بسم الله الرحمن الرحيم
#لبوة علي
الكاتبة: كفاية كاظم
لاتنسون التصويت والتعليق على الفقرات ....
قراءه ممتعه✨✨....
لو عطر رايد لروحك
ماكو غير حچايتي
ولو تريد تصير احلى
ماكو غير مرايتي ❤️✨
..............
زينة....
بين الامس واليوم اختلاف شاسع من شخص يحمل مسؤولية نفسة فقط اليوم صار مسؤول عن عائلة بأكملها ...
حلو من تعيش وي ناس گلب على گلب ومتسالمين بينهم وماعدهم حقد حتى النفسية تتغير للأفضل ....
يكولون العروس شهر كامل الا تتعود على الوضع بس اني غير اول يوم اندمجت وياهم وهما هم محسسوني جديدة كأنهم يعرفوني من زمان ....
بيتهم بيه جو كولش حلو الله يحفضهم فرق كولش جبير عن عائلتنة الي محد يدري بالثاني وين ما وين....
اتصل بابا باركلي هو وأخوي وامي بلعت الغصة متصلت بيه ابد شسوي ماعندي حظ وياها احسهة تحب بنات خالاتي أكثر وتهتم بيهن كانهن بناتها ...
والله حيل يحز بخاطري حتى المتزوجات تتصل بيهن وتسأل عليهن بس وياي غير بس بابا الله شاهد مامقصر وياي ابد وأخوي صدفات اشوفة بحكم شغلة وشغلي ....
تنهدت بقهر وطلعتلي ملابس اروح أسبح وانام ميتة تعب طلعتلي دشداشة خفيفة جوة الرگبة وردنهة ربع
سبحت وبقيت انشف بشعري مقابيل المرايا ..
طبعاً شعري كيرلي عود سحبتة لمدة شهر ويرجع بس غسلتة رجع لطبيعتة هذا هم حضي ماياثر بيه شي ...
عفت شعري ولزمت الموبايل اشوف منو مراسلني فتحتة عبالي لبوة فرحت طلعت تبارك وجة الطاوة
بقينة اني وياها نتراسل طبعاً احنة علاقتنة كله عرك مابينة احترام مدري ليش ...
حسيت بشخص وراي كمزت نسيت علاء يبو مدري وين بالي لزمني من خصري مقربني عليه حط راسة برگبتي انفاسة حارة تضرب كزبر جلدي همس بخفوت ...
علاء:-شبيج طفرتي منو عبالج
زينة:-رديت بتوتر والله ماعبالي واحد بس نسيت
علاء:-افاا شبسرعة نسيتيني لهلدرجة اني مو مهم حتى انسي بسرعة...
زينة:-مقيد حركتي اريد ادير وجهي واحجي وياه بس ميخليني لزمت ايدة وحجيت بخجل لا والله مو هيج شوف انت فهمت غلط مو نسيتك بس هاي اءءء
علاء:-شني هاي كملي ...
زينة:-حركت ركبتي شواربة يبززن بس استحي أكلة عضيت شفتي يحركهن بركبتي حتى ماعرف شحجي وهو بيه طبع إذا حجة بهدوء يطيحني احير شجاوبة يصير مثل المحقق حجيت بانزعاج لا علاء كافي مو هيج رد بذوبان ...
علاء:-شني المو هيج وضحي اكثر
زينة:-والله شواربك يبززن انت ماشايفهن رفع رأسه وداراني عليه حجة بعبوس وهو يسحب خصلة من شعري...
علاء:-جرحتي مشاعري شبيهن شواربي شو يخبلن الصراحة زينة مامتوقعها من يمج هاي حيل حزت بخاطري...
زينة:-بسرعة تغيرت ملامحة من امداني هسة اني شبية ماعرف احجي لو اسكت مو ابركلي عيوني دمعت من شفت كلامي زعجة حجيت مبررة نيتي ..
شوف انت افتهمت غلط والله ما ضايجة من عندك بس كتلك شواربك يبززن بس عادي اتعود والله مو قصدي البالك ابد .....
تنهد بقهر وكال...
علاء:-ماصار شي صح شواربي مو وجهة نعمة ...
زينة:-حجة الكلام ودار وجهة يريد يمشي ابد ما جانت نيتي دل على شي بس هو مدري شبية صاير حساس...
لزمتة من ايدة وصرت مقابيلة تلمست شورابة وحجيت...
مو قصدي تدري بية احجي بدون ماافكر حباب بس لاتزعل ...
وخر ايدي وحجة بجدية ..
