قيود العوف

part 33

#قيود_العوف
بقلمـَي: ريتـَا

أمِس بالليل طيفَك مَر بالعَيون
وگعدتْ ويّاك ساعة و عاتبيتَك
فجأه وراح طيفَك
وفزَّت الرّوح
گلبت الليل كِله ومالگيتَك .

لتنسون التصويت + التعليقات بين الفقرات + متابعة حسابي قلبي ❤️‍🔥

شبابات صوتوا دوسوا علىٰ النجمَة لتنسون مُهم🤏🏻

المعذرة حساب الواتباد مايفتح چان بسبب خلل وهسة يلا انفتح يمي🥲
واختلف كل شيء بيه لدرجة صورة الحساب مايصير اخليها بنهاية البارت

حسابي بالانستا
rita.almuktar
_________________________________

وأشر على هاي المرة وگال بأبتسامة وعيونة تفتر عليها

-أدم: وهاي بنت عمي غرور

أبتسم إبتسامة مُقرفة لهذا اليوم أتذكر شكلهة وكمل كلامة

-أدم: وضرتج بس ان شاء الله خوات مابيناتجن ههههه

رفعت راسي لأمي الي اتصنمت بمُكانهة وجمدت ملامحهة لدقائق فقط بعدهة ابتسمت بحزن وهزت راسها ..

حطت أمي الاكل وتاكل وهي معاجبهة وابوي محتار شيسوي يفلس الها بالدجاج ويحط گدامها وكل شوي يسألها ماتريد شيء ..

دخلت يم امي شفت قاسم واگف يمها ومتخوصر وحواجبة معقودة بعدم رضا زفر وگال ..

-قاسم: يمة بشنو قصرتي وي ابوي وراح اتزوج عليج ؟؟

حچيت بفهاوة وصدمة طفولية ..

-رغد: شنو يعني هاي الي يم ابوي مرته

-قاسم: اي مرته ابوي متزوج على امي

چنة نسولف ونترادد وامي مو يمنة امي بعالم ثاني باوعت بوجه قاسم ومليت راسي ورسمت تعابير على وجهي بمعنى شبيهة ؟

رفع اكتافة بعدم معرفة ومشى خطوات خفيفة حط ايده على اكتافهة وگال

-قاسم: يمه شبيچ ؟

فززها من صفنتها باوعت اله واخذت نفس وزفرتة بتعب ماجاوبتنة ولا ترد علينا من نحچي بهذا الموضوع ..

بقوا لليل يسولفون ويضحكون بس ماطايقينهم ماجاي نتحملهم حتى أصواتهم من توصل لأذني موحلوة مُزعجة فترة واجانة ابوي للغرفة گال

-أدم: راح اخذهم لفندق وباچر احضر غرفتهه

أشر على الديوانية وگال بتوعد

-أدم: كل جنطهه وغراضها هنا إياني إياكم توصلون الهن

-قاسم: راح اخذ منهن شيلة البسها

خزرة ابوي وضرب الحايط ..

-قاسم: يعني امي تاخذ لو رغد طبعاً ماياخذن

چان يسولف وانا عيني متركزة على امي امي اليوم مو طبيعية مالها خلگ تعبانة وجهة شاحب كل ظني صار وضعها هيچ من عرفت بأبوي متزوج ..

عافنا وراح حطيت راسي على رجلهة وحچيت بهمس والغصة بگلبي باقية

-رغد: يمه انتِ مقهورة لأن ابوي تزوج عليج؟

جاوبتني بهدوء وگالت

-هيلة: چنت ادري بيه بيوم راح يسويهة ويعرس خليه براحته شعليه بيه بلكي يلتهي بيَهه ويفكنة ونرتاح

-قاسم: ااااخ لووو اكضها ولا ارتاحيت الها يمه شفتيها شلوون تباوع الچ ؟؟؟

-هيلة: ميخالف يمه مايصير نحكم عليها من اول يوم احنة حتى ماعرفناها ولا گعدنة وياهم

-قاسم: يعني يمه هي التزوج رجال مزوج شنو غير حقيرة

-رغد: يمه انه ماحبيتهه ابد

-قاسم: سعلوووة هذيج هي مبينة سعلوة

لزمت راسها وگالت

-هيلة: كاافي ولكم شجااكم !! يلا بس ولا كلمة بعد كل واحد يحط فراشة ويتمدد عليه يلا وهذا اخوكم وين صار

-قاسم: هسة تلگينة بالركن گاعد يباوع على الباب يمتى ابوي يطلع منه حتى يجي

-هيلة: ابوك مو طلع

-قاسم: اي يمه هسة يجي

صدگ شوية وسمعنة طگة الباب ودخل عوف

-هيلة: يمه وين صرت ليش تبقى بره لهيچ وكت

اتجاهل السؤال وگال بأستغراب

-عوف: شنو هاي الجنط الي بالديوانية متروسة

-قاسم: جنط مرة ابوك

التفت خزرتة امي وگالت

-هيلة: قاااااسسسم

-قاسم: مچذب يمه ؟ لو ماتردين تگليله باچر راح يجيبلهه غرفة ويشوف

-عوف: ابوي متزوج ؟

-قاسم: اي وجابهة تغدت عندنا اليوم

عض أصبعة قوي ودفر الباب برجلة حييل ودخل للغرفة وسدها ..

وثاني يوم ابوي خبصنا خبص من الفجريات هوس البيت وغرفتنا طلع كُل اشيائنا منها بقينة مصفصفين من فعلتة زمخ بينا وگال ..

