الكاتبــهہ""بنت مـهہدي🫀
بوكني من الدنيا ڪلها و ضمني بين چفوف أديكَ
🦋 ... 🦋... 🦋
زمــرد:- ها
مــصــطــفى:- وجعا وطك عظما
زمــرد:- شنو
مــصــطــفى:-علاجي وين
جاوبت طبيعي
زمــرد:- بوحده من الجنط
باوعتله وافتهمت انو مااشارب علاجه
زمــرد:-انتَ مو اخذت قبل شوي
مــصــطــفى:- جاي اسال عنه
زمــرد:- تمام بس نوصل انطي الك
كملت تبديل اخذت جنطه أحمد على جنفي وجنطتي وجنطه مصطفى ادفعهن كدامي شالهن واجه وياي ساعدني صعد الجنط وضليت افكر خاف يتخبل
شلون بيه وهو هم مبين متوتر
مشى بالسياره
مــصــطــفى:- احجي ترا ادري بشنو تفكرين
زمــرد:- مو مهم
صاح بيه
مــصــطــفى:- تخافين اذيج تخافين اذي أحمد
صحت بي
زمــرد:- اني مااخاف على نفسي بس خوفي على الطفل الي خليناه يمنه اني اكدر ادافع عن نفسي بس شلون بهل طفل
مــصــطــفى:- انتِ لليش تحسسيني اني قاصد من اتصرف ترا ما دري بنفسي ومابيه شي هسه
زمــرد:- اعرف مابيك شي هسه بس من سالتني فكرت بالطفل
مــصــطــفى:- الطفل اني مو يمه بقي يمج ترا قليل من اخلي بايدي ولازم شارب علاجي
زمــرد:- تسوي العمليه
مــصــطــفى:- واذا متت؟
زمــرد:- ماتموت
ابتسم تك خد ضل يبعد نظره عني
مــصــطــفى:- راح اسويها علمودكم
زمــرد:- هسه عوفك مني علمود احمد
خليت ايدي على الجنطه
باوعت بوجه مصطفى
مــصــطــفى:- وين أحمد؟؟
زمــرد:- انتَ جبته
مــصــطــفى:- لا انتِ
صفنه للحظه بعدين دار السياره ورجعنه للشقه
مــصــطــفى:- هسه هاي سالفه اضحك اغم روحي اغمج
زمــرد:-شعلي اني عبالي انتَ الي تجيبه
مــصــطــفى:- ليش مرضعه اني؟
زمــرد:- ليش اني مرضعته؟ شعليها الرضاعه هسه؟
مــصــطــفى:- انوب تصيح علي فرد نوب صايره لج زمزم سكتي خل نرجع نجيب الفرخ ترا اشمرج من الجامه
سكتت
كل شوي ويكول
مــصــطــفى:- احجي واكول بطلي الفهاوه يمعوده قللي الفطاره وهاي الصفنات وتضلين بس ترمشين بعيونج مو والعباس شعلتي فص كليبي ماكو
بالاخير صحت بي
زمــرد:- والله ذبحتنه بفص كلبك
باوع علي بخزر سكتت بعد ولا حجيت لحد ماوصلنه يم العماره
طكها ضحكه
مــصــطــفى:- نزلي خل نجيب الوليد
زمــرد:- على شنو تضحك؟
مــصــطــفى:- على حظي المصخم دنزلي لا احطج بركبتي
نزلنه فتح الباب وكل شوي يضل يضحك لحد مايتعب يستغفر وبس يباوع علي يرجع يضحك
رحت للغرفه لكيته على لفته ونايم
زمــرد:- الحمدلله عبالي الكاه كاعد لو يبجي
مــصــطــفى:- هو مو جان كاعد
زمــرد:- يي وكاعد قبلنه اكيد تعب ونام
شلته وطلعت صعدت بالسياره باوعت بعده ورانه مصطفى بس باوعت لوجه رجع ضحك
بس صعد كتله
زمــرد:- شبيك بس تتمضحك
مــصــطــفى:- لا هيج اسف