علاء:-ماصار شي
زينة:-مدري ليش هيج يسوي بسرعة زعل خليت ادية على وجهي وكمت ابجي اني من النوع بسرعة اتأثر لزم ايدية وضمني لصدرة احس صدرة يهتز رفعت راسي شفتة يضحك بذمة وضمير ...
عقدت حواجبي وحجيت ...
شنو اليضحكك رد عليه وهو يمسح بخدودي بطرف اصبعة وهو يضحك ...
علاء:-ترى اتشاقة وياج هاي كامرة خفية زوزو ...
زينة:-عقدت حواجبي وابتعدت من عندة ورجع جرني اله حجيت بعصبية...
واني عبالي زعلت والوم على روحي وانت حضرت جنابك تضحك علية ...
علاء:-ترى انتي صدك غلطانة بحقي وتنمرتي علية وزعلت منج ومنتضرج تعتذرين ....
زينة:-لا بله فوگ ما بجيتني انوب اني اعتذر اصلا المفروض انت التعتذر ...
علاء:-افاا تريدين اعتذر غير تگليلي برسم الخدمة احلا اعتذار راح اعتذر وحالا ..
زينة:-طبع بوسات على شفتي وحجة بخفوت...
علاء:- راح اعتذر
زينة:-حاولت اسحب روحي من عندة بس وين محاصرني حجيت واني ادور على حجة اي شي احجي بية واخلية يعوفني رد عليه وهو يهز حواجبة ...
علاء:-لاتدورين منا ومنا ماكو مهرب الخطر خلفج وعلاء امامج شتختارين اكيد علاء ابو الخبزة ...
زينة:-لا لا مو هسة خطية امك وعدتها اسويلها خلطة
منتضرتني هسة ..
علاء:-بربوك عوفي امي على صفحة هاي ماتصدگ واحد يهتم بيها اهتمي بابنها المسكين المستكين ...
زينة:-مشيت ايدي على وجهة وحجيت مقلصة عيوني...
علاء مسكين مستكين الله يساعدك ويكون بعونك طلعت مضلوم يبعد حيلي ...
راد يبوسني والباب اتفلش هو كبل طفر حجة وهو يباوعلي ....
علاء:-سترك يارب هدادة شني واحد ماياخذ راحتة..
زينة:-راح فتح الباب وهو يرمغني بنضراتة كتمت ضحكتي فتح الباب دخلت عمتي وهي تحجي ...
-ولك شبيك مجلب بالبت ماتخاف عليها جنها جكليتة سايحة خفف عليها شوية درينة بيك ماشايف بس مو هيج ...
علاء:-يمة انتي ليش تتدخلين انريد نخلف جاسر ليش تخريبن ابو الإنتاج هسة اني دخلت يوم بيج ...
-انوب جاسر تهي بهي ...
بعدك بسم الله شتخلف هي زوينة جنها طفلة العب عليها وهي وين تتحمل سامع بالولادة البت جنها جكليتة سايحة عوفهة تشوف دربها لاحگة على الضيم .....
زينة:-رحت بستها بخدها وحجيت بمرح كلبي خالة انتي الجكليتة هيج تنوكلين اكل ...
حضنتي وحجت تباوع لعلاء ...
-اغدي سبع فدوات الج صدك انتي مو من اختياري بس هيج حبيتج من اول ماشفتج طلع عليوينة يعرف يختار ...
زينة:-اجة علاء عاكد حواجبة وخر ايد أمة وهو يتوعدلي ...
علاء:-ابنج اني بعد ذيب اعرف اختار وانتي مو تكولين رقيقة جا شكو مجلبة بيها ماتكليلي رحمة لجحا ...
زينة:-ضربتة على صدرة وحجت ...
-يععع تطردني ولك عليوي شمالك جنك تسودنت يو اني غلطانة ...
زينة:-حجيت بثول لا خالة ماغلطانة سوالي حركة بعيونة مال مجرمين يمة خفت شوية نزل جوة اجو ولد خالة يباركولة ...
مشطت شعري و رجعت نمت وهو خطية هم تعب
گعدت العصر شبعانة نوم حركت روحي على كيف حاضني ونايم باوعت الشكلة مغمض عيونه بانزعاج بس لا بعدة ضايج من عندي ....
سحبت روحي بهدوء وهو نايم بشكل عميق رحت بدلت لبست فستان بصلي فاتح كولش وخليت مكياج بس كولش خفيف اصلا مايلوگلي المكياج الطوخ وإذا خليت ايلانير احس روحي ابن حوتم الملك صديق يوسرسيف ههههه لفيت شال ونزلت جوة ...
