قالت لي : لا حبيبتي بتم وياج طول ما أنا عايشه انشالله انتي قطعه من الغالي ..
قلت لها : كل اللي أحبهم يفارقوني بين يوم وليله ..
عمتي : انتي ادعي ربج وانشالله يسهل عليج حياتج ..
قلت لها : عموتي بداوم يوم الأحد ..
عمتي : لا لا ، ماشي ,,, تريي الين الثلاثا ع الأقل ..
قلت لها : مافيني ، ع الأقل يوم أروح المدرسه أرتاح أنسى الهموم
عمتي : بس بتتعبين جسديا ..
قلت لها : المهم نفسيا عموه والراحه الجسديه تيي من النفسيه ..
عمتي بروح : بلا هذر زايد يالفيلسوفه.. أنا بسير بتغدا يوعانه من يومين كله أكل مستشفيات
طلعت وهي تبتسم لي .. تفديتها من داخلي ومن كل أعماقي .. ربي يحفظها لي ولعيالها ...
مر يوم الجمعه مع بنات عمي وعمتي يوم وايد حلو في قمة الروعه ... حسيت بالسعاده أهلي حولي .. حتى ولو مو مكتملين بس هذييل بعدأهلي اللي يحبوني وأحبهم ...
يوم السبت رحت الموعد مال المستشفى الدكتور فحص دمي وشاف كيف حالتي قال وايد تحسنت .. تم ينكت ويقول عن أضربهم مرة ثانيههههه يتني الضحكه بس ما ضحكت لأني قافطه على موقفي اللي سويته من يومين وضربتهم ... المفروض الواحد يتمالك أعصابه .. بس أنالي أعذاري حالتي كان يرثى لها .. ما كنت بوعيي بعد .. بس هالشي راح يضل ذكرى بـ حياتي لا يمكن أنساها ... نعم لا يمكن أنساهالأنها شاذه عن البقيه ...
مر يوم وبعده يوم كل يوم مثل اللي قبله بس الفرق يوم تقل الآلام ويوم تزيد .. هذا حال المواجع ... يوم الاثنين قمت الصبح حسيت بنشاط ... ما أدري ليييش ..؟
بس أكيد .. لأنه مر أكثر من يوم على رقادي فالمستشفى ... يوم بعد يوم اذا حافظت على روحي حالتي بتتحسن أكثر عن قبل ..
تسبحت ولبست ..
رحت صوب حجرة جواهر لأني خلاص أرقد مع الجوهره .. جواهر ما زعلت لأنها مو نفس طبعي هي وميثاني ,,, وأنا والجوهره ...
تذكرت انهم مدرسه اليوم .. رجعت الحجره شفت السرير .. حلاته وأنا أنش الصبح وأشوف أغلى ناسي .. وبلسم جروحي يمبي ... ننام معبعض نصحى مع بعض .. نصلي مع بعض .. نحس بمواجع بعض ونفرح سوا ... كل شي متشاركين فيه ..
اآه ملل البيت بدون الجوهره ... أحسها فرحة البيت ..
شفت روحي فاضيه .. والحين الساعه تسع ..
رحت حجرة عموري وعادل وعلاوي ... الحجره كبيره تسدهم .. حلوه حياتهم بلاي ستيشن طايح .. وملابس مفرفره ما تنشال الا يوم أحديشيلها .. حلوه حياة الطفوله أكبر همومنا ألعابنا ...
رديت الحجره .. فتحت الكتب .. حاولت أراجع اللي طافني هالثلاث أيام .. حليت الأسئله وما تعبت فالدراسه لأني أراجع أول بـ أول ..
الساعه 10 ونص تذكرت روحي مب متريقه ,,, أويــــــه والدوا لازم الساعه 11 أخذه ...
سمعت باب الحجره يندق وحد دش ...
............: نواري نشيتي .. كنت يايه أوعيج عشان الدوا ..
قلت : هي عموتي ... كنت قاعده أذاكر ..
مرت عمي : زين عاد يلا تعالي تريقي عسب الدوا
قلت لها : أوكي الحين بلحقج ...
استانست بخاطري لو نسيت دواي عادي .. في ناس مهتمين بي ويعطوني الدوا.. مو شرط .. أنا أتذكر ...
