غسـق اللـيل

BART 32

نبدأ بذكر الله ﷽🤎✨

غسق الليل

بارت 32

قراءة ممتعة
🚫لا تنسون تصويت ومتابعة لحسابي فضلآ وليس امرآ..
.................................... ♡

جواهر..

امشي بين الممرات جسمي يرجف عيوني متروسة دموع كل شوي افز
على فتحت الباب يطلع دكتور ويدخل دكتور ثاني ما مفتهمة شي

فلاح يركض وراهم ما ينطونه كلام واحد كعدت على الكراسي بعد ما بيه
اوكف لافه جسمي بالعباية لازمتها حيلل ادعي ادعي من كل گلبي..

حبيتة؟؟
مادري مادري بنفسي انا كلي على بعضي مخربطة ماعرف مشاعري شنو
يمكن بس لأن تعودت عليه !.
اي اي جواهر شلون تحبينه بهل سرعة؟.

مسحت راسي بكف ايدي بعد مرور ساعة او اقل وفلاح كل شوي يذب حرگة
گلبه بيه لأن اجيت ويا وما سمعت كلامه بقيت ساكتة.

اجاني يمشي اكتافة تهتز بلعت ريك وكف فوك راسي وحجه يمسح بوجهه

فلاح - باعي خوية خلي زيارتج اله ايجابية مو تدخلين تتبجبجين وطلعين
لا حاجي بلكي يستجاب لكلامج ويحرك جسمه يكولون لازم تمر اربعة وعشرين ساعة
نحدد بيها حياتة يا اما بخطر يا يتعدى مرحلة الخطر بعد ما وصيج ماشي؟؟

جواهر -: تمام لا تخاف انا اعرف احجي زين وأعرف شنو احجي ماكو داعي لكلامك
هذا بس انتَ ليش ما كلت للحجية؟؟

فلاح - ماكدر اكلها هسه توها صارت زينه اذا اكلها بحالتة هل مره ما تعدي على خير
خلي نصبر بعد ساعات ولله كريم انا راح ابقى هنا راح يجون اصدقائة بالشرطة

جواهر -: شيسوون يجون؟

فلاح - يشوفونه جا شيسوون
وياخذون اقوالة بعد ان شاءالله اذا كعد لازم يلزمونهم هل سرسرية
شلة زعاطيط والله اذا وكعو بيدي ما يطلعون سالمين..

جواهر -: اكدر افوت هسه؟؟

فلاح - ايي تعاي وراي

مشى كمت مسحت وجهي امشي وراه دخلت لغرفة لبست ملابس مستشفى
فوك ملابسي حتى كمامة لبسوني حسسوني داخلة اسوي عملية..

طلعت من الغرفة امشي هل مره وره الممرضة وصلتني لغرفتة وحجت

- حبيبتي عندج اقل شي نص ساعة لسلامة المريض لا تتأخرين

-: تمام شكرآ

- العفو واجبي هذا

تنهدت زفرت انفاسي بصوت مديت ايدي لباب الغرفة فتحتة
صوت الأجهزة ينسمع بالغرفة تقدمت بخطوات خافتة..

سرير زغير يتوسطة جسم مليان اجهزه خليت ايدي على حلكي من الصدمة
حرفيآ المنضر يبجي حتى العدو شلون نطاهم كلبهم هيج يسوون بي؟؟

وجهه بي شك من ناحية خده الأيمن مخيطينه عاري الصدر بطنه بيها مدري شنو
مخلينهن بوسط صدره وبطنه من خوفي ورجفتي بقيت مفهية..

رجعت لواقعي لزمت ايده بارده بجيت بضعف وصمت ما سيطرت على دموعي
ماكدر امسح دموعي وينزلن مو بيدي نكسر كلبي وانا اشوفه هيج..

جواهر -: أدم
كوم فدوة تره مشتاقيلك علي يبجي عليك ويذكرك كل يوم يكلي اريد بابا
ياخذني لمدينة الألعاب من ينام ويكعد الصبح اول شي يسوي يدور بالغرفة وبالبيت كله
عليك.

وأذا ما شافك يجي يسألني ماما ما رجع بابا احبه اريد اشوفة علي صار يحجي
بطلاقة بس شوي اكو كلمات بعدهن صعبة عنده الحجية احم ..

الحجية منتضرتك من يوم ما سمعنة خبر خطفك هيه كل شوي متخربطة
لو تشوفها شصار بيها تعبت تريد تشوفك وزينب ههههه زينب على كد ما تحبك
تتعارك وياي..

فلاح دموعة بعيونة كل الوكت حيلة راح ضهره مدنكه كل الوكت من ساعة ما
سمع بالخبر هو يفتر انا وبكل صراحة احسدك على هيج عائلة..

يستاهلون خبر حلو منك حباب كوم تسمعني انتَ؟؟
انا
انا بعمري كله ما فكرت بيوم من الأيام ممكن اخاف عليك ودعي ترجع بسلامة
بس هسه اترجاك خليك قوي لا تستسلم .

راح انتظرك من ترجع تنفذ كلام الحجية حتى نزوج ونعيش بـ سعادة
علي محتاجك وانا محتاجتك بحياتي فدوة اذا تحبني من صدك لا طول بالنومة..

احجي دموعي تصب شفايفي ترجف حالي مبهذل مسحت دموعي بقوه
لازمه ايده حسيت اصبعه الوسط تحرك وخرت ايدي بسرعة..

اباوع على ايده بالعه ماي ريكي

-: تسمعني صح؟
أدم انتَ تسمعنيي مو..

نزلت نضري لأيده من نرفع اصبعة قليل ضحكت بحركة سريعة مني دنكت
طبعت قبلة على راسة وخرت البسمة على وجهي سرعان ما تذكرت السويتة..

عضيت شفايفي رجعت الكمامة مغطية حلكي عزا بعينج جواهر يله محد شافج
عادي عادي طلعت ركض من الغرفة لاكاني الدكتور ويا فلاح وكفت التقط انفاسي

فلاح - شبيج ليش هيج شكلج أدم بي شي؟؟.

هزيت راسي بلاا مسحت وجهي وحجيت بتقطع

-: أ. أدم تحـرك سمعنـي من احجـي ويا

الدكتور - هذا خبر مفرح بنسبة لحالتة واضح الج تأثير علي خلي اشوفة
عن اذنكم..

