نبدأ بذكر الله ﷽🤎✨
أسكــو بار
بارت 2
قراءة ممتعة
🚫لا تنسون التصويت والتعليق بين الفقرات..
.
.
......................................
انا الحࢪيق مـن أي نار أخاف ؟
.
.
.
وعيت على نفسي بين الخيال
والحقيقة حسيت بجسم دفعني
وكعت من طولي للكاع والجداحة
قبل لا تلوح الباب طفت وشتعلت
روحي !
رفعت راسي شفتة معن يلهث فحطان
واكف فوك راسي عيونه حمر ويرجف
من الخوف
دنك عليه رفع ايدة يريد يلزمني
دفعته وصرخت علي بغضب
عقاب -: مووو كتلك ابقى بالغرفة
بلع ريك عيونه انملن دموع هستوه
يريد يحجي انفتح الباب
رفعنه روسنه ثنينا شافنه يم الباب
فتح عيونه متفاجأ قلص نظرة علينا
يدكم بقميصة
سد الباب تخوصر يباوع النه ويرجع
يباوع للمكان لمح الجداحة غمض عيونه
شم بصوت عالي
فتح عيونه تقدم بتجاهي وانه بعدني
بالكاع رفسني ابطني
شهكت وتزحلكت للدرج لزمت بيدي
حتى لا اطيح دنك عليه شال شعري
بيدة
رفع راسي بوجهه خلا وحجه
صاك على اسنانة
دعلج -: أبن الحرام تريد تحركني ؟
رغم ألم جسمي ابتسمت عرف جوابي
بسق بوجهي تحت انضار معن الخايفة
وخر ايده من شعري ورجع وكف
ضربني ابطني ضربة كفيلة
تخليني اتزحلك من أول باية لأخر باية
اسمع صريخ معن تحت أنضار الولد
الويانه كل واحد واكف اباب غرفتة
و يباوع بخوف
بسقت الدم من حلكي غمضت عيوني
بألم كل جسمي تكسر دعيت أموت
بكل دعوة صادقة
بس كل مرة ما تنقبل دعوتي حسيت
بي من سحاني من رجلية مثل الذبيحة
والدم اخذ مجراه على الكاع
شمرني بالمخزن رجع ضربني على
راسي
دعلج -: راح اخليك اتعفن للصبح
ضاملك خوش ضمة بسيطة
بس تخلص الليلة
طلع
وقفل الباب
تحركت أنيت بصوت خافت
كل خلايا جسمي تعذبني
عضيت شفايفي من الألم كل
السويتة غمضت عيوني بلكي ما
اكعد باجر
اخخ معن دايمآ انتَ الـ تخرب
كلشي ما جان عندي أمل اصلآ ابقى
عايش للصبح
لأن جنت انزف من كل مكان
رغم كلشي ما فقدت الوعي
صوت الشهكات والدكات على الباب
اسمعهن
عرفته منو بقيت ساكت ما زعلان
علي زعلان على نفسي وحياتي
وشكد انه انسان ضعيف فاشل
ما أصلح لأي شيء
مجرد طفل خادم عبد عد الأسياد
الظالمين
معن -: عقااااب تسمعنييي عقااب
ما حجيت ولا حرف اخ منك
ليش هيج دفعتني
بلمح البصر اكدر اتخلص منه
ونعيش على الأقل بحرية نشتغل
مثل الأوادم ماكو أحد يضربنا
نمت ماعرف فقدت الوعي
كعدت على ماي بارد ترس
ملابسي ترس شهكت اكح بصوت
عالي
لمحته واكف مبتسم شيطان على
