"وأد القلوب "
بقلمي: وردة خُزام
★★★★★★★★★
بــــــارت 36
اباوع مازن بوجهي!!
يابة من شفت وجهه كلشي بيه انعاد، مأساة ذيج الفترة ومعاناتها احس عبالك هسه دااعيشها، لو حرمانه الي لأبني الي لو شگد ماافرح وتضحكلي الدنيا راح يبقى غصة بگلبي ..
بقيت صافنة عليه ممستوعبه دااشوفه كدامي بعد كل هالوقت الطوويل، وشگد ماجنت كارهتة شوفته هسه زادت كرهي اله واشمئزازي منه ..
بصفنتي عليه اجتي ملاك سحبتني: تعاي مرت اخويه وين صافنة
سحبتني من ايدي وهو ع واكفته احسه هم مصدوم مثلي بهالصدفة.
دخلنا نضحك بس فرحتي تنغصت، گعدت والابتسامة ع وجهي، كملنا وطلعنا وشفته لسه واكف بمكانه ويباوعلي، مااهتميت وعبرته صعدنا بالسيارة
وعمر مشغل يا نبعة الريحان حني على الولهان ..
يستمع الها ويردد وي الاغنية ويباوع الجيهان
وبسوالفهم نسوني الي شفته قبل شوي، سووها حلوة من طلعوا اثنينهم حافظين الاعنية وكل واحد بيهم يحجي مقطع والثاني يرد عليه بالمقطع الوراه ..
جسمي نحل والروح ذابت وعظمي بان
ذابت وعظمي بان ..
من علتي البحشاي ماظل عندي راي
ماظل العندي راي ..
دائي صعب ودواي ما يعرفه انسان
وجيهان تردله:
ياربي مالي ذنوب الا هوى المحبوب
لاهو ذنب واتوب اغفر لي يارحمن
وعمر يردلها:
كم يوم انا مطروح ليل ونهار انوح
لاتعذبين الروح سوي علي احسان
وظلوا ع هالرنة لحدما خلصت الاغنيه ..
رجعنا للبيت تونا دخلنا واندك الباب رحت افتح صار همام بوجهي حجيت مبتسمه:
هلاوو حبيبي
ردلي بلهفة: هلا ومية هلا بهالوجه اليرد الروح
ولزمت الباب سديته ع النص وبضحكة ماكرة كتله :
- اتفضل اخويه شرايود؟
درلي يقلد ع حجايتي: والله يا اوووختي رايووود خواتي
ضحكت: ها لعد اتفضل
- لا يبعد روحي تعبان اريد ارتاح
عنكشت وجهي مواسيته: اوووي سوده عليه هاي ناز متعبتك؟
ابتسم وعيونه تشع نظرات تجننن: تموون بت ضلوعي اتموون
تسرسحت بحجاياته وكتله بصوت حنون مفهي: اروح فدوا الك همامي
ردلي يضحك: يابة وداعت شريفة عيب عليج تتحارشين برجال ع باب خطوبه!
حجيت بدلع وتذمر: هسه مكتلي شرايوووود
- دا اگووولج رايووود خوااتي
عفته ودخلت للبيت اضحك عابت يقلد ع سوالفي الازرك .. صحت للبنات وجيهان كلبت خلقتها
- اهووو شيريد هذا الاچلح خل يخليني متونسة
ضحكت عليها: باتي
- لا رجلي خطيه
ردتها ملاك تهز بأيدها: والله عمي زين تذكرتي رجلج
گمت وياهن وصلتهن للباب وهنه يداهرن بينهن
اجت ملاك بوستني وگالت: اي شي تحتاجين بس خابريني
ابتسمت: اكيد حبيبتي لعد اخابرمن
جيهان: اني ان شاء الله قبل الخطوبة بيوم اجيج
- هلا بيج يروحي افرشلج بغداد ورد
عافتني احجي وحدي الادبسزز وصاحت متذكره
- يااااا خل اودع عموريتي شو وخرن وخررن
دفعتنا وطبت للبيت
باوعلنا همام متسائل بملامح وجهه انوب كال: عموريتها منين هذا!
جاوبته ملاك: والله يخويه لازم تلحك عرضك لانه بده يتطشر
ردها: اي بالله شو چنها هيج السالفة
دقايق واجت، كالها همام
- ها ودعتي عموريتج؟
- اي اهيئئئئ شلون افارگة
تحجي وتسوي حركات بوجهه عود تبجي وضايجه
التفتلي همام: ناز بلا زحمة جيبيلي صونده
صاحت: لا اشاقة والعباس ابو فاضل اشاقة انت ومرتك مو مال شقة ابد نزوول عليكم!
اجت شهد والوجه معبس: شنو جيهان مراح تودعيني
حجتها وفتحت ايدها، راحتلها وتحاضنن العيارات ووحده تگول للثانية شلون راح افارگج!
ملاك غمتهن بأيدها، وهمام يباوع متفاجئ
كال: شهالعلاقات السريعة اشو عمورتي وناس تريد تبجي وشلون نتفارك، شبسرعه هيج قوت العلاقة!
ضحكت: والله حبيبي علمي علمك
فتحلي حضنه: شنو مراح تودعيني؟ حجاهه وغمز
رحت حضنته ووخرت بسرعة: عفية ليجون اخواني همام
- اريد واحد بيهم يفتح حلگة! حتى **** عرضهم
- روح حبيبي روح لا اتخرب الاول والتالي
تقرب باسني بخدي وصعد سيارته والبنات هم بوسني وراحن صعدن ...
ضلينا واكفين اني وشهد الا ان اختفت سيارتهم من گدامنا، حطت شهد راسها ع جتفي مبوزه
- ناز اذا ماتشوفيلي عريس يمكم انتحر
خليت راسي ع راسها وكتلها: اشوفلج حبيبتي اشوفلج بس اصبري علما احصل واحد حلو
رفعت راسها باوعت بوجهي طگيناهه بضحكه ودخلنا وسدينا الباب ...
جنه حيل تعبانين، صارت بوجهنا الحديقة وسخة وهوسه وكفنا اثنينا متخوصرين مومال انظف هسه ابددد، باوعت وحده بوجه الثانيه، تالي كتلها
- عوفيها للصبح امشي نصعد راح انام ع روحي من التعب والفرة
صعدنا كبل ذبينا روحنا ع الفراش، اجت شهد نامت ع ايدي وغفينا ...
فزيت بـ 11الصبح، باوعت شهوده فاتحه حلگها واتشوخر يمي، وخرت ايدي منـِْها خدرانه كلش
نهضت دورت تليفوني، نمت والنومه نومه حتى مااتصلت عليه واتطمنت وصلوا ...
