نبدأ بذكر الله ﷽🤎✨
أسكـوبار
بارت 5
قراءة ممتعة
⛔لا تنسون التصويت والتعليق بين
الفقرات حبايبي.
.
.
رغم كُل هاي المعارف
جاي أحس بـ روحي محد
انه ياهو؟
وانه وين؟
وهالسنين منين أجتني ؟
وياهو حط ثگل السما كُله إعلى متني ؟
.
.
رجعنه للسكن كل واحد صافن
ومو مصدك عيوني بحالة صدمة
ارمش وصافن بغير عالم
دنكت اباوع الدم متلطخ بأيدي
بلعت ماي جوفي اول ما دخلنا
السكن ضحك دعلج بصوت عالي
صفك أيد بأيد
تمايل بجسمه بطريقة متقنه يمشي
ويحجي بنبرة حماس وضحك
دعلج -: هوه هذا عقاب الحقيقي
لك ابوس ايدك انه ههههههه
باهر -: احنا صار اشهر ندرب ونتعلم
على مود هاي الشغلة تالي عقاب ياخذها
على الحاضر
بسام -: صح كلام باهر ترة هذا ضلم
دعلج -: عقاب سوه شيء انتم صارلكم
أشهر تدربون عليه حتى تنفذونه
اما هوه بدون تدريب بكل سهولة
وبدون خوف بوممم قتل الذ اعدائي
وكسب منصب وهوه بهذا العمر
من يكبر راح يصير عنصر مهم بالحزب
عقاب -: بس انه ماريد
دعلج -: تؤ مو بكيفك تقبل واقعك حبيبي
انتَ صرت قاتل انخلقت بس حتى
تقتل
سكتت نار بصدري ما تبرد
استسلمت بعد ماكدرت ادافع عن نفسي
لأن هل مرة كلامه صحيح
وكعت بالحفرة الحفرها الي
فاز دعلج وخسر عقاب
باهر تعدانه
لغرفته بس كل غضب الدنيا بي
بسام ضرب كتفي بكتفه وهمس
بصوت بس انه اسمعه
بسام -: بسيطة
تنهدت ورحت للحمام سبحت
وكلشي صار مر عليه مثل الشريط
ما صدك انه كتلت انسان وبهل عمر
توني دخلت 13 سنة !!
اول جريمة ألي هيه قتل تاجر اعضاء
خطير اسمه بالشغل والمتعارف عليه
معلا هذا الأعرفه عنه ..
طلعت للغرفه معن بعده نايم دفرته
على بطنه فز مخترع كعدت يمه
اخذت نفس وهمست بصوت هادء
عقاب -: صرت مجـرم انه
مسح حلكه عقد حاجبة ورد
بستغراب
معن -: بسم الله حلمت شني ؟
عقاب -: لا مو حلم انه فعلآ صرت
قاتل كتلت انسان اخذت روح جانت.
تاخذ ارواح غيري
فرك عيونه عدل كعدته
ورد
معن -: صدك تحجي ولك كتلت منو
بس لا دعلج ؟؟
عقاب -: جايه السرة ان شاءالله
معن -: لاااا الوضع خطير من صدك
احجي كتلت منوو
عقاب -: نفسه الخطفني
فتح عيونه متفاجأ
معن -: وين لكيته شبسرعة
عرفت مكانه شلون كتلته احجي
ليش ساكت ؟؟
عقاب -: مو مهم اهم شيء هسه هوه
ميت ويستحق المــوت
معن -: يعني انتَ هسه صرت
مثل دعلج وباهر وبسام ؟؟
عقاب -: تؤ اكبر شوية !
معن -: شلون يعني اكبر ؟.
عقاب -: يعني صرت اكبر منهم بدرجات
معن -: كلامك هذا جديد احس مو عقاب
القديم واحد جديد كدامي شنو التغير
هسه؟؟
عقاب -: حاربـت بكل الطرق ابعد نفسي
عن هذا الطريق حاولت لدرجة الموت
بس ما فاد
بما انو الحياة معانده وياي
قررت اسايرها وأمشي وياها للأخير
بس بطريقتي
معن -: وشنو طريقتك ؟؟
عقاب :- بل أول تتتفذ بعدين
تعرف لا تستعجل
معن -: انه هم اريد اصير مثلك
عقاب -: لا انتَ خليك ساكت
حجارة وألها نفس ماريد منك تتحرك
حتى لا تصير العيون عليك خليك بشغلك
وبس فاهم؟
كشر وجها نفض جسمه ورد
بنزعاج
معن -: ما امشي على كلامك انه
هم اريد اشيل سلاح ودافع عن نفسي
احنا مستحيل نطلع من القوقعة الأحنا
بيها
عقاب -: حاليآ هذا كلامك بعد وكت
عليه السلاح مو شيء سهل هذا ممكن
ياخذ ارواح ناس بالغلط
معن -: تطلع من زرف المس انتَ
عقاب -: حجيك ما يعجبني انه
معن -: ليش شبي حجيي؟.
