قصـة : فحيـح الافعى
بقلمي : نـون النعيمي ✨
لتنسون التصويت والتعليق بين الفقرات حبايبي ❤️!
.......................................
_ وَإِمَّا يَنْزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ ۖ إِنَّهُ
هُوَ السَّمِيعُ الْعَلِيمُ
.......................................
اول مدخلت صارت ابوجهي وحده عمري مراح اتقبل اشوفه ابد واخر شخص اتوقع اشوفـه اصلاً
حجيت بستغراب
عمـه حنان ؟
اندارت عليـة ابتسمتلي خلت فنجان القهوة على الميز وحجت
حنان : عاش من شافج عمـه
ذبيت غراضي من أيدي ونزعت حذائي ورحت كعدت كبالـه كعدت بصفي مروه وبحضنه زينب انتبهت على شيماء هم كاعدة
ريتال : شعندج هنا جايه كومي طلعي
حنان : باع شلون تحجي الماتستحي على الاقل سلمي
ريتال : ماعندج شي يمنه فـ اختصري سبب جيتج الـنه
واذا مراح تحجين فـ تندلين الباب
حنان : يعني تطرديني
ريتال : شنو الغريب
حنان : انـي كاعدة ابيت اخويه يمكموعه ماكاعدة ابيتج انـي
ريتال : اخوج مات من زمان
حنان : چان استحيتي انـي عمتج اكبر منج بهواي بس الظاهر محد عرف يربيج
ريتال : عمتي ؟ اني ماعندي عمـة ولا عمام احنه ماعدنه احد تبرينه منكم من زمان .. من شوكت عارفينه انتو هاا؟
فديوم سألتو علينـه كلتو شبيهم شأكلو اخاف مريضين محد سأل عليـنه اصلاً ولا احد يعرفنـه
فلتجين هسـه توزعين حنان وحنيه متفيدج ومثل مكتلج اختصري حجيج
حنان : تعرفين كلش زين مابيدنه شي تعرفين بيبيتج ماتقبل نتواصل وياكم من ورى امكم
ريتال : احنه شعلينـه بأمنه ؟ انتو اهلنه احنه احفادها وجهال اخوكم احنه من دمكم
حنان : مايفيد هذا الحجي صار ماضي
ريتال : چان استحيتو اخوكم مريض وكعد على كرسي متحرك وصار شلل محد بيكم رف كلبـه عليـه وكال خطيه اخاف محتاج شي
لجج والله لو بيدي مو بس اتبره منكم احركم حرك متستاهلون واحد يباوع بخلقكم من اشوفكم اتنرفز
حنان : جيتي هنا بسبب عمج
ريتال : ههه كالت عمي .. وشبي عمي
حنان : كاعد يموت
ريتال : كلنه نموت محد يبقه عايش بس الكريم الفوك
حنان : على فراش الموت عمج ذكرج بالاسم ورادج
ريتال : اني مالي دخل ابيت رفض اهلي واتبره من ابويه ومن عدنه .. تريديني اجي حته تضل امج تحجي مو وتغلط ؟ .. شكراً لان وصلتي رسالتج
حنان : معليج بأمي مره عجوز اخذيه على كد عقلـة .. عمج عنده شي يخص ابوج يريد ينطيج اياه الج انتِ
ريتال : يخص ابويـه اني؟
حنان : اي .. خليت رقمي يم اختج مروه من تريدين تجين دكي عليـة اجي اخذج
هزيتله براسي .. كامت طلعت من البيت
دخلت اني الغرفتي طلعتلي ملابس ودخلت اسبح
شغلت ضوه التليفون وفتحت الباب اشويـه اخاف تنطفي الكهرباء واني جوه المي ويصير نفس هذاك اليوم
سبحت على السريع وطلعت بدلت وتمددت بفراشي
رخيت جسمي على الچربايـه احس بتعب مو طبيعي
الأمور اللي دصير بحياتي مالـه حل
حسبه توديني وحسبه اتجيبني راسي يأذيني .. احس كلـبي يكول اريد ارتاح واريد ابچي اريد احد يسمعني غفيت واني على هل حالـه
أشهب :: كاعد بغرفتي على الميز كبالي هواي اوراق وكله يرادله ختم وتوقيع واني بالي مو يمهن ابد اني بالي شارد مني ماعرف بي وين