فتحته لكيت كوومه مخابر عليه وداز رسائل، خابرت عليه وووين يلا جاوبني يحجي كوة مبين نايم
- ها حبيبي شنو نايم؟
-هممم
- اوك لعد كمل نومتك ومن تكعُد خابرني
طبيت للحمام سبحت وبدلت وتعطرت وخليت مسكارا وتنت لشفايفي وخدودي وتعطرت ونزلت جوه ..
حضرتلنا ريوك اني وشهد، دااسوي بالريوك ونزل عمر
التفتتله: شنو اليوم مافاتح الصيدليه؟
- لا
- ليش حبيبي؟
لزم گلبه وكال: گلبي يوجعني
عفت البيدي واجيته وملامح الخوف مبينه بوجهي
- شبيك عمري؟ شبي گلبك
- اااخ جيهان عافتني وگلبي يأذيني
باوعتله هذا صدك يحجي !!
- شبيك تخبلت؟
تجاهلني وكام يغني ..
اريدك بالحلم خطار مر بيه عشك اخضر
واتيه نجمه بسنينك ادور طيفك الما مر
خذانة الواهس من بعيد نزف شموعنه الشوگك
مشينه وايد تشبج ايد نناغي الروح بطيوفك
العمر من غير حب شيفيد لمني بعصرة جفوفك
ياريحه مسچ يا هيـل
عذبني ونين الليــل
عطت بي: كافي تجووعر منو ضاحك عليك وگايلك صوتك حلو؟
خزرني وگعد: الگبرر متسوين واهس! موزين اغنيلج
- اي موزين
جنت مسويه مخلمة واجبان وگيمر عرب وكاهي بابا جايبه، باوع للأكل وباوعلي
- هذا كله مااريده گومي سويلي طماطة لاچعة
نفخت معاجبني وگمت سويت وخليته گدامه وصبيتله چاي
عفته وصعدت الشهد اگعدها، وشلعت گلبي يلا كعدت، شهد شهوده حبيبي يلا گعدي سويتلج ريوك
وهي خلصتها هممم اي گعدت ..
وووين يلا گعدت مطت جسمها: صباح الخير
- صباحي انت يحلوو
يلا گومي نلحك ع الريوك راح يخلصه عمر
- يلا هسه اجي بس اغسل وجهي
نزلت قبلها، وعمر يباوعلي بنظرات شر
خزرته وگعدت
حجه: راح تتزوجين منو يغسل الاماعين بعد، منو ينضف
- وشنو خدامة الخلفوك اني!
- طبعا لعد منو سوالي ريوك هسه وهو ممنون
حجاهه ورفع حاجبه يغيضني، صحت بي:
- كافي لا احط راسك بالطاوووة!
ضلينا ساكتين وواحد يخزر بالثاني
نزلت شهد تفرك بعيونها: صباح الخير
رد عليها بدون ميباوعلها: صباح النور
شهد: شكو شبيكم من الصباحيات!
- داافكر اذا ناز تتزوج منو يخدمنا
جرت كرسي وگعدت وهي تكوله: صدك تحجي يعني انت شايل هم هاي السالفة بدل مااتگول البيت يفرغ علينا بدونج؟
راح اشتاقلج؟
- وليش اجذب اصلا راح نحلص منها
شهد: خوش نشوف ان شاء الله
كملنا اكل كبل ليكوم كال: شسويلنا غده؟
باوعتله بطرف عيني: بالبداية اهضم هالزقنبوت الاكلته انوب عود فكر بالغده
- تفوووو عليج
غميته بأثنين اديه وكمت ...
كمنا اني وشهد غسلنا البيت وراهه سويت غده تمن ابيض ومرك باميه، كملت عجبني اسوي سمج شوي
طلعت السمجات حضرتهن وشهد يمي تسوي بالمقبلات ..
حاجيت عمر: عمر گوم حضرلنا الجمريه خل اشوي السمجات قبل لا يجون خطيه تعبانين وجوعانين حتى نجهز كلشي ..
باوعلي بطرف عينه: امشي ولي مابيه حيل
عفته ورحت صعدت فوك عدنه تنور شعلته وخليت السمجات بي، لشوي صعد وراي ادري بي گلبه ميخليه يعوفني وحدي وخاصه لان طلبت منه.
اجه وكف يمي صرنه اثنينا قريب ع التنور منحس الا النار گبت من الصوندات الي يوصلن الغاز، هو بحركه سريعه دفعني للگاع، گبت النار بوجهه بسرعه طفه القنينة
كمت من الكاع مفزوعه واصيح بأسمه: عمررر ابتعددد لك ديربالك
اجتي شهد تركض شافت خبصتنا شهكت
اجه عمر يركضلي وره ماطفاهه سألني: خوما احترگتي!
باوعت بوجهه لزمتني الضحكه واحنه بذاك الحال هههههههههههههه حواجبه محتركه وشعره ضحكت
- شبيييج
- عزا عمر باع شعرك محترك
-سهله يمعوده وكف كلبي كلت راح نموت
نزلنا جوه وشهد جابت السمجات، ما مقسومات هي گوة!
گعدنا بالصالة نلهث من الهبطة وعمر كلما اباوع وجهه تلزمني الضحكه صار عبالك المريض الي يوكع شعره اسم الله، حواجبه شعره ،شعر اديه ...
اجت ماما هاي وقت جيتها طب وسلمت
ردينا عليها السلام
استغربت الوضع صاحت: شكوو شبيكم مصخمين وانت عمر هاي شصاير بحالك!
سولفنالهه ضلت ترزل بينا: شوداكم للتنور ...التفتلي ناز مو تدرين صارلنه سنين مذبوب وتاركيه شوداج اله اليوم
- شمدريني ماما عود دااسوي سمج
- اووف منج هسه اذا صار شي عليج لو على اخوج بيمن ربحي بالسمج!
- سهلة ماما عدت ع خير
لشوي واجه بابا وهم نفس اسطوانه الرزاله وشوي زايد عليها
بدلو وصلوا وصبينا الغده وكعدنا نتغده ..
مشى هذا اليوم عادي وثاني يوم هم مصار شي جديد ...
وباجر حفلة خطوبتي ..
الصبح خابرتني ملاك تسألني شنو حجزت شسويت؟
كتلها: كلشي ممسويه لسه
شافت صوتي شوي وابجي كالت اهدي هسه اني جايتج ونجهز سوه ..