هيئة أنسان ما خفت منه كد ما
خفت من أبتسامتة
لازم بيدة حبل تقدم يمي دنك ضربني
على خدي خفيف ويحجي
دعلج -: عبالي صرت فطيسة
اكعد وراك حساب ابن الحــرام
ما سويت شي خليته يسوي
الـ يريدة لأن جنت تعبان وما بيه
ارفع ايدي حتى
دعلج -: باااهر
صاح بصوت عالي دخل باهر
يركض وكف يباوع عليه
رفع راسه لـ دعلج وكال بنبرة
باردة
باهر -: نعم أستاذ
دعلج -: عدلي نومته
وألزم رجلي زين
باهر -: حاضر أستاذ
دنك عدل نومتي ولزم رجليه
بقى يباوع ابرود
جاب الحبل لفا على رجليه الثنين
وشدا بقوة وخرو مني
اخذت نفس بتقطع للراح يصير
جسمي يرجف بخوف
وعيوني مغوشة جاب نهاية الحبل
شداها فوك بمكان المروحة
بالمخزن ماكو مروحة بس مكانها
خلا درج وصعد شد الحبل ورفعا
بحيث انرفعت من رجلية
صرت اتلولح راسي للأرض وأديه هم
دخت كلشش والدم تجمع براسي
لهناك وحسيت شي مثل النار جوت ضهري
صرخت وتحركت بهستيرية بس
للأسف كثرة الحركة تحركني اكثر وأكثر
على كد ما احس بالألم
ابجي وضرب راسي بديه الجو جان
حار والمخزن بوخة معلك من رجلية
وأنجويت بضهري
هذا غير الضرب وقلة الأكل والشرب
صرت اشوف الواحد تلاثة
دعلج -: حتى مرة ثانية ما
تدخل بشي ما يعنيك ابن الحــرام
باهر -: هيج أحسلك اله
تنعلس ياله
دعلج -: مرة ثانية تعيدها؟
هزيت راسي بلا ماكدر احجي
ضربني على الحرك شاطت روحي
للسما
دعلج -: احجي وياك رد عليه
ابن القندرة تعيدها وترش نفط
على غرفتي مرة ثانية ؟؟
بصوت خافت رديت
عقاب -: أموت وما أسويها بعد
دعلج -: ههههه برافو عليك
هذا عقاب الأعرفة لا عبالك خلص
عقابك بعد ضاملك شغلة راح تتونس بيها
غمزلي بطرف عينه طبطب على خدي
غمضت عيوني ماكدرت بعد
اتصرف
حسيت بيهم من نزلوني ضهري لاح
الكاع عبالك لاح ملح مو الكاع
صرخت بعلو صوتي وتشعوطت روحي
فقدت نفسي بعد ما خلص من
عذابة فتحت عيوني بتعب
نايم على بطني ملابسي متغيرة
فراشي و غرفتي ذني اخذت نفس بصوت
ورجعت غمضت بألم
معن -: شلون صرت ؟
سمعت صوته من البجي رايح
ابتسمت رغم تعبي
عقاب -: بنص الخيـر
معن -: أسف
عقاب -: على شنـو ؟
معن -: بسببي صار كل هذا وياك
عقاب -: ما صار شيء وياي
لا تتأسف
معن -: تضحك عليه انتَ غير
متت بس الچوية الـ بضهرك كافي
تخليني اكتل روحي
عقاب -: ليش تكتل روحك ؟
معن -: لأن انه السبب
عقاب -: يعني قصدك تنتحر ؟
شوفلك طريقة ثانية عيب الرجال
ينتحر
معن -: يعني عادي عدك أموت ؟
عقاب -: كلنا راح نموت بالأخير.