ابتسمت كاعده على المقعد نزعت الكمامة والجفوف شمرتهن بزبل

فلاح - جنت اعرف راح تسوين شي يكولون من لاكينة بشارع لحد ما مدخلينة
بصالة العمليات هوه يردد بس اسم واحد جواهر

ابتسمت هازه راسي بخفوت اضرب رجلية بالكاع من التوتر نص ساعة شفنة الدكتور طلع
من غرفتة ثنينة وكفنة حجه فلاح بـ ستعجال

فلاح - طمنى دكتور

- الحمدالله تعدى مرحلة الخطر بفضل الله سبحانة وتعالى

من الفرحة ضحكت بصوت عالي مادري بنفسي بس ختفت ابتسامتي من حجه الدكتور

- بعدني ما مكمل كلامي..
عنده جانب من كلياتة متعرضة لضرر لازم عملية بالأضافة وحده من رجلي مكسورة
يرادلها شهور حتى يترمم عضمها لازم العلاج من خارج الدولة اذا تردون يتشافى بسرعة ويرجع يمشي طبيعي..

غمضت عيوني عاضة شفايفي ياربي دخيلك حتى ما لحكت افرح من يكعد شنو راح تكون
ردت فعلة؟؟

فلاح - زين دكتور ممكن توضح اكثر بخصوص العلاج من يا دولة نكدر نحصلة؟؟

- من تركيا ابني العلاج الزين ومفعولة قوي تكدرون تسفرونه من يكعد خلي يرتاح
اسبوع او اكثر وبعدين تكدرون تسفرونة لتركيا لأخذ العلاج وجلسات تصوير مهمة
وما علي غير العافية بأذن الله..

اخذت نفس مسحت وجهي كعدت بمكاني فلاح متوتر ندار عليه وكال

فلاح - بعد انتِ وجودج هنا ما اله داعي خوية خلي ارجعج للبيت طمني البنات
والحجيه كل شوي يدكن علي ابنج يبجي

وكفت وحجيت

جواهر -: بس اذا كعد ترجعني مره ثانية مو؟

فلاح - ايصير خير يله تعاي

هزيت راسي بدون كلام طلعنه من المستشفى صعدت وره حرك السيارة طول الطريق
ساكتين وصلني لباب البيت نزلت لتفت عليه وحجة

فلاح - انا راح اروح لشغلي تأخرت انتِ طمنيهن لا تجيبين سيرة السفر والعلاج هسه ماشي؟!

جواهر -: ان شاءالله

راح وانا دخلت للبيت اسمع صوت بجي علي جاي من غرفة الحجية
ركضت فتحت الباب لكيته عد زينب شايلتة وهوه ميت بجي يضرب بيها..

بس شافني شمر روحه عليه اخذته منها خايفة مسحت دموعه طبعت قبلات
على وجهه وحجيت بهدوء

جواهر -: شبي ابني يبجي ها؟
عمري انتَ كلبي اشش عيب تبجي ماما انتَ صرت رجال ما يصير تبجي مو بابا علمك
ما يصير تبجي على اتفه الأشياء؟؟.

- بابا

-: ايي يا روحي بابا شنو كلك مو كلك الزلمة عيب يبجي على اشياء ما تستاهل .

- يعني انا ذلمه؟

-: ههههه اي انت ذلمه
ما كتلي ليش تبجي ها؟؟

- مشتاك لـ بابا وللمدرسة هواااي هيج هيج

يحجي ويفتح بيده ضحكت كاعده بالكاع نزعت عبايتي نفتح الباب نداريت
دخلت نور

-: تفضلي

نور - كواج الله
جيت اسأل على أدم شلونه

جواهر -: زين الحمدالله تعدى مرحلة الخطر الحجية وينها؟؟

زينب - بالحمام

-: ها زين هسه انا بس ابدل ملابسي وجي اساعدجن بالغده..

نور - ااحبيبتي بس كليلي فلاح هو الجابج؟؟

جواهر -: اي هوه وصلني

نور - جا ليش من ادك علي ما يجاوبني !؟

جواهر -: هوه كلي انا راح اروح للشغل تأخرت

نور - تمام جا انا راح اروح اطبخ منا وهيج يحلون الجهال من المدرسة وننخبص
يردون اكل..

جواهر -: ماشي انا هسه اجي

طلعن كمت قفلت الباب طلعتلي ملابس بدلت ملابسي فتحت الباب
لاكتني الحجية مادري ليش اكلها حجيه المفروض اكلها عمه.

بس لساني اخذ الحجية هيه اصلآ ما تحجي شي ابتسمت بوجهه دخلت جوه
كعدت بصف علي خلت يمها عوجيتها رفعت راسها وحجت

- ليمتة رجعتي؟

-: قبل شوية حجية

- أدم شلونة؟؟

ستغربت طريقة كلامها وياي بس تغاضيت عن تضراتها الي ورديت بهدوء

جواهر -: الحمدالله تعدى مرحلة الخطر باقي بس ننتضر يفتح عيونة

- خاف ضامه عليه شي هل مرة تره ما اسامح خاف حسبالج اعديها الكم
انتِ وفلاح..

بلعت ريك ورديت

جواهر -: حجية والله احنه مو قصدنة نضم عليج بس لأن جنه خايفين عليج
لا تتخربطين مره ثانية وفلاح كال لا تكللها هسه من يكعد اخذها اله..

الحجية - ياكل خره فلاح بله مات ابني وانا ما شايفتة كلبي محترك علي
وأنتم تدرون بي لاكينة وبالمستشى حالته خطرة ما تكلولي؟.

فتحت شفايفي اريد احجي سبكتني شايلة عوجيتها تأشر علية وتحجي

- اشش صوتج ما سمعة طلعي منا

عضيت شفايفي طلعت ساده الباب وراي عزا شكد مخيفة وهيه عصبية
شكول عليك فلاح جا من تعرف بحالتة هسه وما كتلها تطردني من البيت
بدون أي رحمة..

رحت للمطبخ عقلي وتفكيري وكلبي كلة يم أدم خايفة من الجاي حيل
ليمتة ارتاح بحياتي؟ جبتها من الزغر هم وقهر لحد الكبر انا اعاني..

راح نص عمري بالويل والبچي وهسة كبرت وكبرت وياي جروحي مادري ليمتة
راح ارتاح وعيش حياة مثل باقي النسوان بدون مشاكل..

بدون أي قهر وضيم ياربي ليمتة يخلص امتحانك بعد ما بية صبر..
تنهدت بصوت ماسحة وجهي مر اليوم عادي مثل كل يوم..

واليوم الثاني نفس الشي حالت أدم مثل ما هية ما تغير شي بس الشي
الزين زينب شوي تحسنت احسها صارت احسن ومرات تشيل علي وتلعب ويا..

حاولت تحجي وياي اتجنبها شمدريني ما محضرتلي مصيبة بيوم الرابع تحديدآ
الساعة 9 ونص بليل دكو على فلاح وكلوله اكو شخص جاي خصوصآ
لأدم وحاول يكتلة بس ملحكين علي بأخر الثواني لازمينة..

فلاح تخبل طلع كل عاده يصيح ويغلط ماعرف شنو يردون منه اكيد يعرف شي
مهم لهذا حاولو يكتلونه الحمدلله مخلين على غرفتة حارس والا جان كتلة بدون ما
يرفله جفن..

