#قيود_العوف
بقلمـَي: ريتـَا
مِن شفتَك
عرفت الدِنيا ما تِنعاف
مِن شفتَك
لگيت الناس موش نظاف
و لگيت بدَمي شي منك
گبل لا اشوف الـ بروحِي
شِفت روحي احبنّك ..
لتنسون التصويت + التعليقات بين الفقرات + متابعة حسابي قلبي ❤️🔥
شبابات صوتوا دوسوا علىٰ النجمَة لتنسون مُهم🤏🏻
__________________________________
ثواني وشخط السيارة بكُل سرعة ومنار واگعة بالگاع
-منار: خذاها جُمااان خذااااااهااااا
اتنهدت وگعدت لزمتها اريد اگومها نترت ايدي ولمت نفسها وهي تبچي وتگول
-منار: راحتت اميييي راحتتتت اخذهااا
-جُمان: تعالي نفوت جوة نفكر بحل
-منار: حل شنو ااخ من ابوية كُله منه ديصير بينا هيج من وراه دمرناااا دمررنااااا
لزمت گلبها وگالت بوجع
-منار: والله بعد مابيه گلبيييي صار يوجعنييي
لزمتها بخوف وقلق من شفتها لازمة گلبها
-جُمان: كاافي بچيي وصريخ گلبج راح يووكف كااافي
گومي وياي يلا گومي ..
فوتتها جوة يَم ماما ورحت للمطبخ داجيب مي طلعت لگيت مَاما لازمة أيدها وتحچي وياها
-امل: عيوني ماماتي حبيبتي انتِ لتسوين بنفسچ هيچي امچ يمتىٰ متردين ترحين الها
ردت علىٰ امي بصوت خافت من بين دموعها
-منار: خذاها خالة خذة أمي مفكر بيه منو الي اني وهو خالي لا بقى الي اب لا اخ وهسة امي هم
تحسست وجهة بأيدها وابتسمت الها بخفة
-امل: شوفي خالاتي بيتي هذا بيتكم وجُمان اخيتج وامچ الله شاهد عليه معزتها عندي وبگلبي چبيرة ولو تبقون عندي الف سنة احطكم علىٰ راسي
:- بس هو كـ أخ عندة وجهة نظر يگلك اختي وگاعدة عن الغرب محد يرضاها وهي اخيته ويخاف عليها مايضرها يايمه
-منار: لعد ليش ما اخذني وياها خالة ليش أخذها وحدهه وعافني اني
-امل: شلون ياخذج يايمة أنتِ هسة الي يعرفونة عنج متزوجة متشوفينة يگول بنتج وتزوجت
-منار: أكيد عمامي الي گالوا اله وترسوا راسة عليه
-جُمان: مية بالمية لعد هو شعرفة اتزوجتي اكيد خابروه همة
-منار: شبيهم عمامي والله راح اتخبل هاي لأن ماا انطوني فصلية لأن ماحققوا الي رادوا هيچ يعادوني ويسوون بيه حتىٰ خوالي يترسون راسهم عليه
رفعت راسها واخذت نفس عمييق وزفرتة وگالت يرجف
-منار: والله تعبت كُلش تعبت كُلها ضدنا أبوية عمامي خوالي كُلهم صارو علينا محد ديوگف ويانة بهذا الظرف
باوعت الي بدموع وگالت
-منار: كُلهم ديزيدون وجعنا أكو احد بهاية الظروف يسوي هيچ اني منو مقويني غير مَاما منو الي غيرها اني بعد الخسرتة
اتنهدت ورحت گعدت يمها مسحت علىٰ ظهرها بخفة
-جُمان: كُل شيء يعدي الزمن كفيل يحل كُل مشكلة خلي نشوف وين تاليتها وشلون راح تنحل الله كريم هونيها
:- وامچ موجودة يمتىٰ ماتردين ترحين اني وياچ نروح لو كُل يوم بس كافي منار اني اخاف عليج گلبج يوگف بسبب البچي والضغط الي دتتعرضين اله
بقت ساكتة واني چنت اباوع بصمت وهدوء سكتت لأن ماا أعرف شنو تاليتها بس هاي السالفة ماراح تخلص لأن عمامها حقدوا عليها ودينبشون ...
