*#سلسله_وخز _الدبابيس_3*
*#احتضار《30》*
*#بقلم_ايناس_ادم(ننس تمدين)*
*"فترة الإجازة"*
*"على لسان مجدي"*
_إيناس رجعت البلد..ونحنا أخدنا إجازة وبعدها!! سنة الفاينل..سنة التخرج..السنة المنتظرنها بفارغ الصبر..مش عشان نتخرج من إدارة..لالا عشان نثبت نفسنا بعد إدارة..عشان نجري وراا أحلامنا أكتر..عشان نشوف الجاينا..كلنا كنا متحمسين للعرض المسرحي...في يوم طلعنا انا ومجتبى شارع النيل ضاربين الونسة.. طبعا مقداد إرتبط ب وعد💙..مجتبى قال لي:- شايف الناس البتنجز..شايف الناس القلبها قوي..أقعد لي انت لمن يجي ود عمها من سقط لقط ويعرسها..قولته ليهو:- افهمني يا مجتبى انا ما عاوز أستعجل..نحنا لسة طلبة حتى لو أنا عندي شغلي الخاص..انا ليالي ما عاوزها حبيبة وجكس ونطلع وننزل ونشبك يدينا ونهدي بعض اغاني واخرتها بلوك وحتى لو ما بلوك..أكيد اخرتها أنفصال وأكون كسرت قلبها..أنا عاوزها زوجة لي..ليالي اختي وصحبتي قبل أحبهاا..وبعد حبيتها وانتظرت الوقت ده كلو..غالبني انتظر شوية كمان!؟..مُحترِم علاقة وعد ومقداد شديد و عارف مقداد أخلاقه شنوو..بس انا عندي فهم معين ماشي بيهو في حياتي..كم مرة بقول عاوز أعترف وبتحصل حاجه تمنعني ويمكن ده من لطف ربنا وكرمه..انا لما أعترف ليها لازم اكون واثق إني ح امشي أطلبها من اهلها..بدون جرجرة كتيرة..اخرتي مع لياليِّ إن شاء الله ح تكون عقد قران ودبلتين💙...!
"عندي_كنت بتكلم مع ليالي مكالمة فيديو"
_إنتي فاهمه انا لي فترة ما قادرة أشيل الإحساس ده..خايفة شديد يكون معتبرني أخته وبس..قولته ليها:- لو بتتذكري لما مجتبى قال مجدي ح يشتبك لو قلتي خالطين وبتاع..ما حسيتي وقتها إنو مجتبى كان بتجاوزنا لمن نسألو..قالت لي:-أيوة صح..بس برضو ماف شي واضح😔..."كانت لابسة فنيلة سوداء خناقة ويديها طوال مغطية لحدي أصابعها😂"..قولته ليها:- والله يا ليالي ما عارفة أقول ليك شنوو..بس مجدي من زمان حركاته واضحه أنتي بس عميانة...كان واضح إنو بغير من علاقتك بمجتبى وشكله مجتبى فهمه أنك زي اخته ما اكتر..ده تحليلي غايتو💙..قالت لي:- طيب أقفلي داخل لي مكالمة..قولته ليها:-بياعة يا ليالي..م ترجعي لي تاني😒..قفلت منها واتصلت على أحمد أخوي..جاني صوت غير صوته:- ألوو..إيناس!..قولته ليهو:-منوو!؟..مش ده تلفون أحمد!..قال لي:-معاك مِشعل..سلمت عليهو وكده..قال لي:- قالوا لي خريجه💙ماشاء الله ربنا يوفقك..قولته ليهو:-تسلم ياخي..الحمد لله خلاص ح أخلص جامعه وارتاح..قال لي:-ايام الجامعه حلوة والله خصوصي لو عندك شلة او كده..ما ح تكوني متمنياها تخلص..مع كلامه ده العبرة خنقتني..أتذكرتا إني ما ح أتخرج مع اصحابي💔..صوتي أتغير قولته ليهو:-مِشعل بعدين خلي أحمد يرجع لي..قال:-طيب..بس إنتي كويسة!؟..قولته ليهو:-كويسة كويسة..قفلت الخط وبقيت أبكي..في قعدتي ديك قررتا لمن يجي وقت التخريج أنا ما ح اتخرج💙.!