شغل قران سكتنه سمع اله لحد ماكعد أحمد وضل يبجي
زمــرد:- صفصف
مــصــطــفى:- فص گليبه
زمــرد:- فاطمه ذاكره بيوتهم ماناوي تروح تسال عنهم
مــصــطــفى:- يي سهله هسه اريد نستقر كم يوم ونروح لبيت المره الجانت عايشه يمها
زمــرد:- يي حباب
هز راسه وكمل الطريق لحد ماوصلنه للبيت نزلني اني وأحمد والجنط وانطانيي المفاتح وكال
مــصــطــفى:- راجع للشقه راح تجي سياره حتى نجيب بقيه الاغراض
هزيت راسي وفتحت الباب دفعت الجنط للطارمه ودخلت تفاجئت من لكيت بالطارمه سنادين ورد
دخلت البيت مصبوغ ابيض وكل الاثاث الموجود بي جديد ونازك الا الغرفه فارغه
جانت اكو غرفه مقفوله من جنه كاعدين بالبيت بس دفعت بابها انفتح لكيتها غرفه طفل لونها ازرك وابيض خليت أحمد بالكاروك وضليت اباوع بيها ميز نازك ازرك عليه العاب وكنتور زغير كلش كيوت لونها ابيض وفراش ازرك واكو نفاخات بس صاعدات للسكف
رحت لبقيه البيت المطبخ متغير كلش وجانت طاوله الطعام بيجيه ووبيها بس كراسي ثنين هسه اكبر واكو من ضمن الكراسي كرسي يشبهم بس مال طفل
حتى الحمام مغير الغساله جانت زغيره وشبه خربانه جايب جديده وشغلات ناعمه بكل مكان مغيره منه ضليت صافه
زمــرد:- جا والغرفه؟
بعدني بعباتي دخلت على احمد لازم طوبه لكاها بالكاروك ويلعب بيها طلعت من البيت بسرعه
دكيت باب بيت مسره
مــســرهہ:- ولكم ايي ايي اجيت ستغفر الله
فتحت الباب شافتني ضحكت
مــســرهہ:- يا واني عبالي جهال بيت الجوارين شجابج انتِ
عبست وكلت
زمــرد:- راح ارجع ترا
مــســرهہ:- دفوتي فوتي
:- باعي ضايجه تعاي يمي
مــســرهہ:- طبي وسكتي
زمــرد:- لاعفت البيت وانوب مفتوح
مــســرهہ:- اجيلج وره العشه هسه جوعانه مابيه احجي
زمــرد:- خوش لعد باي باي
شفتها تغمني واني امشي
بسرعه دخلت للبيت وسديت الباب رتبت السنادين يم البيبان واكو بيهن زرعتهم بالحديقه وشفت الطارمه نظيفه مو مال اغسل
دخلت للاستقبال قنفات كلش ضخمات ولونهم جوزي ومذهبات والحيطان صابغهم بيجي وبي نقشه بالجوزي وانتبهت على الشباك مجان هيج مسوي بكد الحايط كامل والبرده بيجي وذهبي كلش مرتبه واكو تلفزيون وترتيبات ناعمه همين
ماسويت بيها شي رحت للهول بيها قنفه جبيره يم التفزيون واكو ميز بي كتب وتحفيات وبصفه كراسي ثنين بيناتهم ميز زغير وعليه ضوة مو كلش ابيض بي صفار يجنن
ذبيت العبايه والحجاب ورحت
للمطبخ مرتب باوعت بالكاونترات فارغه
سمعت خروشه مال مفاتيح عرفت مصطفى طلعت للهول وتجتفت
بس شافني
مــصــطــفى:- ها شنو رئيج؟
زمــرد:-مو حلو
مــصــطــفى:- شنو الموحلو هسه اغيره
زمــرد:-كلشي
مــصــطــفى:- عاد نغيرج انتِ مو احسن
زمــرد:- شنو شنو؟
