_احنا هنقعد نقضيها بقي شات وكلام في التليفون
-اومال عايز ايه
_عايز اشوفك
-طيب ما انا بعتلك صورتي
_لا انا عايز اشوفك في الحقيقه
-انا قلت لك قبل كده اني مليش في كلام اننا نتقابل وكده
_ يا سلام... يعني انت عمرك ما قابلتِ حد
-عايز الصراحه ...لا
_طيب يا ستي خليني انا اول واحد تقابليه
-امم مش عارفه
_عشان خاطري يا لولو
- م ماشي
اشطاا ..هابعتلك لوكيشن المكان اللي هنتقابل فيه .. هستناكِ
؛قفلت الموبايل بعد اخر مسدج ...حاسه اني بعمل غلط ...حاسه ان جوايا نغزه كبيره بتوجعني...صوت في عقلي بيقولي ان ده غلط ...بس كالعاده تجاهلت كل ده واستنيت المسدج اللي هيبقى فيها اللوكيشن؛
؛ ما تعودتش اقابل حد بره ...ياما صاحبت كتير وسبت كتير ..بس ما قابلتش حد بره ...كله بيبقى في السر... لكن المره دي... وافقت ...مش عارفه ليه... يمكن عشان ده اكتر واحد قعدت معاه ...او يمكن عشان ده اكتر واحد اتعلقت بيه... يمكن.......؛
_رايحه فين يا لبنى
- اممم... نازله يا ماما
_ايوه نازله رايحه فين يعني
- اه ر رايحه عند واحده صاحبتي
_ مين دي
-مش هتعرفيها اصلي لسه مصحباها جديد
_اممم مصحباها جديد ..... طب تمام بس متتأخريش
- حاضر يا ماما يلا سلام
_ لا اله الا الله
-سلام
_آه .....ربنا يهديكِ يا لبنى يا بنتي ويرجعك للطريق الصح
_ بس طلعتِ احلى من الصور
؛ ماحسيتوش اطراء ....حسيته حاجه تانيه... مش عارفه ايه هي ....بس في الوقت ده لازم اتكسف واشكره.... وده اللي حصل؛
- ميرسي
_ مالِك انتِ مستنيه حد
- ها .. لا ليه
_ اصلِك عماله تبصي حواليكِ كده كانك عامله جريمه
- لا ولا جريمه ولا حاجه.... اصل انا كدبت على ماما و قلتلها اني رايحه لواحده صاحبتي وانا جايه اقابلك ...وخايفه حد يعرفني
_ هي ما تعرفش اننا بنتكلم
- لا طبعا دي ممكن تموتني
؛ بصلي شويه وبعدين رجع بالكرسي لورا وهو بيتنهد ...مش عارفه ليه حسيت انها نظرات مشمئزه ... او يمكن .....مش عارفه ...... قرب تاني بس اوي ... و مسك ايدي اللي حطاها على الترابيزه ....سيبته يمسكها ...اها سيبته ؛
_عارفه ...انا مبسوط جدا انك قبلتي تيجي
-امم ... بس ياريت تبقي اخر مره
_ليه بس ما كنا ماشيين حلو
-اصل ممكن حد يشوفني و .......
_ماتقلقيش مين يعني هيعرفك ...وبعدين حد ليه عندنا حاجه
- تمام بس.....
