قصـة : فحيـح الافعى
بقلمي : نـون النعيمي ✨
لتنسون التصويت والتعليق بين الفقرات حبايبي ❤️!
.......................................
_ جرني من أيدي ودارني عليـه ورجع أيديه ع الكنتور
اقترب من عندي كلش بحيث جسمه لزك بجسمي
أشهب : صيري حبابه واسمعي كلام حته ما أذيج
ريتال : المفروض اخاف من تهديدك هذا ميخوف چلب.. بعدني ممكمله چان ماحس غير خال شفته ع شفتي
اتجمدت بمكاني احس كلبي دكاته بالثانيه صارت ترليون
هلكد مديدك سريع
نفسي ضاق كلش
اريد ادفعه ماكدر أيدي عبالك صارت شلل
مرت دقائق وهوه ع نفس الوكفه والحركه ادفع بي اريد اعالج ماكو قافل
استسلمت الدموعي اللي بدت اصب من عيوني
ثواني وخر من عندي وهوه يلهث
كلش قريب ع وجهي انفاسه لاهثه تضرب بجهي
عبالك چان بمعركه وجهه احمر دم
باوع عليـه وابتسم مسح دموعي بأصبعه
ورجع خصلت شعري وره أذني
أشهب : شبيج تبچين ؟
ريتال : برئيك ليش دابچي !
أشهب : ما سويت شي غير بس داشوفج شنو نوع التهديد اللي ممكن اسوي
ريتال : شنوو
أشهب : صيري حبابه ريتال منا الحد ما اطلكج اذا تريدين اضل ع وعدي سمعي كلام ولتخليني أاذيج اكثر خوش !
_ حسيت بنغزه بكلبي يحچي الحچي بكل برود
عنده استعداد يلعب ع مشاعري ويدوس كلبي حته بس يسوي اللي يريده
هزيتله براسي ثواني وعافني وراح مدد ع الچربايـة
ضليت وكفه بمكاني وظهري ع الكنتور
أشهب : حضلين واكفه ابمكانج تعاي نامي
باوعتله بكل استحقار ماعرف شلون الانسان ممكن يوصل الدرجه هيج يكره انسان ثاني
الكره اللي بداخلي مستحيل اكدر اوصفه هسـه
بحيث اريد أشرب من دمه هلكد ما كرهته
طلعت رحت للحمام
غسلت وجهي وبللت ركبتي ومسحته تحسسني براحه من اسوي هاي الحركه
وكفت كدام المرايه ورفعت اصبعي تجاه انعكاسي وحچيت ;
_ انتِ اقوى من انو يكسرج ويأذيج شخص نذل مثل هذا كملي الشهر وراه بعد مشوفي اصلاً
اتنهدت ومسحت وجهي
ورجعت للغرفـة .. شفته امدد وخال أيده ع عيونه
مددت ع طرف الچربايـة واتغطيت نص غطه
وانطيته ظهري
حسيت عليـه اندار من هذيج الجهه
انداريت لكيته صدك مندار .. بعد احسن
غمضت عيوني وغفيت ع هاي الحالـه
فزيت ع صوت تليفوني وهوه يدك .. انتبهت ع أشهب بعده نايم .. اخذت تليفوني من الكومدي طلع محمد استغربت لان الساعة بـ ٨ وهوه ميدك هيج وقت فتحت خط واني فاتحه تك عين والنعاس غالبني حچيت بهمس حته ميكعد أشهب ;
محمد : صباح الخير ريتال
ريتال : صباح النور
محمد : شلونج
ريتال : الحمد الله خوما اكو شي من الصبح ؟
محمد : لا ماكو
ريتال : لعد شكو داك هيج وقت !
محمد : تعرفين القاضي سعد مو بله ؟
ريتال : اي مره لزمت دعوتين وهوه چان القاضي مال محكمه
محمد : يريدج تلزمين قضيه تخصه
ريتال : شلون قضيه !
محمد : ماعرف مسألت ع التفاصيل بس كال خل تمرلي اليوم للمكتب
ريتال : ماندل مكتبة
محمد : هسـه ادزلج اياه برساله
ريتال : ماشي
محمد : حترحين ؟
ريتال : والله ما اعرف عندي مراجعه مال طبيب اذا كملته من وكت اروح عادي
محمد : ماشي اذا رحتي عود رديلي خبر
ريتال : تمام
محمد : يلا اخذي راحتج
_ سديته من محمد ورجعت تليفوني ع الكومدي
انداريت ع أشهب لكيته ديباوعلي وعاقد حاجبه
ريتال : خرعتني والله
أشهب : اويي خطيه خرعته
ريتال : ع الاقل حمحم حته اعرف بيك كاعد
أشهب : لا ليش داريد اشوف مرتي ويامن كاعد تحچي بدون ما ادري اصلاً وفوكاه بهمس
ريتال : اول شي مو مرتك اوكي ! ثاني شغله جنت داحچي ويه محمد
أشهب : شيريد هذا الكواد ؟
ريتال : اسمه محمد للمعلومه .. جايتني شغله دعوى
أشهب : وناويه تلزميه ؟
ريتال : ماعرف اذا متعب الزمه
أشهب : ومنو كلج راح اقبل تلزمين ؟
ريتال : لان شغلي ميخصك البيني وبينك كلمات ع ورق يعني اول وتالي راح نعوف بعض فـ مراح اخسر وظيفتي ع مودك
أشهب : الله كريم .. كومي حضريلي ملابس داسبح داولي للشغل
ريتال : متحضر الروحك انتَ
_ انتبهت عليـه وجهه صار احمر كلش حسيته راح يلزكني بالحايط من العصبيه
كز ع اسنونه وحچه ;
أشهب : كتلج كومي حضري بدون لغوه زايده
باوعتله صفح وكمت ع الكنتور طلعتله ملابس
