مُقيده بأصفادِ الثأرِ

البارت العاشر

انه ليش مو سعيد؟
من القريب من البعيد
من الحجي ال كاعد يزيد
الدنيه مني تريد شي
وانه شي ثاني اريد
ههواي ناس محاوطتني
بس احس نفسي وحيد
________<<<<>>>>__________

الهدوء المحاوط روحي عجيب
صافنه بالفراغ كدامي اسال بروحي
وتالي شراح نشوف .شنو الما شفناه بعد
ضمضموم علينه بعد
طرحت .فد شلون لو حبلت نوب ثانيه
احبل من قصي فكره ماجاي اتقبله
كلما اتخيل طفل منه بطني جان تشوغ روحي

وره يومين كمت على حيلي فد راسي يوجعني والجرح
عضامي اخذ علاج عليهن

رسل شدت حيل من سمعت جنت حامل
حقدهه زاد اضعاف

مالي شغل بااحد حته عمه فوزيه مقهوره علي
وعلى ابنهه
خواتي محاوطاتني ويخافن عليه
ماشفت قصي عكب الصار
من اشوف سيارته اركض للغرفه
ماريد اشوفه ابد
ملكوت تكول سامعته اكثر من مره يسأل عليه
تكول عيونه تدور بينه عليج

اسمع صياحهم هو ووسل
واكلهم عساكم ناركم تاكل حطبكم
عكب ماسمعت بيه حبلت من قصي
ماعدهه حجه بعد
جانت حجتهه انه مابيه شيء نضيفه
ليش قصي مايحلل يعني خايف الصوج منه
وهسه ماعدهه عذر تنطي
وصارت بينهم مشاكل
صياحهم تالي الليل ومشاكلهم تالي قصي ينزل ينام جوه

التحق قصي وانه لا شفته بعد ولا شافني

صرت زينه ورجعت اشتغل بالبيت حالي من حالهم ..

_________
يسر..

طول فتره مرضي وانه شفت اهتمام اول مره اشوفه
من طبيت لهذا البيت لحد هسه
من عمتي ومن حسام
حسام صار يطب ويطلع يسال شبيه
وخافن محتاجه شيء
ومرات يكعد يمي بغرفه عمتي ويسولف وي عمتي
صرت احب سوالفه وضحكته
اول مره انتبه هيج اله .من يسولف اصفن عليه
ومن يطلع اشتاقله وانتضر يجي
من يسالني شلوني افرح بهاي الكلمه وصرت انتضرهه منه يوميه

بطني كبرت شويه والدكتوره كالت وضعي زين فد ماتحرك هواي خفايف

حسام خلاني اتعلق بيه بسبب اهتمامه
لان انه من طبيت هنا ماشفت حنيه منهم كمت افرح باقل كلمه طيبه
نسيت كلشي سوا بيه ونزرع بداخلي احساس حلو
يخليني افكر بيه ليل نهار
بس اسمع صوته ترتاح روحي

__________

ملكوت

مر شهر على زعله مريم .ومازن مثل المسودن
كام يتحجج بيه باقل شغله خاطر يحملني ذنب
ويصب غضبه بيه
يسحبني شوكت مايخطر بباله وكل مره يكوم مني يسمعني كلام يدفن روحي بيه
حرت بحياتي وياه منين مالتفت ماجاي تصفى
مشاعري وتناقضات عقلي وكلبي تعبتني .

مثل الي واكفه بنص النار لا اكدر اطلع يلوحني لهيب
ولا اكدر ابقه تاكلني النار .....

