#جوليت وأسرها....

اخر اضافه🥺

اهداء

أُمي.. شكراً لجعلي في حياتكِ أمّيرة
لعودتي بين أحضانكِ طفلة صغيرة
أتمنى أن أكون لهذا العطاء جديرة

الى أُم جولييت..أعانكِ الله على ما ابتلاكِ بِه وقوّى الله روحكِ بالصبر والايمان

الى جاسر وجولييت..هذه الرواية مِنكُم وإليكُم

الى كل مَن أثقل الحزنُ قَلبه "إن مع العسر يسرا"

جولييت واسرها الاضافات هي فقط مشاعر بعيدا عن الاحداث والبارتات المشبعه بالشخصيات ❤️

رد عليه بحب... احسن الفقير بهذا الزمن محد يريده وماكول حقه خليج هيج

تنهدت .. صدك جاسر امتحاناتي ما ضل عليهن شي

باوعلي.. اي بويه ان شاء الله بس نجي من النجف بعد اكعدي اقري ومحد يزعجج

ابتسمت ورفعت حاجب.. حتى انت

عض شفته.. لا والله اني ما اضمن نفسي احتمال ازعجج

ضحكت...نعزل نفسنا كل شخص بغرفه

رفع حاجب...لا هيج هواي

رفعت حاجب...لا مو هواي عندك سوابق بالشغله ههههه

كرص خدي...هاي قبل مو هسه هسه مكانج بحضني حتى ما عندج فراش ملك...

نزلت عيوني وهمست...اسكت منا مجتبى عيب

باوع على مجتبى كال..افاا بعده واكف والله نسيت وجوده

دخلنه جوه وحضرنه نفسنا وبدلت للجهال تقريبا صارت الساعه بتلاثه باليل خلينه ورحنه للنجف ساعتين وصلنه زرنه وصلينه وبعدها طلعنه للمقبره لكيناهم هسه طالعين من المقبره لان جان اكو مي و وبخور ومي ورد...

هو كعد قره عليهم سورة يس وسور قصيره من القرآن الكريم وكعد يحجي ويه غزل الله يرحمها ما اسمع من كلامه بس همهمات ما جنت افهم شنو يكول رغم جنت اتمنى اسمع جان عندي فضول حيل قوي تجاه هذا الشي...

بجيت عليهم بقلب محروگ تذكرت شلون ماتو على ايد اخويه صار عندي انهيار فضيع واني اعيد الموقف كدامي ومن اتذكر شلون واحد وره الخ يموت وينازع بروحه جانت صدمه اليه ذاك الموقف دمرني عذبني لحد الان راسخ براسي وماذيني

بجيت من قلب وجع اجتاح روحي واستحوذ عليها شفته باوعلي مصدوم من انهياري واني اصرخ...لاااا لييش ليش عاصم شسويت

عرف صار عندي انهيار ومجتبى ومرتضى يسكتون بيه وهدار بحضني ضلت تبجي خافت مني

هو جاسر ابتعد عن القبور واجه سحبني الحضنه كال...شبيج شبيج على كيفج اسكتي يله خلي نروح

بلعت ريكي واني اشهك...گلبي يوجعني جاسر احس گلبي حيوكف ليش هيج صار ليش

مسح دموعي كال..هذا بعد يومهم وهيج مكتوب عليهم يموتون الله يرحمهم

وكفني كال..يله امشينا

بلعت ريكي والشهكات شگت صدري كتله...لااا انت ما شبعت منهم هسه احاول أهدئ وانسى  الصار

جر نفس كال...لا هذا هو صار هوايه كاعد وهم لازم نرجع من وكت عندي شغل خلينا نروح نزور ابوج ونرجع

استسلمت للأمر الواقع وخليت ورحت وياه بعد ما سلم على اهله و ودعاهم

اخذني لابويه بجيت يمه شكيت اله عن حالي وعن الصار بيه حيل احب ابويه احسه انسان مضلوم وفقير والحياة ما نصفته الحمد لله على كل حال ان شاء الله ربي يعوضه بالجنه...

ضليت يم ابويه تقريبا نص ساعة وطلعنه هو ما يقبل اضل هوايه لان يخاف عليه وعلى عيوني عيوني مو زين عليهن البجي والحرگه العصب يتلف...

رجعنه للبيت لكينه ماما رضيه هناك واصله قبلنه هي وخالتي صبريه احنه وصلنه تقريبا بالوحده هو جاب النه غدا من المطعم صلينه وتغدينه ونطكها نومه منا الأذان المغرب...

كعدت صليت المغرب وسويت عشا لكيت خاله صبريه وماما رضيه ديتعاركن

اجيت كتلهن...شكو شكو شصاير

ردت رضيه بعصبية...صبريه ما تستحي كابله وبزه بعينه تحجي على جاسر كدامي ما يستاهل جكليته وما يستاهلها شبي ما يستاهلج مسويلج شي هو شو مدللها والله

صبريه ردت عليها...انه ما احبه من الله وجكليته تعذبت عنده عود ليش ما خلاها تجي ويانه للنجف ليش هو جابها...

ردت رضيه...يخاف عليها تتعب وجابها خصوصي

صبريه بتهجم واستنكار...جذب رياء شوف شعنده من سالفه ليكون يغار من ابن اختي جويبر ابو المتعه

جاوبتها...يااا خاله صدك جذب شنو يغار من جابر بس هو كال تتعبين وياهم وهم ما يمرون على ابوج عاد اني اخذج لابوج

صبريه...اني ضجت من شفتج انتي هم ضجتي من رحنه وانتي لا

رديت عليها...مو عبالي مياخذنه بعدها اخذنه وزرنه وكولش ارتاحيت وجان حباب

فرت شفايفها ما راضيه..امم حباب انوب

ضحكت وكعدت يمها حضنتها وبستها ...خاله حبيبتي انتي والله زين ويايه مو مثل قبل ويحبني حيل وانتي هماتين يحبج

ردت عليه...ما اريده يحبني بس كون انتي مرتاحه وياه ويحبج هذا الشي كافي

ابتسمت...والله يحبني

بعدها تعشينه وهي الصبح راحت على بيتها واني ضليت اقره نظمت وقتي صرت اهتم بدروسي وافتح اليوتيوب واطلع اساتذه خصوصيين وادرس عليهم كولش افتهمت والمواد سهلة عليه ضغطت على نفسي حيل بالدراسة...

جنت اخابر امي بين فتره وفتره بس مو كدامه ابد ما اتصل بيها كدامه ما اعرف جنت اخاف من ردة فعلة او يسمع كلام وتصير مشكله لذلك جنت اخابرها بس من هو مموجود...

جنت اتمنى يحجي ويه امي ويصالحها وتقوه علاقته بيها حتى مرات ابجي لان مبتعد عن امي لذلك جنت اني فاقده الامل ان اني اشوفها والتقي بيها من جديد وضاله بس على الموبايل افتح كاميرا وياها واحجي وياها ابجي وهي تسكتني وتصبر عليه ومن احس بي اجه اطفي الموبايل

هو يعرف بيه اني اتصل بامي ومغلس ما يحجي ولا فد يوم سألني ولا فد يوم كال انتي متواصله ويه امج بس اني اتجنب المشاكل...وكل يوم أدعي ربي يحنن قلبه على امي اريده ترجع علاقته بيها مثل قبل شلون جان يحبها ويحترمها وهي تموت عليه من تشوفه تفرح وتحتار شتسوي ومتباهيه بيه هو نسيبها بس بعد شسوي الموقف الي صار بعدهم الف متر عنه

جانت من توكف بصفه احسها عبالك امه مو امي شلون هيج تباوعله عبالك هلال العيد ودكول دائما جولييت زوجها خوش إنسان ولايگ عليها هو هذا الي يلوگ الجولييت وحلاتها

هذا الموضوع حيل مأثر بيه واريده يتصالح ويه امي وما يدخلها بمشكلة اخواني هي خالته وهو ابن اختها وتحبه حيل محلو اشوفهم هيج واحد ما اله علاقه بالثاني...

حاولت حاولت ما كدرت يعني ما حجيت وياه مباشرة بس لا جنت المح اله وشفت الموضوع عقيم وياه ماكو امل للصلح...

مرة الايام اني اقره وهو وقت فارغه ما يخلي الجهال يمي ياخذهم ويطلع بيهم حتى اكدر اكمل باقي دروسي جنت حيل متوتره وخايفه ان اني ما اتاهل للفاينل...