خليتهن ع الچربايـة اخذ خاوليات وطلع للحمام
انتبهت ع مفاتيحه محطوطه ع الميز
كمت اخذتهن وكفت اكبال الكنتور المقفول
بديت اجرب ع السريع ادخل واحد واطلع واحد
وكلبي يدك اخاف يجي أشهب
بقه مفتاح صغير اول مدخلته چان يطلع صوت مال طكه
فتحت الباب ع السريع واني غامرتني الفرحه واخيراً راح اشبع فضولي
اول مفتحت الباب اتصنمت بمكاني
عباره عن اسلحه ومسدسات وطلقات اشكال وانواع
اول سؤال اجه ع بالي شيسوي بيهن
ممعقوله يتاجر بيهن
سمعت صوت خطوات بره قفلت الباب ع السريع ورجعت المفاتيح بمكانهن وكعدت ع السريع ع طرف الچربايـة
واني احس بأطرافي ترجف
من انقتل علوان چان أشهب اول المشتبهين بقتله واجاني هذا الخبر عساس منتقم الاخته
وراه اتناسيت الموضوع لان ممعقوله يسويه
بس هسـه رجع الموضوع ياكل بعقلي من شفت الاسلحه والعتاد كلش متمكن ممكن كلشي يسوي
دخل للغرفـة وهوه لاف المنشفه بس جسمه السفلي
طب للغرفـة وسد الباب ووكف كدام المرايه وانطاني ظهره
وكف يمشط بشعره
عندي هواي تسائلات عن هذا الشخص
لان ما اعرفه شنو كل يوم اكتشف شي جديد من شخصيته
احسه غامض شكد ما احاول اوصل النقطة سطر يطلع بي تكمله بعد
لاحضت اكو بظهره هواي ندوب وشخوط
بس اكذب اذا اكول بشعات بالعكس ناطيه جماليه الظهره ماعرف شلون
أشهب : كتلج قبل اعرف بروحي حلو
ريتال : واني كتلك الله يرزقني بثقتك
أشهب : ان شاء الله
_ اندار عليـه وهوه يبتسم اقترب من عندي وشمر المشط بحضني ورفع حاجبه
ريتال : خير داده ؟
أشهب : مشطي شعري
ريتال : شنو ايدك مكسوره
أشهب : اني مو كتلج سمعي كلام ها ؟
_ اتنهدت وكمت وكفت لزمت شعره وجريته حيل
لزمته بتك أيد والايد الثانيه لازمه المشط بيه
أشهب : كتلج مشطي مكتلج اقلي شعري من راسي
ريتال : هذا الموجود
_ كمت امشط بشعره واني اضغط عليـة بكل قوتي
متأكدة اني كاعد يتأذه بس مديحچي شي
جر المشط من أيدي وخزرني ورجع وكف كدام المرايه
عفته ونزلت جوه
لكيت امه واكفه دتسوي ريوك
رحت وكفت يمه ورسمت ابتسامه ع شفتي ;
ريتال : صباح الخير خاله
سمر : صباح النور يعيون خالتج
ريتال : اساعدج
سمر : بس طلعي استكاين من الكاونتر وخلي بيهن شكر
ريتال : شكد اخلي شكر
سمر : كل استكان خاشوكه ونص
هزيتله براسي ورحت ع الستكاين
طلعتهن وخليت شكر ثواني وماحس غير احد حاضني من وره
انداريت لكيته نور ابتسمتله ومسحت ع شعره وحچيت ;
ريتال : صباح الخير حبيبتي
سوتلي حركه بأيده بس ما فتهمته
لان ما اعرف لغه الاشاره
سمر : كلتلج صباح النور
ريتال : اهااا
سمر : سهله لغه الاشاره
ريتال : هسه اخلي نور تعلمني مو نور
هزتلي براسه وضحكت وراحت كعدت ع الميز
لحظات ونزل أشهب سلم وكعد بصف نور يشاقه وياها
كعدت كباله وخاله كعدت بصفي
كعدنه ناكل بهدوء احسهم عائله كلش هادئه وصراحه هذا الشي غريب بنظري
سمر : اليوم راح يجون خوالك
أشهب : شعدهم؟
سمر : درو بزواجك
أشهب : وشلون درو !
سمر : اكيد من عندي قابل منين
أشهب : ديربالج يسمعون ريتال لو نور شغله وحق الله امحيهم هل مره بالاخص هاي الحيه
سمر : لا يمه قابل شيسمعوهم شسالفه
أشهب : خوش
سمر : بس راح ادز غده من بره لان مابيه حيل اسوي شي
ريتال : اتسوكلج بدربي ؟
سمر : ليش وين رايحه ؟
ريتال : عندي دعوى اروح اشوفه شنو هيه اذا متعب الزمه
سمر : اهاا
ريتال : اي خاله
سمر : بس مو تتأخرين همه ع الغده اهنا ترا
ريتال : لا ما اتأخر بس كتبيلي شتريدين بورقه حته ما انسى
سمر : ليش متاخذين نور وياج هم تغير جو خطيه
ريتال : اذا اتريد تجي عادي اخذه
_ انداريت ع نور لكيته اتهزلي براسه بمعنى اي
ريتال : كملي وبدلي حته نرجع من وقت .. عافت الاكل وكامت ركض صعدت فوك
سمر : ترحين ويه السايق مو
ريتال : اي
سمر : لعد كومي بدلي انتِ هم
ريتال : خل اغسل الماعين واروح ابدل
سمر : اني اغسلهن روحي بدلي حته ترجعون من وقت
وانتَ أشهب تجي ع الغده مو
أشهب : اي اجي
سمر : ماشي
_ باوعت ع أشهب وعفته وصعدت
طلعتلي ملابس بدلت وكملت ونزلت لكيت نور كاعده جوه أيد امه كاعد تمشطله
جريت كرسي وكعدت كبالهم واني مبتسمه