بيومها حيل ضجت امي ولا اهتمتلي راحت لدوامها ولا عبالك خطوبة بتها ونغم ماسائلة عني
لهناك اجتي شهد بوستني وگعدت، شافت خلقتي مگلوبة كالت
- شبيج وجهج معفوس؟
حجيت مدمعه: شهد كلشي ممسويه ولا محضرة
شهد: فستان همام جايبلج، والصالون هسه نحجزلج
- اي والضيافة والتحضيرات وكلشي منو يسوي؟
ماما شلون تعوفني وتروح غير اتساعدني؟ وامج عود اختي الجبيره ومالها غيري، كلهم محد بيهم مهتم الخطوبتي
حجيتها وكعدت ابجي .. يعني بربج عروس تروح تجهز كيك وعصير وضيافه!!!
مو المفروض اهلي ويلي لج ماما حتى ماسألتني بالجذب شراح تلبسين شجهزتي
استهضمت حيل وشهد خطيه كعدت تسكت بيه وتكولي اني يمج وهسه نجهز شيرادلها شو البيجات تارسه الفيس ونوصي.
تمددت ع الكرويته بالاستقبال وشهد طلعت مدري وين ،شوي واندك الباب رحت فتحته ملاك اجتي ..
طبت للبيت: اووي شبيج هيج معبسه
بجيت بسرعه
وكتلها تعاي طبي طبي
دخلت وتسألني: شبيج حبيبتي صدك تحجين ع شنو البجي!
كعدت ع القنفة وابجي وهي تهدي بيه، بس من صدك بوقتها حيل ضجت واستهضمت من امي
لهناك هدأت شوي، كتلها خلي نتغده وللعصر عود نطلع نجهز
كالت هي: هاهيه لعد انتي ارتاحي واني اكوم اطبخ غده
كامت سوت دجاج، اجيت يمها
- ابو وجه الفاهي مياكل دجاج
- هههههه يدلل اسويله بيتزا
سوت بيتزا لمهيمن وشهد نضفت البيت واني كاعده اتصفن وحاز بخاطري موقف ماما، وهاي مو اول مرة بذيج خطوبتي هم رفوله احتارت بيه وساعدتني بكلشي، وهسه المفروض هالشي تقوم بي نغم بس مدااعرف شبيها هيج ابتعدت شو اول مااجو خطبو طايره بيه وبهمام وتحبه ومكيفه اله ..
كمل الغده وصلينا .. اندك الباب
كتلها: ملوكة عفية فتحي الباب
ملاك: لا انتي فتحي خاف اخوانج عيب
كمت فتحت، طلع بوجهي شاب
- العفو اختي حضرتج ناز؟
- اي تفضل
- هاي الطلبيه الج تفضلي
عكدت حاجبي: بس اني مطالبه شي!
- من زوجچ
استلمت الطلبيه وجانو كراتين كووومه، صحت البنات يشيلوهن وياي
طببناهن للأستقبال
سألني: شنو هالكراتين شنو طلبتي تجهيزات؟
-لا يول مادري حالي حالجن ابو التوصيل يگول هاي من زوجچ
فتحناهن جان طالب كيك جاهز مقطع 6كراتين كل كارتونه بيها 60 قطعه
وكارتونه جبيره فتحناهه بيها كيكة كلش جبيره 4طوابق بيها رسم حلقات ومكتوب عليها "اخذت بت ضلوعي "
ابتسمت وردت الفرحه بوجهي
اخذوهن البنات يخلوهن بالثلاجة واني فتحت بقيه الكراتين جانت اكياس جوكليت ومكتوب علـّۓ. كل كيس( ناز &همام )
يطلعون ب 100 كيس
بعدني دافتح بيهن واندك الباب ..
رحت فتحته هم شاب
- بيت ابو احمد؟
- اي
- تفضلي هاي طلبيه الكم
استلمتها، علاليك 3
طبيت للاستقبال سألن ها منو؟
- هم ابو التوصيل
حجت شهد وتحرك بحواجبها :والله عمي طلع همام يفتهم
خزرتها: يفتهم غصبا عليج
- ها شوو طلع لسانج، قبل شوي جنتي تكسرين الخاطر
- محد يحس بيه غيره اروح فدوا لحبيبي
فتحنا العلاليك جانن حذاء كعب اسود
والعلاكة الثانية كعب احمر يجننن
عاطت شهدد: والله ذوقه حلوو الازرك!
عفتهن وكمت اتصلت بيه
- حبيبي ليش هيج متعب نفسك
ردلي ومن صوته مبين مبتسم: اذا مو الح اتعب چا المن اتعب، عجبوج حبيبي؟
- يخبلن همام يخبلنن
اندك الباب: لحظة همام الباب يندك
ضحك: روحي تره اليوم الباب مراح يسكت
ضل وياي ع الخط وهم جان ابو التوصيل اسلمتها وحجيت بضوجه
-شنوو هاي همام تره والله ميصير هيج!
- اشش لا تحجين شي اني وياج واحد
دخلت اضحك كتلهن: بدون لتسألن هم ابو التوصيل
ضحكن واخذن العلاليك يفتحنهن
داز فستان احمر قصير وضيك من الصدر وبدون اردان هيج لزك ع الصدر ،بس شنو كلمة حلو قليله بحقه يموووت الفستان!
مبهوره بالفستان واجاني صوته :ها عجبنج؟
- يخببببل
والعلاكة الثانية فستان اسود طويل نازك ومرتب ..
- وفستان الخطوبه اليوم يوصلج بالليل نـًسّْيـت ذاك اليوم انطيجياه
- ماكدرت اشكره غير بدموعي، تصرفه حيل كبره بعيني بوقت الي جانو اهلي ملتهين عني هو مانسه هالتفاصيل وفرحني
ضل يسكت بيه ويكولي اني سويت هيج حتى افرحج لو ابجيج؟
كال: ترا حاجزلج صالون انتي والبنات .. وانطاني اسم الصالون
ردت احجي لان فعلا صارن هواي مو هيج! ،يعني لعد اني شدفع كله هو جهزه
بس كلت: همام ..
قاطعني: اشش روحه الهمام لا تحجين شي ولج اذا مو الج اتعب وافرحج چا شنو سبب تعبني وشغلي!
