#الخَـازوق الأسـود
ذكرى.
لا تنسون التصويت والتعليق بين الفقرات 🤎.
استمتعوا....
____________________
____________
اشرتلة بعيني على التابوت وهو فهم علية.
اقترب من الرجال الگاعد يم التابوت وحط أيدة على جتفة وكل.
-أخوية يلا صار لازم ناخذة.
رفع الرجال راسة وباوع على مُعقب وكل: ميصير ابقة دقيقة لاخ ؟
مُعقب: شنو يقربلك الميت ؟
نزل الرجال راسة وكل: ميقربلي شي.
عقدت حاجبي باستغراب وتبادلنة نظرات الاستفهام بيناتنة، اقتربت ووكفت بصف مُعقب وكلت.
-لعد ليش صارلك ساعة گاعد يمة، عبالي أبنك !
گام الرجال من مكانة وكل: خلي نوديه لقبرة، وانا اسولفلكم شنو قصة هذا الولد مادام أنتم شباب وبعدكم بعمر الورد علمود لا تسوون نفس خطئه.
عقدت حاجبي باستغراب من كلامة الي جان كلة غريب.
وليش بس كلامة غريب ؟
تصرفاتة من أول ما جاب الجثة يمنة جانت غريبة، كلامة وتحركاتة ونظراتة كلشي جان غريب.
تقربنة من التابوت وحطينة أيدنة جواه بنية نشيلة على جتافنة.
بس اربعتنة باوعنة على بعض ونظرات التعجب جانت باينة على وجوهنة.
جان التابوت ثقيل بشكل لا ينوصف بحيث حتى من الگاع مگدرنة نشيلة، والي خلانة نستغرب اكثر من حطينة الميت بيه جان خفيف...
أخف بهواية من هسة !
بلعت ريگي احاول اتحكم باعصابي وتوتري، باوعت على الرجال.
جان واكف ومنطينة ظهرة ويباوع على القمر، وبيدة سبحة صغيرة ويردد بصوت مسموع، استغفر الله العظيم من كل ذنب عظيم.
رجعت عيوني على مُعقب وكلت بصوت ناصي علمود لا يسمعنة الرجال.
-اكو شي مو طبيعي ديصير !
باوعت على برهان الجان يدور بعينة بكل مكان ونظرات الخوف والقلق واضحة عليه، وكل بصوت ناصي.
-شنو رأيكم نعوف كلشي ونشرد ؟
خزرتة وكلت: انجب شنو نشرد زعاطيط احنة ؟ وبعدين أبوية منتظرنة، مؤكد خلص حفر !
باوعت على رابعنة الي كل بأبتسامة: الوضع يرجف ويحمس بنفس الوقت.
مُعقب: حجة المازوخي، خلي اخابر الولد يجون يساعدونة.
هزيت راسي، وهو طلع تلفونة واتصل عليهم.
بقينة واگفين بمكانة منتظريهم يجون والرجال الي جان ويانة على وكفتة متحرك من مكانة ولا حتى حرك راسة يشوفنة ليش واگفين ومشلنة التابوت.
اجوي الولد وساعدونة بالشيل.
وكلهم لاحظو ثقل التابوت، بحيث بصعوبة گدرنة نمشي بيه رغم ثمانية شايلين التابوت !
همس مُعقب الي جان گدامي: ورانة ؟
لفيت راسي وهنا جانت الصدمة !
حسيت كل شبر بجسمي كام يرجف برهبة وخوف، ازدادت نبضات گلبي بـ هلع، وكلت بصوت ناصي.
-شباب وقفوو.
وكفو الشباب وكل واحد منهم بأستغراب: هو بگوات شايليه احنة ليش توگفنة ؟
نزلو التابوت وباوعو علية، ومُعقب اندار يريد يشوف الرجال، بس جمد بمكانة بصدمة وحتى الشباب البقية هم فتحو عيونهم بصدمة من باوعو ورانة !!
برهان: لا مستحيل !!!!
بلعت ريگي وكلت: مو شلناه حطيناه بالتابوت !!!!
فتح مُعقب التابوت بسرعة وهو يكول.
-بسم الله الرحمٰن الرحيم، بسم الله الرحمٰن الرحيم.
وهنا جانت الصدمة لكلنة...
التابوت فارغ !
.
.
.
.
الأكـبر
حطيت رجلي على راسة وصدري يرتفع وينزل احاول ارجع بيهة انفاسي، ابتسمت وصحت وانا اضحك.
-انا مو كتلك ما تگدر للأكـبر ؟؟؟
حط أيدة على رجلي وكل: والله بعد مارجع ومتشوفني بس هدني.
الأكـبر: بأحلامك الخضرة.
صاح: يمعودين لحگوني، خلصوني من هذا المخبل.
وخرت رجلي من فوك راسة وكعدت على بطنة اضرب بيه واصيح.
-اعمالكم هاي وعلي الا اخليكم تندمون عليهة ولك زعطوط بعدك مراهق وهيج تسوي چا من تكبر شلون ؟
ابتعدت عنة واستغفرت ربي وكملت كلامي بصوت عالي.