نزلت .. رحت المطبخ شفت مرت عمي مسويه سندويتشات ..
خذيت لي وخذيت الدوا معاي أصرت الا أكل عندها وأشرب الدوا اهني ..
سمعت كلامها وقعدت وياها تريقت وخذيت الدوا قعدت مع مرت عمي وهي تجهز أغراض الغدا .. تميت أسولف وياها ... حسيت الوقت راحبسرعه .. حلوه حياة الصبح ..
نحن طول الصبح في المدرسه ولا نعرف شو يصير فـ العالم الخارجي ..
رحت الحجره أكمل دراسه عسب ما تتراكم علي المواد .. حاولت أخلص بسرعه .. راجعت وحليت أوراق عمل الين ما أذن الظهر صليت ييتأصلي دعيت ربي يغفر لأمي وأبوي .. و تميت أقرا قرآن الين حسيت روحي خلاص بينهد حيلي وبطيح مكاني من التعب اللي فيني ..
رحت حطيت راسي وأنا مرتاحه ...
ما حسيت بروحي الا وصوت الجوهره تقول نواري نشي صلي العصر ..
قمت وأنا متخرعه .. كل ها رقاد .. ما أشبع رقاد أنا حشا ..
رحت تيددت وصليت وعقب نزلنا أنا والبنات نتغدا .. لأنهم ييون جريب أذان العصر ...
عقب الكل رد لحجرته يذاكر ... الجوهره فهمتني المسائل اللي طافتني .. وفهمت منها عدل لأني أحبها .. أي شخص أحبه في هالدنيا لازمأفهم نظراته .. أفهمه متى يحزن بدون ما يقول أي كلمه .. فما بال اذا شرح لي وقال لي ...
............
صحتي تحسنت خلال أيام الأسبوع .. يا يوم الخميس لازم أغيب لأنه عندي موعد فالمستشفى صحيت من نومي تسبحت وتجهزت .. نزلتتحت أتريق .. شفت روحي مب مشتهيه شي .. قلت خل أشرب بس حليب وعقب ما أخلص فحوصات بشتري لي ريوق من المستشفى .. رحتالمطبخ طليت .. الحمدلله مافي أي أحد .. لو مرت عمي اهني جان تذبحني لو تدري اني ما بتريق حليلها هههه تخاف عليه .. رحت صوبالثلاجه طلعت الحليب ييت أصبه فالقلاص لأني أحبه بارد وبس ...
سمعت صوت عروقي فزت .. وجسمي كله ارتعش ...
السلام عليكم ...
رديت : وعليكم السلام ..
يوسف : بتتريقين .. ؟؟
قلت له : تريقت ...
يوسف باستنكار وأسلوب يذبح : لااااااه ، ماشالله لحقتي تتريقين وانتي توج داشه المطبخ ..
صدقت جواهر يوم انها قالت مركب كيمرات أو عنده الحاسه السادسه ..
قلت له : هب مشتهيه .. بشرب حليب بس
يوسف بجديه : تريقي وأنا بوديج الموعد اليوم ...
قلت له بسرعه : ليش وين عمي وعمتي ..
قال : أبوي فالدوام وأمي وعمتي اليوم راحو صوب وحده مريضه ..
يعني هالمريضه أهم عني يدامكم ... بس حرام صار لهن أسبوع يحاتوني وما طلعو .. سماح هالمره .. هههه أحس عمتي ومرت عمي صارو يخافون علي أكثر عن رواحهم ..
قلت له : انزين أنا جاهزه ...
يوسف بصرامه : تريقي أنا قاعد أترياج ما وراي شي اليوم ..
قلت : انشالله ..
تخرعت من نبرته وجديته .. حسيت طلباته أوامر هي بالفعل على قلبي أوامر .. بس هو الآمر الناهي حسيته هو الوحيد اللي يقدر يتحكم بي فـي هالدنيا ..
هذي يمكن أول مره أكون مع يوسف في مكان رواحنا .. طبعا في حد فالبيت الخدم بس المكان اللي نحن فيه روحنا .. حسيت بالأمان وهو قربي حسيت بقلبي قاعد ينبض وبكل نبضه يقول أحبك أحبك عدد ما قالو العشاق وعدد رمل البر والبحر ..
