#طوبى "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ﷺ: “لا يزال لسانُك رطبًا من ذكر الله”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 بينما كان الناس يمدحون ثباتي وقوتي ، كنت أشفق على نفسي ،، لم يفهم أحد أني مجبر على الثبات والقوة ، لأنني محطم تمامآ ..
لا أملگ رفاهية الأنهيار🍃
________________________________________
الساعه 3:00صباحا..
يمشي في ممر لمصحة ما..يمشي بسرعه وع وجهه بادي الخوف والتوتر..
يمشي ويمشي..لين بانت عليه الشغاله متاعه مقعمزة ع كرسي وتبكي..
وصل فيها وقال بقلق بالغ:شن صار فيها؟
هي ناضت وقفت وقعدت تجاوب فيه وهي تبكي..
/نزفت دم كتير وهما دلوقتي بيزيدوها دم..
مختار بلع ريقه وقال..
/رضا وين؟
هي قالت:زمرة دمهم وحده راح معاهم عشان يتبرعلها..
مختار هز راسه وتنفس بعصبيه..بعدين مشي قعمز..
الشغاله قعدت واقفه وهي تبكي..
هو قاللها:تعالي قعمزي تعالي..
قعمزت جنبه وهي تقول..
/كانت خايفه منك وخايفه تخسرك هي بتحبك قوي..
خدي نفس عميق وطلعه وهو مضايق ع الآخر..
☘وفي الحجرة اللي كانوا فيها ياخدوا دم من رضا..
هو كان سرحان ومش حاس بيهم شن يديروا..
بين عيونه شكل وجهها..بين عيونها ردة فعلها ع كلامه القاسي..
رضا شخصيه جاده وجافه وقاسيه هلبه في بعض الاحيان..
طبيعة شخصية اساسا هكي..وخلطته بمختار زاداته على مابيه..
بس كان فيه جانب يدس فيه ومايبيش يطلعه..ويخاف يطلعه..بش مايوليش انسان ضعيف..والضعيف مايعرفش يعيش في الدنيا..
بس يجي يوم ورغم عنه الانسان لازم مايطلع أي جانب مدسوس في حياته خير ولاشر..
ورضا عمره ماتوقع ولاتخيل ان اللي طلع فيه المخبي مراة..
لا ومش أي مراة وحده زي صابرين..النوعيه اللي يكرهها ويزدريها زيه زي أي راجل..
واللي صار لرضا مع صابرين كان رغما عنه ومش بإرادته واقوى منه بمراحل..
"خلاص خوي كملنا"
هو سمع الكلمه هادي وناض..
قالتله الممرضه:خليك شويه تشرب حاجه بعدين تمشي دوخ هكي..
هو ولا اهتم للي قالاته كان يمشي بشي من التعب بس يقاوم يتخيل فيها وهي ع الارض ودمها محاوط بيها..يستسخف كلام الممرضه اللي خايفه عليه يدوخ من سحب شويه دم حسب وجهة نظره..
وصل وين مافي مختار والشغاله اللي شافاته وقالت..
/رضا..
مختار لما شافه لاحظ شحوب وجهه..
طول ناض خداه من ذراعه وقعمزه في مكانه..
رضا:حالي باهي..
مختار:وجهك شاحب ماخديت شي؟
رضا:شن صار فيها..
مختار:يعطوا فيها دم قال الدكتور مافيش خوف عليها جبتها في الوقت المناسب..
هو هز راسه بضيق بدون مايتكلم...
مختار حس ان في شي مايعرفاش قال..
/شويه وجاي..
ومشي خطوات للخلف اشر للشغاله تلحقه بعدين لف وكمل طريقه..
وهي طول ناضت لحقاته..
وخلت رضا وعيونه عليهم كان عارف مختار في شن يبيها..
☘الشغاله بضيق:اه اتخانقوا وجرحوا بعض قوي في الكلام..
مختار شاف لرضا لقاه سرحان..رد نظره للشغاله وقال..
/بريله..بعدين مشي طول..
هي تنهدت بحزن بعدين مشت بطريقها لرضا...
🍃🍃🍃🍃🍃
"هبلوا في القفطان هبال قلتلهم جاي من برا مش هني قريب ماتوا"
الجالي بضحكه؛زي اللي حصلتي فيهم فرصه.
نجاه بإبتسامه:سلمه اللي فاهمني..
هو تمدد ع السرير وقال:باهي سكري ضي بنرقد غدوة عندي سفرة الصبح..
وعطاها بالظهر..
هي قالت بضيق:باهي..
مشت طفت الضي ورجعت تمددت جنبه وهي تشوفله..
كان واضح تهربه منها وهادي مش اول مرة..وبدت تتأكد اكثر من كلام نسرين ليها..
وبرغم هكي مش مفكره تستسلم وتبي بأي طريقه تستغل الموقف وتخليه يولي لصالحها...
🍃🍃🍃🍃🍃
ولى مختار لرضا بحاجات يقيم بيهم نفسه..وقعد معاهم يراجي ساعات وساعات لين طلع الصبح..
خلوه وقتها يخش يشوف صابرين..
ولما خش شافها..وشاف حالتها قلبه الحقود السيء انوجع عليها..هي
تهمه وتعنيه ليها رابط بماضي قاعد عايش فيه ولعيون هالماضي مش قادر يفرط في صابرين..
حط يده ع شعرها وقعد يمسح عليها بعطف بعدين تنهد ومشي طلع...
☘مختار:اني مروح توا يدوب نرقد ساعه قبل السفر..صابرين في امانتك رضا ردبالك..
رضا هز راسه بصمت..
مختار:يومين ونروح ان شاء الله..شبح للشغاله وقال..حتى اني نوصيك عليها امينه..
هي قالت:ماتشليش هم..
هز راسه وقال: Bis später "إلى اللقاء"..
ومشي طول..وعيون الشغاله معاه..بعدين شافت لرضا وقالت..
/روح ارتاحلك كم ساعه وارجع الحراسه موجوده..
هو حرك راسه بالنفي..
هي تنهدت وقالت:براحتك...
غير نظره للمكان اللي مشي منه مختار وقال في نفسه..
"سامحني هالمرة بنخالفك بإرداتي"..
🍃🍃🍃🍃🍃
الساعه 12:30قبل الظهر...
الزوز كانوا جايات يجروا في الممر وهما يبكوا بألم وخوف..
وصلوا في حجرتها اللي كان هو واقف قدامها بروحه بعد ماروح بالشغالة للحوش بش دير لصابرين ماتاكل بطلب منه ماكلة المصحات والمستشفيات مايحبهاش ولايبيها هي تاكل منها..
نجاه ببكي:هني؟!
هو هز راسه وفتح الباب..
خشت نجاه ووراها مروة وهو سكر الباب..
صابرين كان راقده ع السرير لكن فايقه والتعب باين عليها..
لما شافتهم خاشات عليها انصدمت..
مروة ببكي:ياعمري! كله مني كله مني والله من هداكا اليوم ماقدرت نرقد ولانرتاح..
نجاه ببكي:ياعمري ياعمري..
والزوز جوها وقعدوا يبوسوا فيها ويعتذروا منها وهي مصدومه ع الآخر..
وطول جي لمسامعها جمله قالها رضا وهي كانت اكثر من أثر فيها..
《 تحاول تخرب حياة اقرب الناس ليها ودمرهم هادي مش بنادمه اصلا اللي مايسلمش منه اللي دمه ولحمه مافيش اوسخ ولاانجس منه》
دموعه نزلوا بروحهم دموع ألم وندم ووجع....
🍃🍃🍃🍃🍃
في هالوقت..
في صالة حوش لطفي الواعر..