حسيت بحزن مو طبيعي من هل شي
جنت اتمنى فد يوم امي ادكعدني جوه أيديه واتمشطلي هيج لو تححسسني اني بنته
ماذكر فد يوم كلتلي اكلتي لو شربتي
لو شسويتي بالدوام مچان اله علاقه بيه اصلاً
ماحسيت بشعور الحنان من امي ابد
اتمنى احس بي يوم حتلو مره وحده ع الاقل وميضل بخاطري
سمر : ريتال اسويلج شعرج نفس نور
ريتال : شنو
سمر : اسويلج شعرج ؟
كمت ع السريع من الكرسي وكعدت بمكان نور وفتحت شعري .. عبالك ممصدكه
كامت تمشط شعري بكل رقه وهدوء
ملمس أيديه يكزبر جسمي هلكد ما ناعم
تمشط بشعري بكل رقه اتخاف ع الشعرايه
كامت تظفر شعري غمرتني الفرحه بشكل مو طبيعي
كملت شعري اتشكرت من عده
واخذت الورقه اللي كتبتلي اياها مال مسواك وفلوس وطلعنه اني ونور لكيت السايق دينتضرنه
صعدنه وتحرك انطيته العنوان مال مكتب القاضي
اليوم كلش ازدحام لان بداية دوام وبعده دنيا صبح
الحد ما وصلنه احنه مشاهدين من الحر والازدحام
لزمت أيد نور ودخلت للمكتب
كعدنه ع القنفه لان چانو اكو يمه عالم انتظرناهم يطلعون
اول مطلعو اجه جاب كرسي وكعد يمنه
:- شلونج ريتال
:- الحمد الله استاذ انتَ شلونك
:- والله الحمد الله كلج محمد مو
:- اي كلي
:- شنو بطلتي تشتغلين يمه؟
:- اني اصلاً ماشتغل يمه بس چان يصير عدنه شغل مشترك
:- اهااا هيج يعني
:- اي
:- سمعت ازوجتي من كلي محمد ما صدكته
:- اي اتزوجت
:- لعد اشو ماكو خاتم بأيدج
:- طلعت مستعجله فـ نسيته المهم شنو الدعوى اللي ردتني ع لموده
:- صراحه ما اعرف اذا راح ادبريه اذا لزمتيه
:- هههه بالاول كول القضيه بعدين احكم عليـة
:- حضانه !
:- حضانه اذا للام او للاب؟
:- اي بالضبط
:- شنو الصعب بيه ؟
:- المشكله محد يريد الطفل وحالياً الطفل يمي بالبيت
:- لا امه ولا ابو يردو؟
:- بالظبط ومحد من كرايبه يريده فـ باقي بالشارع امه وابو انفصلو وحالياً محاكم واحد يذبه ع الثاني
:- شكد عمره ؟
:- اسمه حسين عمره ٩ سنوات
:- اصغير بعده
:- اي
:- شنو المطلوب مني
:- رفعت دعوى ع الام والاب اريد اخذ حظانته بس ميقبلون ينطوني اياه
:- تتبناه يعني؟
:- اي
:- ماشي سويلي وكاله حته اقدم طلب للمحكمه بس ياريت لو اشوف الطفل بالاول واسولف وياه
:- اكيد انطيني عنوان بيتج حته اجيبه عكب باجر لان باجر عندي هواي شغل
_ جابلي ورقه وقلم كتبتله العنوان مال بيت أشهب
وخليته ع الميز
:- عندك ملفات لو هيج شي
:- اي عندي
:- ماشي كلهن جيبهن عكبه من تچي ومثل مكتلك سويلي وكاله حته ابلش بيه بعدين انتَ شتصير من عنده مكتلي ؟
:- اصير عمه
:- اذا عمه ليش ميقبل ينطيك الحضانه ابوه
:- ما اعرف صراحه ممكن لان علاقتنه مو قويه او هيج شي
:- تمام مثل مكتلك اريد اوراق او ثبوتات
:- عندي شاهد ع الحاله هم
:- تمام
_ سلمت عليـه وطلعنه توجهنه للدكتور
بس بالي كله يم هذا الطفل ماعرف ليش حسيت بمعاناته
ممكن لان اجه يوم حسيت بروحي منبوذه
بس اللي قالقني اخاف الطفل مغصوب ع عمه
لهذا السبب ردت اسولف وياه ع انفراد باجر ممكن هوه ميريد وعنده وجهت نظر ثانيه بخصوص هذ الموضوع
وكفنه اباب العيادة دخلنه اني ونور
اخذت سره وسويت تخطيط قلب قبل ما ادخل لان يطول واول وتالي يطلبه مني
ضلينه كاعدين ننتظر اسمي
الحد ما صاحته السكرتيره خليت نور كاعدة ع الكرسي ودخلت وحدي .. اول مدخلت للغرفـة ابتسملي لان يعرفني
:- شلونج ريتال
:- الحمد الله دكتور
:- صحتج شلونه؟
:- الحمد الله
:- سويتي تخطيط مال قلب لو بعدج؟
:- اي سويت
_ انطيته اياه ظل يكلب بي وماعرف شكام يكتب عليـه
كلي روحي مددي حته يسويلي ايكو مال قلب
اجه كعد ع الكرسي وبده يسوي الايكو
چان يهز براسه ويكتب بالورقه يمه
كمل كمت مسحت مكان قلبي وعدلت ملابسي ورجعت ع الكرسي
:- صراحه ريتال ماكو تحسن
:- شلون دكتور
:- ضلي امشي ع العلاجات الحد ما تخلصيهم وتعاي فحص
:- يعني مراح اصير زينه ابد ؟
:- اتصيرين بس يرادله صبر عضلة القلب اتصير حساسه كلش يرادله عنايه راحه
:- ان شاء الله
:- من يخلص دواج تعاي فحص
:- ان شاء الله
:- سلميلي ع أشهب
:- تمام