-أدم: شبيييكم قنناادر تعالووا ساعدوني نطلع زبايلكم

-هيلة: وين نوديهن ماكو مكان بعد غير الهول والديوانية ؟

-أدم: حطوهن بالمخزن

-عوف: نحط ملابسنا بالمخزن ؟ بين الجريذية والفار

-أدم: وملابسك شنو من حورهن دحطهن بچيس وحطهن هناك كل شيء ماعليهن

-عوف: بيتنة مابي مكان ليش جبتها هنا جان خذيت الها بيت لو بنيت الها غرفة مادامك تريد راحتها

-أدم: ولك ابن الكلب شنو تفرض عليه وين ماا أريد اگعد

-عوف: غرفتنا هاي غرفتنا أنام بيها ندرس بيها ملابسنا هنا وكتبنا وكل شيء وين نروح !!

-أدم: راحت روحك ابن الكلب مهتم بيك انه عسى ماتنام بالشارع

-هيلة: حسبي الله ونعم الوكيل

-أدم: تتحسب بنت الفگر دروحي جيبي چيس علاگة لمي ملابسكم لا اشمرهن برة

اتنهدت امي وراحت تلم بيَهم گعدنة وياها نلم بملابسنا وغراضنا عبالك متهجولين بس اليقهر انطردنا واحنة بيتنا حتى غرفتنا المكان الوحيد الي نشرد بيَه من هوسة البيت هي هم انوخذت من عندنا ..

بهاي الأيام انخبصنا ابوي جاب صباغ ويعدل بالغرفة وجاب غرفة الها تحضيرات كل عروسة بوقتها چان ابوي يحضر بيهن وحدة وحدة ماچان يستعز عليها شيء لو اغلىٰ شغلة يجيبها

ويصرف شگد وما يهمة ولا يفكر بيهن وأمي الف مايحط بإيدها ومصرف ماعندنا چنة نباوع بس مهضومين علىٰ نفسنا وعلى امنا ..

وجابهة ابوي ومر اسبوع على وجودها بيناتنة بس مانشوفها باليوم الا كم دقيقة أكلها وشربها يرحن للغرفة ومن تطلع وتشوفنة بسرعة تعقچ وجهة ..

فد يوم گاعدين بالهول وجاي نباوع على التلفزيون طلعت هيَ تتمايل بمشيتها وتطگ بالعلج وگلابيَتها مفتوحة من جوة من الاطراف گعدت يمنة وگالت

-غرور: أدومي وين راح متعرفون ؟

-عوف: أدومي ياهو

ضحكت بميَاعة وگالت

-غرور: هههه يا أدومي ابوك

لطم گصتة قاسم وگال

-قاسم: جيرة بگصتك يقاسم اي والله

-عوف: لا مانعرف أدومي وين

-غرور: غريبة ماگلي وين رايح بقىٰ بالي يمه

زفر عوف وعفص وجهة وگام لاحظتة وگالت

-غرور: هاي ليش گلب وجهة هيچ ؟

-هيلة: مابيه شي خية بطنة توجعة

باوعلها قاسم وهم عفص وجهة عليها وگام چانت مركزة على تصرفاتنة بدقة بحيث قبل ماتعيد نفس الكلام گال الها قاسم

-قاسم: انه هم بطني توجعني بسرعة طگتني لوية

گالها وراح طلع وره عوف چانت تباوع ونظراتهة شرانية بحتت شحت نظرها عن الباب وگالت لأمي

-غرور: شبيهم ولدج ميحبوني هههه

-هيلة: شلون عرفتي مايحبونج

-غرور: مبينة تصرفاتهم وياي وأشكالهم

-هيلة: متوهمة خية مابيهم شيء شنو شافوا منج حتى مايحبونج

التفت يمين وشمال وگالت ..

-غرور: هذا الهول ينراد اعدله باقي فارغ مابيه شي

-هيلة: باقي فارغ لأن انه وولدي أنام بيه

-غرور: شلون لعد يبقى فارغ ممرتب ؟ وموحلو اني اهلي يردون يجون يبقى البيت هيج لعد وين انومهم اني انومهم بالفنادق

-هيلة: واهلج شعليهم بمكان نومنا ؟

-غرور: لعد غير يجون يشوفون بيتي مرتب ونازك اني اريد اعدله اصلاً وبعدين وين يباتون اهلي غير هنا

عاطت أمي بأستغراب وگالت

-هيلة: شنووو ؟

-غرور: اي لعد شلون

-هيلة: شوفي هذا المكان لو أطلع منه مجنزة محد ياخذة كافي غرفتنا خذيتوها وسكتت ملابس ولدي انشمرت بمكان حيوانات ما تنحط بيَه وهم سكتت وهسة جاية تردين تاخذين مكان نومهم وگعدتهم ؟؟

-غرور: لا بلا عيني لعد اهلي وين اخليهم

-هيلة: والله ماا ادري حيري بيها انتِ

-غرور: شنو انتِ دتعانديني ؟

-هيلة: بوية كفيني شرج وطلعي هاي السالفة من راسج تردين تبهذلينهم وين يرحون بعد هجولتوهم الله اكبررر

گامت وضربت رجلها بأيدها وگالت

-غرور: بسيطة والله اشوف كلامي لو كلامج الي يمشي

مشت وهي تطگ الچلب بالعميد وصارت المغربية واجة ابوي لا دخل يمنة لا سلم علينة گبل فات يمها وأيديه كلها علاليگ اباوع لأمي الي تسوي نفسها ما مهتمة بس والله الدمعة بطرف عينها معلگة ...