حياتة بخطر حتى وهو بالمستشفى يا ترى شنو الشي الخلى شخص يحاول يكتل
محقق وهو بين الحياة والموت؟.
ليش ما نتضرو يمكن يموت مثلآ بس اعتقد الشغلة اكبر بهواي..

اكيد دازينة نفسهم الخطفو يا ترى أدم شنو يعرف عنهم حتى هيج يردون
يكتلونة؟؟

كل هل افكار براسي اجيبها منا ورجع منا الأفكار تتراطم براسي احس صار
علي ثكيل رجع فلاح يضحك والأبتسامة شاكة حلكة..

عقدت حاجبي بستغراب وياي نور وزينب والحجية كاعده على القنفة
لازمه عوجيتها بس صار يمها فلاح ضربتة على رجله وحجت

- شبيك تضحك تخبلت ما تحجي

مسح رجله ومعالم الألم واضحه على وجهه ورد

فلاح- مو هيج حجيه صدك جذب اخ رجلي لو تدرين الخبر الجايبة الج يسوه
الدنيا كلها ..

- احجي فورت دمي اخوك شلونه

كعد على القنفه وحجه

فلاح - فتح عيونة !!
رجع الأسد وهل مره راح ينعل سلفة سلفاهم لهل *** ما يعرفون ويامن ندكو..

ضحكت بفرح مو مصدكه سكتت من حجت الحجية
داكه عوجيتها بالكاع

- اخذني اله هسه

فلاح - ما يصير حجيه هسه ماكو زيارات للصباح لازم ومن عيوني اخذكم كلكم

- اكله اخذني هسه يكلي الصبح شني ما تفهم اريد اشوف ابني اكحل عيني
بشوفتة مو كافي شهر ما شايفتة..

زينب - حجيه حتى لو ترحين هسه ما يخلونج تشوفينة يعني تصير
روحتج خالي بلاش صبري للصبح ونروح كلنا..

فلام - اندري بعدين انتِ الله يخليج صبرتي شهر ما تكدرين تصبرين
للصبح وهم روحت المستشفى مو زينة الج حجية اهم شي صحتج عدنه..

- انا اصير زينة من اشوف ابني لا حسبالكم نسيت سالفتكم من جذبتو عليه
بس مخليتها لغير وكت..

ضحك فلاح ورد

- الله يستر منج حجية ما تنسين شي وداعتج انا بس على مودج ما ردت
تتخربطين علينة مرة ثانية وهسه الصار صار اهم شي أدم رجع بخير وسلامة..

- شايفين لو أدم صاير علي شي لا سامح الله وما شوفه مرة ثانية جان طردتكم
كلكم بره البيت انتم وجهالكم وشوف ياهو اليدخل البيت مرة ثانية..

فلاح - وعلي انا خفت جنها صارت حامية اكثر خفي علينة حجية تره كلنة مساكين
ومنج وبيج هيج يهون عليج تطردينة من البيت..

- هذا الموجود الـ يجذب علية مصيرة بره البيت مهما يكون هذا الشخص
هسه عوفنه من هل حجي ليمتة يطلع حتى نسوي عزيمة بمناسبة رجوعه بسلامة
انا نذرت ونخيت ام البنين ( ع) ما ردتني خايبة اعرفها انا ما تردني هاي ثاني مره
انخاها ..

هز راسه ورد

- ونعم منها تستاهل ان شاءالله حجية

- خوش وهسة يله كلمن يروح لغرفتة ينام تأخر الوكت ..

ستقام من مكانة باس راسها صبح علينه وراح هو ومرتة وراها زينب بقيت انا وياها
باوعت عليه بلعت ريك كضت وكامت للغرفة بدون كلام..

زفرت انفاسي عيونها يخوفن ههههه والله خوش تالي عمري اخاف من حجية
رحت وراها لنفس الغرفة لكيتها حالة شيلتها شعرها طالع اسود وبي شيب..

سديت الباب هيه عدها جرباية بس انا وعلي انام بالكاع نزعت شالي
خليتة يمي شلت الغطى ندثرت جوه الفراش يم ابني غمضت عيوني ونمت...

ثاني يوم.

كعدنة كلنة جهال فلاح راحو للمدرسة وأحنه رحنة للمستشفى الحجية كاعده يم فلاح
بصدر وانا وعلي وره زينب ماكدرت تجي عدها امتحان وهيه سادس ونور بقت بالبيت..

نزلنه كلنه داخلين المستشفى ناقلينه لغير غرفة الحجية كالت تريد تدخل وحدها
بدون ما احد يدخل وياها عاد خلاها فلاح براحتها احنه ضلينه بالممر ننتضر..

كل شوي عيني تروح للساعة بقت نص ساعة نفتح الباب وطلعت تمشي على
عكازتها كعدت على المقاعد يمي وحجت

- روحيلة يريدج

هزيت راسي شايلة علي لزمت ايدي وكالت

- بس انتِ خلي علي يمي

نطيتها علي لزمت عبايتي 
فتحت الباب ودخلت ندار علية ابتسم بس لمحني رجلية ترجف.

فتح ادي وحجه بتعب

-: خلينـي ازيـح تعبـي بحضـنج سجينتـي

شهكت مخلية ايدي على حلكي عضيت شفايفي تدنيت يمة محتارة
اباوع على وجهه وأدي بدون أي مقدمات شمرت جسمي بحضنة ابجي.

شد على حضني باس راسي يحجي يم اذني بخفوت..

-: اشش لا تبجين اش كافي مسحي دموعج اخخ لو تدرين شكد مشتاگلج
والله ما جنت اشتاك هل كد الج حسبالي بعد ما اشوفج ونطفت ناري
بس الحمدالله اشش خلي اشوف وجهج اشوف..

رفع راسي طبع قبلة على شفايفي بسرعة شهكت وخرت من حضنة بلعت ريك
جسمي يرجف ضحك خفيف مسحت وجهي برتباك تنهد وكال

أدم -: والله فقدت الأمل بشوفتج انتِ وعلي كلت بعد ها هية هاي النهاية
نتهت حياتي بس الحمدالله على كل حال هذا انا ما بية شي وأنتِ واكفة يمي
تبجين علية ما جنت اتوقع بيوم تبجين علية هيج؟؟..

مسحت دموعي سحبت كرسي كعدت يمة وحجيت

جواهر - انا هم نفسك خفت هوااي كلت بعد ما اشوفك ما جنت اضن هيج راح
اشتاقلك مادري مشاعري متخربطة لو تشوفنه من سمعنة بيك مخطوف وسيارتك
عليها دم...

صدك أدم منو ذوله شيردون منك؟.
ليش يردون يكتلونك..

