قيود عشك الشيخ

قيد الثاني عشر

وكفت جامدة هو يحجيها بكل برود حسيت روحي هانت علية ولا هامة كال الكلمة وراح عني لهل درجة هانت علية عشرتنة

سكتت التفتلي يباوع لتعابير وجهي ابتسمت وبينت الفرحة او اصطنعت الفرحة وحجيت بصوت مليان فرح::- اي

بهت بوجهي ودار وجها بسرعة وطلع من الغرفة كلها كعدت مهدود حيلي يعني شنو كلشي انتهى خلاص اذا رحت بعد ما اشوفة كلبي وجعني بس فكرت بهل موضوع ظليت اكثر من ساعة طلعت لكيتة نايم بالصالة

استغربت ليش نايم هنا??!! هو الراد هلشي وهو كال مرجعج لهلج اذن ليش ضايج وكالب وجها علية ظليت اباوعلة ومتنهدة نزلت لجوة ضوجة محد كلها نايمة

طلعت للحديقة لكيت ايسر لازم صورة ويحجي وياها ما سمعتة شكال بس "ليش"

تقربت من عندة بسرعة ضم الصورة بجيبة ابتسمت كعدت يمة ع الثيل وحجيت::- امك??

باوعلي وعيونة تلمع هز راسة باي::- عادي اشوفها?!

هز راسة باي وانطانياها تخبل امة كلش حلوة رغم ايسر ماخذ شخصية وضخامة عمة ثقيف بس العيون الزرك لامة ابتسمت::- حلوة

هز راسة مبتسم بغصة::- مشتاقلها?

باوعلي وجر حسرة::- هواي

::- ليش ما تروح الها

::- ما تريدني

حجاها وكام طلع ظليت اباوعلة واتبع نظراتي الة تنهدت شنو من ام عايفة ابنها وما تسال علية ولله المفروض تفتخر بايسر كونة ابنها وترفع راسها كدام الديرة كلها بس هي ينطي جوز للماعندة سنون

مليت والدنيا حارة الضهر صعدت لفوك الشيخ نايم دخلت للغرفة حاولت انام ما كدرت ظليت اتكلب بالغرفة

العصر سمعت صوت الشيخ جوة وصوتة عالي نزلت اركض جان يحجي وي الحجية ويكول::- يمة البت مو الي كوة هي البت ما توالمني يا عائلة تحجين عنها طفلة هاي طفلة اروح اكون عائلة وي طفلة

كعدت ع الدرج ابجي ودموعي تصب اردف بعصبية مفرطة::- يمة لا تكولين عندي انا عندي ولد ايسر ابني واليكول غير هل حجي دبارة عندي ابني ايسر وما ريد بعد جهال

جان صوتها ناصي ما ينسمع  بس هو محتركة روحة ومنفعل يعني لهل درجة ما يريدني

اشتعلت وانطفيت نزلت اركض من الدرج ودفعت الباب عليهم ودخلت تفاجئو بية والشيخ نصدم باوعتلة وحجيت ودموعي ع خدي::- جاااي تكووولل طفللةةة مووووو طططفلللةةةة انااااا اذااا طفففللةةة المممنننن خذتتووونييي يااااا شيييخخخ هاااا المممننن ماااا كلتتتووو طططفلللةةةة شلللووون تتتففاااررككك اهللهااا اححجييي ليشش ساااكتتت حرمتوني من اهلللي حرمتوني من اممميييي حرمتننييي منن دراسسستتتيي كلللييي عنن ايييي طفولة تحجي هااا اييي طفوولةةة لككك حتى طفولتي حرمتوني منهااا كبرتوني فوكك عمررريننن بعمررينن انهانييتت انظررررببتتت ما كلتوو طفففلةة اشتتتغل مثل الخدامة لللليييلل نههههااارر مااا كلتوووو طفلةةة واخررررر شيييي دمرتووو عافيييتتي خليتونيي اشوووف شغلااات اكبببررر مننن عمرريب ليششششش???? هاااا ليييششش شننووو السبب الييي اقترفتتتةةةة بسبب اخوووي موووو ليييششش ما جبببتتتةة وكعدتتتةةةة كبااالللكك وكتللللةةةة بوووويةوة شنننو الصار جااا مو دومك تحجي بالعدل وانت ماااا تظلممم احدد ليش ظلمتني وظلمت اخووي الف مرة كتلللكك اخووويي مووو مجررمم ومستتتحيييللل يكتلةةة شخخخصصص ليييشششش سااااكتتتتتت احححححججججييي احححجججييي