اللي كانت مقعمزه فيه الجارة الحشريه رقيه وهي مش عارفه كيف صبرت الايام اللي فاتوا ع الجية لحوش الواعر بش توصل أخر الاخبار..
وكالعاده مطيره استقبلتها تبي تعرف منها اخر الاخبار مش قادره تقطعها...
وفردوس كذلك كان عندها فضول تعرف شن صار فالعرس...
الفضول نفسه كان عند طوبى..
هالمرة ماقعمزتش معاهم..لكن مرغمة قعدت تتنصت عليهم...
☘رقيه:وكان تشوفوها ياكبدي وكان تشوفوها هداكا اللبس الغالي والتسريحات والذهوبه عروسه حق..يوم الحفله لبست خلقة قفطان ياكبدي عمري ماريته كان في التلفزيون وهداكا الخناق متاع التاكم مدرق رقبتها كلها...
ومطيره وفردوس يسمعوا وهما مقهورات..
لكن طوبى هدا كله ماهمهاش هلبه..اللي اثر في طوبى بقوة الكلام اللي قالاته حشريه بعدين..
رقيه؛ياوخيتي ماتنعطى عمرها وفيها زين سبحانك ياربي مهتمه هلبه برويحتها هدا مش كلامي بروحي كلام كل من حضر غادي يخي في من قال الجالي عنده الحق الراجل وين يلقى مراة زي هادي تزهى في عيونه ويشد فيها وطوبى بنيتي صغيره وغشيمه ماعرفتش كيف تكسب راجلها..وحده تانيه غيرها راهي عرفت كيف تجبده ليها وتنسيه فية اصلها...
طوبى كانت حاسه بحرقه وغضب شديد..
مطيره بحده:بنتنا اللي يبعيها ماتشريه ولادور رضاه بنات الواعر وتعرفونا كويس مش غايبين فينا..وفي الاخير هو ماخدي كان اللي تمشي معاه طوبى مش ليه ولايستاهل ظفرها غير الله غالب نصيبها جابها ليه..
رقيه:وخيرها ماترفع عليه قضيه طلاق..
مطيره:ماتبيش المحاكم تبيها بتراضي ماتبيش الوجيج..
رقيه بعدم اقتناع:ايه صح صح...
وفردوس تشوفلها من فوق لتحت..
☘اما طوبى للحظه كانت حتفقد السيطره ع نفسها وتخش لرقيه وطلع غضبها كله فيها..لكن بكل قوة تماسكت وعقلها سيطر عليها وخلاها تولي هاربه لدارها بش معاش تسمع اكثر ووقتها اكيد مش حتقدر تتحكم في نفسها اكثر من هكي..
وين خشت للدار وسكرت ع روحها..
خدت نفس..بعدين التفتت للزيانه شافت المصحف..
طول خداته ومشت قعمزت ع سريرها وفتحاته وبدت تقرا..
ومازال كلام رقيه يتردد في عقلها..
وبعدين بدت تجي قدامها ذكرياتها السيئة في حياتها مع الجالي وكل ماتتفكر شي ليه علاقه بنجاة قلبها ينحرق حرق..لاحبا في الجالي ولاغيره عليه..بل قهرة وحسرة ع نفسها..
دموعها نزلوا ع صفحات المصحف..وهي تمسح فيهم وتقرا وتقرا...وبعد ماوصلت في سادس صفحه حست بالسكينه والهدوء والذكريات البشعه اختفت وكلام رقيه معاش ولى مسموع..
وجنه جنبها في سريرها راقده براحه وعمق ومش حاسه ولاعارفه بشي من اللي قاعد يدور حواليها...
🍃🍃🍃🍃🍃🍃
الساعه 2:00بعد الظهر..
في كوجينة شقة مختار..
كانت امينه توتي في غدي صابرين ع خشة رضا قال..
/كل شي واتي؟
هي ابتسمت وقالت:ايوه..
قرب منها وقعد يشوف للحاجات بعدين قال..
/عصرتي مع البنجر فرواله تحبها هي..
امينه بإبتسامه:ايوه ياسيدي..اسم الله عليك عارف انها بتحب الفراوله..
هو عقد حواحبه ووجهه تغير لونه لما جاوبها..
/قدام وجهي 24ساعه طبيعي نعرف حاجه زي هادي..
هي بضحكه قالت:طيب يللا ساعدني وخد دول للعربيه..
هو قال:درتي سلاطه عارفتيها انتي ماتقدرش تعيش من غيرها..
قعدت تضحك..
هو قال:شن يضحك فيك؟
هي بضحكه؛ولا حاجه يللا شوف شغلك..
هو خدي الحاجات
وملامح الامتعاض باديه ع وجهه وامينه لحقاته وهي تضحك بكتمان...
🍃🍃🍃🍃🍃🍃
وفي شقة المهدي اللي كان مقعمز مع صغاره ويتغدوا..
يزن:ماشاء الله بوي وليت حريف..
ابتسم المهدي..
سدرة:حق بابا ماكلتك ولت زي العسل..
المهدي:صحتين..
ومحمد ياكل بصمت تام..وبوه يسرقله في النظر..
شويه قالت سدرة:شريت اني وعمتي نانسي هديه لتاله ..
قام محمد عيونه في سدره..
يزن:علاش؟
سدرة:تاله ولت تلبس في حجاب وامها بديرلها حفله اليوم..
يزن قعد ياكل بدون مايعلق لكن محمد بس ماسمع اخته شن قالت تفكر قصة مروة مع الحجاب اللي هو كان البطل متاعها.
تنهد من قلبه..يزن وبوه شافوله بعدين المهدي قال..
/صحة ليها...
سدرة ابتسمت..
محمد:اني بعدين نوصلك..
سدرة؛باهي..وكانت عارفه خوها علاش يبي يوصلها هالمرة..
زي مايزن كان عارف..
اما المهدي فكمل ماكله وعقله راح لولد اخته خديجه اللي شافه اليوم يهيج في سيارة مش ليه مع مجموعه شباب واضح عليهم انهم غير اسوياء..وقرر يحط وراه من يراقبه ويعرف شن يدير بالزبط...
🍃وامها لاهيه بعرس عيت خوالها وناسيه حتى بنتها اللي معاها في نفس العرس اللي مابطلتش تصوير وكل صورة لازم تبعتها لأسماء بش تعطيها رايها فيها...
🍃🍃
نجاة بعد مازارت اختها في المصحه روحت لشقتها وجهزت نفسها وولت لحوش خوال راجلها بش تكمل باقي العرس..
وان كانت قاعده مفجوعه ع اختها بس حياتها مازال اهم..
اما مروة اختهم اللي سمحلها راجلها تمشي تزورها بعد محاولات توسل رفض يخليها تمشيلها مرة تانيه...
☘ومش قاعد توا مع صابرين في الحجره حد غير أمينه اللي توكل فيها..
صابرين بضيق؛خلاص والله انبشمت..
امينه؛معليشي حبيبتي انتي خسرتي دم كثير لازم تاكلي عشان خاطري..
صابرين دمعوا عيونها من كثر ماتأثرت بمعامله امينه ليها وقعدت تاكل غصبا عنها ع خاطرها..
بعد ماكملت خدت العصير وقالت بقرف..
/خي البنجر مانحباش..
امينه بضحكه:عاصرة معاه فرواله وحاطه عسل اشربي بلاش دلع..
هي ابتسمت بقلة حيله وقعدت تشرب.
عجبها وشربت لين كملاته..
امينه؛بالشفا والهنا ياحبيبتي..وقعدت تلم في الحاجات..
وصابرين ولت رقدت وهي تتفرج عليها..