لگيتهم كلهم ملتمين حماي ومرتة وجهالة والبنات موجودات وأمه وابوة سلمت وكعدت يمهم ....
جابت مرت حماي صينية بيها جاي وكعك وكيك هي مسويتة صبت للكل واني من ضمنهم الكيك يكول جاهز يخبل مبينة نادرة هالبت من شكلة ...
طبعاً الكعدة متخلة من الضحك والشقة حجة حماي
موجة كلامة الي ...
-بعد شنريد صارت عدنة واسطة بوزارة الصحة بعد اخوج اريد ازيد الإنتاج ومرتي الا عملية وادفع ذيج الحزة عود سوينة على العام وداريها وياج هيج والله وبعد ماادفع فلوس ...
زينة:-حجيت ماشرة على عيوني احطهة بعيوني إذا مااداريها المن اداري ...
ردت عليه ببتسامة ...
-تسلمين كلبي ماتقصرين فدوة الطولج ...
حجت حماتي المتزوجة...
-وآني جهالي كل يومية طايحين مرضى اجيج للمستشفى وسجليلهم علاج براسة حظ...
بس مو هذا الجنة طبشور ترة لعبت رواحتنة من يمة البطنة توجعة منطينة الحامل منطينها من يمة حتى البية بواسير ماطلع طبشور شايفين عليه الرزق شني هاي...
زينة:-كتمت ضحكتي ورديت لا بس هو يعالج جيمع الالتهابات مثل الطماطة يرهم الكولشي ردت أمة ..
-لاعاب حلگج عود صدگ يمة زوينة اريدج هيج من اجيج اجيب الحبايب واجي وانتي اريدنج تشخلينهن شخل جا أنه عود ماميتة عليهن بس اتمزة بيج جدامهن عبن جنتي دكتورة...
زينة:-ادللي بعيوني انتي وحبايبج ...
صاح علاء وراي طفرني يمة شكعدة من النوم ...
علاء:-ها شني شو صار بيها استغلال من هسه بينت نيتكم الدفينة .
ام علاء: -خاب صچيچة أن شاء الله أكلة اتمزة بيها يكلي تستغلينها ابو شوارب البرم ..
علاء:-لا اليوم شسالفتجن وي شواربي شبيهن ترة شواربي خط احمر لحد يجيبهن بالطاري رجائا رجائا والحاضر يعلن الغايب ...
- دتعال اشربلك جوي ..
زينة:-صبولة جاي وهو يباوعلي مقلص عيونة شوية وطلع ...
رحت اساعد البنات بالعشة كولشي ما خلني اسوي بس كاعدة يمهن وهنا يسولفن على ايام قبل بحيث متت ضحك من سولفلي على بطولات علاء ومن جان بالموصل صار عندي فضول هو يسولفلي ...
رادن يصبلي اكل وحدي بس اني مقبلت اريد اتعود عليهم اكلنة وياهم وأمة فرحانة كل شوية وكالت صدك مو ختياري بس حبيتج ....
علاء:-يمة دكافي رحمة للكائنات .
..انت صدگ ما تستحي غير جنتي وبعدها جديدة رادلهة معنويات ..
علاء:-عوفي المعنويات على ابنج اطلعي منها انتي
زينة:-طبعا علاء ابد ماعندة حية حضوري يحجي بالفصيح على ساعة اغص من وراة ...
بعدنا مامخلصين عشة سحبني علاء گدامهم ولايستحي ابد لازم يحرجني كدامهم ...
سد الباب وبقة يبرم بشواربة ..
علاء:-صارت العقوبة ثنين اولا اتنمرتي على شواربي وهاي وحدها حسابها عسير والثانية طالعة واني نايم
شلون طلعين بدوني ها ...
زينة:-غير انت نايم كلت خطية اكعدة والله منطاني كلبي ...
علاء:-بس اني ينطيني كلبي ..
زينة:-يمة شيخلصني اريد اذكرلي سالفة اي شي غمضت عيوني على النص وصحت بوجهة نتابع فلم ..
لزمني من خصري وحجة ...
علاء:-مااحب الافلام بس تدرين احب اغنية دوكفي خل اشغلها...
زينة:-كلت بگلبي كولشي الجان بقة يكلب بالموبايل ورة دقايق شغل غنية قديمة مالت يلبرتقالة شليتي حالة شعندج وي ابن الناس ..
اني من سمعتها خربت ضحك طحت بالكاع ميتة ضحك هو يباوعلي بتفاجأ والأغنية بعدها مشتغلة
شوية وطلع مقطع ...
