-(وشها ضرب فجأة وقلبها بدق معقولة قاصد الأنا فاهماه)انت قصدك انو انا وانت؟
-(مستغرب مالها البنت دي)اي قصدي كدا عندك مانع ولا كيف؟
-(مصدومة:معقولة فاكر اني كدا؟)منير انت فاهم عني شنو؟
-(لاحظ انو وشها فجأة اتغير وعيونها دمعت)يعني انتي عندك مشكلة انو نحنا نعمل كدا؟
- اكيد عندي مشكلة انت فاكر اني ما بنت ناس يعني؟
ودموعها نزلت وفتحت باب العربية ونزلت خلتو مستغرب
البنت دي ما نصيحة الوقت كلو بتلبس ضيق وبتحاول تغريني وتجدع الطرحة ولما اقول ليها اي حاجة ما بتزعل وحتى بمسك يدها عادي ما بتضايق وبليل بقول ليها أسوء الكلام وهي ما حصل اعترضت بالعكس كمان
بتضحك وفجأة لما اقول ليها بصريييح القول تجي تعمل فيها مصدومة وانو انت فاكرني ما بنت ناس وبتاع هو انتي لو بنت ناس بتعملي كدا ليه؟
ي سبحان الله
اتصل على صحبو
-ي مان ما شفت البنت عملت فيني حاجه غريبة
-(بضحك) في شنو
-ياخ جيت قلت ليها كدا كدا طوالي عملت فيها مصدومة وبقت تبكي وقالت لي انت فاكرني ما بنت ناس
-( بضحك) دي بتكون بتدلع ساي وعايزاك تحنسها وكدا فانت شد حيلك وامشي ليها تاني
-والله بتستاهل التحنيس سمحة ياخ احييي لكن خلاص تاني ما بمشي ليها
تسنيم خشت الجامعة وهي لسه بتستوعب في الكلام وبتبكي معقولة منير يطلع كدا؟ معقولة بس دا همو؟ معقولة بس عايز كدا؟ انا كنت فاكرة انو بحبني وانو حانكون مع بعض ما اتخيلت انو ممكن يطلب مني حاجة كدا والمشكلة انو قالها لي وكأني مستحيل ارفض قال لي كدا وهو متأكد اني حوافق ليه يفهم عني كدا ليه يفهم اني كعبة ليه؟
كان عندها محاضرة واصلا بدت مسحت دموعها سريع سريع ومشت حضرتها بس اصلا كل الناس كانو ملاحظين انها ما كويسة وصحباتها اي وحدة بتلز في التانية وبقو بتهامسو
-(توتة) شكلو دا منير
-(مرام) بكون عرفت حقيقتو
-(هبة بتضحك)تستاهل
بعد المحاضرة خلصت،،،
طلعت سريع سريع لانها م عايزة تتكلم مع زول لكن في وحدة نادتها
( بسمة)
- تسنيم ي تسنيم
-(اتلفتت) ايواا
- انا عايزة اتكلم معاك ممكن في حاجة ضرورية
- طيب
ومشو قعدو
- انا عارفة انو نحنا ما صحبات وكدا بس انا شايفة انك زولة كويسة وما زي صحباتك البتمشي معاهم عشان كدا حبيت احذرك
-في شنو؟
- انا اليوم داك سمعتهم كانو بتكلمو انك صاحبتي منير وكدا وهم كلهم عارفين انو منير كعب وقالو ما حايوروك ويخلوك تقعي
ويضحكو عليك
-(مصدومة) معقولة؟
- اي والله انا سمعت الكلام دا منهم وقلت اكلمك
-(صحباتي عارفين انو منير كعب وما حذروني منو)وانتي عارفة شنو عن منير تاني ؟
-والله ي تسنيم منير دا نص الجامعة عارفاه الاولاد كلهم بعرفو باسم زنقة اسي لو مشيتي سألتي اي ولد حايوريك قدر شنو
هو واحد تافه وقبل كدا كان مربط مع نور وهي خلتو لما عرفتو(معاهم في الدفعة).
بعد ما بسمة حكت ليها الكلام دا تسنيم بقت في عالم تاني من ناحية منير الهي حبتو بالجد وفكرت تكمل معاه حياتها ومن
ناحية تانية صحباتها هي عارفة انهم بكرهوها بس م عارفة الموضوع حيصل معاهم لحدي هنا.
