အကယ်၍များသူသာ ဦးလေးကြီးအီရေးပေးတဲ့ဇာတ်ကိုအလိုက်သင့်၀င်မကခဲ့ရင်....
အကယ်၍သူသာ မေမေခိုင်းတဲ့အတိုင်းမီဒီယာတွေဆီအငြင်းစကားတွေနဲ့ သတင်းစာရှင်းလင်းပွဲလုပ်ဖို့လက်ခံလိုက်ရင်....
အရာအားလုံးဟာ ဒီလိုဖြစ်လာမှာမဟုတ်ဘူးမလား။
"အကို့ကို မယုံဘူးဆိုရင်တောင် ဂျယ်ယွန်းကိုယုံတာမို့ အဖြစ်အပျက်တွေအကုန်လုံးကလုပ်ကြံထားတာပါဆိုပြီး ငါ့ကိုပြောပေးပါလားဟင်"
မျက်ရည်တွေပြည့်နေတဲ့ မျက်၀န်းတွေနဲ့ သူ့ကိုတောင်းဆိုနေတဲ့ ဆောင်ဟွန်းပုံရိပ်ကနေ
သွေးချင်းချင်းနီနေတဲ့ခန္ဓာကိုယ်တစ်ခုကိုအရေးပေါ်ကားပေါ်တင်သွားတဲ့ပုံရိပ်ဆီကိုရုတ်တရက်ကူးအပြောင်းမှာ
"သူပေါ့ သူ့သူငယ်ချင်းရဲ့ချစ်သူနဲ့ဖောက်ပြန်တာလေ"
"အေးဟယ် ကိုယ့်သူငယ်ချင်းရဲ့ရည်းစားကိုမှလုရတယ်လို့ မျက်နှာကလေးချစ်ဖို့ကောင်းသလောက် စိတ်ဓာတ်မကောင်းလိုက်ပုံများဟယ်။ ကောင်လေးခမျာသနားပါတယ် ရှက်လို့ကိုယ့်ကိုယ်ကိုယ်အဆုံးစီရင်သွားရှာတာ"
"ကံကောင်းလို့ပေါ့ အချိန်မီတွေ့လို့"
"လူတွေများကြောက်ဖို့ကောင်းလိုက်တာနော်"
သူ့ကိုရှေ့ထားပြီး သူ့မကောင်းကြောင်းပြောနေတဲ့သူတွေရဲ့မြင်ကွင်းဟာလည်းပျောက်ကွယ်သွားပြန်ပြီ။ဟင်...မေမေ နဲ့ဖေဖေ
"ဟီဆွန်းကလူမှန်းသူမှန်းမသိမူးနေခဲ့တဲ့အချိန်ကိုမှ တိုက်တိုက်ဆိုင်ဆိုင်မင်းကသူ့အခန်းထဲ မှား၀င်သွားတယ်ပေါ့။ပြီးတော့ အိမ်သားတွေတောင်ဘယ်သူမှမသိရတဲ့ကိစ္စက မီဒီယာတွေဆီ သက်သေအပြည့်နဲ့ဓာတ်ပုံတွေနဲ့ရောက်သွားတာ။ ဒီလောက်လုပ်ကြံထားမှန်း သိသာတာတောင် ဂျယ်ယွန်း မင်းကမိဘကိုပါလိမ်ချင်သေးတာလား"
"ဖေဖေ ဒီတစ်ခါလေးပဲထပ်ပြီးသားကိုအလိုလိုက်လို့မရဘူးလားဟင်"
"အဖေကိုအသနားမခံနေနဲ့ ရှင်းမ်ဂျယ်ယွန်း။မေမေမင်းကိုဒီလိုလုပ်ရက်တွေလုပ်ဖို့ပျိုးထောင်ခဲ့တာလား။သူငယ်ချင်းတစ်ယောက်လုံးဆေးရုံရောက်တဲ့အထိဖြစ်နေတာတောင် မင်းမိုက်မဲပြီးရှေ့ဆက်ဦးမှာပေါ့ဟုတ်လား"