*"على لسان مجدي"*
_كنتي بتتكلمي مع زول مهم!؟..قالت لي:-نص زول..مع إيناس الشبر ونص دي..قولته ليها:-متنمرة😂😂..هي كيفها كويسة!!؟..قالت لي:-تمااام..قولته ليها:-حاسك إنتي الما تمام..في شنو أحكي لي💙!؟..قالت:- زهجانة بس ماف شي مهم..الاجازة مُمِلة من غيرك..غيركم يعني..قولته ليها:-أمممم..حتى أنا إجازتي مُمِلة من غيرك..من غيركم يعني قصدي..بقت تضحك وانا ضحكتا معاها..قولته ليها:-جدياً مالك يا سُرمدية!!..قالت لي:-عندي صحبتي بتحب ليها واحد من حوالي 4 شهور او اكتر م عارفة المهم..وهو ما جايب خبرها..الموضوع ده بقى في بالها طوالي..وهي ما عارفة تعمل شنو!..قولته ليها:- تصبر بس...يمكن يحس بيها ويجي يعترف..قالت:- ولو طلع ما بحبها..او بحبها بس لسة ما أعترف وهي ح تموت وتسمع منه كلمة "بحبك💙"..قولته ليها:- أنتي متأكدة إنو دي صحبتك!؟..قالت لي:-أيوة أيوة يا رُسلان صحبتي..قولته ليها:- طيب هي بس تخلي الامور لله..لو ليهم نصيب مع بعض أكيد ح يعترف ليها..والخير فيما إختاره الله ولا شنووو؟؟💙..قالت لي:- صح صح..ومن ترك شيئاً لله عوضه خيراً منه..قولته ليها:-بالضبط كده حبيبتي انا يا قول مجتبى هههههه..قالت:-قلت شنو ما سامعه الشبكةة..قولته ليها:-حبيبتي انا💙..!
*"السمستر7"*
*"على لسان مجتبى"*
_نزلنا السمستر ال7..معدلاتنا حقات السنة الفاتت مُرضية شديد...كنا في المحاضرة معانا دكتور بتكلم لينا عن إنو دي اخر سنة ما مقارنة بالسنوات الفاتت ولازم نشد حيلنا ونبدا نفكر في بحوث التخرج من اسي وإنو السنة ح تكون ضاغطة شديد💙..ادانا نصايح وطلع...انا كنت قاعد جنب ليالي لأنها كانت مُصدعة ومحمومة..قولته ليها:-عايني شكلك تعبان شديد ارح ارجعك البيت يا زولة..قالت لي:-ما قادرة اقوم حاسة نفسي دايخه..قولته ليها:-طيب لما أنتي عيانة ليه جيتي..كده كده المحاضرات ما منتظمة..قالت لي:-أهو الحصل..قولته ليها:-طيب ح أمشي اجيب ليك فطور وعصير ح تشدي بيهم حيلك شوية..قالت:-لالا..بطني طامة يا مجتبى ياخ..قولته ليها:-معليش طيب..بس لازم نرجعك البيت..خليتا ومشيت لمجدي ومقداد الكانوا بتونسوا قدام باب القاعة كلمتهم بحالة لياليّ..مجدي دخل القاعة ومشى ناحيتها حاول يقنعها بالرجعه ابت..قال لي:-دي مجنونة هي ولا مالا ما ح تسمع الكلام..كده وينو تلفونها خليني اتصل على اختها...شلت منها تلفونها واتصلت لياسمين..ردت:-اي يا لولة..قولته ليها:- ياسمين معاك مجتبى..ليالي دي عيانة مالاحظتي ليها الصباح..قالت لي:-لاحظت ليها والله..وقولته ليها تقعد بس بدون فايدة..خلاص انا ح اجي اسي اسوقها..قولته ليها:-تمام أستعجلي بس..مجدي كان بتفحص جبينها ويشوف حرارتها..مقداد قال:-حمتها تقيلة!؟..مجدي قال ليهو:-شديد والله..بعد نص ساعه كده ياسمين اتصلت وقالت هي قدام البوابة بس منعوها من الدخول..قولته ليها:- ثواني اجي أحنك ليك الحرس..مجدي قال لي:-خليها خليها..نوصل ليها ليالي برة بس...