مــصــطــفى:- ها لا كتلج يجرالج التردي اشري واغير الج
زمــرد:- لا والله كلش حلو
مــصــطــفى:- صدك؟
زمــرد:- والله يجنن خاصه الاستقبال وعجبني المكتبه وغرفه أحمد
مــصــطــفى:- جانت مخزن وماجان عاجبني البيت بس لان عايش وحدي ومحد يجي الي ما الي خلكه هسه انتم جيتو وجبتوا الواهس حتى الجيران مااعرف بس مسره العالم عبالهم طالب ومأجره فترة واشيل
فما يجون علي هسه ماعدهم حجه
عائله ابو أحمد المحترمه ماعدا ابو أحمد
ابتسمت بوجه
زمــرد:- شبي ابو أحمد
مــصــطــفى:- هذا الخايس ابو أحمد خايس خيولي
ضليت اضحك ضحك وياي
زمــرد:- ليش الغرفه فارغه؟
مــصــطــفى:- الصراحه؟
زمــرد:- يي
مــصــطــفى:- اريدها على ذوقج وانتِ راح تنامين لذاك الوكت يم أحمد واني المسكين تعودت على القنفه
زمــرد:- جؤجؤجؤ امس نايم ويانه على الجربايه
مــصــطــفى:- مستكثرتها علي وهيه ليله ولج زمزم
زمــرد:- احمم وين الاغراض الجبتهم؟
مــصــطــفى:- على الطريق هسه يوصل اصلا حتى اكو شغلات هناك وكتلهم عوفوها لان عدنه هنا هواي
انتِ هسه طبخي اكو مسواك بالثلاجه وجدوره وطاوات
زمــرد:- ماكو لاسجينه لاچفچير وبعد وكت
مــصــطــفى:- شلون فاتتني صدك والله سجينه وحده ماجبت... شفتي زمزم تفكيري مو مسلح ولو انتِ اول شي اجه ابالج سجينه وچفچير يعني الاسلحه الثقيله الذي يحاسب عليها القانون ويحاسبج الله اذا ضربتيني بيهن
طيكتها ضحكه قويه
مــصــطــفى:- شهرتينه بالعباس
زمــرد:- مسره تجينه وره الفطور
مــصــطــفى:- شوكت رحتيلها
زمــرد:- بس رجعت
باوعلي بنظره اكلني اكل بيها
مــصــطــفى:- بعد لا ترحين اذا ماتكولين الي الباب لا تفتحي اذا مااكلج اني تمام؟
زمــرد:- والله ثواني حتى ماتأخرت ولا حتى سديت الباب
مــصــطــفى:- حتى لو هم لازم تكولي كلشي ويصير عندي خبر
زمــرد:- تمام حاظر
دك تلفونه
مــصــطــفى:- وصلن السجينه والچفچير طبي جوا خل اجيبهن
ضحكت ورحت يم أحمد طلع وياهم نزلوهن بالطارمه انوب صاحلي
مــصــطــفى:- هذا الميز وين اخلي؟
زمــرد:- مو اكو تحفيه يم الباب مال الصاله خليها علي تطلع حلوة
مــصــطــفى:- وهذا الزغير
زمــرد:- يم التلفزيون
شلت واحد ماخلاني وكال عوفي بس ماقبلت وضلينه نرتب سوه
مــصــطــفى:- يلا كافي طبي للمطبخ ضلن بس شغلاته اجيبلج الكوارتين وانتِ صفطيهن بكيفج
صدك دخلت للمطبخ جاب كارتون ولازم بايده شفره كلما يخلي كارتون يفتحها ويكعد على الطاوله
وكلما الكه تحفيه لو شي ماتعجبني بالمطبخ انطيه اله ياخذها لغير مكان وكل شي اريده يصعده للكاوتنر المعلق اخلي هوا يصعده
مــصــطــفى:- ذني الصعدتهن شلون تنزليهن؟