بيوم اول يوم امتحان ما جنت اندل المدرسه إلي امتحن بيها لذلك كال اني اخذج وإذا صادف عندي دوام خلي رضيه هي تاخذج..

كعدت الصبح صليت ودعيت ربي يوفقني للامتحان خليته نايم كلت بين ما اراجع الامتحان وابدل ملابسي ..امتحانه جان الساعه بالوحده الضهر بس اني حضرت نفسي من وكت

لبست صدريه سوده جنت حيل متحمسه للصدريه وحابتها ولبست قميص ابيض وشال اسود لبست ساعتي جنت اباوع لنفسي للمرايه واعدل بساعه واني مبتسمه وفرحانه بشكلي رغم خوفي من الإمتحان

كعد هو كوة فاتح عيونه قلص عيونه باوعلي بعدها صحح من نومته ابتسمت كتله...صباح الخير حبيبي

صفن بوجهي وتنهد بعمق كال...يا صباح هذا وانتي شگيتي گلبي شگ بهالطلاله البريئة

لزمت طرف الصدريه بحماس وافتريت ...حلوه

عض شفته...شنو حلوه كاسره الطالبات كسر عمي اني فد واحد اثول شلون قبلت اخليج تكملين دراسه والله ما اعرف انتي لازم اخليج بگلبي واقفل عليج ما اخلي احد يشوفج غيري

ضحكت..ههههه لا هذا يسمو تملك واناني

غمزلي...واني متملك واناني

ابتسمت...لا لا حباب

راح غسل ورجع عليه احتضن خصري كال..مو من حق الحبيب ان يعيش بحضن محبوبه

حطيت ايدي على صدره العاري وجاوبته بتشرد...لا مو من حقه لان محبوبه عنده امتحان ويريد يركز

رفع حاجب..افااا الدراسه صارت اهم من المحبوب ؟

جاوبت باستنكار...لا لا شوف هو من حقك تعيش بحضني الصغير الي مو على كدك ههههههههههه بس يعني عندي امتحان راعي شعوري حباب لا تدوخني بكلامك وتخليني اكتب عنك بالامتحان بدل ما اكتب الماده الحافظتها هههه

جر نفس...ما ادري الزي المدرسي عذبني يعني حقه عاصم يبطلج من المدرسه رغم اكرهه وابغضه بس بصراحه هاي اول مره اتفق وياه بشغله

رفعت حاجب...اهااا هسه صرت ويه عاصم ضدي بسبب الصدريه

احتضن خصري وباس طرف شفتي همس عندي بحب ورومانسيه ذوبت قلبي كال...تخبل عليج

ابتسمت...هسه انت ما تنغري بالملابس لمشلتحه انغريت بالصدريه

عض خدي وابتعدت...شكلج بيها بريئ احلى من الف لبسه مغريه عبالك طفله عندها إمتحان يعني هيج هواي عليه انتي و ولدج طلاب واني گلبي موجر من الجمال الانتم بي

ضحكت..ههههههههههه تتغزل بينه اليوم شعندك ابو مرتضى كول

باوع للساعه كال...بيش الساعه الإمتحان

جاوبته...بالوحده الضهر

لزم اكتافي وقربني عليه...اهااا بعد وكت تعالي ادرسج درس منحرف

كمزت من مكاني.  لا لا لا مو وكت دراستك المنحرفة تعرف شلون لان اني حاليا متوتره وبالي كله عند الإمتحان

عقد حواجبه...زين مشتاقلج شلون

عدلت ساعتي بدلع...عود من ارجع نسولف بموضوع اشتياقك

ضحك..تذكرين من جنت قبل بكلمة مني انتي مسلمه الأول والتالي وهسه صايره تتدلعين عليه صدك نسوان ما تجن غير بالعين الحمره

حطيت ايدي على صدره بحزن مصطنع...اي جنت مجرم واخاف منك بس هسه انت تحبني اكيد ما تاذيني مو صح

جر نفس وزفره...لا عاد بعد بيه خيط خبال بس المشكلة ما احب اضوجج مثل قبل لان تربعتي هنا بعرش گلبي

ابتسمت واحتضنت وجهه ...يعني هسه من تتعصب شسوي متتصرف مثل قبل مو

رد عليه...لا من اشوف نفسي وصلة القمة الغضب اطلع حتى ما يلوحج طشار

باوعتله بنص عين...اممم وقبل جنت من تتعارك ويايه تكعد تنكد عليه وتطلع الدنيا من عيني

ضحك...قبل وين وهسه وين قبل جنت ادور الزله عليج وهسه ابرر سلبياتج شفتي الدنيا شلون دواره

احتضنته بحب وسألته...صدك تحبني !

ابتسم ومجاوبني رفعت حاجب...هااا اشو مجاوبت سكتت احجي ليكون متحبني

رد عليه بثقه...اضوج من هذا السؤال احسه ما اله معنى يعني انتي ليش تسألين هيج سؤال وانتي تعرفين شلون اني وصلت لمرحله تخليت بيها عن الكل واحتضنتج...واختاريتج كل هذا وتجين تسأليني احبج لولا ؟

همست بعد ما ركزت بملامحها الاحبها...احب اسمعها منك

حط اديه القاسيه وسحبني من خصري الناعم كال...احبج بكد الحب..واحبج لان متلوك الغيرج هاي الكلمه احبج اكثر من الحب

تقربت منه بفرحه غامره صدري ورفعت رجليه وبسته بشفايفه بوسه عميقه استنزفت بيها كل طاقتي...

وهو ما صدك استحلني بحب ورومانسيه ابتعدت عنه همست...لنتاخر جاسر عفيه لا يفوتني الامتحان

ابتسم كال...يالله بس خليني ابدل واجيج

عفته يبدل واني رحت للصاله اخاف على الاطفال يكعدون وكعدت اىاجع بالماده وگلبي يرجف بخوف خايفه ما اتاهل الاخير السنه واني ورايه شمات ما يصدكون ارسب ...

والله خالتي ام فلاح تتمنى ارسب ودكول اصلا بوجهي ما اعتقد تنجحين هي ناس تدك ليل ونهار ومدرسين خصوصين ومدارس وهم يرسبون وهسه انتي كاعده بالبيت وساكته وجايه تردين تنجحين

عاد اني كلتلها...خاله بعد هو التوفيق من رب العالمين اذا ربي قاسم إليه انجح ان شاء الله انجح وما يضيع اليه تعب اني هماتين دا ادرس وتعبانه

لوت شفايفها كالت..اني ما راضيه عن هالدراسه بس شسوي الجاسر يكول لا جولي انضلمت عندي اريد احقق الها شي تحبه

اردفت بخبث..واني ما اشوفج انضلمتي عند ابني بالعكس مدللج دلال اصلا لو حده غيرج واخوج هيج مسوي بينه و واحد غير جاسر من زمان طلكج وطردج

احتاريت شنو ارد عليها خالتي ام فلاح عرفتها ما يصير الها جاره ابد حاقده وكارهتني بس هي لان تحب جاسر وجاسر هو الي مسيطر الها عن الوضع ساكته ومتحملتني الا لو ما جاسر من زمان طردتني بليله ضلمة...

بعد ما كمل هو اخذ سويج السياره ولكينه ماما رضيه كاعده سلمنه عليها وهي كعدت تدعي اليه وبعدها خلينه ورحنه...