بعد ماكملت قعمزت وهي تقول..
/هاه حاسه انك احسن..
صابرين غمضت عيونها وفتحتهم بمعنى "ايه"
امينه؛الحمد لله..ماتبقيش تخوفينا عليكي تاني انا مبارح كنت حموت يابنتي..
نزلوا دموع صابرين وقالت..
/الاستاذ عنده علم؟
امينه؛ايوه كان عندك نص الليل للصبح ودخل شافك وبعدين مشي اصله مسافرة النهاردة..
صابرين:ايه صح..باهي خواتي من خبرهم..
امينه ابتسمت بحزن وقالت؛رضا..
صابرين غمضت عيونها وبدت ع وجهها ملامح الغضب..
امينه:حبيبتي ياصابرين..كل اللي قالوا امبارح من ورا قلبه هو كده كلامه دايما قاسي مع اللي يتمادى معاه..
صابرين:ارجوك ماتكلمنيش عليه ماتجبيش سيرته بكل..
امينه تنهدت وقالت..
/حاضر ياحبيبتي اللي يريحك اعمله..
لفت صابرين وجهها للجهه التانيه وفتحت عيونها ودموعها قعدوا ينزلوا...
🍃🍃🍃🍃🍃🍃
الكلام القاسي اللي يكون نابع من الخوف...
خوفك ع حبيب..ولاقريب..ولاصديق..
خوفك ع شخص ممكن مايعنيلك اي شي في الحياة بس ماتبيش تحمل ذنبه في رقبتك..
بعد العصر..كانوا الكل في شقة فايزة بس يحضروا الحفله اللي حتى مناسك مابتش تتخلف عنها...
بس طوبى الوحيده اللي مامشتش لتوا..
علاش!!!؟
🍃في مربوعه حوش بوها الخارجيه كانوا موجودين جدها وخالها المحجوب مع التارقي..وهي واقفه ورا الباب تسمع فيهم..ماتتصنتش بل حاضرة معاهم لكن من ورا الباب..
عبد القيوم؛الراجل مافيش من يعرفه غريب ع المنطقه كلها مش الشارع بس..
المحجوب:حتى اني وصلت للنتيجه هادي لمادورت وراه..
عبد القيوم:تمام الحاجه هذي ماخلتكش تشك في شي!؟
طوبى بدت ع وجهها ملامح القلق..
علي:تبي تقول في حد وراه..
عبد القيوم اللي كان نوعا ما منفعل في الحديث شويه قال..
/مليون في الميه..
المحجوب:من تقصد؟
عبد القيوم:هو واحد مافيش غيره..
قعدوا المحجوب وعلي ساكتين وهما يفكروا..
هني تكلمت طوبى وقالت..
/حول مختار من راسك مش هو..
هو لما سمع صوتها خاف قلبه يفضحه بكل مافيه من قوه تجاهل مشاعره وقال لعلي
/ياحاج مافيش غيره..
رفعت طوبى حاجبها لما تجاهلها..
المحجوب:تعرف لو الشي هدا صح...معناها مختار دار هكي قصدا لهدف واحد بس..
علي؛يبي الشريك الحقاني في المطحن..
المحجوب:مختار هدا خطير هلبه واني عارفه كويس لكن صدقا ماخطرش ع بالي اللي داره بكل..
"ومن قال هو علاش جزمتوا مش هو اني متأكده"
هو عقد حواجبه وشاف لخالها..
المحجوب قال:متأكده من شني بالزبط؟ حكي معاك في حاجه زي هادي؟
"لا..لكن مختار توا يبي يكسبنا وبس وقعد يمشي علينا ويجي ويحاول يرضينا بأي شكل كيف يدير حاجه زي هادي تخليه يخسرنا قبل ليكسبنا حولوا من روسكم الاحتمال هدا في غيره منطقي اكثر"
علي:زي شنو؟
"زي ان يكونوا عيلة شنيبه وراها"
عبد القيوم:كيف يعني يفتحوا مطحن تاني بش يحاربونا بيه!؟
كان كلامه فيه شي من السخريه استفزها لكن تمالكت نفسها وقالت..
"اكيد لا..اللي نقصده انهم
يكونوا متفقين مع صاحب المطحن بش يحاربونا في السوق تصير ولاماتصيرش!؟"
عبد القيوم زاد عصب لما حس بالأحراج لأنه بسبب توتره والحاله اللي هو فيه مش قادر يركز ولايفكر كويس..
المحجوب:بصراحه منطقي ووارد جدا..
عبد القيوم؛نعرف المهدي كويس مش هدا اسلوبه..
"سامحني حني نعرفوهم اكثر "
عبد القيوم كانت عصبيته تزيد وهو يصارع فيها التزم الصمت وقال جدها..
/كلامك يخش الدماغ يابنتي هادوا يديروا كل شي..
المحجوب:باهي والحل..
كلهم قعدوا ساكتين..شويه وكسرت الصمت بقوة لما قالت..
"ننهوا الشراكه"
هو انصدم..
وجدها وخالها شافوا للباب..
اللي كانت وراه ودموعها في عيونها وهي تتكلم بقوة..
/كل شي زي ماليه بداية ليه نهايه وعمر محدد وهدا حد عمر خدمتنا في القهوة ربك مش رايد نكملوا..
عبد القيوم كان دمه محروق مايبيش يستسلم ويضيع كل شي شاف لعلي وكان يراجي فيه يتكلم..
وعلي تكلم وقال..
/معاها في اللي قالاته..
عبد القيوم بعصبيه مكتومه:انا مش راضي..
"معليشي الحكايه مش عناد هي خلاص وصلنا لأخر الطريق نفضوها وتمت"
هو رد عليها بغضب..
/عناد شني! انا الفلوس اللي حطيتهن عليه مش لاقيهن في الشارع بش نطلع بخسارة كيف هالخساره..
"مافي حد قالك شاركنا"
عبد القيوم؛وانا ماطلبتش رايك لما شاركتكم..
علي والمحجوب شبحوله بنظرات صدمه ممزوجه بالغضب..
هو نفسه لما استاقظ لروحه كيف كلمها وقدامهم تمنى الارض تنشق وتبلعه..
بصوت غاضب علي قال لطوبى..
/خشي داخل خلاص..
معاش انسمع صوت طوبى نهائي..
وقف الحاج علي وخبط بعكازه ع الارض وقال..
/تو ندبرلك في فلوسك ونفضوها وهدا اخر كلام..
ومشي طول طلع من المربوعه وهو في قمة الغضب منه ومن طوبى اللي تجاوزت حدودها في حضورهم..
عبد القيوم غمض عيونه بشده اسفا..
والمحجوب قاله وحتى هو كان مستاء منه..
/خسارتك عليا..سامحنا.
فتح عيونه وناض ومشي طلع من غير مايقول كلمه..
طلع من الحوش بكل وكان مخنوق لأبعد حد..
من الضغط النفسي فقد الاتزان والحكمه اللي كانوا عنده وتصرف بطريقه عمره ماتعامل بيها مع حد ع قد مامر بيه من مشاكل..
وصل في سيارته وركبها وشغل السياره وتحرك طول..
وهدا كله كان على عيون المهدي اللي كان واقف قدام مطحنه وربيع اللي كان واقف قدام المطعم متاعه...
🍃وفي حوش لطفي الواعر..
علي بغضب:قدرناكم ومكانكم وعطيناكم الحريه وعارفين حني بناتنا كويس وكيف ربيناهم..اسلوبك اليوم والطريقه اللي تكلمتي بيها هانتنا حني قبل غيرنا...
طوبى تسمع وراسها لوطا وشاده دموعها بقوة..