-وين صار هذاك الثاني ؟؟؟
باوعت حولي أدورة، وشفتة من بعيد يركض ويضحك وبيدة ساطور وديلمع من بعيد وبس شافني داباوع عليه صاح بصوت عالي.
-هااا ضحية العيد جاهزة ؟؟
باوعت على الجواية وهو بس شاف الكـابر وشنو بأيدة صاح بصوت عالي.
-لا مراح تسويهة لا.
الأكـبر: واذا كتلك اسويهة ؟
نفة براسة وصاح: عليك ابو فاضل وعلي بعد ماعيدهة بس عوفني.
وكف الكـابر بمكانة وهو يضحك، رفع الساطور وكل.
-ها ؟؟
الأكـبر: يلا جاهز.
صاح الولد: ونبي بعد ماعيدهة ونبي بس كافي هدوني.
نزلت عليه وسحبتة من ياختة حيل وگمت اضرب بوجهة وانا اصيح.
-بريئ منك النبي بريئ، ولك تبوك وتدخل لبيوت العالم ؟؟؟؟
الكـابر: مع كل الافس وگعت بيد الناس الغلط، اهمدة حظك اي والله، منو هذا العاقل يدخل بيت حمدية ؟
شمرتة بعد ما خليت الدم يطلع من حلگة وكلت: يلا روح منا، واذا اشوفك بعد هذا الساطور شايفة ؟؟ اذبحك بيه وانا الأكـبر وانطيت چلمة.
الكـابر: صير مثقف اسمهة كلمة مو چلمة.
الأكـبر: انتَ شوكت تنجب ؟
رجعت عيوني على الثاني، گام من مكانة بسرعة ممصدگ عفتة وگام يركض باعد عن المكان، باوعت على أخوية وكلت وانا عاقد حاجبي.
-وثانياً انا دزيتك علمود تجيب سجينة، جايبلي ساطور حمدية ليش ؟؟
الكـابر: هو شنو الي يخوف هذول الزبالة غير هذا الساطور !!
الأكـبر: الكـابر.
اخذ نفس وكل: أي افتهمت بعد، استغفر الله.
تمشيت برة المزرعة راجع للبيت وهو يمشي بصفي وحاط الساطور على جتفة عبالك سفاح، دفعتة من يمي وكلت.
-ذبة بعد هسة الجهال يشوفوك !!!
الكـابر: يمعود شنو تكول والعباس حمدية تذبحني بيه اذا أذبة.
الأكـبر: يعني جايبة بدون علمهة ؟؟
ابتسم وهز راسة وانا ضحكت، فتحت باب البيت وقابلنة صياحهة.
حمدية: اجو المشعوذين اجو، ولك كـابر هاي شنو بأيدك ؟؟
الكـابر: لگيتة برة جموح ذابتة.
طلعت تلفونهة الطابوگة وشمرتة علينة، وثنينة وخرنة وأجة بالحايط الورانة، وهي صاحت بصوت رج البيت رج.
-ولك تجذب هم تجذب، عبالك مشفتة بأيدك وانتَ طالع للحرامي برة ؟؟؟؟
الأكـبر: هسة يمة دخلينة نفوت شعلية بسوالف الكـابر انا ؟
حمدية: اصلاً كلة منك انتَ وابو فاضل.
رفعت أيدية وصحت: يابو فاضل دخيلك.
بگوات عافتنة ندخل لغرفتنة، مسحت على وجهي وتمددت بفراشي على الگاع، نزع الكـابر قميصة وهو يكول.
-منروح لشغلنة ؟
نفيت براسي: باجر ماگدر اليوم.
الكـابر: متكاسل هواي هاي الفترة، يمكن الشغل مأثر عليك.
الأكـبر: سد بوزك.
غمضت عيوني علمود انام.
ومستحيل ثنينة ننام الليل بدون كوابيس واحلام الي تجينة، والي يحيرنة ثنينة نفس الاحلام نحلمهة وبنفس التفاصيل.
فتحت عيوني الصبح على صوت خالتي تكول: شيگعد النباشين هسة !!
عدلت الغطا وانا اكول: بقة بس تكولين علينة سحرة.
حمدية: ليش انتو شتسوون ؟
صحت: ولج يـوم شنو سالفتج من الصباحيات ؟؟؟
حمدية: گومو يلا الريوگ جاهز، ولك كويبر بعدك نايممم گوم.
راحت يمة ودفرتة برجلهة وهو فز وصاح: هاي تخبلت !!!
حمدية: وهرش اليهرشك ويلا ترة تكسر ظهري وانا اسويلكم الريوگ.
الكـابر: على اساس شلون ريوگ، هو طاگة بيضتين بطاوة مزنجرة.
مردت عليه طلعت من الغرفة وانا گمت من فراشي، ورحت غسلت وجهي ورحت للصالة.
البيت عبارة عن غرفتين وحدة النة ثنينة والثانية لخالتي وبتهة خاتون واختي جموح وصالة الي مسوينهة مطبخ وصالة وحتى مرات تنگلب غرفة نوم من ماكو ضوة والدنيا تصير حارة.
عايشين بيت صغير بوسط مزرعة الوحيدة الباقيتلنة من أبونة الله يرحمة.
