نبدأ بذكر الله ﷽🤎
أسكوبار
بارت 3
قراءة ممتعة
🚫 لا تنسون التصويت والتعليق بين الفقرات حبايبي..
.
.
.
ما ضكنا الطفولة بيوم كبرنا
رغم صغر عمرنا..
.
.
جسمي جمد وأنفاسي تلاشت
من خوفي وصدمتي بقيت واكف
بمكاني ما حجيت ولا حرف
دعلج -: من يومك تحب المشاكل
والضرب اضاهر صرت مازوخي
بسام -: ههههه اتحدى يعرف شنو يعني
مازوخي
باهر -: باوعو شلون تغير لونه
خطية راح يسويها على روحة
بسام -: لا تخاف ما نسويلك شي
دعلج -: تعالو جوة هنا مو حلوة
وكفتنا
دفعني بسام من ضهري مشو
وانه وراهم جسمي عرك صار كله
ماي بلعت ريكي
دخلنا جوه المحل اكو غرفة
نخلي بيها الغراض دفعوني بيها
طحت على بطني
اجيت ارفع راسي اجتني ضربة
على خاصرتي شهكت هيه صرخة
وهيه شهكة
تنفست بصوت عالي لازم مكان الضربة
بسام واكف فوك راسي يضحك
هوه الضربني
دعلج كاعد على كرسي يدخن
باهر واكف يمه يباوع بعيون باردة
غمضت عيوني
دعلج -: غيرت رأيي ما راح ادفنك
اذا سويت منك الأريدة بالحرف الواحد
عقاب -: هوه انه شمسوي؟
دعلج -: بسام حبيبي فتشة
بسام -: حاضر استاذ
دنك يفتش بملابسي ضربني على
خدي كف ورجع يدور احسه
يريد يكتلني ويتخلص مني بأي
طريقة
اخر شي دور جيوب بجامتي
فتحت عيوني بصدمة تذكرت الجهاز
جر ايده لازمه بيدة مبتسم
يباوع لـ دعلج ويرجع يباوع عليه
غمزلي وهمس بصوت خافت
بسام -: موتـك قريــب
وراح يكون على أيدي
باهر -: شنو هـاي ؟؟
رفع راسه الهم وكف غمزلي
تخوصر واردف بخبث
بسام -: استاذ هذا جهاز تصنت
مثل ما كتلك هذا يشتغل الهم
ضدك
عقاب -: لا ولله مو هيج
دعلج -: أكل خــرة حبيبي
عد منو بعتني ؟
ابو الليل ؟
لو
معـلا ؟؟
عقاب -: ماعرف منو ذوله والله
دعلج -: ليش تجبرني اعذبك
مو انه عود احبك وحترمك وماريد
ائذيك اكثر من هيج
باهر -: استاذ خلي فد نص ساعة
بيدي اخلي يحجي القضى والمضة
بسام -: تؤ بيدي انه اريدة
يوكع
دعلج -: شوف شلون متشوقين
يضربوك ليش تتعذب كول كل
التعرفة
عقاب -: اذا حجيت راح تخليني
عايش؟
دعلج -: حسب كلامك
عقاب -: مساعة الصبح من طلعت
للشغل عارضني واحد بيدة سلاح هددني
يكتلني لو ما انفذ الـ يريدة مني وانه خفت
وافقت
دعلج -: حلو
وشنو راد منك ؟؟
عقاب -: نطاني هذا الجهاز وكالي
اخلي بغرفتك
دعلج -: و انتَ وافقت ؟
عقاب -: جنت خايف
ما لكيت غير هذا الحل
دعلج -: تعرف شغلة انه اكرة
الخونة خصوصآ الجبناء امثالك
ويسعدني اتخلص منهم بكل سعادة
عقاب -: جنت مجبور والله
تقرب مني ثنى رجلي يمي
اباوع عليه بعيون خايفة بلكي
ينقهر عليه
طبطب على خدي وحجة مبتسم
دعلج -: راح انطيك فرصة تعيش بيها
مرة ثانية بس بشرط !
بسام -: استاذ شعرفك ما يغدر
بيك مرة ثانية
باهر -: ترى هذا الغدر يمشي.