بيوم اجه مستعجل الضهر وكال رايح لكربلاء راضيت
مريم راح ارجعه

-زين انه شبي جسمي رجف
شبيه روحي شاغت .هي مرته وقبل ماصير انه مرته
ويحبه ويتعذب بلياهه ،،شبيه انه كلبي انضرب حيل
شني راضيه بالديصير راضيه يذلج يوميه ويهينج بفراشه.معقوله هيج مرخصه روحي
طلع مستعجل ساعه 1ضهر
ومن الوحده لل7المغرب من ردو وانه مثل الطير المذبوح
جابهه واجه طبو سلمت على عمتي وعلى رسل
وصعدت غرفته
مازن شايل ابنه ويلعب بيه ويبوس بيه
شفت بعيونه اللمعه الجانت مختفيه والفرحه انرسمت عليه

اجت وانه بعد خلصت ورقتي احتركت .
جنت بس للحاجه .

نزلت مريم وبطنه جبيره وكفت يمه وصته على غراض يجيب وهو يعاين عليهه جن شايف الجنه كدامه
طلع واجت رسل يمهه

-همزين رجعتي المن عايفه زوجج وبيتج ينهجم
ويروح منج

-اني رجعت لخاطره يوميه يخابرني يتوسل
ويحير شلون يقنعني .ارجع انقهرت حسيته متبهذل

-لا حبيبه لا متبهذل ولا شيء هم الزلم هيج ترا يمثلون
وراج يلعبون لعب شبيه شو يوميه ساد الباب عليهم

-شنو ياباب

-هه ليش ماكلج هو

-يعني ملكوت اخذهه

-اووو تكول اخذهه اذا ماطلعت حامل هسه
يوميه صاعدتله وساده الباب وصوت ضحكهه شهيره

ملكوت-اني صافنه عليهه شلون حورت الكلام منهه

-ياا ادبسز ياساق*** شرايده مني هجمتو بيتي
يعني اني اطلع زعلانه من وراج تالي يصفالج الجو وتلعبين عليه

-مريم فرفحت وخابرت مازن اجه بساع
ويريد يفهم شكوو

-ولك مازن بفرااشي تاخذه وتحطه بحضنك بفراشي
ضميرك ماانبك ماكلت ليش مريم طالعه من بيت

-بس خل نتفاهم تعالي صعدي

-ماااصعد مااصعد هسه ترجعني لاهلي
ولك تخابرني يوميه بس بجي متبجي عليه تتوسل بيه
وتالي تطلع مصعده ووين لغرفتي ليش مازن ليييشش

-فرفحت روحهه وهي تكمز وحامل وهو يهدي بيهه يريده بس تركد
انقهرت علييه وخليت روحي بمكانهه صعب حيل صعب
هو انه زوجه ثانيه وفصليه يعتبرني ومالي يمه ذره مشاعر من شفته شلون يحبهه متت الف موته
شحال كلبهه هي

-كوه صعدهه فوك وهو يتوسل ويهدي

-التفتت عليه رسل
شراح تسون بينه انتن اجيتن وهجمتن بيتنه
من كون انهجمتن انتن .

-ليش منو الكالهه عالصار مو انتي

-قابل اضم عليهه واخليه مخدوعه
صبري ياحلوه بعدجن مشايفات مني شيء

-نزل مازن بسرعه عالدرج
منو كال المريم عليه !!!التفت عليه انتي حاجيه

-ابد ماحجيت رسل كالت الهه عايفه رجلج وبيتج
ويوميه مسدود عليهم الباب

-سهله سهله
رجع صعد واسمع صوت بجيهه وصياحهه
والطفل جوه يمنه بجى اخذته واسكت بيه
يخبل اسمه علي حسيته جوعان
سويتله ثريد صمون ومي لحم من مال غده وكلته وغسلتله تعب اخذته بالكراج اطبطب عليه نام على جتفي
جاي اطب اجه مازن يسال على ابنه
شافه نايم بحضني اخذه على كيف لايفز
وصعده فوك
رجع اجتمع وي عائلته .والتم
وانه باوعت لروحي واكفه بمكاني وحدي
مصيري مجهول .وحياتي عدم .احلامي انعدمت
انتهت كل احلامي مامن حقي احلم بعد ...