وصلت للمدرسه الي عندي بيها امتحان ودخلت هو ضل منتظرني بالباب خطيه حينتظر منا لمن اطلع من الإمتحان شكد خطيه هاي هو حيل متحملني وصاير حباب بعد ما جان متوحش ههه 

تغير جاسر تغير جذري حسيته صار مثل اول ما خطبني شلون يحترمني ومقدرني ويستخطيني بس حاليا مزيد جرعة حب

والله امتحن الإمتحان الاول جانت بالنسبه اليه اسئله شبه سهلة كملت حل وضليت منتظره منا لمن سمحو اليه اطلع

طلعت لكيته بعده كاعد بالسياره ومقفلها ابتسمت وهو دار وجهه من الجام وشافني بسرعه فتح الباب من يمه وصعدت كال بلهفه...ها بشري جاوبتي

ابتسمت...اي اي جاوبت الحمد لله جان زينه

كال..اهااعفيه عليج اريدج دائما هيج تبشريني

ضحكت..هههه تتدلل

كتله صدك جاسر شغلي اغنيه اريد استمتع بالطريق ضحك ورد عليه...ادللي اشغلج سعدي الحلي لو عبد الحليم

جاوبته...لا مو ستايلي شغلي راح أسجل روحي باسمك

رد عليه بقهر...واني راح اسجل خروج من الدنيا بسبب هاي الاغنية

ضحكت بحماس..تجنن والله بيها كمية مشاعر تمثلني

حك حاجبه وتنهد...احبها اني بس من كثر ما سمعتها وحفضتها مليت

كتله..مالك شغل شغلها شغلها احبها هاي الاغنيه

رد عليه...عمي اشغلها امري لربي اكدرلج انت وجهالج

ضحكت بعد ما شغلها واني مسلطنه عليها رجعت بسرعه للبيت اخاف على الجهال وخطيه رضيه هم وحدها رغم هو كال خلينه نروح نتغده وبعدها ناخذ غده الرضيه ونروح كتله لا مااكدر...اخاف اتاخر ورضيه ما تكدر عليهم مو زين ومنها وضاله يمهم

صدك رجعت هو اذن بالطريق صلينه وكملنه وتغدينه سويت غدا اني

جاسر جان بالغرفه كلت خلي اروحله لكيته مبدل ديطلع واكف ديخلي عطر حضنته من وره وحطيت راسي على ضهره حسيت جسمه تصلب

كال...افااا جكليته حضنتني خيير بويه شكو

ابتسمت بحنين...ماكو بس مشتاقتلك

دارني عليه ولزم اديه باوع الوجهي بتمعن كال...اني هم مشتاق الج لان هاي الفتره انتي مبتعده عني حيل واني مقدر ضروفج بسبب دراستج ان شاء الله وره الإمتحانات بعد ما اهدج دوم زاعجج وياي هههه

ضحكت ولزمت ازرار قميصه..جاسر ممكن طلب

عض شفته بقهر...فد بربوك عبالي مشتاقه من صدك طلع عندج طلب مو ؟

ضحكت بصوت عالي...لا لا قبل الطلب مشتاقتلك اني

رد بسخريه..شنو الطلب بالله

جريت نفس واخذت وقتي وحجيت...اممم هااا هو يعني اريد ترجع علاقتك بأمي مثل قبل

عقد حواجبه مستغرب من كلامي...ترجع مثل قبل شلون يعني مثل قبل

كتمت انفاسي وتوترت جاوبته بحيره...هاا يعني شلون قبل ما جانت علاقتكم انت وياها تتصل بيها وتتطمن عليها وهي كذلك

تنهد بملل ورد عليه...ماكو داعي لهذا الموضوع جولييت

جاوبته بحزن...بس اني اتمنى هيج يصير

رد عليه...اكو هوايه شغلات تحز بالخاطر هي مخفيه عنج وما اريد احجي بيها واجرحج خليني بعيد عن اهلج مثل ما هم بعيدين عليه احسن هيج ما اريد اي تواصل الي وياهم يخصني

فتحت شفايفي دا احجي كتله...بس

حط ايده كدام وجهي وكطع باقي كلامي كال...سدي الموضوع

غمضت عيوني واني اصبر بنفسي وكتمت باقي كلامي

الضاهر مستحيل انجمع ويه امي اذا هو اشوفه ما راضي عن الصلح هو وياها ..

كعدت اقره والجهال تفتر على راسي كالعاده ..ماما ضربني مشمش ماما هدار عضتني ماما وماما ما طلعت ماما طلعت انتقام...

فتحت موبايلي دا اطلع دروس على اليوتيوب رحت على غير صفحه مقاطع عشوائيه هو دخل ضربني على راسي بالملزمه كال...اقري عوفي هالشغلات الي ما بيها فايده

ابتسمت...هههه انت ما تجي الا بالوقت الغلط خليني شويه ارفهه عن نفسي

كعد بصفي وحضني كال...عود من تدخلين كليه رفهي عن نفسج براحتج بس حاليا لازم تضغطين على نفسج تمام بيبي...

حطيت كتفي على ضهره واني اتدلع عليه...تمام تمام

احتضن خصري وهو يبوس بعنقي باوعتله بعد ما درت وجهي عليه...اريد اقره جاسر عوف هالشغلات

ضحك كال...شنو وحده بوحده

ضحكت...اي وحده بوحده عندك اعتراض

عض شفته بقوه وهو يدغدغ بيه ويكرص واني فحطت من الضحك والزم بيده ...جاسر لاااا ههههههههههه بطني اذتني هههه حتى نفسي انكطع

تقرب مني اكثر واخذه الواهس يريد يبوسني..هو اليوم اريد اموتج

دخلت ماما رضيه وهو كمز من مكانه وعدل نفسه بسرعه وبعدها وكف راح يرش عطر سوه نفسه يريد يطلع

واني ارتبكت كمزت اكثر من كمزته كتلها بارتباك...هااا ماما تعالي ادخلي

ردت عليه...يااا هو جاسر هنا ما ادري بي صاير سمعي ثكيل عبالي تتشاقين ويه الجهال انا اعتذر يمه

جاوبتها بعد ما بلعت ريكي...لا لا ماما عادي ماكو داعي للاعتذار فدوه الج بس بس هو جاسر جان يريد اقره ..

هو خله وطلع كال...محتاجين شي

هزيت راسي بنفي وماما رضيه كلتله...لا يمه سلامتك

طلع هو وماما رضيه ضحكت كالت...يمه وليدي مؤدب يستحي

هزيت ايدي...اي كولش ينكط ادب هههههه

ردت عليه بضحكه..ترحيله فدوه انجبي

حضنتها بحب. .ماما تحبيني لو تحبين جاسر

صفنت وجرت نفس كالت...ثنينكم نفس المعزه جاسر ابني الي ما جابته بطني وانتي كذلك اتمنى اشوفكم مرتاحين ومتصافين احسكم طالعين من بطني وكل همي تستقرون وتعيشون بسلام لان ثنينكم ما تستاهلون الصار وياكم

بستها بخدها بحب..واحنه نموت عليج وخاصه جاسر يموت عليج ودائما يمدح ويحمد بيج فعلا انتي جنتي زوجة اب صالحه الهم وانطيتي نظره عن زوجة الاب وفعلا حققتي هذا المثل مو كل اصابعنا سوه فعلا انتي تختلفين

باستني كالت...يمه جولي هو الواحد شياخذ وياه غير الكلمة الحلوه والموقف الحلو الانسان ما ياخذ بس أعماله والشر شيجيب غير النكد وطلوع الروح

جريت نفس ...اي والله ماما لهذا السبب اني حجيت ويه جاسر ردته ترجع علاقته طبيعيه ويه اخويه و ويه امي بس هو ما قبل بهذا الشي...

ردت عليه بعد ما اخذت ثواني من التفكير كالت...يمه يا جولي الصار مو شويه ويمكن صاير موقف بينه وبين امج لهذا السبب هو متشدد من ناحيتهم يمه هسه انتي مو تخابرين امج وتحجين وياها بعد ماكو داعي لجاسر يصالحهم...

جاوبتها بحزن ...ما اعرف بس بخاطري يتصالحون ويكونون مثل قبل واحسن

ردت عليه بقهر عميق...الي انكسر يا يمه يا جولي ما يتصلح ولا يرجع مثل قبل مستحيل يرجعون مثل قبل عيشي حياتج بعيد عن اهلج

صفنت بتفكير والغصه بداخلي..ماما معقوله امي رادت تجي تشوفني وجاسر منعها مني

ضحكت ...ههه لا يمه مو لهاي الدرجه ابو مرتضى قاسي

جريت نفس...ما اعرف اشو هيج حسيت

تقربت مني واخذتني باحضانها كالت...يمه لا تخلين الشيطان يوسوس الج جاسر يحبج وما يحرمج من امج انتي بس ابعدي عن الشك...

