مر كم يوم على موافقة اهل زمرد و اركان ما شايلتة الگاع شوية و يطير من الفرحة عكسي انا الي اتقرب موعد نشر النتائج و گاعدة على اعصابي كل شوية افتح الموقع عسى و لعلى نشروا بس ماكو نسونا مدري من ذكائنا انصدموا
گاعدين انا و امي اركان صايرين ما نشوفة يفتر منا و منا غزيل گاعدة بغرفتها تدرس حسستني بتأنيب الضمير السادس ما قريتلة بس من بدة الدوام
ابوي بالشغل و مهيب بالشغل بس انا گاعدة و صافنة ، شوية و يندگ الباب الخارجي قوي تگول مداهمة
گامت امي فتحت الباب و انا وراها ، شفنة مهيب
-عطيات : ولك مو عندك مفتاح لو لازم خبالاتك ؟
-مهيب : عطيوة مو وكتج وينها بتج
-زمهرير : ها
-ولج غوثة ولج عوبة ولج ام راس
-شكو شبيك عابت
-النتائج انشرت
فتحت حلگي
-ها ؟
-وجعا
-عطيات : ولك وينهن بشر شگد معدلها
-ما شفتهن رجلج حلفني الا يجي
ما حسينه بس على بابا دخل انا صوفرت ، ورة بابا دخل اركان ، دخلوني للبيت و فتحوا الموقع و گعدوا يدورون على اسمي غزيل نزلت و كامشة ايدي
و انا احس رجلية بعد ما تحملني راسي دار دخت حتى بالناس الي دايري ما دايري ما احس ولا اسمع اصوات حسيت روحي شوية و اوگع ما اتحملت حسيت شي يجذبني للگاع هيج لجوة ، اسودت عيوني
ما ادري ورة شگد و گعدت اباع لنفسي بغرفتي ، صعدت عيوني لگيت ماما فوگ راسي و تبچي و بابا گاعد على الكرسي و كامش ايديني شافتني امي و باست راسي
-شلون بيج انا شلون بهذا السكري خبلتيني
-ماما
-حبيبتي
-شگد معدلي
سكتت ما جاوبت
-بابا شگد
گام بابا و طلع ، گومتني ماما و باستني و گالت
-يلا گومي البسي اجو عمامج جوة
-اريد مهيب
-ماهو
-وينة
-گومي زمهرير البسي شي حلو يلا
هزيت راسي ، گمت لبست و احس ما متحملة نفسي معقولة درجاتي سيئة ليش محد يرضى يگول ، جاي امشط شعري و تذكرت تلفوني گعدت ادور نبشت الغرفة نبش ماكو وينه وين صار
نزلت للصالة اشوفها ظلمة وينها الوادم مو گالت ماما عمامي ، جاي اتقدم يم الضوة و كمشت بواحد نزيت عطت صوت و هي عاطت
-منو انتي ؟؟؟
-زمهرير ؟؟
عرفتها من صوتها
-تغاريد ؟
-ولج ليش البيت اظلم وين العالم
-ما ادري چنت نايمة
-افتحي الضوة ما اندلة
-ولا انا
-ثولة غير بيتچ
-هي غرفتي ما حافظتها يمعودة
انفتحت الضويات و حسينا صوت قوي و طشار فوگ راسنا ، نشوف الوادم كلها هنا عمامي و ابوي و امي باوعنا انا و تغاريد لبعض و ضحكنا
تقدم بابا و عمو اديب ، باسونا براسنا
-عفية بحبيبة ابوها و رفعة راسة
ابتسمت و احس عيوني انملن دموع ، تقدم مهيب و حضنة انا و تغاريد قوي و صاح بصوت عالي
-طالعات على عمهن
ضحكنا تقدم اركان و حضني و ضرب تغاريد على راسها
-ها ام السچ ناقص بس تدرسين نية الاستاذ
-تغاريد : اي شوف منو يحچي
-انجبي لج معدلج ١٠٢ وي الاضافة
فتحت عيوني و حضنتها
-ولججج عفيييةةة
-تغاريد : ليش انتي بيمن مقصرة
-ما ادري ما عرفت معدلي