حسن،،،
نايم في السرير بفكر ليه في بنت تانية عشان يصطادها
بعد شوية اتصلت عليه مآب وقعد يتأفأف( اول ما كانت ليه حلوة) رد عليها عشان يخلص من الموضوع دا
-ايواا
-حبيبي كيفك؟
-كويس وانتي
-(مستغربة من الرد) كويسة بس عايزة أقول ليك ماما سألتني انو متين حاتجيبو لي حاجات الدخان وكدا
-(بضحك:دخان شنو تاني ي ماما) ما حانجيبهم
-كيف يعني؟
-عديل كدا انتي فاكرة انو بعد العملناه امس انا ممكن اعرسك تاني؟
-(مصدومة ما مصدقة ولا مستوعبة القالو ليها)حسن انت كويس؟ شارب حاجة ولا مالك؟
-لا انا كويس وما شارب اي حاجة لكن مافي واحد بعرس وحدة سلمتو نفسها قبل العرس
-(بتبكي) بس انت اقنعتني وقلت لي اصلا نحنا حتتزوج بعد كم يوم
-(بضحك) وانتي شافعة تسمعي كلامي؟
-(بتبكي شديد) حسن عليك الله ما تعمل لي كدا استرني الله يرضى عليك ناس بيتنا لو عرفو بقتلوني ان شاء الله لو نتزوج ونتطلق طوالي
- ناس بيتكم كان تفكري فيهم قبل ما تعملي كدا ولا انتي ما بتفكري في حاجة غير القروش يلا ي ماما من هنا وما تتصلي لي تاني
-حسن لا حسن
وقفل الخط في وشها وهي الدنيا سودت قدامها وبقت ما شايفة حاجة وما عارفة تعمل شنو ولا تتصرف كيف شغالة ترجف
وتبكي وقلبها بدق لدرجة انها سامعة صوتو
بعد ساعة وهي استوعبت الحاصل وأنها مفروض تلقى حل..
اتصلت على توتة صحبتها وحكت ليها وتوتة مصدومة وما مصدقة انو حسن عمل كدا في صحبتها وقالت ليها ما تخافي نحنا حنلقى حل مع انها عارفة انو مافي حل وفي النهاية ناس بيتهم حيعرفو واكيد حيقتلوها...
•
•
•
رحيق،،
قاعدة في غرفتها من جات من المستشفى وما طلعت منها وقافلة النور وما فتحتو واي واحد من ناس بيتهم يحاول يتكلم معاها بتصدو أبوها واخوانها زهجو من دلعها وعايزين يجو يشاكلوها بس امها وراوية وقفوهم وقالو ليهم خلوها براحتها لحدي ما هي تهدأ براها.
هي كانت ما حاسة بشي غير انو في حاجات كتيرة حاصلة فقدت الشغف والأمل واي شي هي ما كانت عايزة دا كلو يحصل ما فكرت في انو الوضع ممكن يصل لهنا.
"لم أستطع الشعور كنت اسبح فحسب في محيط من اللاشئ ، وتساءلت اذا كان هذا هو ، إذا كان هذا هو الموت!؟
أظل في الظلام فحسب،ظلام دامس وفقدان الشعور والوحدة وتساءلت ما إذا كان هذا ما شعرت به وما شعرت به أمنا، مجرد
فقدان الشعور ولا شئ وحده !
ماذا لو كان هذا هو الشعور عندما يحين وقت الموت؟؟"
المساء أمها اصرت عليها انها تاكل لانها ما اكلت من امس لدرجة انها بقت ترجف واكلت شوية وراوية اصرت عليها تاخد العلاجات وقالت ترجع تتكلم معاها لانو اسي بتكون هدت شوية
-انا عارفة انك متضايقة من نتايج الفحوصات ومتضايقة من الكلام السمعتيه امس من ناس البيت هم اي قالو كلام قاسي وبزعل بس مشكلتهم حاجة وحدة انو وصلو خوفهم بالطريقة الغلط دي مشكلة معظم الناس بوصلو خوفهم و قلقهم على الناس البحبوهم بطريقة غلط طريقة مليانة صراخ وكلام قاسي بس نحنا لو ركزنا في الكلام القاسي دا حنعرف انو وراه حب
كبير
وبالنسبة للأمراض دي دا ابتلاء من ربنا وربنا اذا احب عبدا ابتلاه وانتي ما صغيرة يا رحيق وخلينا نكون صريحين انتي اصلا عارفة انو الامراض دي جاتك بسبب وزنك وكلها حتنتهي السكري حايكون عابر ساي وحينتهي والكلسترول بنزل والدهون بتنزل دا كلو بمشي انتي اكلي واخدي العلاجات واتحركي كتير وحاتكوني كويسة.
