلت مريت من الصاله سمعت عمي يقول ..: نوره تعالي .. خوالج فـ الميلس ..
قلت له : آسفه .. ما سمعت عمي ممكن تعيد ..

عمي : خوالج يا نوره فـ الميلس ..
قلت له : امممم ما أحيد عندي خوال .. الا اذا وحده رضعتني وهاييل خوالي فالرضاعه ..

عمي : نوره تعالي .. لو سمحتي .. ولا ترمسين جذا يدامهم ..
طالعته : عمي لو سمحت مابا أشوفهم ..

يوسف دخل .. وقال : وين نوره ..؟
شفته : أنا اهني ..
يوسف : تعالي عند خوالج ..

قلت له : قلت لكم ما عندي خوال ..
يوسف بحده : ترا ما بياكلونج .. يايين يسلمون تعالي بسرعه ..
طالعت عمي وعقب يوسف وقلت : بيي وبشوف شو يبون ..

والله لو أمي وأبوي ما قدرو لكم أنا بقدر لكم وخشمكم هذا من كثر ما انتو رافعينه بكسر .. و نشوف عقب .. من القوي ..
رحت ورا عمي ويوسف ..

دخلت الميلس .. شفت اثنين مبين عليهم كبار شوي فـ العمر واحد فعمر يوسف ..
قلت : السلام عليكم ..
خوالي وقفو عبالي بسلم عليهم : وعليكم السلام ..

وقفت في صوب عسب ما اروح أسلم .. بس عمي قال : نوره سلمي ع خوالج ..
رحت صوبهم ومديت ايدي بس وسحبتها بعد المصافحه بسرعه .. لا حب راس ولا خشوم شو أبا فيهم أنا .. هاييل كانو سبب عذاب أمي وأبوي وتشتتنا ..

رحت قعدت في صوب ورافعه خشمي جني ما اعرف منو هم بعد ..
واحد منهم : اشحالج نوره ..؟
رديت عليه : بخير يا ........ اممم ما عرفت منوه ..؟
رد علي وهو يبتسم : خالج عبدالرحمن ,,, وأشر على الثاني وهذا خالج حميد ..
قلت له : والنعم والله يا خوالي ..

حسيت عمي بيي ويفرني برا الميلس بس مستحيل أنزل روحي يدام هاللوث ..
أشرت ع الصغير بالسن ما اهتميت يقولون هاي وقحه ولا شو ..

قلت : ليكون هذا الصغير بعد خالي .. أحيد يدي متزوجين هنتين أم أمي الله يرحمها وأمكم .. ليكون بعد هيج الحزه خذا له وحده ثالثه بعد ..

حسيت هاللحظه بالفعل عمي بيفرني .. بس عمي قال : نوره ..
طالعت عمي وابتسمت ولا عبرت ..
خالي عبدالرحمن : هذا ولدي سلطان ..
قلت : عاشت الأسامي ..

حسيت روحي شوي سخيفه بس غصبا عني والله غصب .. صحيح أمي وأبوي ربوني ما أكلم اللي أكبر عني جذا بس هذييل سبب عذابنا .. وقهرنا ..

خالي حميد : سلامات نوره كنتي مريضه ..
قلت لهم : هي ترا أبوي توه متوفي من فتره الله يرحمه .... وجان أتعب ..
خالي حميد : الله يرحمه ..

تعمدت أقول : صح خوالي انتو ييتو عزا أبوي ..
عمي تكلم : هي بس انتي كنتي راقده وردو بوظبي ..
جان أقول : زين ، شي طيب .
.
وقفت وقلت : تشرفت بشوفتكم خوالي .. صار لي سنين هب شايفتنكم اسمحو لي لأني ما عرفتكم ..
خالي عبدالرحمن : لا لا عادي بس انتي ما تقولين عندي خوال أزورهم اروح عندهم ..

طالعته : والله لوعندي الليسن جان أيي لكم يوميا عادي .. بس تدرون خواني صغار وأنا بعد سني ما يسمح للطلعه روحي وأمي وأبوي الله يرحمهم ودرونا .. مدري منو سبب فراقهم ..
خالي : عاد خلاص تيين ويانا بوظبي ..

