بعد ما البيان خلص أنا و لؤي كنا بنصور من داخل قاعة الصداقه :
حسب البيان الذي قدمته الشرطه السودانيه ، هنالك 5 شخصيات مشتبه بهم و الآن جاري التحقيق معهم إلى أن يكشف الفاعل و يقدم للعداله ....
بعد خلصنا تصوير لؤي قال لي شكلو الموضوع دا مطول !! قلت ليهو شكلو كدا ، المهم لمن طلعت مشيت لـ خالتي في مكتبها ، قلت ليها يعني أنا متأكده إنو الشرطه أدرى مننا بتفاصيل القضيه دي ! معقوله لحد اللحظه ما قادرين يعرفوا القاتل !! قالت لي قضايا زي دي بتاخد وقت ، أنا متمنيه في الآخر إنو المجرم يتعاقب ، قلت ليها لو بدونا فرصه معاهم برانا بنمشي نحقق في القضيه ، قالت لي على فكره الشرطه سابقانا بمية خطوه و كل الخطوات القمنا بيهادي من مقابلة مؤتمن صاحب عماد و غيرو هم عملوها من زمان و أكيد حققوا مع ناس ما خطروا على بالنا أساساً ، زي أهل عماد الفي البلد ، مثلاً آخر مره اتكلموا معاهو متين ، كانوا برسلوا ليهو قروش ولا لا ، شغال شنو و وين و مع منو ، سكان العماره كمان و البواب ، بتاع البقاله ، دفعتو و دكاترتو في الجامعه ، ستات الشاي البشرب جبنه عندهم بعد يطلع من الجامعه و أي مكان كان بمشي ليهو مع شلتو ، و دا غير الكاميرات و الأدله الفي تلفونو و ما تنسي كمان أنهم بقدروا يتصنتوا على مكالماتو و يعرفوا آخر و أول اتصال كان مع منو و انقال فيهو شنو ، المهم أنا متفائله جداً و متأكده إنو البيان الجاي حيكون آخر بيان بالنسبه للقضيه دي ، قلت ليها ان شاء الله ، المهم بعدها هي بدت تشوف في الصحف الورقيه و الإلكترونيه ، كانت تحت كل عنوان بتحسو مهم أو مريب بتعمل خط أحمر تحتو ، أما أنا فكنت بتصفح و بتنقل من فيس لـ واتس لـ تيك توك و هكذا ، لمن دخلت الواتس إتطلعت على الرسايل كلها ، لاحظت إنو ناصر خاتي إستوري لمن فتحتها كانت صورتو هو و دانه من المكتب ، كاتب عليها : دندون غلبتني يخوانا إتفرجت على باقي الإستوريهات ، بعدها طلعت من الواتس و قلت لخالتي أنا حأمشي بعد دا ، قالت لي لو ما عندي شغل كتير كنت حأوصلك ، قلت ليها عادي ولا يهمك ، المهم طلعت منها و قلت المره دي حأركب مواصلات عديل ، طولت ما ركبتها ، المهم مشيت ركبت المواصلات ، قعدت جنب الشباك و بديت أراقب في الناس ، الشوارع ، البيوت ، الشجر ....بحب التفاصيل ، بحب بساطتنا السودانيه ، بقيت أردد في نفسي شعب بسيط و جميل زي دا والله ما يستاهل إلا كل خير و البوجع أكتر إنو نحنا عندنا ثروات لكن دولتنا فقيره ، عندنا موارد لكن ما قادرين نستغلها و ما عارفين ذاتو نستغلها كيف ، عندنا مناطق سياحيه بس ما قادرين نروج ليها و نجلب السياح ، فكرت مع نفسي و اتذكرت إني كنت مقرره إنو أطرح فكرة برنامجي لخالتي ، عايزا أعمل برنامج أعكس من خلالو مناطقنا السياحيه و ألف فيهو كل السودان ، بتذكر إني كلمت لؤي بفكرتي دي قال لي قدااام و أنا معاك فـ تاني إنشغلت بس ما نسيت الفكره....
طبعاً سيد الحافله كان مشغل أغنية "نيلك أرضك زرعك ناسك أصلك فرعك ، بحبك مما قمت ...بحبك حتى الآن بحبك يا سودان " فـ بس بقيت مستمتعه و أنا بعاين بالشباك ، فجأة واحد من الناس القاعدين في كراسي النص انتنفض و بقى يقول تلفوني وووين !! تلفوني و قروشي وين و بتلفت حوليهو ، الناس كلها إتخلعت ، واحد قال ليهو كدي قول بسم الله قروشك و تلفونك انت كنت خاتيهم وين ؟؟
قال ليهو في جيبي الورا ، وحده قالت ليهو غلطان والله في زول بخت قروشو و تلفونو في الجيب الورا !!هو لو ختيتهم قدامك بسرقوهم منك لمن تختهم في جيبك و الورا كمان !!! قال ليهم ما بعرف بس الحرامي دا قاعد معانا هنا ، واحد طلع تلفونو و قال ليهو مليني رقمك ، فعلاً ملاهو رقمو و اتصل في التلفون بس لقاهو مقفول ، الراجل عمل جوطه كبيره و قال لبتاع الحافله ودينا أقرب قسم شرطه ، طبعاً أنا أعصابي تلفت لأني ما حصل إتختيت في موقف زي دا ، طلعت تلفوني ، ما بنكر إنو ناصر خطر على بالي بس بسبب آخر موقف و بسبب انو قبل كدا قال لي أنا ما بحب اقول عنك مرتي ما إتصلت عليهو ، قلت ماف داعي أدخلو و اشاركو بأي حاجه بتحصل معاي و أنا قبل كدا قلت ليهو لو حصلت معاي مشكله ما حأكلمك و ما حأدخلك في مشاكلي.....المهم اتصلت على زيدان كتير بس ما رد علي ، بقيت أحاول في تلفونو لحد ما وصلنا القسم و نزلونا ، لحد اللحظه ديك كنت بتصل عليهو و كان واضح إني خايفه و متوتره و توتري زاد لمن الراجل الإنسرق منو التلفون و القروش بقى يعاين لي ، المهم هو و بتاع الحافله مشوا و بقوا يتكلموا مع العسكري ، لمن جوا وبدوا يفتشوا الناس بالدور أنا تاني إتصلت على زيدان لمن ما رد علي إتصلت على رشا طوالي ، أول ما ردت علي قلت ليها يا رشا زيدان دا وين ؟؟
