قيود عشك الشيخ

قيد الثاني والعشرون

كلتها وعفتة بحيرتة بصفنتة ونزلت سمعت طبكت الباب ما هتميت دفعت الباب مال اهلي ودخلت

امي كاعدة تحوك بالطارمة اول ما شافتني شهكت وكامت بسرعة تهلا وترحب بينا هو تحمحم ودخل سلم وهو واكف

::- تفضل شيخ تفضل ليش واكف

::- مشكورة ام حسن الله يزيد فضلج بس الله يشهد عدنا مشاكل بالديرة وما اكدر ابقة ع غير مرة وصلي سلامي للشيخ

حاولت امي رادت قافل ما يكعد عافتة باوعلي درت وجهي من عندة حجة وي امي::- زهرة شوي تعبانة هل فترة عدها نقص بالحديد هذا علاجها خلوها يمكم هل فترة

شهكت امي تباوعلي بخوف::- مالج يمة منيلج هذا المرض وجهج اصفر وذبلانة

سكتت ما جاوبت هو كال::- لا تخافين اذا استمرت هلشكل راح ادمر حياتها

ضحكت بستهزاء وفريت ايدي ع كلامة عصب وشراينة بينت طلع فلوس من جيبة وحجة::- هذا مصرفج خاف تحتاجين شي

يحجي وياي ينتر عبالك مان منية علية عفتة ودخلت لجوة وما خذت منة شي

شوية ودخلت امي والوجه اصفر::- شبي يمة زهرة بس لا البالي يمة انا ما عولت اطلعين منا بس لا رادة

باوعتلها بقهر حتى لو رايدة احجي الها بعد هذا كلامها تراجعت وسكتت

باوعت للبيت هدوء ردت اسئل سبقتني امي وحجت::- جا ليش ما جيتي لعرس زينب

باوعتلها متفاجئة زينب اتزوجت شوكت

::-شوكت زينب تزوجت

صفنت بوجهي::- يااا يمة غير عزمناكم مالج يمة

تنهدت وبقيت ساكتة حجيت::- يمة تعبانة رايحة انام لا تكعدوني لو الدنيا تنكلب

::- غير تفهمني شبيها بت الكلبة

::- يمة سقطت وحال الضيم حالي وطالعة الدنيا من عيني محد محتويني محد يعلمني ويسولف علية محد ينصحني ومن تصير شغلة كلها تصير براسي الله ياخذني وارتاح

حجيتها ودخلت لجوة تعبانة وهلكانة حيل لفيت نفسي وهل مرة لاول مرة ما افكر ولا اتعب نفسي لاول مرة افكر بس بنفسي وشنو راح يصير بيها وين بعد يصفة بية الدهر

غمضت عيوني ورحت بسبات فزيت ع صوت ربدة صرخت وعطت لكيت فاطمة نايمة فوكاي وتبوس وتحظن بية ضحكت

::- شلونج زهورة

::- هلا فطيمة شلونج حبيبتي

حظنتني تبوس وتحظن دخلت امي حجت::- ادري شل قضية ميتة صارلج شكد نايمة ابوج سئل عليج واجة ونام وكعد وراح طلع للديوان وانتي نايمة

حجيت بستغراب::- ابوي سئل شيريد?!

::- رجلج اتصل وكال باجر نجيكم انا وعمي ابو سلام

عرفت علمود يخطبون فاطمة انتبهت لفاطمة دنكت وابتسمت طلعت امي حجيت::- ها ولج شو تتلزلزين شبيج

ضحكت وغطت وجها بديها وحجت::- ما اعرف بس حاسني الموضوع علمودي

::- لا يحسج هو الموضوع علمودج

طفرت وعاطت::- يااااا ولله صدك

ضحكت عليها::- اي ولله صدك سلام خابص الدنيا خطبوها ما خطبوها

ضحكت والفرحة مالية وجها باوعتلة وصفنت ترمش بعيونها حجت::- انتي شعندج هنا غير تجين وياهم تخطبيني

ابتسمت وحجيت::- لا انا اخت العروس من طرفها مو من طرف العريس

حظنتني فرحانة وتضحك وانا بالف يا ويل اجاملها واسولف
::- شلونها زينب

::- صدك ع طاري زينب ليش ما اجيتي للعرس

صفنت بوجها شنو اكول الها تحججت بمرضي وهي من سمعت مسقطة طفل كامت تواسي وتحاول تنسيني

بعدها طلعت تحظر العشة النا دخلت خالتي بسعاد وحجت::- تعاي الشيخ يريدج

كمزت بسرعة وحجيت::- ثقيف اجة?!!