معن -: برودك راح يموتني
عقاب -: ههههه
معن -: شنو اسوي وصير بارد
مثلك ؟
عقاب -: تعيش معاناتي
معن -: بس انه وياك ثنينا
نفس المعاناة
عقاب -: بس تختلف
معن -: وبشنو تختلف ؟
عقاب -: لا تكثر حجي ما بيه
حيل افتح حلكي
معن -: براحتك تريد شيء؟
هزيت راسي بلا ونمت كلمة تعبان
ما تعبر عن مدى تعبي بهل لحظات
بقيت يومي كله نايم
والغريب بالموضوع معن ساكت
وماكو صوت لأحد بالبيت
من رجع من الشغل ذب روحة
قريب مني يلهث تعبان دفرته
برجلي
فز
ندار عليه يباوع مسح راسه
ورجع غمض عيونه وحجه
معن -: ها شتريد ؟
عقاب -: شو ماكو صوت وين
البقية ؟
معن -: اليوم دعلج اخذهم لغير
شغلة
عقاب -: شنو قصدك غير شغلة ؟
معن -: شمدريني هيج سمعت
كللهم
عقاب -: منو اخذ ؟
معن -: باهر وبسام وكلهم الولد
عقاب -: ليش ما اخذك وياهم ؟
معن -: مادري كلي انتَ ارجع
يمكن يفكر بيك
ضحكت بستهزاء هاز راسي
عقاب -: تعال ساعدني اروح
للحمام
معن -: لازم جرحك يطيب
عقاب -: يرادله شهر يالة يطيب
تريدني اضل نايم شهر على بطني
بدون سبح ؟؟
معن -: لا بس ضل بعد يوم يومين
احسن حتى ما يلتهب ويلم جراحة
عقاب -: شني صاير دكتور ما عرفتك
معن -: اعرفك تضحك عليه
بس هوه مو صوجك صوجي انه
اهتم بيك
عقاب -: يله تعال طلعني برة
بطني خاست على كد ما نمت عليها
معن -: اكعد وسكت اله ننعلس
ياله
عقاب -: محد موجود شبيك جنك
جريذي خايف ياكل سم ويموت
معن -: تعبااان ماريد انضرب اليوم
خليني وحدي اريد انام
عقاب -: امــداك كون
معن -: امداك انتَ
حجاها غمض عيونه ونام تنهدت
ما متعود اضل نايم يومين عمري كله
ما نايم هل كد
بدون شغل بدون ما اطلع برة البيت
والغريب دعلج ما اله صوت ولا حتى
شفته بعد ذاكه اليوم
ومر يوم كامل نفس الشي ثالث يوم
الضهر طكت روحي ساعدت نفسي
وكمت بدون ما البس فالينه
طلعت برة البيت امشي لازم ضهري
جني عجوز بالسبعين عمرة البيت صنطة
كعدت بالحوش
اخذت نفس بعدني حتى ما حمى
مكاني انفتح الباب رفعت راسي
دخل دعلج
مدنك بين اصابيعه جكارة رفع
راسه اخذ نظرة على المكان بعدها
ندار عليه
رفع حاجبة ابتسم واجه كعد مقابيلي
بقينا واحد يباوع للثاني هوه
يباوع بنضرات مستهزئة
وانه اباوع عليه بنضرات كرة وحقد
لو اكدر افرغ مخزن كامل براسة
گلبي ما يبرد من ناحيتة
زفر الدخان عليه غمز بعيونه
الخبيثة يحيطهن سواد قاتم مثل سواد
گلبة
دعلج -: ان شاءالله عجبتك
الكعــدة ؟
عقاب -: اي للحضة الشفتك بيها
دعلج -: هههههه كل عادة لسانك
متبري منك ما اتوب انتَ ؟
عقاب -: تؤ ما توب
دعلج -: بس اريد اعرف ليش هل كد
عنيد وتحب الضرب؟؟
عقاب -: تكدر تكول اتعودت عادي
صار عدي الضرب شيء قديم جرب شي
جديد
دعلج -: ههههه ضاملك اشياء مو شي
بس اصبرلي اتفرغلك
عقاب -: خوش وين وديت الولد؟
دعلج -: للشغل
عقاب -: يا شغل بالضبط؟
دعلج -: بعدين تعرف كلشي
لا تستعجل على رزقك حبيبي
عقاب -: ليمته ترجعهم؟
دعلج -: هواي تسأل
عقاب -: مجرد فضول
دعلج -: ما احب الشخص الفضولي
سكتنا شمر جكارتة بالكاع دعسها
برجلة واردف بكل برود