أمي ماتت واحنة صغار فـ تربينة على أيد أبوية وخالتي حمدية، وجان كل شغلنة نرجع من المدرسة لازم ناكل ونگعد نشتغل بالمزرعة لحد الليل ونگعد نقرة دروسنة.
من وصلنة للثالث متوسط بطلنة بعد من المدرسة وگعدنة نعين أبوية لحد ما توفى ومبقة عدنة أي شي منة غير بس المزرعة الي عافهة نسترزق منهة كم فلس.
گعدت بالگاع واخذت خبزاية حارة جديد مسوينة وكعدت أكل والكـابر اجة ووجهة بعدة مبلل وكعد ياكل وياية واحنة نباوع على الباب منتظرينهن يدخلن.
دخلت خاتون وهي شايلة صينية مسوينهة من الخوص، گعدت يمنة وكلت.
-وهاي جبتلكم الأجبان تزقنبوهة قبل ما تجي أمي.
الكـابر: عمي انتِ وبس.
خاتون: لعد شعبالك، يلا أكل هسة الأكـبر يبلع الصينية.
الأكـبر: جموح وين ليش ما تجي تاكل ؟
خاتون: تريگت الصبح قبلنة وهسة هي برة يم أمي.
گعدنة ناكل واحنة نضحك وياهة، مو أختي صحيح بس مكانتهة بنفس مكانة جموح.
لدرجة العالم عبالهم هي هم اختي لان أي أحد يسألني اكولة اختي الصغيرة، بس الكـابر الة غير رأيي وابد مراضي عن هذا الشيء....
خلصنة الريوگ وطلعنة برة يم خالتي نساعدهة بالمزرعة وجموح هي وخاتون بدلن ولبسن هدوم المدرسة علمود الكـابر يوصلهن.
ثنينهن يداومن غصب عليهن صف ثالث متوسط، واحنة ردنة نبطلهن لان ماكو فايدة، لا يقرن ولا يدرسن وسحل يعبرن من مرحلة لمرحلة، بس خالتي رفضت رفض قاطع يبطلن وكلما يشكن من الدراسة ونكوللهن لا ترحن هي توگف بالوجه وتكول ياكلن نعل يبطلن.
مشة اليوم بين الشغل والتعب لحد ما صار الليل.
دخلت خالتي لغرفتهة وانا باوعت على الكـابر واشرتلة براسي.
ابتسم وكام من مكانة وكل: جموح وخاتون سدن الباب ورانة ولا تفتحن لأي احد.
خاتون: واذا أمي سألت ؟؟
كلنة ثنينة بنفس الوقت: عدهم شغل.
هزت راسهة وجموح كلت: راح ننتظركم لحد ما ترجعون.
الأكـبر: نتأخر لا تنتظرين.
باوعت علينة بقلق والكـابر ضحك وهو يلبس حذائة.
-والله تقلقين بلا فايدة، رايحين ورادين الفجر لا تخافين.
طلعنة ثنينة صعدت على الدراجة وغطيت وجهي وخشمي بوصلة سودة وانطيت وحدة لـ الكـابر هو هم حطهة وصعد وراية وبديت اسوق والكـابر حاط أيدة على خصري ويكول.
-تخيلني حبيبتك.
الأكـبر: وهذا يا مخبل يصعد حبيبتة وياه على دراجة ؟؟؟
الكـابر: چا تصعدهة بستوتة ؟
ضحكت وكملنة طريقنة للمكان المقصود، مقبرة وادي السلام.
حطينة الدراجة بمكان آمن وطلعت من الصندوق جفوف ولبستهن والكـابر نفس حالتي واخذنة كشافات، باوع علية بابتسامة وانا هم ابتسمت ودخلنة جوة ثنينة.
اشرت له على الجهة اليسرى وكلت: انتَ روح منا وكمل طريقك كلة گبل ولا تروح يمنة ويسرى، ولا تبتعد اكثر من كيلو متر.
هز راسة وكل: تمام دير بالك على نفسك واذا مگدرت تطلع لو صار شيء انتظر بمكانك لحد ما يصير الصبح ولا تتحرك.
هزيت راسي ورحنة كل واحد لجهتة.
وانا امشي واضوي بالكشاف الي بأيدي وعيني تتفحص المكان زين.
استمريت على هذا الحال لحد ما شفت قبر قديم.
جان على القبر أسم وتاريخ الولادة والوفاه بس مو واضحات، لان قديم كلش، واساساً طوابيگ القبر جانت متكسرة، والي جذبني بيه جان اكو ثلاث فتحات بثلاث زوايا من القبر.
ثبتت الكشاف على القبر الي بصفة ووخرت الطوابيگ المكسرة والاسم توضح اكثر هو والتاريخ.
اخذت نفس ومسحت گصتي لان عرگت، وكلت بصوت مسموع وانا اطلع الخنجر الي بجيبي واحفر الفتحة الاولى.
-اللهم انت اكبر كبيراً، اللهم لك الحمد كثيراً، اللهم إنا نسبحك بكرة وأصيلاً، اللهم انت العالم بكل حال، اللهم منزل الكتاب ومجري السحاب، هازم الأحزاب شديد العقاب سريع الحساب، اللهم احصِ السحرة وأعوانهم عدداً.