دخل نص ساعة بقى يمها وطلع وگف بباب الغرفة وصوتة يرعد ..

-عوف: بدت رحمة الله

-قاسم: واحد من عندنا راح ينكتل

باوعت الهم امي وگالت

-هيلة: لحد يحچي ولا تفكون حلوگكم ولا تدخلون لا تنكتلون يمة

أتقدم يمشي بعصبية بأتجاه أمي وزمخ بصوت

-أدم: ولچ هيلة انتِ وتاااالي وياااااچ

-هيلة: شصاير شبيك تصيح

طلعت من غرفتها وراحت وگفت ورة أبوي گال وعيونة ناطة وصايرة براسة

-أدم: شلون تطردين بأهل مرتيييي انتِ ياهي وتطردينهم

فتحت عيونها امي على وسعتهن وأشرت على نفسها

-هيلة: انه طردت أهلها !!

حچت وهي واگفة ورة ابوي وگالت

-غرور: اي انتِ لعد اني من اجيت كلت الج داريد اعدل الهول وارتبة لأن اهلي يجون يباتون يمي انتِ صرتي تصيحين وتگولين والله مانطلع من هلمكان واهلج لا تجيبينهم شوفيلهم مكان ثاني

باوعت لأبوي ونزلت منها دمعة تماسيح

-غرور: يعني أدم اني اهلي وين اشوفلهم مكان يجون يشوفوني غير يگعدون يمي ببيتي لعد اطردهم لو اكلهم كعدوا بفنادق ترضاها

اتنهدت امي وحچت بتعب

-هيلة: حرام عليج الچذب ولچ انه گلت الج لا تجيبينهم !

-غرور: لعد شتفسرينهة ؟؟؟

باوعت لأبوي وعيونها مغيمة دموع

-هيلة: وين تريدني أودي ولدي وين اگعدهم وين انومهم لا خليت علينا غرفة ولا هول وين اگعد بيهم بالشارع لو بالدايوانية أنام الي ماندري يمتى يفوت علينا واحد من أصدقائك

غمض عيونة وگال بقلة صبر وهو يزمخ

-أدم: شوفي ولچ هيلة لو تفرشين فراش وتنامين بالحوش ماتهميني اهم شيء عمامي مايطلعون مني وانه متفشل افتهمتي وهذا الهول تطلعين كل غراضكم منه حتى تسوي مكان لأهلها

خرج من صمتة عوف وگال لأبوي

-عوف: مادامك هيج يهمونك أهل مرتك گعدهم بغرفتكم ؟ لو انتوا ماتنامون على الگاع وما تلوح ظهركم الرطوبة وما تتكسرون بنومتكم ؟

-أدم: ولك عوووف

بس سرعان ماا انتفضت وأول مرة امي تخرج عن صمتها وتنتفض بغضب وتنطق كلامها بقوة وگفت گدامه ورفعت إصبعها بوجهة وأيدها ترعش وحچت بصوت يرج رج ..

-هيلة: وحق الي خلق الحق وسواه يا أدم هذا المكان ولدي مايطلعون منة وماينامون مثل ماتگول عسى لو بالحوش المهم ترضي عمامك لو على گص رگبتي ولدي مايتبهذلون وينذلون أكثر

فتح عيونه على وسعهن وضربها راشدي فر وجهة بيه فر رن بأذني صوت قوتة ....

-ادم: ولچ هييييلة أكسرج وما تكسرين كلمتي أكسرج وادفنج

حطت أيدها على خدها ورجعت حچت بصوت اقوىٰ .

-هيلة: كسرنيييي كسرني وما تبچي عيون ولدي بعد كسرني وما تكسر بيهم أكثر

-أدم: انعل ابوو ولدج ولچ بنت القنااااادر

-هيلة: بس خاف ربك خافه وراك موت وحساب وعقاب شتگول لربك شتگول !! تگله زوجوني إياها غصب لأن ماعندها أهل وتايهة بالشوارع تگله چنت أضرب وأدفر وأكسر حتى ارضي روحي وابرد گلبي بيَها

شتريد بعد من عندنا شتريدد زواج واتزوجت أخذت حقك وزايد مني ريحت گلبك وبالك شتريد بعد وين تريد توصل عذابي وأذيتي ماكفوك صرت تعذب بولدك خلفتك !! خلفتك

-ادم: خلفة الفگر من عساني لا خلفتهم انعل أبوهم لابو هيچ خلفة

-هيلة: عندك عندددك مو عندي !!

التفت علينا واحنة حاضنين عوف وواگفين إنه ارجف وخايفة خايفة ابوي يكتلها ويأذيها وهي ترجف مريضة باوعت النا بعيونهة المغورگة وحچت بشفايف ترجف ..

-هيلة: عندي الهوىٰ والماي عندي النفس اليصعد وينزل عندي الدنيا ومابيها هذولي عافيتي وحيلي كله " مُهجة گلبي "

هز أيده بعدم رضا وانزعاج وگال

-أدم: لا تبقين تسربتين فوگ روسنا لمي غراض ولدج وطلعيهم منا لا تدوخيني أكثر

-هيلة: وانه حلفت بالي خلق الحق ما أطلع وماا أتحرك خطوة لا انه ولا واحد من ولدي

حطت أيدها على شفايفها وحچت بتمسكن ...

-غرور: ياااا أدم لعد شگول لأهلي ارجعوا ماعندي مكان انومكم بيه !!