وايد أهملت قلبي الفتره الآخيره .. رحت لمشاعري وضعفي نسيت ان قلبي ساكن به أحد .. نسيت اني كنت أهوى شخص ولا زلت أهواه واذا ابتعد عني أموت .. مب اني افارق الدنيا لأ .. فكري اللي يفارقها ... بس بعد ما تذكرته ورجع لـ موطنه بـ قلبي أحس يوم عن يوم يزيد حبه بـ قلبي ...
حسيته الأمل في حياتي .. اللي لو ضاع بموت وبضيع من دونه .. هو الأمل اللي عايشه عليه أحلم فيه فـ نومي واليقضه .. هو أنفاسي ..
قومني من أحلام اليقضه صوت يوسف يدام الباب : هااا ما خلصتي ..؟؟؟
رحت صوب المغسله أحط صحون الريوق اللي تريقته غصب عني .. وقلت : امبلى خلصت ..
يوسف : من ساعه قاعد أترياج فالصاله ..
حسيته قريب مني ... لا لا مو مني أنا .. قريب من قلبي وأقدر أكلمه بــ حريه ..
قلت له : انت اللي قلت تريقي .. عاد أنا مالي خاطر جان أكل شوي شوي ..
يوسف يتعبث فـ تلفونه وبدون اهتمام : انزين يلا بسرعه ...
طالعته بس للأسف هو لف وصد عني طلع بره المطبخ وراح يمشي .. كنت لابسه العباه من قبل جان الحقه .. حاولت الحقه بس هو خطواته سريعه وايد .. كثر ما اسرع وأجري يمكن بوصل له .. بس قلبه بعدني ما وصلت له ..
هذي أول محاوله وفشلت فيها .. ليش يا يوسف كل ما ابي اتقرب منك وأوصل للحبل اللي بيجمعنا تبتعد وينقطع الحبل ..شكلي لما أبي أوصلك يا يوسف بعاني وبتعب الين أحصلك .. المهم عندي أحصلك .. هذا أهم شي عندي الحين ..
لحقته وركبت ورا ..
يوسف شغل المسجل اعتقدت انه بيشغل قرآن ع الصبح أو اذاعه بس اللي فاجئني أغنيه ..
وكان الصوت وااااطي لدرجه يالله يالله اسمعه عاد ليش مشغل بلا أبا أعرف تميت ساكته وأتعبث في تلفوني ..
يوسف : تبين أمر السوبر ماركت أخذ لج شي ..؟؟
قلت له : لا مشكور
يوسف : تدلين ولا أنزل وياج ..
قلت له : لأ .. أدل ..
كان في خاطري أقول انزل .. هي انزل أباك بـ قربي أباك تحسسني بالأمان اللي فاقدتنه من دونك .. ابيك لي وحدي أنا ...... أنا اللي لجل حبك تعنا ..
بس ليتها يت منه .. سألني ويوم سأل اكيد يتريا مني جوابي اللي هو لأأأ ... ليش جذا يا يوسف ليش حرام عليك أنا محتاجتنك وايد ..؟
..
وصلنا صوب المستشفى ونزلت بدون ما أقول أي حرف أو أنطق بعد سمعته يقول ..
يوسف : بترياج فالباركنات ..
هزيت راسي بـ معنى انزين ونزلت ...
دخلت المستشفى حسيت روحي كبيره خلاص .. لازم أنا اللي أسوي كل شي لي أنا وأخواني .. رحت صوب الاستقبال وعطيتهم البطاقه وورقة الموعد وعقب الاجراءات البسيطه مال المستشفى .. رحت قعدت في صوب اتريا ..
وايد ناس أشكال وألوان ما أعرفهم .. البنات اللي في عمري مبين كل وحده معاها أمها .. بس أنا وين وهم وين عالمي يفرق عن عالمهم مليون درجه ...
ودخلت بسرعه عند الدكتور .. مدري ليش دخلوني بسرعه .. فحص الدكتور وعقب قال أروح مع النيرس لحجره يسحبون فيها الدم عسب يجيكونه كم الحين ..
ونحن ماشيين شفت يوسف واقف يكلم واحد بس شكله توه خلص .. وياه صوبي وهو مبتسم .. مدري هالابتسامه لي أنا ولا لكلام الريال اللي عنده ..