علي:الهي ببنتك وقرايتك ومعاش ليك دخل بشي تاني ..
وخبط بعكازة ع الارض بقوة ومشي طلع...
اما هي مشت بعصبيه للدار وخشتلها وسكرتها عليها...
🍃🍃🍃🍃🍃
وفي شقة فايزة دارو حفله حلوة لتاله عطوها فيها حتى الهدايا وهي زادت فرحت بالقرار اللي خداته وحست انها دارت انجاز كبير..
مع المغرب كان لازم سدرة تروح..جاها محمد وكان يستنى فيها قدام العمارة في الوقت اللي درست فيه سيارة مالك قدامها يراجي في مناسك..
وين شاف محمد نزل مرش السياره وقعد يشوفله بحده من ورا النظارات..
ومحمد متجاهل وجوده لكن كان من داخل محروق بغيرته لما حس ان مروة حتنزل مع مناسك بس تسقدها..
وهدا اللي صار..
نزلت مروة مع مناسك وقدامهم كانوا تاله وسدره..
الزوز وين وصلوا في الباب وشافوا محمد..
سدرة توترت..وتاله اكثر منها لما شافت مالك في السيارة..
ع جية مروة ومناسك..
سدرة:تصبحي ع خير تاله..
تاله:وانتي من اهله..
وطلعت سدرة لخوها اللي قاعد واقف وعيونه ع مروة..
وعيون مالك وكان يلقى ينزله..
مناسك لاحظاته التفتت لصاحبتها وقالت..
/نتلاقوا غدوة ان شاء الله..سلام..
مروة:سلام..وكانت تتجنب تشوف لمالك..
ركبت مناسك للسيارة وكان خاطرها هلبه تشوف مؤيد لكن ماقدرتش..
مناسك؛هيا..
مالك وعيونه ع محمد راجي شويه..
ويشوف محمد يقدم لباب العمارة اللي جايه بتسكره مروة بعد ماخشت وشده..
هي انفجعت..
وهو قال:نبيك في كلمتين بس..
مالك نزل من السياره وقعد واقف في الباب يشوفلهم بغضب..
ومناسك تشوفلهم بخوف..
مروة بحده:اسمع برا احسنلك ماتخلنيش نلم عليك الشارع..
محمد برجاء:كلمتين بس والله مامعطل...
مالك:شن في ياشاب شن عندك معاها.
التفت محمد وقاله بحده:توكل ع حالك توكل..
مروة :مافي شي ياريت تروح..
محمد التفت وشافلها بحده هي بكل قوة سكرت في وجهه الباب..
محمد غمض عيونه بغضب بعدين فتحهم وشاف لمالك اللي ابتسم ع جنب بعدين ركب السيارة وتحرك طول..
سدرة بخوف:محمد..
هو بعصبيه جبد يد اختها ورفعها معاه..
🍃في الطريق..
مالك؛شن قصته العيل هدا شن يبي منها؟
مناسك؛ماحكتليش عليه قبل ولما سألتها عنه مابتش تجاوبني لكن حسيت انه عينه عليها..
هو شد الدومان بقوة..وزاد في السرعه شويه..
ومناسك تقول في نفسها من الخوف..
"ياربي مازال نبي نعيش"..
☘☘☘
اما مروة فالموقف ضايقها هلبه..وحست روحها خافت مالك يفهمه غلط...فكرت تتصل بمناسك وتسألها بطريقة غير مباشرة لكن في الأخر تراجعت...
🍃🍃🍃🍃
"خشيت عليها لقيتها راقده وجنه جنبها"
مطيره بقلق:اشبح شن صاير حتى بوي جوه مش عاجبني بكري كان عادي توا يبان طايرتله...
فردوس:حتى خالي روح بنبيله طول..
اريج:قصدكم هي قعدت معاهم يعني صارت بيناتهم دوة..
مطيره:ايه..لكن زعمه ع شني!؟ ع موضوعها؟
اريج:اكيد مافيش غيره..
تنهدت فردوس وقالت..
/حسبنا الله ونعم الوكيل وخلاص...
🍃🍃🍃🍃
"نتصل بيك من بكري يعطي فيا مقفل"
المهدي:معناها يبي يقعد بروحه..
ربيع هز راسه وهو مضايق..
والزوز في بالهم يدور تساؤل شن اللي يخلي عبد القيوم يطلع من حوش الواعر وهو في حالة غضب..
ومافيش واحد تجرأ يبوح باللي يدور في عقله كل واحد فيهم كان متوقع ان التاني يعرف واكيد حيكون سر والتارقي مأمنهم عليه..
🍃وعدت الساعات وعبد القيوم مافيش منه حس ولاخبر..
المهدي وربيع اللي هدا روح لحوشه ورقد وحطوا في بالهم انه في الاخير حيروح ماعندهم علاش يخمموا زي مانقولوا...
🍃اما طوبى التزمت الصمت والتهرب ومابي حد يضغط عليها عارفين ان نفسيتها تاعبه من الاساس غير قاعده تكمد في داخلها وتظاهر بالعكس طول الايام اللي فاتت..
🍃🍃🍃🍃
وبعيد عنهم بعد نص الليل..
كان رضا مقعمز قدام حجرة صابرين يقرا في كتاب..
ع طلعة امينه بتليفونها قالت..
/مكالمه من مصر هي نايمه جوه ..
ومشت طول...
هو تبعه بعيونه لين تباعدت وبدت تتكلم بالتليفون..
غير نظره للدار وقعد يشوفلها للحظات..
بعدين ناض ومشي بخطوات خفيفه للدار خشلها وسكر الباب وراه...قدم لسريرها بهدوء وقعد يشوفلها كيف راقده وملامح التعب قاعده ع وجهها..
تفكر شكل وجهها لما اسعفها ملامح الحزن قطعت قلبه...
كان متأسف ومستاء من نفسه هلبه لو ماتت كان هو حتما الجاني الوحيد عليها من وجهة نظره..
تنهد وقال..
/مش عارف علاش نزلت يومها..شن خلاني ننزل؟.. والله ماكنت نبي ننزل هداكا الوقت بس قعادي في السيارة خنقني..ياريتني كنت تحملت ووخرت شويه قبل لتجي..
🍃كان يحكي ع اول مرة شاف فيه صابرين..
في يوم شتوي جايه تقابل فيه مختار لأول مرة في واحد من المطاعم..
رضا كان مفروض ينزل ويخش بعدين..
بس هي عطلت وقتها..وهو نزل في اللحظه اللي جت فيها..
عيونه جو عليها وهي تمشي وتشبح للطريق..وبعدين تنزل نظرها لبرك الميه الصغيره اللي تتخطا فيهم بالبوت اللي كانت لابساته..
شاف عيونها اول حاجه فيها ومعاش قدر يشيح بنظره عنها لحقها لين خشت..كان ع باله انها وحده عاديه..
هو اصلا خلا نظراته عليها غصبا قهرا تكون مجرد نظرات اعجاب عابر...ولما عرف بعدين انها صاحبة مختار اشمئز منها وكرهها...ولما ولت عند مختار كان خايف من قربها منه خاف تسيطر عليه وممكن تزيحه من طريقه هو هكي فكر وقتها بس اللي صار العكس تماما وتأثيرها كان اقوى بهلبه مما كان متوقع...🍃
رضا تنهد وقال:كله اللي قلته سببه واحد بس خوفي عليك..وكرهي للطريق اللي ماشيه فيها حسيتها مش ليك حسيتك مفروض تخليها وعندي الغايه تبرر الوسيله..تعرفي شن خاطر في بالي توا..خاطر في بالي نخطفك..والله نبي نديرها ونهرب بيك بعيد عن العالم الاسود اللي عايشين فيه..تعرفي لو نعرف انك متقبلتيني مجرد قبول بس والله نديرها وماندور فيها لامختار لاغيره..لكن اللي قاهرني وحارقني انك....تنهد من اعماق قلبه بعدين وخر خطوة ووهز يشوفلها بضيق وفتح الباب وطلع وسكره وراه..