*"على لسان مجدي"*
_بقيت اقول ليها ليالي قومي معاي..قالت لي بصوت تقيل:-ما قادرة..بحركه خفيفة مسكتها وتكلتها علي..نفسها كان في رقبتي..جسمها نار من الحرارة💔..بقيت ماشي بيها لمن وصلنا برة..ياسمين مسكتها معاي ودخلناها العربية..قالت:-ما تخافوا..ح تبقى كويسة إن شاء الله💙...من ساعتها وللمساء انا كنت مُقلق...مرت ابوي لاحظت لي..سألتني مالي وكده..قولته ليها:-ليالي تعبت الليلة في الجامعه وتلفونها من قبيل مشغول...عاوز اطمن عليها..قالت لي:-ما تخاف..بتلقى المكالمات وترجع ليك..بالفعل رجعت لي..دخلت غرفتي وقولته ليها:-مشغولة وين بضرب من الصباح..بقيتي كيف؟؟..قالت:-أحسن الحمد لله..كنت بتكلم مع مقداد ومجتبى مكالمة جماعية..قولته ليها:-اهاا..يعني حالياً إنتي كويسة صح؟؟..قالت لي:-كويسة والله م تخاف علي💙..قولته ليها:-خفتا والله أكذب عليك؟؟..ضحكت صحكه خفيفة وقالت:- خلاص أطمن💙..اتونسنا شوية وقفلنا..!
_المحاضرات كانت ضاغطانا من جهه وموضوع البحث من جهه..وموضوع المسرحيه من جهه تانية خااالص كنا كلنا في مجموعة واحدة طبعا...جهزنا اسم البحث حقنا وسلمنا خطتنا قبل الامتحانات..نزلنا امتحانات والحمد لله عدت على خير💙..فترة الاجازة ديك منو ونازلين سمستر8 والاخير..إيناس ما نزلت إجازة..فرقت معانا جداً💔...
في يوم ونحنا في الجامعه مجتبى قال لينا:-هاا..باقي أخر تلاتة شهور ونتخااارج ونتخرج💙..كيف وكيف..كل واحد كان بخطط..إلا مقداد ساكت..قال لينا:-أنا ما عاوز اتخرج..حقيقي ما ح اقدر..خالتي كان نفسها اليوم ده يجي اكتر مني لدرجه إنها مخططه ليهو تخطيط..بس حكمه ربنا وقدره كانوا أقوى..ما ح اقدر أتخرج يا شباب💙..مجتبى عاين لينا وقال مبتسم:-انا ما ح اتخرج يا شباب...ليالي قالت:-ولا حتى انا..قولته ليهم:- ولا انا💙..كلنا ما ح نتخرج..مش كفاية علينا الشهادة!!..قال لينا:-بطلوا عولاق ياخ..اتخرجوا وانبسطوا..مجتبى قال :- ننبسط شنو يا ولدنا..هو تخريج من غيرك يبقى اسمه تخريج!؟..ده غير إنو إيناس ما هنا..يعني تخريجنا ح يكون ما عندو معنى بدونكم💙...قفلنا واحتفلنا..مف تخريج يعني مف تخريج💙😎..مقداد كان مُبتسم وقال:- شنو الحاجه العظيمة العملتها في حياتي لمن ربنا جازاني بيكم..!؟؟؟مجتبى قال:- ما عارف والله بس صلي كل يوم ركعتين شكر وصوم اتنين وخميس😎..بقينا نضحك...!
إتفاجأنا بقرار إيناس أنها كمان ما عاوزة تتخرج💙عشان نحنا ما معاها..كان فضل ليها حكاية شهر في الجامعه..متابعين معاها التفاصيل وهي كذلك لحدي ماناقشت💙..!
*"ما حدث بعدها"*
*"على لسان مجتبى"*
_ليالي لابسة أسكيرت أسود +بدلة كحلية+طرحه بيضاء+كعب ابيض..أنا ومقداد ومجدي بِدل كحلية +بناطلين سودا +جزم بيضاء+كرفتات بُيض..توتر خوف ماف تماسك نهائيا..بحاول ألطف الجو وامرقهم من جو التوتر بس أنا متوتر أكتر منهم..دخلنا عشان نناقش..والله ما عارف قلنا شنو اساسا😂😂😂..المهم ناقشنا والحمد لله💙💙..طلعنا برة بنصرخ ونصفر..قابلتنا إيناس💙..بقامتها القصيرة وشها المبتسم على الدوام..جات علينا وهي بتزغرد..قولته ليهم:-كلمتكم قبل كده ما شايل هم الزغاريد في عرسي،طالما البت دي هنا😂😂😂..ضمت ليالي مسافة طويلة..سلمت علينا وبعدها قررنا نحتفل💙...اكتشفنا إنو مجدي حاجز محل كامل لينا ومتفق مع وعد إنها تجي..بهرجنا بهرجه رهييبة عجيبة...لحدي المساء حتى رجعنا بيوتنا..