مر اسبوع والوضع نفسة بس ومنار تلوب وامها تتصل بيها تحچي وياها وتهدي بيها وماكو هي تريد أمها بس أمها متقبل تروح يمها تگُلها
-ام منار: لا يمة لا تجيني خوالج صايرين نار لأن عمامج متعاركين وياهم علمودچ أبقي يم جُمان
ردت عليها بدموع
-منار: مشتاقتلج ماا اگدر بدونچ كل شيء ثگيل عليه
-ام منار: يمة والله گلبي طاگ عليچ بنيتي بس ماا أريدج تجين يضرونج يمة نسوانهم متنحمل اني يذبن عليه سم بالحچي كل حچاية شكبرها
-منار: لعد شلون نبقىٰ هيچي شوكت نرجع نستقر تعبَت
-ام منار: ماما انتِ اتزوجتي منار مو لعب هذا الموضوع ان شاء الله يطلع خوش ولد والله يسعدج وياه بنيتي لتبقين متشتتة وضايعة مثلي جوة ايدين نسوان خوالج
بچت وگالت الها
-منار: مَاما مد اگدر اتقبل الموضوع احس روحي تأذيني وتلوب والله
-ام منار: گولي يا الله بنيتي اتوكلي علىٰ الله منار يمة احنة اتشتتنا واتهدمنا بعد بيت ماكو النا منگدر نفوت بيه ومحد النه يمة لازم يصير عندج رجل توگفين وراه سند الج أرضي بقسمتج بنيتي اني متفائلة بيه خير الولد
اتنهدت ومسحت دموعها وردت
-منار: الله كريم ماما ديري بالج علىٰ نفسج وخابريني لتگطعين بيَه ماما
سدت الخط منها واندگ بابنا گمت فتحتة شفتة قاسم
رحبت بيه ودخلت قبلة وحچيت بصوت عالي
-جُمان: ياهلاااااا بالنسيب حييي الله نسيبي
امي ضحكت وهي گامت سلم علىٰ امي وانوب عليها وردت عليه ببرود وهو گعد
باوعت اله أول مرة احس قاسم خجلان ومتوتر ابتسمت وحسيت لازم اعوفهم لوحدهم بلكي يقل التوتر بيناتهم رحت وگفت يم كُرسي ماما وگلت
-جُمان: اااا من رخصتكم اني اريد اخذ ماما بالغرفة شوي احرك رجليها امددهن الها
افتهمتني امي وگالت
-امل: اي يمة ياريت والله
اخذتها دخلت بيها بالغرفة ضحكت وگالت
-امل: عفية عليچ بلكي يعودها عليه
-جُمان: لا ماما هي تعرفة وبيناتهم كلام اكثر من مرة بس منار هسة تعبانة وبالها مو يمها بوضعهم فَ اتحسست من الموضوع هذا
-امل: حقها الصار مو سهل عسىٰ الله يهون عليهم يمة
-جُمان: اشو ام علي مدتجي مثل قبل ولا دنشوفها هواية شنو سالفتهه
-امل: فاقدتها والله يمه بس هلتشوفين الوضع وهي ماتمر مدري شبيها اخاف مريضة ماشفتيها
هزيت راسي ورفعت اكتافي بعدم معرفة
-جُمان: والله مَاما ماا اعرف بعدين اشوفها شنو وضعها
اجيت الها اخذتها نزلتهة من الكُرسي ومددتها وجبت زيت صرت ادهن برجليها واعصر بيهم وصرت احرك بيهن واسوي بيهن رياضة وحركات
غمضت عيوني علىٰ امل بيوم ترجع امي تمشي علىٰ رجليها وتتشافىٰ
*******
متوترة وماا اگدر أرفع حتىٰ راسي من التوتر والخجل وغثيان صار عندي معدتي انگلبت منهن
رفعت عيني بخطف باوعت اله چان يباوعلي وساكت اتنهدت ماا چنت أتخيل هذا الشخص راح يصير زوجي بفد يوم واگعد گدامة هيچ گعدة
فززني من تفكيري ورجعني لواقعي من گال
-قاسم: انطيني ماي من يمچ
درت وجهي ادور عليه باوعت بأستغراب ورديت
-منار: وينه ماكو يمي مي ؟
-قاسم: الحمد لله چنت اختبرج اذا بعدة صوتچ موجود
باوعت اله بجمود ودرت وجهي
-منار: أستغفر الله
-قاسم: يابويه هسة انه شمسوي غير أعرف عليمن منكور
-منار: انت شعليك ومنكور
-قاسم: انه هم اگول چا غير احس گاعدة يمي بالگوه
-منار: لا بس مالي خلگ اني
نزلت عيوني وثبتتهم علىٰ الارض
-منار: خوالي خذوا امي
-قاسم: وين خذوها ؟
-منار: عندهم
سمعتة زفر بصوت رفعت راسي وگال
-قاسم: خوالج وعمامج اثنينهم گ*** وينراد الهم ضبة
-منار: اتخبلوا علينا يوم واحد جاي يريدني فصلية ويوم واحد جاي ماخذ امي وحارمني منها !