شعر شعر هز يالكمر سكرت بالزايد ...
هو حار شيسوي طفة الموبايل وكعد مقابيلي لزمني من ادية عگد حواجبة وحجة...
علاء:- دخيلك يلعباس ابو فاضل بس لا شربنج سحر لو ضربنج زازوكي ..
صاحبات امي البرابيگ وعلي كلهن اذبهن بالتوقيف منا لمن يعترفن ع المسوياتلح سحر..
زينة:-حجيت واني امسح بعيوني ..
ياسحر بس ذوقك كولش كلاكس وقديم مطلعلي البرتقالة شليتي حالة ههههه ...
علاء:- لا لهنا وحدج انوب ذوقي تعديتي كافة الحدود وارتكبتي جرائم فادحة واليوم وفي هذة الساعة يتم القصاص عليك...
زينة:-شعر شعر هز يالكمر لا لا لاةةة ..
علاء:-سوادين ماينعتب عليج
زينة: لعد شجابك علية
علاء:-مواني فكرت افتح مستشفى مال مخابيل فرادلي كادر نسوي حتى يكمل الكادر الرجالي مكتمل
الحمدلله..
زينة:-بله منو الكادر الرجالي وشتقصد بالنسوي ..
علاء:-الرجالي اني وحيدر وجلال وجم واحد نكفي
والنسوي انتي ولبوة حطيتها بالقاموس بس من رادت تمشي شخطتها راح اشوف غيرها ..
زينة:-ههه وين تمشي لبوة ...
علاء:-ها شبيج غير تمشي قابل تزحلق ..
زينة:-لا انت كلت من رادت تمشي شخطتها اكيد مو هذا قصدك ..
علاء:-بويةةة طببتيني بسوالف الها اول ما الها تالي
لوتية والان انسد التحقيق وعلى الجاني تحمل النتائج...
لا مساحة لغيرك ولا فراقآ منك ✨
زينة:-بديت صباح جديد يومي جان مايكمل الا بشوفة لبوة فد حقيرة هالبنية فلا اتصلت بيه لو سألت علية هي قبل شلونها تكول خاف مشغولة أو عندج فد شغلة عاد مو تزوجت هم دكول مااحب أخذ وقت علاء...
اتصلت بيها من صباحية الله سمعت صوتها ردت روحي والله جني مفارگتها سنة مو يوم ونص
حجيت وياها شوية وسدتة ...
ما ادري احس بيها شي صوتها متحشر كوة تحجي اوفف هالبنية فلا ترتاح ابد وين ما تروح مغيمة ..
عزمتني على العشة تفاجات من حجتلي عدها خالة بس حلو بنفس الوقت لأن هي لاعمات ولا خالات
وعمامها مدري شلونهم لا يدرون بيها طشت لو رشت ...
مر اليوم عادي گلت لعلاء گال عادي روحي صارت الساعة بالثنتين رحت بدلت وحضرت روحي هم اشوف شكو ماكو واتعرف على خالتها ومناك البنات جايات حيل تحمست ...
علاء طالع من الصبح اتصلت بيه يوصلني ميرد عليه
اتصلت بلبوة اشوف شكو ماكو هم مترد كررت الاتصال مرة مرتين تلاثة ماكو شنو سالفتها صح هي متتصل الا للضرورة بس من شخص يتصل بيها ترد بلحضتها ...
كلت يمكن تسبح أو تشتغل مشافتة رجعت اتصلت بتبارك سالتها عن لبوة كالت اتصلت بيها ومترد ...
كلت يمكن موبايلها طافي شحن بس كلبي ممرتاح ابد مدري شبيها لزمت الموبايل وكل شوية عايدة الاتصال ...
الساعه صارت بتلاثة العصر ومترد كمت افتر بلغرفة رايحة رادة اتصل بعلاء ميجاوب هم من الخوف حتى اضافري اكلتهن ...
نزلت يم البنات حجيتلهن كالن يمكن موبايلها طافي شحن لو واكع منها ولو احترك كولشي يصير بس اني كلبي يوجعني من شفتها وشافتني ولا مرة اتصلت بيها ومجاوبت ...
إذا جان احتمال موبايلها طافي شحن فهذا الشي من المستحيل هي موبايلها إذا صار بيه خمسين تطفية تكول صفر أما بالنسبة للحترگ فهذا الشي هم مستحيل لأن هي من تشتغل تخلية بمكان بعيد عنها
يمة راسي انسطر واني أحلل الف فكرة بالي ...
