لكاتبــهہ""بنت مـهہدي🫀
وحق مابينك وبيني
انه شمس الضهر حطيت عين بعين
بس عينگ عمت عيني
🦋... 🦋
فزيت من النوم اتنفس سريع وكلبي يدك حيل حيل واحاول اذكر الي صار باوعت داير مدايري.
تنفست بأرياحيه.
زمــرد:- الحمدلله الي بعدني عنهم كوابيس ولا العيشه وياهم.
دخلت علي مسره من الصبح تضحك.
مـسـره:- خايبه هذا والله فطير اجه من الصبح يسأل عنج.
باوعتلها باستغراب.
زمــرد:- منو؟
غمتني وكالت.
مـسـرہ:- هو منو جابج الي غير صافي.
زمــرد:- اسمه مصطفى؟
رجعت غمتني بثنين اديها وطلعت.
كمت لكيت جنطتي بس جنطت الفلوس والجنسيه ماكو.
زمــرد:- هذا باكها لو ماعنده ثقه بيه؟
كمت مامهتمه اهم شي ابالي اليوم اروح لخالتي،،
اخذت ملابس ورحت سبحت كملت رحت للغرفه
امشط دخلت مسره اجت ركض سحبت المشط.
مـسـرہ:- العباس عليج امشطه اني.
انطيتها ظهري وضلت تمشط واسمعها تصلي على محمد بصوت ناصي.
مـسـره:- انتي تصبغين شعرج اسود لو شنو؟
زمــرد:- لا هو من الله هيج.
مـسـرہ:- شلون هيج سرح وثكيل وطويل صلاوات على محمد شتخليله.
زمــرد:- وراثه من امي.
مـسـرہ:- هاا الله يخليها الج والله اني ماورثت من امي بس الاخلاق.
ضحكت باوعتلها حتى هيه ضلت تضحك
زمــرد:- عليج سوالف.
مـسـرہ:- جوعانه وهيج لو اشبع تدرين شحجي.
ضفرته الي كمنه سوا هيه تسوي الريوك واني انظف بالبيت زغير وطابق واحد مابي بس غرفه وحده، بس بي راحه ماشايفتها ببيت عمي
صوت القران وريحة البخور ، رحت يم مسره ماسألتها عن اي شي رغم اغلب حياتهم شي غير مفهوم بالنسبه الي بس مع ذلك ضليت اضيع وكت بسكوتي انتظر تنتهي كل هل مغامره.
مـسـرہ:- شكد تصفين.
زمــرد:- ها.
مـسـره:-ولطما وطك عضما لاتصفين سولفي.
زمــرد:- ماعندي سوالف سولفي انتِ.
مـسـرہ:- تدللين،،
سمعي اني انخطب بس لخاطر امي ارفض
ياااع جااا تضل وحدها؟؟
جبت عمري بس لو اطرز لو احوك.
زمــرد:- هاا.
مـسـرہ:- يي، وعدنه راتب عايشات عليه
وزايد بس اني اتسله بالتطريز،، انتِ شتحبين تسوين؟
زمــرد:- احب اصلي.
مـسـره:- كلحنه نحبها بس وكت فراغج شسوين.
باوعت بحيرة وكلتها،،
زمــرد:- اصلي.
مـسـرہ:- واذا تعبتي.
زمــرد:- أقرة قرآن
مـسـرہ:- ياااعع الله يثبتج على هل ايمان.
شالت الصينيه وخلتها بالهول وكعدت امها يمنه
وكعدنه نسولف ونضحك،، شوي و باوعت لامها وكالت،
مـسـرہ:- رغم راح سمعها وشوفهة بس شوفتها عندي تسوة الدنيا ومابيها.
دمعت عيوني هيه انتبهت علي.
مـسـرہ:- شبيج حبيبه؟
تذكرت امي واهلي والحادث طاحت دمعه ورة دمعه.
كامت مسره كعدت بصفي تمسح بدموعي وتكلي،،
مـسـرہ:- خايب شكلت شبيج؟ احجي منو وياج؟
شي ياذيج؟ ترا هذا المسربت يخبصني عليج.
زمــرد:- تذكرت اهلي.