___________
اساور...

اعاين كلمن همهه شكل وكلمن صافنه بفراغ وتفكر ..
ثاني يوم صادف نزول قصي انه جنت بغرفه عمتي اعدل بيهه وهي يمي طب علينه هو وسلم على امه وحضنته وتبوس بيه وتشم اني مطيه ضهري وداعزل
كعد على جربايه امه وتسال شلونه ووضعه اندك تلفونهه وطلعت تخابر

اني دايره وجهي اسفط بالملابس وكاعده اجه صوته باذني

-شلونج اساور .

-مارديت عليه ولا كانو سمعته بس صوته اتقزز من اسمعه
عفت المكان وطلعت بسرعه رحت للمطبخ جانت رسل بالحمام تسبح طلعت وشافته واخذته فوك
اني رجعت اكمل شغلي

للعصر كال اريد جاي هم مارديت عليه ابد
تجاهلته تجاهل كامل
خليته يتمنى مني حرف
يتمنه ارفع عيني بنضره اله كام يتحجج المكان الاني بيه يتواجد هو بيه لثاني يوم وتعبته من التجاهل
اني فعلا ماطايقه وجوده

بيومهه للضهر وهو يلوب يفتر ورايه
تعبت منه هو ومرته
مرته انتبهت اله وضلت تفتر وراي
اختنكت منهم ثنينهم مطاوقيني

واكفه بالمطبخ احضر عجين عروك ووكف هو وراي

-ليش من احجي وياج ماتجاوبين منتبه عليج

-ساكته واشتغل مارديت ولا رفعت عيني بقه هو واكف بمكانه كملت وكمت غسلت ايدي وفتت وي مافتت منه لزم زندي حيل وحجه قريب

-شنو معنى تصرفج هذا تتجاهليني عود ؟؟؟

-لاول مره ارفع عينه بعينه بعد الصار كتله

""اني مامتجاهلتك .اني فعلا مداشوفك كدامي""

وشوف شكد انت بنضري زغيرر

عفته وطلعت من المكان وعفته يحترك بمكانه من الاعصاب

بقه طول فتره اجازته اعصابه فايره ويروحه بخشمه
ومشاكل هو ومرته
قبل ميلتحق لدوامه بيوم جنت بفراشي دانام واجه دك الباب كامت زينب فتحته طلع قصي

كمت انه عليه وهو جرني للسطح دفعته

-شداتسوي وخرر

-اسمعي وصوتج نصي ارد احجي وياج وروحي

-ماطيق اسمع حسك

-اساور انه من ساعه الي صار بيج وضميري حيل اذاني والله العضيم اني مو هيج بس السوا ابوج هو الخلانه هيج نتصرف .
انه مامرتاح مادانام الليل تفكير اكل عقلي

-والمطلوب شنوو الي تريده

-تنسين الصار كله

-لوو اموت وبيني وبين الجنه اسامحك
ماسامحك .ولا احاللك وعساك بجاه الله
مترتاح ولا تتوفق
ضحكت مستهزأه بيه وطببت للغرفه
حجيت للبنات كامن يلومن بيه

ملكوت-ولج كسبي الج ادري ماتعبتي من الكتل قشمري

-شقشمر شبيج اكلهه ماطيقه شقشمر هااا
اشوفه ذبااحي

يسر-هلبت لو حملتي يتغير وياج

-حجيجن ينرفز هيج انت صايرات كلش بلا كرامه

ملكوت-انذلينه وطاح حضنه ضلت كرامه

اساور-لا مو انه الانذل وداعه امي
اله اطلع حقي منهم بايدي بس اصبرولي .....