فقدت ظليت اضرب ع وجهي واكطع بشعري اجاني ملهوف لزم ادية وانا ابتعد عنة وانتر نفسي من بين اديه احتار شلون يرضيني

اخر شي دفعتة عني وكمت اركض للغرفة دخلت وسديتها علية انهاريت من كد المصايب النزلت علية حسيت نفسي انفجرت بعد ما عندي طاقة وكملها اليوم الشيخ من كال هل شي

ظليت قرابة الساعة انا كاعدة وابجي حسيت راسي انفجر لفيت نفسي ونمت وما اعرف شوكت وشلون مرن هل يومين بس طول اليومين هو ما اجة الا بيوم دك علية ايسر الباب وكال::- يكول ابوي خل تحظر روحها يلا

باوعت كلشي ما ماخذة كلشي عفتة مثل ما اجيت بطرك روحي راح اروح بطرك روحي هزيت راسي ولبست عباية ونزلت لجوة

جميلة والحجية كاعدات يبجن بالصالة رحت بسرعة حظنت جميلة وبجينا سوة ما حجن شي ولا عاتبن اكتفن بالدموع وهاي هي

سرمد وفتون واكفين وعلامات الفرحة باينة عليهم سرمد غمزلي بحقارة وضحك بشماتة خزرتة

ردت امشي ما احس الا اجرت عباتي باوعت واشوف اصيل ابن ساجد يبجي نزلت لجوة وابتسمت مسح دموعة وكال::- راح تروحين

::- اي حبيبي

::- ليش ترحين

::- لازم اروح حبيبي هناك اهلي

::- وانا يال يلعب وياي?

ابتسمت بالم::- شوف كلما تريد تلعب كول لايسر او عمو يجيبك الي ونلعب

ابتسم بفرح::- صدك اجيج يعني

::- اي تعال

بعدني جاي احجي وياه انسحب من ايدي رفعت عيوني لكيت ساجد يجر بابنة رغم ابد ما بدر مني موقف مو حلو وياه ودائما احترمة ومن تروح مرتة اصبلة واغسلة ملابسة بس ما اعرف ليش ما يطيقني حتى بالجذب الله وياج ما كالها

هو انا طلعت من البيت بس بجميلة والحجية وايسر رحت للطارمة واتفاجئ عمة حميد ابو سلام وسلام واخو الجبير لسلام والشيخ وواحد جبير هم ما اعرفة هاي كلهم رايحين وياي?!!

التقت نظراتنا اني وشيخ دنكت عيوني عنة ومشو هم وانا مشيت وراهم انا والشيخ وسلام وعمة بسيارة والباقين بسيارة ثانية حتى ايسر راح ويانا

طول الطريق وانا خايفة شراح تكون ردة فعل اهلي بين الفرحانة الطايرة من الفرح اهلي راح اشوفهم من بعد غياب سنة وبين الخايفة وكلبي يرعد ما اعرف شنو راح يكون اسقبالهم سلام يسوق وابو يمة وانا والشيخ ورة التفتت لجهتة لكيتة يباوعلي بس التفتت دار وجها عني

لزمت ايدة حيل التفتلي فاز  بسرعة ويباوعلي بشنو شبيج تقربت يمة وكعدت ابتسمت بالم::- ليش ما ودعتني

ابتسم وظل يباوعلي ساكت غصيتي بكلمتي واردفت وصوتي رايح::- بعد ما اشوفك

عصر ايدي حيل نزلت دمعتي::- انتي الرايدة هلشي بوية ما جابرج انا

::- انت الكلت مصيرج ترجعين

ابتسم بحزن ودار وجها انقهرت شو لافها عليه خلاني انا الطلبت من اروح حجيت::- شبيك شيخ

باوعلي وانا اباوعلة بعدم اهتمام::- ما بية شبية قابل

::- انت الطلبت وانا النفذت بعد عليش ضايج مني

تنهد وباوع لعيوني وابحر بيهن وحجة::- باردة عيونج عليه حارك روحي ليش?!