سكتت بس نوعا ما ضجت لان خجلني
هو حس بيه كال: يلا هسه اريدج تشغلين ساجده وتركصين
-هههههههههههه تدلل عد عيناك
سديته منه والبنات استلموني
- بعد شتردين عيني كلبتيها فاتحه علينا
- بسس يلا كومن نركص
ملاك: ياعيني اروح فدواا للفرحان
شغلنه الديجي وعليناه اجيبك للدرب كتلك اجيبك
ونركص ملاك اخذها الواهس ونست روحها، نركص وصارت عيني ع الباب احمد منتجي ومكتف اديه ويتفرج
شهد شافتني وين اباوع بسرعه بطلت، وملاك خطيه متدري مستمره تركص انوب كامت تذب شعرر
احنه لا نگدر نأشرلها هي ناسيه روحها وداخله بعالم بس هي وخالتها ساجده، لهنااااك وانتبهت احنه مو يمها
حجت: شبيجن؟ حجتها وباوعت للباب
شافت احمد وجها انكلب اصفررر وشردت ختلت وراي
هو ضحك وكال: اني صاعد بويه اخذن راحتجن
عافنه وصعد ..
وهي اسلمتنا: حقيرات والله! ليش مااشرتلي حجيتن هااا؟؟
ضلت تفتر وتحجي: شگد عيييب ياربي هسه شيكول عليه خفيفة، شبيه اتخبلت نسيت روحي
-لا تكبرين الموضوع عادي والله، وترا احمد مو من هالنوع
- لج ناززز شنو عادي يربي لسه من اذكر شلون صافن بيه اخجل من نفسي
رحت لزمت ايدها: كافي عاد ملاك! ،عفيه لتخربين واهسنا كتلج عادي والنبي
- لج لو مهيمن عمر عادي بس هذا اخوج يختلف هذا حقنه
شهد: والله لو يسمعج هذا الحقنه الا يعلگج بالبنكه
نزل هو مبدل هي بسرعه نزلت راسها
حجه: تعاي بويه ناز تعاي خل احضنج باجر مااحضر خطوبتج
برطمت: ليش احمد
- عندي واجب بمكان بعيد
- يعني ضروري الا باجر!
- اي ضروري لعد شلون
حجاهه واشرلي دتعاي
رحتله حضني وباس راسي: الف مبروك بنيتي زواجه الدهر ان شاء الله ،وماتشوف عيونج غير السعادة
- يوم الالك ونفرح فرحتنا الجبيرة
ابتسم وباسني بخدي، ولزم ايدي خله بيها 5 اوراق
- هاي الج سوي بيهن كلشي بنفسج
- ياا احمد ممحتاجه والله
- ميخالف حبيبتي سوالفجن انتن البنات متخلص
ضحكت وابتعدت ع صفحه شوي .. فتح ايده لشهد
- ها ولج متجين تحضنين خالج؟
راحتله حضنته باسها براسها وانطاهه ورقتين ..هاي الج حبيبة خالج
ابتسمت هي وكالتله: خالو والنبي ما محتاجه شي
- الا محتاجه يعني؟ ضميهن يمج من تحتاجين عود
باوع الملاك وهي خطيه مارفعت راسها ابد منحرجه منه وهي منا خجوله
وجه كلامه الها: وانتي بويه محتاجه شي؟
رفعت راسها: ها وياي؟
- اي وياج
دنكت وكالتله: لا سلامتك ماتقصر
كال: يلا لعد اني طالع كملن ركصجن .. حجاهه وباوع لملاك يضحك وهي وجهه كام يضرب الوان
طلع وطلعت وراه للباب ودعته وسديت الباب وراه ...
للعصر كلش يلا رجعوا اثاري جانو معزومين يم بيت عمي .. واحنه هم من انتظرناهم ومااجو صبينا واكلنا ...
وشهد كالت نروح للصالون نسوي تنضيفات وترتيبات
كتلها: خل يجي مهيمن وياخذنا
لشوي واجه مهيمن، شاف ملاك صاح
- اگول اليوم البيت منورر!
ابتسمت: منور بأصحابه خويه
باوع بوجوهنا كال: شو صنطة! توقعت الگه البيت مكلوب ملهى
ضحكنا ... كتله: دا نركص وطب احمد وبطلنا
- ها يله صبلي غده ميت جووع
ملاك: سويتلك بيتزا
-فدوووه لأيدج، ديلا صبن علما اروح اجيب ببسي واجي
صبينا وهم كعدنا انقش وياه
سألني مهيمن: اي ناز شسويتي ما سويتي ..حضري نفسج بالليل نطلع نجيب شغلات الضيافة وشتحتاجين
- ميحتاج جابولي
- منو جابلج
- همام موصي توصيل وجابولي
- ها ..لعد شنو عوزج بعد
- ماعايزه شي بس نريدك تاخذنه للصالون
- نازز وربج تعبان ميت، انتي اخذي سيارتي وروحن شعليجن قابل لو ماتندلن؟
- مادري بس ماعدي الجرأة اطلع وحدي
- غير البنات وياج
- مادري والله
حجت ملاك: اني عندي اجازة سياقة واسوق بدالج
- هاهيه لعد وين ماتردن روحن
كملنا غده ومهيمن خطيه مبين عليه تعبان كبل صعد الغرفته
وكفت اغسل بالاماعين والبنات يمي يعزلن، دقايق ونزل، اجه يمي
- هاج حبيبتي هاي الج اشتري الي يعجبج خله بأيدي 500 الف
مقبلت اخذ: وداعت عيونك عندي واحمد هماتين انطاني
- دهاج اخذيهن ميخالف اعتبريهن هدية خطوبتج
مقبلت ورجعت اغسل اماعين، مااحس الا داحسهن بصدري!
فتحت عيوني: ايااا عاررر!
ضحك وكال: بلا ذني ماالهن نيه يكبرن؟
حجيت من بين سنوني: لاااا
ملاك حارت وين تودي وجهها خجلت متدري بسوالف ابو وجه الفاهي كلها طايح حظها
وشهد ميته ضحك
راد يطلع من المطبخ وكفتله شهد سدت طريقه
كالها: خيرر؟
- وررق بسرعه ... تحجي وتركص بحواجبها اله
- شورق ك ... خالتج
- والنبي يامهيمن اضل ادعي عليك
كتف اديه وكاللها: اي بالله شتدعين عليه؟
- كون اتطيح بوحده عوره عياره ام سحوره
- تففف عليج بيش مفاولتلي
- لعد ورق بسرررعه
- ومررض اصعدي اخذي من الجراره 100
- بس!