خليت ايدي على وجهي ورجعت ابجي بقوة شبكتني حيل ونومتني على رجليها تمسح على راسي.
مـسـرہ:- جا همه وين؟ مو اليوم يوديج الهم.
ضليت ابجي بقوة بالكوه فهمت كلامي واني احجيلها.
زمــرد:- لا اهلي ماتو من زمان ماتو ماعندي اهل اني وحدي، وجاي احارب هنا وحدي، جاي الكه حل اشرد من الموت والالم، وبكل مرة اتأذه اكثر
ضليت ابجي حيل واحجيلها والغصه خنكتني اكثر واكثر من رفعت راسي شفتها تبجي وياي شبكتها حيل وكمت غسلت وضليت احجي على روحي.
زمــرد:- هسه شعليها البنيه ضوجتها وياي.
شوي اجت وراي واول مرة اشوفها تحجي بهل جديه،
مـسـرہ:- تضلين يمي لامسربت ولا اي واحد ياخذج، وتكعدين حالج حال امي اوكلجن واحبجن.
ضحكت بوجها على طريقه كلامها وروحها الحلوة.
زمــرد:- مسره اني عندي خاله راح اروحلها
واخلص من هل ضيم كله.
مـسـرہ:- وين عايشه.
زمــرد:- هنا اليوم راح اروحلها.
مـسـرہ:- اروح وياج حتى اندل اضل كلما اروح للسوك امر عليج.
زمــرد:- تمام الضهر نروح.
مـسـرہ:- خوش لعد خل اجهز عباتي.
راحت سريع رحت كعدت يم الحجيه وافكر ليش،
زمــرد:- اخذ الجنسيه وفلوسي؟
بعد تفكير هواي وربطت شي بشي ودخلت بمواضيع هواي اجت مسره صاحت،،
مـسـرہ:- تعالي وياي راح اطبخ الغده حتى ناكل على وكت ونبدل ننتضره قبل لايجي.
زمــرد:- تمام.
رحت يمها وكلما تريد تسوي شي تلكاني اسوي بي.
مـسـره:- خايبه انتِ تساعديني اني اساعدج؟
ضحكت وكلت،
زمــرد:- لا بس صار فتره ما طابخه خليني اكملها عنج.
كعدت وضلت تباوعلي وكل شوي تكول،،
مـسـرہ:- احنه مانسويها هيج .
: احنه مانخليلها هيج.
: هذا احنه مانخلي.
: لا مو هيج احنه نسويها.
بالاخير صبيت وكعدنه اكلنه كلشوي تخزرني بالاخير خفت وكتلها،،
زمــرد:- شنو ليش هيج تباوعين.
مـسـرہ:- منو معلمج على الطبخ.
زمــرد:- وحدي تعلمت.
عوجت حلكها وضلت تقلدني،
مـسـرہ:- نننن وحدها تعلمت.
زمــرد:- والله.
كملت اكلها واني ماحجيت بالاخير كامت شالت الصينيه وراحت تغسل،، شوي وسمعت الباب يدك
فتحت الباب وبلشو يتناكرون.
مـسـرہ:- لو اكو عبايه على راسي جان علمتك شلون تعيب علي ابو العضام.
تذكرت العضمه هاي حتى مسره تدري بيها
بالاخير كاللها،
مـصـطـفى:- خل تبدل بس اكل واجي.
صاحت علي مسره.
مـسـرہ:- تعال غدانه جاهز خل اصبلك
وطلعوا على السريع.
مـصـطـفى:- طبخج مو طيب.
مـسـره:- انجب غير لحم جتافك من طبخي
تعال هاي البت طبخته مو اني.
مـصـطـفى:- هلو هلو انوب هاي الفرخه تطبخ
حتى تسممني وتوديني لأقرب مستشفى.
مـسـرہ:- طب ترا مااخليها تطلعلك بالعباس الا تدخل.
دخل وهو يضحك.
مـصـطـفى:- يلا صبي وكثريلي بالخبز والجاي.
رحت للغرفه لبست حجاب ورجعت كعدت يم الحجيه.
اول كعد وكال،،
مـصـطـفى:- صبي يلا لاتضيعين وكت.
مـسـرہ:- شمالك انتَ رايحه رايحه.