طلعت من عدهة علاگة سودة، وگعد بالگاع وگمت اردد وانا افتح العلاگة.
-اعوذ بكلمات الله التامات من شر ما خلق وذرأ وبرأ، ومن شر ما ينزل من السماء ومن شر ما يعرج فيها، ومن شر ما يلج في الأرض، ومن شر ماي خرج منها، ومن شر طوارق الليل والنهار، ومن شر كل طارق يطرق إلا طارقاً يطرق بخير يا رحمن.
جان بداخل العلاگة شعر وجان هواية يعني مو خصلة صغيرة، جان شعر مال وحدة مبين شعرهة طويل وگاصتة.
ذبيت كل الشعر بالگاع وگمت ادور بداخلة لان حسيت بشيء ثگيل.
بعدت كل الشعر وتوضح عندي الي جان بداخلة.
قفل والحديدة مالتة ملفوفة بوصلة بيضة، وعلى القفل مرسوم دائرة ومكتوب احرف وكلمات ممفهومة.
شلت القفل وطلعت مگص من جيبي وگصيت الوصلة البيضة وانا اردد.
-اعوذ بالله السميع العليم من الشيطان الرجيم.
اخذت نفس لان حسيت بخنگة مو طبيعية وانا افتحة.
بس مو مثل الخنگة الي تجي للمسحور نفسة.
هسة الي دافكة سحر لأبنية، الله اعلم حالهة شنو وشنو العاشتة والي تعاني من ورة هاي النجاسة الي البشر وگعو نفسهم بيهة، والاسوء من كل هذا هسة انا ودافكة شنو ديصير يمهة.
فك السحر كلش صعب، ويحتاج اشياء انا والكـابر بصعوبة حصلناهة، وحفظنة ادعية من كتب واخذناهة من شيوخ من سمعو الي نسويه انطونياهة كنوع من المساعدة وعلمود لا نتأثر احنة بالسحر.
خلصت من الوصلة البيضة وسويت اللازم وية الاوراق الي جانت ملفوفة وية الوصلة وشلت القفل.
رحت للفتحة الثانية والثالثة الموجودة بالقبر، والي صدمني الثالثة.
جان عليهة أسم بنية أبوهة نفس أسم أب المتوفي الي دافنين السحر يمة، يعني أختة والي مسويلهة السحر شخص من اقاربهة !!!
خلصت كل الي يمي وگمت من مكاني، واخذت طابوگة من الي ذبيتة وكسرت بيه القفل ورحت ابتعدت شوية اكثر ادور على بعد.
هذا الشغل نسويه مو بس علمود نساعد العالم، وانما بسبب تأثرنا بهاي السوالف.
أبوية واصدقاءة هم جانو هيج يسوون، ومن مرة اخذونة انا والكـابر وياه وشفنة الي يسووه كلش جنة متحمسين نجرب احنة هم.
من بعيد لمحت واحد ديأشرلي، عقدت حاجبي باستغراب وحولت الكشاف عليه وهو يتقدم علية.
وگف گدامي وجان لابس دشداشة وحاط غترة على جتفة وكامش سبحة.
باوع علية وكل: منو انتَ وشتسوي هنا ؟
كلت وانا اباوع عليه بحدة: وشنو تستفاد من تعرف هويتي ؟
رفع حاجبة وكل: واضح انتَ من الي...
قاطعتة: كلت ميهم منو انا وشنو شغلي.
ابتسم وكل: انتَ واحد من التوأم.
عقدت حاجبي وكلت: وشعرفك بينة ؟
بقة على ابتسامتة وكل: هواي ينجاب طاريكم، خصوصاً من الدفانين الي يشوفوكم دائماً.
مرديت عليه بقيت واگف بمكاني وهو كل: كمل شغلك أبني، هذا كلة أجر وثواب لك ولأخوك.
هزيت راسي بدون كلام وردت اروح بس هو استوقفني.
-بس كلي ياهو انتَ، الأكـبر لو الكـابر ؟
ابتسمت وباوعت عليه بدون كلام، وهو ميل راسة باستغراب، نزلت اللثام من وجهي وكلت...
الأكـبر: انا الكـابر.
إرَم
گاعدة بالگاع وداعجن وأمي على التنور دتطبگ الخبز، والحرارة كلش عالية ودتضرب وجهي، مسحت وجهي بالحجاب وكلت.
-اخخخ شوكت اخلص بعد ربي.
باوعت علية وكلت: چا من تزوجين شلون ؟
إرَم: يا زواج يمة انتِ ملعبة نفسي من گعدتي هنا ومن گعدتي بيت رجلي.
وهاج: دعجني زين، وين قوتج ولج لو بس فالحتلي بالحجي والنگ ؟؟
إرَم: يمة عليج ابو فاضل هديني بعد بزعت من الظهر دتشتغلين بية !!!
وهاج: روحي روحي على اساس شنو سويتي انتِ، هياتة الطحين بعدة بأطراف العجين.
مصدگت من كلتلي روحي، گمت من مكاني وركض دخلت جوة ورحت غسلت أيدي وأمي تصيح.
-طاح حظج اي والله، بنات هالوكت مامنهن أي فايدة.
مرديت عليهة، بس رفعت راسي بأنزعاج من سمعت نوح يصيح.