هزت ايدها ما عاجبها::- ابوج اقصد شوكت لحكتي تحتامين ع شيخ ولو هو فلوس ودلال ونوم وراحة طبعا ترحين جا مثل بناتي انطيتهن بس كونة رجل ويخلصهن من هل عيشة الزفرة

سكتت اباوعلها يعني بعمري ما خلتني مرتاحة جانت تحاربني ومن طلعت من عدهم وردت ارتاح حتى بهاي خلت عينها

حجيت بقهر::- وينة ابوج

::- بالغرفة روحي سلمي علية وبوسي ايدة لا تخلي يجعر علينا مالنا خلك ستونا جايين من الفرح

سكتت ودخلت منزلة راسي وافرك بدية طرقت الباب سمحلي ادخل دخلت جان كاعد ع جرباية بكل هيبة وجبروت حجيت::- السلام عليكم شيخ شلونك

ما حجة بس رفع ايدة تقدمت بوستها وخليتها ع راسي وحجيت::- شلونك بوي.. ااا شلونك شيخ

باوعلي وحجة::- رجلج ليش جابج لهنا

بلعت ريكي بتوتر وحجيت::- شيخ تمرضت وتعبت جابني هناية حتى ارتاح

باوعلي دنكت راسي حجة::- شوفي هلمرة سويتيها المرة الثانية قسم بذات لله اخابر رجلج يجيج ياخذج واحرمج من امج مو كلما تمرضتي اجيتي

بلعت ريكي وحجيت::- ليش اكو سبب تخليني ما اجي تعبت يابة واجيت ارتاح يمكم ليش تعبوني اكثر من تعبي

ضربني ع حلكي وعاط::- طلعي برة طلعي يجي رجلج باجر وتولين وياه ماريدن اشوفن ركعة وجهج امج وشفتها وهذا لسانج شطولة اذن صرتي زينة يلا ولي وكولي لذيج خالتج ماريدن زقنبوت انسدت نفسي من شكولاتج

كمت مهضومة مكسورة وطلعت من الغرفة دموعي صبو رحت بسرعة للغرفة تلفلفت وكمت ابجي ما اعرف شكد بقيت ع هل حال اخر شي نمت. و انا دمعتي ب عيني

ثاني يوم كعدتني امي وحجت::- خايبة بسج نوم اكعدي عيالج ع وصول وانتي نايمة

كمت بتعب ورحت طلعت من الغرفة غسلت وجهي وفاطمة وجها صاير اصفر ومرتبكة ابتسمت بوجها وطمنتها

علما رتبت نفسي فاطمة تحظر بالريوك جهزتة النا وكعدنا ناكل انا ويها

اندكت الباب حجت::- اهووو ولله ما بية افتح

ضحكت وحجيت::- يلا مسموحلج كعدي هنا انا راح افتح اليوم انتي عروس

ضحكت ودنكت راسها بخجل الباب تندك بقوة خليت الشال ع راسي وفتحت الباب ويصير بوجهي نواف بن عمي

ارتبكت وابتسمت مجاملة هو شافني وفتح حلكة ما مصدك حجيت بتوتر::- ها شلونك نواف

ما رد علية ومبين عصب عيونة طلعت من مكانها حجة بعصبية مبطنة::- هذا المسواك دزاه عمي اخذي

اخذتة من عندة وهو راح دخلت لجوة وانطيت المسواك لامي وبسعاد وانا دخلت لبست نفنوف لون ازرك حبري وبي وردة ناعم احمر ولبست باند( طوك قماش) لون احمر وضفرت شعري

اجت فاطمة هم لبست وخلصت وطلعت اجت امي كالت

تعاي عيالج وصلو هزيت راسي وطلعت وياها للديوان اول ما دخلت تلاكت عيونا درت وجهي من عندة