زمــرد:- اخلي الكرسي
مــصــطــفى:- الله يفتحها بوجهج
زمــرد:- ويفتح وجهك
باوعلي بنظره غريبه
مــصــطــفى:- هسه هذا دعاء
ضحكت طلع
اجه جايب كارتون فتحه
مــصــطــفى:- اخر واحد كملي الساعه 4:00
زمــرد:- يلا خلصت اكمله وابلش بالطبخ بس هاي المميه سويتها لأحمد توني شفته كاعد
مــصــطــفى:- شفته ملتهي بالطوبات
اخذها وراح واني بقيت كملت اخر كارتون طلعته للطارمه وبلشت بالاكل سويت لحم على التمن وحلاوه وعصائر وضليت ارتب على الطاوله ورحت للهول وشغلت التلفزيون على الختمه مال القران
ودخلت فتحت جنطتي طلعت دشداشه حمره مطرزه قصيره شوي وعلكتها بالحمام
ولكيت بخور وجمر شتريتهم من طلعنه رحت خليت الجمره على النار لحد ماصارت حمره
جبت ماعون وخليت عليه سيلفون حتى لا يصير بي ريحه شغلته بالصاله وفتح باب الصاله وكل بيبان البيت لان الجو حلو وبي نسمه هوى باردة
دخلت للحمام من طلعت انشف بشعري لكيت مصطفى بحضنه أحمد وكاعد على التلفزيون
زمــرد:- أذن المغرب؟
باوع علي ماشال عينه ابد لحد ماانتبه علي
مــصــطــفى:- شنو كلتي؟
زمــرد:- أذن لو بعده شبيك؟
مــصــطــفى:- يي الحمدلله أذن الف الحمدلله الف الحمدلله
زمــرد:- ليش؟
غير الموضوع من كال
مــصــطــفى:- اكو واحد يطبخ ومايسوي شوربه جاهزه ولج بدمي تمشي من كد ماجنت اكل بيها حتى حنيت الها
زمــرد:- ها اسويها هسه؟
مــصــطــفى:- لا طابخه نعمه عوفيه لباجر
زمــرد:- تمام
ندك باب الشارع اخذت احمد من ايده راح فتحه باوعت من الشباك عمار صديقه سديت باب الصاله ورحت سويت دولكه ماي واني شايله احمد والاعبه
شوي ودخل
مــصــطــفى:- عادي تصبيلي اني وياه بالصاله؟
زمــرد:- يي عادي
تاكدت من الاكل وشنو اخلي الهم واني اكل على الواكف
واخذت احمد ورحت للغرفه مالته طلعتلي مشط من جنطتي وخليته بصفي ومشطت وكمت صليت واخذته ورجعنه للمطبخ صبيت اكل لمصطفى وصاحبه بصينيه ورتبتها صبيت الي بس دكيت الباب عليهم اجه مصطفى سحب الصينيه وراح
اخذت الصبيته الي واخذت أحمد خليته بحضني وكعدت اكل واتابع تلفزيون
ندك باب الشارع سمعت باب الصاله الخارجي انفتح عرفت مصطفى طلع اله كملت اكلي ماهتميت
سمعت بسبسه بره وشحطه مال شحاطه وانوب اندفع الباب ودخلت علي بس شافتني صاحت
مــســرهہ:- ولج شماله هذا رجلج؟
دخل مصطفى وراها
مــصــطــفى:- والعباس اذا اسمع حسج
مــســرهہ:- هذا نفسه العنده بمدبليوز؟
مــصــطــفى:- شعليج بسيارته هسه انتِ روحي انجبحي يم صاحبتج ترا ارجعج لبيت امج بالطابوك
مــســرهہ :- لا شنو ها اها
كعدت يمي باوعت لحضني شافت أحمد وكفت على حيلها
وحجت بصوت عالي جفلني
مــســرهہ:- خايبين يالله مسرع لحكتوا تبزرون