ဂျယ်ယွန်းပြန်မဖြေနိုင်ခဲ့။ သူဒီလမ်းကိုရွေးချယ်ခဲ့ပြီးပြီ လျှောက်မယ့်လျှောက်အဆုံးထိသာလှမ်းရန်ကျန်သည်။နောက်ပြန်လှည့်လိုက်ရင် သူကိုကိုနဲ့အဆုံးထိဝေးမှာ။
"အင်း အဆုံးထိရှေ့ဆက်ဦးမယ်ပေါ့လေ။ဒါဆိုလည်း ဒီနေ့ကစပြီး ငါ့မှာသားတစ်ယောက်ဆိုတာမရှိခဲ့ဘူးလို့သတ်မှတ်လိုက်မယ်။အမွေပြတ်စွန့်လွှတ်မယ် စွှန့်မလွတ်ဘူးဆိုတာတော့မင်းအဖေသဘောပေမယ့်။ငါကတော့မင်းလိုကလေးတစ်ယောက်ရဲ့ အမေတစ်ယောက်ဖြစ်ရမှာရှက်တယ်"
"ဟင့်အင်း မေမေ !! မေမေ !!!! "
"ဂျယ်ယွန်း ဂျယ်ယွန်းလေးသတိကပ်ပါဦး။ နာနာရှိတယ် နာနာရှိတယ်လေ"
ချွေးစေးတွေနဲ့အတူအော်ဟစ်နိုးထလာမှုကြောင့် စောစောကအရာတွေဟာအတိတ်ရဲ့အိမ်မက်တွေဖြစ်ကြောင်း ဂျယ်ယွန်းသိလိုက်တယ်။
နာကျင်ရတယ် ပင်ပန်းရတယ် ဒါဟာသူလိုအပြစ်သားတစ်ယောက်ခံယူသင့်တဲ့ ၀ဋ်ကြွေးပါပဲ။
ထိုလူသားကိုပိုင်ဆိုင်ရဖို့အတွက်အရာအားလုံးနဲ့ သူ့ရဲ့နှလုံးသားကိုလဲခဲ့ပါတယ်။ အသိုင်းအဝိုင်းတစ်ခုလုံးရဲ့အချစ်ခံဘ၀ကနေ အပယ်ခံဘ၀ဆီပြောင်းခဲ့ရလည်း သူမမှုခဲ့။အချစ်ဆုံးသူငယ်ချင်းရဲ့နှလုံးသားကိုခွဲခဲ့မိလည်းမျက်နှာပြောင်တိုက်ရဲခဲ့တယ်။ယုစ္စအဆုံးမိဘတွေဆီကပစ်ပယ်ခံရတဲ့အထိ သူ့အဖြစ်ကဆိုးဝါးခဲ့လည်း ကိုကိုသာတစ်ချက်လောက်ပြန်လှည့်ကြည့်ပေးရင် ဂျယ်ယွန်းကကျေနပ်ပါတယ်။
ကိုကို့ကို ကျွန်တော်ကအဲ့ဒီလောက်ထိချစ်ခဲ့တာပါကိုကိုရယ်....
____________
အလုပ်ခရီးသွားတဲ့ခင်ပွန်းဖြစ်သူကိုကိုက တစ်လောက်ကျော်လောက်ထိအိမ်ပြန်မလာတဲ့အခြေအနေမှာ ကံဆိုးမှုအပေါင်းထပ်လောင်းပြီး နာနာဟာလည်းဇာတိကိုပြန်ဖို့အရေးပေါ်အခြေအနေဖြစ်လာတယ်။
"ကျွန်တော့်ကိုစိတ်မပူပါနဲ့ စိတ်ဖြောင့်ဖြောင့်သွားနော်"
"ကိုယ့်ကိုယ်ကိုယ်ဂရုစိုက်ပါဂျယ်ယွန်းလေးရယ်"
"ပြောပါတယ်ကျွန်တော့်အတွက်စိတ်မပူပဲ ဘွားဘွားကိုသာကောင်းကောင်းဂရုစိုက်ပါဆို။စောင့်ရှောက်စရာမိဘတစ်ပါးရှိနေသေးတာ ဘယ်လောက်ကံကောင်းလဲ။နာနာကျွန်တော့်ကိုအများကြီးဂရုစိုက်ပြီးပြီ။အခုကိုယ့်ကိုယ်ကိုယ်နဲ့ အမေဖြစ်သူအတွက်အချိန်ပေးတော့လေနော်"