حسيت عمي يبا يوقف ويقول لأأأأأأأأأأأأ .
بس أنا قلت : لا لا شو أبا في بوظبي أنا أتم اهني أحسن لي .. يوم ابا أيي بتصل بكم وتعالو وراي ..

جنهم دريوليه عندي .. خخخ
وقفت وقلت : يلا زين شفناكم عيدوها ..
عمي : بنتي اقعدي شوي مع خوالج ..

قلت : لا عمي وراي امتحان صعب باجر .. ما أقدر بروح بذاكر ..

طلعت بدون ما أشوف تعابير ويه أي أحد .. مدري ليش سويت جذا ..
ليش سويت هالتصرف .. ندمت ع الكلام اللي قلته ,. بس يستاهلون .. مدري كيف صرت قويه وهالكلام طلع مني مدري .. أنا ضعيفه وأستحي وايد .. بس هالحزه يتني القوه أرد .. والله يا بوي وأمي باخذ حقكم .. ومحد بيقدر يلعب في عقلي ..

رحت حجرتنا أنا والجوهره وأنا مرتاحه نفسيا وحسيت بالي ارتاح لما عاملت خوالي جذا .. والله براويكم مستواكم .. وشو انتو يدام نواري .. ما تسون شي .. شرات الريشه أهفها وأردها مكانها ..

قعدت ع السرير وطيحت روحي .. قمت ألعب بشعري وأفكر يا ربيييه شو بسوي شو..؟
دراسه مالي خلقها .. وما عليه امتحانات ههه أمحق خرط خرطته أنا ... ...

رحت زقرت الجوهره عسب تيي تقعد وياي لأني ملانه وما علينا شي و مخلصين مذاكره ...
..
الجوهره : ها نورو .. خوالج يو ..؟
قلت لها : هي تصدقين ..
الجوهره : شو تحسينهم ..

قلت لها : والله ماشي أحسهم منافقين ..
الجوهره : حشا مب قلب عليج .. ترمسين عن خوالج جذا ..

قلت لها : وهم شو من قلب عليهم .. يوم فرقو بين أمي وأبوي ..
الجوهره : تعالي تعالي .. صح قبل أمــــــــــس ..

قلت لها : شوه ارمسي بسرعه ..
الجوهره مستحيه : امممم حمد ولد عمو حفصه تقدم لي ...

وقفت وعفدت صوبها حضنتها ... : صـــــــدق مبروك مبروك ..
قالت لي : لحظه لحظه بعدني ما رديت عليهم ..

قلت لها : وانتي شو رايج ..
الجوهره : والله مدري .. بس.. أحسه زين ,, لكنه غامض وايد وما يسولف خير شر ..

قلت لها : ( بطنازه ) يعني انتي اللي كنتي تسولفين .. دام زين وافقي شو وراج لاه .. تفتكين من حياة العزوبيه وتدشين القفص الذهبي .. ههههه

الجوهره : بس أنا أبا أكمل دراسه ..
قلت لها : كملي عادي .. وقولي شرطج أكمل والزواج ع كيفج انتي حدديه .. اللهم الحين يحجزونج وبس ..
الجوهره : تعتقدين جذا ..
قلت لها : صلي استخاره وتوكلي .. بس هاه عن تنسيني ..

الجوهره : مستحيل أنساج .. فديتج انا ....
ابتسمت لها وقالت لي : نواري بقول لج شي بس لا تفهميني غلط

قلت لها : قولي .. كلي أذان صاغيه لج ..
الجوهره : نواري .. أنا كنت أحب حمد أصلا ..

طالعتها وبنص عين : ها يالمكاره .. أونها ماعندي سوالف وهناك تحب أحلى واحد في القبيله كلها ..
الجوهره : انزين أنا أستحي وما أحب أقول ..

قلت لها : أحسن خلج من سوالف ميثاني وجواهر هاييل حتى ياسر وفهد يعرفون عنهم ..
الجوهره : وع ع ع .. تخيلي حبيبج يدري انج تحبينه ..