وهي فتحت عيونها ع وسعهم بصدمه حست روحها تحلم اللي كان هني رضا!!؟ شن اللي كان يقول فيه!!؟
لالا هدا حلم..اضغاث احلام مش حتى حلم..مستحيل!!
انفتح الباب هي طول غمضت عيونها..وخشت امينه ومشت طول لسرير المرافق وولت رقدت..
ورجعت صابرين فتحت عيونها وقاعده عايشه حالة الصدمه عدم الاستيعاب...
🍃🍃🍃🍃🍃
تاني يوم...
روحوا عبد الرؤوف واسكندر من تركيا بسميرة وغرفه..
ومع العصريات كانوا نساوين حوش الواعر في حوش غرفه
اللي استقبلتهم بلوك جديد ابهرهم..
الاء بضحكه؛وااو وااو طالعه عسل الصبغه مغيراتك هلبه..
قعدت غرفه تحرك في شعرها وهي تقول..
/حق!؟
اريج بإبتسامه؛مش انتي بكل متغيره مش غير الصبغه والقصه وجهك..
مطيره:مدايرة لوادجو..
ضحكوا..
غرفه بضحكه؛خشوا خشوا قعمزوا تو نهدرزوا..
خشوا كلهم للصالون..وطوبى طول الوقت عيونها ع اختها وع التغيير الشامل اللي طرأ عليها..
كانت حابه شكلها وطول الوقت تبرك عليها..بس كان في داخلها غصه..لو كانت زواجها طبيعي ومستقر راهو عاشت حالتها في كل وقت..معروفه طوبى زمان بحب اهتمامها بشكل ونفسها...
بس مادام الروح من داخل تعبانه ومحطمه مهما يحاول يرمم شكله من برا حيبان فيه الخراب الداخلي اللي عايش فيه..
بس طوبى حاليا قاعده تقاوم وماتبيش تستسلم وتسلم وتعيش دور المهزومه..هالدور البغيض اللي مايليقش بيها...
قعمزت وهي تتفرج ع غرفه وتسمع في هدرزتها عن السفره وكان تتكلم هلبه عن عبد الرؤوف وين تجيب سيرته حتى من عيونها يضحكوا وتبان فيهم لمعة الحب..
وفي نفسها قالت..
"يارب دوم عليها..واجبر قلبي جبرا يليق بك"
وشويه وناضت جابت ولادها ولهت بيهم طوبى اللي كانت قريب تاكلهم من كثر ماتحبهم..وفاقت بيها جنة اللي خلتها تسيب صغار خالتها
....
🍀"وتوا جي دور الهدايا"
خشت عليهم وهي قايمه زوز شناطي كبار ناضت اريج ساعدتها في وحده فيهم..
حطوهم ع الارض..وفتحت غرفه الاولى وبدت طلع في الهدايا..
اول شي عمتها شرتلها بالطو شتوي وشال وزوز كنادر وشنطه وكله من ماركات مشهوره..
بعدين اختها فردوس ماليه وقونه شتويات وزوز كنادر حتى هي وبالطو شتوي قصير..
بعدين طوبى جابتلها زوز كابات شتويه تنحط حطان فوق العبايه او الجلابيه...وبوت شتوي حاطي..وساعه..
وكانت لجنة حصة الاسد لبس ع توكات ع روائح ومستلزمات غرقتها بالهدايا اللي فرحت بيهم طوبى هلبه...
واخر شي اريج والاء اللي طلبوا منها تجيبلهم حاجات معينه بين لبس ومستلزمات...
مطيره:ربي يحفظكم ويبارك في رزقكم يارب..
فردوس:ان شاء الله مانفقدك ياغريفه..
غرفه:خيركم حسستوني درت حاجه كبيره مافي شي يسواكم عندي..
مطيره:لا شكله اللوادجو من برا ومن داخل..
قعدوا يضحكوا..
طوبى بإبتسامه؛ربي يفتح عليكم ويجبر بخواطركم يارب..
غرفه بإبتسامه؛ياقلبي جنونه بنتي واني امها راهو..
طوبى:اكيد..وهالفرافيط حتى هما وليداتي..وقربتلهم وقعدت تلعب فيهم..
غرفه ضحكت بعدين قالت..
/صار عرس صفو شهر 11..
فردوس:ايه..
غرفه؛خسارة تعرفوا شريت قفطان وطاكم للعرس...القفطان يبي جسم مليح قبل بنروجم ع خاطره...
آلاء؛شوقتيني نشوفه..
غرفه:هي راجي شويه..وناضت ومشت خشت داخل..
مطيره؛فلسنا بيهم..
الاء: عادي روفا عنده عمتي وكريم هلبه..
مطيره:ناري ع عزوز مسكين..
ضحكوا وهي ابتسمت بخجل..
ع جية غرفه بكيس كبير لونه اسود وكيس تاني متاع مجوهرات صغير..
حطت كيسة المجوهرات ع الكنبه..وفتحت سوسته غلاف الفستان بعدين طلعاته..
نظرات عيونهم كلها كانت بين الذهول والانبهار..
الفستان كان اسود كله يلمع يجي ضابط ع الجسم من فوق في طرف ينزل لوطا طويل...
الفستان كان مذهل بكل معنى الكلمه ..
مطيره بدهشه:قداش حطيتوا فيه هدا ياكبدي!
غرفه بضحكه؛مش مهم الغالي يرخصلي..
طوبى:الطرف الفوقاني لاصق فيه؟
غرفه:لالا يتحول..شوفي..وفكت الطرف وحطاته ع الكنبه..
وهني بان الفستان من فوق صدره مفتوح بالعرض يعني كان ساتر مش كاشف...وربع كم...
الاء:روعه روعه روعه وخسارته..
غرفه:نلبسوه في عرس تاني ان شاء الله..
ردت الطرف ورجعت دست الفستان في غلافه وحطاته ع الكنبه وخدت كيسة المجوهرات وطلعت منها علبه وقالت /شوفوا هالبدعه..
وفتحاته وقعدت توري فيهم..كان طقم لولي سلسال قصير وحلق وانسيال وخاتم..
فردوس بإنبهار؛حقاني هدا؟
غرفه بإبتسامه غرور مصطنعه؛ياعيني مالا شنو..
طوبى؛الله يبارك الله يبارك..
مطيره:تلبسيهم بالهني ياربي..
غرفه:تسلموا يارب..
اريج؛باهي خديتي بديل..
غرفه؛ايه..خل ندس هادم ونجيبه..خدت الحاجات ومشت خشت بيهم داخل..
الاء:القفطان خيال خيال..
اريج:تطلع فيه زي السلطانات كان لبساته..
جتهم غرفه وفي يدها فستان لونه احمر قاني كان جميل حتى هو وتفصيله حديث..
وكلهم عجبهم هلبه وقالولها انه طالع ع صبغة شعرها..
ومنه قعدوا يحكوا ع عرس صفاء وشن بياخدوله وطوبى كانت مستمعه قاعده مستثقله الكلام عن الافراح وحاطه في بالها انها حتحضر العرس بدون مبالغه في طلتها...
🍃🍃🍃🍃🍃
وبعيد عن الشارع بس في نفس المنطقه..
قدام الجامع كانوا مقعمزين حسين وجده علي ويحكوا في موضوع مهم..