မျက်ရည်လည်ရွှဲနဲ့အမျိုးသမီးကြီးဟာ ဂျယ်ယွန်းငယ်ဘ၀တစ်ခုလုံးမှာအဖော်ပြုပေးခဲ့သူ စောင့်ရှောက်ပေးခဲ့သူ။ဆယ်ကျော်သက်အရွယ်ကတည်းကအိမ်တော်မှာအလုပ်အကျွေးပြုပြီးသူ့ဘ၀ကိုမြုပ်နှံရင်း မိဘကိုငွေကြေးသာထောက်ပံ့နိုင်ခဲ့ပေမယ့် အခုတော့ ကျန်းမာရေးမကောင်းတော့တဲ့မိခင်ကိုအနီးကပ်ပြုစုရန်အချိန်မို့မခွဲချင်လည်းခွဲရတော့မည် ရေစက်ပင်။
သူဘယ်စိတ်နဲ့ဆွဲထားရက်ပါ့မလဲလေ...။
_____________
နာနာမရှိတဲ့နောက် ဒီအိမ်တော်မှာအသံဆိုတာ စိုးစဉ်းမျှမရှိတော့။
ချက်ပြုတ်နေတဲ့အသံတွေမရှိတော့သလို ဂျယ်ယွန်းကိုတစ်ခုခုလုပ်ဖို့ ဆော်ဩနေတဲ့အသံတွေလည်းမရှိတော့။
ရက်သတ္တပတ်တော်တော်ကြာ ပြုစုပျိုးထောင်ခြင်းမခံရတဲ့ပန်းတွေညိုးနွယ်ခြောက်လျော်နေတာကို လေပြေညှင်းကြောင့်တလွင့်လွင့်ကခုန်နေတဲ့အဖြူရောင်လိုက်ကာစတွေကြားကကြည့်ရင်း သူ့ဘ၀လည်းဒီပန်းတွေလိုညိုးနွမ်းနေမှန်းသိလိုက်ရတယ်။
ရုတ်တရက်ကိုယ်လုံးပေါ်မှန်ရှေ့အပြေး၀င်လို့ ကိုယ့်ရုပ်သွင်ကိုယ်ကြည့်မိတော့ သူဟာထိုပန်းတွေထက်ကိုကြည့်ရဆိုးနေသလို။
ပိန်လှီနေတဲ့ကိုယ်ဟာ မနက်၊နေ့လည်၊ညစာဆိုပြီးနပ်မမှန် မှန်အောင်အတင်းကျွေးမွေးမယ့်နာနာမရှိတည်းက သုံးရက်နေမှတစ်နပ်လောက်သာမှာစားဖြစ်တဲ့ရလဒ်နေမည်။
မျက်ကွင်းညိုတွေဟာ အတင်းကြိတ်မှိတ်အိပ်တာတောင်ခြောက်ခြားပြီးလန့်နိုးရတဲ့ ရက်ဆက်နေတဲ့အိပ်ပျက်ညများရဲ့သက်သေ။
ဖြီးသင်ခြင်းမရှိတဲ့ရွှေအိုရောင်ဆံပင်တွေဟာအောက်ခြေမှာအနက်ရောင်ဆံပင်သစ်တွေနဲ့
အကျည်းတန်စွာ ရှုပ်ပွလျက်။
ရေဓာတ်မရှိတဲ့အသားအရည်မှာကြည့်မကောင်းဆုံးဟာ ခြောက်သွေ့နေတဲ့နှုတ်ခမ်းတွေဖြစ်ပြီး အမည်တပ်မရတဲ့စိတ်ဖိစီးမှုကြောင့်ဖြစ်ပါလိမ့်မည် နီရဲရဲ၀က်ခြံတွေဟာ မျက်နှာပေါ်မှာ ခပ်စိပ်စိပ်နေရာယူထားသည်။