عقاب -: مـدري شلونه
رفع حاجبة وما رد عدل فراشة
واخذ ملابسه وراح للحمام دقائق حسيت
خاصرتي كامت عليه بسرعة طفرت
للعلاج اخذت كل شيت حباية
شربتهم ونمت براحة
ثاني يوم
طلعت للشغل هل مرة ما اخذت العربانة
امشي واباوع بلكي احد يحتاج
عامل من بعيد شفت شرطة
ثنين واكفين بسيارة وكفت
اباوع عليهم شيصير لو اروح
وكلهم كلشي ؟.
انه جربت قبل والنتيجة الحصلتها
هيه الضرب والتعنيف من بعد ما
عرف دعلج بالموضوع
تراجعت مو وكته هسه خصوصآ
انه صرت مجرم ولازم ادرس كل
خطوة اخطيها بهذا عمري منو
راح يصدكني؟
اذا حجيت كلشي يمكن يضحكون
عليه او يشمروني بمصح عقلي
و يخرب كل تخطيطي
سنين من عمري فاتت وسنين بعدهي
العمر بعدة كدامي راح ابدي من
الصفر والجاي مو شوية الجاي
أنتــقام عـــــقاب
عـــــقاب :- العفو حجي ما محتاج
عامل يساعدك ؟؟
رفع راسه عليه قلص عيونه
يباوع لمحله ورجع باوع عليه
- والله يابة اريد بس مو يوم كامل
يعني شغلة ساعة ونطيك اجرك
عـــــقاب :- شلون يعني ما فهمت ؟
- شايف ذني الكوارتين دخلهن جوة
كلهن ونطيك عشر تالاف انه ضهري
ما بيه اشيل
باوعت كوارتين مصفطة شي فوك
شي تنهدت
عـــــقاب :- تمــام
بديت اشيل على الأقل احسن من
دفع العربانة بس الشمس تكتل
يا حرارة العراق الما تخلص
يمكن بقيت ساعة ادخل بالكوارتين
اخر كارتون خليته وكعدت فوكه
الهث ومسح بديه
جريت نفس بصوت شافني
الحجي جابلي ببسي وبسكت
قدمهم الي بابتسامة
- تعبتك وياي
عـــــقاب :- شغلي هذا
- ونعم من البطن الحملتك
واضح عليك ابن حلال
كلامه انحفر داخل عقلي
ودك اله گلبي ورجف كل جسمي
أبن حــلال الله شحلاتها الكلمه
اول مرة واحد يمدحني بهل
كلمات الحلوة ابتسمت من كلبي بس
خنگة بداخلي اخذتهن منه واكلت
لحد الشبع
طلع 15 الف اخذ ايدي خلاهن
بكفي وسد عليهن
عـــــقاب :- احنا اتفقنا بس 10 تالاف
- ادري بس تعبت هواي
عـــــقاب :- غير شغلي هذا
انه ما اخذ غير الـ اتفقنا عليه
وأستحقة
- اعتبر احنا متفقين
على 15 ألف
عـــــقاب :- بس
قاطعني بحزم
- مثل ابني انتَ اعتبرها دفعة
بلا اخذ رزقك وحمد ربك انتَ شاغول
وأحسن من الچبير
يومية تعال صوبي اذا صار عدي
شغل اشغلك ما اشغل غيرك
ابتسمت هزيت راسي بأي
نكتت ملابسي خليت الفلوس
بجيبي
عـــــقاب :- شوف محلك من برة
اخاف باقي شيء حتى ادخله جوه
- ماشي
راح برة
طلعت الخمسة خليتها بصندوگ
الفلوس وطلعت ورا
- عاشت ايدك ما احتاج شيء بعد
عـــــقاب :- وأيـدك مع السلامة
لعد
- الله ويـاك أبني دير بالك على روحك
ابتسمت شعور حلو حسيت بي
مشيت بالشارع السوك ريحته
ريحة مشاوي
دنت نفسي
شفت محل يبيع لفات
طلعت العشرة اصرفها على
لفات فلافل ؟
لو اخليها لـ دعلج كاملة
وصل السرة الي حرت
وصاحب المحل متاني اخذت
قراري خلي نجرب شيء جديد
عـــــقاب :- عدك لفات كص ؟؟
- كلشي موجود فلافل لحم
دجاج وكل وحدة الها سعر
عـــــقاب :- اريد ثنين كـص
نطيته الفلوس دقائق طاني العلاكة
و رجعلي 7 تالاف يعني اللفة
بـ الف ونص ريحهن تصطر صطر
اخذتهن فرحان بيهن
وحدة الي وحدة لـ معن
وصلت بعد تقريبآ ساعة دخلت
للسكن
صارو كدامي دعلج والثنائي المغرور
باهر وبسام ومعن يباوع
صافن بغير عالم على
طفلة !