-اركان : غير طلعنا الدرجة و ماعت روحها گبالنا گلنا ماتت
-شگد معدلي اركان عليك الله
-مهيب ما يرضى نگول
-لا بلة ؟؟؟
عفتهم و رحتلة ضربته على ظهرة
-شگد معدلي يلا
-انجبي تدورين معدل طالعة بأثنين
-عليك ابو الحسن
-حلفتيني بالغالي
-عليك الله گول
-بدون الاضافة ٩٨ وي الاضافة ١٠٠
صرخت بصوت عالي و دموعي نزلت گمزت و حضنتة من رگبتة و دفنت وجهي ابچي ، بادلني الحضن و هو يضحك
همس
-لج زمهرير عيب بعدين احضني شوفي راح ياكلوني
وخرت منة و امسح دموعي كمشت وجهة و بستة من خدة
-ميهموني
ورحت لبابا حضنتة و ماما من الفرحة مشيت عليهم نفر نفر ، بقى واحد چنت اتمنى يكون اول واحد يعرف ، عفتهم ملتهين و صعدت لغرفتي كمشت دفتري بديت اكتب :
تاريخ : **\*\****
تيمي و متيمي يا من تمنيتهُ بجواري يشاركني هذه اللحظة ، كيف حالك ؟ هل انت بخير ؟ اتمنى دوماً ان تكون بخير . انا بخير او في الحقيقة دعني اقول اني على وشك الطيران من السرور ! ربما سيكون هذا خامس اجمل يوم في حياتي ، هل تسأل ما هو الاول ؟ انه حين قابلتك و انا في حجم البازلاء اما الثاني هو حين اقابلك الثالث ربما سيكون زواجي بك أني أطمح اليه بشدة ! أما الرابع سيكون تخرجي من الجامعة بكل تأكيد لكن في الحقيقة حين اكون معك انا متأكدة بأن جميع ايامي ستكون سعيدة .
متيمي هل تشعر بسعادتي ؟ كم كنت اتمناك بجانبي الان و اقول لك هذا الكلام وجهاً لوجهه .
يا لغتي و لهجتي و كلماتي يا عباراتي الناقصة و حروفي الكاملة ، يا سري المخفي بيني و بين خالقك ، يا دعائي المتكرر ، اناديك و انا في أسعد لحظاتي اناديك و اريدك بجانبي ، احبك بحق كل قطرة دماء تجري في عروقي ، احبك بحق كل حرفٍ قلته في صلاتي ، احبك و انا متأكدة انك لن تصدق حبي لكني ما زلت احبك !
سديت دفتري و ابتسامي شاگة حلگي ركضت جوة كملت حفلة وي اهلي ، خابرتني زمرد تباركلي و اركان شوية و يطب بالتلفون ، خلصت الحفلة و نمت اففف اچذب اذا گلتلكم نمت ابد ضليت سهرانة و الفرحة شوية و تطيرني تعب سنة كاملة ما ضاع
گمت صليت صلاة شكر و شكرت الله و حمدتة احلى شي صارلي الف الحمد لله
گعدت ثاني يوم و احس نفسي خفيفة و اليوم العقد و المشية و اركان مو بس طاير لا شوية و يوصل لسابع سمة يلبس و يحضر تگول هو العروس و مهيب مصنف عليه
-ولك عمي اثگل فشلتنا
-لك مهيب حصلتهاااا
-افتهمنا كافي شوف ولك اذا فشلتنا گدام الوادم اخذها انا
-لو مو مهيب چان هسه چطلتك هنا و جبتك ببوكس
-شمعنة عود ؟
-اعرفك انت شنو
و غمزلة
گمزت بنصهم
-هاها شو صاير تغمز يلا سولفوا
رفع مهيب ايدة و غم اركان
-اهمداك حطيتني جوة لسانها شيخلصني بعد
مشة اركان و ضرب متن مهيب بايدة كانوا يواسي
-تهون خوية تهون
و راح و عافة يمي و انا الفضول اكلني
-زمهرير : ها ؟
-ها
-شنو يلا گول
-عمي ماكو شي اخوچ فيوزاتة راكبة
-ها
-اي