_ طلعت من الغرفـة الخنكه كاتلتني
ماعرف شوكت راح اصير زينه واتخطه كل هذا ماعرف ليش اني هيج
اتلكتني نور طمنته عليـة وتوجهنه للسوك
وصلنه وكمنه نتسوك واخذنه غده
كباب ودجاج شوي ع التمن ومرك جاهزه وحلويات
هلكنه هلك لان كله انتظار بين ميكملوهن
اشترينه موطه ورجعنه للسيارة توجهنه للبيت
اباوع ع نور كلش متونسه رغم التعب تاكل بالموطه وعيونهـا ع الشارع وتضحك
واضح عليـة ماعده صديقات
كلش واضح هذا الشي .. ضحكت ع ضحكته لان اتذكرني بزينب
هم من اطلعه ويايه هيج تتونس واتضل الطريق كله تضحك حتلو چانت الطلعه كله تعب ميهمه لان ويايه طالعه
وصلنه للبيت نزلنه الغراض ودخلنه بعدهم مجاين
سمر : عاشت أيدج يمه
ريتال : بالعافيه
سمر : شكلج الدكتور
ريتال : كال استمري ع العلاج
سمر : ماكو فرق؟
ريتال : لا ميصير هسـه
سمر : يلا ميخالف الله كريم
ريتال : ان شاء الله
سمر : روحي لبسي دشداشه حلوه وخلي مكياج لان بعدج عروسه
ريتال : خاله ما احب اخلي مكياج
سمر : ميصير ماما غير بعدج عروسه هسـه شيكلون علينه روحي قبل ميجون ويجي زوجج
ريتال : تمام
سمر : عود حضري الأشهب ملابس مو تنسين
ريتال : تمام
_ صعدت للغرفـة واني ادردم لان ماحب احد يجبرني ع شي اني ما احبه واصلاُ ما اعرف اخلي مكياج
طلعت تراك اسود الأشهب وخاولي وعطر خليتهن ع الچربايـة وطلعتلي دشداشه لون احمر مخصره كلش حلوه ودلعته زينه
طبيت سبحت وطلعت وكفت كدام المرايه امشط شعري
سويت ذيل احصان خفيف طلع كلش حلو ويه الدشداشه
ورسمت عيوني بالكحله وخليت حمره خفيفه
باوعت ع نفسي بأعجاب صدك حلوة طلعت
داطلع من الغرفـة چان تدخل ام أشهب بيده صندوق صغير
ضلت تباوع عليـة بأعجاب وتبتسم
سمر : متصورت فد يوم يصير عندي چنه بهذا الجمال
ريتال : شكراً خاله
سمر : ما شاء الله شكد حلوة .. تعاي كعدي اريدج بشغله
_ كعدت ع الچربايـة رحت كعدت بصفه
خلت الصندوق بأيدي وحچت ;
سمر : مشتريتلج ذهب ولا سويتلج عرس يلوك بيج ما جهزتج ولا انطيتج شي من حقج بس بهذا الصندوق اكو ذهب كلش عزيز عليـة اتمنى تقبلي كـ هديه مني
ريتال : طبعاً مراح اقبله خاله الذهب ذهبج مستحيل اقبله هديتج واصله ان شاء الله
سمر : الخاطري اني مثل امج عيب عليج تفشليني
ريتال : بس خاله ماكدر
سمر : اشش
_ فتحت الصندوق وطلعت كلاده كلش حلوة ونازكه
بيه مداليه ع شكل ورده بس كلش حلوة لون احمر وياها ترچيه طويله بس نازكه حيل بيه شذر احمر
لبستني اياه وباوعتلي بكل حب
اعجز عن فهم الحب اللي بعيونهـا تجاهي
اني امي وخواتي محابيني هيج شلون ناس غربه ممكن يحبوني بهل شكل شلون مره تعتبرني اني وبته نفس الشي ونفس المستوى
سمر : البسيهم بالعافيه يخبلن عليج
ريتال : شكراً خاله كلش هواي ماعرف شكلج
سمر : لدكليلي يلا كومي خل انجهز السفره
_ عافتني وطلعت خليت الصندوق ع الميز وطلعت نزلت جوه بدينه انرتب بالسفره دقائق وسمعنه صوت الباب مال بيت راحت ام أشهب تفتحه واني ضليت بالمطبخ
انتبهت ع نور كاعده وكالبه خلقته ماعجبه الوضع
مبين ضايجه قبل ساعه چانت تضحك وفرحانه
كعدت كباله عاقده حواجبه نفس اخوه
هم هيج حركاته
ريتال : شبيج ضايجه ؟ شنو متحبيهم؟
_ هزتلي براسه بمعنى اي
ريتال : حتلو متحبيهم بس لتبينيلهم انو متحبيهم هسـه عبالهم انتِ ميته عليهم خوش؟
هزتلي براسه كمت كملت الماعين
والتجهيزات .. مجنت اتصور فد يوم راح اوكف بالمطبخ هلكد ما اكرهه
اجتي ام أشهب جرتني من أيدي وودتني للصالـه
چانو اثنين رياجيل وولد شاب وثنين نسوان
لاحضت وحده كاعده تبتسم بوجهي بس الثانيه تباوعلي من فوك ليجوه
سمر : هاي مرت الغالي ريتال
_ ابتسمت وهزيت براسي بتودد
سرى : تعاي يلغاليه تعاي بصفي
رحت كعدت بصفه
اخذت أيدي الحضنه واضح عليـة لطيفه
سرى : ما شاء الله شكد حلوة انتِ
ريتال : تسلمين خاله
سرى : أشهبنه عنده ذوق كلش حلو .. شدرسين
ريتال : خريجة قانون
سرى : تشتغلين؟
ريتال : اي
سارة : شعجب خلاج أشهب تشتغلين ؟
_ وجهت نضري اله وابتسمت لان كالبه خلقته
حچيت بكل هدوء ;
ريتال : ليش ميخليني بالعكس أشهب داعم كلش كبير الي