قالت لي في الشغل ، مالك في شنو صوتك دا عامل كدا ! قلت ليها بتصل عليهو و ما برد ، قالت لي في شنو يا مها ما تقلقي بي ، قلت ليها أنا في قسم الشرطه ، قالت لي شنوووو ، قسم شرطه !! الوداك هناك شنو ، قلت ليها بوريك بعدين المهم ألحقوني هسي ، قالت لي طيب في أي قسم ، سألت المره الجنبي فـ ورتني اسم القسم و طوالي كلمت رشا ، المهم فتشوا الناس القدامنا و كلهم رجال ، بقينا 7 نسوان ، وحده قالت ليهو أنا بديك شنطتي و أكياسي تفتشهم لكن إياك تقرب مني مستحيل أخلي راجل يفتشني ، بقى ينادي و يقول رشيده يا رشيده ، جات مره فقر كدا واضح من وشها ، قالت ليهو أيوه قال ليها دخليهم جوه و فتشيهم ، تااااني إتصلت على رشا ، قالت لي كلمت أبوي و قال حـ يجيك هسي ، قلت ليها طيب ، المهم اثناء ما نحنا داخلين جوه تلفوني رن ، افتكرت إنو حيكون أبوي بس طلع ناصر ، قبل ما أرد المره جرتني من يدي و التلفون وقع مني ، البت الوراي رفعتو لي ، المره بعد ما فتشتني شالت شنطتي فتحتها و بقت تفتشها ، فجأه كدا طلعت ربطة قروش و تلفون ، نادت العسكري و قالت ليهو لقينا الحراميه ، طبعاً دموعي نزلت عشره عشره ، بقيت أشيل و أحلف ليها إني ما سرقتهم ، خلوا باقي الناس يمشوا و أنا قالوا لي اتفضلي معانا جوه ، البت قبل ما تمشي رجعت لي تلفوني و مشت ، كان في اتصال من أبوي ، رديت عليهو و أنا ببكي و طوالي حكيت ليهو الحصل ، قال لي أديني العسكري دا ، فعلاً مديت ليهو التلفون ، شالو و مشى بعيد تاني جا راجع و قال لي برضو ما حتطلعي طوالي كدا ، أبوي قال لي ما تخافي أنا قربت عليك ، الراجل صاحب التلفون قال لي مع إنو ما باين عليك انك حراميه بس خوفك القبيل داك شككني فيك ، قلت ليهو ما عارفه وصلوا شنطتي كيف بس أنا اقسم بالله ما سرقت منك حاجه و بعدين انت ذاتك ما كنت قاعد جنبي و في كرسي فاصل بيناتنا فـ كيف سرقتك ؟؟!! قال لي السرقه إحتراف ، المهم دخلوني جوه و بقوا يحققوا معاي ، فجأه ناصر إتصل علي ، رديت عليهو و أنا صوتي راجف ، قال لي مها كويسه انتِ ؟ قلت ليهو أيوه ، قال لي أنا جاي عليك ، قلت ليهو أبوي قريب حـ يجي هسي ، لو انت بعيد ما تجي ، ما قال حاجه قفل الخط بس ، المهم بعد دقيقتين كدا أبوي جا ، من شفتو طوالي جريت عليهو و قعدت أبكي فيهو ، أبوي دخل ليهم جوه و بقى يتكلم معاهم ، جاط فيهم شديد قال ليهم هُبل انتوا ولا شنو ، يعني عشان لقيتو المسروقات دي في شنطتها معناهو هي حراميه ؟؟ عاينوا ليها كويس شكلها دا شكل حراميه ؟؟ أنا بتي ما بتمد يدها على حق زول ، ما عندي ولد أو بت بسرقوا ، أولادي أساساً ما محتاجين شي عشان يسرقوا و قريشاتكم دي لو عايزين أنا بديكم مية ربطه زيها ، قلت ليهو يا أبوي أنا ما عارفه التلفون و القروش ديل وصلوا شنطتي كيف ، العسكري قال لي انتِ أديتي شنطتك لـ زول ؟؟
قلت ليهو لا كنت خاتاها في رجليني و لمن نزلنا كنت شايلاها ، أبوي قال لي واضح إنو في زول ختاهم ليك في شنطتك ، بس فجأه اتذكرت المره القبيل !!....عاينت لأبوي و قلت ليهو قبيل لمن كنت بحاول اتصل على زيدان في وحده كانت واقفه يميني و كانت قريبه شديد مني حتى إني سألتها نحنا في أي قسم و ورتني ، عاينت للراجل و قلت ليهو دي نفسها المره الكانت قاعده جنبك و نفسها القالت ليك غلطان والله في زول بخت قروشو و تلفونو في الجيب الورا ، أبوي قال لي بسسس معناها دي هي ، عاين للعسكري و قال ليهو انتوا ذاتكم لو ما أغبياء ما كان خليتوا الركاب كلهم يمشوا قبل ما تحققوا مع المتهم ، العسكري قال ليهو كدي أبرد يا حاج ، قال ليهو ما ببرد ولا زفت .... طبعاً أبوي كان هايج شديد ، بعد جوطه طويله عريضه صاحب التلفون قال لينا يخوانا حصل خير و خلاص بقى واضح انو البت دي ما سرقتني ، واضح انكم ناس محترمين ، و الحمدلله أنا تلفوني و قروشي رجعوا لي و حسبي الله ونعم الوكيل في الكانت السبب ، المهم بعد مسافه كدا طلعنا من القسم و أبوي لسه كان جايط ، قلت ليهو أبوي خلاص روق ما تضايق نفسك عشان الضغط ، والله للسبب دا انا نهاي ما فكرت أتصل عليك ، عارفاك بتزعل و بتغضب شديد ، قال لي ياخ ديل ناس عواليق ، يسرقوا و يرموا عملتهم في غيرهم ، المهم أثناء ما نحنا واقفين جنب عربية أبوي و أنا بتكلم معاهو ، جا ناصر بعربيتو ، نزل و سلم على أبوي و سلم علي ببرود و من دون ما يعاين لي ، قال لأبوي الحصل شنو ؟؟ أبوي طوالي قعد يحكي ليهو ، طبعاً كل ما يتكلم بزهج و بتضايق زياده ، قلت ليهو أبوي خلاااااص هدي نفسك حصل خير !! قال لينا خلاص انتوا أمشوا انا راجع البيت ، قلت ليهو طيب ، ودعنا و ركب عربيتو و مشى ، ناصر قال لي يلا ، ركبنا و إتحركنا ، طول الطريق كنا ساكتين ساي ، لا سألني عن تفاصيل الحصل لا أنا حكيت ليهو ، فجأه تلفوني رن ....كان زيدان ، قال لي يااا بت في شنو لقيت دشيليون مكالمه منك ! قلت ليهو انت تلفونك دا جادعو وين من قبيل بتصل عليك ، قال لي كنت في إجتماع و التلفون صامت في شنو ؟؟؟
طوالي حكيت ليهو الحصل ، قال لي شنووو ، قلت ليهو ما تخاف أبوي جاني و هسي راجعه البيت ، قال لي هسي كويسه انتِ ؟؟ قلت ليهو كويسه كويسه يا زيدان ، قال لي عشان كدا لقيت مكالمه من رشا ، والله التلفون كان صامت ، قلت ليهو زيدان ولا يهمك المهم أبوي جاني و الموضوع انتهى ، قال لي طيب راجعه بيتنا ولا وين ؟؟ قلت ليهو لا ، قال لي راجعه بيتك مع منو ؟؟معاك ناصر ؟؟ قلت ليهو أيوه ، المهم بعد قفلت منو عاينت لـ ناصر لقيتو مركز مع سواقتو ، كأنو ماف زول راكب معاهو ، قلت يمكن هو بالجد ما بهمو البحصل معاي ، المهم وصلني البيت و ما نزل ، قلت ليهو ما نازل ؟؟ قال لي لا راجع شغلي ، قلت ليهو طيب دانه وين ؟؟ قال لي في الشركه مع الحاج .... طبعاً كان بتكلم معاي من دون نفس ، دخلت البيت و طوالي رشا اتصلت علي ، أول ما رديت عليها جاني صوت أمي ، قالت لي الحصل شنوو و دا منو الوداكم القسم و في شنو و هسي انتِ وين و أبوك جاك ولا لسه و و و ، قلت ليها يا أمي كدي أخدي نفس ، قالت لي اختك خلعتني والله انا دي دخلتي البيت ، قلت ليها رشا دي واااي أنا منها ندمتني لأني اتصلت عليها ، المهم حكيت لأمي الحصل ، قالت لي حسبي الله ونعم الوكيل في السرق و ختى التهمه فيك ، قلت ليها مشكله و إنحلت ، قالت لي أبوك وين هسي ، معاك !؟ قلت ليها لا لمن كنا في القسم ناصر ذاتو جا فأنا مشيت مع ناصر و أبوي هسي في الطريق أكيد قرب للبيت ، قالت لي هدا ليهو جا داخل ....قلت ليها تمام ....المهم بعد قفلت منها حسيت نفسي متضايقه ، ملامح وش ناصر و زعلو ما مريحين قلبي ، حسيت زي الكأني عملت ليهو حاجه ، المهم بعد ساعه كدا رتاج اتصلت علي ، قالت لي بعد شويه برنامجي حـ يبدا و اتخيلي ضيف الحلقه منو ؟؟ قلت ليها منو ؟؟ قالت لي علي الشيخ ، فناني المفضل ، قلت ليها اهااا بالتوفيق ، قالت لي دقيقه صوتك دا مالو كدا ؟؟ قلت ليها ما تشغلي نفسك ، قالت لي لا حابه اشغل نفسي ، أخدت نفس و حكيت ليها الحصل معاي ، قالت لي وااااي مبالغه ! لكن
أبوك ما قصر عجبني إنو شاكلهم و جاط فيهم ...قلت ليها ايوه....قالت لي طيب مالك ؟؟
قلت ليها مالي ؟؟
قالت لي صوتك دا ما عاجبني ، قلت ليها رتاج أمشي البرنامج حـ يبدا بعد دا ، قالت لي أول ما أخلص حـ اتصل عليك ، قلت ليها طيب ، قالت لي بالمناسبه شايفاكم انتِ و ناصر بقيتوا تريند ، صوركم منتشره في الفيس و التيك توك و الإنستقرام ، أعوذ بالله منهم ما يقوموا يدوكم عين كمان ، قلت ليها من حلاوة علاقتنا و قوتها ؟؟!
قالت لي هييي شكلك عندك كلام كتير ، بخلص و بجيك في البيت عديل ، قلت ليها طيب منتظراك ....
___________________
يمكن من أكبر مشاكلنا أنا و مها إننا ما بنتفاهم مع بعض و كل واحد أعند من التاني بس هي غير إنها عنيده ما بتتنازل و بتتصرف من عندها ، أيوه يمكن نحنا ما بنطيق بعض أو ما متقبلين بعض بس بما إننا بقينا متزوجين فـ غصب عننا مضطرين نتعامل مع بعض ، غصب عننا في حاجات مفروض نشارك فيها بعض ....أنا ما قاعد اتدخل في حياتها و هي نفس الشي لأنو دا إتفاقنا من البدايه ، بس لمن تقع في مشكله أو تحتاج مساعده مفروض تتصل علي و تكلمني ، حسيت نفسي زي الغريب لمن ما فكرت تتصل علي أساساً! اتصلت على أخوها كذا مره و ما خطر على بالها تتصل علي مره وحده بس و لمن إتصلت عليها ما ردت علي و تلفونها كان مشغول يمكن لأنها كانت بتتكلم مع أبوها ، حسيت نفسي محرج و قدر السمسمه و أنا واقف جنب أبوها ، ختتني في موقف بايخ شديد ، كونها تتصل على ناس بيتهم كلهم و تستنجد بيهم و أنا المعرسه ما تعبرني دا عدم إحترام للبينا و عدم تقدير لي أنا ، مع ذلك نفسي ما سمحت لي أخليها حتى بعد ما عرفت و اتأكدت من إنو أبوها حـ يصلها ، كتر خير أختها العبرتني و أدتني خبر ، خليت الوراي و القدامي و قمت جاري عليها و هي بكل بساطه قالت لي أبوي جاي علي لو بعيد ما تجي !! يعني يمكن لو ما حست بالحرج كانت حتقول لي ما تجي أساساً !!
أنا أصلاً زاعج نفسي و مضايقها على الفاضي ليه ؟؟ عنها ياخ ما عايزاني أتدخل في حياتها فـ هي حره...... أ
نا أعند منها ما لاقيت ، شخص عديم مبالاة زيها خالص ما لاقاني !!....أول ما وصلت الشركه توته اتصلت علي ، ما كان عندي مزاج أرد على مكالمه أو اتكلم مع زول ، دخلت مكتبي و قفلت الباب ، قعدت على الكرسي و أخدت نفس عميق و بقيت أقلب في الملفات القدامي ، لحد اللحظات ديك توته لسه كانت بتتصل ، رديت و قلت ليها أنا ما فاضي هسي و على طول قفلت الخط و هي ما رجعت إتصلت تاني ....
بعد هديت شويه إتصلت على السكرتيره و طلبت منها تجيب لي دانه من أبوي ، فعلاً مشت و جابتها لي قالت لي لو مشغول خليها معاي أنا بحب الأطفال ، قلت ليها لا ما مشغول شكراً ، قالت لي طيب ، شلتها منها و هي طوالي طلعت ،
الحاح جا داخل و قال لي البت دي الليله شغلت الشركه كلها ، من قبيل تبكي قالت عايزاك و دا غير الفوضى العملتها ، السكرتيرات الله يديهم العافيه تعبوا معاها كل مره مودينها الحمام و جايبنها عشان كدا البت دي الليله قبل بكرا يا ناصر رجعها لأمها ، نازك دي لازم تتعلم تتحمل مسؤولية أولادها و بيتها ، النسوان ديل كلهم ولدوا و كبروا أولادهم عن سكات هي مالا ما مره !؟ قلت ليهو خلاص بشوف حل للموضوع دا يا أبوي ، المهم اول ما طلع إتصلت على نازك ، قالت لي دانه عملت غلبه ولا شنو ؟! قلت ليها أكيد هسي أنا جايبها معاي الشركه ، عامله إزعاج و فوضى كبيره ، ضحكت و قالت لي أصلها مشاغبه قلت ليها بعدين حـ أجيبها ليك ، قالت لي يا ناصر تجيبها لي شنو انت عارف محمد ماف و أنا بمشي الشغل و بسوق معاي مؤيد ، يعني عايزهم يبقوا لي دانه و مؤيد !! والله الإتنين حـ يجننوني ، سكته ما قلت ليها حاجه ....قالت لي انت أخوي ما راضي تمسكها لي الغريب حـ يمسكها ؟؟ قلت ليها ديل ما غربا ديل أهلها........قالت لي صح ديل جدها و حبوبتها و عماتها و أعمامها بس والله كل واحد مشغول مع نفسو و أولادو ، أولادي ديل لو واقعين قدامهم على الأرض و ببكوا بأعلى حس زول بجيب ليهم خبر ماف ، لاحظ إني جبتها ليك انت عشان عارفه إنو انت و مها شغلكم ما ضاغط شديد هي عادي بترجع الصباح و مرات نص النهار و أنت كذلك ، يعني في أسرتنا كلها انتوا أكتر اتنين شغلكم ضغطو خفيف ، اتحملني الفتره دي بس لحد ما أجيب ليهم مربيه ، قلت ليها لا خليها طيب ، قالت لي شكرررا شديد ليك يا ناصر.....