اندكت الباب وانفتحت على كيف
سمر : ها يمـه كاعد
أشهب : اي علويـه تعاي كعدي
اتقربت مني خلت كوب الحليب كدامي وكعدت كبالي
أشهب : شنو علويـه اني جاهل هيج تعامليني
سمر : لعد من كبرك .. شكدما تكبر انتَ طفل بعيوني
أشهب : افا عليـج علويـه لعد هل شوارب شتسوي بوجهي
سمر : هاي النفسك مو الـي لك
أشهب : لا هيج حزينه اني وانعل اللي يربي اشوارب بعد
سمر : انجب واشرب
أشهب : هاي فوكاه يعني
سمر : شخبار المحاميـة
أشهب : اليوم اجتني للمكتب على مود ادكلي باجر جلسـه على مود مال نور القضيـة
سمر : اي اعرف دك عليـة المحامي محمد
أشهب : ي شكو بعد
سمر : هيـه كلش حبابه احسه لطيفـة حبيته اني
أشهب : لتخافين يمه مراح يصير شي بيني وبينه ومراح ازوجه ولا احبه مجرد عمل راح يخلص وكلمن يروح الدربه مثل منكول
كامت من يمي هزت أيده وطلعت معاجبه حجيي
اني اعرف شتفكر عباله مادري .. متدري اني حافظه دمار دمار امي واعرفها
كمت رتبت الميز
خليت الاقلام بالتساوي من الصغير للكبير عندي وسواس مال ترتيب ماكدر
رتبت غرفتي ودخلت بفراشي ووقتت التليفون بـ ٧ بين ما اروح للمركز اكمل كم شغلـه ومناك امر الريتال اخذها وانروح على المكان اللي كالت عليـة امـه
عندي فضول اشوف شنو السالفـه رغم هيه رفضت وجودي اصلاً ورفضت اجيها وانروح سوى
مادري ليش هيج داسوي
هل هوه من دافع الفضول او من دافع الشفقه لو شنو هواي علامات استفهام عندي
ريتال :: فزيت على صوت هورن كلش قوي
وره ثواني دفرت الباب مروه ودخلت للغرفـة عبالك كاعدة بدورة مال ضباط
حجت بعصبيه...
:- مدكومينن عاااد
:- شكو ماانام يعني
:- أشهب سبه الدنيا بالهورن كاعد ينتظرج بره
:- طلعي كوليله خل يروح
:- لج بابا عيب كومي
:- اني مكتله تعال هوه مصرف من يمه
:- هاي اخر مره اذا مكمتي اسوي شي ميعجبج
خلصت جملته وطلعت من الغرفـة وركعته وراها
خوش مصباح وخوش بدايـة يوم
بوجه مروه والغثيث هذاك
كمت فتحت الكنتور ماعرف شلبس هنه نفس الملابس كل يوم البس بيهن طلعت بنطرون اسود وتشيرت اسود نص ردن بي نقشه من يم الخصر
بدلت وشلت شعري
طلعت دخلت للحمام غسلت وطلعت البس بالحذاء
مروه : متاكلين لكمه
ريتال : اكل سم .. سديتو نفسي من الصبح
طلعت من البيت شفت أشهب طابك بسيارته اباب البيت
صرت كدام سيارته كباله
لابس مناظر سوده ومطلع أيده من الجامه
وخال بحلكه جكاره فززني من دك بالهورن للمره الاف تقريباً هاي
رحت فتحت باب السيارة وحجيت بعصبيه
ريتال : شبيكك مشايف هورن عبالك جاهل اول مره تعرف شلون يستعمل كبر اي والله
عفته وطبكت الباب بقوه
ومشيت على السريع طلعت كبل
ماحسيت الـه ساحبني من أيدي بقوة عتني
ودارني عليـه
أشهب : لزمي السانج احسلج شنو يرادله كص حته يتعدل ويحترم نفسه
ريتال : لا بله خفتت يمـه المفروض اتخربط هسـه واصيح اريد أمي مو لو شنو بالضبط
أشهب : احترمي نفسج لتخليني استعمل وياج غير اسلوب
ضغط على أيدي بقوه وعافـه
أشهب : صعدي بالسيارة احسلج
اباوع على أيدي صارت حمره كلش .. شكد همجي وميعرف يصرف شكد كرهته .. هم هوه حشك روحه وهم مسويلي روحه فد شخصيه