قلت لها : ويــــــــه بنتحر العالم كله يدري الا هو .. هههه
الجوهره : نورو .. يعني أوافق ,,
قلت لها : هاذي حياتج وانتي حره ... شي راجع لج ..

الجوهره : نونه تدرين أحسج لايقه ع يسوف ...
طالعتها : وع ع ع مالت عليج ..
الجوهره : وع عليج بلاه أخوي شيخ الشباب ..

قلت لها : لا تخربين عقلي .. يلا مناك يلا مناك .. ناويه تخربني جوجو ..
الجوهره بنص عين : هاه أنا اللي أخربج و لا روحج مختربه

قلت لها : جوجو ان ما صخيتي لأفرج بهاي الوساده .. واخبر حمد عن حبج له هاه اختاري بتسكتين ولا ..
الجوهره حطت ايدها ع حلجها : هه سكت ... ندمت اني خبرتج ..

قلت لها : أقول لج الأقارب xxxxب بس ما صدقتيني هههه
الجوهره : يلا نشي ذاكري اليوم ما فتحتي ولا كتاب

قلت لها : غربلاتج من سالفتج ههههه
الجوهره : يلا مناك .. أنا ما أرمس يهال .. تراني حرمه معرسه خلاص

...........: منوه المعرسه ...؟؟؟؟
لفينا متخرعات ......
الجوهره : خرعتينا ويا شكلج ..

جواهر : برا يلا برا .. عن تخربين عقل نوران ويا سوالفج ..
الجوهره : يا حافظ عاد جواهر اللي سوالفها حلوه ..

قلت : لا انتي ولا هي بتخربني ،، أنا روحي مختربه هههه
الجوهره : الاعتراف بالحق فضيله هههه

قلت لها : جوجو هب شي تودريني روحي تمي وياي
الجوهره : عندي حل!! خذي فهد وجذا بناخذ خوان ...هههه

ما حست الا بهاك البكس اللي يكسر المقبض هههه ع راسها ... من حرم السيد فهد ..جواهر هع

بعد أيام معدوده وافقت وأخيرا الجوهره بتعرس .. بس أنا زعلانه ..

لأنه ربيعة روحي بتتركني وحيده .. ما أحب جذا ..
بس يلا مجرد خطوبه بتم ويانا لين تعرس عاد .. الله كريم ..

............. بس اللي فاجئني عقب ما راحو قوم عمتي ... دخلت الحجره .. وأنا طالعه سمعت عمي يكلم يوسف ...
عمي : انت خذها انزين ,,
يوسف : أبوي قلت لك ما أبا أعرس أنا ..

عمي : بس هي بنت عمك وانت أولى بها من الغريب ..
يوسف : والله مدري بس حاليا أنا جالع فكرة الزواج من بالي ..

عمي : انزين هب لازم تتزوج ،، مجرد تخطبها .. وانت تدري خوالها الفتره الأخيره زياراتهم زادت .. يمكن ناوين على شي ..

يوسف : بشوف وبرد لك خبر انشالله ..
عمي : فكر عدل وبعدين بنت عمك ما شي مثلها اثنين ...
يوسف : بشوف ..

رحت لحجرتي رميت روحي ع السرير ... اليوم الجوهره عرفت خلاص وارتاحت انها بتكمل حياتها مع فارس أحلامها أما أنا منو منو ..؟ هذا ولد عمي ورافضني عاد الغريب شو بيسوي .. ما هقيتها منك يا يوسف .. يقول بفكر .. لو انه يحبني جان وافق .. عشان ما أضيع من بين ايدينه .. بس آه منك يا زمن .. أعز الناس ياقلبي خانوك .. خانوك ...

حسيت روحي مليت من التفكير أروح أذاكر أحسن لي من الصدعه ...
دمعت عيني .. تذكرت أبوي ليته يمبي وييي يجس احساسي أش كثر مشتاقه له .. كثر شوق الظوامـــــــــــي إلى الماي أو يمكن أكثر .. آه يابوي وينك تركتني ... بس أنا وعدي بـ محله بييب النسبه يعني بييبها ... وأرفع راسك ...