سوة نفسة عود تلفونة دگ و عافني ، ركبنا السيارات كلنا من عمامي لخوالي كلهم اجو غير اصدقائة الي متفقين ويا و اكو اصدقاء ابوي و عمامي و بعد باچر يجي هم دفعة تگول راحين هدادة مو نخطب
الطريق كله اغاني مهيب عالگها و احلى شي عمي جبر ويا فد ونسة بس انا گضيتها نوم ، وصلنا للفندق العالم كلها نامت و الي اخذ اهلة و طلع يفرهم و انا فتحت مسلسلي و گعدت اتابعة
شوية و گعدوا و انخبصنا بدو يجهزون العالم تركض ركض هذا الي طلع يجهز السيارة و هاي الي تبدل و مهيب حاط اركان يحفظة شيحچي وي زمردة و اركان شوية و يبچي
ابوي و امي كل شوية مختفين مدري وين يرحون و هاي غزيل فاتحتلي محاضرة سمر و چبس و گاعدة منتظرتهم
و انا حايرة بكفشتي وين احطها
-زمهرير : غزززيييلل
-ها هاا
-شعري اشيلة لو اعوفة ؟
-بكيفج
-اذا شلتة تطلع رگبتي طويلة
-لعد عوفي
-و اذا عفتة تطلع گصيرة
-خوش لعد شيلي
-غزيل حكسر التلفون على راسج
-شبيج حبيبتي خبصتينا بالحالتين حلوة ان شلتي و ان لا
-ها هيج تگولين ؟
-اي عمري بس احس عوفي احلى يبين طولة
-و رگبتي ؟
-حلوة تخبل تعالي ابوسها بس عوفيني
-ولي عاتبلچ
رجعت عيطت بصوت عالي
-مهيييببب مهههيببببب مهوبتييي
جنت امشي بالغرفة و اصيحة چان بطلعلي من ورة
-عيونة و حياتة
-اوي استقر
-شتردين
-حلوة ؟
عض اشفة و هز راسة
-صاكة بت الصاكة
-ها ؟
-والله فد شي شنو هاي ولج تطگين بالگاع اموت عليج
دزالي بوسة بالهوة و راح ، يلا ما دام عجبت مهيب هاي هيه ، چنت لابسة فستان رصاصي جوة الركبة بشوية يعني اذا گعدت يوصل لفخذي و ردان طويل بس شفاف يعني زندي و كلشي يبين و مخصر و حطيت مكياج بسيط كلش ما يبين حتى لان وجهي اصلاً حلو فديتني
چذب ست عطية ما ترضى نخلي المهم ، غزيل طالعة صدگ غزالة تجننن اختي المزة بس اكيد اختها احلى ، شوية و نسمع بابا يگول يلا تأخرنا
ركبنا السيارات و الاغاني و الهلاهيل بكل مكان ، خمس سيارات يمكن چان بيها النسوان و الجهال و الباقي كلها للزلم يهوسون
نزلونا يم بيت زمرد و تلگتنا امهم و الهلاهل صارت بدينار ، دخلنا و نشوفلك زمردة گاعدة بس شنو مالك هلبنت بيها قبول مو طبيعي
دخلنا و بدة السلام و السؤال عن الحال و سوالف العجايز ، گعدت انا حايرة بملابسي جبر لبسوني صاية من طلعت
گعدت اعدل بالفستان و شعري بسرعة و رحت يم العروس شاورتها
-شنو هلجمال ترى اخوي ما يتحمل
ابتسمت على كيفها و كمشت ايدي قوي
-ولج تارجف خايفة
-يابة من شنو خايفة حتزوجين حبيب القلب هاي انا لو مكانچ اگعد بنص النسوان اهلهل
گعدت انا و غزيل يم زمردة و هنه يحچن و غزيل مكمشة بيه حتى ما اگوم ارگص
-زمهرير : غزيل راح اعضچ
-اگعدي راحة عيب انتي اخت العريس اثگلي
-ولج ايدچ وخريها عرس اخوي اگوم اكسر الكاشية
اجيت اگوم هم كمشتني و گرصتني
-عيب والله فشلة اگعدي وين امي عنچ
-زمردة بروح الحسين حاچيها راح اگوم اشمرها على الزلم المعقدة
-اني معقدة ؟؟
قلدت على نعوصتها
-اي انتي موعقدة
