يا من هواه أعزه وأذلني
كيف السبيل إلى وصالك دلني
وتركتني حيران صباً هائماً
أرعى النجوم وأنت في نوم هني
و لاقعدن على الطريق فاشتكي
في زي مظلوم وأنت ظلمتني
ولأشكينك عند سلطان الهوى
ليعذبنك مثل ما عذبتني
ولأدعين عليك في جنح الدجى
فعساك تبلى مثل ما أبليتني
——————————————
زمهرير /
ما ادري ورة شگد و گعدت حسيت ضوة قوي دخل بعيوني ، غمضتهن منزعجة ، شوية شوية بدت عيوني تتعود ، فتحتهن نص فتحة و انا اباع داير ما دايري
هاي مو غرفتي ، ريحة ديتول ، شديصير ؟ شنو اسوي انا هنا ؟ شفت نفسي بالفراش و متغطية بجرجف ازرگ ، ايدي بيها كانولة ، اباوع محد يمي شصاير يربي شجاي اسوي هنا
غمضت عيوني احاول اتذكر ، شوية شوية رجعتلي الذاكرة عطت بصوت عالي و انا اشلع الكانولة من ايدي
-بابااااااا
ركضت اطلع من الغرفة ما ادري انا شنو لابسة لو شنو شكلي بس اريد ابوي ، طلعت اركض كمشتني الممرضة
-اوكفي يا عيني شبيج
-ابوي ابوي وينههه ارررريدددةةة
-دقيقة تعالي وياي
دفعتها و انا احاول الگي شخص اعرفة ماكو اركض بالمستشفى مثل المخبلة ادور على احد عمامي اخواني وينهم مهيب وين امي اختي ماكو احد
وگفت بنص المستشفى و الانظار كلها عليها ، افتر كلها تباوعلي حاصروني بدائرة ، خفت كلها تباع العيون كلها عليه انا شنو شسوي
گعدت بالگاع و حطيت راسي بين ايديا احاول اسيطر على نفسي دموعي بدت تنزل و انا اشوف نظراتهم عليا هذا يگول خطية و ذاك يگول الله يشفيها
ما بيه شي انا مو خطية انا ، گاعدة و متكورة على نفسي و دموعي تنزل و كلهم يباعون عليا و الاطباء يتقربون مني شوية شوية يحاولون يضربوني مهدء و انا ما اكدر اسوي شي خايفة
انكث و ارجف دموعي ما توگف انظارهم خوفتني ، اباع على واحد يدفع بيهم يريد يجيني ، شفته هذا اجود و واحد ورا مهيب
ركضلي اجود و نزع جاكيتة ، حطاها فوگ راسي و گومني على كيف همس بأذني
-اشش اشش خلص ماكو شي يمج انا
لزمني من كتفي و عاط بصوت عالي
-على شنو تا تدحكون كل واحد لشغلووو
اجا مهيب بعد ما دفع الناس ، كمشني من ايدي يحاول ياخذني من ايدين اجود بس اجود مكمش بيه قوي
-مهيب : وخر خلي اشيلها
-انا ماسكها
-اجود وخر اخذها للغرفة
-انا ماخذها
دفعة مهيب من كتفة و همس بين سنونة
-وخر عنها ترى كامش روحي گوة
همس اجود
-مو وكتو مهيب ما جاي تشوف حالتها ؟
دفعة اجود و اخذني و انا احس ما عندي طاقة احچي دخلني للغرفة الي چنت بيها اول شي و گعدني ، لبسني جاكيتة و غطاني و مسح على رأسي
گلت بصوت واهن
-كلة من وراك
باوعلي هو و گال بهدوء
-انا ؟
-ابويا وين ؟
-بالغرفة الي يمج
-اريد اشوفة
هز راسة بلا و گال
-ماكو طلعة شوفي روحج رجلج و ايديج و راسج تردين تموتين ؟