-إرَم مي.
إرَم: انتَ جيب لنفسك ماشتغل عند الخلفك.
نوح: اكسر راسج ؟؟؟
مرديت عليه وهو صاح: مينطلب منج شي أبد، بس من انتِ تردين شي لازم نوح يركض.
إرَم: انتَ ليش راجع من وقت هيج ؟ مو المفروض تكون بالشغل ؟
نوح: وانتِ شعليج بية ؟
إرَم: يعني عايف بابا وحدة بالشغل.
باوع علية وكل: انتِ شعليج بهاي السوالف هسة ؟
گعدت بالگاع يمة وكلت: قنعتلي بابا ؟
هز راسة: حاجيتة وهو كل لعد مسؤليتهة عليك انتَ تصرف عليهة وانتَ تاخذهة وتردهة يعني اذا صار شي عليج انا الي اتحاسب.
إرَم: يلا ميخالف أخوية لخاطري اكيد تتحمل.
نوح: نعال على خاطرج لشوكت بعد اتحملج انا ؟
إرَم: لعد ابقة بالبيت زين ؟ انا اريد اتوظف مستقبلاً واعتمد على نفسي، مو على رجال يشبهك بالخلق والاخلاق !
باوع علية وكل: بلا منو ياخذج باجر.
إرَم: صاير ميتشاقة وياك !
دخلت أمي شايلة بيدهة صينية مال خبز وكلت.
-وين البتيتة انا شكتلج ؟؟؟
إرَم: يـوم حاطتهة من زمان والله، اكيد مستوية هسة.
صاحت: اي دروحي جيبيهة المن صافنة !!!!
گمت من مكاني بسرعة ورحت للمطبخ، كلشي عند أمي بالعياط ماعدهة هدوء بالحجي.
شلت الجدرية ووديتهة للصالة وحطيتهة يم أمي الي طلعت منهة البتيتة وبدت تگشرهة وتحطهة بماعون گدام نوح وهي تكول.
-هاك اكل حبيبي انتَ.
وانا گشرت لنفسي وانا اباوع عليه بضيق الولد الوحيد والدلال كلة له، وانا الابنية الوحيدة ويكلولي ساعدي امج لا تخليهة تشتغل انتِ وحيدتهة وهيج سوي وهيج سوي انتِ وحيدتهة.
خلصنة عشاء وأبوية هم رجع وگعدو شوية يحجون ويسولفون وانا كاعدة واباوع عليهم، لحد ما نوح باوع على أبوية وكل.
-اي بوية مثل ما متفقين باجر اخذهة للجامعة.
أدريس: انا كتلك انتَ تشيل مسؤليتهة مادام تلح بالموضوع.
نوح: وانا كتلك قابل بهذا الشي، خليهة تدرس ويكون عدهة شهادة ليش تگعد بالبيت لا شغل ولا عمل، على الاقل اذا مستقبلاً تزوجتلهة واحد ماعندة هي يكون عدهة وضامنة نفسهة !!!
باوع علية أبوية بطرف عينة وكل: اي ان شاء الله، بس اذا اخذت الشهادة وگعدت بالبيت انعل سلفة سلفاهة.
ضحكت وكلت: لا بوية لعد المن ماخدة الشهادة انا غير علمود اشتغل.
ابتسم وكل: مادامج اختاريتي هذا الطريق لازم تنجحين بيه.
هزيت راسي وأبوية رجع كل: محامي ومدرسة بهذا البيت !
ضحك نوح وكل: يلا مباقيلي انا شي بس هاي السنة.
عفتهم ورحت لغرفتي وانا متحمسة كلش، باجر راجعة للجامعة بعد غياب ثلاث ايام.
أبوية راد يبطلني من الجامعة وانا گعدت وحجيت وية نوح علمود يقنعة ارجع للجامعة.
السبب ؟ لان كل بنات عمامي وعماتي مبطلات من المدرسة وكاعدات ببيوتهن ويساعدن امهاتهن، ومن سمعو انا بديت اداوم بالجامعة گامو يحجون براس أبوية لحد ما كلي بعد مترحين بس نوح قنعة ارجع.
ادرس تربية تاريخ وهو الاختصاص جنت مرايدتة الصراحة لان انا احب الانكليزي اكثر واحب ادرسة واتعلمة، واگعد افيك باللغة عود انا انكليزية وهيج بس مگدرت ادخللهة لهذا دخلت تاريخ.
يوم الثاني گعدني نوح وانا رحت غسلت وبدلت بحماس مو طبيعي.
سويت ريوگ لثنينة وكعدنة ناكل وأمي جانت دتنظف بالبيت.
خلصنة ريوگ وانا حطيت عباتي على راسي وطلعنة ثنينة وصعدنة بسيارة أبوية ونروح للجامعة.
نوح يستخدم سيارة أبوية علمود نروح للجامعة وعلمود احتياجاتة الثانية، وهو على اساس بس يتخرج يشتري وحدة لان ديجمع راتبة الي ياخذة من الشغل.
منطقتنة عادية كلش وبسيطة، يعني الي مستواهم اقل من المتوسط يعيشون بيهة.