::- السلام عليكم

الكل::- وعليكم السلام

سلمت ع ابو سلام وسلام واصيل اخو سلام الجبير اما ثقيف عبرتة ولا كانو شايفتة

بعدني واكفة دخل ايسر هم سلم بس باوعلي دار وجها وانا هم غلست عنة وما سلمت

الشيخ التفتلي يباوعلي بغضب قابلتة بنظرات باردة بهت وجها وحمحم وفتح اول دكمتين من دشداشتة

طلعت وجبت الضيافة الهم وضيفتهم وصلت يم الشيخ كز اسنانة وحجت::- فوتي ولا تراويني وجهج

ابتسمت بستهزاء وحجيت::- واكفة هنا علمود اختي اما انت فما يهمني ان شفتي او لا لان انا ما شايفتك

صفن بوجهي متفاجئ وخرت وايسر اخر شي كاعد خليت الكهوة مقابيلة ع طبلة وعفتها ما قدمتها الة

باوعت للكل وترخصت وطلعت وطلعن وياي خالتي وامي

شوية سمعنا ابوي يكول::- حظرو السفرة يا بنات

حظرنا السفرة وكمنا ننكل بيها واحنا بالمطبخ نحظر اجت بسعاد صاحت لفاطمة واخذتها وراحت للغرفة

شوية وسمعنا صوت هلهولة ابتسمت وفرحت من كلبي ل
فاطمة اختي

طلعت وجها احمر من الخجل وفرحانة بعدها شربو جاي ورادو يرحون صاح الشيخ النا

دخلت وي بسعاد وامي حجة ثقيف::- هسة متفقين انشالله باجر العصر نجي ويصير العقد

اتفقو ع هل اساس فاجئني ابوي من حجة كدامهم::- يلا بوية زهرة حظري روحج ترحين وي عيالج

باوعتلة ودنكت راسي ما رايدة اروح هو من شافني هيج كال::- لا شيخ خليها هنا لفرحة اختها ما تسوة تروح هسة وترجع ويانا باجر

سكت ابوي بس ما قابل كوة علية نهضمت من شفتهم واحد يذني ع الثاني وما عندي مكان يئويني 

كمت وعفتهم حتى ما ودعتهم وهم راحو العصر امي وبسعاد وفاطمة راحو لسوك بغداد يجهزن لخطبة فاطمة

للمغرب يلا اجن ومشتريات اشكال والوان وفاطمة ماجرة فستان لون ذهبي بي نفشة بسيطة وبدون ردن كلش حلو

انا وصيت امي تجيبلي فستان وجابتلي لون احمر كلوش لجوة ركبتي

ما دققت بهل موضوع حيل لان كوة علية اضحك واسولف واكوم احظر مثل ما كال الشيخ نمثل ما نريد نخرب فرحتهم

مر اليون بسرعة ثاني يوم كعدتني بسعاد من الصبح حتى اروح وي فاطمة للصالون

وفعلا رحت وياها خلصنا ب1 جابو سيارة ورجعنا الطريق كلة وانا متوترة

دخلنا استقبلونا بالهلاهل والجكليت شفت جميلة فرحت رحت اسلم عليها دارت وجها عني وراحت

ظليت جامدة بمكاني روحي حسيتها تريد تطلع من القهر ليش ليش محد طلب مني اشرحلة ليش اتهموني بدون اي مبرر

وخرت عنها ووكفت ع صفحة واباوع بعيوني مقهورة البنات يركصن وفرحانات وانا واكفة ابتسم مجاملة

كومو فاطمة علمود العقد وعقدلهم ثقيف وتم العقد والهلاهل وصلت لاخر الشارع والركص والاغاني

اخر شي رادو يطلعون دخلت لجوة حتى ابدل اصلا طلع العرس كلة من عيني

انفتحت الباب ودخلت جميلة تقربت وانا اباوع الها حجت

::- خايبة ما اعرف اعوفنج وانتي زعلانة عبن احبجن

ابتسمت وتقدمت حظنتها وبجيت وهي تطبطب علية

::- زهرة وحك الله حرت خايبة شنهي السالفة شوداج لغرفة سريمد

باوعتلها وحجيت::- اذا احجي تصدكيني

::- اصدكج عبن ما رحت وعفتج متكدرة طول الحفل وانا الومن بروحي عبن ضوجتج احجي شنهو الجرة ريحي ضميري