أدم -: مجرد مزعطة لا تفكرين بيهم بس خلي اطيب ورجع على حيلي
ساعتها ما ارتاح اله وانا اشوفهم بالسجن هل گو*** وين علي جيبي خلي اشوفه

جواهر - عد جدتة تريد اجيبة الك

أدم -: ايي بسرعة فدوة

جواهر- تمام لحضة

طلعت بره ما لكيت احد بقيت ادور ماكو سألت الحارس يكول طلعو بره
قبل نص ساعة وبعد ما رجعو رجعت للغرفة مستغربة..

أدم -: ها ليش تأخرتي

جواهر - ماكو احد الحارس يكول طلعو قبل نص ساعة وبعد ما رجعو
وين راحو بدون ما يحجون؟.

عقد حاجبى ورد

أدم -: اجوز رجعو للبيت تعاي كعدي بمكانج عدي حجي مهم وياج..

رجعت كعدت يمة هزيت راسي بشنو

-: بس ساعديني اعدل ضهري

- شلون؟؟

-: بس رفعي السرير شوي منا

- ها تمام

كمت عدلت كعدته ورجعت تحمحم وحجه

أدم -: باعي حبيبتي انا اعرف كلش زين بوضعي حجالي فلاح كلشي
والدكتور فهمني لازم اسافر لتركيا..

جواهر - اي صــح

هز راسه ورد مكـمل كلامة

أدم -: اريدج تسافرين وياي طلبت من فلاح يجهز جواز الج انا عندي جواز
بس انتِ ما عندج مو مشكلة جبيرة فلاح راح يهتم بالموضوع شكلتي؟؟

من صدمتي بقيت ساكتة اراجع كلامة هزيت راسي بعدم تصديق ورديت

جواهر - أدم انتَ كاعد تسمع اذنك شنو تحجي؟؟.
تريدني اسافر وياك وانتَ
هذا وضعك لا ونوب نسيت علي؟؟
منو اله هنا ؟!

أدم -: افهم من كلامج تردين تعوفيني بوكت انا محتاجج اكثر من أي وكت
جوهرتي انتِ وافقي وعد ما راح تندمين نسافر حتى اتعالج ومن اطيب نرجع
نسوي العرس هنا ما نتأخر اقل شي شهر نبقى.

بقيت صافنة ماعرف شحجي؟.

جواهر- صعب هواي صعب ماكدر علي اذا تمر دقيقة وما شافني يبجي ويدور علية
مو نوب شهر ما ينطيني گلبي اعوفه اذا يروح ويانة بيها مجال بعدين انتَ ليش ما
كلت لفلاح ليش انا بضبط؟؟

أدم -: راح تعرفين كلشي جوهرتي
كلشي بوكتة حلو ..

فتحت حلكي اريد احجي بس سكتت من نفتح الباب دخل فلاح شايل علي
بس شاف أدم صرخ بضحك يكمز من مكانة يريد يروح لأدم..

ضحك فلاح دنك نطا لأدم اخذه حاضنة بكلبة مخلي راسة بركبتة
يشم بي ويبوس ابتسمت بفرح وأخيرآ علي ضحك خلا بحضنة..

جواهر - وين رحتو طلعت بره ما لكيتكم وين الحجية؟؟

فلاح - الحجية وديتها للبيت اخذنه علي ويانة ومن رجعت جبته وياي
فرحان بالسيارة يكول ما راكب سيارة بحياتة..

أدم -: شبيها الحجية خو ما تخربطت؟

فلاح - لا ما بيها شي بس هيه ما تحب المستشفيات انتَ تعرفها فـ رجعتها للبيت
بعد هيه شافت ابنها وكحلت عينها على كولتها..

أدم -: وشنو صار على ربعنة؟؟

فلاح - بالحفض والصون ابو علي افا عليك ما تعرفني يعني؟

أدم -: ونعم منك ابو محمد ليمته يخلص جواز المره؟.

فلاح - باقيلة ايام قليلة ان شاءالله وبنسبة لطلعتك منا باجر الدكتور يجيك وضعك
ونشوف اذا يسجلك خروج او تبقى بعد يوم..

باس ايد علي ورد

أدم -: تؤ هذا الحجي ما يصرفلي اليوم اطلع منا زين مني كاعد لحد اللحظة

جواهر - لا تعاند جروحك بعدهن ما طايبات

أدم -: تؤ طابن من زمان بالبيت ارتاح اكثر هنا هوسة وريحة الديتول والمستشفيات
تخنك ما حبها هسه اريد اطلع

رد فلاح عاقد حاجبة

- هسه هسه؟.

-: اي هسة يله روح وقع على مسئوليتك الخروج..

- امري لـ الله رايح عمي رايح

راح فلاح نداريت على أدم وسألتة بستغراب

جواهر - منو ربعكم ؟

ضحك وخر علي من بطنه ورد

-: بالشغل لا تفكرين انتِ
اخخ ولك صاير ثكيل وما تنشال

دنك على علي يحجي ويا تنهدت بقيت اباوع عليهم علي ميت ضحك وهذا يدغدغ بي
عيوني تركزن على وجهه شكد متغير صح اكو اثار الخياط بخده..

بس بعده حلو بعيني نزلت نضري لرجله مجبريها اله رفعت راسي تلاكت عيونة سوه
بلعت ريك رفع حاجبة غمزلي وهز راسة عضيت شفتي بخجل..

يبو عليج جواهر شكو تباوعين هيج ضحك مدنك راسة على علي من خله ايده
على خده مكان الجرح بلع ريك من سألة علي بصوت مستغرب

- بابا اوه مو حلو

وخر ايده مبتسم طبع قبلة على خده و حجة

-: حبيب ابوك انتَ ما بية شي بابا مجرد خدش زغير يطيب بسرعة
بمرور الوكت..

دخل فلاح ويا الدكتور طلعت بره ومن خلص الدكتور دخلت سجل خروجة من المستشفى
وقع فلاح نطاني علي جاب كرسي متحرك لـ أدم مايكدر هسه يمشي على عكازة..

طلعنه من المستشفى صعد أدم بصعوبة بسيارة وصعدت انا وره
حرك فلاح السيارة اباوع على أدم وجهه بي حزن يمكن من حالته..

تنهدت ساكتة بعد مده وكف كبال باب البيت نزل فلاح فتحة ورجع دخل السياره
جانت واكفة بالباب الحجية على عكازتها يمها زينب ونور..

وكفت السياره نزلت نزل فلاح وندار على أدم وكف مطلع مبايلة مدري على منو دك
بقى يحجي دقايق طفى لتفت على صوت أدم يحجي عاكد حاجبة..

-: شبيك واكف جنك دثو تعال ساعدني خرب رجلي نشلت..

فلاح - اصبر دقايق اوامر الحجية هاي..