_ ولو يا ستي لسه خايفه احنا ممكن نتقابل في اماكن بعيده ومافيهاش حد
-ودي فين دي
_ تحت الكوبري مثلا
- نعم
_ بهزر بهزر
- اه بحسب
؛اتنهد وحط يده على خدي ؛
_ احنا هنقضيها كلام عن المكان والناس كده
-اه سوري
_ اتاخرتِ ليه
-معلش الطريق كان زحمه
_ طيب روحي غيري عشان تاكلي
- لا انا اكلت بره
_بره فين... انتِ مش كنتِ عند صاحبتك
- اه صح ... ما احنا خرجنا بقى وكلنا بره... انا مش جعانه كلي انتِ
؛ بصيتلي بنظره خليتني اتكسف من نفسي اوي من جوايا.... انا متاكده انها ما تعرفش حاجه و مش قصدها اي حاجه ...يمكن انا اللي حاسه اني غلطانه و بعمل حاجه غلط ؛
؛دخلت اوضتي مرهقه.... كويس ان اليوم عدي على خير و مفيش حاجه حصلت ...بس ..... انا ليه حاسه انه مش خير ؛
_لبنى.... لبنى اصحي
؛ فتحت عيني ورجعت قفلتها تاني ...الضوء كان قوي اوي ....فتحتها بالراحه... بس اللي حصل اني.... اني ما كنتش في اوضتي ...كنت في مكان اشبه ب...... بالسما؛
_ لبنى ...فوقي
؛بصيت ورايا لقيت حد ...شاب ....شاب كان لابس ابيض... هدوم حريريه... وشه تحس أنه بيشع منه النور .... حقيقي ؛
_قومي يا لبنى
- انت مين
_انا .....مش مهم
- يعني ايه مش مهم
_ يعني مش مهم تعرفي انا مين.... المهم في اللي جاي اقوله ليكِ و اخليكِ تشوفيه
- وايه هو ......وانا فين
بصلي وابتسم_ تعالي معايا وانت تعرفي كل حاجه
؛تلقائيا هزيت راسي ب اه .....ابتسملى ابتسامه تخطف القلب... وهي فعلا خطفت قلبي ؛
؛مشي قدامي وانا وراه ... المكان حقيقي أشبه بالسما ... غيوم قطنيه تحت رجلي ... الجو مريح ؛
؛لقيته وقف مره واحده ... انا كنت بتأمل المكان ... بصيت عليه ... لفت انتباهي حاجه ... بوابتين كبار اوي ... واحده باللون الاسود وده كان شكلها من بره يخوف ....والتانيه كانت رماديه ...هاديه اوي ؛
؛لقيته اتحرك ناحيه الرماديه ...كانت على اليمين ...قربنا منها... لقيته خبط عليها وطل منها واحد... اول ما شاف الشاب اللي كان معايا فتح البوابه على اخرها ...ودخلنا ...سمعت حد بيلقى السلام والتاني بيرد.... ماكنتش مركزه مين اللي قال و مين اللي رد... انا كنت سرحانه في المنظر اللي قدامي ... كان لا يصدق... قلبي كان هيقف من جمال المنظر؛
_ جميل المنظر صح
- جميل بس ....ده جمال ما يخطرش على بال حد
_ ولسه
؛ مشي قدامي تاني وانا مشيت وراه ...المكان كان فيه.... كان فيه ايه... كان في كل حاجه.... ولما دخلت اكتر في المكان شوفت ... الارض خضره... فيه اشجار كتير... ورود في كل ناحيه ...اشكالها تشرح القلب ...في نهر شفته من بعيد ... لا ده كذا نهر... الوانهم مختلفه... ماحددتش هما ايه لانهم كانوا بعيد ... اصوات العصافير ...و صوت خرير الميه اللي بيريح الاعصاب .... كملنا لحد ما واقف عند مكان .... مكان كان فيه ناس ماشيه وناس داخله وناس طالعه من قصور ... وكان في بيوت صغيره و عشش كمان .... النور كان ساطع ...لكن ماكانش فيه شمس؛
؛ المكان كان احلى من انه يوصف... كل اللي وصفته ده كان جزء بسيط من اللي شفته ... مش لاقيه كلام اوصف بيه اللي شفته واللي شايفاه ....الناس هنا على وشهم باين النور... والجمال ... حاسه اني في .......؛
-انا فين
لف ليا و ابتسم _انتِ في الجنه
