قيود العوف

part 8

#قيود_العوف
بقلمـَي : ريتَا

لتنسون التصويت + التعليقات بين الفقرات قلبي 🖤.

واصلة لحِد نجمّة الله
‏والحَسرة بيّة تَريد حِيل
‏وآنة روحَي خيّوط بَازة
‏أشمِا يطُگني الرّيح أمَيل.

شبابات صوتوا دوسوا علىٰ النجمَة 🤏🏻
<________________________>

-تقَدم وصعَد فوگي مثَل الخبل ويسب بيَه ويصيح بصوت عاليي
ويجر بشَعري ولزمني من ملابسَي يريد يجرهن ويشگهم واني اصرخ

-وخرر وخرررر ولككك وخرررررر

ادفر واخرمَش بوجهة ولا يَمي راح بّغير عالم وكأني
من وصفَتة بالمرَيض جاي يطَلع حقيقة مرضَة عليَه
وديثَبت الي هو فعلاً مو انسان طبيعي

هو ثگيَل بشكل واني جسَمي مكسر ومورم من الضرب وهَو فوگي
حسَيت النفَس بدة ينگطع عنَدي

-ماعندي شيء ادافع بيه عن نفسي بالغرفة فارررغة بس
متروسة تراب اخذت صم مال تراب بإيدي وترست عيونة بيه ودفعتة عني

گمت بسَرعة وسحگت علىٰ بطنة حيل وهو صاح صوت
زرف طبلة اذني ورجعت اخذت تراب وذبيته عليَه وطلعت أركض

فتحت الباب البرة واني بالگوا گدرت أركض صرت أتلفت وراي دست علىٰ نفسي وسرعت ركضتي والألم صار أضعاف ..

البستان چبييييير كُلش بقيت اركض باوعَت وراي محد يعني ماگدر
يگوم بعده ترست عيونه تراب ترس بلكت يتأثرن ويلتهبن..

استمريت بركضي انداريت البيت صار بعيد عليه كلش حطيت ايدي علىٰ صدري واخذَت نفَس بيه راحة وجهت نظري للي گدامي زين وين أروح منين المخرج ..

بعد ماگدرت امشَي ولا اگدر احط رجلي بالگاع رفعت رجلي
وگمت اطفر علىٰ رجل وحدة بس حتىٰ ارتاح طفرت بين الحشيش والحصو وتطلع مني شهگة بكل مرة رجلي تدوس ع حصوة..

ضميت روحي ورة شجر جان كله بصفحة وحده بعيدة وكُله يم بعض ومايبين منه شيء جريت نفس طوووويل ريگي نشَف وبَدة يشحط

شَفت گدامي مثَل المجرىٰ ماهمني نظيف وسَخ اهم شيء اروي ريگي بي حركت روحي وزحفَت اله ومدَيت ايدي اشَرب منه چان مجرىٰ مي للبستان شربت واني احس اريد اشرب بعد وبعد مجاي ارتوي المي هذا صرت اتمناه ..

غسلت وجهي وبَاوعت للگاع هَواية واگع بيَها تمر يابس مديت أيدي أخذت كم وحدة أكلتها لعبت نفسي معدتي فارغة صارلها أيام غسَلت ايديَة وغسلت رجلي وفتحت رجلي من الشال الي لافته بيَه ..

انهاريت من شفت شكل رجلي فعلاً دگ الخوف بكل جسمي مستحيل وضعها بعد أبد ماراح يعدي علىٰ خير بچيت متألمة ومتحسفة متأذية علىٰ نفسي و وضعي أرحمني يارحيم خلصني منهم خلصنييي اني تحت رحمتك بس والله تعبتت تعبتت..

ذبيت مي علىٰ رجلي وعطت متألمة مو مي عبالك تيَزاب وذبيَتة علىٰ رجلي روحي شاغت وشفتي صارت ترجف من الوجع رجلي تخوف وصرت اخاف منها وين راح يوصل بيها الالتهاب بعد رجلي دتتاكل..