-هيلة: تگليلهم الي تگولينة مو شغلتي هاي

نفخ بعصبية وجر امي من شعرها عتها حيل وهي صرخت انتفضنا كلنا بصوت من يسحل بيهة يريد يطلعهة برة بس أمي چانت رافضة ومُصرة تتحمل الأذية وما تطلعنة من هلمُكان

ركضوا عوف وقاسم اثنينهم يصيحون بصوت على أبوي مترجينة يعوف أمي ويرحم بيَها بس مايسمع صوت أحد منهم اتخبل عليها يدفر بيَها ويعتب ويضرب وهي جواه بس امي چانت جامدة طلعت منها صرخة وحدة وبعد ماطلع منها صوت

كل هلضرب والأذية الي تعرضت الهن ما استغاثت بكلمة وحدة بقت جامدة أيده تحرك بيَها يمين وشمال وگف گلبي وخفت من شفتها هيچ جواه

بس من جر شعرهة حيل ودفرهه ببطنها طلع صوتها المبحوح من صرخت من وجع الدفرة وشمرها بالگاع نكث أيدة وطلع بچت بصوت عالي وغطت وجهة بأيديها گعدنة يمها ثلاثتنة دموعنا تجري بحرگة گلب وقهر روحنة تتلوع ..

لزمناها واستندت علينا وگامت تمشي بخفة وتعرج ..

اجت عيني عليها تباوع لأمي هزت أيدها ودارت وجهة وراحت

ومثل كل مرة نسهر ويانة ونمسح دموعها الي تطيح وهي تسولف نبوس أيديها نمسح على جسمهة

صفنت بوجهة ورمشت ببرائة وطاحت دمعة مني
امي حلوة هواي معانيها صغيرة وناعمة بيضة قطططن ومثل عود الريحان شعرهة اصفر ومثل الماي

برغم جمالها كله ونظافتهة بس أبوي ولا مرة شافهة ولا مرة رف گلبة عليها يباوع إلها مثل النكرة

وفد يوم دخل عوف عيونة صايرة براسة ووجَهة أحمر صاير من العصبية شمر قاصة گدامنا وگال بصوت يرج

-عوف: ياهو منكم فاتح القاصة هاي وماخذ الفلوس البيها ؟

شفناها واستغربنا اول مرة نشوفها رفعت اكتافي وگلت

-رغد: والله مو انه اصلاً اول مرة أشوفها !!

-قاسم: وعلي يكون انا ولا شايفهة ولا ماد أيدي

-عوف: ولكم الفلوس وين راحتتت البييييها !!

-هيلة: يمه شني سالفتهة هاي ماتسولف دخلت ترعد علينا

-عوف: يمه هاي القاصة اشتريتها وصرت اذب بيها من فلوس الخبز الي تخبزينة وانطيج الباقي حتى أجمع مبلغ واخذج للطبيب لأن الفلوس الي عندج تصرفينها علينا وعلى البيت

لطمت على خدي وحچيت بقلق ..

-رغد: ولگيتهن مبيوگات !!

-عوف: ما الهن أثر القاصة مفتوحة ومشمورة ولكم انا ضامهن ضمة الشياطين مايعرفون بمكانهن

-قاسم: ياهو بالبيت غيرنا بس السعلوة وابوك واحد منهم ماخذهن

هز راسة بتوعد واتخبببل طلع يصيح بأسمها

-عوف: غروووورررر

طلعت بـسرعة باوعت اله بأنزعاج وگالت بعدم إهتمام

-غرور: خيررر شبيك تصيييح ؟

-عوف: هاي القاصة انتِ فاتحتهة؟

باوعت الها وبين على وجهة التوتر هزت راسها وگالت

-غرور: لا عيني مو اني

-عوف: ولچ غرورررر ياهو بالبيت غيرج وياهو فات النة محد يعني واحد من هلبيت لغفهن مال اخواني هاي قطنة وشلعيها من أذانج يعني ماكو غيرج لو انتِ لو أبوي

وي ماگال الكلمة طلع أبوي ينشف بشعرة وهي تدردم على عوف لسانها شطووولة وماكو حچاية ماحچتها رد أبوي ببرود وگال

-أدم: انا اخذت الفلوس شرايد هسة

-قاسم: يبا انتِ اخذت فلوس امي مال الطبيب !!؟

-أدم: فلوس امك ؟ ها طلعتي تضمين يهيلة بعد الضامتة الله يعلم بيه

-عوف: هيج نفسك !! تدنىٰ على فلوس مريض على تعب ووگفة تكسر الظهر وفرة أطلع افتر على العالم واحد واحد حتى يشترون الخبز مني وتاخذهن انت بدم بارد !!

-أدم: ولك انه ابوك ابن الكلب ماتحاسبني الولد وما يملك لأبيه

فرك راسة بعصبية ومسح وجهة وماجاي يسيطر على روحة نطقت امي وگالت

-هيلة: ااخ يا أدم وين توصل بيك بعد وين تحتار شلون تأذيهم وتكسر گلوبهم ليش مافكرت بيه من اخذتهن ماگلت تعبة هذا شلون الك نفس

-غرور: وشنو هو باگهن فلوس أبنة يعني فلوسة ماسوىٰ شيء غلط شدعوة تدافعين لولدج وتكسرين بخاطر أبوهم

-عوف: سكتتييي انتِ اخرر وحدة تحچي

-أدم: ولك لا ترفع صوتك عليها س***

-عوف: ماا اگدر أرد عليك أكثر من هيج يبا بس الله موجود وماا تتهنون بيهن لا والله وعساها بحظكم وبختكم

-أدم: لككك زماال قندريتيش انتَ وتحچي أخذ كل فلس عندك وماتفك حلگك وياك حقير تعبت عليكم وكبرتكم وتمن عليه بفلوسك نذل

باوع اله وضحك ضحكة طووويلة

-عوف: حقك والله ماا ألومك صدك تعبت تعبت من الكتل والتفرقة والتعذيب والنكران والقسوة والمعاير تعبت حتىٰ كبرتنا وسويتنا زلم

بقى يباوع اله ومانطق بكلمة بعد لزمتة من كتفة وگالت

-غرور: دتعال فوت تعال والله عبالي عندهم سالفة جايين يحاسبون ابوهم على فلوس شنو قحط !!