تقدمت عاكد حاجبـي
همست وعيوني عليها
عـــــقاب :- شنو هـاي ؟؟
اباوع عليهم ساكتين
عدل كعدته زافر الدخان بالهوه
ورد ابرود
دعلج -: طفلة شتشوف يعني ؟.
عـــــقاب :- اي بس منين اجت ؟
و شتسوي هنا ؟؟
دعلج -: انتَ راح تصير مسؤول عليها
مثل معن يعني
رديت وانه بحالة صدمة
عـــــقاب :- بس هاي بنية !
تريدني اربي بنية بعدين احنا ولد
ماكو بنية حتى تبقى عدنا !!
دعلج -: وين اوديها يعني ؟
اشمرها بالشارع مثلآ ؟
عـــــقاب :- أهلها وين ؟
احنا شعلينا حتى نربيها اخذها
لأي مكان حتى لو للشرطة
دعلج -: همه اهلها شمروها عليه
كل شهر ينطوني مصروف الها
بالمقابل نعتني بيها وكلت ماكو
غير عـــــقاب هوه يحب يربي
عـــــقاب :- شكد عمرها دخيل
السموات السبع ؟؟
دعلج -: 6 سنوات تاكل أي شي
يخطر على بالك تشرب ممة غراضها
بغرفتكم كل يوم لازم تسبحها
ماريد صوتها يطلع
معن -: خطية ترة شوفو شلون
مستغربة
اباوع عليها الدموع بعيونها
شفتها صغيرة ترجف جنها تاوة
محتركة لابسة بدلة لون اخضر
كصيبتها صفح صايرة
كراعينها سود
عـــــقاب:- تشرب ممه وعمرها 6 سنوات؟
دعلج :- امها هاملتها وابوها ما يريدها
متعلمة تشرب ممه طول عمرها
عـــــقاب :- لو اموت مالي شغل
بيها
عفتهم ورحت للغرفة كعدت
والعلاكة بيدي حتى نسيت اللفات
انسدت نفسي خليتهم على فراشي
وكعدت افكر
دعلج ما يخليني بعد اله يبركسها
براسي صدك يحجي هذا ؟
طفلة يريدني اربيها بعدهي تسوي
على روحها
مسحت وجهي حاير انوب يتراوالي
اغسل فضلاتها نفرت عقلي
ضربت راسي عتيت شعري بقوة
رفعت راسي من انفتح الباب
دخل معن بيدة وجه التاوة انتفضت
من مكاني
عـــــقاب :- شكو جايبها للغرفة
طلعها معن
معن -: خطية تبقى برة يعني؟
عـــــقاب :- للجحيم احنا شعلينا
بيها همزين شايلين رواحتنا نروح
نربي طفلة !
كعدها يمة
مخليه اصبعها بحلكها
السلاج يطيح من حلكها صفح
عـــــقاب :- شهل لعبان النفس هذا ؟
معن -: جاهل ترة
اعتقد جوعانة
عـــــقاب :- اشمرها برة
معن -: اشوف نفسي بيها
تتذكر من جابني دعلج وجنت تكرهني
بس بعدين صرنا الروح بالروح
عـــــقاب :- لك لا تقارن نفسك بهاي
هاي طفلة بنية انثى تعرف شنو يعني؟
احنا ولد وهيه بنية وين صايرة هاي
بنية تتربى بين اربع ولد
معن -: عادي انه اصير اخوها
اجيت ارد عليه بس سكتت من
سمعنا صوتها بجت استغفرت
بصوت خافت
معن -: لا تبجين راح اسويلج ممة
عقاب :- جبيرةةةة وينها وين الممة صدك
تحجي انتَ؟؟
معن -: لا تحكم عليها ضروفها صعبة
رغم عمرها بس بعدهي تمارس حياتها كـ طفلة
عقاب -: دعلج جذاب مستحيل هاي عمرها
ست سنوات شكلها يبين اصغر وحتى
أفعالها
معن -: هو كال اهلها ما معتنين بيها منين
تريد تتعلم ؟.