؛ انا قلبي وقع في رجلي... وعيني دمعت... مش دمعت بس انا دموعي نزلت من غير ما احس ... لمجرد كلمه هو قالها ؛
-ي يعني ايه ... هو انا مت
_ لا يا لبنى ما موتيش
- اومال انا في الجنه ازاي
قال لي وهو لسه على ابتسامته _ انتِ فعلا في الجنه ... بس ما موتيش
؛ بصيتله وانا لسه مش فاهمه حاجه؛
؛ لسه على نفس الابتسامه.... ارجع لورا خطوه وهو بيبص حواليه؛
_ كل اللي انتِ شايفاه ده واللي شفتيه.... ده جزء بسيط جدا من الجنه ....تقدري تقولي نقطه ميه في محيط كبير
سكت وبص للناس_ شايفه الناس دي ...دول اهل الجنه .... دول اللي عاشوا حياتهم وماتوا على طاعه ربنا ...اللي بيخافوه و بيخافوا يعصوه ...بيتمنوا رضاه وبيخافوا غضبه .... اللي انتِ فيها دي الجنه اللي كل البشر بيحلموا بيها واللي بيحاولوا يتخيلوها ... شايفه اللي هناك دي ...دي قصور للمؤمنين ... و بيوت و عشش ...كل حسب درجته ودرجه طاعته وايمانه
؛خلص كلام وبصلي ...كان نظرته وهو بيتكلم فيها فرح ودموع من السعاده ...لكن لما سكت وبصلي ...نظرته اتغيرت.... بقى فيها شجن ...فيها حزن وشفقه ...كان طول ما بيتكلم انا كنت عماله اعيط ...اعيط من كلامه ... لحد ما قال وهو بيبصلي بنظره حزن وشفقه؛
_ بس للاسف يا لبني ...انتِ مالكيش حتى مقعد هنا
؛ برقت عيني جامد ...اتخضيت لدرجه ان رجلي مش شايلاني و ركبتي ارتعشت ...و وقعت على الارض؛
؛ يعني ايه مليش مكان هنا ...يعني ايه مليش مقعد هنا ... يعني انا مش هدخل الجنه ... دموعي نزلت زي الشلالات ... بصيتله بحاول اترجاه بعيني انه يقولي انه مش بيتكلم بجد .... الاحساس ده وحش اوي ...وحش بمعنى الكلمه ؛
_قومي يا لبنى ...قومي و كوني قويه لان اللي جاي هيبقى صعب و لازم تستحملي
؛ مشي وانا قاومت وقمت ...مش عارفه ايه اللي هيبقى اصعب من انك تعرف انك مش داخل الجنه ؛
؛ومشي قدامي وانا وراه ... سرحانه ودموعي لسه بتنزل ...اخذت بالي اننا طلعنا بره ...رجعنا مكان ما جينا.... قدام البوابتين؛
؛مشي ناحيه البوابه التانيه ...بديهي كده ..اكيد دي بوابه .......
؛ حصل نفس اللي حصل على بوابه الجنه ... خبط وطل واحد من ورا البوابه وفتح البوابه ودخلنا ....وياريتني ما دخلت .... انا شفت ابشع منظر ممكن يشوفه الواحد .....شفت ناس لابسه اسود و بتجري ... بتجري في كل حته وبيصرخوا ....صراخهم يسد الاذن ... وناس ماشيه على حاجه شبه الكوبري ... بس رفيع اوي اوي ....والناس دي كان فيه حاجات بتمسك في رجليهم وتوقعهم ... بس مش اي وقعه ....دي وقعه في النار ....الناس بتسيح من الحراره ...كتل من النار بتتحدف في كل ناحيه ... وتصيب اللي تصيبه ... ده كله شفته وانا عند البوابه بس؛
_ تحبي تدخلي
بصيتله بعيون كلها خوف ورعب ...جسمي بيرتعش اوي؛
_ تعالى انتِ لازم تشوفي حاجه
- لا ارجوك
_ لازم تشوفي حاجه
؛خطوه اتنين تلاته .... وفي كل خطوه كنت حاسه اني بنتفض ... من اللي شايفاه والناس اللي بتصرخ وبتجري واللي بيحصل ....لكن كل ده كوم .... واللي شفته ده كوم تاني ؛
؛شفت واحده من بعيد عماله تصرخ جامد اوي ... صوت صراخها واصلي ... ايديها بتتحرق و وشها ..وعينيها بيطلع منها النار ... المنظر كان فظيع بجد ؛