فر وجهة ومشىٰ عنها راحت يمه أمي وحچت ..

-هيلة: ميخالف يمه الله يعوض لا تضوج أخبز الك وكلهن اخذهن لمهن ألك انا مابيه شي يمة لا أروح للطبيب ولا غيرة مَا أشكي من شيء

-عوف: يمه شنو گدامج قشمر انه ماا اشوفج ماا اشوف حالتج شنو وشَلون صايرة

-هيلة: هههه يمه الكبر اخذني مابية شي

زفر بعدم رضىٰ وگام

-عوف: يمه ول يرحم والديج انه مو جاهل وتحچيلي هلحچي !!

ومرت سنتين وكلنة نجحنة وعوف هم ونجح للسادس علمي وشاطر درجاتة كلها عالية من شاف أمي تعبت كلش بالزايد وطاح شعرها وضعفت حلف ماتوگف بعد يم التنور وتخبز ولا تطگ خبزة بأيديها

صار يشتغل عمالة ويطلع من الفجر ويجي العصر تعبان وهلكان وملابسة متربة وأيديه مشگكة ورغم تعبة مايفوت وأيده فارغة من يوم الي أشتغل

وكل هلوقت الي مر وبقىٰ أبوي على نفس الموال كل يوم كل اسبوع كل شهر ضرب وعنف وعدم احترام عياط على الصاعدة والنازلة ومن تزوج غرور لهذا اليوم اتسودن علينا بالزايد خصوصاً من حملت وجابت دلال صارت عندة الكل بالكل .

بحيث كلمة وحدة مايتحمل من عندنا ولا يشوفنا ولا يهتم وغرور كل يوم تسوي مشكلة وكل يوم ننضرب من وراها لأن تچذب عليه وتذب علينا بلاوي وأول ماتنطق بالحچاية گدام ابوي يصدگهة ويجي علينا

وجه أمي صار عظام والرجفة ماعافتهة صارت تمتمت بكلامهة وضعها مو طبيعي وشعرها صار يطيح بحيث الحجاب صارت ماتذبة حتى من تنام والكل يلاحظة إلا ابوي مايشوف ومايهتم ولا يسأل على حالها الضعيف حتىٰ !

بقىٰ عوف يشتغل عمالة ويدرس سادس يجي تعبان ووجهة أصفر من التعب ويسبح ويگعد يقرأ وقاسم يشتغل بمحل ويجي باليل وصارت حياتهم دراسة وشغل تعب وتعب ثاني يتحملون كل شيء لخاطر مانطلب ربع من أبوي ويذلنه بيَه ..

صرت ما اخلي أمي تشيل عود الشخاط وهي اصلاً ماتگدر تمشي قليل وتدوخ وتطيح

وبيوم چانت متكرفصة وگاعدة دخل عوف علينا چان توة جاي من العمالة وحالتة حالة بس چان يضحك ووجهة مرتاح ...

گعد يم أمي باسها براسها وگال

-عوف: يمه اليوم فتحت قاصتي الي حطيتهة من العمالة وباچر أخذج للطبيب يمه هلمرة اذا ماترحين وترفضين وحگ رب علي ماا احچي وياچ بعد

ضحكت بحزن وهزت راسها اله واخذت أيديه تبوس بيَهن وعيونة تجري دموع وأشرت النا على حضنها بمعنى تعالوا وحچت برجيف وهدوء

-هيلة: مشتاقة الكم ، فدوه اروحلكم يمه من عمري على عمركم

تحچي وتتلمس بوجهنة بأيديها الترجف لزم عوف أيدها الي على وجهة باوعلها وگال

-عوف: يمه أنتِ اليوم بس رجيف هواي ترجفين خلي نروح للطبيب هسة احسن من باچر

هزت راسها بأستنكار وگالت

-هيلة: لا يمة مابية شيء بس ماخذة برد

عقد حاجبة وگال بأستغراب

-عوف: بس يمة مو باردة ؟ الجو حار راح البرد

لمت نفسها بالزايد وگالت

-هيلة: اي يمة مادري ليش اليوم جسمي بردان كلش

-قاسم: يمه خاف مصخنة

مد أيده عوف لوجهة اتلمسة وگال

-عوف: بشرتهة باردة مو حارة

-هيلة: لا يمة ما مصخنة يابعد حيلي

عدلت گعدتهة وفتحت أيديها وكالت

-هيلة: تعالوا بحضني يمة أريد اشم ريحتكم الحلوة

حطيت راسي بالنص وعوف وقاسم من الجهتين متكئين عليها وحاضنينهة مسحت على راسي وگالت بتقطع

-هيلة: اااخ ، يمه رغيدة بنيتي حيلي كله وروحي من هاي الدنيا امانتكم انتوا إخوانها رغيدة بذمتكم ليوم الدين ديرو بالكم عليها لا تخلون أحد يوصلها ابقوا حنينين عليها ضموها بعيونكم