حاولت اتغاضى عن الموضوع وفعلا تغاضيت وبديت بالامتحانات ومرة الايام طبيعيه

باخر يوم الإمتحان صار عندي صداع فضيع ورجليه اذتني من رجعت رجعت تعبانه سبحت ولفيت راسي ونمت هو جان مموجود والاطفال يم ماما رضيه بس هدار نومتها بصفي لان اخاف عليها

اجه باليل كعدني كال...جولييت اكعدي شنو سالفتج صار ساعتين من اجيت وانتي نايمه وامي رضيه دكول من اول ما اجت وهي نايمه

فركت راسي بوجع...والله يا جاسر ما اعرف شنو اكولك بس راسي دياذيني حيل

حط ايده على رقبتي حسيت بقشعريره من برودة ايده كال...شنو هاي شو انتي مسخنه صايره نار امشي حضري نفسج اخذج للمضمد او للمستشفى

لزمت ايده بتوسل...لا فدوه جاسر ما بيه اوكف على رجليه ما اكدر امشي

رد عليه بحزم...لا تخافين اني ابدلج واشيلج

كحيت بصعوبه...لا لتخاف يمكن ماخذه شويه برد هاي البارحه باليل سبحت وطلعت برا بالحديقه وجان الجو بارد..احس عندي انفلونزا داخليه

رد عليه ...دكليلج فد شي حتى انطيج علاج مال التهابات...

وكفت بس دا احس مختنكه وما اكدر اوكف على طولي حسيت دا اوكع لزمت ايده بتعب وخنكه ...جاسر لا تعوفني

تقرب مني وحضني كال...شبيج بابا تعالي بالله دشوف شبيج

كعدني على القنفه ولزم ايدي جانت حاره والسعال زاد عندي

بعدها شالني خلاني بالحمام وسند ضهري بصدره و وجهي للمغسله غسلي وطلعني نشف وجهي بالمنشفه واديه جنت عبالك طفله كدامه

نومني على السرير وغطاني طلع شويه اتاخر وبعدها اجه جايب لفه وبيبسي اكلت شويه وشربني علاج

نمت بسرعه غفيت عبالك شربت منوم بس راسي احسه نار ورجليه وضهري موتني عبالك مثل المره الي نازفه ومسقطه طفل من غير الخنكه

كعدت تقريبا الفجر ضليت ابجي واني امسح على صدري واخفف الضيق عني

شفته نايم يمي ومكتف اديه ومرتضى ومجتبى نايمين بمكانهم وهدار بكاروكها...

هزيته وهو نايم همست بتعب...جاسر جاااسر كعد حموت والله مدري شبيه

فتح عيونه بذبول وعقد حاجبه كال...هااا حبيبتي شبيج بيج شي

كحيت حيل ولزمت صدري...ما ادري جاسر مختنكه حيل طلعني شويه للحديقه خلينا نطلع بره

سحب الجاكيت مالته ولبسه لان جان الجو بارد وكف ولبسني الروب مالتي جان ثخين ويدفي لبسنياه وطلعنه...جان لازمني ويتجيلي لان مدا اكدر امشي ما اعرف شبيه

كعدنه على الكراسي بالحديقه وهو لزم ايدي يدفيها كال...شنو شبيج ما دكليلي وضعج مو طببعي

كحيت بصعوبه...مختنكه احس شي خانكني وهم احس عندي انفلونزا

عقد حواجبه ورد عليه....الصبح نروح للمستشفى اخاف كورونا

اتخضيت من مكاني واحس كلبي طفر كتله...عزاااا لا اسم الله إن شاء الله ما بيه لا كل شي ولا كورونا ما بيه حيل اتمرض واموت يمه اطفالي منو الهم

ضحك كال...شبيج بويه على كيفج كلت احتمال ما كلت اكيد وبعدين ميخالف لازم نسوي مسحه للتأكيد يعني...

جاوبته بخوف...لا لاما اروح اخذ علاج واطيب اني دائما من اتمرض هيج يصير بيه ومن اخذ علاج اطيب ...

حضني بحب كال...يومين اذا مصرتي زينه اخذج نسوي مسحه

استسلمت للامر الواقع ومرة اليومين وحالتي ساءت بالزايد صرت اوكف و اوكع...

بس رغم كل هذا اني اشتغل وماما رضيه متقبل كنت دا اسوي مرك دجاج فدا اخلي،بهارات اني بيه طبع احب اشتم البهارات قبل لا استخدمها احب ريحة البهارات فشتميتها ماكو مدا احس اكو فد ريحه بيهن

استغربت بصراحه كلت يمكن لان قديمه راحت ريحتها دا احس اشم تراب مو بهارات

رحت على ماما رضيه كلتلها...ماما تشمين هاي البهارات اشو ما بيها ريحه

اشتمتها وعطست كالت...يااا يمه ريحتها خنكتني صدك تحجين شلون ما بيها

استغربت حالتي وضليت متوتره من غير الوجع الي اجتاحني حتى ما اكدر امشي وراسي يوجعني واحتقان بحنجرتي كلت يمكن لان مريضه

بعد ما كملت الغدا هو اجه من شغله طلعت لكيت ماما ترش ديتول تخاف من كورونا هماتين رجعت استغربت مشميت ريحته معقوله اكسباير رغم هذا الديتول حيل قوي...

ويه ما دا افكر حسيت بغشاء على عيوني و وكعت من طولي ما حسيت بنفسي الا بالمستشفى

فتحت عيوني بغواش وعيوني مدمعه شفت جاسر واكف على راسي كال بلهفه...هااا جولي هااا شبيج بشريني

سعلت بصعوبه كتله ...ما ادري احس نفسي تعبانه اريد اموت

لزم ايدي وباسها كال...اسم الله عليج من الموت لا تخافين ما بيج شي ان شاء الله

كعدنه شويه وبعدها اجت الممرضه كالتله اذا يكدر ياخذني نسوي مسحه انصدمت وخفت بوقتها حيل لزمت ايده بخوف..لا جاسر ما اروح شنو مسحه اني عندي غده لان اختنك

ابتسم على كلامي ومسح خدي كال...لا حبيبتي مو غده هاي خنكه احتمال من كورونا

مشيت وياه واني خايفه لمركز كورونا صاحبو باسمي دخلو بخشمي مثل الأنبوبة حسيتها وصلت العيني صرخت بصوت ولزمت ايد الدكتور كال الدكتور...على كيفج استرخي استرخي..

هو لزمني بخوف ورد على الدكتور...على كيفك يمعود هو هيج متشوفها متاذيه وين تتحمل تدخل هذا بخشمها

رد عليه الدكتور..شسوي لعد غير هي هاي المسحه

بعد ما كمل انطانه موعد للاستلام يا اما سلبي او ايجابي...

بعدها كال خليني اخذج المركز كورونا بشارع فلسطين حتى اسويلج مفراس لان المفراس اضبط ويطلع بسرعه ...

رحنه بعد ما خلصنه يوم كامل خارج البيت جان كل شويه يخابر على ماما رضيه وتطمنه على الاطفال

وصلنه واني حيل تعبانه حتى ما اكدر اكعد حطيت راسي على كتفه وهو حط ايده جوه حنجي همس الي بحنيه...هااا جولييت هاا شبيج

همست بتعب...نعست

حضني واحنه منتظرين النتيجه تطلع مالت المفراس وجنت لابسه كمامه ولابسه حتى كفوف وهو كذلك وجان شويه الجو بارد صاح باسمي الدكتور وخلينه ورحنه للدكتور الي هو اختصاص بكورونا شاف المفراس كال..مصابه واصابتها نازله للرئه بنسبة خمسين بالميه لازم تنومها مستشفى وشدولها اوكسجين حتى ما ينزل الاوكسجين عندها ونفقدها

هو تخبل واني احس نفسي بصدمه بعدها تخربطت احوالي حجزلي سويت كامل بالمستشفى مستشفى اهلي بس جانت الدمعه بعيني على اطفالي توقعت الموت بكل لحظه لان حالتي سيئه لدرجه

نمت بالمستشفى وهو ويايه بعدها صرت افقد ما احس على نفسي وما اعرف بحالتي شنو اكعد وانام الكاه ويايه ما يتركني واني ما اقبل لان خطيه اخاف عليه...

سمعت الدكتور يكوله...ما اعرف شكولك بس هي مجاي تستجيب و خايفين اوكسجينها يصفر يعني احنه مجاي نوخر الاوكسجين منها وتسهلك هوايه قنينات بس للاسف مجاي نشوف نتيجه...

رجف جسمي من كلامه جنت بين الوعي ولا وعي وبعد ما شفته

..........

جاسر..