دعلج -: دير بالك على تصرفاتك
حتى لا تصير بيوم من الأيام مكان
هاي الجكارة
عقاب -: تهددني؟
ابتسم تقدم يمي مد ايده خلاها
ورة ضهري تحسس الچرح وخرت
ايده بنترة خازرة
ضحك بصوت عالي مسد على راسي
ويحجي بضحكة خبيثة
دعلج -: عقلك چبير يفتهم كلشي
طيب ان شاءالله حبيبي حضر نفسك
باجر شغل
راح
وبقيت كاعد بمكاني حاير
مسحت وجهي وكمت للمطبخ
اريد اكل
فتحت الثلاجة ما بيها شيء تنهدت
فتحت الكاونتر مزنجر نصة وكله وصخ
لكيت احرف خبز
اخذتهن اكل بيهن بدون شيء لهناك
بطني گلبت بدقائق لعبت نفسي
شمرت الخبز بالكاع وركضت اتقيئ
ذبيت كلشي من بطني انوب ضهري
موتني شربت ماي غسلت وطلعت
للغرفة
مصارين بطنـي اتلوب على الأكل
تعب جسمي الضعيف وقلة راحتي
خلتني لاني بالسما ولاني بالأرض
ساعة أبچي بصمت وساعة احجي وي
ربي اعاتبة وساعة ادعي على الجابني
لهاي الدنيا
اخر شيء تعبت ونمت مدري اغمى
عليه مادري بروحي كعدت على
صوت معن يكعدني
فتحت عيوني وعدلت نومتي
شفته كاعد يمي ويمة صينية بيها
اكل
فزيت من مكاني جريت الصينية
لحضني اخذت الصحن ترست حكلي
تمن وعلي مركة عدس
غمضت عيوني راجعة روحي لجسمي
مو تمن وعدس يكول ماكل لحم
اكلت واكلت لحد ما خلص كلشي حتى
حبة ما ضلت
رفعت راسي لـ معن يباوع فاتح
عيونه متفاجأ من ردت فعلي ما هتميت
اهم شي اكلت اكل نضيف وشبعت بطني
معن -: على كيفك شبيك راح تاكل
حتى الصينية
مسحت حلكي بكف ايدي اخذت
نفس
عقاب -: صارلي يومين ما ماكل
بس الماي داخل بطني
معن -: بالعافية بس عود انه وياك
ناكل هاي حصتي
عقاب -: اعوضك ان شاءالله باجر
منين جبته هذا الأكل؟.
معن -: جيرانه بيت ابو علي
مسوين ثواب
عقاب -: ها انه اكول ماكل هذا الأكل
قبل اثاري من بيت ابو علي
معن -: اي كل سنه يودونه
يدرون بينا فقرة
عقاب -: انعم الله عليهم
باجر اروح للشغل.
معن -: بعده ضهرك ما طايب
عقاب -: لا صار زين
معن -: ادري بيك جذاب
عقاب -: معن لا ترادد كوم
جيبلي ماي وأغسل المواعين وديهن
لهلهن
معن -: لو جنت مرتــك ما تتأمر
عليها هل كـد
عقاب -: ههههه ولك لسانك
معن -: والله شني مسويني خادم
اغسل مواعين وجيبلي ماي ترة اكدر
هسه اعوفك وروح
عقاب -: هسه انه شكتلك
معن -: لو ما اكول خطية ضهرة
مجوي فلا اكعد يمك ونفذ طلباتك
عقاب -: هههه سبع انتَ معدل ونعم
منك ابو يزن
معن -: شنو هاي ابو يزن انوب؟
عقاب -: غير ابنك المستقبلي
ان شاءالله
معن -: لا شني هيه بكيفك تسمي
اصلآ انه ما ازوج وعوفك
عقاب -: الـ يسمعك يكول انه حبيبتك
بعدين يزن حلو فخم
معن -: لا لا مو حلوو
عقاب -: لا حلو
معن -: مو حلووو اكلك شنو يزن
عقاب -: لك ليش تصير مطي
يزن ويصيحولك ابو يزن والمحروسة
ام يزن
قلص نظرة وعدل كعدته ضل يفكر
دقائق وحجة
معن -: منيه المحروسة؟
بالكوة كضيت روحي ما ضحكت
منضرة يضحك وهوه يفكر
عقاب -: غير مرتك !
معن -: مرتي ؟
عقاب -: اي مرتك المستقبلية
لمعن عيونه ورد بحماس
معن -: اريدها حلوة كون تضوي ضوي
من الحلاة وهم اريدها كون تعرف
تركص
فتحت عيوني وضحكت بصوت.