قرب نفسة مني ثبت عيونة بوجهِي وگال
-قاسم: وانتِ علمود هاي ضايجة ؟ وحق علي اذا تردين امچ هسة اگوم اجيبها وأريد گ*** يوگف بوجهي
مسحت وجهي بأيدي واخذت نفس
-منار: لا لأن امي متقبل تجي اصلاً بعد تگول شنو گعدتي بيت جيراني وبيتي ماافوتة خليني گاعدة عند أخواني ولا بيت غرب
-قاسم: وانتِ هم
-منار: شنو ؟
-قاسم: انتِ هم منار شنو گعدتچ هنا وانتِ محسوبة عليه يعني انه زوجج بالاخير
-منار: اي قاسم ؟؟
-قاسم:أريد اخذج وياي للبصرة
انتفضت وگمت بسُرعة
-منار: شعندي هناك حتىٰ اروح وياك اني كُل شيء عندي هنا وين اروح للبصرة
باوعلي وگال بصَوت هادئ
-قاسم: تعالي گعدي خلي نسولف فدوه اروحلج
اتنهدت بقوة وگعدت وعيوني مثبتة عليه
-قاسم: لشوكت تبقين هنا گاعدة چا ؟
-منار: ماجاي أگدر أتقبل
-قاسم: ماتتقبليني ؟
-منار: ماا جاي اگدر اتقبلك تكون زوجي ماجاي اگدر اكون طبيعية وياك
بقة يباوعلي وصافن وساكت حچيت بتعب
-منار: كُل شيء صار فوگ بعضة وزواجي منك ماا افتهمت منه شيء حتىٰ ماگدرت أفكر ولو دقائق لأن چنت خايفة اروح فصلية وياخذوني تدري اني گلت موافقة بدون ماا افكر بيها وبدون ماا احسب شنو وراها ؟
بلل شفتة وگال
-قاسم: مفتهمج انه
تنقلت عيونة بعيوني ورجع گال
-قاسم: أريدچ يمي انه مو كل يوم شغلي ببغداد ومن أنزل أريدچ گدام عيني هنا ماا اگدر اخليچ ماا أمن عليچ وحدچ
-منار: مو وحدي هنا خالة امل وجُمان ؟
-قاسم: افتهميني فدوه اروحلج انه ليش اجيت من البصرة لهنا صارلي كم يوم غير لأن خايف عليچ يعني ماا اگدر اعقد عليج وارجع ؟ بس غير ماا أمن عليچ هنا
-منار: ليش متأمن عليه هنا وبعدين اني لهسة ماا اعرف ابوية واخواني وين وماا أعرف شلون حتنحل هاي السالفة
صاح بصوت خفيف وسكت ورجع گال
-قاسم: اي مو انه علمود هيج أريد اخذج وياي لأن السالفة لهسة ما لها حل وهمة شاردين وعمامج گ*** ماا امن عليج تبقين يمهم ببغداد منا لهنا
بلعت ريگ وطبگت شفتي
-منار: ماا اگدر منين ماا اجيبها صعبة ماا اگدر
-قاسم: انتِ خايفة مني ؟
باوعت اله ورديت بتلبك
-منار: لا بس اني ماا اگدر بعدين ليش تاخذني للبصرة احنة مو علىٰ أساس زواج علىٰ ورق بس حتىٰ يسكتون عمامي ؟
-قاسم: وين أكو انتِ مرتي بعد
-منار: اها هيچ صار الحچي ؟ لعد منو قبل اسبوع گال زواج علىٰ ورق بس ؟
-قاسم: چنت اضحك عليج حتىٰ توافقين
-منار: لاااا والله
-قاسم: وعلي لگمة وللحلگ وصلت
-منار: شوف ماا اروح وياك للبصرة لحد ماا يرتاح بالي من الي اني بيه واقتنع بيك عود يازوجي
-قاسم: فكري علىٰ راحتج يامرتي لأن انتِ اول وتالي ترحين وياي للبصرة يابعد روحي