اتكلمت معاها كتير بس رحيق ما كانت جايبة ليها خبر اصلا .
بجيبو ليها الأكل بتاكل شوية وبتاخد علاجاتها وبتتحرك وبتسمع الكلام بس دا كلو ما مهم بالنسبة ليها هي حاليا بتكره نفسها وبتنبذها بس ونفسها انو تتخلص منها بسرعة.
•
•
•
علي،،
نزل الشغل وبقى كل ما يطلع قروش يشتري بيها حبوب وسوسكا بستغلو وبشيل منو قروش زيادة ويجيب ليه الحبوب وهو بدفع معاهم في ايجار البيت والمصاريف وكدا وما فكر يرجع لناس بيتهم تاني.
امو وابو الاثنين شغالين ابوه في الركشة وامو بقت شغالة كسرة جنب البيت واختو بتمشي المدرسة وبتجي واخوهم داك فصلها منهم وحتى ما سأل عنهم تاني بس ابوهم من الهم والشغل الكتير تعب وضعف شديد وبقى كل ما يطلع في الحي يسمعهم بتكلمو عن علي وجماعتو والحبوب الببلعوها لما بقى ما بقعد مع رجال الحي بس من الشغل بجي البيت وكل يوم تعبان وامو كل يوم السكر هابط ومرة مرتفع وهي واقعة والوضع بقى ليهم صعب لانو اولادهم ال٢ خلوهم.
في يوم،،
واحد من رجال الحلة قال ما بسكت على بيت العذابة دا والحبوب بتاعتهم دي وكلم واحد من ضباط الشرطة في مركز الشرطة الفي حيهم وهو رسل واحد من العساكر المعاه يراقبهم عشان يمسكهم بالثابتة لحدي ما العسكري شاف علي ومعاه واحد من أولاد بيت العذابة سلمو حبوب وطوالي جاء قبضهم ودخلهم الحراسة وعلي اتصل على سوسكا عشان يجيهم.
وسوسكا جاء طلعهم لانو بعرف واحد من العساكر وقاعد يبيع ليهم واصلا معظم العساكر الفي المركز ببيع ليهم
بعد طلعهم قعد يحذر فيهم انو يعملو حسابهم وكدا ولو تاني اتقبضو ما بفكهم وما مسؤول من واحد فيهم.
علي بقى طبيعي سكران بشرب وببلع وعيونو محمرة وما بنوم بشتغل في الصالون ومرات ما بشتغل الا لما يكون محتاج حبوب حتى يمشي يشتغل بس لما يكون بحلق لزول ما بكون مركز وكم مرة بسرح ومرة كان بواسي لواحد في القطعية جرحو بالموس وهو قام وهاج وانو كيف يجرحو وهو ما حريف وبالو ما معاه والمصطفى جاء وقال ليه انت اصلا عندك كم يوم في الحالة دي وما عندك شغل هنا تاني واتشاكل معاه واتضاربو والاولاد الفي الصالون طلعو برة وسوسكا قعد يهدي في المصطفى لكن مافي فايدة قال ليه تاني ما يجي هنا ولا اشوف وشو.
وعلي من زهجو ضرب أولاد الصالون ضرب وبعدين طلع شغال يصرخ
وما عارف اسي حيشتغل وين
ودي فرصة سوسكا انو يشغلو معاهم في الحبوب واصلا هو عايز كدا.
•
•
•
• رحيق،،
بتفكر،،
انا ليه م عندي زي كل الناس أصحاب حلوين وبحبوني وبنطلع مع بعض؟ ليه م عندي الصحبات البعملو لي تاق في الفيس ويعملو لي مفاجآة لما يكون عيد ميلادي ليه م عندي الصحبة البتجي تبيت معي ونقعد الليل كلو نتونس ليه م عندي الصحبة الممكن نمشي مع بعض السوق ونشتري حاجات مع بعض ، أو حتى ليه م عندي زول بحبني وبحبو ونطلع مع بعض ونتكلم بالتلفون ما عندي زول يجيب لي هدايا أو يهتم بأدق تفاصيلي ليه ما عندي شلة حلوة لما يحسو اني متضايقة زي اسي
يجوني ويطلعوني من الجو دا ليه انا وحيدة كدا وما عندي ناس بتحبني؟ حتى ناس بيتنا بكرهوني وبتكلمو عني اني بس باكل باكل الوقت كلو .