عقاب :- اعرف انا افهم عليك بس دعلج
جذب بعمرها يمكن لأن اذا كال عمرها الحقيقي
مستحيل نوافق نربيها ويانا
معن :- مو وقته هسه بعدين نحجي
يحجي ويمسح بدموعها
والمصيبة زادت بالبجي راح يفتح
بجنطتها ويحجي عود يسكتها
بس هيه تبجي عيونها عليه خزرتها
وزمخت عليها بصوت عالي
عـــــقاب :- اششش اسكتي راسي
يوجعني
خاس خاس عوع
تحجي ذني الكلمات وتبجي
انوب صوتها شعلوة
عـــــقاب :- اشتعلو صفحة اهلج
ناقصين وجع راس
معن - خوفتها شبيك شوي شوي
عليها بعدهي طفلة
عـــــقاب :- أنچب انتَ ولك هاي طفلة
تعرف شنو يعني طفلة؟
بس امها تعرف شلون تسكتها احنا المساكين
وين نكدرلها
خلا الممه بحلكها سكتت تشرب مثل الطفل
الرضيع غريب امرها اي شخص يشوفها
يحكم عليها من مظهرها
بس هاي وراها قصة طويلة
الأهل يبقون بالدور الأول بالتعليم
الضاهر ميتمينها رغم اهلها عايشين
انوب نومها بحضنه يمسح على راسها
معن -: هيه مثلنا قصتها تشبة
قصتنا اهلها تخلو عنها شلون تريد منا
نتخلى عنها ؟
نتحملها يومين اسبوع وبعدين راح تتعود
علينا نربيها ثنينا بالغرفة حتى برة
ما نطلعها هيه چبيرة تفهم بسرعة
بس يراد أحد يعلمها ها شتكول؟
عـــــقاب :- والشغل شلون نكابلها
و نكعد؟
معن -: دعلج كال عـــــقاب ليمته
ما يطلع للشغل يطلع حتى لو مو
يومية يشتغل
اطلع انه الصبح خليها يمك
ومن ارجع انه اعتني بيها وخليها
يمي ها شكلت؟
عـــــقاب :- ليمته عقاب حجه هل حجي ؟؟
معن -: قبل لا تجي بدقائق
عـــــقاب :- غريب هل دعلج
افكارة مثلة شيطانية ما تنعرف
معن -: يمكن صدك اشفق عليك
شدراك انتَ
عـــــقاب :- انتَ ما تعرفه زين انه
اكثر واحد اعرف دعلج وفكارة
الله اليستر
معن -: باوع نامت بسرعة تعبانة
و جوعانة خطية
اباوع عليها صدك ذابة روحها
فاتحة حلكها خلاها على فراشة
غطاها خفيف لأن الجو حار اصلآ
انوب جر فراشة خلا جو البنكة
وكام علاها على قوتها
انه بس اباوع عليه راح غسل ممتها
ورجع خلاها بالجنطه وكعد يمي
ابتسمت
عـــــقاب :- اخ يا كلبك الكاتلني
معــن -: اخ يا برودك الموتني
عـــــقاب :- ما كتلي شسمها
هاي ؟
معن -: اسمها ديــار
رفعت حاجبي اسمها حلو عكسها
جنها تاوة محتركة كلش بالضبط
ابتسمت وجريت العلاكة
عـــــقاب :- همزين ما نسيت
باوع شنو اشتريت
فتحت العلاكة طلعت منها اللفات
ريحتهم بعدهي شم بصوت عالي
مغمض عيونه فتح حلكه بذهول
معــن -: الله ريحتهم تخبل
عـــــقاب :- اي ذني كص لحم مو فلافل
انطيته اللفة اخذها اكل اول لكمة
طلع صوت متلذذ يهز براسه
معــن -: هاي اكلت المثقفين
وأخيرآ ضكتها
ضحكت
عـــــقاب :- ليش انه وياك مو مثقفين ؟؟
معــن -: الثقافة يمنا وكطع
ضحكنا وبدينا ناكل بكل تلذذ
كملت لفتي وهوه على النص لفها
بالعلاكة خلاها على صفحة سألته مستغرب
عـــــقاب :- شلك بيها بعد ضامها
تخرب كملها
هز راسه بلا ورد
معــن -: من تكعد ديــار انطيها
الها خطية تجوع
عـــــقاب :- غير شربت ممه
معــن -: لا ما تشبع الممه
عـــــقاب :- كون انتَ امـي
معــن -: ههههه اصيرلك ام
لا تزعل
عـــــقاب :- لا مو انه ربيتك
من الصغر ما ترهم تصير امي
معــن -: هم صح
يله انه نعست وتعبان هم
اريد انام وعاشت ايدك ع اللفات
عـــــقاب :- بالعافية بس وين تنام ؟.