حسين؛تبي الحق ياجدي الراجل ماغلطش حرام الفلوس اللي حطهم يريحوا عليه..
علي:من الاول حطيناه في الصورة وقلناله مرات المشروع ماينحجش ومايطلعش منه كاسب..
حسين:تمام لكن انتم مشيتوا كويس في البدايه..
علي:تبي الصراحه ياولدي اني المطحن هدا معاش يعنيلي في شي بعد وفاة عمك الله يرحمه زهدت فيه والله ماعاد يوزن عندي غرام..
لاحظ حسين لمعة الدموع في عيون جده وقاله..
/يعني محسوم الموضوع؟
علي:ايه قوله خلاص..
حسين سكت وهو يفكر...
وعلي حتى هو سرح بتفكير للماضي القريب اللي كان فيه لطفي ولما راح راح معاه..
حسين:باهي هو يبيكم تسامحوه ع اللي سوء التفاهم اللي صار..
علي:قوله اليومين هادم مادابيه مايورنيش وجهه بكل..
حسين وهو مصدوم؛شن صار لهدا كله الراجل تنرفز شويه وطلع عن طوره تصيرلنا كلنا..
علي فهم ان عبد القيوم ماحكاش كل شي وعرف علاش ردت فعل حسين كانت جايه لصالحه...
تنهد وقال:اللي هو لين يطيب خاطري وبعدين نشوف..
هز حسين راسه وقال:زي ماتبي ياجدي..يعني تو الكل راضيين ع فك الشراكه..
علي هز راسه بإيجاب..
حسين:في حاجه في روسكم؟
علي:عمتك مفكرة في مشروع وقالت ان شاء الله ناجح خليهم يديروا مايبوا..
حسين رجع سكت مرة تانيه وهو يفكر..
🍃🍃🍃🍃
وفي حوش ربيع ..
حطت نسرين سفرة قهوة وحلويات وهي تقول..
/شد الولد ياربيع..
طبه ربيع قبل ليوصل فالسفره وهو يقول..
/وين ماشي وين..وحطه ع رجله وقال..ترا عطيني حاجه يلهى بيها..
نسرين وهي تمد في فنجان القهوة لخوها قالت..
/شويه بس..
خدي المهدي منها وقال..
/صحيتي..تلقاه في البر يافي الصحرا..
ربيع:حطيت في بالي الاحتمالات هادي..لكن ع الاقل يعطي علم..
المهدي:هو لما ظلم عنده يبعد ويقعد بروحه مايبي
يكلم حد ولايرافق حد..
ربيع ضيق عيونه وقال؛صح..
المهدي:اني نبي نعرف شن في بينه وبين حوش الواعر طلع من عندهم امس طايرتله..
ربيع:تعرف نحساب عندك علم..
المهدي:يعني انت تعرف؟
ربيع:لاوالله مانعرف حاجه..اني قتلك نحسابك تعرف يعني قايلك وانت داس..
المهدي:حتى اني فكرت فيك نفس التفكير..
ربيع:لا والله ماقالي حاجه..لكن الباين في شي كبير..
المهدي هز راسه وهو ساكت..
نسرين:بالك شغل ولاحاجه..
المهدي؛وارد..
سكتوا شويه بعدين قال المهدي..
/نسرين..
شبحوله الزوز..
المهدي:كلمني خو جدة صغارك وقالي الايام الجايه بيروح محمد ولدك..
اتفاجئت نسرين وشافت طول لربيع..
ربيع؛بيروحلهم؟
المهدي؛هو يقول يبي حوش جده شنيبه..
ربيع:يجي يقعد هني عند امه امه اولى بيه..
زادت اتفاجئت نسرين..
المهدي:يعني ماعندكش مشكله؟
ربيع بضحكه؛وعلاش بيكون عندي مشكله صغار نسرين صغاري..
ابتسمت بحب وهي تشوفله..
المهم بإبتسامه؛ربي يحفظ قلبك الطيب..
ضحك ربيع وقعد يوكل في يحيى..
والمهدي رجع يشرب في القهوة..وعيون نسرين ع راجلها اللي قاعده قلبها يتعلق بيه يوم عن يوم..
هو شافها ابتسم وغمزلها..
وهي شدت ضحكتها الخجوله...
🍃🍃🍃🍃🍃
"والله عليكم حق قسما بالله تصير حاجه زي هادي وماتقولوش شن مش حاسبيني منكم ولاكيف"
علي:حتى اني اخر من يعلم هادم معاش حاسبات حد بكل..
وعطي لطوبى نظره قسمتها نصين..وهي هربت بنظرها عنه خجلا..
مطيره:يابوي مانبوكش تعلق مع هالشكالات تعرفهم مايحترموا حد ولايقدروا حد..
عبد الرؤوف؛تو نزيد نشوف الموضوع ونهدرز ع اشرف..
غرفه؛قالوا انحل خلاص والمهدي بعت من طبهم كلهم..
عبد الرؤوف:اني بنزيد نشوف الموضوع انتي شن دخلك..
علي:كولي ع راسك تبيها خاشه في مواضيع مش ليك..
ضحكوا ع غرفه وهي انحرجت..وعبد الرؤوف مركز معاها وهو مبتسم ..
علي:اخر مرة يصير شي زي هدا وتخلوني اخر من يعلم والله تشوفوا مني شي عمركم ماشفتوه..
مطيره:خلاص اخر مرة شعفه..
علي:نوضوا حطوا العشي تحركوا.
كلهم ناضوا مع بعضهم للكوجينه..
وقعدوا عبد الرؤوف وعلي يحكوا عن موضوع المطحن...
☘وتعدي هالليله ويطل اليوم اللي بعده ومازال عبد القيوم مختفي ع الانظار وتليفونه مقفل..
ربيع ماارتاحش..ومشي لمكان عمله يسأل عليه وغادي تلاقى هو زميله عيسي اللي قاله..
/قال ماشي للعوينات عند اقارب غادي بيقعد عندهم نهارين تلاته..
ربيع:وعلاش يسكر فهاتفه؟
عيسى:علمي علمك ياخالي..
ربيع تنهد وهز راسه بعدين قال..
/بارك الله فيك..السلام عليكم..
عيسى؛وعليكم السلام..وقعد معاه بعيونه لين اختفي من قدامه وع وجهه باديه ملامح الضيق...
🍃🍃🍃🍃🍃
"ايه الحمد لله اليوم احسن"
هادي صابرين تكلم في مختار هاتفيا..
"تمام..باهي علاش تبي تطلعي اليوم؟"
صابرين؛مليت الجو متاع المستشفيات كارهاته..
"باهي لكن بتقعدي في الحوش ماتطلعيش بكل لين تولي كويسه فاهمه..اني صارلي شغل مفاجئ مازال بنعطل نروح ونتفاهموا"
هي بإستغراب؛على شنو؟
"ماتخافيش مافي شي يخوف..خلاص توا سكري عندي ماندير..هاه ردي بالك من روحك"
صابرين:حاضر..
"تشاو"
صابرين؛باي..وسكرت ومدت التليفون لأمينه وهي تقول بضجر..نبي نروح..
امينه؛قالوا بعد المغرب ياحبيبتي اصبري..
تنهدت صابرين واتكت ع السرير بعدين قالت..
/مااتصلوش خواتي..
حركت امينه راسها بالنفي..
هي سرحت في الفراغ وقعدت تتفكر فيهم كيف جوها وهما مرعوبات عليها قلبها وجعها عليهم...وترجع تسمع كلمات رضا الجارحه بخصوصهم وتزيد تنوجع..