-والله اگول لماما عنچ
-عفية سباعية يلا گومي
درت وجهي اشوفلك تغاريد ترگص يا يابةة تغاريد ترگص و انا گاعدة ؟؟ وسفة والله
چان اشمر غزيل على زمردة و گمت ارگص ، خلصت مشية الزلم و ما ندري شصار محد رد خبر لهسه ، شوية و نسمع صوت دخول الزلم علمود العقد
دخل اركان و الشيخ ، جابت ام زمرد و هي تبچي مثل الطاسة الكبيرة هيج وعاء و خلت بي ماي و الياس و حطت بأيدها هيل و فتحت القرأن بحضنها
بدة الشيخ بحچي و سأل
-اركان ابن مصعب هل توافق على الزواج من زمرد بنت بكر
حچة اركان بصوت يرجف من الفرح
-نعم اوافق
و بدة يسأل زمرد و يرجع يكرر اكثر من مرة منا لمن جاوبت
-نعم اوافق
و بدت الهلاهيل العالم كلها تهلهل و فرحانة ، اخذت انا و تغاريد شال ابيض و حطينا فوق راس عروستنا ، همست بأذنها
-مبروك زوجة اخي
-الله يبارك فيكِ اخت زوجي
ضحكت بصوت عالي و بدت الگفلات و الاغاني و الرگص ، ام زمردة تبچي رحت يمها
-خالة على بختچ بنتچ عروس شنو تبچين
-كبرت بنتي و صارت عروسة
-ايي يلا گومي ارگصي ما ينعقد عقدها كل يوم
و كمشتها و بدينا نرگص ، چان يوم حلو كلش من كل النواحي ، شوية و صاحوا راح بدخل العريس ، النسوان تتراكض هاي تلبس عبايتها و هاي حجابها
دخل اركان منزل راسة ، تقرب من يم زمرد و انا ركضت گعدت قريب يمهم اريد اسمع
تقرب و باس راسها و همس بأذنها مدري شگال غيري يعلي صوتة ، جاوبولة الذهب و بدة يلبسها و ايدة ترجف فتحت تلفوني اصوره
لبسها الگلادة و نزل على ايدها لبسها السوار و باس ايدها و انا احس من يمي استحيت هي شلون بيها
جاب هذا مدري شنو يسموا درع اعتقد على خصرها لبسها و تراچي و يهمس بأذنها طلع رومنسي اخوي و انا ما ادري
گعد يمها و كمش ايدها و اللوان بشرتهم المختفلة تجنن هو ابيض و هي سمرة فد شي طالعين
سديت التصوير و عطشت ، رحت للمطبخ اشرب ماي ، صافنة و انا اشرب ماي هم يجي يوم انا و تيم هيج ؟ نتزوج ؟ قاطع تفكيري صوت رجال مو غريب عليه
-اختي ادخلي جوة اكو زلم هنا
درت وجهي شفت اخو زمرد الكبير ، منزل راسة كأني بدون ملابس
-العفو بس چنت اشرب ماي
-تفضلي اختي لجوة
گالها بنتر رفعت حاجبي شبي هذا
-شبيك خوية انت مستقصدني يعني لو شلون ؟
رفع عيونة و خزرني يمه هذا يخوف
-اختي شنو مستقصدچ ؟ تأكلج اكو زلم ادخلي جوة
-اي و انت شنو دخلك دخلت لو لا ؟؟
-هم صحيح شنو دخلي اني بكيفچ ابقي هنا طبچ حرش
طلع و عافني فتحت عيوني مصدومة ! حرش !!! هذا شبي مو صاحي ربي اهدي ، توني اريد اطلع و دخل مهيب
-هاي شجاي تسوين هنا
-اشرب ماي
-و هذاك شيسوي توة طلع
-شبيك انت ؟؟؟ روح اسالة يا قيور
اجيت اريد اعبرة كمشني من ايدي قوي و سحبني گدامة
-زمهرير من احچي وياچ ما تعوفين و ترحين فهمتي ؟؟
-هاي شبيك انت النوب ايدي دتأذيني عوفها
-شيسوي يمچ احچي
-شبيك مهيب اصحى !! انا زمهرير باوع عدل
دفعتة و طلعت تخبل الثاني النوب