-منار: مااا اروح گتلك
قرب نفسة عليه وگال
-قاسم: ترحين ترحين
بعدت نفسي عنة شوي وأني اباوع اله
-منار: وخر عني ماكو مكان لزگت روحك بيه
-قاسم: غير أريد اشم ريحة مرتي
خزرتة وصحت بيه
-منار: قاسم لا تتسوفل احترم نفسك
ضحك وخر عني وگال
-قاسم: بالعباس انه مضطهد وين ماا اروح مضطهد
-منار: انتَ متسوفل اني مو گتلك ممتعودة عليك ؟
حط وجهة بوجهي وانفاسة الحارة لفحتني وگال
-قاسم: چا غير تخليني أعودج عليه
ميلت راسي عنة بضوجة وصار وجهة برگبتي سحب نفس وگال
-قاسم: يابوية ريحة العافية
مديت أيدي حطيتهن علىٰ وجهة بعدتة عني وهو ضحك
-منار: وخر شواربك تبزز
غمز وگال بحرشة
-قاسم: لأن ما متعودة عليهن
گلبت وجهي ورفعت ايدي گلت اله
-منار: وخر لتعبر الحدود رجاءاً
ضحك بصوت عالي وگال
-قاسم: لااا بعد مااكو حدود اكض الحدود وانعل ابو طاهرهن هاي الحدود راح وكتها
-منار: اننن انننننن
شال جهازة وجگايرة وگام وگال
-قاسم: هذن اطلعهن من عيونچ وحدة وحدة بس مو هسة من تتعودين هههههه
بقيت گاعدة اباوع اله واني اخزر بيه
نزل نفسة لمستواي ميل راسة وحچة بهدوء
-قاسم: تلعبين علىٰ گلبي وعلي ومتونس وفرحان بيچ انه
-منار: لا تفرح بيه ترىٰ ما طايقتك
-قاسم: اول وتالي تطيقيني وتموتين علىٰ ربي انه محد عرفني وماحبني
هزيت أيدي وگلت اله
-منار: والله ياا الله نشوف عود
اتقرب وگال بصوت ذايب
-قاسم: محتاجة شيء مرتي ؟
رمشت بوجهة عدة رمشات سريعة وهزيت راسي بـ لا
بقىٰ علىٰ نفس وضعيتة وقربة وگال
-قاسم: انه راجع للبصرة گلت أجي اشوفج يلا أرجع لأن مناك والتحق وأطول نبقىٰ علىٰ أتصال وشيصير عندج تخابريني تگليلي بيه ماشي؟
-منار: تمام
منتبهة عليه وهو ديسولف وصافنة وياه وبلمحة بصر سريع أتقرب مني وباسني بخدي حييييل وابتعد رفعت ابعد بيه أكثر
-منار: انيييي مو گتلك لتعبر حدودك وياية وتاليييييي
-قاسم: كله حلال والله راضي بيه
حمقت وبقيت اباوع اله بعدم رضا گرص خشمي بخفة وگام طلع ... اخذت نفس وزفرتة بقوة وگلبي يدگ سريع وبطني بعدهي تخبط
گمت دگيت باب الغرفة ودخلت لگيت جُمان مددة خالتي ودتحرك برجليها باوعت الي وگالت
-جُمان: راح قاسم ؟
-منار: اي راح يگول اريد ارجع للبصرة
-امل: يايمة الله يوصلة بالف سلامة
حكت خشمها وگالت بتردد
-جُمان: بس هَو يرجع .. يعني گال بس هو محد وياه بعد
قلصت عيوني وگلت الها
-منار: لا ماگال شيء بعد بس هيچ
-جُمان: اهاا
بقيت اباوعلها بشك ومقلصة عيوني انتبهت الي وهزت راسها وگالت
-جُمان: هاا شبيچ شنوو !!