؛ جسمي اتشل ... رجلي مش شايلاني ...... اكيد خمنتوا مين دي ... دي انا ....نسخه مني واقفه قدامي و بتتحرق ... كإني باصه في المرايه بس في عالم تاني؛
_ انتِ تعرفيها صح
؛بصيتله وانا لسه على صدمتي ... انا قلبي مش قادر يستحمل ده كله؛
_ تعرفي ايديها بتتحرق ليه ....لانها سابت واحد محرم عليها انه يمسكها
_ طب و وشها ... عشان سابت واحد محرم عليها انه يحط ايده عليه
_طب تفتكري عينيها ليه بتتحرق كده ... لانها ماغضتش بصرها عن المحرمات
_و جسمها اللي بيطلع منه النار ده عارفه ليه ...بسبب لبسها الضيق وتعمدها انها تلفت الأنظار
_ ده كان جزء بسيط جدا من عذابها .. لانها عملت ده كله و ما تابتش ... مااستغفرتش ربنا مره عن اللي بتعمله ...انا عايزه اقول لك حاجه ... البنت دي كانت متقيه ربنا ... لكن صدمه موت باباها خلاها تتغير ..وبقت تعدي صدمتها ب اللي بتعمله ده ... لكن الطريق ده ما وصلهاش غير للي انتِ شايفاه قدامك ده ... طريق المعاصي والمحرمات ...طريق الشيطان ... هو ده اخرته ... بس مشكله البنت دي مش انها اختارت الطريق الغلط ... لا مشكلتها انها ماحاولتش انها ترجع عن اللي بتعمله ...ما فكرتش ايه اخره اللي بتعمله ...لكن انتِ شوفتي اخرته ..... تفتكري لو كانت من الاول خالص اختارت تكمل في طريق ربنا ... اختارت انها تعدي صدمتها بإنها تتقي ربنا وتدعيه أنه يساندها ويقويها ... واختارت انها تبقى انسانه صالحه .... ده هيبقي اخرتها
؛كلامه كان زي السهام في قلبي عمال يقطع فيه ... فاكرين انهياري لما عرفت اني مش هدخل الجنه ...انهياري ده كان اضعاف اضعافه .. وانا شايفه نفسي باخذ جزاء اللي باعمله ...معاه حق في كل كلمه .....قالها يا الله يا لطيف ...يا الله يا رحيم
_لكن عايز اقولك على حاجه ... في فرصه تغيري ده كله ...ربنا مديكِ فرصه وحاولي تستغليها على قد ما تقدري
_ يا لبني ...اصحي يا لبني ... اصحى يا حبيبتي
؛قومت من النوم مفزوعه ...بصيت حواليا ما لقيتش نار ... ولا لقيت الشاب ده ... بس لقيت ماما قدامي .... اترميت في حضنها و انهرت ... عيطت كتير اوي ... وهي بتطبطب عليا و بتهديني ... عيطت وبحاول اخلي دموعك تطهرني ...عيطت وبطلب السماح من ربنا من جوايا ؛
؛فاتت فتره طويله وانا في حضن ماما بعيط ... طلعت من حضنها بعد ما حسيت اني هديت شويه ...ومسحت دموعي ؛
_اهدى يا حبيبتي ...اهدي ... انا سمعت صوت عياطك وانتِ نايمه وكنتِ بتتمتمي بكلام مش مفهوم ....انا مش هسألك عشان اكيد اللي انتِ شوفتيه مش قادره تحكيه ...بس انا هقولك قومي اتوضى وصلي الفجر عشان اذن. وانا كنت قايمه اصليه ...وبعديها صلي ركعتين لله عشان يطمن قلبك
؛ ااااه ...الصلاه..... هي الصلاه ....انا محتاجاها اوي ....وكنت محتاجه حد يفكرني بيها؛
؛كانت هتمشي وانا مسكت ايديها ...وبصيتلها بندم نابع من جوايا ؛
-انتِ مسامحاني صح ....مسامحاني على اللي بعمله و على تغيري للاوحش
؛ لقيتها بتبتسم بصدق و حب و حطت ايديها على خدى ؛
_ومين قالك ان انا زعلانه منك ... انا مقدره صدمتك لموت بابا وكنت كل يوم بدعيلك بالهدايه .......وشكلها كده استجابت
- ايوه يا ماما استجابت
؛ ابتسمتلي وطلعت بره الاوضه ...وقمت على طول اتوضيت ...وطلعت الاسدال بتاعي من الدولاب ...قعدت كتير عقبال مالقيته لاني ما كنتش بصلي..... وحشني اوي؛