عايشين بالنجف بس بمنطقة بعيدة عن وادي السلام والقبور هم بعيدة علينة، بس انا كلش اخاف من نروح نزور.
بحيث مانام بالليل اضل الوقت كلة افكر واذا انام اشوف كوابيس، خصوصاً مرة رحنة للمقبرة نزور جابو ميت وجان القبر مالتة كلش قريب علينة فاحنة وگفنة نشوفهم.
وانا شفت شلون دفنوه وحطو عليه التراب، اتخيل هسة ديتحاسب على كل اعمالة وعلى كل فعل موزين سواه بالدنيا، تجيني قشعريرة لا ارادياً، ومن هذاك الوقت انا اخاف.
نزلنة من السيارة ودخلنة للجامعة، ثنينة بنفس الجامعة بس اقسامنة تختلف.
گعدت بالقاعة وحطيت ملازمي وانا مبتسمة، رغم ماعندي صديقات ولا زميلات بالجامعة بس الفرحة الي تجيني من اكون متواجدة بهذا المكان متنوصف.
خلصت اول ثلاث محاضرات وطلعت برة ورحت للكافتيريا اشتري شي أكلة.
اخذت الي أريدة ورحت گعدت على مصطبة اكل واباوع على الطلاب.
وشفت من بعيد نوح گاعد يم صديقة وديحجي وياه وعينة علية، ابتسمت وهو هم ابتسم ورجع عيونة على صديقة.
بقيت كاعدة بمكاني لحد ما نوح عاف صديقة واجة يمي كل.
-ليش وحدج ؟
إرَم: احب اگعد وحدي.
نوح: شوكت تخلصين ترة اخلص بسرعة انا !
إرَم: مباقي شي بس محاضرة وهاهية.
هز راسة وبقة گاعد يمي لحد ما اجة وقت محاضرتي.
كملت محاضرتي وطلعت لـ نوح الي جان واكفلي.
تمشينة ثنينة وصعدنة بالسيارة وانا گعدت اباوع على الطريق بابتسامة.
وصلنة للبيت مالتنة ونزلنة ودخلنة للبيت، كالعادة أمي بالمطبخ ودتطبخ ومخلصة شغل البيت كلة.
دخلت لغرفتي وغسلت وغيرت ملابسي ورجعت طلعت للمطبخ اساعد أمي بـ صب الاكل.
هيج مر اليوم طبيعي بين گعدتي وية أهلي وسوالفنة وية بعض.
مشت ايامي بالجامعة طبيعي ومثل العادة الابتسامة مالية وجهي، الي يشوفني يكول ممصدگة داخلة جامعة، بس انا فرحانة لان رجعتلهة بصعوبة وكسرت كلمة عمامي وعماتي وخليتهن هيج يغلن لان بناتهن مكملن بس انا لا كملت.
بيوم خلصت كل محاضراتي وگعدت منتظرة نوح يطلع لان جان ديمتحن بالقاعة.
گاعدة على المصطبة وداكل لفة وحاطة يمي عصير واشرب وانا اباوع على الرايح والجاي.
سمعت صوت شخص وراية، انداريت وجان ولد انا اعرفة.
دائماً اشوفة وية نوح ويحجون سوية.
ابتسم وكل: مرحباً !
هزيت راسي وهو باوع على المكان الي گاعدة عليه وكل.
-تسمحين اگعد ؟
نفيت براسي وكلت: اعتذر، بس لا.
رفع تك حاجب والابتسامة بعدهة مرسومة على وجهة وكل.
-نوح مو قليل.
عقدت حاجبي باستغراب من كلامة، بس مرديت عليه نزلت راسي وحطيت اللفة مالتي بالكارتونة مالتهة والنية جانت اگوم واعوف المكان لان اذا نوح شافني تصير مشكلة.
استوقفني صوتة: والله ونوح عرف يختا..
قاطعة صوت نوح وراه يكول: شتسوي هنا ؟
من خوفي تشنجت وطبگت اسناني بقوة، ونوح تقرب من الولد ودفعة حيل وكل بصوت مبين عليه صار عصبي.
-ليش واگف يمهة ؟؟
عقد الولد حاجبة وكل: شبيك نوح !!!
نوح: روح مهيار منا.
مهيار: تمام اهدئ عمي، يا بنية محاجيج بـ شيء انا ؟
مرديت عليه ونوح رجع يمة ودفعة حيل وكل بصوت عالي.
-وخر يلاااا.
باوع علية واشرلي براسة، گمت من مكاني وابتعد عن المكان بدون ما حتى اندار واباوع وراية والرجفة ملازمتني.
طلعت من الجامعة وانتظرت نوح برة وانا بعدني ارجف.
مطول فترة خمس دقايق وطلع هو هم من الجامعة وبدون كلام اشرلي براسة يعني يلا.
تمشينة لحد ما صعدنة بالسيارة راجعين للبيت والي خوفني اكثر هدوء نوح.
اذا رجع للبيت وسولف لأبوية بعد احلم بشيء اسمة كلية، فگضيت الطريق كلة ادعي بگلبي.
وصلنة للبيت ونزلنة ثنينة وهو بعدة على هدوئة، حتى محجة وياية.
دخلنة وهو بس دخل سلم على أمي وراح لغرفتة وانا گعدت بالگاع.