صعدت بالسيارة لان ابد مالي خلك اتعارك وياه واسويلي عيطه من الصبح
أشهب : شسم المنطقـة اللي كالت عليـة امج
ريتال : منطقـة ... اهناك نسأل على مره اسمه ام وسن
أشهب : تمام
حرك السيارة بدون ميحجي شي الطريق كله لا هوه طايقني ولا اني طايقته .. تقريباً بالساعه هيج يلا ووصلنه
وكفنه بمنطقه شبه مهجورة محبيته حسيت بشي غريب تجاهه ماعرف شلون اوصف شعوري
طبك أشهب سيارته نزل قبلي هوه
فتحت الباب اول مخليت رجلي بالكاع حسيت بشي غريب راودني معرفت افسره شنوه
نزلت ووكفت بالشارع
ماريد اتحرك واخطي هيج خطوه احس نفسي مو مستعدة حته اسمع الاجوبه اللي اريده لان اعرف مراح تكون بصالحي اريد اتراجع بالدقيقـة الاخيره
عاط عليـة أشهب
:- امشيي عااد حنضل واكفينن بنص الشارع يعنيي من ورى حضرتج
مشيت متوجه عليـه وكفت بصفه المنطقـه عبالك مهجوره ماعرف مابيـه احد اغلب البيوت فارغه مابيه سكن
شفنه مره وابنيـة طفله كاعد يمشون اندار عليـة أشهب كال انتظريني اهنا راح هوه ركض عليهم
ضل يحجي وياهم واني بعدني واكفه بمكاني
حسيت المره تباوعلي بنضرات غريبـة شويـه ورجعت نضرها على أشهب ضلت اتأشرله ومادري شنو
طلع أشهب فلوس من جيبه انطاها واجه بتجاهي
صار عندي فضول اعرف هل فلوس مال شنو معقوله مقبلت ادليه الـه بمقابل
أشهب : اندليت بعد فرعين منـا على اليمنه ثاني بيت
ريتال : ماشي
أشهب : يلا سبقيني للسيارة
رحت صعدت هوه صعد ورايه
ضل السؤال يراودني عندي فضول اعرف
ريتال : ليش انطيته فلوس للمره
أشهب : شفته محتاجه وانطيته عادي
ريتال : ليش تكذب الظاهر نسيت كبالك محاميه .. مقبلت ادليك الـه بمقابل مو
أشهب : اذا تعرفين شكو اسألين لعد ست
شكد سخيف ميكدر الـه يغث ماكو هيج بشر بالدنيا كله .. مغثه مينبلع يوكف بالزردوم
طبك كدام بيت شبه واكع تقريباً نزل قبلي ونزلت وراه
دكيت الباب اول مره وثاني مره وثالث مره يله انفتحت
چانت اكو مره وره الباب بس ممبين شي من عدها
:- شعدكم اهنا
:- انتِ ام وسن مو
:- اي اني منو انتِ
:- امي سعاد دزتني عليج كالت هيه تعرف كلشي
كملت جملتي وجان تعيط عليـة
:- ماعندجج شييي اهناا يمي يلاا روحي وبعد ديربالج ترجعين .. سدت الباب بقوه
رجعت ادك بالباب واحچي بتوسل
:- عليـج الله خالـة فتحي والله كاعد اموت اعرف كلش زين انتَ تعرفين اني ليش اهنا وتعرفين الاجوبه اللي اريدها عليـج الله بداعت عزيز گلبج فتحي الباب فدوة
ضليت ادك بالباب وتوسل مثل الطفلـة
انهد حيلي وهيه مافتحت الباب انداريت على أشهب وكتله امشي خل انروح .. بعد ما فقدت الأمل من فتحت الباب اللي
أشهب راد يهد عليـه بس مخليته
أشهب : عوفيني خلل اشوووف ابنن امه اللي مايفتح الباب والله اكسرها واطب غصباً على الخلفـه شنو ما تفتح الباب
ريتال : امشي خل انروح
انداريت داريد اصعد بالسيارة
بس سمعت الباب انفتحت وكالت ادخلو .. احس الامل رجعلي من جده وجديد
دخل قبلي أشهب اول مخليت رجلي بداخل البيت حسيت بشعور كلش غريب ماعرف شنو هوه دخلت جوه اكو ضوه كلش خافت ..اباوع على البيت فارغ حته اثاث ما بي