قفلت منها و أنا عارف كويس إنو نازك مستهبله و غير مسؤوله و مهمله شديد بس الأطفال ما ليهم ذنب ، أنا متأكد إنو لو رجعت ليها دانه حـ تهملها و يمكن تجيب ليهم مربيه هي و مؤيد أخوها و أنا صراحة ما بضمن المربيات ديل عشان كدا الأحسن دانه تفضل معاي لحد ما أبوها يرجع من السفر....
قعدتها قدامي في المكتب و بقيت أصورها و هي تضحك ، قالت لي صورني صوره سمحه ، ضحكت و قلت ليها حااااضر يا دندون ، صورتها و ختيت صورتها بروفايل على الواتس و ختيتها في الإستوري و كتبت عليها : دي الحاجه الوحيده المصبراني على الحياة دي 💜
نازك ردت علي في نفس الدقيقه و قالت لي مفروض تشكرني لأنو بتي محليه حياتك 😂 قلت ليها مرات الحلاوه الزايده بتعمل سكري ، قالت لي المهم بوووس لي دندون دي ، بعدين لو طلعت بدري. من الشغل حأجي أشوفها ، قلت ليها تمام ...قبل ما أطلع من الواتس وصلتني رساله من مها ، دخلت شفتها في نفس اللحظه الرسلتها لي فيها بس إستعجلت و حذفتها بس كانت ظاهره عندي ، كانت كاتبه : مصطفى أنا لازم أشوفك ضروري ...ماف زول خطر على بالي غير مصطفى الكان صحبي لأني قبل كدا شفتها معاهو في مطعم ، ايوه ما كانت براها بس أكيد هي قاعده تتعامل معاهو ....مزاجي إتعكر أكتر ، قفلت الشبكه و طلعت من الواتس ، شلت دانه و طلعت من مكتبي مشيت مكتب الحاج و كلمتو إني طالع ، المهم أخدت دانه و طلعت بيها ركبتها و بقيت لافي بيها بالعربيه ، وقفت سواقه لمن تلفوني رن ، كانت توته ، أخدت نفس عميق و رديت عليها ، كانت بتبكي ، قالت لي بقيت بتسفهني يا ناصر و أنا ما حصل عملت حاجه ضايقتك ، ما عارفه ليه فجأه كدا اتغيرت علي ، أنا لو غلطت عليك أو عملت تصرف زعجك تعال كلمني و وريني غلطي بس ما تتغير علي بالطريقه دي ، قلت ليها تمام و آسف ، قالت لي عملت ليك شنو أنا يا ناصر ؟؟ واجهني بس ما تتغير علي ، قلت ليها صدقيني انتِ ما غلطتي في حقي و أنا ما متضايق منك ، أنا بس الفتره دي زهجان و قافله معاي ، قالت لي في شنو أحكي لي ! قلت ليها ضغط شغل بس ما تشغلي بالك ، قالت لي طيب ، المهم قفلت منها و واصلت سواقه لحد ما وصلت البيت.....
______________________
طبعاً رتاج لمن جاتني قعدت أحكي ليها الحاجه المضايقاني ، يعني فتحت ليها قلبي و قلت ليها إني ما قادره افهم ناصر و هو ما قادر يفهمني ، قالت لي الإتنين أعند من بعض ، قلت ليها المشكله إني لمن اتنازل و أجيهو بصدني ، مثلاً لمن كان عيان و رسلت ليهو كيفك سفهني و لمن جيت البيت و مشيت ليهو في غرفتو برضو سفهني و قال لي أطلعي و اقفلي معاك الباب ، قالت لي دقيقه دقيقه انتوا ما بتنوموا في غرفه وحده ؟؟
قلت ليها لا ، قالت لي حالتكم مستعصيه شديد ، بس يا مها لو جينا للحق انتِ الغلطانه يعني بعد اللئامه العملتيها في القروب قدامهم كلهم و إظهارك لعدم مبالاتك بمرضو عايزاهو يتعامل معاك كيف مثلاً ؟؟ بالإضافه لإنك بتطلعي من دون ما تكلميهو و بتكذبي على اهلك و لمن يتصلوا يسألوهو بضطر يكذب و يتم الإنتِ بديتيهو يعني لو دا واحد تاني أول شي كان حماك من الطلوع أو شكاك لأهلك بس لاحظي انو ناصر بتستر عليك و تصرفك حق قبيل داك بالجد بزعل ، حاجه بايخه بالجد و فيها عدم إحترام ليهو ، كدا انتِ صغرتيهو قدام أهلك لأنو ما معقوله تتصلي عليهم كلهم و توريهم الحاصل معاك و هو لا ، و كمان ما كنت مفكره تتصلي عليهو خالص رغم انو زوجك و من حقو يعرف أول واحد كمان ، و المشكله انك عارفه تصرفاتك غلط و بتزعلو منك و مع ذلك بتعمليها و بتجي تستهبلي و تسألي نفسك هو مالو معاي و انك ما قادره تفهميهو ، قلت ليها اوريك أنا مشكلتي الحقيقه شنو معاهو ، قالت لي اها قولي ، قلت ليها هو يا رتاج دائماً بقول لي أنا ما بعتبرك مرتي و ما بحب اقول عنك مرتي و ما شغال بيك و ما بتهميني كتير ، و انتِ شفتي الحاجه دي قبل كدا لمن جيتي و نزلتي صورنا حقت العرس في التعليقات ،جا حذف الكومنتات حقك و رسل لي و قال لي شايفك حتموتي لو ما كلمتي الناس كلهم انك مرتي ، يعني أنا حتى لو أظهرت إنو كلامو ما فارق معاي بس بالجد من جوه بيوجعني و انتِ عارفه كويس إني ولا يمكن أطلب مساعده من زول بكرهني أو ما بطيقني و لمن كان عيان أنا أساساً ما كنت عارفه و للصراحه لو كنت عارفه ما كنت حأجي أشوفو ببساطه لأني ما بفرق معاهو بالتالي وجودي أو عدمو واحد بالنسبه ليهو ، و أنا ما بتواجد مع زول ما عايزني و شايف اني لاصقه فيهو أو ميته عشان أقول إني مرتو ...... أيوه انا زيو ما بطيقو و ما شغاله بيهو بس مرات بحكم الرابط البيناتنا بحاول اتكلم معاهو أو اتنازل و اجي اسألو بس برضو بصدني و أنا ما بحب الحاجه دي و ما بحب زول يحسسني إني جاريه وراهو ، قالت لي بيني و بينك كدا يا ميمي ، ناصر دا ما عندك ليهو حاجه ؟؟ و ما تكذبي علي لأني متأكده انك ما بتكرهيهو ، قلت ليها تمام حأقول ليك الحقيقه ، أولاً كلمة كراهيه دي كلمه كبيره شديد و معناها أكبر و ما ساهل إنو الزول يكره زول ، أيوه أنا و هو من زمان بنتناقش مع بعض و بنقول اننا ما بنطيق بعض بس أكيد ما لدرجة الكراهيه ، لأنو الكُره دا ما بجي إلا بعد مراحل من الأذيه ، قبل ما أعرسو كنت ما بطيقو و أنا هسي ما حاسه بحاجه اتجاهو يمكن لأني خلاص اتقبلت وجودو و تاني لو بطيقو أو لا مصيري أقعد معاهو تحت سقف واحد ، هو هسي بالنسبه لي زول عادي جداً لا بكرهو لا بحبو ، قالت لي انتِ جاده يا ميمي ؟؟ معقوله ما بتحبي ناصر ؟؟
قلت ليها بعد غسان أنا كرهت حاجه إسمها حب ، قالت لي إنتِ لسه ما نسيتيهو ؟؟ ، قلت ليها أنا لو نسيتو و نسيت الحب الكان بيناتنا مستحيل انسى الكسره و الوجعه الإتسبب لي فيهم من يوم قال لي ماف قسمه بيناتنا و اننا ما بننفع نكون مع بعض و مشى من دون ما يفهمني الحاصل شنو ! يعني أنا لحد اللحظه بسأل نفسي أنا عملت شنو !!؟ أنا غلطت معاهو في شنو عشان عقابي يكون إنو يمشي و يختفي فجأه من حياتي ؟؟ على الأقل يخت لي النقاط على الحروف ، يوريني أسبابو ، يجاوب على إستفهاماتي و الأهم إنو يديني مانع أو سبب قوي يخلي مصير حب نشأ من الطفوله يتبخر و يتلاشى زي الرماد ....يمكن لو كان جا و قال لي كلام منطقي كنت حأعذرو و أسبابو المنطقيه حتشفع ليهو قدامي ، بس هو غير جملة اننا ما بننفع نكون مع بعض ما قدر يقول حاجه و دا ان دل فيدل على إنو ما كان خاتي لي إعتبار أو إحترام لمشاعري و إني كنت مرحله في حياتو هو كان عارفها حـ تنتهي متين عشان كدا هُنت و ما فرقت معاهو...
قالت لي بلا و انجلى ، صدقيني هو الخسران و على فكره أنا حاسه بيك لأني كنت شاهده على قصة حبكم دي و صراحة ما اتوقعت تصرف جبان زي دا من غسان ، المهم يا مها ما تخربي حياتك بسببو ، هو سافر من زمان و كمل حياتو و انتِ كمان مفروض تعملي كدا ....قلت ليها صدقيني أنا ما عامله حداد عشانو ولا عايزاهو يرجع لي ، أنا بس ما قادره أصلح الإتكسر جواي ، ما قادره أحب أو اصدق حاجه اسمها مشاعر ، مع إنو زول واحد بس الكسرني بس بسببو أنا ما قدرت أحب زول تاني ، و دا طبيعي لأنو كان حب طفولتي و اول حب في حياتي و أفنيت كل مشاعري و طاقتي في سبيل حبو و هسي حاسه نفسي خاليه من المشاعر و مجرده من الأحاسيس...قالت لي والله حاسه بيك لكن حاولي أدي نفسك فرصه ، حاولي انك تبدي صفحه جديده مع ناصر ، قلت ليها أنا من قبيل بشرح ليك بس انتِ ما فهمتيني.....شوفي عادة الفرص دي نحنا بنديها للزول العايزها ، للزول العايز يكون معاك و جنبك بس انا و ناصر الوضع بيناتنا مختلف تماماً و صدقيني ولا واحد فينا عندو مشاعر للتاني أو منتظر منو فرصه ، قالت لي طيب فسري لي ليه هو زعل عشان انتِ ما سألتي عنو لمن كان عيان و لمن مشيتي بيت حبوبتك و خوفتيهو عليك و لمن مشيتي بيتكم برضو من دون إذنو و اليوم لمن كنتِ في القسم و كلمتيهم كلهم إلا هو !..و الغريبه انك بـ لسانك قلتي الحاجه دي و قلتي انو ناصر متغير عليك لأنو زعلان من تصرفاتك دي !...إتنهدت و قلت ليها أنا حاسه إني من قبيل كنت بشرح لـ حيطه !!...شوفي كونو ناصر يزعل أو يتضايق لأني ما كلمتو دي حاجه طبيعيه لأنو مثلاً لو حصلت لي حاجه هو المسؤول الأول قدام أهلي و هو أول واحد حـ يتصلوا عليهو عشان يسألوهو عني ، أما بالنسبه لقبيل فـ برضو ليهو حق يزعل لأنو أكيد حس إني بقلل من قيمتو قدام أهلي ، قالت لي طيب انتِ عارفه دا كلو ليه بتسألي ؟؟
قلت ليها أنا تعبت من الشرح يا بت الناس ، قلت ليك إني ما بحب أحمل زول مسؤوليتي و هو أساساً ما معترف بالرابط البيناتنا !! قالت لي ما عارفه ! ما عارفه يا ميمي مصير علاقتك بـ ناصر شنو بس رجاءً حاولي معاهو ، انتوا الإتنين حلوين مع بعض و ناصر ما فيهو كلمه ، حاولي بس تخطي خطوه تجاهو.....
ما رديت عليها لأني تعبت من الكلام الكتير دا....المهم اتكلمنا كتير في مواضيع تانيه بعدها هي استأذنت و مشت ، بقيت قاعده براي و بفكر ، قلت عقلي حـ يطق لو قعدت افكر في علاقتي بـ ناصر عشان كدا أحسن اشيلو من بالي ، المهم فجأه و أنا سرحانه كدا اتذكرت حاجه !!!