باوعت علية أمي وكلت: شبي وجهج صاير كركم !!!
نفيت براسي وكلت: مابية شي يمة.
وهاج: لعد گومي يلا ساعديني نفرش السفرة، أبوج بالطريق.
نزعت عباتي وانا اكول: يـوم يعني ميصير ارجع بس شوية ارتاح !!!
بدون ما تباوع علية رجعت للمطبخ وكلت: انجبي ويلا غيري هدومج.
گمت من مكاني ورحت غيرت هدومي وانا التعب مسيطر علية.
رحت للمطبخ وساعدت أمي بالطبخ وانا ادعي نوح يحن علية وميحاجي أبوي بالي صار اليوم.
مرت فترة وأجة أبوية وتجمعنة كلنة على السفرة، وانا اكل وعيني تراقب نوح وهو جان ياكل بـ هدوء بدون ما يرفع راسة.
خلصنة وانا ساعدت أمي، وطمنت نوح ماحجة شي ولا فتح موضوع.
صعدت لغرفتي ونمت ساعة وحدة وگعدت اقرة دروسي.
جنة بس انا وأمي بالبيت، نوح يروح وية أبوي يكملون الشغل.
فترة وسمعت صوت هوسة، گمت من مكاني وفتحت باب غرفتي ووگفت يم المحجر مال فوگ اريد اشوف منو يمنة.
جانن عماتي لطفية ونجيبة ووياهن زوجة عمي الجبير ساعدة.
هذن الثلاثة بالخصيص اذا تجمعن، الشيطان يستحي يصير رابعهن يروح يطبگ على صفحة.
على كيف هيج انسحبت اريد ارجع لغرفتي علمود ماضطر انزل واسلم عليهن، بس الوالدة الله يحفظهة صاحت.
-ولج إرَم نزلي سلمي على عماتج...وين صرتي ولج تعاي.
عضيت أصبعي وانا اكول: اي يـوم نازلة هسة.
نزلت جوة بعد ما عدلت شعري وسلمت عليهن، لطفية من سلمت عليهة كلت.
-ها ولج صرتي جامعية ماتتحاجين !!!
ابتسمت مجاملة ورحت سلمت على عمتي الثانية ومرة عمي ورحت للمطبخ احضر الهن ضيافة.
اريد بس احطة گدامهن وارجع لغرفتي لان اذا اگعد يمهن يبدن مواضيع الجامعة وشلون انا بنية وادخل جامعة لان يمهن الجامعة بس للولد ميصير البنات يدخلن.
حطيت الضيافة وردت اروح بس كمشني دگ سوالف وحجي وانا تورطت وياهن تورطت.
لحد ما اجة أبوي ونوح من الشغل وگعدو همة هم وياهن يسولفون وانا بس گاعدة منتظرتهن يرحن لان راح يبدن يحجن براس أبوي.
بس وجود نوح نوعاً ما مزعج بالنسبة الهن، لان أي حجاية يحجنهة هو يردهة الهن.
كلما يجن لو احنة نروحلهم لازم موضوعهن إرَم وجامعتهة، محترگات لان انا جامعة وبناتهن بالبيت لا دراسة ولا زواج الي بطلن علمودة.
بيوم جنة راجعين من الجامعة كالعادة وجانت الدنيا حارة تحرگ حرگ وجان يوم خميس.
دخلنة للبيت وجان أبوي گاعد وأمي هم گاعدة.
سلمنة عليهم ونوح كل لأبوي: ها بوية شو بالبيت من وقت ؟؟
أدريس: اي تجهزو راح نروح لكربلاء.
گعد نوح وكل: شنو نبات هناك ؟
هز أبوية راسة وكل: اي باقين هناك بما انو اليوم خميس وباجر جمعة ماعدنة شي.
نوح: والمطعم ؟
أدريس: ابو ناصر موجود.
رحت لغرفتي وانا مبتسمة ومتحمسة بنفس الوقت واسمع أمي تصيح.
-ولج إرَم تعاي ساعديني.
غسلت بسرعة وبدلت ونزلت اساعد أمي وگعدنة كلنة ناكل على الغداء وأبوية كل بس نخلص أكل ارتاحو يلا تتحضرون.
وصدگ بس خلصنة ارتاحيت ساعة وبديت حضرت نفسي وحطيت الاشياء الي احتاجهة بعلاگة ونزلت جوة يم أهلي الي جانو كلهم متحضرين.
طلعنة برة وصعدنة بالسيارة وأبوية بدة يسوق وانا گاعدة واراقب الطريق واسمع حجيهم وسوالفهم الي لو على الشغل لو على مواضيع ثانية عشوائية.
فترة ووصلنة وأبوية طبگ سيارتة بفرع جان تقريباً فارغ ومابيه اي أحد وحتى بيوتهة فارغة لان على اساس نخلص زيارة نروح نحجز لبيت صديقة ونرتاح بيه وميحتاج نحطة بالكراج.
كملنة طريقنة مشي للإمام وبس وصلنة افترقنة عن أبوية ونوح.
دخلنة جوة انا وأمي وگعدنة ثنينة نصلي ونقرة الزيارة وبقينة گاعدين ومرتاحين بمكاننة لان أبوية كللنة اخذو راحتكم شگد تبقون أبقو.