كالها واندار وفلت ايدة صفنت ونزلت دموعي وكل الطريق بعد ما جمعنا حديث وصلنا لبغداد وانا اباوع الها ودموعي تصب بحزن وبفرحة

طلعت من عندج مكسورة وغصوبة ورجعتلج هم مكسورة ومجبورة شنو سالفتج وي الحزن بغداد

دخلنا لمطقتنا وانا الخوف تملكني ورجف كلبي ظليت اباوع من الجامة تعديت ع مدرستي وضحكت ونزلو دموعي وانا اتذكر شلون جنت اروحلها وشلون احل وكصيبتي وراي وفرحانة دخلنا بفرعنا ولزمت كلبي الرجفة اعتلت جسمي

باوعت وانصدم بابة واكف وعمي ولد عمي وكم شخص واكفين ومسلحين الخوف دخل كلبي وخفت نزلنا وانا الرجفة بية باوعت محد يمي حسيت بايد ورة ضهري التفتت الشيخ ابتسمت حجة

::- لا تخافين انا بضهرج امشي بوية

نزلو دموعي ع حنيتة وموقفة هذا وفعلا مشيت وهو يمشي بجانبي وصلو لهناك وانا واكفة خايفة ابوي وعمامي يخوزرون بية كلبي حسيتة وكف حايرة اروح اسلم لو ابقى واكفة بمكاني تقربلي الشيخ وهمس

::- روحي سلمي

هزيت راسي وتقدمت مترددة خطوة اتقدم وارجع عشر خطوات لورة وصلت يمة شمرت روحي بحظنة وبجيت ما رفع ايدة وما حتى بادلني الحظن حسيت بفشلة وكلبي وكع اتفشلت كدامهم هم ذولة الاهل الكتلت روحي عليهم

ابتعدت مدنكة راسي بخيبة رفعت عيوني وشفت الشيخ يباوعلي وكانو بنظراتة يكول محد حنين كدي عليج هم ذولة العفتيني علموددهم دنكت راسي اردف ابوي بهمس

::- ليش راجعة

رفعت عيوني الة مصدومة باهتة صار سلام حار بين الطرفين دخلو للديوان وانا رحت بسرعة اهرول لباب اهلي ادك عليها وفرحانة وابجي واصيح::- يمة فتحي الباب يمة هاي انا اجيتج

انفتحت الباب وشفت فاطمة واكفة ودموعها ع خدها شمرت روحي بحظنها ابجي وهي حاظنتني وتبجي وياي ظلينا هواي واحنا واكفين سوة ونبجي

سمعت صوت::- يمة زهرة

ابتعدت عن فاطمة واشوفها اي ولله هاي امي هاي حبيبتي امي ركضت الها ودموعي تصب::- ابوس بيها واحظن بيها وابجي مفرفحة ما مصدكة هاي امي الكبالي

روحي طلعت وانا احظن بيها وكلساع اوخر ابوسها باديها وبوجها وبراسها ونبجي ثنينا انتبهت لزينب اختي هم واكفة ومصدومة بس ما تبجي تقربت الها بسرعة حظنتني حظنتها باوعت بسعاد مرت ابوي واكفة وكفت سلمت عليها وبوستها

::- شلونج خالة

::- هلا خالة هلا اكولن خالة ليش عافوج بس لا لكو اخوج

هزيت راسي ب لا ما لكو حجت::- اشوة عبالي لاكي

حجت فاطمة::- بعدين الحجي يمة دخلو دخلو لجوة

دخلنا لجوة كعدت وامي مكعتها يمي وكلساع تجرني وتحظن وتبوس بية باوعت خواتي الباقيات ما هنا سئلت عليهن كالن تزوجن سكتت

ظليت كاعدة وامي تسئل عليهم وانا لكيت روحي امدح بيهم كدامهن وابد ما نطيت بيهم وحتى ما جبت طاري فتون او اي احد كلت خلاص هم بعد صفحة وانطوت وما اطلعهم بالموزين واخليهم يحجون عليهم بالعكس رفعت من شانهم ومدحت بيهم