دخلت مع النيرس الحجره وسحبت الدم ويوم طلعت شفت يوسف واقف يمب الحجره .. رحت صوبه ..
استغربت توه يقول روحي روحج والحين ياه والله أمر عجيب وما يندرا له ...
يوسف سألني : ها خلصتي ..؟
قلت له : بس يفحصون الدم ..
يوسف : أوكي روحي الانتظار ويوم يزقرونج سووي لي مسكول ..
قلت له : انزين .,.
قعدت وعقب عشر دقايق زقرو اسمي .. حسيت بـ فخر يوم سمعت اسم ابوي يتبع اسمي حسيته موجود يمبي ومساندني .. في حياتي خطوه خطوه ..
دقيت ع يوسف ودشيت الحجره ...
الدكتور تم يطالع الورق بس .. حسيت هالشي خوفني وايد .. اربكني .. شوالسالفه مب قاعد يرمس .. بغيت أقول له .. ارمس ... فيني شي تكلم ..
بس سمعت صوت باب الحجره يندق
الدكتور : تفضل ..
يوسف : السلام عليكم ..
الدكتور وقف وتخاشم مع يوسف : وعليكم السلام
بعد ما سلمو وسئلو عن أخبار بعض
الدكتور : تفضل يوسف ...
يوسف : ها بشر شو النتيجه ..؟
الدكتور طالعني : لأ تمام عاد نواري شكلها بدت تتحسن وايد ..
أصغر عيالك أنا عسب تدلعني شو تتحرا روحك ..
يوسف طالعني مبتسم : هي ترا اليوم الصبح غصب مريقينها ..
حسيت يوسف يبا يتقرب مني .. بس يمكن هالشي قاله عسب يغير جو الكآبه اللي عام المكان
الدكتور : سوو جذا دوم عسب ما يصير بها شي هههه
حسيتهم يرمسون بالألغاز وأنا فيني شي ... ولا ليش كل هاللف والدوران ..
وقفت يدام طاولة الدكتور وقلت بحده : اذا فيني شي ارمس لو سمحت دكتور ...
الدكتور : نوره هدي توج اش حلاتج بلاج ..
قلت له : أنا روحي تعبانه .. ارمس فيني شي ولا لأ ..
الدكتور : صلي ع النبي يا نوره .. ما فيج شي ..
طالعت يوسف ورديت طالعت الدكتور وقلت : لين باجر قول جذا مب مصدقتنك .. دكتور ارمس لو سمحت ..
الدكتور : والله يا نور ما بلاج شي .. هاذيني حلفت بعدج مب مصدقتني ..
طالعته : دام حلفت صدقتك .. بس والله لو دريت انه فيني شي لا سمح الله ما بتلومون الا روحكم ..
يوسف يبا يغير الجو : يعني بتنتحرين ...
قلت له : مو بعيده علي ..
الدكتور : نوره شو هالكلام .. انتي تدرين اللي ينتحر شو عقابه ..
شفت يوسف ولا اراديا دموعي بدت تهل .... ما قدرت أمنعها ..
وقلت : ابا أعرف من بقالي بـ هالدنيا عسب أعيش .. ، شو الفايده من وجودي بـ هالحياه
كلها ..
يوسف طالعني وبدا يهز ريوله وحط ايده تحت ذقنه .. هاللي الله قدرك عليه كثر الله خيرك ..
الدكتور : نوره ما يصير هالكلام انتي عوده ..
طالعته مسحت دموعي : آسفه شكلي عكرت مزاجكم .. أدري وراكم اشغال غيري وأهم عني
وقفت وطلعت من حجرة الدكتور و دموعي قاعده تهل .. ورحت صوب المصعد تميت واقفه ..
الكلام اللي قلته كنت قاصدتنه كلمه كلمه و حرف حرف .. موجه لـ يوسف عل وعسى يحس بي وقلبه يحن شوي .. تعبت من صده تعبت ..
حسيت بصوت قريب مني ... مسحت دموعي بسرعه بسرعه ..
........: نوره ..
قلت : نعم ..
يوسف : تعالي نروح الصيدليه .. ناخذ الدوا ..
قلت له : مابا دوا أبا أموت ..