مشاعر جامده واهات اخترقت الروح وكأن گلبي اختنگ وانعصر واني اواجهه ازمة مرضها جنت غرگان ببحور من الألم والوجع عليها

مشهد مقتل بنتي يتجسد كدامي بجولييت اشوفها المرض استفحل على جسمها وكأن راح افقدها كرهت كل لحظه مرة عليه بهذا اليوم حسيت انفاسي استنزفت طاقتها

مراح اسامحها اذا عافتني واني الي اختاريتها من بين الف وحده مستحيل اسامحها بدينا بالطريق سوه اني وياها تحملنا كل شي صرنه دوا واحد للثاني حبيتها وتعلقت بيها

الحياة مو كله احبج وحبيبتي وعمري لا هذا ملل جولييت انطت الحياتي أكشن اثاره متعه شي حلو ما اعرف شلون اوصفه حيرتني واحتاريت بوصفها صرت كل يوم اريد اكتشف هي شنو ليش جاي اتعلق بيها ليش احس نفسي مقيد كدامها

وكعتني ودمرتني خلتني بس الها بدون ما تسوي شي حبيتها بخفت دمها وبثكلها باهتمامها كسبت عاطفتي وخوفي وغيرتي...اييي وكعتني !

تسويلي واهس وترجع تاخذه مني وترجع تسويلي واهس بنظراتها بكل شي تخليني اريد اعرف شنو سرها تخليني اتعلق اكثر واكثر مو كله حب حب لا علاقتنا جانت بيها شغف وموضوع مهم

وصلت المرحله من الجنون من اول يوم زواجي منها من نزعت بدلتها ولبست الروب الابيض الي هي زادته رونق وجمال بيومها سوت بداخلي مجزره انتصرت هي وكل الي صادفتهم بحياتي صاروا ضحايا

جمالها خجلها اناقتها طفولتها مثل الملائكه مثل قطعة السكر وجنت اجزم ان هاي الانسانه من الملائكه رقيقه مثل الفراشات مذهله مغريه ميزتها عن الكل جانت اول هزيمه اليه واني اشوفها بالثوب الأبيض جانت مثل القمر لهاي الدرجه حلوه بس بعيييده عني

واني جنت باني حواجز بينه ما اريد اتقرب منها لان اعرف بقبلة وحده منها اهدم كل الحواجز...

باول ليلة عرسنا تركتها وطلعت واني اتجول بشوارع بغداد وطيفها لحد الان مسيطر على مخيلتي طردتها من تفكيري من خيالي

نهرت نفسي بغضب جاسر لا تحبها انت عندك من ملكت قلبك لا تصير جشع وتحاول وياها بعدها طفله احميها ولا تدور وياها حقوق وحضن ومشاعر...

جنت محتار وملخبط بمشاعري بين الي اريد ارجع الها وبين الي اريد ابتعد عنها

طولت واني بالشارع بيومها خابرت على جابر اجاني جان ما شايفها ولا يعرف عنها شي ولا مصادفها من شافني ضحك كال...لك هاي شنو عريسنا عايف مرتك وجاي هنا شسوي انوب مخابرني صدك مو وجهه نعمه ههه

ابتسمت على كلامه ورديت عليه..يمعود عروستيش لو تشوفها دكول طفل حتى استحي احاجيها احس نفسي نذل جشع

ضحك كال..ليش يابه يكولون عروستك حلوه توقعنا بعد ما نشوفك من تشوفها

رديت عليه...ممكن تاكل تبن اگله هيج يگول هيج

تنهد وحط ايده على كتفي كال..ادري شبيك شكو

جريت نفس عميق وزفرته جاوبته بملل...ما ادري ما اعرف شحس احس تعبان

رد عليه..بعدها شام تحوم عليك مو

جاوبته بعدم مبالاة...مو بس شام بس البنيه صغيره ما ادري اشوف بيها غزل احسها بريئه زياده عن اللزوم واني مو مال هيج وحده اخاف اتعصب عليها ااذيها اجرحها ما اعرف احسها مو كد المسؤؤليه ولا تكدر الي

جر نفس وجاوبني بعد مافتح باب السيارة...ارجع العروستك يابه والوقت كفيل بكل شي يمكن تطلع ناضجه فكريا شمدريك قابل معاشرها...

ركبت السياره ورجعت للبيت جانت كل مشكلة تصير وياي افضفض بيها الجابر هو اخوي وصديقي ولا جنت اتوقع بيوم من الايام يهرب جولييت ولا جنت اتوقع يخوني ويضمها عني اشهر ابد ما جنت متوقع منه

قبل جنت اسولف اله عن جولييت وعن كل مشاعري وبعد ما هزمها وظم الموضوع عني صرت اتحسس منه وما احجيله...

رجعت الها بيومها فاتح الرباط وحالتي حاله ما دخلت الها رحت لامي رضيه لان غزوله نايمه عندها ..

لكيتها منومه غزل بحضنها اسرني منظرها طفلتي الحلوه احبها بجنون جانت تخصني اكثر شي احبها  علاقتي بيها مو بس علاقة اب وبنته جانت عبالك صديقتي اختي وبنتي حتى مرات اكعدها من نومها العب وياها وضمها الصدري وهاي اول ليلة تنام بعيده عني انقهرت بيومها وكلت لنفسي محد ياخذ مكانها لا جولي ولا الف من جولي

بستها وعدلت ضفيرتها كعدت امي رضيه كالت...هااا يمه وين جنت صدك تحجي انت عايف عروستك وطالع مو عيب منها ومن امها شكد خجلنا من وراك

جاوبتها بتشرد .عندي شغل ورحت وشغل مهم ولا تسألين شنو لان انتي تعرفين طبيعة شغلي

كالت...ادري يمه بس معقولة شغلك اهم من مرتك

صفنت بذهول ...مرتي !!!

ردت عليه...اي مرتك يمه جاسر بعد انت تزوجت عوف شام يمكن ماتت انساها صار سنين من اختفت يمه كافي تفكر بيها شذنب البنيه الي تزوجتها وانت عقلك عند غيرها

تنهدت...سدي الموضوع يمه

كالت..خطيه البنيه انخطف لونها من درت بيك عايفها وراحت وحتى ما تعشت وشفت الحزن بعيونها

ما اعرف شصار بيه من كالت هيج وكفت كلتلها...جان كلتولها عنده شغل وطمنتوها

ردت عليه بلوم ...يمه شغليش بيوم عرسك

تنهد وسحبت نفس عميق وساقني رجليه الها بعد ما وصيت امي على غزل

حطيت ايدي على مقبض الباب ترددت ثواني ما اعرف شنو الي صار بيه حسيت نفسي جاي أواجه جبل مو هاي البنيه المراهقه...لأول مره احس بعجز واني اقابل شخص متوتر الى ابعد حد

شجعت نفسي ودخلت عليها لكيتها نايمه ومتكوره على نفسها لازمه الكنلكس بيدها وتبجي خطفت گلبي بيومها

من حست بوجودي بسرعه كعدت وفزت من مكانها وهي تغطي الاجزاء المكشوفه من جسمها نزلت راسها بخجل دخلني بدوامه من المشاعر والانهيارات

ما عرفت شلون اتصرف العجز قيدني شجعت نفسي كلتلها...تعشيتي

ردت عليه بنبره اقرب للهمس كالت...لا ما اريد

تنفست بهدوء...زين ليش ما تردين

حطت اديها على وجهها وبجت بصوت مسموع...اريد ارجع لاهلي ما اريدك

بهالاثناء ما اعرف شعوري شنو اضحك انقهر طفله لابعد حد ضحكت وتقربت منها حطيت ايدي على كتفها فزت بسرعه وابتعدت عني

همست ..شبيج ليش خفتي

كالت بحزن مبين على ملامحها...انت متحبني اني اعرف

استغربت..شلون تعرفين

مسحت دموعها وبلعت غصتها..لان انت عفتني وطلعت وسمعت يكولن ما يحبها لهذا السبب عافها

رفعت حاجب مستنكر هذا الشي...منو گال

ردت عليه بغباء...شسمها م..اء لا لا ميصير احجي ماما كالت عيب توصلين كلام الزوجج وتنافقين اني مو منافقه

ضحكت...ههه لا مو منافقه بس اريد اعرف من كال هيج

جاوبتني بدلع رباني نابع من روحها...هن كالن كلهن كالن ما يصير يعوف زوجته ويطلع معقوله ما يحبها...