اجانا طفل ما عرفتة كال::- يردون زهرة بالديوان

توترت وارتبكت هزيت راسي وكمت وياه لزمتني امي وحجت::- يمة مدامج تحبين رجلج لا تعوفينا وانتي كلتي خوش وادم يمة المن راجعة للضيم

صفنت بوجه امي حجيت::- يمة هو ما يريدني

سكتت وانا رحت وكلام امي براسي لو متمسك بية ومكملين حياتنا سوة لو ولو والف لو بس بعد ما يفيد هاي النهاية بعد

وصلت للديوان وسميت واخذت نفس وانا شريط حياتي وانا والشيخ كلة مر علية من اول يوم لحد ما افترقت نظراتنا ودخلت لبيت اهلي نزلو دموعي مسحتهن واخذت نفس وزفرتة ودخلت مرتبكة

::- السلام عليكم

::- وعليكم السلام ورحمة الله وبركاتو تعاي بوية حدري هين

رفعت راسي ع مصدر الصوت لكيت رجال الي اجة ويانا هو اليحجي كاعد يم الشيخ رحت بخطوات مهزوزة كعدت يمة صار بالنص بيني وبين الشيخ

كام يقرة ايات ويحجي وينصح بس ثنينا ساكتين ثنينا نريد واحد يبادر وتطلع من عندة كلمة ما اريد

باوعتلة ونزلو دموعي من شافنا الشيخ مصرين ع قرارنا تنهد وكال للشيخ::- باوع لعيونها وارمي يمين الطلاق

باوعلي وعيونة لمعن::- انتي طالق

نزلو دموعي بالم وغصة صارت بكلبي خلاص يعني خلاص ماكو شي بعد يربطنا كامو وانا بعدني واكفة استوعب الصار

رفعت راسي اباوعلهم والشيخ حميد كال::- انا ردينا بتكم بس ابنكم وين ما نلكاه دمة مهدور

سكتو محد حجة باوعت بخوف للشيخ وعيوني فاتحتهن غمض عيونة واشرلي براسة بكلمة ما عليج بالكلام هزيت راسي بالم وابتسمت الة اتشكرة بنظراتي ودموعي تصب

حجة ابن عمي نايف::- طلكها بالثلاث

باوعلة الشيخ بستهزاء ودار وجها ومشة عنة كلهم طلعو انا اباوع وراهم ودموعي تصب

طلعت مختنكة اريد اجر النفس ما اكدر ظليت اكح واكح اريد اتلاكف الهوة ماكو تقيئت وطلعت روحي وانا بباب البيت مالتنا انفتح وطلعتلي فاطمة تركض جرتني دخلتني لجوة وكعت من طولي رجلية صايرات خيوط ابجي وانفاسي ما منتظمة كوة اجر النفس وارجف

اجت امي تركض ع اصواتنا كابلتني وكامت تبجي اجت زينب كومتني وغسلت وجهي ودخلت لجوة الشهكة لازكة ببلعمومي

كلما اتذكر خلاص بعد ما اشوفة روحي تطلع ما اعرف شبية هو هم ضاج هم راح يشتاقلي اذا بعد سنين التقينا هم يعرفني يتذكرني من يصفن كلها مرن ع بالي وانا افكر

دخل ابوي وعمي ونواف ابوي باوعلي بخزرة وكعد تفاجئت حتى كلمة حلوة ما كالها الي ولا اشوف نظرة لهفة بعيونة صدمني عمي من كال::- المن رجعتي?

ظليت ساكتة صافنة بوجوهم حجت امي::- ع بختك ابو نواف البت ما تكدر تحمل بيت وعيال ورجل

عاط بيها ابوي مسكتها::- اسكتي انتي من لا بارك الله بيج وبفروخج كل واحد مربيلي علة شكبرها ما الله ياخذهم وارتاح ويخلصوني احنا جاي نلعب بت الكلب جاي نلعب شنو معناها تجين مطلكة لبيتي تردين تنزلين راسي

جان يحجي ويتقدم باتجاهي يريد يفترسني صارن فاطمة وزينب ونواف مقابيلة وانا مصدومة والغصة استوطنت كلبي