يوسف : نوره هـ الكلام حرام اللي تقولينه تعرفين شو يعني حرام ..
قلت : وانتو مب حرام عليكم .. ما تحسون فيني .. حسو شوي ع الأقل ..
حاولت أجمع الكلام بحيث موجه للجميع بس والله انه موجه لك يا يوسف كلهم يراعوني بس انت تعاملني جني وحده غريبه يوم تبا تمزح تمزح ويوم تحرج برايك جني لعبه في ايدينك ..
يوسف : نوره مب وقته هـ الكلام ..
قلت : عاد متى وقته خبرني ..
حسيت بايد تحوط ايدي ,. كف ( وسط اليد ) ساخن يحسسني بالأمان حضن كفي ..
وسحبني معاه بـ هدوووو ..... رحنا صوب العالم كله حسيت بالأمان ... معني وسط عالم وناس بس دام ايدي بيدك أحس روحي فمملكه وأنا ملكتها يشهد الله هذا احساسي ..
بس تفرقنا يوم عطا الورقه للصيدلي ,,
حسيت الناس كلهم يطالعون صوبي .. ويهي وارم محمر دليل ع البكا .. بس والله اني مب صايحه على شي تافه لا تحكمون علي بالمظهر أنا داخلي مجروح مشدوخ من أعز الناس .. هذا غير فراق أغلى ناسي ..
.. مره ثانيه حسيت بايد تحاوط يدي .. دافيه ، خشنه دليل ع الرجوله بس والله أحسها أنعم يد فـ الدنيا كلها .. هـ اللحظه حسيت بمعاني الفرح كلها اللي بـ الدنيا حسيت بـ الروح فيني ..
دعيت ربي ييي هاليوم اللي لازم ايده تحاوط يدي وأفتخر جدام الناس وأقول هذا حبيبي وأرفع راسي ..
مشينا ومشينا وأنا مب حاسه باللي حولي اللي يهمني الحين يوسف .. يوسف اللي يمبي .. اللي حبيته من فتحت عيوني بـ هالدنيا ..... حسيت بالدفا والأمان معاه .. مدري ليش ما استحيت وسحبت ايدي .. يمكن شعور بـ الأمان أو بالتملك .. أو يمكن حب .. الله يعلم .. أو الاحتمال الأكبر انها مبادره خير منه .. بس لأ هو اللي يت منه روحه .. يمكن يمكن ... ...
لأأأأأأأأأأأأأأأ لا تتركني تم وياي ... حرام عليك دخيلك لا تفارقني .. ولا تفارق خيالي وعقلي وبالي وكل شي فيني .. تم وياي محتاجتنك ..
للأسف ركبت السياره وأنا مستحيه منه هالاحساس ما ياني الا يوم تفارقنا ,, الا يوم ايده تركت ايدي ..
تذكرت قبل ثواني .. تمنيت اني أتم وياه طول عمري وانه ما يفارقني ما تمنيت انه تيي لحظه وايادينا تفترق .. تمنيته شمسي وحياتي وعمري وأرضي وسماي .. وتمنيته معي طول عمري ولا يفارقني أبد .. بس هذي كلها أماني .. بس أحلى أمنيه ... ربي يحفظه وين ما كان
استحيت منه وايد ,,, بس هو لأ ما أدري ليش .. المفروض هو اللي يعتذر هو اللي مسك ايدي بس هو مهما كان ولد .. لازم أنا كنت أسحب ايدي لما ضمها بيده .. بس أنا محتاجتنه .. وايـــد ..
قلت لازم أصلح غلطتي بس بشكل غير مباشر ..
جان أقول : أنا آسفه يوسف .. مدري عقلي شو صابه من رمسة الدكتور ..
يوسف طلع نظارته .. حسيته بيذبحني بحركته .. وقال : صار خير ..
يااااااااانااااااااااااس بيذبحني ... حتى في كلامه غامض وما يقول غير كلمه وكلمتين ..
الحين شو ابرر موقفه تجاهي على هالكلمتين ما فهمت منهن ولا شي .. حتى الاجابه ما عرفتها .. محيرني يا يوسف محيرني ..
وصلنا جريب البيت .. يوسف عطاني جيسة الدوا .. وقال كل واحد كيف أخذه ..