________
ملكوت...

رضت مريم وي مازن .
وصارت تشد وياي وكدامه وتشتم بيه وابوي
وهو ميتدخل ابد .ولا يراعي مشاعري
حيل انقهر واتاذه بس محد يحس بيه

بيوم جنت مريضه سني يوجعني والوجع مسهرني الليل كله لا فاد بيه علاج ولا شيء وتعبان وجهي وذبلانه
كاعده بالمطبخ ولازمه خدي المورم ومدنكه راسي
طب مازن وشافني حالتي جانت كلش تعبانه استغرب وضعي

-شبيج

-اشرتله على خدي

-سنج

-هزيت راسي

-اخذتي مسكنات

-ميفيد كلشي من امس نزلت دمعتي من الوجع مسحتهه

-استغفر الله
دكومي خل اوديج لدكتور اسنان بلكي بفيد شيء يطيج شيء

-بسرعه كمت وغسلت وجهي بدلت ونزلت شافتني مريم دانزل الدرج
هي حامل كوه تنزل صاحت على مازن جان بغرفته نزل وديخلي فلوس بمحفضته

-وين رايح

-متشوفين البنيه مريضه

-مريضه وانت شنو شبيك تركض عليهه

-شبيج مريم ماتشوفين البنيه شحالهه

-مايهمني انت شبيك ترجف عليهه شكو طبهه طوب

-انتي الحجي وياج مايفيد من ارجع نتفاهم امشي انتي

طلعنه اني وياه كاعده بالسياره وايدي على خدي
اشوف الشوارع وبغداد اول مره اشوفهه
ناس هواي طالعه وتفتر وتمشي سيارات هواي
عوائل
شكثر صار ماشايفه شارع ولا ناس
مدفونين جنه
وصلنه لعياده الدكتور وصعدنه كال للسكرتير وضعهه تعبان خل تمشي اول وحده انطا الكشفيه وانطه كراميه للسكرتير طبينه
شاف الدكتور سني كال ثقب صغير بس التسوس الي جوه هواي ننضفه ونحشي ونشوف العصب

طلع ابره البنج لو انه خرطت العافيه
بلكوه ضربني وكال انتضرو شوي ويبدي مفعوله

كعدت بره الوج واكل بروحي من الوجع شوي وحلكي جن انعوج خفت صار ثكيل التفتت لمازن

-عفيه حلكي اعوج صار

-لا مابيج شيء

-لا ثكيل صار ماحس بيه شصار بيه

-مابيج شيء هذا بنج عادي

طبينه للدكتور كام يشتغل واني الوب منا ومنا
اخاف غراض الاسنان تخوف
كل شوي وجايب شغله شكل

اتحرك جوه ايده وادفع لزمت ايد الدكتور

دكتور مروتك كافي راح الوجع ماريد

-مايصير اذا فكج البنج تتوجعين اضعاف الالم الجان بيج لان لعبت بيه

-اجه مازن سحب ايدي من الدكتور ولزمهه وخزرتي
اثبتي خل يخلص الدكتور

لحد ما خلص انه روحي خلصانه

طلعت وانه امسح بدموعي طبيت بالسياره
وهو راح للصيدليه يجيب العلاج
اباع عليه

ياريت لو تضل هيج حنين

صعد هو وخله العلاج يمي
مديت روحي على الكشن تعبت والتبريد فتحه على وجهي
كالي انداري على صفحتي منا سيارات وجامه