تعوذت من الشيطان صار العصر وعلاء ماكو تحلفت بيه ادري يطير بسيطة اني الك عليوي ...
بين مااني على هل وضع دخل علاء طفرت من مكاني
معاركته ..
شكد اتصلت عليك ليش ماترد ماشفت موبايلك شوفة شكد اتصلت كول عدها شي مهم ماراح يأخذ من وقتك إذا جاوبتني دقيقتين بس دقيقتين الله يا زوجي بعدنه بسم الله وكمت حتى اتصال ماتفتح علية ...
حجيت فرد دفعة هو سكت بس يباوعلي عندة حجي يريد يحجية بس متردد سحبني لحضنة دفعت ايدة وصرت ادفع بيه حرگ كلبي لزم ايدي ورجع حضني
صرت ابجي لأن انهضمت حسيت نفسي مو مهمة حتى احصل كل هذا التجاهل .. .
مسح وجهي وحجة مهديني ...
علاء:-شبيج تبجين
زينة:-من كال هيج كمت ابجي بالزايد ماادري شحسيت فاجاة داخلة بمود حزن وقلق ..
حجيت واني اشهك شكد اتصلت بيك وانته ماكو علساس معزومة ولبوة اتصل بيها صار ساعتين ماكو
علاء احس بشي مو طبيعي...
علاء:لا تخافين أن شاء الله يصير كلشي طبيعي
زينة:-كولي اكو شي صاير
علاء:-لا يكلبي ماكو شي لاتخافين
زينة:-لعد ليش اتصل بلبوة ماكو راح اتخبل شوف علاء والله لبوة مو هيج لازم تتصل بيه لأن هي عازمتنة وحتى لو موبايلها ضايع تتصل من اي شخص انت تحس الموضوع عادي بس هو ابد مو هيج ...
والله الأفكار اكلت راسي تعرف شي ولا اكولك امشي نروح لبيتها صدوك نسيت اني منتظرتك تجي وتاخذني ..
رحت مسحت وجهي و عدلت شالي حضني من ورة وحجة بهدوء ..
علاء:-اذا اكلج شي تصيرين قوية وما تنهارين
..
زينة:-حطيت ايدي على كلبي حسيتة راح يوكع من الخوف والله عرفت صاير شي بلعت ريگ وهزيت راسي...
علاء:-اليوم الصبح حيدر خابرني عدنة شغل من رحت انصدمت بالسمعتة احس انضربت على راسي من كالي لبوة انخطفت ...
زينة:-احس نفسي انفصلت عن العالم شنو انخطفت وليش ومنو الخطفها وكعت بالكاع وعيوني غوشن
مااحس بشي انصدمت ...
بقة علاء يفرك بيدي ويمسح بوجهي راح جابلي مي شربني وغسل وجهي بقيت على هالوضع ربع ساعة
لزمت ايدة وحجيت بصوت مبحوح ...
كمل ...
علاء:-اليوم الصبح طالعة للسوك وصاعدة بتكسي
وبعدها اختفت الكامرات ملتقطة هالشي وبعدها
اختفت السيارة ...
وبنفس الوكت دازين لحيدر صورة لبوة وكايليلة هاي حبيبتك أمانة عدنة ...
زينة:-حجيت واني ارجف
شيريدون منها ومنين يعرفونها ...
علاء:-مراقبينها من زمان حسبالهم حبيبة حيدر ويهددونه بيها ..
زينة:-ليش هي شعليها بية ماراحو لاهلة
علاء:-حيدر جنسيتة سرية يمشي باسم مستعار
سكنه محد يعرفة ومو بس هيج حتى مايعرفونة يشتغل بالاستخبارات ....
ماكدرو يتوصلون لشي من هذا بس اكيد شايفينها وياه بالمستشفى وكدرو يتوصلون الها ...
زينة::وهسة شيريدون منها
علاء::حيدر لازم قضيتهم وعندة أدلة يطيحهم بشربة ماي وهما دكهم ونوحهم على الأدلة والممسكات ...
زينة:-يعني إذا انطة هاي الممسكات ينطونة لبوة
لعد ما ينطيهم شمنتضر يقتلونها ..
علاء:-ليش انتي عبالج بهل سهولة ياخذون الممسكات ويسلمون لبوة احتمال كولش جبير يقتلونها ...
زينة :-شهكت وحجيت برعب ...
شنسوي هسة شيريدون انطونهم حتى لو يريدونينة حيدر خل ياخذونة بس خل يعوفونها هي شعليها بية
علاء:-لا تخافين مايصير بيها شي اولادنا سباع لو تشوفينها كلها مخبوصة وكل شخص يشتغل بصوب وان شاء الله بأقرب وكت يحررونها من عدهم ..