ما حسيت بروحي الا ومرت عمي توعينا لـ صلاة الفير ,.
قمت صليت وغيرت صارت الساعه سبع الا ربع نزلت تريقت .. وكانو يوسف وعمي بعد يتريقون شكلهم بيداومون مبجر اليوم ..

بعد ما خلصنا ريوق رحنا أنا وجواهر والجوهره نتريا باصاتنا ,,
قلت : بناتات شكلنا بنتفحم اليوم ..

الجوهره : هههه حلوه هاي بناتات .. انزين الشتا قال باي باي خلاص
جواهر : و جوجو خلاص بعد بتقول باي باي ..

الجوهره تلومت : اسكتي لاه فضحتينا ...
جواهر : أأأأأأأأأأأأي خدا ( بعد الترجمه ... <<< يا ربي )
طالعتها : بلاج تخبلتي قمتي ترمسين عيمي ..

جواهر : أحوال شوما .. جتوري ... ( بعد الترجمه <<< شخباركم اشحالكم )
قلت لها : خوبي .. هع ( بعد الترجمه <<< تمام )

قلت لها : بلاج ...؟؟؟
جواهر ما ردت علي .. طالعت الجوهره قالت لي ما ادري ..
ضربتها ع راسها : بلاج حوه ...؟

جواهر تأشر: يعذب ها يعذب ..
طالعت مكان ما تأشر بالفعل فيه واحد يعذب يطير .. يخبل بمعنى الكلمه ..
قلت لها : بلاه انزين ...

جواهر : تطالعين هذا أصله جنه عيمي بس متجنس .. هع بس والله عذاب شكله يخبل ... يوميا الصبح أشوفه قبل ما يروح الدوام ..

قلت لها : بس مب أحلى عن ........................( سكتت وتذكرت )
جواهر بنص عين : من منوه هاه ارمسي يلا جكيتج ..

قلت لها : مب أحلى عن حمد صح الجوهره
الجوهره تلومت وجواهر قالت بعدم تصديق : هي صدقتج ..

وصل باص قوم الجوهره وجواهر الجوهره مشت برزانه أما جواهر راحت طيران وسلمت ع البنات .. جنها أول ابتدائي هههه مدري متى تعقل هاي البنيه ..

وقفت لـ لحظه .. تذكرت كيف كنت أوقف عسب أطالع مانع ولد ييرانا .. كان يخبل مثل ولد ييرانهم هذا .. الله يحفظهم .. ويوفق شيخاني مع مانع ... والله اشتقت لها وايد ..

وعاني من خيالي وذكراي ... صوت موتر ... توه اشتغل ..
صديت وراي .. شفت يوسف توه شغل موتره ...

وهاللحظه باصنا وصل رحت ركبت الباص وأنا أطالع صوب سيارة يوسف حسيته يتابعني بـ كل خطواتي ...
سمعت بنيه تقول : واي يهبل
قلت لها : صخي أيـــــــــــه عن الرمسه الزايده ..

البنيه استحت وسكتت .. مدري ليش ما ردت علي .. بس والله يا يوسف أغار عليك أغار عليك من روحي بعد .. وأغار بس ينطقون بـ اسمك أبيك لي أبيك لي أنا وحدي ...

وصلنا المدرسه الكل نزل طبعا حصلت كم كلمة ... من هالصوب وهاك الصوب .. بس طنش تعش تنتعش وع قولة جواهر اركب جحش ..

دخلت الصف شفت وداد رحت حطيت الجنطه ويودت ايدها وطلعنا نتمشى ..
قلت لها : تتوقعين شو صار عندنا هالسبوع ..؟
وداد : اممم شو ؟؟

قلت لها : حمد اللي قلت لج عنه خقاق خطب الجوهره ...
وداد بفرح : صدق ..

قلت لها : هي صدق .. والله مستانسه وايد حق جوجوتي ..
وداد : الله يوفقها هههه .. يالله عاد نحن عنسنا ..

قلت لها : ههه لا عاد حلاته يوم عمرج 22 ولا 23 شو تبين فالعرس وانتي بعدج روحج يبالج تربيه هههه تروحين تربين ..