عالي عبس وجها
معن -: لا تضحك عليه شبيك
ضربت كصتي ودفرته على رجلة
اضحك وحجي
عقاب -: اخخخ ضهري خرب يومك هههه
يريدها تركص هههههه
معن -: صوجي احجيلك والله
كام وصدك جان ضايج ضحكت عليه
هاز راسي هذا ما منه فايدة
من هسه يدور نسوان حلوة و تركص
مرات نحجي حجي بداعي الضحك
بس ما نتوقع بيوم من الأيام راح يكون
حقيقة !
الحياة نعيشها غصبآ عنه سواء
فقيرين او اغنياء مرتاحين او متعذبين
بـ الحالتين لازم نعيشها
رغم صغر سنه وبرائت عمرنا ورغم
الطفولة البينا نحس احنا كبرنا اضعاف
عمرنا احس بروحي شيبت وانه طفل
حتى بعدني مو شاب
مرت الأيـام عادية شغل وبهذلة
وضيم وفوك كل هذا حرارة الشمس
جنت راجع من الشغل توني
اتمشى بين الأزقة وجهي معرك
وادية خدرانه من جر العربانة وشيلة
الطابوك والبلوك
رجلية زين ويمشن بيه وكفت بمكاني
اجر بالنفس جــر شفت اطفال يلعبون
طوبة
برائة طفولتي خانتني تقدمت يمهم بقيت
اباوع عليهم شلون مرتبين ويلعبون
على حسب الأصـول
بقيت واكف و اباوع فترة مادري بروحي
طكت برجلي الطوبة فزيت مخترع
رفعت راسي ألهم
بلعت ريكـي الكل يبـاوع عليه
حجه واحد من الأطفال
مستغرب
-: شبيك يكول اول مرة تشوف طوبة
ضحكو بصوت عالي ابتسمت هوه
فعلآ اول مرة اشوف طوبة قريبة
عليه هل كد
-: تلعب ويانا؟
-: يمعود ما يعرف يلعب عوفو
-: جبان هذا
اسمعهم يحجون وانه ساكت روحي
تلوب اخر شي كمت من مكاني
ورجعت للبيت
اسمعهم يصيحون عليه ما حجيت
شي دخلت للبيت كبل للحمام
اسبح وبجي
دموعي اختلطن سوية شكد بوكتها
بجيت وشكد حقدت على الناس
وعلى حياتي وحتى على رب العالمين
صرت واحد بارد لو اشوف واحد من عدهم
يحترك كدامي ما اسوي شيء
وأحتمال اضل اباوع عليه وهوه يحترك
محد يحس بالنار احس روحي كاعد
تحترك شوي شوي گلبي فحم
و مشاعري اتبخرت
طلعت من الحمام وفتت للغرفة
لبست ملابسي ونمت لليل
طلعت لكيت دعلج مسوي سهرة
يمه باهر وبسام ذوله يباوعون على
النسوان مكيفين وكل واحد
لازم بيدة سلاح !.
فتحت عيوني متفاجأ بلعت ريكـي
بخوف ثنين نسوان يركصن
وزلم اربعة ومن ضمنهم دعلج
يصفكون اصوات ضحكاتهم تارسة
البيت والشرب كدامهم دنكت اجيت
اعبر بس ستوقفني صوته
دعلج -: عقاااب
وكفت
اخذت نفس بتقطع رفعت راسي
اباوع بعيونه شال كلاصة شربة كله
هز ايده وأشر بمعنى تعال
بدون حرف تقدمت يمهم خطوة
ارجع بيها وخطوة اتقدم
لحد ما صرت قريب علي
ضحك و يحجي بطريقة مخمورة
دعلج -: تعال تونس ويانا
كله حابس روحك بالغرفة
مثل النسوان
عقاب -: انه حر بروحـي
وين ما اكعد اكعد
ضحك دنك يباوع لـ باهر غمزلة
ورجع باوع عليه
دعلج -: تعلم الرجولة ولا تصير خنثة
اكعد وشوف شلون الزلم تصير
الحرارة صعدت لراسي قبضت
على كف ايدي بقوة كعدت بغضب
بس حتى اكسر راسه
بقيت اباوع عليهم واحد واحد
عيوني تشكلت على الراقصة لابسة
ملابس ركص نص جسمها مبين
جانت حلوة كلشش بدون وعي مني
بقيت صافن عليها حسيت بضربة
على راسي
فزيت
نداريت اباوع غمزلي وكال بضحكة
باهر -: عجبتك؟
عقاب -: شتحجي انتَ
ترة عمري 13 سنة !