زينة:-واذا صار بيها شي
علاء:-لاتخافين أن شاء الله مايصير بيها شي انتي بس دعيلها والباقي عوفية علينة هسة اني راح اروح واي شي يصير اخبرج لا تقلقين حتى لو اتاخر...
زينة:-حجيت واني اشهگ فدوة طلعوها لاتخلونها تتاذة ...
علاء:-بحيل الله نرجعها سالمة مستعدين نضحي برواحنة ولانخلي اختنا بيدهم ...
زينة:-طلع علاء واني نهاريت من البجي شوية ودخلت عمتي والبنات يهدن بية حضنتني عمتي وحجت ...
-دكافي بسج صدگ لبوة ماتستاهل بس شبيدنة يايمة بدال هذا البجي المايفيد خل نسويلها حملة ندعيلها الله يخلصها من ذولة الگو**..
راحن البنات يسون حملة أدعية بنية الفرج وعمتي وياهن خطية من كلولها تسودنت عليها ...
بس اريد اعرف شي واحد ليش كل هذا يصير وياها بالذات شيريد يصير وياها بعد بحياتها ما رتاحت وضحكت من كلبها ...
حتى لو تسولف وتضحك بس يبقى بداخلها حزن فضيع دائما الاحظ هالشي عليها ...
صح ماتسولفلي هواي مرات الكاها صافنة من اسئلها تحجيلي عن تعامل عماها وياها شلون عايشة وحدها صح كلامها مختصر بس يقهر و من تحس بنفسها تسكت ...
شنو ذنبها مرة تهمة مخدرات ومنين من ابن عمها الخسيس ومن ذاك اليوم لهذا اليوم تغيرت جذريا ...
أنوب خطف وعصابة شيصير بحالها...
بقت تتردد كلمتها بذني من تكول الماعندة أهل كولشي موزين بهالدنيا يصير وياه سالتني تدرين ليش هزيت راسي ماعرف ردت عليه بصوت مبحوح وعيون مليانة دموع ...
العندة أهل من يريد يصير وياه حادث معين رب العالمين راح يدفعة عنة لخاطر أمة لخاطر اخوتة لخاطر ابوة المسكين مايريد يشوفهم متعذبين لعل واحد من عدهم يستجاب دعوتة ....
ام حنونة تدعي بكلب محروگ اب تذرف دموعة بصدق وانكسار يبان علية اخ صغير يدعي بنية صادقة فأكيد واحد من عدهم راح يصعد دعائة ...
اما الماعندة أهل منو اليدعيلة بصدق ومن كل كلبة
محد وراح تمر علية انواع المشاكل ....
تدرين دائما أردد كلمة وحده الماعندة أهل ماعندة وطن...
الأهل هم الملاذ من المشاكل وحتى إذا رادت تصيبك مشكلة حتى المشكلة من تسمع بأهلك تغادر بسلام...
زينة:-جنت انقهر من اسمع هذا الكلام وارجع اواسيها..
شوفي اني محد يسأل علية كلمن ملتهي بروحة بابا بشغلة وماما ملتهية بروحة وأخوي هم مثلهم عن اي أهل تحجين ترة مو الكل سوة اكو ناس متحب اولادها والبعض الآخر ميهتم بيهم فمو كلهم سوة ...
ردت عليه بابتسامة...
مو المهم طريقة تعاملهم المهم وجودهم صدگيني العندة عائلة هو اشياء مو زينة تندفع عنه ...
مثلا انتي لحد هذا اليوم أحد ضربج هانج نمتي جوعانة نمتي خايفة نمتي مسلوب حقج انضلمتي شي احد استهزء بيج وحاول يدمرج شوية شوية اكيد لا...
تدرين ليش لان اهلج موجودين مو المهم تسمعين كلام حلو أربعة وعشرين ساعة مو مهم تشوفينهم كل يوم المهم اكو سند الج بهاي الحياة ....
انطيج مثل البنية إذا عيالها مو زينين وياهة تلم ملابسها وتروح لاهلها وحتى عيالهة يهابونة ويستحون من أهلها ما يحاجونها أما إذا جان العكس
ماعندها أهل راح يهينونها ويمسحون كرامتها بالكاع بحكم ترجع علينة ماعدها أهل ....
اليوم ابوج يشتغل على مودكم يضمن عيشتكم إذا كبر وحتى لو تزوجتم يفكر بيكم خاف ماتحصلون الحياة التستحقونها من تزوجون فهو باني الكم احلام جنتو تحلمون بيها ..