سرى : لتواخذيه بس نعرف أشهب شكد صارم
ريتال : بالعكس ممكن ويه غيري صارم بس مو ويايه
_ اتعمدت احچي هيج حته مياخذون فكره
وبالاخص هذيج لان دشمر ويايه بالحچي
سرى : اني مرت خاله الكبير مرت سامر وهذا ابني مرتضى وبنتي روان
_ اشرتلي ع رجله لكيته مبتسملي مبين حباب وابنه يباوعلي بنضرات غريبه درت عيوني من عنده بس البنية روان وجهه كلش بشوش
عرفت هذاك خاله الثاني لان هم كالب خلقته واضح عليـه مرته هاي الثانيه ماريد احكم عليهم بس واضح أشهب چان قصده عليهم الصبح
سرى : اي شي تحتاجي دكي عليـة عليج الله
ريتال : ان شاء الله
_ كمت رحت للمطبخ اخذت الصفره اني ونور
رحنه فرشناه ورجعنه للمطبخ .. ثواني واجتي روان يمنه وكفت يم السنك
روان : هلو اني روان
مدتلي أيديه .. ابتسمت واخذت أيديه وكلتله ع اسمي
روان : اسمج حلو كلش منو اختاره
ريتال : ابويه
روان : انتِ هم حلوة شكلج كلش حلو
ريتال : تسلمين حبيبتي
روان : معليج بمرت عمي زياد هيه حيه ترا
ريتال : هاي مرت عمج مو ؟
روان : اي هاي سارة كلش حيه الكل يعرف بيه
ريتال : شعجب
روان : هاي هيه ورجله حاقدين ع الدنيا واهله لان ميصير عدهم جهال صارلهم عشر اسنين مزوجين
ريتال : اهاا اهنا الحچي
روان : بالضبط فـ كلنه نكرهه بس انقدر مشاعره ونستخطيه
ريتال : زين اتسوون
روان : بس الصراحه مجنت اتوقع أشهب عنده هيج ذوق نار وضامج حته يصدمنه بيج
ريتال : هههه ليش
روان : لج أشهب تدرين چم مره جابوله چم مره بمره امه تخطبله ومن يدري يفصخ عبالنه بي فوبيا من النساء
ريتال : ههههههههههههه مجنت ادري
روان : بعدج اكو اشياء متدرين بيه هسـه من انكمل غده اسولفلج بعد
ريتال : ماشي راح اتحمس ترا
روان : اتحمسي اني اريدج تتحمسين
_ اندكت الباب راحت نور فتحته چان صوت أشهب لان دخل سلم للصاله راحت روان اتودي الماعين
ثواني وشفته واكف اباب المطبخ ومنتچي ع الباب
ويباوعلي من فوك ليجوه
درت وجهي من عنده ورجعته ع الطرشي
لان كاعد اوزع بالمناكيس
حسيت بخطواته .. صار ورايه بس مو كلش قريب عني
انداريت عليـه لكيته منتچي ع الميز وماخذ أيديه بحضنه ويباوعلي ويبتسم
ريتال : خير اكو شي ؟
أشهب : اي اكو
ريتال : شكو؟
أشهب : اكو جمالج اكو جسمج اكو عيونج اكو كوارث دصيرلي بهل لحظه
ريتال : كوارث شنو
أشهب : اني لو من عندج چان مصار عندي فضول تجاه هاي الكوارث
ريتال : خوش
رجعت انداريت وانطيته ظهري
ثواني وماحس غير محاوط خصري بأيده وخال راسه ع كتفي
ريتال : شدسوي مناك العالم ؟
أشهب : طز بالعالم اني مداشوف غيرج
ريتال : وخر حتجي روان
أشهب : شسويله غير حلالي انتِ
ريتال : ماخذك الواهس وحاسبني صدك مرتك
أشهب : اي خل اتمتع شسوي
روان : لتسون شي اهنا صعدو الغرفتكم
_ فزيت ودفعت أشهب كلش قوي بحيث انضرب بالميز
اباوع عليـه وع روان خربانين ضحك
اخذت المناكيس ورحت ركض للصاله
احس بروحي صخنت من الموقف
خليتهن ع السفره جاي اطلع چان يدخل أشهب للصاله
باوعلي وراح كعد ع السفره
نقلت كل الماعين ع السفره
وكفت اباب الصاله اهفي الوجهي لان احمر صار
سمر : يلا يمه تعايي ريتال
دخلت للصاله كعدت بصف أشهب
لان چانو مسويلي مكان بصفه .. روان كاعدة بصفي
اقتربت مني وهمستلي
روان : لتخافين مشفت شي لضلين مستحيه
انداريت عليـة وابتسمتله
ورجعت نظري ع السفره كلهم دياكلون ومتلذذين بالاكل
اله اني استحي اكل
مد أشهب لفه مال كباب
باوعت عليـه ورفعتله تك حاجب .. اخذ أيدي وخله الفه بيه
كمت اكل بيه لان جوعانه ومماكله شي من الريوك الحد هسـه
سارة : شلون تعرفتو انتَ وريتال ؟
أشهب : هممم هيج فضوليه !
سارة : لا بس اريد اعرف شنو الجذبك اله واحنه چم ابنية جبنالك
أشهب : تردين تعرفين؟
سارة : اي
_ اندار عليـة أشهب ضحك وكال ;
أشهب : كلشي بيه جذبني اول مشفت عيونهـا وكعت بيهن وچانت احلا وكعه اوكعه بحياتي كله
سامر : الله يحفظكم خالو
أشهب : تسلم خالي الله يسمع منك
_ حسيت اكو شي بمعدتي ماعرف اذا توتر لو شعور حلو
بس كلش عجبني الوصف مال أشهب ع الرغم من ماكو هيج شي اصلاً
...