باهر -: اخخخ هوه هذا الـ يخرب
الواهس صح انه اكبر منك بس هم
ما تقبل الكوادة أله 16 سنة يالة
عقاب -: شدعوه كاتل روحك عليها؟
وشنو هذا البيدك؟؟
باهر -: غير نمتع انفسنا شضال
بالدنيا هذا سلاح يعني ما تعرفة؟؟
عقاب -: بعدك صغير على هذا كلامك
منين تعلمت؟
باهر -: ههههه تؤ مو صغير
تدري من اكبر شنو اريد اصير؟
عقاب -: لا مادري
بقى صافن ثواني لمعن عيونه
وحجه بحماس
باهر -: اكبر تاجر مخدرات ويصير
عدي ملهى اجيب انواع النسوان بي
حتى من خارج بغداد اجيبهن
عقاب -: صدك تحجي؟
باهر -: وداعـتك و انتَ شنو تريد
تصير ؟
عقاب -: اطلع من هذا المكان ومن هل
فقر والعذاب اعيش ابيت وعائلة حالي حال
أي طفل اعيش طفولتي ادرس وأنجح
باهر -: ههههه أحلام العصر هاي
احنا نولدنا حتى نصير مجرمين
عقاب -: ماكو أحد ينولد مجرم
بس الضروف هيه الـ تحكمة وحتى
البشر
باهر -: احس روحي احجي وي
رجال چبير بالعمر
عقاب -: وخر هذا من ايدك مو
لعبة ترة هذا سلاح
ابتسم رفعة للسما سحب أقسام
بطريقة سريعة ومتقنة تصنمت بمكاني
عقاب -: منين تعرف كل هذا ؟
باهر -: الشغل علمنا
سكتت روحي تلوب بحلكي
حجي واخاف لا يفهمني غلط
ويحجي لـ دعلج
باهر -: احجي شكو ابالك
عقاب -: شلون عرفت ؟
باهر -: واضح من معالم وجهك
تحوس ولسانك يتمتم شكو؟
عقاب -: اريد اسألك بس لا تفهم
غلط
باهر -: اسأل
عقاب -: شنو نوع الشغل الترحون
بي انتا والولد وما تاخذوني انه ولا معن؟؟
باهر -: شغل بس للزلم هذا
قلصت نضري مسحت وجهي
ورجعت حجيت بهدوء
عقاب -: ما فهمت شنو شغل زلم
يعني شنو نوع الشغل؟؟
باهر -: ماكدر اكلك دعلج ما يقبل
عقاب -: هوه ليش ما ياخذنا وياكم؟
باهر -: هذا هوه وسألة انه شلي
غرض بس اجوز هوه ضاملك غير
شيء انتَ ومعن !
عقاب -: شي مثل شنو ؟؟
رفع اكتافة يلعب بالسلاح
يباوع للبنية التركص ويحجي
باهر -: كل شيء راح تعرفة
بوقتة لا تستعجل
عقاب -: انتَ تعرف شي وضامة
علية؟
باهر -: اممم اشياءء هواااي
بس لا اتعب روحك ما احجي شيء
عقاب -: ليش؟
باهر -: سر المهنة حبيبي
عقاب :- على الأقل بس...