သူကောင်းကောင်းနေပါမည်ဟု နာနာ့ကိုကောင်းကောင်းလိမ်ခဲ့ပုံပင်။ဒီလိုပုံစံကို ကိုယ်တိုင်လည်းမနှစ်မြို့နေပင်မယ့် သူဘာဆိုဘာမှလုပ်ကိုင်နိုင်စွမ်းရှိမနေခြင်းမဟုတ်လား။စိတ်လည်းမသွားသလို ကိုယ်လည်းမပါ အသက်ရှင်နေရခြင်းရဲ့ရည်ရွယ်ချက်ကိုတောင်မသိတော့...။
တစ်ယောက်တည်းအခန်းထောင့်လေးမှာထိုင်နေရင်း ညနေစောင်းသွားတဲ့အခါ အမှောင်ထုတစ်ချို့ကစတင်ဖုံးလွှမ်းလာတာနဲ့ သူ့ရင်အစုံဟာလည်းတဒုတ်ဒုတ်ခုန်လာတာ မောဟိုက်လာသည်အထိ။
သူ့ကိုခြောက်လှန့်နေတဲ့အတွေးတွေနဲ့အတူပုံရိပ်ယောင်တွေရောက်လာတော့မည်။
သွေးချင်းချင်းနီနေတဲ့ ဆောင်ဟွန်းကိုအရေးပေါ်လူနာတင်ကားဆီတင်နေတဲ့ပုံရိပ်တွေ။
ငယ်ငယ်ကတည်းကခင်မင်လာတဲ့အပေါင်းအဖော်သူငယ်ချင်းတွေဆီက ဒေါသမျက်၀န်းနီနီတွေ။
အားးးးး
"သူငယ်ချင်းရည်းစားကိုလုတဲ့ကောင်လေသူက ကောင်လေးခမျာသနားပါတယ် ရှက်လို့ကိုယ်ကိုယ့်ကိုယ်အဆုံးစီရင်ဖို့လုပ်သွားတာ"
"သူများတွေကိုလိမ်တာမလုံလောက်သေးဘူးလား ကိုယ့်ကိုယ်ကိုယ်ပါလိမ်နေတာလား မင်းကသိပ်ရွံဖို့ကောင်းတယ်"
မပြောနဲ့ မပြောကြပါနဲ့
"ငါ့မှာမင်းလိုသားမရှိတော့ဘူး"
"မင်းလိုကလေးမျိုးရဲ့အမေအဖြစ်မနေနိုင်ဘူး "
ဟင့်အင်း!! ဟင့်အင်း ဖေဖေ မေမေ
နားနှစ်ဖက်ကိုအုပ်လို့ အော်ဟစ်နေလည်း ကြောက်စရာပုံရိပ်ယောင်တွေနဲ့အသံတွေဟာပျောက်မသွား။
တိတ်ဆိတ်လွန်းတဲ့ပတ်၀န်းကျင် တိတ်ဆိတ်နေတဲ့စံအိမ်ထဲ သူ့အနီးဆုံးမှာကြားနေရတဲ့အသံတွေဟာ သွေးပျက်ဖွယ်။
တိတ်ဆိတ်ခြင်းအပြင် သူနဲ့အတူပါလာတဲ့အထီးကျန်ခြင်းကိုဂျယ်ယွန်းကပိုကြောက်ပါသည်။ဆိုးရွားလှတဲ့နတ်ဆိုးတွေလို အရာတွေပင်။
အင်အားမရှိလေ ပိုတိုက်ခိုက်လေမို့ အားအင်ချည့်နဲ့နေသူ ခိုကိုးရာမဲ့သူဂျယ်ယွန်းဟာ ၎င်းတို့အတွက်သားကောင်။
*ကလင် ကလင်*
*ကလင် ကလင်*
တိတ်ဆိတ်နေတဲ့ အိမ်တော်ထဲမှာထွက်လာတဲ့တစ်ခုတည်းသောအသံက ဂျယ်ယွန်းနားစည်ကိုဖြတ်သွားပြီးနောက် ခြောက်လှန့်နေတဲ့အသံဆိုးတွေကိုမကြားနိုင်တော့။
ဟုတ်တယ် သီချင်းတွေဖွင့်ထားရမယ်။ဒါမှသူတို့တွေမလာနိုင်မှာ။