تنهدت وبديت اسرد الاحداث الها وهي فاتحة عيونها ع وسعهن حجت::- اوكفي يمة يمة اوكفي يااااا يمممةةة عمتتت عينييي وللججج تحجججيييننن صدككك ولججج يمممةةة تعاالي لييية

طفرت سديت حلكها انهارت كامت ادك وتلطم ع راسها باوعت للباب همزين الهوسة بعدهي ما فضت واكو عالم::- جميلة بروح الحسين اسكتي فضحتينا

::- خايبة مو مال واحد يحجي ليش ما حجيتي للشيخ ليش خليتي يضلمج لج لا ليلة ليل ولا نهارة نهار متكدر حتى اللكمة ما يدخلها لحكة

سولفت الها الصار من اخذني ومن حبسني وشلون تعامل وياي وهي ارتفع ضغها وحرت بيها رادت تنجلط وكمت صحت لامي

التمن النسوان عليها وهي ذايهة روحها وتون ع كيفج وتبجي وتتحسب ولازمة راسها

خفت تحجي تقربت من عدها وحجيت::- جميلة ابوسن اديج لا تحجين خايبة امي تموت والشيخ انا بالعرس افهمة كلشي

غمضت عيونها شوية ودخل الشيخ ونا لازمة ايدها وراسها بحظني

تقرب عليها بخوف واحتضنها صاح لواحد علمود يجيب مضمد ورفعها ع جرباية

شوية وصاحو اجة المضمد سوو طريق بسرعة سحبت الشال وخليتة ع راسي

دخل المضمد وضغطها 20 على 12 همزين ما نجلطت خلالها مغذي وضربها ابرة وطلع طلع ثقيف وياه

باوعتلي وحجت::- خايبة زهرة وينج

تقربت الها وباوعتلي وكامت تبجي بنحيب::- خايبة زهيرة بداعة اميمتج لا تكولين للشيخ ولعباس تصير مذابح بيناتهم بداعة اخيج

فتحت عيوني ع وسعهن وحجيت::- لا جميلة عليج الله لا تحلفيني الشيخ لازم يعرف

حجت::- ولعباس اذا كلتي ما يصير خير خية بروح اهلج خايبة تصير كاتل ومكتول وانا اقنع الشيخ يرجعنج

تنهدت اباوعلها حايرة سكتت ما حبيت احجي اكثر بهل موضوع وخاصة هي وضعها ما يسمح جانت تنجلط الا شوية

حجيت::- يعني سرمد ما مات

تنهدت وحجت::- عسى مات هل جلب وفطس وخلصنا من عندة غير رايح لسهيوة الثولة ماخذها ومنهزم وما ندري وين وباي كاع

فتحت عيوني ع وسعهن::- وين اخذها بس لا يسوي بيها شغلة لا يا رب

تنهدت وبقت ساكت باوعتلي بتوسل وحجت::- مو تكولين للشيخ

::- الشيخ لازم يعرف كلشي عبالة انا خاينتة اريد ابين الة انا بريئة وبعدها انا اطلب الطلاك

رادت تحجي اجانة صوت الشيخ هو يكول::-  شعرف

جمدت بمكاني وجميلة شوية وتموت انتهت حتى وجها صار اصفر المكان ما مناسب وعدنا ناس ننفضح فكرت اكول الة بالعرس اصلا هو الخميس ما بقالة شي غير اربع ايام

سكتت وما جاوبتة عفت الغرفة وطلعت شوية ودك الباب رايد طريق سوينا طريق وطلع ساند جميلة سلمت وباركت وراحت

الاربع ايام ما اعرف شلون مشن بين فرحة فاطمة وبين قلقي وتوتري

اليوم عرسها اخذنا غراضنا وتوجهنا للعمارة الطريق كلة انا صافنة ع الطريق وماخذتني الحيرة شلون راح اواجه لشيخ شلون راح اكلة

تعبت ونتهيت والتفكير نخل راسي نخل وصلنا للهناك وبسعاد وفاطمة راحن للصالون واحنا دخلنا للبيت

جانت الانظار كلها علية تباوعلي بشمئزاز كلها نافرة وجودي من الجحية تمامة الحجية ام ثقيف وكلها

دخلت بوجهي لمطبخ وظليت وي جميلة احظر صار الغدة وفرشنا واجو الولد ياخذون الاكل دخل ثقيف بس شافني وكف يباوعلي