نزلت من السياره وقلت له : أنا آسفه ...
ما رد علي ولا حتى طالع صوبي لـ هالدرجه أنا عال عليه لهـ الدرجه يتمنى التخلص مني .. انزين خل يرمس مب لازم يجرح أو ينغز باالكلام .. خل يكون صريح ويقول ما نباج بينا .. بطلع بكرامتي أحسن لي ..
بندت الباب .. ولفيت قمت أمشي شوي شوي .. حتى ما صديت وراي ..
دخلت البيت ويوم أبند الباب .. شفت صوب سيارته بعدها واقفه بس الظاهر توه حركها .. كان يترياني الين ما أدش .. والله ما ينعرف لحد بـ هالزمن .. كل شي ألغاز ..
دخلت رحت الحجره رميت روحي ع السرير .. وقعدت أصيح وأصيح .. عل وعسى همومي تنغسل وتطلع مع هالدموع .. ويرتاح بالي ..
..........................
ما حسيت بروحي الا وأحد يهزني ...
لفيت : اممممم خلوني أرقد ...
الجوهره : نوريه نشي لين الحين راقده حشى ,,
رفعت راسي شفت الساعه تخرعت : لين الحين راقده أنا .. وبعدين نوريه في شكلج ..
الجوهره : هههه نشي تعالي نتغدا اليوم يوسف وياسر عندنا ع الغدا ..
قلت لها : صح انه البيت بيتهم بس لا غدا ولا عشا موجودين فندق فايف استارز اهني
الجوهره : هههه يلا نشي ..
رحت تغسلت وصليت الظهر اللي مب مصلتنه .. شفت الساعه 2 ونص ... نزلت ..
وأنا قاعده أنزل .. الحمدلله هذا حلم .. لو حقيقه شو بيستوي بي بموت يا ربيييه فضيحه ..
رحت صوب السفره: السلام عليكم
الكل : وعليكم السلام
قعدت بين الجوهره وجواهر .. تميت أكل وأنا ساكته ... حتى حرف ما نطقت ...
بس جواهر فاجئتني : أميه تراج راقده بالعباه كنتي ..
طالتعها مستغربه : أناااا ...؟
جواهر : هي شكلها مب فـ الدنيا الحبيبه ..
مرت عمي : صح يوسف الدكتور شو قال لك ...
رديت بالذكرى ورا .... ورا ... قبل ساعات ولحظات معدوده ..
هي اليوم أنا رحت المستشفى مع يوسف ... وتوني يوم نشيت رحت فسخت العباه ..
يعني ......؟ يعني اللي صار حقيقه مب خيال .. نعم حقيقه .. فضيحه الحين كيف بحط عيني بـ عين يوسف .. أصلا مالي ويه اقعد أكل وياه على نفس السفره ..
قمت وقلت : الحمدلله شبعت ...
يوسف : الدكتور قال وكلوها عدل عسب ما تطيح عليكم ..
قلت : الحمدلله كليت وايد ..
رحت الحجره .. التصرف اللي سويته وقمت من ع الغدا هالشي بيثبت ليوسف اني غلطانه .. ليش أنا دوم جذا ... ؟؟؟ بس يوسف قال لي تمي تغدي ليش ..؟ يبا يفهمني انه تفكيري غلط ولا انه هو الصح .. ولا شو ..؟ يا ربيييه احترت معاك يا يوسف احترت لي متى بتم جذا غامض وتحيرني معاك ..
اليوم خميس وما يباله مذاكره باخذ ريست تعبت هالأسبوع كله على بعضه مراجعه حتى ولو فالبيت بس لازم أذاكر .. مليت متى تخلص السنه ..
المغرب طلعت من الحجره وأنا أدعي اني ما أشوف يوسف .. مابي اشوفه أكيد بضعف يدامه .. هذا غير اني بفتشل عالسالفه .. اصلا كيف رضيت يزخ ايدي .. وهو ليش سواها من الأساس ..
............: نوار .......
لفيت وأنا متخرعه : بسم الله الرحمن الرحيم ..
جواهر : هههه لـ هالدرجه أخوفج أنا .. ؟؟
قلت لها : لا بس روعتيني والله ..
جواهر : ملانه أنا ميته من الملل
قلت لها : بس أنا قاعده أشوفج حيه ترزقين ,,,
جواهر : هههه تعالي نروح المطبخ ..