-عوف: يمه ليش تحچين هيج

-هيلة: ميخالف يابعد حيلي جاي أوصيكم عليها وحيدتي هاي وانتوا زلمي وادريكم كفو وماتردون كلمة امكم

لا تحرمونهة من شيء تريدة ولا تقسون عليها بيوم راعوا گلبها وروحها أريد تكمل دراستهة وتوصل ما أريدها تصير مثلي وتكسرها الدنيا وتبقى بدون شهادة تسند روحهة بيها

ضحك قاسم وحط أيده على راسي نثرة بحركة سريعة وگال

-قاسم: يمه طبعاً هاي أختي الوحيدة شعندنا غيرها اذا ماندير بالنة عليها ونباوعلهة نباوع المن !

-عوف: بنص عيني وروحي اخليها

طاحن دموعي وانه ضامة راسي بين رجليها گلبي يوجعني مادري ليش مامرتاحة أبد گلبي مغموت

سمعت ضحكتها الحلوة وگالت الهم

-هيلة: لو شدت الدنيا بيكم وضاگت لحد يعوف الثاني لوذوا ببعضكم يمة صيروا سند وعزوة أريدكم اوفياء وماتخونون الأخوة وماتخونون كلمتي ووصيتي بيكم

-هيلة: عوف

-عوف: ها يمه

-هيلة: لو مهما يصير أخوك ماتعوفه لو غلط تعلمة لو عثر وطاح تمد اله أيدك وتخلي ينهض على حيلة شيل همه وياه ولا تخذله بيوم

اخذ نفس وزفرة بصوت عالي بچت وحچت بصوت حزين ..

-هيلة: سامحوني ، سامحوني لو قسيت عليكم بيوم وسامحوني لأن اتحملتوا أذية بيوم لخاطري يمه

-عوف: يمه كافي كافي لا تحجين هيج كااافي

حضنتنة ثلاثتنة وشدت على حضنها وتشم بينة تاخذ نفسها بقوة كأنُ أخر نفس جاي تاخذة من عندنا وتبوس بوجوهنا وروسنا وتبچي وتشهگ حييل صوتها بيَه غصة وعبرة

صرنة نبچي وياها دموعنا تسابقت نار اشتعلت بگلوبنا انهضمنا مانعرف شنسوي شبيها امي اليوم ليش هيچ تحچي ويانه ليش جاي توصينا !

-رغد: أكو شيء مزعلج يمه أكو شيء متعبج

هزت راسها بأستنكار

-قاسم: يمه چا ليش هيج اليوم عبالك جاي تودعينة

-عوف: اسكت لا تلفظ هاي الحچاية بعد

توجهت أنظارها لعوف مابعد ما گال هيج وحچت بأبتسامة حزينة ..

-هيلة: كلنا بالنهاية نرجع لربنا يمه ماباقي بس وجه الكريم

-عوف: اي يمه ميخالف لا تحچين هيج

-هيلة: مايصير تحچي هيج عوفي

بلل شفايفة بحيرة واتنهد وأشوف الدمعة بعينة متعلگة ..

بيومها نامت بنصنا وما قبلت واحد من عندنا يفارگهة لو دقيقة وكل شوي تاخذ نفس بصوت عالي وتشهگ بيه چانت هاي الليلة مختلفة عن كل ليلة تگضيها يمنة

كلنا گلوبنا مغموتة وروحنا بيها غصة مو مرتاحين دموعنا وحدها تطيح وكل شوي واحد من عندنا يبوسها ويحضنها ويحط راسها يم راسة أكثر

چانت سريَعة الليلة وقتها مر سريع وكئيبة حيل نمنا وصدورنا مغموتة وعبالك جبل على صدر كل واحد بيَنة وهي تمسح على راسنا بايديها الي ترجف غفينا بحضنها وحنانها ...

فتحت عيني الصبح على صوت عوف شفتة مبدل وواگف يم راس امي

-عوف: يلا يمه گعدي حتى نروح للدكتور ، يمه ؟ يمه !

گالها مرة ومرتين بلع ريگ ودنگ گعد يمها رفع صوتة أكثر وهو يگول

-عوف: يلا يمه أول مرة تنامين لهيج وكت كل يوم انتِ تگعدينة اليوم انه الي اگعدچ ههههه والله وكت

-قاسم: شبيها امي ليش ماترد !

-عوف: مابيها شي نايمة هسة تگعد

اتقربت يمها ورجفت شفتي ..

-رغد: يمه گعدي يمه

حچيت وياها هواي ندهتها اكثر من مرة ماجاوبتني ركزت على وجهة الشاحب وشفايفها بيَض ويابسات

-رغد: ييييمهه ردي عليه جاوبيني يمههه لا تسكتين

مد أيده بتردد عوف ولزم أيدها رفعها طاحت وحدها

طاحت أيدها وصرخة طلعت من عندنا صرخة شگت گلوبنا صرخة ورجيف ..