بدمة
عقاب -: جربني ما راح اخذلك
هل مرة
دعلج -: اتفقتو تلتقون بمكان معين؟
عقاب -: أي باجر بنفس المكان والزمان
هيج كلي
دعلج -: حلو ننتضر لباجر
اريد منك تروح طبيعي كأنما ولا
شي تنتظرة لحد ما يحجي وياك
الباقي علينا
عقاب -: بس؟
دعلج -: بس
شفت شلون انه احبك
وخاف عليك
جنت اعرف هوه ما يتأمن
واعرف كلش زين ورا ضحكتة
مصيبة چبيرة !
اضطريت اوافق مسح على راسي
وقبل لا يطلع امر باهر يساعدني
حتى اوكف وغسل وجهي
طلع
وبقيت وحـدي اجر بالنفس كوه
وخلايا جسمي ترجف
خوف
على توتر وألم .
باهر -: بس لا عبالك اساعدك ؟
كوم خلصني ورانه شغل
بسام اردف بحقد -: هل مرة عدت سلامات
المرة الجاية اكتلك بمكانك بدون
ما احد يدري
عقاب -: شمسويلك انه وهل كد تكرهني؟
بسام -: تعرقل شغلي سالفة عقاب
وذكائة وقوته على لسان دعلج ليش ماعرف.؟
ما كاعد اشوف بيك شي عظيم
واحد ضعيف خواف دمعتة بعينه
يمكن الشي الوحيد الزين بيك هوه
تحملك وصبرك رغم التعب ما تستسلم
وهذا الشي اكرة بيك انه
عقاب -: تكدر تصير مثلي
ضحك يهز براسه غمزلي
ورد بنبرة خبيثة
بسام -: عن قريـب ان شاءالله
عن قريــب
بلعت ريكي ومسحت وجهي
بتوتر ذوله مو اطفال ذوله شياطين
فقط الوجوة ادل على انهم بشر
اما داخلهم شياطين متعطشة
للقتل والفتنة بدون رحمة
خالين من أي برائــة
رجعت للشغل ومن سوء حضي
اكو هواي ناس وشغل كثر
منا توني منضرب ومنا حارة والعربانة
صارت نار
وكفت اشرب ماي لأن دخت وراسي
صار يفتر احس بالكاع تفتر بيه
وبلحضة ضعف ما سيطرت على
جسمي
وكعت واغمى عليه
فتحت عيوني بثقل لكيت نفسي
بالمستشفى هاي اول مرة ادخل مستشفى
جنت هواي اتمرض بس ابد ما اروح
الها ولا شايفها رجعت غمضت عيوني
متنهد براحة
لهناك حسيت بضغط على خاصرتي
مكان الضربة فتحت عيوني فاز
صار بوجهي زلمة لابس ابيض
دفعته بخوف
رجع خطوة رافع ايده
مستغرب من تصرفي
الدكتور -: اهدئ حبيبي مو زين
عليك الحركة
عقاب -: وين انه انتَ منو؟؟
الدكتور -: انه الدكتور و انتَ فقدت
بالشارع والناس نقلتك للمستشفى
كلي هسه منو ضاربك على خاصرتك؟؟
عقاب -: محد
-: شلون محد غير هذا
الأثر
عقاب -: انه طحت وحدي
-: هذا اثر ضربة واضح
ع العموم براحتك اذا ما تريد
تحجي بس خليني اتفحص جرحك
عقاب -: ماكو داعي اريد اطلع
منا
-: انتَ تدري شكد صارلك نايم؟
عقاب -: لا مادري
-: صارلك تقريبآ خمس ساعات
فاقد الوعي جابوك النه جثة هامدة
الدم يابس بجسمك
عندك سوء تغذية قلة شرب الماء
التعب والأرق عضمك هش اديك مورمة
بالأضافة ويه رجليك
خاصرتك عليها اثار ضربة قوية
ضهرك محروك بسيخ وهذا ايضآ
واضح بس اريد منك جواب صحيح
بدون خوف تمام ؟!