- لعد شگد تردين
- الخير ومدت ايده
- يلا اخذي 150
باسته بخده ورفعت راسها للسكف وفاتحه اديها: روح يا مهيمن ياابن مريم عسى ربي يوكعك ببنيه بت حلال عيونها زرك
ضحك وكفخها على راسها: خررب عرضج والله مصلحچيه
ركضت هي قبله جابت الفلوس واجت
حجت ملاك: ناز اخوانج حيل يحبونج مبينين
رجعت اغسل ورديت عليها: همه الشي الوحيد الحلو بعائلتي، تنهدت وكملت .. هسه منو الفقدني امي؟ ابويه؟ شو حتى اختي ماكلفت نفسها تجي تسألني شمحتاجه .. وماما هسه تشوفين تجي من الدوام تلف راسها وتنام وتعاي عاتبيني اذا سألتني شسويت شجهزت ..
- معقووله؟
- هسه تشوفين بعيونج
خلت ايدها ع جتفي: لتضوجين حبيبتي هياتنه يمج
شمرتلهه بوسه بالهوى وهي شمرتلي وضحكنا
اجه عمر الدايح صوته يلعلع: هلاااا بملاكي
ضحكت وردته: هلا بيك وبطلتك ابو عميره
- لعد شنو جيهان مو وياج!
ضحكت: لا
لزم گلبه: اخخخ گلبي شلون طاوعها گلبها
اتعوفني
كالتله: منا لبعد شوي تجي
- الله احلى خبر سمعته بحياتي
باوعلي كال: يمه فدوه عروستنا تعاي ولج مشتاقلج
- وخرر مني لا بالچفچفير
غمني: دولي عود كلت عروسه وخطيه اتغزل بيج بس وجهج مو مال غزل
- اي وجهي مصخم مثل وجهك
راح يكلب بالگدور ويحجي: شمسوين غده اليوم
- احريشي
- صبيلي حريشي ميت جوع
كالت ملاك اني اصبله، صبتله واخذته اله بالصاله
كملنا المطبخ ورحنت كعدنه يمه سأل ملاك:
- باجر هم يجون گرايبكم؟
- مدري والله بس شي اكيد يجون
- اممم عاد عدكم بنات حلوات
ضحكت: نص ونص
- خوش لعد اني ابقى واكف بالباب وهسه اروح ازين واسبح بلكي احصلي وحده حلوه
كتله: عزززا بعينك يالزاحف
- ولج عجزت محد تقبل بيه يا بنيه اصاقدها وره اسبوع تنخطب
ملاك: هههههههههه خوش تفتح قسمة البنات لو اني منك افتحلي محل واكتب عمر لفتح القسمه والنصيب
ناز: لا تضوج حبيبي هاي حال الدنيا
عاط: ناززز يادنيا يا دنيااااا
- ومرررض اني شعليه تصيح عليه
- اتخيلي اتربط بوحده وطبات وطلعات واعدها بزواج ومن غير الهدايا التقط بيه تالي متالي طلعت متزوجه وعدها 2 جهال!
متنا ضحك
- اي بر ... اضحكن اضحكن
وي اذان المغرب راحت شهد تفتح الباب ومانسمع غير الهلاهل ترست البيت
عرفناهه هاي جيهان
طبت للصاله تطش جوكليت وتهوس
عمر كاملها: هلا بعافيييتي
وهي ترده: هلا برووحي
-اشتاقيتلج
-خاب طاك گلبي عليك
تعال گابلني خل نهوس اني وياك: گلللووووش فصوص روبه يا حلاها وين دورها ولگاها
وتكابلو يهوسون ويهلهلون، ابنها وياهه الطفل مصدوم بأمه وهي مو يمه اصلا تهوس بعباتها وتركص
رحت شلته وبوسته: تعال حبيبي لتخاف هاي امك طاگه فيوزاتها
تعبت من الركص واجت عليه: هلا بگلبي هلا بجنتنا انوب حتى ماتنطيني مجال ارد عليها اكلتني اكل بسلامها
نزلت ماما وسلمت عليها، كلتلها شهد: بيبي تردين اصبلج غده
- لا مااشتهي
لشوي اترخصت وكالت: يلا حبيبتي ناز اهتمي بضيوفج اني صاعده انام تعبانه شوي
باوعت لملاك فهمت قصدي .. ماحاجيتها شي بس الدمعه بطرف عيني، ضلينا كاعدين والبنات انطلقن هنه وعمر سوالف وضحك بس اني تغير مزاجي بعد حجاية ماما
ملاك حست بيه اجت يمي: عمري ناز لتخربين مزاجج يمكن تعبانه وبعدين انتي ممحتاجتلها شو اخوانج الله يحفظهم ماقصرو وهمام واحنه يمج
- حتى حجايه ماكلفت نفسها
- سهلة لتقهرين روحج
حس عليه عمر اجه يسألني شبيج وشگلبج فجأة؟
كتله مابيه
ماصدك ضل يلح
كتله ابد كلشي مبيه
كال براحتج
وره العشه صعدنا نبدل حتى نروح للصالون وجيهان گالت
- اني عوفني خل اشبع من عمورتي
وهو يكلها بصوت ذايب عود: يا بعد روح عمورتج كومه ضاملج سوالف محد يفهمني غيرج
هزينا ادينا وصعدنا .. بعدنا ع الدرج ونسمعه يگلها
- عوفيهن خيولن مضغوطات من حبنا
حجت ملاك: هسه بلة شنحاجيهم ذوله!
- عوفيهم خيولون امشي نبدل
بدلنا ونزلنا وملاك اخذت مني وغيرت ملابسها
لگينا ذوله بعدهم يسولفون ويضحكون
حجيت: جيهان شنو تروحين تبقين يم عمورتج؟
باوعت العمر وكالت: والله مابودي اعوفك بس لازم اغير شكلي
- يبعد روحي ترحين وترجعيلي بسلامه
- والله يا الله مو رايحه حرب هيه!
وهي تردني الادبسزز: عوفك منها بيبي تغار هاي.. يلا ديربالك ع روحك
هزيت ايدي اضحك وطلعت كدامهم شغلت السياره
صعدن ملاك وشهد واجت جيهان تخوصرت وكالت: انتي تسوقين؟؟
- اي
- يمه تردين تموتيني انتي اشايفه من عمري
ملاك: تعرف تسوق اصعدي لا تأخرينا
- راح اصعد بس اذا صار شي عليه ذمتي برگبتج
ضحكت: ميخالف بس اصعدي
صعدت وتقره ايات مدري ادعيه وكالساع وعاطت: ناز على كيييفج
نازز انتبهييي ... يبووو تندمت ع الساعه الكتلها بيها تعاي ويانه لو مخليتها يم عمورتها!