للحظه حسيت هل بيت ميسكن بي بشر حقيقيين
قاطعت تفكيري من كالت .. اكعدو بالكاع
كعدت بصف أشهب اول مره احس وجوده اليوم صحيح لو جايه وحدي چان انجلطت يمكن
كعدت كبالي بالضبط .. لاحضت اكو حروق بوجهه وأيده هم محروقه بشكل بشع كلش
:- شعدكم اهنا
:- تعرفين كلش زين اني متأكدة
:- كاعد اشوفين اشياء مو وعبالج مو حقيقيه ومن خيالج
:- اي
:- شكو شي اشوفي حقيقي ماكو شي خيالي
_ ماعرف ليش ارتاحيت من كالت كلشي حقيقي يعني اني مو مخبله ولا جنت اتخيل كلشي صحيح شكو شي حسيت بي صحيح اذكرت ذيج الليله الصار بيـه وانرسم شي على كصتي .. خليت أيدي على كصتي ومشيته اتحسس المكان شكو شي صار وعبالي اتخيلته طلع حقيقي ..
:- هل شي صار من انتِ وصغيرة .. جنتي مجرد ثمن او مبلغ اندفع مقابل الحصول على شغله وچان اللي قدمج او دفعج أمج سعاد
:- أمي اني ؟
:- اي امج سعاد في سبيل الحصول على شي هيه تريده تتوقعين ثمن مرض ابوج ابلاش يعني ؟ طبعاً لا تتوقعين وجودج اهنا ماله ثمن او سبب طبعاً لا حياتج كله بيه سبب والسبب يأدي الجواب واحد
انتبهت على الكلوب كام يطفه ويشتغل صار هوى بالبيت وشويه ضجيج
ام وسن : صفقه انعقدت قبل بالماضي بين امج والشياطين وچان ثمنه انتِ .. امج قدمتج على طبق من ذهب الهم من جنتي بأحشائه انكتبلج هل مصير مراح يجوزون منج الـه ياخذون روحج الطاهره واللي يريدج اكبرهم أبليس بنفسـه يريدج يريد روحج انتِ
مصيرج كلش واضح راح ياخذ روحج وتموتين وتصير ملكه لان هذا اللي اتفق عليـة واللي حيصير وماكو شي يكدر يوكف هل شي لو يمحي اول وتالي راح ياخذج ويسلب روحج منج
:- احاول استوعب كل اللي سمعته دفعه وحده بس ماكدر رافضه اصدك هل شي بالرغم اني اعرف بي حقيقي
جرني أشهب من أيدي وطلعني بره
اسمعه يحجي بس ما افهم شيحجي كلشي اتغير من هل لحظه من هسـه اني انولدت على مود صفقه اني ثمنه
وكفنه بالباب مال بيت نسمع صوت ضحكاتها وفرحته عبالك منتظره هل لحظه من زمان
أشهب : اذا ما اعفنه بالسجن لهل كح** مسويه روحه سحارة موو بسيطه انيي اعلمـه
ريتال : رجعني للبيت
صعدت قبله للسيارة اجه ورايه شغل السيارة وحرك
اريد ابچي بس ما اكدر خليت راسي على الجامه
اخخ بويـه لو تعرف بنتك شصاير بحالـة لو تعرف هيج حيصير بيـه اعرف مجنت راح تقرر اتجيبني للدنيا
شكو شي بجسمي يوجعني حته اظافر اصابيعي توجعني
گلبي تعبان كلش تعبان محد راح يحس ولا احد راح يصدك شكد تعبانه
منو راح يسمعني منو راح يصدكني من اسولفلـه اللي صار منو حيوكف ويايه ويكلي اني يمج .. اني محد يمي اني كلشي اعدي وحدي بس مراح اكدر اعدي اللي حيصير
حياتي صايرة عبارة عن امواج بحر هايجه محد يكدر يوكفه
منتظرني الموت على ابواب اني اعرف
اشهك بدون ما ابچي
سمعت أشهب يحجي شي انداريت عليـة حته اركز
أشهب : اللي ميبجي ميسمى انسان ابچي وريحي اللي بداخلج
حسيته تحفيز اللي حته ابچي
صعدت رجلي على الكشن وحضنته الصدري خليت راسي بين رجلي وكمت ابچي .. ابچي بغصه وبحركه يصاحبه وجع وندم وكره وحقد وعتب
اني راح ابچي واسمع نفسي بس گلبي اللي انطعن من اقرب شخص الـه شلون راح يبچي وينسمع ..