عقاب -: اريد اطلع منا
تنهد مسح وجها تقدم كعد
يمي وحجه بهدوء
-: انتَ تتعرض للتعنيف ؟
للحضة اجيت احجي كلشي
بس تراجعت من خوفي على معن
وعلى حياتي سكتت عن الحقيقة ورديت
عليه
عقاب -: لا
-: منين تخاف انتَ ؟
عقاب -: بس من الله
-: كلامك حلو واضح عليك واعي
تعرف تحجي زين
عقاب -: شنو تريد مني هسه؟
-: رايد سلامتك
عقاب -: اريد اروح للبيت
-: ماشي بس خلي ابالك
اذا تريد تحجي او تتعرض للضرب
مرة ثانية تعال انه اسمعك
هزيتله راسي بدون كلام
طلعت صارت الدنيا عصر الجو
حلو تمشيت بالشارع
بدون علم وين رايح تيهت على كد
ما جنت تعبان اخذتلي نص ساعة
امشي لحد ما دخلت بشارع
رجعت لنفس الدرابين ونفس الولد
يلعبون طوبة وكفو كلهم يباوعون
دنكت ومشيت
سمعت صوت ولد يحجي
مستهزء
-: هل درابين متروسة مخابيل
-: ههههه اي شوف زنوبة
بت ابو علي اليوم مسوية كصايب
ثنين طالعة جنها شبح
وكفت بمكاني نداريت اباوع
عليهم ثنين واكفين فوك راس
البت
يتلمسون بشعرها وهيه تفز
والدموع تنزل بصمت شعرها اشكر
وجها ابيض اديها محنيتهن طالعات
يكول ايدين مرة جبيرة
وهيه بعدهي طفلة صغيرة هل
كد حلوة بس للأسف عقلها مو
براسها يعني احنا بالعراقي نكولها
مو بعقلها مسودنه
عقاب -: عوفوها عيب عليكم
التفتو عليه يضحكون
تقدم واحد منهم اعرفه بيت ابو
جليل عده فروخ كلهم كواويد
واصحاب مشاكل من جبيرهم
لصغيرهم وهذا اصغر واحد اسمه
عمار اكبر مني بسنتين
عمار -: اول مرة اشوف مسودن
يدافع لـ مسودن ههههه
عقاب -: ما غيرك لـ مسودن
على الأقل ما العب وي الجهال
امثالك
عمار -: هوه انتَ ما تعرف تلعب
اصلآ انتَ واحد متشرد لا عدك
اهل يعلمونك الأخلاق لا عدك اصدقاء
يلعبون وياك
عقاب -: انه اشتغل حتى اعين
نفسي ما العب لعب جهال
عمار -: ولي منا
ابن الحــرام
نطيت عيوني بصدمة
جسمي تصلب بلعت ريكي
وانه اشوف نظراتهم عليه
تقدمت بعصبية لزمته من خوانيكه
كلها كضتني يردون بس يحلوني
عنه ماكو لزكت مثل كرادة بعز ثور
(هذا مثل قديم 😁)
رجعت راسي ودفرة گله
على خشمه وكع بالكاع يتلاوة
الدفرات مدري منين تجيني دفعتهم
وركضت
لمحتها بطرف عيني واكفه على
الباب تباوع بخوف مخليه
ايدها بحلكها طبت وسدت الباب
ضحكت من بين ألام جسمي
يمكن امي من جانت حامل بيه
تتنسه على مشاكل
او يمكن بفترة حملها بيه
جانت حياتها عبارة عن مشاكل
اهم شيء انه ورثته منها مادري
مية فكرة براسي عود ليش وين
ما اروح تصيرلي مشاكل؟
وانضرب !
ولازم انضلم بكلشي ماكو
انصاف بحياتي رفعت راسي
للسماء اخذت نفسس بصوت عالي
رادف بخنكة
عقاب -: ربي انتَ يكولون عليك
رحيم لعد ما ترحم بحالي؟!