وتتفكر فجأه اللي سمعاته ليله امس فنصت عيونها وشافت لأمينه وقالت..
/هداكا المسموم خشلي امس!؟
ضحكت امينه وقالت؛لا..
صابرين في نفسها..
"والله الا الحلم..واضح اصلا"
امينه:بتسألي ليه؟
صابرين عقدت حواجبها بغضب..
/قوليله يحاول مايورنيش وجهه بكل بعد مانروح مانبيش نلمحه ولانسمع حسه الواطي الحقير الخسيس النذل..
امينه وهي مفنصه عيونها وتضحك..
/حاضر حاضر اللي تشوفيه حاضر..
صابرين بعصبيه؛سحيقه..
ومازال امينه تضحك...
🍃🍃🍃🍃
ويجي وقت الخروج...
وتطلع صابرين وهي متعنقه ذراع امينه ويمشوا والحراسات محاوطينهم..
قبل ليوصلوا لباب العياده يجي اتصال لأمينه كان من اختها مروة اللي خدت رقمها امس..
فرحت امينه ومدت التليفون لصابرين وقالت..
/اختك مروة..
هي بلهفه خدت التليفون وفتحت الخط وردت..
/ايوه..
"خويله"
نزلوا دموع صابرين وهي تقول..
/نورا حبيبتي.
"خويله حمد لله ع سلامتك ياروحي والله لما سمعت قربب متت"
صابرين بنبرة باكيه:بعيد السو عليك ياروحي..اني كويسه ينتي كويسه شن حال ماما وخوتك..
"كلهم كويسن ويسلموا عليك..خويله بنسكر مانقدرش نطول باي"
وفصل الخط..نزلت صابرين التليفون وهي تبكي بصمت..
مداته لامينه اللي كانت تشوفلها بحزن..
ورجعت صابرين تعنقت ذراعها وكملوا طريقهم والحراسات معاهم..
وصلوا برا و vip تراجي فيهم ورضا مقعمز فيها..
قدموا للسيارة لين وصلوا في الباب السحاب
فتحلها واحد من الحراسات وساعدتها امينه تركب بعدين سكرت الباب..
ومشت ركبت جنب رضا..
والحراسات توزعوا ع السيارات اللي وراهم..
رضا وهو مدرق عيونه بنظرات سود غامقات شاف لصابرين من المرايه لقاها تبكي..شاف لأمينه اشرلها وسألها خيرها..
هي بحزن حطت ع رقم مروة وورتهوله واشرتله انها كلمتها..
هو رجع شاف لصابرين من المرايه لقاها تشوف للروشن اللي جنبها ودموعها سيل..
شغل السيارة وتحرك طول..
والصمت سائد...
شويه فتح رضا منظومة السيارة اللي مشغل فيها اغنيه معينه...
كانت صابرين غارقه في حزنها وألمها وصوت بنت اختها يتردد في وذنها لعند ماخشت عليها كلمات الاغنيه..
بدي اعرف شو مبكيكي..مني زعلانه براضيكي..
هي حركت عيونها طول للمرايه وقعدت تشوفله..
تسمع فيها وتشبحله بس..وهو كان يسرقلها في النظر بدون ماتعرف لأن النظارات مدرقينهم..
امينه ارتسمت ع وجهها ابتسامة حلوة وهي تسمع فيها..
غيرت صابرين عيونها للروشن وهي متوتره ومرتبكه هلبه.
وحاسه بشي غريب..في حياتها ماحست بيه..
شعور خلا بطنها توجعها...
رجعت شافتله وهي متفاجئه لما سمعاته يغني..
تفاجئت بحلاوة صوته..صوته كان حلو لدرجة كبيره وحساس هلبه..
شكت ان هدا نفسه رضا اللي تعرفه مش باين عليه بكل..
خطرت عليها هديكا الليله والاغنيه اللي اول مرة تسمعه مشغلها كانت لنفس المغني..
غيرت نظرها للروشن وقلبها بدي يدق بقوة يدق يدق وحست روحها سخنت فجأه..شافت لأمينه وقالت..
/معليشي امينه شغلي المكيف..
هو طول شغله..
هي شبحتله من المرايه بحده بعدين غيرت نظرها للروشن وهو ابتسم...
🍃🍃🍃🍃🍃
"سامحني لكن مجبور معليش"
عيسى وهو يتكلم بالتليفون..
/مش مشكله اني جايك في الطريق راهو..
"ماتعبش روحك اليوم"
عيسى:زيد غادي زيد..وسكر عليه..
بعدين مشي ركب سيارته وشغلها وتوجه لوجه معلومه...
🍃🍃🍃🍃🍃
وصلوا للعمارة..
نزلت امينه ومشت نزلت صابرين اللي مشت معاها لين وصلوا لبوابة العمارة وقالت..
/شويه ترا..
قعدت واقفه تراجي فيه ينزل..
وامينه تشوفله حتى هي..
هو نزل شافهم واقفات..
حول نظاراته وقدملهم وهو يشوف لأمينه قال..
/خير؟
صابرين بحده؛اشبحلي هني..
غير نظره ليها..
صابرين بحده؛رد بالك تخليني نشوف وجهك رد بالك تجي قدامي انسى اني موجوده هني فاهم..؟
هو قال؛هادي شكرا اللي نراجي فيها منك!؟ لولاي راك توا تحت التراب..
هي بنظرات حاده مليانه دموع..
/تحساب روحك درت فيا خير!؟ انت زدت بلي ع بلاك..
هو قعد ساكت وامينه تشوفله..
صابرين رفعت سبابتها في وجهه وقالت..
/اني قتلك ماتخلنيش نشوف وجهك اللي مش طايقه شبحه ولانسمع صوتك بكل....
ولفت ومشت خشت وامينه لحقتها..
هو بعد ماخشت ابتسم ابتسامه خفيفه ومشي لشقته...
🍃🍃🍃🍃🍃
"خله والله ياخدهم تلاته في نفس الليله"
ضحكت اميمه..
صفيه:مابعدها والله مسكينه ربي يكون في عونها..
اميمه؛باهي توا هو قاعد في حوشه علاش ماتروحيش؟
صفيه بضيق؛لالا خلاص اني تعودت ع حياتي هني والله ماارتحت الا وين جيت هني يابنتي..وانتي كان ربي يهديك وتجي تسكني معانا..
اميمه:قتلك قبل مستحيل نسيب جدي..
تنهدت صفيه وقالت؛انتي حرة..باهي شن صار في الموضوع اللي جابهولك خوك..
اميمه؛ماما الف مرة قلت قبل هكي موضوع الزواج معاش نبي حد يفتحهولي بالله عليكم همي توا شغلي وقرايتي بس..
صفيه بحزن:معقوله يابنتي بتقعدي هكي حرام عليك شبابك يابنتي وكان عديتي التلاتين معاش يدوروك..
اميمه بلامبالاه؛ولايهمني اخر همي..موضوع الزواج لو صار وانفتح مرة تانيه مش حيكون الا واني مقتنعه وراغبه بس..
صفيه؛اميمه قولي الحق..ناويه توليله؟
اميمه؛من هو؟
صفيه:من هو يعني عمر..
قعدت تضحك اميمه..
صفيه:من جدي ندوي يومها اتصلت بيا رقيه قالت اشبح من رايك واقفه تهدرز معاه في المصحه..
اميمه؛واااك من هالناس ومن رقية هادي ماعندها شي في حياتها المراة هادي تلهى بيه!
صفيه:ماتغيريش الموضوع يااميمه..
اميمه؛شن بتغير بس والله مافي حاجه اصلا مستحيل من سابع المستحيلات من جميع النواحي..