مــصــطــفى:- صوتج من كون شالج الله
باوعتلي وكالت
مــســرهہ:- ابن منو هذا خايبه زمرده
مــصــطــفى:- احترمي نفسج وكوليلها ام أحمد
مــســرهہ:- وانتَ ياهو
حجيت اني
زمــرد:- ابو أحمد المحترم
باوع ليفوك وعدل ياخته باوعتله مسره بتك عين فرت ايدها وغمته
مــســرهہ:- احجي الصدك هوا غير معلوماتي تكول المره تحمل تسع اشهر انتِ منين تحملين وتجيبين بشهر شنو بيضتي؟ سمجه انتِ؟
ضحك مصطفى وراح يم صاحبه
مــســرهہ:- يلا مادام راح هذا المسربت احجي الصحيح
زمــرد:- يي هذا احمد
:- وانتِ منو؟
زمــرد:- ام أحمد
مــســره:-والمسربت؟
زمــرد:- هذا ابو أحمد
مــســره:- حرام اذا فهمت شي بالله جيبي افحصه بلكي اعرف
شلته وخليته بحضنها
مــســره:- اسم الله الرحمن شحلاته بس مايشبهج
يشبه ابو يي هذا المسربت مالتنه كلهه خلفته يخبلون
زمــرد:- ها يشبه مصطفى؟
مــســره:- طبعاً جمال واخلاق والذكاء وخاصتاً بالهدوء
زمــرد:- اني قابله بيهن كلهن بيهن ومراح احجي بس الذكاء شلون عرفتي؟
مــســره:- ابن الدكتور شيطلع ابو الاسواق غير دكتور على ابوه
ضحكت وكتلها
زمــرد:- اكلي وياي توني صبيته
مــســره:- اكلت واجيت بس هاي شنو سوا بالبيت صدك اسمع صوت شغل بس مااعرفت هيج يسوي حلو صلاوات
زمــرد:- يي حلو
مــســره:- عين البارده عليكم وهذا وليدكم همين ولو بسرعه جبتوا راح تجيبون لروحكم لعين وبعدين انتِ مو مال وحده نفسا
ضحكت لحد ماتعبت وكتلها
زمــرد:- مو ابنه يتيم بس اخذنا وخلينا باسمنه
مــســره:- ياا خطيه والله انتم خوش ناس خاصه المسربت الله يفتحه بوجهكم ولو هذا المخبل اخاف عليج منه انوب فرخ
زمــرد:- يي راح يتعالج
مــســره:- حلفي
زمــرد:- والله بس يخاف تفشل العمليه
مــســره:- هو لان فاشل يشوف العمليه راح تفشل شوفي صيحي ارزله واعلي صوتي حتى يسمعني صاحبه ابو البمدبليوز اصيح ويحس بيه خوش مره وگد المسؤوليه ويحبني وياخذني وامه تشلع كلبي ونعزل ببيت وحدنه ويصير عدنه فرخ مثلكم ونغسل البمدبليوز ونكعد وننجب
ضليت فاتحه حلكي
مــســره:- سدي حلكج لا تطب بي ذبانه
زمــرد:- شني بالعه رشاشه؟
مــســره:- دسكتي مابيج فايده خل اروح لامي
زمــرد:- لو باقيه اصبلج جاي
مــســره:- لا مو امي جاي تتخربط ومااكدر اعوفها وهسه لان نامت اجيتج
زمــرد:- شبيها؟ سلامات
دمعت عيونه واول مره اشوف مسره هيج دائما اشوفها الخبله الي تضحك وتضحك
مــســره:- زمرده امي راح تموت
يتبع.....
🦋 ... 🦋... 🦋
شلونها القفله؟
شنو رئيكم ببارت اليوم؟
شنو تتوقعون يصير بالبارتات الجايه ؟
شنو راح يصير بمسره ؟
يوزري @ayay_.almahdi
لاتنسون التصويت للبارت ❤️🩹