دخلت للبيت كبل للحمام حتى ما
رفعت راسي لأحد سبحت وامسح
على خاصرتي خرب الوجع كاعد يزيد
الله يكسر ايدة متقصد يسوي
أثر هل حقير الحقد كبر براسي
وگلبي عليهم كلهم
كل ثانية تمر عليه ادعي عليهم
وتوعد الهم طلعت
لابس بس شورت ضهري طالع
ونص من رجليه هم لازم
خاصرتي وأمشي بتعب بس اريد
الوح فراشي بس اريد اغمض عيوني
دعلج -: حي الله عقاب
تونست ان شاءالله بحياتك؟؟
نداريت متنهد
عقاب -: بس انام وبليل سوي
الـ يعجبك ما سوي شي ولله
دعلج -: وين جنـت؟
عقاب -: بالمستشفى
دعلج -: شتسوي ؟
عقاب -: مادري همه الناس ليش
يرحون للمستشفى ؟؟
دعلج -: بسيطة روح نام
وراك شغلة مهمة لازم تنفذها
عقاب -: ماشي
عفته ورحت للغرفة معن ماهو
ما سألت كبل ذبيت روحي ونمت
مثل الميت
تحملت فوك طاقتي اضعاف
شكد ما اتحمل وقوي كل الصارلي
كفيل يخليني افقد نفسي
بنية جسمي ضعيفة بس عضمي قوي
انه اعرف كلشي يصير وشنو شغل
دعلج ومنو وراه واعرف وين يروح
وشنو اباله بس اتضاهر بالغباء
مرة قريت مقولة تكول
تظاهر بالغباء اذا كنت تريد ان
تكون ناجح وصنع من ذكائك مفاجأت
منتضر الوقت المناسب حتى افاجئهم
حاليآ صابر وساكت الساعة
بـ 1 بليل كعدت على مصارين بطني
تتعارك من الجوع
رحت للمطبخ اي شي اسد جوعي بي
لكيت على الميز ماعون سفري
شلته بيدي مستغرب
شميته ريحة اشمها كل يوم
من ادخل السوك بلعت ريكي بللت
طرف شفتي هذا كباب والله
بس الريحة اضاهر دعلج اليوم
رابح بالشغل ومشتري كباب اله
بقيت اشم الريحة تخبل هيج ترد الروح
اتخيل بي شيش واكل بخبز حار ومكسب
حتى شبعت شمرت الماعون
بالكاع وطلعت للغرفة
معن نايم فاتح حلكة ويشخر
واضح عليه التعب من تعبي انه بسرعة
رجعت نمت وكل تفكيري شنو راح يصير
باجر
ثاني يوم
الصبح كعدت الفجر لبست ملابس
الشغل ضميت وجهي باللثام
صح اتضاهر بالقوة بس اكو
خوف بداخلي
فتحت الباب وطلعت مشيت خطوة
وحدة يمكن وشفت زنوبة كاعدة
بالباب تلعب بكصايبها وتضحك وحدها
تعديتها ساكت خطية تقهرني هل بنيه
عليها جمال رباني دخيل ربها شكد
حلوة
هزيت راسي حتى انثولت بمشيتي
ارتدمت بالسياج مال البيت مسحت
جبهتي عاكد حاجبي
وكفت بالمكان المحدد گلبي يدك
بصدري وبلش جسمي يعرك
دقائق وصار كدامي نفس الشاب
هل مرة ما بيده شي غمزلي
رادف بنبرة واثقة
-: ها بشر سويت الكتلك عليه؟
عقاب -: اي خليتها بغرفتة جوه
جربايتة بدون ما يدري
-: سبع معدل والله كفو منك
بس ليش الجهاز ما يشتغل؟؟
سكتت
مادري شنو اكول عدل وكفته
رفع حاجبة فتح عيونه على وسعهن
مد ايده طلع سلاحة وقبل لا يسوي
أي حركة
ثارت طلقة
جمدت بمكاني عيوني تصلبت
جسمي برد قطرات من الدم ترست
وجهي وبعضها على ملابسي
صار الصريخ بكل مكان والناس
صارت تركض لبيتوها دنكت
اباوع علي
طاح على بطنه الدم ملا جسمه
فاتح ادي سلاحة يمة ما حسيت اله
على فالينتي تنجر من ورة
فزيت توني وعيت على نفسي
نداريت وجان اشوف زنوبة اديها
بفالينتي وتجر بيها وتحجي
-: روح روح منا بسرعة روح
نزلت نضري لأديها بلعت ريك
بدون كلام ركضت للبيت بس اريد
اوصل بس اريد افتح الباب ماكو
حسيتهن مو دقائق سنين انه اركض
رجلية يرجفن امسح بوجهي متخبل
منضرة ما يروح من بالي
أول مرة بحياتي اشوف شخص
ينقتل كدامي ودمه يتلفني ما جنت
اعرف هاي فقط البداية !