ماعندي غير حسن الظن بيَك
ماعندي غير أمل شمَس لطفَك تشَرق عليَه ، عَصرت رجلي بأيدي حيَل ورجعت لفيَتها بالشال ومشيت أستغربت كل مسَافة امشيها صرت أشوف حفر عملاقات وأبتعد بخوف لغير أتجاه وأرجع أمشي مسافة وأشوف نفسهم..

باوعت الهم برعب والله اذا يلگوني يذبوني بنصَها ، شحيت نظَري عنها
وكملت مشَي مشَيت هواية وماكو طريق ! ولا اكو مكان اكدر اطلع بيه ع شارع وين ساسة وين راسة هلمُكان اجيت بطريق غلط لو شنووو ...

انداريت مبتعدة كُلش عن البيت وين صرت ماا ادري واتلفت يَمين يسار ماكو اي طريق .. زفرت متنهدة اتلفتت بالاتجاهات يمكَن مو هنا طريَق الطلعة ...

رجعت علىٰ نفس الطريق ألي اجيت منه والي ماكو غيرة أساساً مدشوف غير حفر فارغة وكل مسافة بير مي موجود ماكو اي مخرج..

مشَيت هواية واني حاطة أيدي علىٰ گلبي خاف ديدورن عليَه
ويشوفوني امشَي وكُل ماا اشوف مكان اضم روحي بيَه
واباوع من اشوف مااكو احدارجع امشَي

صرت قريبة علىٰ البيت ، لزمت گلبي وگلت خاف همَة وراه ؟
خاف هناك عبالهم اني بقيَت بحيرة انتظرت بمكاني هَواية ومحد طلع ولا شفت احد

كملت مشي واني گلبي يدگ دمام وي كُل خطوة اتنهد واغمض عيوني
وصَلت وركضَت ورة البيت بسَرعة چانت اكو تانكي مي چبييير
ضميت روحي وراه واني اباوع كُل شوية ماكو احد !

وينَهم لعد معقولة عبالهم رحت طلعت منَا وطلعوا ديدورون عليَه !
غمضَت عيوني وگلت دخيَلك يارب خليَك ويايَة ساعدنيي

هاي الجهة من البستان الي ورة البيت عكس هذيج الجهة
چانت يابسَة وبيَها كم شجرة وكُلها عاگول وشَوك وسخ مو نظيفة

منَا البستان كُله شجر ونظييييييف ، قَويت روحي وگمت لشوكت
ابقىٰ ضامة نفَسي هنا اني لازم اتحرك لازم اگوم واشرد

دامشَي وتَوني دابَتعد عن البيت مسَافة صغيرة وما حسَيت
اله دفرة بنَص ظهري حسَيت بيَها ظهري انكسر ومنَها وصَار كل جسمي علىٰ الارض

-مديوي: بنت ال**** انعل ابووووج تردييييييين تشردين من عندناااااااا

جرني من شَعري وحسَيتة اتگطع بأيدة وگومني وهَو يجر بَشعري
واني اناشَغ واصَرخ من الوجع واتوسَل بيَه يعوف شعري وهو يزيَد بالجر ويگول

-مديوي: تحلميييييين تطلعين من هلمكاااااان مووووتچ علىٰ ايَدي ياب**** تمرررردتيييي هوووواي والله لأطلع روحچ اليوووم

اجت عيَني للبيَت من فوگ بيَه سطَح ودرج خارجَي علىٰ البستان
ويگدرون يراقبَون من فوگة ويشَوفون الي جاي والي رايَح

گمَت ورجع دفرني انتهيت من الوجع وراح أملي كُله
هذا چان اخر امل عندي علمود اتحرر منَهم ومن عذابَهم
بس ارادتك چانت اقوىٰ يا الله ،

جرنَي من شعري ودخلني للبيَت ورجع شَد أيديَة بحبل يأذي
عبالك بسَامير ودخَلهن بأيدي صررخت من الووووجع
ضربنَي راشدي وجهي افتَر بيَه غمضَت عيوني ، واني احسَ بخيبة
بتعَب ماجاي يفارقني ، جسَمي جاي ينتَهي ،

بس وجع روحي چان اقوىٰ من وجع جسمَي ، حرب نفسَية للحظات تنفست بأرتياح و گلَت ياا الله بس الحكم چان أقوىٰ..