أدم -: اوامر الحجية كتلي؟؟
ليش بوية؟

قبل لا يجاوبة دخل زلمة جبير بيده طلي يكود بي متنه ضحك وهذا علي
يريد يلزمه ابتعدت عنهم خله الطلي جوه رجلين أدم بيده سجين..

نوما مشددين رجلي خله السجين على ركبتة غمضت عيوني وخليت ايدي على عيون
علي بعدها نزل فلاح الكرسي ونزل أدم دخلو جوه والحجية طلعت مسوية ثواب..

بقينة نطبخ اكثر شي الطبخ على نور انا وزينب علينة الخفايف
بس دقايق نترس بيتنه نسوان وجهال اشكال بقيت مفهية بالوجوه..

طلعت الحجية عازمة اهل المنطقة كلها كل شوي اطلع اريد اشوفه ماكو
خلصنه الغدى وبقت المصيبة الٱكبر غسل المواعين احس ضهري نكسر..

زينب -: جواهر أدم يريدج

نداريت ضهري عاقده حاجبي هزيت راسي وحجيت

جواهر -: وين هو؟

زينب -: بـ صالة

هزيت راسي كمت غسلت ادية ورحت للصالة لكيته متسطح على القنفة
الحجية يمه تلعب براسة وفلاح يضحك الجهال يلعبون بالكاع وعلي وياهم..

الكل راح محد بقى بس شافني ابتسم ابتسمت بتوتر رفعت راسي للحجية من حجت

- تعاي ساعدي يرتاح بغرفتة

هزيت راسي بالعة ماي ريكي تدنيت يمه بقيت مفهية شلون اساعده.؟؟

- يل فاهية شمتانية

فزيت على صوت الحجية عدل كعدته خليت ايد على جتفه
وهوه خله ايده على خصري عكدت حاجبي بفشلة مشيت بي لحد ما دخلنه الغرفة..

بس سديت الباب خله راسه بركبتي رجف جسمي همهم بصوت وحجه

أدم -: وحك الكعبة مشتاكلج

جواهر - لحد يدخل عيب راسك وخره يا

ضحك وخر راسه غمزلي وكال

أدم -: محد يدخل اليوم العب الغالي ع لغالي

اردف وهوه ينام على الجرباية خزرتة فاتحه عيوني بصدمة من كلامة
ضحك جراني من ايدي شهكت انفاسه بركبتي رجفت وحجيت بتوتر

- حرام عليك تره وخر عني اريد اطلع عيب بعدني ممخلصة مواعين..

-: انعل ابو المواعين اكلج صدك شنو كلتي بخصوص السفر وياي؟؟

- مادري

-: يعني موافقة؟

- يا ليمتة كتلك موافقة بس مادري بعدني مستغربة الموضوع..

-: جوهرتي تدرين ليش ختاريتج انتِ؟

- لا مادري

-: عدي الج مفاجأة اكفر بيها عن كل اخطائي وياج وأنتِ بعد بكيفج اذا تردين
اتقدملج ونزوج وذا تردين لا توافقين مستحيل اضغط عليج مره ثانية..

- شنو المفاجئة ؟؟

-: غير مفاجأه..

- حمستني تره

-: تذكرين من كتلج راح اسوي كلشي حتى اشوف ضحكتج وخليج تنسين كل حياتج
القديمة شوي شوي راح ارجعج للحياة جوهرتي انتِ تستاهلين حياة احلى وأجمل
من العشتيها ..

تنهدت ساكتة وخر الشال ايده تسللت للقراصة وخرها نزل شعري وره ضهري
بلعت ريك وخرت لزمني من ايدي رجعني لمكاني منطيتة ضهري..

وهوه وراي يلعب بشعري بس انفاسنه تنسمع مرت دقايق نعست كلش
عيوني بدن يقفلن وحدهن وهو اصابعة تتخلل بشعري..

ما حسيت بعد بشي نمت نومة طويلة من التعب ما دريت بروحي وين اني
حتى علي نسيتة نايمة وحس اصابع داخل حلكي وعلى شفايفي..

وخرت راسي متنهده فتحت عيوني بخفوت صار بوجهي علي على وجهه ابتسامة
اصابعه على وجهي تلملمت بفراشي لحد ما ستعاديت وعيي..

كمزت من مكاني من تذكرت الصار عيوني ادوره بالغرفه ماكو كمت غسلت
لميت شعري خليت الشال على راسي وطلعت لازمة علي..

دخلت للصالة كلها صارت تباوع علية حتى اخته المزوجه اسراء اسمها
موجودة سلمت كعدت على القنفة مخليه علي بحضني..

أدم يباوع بابتسامة خزرتة ودرت نضري صارت عيوني بعيون الحجية
يبوو وعلي خازرتني خزرة للحضة اجيت اصرخ بلعت ريك لأن حسيت ريجي يبس..

اسراء - شلونج جواهر وين جنتي من زمان اجيت انا ما شفتج هنا..

ابتسمت ورديت بهدوء

-: جنت نايمة حبيبتي

هزت راسها بعدها أدم فتح وياهم موضوع السفر والعلاج لحد ما كللهم
جواهر تروح وياي كل الوجوه صارت علية عضيت شفايفي شلون بلوه هاي؟؟

اسراء - يا خوية تحجي صدك؟
المفروض فلاح يروح وياك هيه وين تكدر انتَ غير مقعد ولازم دفع وين تكدر هية؟.

أدم -: فلاح ياخذنه للمطار يصعدني للطيارة بيده هيه ما راح تسوي شي
ومن نوصل هناك اكو واحد انا متفق ويا على كلشي هو الراح يتكفل بعلاجي
انا بس اسافر..

الحجية - جا ليش تريدها وياك فهمنة اكثر؟
احنه ما عدنة مرة تسافر هيج
بكل سهولة تره مو لعبة الشغلة تركيا مو وره بيتنة ولا بغداد هاي دولة كاملة

تنهد ماسح وجهه ورد

أدم -: حجية الله يخليج شني هاي ما عدج مره تسافر تراها مرتي وانا حر بيها
وبعدين انا كملت كلشي وحتى الجواز راح يطلع باجر ..

- بكيفك انا نطيتك رأيي

هز راسة بعدها تغيرت السالفة والحمدالله عدت على خير

بعد مرور اسبوع...

كاعدين بالمطار بيدي الجنطة وأيدي الثانية لازمه علي يمي أدم كاعد على الكرسي وفلاح لازم الكرسي
منتضرين يصيحون بموعد الطيارة خايفة ومتوترة حسيت ايد نخلت على ايدي.

رفعت راسي اباوع ابتسملي ضغط على كف ايدي وحجه يم اذني

أدم -: لا تخافين جوهرتي خليج طبيعية.

هزيت راسي بأي بالعه ماي ريكي سمعنة صوت يعلنون بي عن موعد الطيارة
كمت لازمه علي بقوة فلاح يدفع أدم نطى الجواز خلص الأجرائات بسرعة..