اجيت اتعارك بس دخلت الممرضة ركبت الكانولة و عينها عليه ، حچيت بگلبي اخذي الج و خلصيني منه
طلعت هي
-ابوي شلونة
-زين ما بي شي بس ضغطة انخفض
-تضحك على منو انت ؟
حركت راسي بعصبية حسيت الم مو طبيعي
-اهخخ
-گتلج لا تتحركين بس الاثول اثول
-انت اثول خوش
عض اشفتة و گال بعصبية
-لو ما مريضة چان عرفت شنو اتصرف
-شتسوي بله تمد ايدك اكسرها و احطها بحضنك
-ما عاش الي يمد ايدو عليج احرگو حتى لو انا ، بس بابا شوفي روحج راسج ملفوف واكعة علية و ايدج صاير بيها خلع تردين تموتين ؟ ابوج زين لا تخافين
-مو زين لو زين ما جان اجيت انت من الانبار لهنا
-هوب هوب ما اجيت علمود ابوج خابروني گالولي انتي وكعتي اجيت علمودج لج گالوا وكعتي من الطابق الثاني متكسرة ما شفت دربي اجيت طير ردت انسحك مرتين
-محد گالك تعال
عض اصبعة و گال
-اههخخخ اهخخخ
طلع و عافني مخبل ، حاولت اگوم من مكاني بس قطعني دخول مهيب تقرب مني و لزم ايديا قوي ما كدرت اوخره گلت و انا ما اباع لوجهة عيوني تباع لكل مكان عدا هو
-عوف ايديا
-زمهرير انتي زينة
-وخر
-اسف
ضحكت بأستهزاء و دفعتة
-اطلع برا
-ما اطلع
-اطلع
-ليش ما جاي تگولين اسمي ؟
-لان انت مو مهيب انت واحد ما اعرفة مهيب ما يخليني بهيج موقف اطلع برا
-اسف والله م......
-اسفك هذا نگعة و اشرب ميه يلا اطلع
ضرب الباب برجلة و طلع ، يارب عفوك و رضاك يا ربي ، بقيت صافنة بالحايط اريد اطلع اريد اشوف ابوي
حسيت الباب انفتح ، ركزت انظاري اشوف بابا بالكرسي المتحرك و اركان يدفع بي ، حطو يمي و انا ما حاسة على روحي دموعي تنزل ، مسك ايدي و گال
-اش حبيبتي لا تبجين
-بابا تعورت
باس ايدي
-هسه تصيرين زينة
-وكعت بابا
-ما تعرفين تنتبهين لطريقج بابا ؟
-خفت عليك
-سودة بوجهي
-ايدي تأذيني و راسي
-اسف باباتي كله بسببي عساها بيه
-بابا خلص انا اتزوج بس لا تروح حباب لا تعوفني ما اكدر بدونك
-ما اعوفج انعل ابو الي يعوفج شعوفج ولج انتي من روحي
ضحكت بنص دموعي و انا اتذكر نفس اليوم الي تيم ضاع بي ابتسم هو على ضحكتي و گال
-شو تضحكين
-هاي المحادثة صايرة قبل بابا من واحد دفعني تذكر ؟
ضحك هو وگال
-من يومج شالعة گلبي
اباع لبابا وجهة تعبان و عيونة ميتة ، اخذت ايدة الي كامش بيها ايدي و بستها
-اسفة
باس هو ايدي
-ما سويتي شي بس هذا حظج انا
ما فهمت شنو قصدة ، مر اسبوع و انا كاعدة محد يرضى اكوم ، رحنا بهل كم يوم للانبار علمود عرس اركان
تطورت علاقتي وي اجود شوية ، صرنا نتراسل و نسولف بس كلها عرك دوم احرك دمة و هو ما يسكت يحرك اعصابي ببرودة ودي احركه و يجي و يروح و يجيب ويا حلويات و اكل و اشياء للبيت و لسانة شلون يحجي و جاب امي للدرب گامت تصبغ بي