مرت سَاعات فتَح ايديَة وگعد گبالي عيونة نااااطة بشرار..

-بعد هذا المكان ميرهملج وانتِ تجاسرتي هواي ولا تتوقعين اني تاركج هنا وماجاي اضغط عليج لسواد عيونج لا براسي الف شغلة وملتهي بألف شغلة مافارغلج بس انتِ الظاهر متفيد وياج الحسنة

بلعت ريگ وبقيت ساكتة كمل كلامة وگال..

-راح ابيعج ماراح أحتار بيج أكثر لأن ما وراج فايدة ومن الضرب تشوهتي شنو فايدتج بعد خل ياخذج چلب من چلاب العثال هناك فارغين الجن راح يربونج عدل ويعرفون وين يخلونج ..

غمضت عيوني بحسرة من تفل عليه وطلع .. بقيت جامدة بمُكاني متصنمة لزمت راسي مرعوبة سلعة اني حتىٰ يبيعني بعد ما اكدر ولا استحمل أكثر طاقتي خلصت وروحي تعبت من الجرجرة خليني أموت أهون الي...

*****

-قاسم: من فترة وصلتنا معلومات عن مجموعات من العصابات
ومنها ، خطف ، تجارة ، مخدرات ، تسليب ،
كثروا وبكل محافظة هاي العصابات منتشرة وكل فترة توصلنا
سالفة عليَهم

كثرت قضاياهم والي ترمز الىٰ فعل ارهابي ،
كلفوا جهة خاصة بيَهم بس بكل مرة تفشل عملية القاء القبض
عليهم ويهربون شلون وصلتهم معلومة ان كذا جهة راح
تطلع عليهم ؟

عندَهم من يوصل الهم المعلومة بس منين اكيد بنفَس المكان

تم تكليَفنا بالمهمة ومن اول يوم
وصلتنا معلومات عن المجرمين بدينا نشتغل
بس همَة واحد اثنين ! متفرقين وصايرين مجموعات
كل مجموعة بمحافظة وعندهم ظهر قوي يستندون عليه
مايخافون ويسوون الي يردونة وماترف الهم عيَن لأن واثقين
من الحماية ومتأكدين ماراح يزلغ سجلهم ولا يوصَلهم طرف

- ايام من التعاون والشغل المستمر علىٰ تحديد مواقعهم وتحركاتهم تم تحديد مواقع أغلبهم ورصد تحركاتهم..

ابتسمت براحة وهزيت راسي اتشكرت من الشباب وطلعت من الغرفة متوجه للمكتب دگيت الباب ودخلت اندار ألي منتظر مني حچاية ..

- تعال قاسم

-عوف

-نعم ؟

- تم تحديد المواقع ..

انرسمت علىٰ وجهة ابتسامة خفيفة هز راسه شال سلاحة من علىٰ المكتب وحَطة بخصرة وگال ...

-جهز الشباب قاسم

-أمرك سيدي

****

"جُمان"

فزيت مستغربة أسمع اسمع هوسَة حچيهم مشيت تقربت للباب گعدت يه وحطيت أذني عليه ..

-مديوي: الليلة نغير المُكان

-حنتوش: كله منننننكك اتغافلت عنهاا وماااطلت بيهااا لو متخلصين منهااا من زمان ومفتكييين

-مديوي: ولك مطي جُمان حلوة تفيد الف واحد يشتريها من عندنا وبالسعر الي يعجبنا جماعة ابو العثال يلگفونها لگف يحتاجونهن..

-حنتوش: شلون تعرفت علىٰ جماعة ابو العثال انتَ ؟

-مديوي: بعدين اسولفلك هسة أنهض خلي نخلص شغلناا باقي الشباب راح يجون لأن اليوم بالليل راح نطلع...

زفرت وأبتعدت عن الباب والله لو أموت بالطريق ماراح اخليهم يتاجرون بيه ويبيعوني لهذا وهذاك كاافي إذا مالي خلاص منهم ماراح اخليهم يضغطون عليه بشيء بعد...