توجهنه للطيارة اول مره اشوف طيارة عن قريب جبيييرة فلاح صعد أدم من مكان مخصص
اخذو مني الجنطة شلت علي وصعدت لازمه العباية بخوف..

كعدنه بمكانه المحدد ودعنه فلاح بدموع كل شوي يبوس بـ أدم ويربت
على ضهره جسمي كام يرجف احس لوني تغير من الخوف والرهبة..

من خلينه الأحزمة وتحركت الطيارة هذا خوف وحده لازمه ايده علي المستغرب والخايف
وأدم لازم ايدي ضاغط عليها لحد ما صرنة بالجو احس ما كاعد تتحرك..

شوي شوي تعودت جنت متشنجة حيل أدم يحجي وياي يطمني وانا اهز براسي
مر وكت بسرعة ما حسيت بيي اله من أعلنو راح نحط بمطار اسطنبول...

خليت الأحزمة الي ولعلي وأدم هم لزم ايدي مره ثانية وكفت الطيارة بخير وسلامة
كلبي يدك قوي لحد ما وصلنة بخير ختمت القرآن من الخوف..

بدى الكل ينزل جبت كرسي أدم من فوك فتحتة خليتة يمه ساعدته يصعد
اجه واحد ساعدني نزلة من الطيارة شلت علي ونزلنه.

جانت الدنيا ليل اخذت الجنطة وكفت مستغربة هسه شنو؟؟

أدم -: نطيني علي خلي اشيلة باعي جوهرتي الراح تشوفينة هسه شي اشبه بالخيال
بس هو حقيقي لا اطيحين علينة حاولي تسيطرين على ردت فعلج..

عقدت حاجبي بستغراب من كلامة نطيتة علي ورديت

- شنو قصدك خوفتني بكلامك هذا ؟؟

دك مبايلة طلعا من جيبة فتحة وحجه

-: ايي يولي وصلنة تونه صدك؟
وينك انتَ بعدنه بنفس المكان اي تعال يله منتضرينك..

سدا رجع المبايل لجيبة متنهد بصوت

جواهر - كلبي وجعني تره والله شكوو منو هذا الحجيت ويا ؟.

أدم -: هسه تعرفين كلشي صبري لا تخافين ماكو شي..

بقينه ثواني بس وحجه بضحكه

-: باعي اجه شوفي هذا الجنه منتظرينة..

لتفتت اباوع عاكدة حاجبي شفت شاب طويل لابس ملابس سود مرتبة
لحيتة خفيفة شعره خفيف هم عيونى بيهن لمعة ماعرف شنو
دموع؟؟؟

بقيت واكفه بمكاني اباوع تقدم بخطوات خافتة عيونى ابد ما نزلت من عيوني
فرك وجهه حييل وحجه بصوت متشنج

-: ما عرفتيني مو؟؟

غمضت عيوني عاصره راسي هل صوت مو غريب علية وحتى شكلة شايفتة قبل.
بس ماعرف وين؟!

- العفو منو انتَ انا اعرفك قبل؟؟

تقدم خطوه صار مقابيلي يبعد عني بكم خطوه ورجع حجة بنفس الصوت بس هل مره
اضعف..

-: نسـيتي الجان يجيبلج حلويات بنص الليل؟؟

شفتي ترجف مسحت وجهي وحجيت بهدوء عكس النار الجواي

- منووو انتَ؟؟؟

ضحك خفيف دمعه نسابت على خده ورد بصوت خافت

-: نسيتي اخــوج جـواهر
نسيـتي عـلي؟.

ههههههههه ضحكت هذا كل السويتة فجاءة سكتت ختفى كلشي من كدامي
وبس هوه بقى فتحت عيوني بصدمة رجلية ما كدرت اوكف عليهن

صارن خيوط وكعت بالكاع ركض علية بدون أي مقدمات شمر جسمه بحضني
حضني حيلل اخذت نفس وحجيت

- علي انتَ اخوي علي ريحة اهلي بيك اي اي شلون انساك انا بس من صدمتي ما عرفت شنو اسوي
يمة دخيلكك ياا عليي والله جسمي يرجف شوف ايدي مدري شبية..

احجي بتعجب ولحد اللحظة مو مصدكة وخر مني يبجي مسح دموعه اخذ ايدي
طبع قبلات متفرقة عليها حسيت بكم الحنان البي وشكد يحبني..

يارب وأخيرآ فرحة خلتني ابجي بس من الفرح مو من الألم يارب الحمدالله مو مصدكة
بقيت اشهك حاضنتة نسيت احنه وين لحد ما سمعت صوت أدم

أدم -: يمعودين نحن هنااا ترة والله انا رجال مريض وأبني مسكين

ضحكت من بين دموعي وخر مني يمسح دموعي ويحجي

علي -: هل مرة ماكو شي راح يفرقنة بس الموت

- اسم الله لتجيب طاري الموت لو تشوف شنو صار بعد ما هاجرت
ما سولفلك اخ الدنيا لعبت بينة جولة اختك ضاع عمرها وهية تحاول تعيش.
خلافكم تشردت وتبهذلت بس رغم كل الصار وكل السنين ما نسيتك ولا لحضة..

علي -: اعوضج والله كلشي يتعوض كل الصار مو بيدنة كومي يله كومي لا تبجين
كافي..

مسحت دموعي مو بيدي هنه ينزلن وحدهن اباوع على أدم مبتسم لازم علي
نسيتهم والله اخذت علي منة سلم علي اخوي على أدم واضح همه يعرفون بعض..

اخذ مني ابني نفس اسمه انا سميتة حتى يذكرني بي بوسا عدت مرات
ويحجي فرحان

-: خرب يعني انا صاير خال ومادري يولو شهلل جمااال نوب نفس اسمي
اكرطك انا يله تعالو هنا سيارتي قريبة خليتها خلي نروح لبيتي شوف الناس شلون تباوع بس نطيني الجنطة اخليها بسياره وجيكم ع سريع

أدم -: ماشي حبيبي براحتك

اخذ الجنطة وراح بقيت اباوع على طوله لحد ما ختفى نزلت نضري لأدم من حجه

-: جوهرتي مو هيج شني السالفة جدام الوادم حضنتي نوب هوه يمسح
على خدج عود هاي شيسمونها؟؟

جواهر -: او محقق أدم يغار من اخوي؟؟

أدم -: طبعآ اغار شايفتني هنا حمار اباوع على مرتي تحضن واحد غيري

جواهر -: حشاك بس هذا اخوي ما بيها شي لا تكبر الموضوع تره صار اكثر من
سنوات ما شايفتة ولحد اللحضة مو مصدكة شفتى كدامي..