باجر عرس اركان وراها عقدي ، و انا ما محضرة ملابس لابن امي ولو هو ما يستاهل اتانق بس لخاطر زمرد
كعدنا انا و غزيل نفرفر بالبيجات بس ما لگيت شي و احس اريد ابجي عرس اخوي باجر و ما عندي ملابس
-زمهرير : ولج غزيل شلببببس
-شوفي من فساتينج
-اذا ما لكيت شي البسة ما اروح للعرس
-انجبي زمهرير عرس اخونا
-لا حبيبتي عرس اخوج بالنسبة الي رايحة لعرس صديقتي
-اي اي
قطع كلامنا دخول امي و شايلة كارتون مال هدايا ، اجت غزيل اخذته منها گالت ماما
-زمهرير هذا من رجلج
-يا رجل ؟
-كم رجل عندج ؟
-ما عندي رجل
كالت بنفاذ صبر
-زمهرير هاي من اجود
فتحتة چان فستان لون سمائي ، شالتة غزيل حتى نشوفة ، جان فد شي لونه سمائي طويل بي ورود اصفر و ابيض ، بي فتحة صدر وردان شفافات چان نازك بشكل مو طبيعي منيلة هيج ذوق
كلش حلو تصرفة حسيت شعور لطيف ابتسمت بخفة و انا اشوفة ، گمت من مكاني و انا اشوفة شگد نازك و حلو
طلعوا غزيل و امي و وصلتني رسالة
-حلو ؟
-منو الحلو ؟
-تستغبين علية ؟
-هااا الفستان قصدك
-اي
-حلو كلش شكراً عجبني هواية ، كم سعرة ؟
-ليش تخليني اتعارك وياج ؟ اسكتي احسلج
-بعدنا ما متزوجين و كاعد تصرف هواي فلوس عليه و اكره هلشي كم سعرة
ما جاوبني
-ويامن احجي جاوبني
-اذا تبقين تمسلتين ما اجاوب
بعدين تعرفين عدنا هلشي مثل المسبه ؟ يعني من زوجة تگول لزوجها انطيك انا الفلوس معناها كاعد تگلة انت ناقص و انا كاملة
-ترى ما قصدي هيج
-بس كلامج يدل هيج
-خلص اسفة يلا
-ماكو اسفة
-و شتريد هسه ؟
-البسي اشوفة عليج
-باجر تشوفة
يلا باي تصبح على خير
-يعني باجر اشوفج ؟
-غير العرس نساء و رجال ؟
-و انا برأيج اذا عرس حرم و زلم اخليج تلبسين هيج كدامهم شبيه تخبلت ؟ لو مگرن ؟
-اكرهك
-انعم الله عليج روحي نامي لا تسهرين
-اوك
-گولي خوش شنو اوك شنو هلتنعوص
-بكيفييي عجل بس انت تحجي مفردات و انا لا ؟
-باجر سمعيني عجل بصوتج حتى اعضج
-و ليش تعض ؟ شنو مچلوب
-شلون بلسانج الي مال كص
-اي والله مال لفة گص
-مشتهية ؟
-كلش
-عجل انتظري
-ها شنتظر
طلع عندي تم الارسال بس ما شاف الرسالة وين راح بس لا صدك راج يجيب لفة الگص
ورة فترة راسلني گال
-انزليلي انا جوة
-وين انزل يمعود
-انزلي يول
-لا يشوفوني اهلك
-عادي هذا بيت رجلج و بيتج
-ما متزوجين بعدنا
-نتزوج لا تخافين
تنهدت و كتبت
-نازلة
عفت تلفوني و نزلت اتختل لا يشوفني احد و هسه غزيل تجي للغرفة تشوفني ما هي تخبصهم
نزلت الدرج و اشوفلك هذا واكف بنص البيت مدري الفندق شو جبير و يغني صخام بوجهة
نزلت ركض و هو شافني
-اجود : ليش تركضين هسه توكعين وتت.....