أشهب :: اسمع شهكاته ووبچيه شلون يخترق گلبي
بس ما بيدي عليـة شي اني .. منو اني بالنسبه الـه حته ادخل واواسيه واخفف عنـه اني مجرد غريب عنده عمل وياها لا اكثر
اني مصدكه كلش زين واعرف شكو شي كالـته المره صحيح بس ماكدر اكلـه اني مصدكج وأيده على هل شي ماريد اكله اي مصدكج وانتِ راح تموتين
اباوع على شعرها شلون ضاربه عليـه الشمس ومبين جوزي الشامات اللي بزندها شلون مبينات أيده اللي ابيض من الثلج ..
اندارت عليـه تباوع بعيوني
عيونها صايرة حمر دم مال بچي وخدودها ورديات خشمه الصغير صاير قطعه مال طماطة
نمشـه اللي ميزه عن غيرها وزايدها جمال فوك جمالها طاغي كلش على ملامحها .. احس رب العالمين خلقه بشي خاص مخلق احد يشبهاا أبد
احس جمالها كلش مبالغ بي طاغي الدرجـة محد يتصورها أبد
ريتال : شنو حتضل اتباوع مشايف احد يبچي قبل لو شنو
حته هيه وعصبيـة ومطايقه احد حلوة
عصبيتها حلوة مال جهال
درت وجهي من عدها بعد ما استوعبت نفسي شكاعد اخوط واخربط بيني وبين نفسي
رجعت هيه خلت راسه على الجامه وسكتت بعد مكامت تحجي ضل بالي مشوش لازم اروح على شخص اعرفـه
راح يساعدها متأكد اني
ضل الطريق هدوء صوت ضجيج العالم هذا اللي يدك هورن هذا اللي يتعارك هذا اللي منتظر هذا اللي تايه
كل هل امور بجهه والضجيج اللي بداخل ريتال بجهه
طلعت من الازدحام بعد مده رجعت باوعت على ريتال شفته غافيـه وخصلت شعرها نازله على عيونها
مديت أيدي وخرتها من عيونها طخت أيدي بخدودها الناعمه أيدي وحدها بكبر وجهه
اني ماشايف هيج بنيـة ابد
ولا صار عندي فضول اتقرب واساعد شخص هيج اني وحش مثل ما سمتني هيه فعلاً اني مجرد قاتل يدور فريسة حته يفترسه
بس هيه ما حاولت افترسه مثل ما اني معتاد
اخذت نفس ورثت جكاره وتوجهت البيتـة
وكفت اباب البيت واني اشوفها غافيه ميهلي اكعدها احسه محتاجه اتنام مرت تقريباً نص ساعه واني واكف اباب البيت الحد ما طلعت اخته من الباب كاعده اذب الزبل
شافتني اجت ركض عليـه
فتحت الباب اللي يم ريتال
:- شوكت وصلتو
:- هستوني طبكت
:- اها زين بس شعجب نايمة
:- ماعرف يجوز تعبانه شمدريني
كعدتها اندارت عليـة ابتسمتلي ونزلت من السيارة
احس هل ابتسامـة طالعـه من كل روحها حسيت بشعور غريب انتظرتها طب للبيت يلا حركت
توجهت للمركز طبكت ودخلت كبل بمكتبي احس بحراره نزعت سترتي وشغلت السبلت فتحت دكم القميص اللي بالبدايـة
وخليت راسي على الكرسي وغمضت .. اندكت الباب صحت ادخل بدون ما ارفع راسي
حسن : شبيك سيد شو مو على بعضك
أشهب : دايخ
حسن : اعرف بشنو دايخ
عدلت كعدتي واني انتظره يحجي ..