بتفكر وبتبكي
جات راوية اختها لقتها في الحالة دي
-رحيق
-(اتلفتت عليها)
-عملت صينية بطاطس رهيبة ارح اكلي عشان تبلعي الحبوب
-م نفسي
-م انتي م ممكن تكوني قاعدة كدا والعلاجات ما ينفع تاخديها من غير ما تاكلي كويس يلا قومي يلا
-طيب
قامت معاها لانو م عايزاها تتكلم معاها كتير
طلعو برة ولقت اخواتها وامها وكلهم زعلانين على حالتها وانها ما رحيق الكانت اول ، قعدت في الصينية وشغالة تهبش وبتاكل براحة وسرحانة الوقت كلو وكل شوية يقولو ليها رحيق أكلي وتهز براسها كويس واي وحدة بتعاين للتانية في انو م عارفين
يعملو ليها شنو بعدين اخواتها بقو يتونسو ويحكو مواقف بتضحك عشان هي تقدر تاكل وكلهم اي وحدة بتجيب ليها موقف مضحك حصل معاها في المواصلات أو الجامعة أو الشغل أو في أي حتة بس برضو هي ما كانت معاهم أو حتى الكلام ما بضحكها.
"الاكتئاب،،
يتوغل اليك بكل هدوء في البداية تعاني من الأشياء الصغيرة لكنك تختار ان تتجاهلها ، إنه مثل الصداع تقول لنفسك انه مؤقت وسوف يزول ، إنه مجرد يوم آخر سئ، لكنه ليس كذلك انت غارق في هذه الحالة النفسية ، وتعتاد على ارتداء قناع اجتماعي تختبئ خلفه لكي تواصل العيش ضمن الآخرين، لا بد ان اعيش هكذا ولا يوجد شئ يمكنني فعله،،"
•
•
•
تسنيم،،
بعد رجعت البيت حكت لتسابيح اختها عن منير والحصل وهي قالت ليها انا من البداية الولد دا ما اطمنت ليه وكنت حاسة انو وراه حاجة المهم قالت ليها انسيه وخلاص وهي قررت انها تنساه وما تركز معاه وكويس انها عرفت حقيقتو من اسي احسن ما تعرف لقدام.
بليل،،
بتحضر مع امها واختها في مسلسل بعدين دخلت الغرفة وخلتهم قاعدين غمضت عيونها وبقت تفكر في واحد هي ما قادرة تفكر في واحد معين بس بتجيها صورة ولد من غير راسو يكون ظاهر وهو بقرب منها وهي مبسوطة شديد ومبتسمة وكل ما يقرب اكتر هي بتفرح اكتر بعدين التفكير قلب لبوس واحضان وحاجات تانية والتفكير دا عدل ليها نفسيتها جدا وحاسة انها بقت احسن ومبسوطة ، وبعد التفكير الكتير دا كلو هي اضطرت انها تعملها تاني لحدي ما نامت وبقت تحس انها ما بتقدر تنوم الا تعملها وبتحس انها بتخليها مرتاحه وكل تفكيرها بقى جنسي.
الصباح،،
لبست ومشت الجامعة وقررت انها لو لقت منير حاتوقفو في حدو ولو لقت صحباتها مع حاتسلم عليهم ، طلعت من البيت ورجعت للمواصلات تاني وهي بتفكر في أفكارها دي لحدي ما وصلت الجامعة نزلت لقت بسمة في وشها سلمت عليها وقعدو يتونسو وبسمة بقت تتكلم ليها عن الدراسة وانو الامتحانات قربت ومفروض يقرو وقالت ليها رايك شنو نبدأ مع بعض وكدا او ممكن نعمل جدول عشان نقرا مع بعض قالت ليها خلاص م عندي مشكلة واصلا هي بالها مافي الدراسة بالها في حاجات تانية.
صحباتها بحمرو ليها ساي وهي زاتها ادتهم العين البايظة وما اشتغلت بيهم.
بعد خلصت ما كان نفسها تقعد في الجامعة وكدا ويمكن برضو عشان ما تشوف منير بالصدفة طلعت من الجامعة ومشت موقف المواصلات عشان تركب لقت واحد من دفعتهم واقف برضو اسمو مجتبى ولما شافها اتحرك من مكانو وجاء وقف
جنبها
- تسنيم كيفك
-الحمد وانت
-تمام كويس
الليلة الجو مسخن
- اي شديد
#يتبع