؛ بدات صلاه ....وبدات عياط ... طول الصلاه و انا عماله اعيط ... وقلبي كان بيعيط قبل عيني .. دعيت ربنا كتير انه يسامحني ...الحلم ده هيفضل ملازمني طول حياتي.... وحمدت ربنا كتير ان لسه فيه فرصه ؛
:فاتت سنتين ...سنتين بس ... حصل فيها تغيرات كتير اوي.... اشتريت موبايل جديد بخط جديد ... واشتريت هدوم واسعه ودريسات فضفاضه وحلوه ... واختمرت ...وبقيت مواظبه علي الصلاه ... وبقيت احسن ... بدعي ربنا على طول انه يثبتني ويديني القوه اني اكمل وابقى احسن ... واتحسنت جدا في دراستي في الجامعه ...وبعدت عن الطريق اللي كنت ماشيه فيه ...وبقيت اتصدق ... واحفظ القران ...وبقيت اروح لدار الايتام على طول ... وحقيقي الحياه دي اريح واحسن بكتير من الحياه اللي كنت عايشاها ....وماما بقيت راضيه عني وعلاقتي اتحسنت معاها جدا؛
؛ بس في حاجه صغننه كده شاغله بالي ...خمنتوا صح ...الشاب اللي شفته في حلمي ... شاغلي بالي من ساعتها ...مين هو وليه هو بالذات؛
_ انا داخله انام يا لبنى ...انتِ مش هتنامي
-وانام ليه انا الحمد لله خلصت امتحانات
_لا يا اختي ما انا عايزاكِ بكره عشان نزل السوق مع بعض
- اه قلبي ....عشان خاطري يا ماما ...طيب سيبيني براحتي بس اسبوع واحد .. انا مفحوته في المذاكره والامتحانات بقالي اكتر من شهرين
_ يا سلام ...يعني انزل لوحدي يعني
-لا طبعا انا اقدر اسيبك تنزلي لوحدك برده .. استنيني الاسبوع الجاي
_ وحياه امك
-اللي هي حضرتك ...احم ... حاضر يا ماما هانزل معاكِ
_لبني ...لبني قومي
؛فتحت عيني وقفلتها تاني بسبب الضوء ... انا فاكره المشهد ده ... والصوت ده .. فتحت عيني تاني بسرعه .. لقيت في نفس المكان اللي كنت فيه المره اللي فاتت .. بصيت ورايا بسرعه لقيته .... هو ؛
؛لقيته مبتسملي ابستامته الساحره ؛
-ايه ... هتوديني فين تاني
؛ضحك ... وسرق قلبي ؛
_انا فعلا جاي اوديكِ في حته ... بس هتعجبك
-يا مسهل يا رب
؛وقفنا تاني قدام البوابتين ... لكن ... لقيته حود علي اليمين ... عرفتوا رايح فين صح ؛
؛خبط علي الباب و طل منها واحد ... وفتحلنا البوابه ... القينا عليه السلام و رد علينا ... المرادي كان مبتسم في وشي ... دخلنا .. المكان مريح اوي .. ضحكت علي اللي قولته ... طبعا مانا في الجنه ... وقف مره واحده وبصلي ؛
-وقفت ليه
_شايفه اللي هناك ده
؛بصيت علي مكان ما بيشاور ...لقيته بيشاور علي قصر جميل اوي ؛
_ده قصرك
؛بصيتله و انا مصدومه ...دموعي نزلت كتير اوي ... لما دخلت هنا اول مره قالي اني مليش حتي مقعد هنا ... لكن دلوقتي بيقولي ان ليا قصر ... يا الله ؛
-ي يعني ربنا سامحني
_هو بيحبك و ده قصرك .. بس انتي بعدتي عنه ... وهو كان عايزك تبقي مستاهله القصر ده .. و حلمك كان انذار عشان تفوقي
؛ماعدتش قادره استحمل .. كرم ربنا .. يا الله يا رحيم .. دموعي حسيتها هتخلص .. يارب يا غفور ؛
-ان انت مين
ابتسم_هتعرفي قريب ان شاء الله
_ يا لبنى .. بت يا لبنى
-ايوه يا ماما في ايه
_ بصي يا حبيبتي عايزه اتكلم معاكِ في موضوع
-ايه في ايه ها في اي
_اصبري بس ...انتِ عارفه انك كبرتي وبقيتي عروسه و ........