:- واكفه داغسل بالماعين وفكري كلش مشتت
من كل النواحي اوله ع ريتال فكري كله يمه
سمعت صوت زينب اتصيحني
عفت الماعين ورحتله
مروه : ها صحتيني
زينب : الباب كاعد تندك
_ اخذت شالي ورحت ع الباب
اول مفتحته صار حسن كبالي
مروه : اعذرني ماكدر اطببك العالم كامو ايطلعون حچي ترا
حسن : اعتذرتي من ريتال؟
مروه : لا
حسن : الاعتذار حلو وصدكي ريتال كلبه طيب راح تنسى الموضوع ع السريع
مروه : اعرف بس مداكدر اتقبل نفسي
حسن : ليش
مروه : اشكال غلطت عليـة وضربته ونامت من ورايه بالمستشفى واذا اعتذرتله راح اتسامحني ويرجع كلشي طبيعي
حسن : وين المشكله ؟
مروه : المشكله بانانيتي المفروض اتمناله كل الخير لان تستحق كلشي زين اني اعرف قبلت بأشهب غصب عنه بس ع مودي بس اني مقدرت هذا الشي
حسن : صراحه انتِ هواي اتغيرتي كلش هواي
مروه : اعرف مادري غيرتي من ريتال
حسن : من شنو غرتي هيه اختج
مروه : كله تحبه وتقدره وتحسبله ميت احساب البارحه بيبيتي اجت سجلت بيت بأسمه
حسن : تتصورين ريتال مراح تتقاسم هذا البيت وياج؟ لو ويه اختج
مروه : ماعرف والله بس اتنرفزت كلش
حسن : انصحج تعتذريله لان حته وهيه مو يمكم حسبت حساب عيشتكم مو !
مروه : اي بالضبط
حسن : لتخسرين ريتال لان ريتال خوش ريتال والله
مروه : ان شاء الله اسفه لان خليتك واكف بالباب
حسن : لا عادي يلا طبي جوه
مروه : تمام
_ جيت داريد اسد الباب چان ما اشوفه غير باسني من خدي وطفر ع السريع للسيارة
اباوعله يضحكلي ويشمر بوسات بالهوى
سديت الباب ع السريع وكفت وراه واني احس بكلبي يدك ع السريع اعرف حرام بس احس براحه ويه حسن لان يفهمني وينصحني هواي ماريد اخسره
بس التفكير بخسارته تأذيني
بديت اخسر كلشي حلو بحياتي من وره تصرفاتي الماله مبرر حته نفسي بديت اخسره من ورايه
....
سامر : المحاماة صعبه مو بله
ريتال : هيه صعبه بس اذا جنت اتحبه سهله اتصير
سامر : طبعاً واضح عليج تحبيه
ريتال : كلش لان هيه حلم حياتي جانت
سامر : والله اني اهنيج يا بنتي ع هذا التفكير ياريت لو تقنعيلي روان العوبه لان متقبل اتكمل دراسه
ريتال : ياا ليش
روان : مو ماريد بس اني اكره الدراسه
ريتال : بالعكس حلوه لازم تحبيه يلا تكدرين ادرسين غير هيج مستحيل تدرسين
سمر : اتعلمي من ريتال ترا نصائحه حلوة
روان : خاله دتحسسوني اني غبيه
سمر : لا خاله حشاج من الغباء انتِ
روان : اويليي يعني غبيه
_ ضحكت وكمت رحت للمطبخ داشوف الچاي واحضر استكانات لان عيب ام أشهب تعبت خطيه
واكفه يم الچاي وتفكيري سارح
ثواني وحسيت شخص دخل للمطبخ انداريت شفته مرتضى ابن سرى
مبتسم واكف يصبله مي
مرتضى : بس لا خرعتج ؟
ريتال : لا عادي
مرتضى : عبالي اسمي مرتضى بالمناسبة
ريتال : واتوقع تعرف اسمي ميحتاج اكول
مرتضى : اكيد ريتال بعد
ريتال : هههه زين
مرتضى : عندي فضول تجاه شغله
ريتال : وهيه ؟
مرتضى : شلون اتزوجتي أشهب والله جديات
ريتال : ليش قابل شبي
مرتضى : اذا انتِ تحت التهديد احچي حته انقذج
ريتال : لا ههههههههه بس بعد اتزوجنه
مرتضى : اها يعني انتِ مقابله
ريتال : لا قابله مكلت لا اني
مرتضى : ما اعرف بس أشهب مو مال مره
ريتال : ليش كلكم ادكولولي نفس الكلام
مرتضى : لان كلنه نعرفه شنو
ريتال : بهاي الحاله يعني اني ما اعرفه مو
مرتضى : لو تعرفي چان ما قبلتي بي بنظري
ريتال : شنو لهل درجة يخوف
مرتضى : نفس البعبع بالظبط
ريتال : اووو ههههههههههههههههههههه
مرتضى : بكيفج اضحكي عبالج داشاقه
ريتال : خوش ميخالف
_ بهل اثناء دخل أشهب للمطبخ بس انتبهه ع مرتضى
انكلب وجهه ورفع تك حاجب وكال ;
أشهب : شدسون اهنا ؟
مرتضى : مدنسوي دنتعرف اني وريتال مو رتوله؟
ريتال : اي شي من هذا القبيل
أشهب : رتوله؟
مرتضى : لدكلي بعدك ممدلعه ! بس لا اتصيحله بأسمه
أشهب : امشي اطلع بره معليك انتَ
مرتضى : اووو الرجل الغيور
أشهب : مررررتضى !