دخلت الواتس و رسلت لـ رشا و رسلي لي صورة حسام حقت يوم داك ، ردت علي بعد دقيقه و قالت لي لييييه عايزا بصورتو شنو يختي 🙂 قلت ليها ما وقتك هسي يا رشا ، رسلي صورتو ، فعلاً رسلت لي صورتو ، قلت ليها لا ما دي ، رسلي لي الصور الوريتيني ليهم يوم داك الفيها هو و شلتو قالت لي طيب ثواني .... فعلاً رسلت لي الصور كلها ، بقيت أشوف فيهم وحده وحده و أدقق ، قلت حسام علاقتو شنو بـ مؤتمن و عماد !! بعرفهم من وين لمن متصور معاهم ؟؟ قلت لـ رشا الولد اللابس قميص مخطط و اللابس قميص أسود ديل حسام بعرفهم من وين ؟؟ قالت لي ما عارفه والله ! أنا الفي الصور ديل كلهم ما بعرفهم ، زي ما قلت ليك الصور دي حسام قبل فتره كان خاتيها إستوري عندو ، قلت ليها عليك الله يا رشا اسأليهو لي ، قالت لي جنيتي يا بت !! عايزاهو يقول إني بحتفظ بـ صورو و أساساً ارسل ليهو اقول ليهو شنو ؟؟ قلت ليها اتصرفي ، انتِ مفتحه و بتعرفي تسحبي الكلام ، رسلي ليهو و بكل شفتنه جيبي لي زيت الولدين ديل و طبيعة علاقتهم ، و اتحججي ليهو بأي شي المهم يكون مبرر لـ حفظك لصورو ، قالت لي قررتي تدبلي فوق ناصر ولا شنو ، قلت ليها فعلاً عرفتي كيف 🙂 قالت لي لأنو انتِ ماف حاجه بتطول معاك ، بالكتيره 6 ، 7 شهور ، قلت ليها المهم اتصرفي و أديني خبر ، قالت لي تمام ، المهم انتظرت ربع ساعه كدا بعدها هي رسلت لي دردشتهم و الريكوردات ، عرفت إنو مؤتمن دا أخو صاحب حسام و هم طلعوا رحله و هو طلع معاهم و جاب معاهو صحبو يلي هو عماد و حسب تاريخ الصور الكلام دا قبل وفاة عماد بأسبوعين !! قلت معناها مؤتمن كان بكذب لمن قال إنو علاقتو بـ عماد مقطوعه من زمان ، قلت ليها طيب ليه حسام خاتي الصور دي إستوري و هي إتأخدت قبل أكتر من شهر !؟؟ قالت لي قال لي إنو عايز يغيظ واحد صحبو لأنو ما مشى معاهم الرحله دي و رافض يمشوا معاهم الرحله الجديده عشان كدا هو و اصحابو رفعوا الصور القديمه ، قلت ليها اهاااا ، بعدها بإستعجال فكرت أرسل لـ مصطفى ، طبعاً هو قبل كدا رسل لي سلام و سفهتو ، طبعاً هو يا شال رقمي من سارا أو إلهام ، غالباً حيكون شالو من إلهام لأنو سارا خالتي لو زول قال عايز رقمي بتكلمني أول شي ، المهم بإستعجال نزلت تحت و بقيت أفتش على دردشتو ، من دون ما أنتبه دخلت الدردشه الغلط و كتبت : مصطفى أنا لازم اشوفك ضروري ، طبعاً أول ما إنتبهت إني مرسلاها لـ ناصر إستعجلت و حذفتها بس حاسه انو شافها ، قلت ما مشكله....
المهم بعد حكاية ساعه كدا ناصر جا داخل مع دانه ، قال لي السلام عليكم و طوالي طلع مشى غرفتو ، دانه جات سلمت علي ، قعدتها في رجليني و قلت ليها خالو ساقك وين يا حلوه ؟؟ قالت لي مشينا بعيد هناااااك ، ضحكت و قلت ليها حتى كلامك عسل زيك ، بقيت أشاغلها و ألاعب فيها ، لحد ما ناصر جا و هو شايل لابتوبو ، قعد و فتحو و بقى مركز معاهو و أنا و دانه بنلعب مع بعض ، طبعاً هي ضحكتها حلوهـ و صوتها عالي ، يعني تلقائياً كدا أنا بقيت اضحك معاها و نسيت كل حاجه و حسيت كأنو ماف زول غيرنا أنا و دانه ، طبعاً كنت مبسوطه على الآخر ، فجأه لمن رفعت راسي لقيت ناصر بعاين لي !! طوالي غير نظرو و بقى يعاين لـ دانه ، فجأه سمعنا صوت الجرس ، ناصر قام طوالي و مشى فتح الباب ، بعد شويه كدا نازك جات داخله ، دانه أول ما شافتها جرت عليها و هي بتقول ماما جات ماما جات ، نازك أدت ولدها مؤيد لـ ناصر و شالتها و بقت تبوس فيها ، قالت ليها بتي حبيبتي اشتقت ليك شديييد والله ، جات سلمت علي و قعدت ببتها ، دانه قالت ليها خالو اشترى لي حلاوه ، قالت ليها أنا ذاتي جبت ليك حلاوه و ألعاب ، فتحت كيس و طلعت ليها كميه من الألعاب و الحلويات و الشكولاتات ، قالت ليها ماما مها جابت لي دبدوب كبييييير ، نازك قالت ليها أنا ذاتي جبت ليك واحد كبير ، مؤيد قعد يبكي ، ناصر قال ليها هاك ليهو ، طبعاً ولدها عمرو سنتين و دانه 4 سنوات ، قعدت بأولادها الإتنين و بقت تشاغل فيهم ، قلت هسي في داعي الوحده توزع جناها كدا و ما تشوفو إلا في وقت فراغها !! للأسباب دي أنا كنت شايله فكرة العرس ، لأنو بعدو في مسؤولية زوج و شفع ، يعني الوحده حتكون مجبوره تختار بيتها أو شغلها ....قمت دخلت المطبخ جبت ليها مويه و عصير ، بعدها خليتها هي و أخوها و أولادها و مشيت غرفتي لأنو الوضع بيني و بينها متوتر و أساساً هي ونستها كلها مع ناصر و أولادها .....المهم دخلت غرفتي و فتحت الشبكه ، لقيت رساله من مصطفى ، قال لي طوالي ، بس وين ؟؟
قلت ليهو جيب معاك ولد عمك ، قال لي تمام ، قلت ليهو نتلاقى في (...) قال لي تمام ، أول ما طلعت من دردشتو تاني رسل لي ، شفت رسالتو من فوق ، كاتب لي أخبارك شنو ، قلت دا شنو العبيط دا ، رديت عليهو بعد مسافه و قلت ليهو كويسه ، قال لي أنا كمان كويس 😅
قريتها و ما رديت عليهو ....
المهم بقيت لافه في الميديا ، جيت راجعه الواتس تاني و بقيت أشوف في الإستوريهات ، بالصدفه شفت الإستوري حق مصطفى ، كان عامل إسكرين شوت للبروفايلات من برا و عامل خطوط حمراء تحت دردشات معينه و كاتب عليها : بما إنو سمير و أسامه و منير و درغام عاملين شعار برشلونه بروفايل أكيد حـ يخسروا 😂✌️
طبعاً بروفايلي برضو كان ظاهر ، المهم شفت باقي الإستوريهات تبع الناس العندي ، رسلت لـ سارا خالتي ، رسلت ليها الصور الرسلتهم لي رشا و حكيت ليها في ريكوردات و قلت ليها لاحظي لـ تاريخ الصور ، ما كانت داخله فـ طوالي إتصلت عليها و قلت ليها أدخلي واتس ضروري ....المهم دخلت و شافت الصور و سمعت الريكوردات ، قالت لي دا معناهو إنو مؤتمن كان بكذب لمن قال علاقتو بـ عماد ليها فتره طويله مقطوعه !! قلت ليها بالظبط كدا ، قالت لي جبتي الصور دي من وين ؟؟ قلت ليها موضوع طويل بقولو ليك يوم تاني ، المهم أنا قبل شويه قلت لـ مصطفى إنو نتلاقى و طلبت منو يجيب معاهو مؤتمن ، قالت لي ما تستعجلي ، قلت ليها لا اتطمني ما حأجيب ليهو سيرة الصور دي حأستدرجو بالكلام ، قالت لي حـ تتلاقوا وين عشان أجيكم لو خلصت شغل بدري ، قلت ليها في (...) قالت لي خلاص تمام ....قلت يا ربي الكاتل منو ؟!!!!