كومتني امي وهي ترجف ودخلتني للغرفة نزعت شيلتها ولطمت ع صدرها::- صخام الصخمج يزهرة خايبة المن رجعتي المن وانا مكيفة تخلصتي من هل ضيم المن رجعتي كونة رجلج زين وياج ليش عفتي من دهر صابج

بجيت بقهر بالم بوجع صعبة حيل صعبة اهلي الي كتلت نفسي عليهم ما يردوني اهلي الي عفت اطيب واحن شخص علمودهم ما يردوني حسيت نار بنص كلبي

توالت الايام والايام صارت شهور الوضع نفسيتة امي تحاول قدر المستطاع تبعدني عن ابوي وما تخلي يشوفني لان بس يشوفني يكضي بية التوبة ويكوم البيت ويكعدة ع روسنا

جنت كاعدة بالطارمة وبالي سرحان بغير وادي اليوم مرن شهرين وانا عد اهلي الشوك كاتلني وانا هنا اريد بس خبر عنهم لو حتى طيف

روحي مفرفحة تفرفح عليهم اجتني فاطمة كعدت يمي::- ها زهرة

::- ها

::- ادخلي راح يجي ابوي

بلعت غصتي وحجيت::- اي

كلعادة ابوي ما يقبل يشوفني ولا يريد يسمع صوتي بالبيت ومرة جنت احجي بغرفتي وي فاطمة وهو سمع صوتي تخبل وكام يصرخ ويريد يجي يضربني وامي ما بيدها شي كل عادة بس تبجي

دخلت لجوة بروح مسلوبة تعبانة ومشتاقة للشيخ حيل مشتاقة الة اريد اعرف هم يذكرني هم يكول شنو اخبارها اجة الشيخ وانا بالغرفة اسمعة يكول للبسعاد::- خوش وادم وخيرة وعدهم املاك خلي ننطيها

وبسعاد تجاوبة بفرح::- اي خل يجن النسوان ونشوف

كلبي وكف عبالي ديحجون علية بس طلعو يحجون عن زينب خاطبيها من ابوي زينب فرحت حيل وطارت من الفرح استغربت حالتها وفرحها

جريت فاطمة وحجيت::- اكول اشو اختج فرحانة شدعوة

::- يختي الواحدة بينا تتمنى هسة تزوج ولا تبقى بهذل الضيم ما تشوفين ابوي يكومنا بكفخة ويكعدنا بكفخة خليها تزوج وتروح عنهم احسن

صفنت افكر بكلامها لهل درجة ابوي ما حاوينا زين ليش شنو السبب بس لان احنا بنات?!! شنو ذنبنا صفنت وقارنت بين تصرفات الشيخ وي جميلة رغم مطلكة بس ابد ما حسسها بهل شي ومعتمد عليها كانها هي ام البيت

وابوي رغم احنا بناتة طالعات من روحة هيج يعاملنا سكتت وانا اشوف فرحة زينب دخلت لجوة واختنكت بعبرتي::- شيخي محتاجتك تعال لو عندي ذرة معزة بكلبك تعال وخلصني

بجيت بقهر وبيوم جنا كاعدين وبسعاد دخلت جانت طالعة اجت وكالت::- اكو معمل مال تعليم خياطة اسجلج انتي وفاطمة بي تتعلمن

فرحنا اني وفاطمة ورحبنا بالفكرة بس العائق هو ابوي شلون يقبل المهم كالت بسعاد ما عليجن بالبوجن انا اقنعة

زينب عقدت والشهر اليجي زواجها ماكو احداث تستحق الذكر بهاي الفترة غير شوقي المفرط للشيخ وحنيتة علية

جنت دائما اسولف لفاطمة لساعات نظل نحجي واتذكر سوالفنا ونضحك سوة وبعدين اظل ابجي وتبجي وياي

وبيوم جنا كاعدين واجت بسعاد طايرة وكالت ابوجن وافق........يتبع

الـنـهـايـة 🌚❤️

الكاتبة شوك 🧚‍♂️❤️

الفاتحة ع روح المرحوم عبد ابن هدية يرحمكم الله💔💔

اقرو الفاتحة واهدوها لروحة واكون ممنونة منجن 💔