رفعت أيدية ليفوگ ورديت
-منار: ابد هيچ هيچ
وگمت رحت گعدت يم راس خالة امل واخذت ايديها اعصر بيهم ورجع احتواني التفكير وسرحت بعيد
******
رحت للفندق گبل فتحت باب الغرفة وشفتة حاط الحاسبة والأوراق بيده ذبيت السويچ علىٰ الميز وذبيت روحي علىٰ الچرباية وگلت اله
-قاسم: شجاي تسوي شنو هاي الملفات الي بأيدك
-عوف: اقرة بملفات الگ*** هذول
باوع الي وگال
-عوف: شو نمنه ؟
-قاسم: والله نعسان مانايم وتعبان كلش
-عوف: شلونهة منار
نهضت وعدلت گعدتي
-قاسم: خوالها وعمامها غير شادين وياها حتىٰ امها خوالهة خذوها يمهم
رد عليه وهو يقرة بيهن
-عوف: سرسرية انه عرفت عنهم هواي سوالف كلهم مطگطگين وكلاوچية عمامها بس خوالها ماعليهم شي
-قاسم: گلت الها انه بس يصير شيء تگليلي
صفگت ايدي بقهر
-قاسم: أريدها من الله يوصلون يمهة اله ازوعهم العافية
-عوف: مايسوون شي عاطلين هذول تلگاهم ملتهين بطلابتهم ويصفگون ايد بأيد علىٰ يا گاع يبيعونها فليسية
ذب الاوراق وگام رفعت حاجبي وگلت اله بتساؤل
-قاسم: يمتى يصعدون للمحكمة ؟
-عوف: مابقىٰ شيء
-قاسم: بس انتَ حلفت الهم ووعدتهم تسفرهم
ضحك بخفة وگال
-عوف: بعدني علىٰ وعدي بس ارجع من الموصل اسفرهم اسفرهم
-قاسم: بس هاي الادلة الجمعتها عليها هاي كارثية ولا گ** بيهم يفوت سجن هذول
-عوف: غير أريد اسفرهم
ضحكت وگلت اله
-قاسم: والبنات الي لگيناهن بالم*** وخذوهن الشباب بعد ما سألت انه اللتهيت وحامد يفتر علىٰ روسنا
گعد مقابيلي وگال
-عوف: قسم منهن عرفنا اهلهن بس چانن خايفات يرجعن اخذناهن بأيدنة وي دليل خطفهن ومساومتهن واكو بيهن عندهن أثار العنف واستقبلوهن عوائلهن
-قاسم: لا ياخي يضرونهن
-عوف: انه مو غبي اخذت تعهد منهم كلهم عن العنف وانطيت كل وحدة رقم تتصل بيه اذا تعرضت للعنف من قبل احد من عائلتها والباقي علينا
-قاسم: اي زين والبقية ؟
-عوف: البقية لا أهل ولا مكان اغلبهن من الشوارع ماخذينهن ومن دار الأيتام يعني بالمختصر ماكو عوائل
-قاسم: وهذن شلون ؟
-عوف: هذن اغلبهن صلفات ونصهن يردن الشغلة هاي حتىٰ يفشرن علىٰ الولد لأن اخذوهن من المل** يصيحن شغلنا والشغل مو عيب شتحچي وي البرابي*
-قاسم: فالتات خالي
-عوف: شغلتهن يمعود
-قاسم: حضرت شغلاتك حتىٰ نطلع ؟
-عوف: قاسم انت روح قبلي للبصرة انه عندي شغل هنا يومين وأرجع
قلصت عيوني وگلت اله
-قاسم: وشني شغلك
-عوف: مايخصك شعليك
-قاسم: خاف جو شغلك
-عوف: جو شنو ؟
-قاسم: جوجو
-عوف: شو انتَ اجيت من يم المرة وصرت تضر**
-قاسم: هو انه شمحصل من المرة ولا تغير الموضوع بشرفك
گام واخذ اجهزتة وهويتة حطهن بجيبة ووگف كدام المراية وگال
-عوف: ياموضوع يمعود شعندك انتَ