هز راسة بابتسامة رجع علي دفع أدم وانا شايلة علي صار عدنه ثنين علي.
يله زيادة الخير خيرين المهم صعدنه السياره انا وره علي يسوق يمه أدم..

أدم -: ابو الجود هاي سيارتك الحقيقية؟؟

علي -: ايي طبعآ لعد الجذبية

جواهر -: عزا يعني هاي صدك سيارتك والله ما توقعت..

ضحك ورد

علي -: هذا كلة جهد التعب التعبتة على نفسي شكد عشت ايام سوده هنا
وحتى نمت بشوارع بس الحمدلله ما ستسلمت درست وشتغلت بنفس الوقت

بنيت حياتي من الصفر شكد جنت اتمنى اشوفكم وسمع صوتكم بس للأسف ما كدرت

أدم -: بطل والله

حجيت بسرعة

جواهر -: يعني انتَ هسه دكتور؟؟

علي -: اي

جواهر -: دكتور شنو؟؟

علي -: تجبير وترميم الكسور

جواهر -: ها هسه عرفت ليش أدم سافر لتركيا وجابني ويا.

أدم -: اي برافو عليج خوش تفكرين

جواهر -: بس انتَ هيج تستغل اخوي تره!.

أدم -: تؤ كلشي متفقين علي احنه مو ابو الجود؟؟

ضحك علي هاز راسه ورد

-: صح ابو علي

جواهر - احد يفهمني شنو كاعد يصير هنا؟.

هزيت راسي بحيرة لتفت أدم وكال

-: من نوصل ونرتاح تعرفين كلشي

هزيت راسي اباوع على اخوي احفظ تعابير وجهه شكد متغير ما عرفتة من البداية
صاير زلمة معتمد على نفسة تنهدت يارب معقولة هاي نهاية الوجع؟؟

مسحت وجهي عاضة شفايفي درت وجهي للجامة كاتمة شهكاتي
دموعي تنزل بصمت امسحهن بهدوء انا هواي تعذبت بحياتي..

هواي كلمة ما تعبر عن العشتة ولا عن حالتي بس برغم كل هذا اكول الحمدالله
على كل حال اهم شي هسه انا يم اخوي وأبني بحضني..

وزوجي ماعرف اذا يحقلي اكول زوجي بس المهم هو بخير وان شاء الله راح
يتعالج ويرجع يمشي على رجلي لأن كاعد اشوف الحزن على وجهه..

وهذا شيء طبيعي اي واحد بمكانة يحزن صعبة بيوم وليلة تخسر جزء من صحتك
بين تفكيري وعدم تصديقي للي صار وكفت السياره كبال شقق جبيرة..

علي -: شقتي بالطابق الثاني يله نزلو

نزلنه انا وأبني وعلي نزل الكرسي لأدم برغم ما قبل يكول بس تجيلي
اكدر امشي ما قبل علي لأن هيج راح يصير الضغط على رجله المكسورة اكبر.

وممكن تتضرر اكثر دخلنة جوه المكان يجنن صعدنه بالمصعد احس بخوف
من تجربة الأشياء الجديدة نفتح باب المصعد طلعنه بوجهنه لشقتة..

فتح الباب وأخيرآ دخلنه جان يطغو عليها اللون الأبيض الحليبي واثاث
سمائي هيج تحسي خيال يخبل شمرت عبايتي متنهده بصوت..

كعدت على القنفات براحة اخذ انفاسي

علي -: حي الله عمي نورتو الشقة

أدم -: النور نورك حي الله اصلك ما قصرت

علي -: هذا واجبي صهري هاي الشقة كلها الكم انا كبالكم شقتي أي شيء تردون
بس دكو الباب وانا حاضر اخذو راحتكم وان شاء الله من باجر نبلش بالعلاج
هسه رتاحو..

أدم -: ما قصرت اردها الك ان شاء الله

علي -: سبق وكتلك انتَ اذا تطلب روحي انطيها الك ما طول جمعتني بأختي
صدك جواهر تعاي شوي تسمحلي مو صهري ؟؟

ضحك هاز راسه ورد

-: اكيد

كمت ورا طلعنه بالباب ابلع بريكي لتفتلي يمسح على راسه ابتسم من شافني
متوترة اخذني بحضنة حضنته مغمضة عيوني بقينة دقايق وخر مني مسح عيونة وكال

علي -: مو مصدك.
انا هنا كبالكم بهاي الشقة أي شي تردينة تعاي بأي وكت جنت اريد ابقى اكثر
وكعد وياج بس مو هسه ورانة العمر كله نعوض الغربة العشناها...

هزيت راسي مسحت دموعي ورديت بصوت خافت..

-: وانا هم مو مصدكة شكد جنت اتمنى اعرف خبر عنك حتى لو بس اعرف عايش او ميت
بس هسه انا واكفة كبالك احجي وياك وحضنك لو جان حلم اتمنى ما اكعد ابد..

علي -: لا هذا حقيقة الأحلام تتحقق لا تنسين يله روحي جوه ديري بالج على أدم
يرادله عناية وعلاجة هسه انطي اله خلي يشربة حتى باجر اخذه افحص رجله..

جواهر -: تمام تصبح على خير

علي -: انتِ الخير كله فوتي يله

ابتسمت ودخلت جوه سديت الباب لاكاني أدم رافع حاجبة بلعت ريك

جواهر - شكو رافع حاجبك ؟

أدم -: ماكو شي جوهرتي كاعد اشوف عيونج يلمعن وجسمج يرجف
على كيفج اخذي نفس لا تطيحين علينة شوفي علي نام..

لتفتت على علي صدك نايم اخذته دخلت للغرفة خليته على الجرباية رجعت لأدم
اخذته للحمام ورحت للمطبخ سويت اكل ورجعت من سمعت صوته.

ساعدته طلعنه من الحمام دخلنه المطبخ كعدنه ناكل شوي بس نسد جوعنه
فلاح دك على أدم اكثر من مره طمنى علينة طفيت الأضوية..

ونمنه نومة اصحاب الكهف الصبح كعدت على دكة الباب كمت من فراشي بنعاس
صرت وره الباب وحجيت

-: منو؟؟

اجاني صوت علي يحجي

علي -: بعدكم نايمين؟؟
بس سمعت صوتة فتحت الباب بسرعة ورديت بابتسامة

-: صباح الخير تفضل

دخل جوه مبتسم كعد على القنفه مخلي رجل فوك الأخ ورد

علي -: ول ول كعدي رجلج يله ورانه شغل يا شغل حتى من اخلص اطلعج
افرج اسطنبول فر..

ابتسمت وقبل لا ارد سمعنه الباب ينفتح وصوت أدم يحجي رافع حاجبة

أدم -: جا انا شنو شغلي بلأعراب بله ما تكلولي اشو انتم من كيفكم تحجون..