صبت وخلت كدامه، اخذ الخاشوكه واشوفه متردد بالاخير اخذ شوي كلش قربه على خشمه شمه اندار علي يباوعلي ، اكل منه كلش شوي حتى اليضوك مو هيج،، من بلعه يالله كمل الخاشوكه،
دنك على الاكل ورجع ضاك شوي منه ورجع باوعلي.
مـصـطـفى:- منو علمج هيج تطبخين؟
زمــرد:- محد.
شمر الخاشوكه وصاح.
مـصـطـفى:- محد معلمها يعني محد معلمها يابوية غشني الطعم والتسمم يرحب بالابطال.
صاحت بي مسره
مـسـرہ:- انجب من مساع اكلنه منه وطيب
وماصار بينه شي وكدامي طبخته.
رجع ياكل وكل شوي يباوعلي واني ادور عيني على مسره ع اساس ما اباوعله.. بعده ياكل وصاح.
مـصـطـفى:- جيبي جاي فدوة وانتِ كومي بدلي حتى نروح كافي.
زمــرد:- حاظر.
وطفرت بسرعه بدلت ولبست العبايه ورتبت جنطتي ، اجت مسره لفت حجابها عدل وسحبت عبايتها من ورة الباب وصاحت.
مـسـره:- انه اروح وياكم.
مـصـطـفى:- طالعين سفرة مدرسيه وما ادري؟
مـسـره:- طلعت وقفلت الباب علي من برا وكالت،
مـسـرہ:-انتَ بكيفك لو اني وياها لو ثنينه نبقى ماكو خيار ثالث.
سمعته صاح وهو يمشي.
مـصـطـفى:- امري لله يلا تعالن.
فتحت الباب ومشت كدامي واني مشيت وراها طلعنه اخذت مفتاح من فوك الثلاجه وراحت تشحط بالشحاطه، لبست حذائي ورحت وراهم لكيتها صاعده كدام فتحت الباب وصعدت ورا لكيتهم يتصايحون و هيه معصبه وهو يضحك.
مشت السيارة وهيه كلشوي وكالت،
مـسـرہ:- شوفي منا اروح للسوك من هذا الفرع اروح لابو الاسواق، هذا بيت صديق مسربت عنده بيمدبليوز.
زمــرد:- شنو؟
مـصـطـفى:- اسمها pmw.
مـسـرهہ:- نفس الشي ماغريب الا الشيطان
لا تعدل وراي.
ضل يستغفر بصوت ناصي مسموع.
وصلنه للمنطقه وضل كل شوي ينزل يسأل ابو محل، ويرجع يصعد يكول ماكو.
بالاخير نزل ضل ابو المحل ياشرله ويحجي
من صعد كال،
مـصـطـفى:- لكيت وحده ان شاء الله هيه.
نزل يم بيت وضل يدك بالباب طلع ولد زغير ضل يجاوبه انوب دخل للبيت يركض اجت مرة جبيره ضلت تحجي وياه من الباب وتباوع للسياره ونقاشهم جان جدي وثنينهم يباوعون بأتجاه السيارة.
صعد مشى شوي وصف السيارة وكال،
مـصـطـفى:- خالتج بالعمارة.
زمــرد:- شنو.
مـصـطـفى:- خالتج بالعمارة حاليا بايعه بيتها ورايحه هناك.
زمــرد:- لا هيه قبل اسبوع هنا.
مـصـطـفى:- بايعه بيتها ورايحه هناك المرة تكول
احنه بيتنه قريب وردنه بيتها من زمان ماقبلت جايتهم اول امس بايعته الهم بسعر مايسوه وطالعه من البيت وامس سكنوا بي.
باوعتله بحيرة وكلت،
زمــرد:- وهسه شلون الكاها؟
مـصـطـفى:- هيه شسوي بالعمارة شلون تعوفج وتشيل؟
زمــرد:- اني جنت بالعمارة يمكن راحت تدور علي.
مـصـطـفى:- ليش انتِ ماجنتي يمها؟
زمــرد:- لاجنت ابيت عمي.
مـصـطـفى:- وليش محد منهم اجه وياج يوصلج؟
صفنت بوجهه هسه هذا شلون اكله شارده منهم.