رجعت سالتني بترقب...انت صدك ما تحبني ؟

جاوبتها بهدوء..شلون ما احبج لو ما احبج ما اتزوجج

نزلت عيونها بخجل...اني هم كلت هيج وماما هماتين كالت الي لو ميحبج ما يتزوجج

صفنت بملامحها واثارتها بلعت ريكي واني اصارع مشاعري نقيه يخدشها ريش النعام ما اتخيل نفسي بيوم من الايام ااذيها هذا جان احساسي ناحيتها وشعوري تجاهها

بس للاسف كل شي أتغير وكل شي صار ضدي القدر اله كلمته وانكسرت كلمتي صرت الها كاسر اذيتها من بعد موت غزل جرمت بحقها بس خلال هاي الفتره تعلقت بيها هواي جنيت عليها...

جنت اناني تماديت وياها هواي و رغم توسلاتها قتلت عاصم ومن شفت انهيارها وكرهها اليه وجفاها عليه تمنيت لو ما قتلته ناقضت نفسي صرت اتمنى عدوي حي يرزق لخاطرها مو لخاطر شي ثاني شفتها ذبلت ماتت وهي عايشه تاذيت بوقتها شفتها تموت يوم عن يوم ...

وحتى من طلع عاصم عايش صح تعصبت بس بعدها تقبلت الامر الواقع كلت طز بعاصم واصله المهم ام مرتضى راضيه صارت ام مرتضى بعد ما جانت طفله تعاني بحضني ...

اسما انواع الحب من حبيتها رغم كل الظروف الحاوطتنا ما ردتها الاطفالها ردتها الي اني ما همني شي غيرها هي وغير نفسي حبيتها وصرت اناني ومهووس وادمنتها

وحتى من تركتها تروح البيت عمها جنت متأكد راح ترجع بس خفت ان يكون اخر لقاء رغم اعرف ترجع جنت متوتر وكتبت رسالتي الها كلت اخاف كل شي يصير يجوز من تقره الرساله ترجعلي لان فعلا ادمنتها ادمنت حبها لطافتها حتى عصبيتها ولسانها اللاذع بأغلب الاوقات

وصلت الها للمستشفى حجزت الها سويت خاص بمستسفى بالكاظميه وكادر خاص يعاين حالتها بس جانت تنتكس حالتها ما تتحسن وهذا الي اذاني ينزل الاوكسجين وفقدت مره او مرتين...

الدكتور ما قبل ادخل الها بس اني مو شرط اخذ كلام الدكتور سلامتي من سلامتها شفت الاوكسجين لحد الان بخشمها ما شالو من تقريبا يوم كامل...

كعدت يمها لزمت ايدها بحب حجيت وياها بهدوء تام...جولييت حبيبتي عمري اكعدي اني اجيت

فتحت عيونها بذبول والدمعه لازكة باهدابها سحبت الاوكسجين من خشمها وردت عليه بتعب...اجيت وين جنت

عصرت ايدها الي مثلجه ...موجود ما رحت بس زرت الامام الكاظم علية السلام واجيتج ودعيتلج

ردت بغصه...مختنكه احس واحد يخنك بيه جاسر اني حموت مو وتدفنوني بعيد حتى مو بالنجف مدري وين يدفنوني يمكن بسعوديه

حطيت الأوكسجين على خشمها وهمست....اشش لا تحجين هذا الكلام ازعل منج ما تموتين وبعدين شوداج للسعوديه

رجعت شالت الاوكسجين كالت...انت ليش دخلت ما تخاف تنصاب متخاف على نفسك

فركت اديه باديها وتقربت منها بست شفايفها...شفايتلي لو دائج يصير بيه حتى كورونا منج عسل

جولييت ...

انتكاسه فضيعه مريت بيها اني اتاكدت العدوه انتقلت الي من المدرسه بعد ما أديت امتحانات الوزاري للخارجي لان وراها بأيام اني وكعت مريضه

من نمت مستشفى روحي هايمه عند اطفالي ما اكدر افاركهم وتذكرت امي بكل لحظه تمر عليه تمنيت لو امي موجوده عندي من بين كل ذرة هوا استنشقها واختنك بيها احس بحاجتي الها وياليت اشوفها واموت...

جنت افقد الوعي واهلوس من اكعد هو يگولي هلوستي هواي اليوم يا جولي واني ابتسم ما عندي طاقه للرد

كعدت بتعب وهو ساعدني حجيت بصوت تعبان...شلونك

رد عليه بحب...اني زين انتي شلونج طمنيني

تنهدت وجاوبته...زينه الحمد لله

كال..هواي هلوستي اليوم وسخنتي بس الحمد لله نزلت حرارتج احسن من قبل

بلعت ريكي الجاف بغصه...الجهال شلونهم لا تروح الهم ولا تحضنهم اخاف انوب انت ملامس وتعديهم

كرص خدي بحب كال...لا ما رحت بس اخابرهم ويسلمون عليج ويالله ترا طولتي هنا صار عشرة ايام بابا لازم تصيرين زينه حتى شنو تكملين قراءة وتنجحين وادخلج ارقى كليه حتى لو على حسابي

ابتسمت على كلامه...صدك يعني اذا مطلعت معدل تدخلني جامعه اهليه وتدفع قسط

رد عليه...اي المهم تصيرين زينه وتطيبين وبعدها كل شي يهون ادخلج بارقى جامعه واحسن قسم تدللين جكليتي

همست بفرحه...يارب اطيب تحمست ههه

باس خدي وتقرب لشفايفي غطيت وجهي ومنعته واني منزعجه من اهماله لنفسه...انت لا تبوس بيه ترا هذا مرض معدي لا تنصاب منو يداريك اني مريضه

ضحك ورد عليه...عندي مناعه وبوستج اصلا مناعه

جاوبته بعناد...ما ما هسه تتمرض

رد عليه برومانسيه...خليني اتمرض ونعيش اني وياج حياة مريضه مليئه بالديتول

ضحكت...لا تضحكني ما اكدر ههه جسمي يوجعني مفاصلي كلها تاذيني

تنهد ومسح على شعري كال..قبل شويه اجه عمي عكاب وجابر وجعفر وصلاح وامي وصبريه وامي رضيه بس ما خليتهم يدخلون والدكتور هم مقبل هم ما اريد الناس تنصاب بسببي

جاوبته...اي زين تسوي

اردف بتنهيده..انوب جعفر لزك اله يدخل عليج يكول اني مصاب وماخذ لقاح بعد ما انصاب لطش لطش واني ما خليته نرفزني كتله تروح لا اكتلك بنص المستشفى

ابتسمت باسف...ليش محاربه انت بس تكتل بيه

كال...تدرين شيكول يكول صاير حنين على جولي هو اصلا اكثر ثنين شبعو كتل منك اني وجولي

ضحكت من قلب...هههه اي والله الرجال ممجذب

كال..بس بصراحه من جنت اكتلكم جنتو مستاهلينها

رفعت حاجب...لا والله

ضحك...لا بس جعفر انتي لا متستاهلين

صفنت عليه ثواني واشياء تهشم بصدري وجسمي احس شي يكرص بيه سكتت مجاوبته

هو عرف لحد الان حالتي تسيء كال ..جولييت شنو حابه احقق الج

رديت عليه...اريدك تتصالح ويه امي

حسيته انصدم ومثل الي تفاجئ سكت مجاوبني وبعد ما اجه الدكتور انطاني ابر بالمغذي وعلاج وطلع على اثرها نمت....

...........

جاسر...

اجيتها باشتاتي وجمعتهن ما اريد اضيعها واشتتها من جديد ما اعرف شصار بيه من طلبت مني اتصالح ويه امها

ما عندي شي ويه خالتي احترمها واحبها بس صار موقف بينه بسبب هاله خلاني اكرهها لان جانت جولييت بي مضلومه عاد حقدت عليها بطبعي احقد بس اذا احب اتملك

حتى لو كل شي صار بيني وبين خالتي الخاطر جولييت اني تخليت عن كل صفه تعبانه بيه جنت متمسك بيها احسها ضلع بيمني الله خلقه

قررت اخابر خالتي كدامها واتنازل عن هواي امور صارت قبل وياي بس المهم جولييت تصحى وتكون بخير يعني اني حاليا لا ليلي ليل ولا نهاري نهار وصلت مرحله من القلق حتى ما اكدر اغمض وانام اخاف يصير عليها شي

رقمها خالتي عندي لان جولييت ما شاء الله عندها غباء مرات يركبها تتصل من موبايلي وتحذف الرقم بس ما تحذف المكالمات فحفظته عندي

رجعت الها للغرفه واني مقرر قراري ومتحدي نفسي شفتها نايمه بريئة لطيفه عبالك بوكس مال ورود من رقة بهائها ونعومتها...