-قاسم: عليك علي لا تغير الموضوع
-عوف: ولك بوية شني
-قاسم: تريد تبقىٰ علمود جُمان
-عوف: اگله عندي شغل
-قاسم: چا هي هم شغل حارگ روحك حرگ علمودها ليلك ونهارك تشتغل علىٰ العصابة الي خطفتها وتجيب بالادلة وتحط علمود الحكم مالتهم وشو جبتني من البصرة لهنا بالمغربيات علمودها چا هذا مو شغل دبسسسك عليمن تعبرهن علييييه
باوعلي وگال
-عوف: ولك انتَ ليش تصير گ** ياهو صار يزاگط من گلت اله منار يردونها فصلية غير دربك ما ندليتة انتَ
-قاسم: اي چا غير تهمني
-عوف: يعني تريدها
-قاسم: چا اذا ماا اريدها المن عقدت عليها
-عوف: انه اخوك
-قاسم: شني
-عوف: وانه ماا ادري چا ليش اجيتك وگلت الك انتَ بالموضوع غير ادري بيك صاير زمال من ورة منار
حطيت أيدي علىٰ الچرباية ورجعت ظهري عليهن
-قاسم: والله انه رجال صريح وواضح مو مثلك من جوة ليجوة
ضربت أيدي بالچرباية حيل وگلت اله
-قاسم: عمي وعلي اذا ماطلعت تريد جُمان اطلع انزع هدومي بالشارع بطولي واگعد اغني ماما جابت بيبي
-عوف:گوم أطلع انزعهن
-قاسم: خاب ليش تضم عيونك فاضحتك وعلي غير من تشوفها بعد ماترمش انتَ
-عوف: يتراوالك
-قاسم: عليمن غير مبين انتَ
-عوف: يلة سولف لوحدك انتَ تريد تسولف انه طالع
صحت بصووت
-قاسم: اي رووووووح لشغلك اسمه جوجو
سمعتة ضحك بصوت عالي وطبگ الباب
والله متغير ومن يشوفهة عيونه تلمع تلمع وهذا عوف المايضحك بوجه أحد وعاقد النونة من يشوفهة حتىٰ ملامحة ترخة
بس هو مايهتم للنسوان وكل وقتة للشغل حتىٰ بأستراحتة يشتغل وعقلة وروحة بيه معقولة صدگ گلبة رف وحب معقولة ذاب الجليد ؟
*******
الكهرباء طافية واني گاعدة داقطع لأمي فواكة وانطيها تاكُل ومنار نايمة علىٰ بطنها ورافعة رجليها وكُل شوي وعاطت
-منار: الله لينطيكم ولكم شغلوا الكهربااااااء
واني وماما فاطسين ضحك ولا تتحمل الحر گامت گعدت مسحت وجهة وگالت
-منار: اريد اخابر مَاما شلون بيه مسمعت صوتها اشتعلت ابهاتكم ولكم الكهرباء
-امل: هسة تجي وخابريهة
گمت شلت الصينية وغسلت أيدي اجيت وگفت گدام الميز باوعت للعلاج وعضيت شفتي صار الي يومين شاكة بيَه
ومدانطي امي منه باوعت الها وگلت
-جُمان: ماما علاجج
عقچت وجهة بأنزعاج واضح وگالت
-امل: صار الي يومين مرتاحة منه يمة من اخذة اتكسر وجسمي كله يوجعني وأريد بس انام يتعبني مو علاج نقمة
رفعت أيدي حطيتها علىٰ شفتي احرك بيها واباوع بأستغراب باوعت الي منار وهزت راسها بمعنىٰ شكو
نفخت بحيرة ومسحت وجهي بتعب صار شيء ياخذني وشيء يجيبني قريتة اني قريت اسماء العلاج الي موجود ونغزني گلبي غمضت عيوني وفتحتهم
ورحت لمنار شاورتها اذا سألت عليه ماما تغطي بأي حجة لأن لازم اليوم أتأكد لازم احط لشكي حدود ونهاية ...