- متقدملي عريس صح
_ عرفتي منين
-ما هي معروفه يا ماما والله ومش محتاجه
_ طيب وانتِ ايه رايك
-مش لما اشوفه يا ماما الاول ... وبعدين انا هرفض
_ ليه بس
-مش عايزه اسيبك لوحدك ...انا لو اتجوزت انتِ هتقعدي مع مين
_عادي يا حبيبتي وبعدين احنا مش في منطقه بعيده ولا حاجه ...وعلى فكره العريس انا عارفاه وعارفه مامته وباباه كويس وقالي انه هيسكن جنبنا هنا بس لو وافقتِ
- اممم .. ربنا يسهل
؛ نهار ملحوس ... انت ... ده ولا اللي في الافلام والروايات ... مش معقول؛
_ نسيبهم شويه لوحدهم
؛يا ريت ..محتاجه افهم اللي بيحصل ده؛
-احم ...انا كرم محمد ... خريج هندسه و .....
_انت عرفتني ازاي
-احم ... انا ... انا ...
_انا حلمت بيك
-انا حلمت بيكِ
؛قولنا نفس الجمله مع بعض ... وضحكنا ؛
_انت حلمت بيا ازاي
-احم ... انا كنت انسان وحش اوي في حياتي وبعمل حاجات كتير غلط ... لغايه ما ف يوم من سنتين ... حلمت بيكِ وانتِ بتوريني الجنه ... و قولتيلي أن.....
_انك مالكش مكان في الجنه ....وبعدين وريتك مكانك في النار
-صح ...عرفتي ازاي
_لأني ببساطه حلمت نفس الحلم من سنتين .... بس العكس
- وكمان قولتيلي أن لسه فيه فرصه .... وفعلا انا اتغيرت وبقيت احسن ... وختمت القرآن .. وبصلي في الميعاد ... و بقيت متقي ربنا جدا ... انا في الاول ما عرفتكيش لأني كنت مسافر ... ورجعت من شهرين ... و كنت ماشي بالعربيه ولقيتك بتعدي الشارع ... عرفتك علي طول انك اللي كنتي في حلمي ... مشيت وراكِ لقيتك رايحه الجامعه ... وبعدين لما سألت عنك عرفت انك بنت استاذ رفعت الله يرحمه .. وهو كان صاحب ابويا ... لغايه بس اول امبارح
_حلمت بيك تاني وانت بتوريني قصري في الجنه
ابتسم وكمل -ساعتها ماقدرتش لأنك خطفتيني من اول مره حلمت بيكِ ... وانا دلوقتي قدامك اهو وبقولك ... تتجوزيني
؛اسمه كرم... وهو فعلا كرم من ربنا ... اتجوزنا ... و دائما بيساعدني علي طاعه ربنا ... ومتأكده أن ده اللي هياخد بإيدي للجنه ؛
؛دايما بيبقي فيه فرصه تانيه ... فيه فرصه انك تتوب واستغفر ... وباب التوبه مفتوح دايما ... بس التوبه تكون تابعه من جوا ... فيه فرصه انك تصلح اللي فات .. ودايما اختار الطريق القريب لربنا ... ده هيبقي احسن واسهل طريق ... ممكن سهل انك توصل بس صعب انك تحافظ علي اللي وصلتله ... دائما خليك مؤمن و واثق في ربنا ومن نفسك ... ومش اول مشكله تيأس وتبعد ... ادعي ربنا دايما ... وهو هيسمعلك وهيستجيب ... بس انت توب واستغفر وادعي ...؛
"والله اقرب إلينا من حبل الوريد"❤❤
*وصفي للجنه والنار ما هو إلا مجرد تخيل *💜
اللي يقراوا للاخر يصلي علي خير البشر🥺🫀