خلصت رابعه...!
اربعه سنوات..ضِحكنا فيها..زهجنا وزعلنا..وقفنا جنب بعض..في تفاصيل كتيرة عشناها جوه الجامعه دي وعشناها في الاربعه سنين دي..إتعلمنا حاجات كتيرة..اهمها إنو صُحبة الجامعه ما اي كلام لو اخترنا صح💙👌🏾..!..مجدي مقداد إيناس ليالي دي ما مجرد اسامي عادية!..ديل كانوا اخواني لما ما لقيت اخواني الحقيقين جنبي..كانوا الدواء ساعة المرض..كانوا الكتف ساعه الشعور بالتعب والارهاق..كانوا عكازي..هم وبس💙..ح أفضل ممتن ليهم عمري كلو..معاهم عرفت انا منو اساسا..معاهم عرفت قيمتي..معاهم هم حسيت إني بتعامل مع نفسي ما مع زول غريب...!
*"بعد مرور شهر على التخرج من الجامعهه"*
*"على لساني"*
_جهزنا كروت الدعوة لأهلنا..دعوة خاصة💙معمولة ليهم هم وبس..باقي الناس الدعوة كانت عامة..نشرناها على صفحتنا في الفيسبوك..على كل المواقع..أهلي لما سألوني اذا انا معاهم ولا لا..جاوبتا ب:-لالا..حتى إني سمحتا ليهم يفتشوا تلفوني لو لسه شاكين إني تبع اصحاب الابداع..الحاجه دي خلتهم يطمنوا لي💙..بعد صممنا كروت الدعوة قررنا نوزعها عليهم يوم العرض بس بالصباح..الخاطرة الموجودة انا الكتبتها..!
يوم العرض من الصباح طلعنا من البيت..انا قلت ح امشي لإنصاف "عندها بنوتة تتأكل من حلاوتها💕🙈"..وليالي اخترعت ليها مشوار..عمر كان حاجز المكان ومتكفل بكل حاجه..بس كان في شوية تجهيزات مفروض نقوم بيها...
أثناء التجهيزات..وعد قاعدة مع مقداد هو بونسها وهي بتظبط الزينة..انا كنت واقفة مع عمر بنشوف موضوع الاضاءة والتصوير..مجتبى كان برتب مقاعد أهلنا الامامية بأسماء مزخرفة بشكل ظريف💙
ليالي ومجدي كانوا بجهزوا في الضيافة..ليالي كانت بتقطع في البسبوسة وبتختها في الصحن مع حلاوة وحته جاتو وباسطة..مجدي كان بظبط البلح والفنكوش وبنزل في قوارير البارد من العربية للتلاجة..
*"على لسان ليالي"*
_كنت مُشغلة أغنية وردي💙..بتقول:-
قدر الكون ده كلو حبي أكبر بكتير💙
قدر الكون و اكبر بكتير..مالكني محيرني..مالكني محيرني
شوف قلبي الاثير
أسألي قلبك
يمكن يقدر يشرح حبي انا محتار
انا بهواك..صدفة واجمل صدفة يوم لاقيتك
اسعد يوم يومي الحيييتك..!
مجدي كان بعاين لي بنظرات غريبة اول مرة ألمحها في عيونه..جاني قريب وقال:-ليالي..بدون كلام كتير ومنمق..بدون عبارات عميقة وفلسفة وشِعر..بدون خوض في التفاصيل..وبدون حتى جُمل مستعصية...
"ليالي محمد الحاج..مجدي الطاهر بِحبك❤"
*اِصنعو قِصصكم الخاصّة، لا تقتفُوا أثر علاقةٍ ناجحة، ليس للحُب -كتَالُوج- ! ليس طبقاً شهيّاً لهُ مكونات ثابِتة ومقادِير ! ولا وظيفةً مرموقة لها كُتيّب يصِف طريق الوصول إليها، إنمّا هو رِحلةٌ في حدّ ذاته، رحلة مُضنية أحياناً، مليئة بالترقُّب والإنتظار، مليئة باللهفة والشُوق، مليئة بالإنتصارات وتلاحُم الروح بالروح؛ وإقتسام الفرحة، ومُجاهدة حُزن الآخَر، والسعِي لِحراسة الوَهج بينكم مهما تعاقبَت عليهِ أسبابُ الإنطفاء، إنّه أمرٌ فيّاض، أمرٌ يفوق الوَصف، أوسَع من رِوايتِه، وأكثر قداسةً من أن يتكرّر!🧡*
#رُوسيال