باهر -: كتلك لا تستعجل ليش مصر
انتَ تعرف؟؟
قاطعني رافع حاجبة ويسأل
نبرة صوته بيها شك بلعت ريكـي
ازحت نضري عنه وحجي
عقاب-: بس اريد اعرف شنو الراح
يصيرلي بالمستقبل وبالأيام الجاية
ابتسم ورد
باهر -: كل الخيــر
سكتت مادري شنو الجبرني اضل
وياهم كاعد بقو لنص الليل كل شوي
اتلفت اخاف لا معن يطلع بس الحمدلله
ما طلع من الغرفة
راحو وبقت وحدة صعدت لغرفة دعلج
عرفت شراح يسوون وباهر يضحك
ويصيح بصوت عاالي
باهر -: هنيالك استاذ
دعلج -: هههههه اكيد هنيالي
انتَ بس امشي على اثار رجليه
راح تعرف طريقك الصح
باهر -: تأمر امر استاذ وذولاكة
الناس ليمته تتعلم؟.
دعلج -: عن قريب عن قريب
حجاها وصعد لغرفتة بقيت
مستغرب شنو قصدهم.؟
باهر -: لا تفكر روح نام تأخر
الوقت وراك كعدة من الصبح
عقاب -: من ليمته تهتم انتَ ؟
باهر -: يطبك مــرض
سد باب غرفته بقيت واكف محتار
عيوني راحت لمكانهم باقي
كلاص وبي قليل من هذا الـ يشربونة
الشيطان ركب راسي دنكت
على الكلاص شميت ريحته قويةةة
كلش فـما بالكم بطعمة
شمرت الكلاص وركضت لغرفتي
دحست روحي جوة البطانية
احـوس
كون يصير زلزال كون يصير قصف
كون تنكلب الدنيا ولا يتهنون بليلتهم
ما بيدي شيء بس الدعاء
هستوني اغفى سمعت صوت أطلاق
نار بالشارع فزيت انه
ومعن وياي هم فز يفرك بعيونه
معن -: شنو هذا الصوت
عقاب -: باهر طلع صوت ارجع نام
معن -: لا اضن هذا صوت
اطلاق نار
عقاب -: أنچب ونطمر وين اكو
كواد كاعد هسه
معن -: شبيك عصبي شكلت انه
هسه
عقاب -: تكثر حجي وانه مالي
خلك روحــي
ما رد عليه لف روحة ونام
وانه هم ما طلعت متعودين
مو اول مرة تصير
ثاني يوم لبست ملابس الشغل
وطلعت الفجر الشمس توها تغيب
الجو دافي والناس اكو بيها تطلع تصلي
بالجامع
بيتنا صاير بين درابين والبوسط
احسب 12 بيت اصير كدام الشارع
العام
امشي وحسب ما منتبه لطريقي
والأصوات التقترب مني كل ضني
ناس رايحة بطريقها
بس وكفت بمكاني من حسيت اكو شخص
كدامي رفعت راسي تصنمت بمكاني
انفاسي انقطعت تدريجيآ
بلعت ريكي ومسحت وجهي
عيوني بقت متصنمة على السلاح
البيدة وأبتسامته الخبيثة
عقاب -: منوو انتَ ؟
سألته واحاول اكون طبيعي
وما ابين خايف ضحك ورد
-: جاسوس الحجي
عكدت حاجبي كلشي ما فاهم
تقدم خطوة صوبي رجعت خطوات
خايف
عقاب -: منو الحجي شنو جاسوس
ما كاعد افهم عليك يمكن مخربط
انتَ!
-: تؤ تؤ زقاق ***بيت رقم 12
الأسم دعلج عنده مجموعة أطفال
يشغلهم عده حتى يلم فلوس يشتري
بيها سلاح للحزب
راسي افتر بقيت ساكت حاير
بكلامة شال سلاحة صوبا بوجهي
رجف گلبي قبل جسمي
عركت جبهتي وبقيت ابالع بريكي
شكد جنت ادعي اموت بس من صارت
صدك حسيت بالخوف الحقيقي
عقاب -: اذا تكتلني ما تحصل شي
اصلآ انه شلي علاقة بي ؟؟
-: ادري ما كتلك لا تخاف
انه ما اكتل الصراصير بس شني
اريد منك خدمة صغيرة
عقاب -: انه ماكدر اسوي شي
شوفلك واحد غيري
ضحك
-: تؤ انتَ تكفي وتوفي
اسمع حبيبي لا تخاف خليك
بطل
عقاب -: مالي خلك مشاكل
-: ماكو أحد يحب المشاكل !