فترة يلا گمنة من مكانة ورحنة للمكان الي أبوية اتفق بيه ويانة راح يتواجد بيه هو ونوح.
وصدگ جانو ثنينهم گاعدين ويسولفون وية رجال واگف وبس شافونة سلمو عليه واجو يمنة وأبوية كل.
-ها نروح بعد ؟
وهاج: خلي نروح للسوگ نشتري كم شغلة يلا نروح.
نوح: اهووو، يـوم اجليهة لباجر !!
وهاج: يا يااا وانا ماصدگت شوكت اجي هنا.
هزيت راسي وكلت: اي بابا عليك الله، شوية نفتر ونرجع.
وهاج: وهنا عدهم خوش اقمشة اريد اخذلي كم قطعة، ديلا هي نص ساعة.
باوع أبوية على نوح وكل: هسة تشوف بعينك هاي النص ساعة.
نوح: انا اعرفهن النسوان اعرفهن زين.
تمشينا وانا اكول: طبعاً تعرفهن، غير ممبقي بنية بالكلية مصادقتهة !
باوع علية وخزرني: ولج اجي اكسر راسج ؟
ابتسمت وكمشت أيد أبوية: بابا دتشوف نوح ؟
مرد علية أبوية، حط أيدة بجيبة ووگف بمكانة يجيگ جيوبة، وگفنة كلنة وياه ونوح كل.
-شكو ليش وگفنة ؟
عقد أبوية حاجبة وكل: محفظتي ماكو !!!!
باوع عليه نوح وكل: انتَ متأكد جبتهة وياك ؟؟؟
حط أبوية أيدة على گصتة يفكر وانا بقيت واگفة اباوع عليه وأمي هم، نفة براسة وكل.
-يمكن عفتهة بالسيارة، خلي نرجع وعود باجر نرجع للسوگ.
نوح: اني جايب محفظتي وياية.
أدريس: شگد بيهة ؟
طلعهة نوح من جيبة وفتحهة وكل: بيهة 15 الف.
هز أبوية أيدة وكل: لفة وتعرف وين تحطهة.
ضحك نوح وراح وراه وانا وأمي هم لحگناهم ضايجين لان بهيج وقت حلو نفتر وبراحتنة، اما اذا باجر يعني اكيد راح يكون الظهر لو العصر والشمس تسطر سطر.
وصلنة للمكان الي حطينة بيه السيارة وصعدنة كلنة وبدة أبوية يسوق للبيت مال صديقة.
فترة ووصلنة ودخلنة جوة.
هو بيت صديق أبوية فارغ، عندياه بكربلاء ويفتحة بزيارة الاربعين للزوار الي يجون من محافظات ثانية ينامون بيه.
ومرات من احنة نجي عائلة لو هو عائلة يجون يبقون گاعدين بيه.
نزعت العباية والحجاب وساعدت أمي نحط العشا الي جبناه ويانة وگعدنة كلنة ناكل.
ورة ما خلصت رحت للحمام وسبحت اريح جسمي ووراهة رحت تمددت بالفراش علمود انام.
طلعاتنة كلش قليلة واكثرهة تكون لكربلاء لو لمرقد الإمام علي (ع)، بس من نروح نروح بأيام العطل علمود نبقة هناك.
گعدت الصبح وبدلت ورحنة لاقرب مكان نتريگ بيه، ورحنة للإمام العباس (ع) وبقينة هناك لحد صلاه الظهر صلينة وقرينة الزيارة ووراهة رحنة للسوگ.
اخذنة كلشي نريدة من اقمشة ومن حلويات ومن ملابس واشياء ثانية وانا اشتريت هواي ربطات، لان هنانة عدهم النوعية الي استعملهة والي احبهة، يمنة مالگة القماشة الزينة الي أدوم وياية.
رحنة تغدينا ورجعنة لبيت صديق أبوية لان أمي هواي تعبت وكلت اريد ارتاح وأبوية هم نفس الحالة كلو نرتاح يلا نرجع للنجف.
صار الليل يلا صعدنة بالسيارة راجعين للنجف وطول الطريق مگضينهة اكل وسوالف وضحك.
لحد ما صرنة تقريباً بين حدود كربلاء والنجف.
شفنة واحد واگف على الطريق وماد أيدة وبس شافنة وگف بنص الشارع ورفع أيديناتة ثنينهن.
خفف أبوية من السرعة ونوح كل: عوفة بوية لا اديرلة بال.
أدريس: دخلي نشوفة شيريد اجوز يريد مي شي.
نفة نوح براسة معاجبة وأبوية وگف السيارة ونزل منهة ونوح بقة گاعد بمكانة واحنة نباوع على أبوية تقدم من الرجال وگام يحجي وياه.
شوية ومنحس الا الباب الي يم نوح ينفتح بشكل سريع ومسدس ينحط على راسة وصوت طلقة...
يتبع...
_____________
هلا هلا 🫢🤎.
انطوني رأيكم بالبارت، واريد اشوف توقعاتكم للبارت الجاي 🤎.
____________
.
.
.
.
.
.
.
.
.
.
في أمان الله 🖤.