حسن : بريتال مو
أشهب : دكوم من يمي لا اطلع حركتي بيك هسـه
حسن : ديلا عيني عساس مادري ... عليمن جاي انتَ ترا اعرفك من جانت امك بعدها ماكاصه الحبل السري مالتك
أشهب : شتمسلت انتَ مدكلي
حسن : ليش مدكلي شديصيرلك مو احسن
أشهب : زين ليش مو انتَ دكلي شعندك ويه مروه
حسن : ماعندي شي وياها
أشهب : لتكذب تعرفني شكد اكره الكذب
حسن : تعجبني
أشهب : اعترفتلها
حسن : اني بس كلتلها خل نتزوج ركعتني راشدي
أشهب : ههههههههههههههههه اخخ يمـه .. زين شواربك احسلك مره تضربك چان ستحيت
حسن : اسكت يمعود مسويه نفسه عساس صعبـة المنال اتبيع عزة نفس براسي واني *** يسولفلي
رجعت راسي على الكرسي ورجعت غمضت سبحان الله الخوات يشابهن فعلاً
ريتال :: اليوم هدوء ماكو اصوات براسي ولا سمعت شي
امدده بفراشي كل عاده بس هل مره مو مثل كل مره منتظره شراح يصير بعد اللي سمعته اليوم مستحيل هل هدوء راح يضل هدوء اكو عاصفة بالطريق
فتحت الباب عليـة مروه وضلت واكفه
:- مراح تاكلين شي
:- لا ما اشتهي
:- من جيتي الحد هسه انتِ مو على بعضج شصاير
:- حتلو اذا كتلج مراح اتصدكين فـ راح اكتفي بـ ماكو شي
:- شنو علاقتج بأشهب زين
:- ماعندي علاقـة بي قابل شعندي مجرد زميل عمل
:- متأكدة
:- مروه لضوجيني ترا كلش تعبانه وبس الله يدري بتعبي شنو فـ لدوخيني احسلج
طلعت وركعت الباب وراها معاجبه كلامي
وتعرف كلش زين ماعندي شي ويـه الولد مجرد كلشي ديصير صدفه حته حضوره اليوم اني مجنت رايدته
حسيت عليـه اليوم شلون يباوعلي وچان صافن عليـة من ابچي حسيته چان يفكر بس معرفت بشنو تحديداً احسه مصدكني بس ينكر ويكذب روحه
وراح اكتشف هل شي
سمعت صوت رنـة تليفوني شفته محمد
:- ها ريتال شلونج
:- هلا محمد الحمد الله
:- حبيت اسأل عليج احسج مريضه
:- لا مابيه شي
:- انشاء الله ... شفتي ملف القضيـة لو بعد
:- لا والله مصارلي مجال
:- من يصيرلج شوفي لان العالم منتضره جواب مني .. ولتنسين باجر الجلسـة مال نور
:- انشاء الله
:- يلا اخذي راحتج
فعلاً اني نسيت امر الجلسـة والقضيـة اللي انطاني اياه محمد ... كمت ادور الملف ماعرف وين حطيته فتحت الكنتور ادور بالملابس اخاف شايلته وياهن بس ماكو .. دورت بالكومدي وبالفراش وبالغرفه كله ماكو وين اختفى
دنكت بالكاع باوعت جوه الچربايـه شفته واكع جوه مديت أيدي بس بعيد عليـة كلش
رجعت مديت أيدي احاول اوصله
لزمت شي بس مو الملف حاولت اتلمسه
ماحس اله أيدي انكمشت حيل
حاولت اسحبه بس قويـه ماكدر
حسيت كف أيدي راح ينكسر من القوة
اكو شخص دخل الغرفتي بس مداكدر اندار لان أيدي محكمه
صوت المشي بالغرفـة الحد ما صارت يمي
رفعت راسي عليـة
تفاجئت كلش وحجيت
شيماء ..؟
يتبـع ...
اذا عجبكم البارت لتنسون اتصوتون 🤍!