محد راح يعرف أهمية الأهل الاعند فقدانهم بذاك الوقت راح يحس باليتم وتنشال الخيمة الجانت حاميتة من الشمس من المطر من البرد وبذاك الوقت ندرك اهميتهم ونكتشف احنة جنة اغبياء جدا ...
اليفقد اهلة يفقد الراحة ...
زينة:-كلامها كله صح بس وين اليسمع ويطبق
والله من اسمع كلامها اوعة على نفسي واغير تفكيري ....
وفعلا الاحظ بابا يجي تعبان ويحضني وشيريد يجيبلي وامي ابد مااعوفها حتى لو ماتسولف وياي وتسالني اني اروح اسولف وياها ...
مامرة نضربت من صرت ولهذا اليوم ولامرة شخص غلط بحقي...
شهكت بقهر ومسحت دموعي بقى هذا الكلام الدار بيناتنة يصدع بذني ...
الخبر انتشر وروحي تلوب علاء ماكو ابد لايشيل تليفون ولا اتصل مر العصر وصار الليل وطلع الفجر واني ولا غمضت الي عين شلون انام واني ماادري بيها شنو حالتها ميتة عدلة ماكلة شاربة ..
الطاقة الإيجابية الجانت بحياتي مصدرها لبوة صح اكو أشخاص فاقدين الاهتمام والكلام الحلو بس ما يبخلون بيه ابد حتى لو جانو بأمس الحاجة آلة ...
احس طاقتي خلصت لااشتهي اكل ولااكدر انام بس افتر حيلي مهدود الصار ابد مو شي عادي ولا الشخص المخطوف عادي الم ياكل بيه واسئلة
براسي تصدع ...
هسة لو الخاطفينها ناس عادية بيها باب وجواب نطيهم فلوس ويخلصونة أما ذولة عصابة وعدهم عداوة وي حيدر كولش قوية بس الله اليستر ...
دخلت عمتي يمي وهي تحجي علية اكل لو ارتاح شلون ارتاح وتأخذ عيني نوم واي خبر ما وصل
عنها....
معقولة تروح بشربة ماي شنو الذنب الارتكبتة لبوة سنين واني وياها ولامرة حجت على شخص لو جابتة بالطراي واذت شخص بكلمة حتى اليحجي عليها ماترد علية ...
تعرفون دراسة الطب شكد صعبة ومطولة وكل هاي الفترة ابد مافترگنة حتى من تعينة أصعب الأوقات ماعافتني بيها درسنة تعلمنة أخذنا دروس وعبر سوة ....
شاركنة هواي اشياء دائما نتناقش بمواضيع عامة وهي راي واني راي وضل اتعارك وياها لأن تعاكسني ضحكت وسط دموعي واني اذكرها من ترد برود واني محترگة....
الوقت يمر بطء شديد ولاخبار متلاشئة أخذني التعب ونمت مادريت على روحي ...
گعدت مخروعة واصرخ والبنات محاوطتني يحيرن شيسون وعمتي تقرا قران على راسي...
...........
علاء....
ماكو شخص يعرف نهاية المجهول شنو راح تكون هل هي مرضية لو راح تكون طاحلة ...
احداث مامتوقعة ولا شخص حاطها بآلة ابد هو خطف لبوة وتهديد حيدر بيها ...
ماعرف شنو العلاقة بينهم بس اني متاكد ماكو اي علاقه وخاصة من ناحية لبوة هذا شي مستحيل والبت سفرها بأجر اخر يوم الها بالعراق....
شكد جانت متحمسة ومحضره كولشي بسرعة انقلبت الأمور رأسا على عقب شنو العبرة من الحادث وهي قررت تبدي حياة جديدة بلد جديد
وحطت امال وخطط فجأة يخرب كلشي ....
كاعد اشوف خلية نحل كل أفرادها تشتغل هذا اليحدد موقع السيارة وهذا اليبحث عن السايق
ومكان سيارتة هواي اشياء لصالحنة ...
الكل مجتمع ركن سلام وعقيد فاروق وضباط الكل ينطي احتمالات واراء الا حيدر الشخص الوحيد الصامت كلمة ماحجة بس يرمش بعيونة ...
على مدار معرفتي بية ولهذا اليوم اول مرة اشوفة بهاي الحالة معقولة يحبها بس هذا موشكل واحد يحب هذا شكل شخص عابر مرحلة العشق ...
وجهة احمر دم وشراينة تريد تنفجر وحالتة حالة ماحط قطرة ماي بحلگة بس يلوب ...