معــن :- يمها اخاف تكعد
عـــــقاب :- ادري بس وفراشك؟
معــن -: بلعه انام على الكاع
اهم شيء هيه ترتاح وتنام زين
عـــــقاب :- توك عرفتها ليمته
تعلقت بيها هل كد وحبيتها ؟.
تمدد يمها وانه هم مددت جسمي
دقائق مرت ورد بصوت خافت
معــن -: لأن بعدهي طفلة هذا ردي
ابتسمت وبعد ما سألته
نمنه بس مو هواي كعدت بخمول
على صوت بجي عالي
تنفست بعصبية رفعت راسي
واكفة على كراعينها تبجي
دموعها وماي انفها اختلطن سوية
عـــــقاب :- بت الـ
استغفرالله ششش سكتي لج
اريد انطمر تعبان خرب
ماما اريد ماما ممه
عـــــقاب :- هسه ما عرفنا تردين ممه
لو ماما ؟.
زادت بجي ما تسكت زمخت عليها
خزرتها ما فاد كمزت بعصبية
طلعت برة اصيح
عـــــقاب :- معن لك معننن
طلع من باب المطبخ ماد راسه
يخض بالممه ويحجي
معــن -: ها ها شكو
عـــــقاب :- تريد امها وجه التاوة
معـن :- بس شوية تبرد الحليبة
سكتها ثواني
عـــــقاب :- اكله تريد امها يكلي
سكتها ثواني شسويلها مثلآ
اكلها انه امج تعاي ارضعج ؟؟
كشر وجها تعداني يخض بالممه
ويحجي ما راضي
معــن -: شبيك ترة هيه طفلة
من كلمة تسكت بس لا تزمخ عليها
وتخوزرها وهيه تسكت
دخلت ورا يريد يسكتها يكعدها
ينومها حاول بكل الطرق ماكو
معاندة
معــن -: لج تعبتيني شربيها وخلصيني
ليش تبجين ؟
شنو تردين ؟
مريضة؟
جوعانة هاي ممه
ماما اريد ماما
عـــــقاب :- احتركت امج اي والله
معــن -: لا تحجي هيج كدامها
رفعت حاجبي هزيت ايدي
اباوع عليه يحجي ويدنه يمها
دنك قريب منها شمها عكدت حاجبي
عـــــقاب :- شسوي ولك چلـب
رفع راسه باوع عليه
وهمس
معــن -: اكلك هاي مسوية على
روحـها
عـــــقاب :- مبروك شتريد انطيك
يعني حفاضة لو ماي ؟.
معــن -: انتَ اكبر مني تعال ساعدني
نغسللها ماكدر وحدي
عـــــقاب :- اكل نعل هوه انه روحي
بالكوة اغسلها هيه جبيرة تغسل روحها
معــن :- ما متعلمة احنا نعلمها بس هسه
لازم نغسل الها
عقاب :- ماكدر
معن :- انه اكول تبجي ضايجة
ماتكدر تمشي خطية يله عـــــقاب
بداعتي عدك
خزرته
عـــــقاب :- انچب معــن انچب
معــن :- يله فدوة
عـــــقاب :- مستحيـل
معــن -: ما عدي خاطر الك ؟
عـــــقاب :- لا تستغل صداقتنا
على مودها لك تلعب نفسـي والله
معــن -: انه وياك بس نصب عليـها
ماي خطية تبقى هيج للأبد يعني ؟
عـــــقاب :- افهم ماكدر لا انتَ ولا انه
معــن -: لا انه اكدر عادي بس احتاج
مساعدة منك
عـــــقاب :- فك ياخه عني
معــن -: تبقى طفلة ماتكدر
تعتمد على نفسها
عـــــقاب -: ليش هيج حجيها مكسر ؟
معــن -: لسانها ثكـيل
عـــــقاب :- اللهم انعل دعلج ومن معه
واتباعة
جريت لثامي خليته على وجهي