بداية العذاب الحقيقي
بداية القتل وسفك الدماء
موت الروح وبقاء الجسد
أنحراق القلب وبقاء الرماد !
سبحت وليفت جسمي بكل
قوتي لدرجة حسيت بالحرارة
بوجهي بعدني بصدمتي
وسمعت الباب ينفتح واصوات
حجي من بين كل الأصوات سمعت
صوته
دعلج -: عقاااب تعال ابوسك
حبيبي
عكشت وجهي بقرف
ضحك وراه باهر وبسام كعدو
على الكرويتة يضحكون
باهر -: استاذ خوش شغلة حبيتها
متحمس اجرب مرة ثانية
دعلج -: لا تستعجل بهداي الأمور
تمشي
بسام -: اكو ناس خايفة
دعلج -: بمرور الوقت تتعلم
بسام -: ما ضنتي
دعلج -: تؤ انه من احجي كلمة
اكون كدها
باهر -: ونعم منك استاذ
بسام -: شنو رايكم نسوي
سهرة بليل ؟
دعلج -: على حسابي هم
باهر -: حرام هههههه
بسام -: على كولت ذيج الناس
بعدنه صغار ههههه
دعلج -: الرجولة ما الها عمر معين
اذا اريد تصير رجال حقيقي عوفلي
العمر على صفحة
عقاب -: يعني اذا تريد تصير رجال
تكتل انسان ؟.
دعلج -: مو شرط بس من ضمن
شروط الحياة اذا تنجبر حتى تعيش
فـ القتل يصير مثل شربة الماي عدك
عقاب -: مستحيل اقتل انسان
دعلج -: هههههه نشوف وذكرك
بيوم من الأيام
باهر -: ليش هل كد واثق استاذ؟
دعلج -: اشوف بعيونه القوة
مادري احسه يتظاهر بالغباء كدامنه
عنده شي بداخله
بسام -: هواي منطي اكثر من حجمة
دعلج -: معليكم لا تدخلون
بقراراتي انتم بس نفذو الأطلبة منكم
وخلو الباقي عليه
عقاب -: انتم السبب بقتل هذا
الولد لعبتو عليه وخليتوني ضحية
دعلج -: تؤ محد يتحمل السبب غيرك
انتَ اخذت منه الجهاز تستاهل هاي
نتيجة افعالك
عقاب -: ليش كتلتو ؟؟
دعلج -: جان لازم يموت
حتى نوصل رسالة
عقاب -: بالدم رسالتك توصلها؟
دعلج -: الدم بالدم والبادي
اضلم
عقاب -: متأكد مو انتَ الكتلتة
شي اكيد لعبت بعقول ذوله
باهر -: لا تخليني اكوم ادفنك بمكانك
دعلج -: اشش بهداي نحجي
بسام -: هواي تتجاوز عقاب
كلك خلك فارة لا تخليني اتحول
عتوي واكلك
دعلج -: ماريد بينكم مشاكل
اسمعوني زين انتم الثلاثة خليتكم
عدي ويه هذا معن الزعطوط
يعني اربعة تاكلون وتنامون بلاش
تشتغلون حتى تعتمدون على نفسكم
وتتحملون مسؤولية حياتكم
بس ها هذا مو ابلاش هنا يجي
دوركم تردون المعروف وتحمون
استاذكم بروحكم
ماريد خوف
ماريد ضعف
خليكم اقوياء
حتى الكل يحجي بيكم من تكبرون
تصيرون ملوك زمانكم اغنياء بفعالكم
اسياد تصرفاتكم !!