وصلنا الصالون جان ازدحام عود هاي ليل مااتوقعت هيج
البنات كالن: زين اذا طلعنا ب 2بالليل ع هالازدحام
حجت جيهان: معليجن يمي ودكت صدرها
راحت لأم الصالون مدري شحجت وياهه وانطتها فلوس واجتنا تتمضحك
كنالها: ها؟
- هسه تشوفن
فعلا دقايق واجنا 3 عاملات: اتفضلن يا اهلا وسهلا
فرغلنا مكان وكعدنا، شاورتني ملاك: مگرود يالماعندك فلووس عفية بلد كلشي بالفلوس!
- اي والله ماعدك فلس ماتسوه فلس
ضحكنا واستلمنا ..
اكرلك ع تنضيف بشره ع وضربت ابر توريد ونضاره
والبنات كذلك سون الي يعجبهن، جيهان صبغت شعرها ثلجي وحفت
وملاك خصلته ابنفسجي واضافر سوتهن
طلعنا من الصالون ب 10 من الليل هلكانين تعب، عبالك داخلين معركه مو صالون
صعدنا بالسياره كالت جيهان: هالبت احد ذاكرنا مخابرنا سائل علينا!
ملاك: اي والله عبالك منبوذات محد بالجذب رفع تليفون وكال وين ولت هاي النسوان
دنحجي وخابر همام، ضحكنا
- ها يحلوو وين مختفي وناسي حبيبك
- هلا حبيبي ستوني طلعت من الصالون والبنات وياي
- ها ديلا ديرن بالجن ع نفسجن
- اوك
سديته منه ... كالن البنات تأخرنا تأخرنا خلي نروح نتعشه فد مرة، رحنا للمنصور هذا المطعم متعودين دائما ناكل بي
بعدنا بالباب وشفنا همام هو وعلي ابن اخوه مدنكين ياكلون
حجت جيهان: امشن بسررعه قبل لا يلگفونه اطلعن ولجن انريد نكضي وقت وحدنا
درنا وجوهنا بسرعه نريد نفلت اجانه صوت همام
- نازززز
درنا كلنا سوه وع وجوهنا ابتسامه مزيفه مال واحد فشلت مخططاته
- هههه هلوو همام
- وين رايحات تعالن كعدن ويانه
خضعنا للأمر الواقع وكعدنا وياهم ع نفس الطاوله
همام صافن بوجهي واحنه كاعدين بصف بعض همستله
- عفية حبيبي والله دتخجلني
- شطالعه ولج جنج العافيه
ضحكت ودنكت
- تخبلين وشريفه جنج لعابه
- كافي هماااام عيب
طلبو البنات الي يردو واني كذلك بس انتبهت العلي يباوع الشهد بس امانة الله شهد مارفعت راسها ابدد
عبالي خفيفة تالي طلعت بس بوخة
خابرني مهيمن، كتله دنتعشه
كال جيبلنا عشا وياجن اني وعمر
بدينا ناكل
تقرب همام همسلي: چنه موبس احنه راح نعرس
- شفت الي اني شفته؟
هز راسه يضحك بمكر
- غلس
باوعلي مبتسم بشيطنه: افااا اغلس موو!
التفت العلي: علاوي حبيبي عيونك راح تطلع على كيفك
علي لو تعصرينه ماتلكين قطره دم بي حار وين يودي وجهه سكت ودنك ياكل
ندستني شهد
- ها شكو؟
- خل انروح تأخرنا
- يلا بس خلي البنات يكملون
كملت رحت غسلت وتوجهت احاسب، دااحاسب الولد وحسيت ع گرصه بخصري
شاغت روحي التفتت همام، ضل مستمر گارصني ويحاسب بالولد، حسيت اللحم اجه بأيده
مااكدر احجي بس من الوجع نزلت دموعي، قبلها مغثوثه مـــِْن امي ونغم وهو اجه كملها مااتحملت بجيت، دفعته حييل
وطلعت اركض، صعدت السياره وقفلتها اجه وراي يدك بالجامه ويصيح افتحيييي
اتجاهلته ولا عبالك ديحجي وياي
اتصلت ع جيهان كتلها يلا طلعن اني بالسياره منتظرتجن
طلعن البنات فتحت القفل وصعدن، هو واكف دااحرك السياره ومااحس الا انضربت الجامه والجام طفر ع وجهي والدم بده ينزل من وجهي
البنات تخبلن ضلن يصرخن
- لج نازززز وجهج دينززف
احس وجع برجلي مو طبيعي، باوعت گزازه جبيره نابته بيها.
هو شافني هيج اتخببل فتح الباب وشالني خلاني بسيارته، ملابسي انترست دم والوجع موتني
شخط السيارة 200 يمشي ويغلط ع كل واحد يصير گدامه، من شفت عصبيته خفت ماحجيت شي رغم هو الي انگلب فجأة ومااعرف شبي!
وگفنا ازدحام بغداد وهو بس يسب ويغلط، لزمت ايده
حاجاني والخوف بعيونه: اصبري راح نوصل اتحملي
- همام اهدئ مابيه شي رجعني يله، هسه انضفها بـ كلنكس واوصل للبيت اعقم الجروح رجعني يله
باوعلي عيونه مدمعه ماحجه شي فر السيارة واخذني لكورنيش الاعظميه
نضفت وجهي بكلنكس بس الدم ميوكف بقه ينزل والكزاز بعدهي برجلي
اخذ الكلنكس من ايدي وصار هو يمسح الدم من وجهي
- همام؟
- اممم ... ميباوع بوجهي يمسح ويحجي
- طلعها من رجلي
رفع عينه بعيني ونظرات الندم واضحه: مااكدر ناز
- تگدر، حبيبي طلعها دتأذيني
استسلم وبده يطلعها، غمضت عيوني والوجع بگلبي
وره دقايق فتحت عيوني لكيته صافن بوجهي ودموعه ع اي لحظة توكع
- شبيك همام ليش هيج سويت؟
دار وجهه مِڼـّي: مااتحمل احد يباوعلج غيري
- منو مباوعلي!
- من گمتي تحاسبين ولد اثنين واحد يگل للثاني مو بنية ضيييم
سكت وتنهد وكمل .. ردت اعاقبج وادري مالج ذنب بس مو بأيدي، وارجعلهم اراويهم الله بعينهم وحق شريفة بنت الحسسن!!
سكتت ماحاجيته
ضلينا ساكتين وكاعدين بسيارتنه الي طابگها كدام الكورنيش
فززنا صوت موبايله جان علي ديخابره يسأل عن مكانه
انطاه مكانه وكله جيب البنات وياك
رجعنا ع سكتتنا مديت ايدي شغلت المسجل طلعت اغنيه
كل دقيقة وانتي روحي
كل ثواني وانتي حبي
...