هزيتله راسي خله ايده بيدها وطلعها
للحمام غصب عنها
تبجي وتصيح اريد ماما
فتحت الماي درت عليها اباوع
عليه نزع حفاضتها غمضت عيوني
عكشت وجهي بقرف
معــن -: الزمها بس اخليها
بالعلاكة ورجعلك
ضليت حاير انوب هيه تباوع عليه
لمحت شامة تصير بركبة رجلها
وبطنها تدنيت منها احجي بهدوء
عـــــقاب :- تعاي اغسلج حتى ترحين
لماما
- ماما
عـــــقاب :- اي ماما بس اول شيء
غسلي حتى تصيرين حلوة
هزت راسها بابتسامة غسلتلها
واحجي
:- انتِ حلوة بس لازم تتعليمن ذني
الشغلات ممنوع بعد تسوين على روحج
هذا الحمام هنا تجين
والممه كخ مو حلوة عيب انتِ جبيرة
صافنه عليه جنها طير الكناري غسلت الها
بدون ما اباوع مادري شلون بس
صارت بعد اجه معــن اخذها وراح
بقيت اغسل بصابون وتايت لحد
ما ايدي صارت حمرة تنهدت ورجعت
لكيته يبدللها و بحلكها الممة
عـــــقاب :- لازم تتعلم تسويها بالتواليت
ترة جبيرة بسرعة تتعلم
معــن -: هوه انه راح اعلمها
بس يراد اسبوع اكثر
عـــــقاب :- وعلي ترهم مربية اطفال
ليش ما تشتغل خوش شغلة بيها فلوس؟.
رفع حاجبة باوعلي صفح
ابتسمت وطلعت برة اريد افتح الباب
اطلع انفتح ودخل دعلج
بيدة جنطه مال مدرسة
تعداني وكال بنبرة جامدة
دعلج -: تعال عدي وياك موضـوع
سديـت الباب ورحـت وراه
كعد بمكانة المعتادة وكفت مقابيلة
خلا رجل فوك الاخ شمر الجنطة
على الميز
دعلج -: جبتلك كتب وجنطة
بعد اسبوع تبدي الدراسة صفك
السادس ابتدائي
فهيت بوجها مو مصدك السمعته
هزيت راسي بعدم استيعاب
عـــــقاب :- ش..شلون يعني ما فهمت ؟؟
دعلج -: ماكو شيء اشرحة الك
سجلت بالمدرسة والأسبوع الجاي
اداوم
مد ايده واردف بنبرة تحذير
دعلج -: بس لا عبالك تنسى الشغل
تؤ الصبح دراسة والعصر شغل
وها ملابسك المدرسية على الحجي
هوه تكفل بكلشي
عـــــقاب :- بس ليش هوه مهتم
بيه هل كد ؟.
دعلج -: مستقبلك عنده فـ شي اكيد
يهتم بيك هسه ومن تجهـز وتكبر انتَ
تهتم بـي !
عـــــقاب :- بس انه ماعرف اقرأ
وكتب شلون سادس؟؟
دعلج -: بالفلوس كلشي يمشي
اما عن دراستك فـ انتَ وشطارتك
بس تعرف الأحرف العربية تكوم
تقراء وتكتب طبيعي
عـــــقاب :- اريد أحد يساعدني
بس بالاحرف على الأقــل
دعلج -: ساعدتك هواي بس راح
اكلك على واحد انه اعرفه خوش يدرس
يصيحولة سيد أحمد تلكا بالجامع اخر الشارع
الصبح او العصر هوه موجود
هذا اذا تكله موت على مودي
يموت روحى لازم تبدي من اليوم
كدامك أسبوع بس والأ اطير منك
الفرصة !
ابتسمت هزيت راسي بأي اخذت
الجنطة خليتها على ضهري
فتحت الباب وركضت للجامع
فرحاان شعوري مثل الطفل الضيع امه
ولكاها وأخيرآ ضحكتلي الدنيا
وأخيرآ راح احقق جزء من احلامي
ادرس !