-عوف: يمه فدوه اروحلج لا يمه انه گلبي مامرتاح من البارحة لا تعوفينة وترحييين لا تغمضين عيونج الحلوة يمه لا تغضمينهن

-قاسم: ولچ يمه دخيل اسمج گومي يمهه وعلي ماا نگدر بدونج ردي علينا وريحي گلوبنا يمهه لا تعوفينة وحدنة مو انتِ الي تسوينهة مو انتِ

شهگت وغصيت بشهگتي رجف جسمي وحطيت راسي علىٰ صدرها وونيييت وصوت ونيني ترس البيت كله

-رغد: بعد وووكتتتت وين عفتينا يمهه بعد وكتتت ليش تروحين مافكرتي بيه ياهو الألي بلياج يمه لا تكسريني انتِ هم

-عوف: اااااخخخ ليشش يا الله ليششش ليششش

لزمت وجهة بأيدي وعيوني دموعها تتسابق حرارة تطلع من عيوني وتنزل على وجهي مو دموع بوقتها ..

-رغد: يمه ماا اگدر بليااااج مااا اگدرررر لا تعوفيني للوكت مايرحمني يمهه اريدج اريدج وياي لا تعوفيني بعد وكت بعدني ماشبعت منج ماشبعت من ريحتج يمه ماشبعت من شوفة وجهج بعدني صغيرة على فراگج يمه والله روحي ماتحمله

انهاريت ماا أعرف شنو بدر مني بس كُل الاعرفة والي سمعتة انُ انهاريت صرخت وبچيت لحد ماا انغمىٰ عليه وبعدها ماا أتذكر شيء لا من أخذوها غسلوها ولا من دفنوها

كل أيام فاتحة امي انه مو بوعيي وافز دقائق حال ما أستوعب وفاة أمي اصرخ وابچي وأنهار وأرجع ينغمي عليه

ومرت أشهر على وفاتها وانه الاكل مايدخل معدتي باليوم إلا القليل بسبب إصرار واللحاح أخواني لخاطرهم اكل لگمتين بيومي وأحط راسي على المخدة وابچي وانام

أتذكرها ، أتذكر ريحة أمي ، صوتها ، حنيتها ، كلامها
حتى عياطها عليه اشتاقيت اله اتمنى ترجع وتعيط عليه منا لألف سنة إنه قابلة بس خلي ترجع

بكل كتر بهذا البيت أتذكر أثرها ومشيتها وگعدتهة وسوالفها بكل مكان بيَه ، متندمة حيل متندمة على كل دقيقة ما گعدت يمهة بيها ، ومتندمة على كل مرة رادت مني شيء وماسويتة بسبب عجزي .

ماكو شيء سد مكان أمي بهاي الدنيا ماكو شيء عوضني عنها ، من خسرت أمي خسرت هواي ، خسرت الروح الحقيقية الي بالدنيا أحس بيها ..

خسرت شوفة أحلىٰ وجه شافتة عيوني واحن أنسان عليه وفاة أمي غصة بگلوبنا للموت ما تنسي أمي ماتت بسببهم حرگو گلبها هواي

مسحت دموعها الي بللت وجهة والشهگة الي ماعافتهة

-جُمان: كافي رغد كافي بعد ماتگدرين تسولفين الله لايوفقها الله ينتقم منها ومن كل واحد تسبب بأذيتكم

ضرب صدرها بأيدها وحچت بدموع

-رغد: كل هلسنين وهذا مشتعل نااار ماتطفىٰ ناااري عايشة بحسرتي على أمي كل هلوكت

-منار: وجععع بگلبج ياغرور اذا اشوفهة اكتلهة

-رغد: اكرررهممم اثنينهم اكرررهم وبالخصوص هو ماا أريد شوفته لا بخير ولا بشر خلييي يعوفنة خلييي يعتقنة

-جُمان: ميخااالف أكيد عوف وقاسم ماراح ينطونة مجاال ويخلونة يتقرب الكم ! ولا يأذيكم لا تنسين مو بعدهم هذوليج الأطفال كبروا وكل واحد عندة صيتة وقوتة ورتبة مثل الجبل شايلها على كتفة مايگدر ابوج يسوي شي لو يمس شعرة منچ

-رغد: ليش عبالچ انه خايفة منة ! لا جُمان انه محد يخوفني بعد صدگيني ولو وصلوا يمي هو لو اي وتحد غيرة احاسبهم والله احاسبهم وما أشوف واحد گدامي منهم مابقت عندي ذرة خوف من اي بشر بعد الي عندي كره وحقد واشمئزاز من ذكر اسمة حتىٰ

-جُمان: حقجج منو يگدر يلوومج

-منار: اااااخخخ ياالأهل اااخخ كفيلين انُ يرفعونج لسابع سما ، وينزلونج لسابع أرض يدمرونج ويهتگونج هتگ

-رغد: مايتسمون أهل ماعندي أهل غير أخوتي والحجية انه

-منار: ليش اجة لعد ليش أجاكم بعد كل هاي الفترة وهو يدري بيكم محد يريدة ؟

-منار: يجوز صحىٰ ضميرة ! بعد كل الي سواه يمكن صدك قلق على قاسم من عرف بيه متصاوب وجابة خوفة ولهفتة عليه

-رغد: هههههه نفس الوجه ونفس النظرات شفتهن بيه ماا أتغيرو أبد لهسة يباوع النا بحقارة لهسة يشوفنة نكريييين أبوي مايتغير وما يصحىٰ ضميرة أبد

-جُمان: عجيب ! شنو من گلب عنده لعد هذا البشر

-رغد: الي مارحمنا ولا مرة بحياتة ولا مرة ! عندة گلب ! عنده أحساس

-جُمان: شبقى بيكم لعد شلون كبرتوا وانتوا شايلين هذا الوجع كله بگلوبكم الي يشوف ضحكتكم وسوالفكم يگول أريح منهم ماكو !

ضحكت بحزن وگالت

-رغد: احنة ملچومين بس نضم لچمنة ..