بقينا نستمع للأغنيه
ودموعي تنزل بهدوء مااعرف احس دائما لازم يصير شي ينغص فرحتي لازم هالشي لا بأيدي ولا بأيده
وصلوا البنات خطيه يتراكضن خايفات عليه وشهوده حضنتني وتبوس بيه
كتلهن هياتني كدامجن مابيه شي
حجت جيهان: لج عيني عمر اجه يگلبنا كالساع مخابر
- يلا امشنا
مشيت حجه علي: الحمد لله على سلامه نونه
- الله يسلمك
اخذتني ملاك اتجيلي للسياره كعدتني بالصدر والبنات صعدو ليوره وهي تسوق ..
ضل هو بسيارته مانزل درت وجهي منه ومشينا ..
الطريق كله ساكتات ماحجينا وصلنا للبيت عمر ومهيمن واگفيلنا بالباب
فتحولنا الباب طببت ملاك السياره اتلكونا يضحكون بس نزلت وشافوني انخطف لونهم!
ركضولي: هاي شصاير شبيييج؟
حجيت اطمنهم :مابيه بس دااسوق ومدري منين اجت طابوكه ع الجامه وانكسرت وتأذت رجلي ووجهي
ضلو يكلولي ليش مارحتي مستشفى
كتلهم ماتسوى مابيه شي
طبيت للصاله وهمه وراي شلون وشصار واني روحي مطايقتها
كتلهم: فدوه تعبانه لحد يسألني
عمر جاب علبة الاسعافات واجه يعقم بالجروح وشاف رجلي
كال: هاي يرادلها خياط تحجين صدك! وتگولين ميحتاج طبيب ومستشفى
- مو انت دكتور خيطها
- بس ماكو تخدير
- ميخالف اتحمل
- ولج تتأذين شبيج تخبلتي توجع
- حجيت من بين سنوني كتلك اتحمممل!
سكت ماحجه شي جهز الخيط والابره واحسه متوتر اكثر مني وايده ترجف
- غمضي عينج
اجتي ملاك حضنتني وضمت راسي بصدرها
بده يخيط وطلعت سالفه اتحمل من اذاني كمت اصررخ من الوجع على صوتي اجو اهلي يركضون مرعوبين
انوب الادويه صار فتره تاركتها ومن الصريخ احس گلبي كام يوجعني عرفت مراح تعدي ع خيرر ...
كملت شالني مهيمن وصعدني بغرفتي، اجتي ملاك يمي طلعت مهيمن وبدلتلي ملابسي
وتلفلفت ونمت ...
بس من الوجع ماغمضت عيني، ضليت بفراشي ودموعي تنزل، الغصه البصدري هاكبرها واكثر شي حاز بخاطري موقف امي حتى بعد ماشافت وضعي تصرفت عادي، ملاك الي امس عرفتها كالساع تصعد تشوفني وهي ولا وصلت!
بهاللحظة حسيت بأحساس غريب امي مو مثل الامهات وحتى الي حبيته ومعتبرته سند كل يوم يكسرني. بكسره اكبر من القبلها ..
وسط تفكيري وانفتحت الباب غمضت عيوني اتظاهر النوم، حسيت على انفاس صارت تضرب بوجهي وراهه صارت بوسات تتوزع بخشمي بخدي بكل مكان بوجهي
صارت دموعي تنزل ومغمضه حييل
حجه: افتحي عيونج ادري بيج گاعده
فتحت عيوني وكلشي بيه يريد حضنه ماسيطرت ع نفسي بسرعه شمرت نفسي بحضنه
حضنته حيييل وبجييت، ليش يكسرني وارجع احضنه واشكيله منه؟
ليش هالگد متهاونه ومتسامحه وياه؟ !
ضل يمسح ع شعري وظهري ويسكت بيه
- همام ليش دائما تأذيني باع وجهي باع رجلي لو خصري الي صاير ازرك!
داافهم شنو ذنبي، هذا حال عروس هذا عبالك طالعه من انفجار!!
ساكت ميحجي نزل على ايدي باسها: صح ماالي حق احجي شي بس اسف
صحت بي: كل مرة تكول اسف كل مررررة وتوعدني تمسك اعصابك وترجع تعيدهااا
همام تعبتني هاي بدايتها وهيج شلون لو اتزوجنا؟
هم تبقى تضربني ع الصاعده والنازلة
ميحجي شي بس منزل راسه ... كملت
- همام اذا تضل هيج مااعيش وياك اني
ميحجي شي بس لازم ايدي ويبوس بيها سكتت ماكو رده فعل منه
سحبني لحضنه عصررني حجيت
-همام
-روحي
- اختنكت
عافني .. لزمت وجهه بين اديه: ليش منايم
- شلون انام وانتي زعلانه وهذا وضعج
- من ايدك هذا حالي
لزم ايدي: وعد راح اغيير من نفسي واحاول امسك اعصابي
-ووعد؟
لو مثل كل مره!
- وداعت عيونج الاحبهن
ابتسمت: اوك حبيبي يلا هسه روح نام
من ابتسمت بوجهه تغيرت ملامحه واتحمس: باجر تصيرين مرتي
دنكت: اي
- بت ضلوعي تصير الي وحدي ومااشوفج بالختلات بعد
ضحكت: على طاري الختلات شلون صعدت الغرفتي؟
- جيتت من الحديقه وطبيت جني حرامي اتختل .. غمزلي حتى تعرفين معزتج بگلبي ماكدرت اغمض جفن وانتي زعلانه مني
- لا والله !
ترا انت الي مزعلني خاف متدري
- لا بوويه ادري ومعترف بغلطي واجيت اطلب رضاج
رفعت حاجبي اي خاف عبالك
- اخخخ بوويه شلون بهالعيون الملونه الشاله حالي!
ضحكت
- اي اضحكي اضحكي واني حالي بالضيم
- ابجي لا ترضى اضحك لا ترضى حرت وياك يهمامي
حضني لگلبه وحط راسه ع راسي:لا تحيرين يجذوع گلبي اني اريدج تضحكين وبضحكتج ينتعش گلبي
شددت حضني اله انوب تذكرت
دفعته يلااا كوووم اريد انام
ضحك: والله عيب عليج تطرديني
- همام والنبي ميته نعاس بس جانت غصه بصدري مانعتني انام
باوعلي وهسه؟
- هسه كُلشش مرتاحه
يلا يلا كوم ازعجتني بهالليل شلون ناس متستحي اوووي!