وصلت الهث شفت باب الجامع
مفتوح مديت راسي بهدوء لابس
عمامة سودة وجها حلو ابيض وادي هم
لازم بيدة قرأن ويقرأ بصوت خافت
بلعت ماي جوفي بتوتر دخلت
اقدم رجل وأخر رجل خطوة اتقدم
وخطوة ارجع
رفع راسه جمدت بمكاني رمش
عدت مرات سد القرأن طبع قبلة
عليه وحجه بصوت هادء
-: تفضـل أبني محتاج شيء ؟
رديت بدون تفكير
عـــــقاب :- أي محتاجك انتَ
عقد حاجبة بطريقة مستغربة
عدل كعدته وطبطب على مكان
بصفة
كعدت ضاغط على جنطتي
مستحي من نفسي
- خير ان شاءالله اسمعك
حبيبي احجي الـ تريدة
وان شاء الله اكدر اساعدك
عـــــقاب :- انه اسمي عـــــقاب
سجلت بالمدرسة والأسبوع الجاي
اداوم بس ماعرف بالأحرف العربية
ولا حتى اعرف اقرأ او اكتب وجاي
حتى تساعدني
ابتسم مسح على راسي ورد
- تأمر امر انتَ بس
واضح عليك جبير ما شاءالله ليش
ما مسجل من قبل بالمدرسة ؟
عـــــقاب :- ضروف ما تسمح
- ولا يهمك انه موجود هنا بكل
وكت انتَ حاب تتعلم تعال ومن عيوني
عـــــقاب :- شكرآ كلش هوااي
لأول مرة ماعرف ارد تلبكت
وكلبي يدك بصدري ايدي ترجف
خجلان ومستحي وبنفس الوقت
متحمس
طلعت دفتر وقلم وهوه سمه اول شيء
كنف ردانات قميصة وبدون اسألة عن.
حياتي بدى يعلمني الأحرف الأولى
من الأحرف العربية
مر الوقت مثل نسيم الهوه
ما حسينا أله لمن دخل علينا رجال
سلم وسأل الشيخ شعجب ما خلا
قرأن اليوم ؟!
سأله شكد الوقت رد عليه
بـ 6 العصر انصدمنا بس بنفس الوقت
ضحكنا شلون اخذانا الوقت واحنا عبالنا
ساعة مرت
هادء صوته راحة يدخل للقلب
بسرعة ضحكته راحة نفسية
كلامه استقر بعقلي
تعلمت اول عشر احرف رجعت
فرحان اول مرة بحياتي افرح هل كد
اردد الأحرف بعقلي وبتسم
بس وصلت لغرفتي كعدت
وبديت اراجع كل العلمني عليه
معــن -: منيلك الكتب؟
عـــــقاب :- راح ادرس الأسبوع
الجاي
فتح عيونه متفاجأ
معــن -: جــذاااب
عـــــقاب :- الجذب حرام
معــن -: منو شترالك الكتب.؟
عـــــقاب :- الحجـي
معــن -: منو هذا الحجي؟
عـــــقاب :- صديق دعلج ما تعرفة
معــن -: ليش حتى يشتريلك
كتب؟
عـــــقاب :- بعدين اكلك هسه خليني
احفظ بعد أحـرف
معــن -: لعد وانه هم اريد ادرس
عـــــقاب :- والله لو بيدي حتى باهر
وبسام اخليهم يدرسون بس مو بيدي
دنك راسه ساكت ابتسمت
عـــــقاب :- التاوة ماكو صوتها؟
معــن : يا تاوة؟
عـــــقاب :- هاي ديناار مدري ديار
معــن -: اسمها ديار نامت بس تعبتني
كلش بس تبجي وتريد امها
عـــــقاب :- غير طفلة لعد شتريد
تحجي مثلآ ؟
معــن -: لازم نصبر عليها كم يوم
لحد ما تتعود على حياتها الجديدة
انتَ بس خليك هادء وطول بالك علينا
عـــــقاب :- والله الك خلك
معــن -: شبيك متعاجز يكـول
راح تشيلها على راسك !