သို့နှင့် နံရံကပ်တီဗွီကြီးပေါ်မှာ ကခုန်နေတဲ့သူတွေနဲ့ ဆူညံနေတဲ့သီချင်းသံတွေဟာ နေ့ညမပျက်တော့။
ဆူညံသံကိုလူတွေကမုန်းပေမယ့် ဂျယ်ယွန်းအတွက်တော့ဖြေဆေးတစ်ခုလိုပင်။ တိတ်ဆိတ်နေတဲ့ညတွေမှာ အိပ်မပျော်နိုင်ခဲ့ပေမယ့် ဆူညံနေတဲ့သီချင်းသံတွေကြားမှာတော့ ပင်ပန်းလွန်းတဲ့မျက်၀န်းတွေက မှိတ်စက်ကာအနားယူနိုင်တယ်။
ကလင်ကလင်မြည်နေတဲ့ အ၀င်ဖုန်းဟာတော့ တစ်ဖက်ကမကိုင်သည့်နောက်မှာတော့ ထပ်ပြီးမမြည်လာတော့.....။
________________
ဖန်တရာထပ်နေတဲ့ အထီးကျန်မနက်ခင်းတစ်ခုမှာဂျယ်ယွန်းနိုးထလာချိန် သူ့ဗိုက်ကတဆစ်ဆစ်အောင့်လို့နေသည်။ရက်အတော််ကြာအစားကောင်းကောင်းမစားတာကြောင့်ဖြစ်လိမ့်မည်။
အစားအသောက်မှာနေကျappတစ်ခုထဲ၀င်ပြီး တွေ့တဲ့menuသုံးလေးခုမှာလိုက်တယ်။အကြောင်းပြချက်ရေရေရာရာမရှိပေမယ့် ဘ၀ကစုတ်ပျက်နေရင်တောင်အသက်တော့ရှင်နေရဦးမည်။ဘယ်သူမှမရှိတဲ့ ဒီစံအိမ်ထဲမှာသေသွားခဲ့ရင် သူ့ကိုဘယ်သူကများဘယ်အချိန်မှာရှာတွေ့မှာပါလိမ့်။
တွေးစရာအကြောင်းတစ်ခုခေါင်းထဲရောက်လာတာနဲ့တစ်ပြိုင်နက် ဖန်သားနံရံပါးပါးကိုကာထားတဲ့ ဖြူလွှလွှလိုက်ကာတွေကိုဆွဲလိုက်ပြီး ကျယ်၀န်းတဲ့ခြံထဲကခြောက်သွေ့နေတဲ့ပန်းတွေကိုကြည့်ရင်းအတွေးနယ်ချဲ့နေမိသည်မှာ တံခါးဖွင့်သံကြားမှသတိ၀င်လာသည်။
Deliရောက်လာတာဖြစ်ပါလိမ့်မည်။နာနာထွက်သွားတုန်းကခြံတံခါးရောစံအိမ်တံခါးမကြီးကိုရောသော့ခက်ဖို့မေ့ခဲ့တာဖြစ်လိမ့်မည်။ဒါကြောင့် deliသမားကတံခါးကိုဒီတိုင်းဖွင့်လိုက်တာလို့ ဂျယ်ယွန်းကတွေးလိုက်ပါတယ်။
Energyလည်းများများစားစားမရှိတော့တာမို့ ခပ်ဖြည်းဖြည်း လှေကားပေါ်ကဆင်းနေတဲ့ဂျယ်ယွန်းခြေလှမ်းတွေရုတ်တရက်ရပ်တန့်သွားခဲ့ပါတယ်။
အကြောင်းအရင်းကတော့ အိမ်ထဲ၀င်လာသူကအစားအသောက်လာပို့တဲ့deliမဟုတ်ပဲ သူအမျှော်လင့်ဆုံးဖြစ်သည့်တိုင် မျှော်လဲမမျှော်ရဲတဲ့တစ်ယောက်သောသူဖြစ်နေလို့ပါပဲ။
"ကိုကို...."