وداد : صدقج بس محد يعرف لأنه نصيب ..
قلت لها : صدقج .. يلا شكله رن جرس الطابور ..
وداد : واع مالي خلقه ..

................

كنت قاعده مالي خلق لا مدرسه ولا دراسه بعد .. قعدت أشخبط ع الكتاب ... بس انتبهت لما المس قالت ...
المس : نوره انتبهي الدرس مهم هذا لصالحج الامتحانات قربت ..
قلت لها : مس مدوخه ما اقدر ..

المس : أوكي حبيبتي سيري عند الممرضه
قلت لها : لا بتم اهني أحسن
المس : برايج ..

تمنيت الوقت يروح بسرعه .. متى يرن جرس البريك ... مليت من القعده في الكلاس ..
رن الجرس حسيت اني صرت حره وأخيرا ......

طلعت شفت البنات كل وحده قاعده مع قروبها .. فجأه حسيت بدوخه .. تماسكت بس راحت عني لما حسيت ..

بايد تحوط خصري ... والثانيه رفت بها البلاك بيري يدامنا تبا تصورنا ...

لفيت ويبت ايدي عالبلاك بيري وفريته ع الأرض بكل قوه أملكها تمنيت انه ينكسر في هاللحظه .. طاح ولا انكسر لأنه عليه كفر أزرق .... يا ريت لو وردي بعد ..

...........: نواري جيه جذا انزين ... ؟؟؟
قلت صوت عالي وأنا في وسط الساحه والبنات متيمعات ..
قلت : وقسم بالله ان ما قمتي عني وجلبتي رقعة ويهج ما تلومين الا روحج ..

حمده : نواري هدي بلاج
قلت لها وأنا كلي حره وأبا أطلعها فيها : مالت عليج شو ما تستحين يالبويه .. تدرين ان ربنا يلعن النساء المتشبهات بالرجال ...

حمده : نواري لي اهني وبس اسكتي ..
قلت لها : لا تطرين اسمي ع لسانج أصلا ما اتشرف ..

حمده بحده : جب ولا كلمه فاهمه شكلي عطيتج فيس زياده عن اللازم
قلت لها بالأسلوب نفسه : هه شكلي أنا اللي عطيتج فيس .. على بلاويج الله يعلم شو من بلاوي بعد .. يـــــــــــا حمدان ... هههه

فيه وحده يت وتدخلت .. موزه : هاه حمدانوه عرفت شو من طينه هاي بس انت اللي ما تفهم وخليت بنيه تعلي صوتها عليك ...

قلت بطنازه : ياحــــــــــــافظ .. الحمدلله بعدني أعرف ديني ومذهبي ...
حمده : لو سمحتي موزه لا تتدخلين ..
موزه : والله براويج يا نوره بنت خليفه ...

يتني الغبنه بس قلت ما بسكت ...
قلت بصوت عالي : جــــــــــــــــــــب ... لا تنطقين اسم أبوي ع لسانج فاهمه ..

موزه تحرني : يا بنت الـــــ ************
ما حسيت بـ روحي الا وأنا أتجدم منها وكل غيض وعطيتها هاك السطار اللي يأدبها ...
موزه مسكت مكان الكف .. : تضربيني أنا ..

وعفدت صوبي وتمت تمط فيني وأنا أتضارب وياها ...

حسيت روحي في فيلم هندي بـ صراحه ... والبنات كلهن محد تدخل غير حمده اللي كانت تفج بينا ...
وصلت المديره .. وصرخت علينا ... وشلتنا وياها الاداره .......

تميت أمشي بغيض وأدعي على موزه وحمده لولاهن جان تخرجت من المدرسه وأنا كرتي أبيض ولا مره ما تضاربت مع أحد بس هـ الأشكال غصبوني ... والله غصب أشوف أحد يهين أبوي وأسكت .. لأأأأأأأأأ مستحيل .. أنا نوره ما عاش من يهيني ويهين الغالي ؟؟

.. دخلنا الاداره .. المديره : شو ها اللي سويتيه انتي وياها ...؟
موزه وحمده تمن يطالعني ...