عـــــقاب :- فكرة راح تبقى ويانه
بنفس الغرفة ونربيها ويومية نسمع
صوتها المزعـج تسببلي صداع حاد
معــن -: تهـون ان شاءالله
عـــــقاب :- تهون تهون
ضليت اقرأ ساعتين وتعلمت احرف
جديدة السيد كتبهن الي كلهن
انوب كل شوي اضحك وحدي مو مصدك
اكض القلم وكتب الحرف اضل اضحك
وتحمس ورجع اكتب الحرف ولفض
اسمه بيوم واحد حفظت عشرين حرف
مر اسبوع الليلة اخر ليلة الصبح
يبدي أول يوم ألي بالمدرسة متحمس
وبنفس الوقت خايف
شعور لا يوصف جنت اقرأ
تعبت نمت على ضهري نزعت فالينتي
الجو حار والدفتر
فاتحة ومخلي على راسي حسيت بيد
على كتفي
فزيت وخرت الدفتر شفتها وجه
التاوة ساكته بس تباوع عليه
وترجع تتلمس صدري وكتفي وخرت
ايدها
برطمت حلكها والدموع تجمعت
بعيونها وقبل لا اسمع صوت بجيها
المزعج رجعت ايدها على كتفي
ابتسمت تتحسس كتفي ضليت اباوع
عليها دقائق تدنت اكثر ضربتني على
خدي راجدي
لزمت خدي خازرها ضحكت ورجعت
ضربتني
عـــــقاب :- لجج لاااا ضربيني
ناقصج انه بت المنعول
- خاااس انتَ عوعع معن حلو
رفعت حاجبي
عـــــقاب :- تحبين معن وانه عوع
والله خوش مو معن غسل استغفرالله
ولي منا روحي لمعن يله
- ما ماروح
عـــــقاب :- باع لسانها دخيل السموات السبع
دبة غاز بس لسانها كاز
- انتَ خايس عوع
عـــــقاب :- افتهمنا والله افتهمنا
اشتردين هسه ؟
- هنا اصعد
تأشر على بطني رفعت حواجبي
عـــــقاب :- عربانة وتصعدين هنا
هوه انه مشعول ابو ابوي
- حباااب
عـــــقاب :- والله طلعلج لسان
وانه حسبالي فقيرة
تباع عيونها يلمعن تنهدت ورفعتها
من بطنها خليتها فوك بطني
نغزتني خاصرتي اتنفست بصوت عالي
اديها خلتهن على صدري ثنينهن
تشخبط بعشوائية وتضحك انتبهت
ضحكتها حلوة هاي أول مرة اشوفها تضحك
من اجت كله تبجي والأيام الفاتت اشوفها
ساكتة بس تباوع اظاهر بدت تتعود
على المكان تاكل وهيه ساكته
تعلقت بمعن هوااي وهوه هم من
يرجع من شغلة ويدخل الغرفة
تركض عليه تحضنة وهوه يضحك
يبوس بيها ويحضنها
يا ترة انتِ شنو قصتج
حتى أهلج شمروج هل شمـرة ؟
هيه سمرة عليها شعر ضخين اسود
حواجبها رموشها شعرها حلكها صغير
مدور خشمها لا بأس بي هيه معانيها حلوة
تذكرت زنوبة ذيج وين وهاي وين
ضحكتها تختلف اديها شعرها سبحان الله
فرق السماء عن الأرض
عـــــقاب :- يلة كافي تعبت
- بعد بعد حباب
عـــــقاب :- خوش بس لا تكليلي خاس
وعوع مرة ثانية مفهوم ؟.
ترمش وتهز براسها ضحكت
على تعابير وجها
عـــــقاب :- كولي أسمي عـــــقاب
فتحت حلكها تريد تحجي
ورجعت سدته
- نثيته
ضحكت ورجعت حجيت
بهدوءء
:- ع ـــــق ا ب
حرف حرف حجيته الها
صفنت وردت وراي
- غراب
:- لااا شجاب غراب لـ عـــــقاب
- حباب
:- لجج اسمي عـــــقاب
- عاااا
:- ايي يا علي عقاب ع ق ا ب
كوليها
- ع ق ا ب عقاب
:- عفيةةةة برافو عليج شاطرة
نضحك ثنينا خذاني الواهس
وياها ضحكتها تخبل الواحد بدلك
بس تكابلها وتسمعها من تضحك
اسمي أول مرة احسه حلو هيج
رغم تعبتني يالة حفضته بس طلع
يستاهل التعب
اول مره نبقى وحدنا بدون مشاكل
ومن اليوم هذا تغير كلشي من ناحية
هل طفلة
- دول انتَ اسمي
طلبت مني احجي اسمها ابتسمت
وهمست بصوت خافت
عـــــقاب :- اسمـج ديار حلو
بس انه راح اسميج
روليت
.
.
.
يتبــــــــــــع
للقصة بقية....
السلام عليكم حبايبي شلونكم
اخباركم ان شاءالله بخير وين ما تكونون ❤😔
شكرآ كلش هواي على هل تفاعل والتعليقات
الحلوة مثلكم اي لافيو سو ماج 😂❤
شنو رايكم بالبارت اليوم ؟.
البارت الجاي راح تعرفون شوية عن ديار
وليش تشرب ممه وتسوي على روحها
برغم هيه عمرها يساعد حتى تفتهم كل هذا
🚫لا تنسون التصويت والتعليق بين الفقرات
مع ألف سلامة
الكاتبة 𝑀𝐴𝐼𝑁 𖢕