يعرف كلش زين خطر هاي العصابة الكل عاف ملفها هو الوحيد الستلمها بشجاعة ودمر منهم حصيلة كلش جبيرة بقة جزء بسيط منهم ...
شلون يرتاح إذا بنية لأبيها ولاعليها ينسبونها اله وحياتها مهددة بالخطر وهو السبب ...
مرت علينة هواي حالات وصلت للقتل اذكر ضابط جان ويانة بداية تعييني خطفو بنتة وكتلوها وخطية
انجلط بساعتها و من يومها ترك الشغل ...
فالشغلة ابد مو هينة نسلمهم كل الممسكات بس شني اليضمن مايقتلونها نسبة كلش جبيرة ماتطلع منها ..
تنفست بقهر الله الساتر ...
كل شخص بينة عندة شغلة محدد بيها جنت كاعد وي الولد نحدد مواقعهم كل شوية اباوع لحيدر صار الفجر اتصلو بيه حجة واحد بصوت قذر ...
-تريد حبيبتك لو مو مهمة عندك مخليها للونسة تجيب الف وحدة بدالها إذا ماتت ...
رد حيدر وهو صاير بركان ...
حيدر:-وحگ اسد الزهرة إذا لمستو شعرة من راسها لو صار بيها شي لو تطيرون بالسمة اطير وراكم وامثل بججثثكم تمثيل ...
رد علية وهو يضحك ...
-لاتخاف حيدوري احنة ماعدنة شي وي البنية هاي وحدة وشغلة ثانية اني ماكدر اسيطر على الولد العندي هي ماشاء الله وبارك تگل للگمر غيب واني بمكانك الصراحة تجذب وتطيح اكبر راس وذولة مثل الذبان يدورون عسل وشلون عسل اويلي يابة صافي مصفة هههههههههه....
احس حيدر راح ينفجر رد عليه بهدوء ..
حيدر:-تعرفون منو حيدر إذا انطخت طخة كلكم انبشكم من جوة الكاع واحد واحد ...
لاحد يتقرب عليها وشتريد اني موجود تريدني اجيك بالوقت التحدده بس عوف البنية مالها ذنب ...
رد عليه وهو يضحك بحقارة ...
-اويلي يابة شكد تحبها عمي حقك مالومك عسل مو بت اني مااريدك شسوي بيك عود بعدين اخذ حقي منك بس مو هسة استعجل ودزهن الي علمود نطير
الطير...
جاوبة حيدر بدهاء ...
حيدر:-انفذ كلامكم بالحرف الواحد بس شيضملي هي عايشة لحد الآن لو من تأخذون شغلتكم تقتلونها
شمعرفني هسة هي بعدها عايشة ما تقتلوها....
ورة شوية رد عليه ..
-عايشة لاتخاف
حيدر:-افتح كامرة خل احجي وياها لو تنطيني احجي حتى لو بس صوت ....
غلق الموبايل بوجهة والأسف ماكدرنا نحدد مكانة لأن خطة دولي لهذا ماخذ راحتة بالكلام بس اني متاكد هي مو يمة ...
احس حيدر راح ينفجر طبطبت على ضهري وحجيت مطمنة...
تهون يخوي وتضل سوالف وين يروحون نكضهم والبوة تطلع سالمة ...
طلع برة والبحث متواصل من مدار يوم كامل رحت طلعت وراة احسة جبل شامخ وانهار بلحضة رحت اركض سندتة وهو لازم الموبايل ...
خشمة طك دم اخذت الموبايل من ايدة شفت دازيلة مقطع بيه لبوة مشمورة بالكاع وتهلوس الگاع متروسة صخام وجهة علية وايديها مشبگة وراها براميل ...
عدت المقطع أكثر من مرة ركزت بالارضية وضحكت
دكيت على ضهر حيدر وحجيت حضر روحك لاعدائك ضلعي ...
نهاية مجهولة وأرواح متلاشئة كل هذا بحكم القدر ياترى ماهو المطلوب من كل هذا ...
هل ستنجو غصن الريحان هل سينصفها القدر كيف ستكون ختامها ونحن لانعرف مالذي حدث لها ..
اسال القدر مالذي تريد هل تريد العب مع هذه الفتاة الم يكفيك جورآ عليها الم تكف وترحل ...
ام تريد رحيلها وهي معذبة ...
يتبع ...
انطوني رأيكم بالبارت بس لاتكولون ملينة من زينة
😂 راح ترجع لبوة شاركوني ارائكم الحلوة 🫶❤️
دمتم بحفظ الرحمن 🌺