တိုးလွန်းတဲ့လေသံကို သူ့ခင်ပွန်းဖြစ်တဲ့သူကမကြားနိုင်ခဲ့ပါ။
အချိန်တစ်ခုအထိ မလှုပ်မရပ်ကြောင်ကြည့်နေပြီးနောက် သူ့အခန်းထဲပဲလှည့်ပြေးလာခဲ့သည်။
ကိုကိုကသူ့ကိုမမြင်ချင်လောက်ဘူး။ခရီးကပြန်လာလာချင်းအမုန်းဆုံးသူကိုတွေ့လိုက်ရတာမို့ အမောစို့တဲ့ဖြစ်ရပ်မျိုးချစ်ရသူကိုမဖြစ်စေချင်ပါ။
ကိုကို့ရုပ်သွင်ကတော့သူနဲ့ဆန့်ကျင်စွာ ကြည့်ကောင်းပြီး နောက်ဆုံးတွေ့ခဲ့တုန်းကပုံရိပ်နဲ့တစ်ခြားစီမို့သူ့စိတ်ကလေးအေးသွားပါတယ်။
ရပြီ သူကစုတ်ပြတ်နေရင်တောင် ကိုကိုကတော့ကြည့်ကောင်းနေရင်ရပါပြီ။သူမပျော်ရွှင်ရင်တောင် သူလုထားတဲ့ကိုကို့ပျော်ရွှင်ခြင်းတွေကိုပြန်ပေးချင်ပါသည်။
______________
*ဒေါက် ဒေါက်*
"ခဏလောက် ဧည့်ခန်းထဲဆင်းလာပေး"
စူးအောင့်နေတဲ့ဗိုက်ကိုကိုင်လို့ စောင်ပုံထဲခပ်ကွေးကွေးနေတဲ့ဂျယ်ယွန်းကချွေးစေးတွေပြန်လို့ဝေဒနာခံစားနေရလည်း မကြားရတာကြာပြီဖြစ်တဲ့ကိုကို့အသံကိုကြားလိုက်ရတဲ့အခါ ဝေဒနာတစ်၀က်ယူပစ်သလိုပျောက်ကင်းသွားပါတယ်။
အင်အားမရှိလို့လှုပ်တောင်မလှုပ်နိုင်တဲ့သူက ကိုကို့အသံလေးကပေးတဲ့အင်အားတွေနဲ့ ဧည့်ခန်းထဲအထိရောက်အောင်သွားနိုင်သည်။
"ငါရုံးခန်းထဲမှာ အိပ်ခန်းပါပြင်ပေးထားတာမို့ အလုပ်များတဲ့ရက်တွေဆိုပြန်လာဖြစ်မှာမဟုတ်ဘူး ရုံးခန်းထဲမှာပဲအိပ်ဖြစ်မယ်။ငါယူထားတဲ့အိမ်ထောင်ဖက်မလို့ တကယ်အိမ်ထောင်ဖက်လိုမဆက်ဆံနိုင်ပေမယ့် အခက်အခဲဒါမှမဟုတ် ပြဿနာတစ်ခုခုရှိရင် ငါ့ကိုအကူအညီတောင်းလို့ရတယ်"
"ဟုတ်"
"ငါ့အဖေတောင်းဆိုထားတာမို့ တစ်လတစ်ခါတော့ ငါ့အိမ်ကိုညစာလိုက်စားပေးဖို့အကူအညီတောင်းချင်တယ်။ဒါပေမယ့် အဆင်မပြေရင်လည်းရတယ် ငါကြည့်ပြောလိုက်မယ်"
"ရပါတယ် အဆင်ပြေပါတယ်"
"ငါ့ဖက်ကပြောစရာကတော့ဒါပဲ။ထပ်ပြီးမရှိတော့ဘူး။မင်းပြောစရာမရှိရင် ဒီလောက်နဲ့တော်ရအောင်"
သူနဲ့အတက်နိုင်ဆုံးတူတူမရှိချင်တဲ့သူက ပြောစရာရှိတာပြောပြီး ကျောခိုင်းသွားတာကိုကြည့်ပြီး ရင်နာပေမယ့်တစ်ဖက်မှာတော့ သူ့ကိုအနည်းငယ်အဖတ်လုပ်လိုက်တာကြောင့် ပျော်ရွှင်လျက်ရှိသည်။
စိတ်ကနေသာပေမယ့် ခန္ဓာကိုယ်ကဝေဒနာကိုတောင့်မခံနိုင်တဲ့အဆုံး ဂျယ်ယွန်းမျက်၀န်းတွေဝေဝါးကာ အဆုံးမှာတော့ အမှောင်ကျသွားခဲ့သည်။
******
နောက်များတော့ လာမြောင်ဂျစ်angstလုံး၀မကိုင်တော့ပါဘူးTT
Typeရင်းငိုနေရသလို အဖိုးတန်လေးချစ်ဖို့အကောင်းဆုံးလေးကိုမှ ဇာတ်နာထားမိလို့အိခုပိခုမျက်နှာမြင်တိုင်း guilty ဖြစ်ပြီး၀မ်းနည်းနေရ༎ຶ‿༎ຶ
Happy Birthdayအဖိုးတန်ပတ္တမြားခဲလေး, ကမ္ဘာပေါ်ကအလှဆုံးဖြစ်တည်မှုလေး ဂျယ်အိခု✧♡
ဒီထက်ပိုပြီးတောက်ပပါစေ ကောင်းမွန်တဲ့ပတ်၀န်းကျင် စစ်မှန်တဲ့သူတွေဆီမှာ အချစ်ခံရပြီး အမြဲပျော်ရွှင်နေရပါစေ❤️