فجأه كدا ناصر جاني داخل ، قفل الباب و قال لي سؤال و جواب ، انتِ علاقتك شنو بمصطفى ؟؟ طبعاً استغربت ، في شنو !!! قلت ليهو مصطفى منو ؟؟ عاين لي بحده ، قلت ليهو اهاااا مصطفى صحبك !! ماف ولا شي ...جاني مندفع و قال لي أنا عارف كويس انتِ بتعملي كدا ليه ، عايزا تتحديني بس عشان قلت ليك إنو في خلافات بيني و بينو ....نزلت من السرير و وقفت قصادو ، قلت ليهو و أنا قبل كدا قلت ليها و تاني حأقولها ، أنا ما عندي أي شغله بالخلاف البيناتكم ، قال لي و كمان ما عندك أي مشكله او مانع في إنك تعملي علاقه مع صاحب راجلك و في العلن كمان....
طبعاً كلامو دا حسيتو نزل زي السيف على قلبي ، بقيت أعاين ليهو بخلعه ، للحظات حسيت لساني إتربط ، زعلت قدرتي و قربت أطق ، قلت ليهو ما عارفه انت مالك أو جايب الكلام دا من وين بس دااامك عندك لي سيناريو كامل و مصدقو فأنا ما مستعده أبرر ليك و بعدين فلنفترض إنو في علاقه بيني و بينو انت ماااالك ؟؟؟
مسكني بعنف من يدي و قال لي بنبره عاليه دا منو الحيوان الديوث البقبل يشوف مرتو طالعه و نازله و بتتراسل مع راجل ! لا و كمان الراجل دا واحد كان صحبو!! شفتي أنا لو بكرهك كره الموت مستحيل أقبل فكرة انك تطلعي و تنزلي مع راجل....بالقوه فكيت يدي منو و قلت ليهو ما تتهمني اتهامات باطله ، متين أنا طلعت و نزلت معاهو ، قال لي رقمو عندك ولا لا ؟؟ قبل كدا طلعت معاهو مطعم ولا لا ؟! و ما تنكري لأني شفتكم و انتِ ذاتك شفتيني ، قلت ليهو و أكيد انت شفت اننا ما كنا قاعدين برانا ، قال لي و دا ما معناهو إنو ما حصل طلعتو براكم ، أخدت نفس و قلت ليهو شوف مصطفى في شغل بيني و بينو و أنا ما مضطره أوضح ليك أكتر من كدا و ما تخليني اذكرك اننا متفقين ماف زول يتدخل في....قاطعني و قال لي بنهره إلا إذا متفقه مع نفسك و تاااااني ماف حاجه اسمها إني ما اتدخل فيك ، مش انتِ مرتي غصباً عنك حأدخل و من اليوم انتِ مجبوره تستأذني مني و مجبوره توريني ماشه وين و جايه من وين ، من اليوم ماف حاجه اسمها تلفي على كيفك و تمشي وين ما عايزا ....قلت ليهو ما على كيفك ، قال لي نشوف ، طلع و قفل الباب بقوه ، قعدت أبكي بس ، تاني مسحت دموعي و قلت أبكي عشان كلام الغبي دي ، مستحيل اسمع كلامو و بكرا حأطلع أشوفو حـ يمنعني كيف ....بس انا ما فاهمه الحصل شنو فجأه !!؟ يعني ناصر مالو فجأه كدا جاني هايج و سألني عن علاقتي بمصطفى !!؟؟ أكيد في زول وصل ليهو كلام عني ....اتذكرت الإستوري تبع مصطفى ، قلت ياهم احتمالين ، يا إما مصطفى قاصد يعمل الحركه دي عشان ناصر يشوف الإستوري حقو ، دا في حال انهم عندهم ارقام بعض و بشوفو إستوريهات بعض ، أما الإحتمال التاني إنو في زول من شلتهم شاف الإستوري و رسلها لـ ناصر عشان يفتكر إني بتواصل مع مصطفى ، بس هو كيف عرف انو دي أنا !! ما أنا براي الإسمي مها !! اتذكرت البروفايل حقي و قلت أكيد عرفني منو ، قلت في سري أصبر لي يا مصطفى يا عواليق بعد مصلحتي معاك تنتهي حأوريك النجوم عز الضهر و للوقت داك حـ أعمل حسابي منك....
المهم لمن نزلت تحت ما لقيت نازك ، شكلها مشت ، مشيت المطبخ لأني كنت جعانه ، فتحت الأدراج ما لقيت إندومي ، اخخ ما إنتبهت إنها خلصت ، لمن فتحت التلاجه لقيت فواكه و خضروات ، قلت حأجيب إندومي و حأعمل معاها صحن سلطه ، رجعت غرفتي لبست عبايه و شلت لي قروش ، أول ما طلعت من غرفتي كدا ناصر كان طالع من غرفتو ، جا علي و قال لي على وين ان شاء الله !! قلت ليهو شايفني شايله قروش في يدي يعني حأكون ماشه وين ؟؟
قال لي من دون لئامه و عناد عايزا شنو ؟؟ قلت ليهو إندومي ، قال لي تمام و اتحرك من جنبي ، رجع تاني و قال لي دانه نايمه جوه خلي بالك منها ....هزيت ليهو راسي بس رغم إني زعلانه شديد منو ....
المهم دخلت غرفتو لقيت دانه نايمه ، مشيت قعدت جنبها ، الشاشه كانت فاتحه و في فلم خيال علمي شغال و أنا بحب الأفلام الزي دي ، قعدت على السرير و بقيت أحضر بعدها رقدت لمن تعبت من القعاد و ناصر لسه ما جا ، قلت غريبه اتأخر كدا ليه ، غطيت دانه كويس و جبتها علي ، حسيت نفسي نعسانه بس كنت بقاوم في النعاس لحد ما في الآخر إستسلمت و نمت......
بعد مسافه كدا جاتني صحيه كنت شامه ريحة عطر ، صحصحت شويه و بقيت عين مغمضه و عين مفتحه ، طبعاً شفت ناصر في وشي و نايم جنبي لا و كمان أنا نايمه في حضنو ! بقيت أقول انا الجابني هنا شنو ف طوالي اتذكرت إني نمت هنا و أنا منتظراهو يرجع ، طبعاً كان ضاميني عليهو و محاوطني بيدو ، ختيت يدي على يدو عشان أشيلها مني و أزح منو بس ما قدرت !! ...عرفتو صاحي و ما ناوي يبعد عني ، قلت ليهو ناصر ! لو سمحت فكني ، خليني أقوم ، ما رد علي ، قلت ليهو دانه نايمه ما تخليني أرفع صوتي و أصحيها ، برضو عمل فيها نايم ، ضربتو على صدرو و قلت ليهو أصلا دا العايز تصل ليهو ، الزمن كلو شابكني انتِ ما مرتي و ما بتفرقي معاي و شنو ما بعرف و في أول فرصه جاتك استغليت الوضع !...ياااااخ خليني أقوم !!