قلت : يلا ... المطبخ صار البيات الشتوي مالنه هههه
جواهر : الشتا خلاص بيودعنا ..
قلت لها : هي ترانا نهاية ثلاثه خلاص ..
جواهر : بيبدا الربيع والزهور بتتفتح والمياه بتجري فالأنهار والعصافير بتزقزق فوق الشجر ..
قلت لها بطنازه : وايد عليج ، ماماتي نحن فالامارات لا عصافير ولا أنهار ولا زهور هههه
جواهر : شي بس كله اسطناعي .. هههه وبعدين نحن أول ما نخلص الشتا على طول هوووب صيف ومن صيف ننقز شتا ..
قلت لها : مب ممرضنا غير ها أصلا ..
..........:بس الامارات حلوه بجوها هذا ..
لفينا وقلت : ترابعينا ...؟
الجوهره : أكيد وين ..؟
جواهر : البيات الشتوي ..
الجوهره : الشتا خلص دورو مسمى ثاني ..
قلت لها : اممم يمكن خيمة ينفع هههه
الجوهره : لايق ع الصيف ...
جواهر : شو تبون ناكل ...
قلت لها : سوي لنا أندومي ..
جواهر : اكيد بسوي لو شي ثاني جان شردت من البيت كله ..
قلت لها : أصلا نحن اللي ما نبا نتسمم ..
جواهر : بلا هذر بناتات اقعدن مكان واحد ..
الجوهره : يا حافظ دام هاي أبلتنا ..
قلت لها : والله اشتقت للأبلوات ..
الجوهره : والبنات ما اشتقتي لهم ..
قلت لها : وداد شوي معنها هب معاي هاك الزود ،،، لو تبيني أشتاق لـ حمدان ترا عادي ..
..............: منووووووووه حمدان ....
تخرعنا ولفينا ...
عموري يضحك : ههههه بعدها هاي حمده ما ودرتج ..
قلت له : ما ادري عنها بالطقاق .. ما تهمني هـ الحثاله ..
عموري : جوجو ماماتج تباج ...
جواهر : يايه يايه
الجوهره : تخيلي يوم الأحد يوم تداومين شو بتسو ..
قلت : بتي صوبي وتقول حوووبي ما حبي وحياتي وسلامات وأكيد تباوس بس أنا أمسح خدي وراها هههههه ..
الجوهره : لو بدالج اغسل بغسول نيفيا كااااامل وأخلصه فيوم ..
قلت لها : ههه مو بعيده أستخدم مقشر بابايا بعد ..
الجوهره : هههه ، جوجو تعالي الماي مالج على ...
........
حسيته يوم من أحلام أيام حياتي .. حسيت بالأمان فيه مع يوسف .. ليت هاللحظه تنعاد معك ، والله محتاجتنك وايد يا يوسف لا تتركني مثل ما تركوني أمي وأبوي ..
...............
مرن يومين الاجازه وأنا اتحاشى يوسف أحاول ما أقترب منه بـ قدر المستطاع واتحاشى نظراته اللي تذبحني وتوقف الدم بـ عروقي ... صح اني كنت حاسه بالندم ع الحركه اللي سويتها ورضيت أزخ ايده بس على كثر الندم أحس بأضعاااااف وأضـــــــــعاف السعاده اللي غمرتني .. .. .. وملأت حياتي يوم يوسف مسك يدي ..
راجعت حساباتي شفت اني مب غلطانه وما بيفهمها غلط لأني كنت منهاره ومو في وعيي .. وعقب يوم حسيت اعتذرت .. أكيد بيعذرني ،،، لأني تعبانه نفسيا وأي تصرف مني يمكن يكون كـ ردة فعل .. تطلع لا اراديا .. لا أكثر..
وهو احتمال ما يكون حب .. أعتقد انه عطف أو شفقه ..
هه آخر زمن يا نوره الناس يشفقون عليج .. وينج يا نوره الأوليه أحيد كنت أهز بلد بـ كلمه تطلع مني ..
أما الحين الحال تحول .. كنت أتمنى يتحول حالي للأحسن بس للأسف كلما له يتحول لأردى وأردى ..
يتبع ......