مـصـطـفى:- جاوبي لا تصفنين.
ضليت ساكته،، مشى السيارة من وصلت يم بيته طبك وكال.
مـصـطـفى:- ماترجعلج جنسيتج ولا الفلوس
الا لولي امرج او واحد من اهلج.
زمــرد:- الا خالتي.
مـصـطـفى:- باجر نطلع للعمارة ونروح
لبيت عمج و اوديج الها.
زمــرد:- لا ما اروح خليها هيه تجي واني هنا.
مـصـطـفى:- هاي شنو؟
زمــرد:- ايي لا اروح ولا اعتب العمارة.
مـصـطـفى:- ليش؟
ضليت صافنه مرديت حجه هو وبنظرات مشككه،
مـصـطـفى:- انتِ شاردة؟
زمــرد:- والله اجيت حتى اروح لخالتي.
مـصـطـفى:- بس شارده من عمامج؟؟
سكتت.
مـصـطـفى:- من احجي وياج جاوبي.
ضليت ساكته بس دموعي نزلن.
مـصـطـفى:- هسه عليش تبجين واحد ماذيج كولي.
زمــرد:- ايي عمي واني اجيت لخالتي.
مـصـطـفى:- وخالتج تدري راح تجيلها.
زمــرد:- لا هيه الي تجيلي كالت قبل خمس تيام بس ما كدرت الا اجيها.
باوعلي بحده.
مـصـطـفى:- وليش ما انتضرتيها؟
زمــرد:- ماكدرت.
مـصـطـفى:- ليـش؟؟؟
سكتت وضليت بس ابجي خليت نضري على ايدي واني ابجي.
نزل من السيارة ونزلت مسره سحبتني وهو صاح.
مـصـطـفى:- هييوو جيبيها اريد افهم سالفتها شنو.
مـسـرہ:- اجي وياكم.
مـصـطـفى:- استغفر الله يالله روحي شوفي امج وتعاي.
سحبني وكال.
مـصـطـفى:- تعاي انتِ وياي.
سحبت ايدي بالكوه ومشيت وياه،، فتح الباب دخلنه وخلاه مفتوح.
كعد كدامي وكال،
مـصـطـفى:- كعدي نبلش تحقيق.
خفت من نضراته وطريقه كلامه الجديه كعدت كدامه وحجه بجديه.
مـصـطـفى:- هذا كلامج راح اخذه واروح للعمارة
تدليني بيتكم واسأل عنه، الكه خالتج واجيبها الج ماشي.
زمــرد:- ماشي.
مـصـطـفى:- انتِ طالبه؟
زمــرد:- ايي بس ما داومت اسبوع صارلي.
مـصـطـفى:- ينحل موضوع خالتج وتصير سالفه دوامج، سهله بس خل اروح وارجع تبقين هنا مو يم مسره فاهمه.
زمــرد:- لا اريد يمها.
مـصـطـفى:- لا هنا بس من اطلع ترحين يمها ،خاف كلامج جذب تطفرين هنا، من موجود أأمن عليج اكثر.
طفرنه صوت مسره من يم الباب.
:- والعباس تبقى يمي.
مـصـطـفى:- من شوكت انتِ هنا؟
مـسـرہ:- من رجعت من العمارة.
اخذها وراح للمطبخ يحجي وياها شوي ورجع.
مـصـطـفى:- تبقين يم مسره.
مـسـره:- غصباً عليك.
مـصـطـفى:- طلعي برا تبقى يمي.
مـسـره:- اشك حلگك.
مـصـطـفى:- يلا برا.
اشرتلي بعيونها انو كومي ركضي ركضت فتحت الباب اجت وراي،
مـسـره:- امشي سريع راح يجي.
اجه ورانا يمشي ويضحك ويهز بأيده طلعنه بسرعه دخلنه للبيت وسدينه الباب
يتبع...
🦋... 🦋
شلونها القفله؟
شنو رئيكم ببارت اليوم؟
تكولوون يلكه خالتها ؟
شنو تتوقعون يصير بالبارتات الجايه؟؟
يوزري انستغرام
@ayat_.almahdi
لاتنسون التصويت للبارت ❤️🩹