باهر -: كلامك على راسي استاذ
وعد مني اكون مخلص الك كل عمري
بسام -: وأوعدك انه هم كل
عمري بيدك استاذ
بقيت ساكت كلهم باوعو عليه
منتضرين جوابي ما حجيت
ولا حرف
عفتهم ورحت تحت نظراتهم
الحقودة والماكرة
مرت عدت ليالي يرافقها كوابيس
اشبة بالموت حتى النوم انحرمت
منه
كل كابوس ابشع من الثاني
ريحة الدم بكل مكان يتراوالي
حتى الماي احمر ملابسي التوصخو
ذبيتهم
عايش غصب عني احس بروحي
حتى روحي مجبورة تعيش
وياي
جاي أحس بـ روحي محد
انه ياهو؟
وانه وين؟
وهالسنين منين أجتني ؟
وياهو حط ثگل السما كُله إعلى متني ؟
بيوم رجعت من شغلي
اتمشى وشوف الناس متجمعة
على باب بيت ابو علي
ركضت ما فاهم شي سألت
محد يرد عليه بس اسمع
كلام الناس
-: لا حول الله
الله يصبرهم
ما تستاهل بعدهي صغيرة
يله هيه مسودنه عادي
اسمع وكلبي ينلچم
كضيت گلبي بالع ريكي
جسمي تصلب وعيوني غوركت
دموع
من سمعت ابوها يكول
-: ماتت زنوبة راحت الحلوة
راحت بت ابوها راحت اخخ يا زنوبة
يا بويةةة
شهكت بدون حتى ما اعرف السبب
ركضت وهل مرة طلعت من
الدربونة ركضت وركضت
شارع وره شارع
بيت وره بيت
لحد ما وكفت انه على جسر
باوعت منا منا ماكو ناس
اخذت نفس فتحت اديه
للسما وكفت على حافة الجسر
غمضت عيوني وكعت دمعة مني
وراها بحر من الدموع
مر طيفها كدامي كصايبها
اديها بياض وجها
برائتها دموعها طفولتها
ليش ماتت؟.
شنو السبب؟
تذكرت اخر مره شفتها بيوم
الحادث
وبعد ابد ما شفتها ولا لمحت
طيفها رغم صغر سنها يمكن
عمرها 8 سنوات بس حيل جنت احبها
هذا انه نحس حتى ال حبيتها
ماتت
-: اهدئ بوية
فتحت عيوني
شفت شرطي قريب عليه
ويمه واحد هم فزيت ورجعت
لحافة الجسر
-: دير بالك لا توكع
مو هيج تنحل الأمور بعدك
طفل
عباله اريد انتحر
لمعت ابالي هل فكرة باوعت
للماي اذا شمرت روحي اخلص من
كلشي
-: دير بالك تفكر بهيج
فكرة انزل على كيفك بوية
عقاب -: لا تتقرب اشمر روحي والله
عوفني
-: أنچب ونزل لا اموتك والله
حجه الشرطي الثاني
عقاب -: هوه انه اريد انتحر
وتكلي اموتك
-: معليك بي هذا يمسلت
باوع حبيبي وعد مني ما خليك ترجع
اله و انتَ مرتاح لا تتصرف غلط
عقاب -: عوفني وانه ارتاح
ماريد مساعدة من أحد اصلآ
ما انتحر لا تخاف
-: تمام يله وخر من الحافة
خطرة لا تزلك
عقاب -: انتَ روح اول شي
-: بل أول نتأكد من سلامتك
ما جان كدامي غير اوخر
ركض عليه حضني بقيت مستغرب
تصرفة مسح على ضهري وحجه
-: بكد ابن اختي
شلون هيج تريد تنهي حياتك
خبل انتَ وينك وين الموت
ما حجيت ولا حرف
يباوع بعيوني وبوجهي تفحصني
دفعته بقوة
وركضت يمكن يومها اول مرة
اركض بحياتي هل كد وماعرف
ليش ارجف حسيت نفسي بغابة
وداير مدايري وحوش
وكفت الهث مسحت وجهي
بكف ايدي
مادري ليمته وشلون حسيت
بقطعة قماش على وجهي وأيد
على عيني
تلاويت
دفرت
صرخت بس بصمت
صوتي ما يطلع
كلبي خفق قوتي خارت
نعست غمضت عيوني ونمت
.
.
مدري اغمى عليه !
.
.
.
يتبــــــــــــع
حبايب قلبي صح كلت التنزيل كل
ثلاثاء بس اكو بارت هدية ينزل مو
معلوم يا يوم او بيا ساعة ينزل مفاجأة الكم
بارت خفيف الوزن ثقيل القفلات 🤣🥲
⛔اهم شيء تصوتون للبارت
و تعلقون تحفيز حتى اكمل القصة
حب جبير للي يعلقون 😔❤
مع الف سلامة
الكاتبة 𝑀𝐴𝐼𝑁 𖢕