فتح عيونو و قربني عليهو أكتر ، قال لي خليك هاديه و نومي ساي عشان الموضوع ما يتطور.... طبعاً بلعت ريقي ، غطاني كويس و قال لي تصبحي على خير ..... طبعاً استغربت فيهو !! ما عرفتو مالو !...بعد مسافه قلت ليهو أنا جعانه ، ما بقدر أنتظر الصباح ، فتح عيونو عاين لي للحظات كدا و بعدها نزل من السرير ، شكلو ياداب إستوعب الحاصل ، عاين لي بحده و الطلع ...
طبعاً أنا إتهبلت زياده ! بقيت أعاين في السقف و اتذكر لحظة صحيت و لقيتو في وشي ! حسيت نفسي زي البحلم ، جاني إحساس ما عادي ، إحساس طمأنينه و حنان و عطف ، حسيت نفسي و أنا نايمه في حضنو زي الطفله!...لمن وعيت على نفسي انتفض و قمت من مكاني و طلعت بإستعجال ، طبعاً قلبي كان شغال زي الدلوكه ، لمن مشيت المطبخ لقيتو جايب لي الإندومي و كمان جايب معاهو أكل جاهز ، عملت الإندومي بس و أكلتها ، بعدها غسلت الصحن و طفيت إضاءة المطبخ و طلعت منو ، لمن وصلت السلم اتذكرت إنو ما طفيت لمبات الهول ، لمن عاينت لبابو لقيتو فاتح قلت معناها ناصر برا في الحوش ، خلاص لمن يدخل حـ يطفيهم معاهو ، اتحركت كدا بس تاني رجعت و قلت أحسن أمشي اتأكد ....نزلت من السلم و طلعت من الهول ، الدنيا كانت ضلام ، بقيت أتلفت يمين شمال في الحوش بس ما شفت ناصر ، طلعت لـ قدام شويه و أنا لسه بتلفت و بعاين حولين الشجر ، بعد شويه سمعت صوت جاي من ورا الشجيرات ، و الصوت دا إتكرر أكتر من مره ، صراحة خفت ، دخلت و قفلت باب الهول و جريت على السلم و أنا قلبي في يدي من الخوف ، اتخطيت العتبه الأولى و التانيه و في التالته رجليني ضربوا في بعض ، صرخت صرخه واحده و جيت واقعه من السلم على الأرض ، حسيت جبيني دا إتشق عديل ، رجلي ما قدرت أحركها و أصلاً ما قدرت أقوم ، ختيت يدي على جبيني لقيت في دم ، بدا ينزل على وشي ، فجأه ناصر جاني جاري ، حاول يقومني بس قلت ليهو ما قادره حاسه جسمي كلو مكسر ، طوالي شالني و وداني غرفتي ، طلع بإستعجال و جا راجع مع علبة إسعافات أوليه ، بقى ينضف لي في الجرح و هو شغال لي هسي وقعتي كيف !! ما بتشوفي أنتِ ؟؟
قلت ليهو واااي يا ناصر رجلي واجعاني 😭
مسك رجلي و بقى يحركها لي و أنا شغاله ليهو برااااحه برااااحه ياخ واجعاني ....أكيد إتكسرت ....قال لي لا ما إتكسرت ، دا إلتواء ، قلت ليهو برضو حار ، قال لي ما دا كلو بسببك ، نفسي افهم وقعتي كيف و الإضاءة شغاله !!
حكيت ليهو الحصل ، قال لي فعلاً في حركه ورا الشجر ، قلت ليهو واااي يعني انت ذاتك سمعتها !!؟ قال لي ايوه ، قلت ليهو دا حرامي !؟ قال لي حرامي حيعمل شنو ورا الشجر !!؟ حـ يحفر قبر مثلاً ، قلت ليهو يمكن عايز يسرق البيت و متدسي هناك ، قال لي لا دي كلبة الجيران ، والده ورا الشجر ، قلت ليهو بالجد ! واااي يعني في كلبه في البيت !؟ قال لي أيوه جد ، قلت ليهو طيب ليه ما كلمتني هسي بسببك جيت واقعه من السلم ، قال لي و أنا من وين حأعرف انك حـ تطلعي الحوش نص الليل و حتحسي بحركه ورا الشجر بعدها حـ تخافي و تجي واقعه من السلم !!؟؟
قلت ليهو ماااا عارفه بس الحصل لي دا كلو بسببك انت ، عاين لي بغيظ و سكت ، شال العلبه و طلع بعدها جا و هو شايل صباع ، و بقى يمسح لي بيهو رجلي و أنا بعاين ليهو ساي ، قال لي خوفك دا يوم حـ يموتك ، قلت ليهو انت السبب ....رفع راسو و عاين لي جوا عيوني بس ما رد علي ، لمن خلص قال لي في شي تاني واجعك ؟؟!! قلت ليهو لا ، قال لي تمام نومي بعد دا ، طفى اللمبه و طلع و قفل الباب ، طبعاً خالص ما إتوقعت منو تصرف زي دا ، يعني هو رغم زعلو و ضيقو مني و من تصرفاتي و عنادي مع ذلك ما إتردد ثانيه في إنو يساعدني و يخفف عني ....حأقول الحقيقه و الصراحه ، لو كان حاصل العكس و أنا زعلانه منو و متضايقه من تصرفاتو و حصل ليهو الحصل معاي كان حيحصل الآتي :
و هو واقع حأقول ليهو بتقدر تقوم براك ؟؟ لو قدر فـ خلاص و إذا لا يمكن من باب الإنسانيه حأساعدو يقوم لحد ما يصل غرفتو ، حأقول ليهو اجيب ليك حاجه توقف بيها الدم دا ولا لا !؟ لو قال لي ايوه حأمشي اجيبها ليهو ولو قال لي لا حأطلع من غرفتو و أمشي غرفتي و أخليهو يتدبر أمرو....فـ حقيقة بهرني و حسسني إني طفله و ناساني إني كنت زعلانه من كلامو و إتهامو لي 💜
"و إن خيَّروك فاختر من يحسن إليك.. من يتشبَّت بك مهما كلَّفه الأمر.. من يراك الأجمل دومًا.. من لا يرى غيرك وكأن الأرض جردت من كل شيء إلا منك.. من لا يستطيع الاستغناء عنك لأنك أثمن ما لديه.. من يقدِّر كل تفاصيلك الصغيرة التي تجعلك سعيدًا للحد الذي لا حد له.. من لا يجعلك تتساءل كل يومٍ بعديدٍ من الأسئلة التي تقتل ما بينكما.. من يحيي تلك المشاعر الدفينة بداخلك، الخائفة من زيف المشاعر.. من يعرج بك من أراضي الخيبة إلى سماوات الطمأنينة.. إن خيَّروك فأحسن الإختيار."🖤
لكاتبه
يتبع......