عقاب -: شتريد مني ؟
-: هذا الحجي الزين
اسمع حبيبي اريد منك تخلي
هذا الجهاز بغرفة دعلج اكون بمكان
واضح بس مايكدر يشوفه تفهم عليه مو؟؟
يحجي وانه ساكت طلع من جيبه
مادري شنو صغييير كلش اسود
اخذته منه ايدي ترجف
عقاب -: شنو هذاا؟؟
-: جهاز تصنت
عقاب -: انتَ منوو؟؟
-: مو مهم منو المهم هسه اريدك
تخلي بمكان حلو بغرفه ريسكم
بس كون ما يشوفه
عقاب -: لنفترض شافه شراح يصير ؟
-: يخرب كلشي وانه وأنتَ نقرة
على روحنا السلام
بس هذا الشي ما راح يصير
طول ما انتَ تبقى ذكي وقوي
عوف الخوف على صفحة
عقاب -: بس انه ماكدر اخاف من صدك
-: شنو الـ يجبرك تبقى تحت رحمة دعلج
تنام بكتله وتكعد بكتله ما حاب تتخلص
منه؟؟
تعيش حياتك طبيعي تطلع وكت.
ما يعجبك تاكل الـ يعجبك
تلم فلوسك الك ما تنطيهن اله
هوه يحجي وانه اعيش كل لحظة يكولها
فبرك عقلي كل السويته هزيت
راسي بأي
ابتسم خلاها ابطن ايدي وسد كف
ايدي ضاغط عليه بقوة
-: باجر بنفس المكان والزمان
انتضرك لا تتأخر تمام؟.
عقاب -: تمام
حجيتها ضايع ماعرف شسوي
اختفى من كدامي بقيت واكف
اراجع براسي الصار حلم لو حقيقة
شفت الجهاز الصغير الـ بكف ايدي
فعلآ حقيقة شنو هذا ومنو وشيريد
مادري بوقتها كل السويته اهز براسي
وابقى ساكت
ما سألت هواي كملت طريقي بس
مية فكرة براسي رحت للسوك
والجهاز بجيبي
اول ما تحركت بالشارع سمعت
صوت وراي يصيح
-: عقاااب دعلج يريدك
بالمحل بسرعةةةة
فزيت بسام يصيح ويأشرلي
رحت وراه يمشي سريع وانه
امشي وما فكيت حلكي بحرف
لحد ما وصلنا للمحل دخل ودخلت
هم فجأة نسد باب المحل
بلعت ريكي بخوف
بقيت اباوع على بسام الـ مبتسم
بطريقة غريبة هزيت راسي بستغراب
وسألتة
عقاب -: شكو شبيك وينه دعلج؟
ليش سديت الباب ؟؟
بسام -: مستعجل على رزقك مو ؟
عقاب -: اي كلش
بسام -: ههههه اذا طلعت منا
عايش
عقاب -: شقصدك بسام ؟؟
قبل لا يرد عليه سكتنا من سمعنه
صوته يحجي بنبرة مخيفة
دعلج -: قصدة الـ يبيع استاذة
ومكان شغلة مكانة الزبالة بس انه راح
اشفق عليك وخليك بگبر يم التواليت
حتى تبقى ذكرى !.
....................................
يتبــــــــــــع
للقصة بقية..
السلام عليكم حبايبي شلونكم اخباركم؟
مشتاقين 🔥😔
بعدنه بالبداية بعدكم ما شفتو الحماس
على أصولة 😔❤
🚫موعد التنزيل كل ثلاثاء واذا صار مجال عندي انزل بارت مفاجأة
🚫لا تنسون التصويت حبايبي
⛔ومن تعلقون علقوا بأحرف او كلمات
مو ملصقات ما تصعد القصة هيج حبايب
گلبي انتم
مع الف سلامة
الكاتبة 𝑀𝐴𝐼𝑁 𖢕
قناتي تلي https://t.me/DXN_zx