عيونها حلوه بحيث مرات احس الثمانيه وعشرين حرف تعجز عن وصف عيونها وجمالهن يمكن ابالغ بس عادي حتى لو بالغت وصف المحبوب قابل للمبالغه

رجعتله انتظرت تكعد واني صافن عليها صفنت على نفسي واخذتني الذكريات الاتعس الحالات جولييت جانت تتوسلك يا جاسر ليش ضلمتها...محبوبتك مريضه وضميرك مانبك عليها حرگة گلبها اكثر من مره واستفزيتها

بس اني من جنت اقسي عليها السبب ما اريدها تنتمي لحضن الشيطان الي هو عاصم جنت اريدها تنتمي الحضني وما الها مهرب غيري تنهزم مني واليه ما الها مكان غير حضني...

دائما جانت تكول الي انت مثل العراق رغم الدمار والخراب الي بي بس ما نكدر نعيش الا على ترابه واني كذلك اني الشعب وانت الوطن وما اكدر اعيش الا على ارضك

جانت ناعمه مثل السحاب وشامخه مثل النخل وعاصفه مثل الهبوب وبريئة مثل الطفل...

عيونها مثل البحر واني سفني غركانه بيها...

تنهدت وطلعت منها صاير مجنون ورب مال جنون تعديت الحب و وصلت الحد الهيام والهذيان بيها...

خابرت على امها انصدمت اول ما سعمت صوتي وتفاجئت مني بعدها حجيت الها عن جولي ان هي مريضه وامها تخبلت عليها ضلت تبجي واعتذرت مني كالت..والله انت مثل غلاة جولييت عندي يا ابو مرتضى اتمنى اجي وادخل بيتك احضن بنتي واحضن احفادي بس اخاف منك تمرمر بنيتي وما تقبل اقابلها

تنهدت ورديت عليها...لا يا ام جولييت تجين واخليج على راسي تضلين ام جولييت وبيبية الجهال اهلا وسهلا بيج

بعدها كلتلها من تكعد جولييت اخليها تخابرج قفلت الخط منها ورحت سبحت وبدلت وخابرت الولد بالشغل باليل اجوني الرائد رضا ونبيل والمقدم انترس المستشفى عساكر تطمنو عني وعن حالة ام مرتضى وراحو

رجعت صعدت الها واسمع الممرضات يحجن دكلها..اكلج هذا شنو شيخ عشيره مريض وانترست الحديقه عليه عساكر

ردت عليها...لا يابه زوجة واحد من جماعتهم بس لج عيني شايله عيون تطيح بيهن الداخليه والخارجيه هههه حقها عباد الله تجي كلها

ابتسمت على كلامها ورجعت الها لكيتها هسه كاعده وتحاول تصحصح كعدت يمها واتصلت على امها فتحت كاميرا وسبيكر...

هي جانت تعبانه ومتحجي من سمعت صوت امها كالت الوو وهي فزت من مكانها و وشمرت الاوكسجين من خشمها وكأن امها هي اوكسجينها

اول ما سمعت صوت امها بجت وصرخت...ماما احلم اني لو صدك جاسر سمعت صوت امي مو

قربت الموبايل منها وخليتها شافتها حضنت الموبايل وحضنتني وياها افااا المره تخبلت صارت تحضن بدون شوف

امها نادت عليها...يمه جولي يمه يروحي على كيفج يمه لا يصير بيج شي حبيبتي طمنيني عنج بنيتي

ردت على امها وهي تبجي..زينه والله زينه من سمعت صوتج صرت بخير شلونج يمه مشتاقتلج

بجت امها وردت عليها...يا بنت گلبي يا روحي انتي ان شاء الله بنهاية سنه 2022 اجيج والله بس تتعدل الأوضاع ونكمل الاقامه اجيج يعمري انتي

ضحكت من بين دموعها وحجت برجفه...ماما هذا جاسر سلمي عليه يالله جاسر سلم على امي

جاوبتها امها بحنية...لا يمه سلمت وحجينه وتصافينا روحي وعمري انتي حجينه من الصبح لا تخافين ما بينه شي

لزمت ايدي وعصرتها بيدي وكأنها ممتنه الي عن الي سويته اليوم الخاطرها

حجت امها بحزن ودموعها تتساقط..جولي يمه اريدج تصيرين زينه ولا تخافين الخوف ينتكس من حالتج خليج قويه وفكري بيه وبزوجج واطفالج

هزت راسها مثل الطفله لامها تنصحها..اي اي والله دا احارب ومخايفه مدام انتم ويايه احبج ماما

ردت عليها..واني احبج يروح ماما

اني انطيتها الموبايل وطلعت لان ما اريد اكون متطفل خليها يمكن عندها موضوع هي وامها خلي ياخذن راحتهن..المهم الي عليه سويته

.............

اتصلت بامي وعشت وياها احلى شعور اني مو اول مره اتصل بيها بس كل مره احس فاقده لذة الاتصال وياها لان علاقتها متوتره بجاسر

بس اليوم لا احس طايره من فرحتي لان اتصالح ويه امي وهي كلتلي راح اجيج واني كتله اريد اجي وكال اهلا و سهلا بيج ام جولييت مصر يكولها ام جولييت لان هو يكرهه اخواني ومستحيل ينسبهم الامي

مو مهم عندي المهم امي بعد احجي وياها واني مو خايفه من شي وبعد ما اكل هم شلون اصالحهم الحمد لله يارب

ضليت بالمستشفى تقريبا اسبوعين كاملات وبعدها تحسنت الحمد لله صرت زينه بس عندي اعراض صارت مثل تساقط بشعري وعيوني قل نظرهم وارجع واكول الحمد لله من طلعت من هاي الأزمة سلامات

طلعت من المستشفى والتقيت باطفالي وماما رضيه جنت كولش فرحانه بيهم وفرحانه بسلامتي حتى خالتي ام فلاح خابرتني وسلمت عليه كالت ما اكدر اجي عندي سكر وجاسر ميقبل يكول اني لحد الان ملامس واخاف عليج

كلتلها..اتمنى تجين بس مدام جاسر كال هيج المهم سلامتج خاله ومشكورة على الاتصال ربي يجعلج حجه وعمره يارب

تشكرت مني وراحت وعشت حياة طبيعية الحمد لله بعد ما انصبت بس جاسر ما انصاب عنده مناعه فدوه الگلبه هههه

بديت اقره للامتحان النهائي الوزاري من قبل تلث اشهر تقريبا افتح اليوتيوب وادون المهم وباليل،من ينامون الجهال استقر اكثر وادرس بفهم وهدوء وجاسر خطيه اصلا هو يشجعني ومرات اكو شغلات ما افهمها هو يفهمني عليها ومرات احفظ القصيده واريد اراجعها هو يلزم الكتاب واني اقره اله لحد ما بدت الامتحانات واني بصراحه رغم سيطرتي على المواد بس عندي نوع من القلق والخوف وبديت امتحن يوم بعد يوم لحد ما انتظرت النتائج...

بيوم النتائج جنت خايفه حيل ومتوتره الي ابعد حد افتح الثلاجه وارجع اسدها جاسر كال جولي روحي جيبيلي محفظتي رحت جبتله عطر واجيت

كال..شنو هاي شبيج بابا شبيج منعسه كتلج المحفظه مو العطر

مديت شفايفي بزعل وقلق...اليوم النتائج وخايفه اعذرني متوتره

كرص خدودي ثنينهن ورد عليه...العمر انتي لا تخافين ان شاء الله ناجحه واضل وراج و وراج سنين طويله اذا تردين بس حتى تنجحين واشعجج لاخر يوم بعمري

ابتسمت على كلامه بلسم الي بسته بخده وابتعدت ابحث عن روابط للنتائج وبعد بفتره نزلت النتائج واني من الخوف گلبي صار ببطني من القلق والرهبه

هو جان يبحث واجوي اهله خالتي وصلاح وجعفر والبنات سلمنه عليهم وبعدها رجع يبحث بالنتائج اني مخليه اديه على عيوني ما اريد اشوف الصدمه ولا انرعب من اشوف عدد الرسوب والنجاح

وجعفر كل شويه وصفك باسف وكال لاااا مع الاسف راسبه واني عبالي صدك كل شويه واجيت اتخربط من الهبطه