گام يعدل بملابسه: ولج والله بر ... صوجي اني گلت خطيه تنام مقهوره
سويتله: ننننننن
- امووووت بالـ ننننن دنك باسني بخدي وغطاني وطلع ...
نمت مرتاحه بسرعه غفيت ...
الصبح كعدوني البنات، كمت سبحت وشسورت شعري وبدلت ونزلت الكل جان ملتم
صبحت عليهم وكعدت اتريك
كملت وكلت لمهيمن اذا ماعندك شي وصلنا للصالون
كال صار
حجت ملاك :صدك ناز تره همام جاب الفستان مالتح من الصبح وخليته بالاستقبال
هزيتلها راسي
كمت اريد اغسل اجت نغم كالت: صباح الخير
مجاوبتها اني همه ردو عليها
باوعت لوجهي كالت: شبي وجهج ناز!
جاوبتها ابرود: انجرحت
- بيش انجرحتي؟
تجاهلتها وعفتها وكملت طريقي اغسل ..
اسمع البنات وراي يحجولها الي صار، والصدمه ماما ولا عبالك اليوم خطوبتي بدلت وراحت للدوام!!
البنات ضلن يباوعن بوجهي مااهتميت
كتلهن: يلا امشن رجلي موتتني
رجلي اعرج قليل من امشي عليها
وصلتني ملاك للسيارة ورجعت جابت الفستان والحذاء خلتهن بحضني وتوجهنا للصالون ...
الطريق كله ساكتين خررب واهسنا وين امس ووين اليوم، باوعت لنفسي بالمرايا وجهي كله شخوط بله وجه عروس هذا!
وصلنا للصالون قبل لننزل كال: بس تكملن خابرني
دخلنا والبنات بسرعه عرفونا واستقبلونا مو البارحه جنه يمهم ..
باوعن بوجهي وانصدمن: يا عزااا شبيج
كتلهن: من طلعنا منا سويت حادث
ضلن يتحمدلي بالسلامة وكالن لا تهتمين وداعتج انطلعج گمرر وهالجروح بسيطة نخفيها بالمكياج
وفعلا شغلهن فنانات بحيث ضيعن كل الاثار حتى الخدوش البسيطة
طلبت تسريحه بسيطة وعفته ع طوله مبروم
كملنا مكياج ولبسني الفستان فد شي! يجننن ولا غلطةةةة
طلعت من غرفة التبديل جيهان كامت تصلي على محمد، والبنات الي بالصالون كالن ماشاء الله طلعتي تحفة
البنات كالن احنه نبدل بالبيت عاد خابرت مهيمن يجي علينا
اجه اخذنا ومن طلعت بس خليت شال ع صدري، مهيمن كام يصوفر ويكولي
- ولك جبّير ماعرفتك طالع تكتل!
- دنجب يلا
وصلت يمه ضحك وكال: ولج شنو هالجمال كله
- اول مرة تحجيلك حجايه بيها حظ
- مو اعرفج والله مااتغزل بيج من هاي سوالفج
وصلنا للبيت جانت كومه سيارات بالباب طبينا للمطبخ عماتي وخالاتي سلمت عليهن وطبيت للصاله، شفت وجه الطاوة رحت سلمت عليها وبست راسها وايدها
ابتسمت وكتلها: شنو رأيج بيه بيبي؟
- خايب اغدي فدوه لوجهج يبيبي تخبلين ناقصج شي واحد
- شنوو؟
طلعت عليه جبيره وفتحتها طلعت منها حزام ذهب ولبستنياه وكالت
- هاي هديه خطوبتج بستها براسها
ورحت كعدت اجن بنات كرايبنا باركولي والبنات صعدن الغرفتي يبدلن ..
حسيت شي حار نزل ع رجلي رفعت فستاني شفت الخياط مفتوح ورجلي مدمره دم، بت عمتي جانت قريبه عليه
صحتها: عفيه جيبيلي علبه الادويه
راحت جابتها واجت، مسحت الدم وعقمتها
نزلن البنات كلهن جانن لابسات فساتين طوال بس شهد فستانها قصير وماما خوب عبالك هي العروس!
لابسه زي كردي والمكياخ طوخ وشعر صابغته والذهب
شوي وكالن البنات: ابوج يريدج بالمطبخ
كمت للمطبخ واشوف احمد گدامي اخ يافرحت گلبي
فعلا هو هذا ابوي ركضت لحضنه واضحك
- عرفتك متعوفني بهيج يوم
حضني اله وباسني براسي وبخدي: منتضريني بالباب بس اجيت اشوفج، شگد ردت ارسم شكلج وشلون طالعه ماكدرت
ابتسمت: وهسه طالعه حلوه؟
- منو يلحك جمالج بنيتي
ضحكت وبسته بخده: اروح فدوه لطولك الحلوو
فتحو البنات اغاني توسلت بي: حباب احمد تعال نركص اني وياك!
- لا بوويه عيب شنو السالفه
- لخاطرري
غمض عيونه ومسح وجهه :مااكسر خاطرج بهيج يوم تعاي
اخذ ايدي وطبينا للصاله، البنات جانو يركصون من شافنه فرغن المكان وصارن داير مدايرنا ..
لزمني من خصري وصرنا نتمايل سوه رفع ايدي وافتريت وهو يباوعلي ويبتسم واني احس الگاع كلها مشايلتني من فرحتي بي، جنت مكسور خاطري بس هسه اني اسعد وحده ورافعه راسي بي
باسني براسي وكال: يلا تأخرت منتضريني
راح واني رحت لغرفة بابا مددت ع الجربايه احس جسمي مكسر، متمدده بحذائي واباوع للسكف والابتسامه شاكه حلگي
بعد دقايق واصير بأسمه، راح ابدي صفحه جديده وحياة جديده وناز جديده راح اصنع عالم خاص بيه بس اني وياه ...
يتبع ..
5200 كلمة
هالقصة حيل مأذيتني لانه حيل تأخرت والمفروض هسه هي خاتمتها .. اريد بس اخلصها بس مداترهم وي ضروفي ووقتي ومن يصير عندي وقت واهس الكتابه يطير!
ع العموم قررت بعد كل اسبوع انزل بارت وهم حسب اذا كدرت اكمله خلال الاسبوع ..
ردت اختمها قبل رمضان بس مصارت 💔
بعد اكو شغلة ثانيه ردت اخذ رئيكم بيها .. باعو اني لگيت اشباه للأبطال فـ تردون انزلهن لو لا؟
حتى اذا ميحتاج فـ ماانزلهن .
كتبولي هنا شنو الي تردوه ...
وهاهيه هسه اقروا البارت براحتكم 🤍