مرتضى : حطلع للمحل اشتري جكاير تردين شي رتوله ؟
ريتال : لا سلامتك
_ ابتسملي وفات من يم أشهب الكاب نار
احس عيونـه اطير شرار
هز براسه وطلع كانو كاعد يتوعدلي
مهتميتله صبيت الچاي ووديته للصالـه كعدت بصف نور وروان
زياد : شنو العجبج بـ أشهب ريتال
_انتبهت ع أشهب باوعلي
ريتال : ليش كلكم تسألون نفس الاسئله عندي فضول صراحه
سامر : من محبتنه الكم الله شاهد بالنسبه اللي
ريتال : هممم صراحه كـ شكل او وضيفه او من هل خصوص ماكو شي عجبني بس اكو شغله تعجبني
زياد : وهيه ؟
ريتال : كلش حنين ممكن هذا الشي ممبين ع شخصيته بصورة مباشرة بس اكتشفت هذا الشي بي
سارة : واضح عليج مشايفه حنيه قبل ههه
ريتال : اي صحيح ليش اكذب عليج ماحب اتصنع اني
فعلاً مشايفه حنيه مثل حنية أشهب
_ حسيت الكره راح يطلع من عيونهـا
تخزرني وتباوعلي من فوك ليجوه لهل درجة كرهتني
لاحضت أشهب يبتسم البغل مكيف
بس محبيت سالفة الاستصغار هاي
زياد : ابوك شلونه
أشهب : لو اعرف چان كتلك ولميت فضولك
زياد : تلكي دايح بالملاهي
أشهب : حياته هوه حر بيه خالي لا انتَ ولا اني ندخل
سارة : مبين مرتك متدري بسالفة ابوك وشسوه
_ ماشوف غير أشهب شال الستكان وركعه بالحايط
بحيث دماراته كلهن بينن وهيج بيده يكوم ياكله اكل
ماعرف ليش ضاج من جابو طاري ابو
لاحضت أيده تنزف
عافنه وكام طلع من الصالـه شفت امه اتاشرلي حته الحكه كمت ع حيلي وطلعت سريع صعدت للغرفـة
لكيته كاعد ع الچربايـة
ويباوع ع اصبعه اللي كاعد ينزف ماعرف شلون انجرح حته
رحت للحمام جبت معقم وشاش صغير
ورجعت للغرفـة كعدت بصفه اخذت أيده الحضني وكمت اعقمه واحس عليـه يباوعلي
أشهب : ماعندج فضول تجاه ابويه وشنو مسوي ؟
ريتال : لا
أشهب : ليش ؟
ريتال : اذا انتَ متحچي عنه بأرادتك واجيب طاريه ليش اسئلك عليـه !
مجاوبني .. عقمت أيده ولفيت الشاش وطلعت من الغرفـة
بس كلش ضايج ومتنرفز صراحه ماعندي فضول ع ابوه بس عندي فضول ليش هيج ردة فعله
مر اليوم كلش بتعب طلعو بـ ٨ باليل نظفنه البيت اني
ونور وام أشهب بـ ٩ باليل كملنه
صعدت للغرفـة لكيت أشهب امدد
طلعتلي ملابس ورحت اسبح بدلت ورجعت للغرفـة
لكيت أشهب كاعد ينضف بمسدسه مال ضباط
بس لو اعرف شنو سالفة الاسلحه اللي عنده ارتاح
بالي كلش اشتت من هاي الناحيه
وكفت نشفت شعري وعفته مفتوح ورحت ع الچربايـة
اخذت تليفوني لكيت محمد داك عليـه بس مفتوح المكالمه
ريتال : شنو مجاوب محمد؟
أشهب : اي
ريتال : ليش جاوبت ابدالي
أشهب : ليش ميصير
ريتال : اي ميصير لازم تحترم خصوصيتي ترااا
أشهب : لصيحين لا اكوم افرك حلكج
ريتال : مداصيح بس السالفه واكفه هسـه شيكول عليـة
أشهب : ميكول بس راح يعرف انتِ مره متزوجه ويحترم نفسه وبعد ميدك
ريتال : دك عليـة ع مود الشغل
أشهب : ليش ما اعرف
ريتال : استغفر الله يا الله شنو سالفتك أشهب
أشهب : اعذريني ماعندي سالفة
ريتال : لعد شنو هاي التصرفات مال جهال
أشهب : شتفسرين تصرفاتج ويه مرتضى لعد ؟
ريتال : يا تصرفات ترا الولد حباب كلش چنه نسولف بعدين شكو دابررلك اني
أشهب : غصباً ع خشمج اتبرريلي لتنسين روحج
ريتال : ميخالف
أشهب : بعدين شنو سالفة القاضي اللي راح يجي عكب باجر للبيت ؟
ريتال : شلون عرفت؟
أشهب : عرفت بعد جاوبي ع كد السؤال
ريتال : الدعوى اتخص ولد صغير امه وابو ميردو فـ القاضي اللي هوه عمه يريد يتبناه وياخذ حضانته بس مدقبلون
أشهب : ليش ميقبلون
ريتال : ما اعرف عكب باجر حيجي الطفل وياه اريد احجي وياه
أشهب : ليش
ريتال : ماعرف ممكن عنده غير رئي بالموضوع
أشهب : شكد عمره؟
ريتال : ٩ سنوات
أشهب : اصغير
ريتال : اي
_ اتنهدت ومددت ع طرف الچربايـة وهوه بعده كاعد ينضف بالمسدس ضليت اباع عليـه و ع خطواته ودقته من دينضفه
درت وجهي ع الجه الثانيه
كلش مشتاقه الخواتي اريد اشوفهم بس ماريد
مروه داست ع كلشي
ماريد اباع وجهه اصلاً ولا اشوفه
كلش مطايقته ولا اريد اشوفه اصلاً
بس مشتاقه الزينب وأيهم اريد أشوفهم
واريد اشتريلهم ملابس وغراض
كام أشهب طفه الضوه وبقه ضوه خافت ع لمودي و مدد بصفي حسيته نام ع ظهره انكلبت اني هم نمت ع ظهري وعيوني بالسكف
ريتال : اكلك
أشهب : كولي
ريتال : المزرعه اريد اتشغله