اتنهدت وربتت على أيدها وحچيت

-جُمان: احنَة يمچ انتِ مو وحدج رغد اني ومنار اثنينة خواتج حتىٰ لو علاقتنة مو قوية بس والله احبچ هواي وأعزج حيل وبأي وقت تحتاجيني اني مستعدة

-منار: واني هم صح صار يومين اعرفج بس طينتج معروفة و واضحة شگد نقية ونظيفة لو اتكدر خاطرج بيوم لا تتردين انُ تحجين النة وتفضفضين يمنة

-جُمان: لا تعتبرينهة فضفضة اعتبريهة إستشارة اعتبريها أخذ رأي شلون ماتحبين تعتبرين الموضوع اعتبري

-منار: حمستونييي اوگفن اسوووي گروب بالواتس النة ثلاثتنا

ضحكت بحزن اتنهدت وگالت

-رغد: أول مرة احس روحي محظوظة بناس من غير اخواني وحبوبتي كل شيء حچيتة وكل دمعة طاحت مني گدامكم ما استنكفت منها ولا خجلت شكراً لأن ماحسستوني بضعفي

-منار: اوووو اذا على الدموع الله لا يشوفج اني من أتذكر اهلي وابچي أبقىٰ يومين انحب يم جُمان

هزيت راسي وضحكت

-جُمان: اي يعني اني متعودة واصلاً اني هم ام دميعة هههههههههه

بكل مابينة حاولنة نطلعهه من المود الي چانت بيَه حاولنة ندعمها ونحسسها فعلاً وحقيقةٍ انُ البچي مو ضعف ولا عيب ! أكثر من طبيعي انُ الانسان يفقد طاقتة ويضعف

بالأخير كل انسان معرض لفقدان طاقة الصبر والتحمل أثر الضغوط والتراكمات الي تصير عندة بس يفرغ طاقتة السلبية كلها وكل شيء كابتة بداخلة وبعدها بعدهة يرجع اقوىٰ من قبل ..

لولا أنّ القلوبَ تُوقنُ باجتماعٍ ثانٍ
لتفطّرت المَرائرُ لفِراقِ المُحبّين.

*****

-مصطفىٰ: خااااااييييبب شبييييك اتسووودنت عليه اليوم مو گلبت القاعة فوگ حدررر ماكو ثقل ماشلتة ادري شجاااك مو ملخت روحك تملخ

نزل الدمبل واخذ نفس عميييق وزفرة فرك راسه وصار يفتر ويصفگ أيد بأيد وگعد ورث جگارة وبين ماجاي يسولف خلصت بسرعة ورجع ورث الثانية

-عوف: ااااااخخخ ولك شوفة وجهة رجعتني عشر سنين ليورىٰ رجع مخي يسترجعهن وحدة وحدة

-مصطفىٰ: شبييييك يمعود لا تهتم إله يقدم يأخر هسة هو گدامك

أشر بأصبعة على گلبة وگال

-عوف: هنا ولك هنا محفورات وحدة وحدة مواقفة

-مصطفىٰ: يلاا خوووية لخاطر موسىٰ الكاظم عديها وأنسىٰ أنتَ شفتة حتىٰ

-عوف: ليش انه چايل چيلتة فصم حتىٰ أهتم لوجودة انه ماا أريدة يوصل يم واحد من عندنا لأن ماا اضمن الك ردة فعلي

-مصطفىٰ: شتضمن انتَ اذا توة حاط رجلة ببيتك وكضيتة وطردتة

-عوف: قليل بيَه

-مصطفىٰ: خوية انتَ صاير نار ماا تتحاچىٰ

-عوف: دكل قنااادر

-مصطفىٰ: أكلت بس أهدأ

-عوف: هادئ انه

-مصطفىٰ: ها ؟

باوع الي بطرف عينة وگال

-عوف: شبييييكككك !!

-مصطفىٰ: هههههههههههه

-عوف: زماال ليش تضحك أنتَ !!

-مصطفىٰ: هادئ بعد روحي گتلي ؟

-عوف: مصطفىٰ اذا ماتعوفني وتسكت الزگك بالحايط وعلي

-مصطفىٰ: هم نزل وهم يدبچ علىٰ السطح چا ياهو الخابرني وصاح الي ولك والله طرگااااعة طرگاااعتك يمصطفىٰ

-عوف: دخييييلككك يا محممدددد

أتصل تلفونة واتغيرت ملامح وجهة ١٨٠٪؜ درجة قلص عيونة وأبتسم بخبث سد الإتصال وهو يضحك

-مصطفىٰ: بيَك انفصام ومحمد شني من إتصال هذا غير ملامحك كلها

-عوف: انههضضض ولكك

-مصطفىٰ: خلي اكل قنااادر وفهمنييي شنييي الطرگاعة

عاااط بصوت رج المكان رج بيه ..

-عوف: شبيييك چنك چلببب تنببح انهضض وتعال وياااي

-مصطفىٰ: بالعباس ابووو فاااضل ولا اتحرررك خطووة اذا ماتگلي شنووو سالفةة المكالمة خااايب وعلي خرطت العافية گلبي طاح بين زروري !

مسح وجهة بسرعة واخذ نفسس وهز راسة بتوعد وعيونة صعدت لراسة گال بخبث

-هسسه اااجه وكتت الحگ الچنت رايدة من زماان ..

يتبع .....

للحكاية بقية ...

_______________________

شاركوني توقعاتكم ؟

حسابي بالانستا 👇🏻
rita.almukhtar