قلت : هذي البويه .. اللي اسمها حمده وحبيبتها موزه طاحن علي ضرابه ..
موزه : لأأأأ هي اللي بدت تسب ..

المديره : وانتي حمده شو تقولين ..
حمده : نوره اللي سبتنا ..
طالعتهن : أنـــــــــــــا يالمنافقات ...

المديره : اسكتي انتي وياها ...
سكتنا وكل وحده تطالع الثانيه غيض وقهر وتبي تفلع الثانيه بـ شي حسيت بألم في راسي ما رمت أستحمل بغيت أطيح بس يودت روحي ..

المديره : أبله حليمه .. أبله حليمه ..
أبله حليمه : نعم ...

المديره : سيري ازقري آمنه حمد و شيخه راشد ...
أبله حليمه : انشالله ...

طلعت الأبله .. وردت عقب ثواني وسألت البنات شو مستوي ...
طلعن بنات خير وقالو لها السالفه طبعا حتى الكلام اللي قلته قالوه .. ماشالله عليه سبيت بعد بس أنا كنت مع الحق المفروض ما أتعاقب ...

المديره : ألحين بتصل بأولياء أموركن عسب يعرفون سواد ويوهكن انتي وياها ..
قلت لها : بس أنا مالي خص ..

طالعتني بنظره بـ معنى اسكتي مالج خص الحين بييون أهلج ويتصرفون وياج ..
ترييت واقفه ويمبي موزه وحمده ...

دخل واحد جنه أخو موزه وعقب ياه واحد ثاني الظاهر نسيب شيخه .. ترييت حد من أهلي أنا اييه بس يمكن محد بيي حقي ..
المديره تمت ترمسهم ترييت أحد يي عشاني بس الظاهر محد ...

جان المديره تقول لي : تعالي نوره خليفه ..
رحت صوب الطاوله .. استحيت خوان موزه وحمده اهني .. بس يلا طاف ..

قالت لي : وقعي تعهد ما تتعرضين لهم مره ثانيه ...
قلت لها : بس هم اللي بدو .. حمده وموزه من بداية السنه يقطون رمسات ..

المديره بحده : قلت لج وقعي بسرعه ..
طالعتها : لأا ما بوقع ..
المديره تعلي صوتها : وقعي أحسن لج ولا ترا السالفه بتوصل للشرطه ..

قلت لها : توصل شو يعني .. ما بوقع لأني هب غلطانه ..
المديره : اطلعي برا انزين نتريا .. نشوف لما أهلج ييون
قلت لها : أنا أهلي .. ما عندي أهل .. أبوي متوفي وأمي بعد ..
المديره طالعتني جنها تبا تذبحني بمعنى صخي ...

لفيت أبا أطلع أوقف أتريا أحد ييي ويسأل عني ...
قبل ما أفتح الباب .. اندق وانفتح .. دخل ... وكله هيبه وشموخ ...

قال : السلام عليكم ..
وقفو كلهم وقالو : وعليكم السلام ..
........... : السموحه ع التأخير الدرب زحمه ,,
المديره : لا عادي .. حياك استريح ...

دش وهو يطالع صوب المديره ويرد يطالعني .. ما ادري جنه أول مره يشوفني في حياته ..

وبعد تفاهم بين أولياء الأمور خلوني أوقع تعهد على اني ما أسب .. طبعا مب أنا روحي خلو موزه وحمده يوقعون تعهد عن أشيا وأشيا .. ام البلاوي هاييل ..

يوسف : يلا مشكوره ..
المديره : الله وياك ..

وأوليا أمور شيخه وموزه بغو يطلعون بعد بس المديره قالت : اذا تبون تاخذونهم خذوهم ترا الدوام عقب خمس دقايق بيخلص ..

يوسف طالعني ... بمعني تعالي برا أباج ...
طلعت وياه وقفنا يدام الاداره .. يوسف : سيري خذي أغراضج وتعالي ..
قلت له : لأ برد ويا الباص ..

يوسف : قلت لج تعالي .. أترياج برا ..
وروح وغاب عن عيني وناظري .. استانست رحت شليت جنطتي .. ولبست عبايتي وطلعت رحت السياره ركبت ورا ...

يتبع ......