صفيه:باهي شن يدير جايك غادي؟
تنهدت اميمه وبدت تحكي..
🔺️في وقت سابق..
عمر:اني مانبي منك شي غير انك تسامحك عمري ماكنت نستاهلك وماعرفتش نحافظ عليك..
اميمه بإبتسامة رضا:كله نصيب في النهايه..بالنسبه ليا اني مسامحاتك خلاص بس ننصحك نصيحه حاول ع قد ماتقدر تغير من نفسك..اعترف بعيوبك وصلحها عمر انت كويس بس في حاجات مفسده عليك ومفسده حياتك معاها..
ابتسم وقال:عندك حق..بس زي مايقولوا المصايب تربي واني تربيت من اول وجديد يااميمه..
ابتسمت وهي ساكته..
هو قال:من قلبي نتمنى تكملي حياتك وانتي مرتاحه وتنجحي وتوصلي للي تبيه..
هي قالت:اجمعين ان شاء الله.
عمر:هي مانعطلش عليك..
اميمه:في امان الله..
هو بإبتسامه؛بارك الله فيك..سلام..
اميمه؛سلام..
ومشي طلع من المصحه وهي ولت خشت داخل..
🔺️في الوقت الحاضر..
صفيه:الله يسعده ويبعده ويفكنا من شرهم..
اميمه:المهم حولي من راسك افكار حشريه التعبانه هادي وكان تقطعيها بكل خير..
صفيه مابتش ترد عليها مستحيل تستغنى عن رقيه اللي مخليتها تعرف اخبار الشارع واولهم حوش سلفها اللي كانوا برغم كل شي واجعها اللي صاير معاهم...
🍃🍃🍃🍃🍃
"غدوة بنطلعوا مع صفو ومروة للسوق خلاص بتبدا تبتت معاش في وقت"
طوبى:ايه هداكا هو..لكن خاطري نطلع جنوني زعمه عادي في الكروسه متاعها..
فردوس؛بندوروا في السوق رانا..
اريج؛عادي ياما منهم يدوروا في السواق بكراريسهم..
فردوس قعدت تفكر شويه بعدين قالت..
/لبسيها زين وردي بالك..
طوبى بإيتسامه؛اكيد..
الاء:شن رايكم نتعشوا برا بالمرة بالله ماتقولوا لا...
فردوس بضحكه؛ياودي باهي..لكن دورتنا في جهة محلات راجل خالتك راهو..
طوبى وهي تشوف لجنة اللي كانت في حضنها بإبتسامة:احسن ع عينه..
🍃وفي هالوقت كانت صفاء مع امها مقعمزين يكتبوا في قائمه طويله عريضه فيها كل شي يخص البتات والعرس نفسه ومارقدوش الا وهما مسجلين كل شي...
🍃🍃🍃🍃🍃
تاني يوم...
11اكتوبر...سنة2018...
الساعه 9:00صباحا..
كانت راقده في سريرها بعمق..شويه وبدت تفيق..
خش لمسامعها كلمات نفس الاغنيه..
غمضت عيونها وفتحهم..بعدين ناضت من السرير بالشويه بالشويه بش مادوخش..
لمت شعرها القصير ورفعاته فوق..بعدين فتحت باب الفيرندا وطلعت..
وقفت ع السياج ونزلت نظرها لتحت..
شافت ع طاولته لاب توب مفتوح لكن هو ماكانش موجود..
قعدت تشوف لمكانه وهي تسمع في الاغنيه وتقول في نفسها..
"هدا خيره مولي هكي!!!؟"
لفت ومشت خشت وهي مازال تفكر لين طلعت من الدار..
توجهت للدروج ونزلت للكوجينه..
خشت وقالت:صباحو..
التفتت امينه وشافتها لأول مرة نازله بتوته ومن غير مكياج قالت:صباح الفل ازيك النهاردة؟
قعمزت ع كرسي البار وقالت..
/الحمد لله..ديري في فطوري؟
امينه بضحكه؛ايه..
تنهدت وقالت؛هدا خيره انقلب هكي وولى اشبح كيف!
ضحكت امينه وقالت؛علمي علمك انا نفسي مستغرباه قوي..
صابرين:ماتستغربي شي عليه هدا واحد مريض توقعي منه كل شي..
امينه قعدت تضحك بدون ماتعلق..
وتت لصابرين فطورها وحطاته ع الطاوله..
مشت صابرين قعمزت وراها وبدت تاكل
ع خشته قال؛ديريلي حاجه ع السريع مستعجل..
صابرين بحده:اوففف...
هو تجاهلها وشاف لطاجين كبده لقي مازال في..
صابرين:اني شن قلت امس..
هو قال؛كان ماتبيش تشوفي وجهي اركبي لدارك هدا المكان بس اللي تقدري تحرمي عليا خشته..
صابرين انغاضت ع الاخر..
هو قال؛امينه فوتي اللي ديري فيه وديريلي من الكبده..
صابرين بعصبيه؛لا كبدتي لا ماتعطيه منها شي..
قعدت تضحك امينه..
هو قال:اني اللي جايبها ع فكره..
صابرين:ملزوم بش ترقع عملتك..
هو تجاهلها وقال:هيا امينه..
صابرين:تحطيله منها والله العظيم ماني واكله حاجه اليوم والله..
امينه قعدت تشبحله..
هو قال:ديري حاجه تانيه..
صابرين لفت وجهها عنه وقعدت تاكل بعصبيه..
هو ابتسم..بعدين غير نظره للخلاط..
خش داخل خداه وخدي طاسه وصب من العصير بعدين مشالها وحطه قدامها..
هي قعدت تشوف للطاسه ودموعها في عيونها..
وهو مشي طلع وكان يقول..
/خلاص امينه فوتي بنطلع معاش عندي وقت..
تنهدت امينه وقالت؛مااكلش من مبارح..
شبحتلها وهي ساكته..
شافت امينه لصابرين وقالت..
/ع فكره دمو بيجري في عروقك دلوقتي..
هي انصدمت ..
امينه ابتسمت..
هي ودموعها يرقرقوا في عيونها قالت..
/شن يبي مني؟
امينه بإبتسامه..تسامحيه..
والتفتت لشغلها..
وخلت صابرين في حالة مش قادره تستوعب منها شي..
🍃🍃🍃🍃🍃
بعد العصر..
طلعوا فايزة وفردوس مع طوبى والبنات للسوق وجنونه كانت معاهم..
طلعت للعالم الخارجي اول مرة والباين عجبها الجو..
وامها وهي دف في الكروسه كانت تردد في الاذكار ووتتفرج ع المحلات والبضاعه..
صفاء كانت في ذوقها هي اكثر من غيرها وخدت كل شي اختاراته طوبى..
في محلات عبد الرؤوف لقوه اللي يبوه واحسن وهو دارلهن تخفيضات خاصه ع خاطر صفاء...
بعد ساعتين ونص من الدوران...مشوا لوحده من المطاعم بش يتعشوا..
ويشاء الله بصدفه..ان المطعم هدا يكونوا في الجالي وحكيم اللي جابه من المطار وعزمه ع العشي..
وهما في عز هدرزتهم يجوا عيون الجالي ع طوبى..
لما شافها تقول كان في ظلام دامس وطلعت عليه الشمس ليه مدة طويله ماشافهاش..
هالمرة كانت عكس اخر مرة..منوره وضحكتها ع وجهها..
حكيم:جالي..ياهو...والتفت شاف وين مايشوف عرفها طول..بعدين غير نظره للكروسه ورجع شافله..
الجالي:شويه وجاي..وناض ومشي ناحيتهم....
#الحرب_البارده
#طوبى
....يتبع....