قطعت كلامة و انا اسد حلگة بايدي و همست
-عزا بعينك اجود بنص البيت تصرخ اسكت فضحتنا
جريتة من ايدة و اخذته للحديقة الي شفته بيها اول مرة هو طول الطريق ساكت اول ما دخلنا للحديقة جرني قوي بحيث انضربت بصدرة ردت اوكع
همست بعصبية
-مخبل مو بيدك
نزع الشماغ الي لابسة و حطا على راسي مثل الحجاب
-يابة انا شيخ و عرضي يمشي مفرع بالمزارع
-مزرعتك هاي ترى
قرب وجهة يمي وجهي و گال بهمس
-گولي مزرعتو لزوجي
-بعدك مو زوجي اخذت علاگة مال لفات الگص و ردت ارجع كمشني من زندي
-وين رايحة
-للغرفة اكل
-تؤ ناكل هنا بالحديقة بعدين انا هم جوعان مو بس انتي
-يوووههه ما اريد اكل وياك وجهك يسد النفس
-بس وجهج يفتح نفسيتي
-و انت تسدها
-اسد شنو
-نفسيتي
جرني من ايدي و گعدني جوة الشجرة و هو گعد يمي دحس
-بعد تعال اكعد بحضني
-ما اكول لا
گام يريد يكعد دفعتة
-لك دوخر شوف شكبرك وين تگعد تكسر رجلية
كمش فكي و گال
-اذا بعد گلتي ولك ترى اسوي شي ما يعجبج
-شتسوي ؟
قرب خشمة يم شفايفي ، فهمت شقصدة و دفعتة
-ادبسز
اخذت لفتي و گعدت اكل و ادردم عليه بصوت ناصي ، هو ياكل و يضحك متنة يهتز
-عليمن تضحك
-ما اضحك
-ترى والله ادحس اللفة بخشمك
-دحسيها تاشوف
-عفت عنك لهجتك
-تحبيني يولي ليش تنكرين
-اوي ليش شنو بيك ينحب ؟ شو شكلك مو حلو
-افا عليج
مسح على لحيتة و گال
-عيوني مثل الصقر و شعر و لحية و طول و عضلات و رجولة و العالم كلها تهابني و فلوس و وسيم و لطيف على گولتج
-منو الطيف ؟
-انا
-اوي سندس
-ولللل ودي اخنكج
-متوحش
سكت هو و گلت انا
-بعدين شدعوة هيج بخيل ما تعرف تجيب ببسي
-مو زين عليج
-ترى ببسي
-بيك سكر يحلو
-اوههه هم سكر ترى نسبة قليلةةة
-اي اي
سكتنا شوية و گلت
-اجود
-عيونو
-اجود ما اريد
-شنو شما تردين
-انت مو گلت اي شي تردي اسويلجيا ؟
-اي
-ما ترجع عن كلمتك ؟
-يابة اطلبي و انا تحت امرج
-ما اريد اتزوجك
جمد هو ، تنهد و ضم لفتة و باوع بعيوني انا مباشرة نزلت عيوني لزم فكي باطراف اصابعة و گال
-دحكي علي زمهرير
-اضحك عليك ؟
-عاينيلي يعني
-ما
-عايني
رفعت عيوني و باوعت بعيونة ما احس بشي يربي ما اريد اظلمة وياي
گال هو بصوت هادئ
-لو تجتمع الارض وي السماء لو ينزل امر الاهي يگلي زمهرير مو الك اعاند كلشي و اخذج يول مصگوعة انتي بدمي تمشين عمري ما حبيت حرمة كد ما حبيتج ، عمري ما بينت حبي لاحد حتى لوالدتي كد ما تأبين حبي الج
-اجود ما افيدك تنظلم وياي تتعذب انا مو مناسبة الك
-اذا قربج اذية فگلبي يحب يتأذة و اذا بعدج راحة فگلبي يكره الراحة
-اسمع عقلك شنو يگول ولا تحكم بمشاعرك الي يحكم بمشاعرة يخسر
-عقلي من يوم ما شاف عيونج بعد ما يشتغل بح اختفى هسه مثل العاقلة ترحين للغرفة تنامين و تبطلين هاي الافكار
گمت من مكاني و مشيت ، احس گلبي يأذيني عليه ما يستاهل اجود وحدة مثلي يستاهل وحدة تحبه وحدة تقدرة وحدة تعرف قيمتة ، وكفت و درت وجهي عليه شفتة واگف وراي منتظرني اكمل مشي حتى يلحگني
-اجود انت تستاهل احسن مني ما تستاهل وحدة مثلي انا وحدة عقلها و قلبها مو هي تتحكم بيهن حتى لو فكرت بيوم من الايام احبك قلبي ما موجود حتى يحبك
ابتسم هو و گال
-ما اريد گلبج يحبني ولا عقلج اريدج انتي زمهرير تحبيني اريد زمهرير مو قلبها
بعد كلامة هذا ما كدرت اگول شي بعد كلامة هذا رحت للغرفة و هو طول الطريق ما فارقني و انتظرني منا لمن دخلت للغرفة ، شفت غزيل نايمة و تغاريد يمها ، رحت نمت و بالي يمه الله يهدي قلبي عليه
————————-
للحكاية تكملة ...
شكراً على التفاعل الحلو احبكم 💗
لا تنسون تتابعون حساب التيك bluecordelea