ضحك علي بصوت واردف وهوه يشغل جكارتة

علي -: انتَ منو اصلآ؟.
اخ وأختة انتَ شدخلك.

ضحك أدم خفيف كعد على القنفه كبالة ورد

-: اختك مرتي الي دخل بكلشي يخصها دكتور علي..

علي -: هههه تغار عليها مني؟؟
بعدين انتَ مو كتلك لا تمشي على رجلك مو زين شكد عنيد رحمة للكعبة..

-: لا تخاف علي دكتور
يله دقايق وكون جاهز نتضرني..

علي -: خوش جا وين ابو عيون مدوحسة؟؟

رديت عاكده حاجبي

جواهر -: منو قصدك؟.

علي -: ابنج يول

نط أدم من مكانة يحجي بعصبية

-: لنها وكافي ما سمحلك تحجي على ابني زودتها تره..

علي -: بلعه راسه مدوحس من حلاتة

أدم -: غير مثل راسك..

-: انا راسي مدوحس.؟؟؟

ضحكت على تعابير وجهه غمزله أدم بعدها ساعدته حتى يغسل ويلبس ملابسة
وكل شوي يتحرش بيه وانا بس اخزرة وهوه يهددني بعد ما اطلع كدام علي بلي
حجاب.

هزيت راسي بأي طلعو بره علي مشتري عكازات لأدم مايحتاج للكرسي بعد
راحو وانا دخلت جوه مبتسمة بداخلي كمية سعاده لا توصف..

نضفت الشقة سويت ريوك الي ولعلي هم شغلتله الشاشة كعد يباوع وانا ويا
وين اروح؟

للساعة بـ 12 رجعو جايبين وياهم اكل تغدينة سوية بعدها راح علي يرتاح
وأدم تعبان كلش نام العصر طلعنة انا وعلي اخوي بقو أدم وعلي بالشقة..

اخذني للشط مدري نهر شعرفني أنه الشوارع تشوفين روحج بيها تخبل بقينه نفتر ونسولف

جواهر -: صدك ما كتلي شلون تعرفت على أدم وليمته؟؟

علي -: ماكو بيوم من الأيام اجاني صاحبي جان وياي من هاجرنة يكول اخو شرطي
وعنده صاحبه محقق يسأل عليك يكللهم اخوي جان وياهم..

طبعآ انا خفت من كال محقق حسبالي بعدهم يدورون علية تجاهلتة بس رجع
مره ثانية وهل مره كلي يصير زوج اختك يريد يحجي وياك ضروري..

من كال اختك تذكرتج كبل معقولة جواهر متزوجه محقق؟.
تأكدت من الموضوع وأخذت رقمة اول شي جنت خايف وشاك بالموضوع
بس بعدين تأكدت من كلشي بقينة على تواصل اكثر من اسبوع..

بعدها نكطعت اخباره وقبل لا تجون بيوم اتصل عليه وكلي راح نجي لتركيا
انا وجواهر وسولفلي حالتة كتله يمي انا اعالجك بس تعالو انتم..

وصدك جيتو والحمدالله هسه احنه ويه بعض

جواهر -: زين شعجب ما مزوج؟

-: ههههه لا يمعودة زواج شنو هو انا ماعندي وقت احك راسي تعبت على نفسي
هواي بس الحمدلله رب العالمين ما ضيع تعبي

جواهر -: الحمدالله اهم شي انتَ بخير شنو صار على أدم وعلاجه؟؟

علي -: زين كاعد يتقدم بالعلاج اقل الشهر يرجع طبيعي ان شاء الله..

-: ان شاء الله ياربي

-: تحبينة؟؟

ابتسمت اباوع للطيور نزلت راسي افكر رفعته هزيت راسي بأي وحجيت

-: اي احبة صح جنت اكرهه بس هسه احبه وتمنى يرجع بسرعة مثل الأول
وتكمل حياتنه سوه بـ سعاده ابديه..

ابتسم هاز راسه دك مبايله اجا صوت أدم العالي وصوت علي يبجي
يضحك برود ولا كأنو

-: جايين يول سكتة عيب عليك ابنك يبجي وأنتَ يمة ول ول جايين لا تعصب
مو زين عليك ههههه..

سد الخط يضحك رجعنه للشقة لكيتها مكلوبة كلاب تنهدت نضفتها وأدم صاير
اعصاب وعلي يضحك علي هيج مرت الأيام بحلوها ومرها..

بعد ما مر اكثر من شهر تقريبآ صار شهر وسبوع أدم رجع يمشي طبيعي
بفضل علي طبعآ وعلي ابني عايش اجمل ايام حياتة ويانة..

اختصرلكم انا جواهر..

رجعنة للبصرة علي ويانه بعد توسلات يالله قبل جان فلاح بالمطار ينتضرنة
من وصلنه للبيت جانت هواي ناس منتضرة المهم بعد ما رجعنه ثاني يوم..

أدم قرر يجدد زواجنه رفضت بس اصرار الحجية خلاني اقبل خاف جنت سعيده وانا بسطنبول
هسه صرت اسعد..

رجعنة لبيتنه القديم أدم فاجأني وره زواجنه بموضوع الدراسة الخارجية
سوالي واهس هو وعلي قدملي مختصر همات انا حاليآ مدرسة انكليزي..

علي بين فترة وفترة يجي للبصرة ما يقبل يبقى هنا يكول كل شغلي بتركيا
أدم الحمدلله تشافى بالكامل ورجع لشغلة ولزم الخطفو..

وبنسبة لأبني صار عمرة 12 سنة النطق عنده صار كلش زين...

واخر شيء الحمدالله على كل حال وأخيرآ الله سبحانة وتعالى عوضني
وما اجمل عوض الله حاليآ اني حامل بشهري الثاني ادعولي بسلامة..

وتستمر الحياة...........

................................... ♡

النهاية...

بنسبة لقصة جواهر هواي جانو بنات يكتبون الغيها وكتبي بس على ثمار...

اني شفت قصة جواهر تستاهل اكتبها هيه انسانة عضيمة قوية
حاربت وحاربت ما ستسلمت والحمدلله اخر شي الله سبحانة وتعالى عوضها مثل ما كالت
ما اجمل عوض الله نطوي صفحتها ونتركها تعيش بسعاده..

بنسبة للبارت الأخير الجاي راح يتأخر بليز لا تضغطون علية لأن امي الليلة
تروح للزياره او باجر فـ راح ابقى وحدي المسؤولية تصير علي اكبر..

وبنسبة لشجن وضلام بالبارت الأخير راح اذكرهم ووضح كلشي بخصوصهم

تأخير نزول البارت بسبب الكهرباء 💔
طافية من الصبح توه شتغلت..

المهم ⛔ لا تنسون التصويت ومتابعة لحسابي

مع الف سلامة

ميان أل مالكي