أشهب : ممحتاجته لان اني موجود
ريتال : ع مود خواتي لازم ادزلهم فلوس
أشهب : ماشي اشوف
ريتال : البارحه من رحت جبت غراضي صادفت بيبيتي اهناك جانت جايه خصوصي عليـة
أشهب : اي
ريتال : مسجله بيت بأسمي
أشهب : مبروك
ريتال : اريد تحوله
أشهب : وين احوله؟
ريتال : نص بأسم زينب ونص بأسم أيهم
_ وخر أيده من عيونـه واندار ع صفحتي خله أيده جوه خده وحچه ;
أشهب : صدك تحچين؟
ريتال : اي
أشهب : ليش
ريتال : ماكدر أامن بمروه لو شيماء ماحسهم كفو وممكن يتحملون مسئوليه فـ اريد اضمن مستقبلهم
أشهب : باجر عكبه يصير عندج جهال
ريتال : عندي مزرعه وبيت بنصه فـ محسبه حسابهم
أشهب : ماعرف
ريتال : ماحس بروحي راح اعيش هواي من وره كلبي احس حالتي كاعد اتسوء اكثر فـ ماكدر اعوفهم صراحه
أشهب : الله كريم
_ رجع مدد ع ظهره
ماعرف ليش طلبت من عنده هل شي بس اكدر اكول اكثر شخص ممكن اثق بي حتلو واحد بالميه هوه أشهب ع الرغم من كلشي سواه وراح يسوي
غفيت ع هل حاله فزيت من النوم
بعد حلم كلش يخوف فزيت لكيت الغرفـة ضلمه كلش
انفاسي بدت تتسارع كلش خليت أيدي ع مكان أشهب بس چان ماكو
دورت تليفوني بس ماكو
اخذت رجلي الحضني وكمت اتعوذ من الشيطان
انفاسي كلش سريعه واكو خوفه بكلبي
انعاد الشريط كله كدامي انعادت اللمسات والهمسات ونفس الخوف حسيت كلشي رجع
كمت ابچي بشهكه بس بصوت خافت
احس اكو انفاس يم أذني ما اعرف اذا كاعد اتخيل
لحضات وحسيت احد اخذني الحضنه
حضنه قوي كلش بعد شويه يدخلني بضلوعه
-: اششش اني يمج
_حچيت بصوت خافت بي شهكه ;
-: وين رحت
:- رحت اشوف الكهرباء ليش مكطوعه
:- الغرفـة ظلمة
:- اني يمج يحبيبة كلبي لتخافين
_ بادلته الحضنه قوي
:- لتعوفني بالظلمه وحدي حباب
:- يخسه اذا اعوفج يراحة كلبي وتعب سنيني
_ ضليت بحضنه واني ميته خجل
مرت دقائق حسيت بروحي هدئت بس هم اخاف افتح عيوني واشوف ماكو ضوه
دقائق واجتي الكهرباء وخرت من حضنه
واني مدنكه راسي
:- رجعي نامي
:- تمام
_ رجعت دخلت بفراشي واني اتمنى الچربايـة تبلعني
من الموقف والكلام اللي كاله
مدد بصفي وانطاني ظهره
باوعتله باستغراب .. عجزت واني احاول افهمه
شلون يكدر يتجاهلني بهيج موقف
انطاني ظهره من كل عقله .. اتنهدت ورجعت نمت
كعدت من النوم ع صوت تليفوني وهوه يدك
لاحضت أشهب ماكو بصفي .. باوعت التليفون چانت شيماء
فتحت خط
زينب : هلوو خاله
ريتال : هلا يعيون خالتج انتِ
زينب : مشتاقتلج خاله ريتال
ريتال : يمه اروحلج فدوه يبعد عيوني انتِ
زينب : متجين
ريتال : لا شيجيبني ماكدر عندي شغل
زينب : خاله شيماء كلش مريضه
ريتال : شبيه؟
زينب : ما اعرف بس مصخنه وهواي عركانه ماما ادكول
ريتال : احاول اجي واذا ما اجيت حدزلكم فلوس
زينب : ماشي خاله
ريتال : يلا حبيبتي شربي حليب ع الريوك مو تنسين
زينب : تمام
_ سديته من عده واني كلي قلق التفكير بده ياكل براسي اخاف صاير شي الشيماء
كمت طبيت للحمام غسلت وطلعت
سمعت صوت حچي خافت واني ع الدرج
نزلت ع كيفي وتوجهت للصالـه
وكفت وره الباب وخليت أيدي ع حلكي حته ما اطلع صوت من سمعت كلام أشهب ورجال ثاني وياه
:- سيدي هذا المسدس نوعيه المانيا خرافي
:- بي كاتم؟
:- اي بي طبعاً
:- شكد سعره؟
:- ١٥ ورقه ومابي مجال
:- ماشي حدزلك اياه بيد واحد من جماعتي
:- ع راحتك سيدي
:- بس خوش لون ذهبي
:- مخصوص الك هذا حته النقشه خليتهم ينحتوه
:- عاشت أيدك
:- سيدي عندي سؤال؟
:- اسئل ليش لا
:- شتسوي بهل اسلحه
_ شهكت من سمعت كلمة أشهب اللي هزت كياني
بحيث حته نفسي ضاق
:- الاسلحه تستعمل للقتل اكو غير شي تستعمل بيه ؟....
.
.
يتبـع ...
انا أجيت
من أخر سنيِن الطفوله
لحد مشيبك
انا الأستاهل يسمُوني حبيبك .
~~~~~~~~~~~~~~~~~~~~~~
هلو حبايب قلبي شلونكم
اعذروني اتأخرت عليكم بالبارت بس تعرفوني طالبة سادس وبعد ٢٠ يوم متحاناتي فـ ماكدر افوت أي فرصه بعد ٢٠ يوم يتحدد مستقبلي فـ اتمنى اتذكروني بدعوه حلوه ♥️.
بخصوص التنزيل فـ داتأخر عليكم فـ راح اعوف القرار الكم انتو تختارون وان شاء الله اعوضكم 🤏🏻
اذا تردون اوقف القصة وانشره وره الامتحانات لو عادي اتأخر بالنشر بعد بكيفكم حبايبي ♥️ .
حبايبي لتنسون اتصوتون اذا عجبكم البارت 🤍!