اني هم انداريت وغمضت عيوني بتعب

ساق السياره واني اغمض وافتح وي كل طسه وكل هورن واشوفه يتلفت عليه ويشوفني

-اجيبلج اكل جوعانه

-لا ماريد

-طبك بمكان ونزل هو اني على نومتي شوي وصعد جايب موطه

-هاج اكلي هاي حته تبردين

-باوعت عليهه علبه مشكله شكلهه يشهي
فتحت العلبه واخذت بالخاشوكه البلاستك شوي اكلت

-ها عجبتج

-امم طيبه

-ماكتيلي تفضل

-اسفه هاك اكل

-داسوق ماكدر وكليني

-خجلت من حجايته وكوه خليت بالخاشوكه وخليت بحلكه اكل وهو يبتسم

-طيبه انطيني بعد
وكلته مره ثانيه ..كال

-اكلي انتي اني ماريد بعد

كعدت اكل على كيف اتنغصت الباقي لزينب
سديت القبغ وكتله
-عادي اضمه لزينب

-تردين اجيبلج بعد

-لالا هذا كافي بس قصدي تقبل

-الف عافيه اني المن جايبه

-حبيت هذا الكلام منه حسيت بالحنيه واني مفتقدتهه
وحسيت كلبي مثل الارض اليابسه ورجع بيهه المي
وارتوت .رجع خضر بكلبي حبه ورجعت نبضاتي تدوره بنص كلبي .

كله هذا صار لان حسيت بيه حنين بكلامه ويايه

وصلنه للبيت بيدي علاكه الدوه وعلبه الموطه
طبيت جانت مريم وجهه مكلوب سالتني اساور
كتلهه حشيته
بهالاثناء طب مازن كال هاا الله يساعدكم
مريم طلعت مجاوبت بهالاثناء من دتطلع
هو لزمهه من ركبتهه بالشقه وخلاهه جوه جناحهه ويشاقي بيهه

-مثل الي نطاني جناحات طرت بيهم للسما
وفجاه كص جنحاني ووكعني للكاع ...

هيج جان احساسي من اشوفه وياهه ..
هو يمكن ماجان قصده من عاملني بود
بس كلبي ماصدك بسرعه رجع نبض ونسه كلشي
وكل الاذيه وكل كلمه جرحتني ...

بكلمه نسيت كلشي ورجف كلبي ..

_______
يسر....

جنت نايمه واسمع صياح جوه فزينه ونزلت مرعوبه على كيف نزلت خواتي قبلي
عمه فوزيه شاكه ثوبهه وتلطم ورسل واكفه تبجي وشعره مملخ

حسام يكول شمدريك بس كللللي

مازن-خابروووني من الفوج مالهم
كالو صاير عليهم رمي بليل ومتكتلين هواي

عاطت عمتي يمه قصييييي يمهههه

بقينه مصدومين واكفين وبينه اساور مصدوومه
كعدت عالدرج بصدمه ونزلت دمعه منهه مسحته بسرعه .

طلعو مازن وحسام بسرعه والعمام اجو
البجي وصوت الصراخ يفزز البدن الكرايب التمو كلهم
وكل هذا ماكو من مازن خبر راح يدور على اخو

بقينه ناس راحت وناس بقت وعمه فوزيه متخبله ورسل مو احسن منهه
اجو اهلهه وكامو يسمعون باساور حجي وهي ماجانت تنطي رده فعل تالي عافتهم وصعدت فوك بقت اعتكفت

صعدت اشوفهه لكيته كاعده وحاضنه نفسهه

يسر-اساور شبيج

اساور-عذاب الضمير نهش بيه

-ليش شعليج انتي

-اني دعيت عليه ويوميه ادعي عليه
بس مادري ليش من صارت صدك خفت
خفت اني السبب وراح وخسر شبابه
هواي ضلمني اذاني وحاقده عليه واكرهه
بس ماريده يموت ماريد احس بتانيب الضمير
يتعب حيل تأنيب الضمير

-جا ابوي شلون جان عايش حياته عادي وهو كاتل بشر

-مادري مادري شلون كدر

بيومهه للصبح محد كدر ينام
خابر مازن كال ماكو ملكو وي الجثث وبعد ديدورون
يومين واحنه انسبينه سبي ماكو نوم ولا راحه دورو ماخلو مكان رجعو وره ثلاث ايام محنيين الضهر

هنا الكل عاط وعبالك جايبين خبره الدنيا كامت وما كعدت
للعصر صارت هوسه بره ونخبصو
طب النه مازن لونه مخطوف ويرجف .......

قرائه ممتعه حبايب
اعتذر عن التاخير اعوضكم ان شاء الله

تفاعلو بالتصويت بالنجمه والتعليق بين الفقرات♥️