شگد اتمنيت عندي سچينة عندي شيء ادافع لنفسي بيه بس وين ماگدرت احصصصل ولا هلگددد يتركوني بأماكن غير التراب مابيهاا رجعت راسي علىٰ الحايط .. لحظات لحظات مرت وانقلبت الموازين بصياحهم اتخبلواااااا ...

يصيحَون ويفشرون واحد يسسب بالثاني واحد اتغير علىٰ الثاني بالكلام اسمع صياحهم يرعدون رعييد صاروا ..

-اتحررركككك اصعد فووووووگ ارمي وبس نصَعد بالسيَارة انتَ اطفر اللحگنااا ننتظررررك احننننننة

ماعرفت شكوو وشصاررر وهيج اتخبلواا وخافوووا بس طفرني وفززني برعب صَوت الطلق الي صار ما يتلحگ عليه صرت مثل السعفة ارجف ماعرف شكو منو صارت بيناتهم لو شكو..

اتمنيَت الله ياخذَهم وافتك منَهم مااا اريد اشووفهم بعد ياربي
تعبت من الخوووف والرعب تعبتتت زاد الصَوت وصَارت الأصوات أضعاف طبلة أذني صارت ترن..

گعدت بخوف لميت رجلية لصدري وراسي بنصهم
صوت الطلق ، صوت العياط احتل مسامعي
سديت أذني بأيدي ما اريد اسمع شيء ما اريد

- لحد ما بعَد مرور دقائق عم الهدوء علىٰ المكان
ولا كأنه قبل فترة قصيرة كان هذا المكان اشبَه بساحة الحرب

- أنفتح باب الغرفة وأني علىٰ نفس وضعيتي
مارفعت رأسي خفت ارفعة فكرتهم نفسهم وأرجع اشوفهم
ما اريد ما اريد

- قاطع صوت تفكيري صوت خشَن ونبرة حادة
ما سامعتة من قبل ومايشبَه صوت أحد منهم

- منو أنتِ ؟

- رفعت رأسي فور سماعي للصوت

-وگف عند الباب ورمقنَي بنظرَة غريبة وگال
-انتِ شتسوين هنا ؟

-بچيت بقلة حيلة وگلت بصَوت مبحوح

-والله ما أعرف مو أني اجيت هَم جابوني هنا

- نظراتَه المليئة بالاستهزاء وعدم التصديق
نظرات كأنها تگُلي اكتفي بالسكوت

- ما چان عندي الحيل والقوة حتىٰ أبرر
مثل الغرگان ومابيَه يصيَح كُل الي يريدة
ايد تنمد أله وتنجيَ من الغرگ

- كُل الي بَدر مني هوَ

-مديت ايدي اراويَه أثر الحبل والتعذيب الي
بيَهم باوعَت بعيَونة واحتَلت الدمُوع عيَني وگلَت

-شوف اثَار التعذيب شوف شسوو بيَه

قاطعني وگال

-ليش همَ شَردوا بَرة وانتِ هنا موجودة

بَاوعت اله ما مفتَهمة قصَدة تقرب گعد گبالي صفن بوجهي لثواني بنظرات غريبة عجيبة ..

-شنو اليضمن كلامج صحيح؟

-اضرب بأيدي علىٰ وجهي واعيط واحچي
لا والله أني بريئة والله ما اعرفهم منو

-الله يخليكم كافي رجعوني لأمي مالي دخل بيهم مالي دخل

صرت اشهگ وارجف والدموع احتلت كُل مكان بوجهي وهَو هادئ ونظراتة مثل ماهيه بعدها نطق وگال ..

- مسَحي دموعچ وگَومي

- چنت تعبانَة والارهاق والحَزن غلفني كُلي لكن اطمئن قلبي من لاحظته بالزي العسكري العراقي فرحَت وگلت خلَص أنتهىٰ عذابي
راح أرجع لأمي أكيد

- مافكرت بالمجهول الفرحة احتلت كُل مكان بعقلي وبجسمي وماتركت لي مجال أفكر قبل ما اگوم واتحرك گدام هذا الانسان الغَريب

يتبَع .......

<________________________>
حسَاب الانستا نوروني هناك 🪽
rita.almukhtar