دخلت لبست واخذت علاگة العلاج وسديت بابنا علىٰ خفة أيدي وگفت الباب اللتفت منا ومنا ومشيت وعيني علىٰ العلاج
وگفت من حسيت صار شيء ضخم گدامي رفعت راسي بأستغراب سرعان ماا ارتخت ملامح وجهي من شفتهة سيارتة أعرفها
مشيت بخطوات وگفت گدام بابها نزل الجامة ونزع نظاراتة والتفت عليه وانرسمت علىٰ وجهة ابتسامة خفيفة وگال
-عوف: وين سافة ؟
حركت راسي بخفة ورديت
-جُمان: اها بهلجتكم يعني وين رايحة مو
ضحك بخفة وگال
-عوف: عفية
همهمت واشرت براسي ليگدام وگلت أله
-جُمان: للصيدلية
قلص عيونة ونزل راسة بخفة وباوعلي بشك سرعان ماا افتهمت شنو قصدة رفعت علاگة العلاج گدامة واشرت اله عليها
-عوف: تعالي صعدي انه اخذج
-جُمان: لا ماكو داعي هاية قريبة دقائق وأوصل اصلاً
باوعلي بخزرة مُصطنعة
-عوف: دبطلي العيارة وتعالي صعدي
رفعت راسي ونفخت بقلة صبر
-جُمان: ياااصبرك يا ايووب
صعدت وشغل السيارة فرها بأتجاهة
-جُمان: بس ماگلتلي شعندك جاي ؟
حك خشمة وهو ديسوق وعينة ليگدام
-عوف: ترىٰ عندنا چنة يمكم اجيت اشوف چنتنا قبل لا ارجع للبصرة
نزلت راسِي وجاوبتة بأنزعاج
-جُمان: اي ميخالف زين
دار وجهة عليه باوعلي لثواني وسكت ، وصلني للصيدلية وأشر
-عوف: هاي مو
-جُمان: اي اوگف انتَ ابقىٰ هنا اني راح اجيب العلاج واجي
هز راسة بأستنكار ومد أيده ديريد ياخذ العلاكة وگال
-عوف: جيبي يابه انه اجيبة وين رايحة انتِ
لزمتها وخرتها بأيدي وگلت اله
-جُمان: لا اني اجيب وعندي كم شغلة اجيبها من الصيدلية
-عوف: اي يابه شتردين اجيب الج انه
وترني ارتبكت واحتاريت شنو اگول وحچيت بتردد
-جُمان: شغلات خاصة متعرفها انتَ
-عوف: ميخالف انتِ كتبيها وانه اجيبهه
-جُمان: اگلك خاصة عيب ميصير
باوعلي بخبث وقرب نفسة عليه
-عوف: شنو هنة هذن الشغلات الخاصة ؟
نفخت بوجهة بملل وجاوبتة
-جُمان: شعلييييك ابقىٰ هنا انتَ لتجييي وراي
نزلت وسديت الباب وباوعت أله أشرت اله بأيدي بمعنىٰ ابقىٰ نزل الجامة وصاح عليه
-عوف: اهم شيء الشغلات الخاصة مو تجيبين العلاج وتنسينهن
رفعت أيدي مسحت بيها وجهي بنتر ومشيت فتت للصيدلية وگفت گدام الصيدلاني واحس رجلية نملن صرت ادعي بگلبي الافكر بيَه مو صح !
-الصيدلاني: أمري ؟
حطيت العلاگة گدامة وگلت اله
-جُمان: شوف الادوية هذول ياخذهم صاحب الجلطة ؟
فتح العلاگة واخذ الاشرطة وصار يقرأ بيهم واحد واحد
أكلت اضافري من التوتر اكرط بيهم وماا احس بنفسي لحد ماوصلت لحم الاظافر رفع عينة وباوعلي بأستغراب
باوعت اله بخيبة احس اضطرب نبضِي مثل واحد داس علىٰ گلبي اسودت الدنيا بوجهي من گال
- العفوا خوية بس شنو هاي الاشرطة !! ولا بيهم علاج واحد يصير ياخذة صاحب الجلطة !
يتبع............
_______________________________
البارت نزل بموعدة ماكو تأخير
شنو تتوقعون تسوي جُمان بعد الي سمعتة
وشنو ينتظرنا بالبارت الجاي ؟
حسابي بالانستا
rita.almukhtar