جاسر رد عليه..دكافي شبيك هسه شجابك اليوم ويه النتائج حضي لو حظ جولييت

رد عليه..ما ادري بس شفت اسمها يمكن نحولت خخخخخ

هز ايده جاسر ورجع يبحث والمدارس دتنزل وطلعت نتيجتي هو قره اسمي واني غمضت عيوني،باديه وكلبي يرجف كتله...هااا جاسر

صرخ بصوت عالي وبفرحه عارمه نابعه من روحه...ناجحه جولييت ناجحه

فتحت عيوني مصدومه من الخبر ضليت اكمز بمكاني صدك ...جح جاسر صدك ناجحه بالله خلي اشوف

شفت النتيجه مكتوب ناجح فرحت حييل بيومها لزمت اطفالي ابوس بيهم واحضن بيهم وانوب حضنته حييل وبجيت بصوت وكأن هو اماني وامتناني وعبالك هو انحفر بجفني كل ما اغمض اشوفه

بعدني من صدره واحتضن وجهي مسح دموعي بحب كال..يالله كافي مبروك نجاحج يگلبي جاهدتي وتعبتي وحصلتي ثمرة تعبج

باركن الي،البنات وخالتي وماما رضيه سمعت كلمة من خالتي عكرت مزاجي كلتله بمزح مبطن بحقد...هههه هي راح تدخل كليه وانت ضل هنا نضف

عاد هو رد عليها كلها..احنه عائلة بيت اذا هي ساعدتني او اني ساعدتها ما بيها شي وبعدين واذا درست هي صار سنه تدرس مقصرت ويانه الحمد لله مريتي معدله تعرف تدبر امورها عاد انتم اهتمو بنفسكم ولا تشغلون بالكم عليه ههه

ابتسمت على كلامه وخالتي سكتت بس ضاجت من كلامه وبعدها خلت وراحت رادت تهينه بس هو ردها بقوه عبالك ما تعرف ابنها السانه متبري منه ههههه

جانت الفرحه غامرتني رغم شويه محبيت معدلي هو بالسبعينات بس جنت حاسبه غير حساب

.......

جاسر

اليوم يوم كلش مميز اليوم انخلقت روحي انخلقت من ضلعي انتسبت الي انكتب تتزوجني وتكون حبيبه اليه تكون احتلال احتلتني بكل ما بيه صرت وطن محتل وهي الاحتلال

اليوم عيد ميلادها حافظه وهي الثوله تاريخ زواجنا محافظته بس مهم المهم اني احفظ منريد نتعبها...

سوينه حفله بسيطه بعد ما ذكرتها بعيد ميلادها كالت ماما رضيه كدامي...جاسر يمه خلي نسوي مفاجأه لجولييت بعيد ميلادها..
ردت كالتلي...جولييت راح نسويلج مفاجئه بعيد ميلادج

ضحكت...غير مفاجئه هاي اذا انتي كل شويه وكلتيلها مفاجئه ههههه

جولييت..

ذكرني بعيد ميلادي جنت ناسيه ضحكنه شويه وبعدها هو جاب كيكه وشغلات تزيين سوينه حفله بسيطه على كدنه لبست فستان من فوك اسود ومن جوه احمر جان حلو عليه وحيل بسيط وشسورت شعري خليت شويه مكياج

شغلنه اغاني على اعياد الميلاد انوب شغل هو حبيبة قلبي كبرت سنه جنت اصور اني وياه واطفالي وماما رضيه حسيت بسعاده

هو لبسني الكبوس وباس خدي كال..كل عام وانتي مريتي كل عام وانتي حبيبتي وعمري احبج بكد الحب...

ابتسم وحضنته..كل عام وانت ابو جهالي وسندي من بعد رب العالمين ربي يخليك الي

طفيت شمعتي واتمنيت نعيش دوم بهذه الفرحه والجاهل مكيفين عبالك عيد ميلادهم ههههه

باليل بعد ما نامو هو جان طالع هاي وره مخلصت الحفله دا اريد انام بس خفت عليه اتاخر لذلك انتظرته اجتني رساله منه فتحتها جان مكتوب بيها....وقلت عنها في نوبة حنين :
كانت ثرثارة كالطيور السابعة،وحكيمة كشيخٍ مسن، ومريحة كصلاةٍ في جوف الليل، ودافئة كأحضان الأمهات كنت أحبها
كأنها ابنتي،وأبرها كأنها أمي وألجأ إليها كجزء مني،كضلعٍ من جنبي كان يؤلمني طوال الوقت.. ولم يهدأ إلا بها فعرفتُ أنها هي ضلعي المفقود، وبعضي التائه..كل عام وانتي مرتي ام مرتضى. 

ابتسمت وجاوبته كل عام وانت ابو جهالي وحبي الأبدي

دخل وهو بيده بوكس ضحكت من شفته و وكفت كعد يمي كال هاي هديتج بويه

ضحكت وفتحتها جان بوكس،بي مكياج كامل وبي قصاصات صغار باللون الاسود والكتابه بالابيض مكتوب بيها عمري روحي مريتي نفسي نبضي دنيتي اهاتي جنتي هوايه كلمات مكتوبه بيهن بالمية قصاصه...

والبوكس الثاني جان عباره عن ورود وبالنص قران لونه احمر ومطرز باللون الذهبي جان كولش شي راقي وحلو

وساعه وياها سوار ومحبس ذوقه حيل راقي يطبعا بعد اني ذوقه ههههههههههه

ما عندي شي اشكره بيها ولا اعرف ارد على الكلام الحلو هذا طبع بيه محلو اختصرت كل الكلام وكل الامتنان والشكر كله اختصرته ببوسه عميقه على شفايفه ورغم كل شي يكول بوساتج هادئه مو بوسات عاصفيه ...بس هاي البوسه خلتني اتيقن ان اكو شي الذ من الجكاره

كانت غبيه لا تجيد التقبيل ..كانت كقطعه أثرية ..كحلوى طرية ..اذابت انفاسي بهمسات انفاسها انها  كالخمر تسلب العقل...هكذا هي فاتنة الكاسر بإختصار..

وهو ناسي ان اني،قدمت روحي وعقلي وقلبي شكر وامتنان اله رغم الصار بحياتي بس اني مثل السلام سامحته وارتضيت...

الى جاسري...
الى ذلك الذي كان بعيدا حتى اصبح اقرب من شرياني إلي
الى ذلك الرجل الذي امتلك أيامي وحياتي قسرا حتى أملكته قلبي وعمري جهرا
أُشيح بنظري عنك فأرى عيناي تُلاحقك دوناً عني
أُبعدك عن قلبي قليلاً فأراك راسخاً به مُنغرساً فيه
قُدتَ ميادين حرب بداخلي وكُنتَ خير القادة الذين لا يرضون الا بالفوز حليفاً دائماً لهم
لغات العالم أجمع ألفت لغة عُشاق وقصائد مُحبين لكني أراها عاجزة عن وصفك عندما تقف أمامك
يا لجمال عيناكَ اللتان اذا نظرتُ لهما ينسلب كياني مني
جاسري...
يا مَن شدد الله على قلبي..بك
يا مَن عوضني الله عن تعبي..فيك
يا مَن خُلِقتُ من ضِلعه وكأنهُ خُلِقَ من شرياني
يا مَن بالرغم من كل الصِعاب وتلاعب الأقدار لم أرضى بغيرهِ فارساً لي
ولم يرضى قلبهُ بغيري عشيقةً أبدية لهُ
أُحِبُّك...

إهداء من منار

تأتي النهايه سريعا وتصل بي الى ختام روايتي التي لطالما شغلتني وعشت بين سطورها روايتي التي كانت كبغداد بعطائها وسخائها وعذابها تجولت في شوارعها وتأملتُ احزانها وانكسار أغصانها .. كانت كتابتها في غاية المتعه متمنيه ان تغذي تفكير القارئ ومفاهيمه
شكراً لكل من ساهم بنجاح الروايه اخص بالشكر صديقتي الكاتبه نورا ناصر على دعمها الدائم ومساندتي وكذلك اختي وحبيبتي متابعتي الجميله منار لمساعدتها الكبيره لي بروايتي ولولاهم لما وصلت روايتي بما هي عليه الان وكذلك الشكر موصول لجميع القُراء والمتابعين

كونوا انتم كونوا بخير
نور سمو العراق

مقتطفات من الكتاب❤️

حسابي بالانستا الي طلبوا الحساب😍