درت وجهي من عندة ضايجة تقرب وكف يمي راد يحجي عفت المطبخ كلة وصعدت لفوك سبحت وشسورت شعري ولبست فستان فيروزي ونزلت

كلهن ابنهرن بية وجميلة تفتر وراي وتصيح::- خايبة خل اقرة ايات من دهر صابج نازلتلي مصلخة

ابتسمت شوية واجت الزفة بين الهوسة وهاي رحنا لبيت ابو سلام لكيت فاطمة هناك طالعة مثل الملاك

بين الركص والتعب رجعنا هلكانين جميلة فارشة بغرفتها لبسعاد وامي وانا هم فرشت يمهن ونمت بثوبي بمكياجي حتى صلاة ما صليت من التعب

بين النايمة والكاعدة حسيت الباب انفتحت ونسدت غلست عبالي جميلة شوية وصارت ايد ع حلكي

صرخت بصوت مكتوم وكمت ارفس تقرب يم اذني وحجة::- كومي

تنهدت وكمت وياه طلعنا من الغرفة
باوعتلة وحجيت::- شرايد مني ها

ابتسم بستهزاء::- بعدج صلفة وتحجين

::- دام صلفة عوفني شرايد مني?!!

باوعلي بنص عيوني وحجة::- ما كسرني غيابج بكد ما كسرتني خيبتي بيج

وصعدنا فوك تفاجئت من لكيت سلام واخو اصيل وايسر وابو سلام موجودين بالصالة الفوك

وكفت محتارة سلمت بارتباك ردو السلام بثكل حجة ابو سلام::- بوية رايدينج تحجين شنهو الصار بينج وبين سرمد انتي بت اصيلة وانا اعرفن ما تطلع منج العيبة

تنهدت وحجيت::- تسلم شيخ

::- احجي بوية

باوعت لثقيف عيونة جمر بديت اسرد الاحداث كلها من اول تهديد لحد اعترافة وعلاقتة بين فتون

اقل ما اكدر اكول هم تخبلو ثارو وصار الصياح مالة والي وانا واكفة وجسمي ينكث وابجي بصوت

صاح بيهم ابو سلام وحجة بتعب وصوتة يرجف::- بوية احلفنج بعزير كلبج كليلي هذا الكلام صح

تقربت يمة وبجيت::- وداعة عافيتي وداعة نظر عيني عمو انت الوحيد الي صدكتني وطلبت مني تبرير جيب القران احلفلك علية وع عافيتي

رفع ايدة الترجف خلاها ع راسي وبجة::- بوية زهراء بوية شحست روحج بوية

النحيب صار عالي واسمع اصوات جاية من جوة صعدت جميلة تركض بس شافتهم ع هل حال وكعت بالكاع ع اركبها وتبجي وتطلع وتنعة بصوت عالي

لحظات والكل صار يعرف بالموضوع والبيت انعج بالصريخ والنواعي

الولد ثارو يردون يطلعون ابو سلام ما خلاهم حجة::- بوية لا تنسون هو بالدولة اقل شي يسجنكم ما عدنا دليل

كعدو محتارين وسلام يدك ع راسة ويصيح خوية زهورة بوية يا بعد روحي روحج

عاطت تمامة بوجهي وصاحت::- جذذذاااببةةة ابببنننييي ماا يسوييهااا ولله جذااابببةة

رادت تهجم علية لزمها ثقيف وحجة::- نفس واحد الج وحك من انزل القران ادفنج هنا طول عمرج تسترين لقذارة ابنج

دفعها وهي نهدت بالدواعي والصراخ ملخت شعرها وما خلت شي يعتب عليها

ابو سلام طلب يجتمع بيهم راحو واكثر من الساعين هم سوة

تعبت وصعدت لفوك شردت من امي وبسعاد الي يحققن بية

دخل ثقيف اول ما شفتة قبل لا يحجي كتلة::- طلكني

وكف يباوعلي بشموخ حجة::- يجرالج باجر من الصبح اجيب شيخ وينتهي كلشي ........يتبع

الـنـهـايـة 🌚❤️

الكاتبة شوك 🧚‍♂️❤️

الفاتحة ع روح المرحوم عبد ابن هدية يرحمكم الله💔💔

اقرو الفاتحة واهدوها لروحة واكون ممنونة منجن 💔