في ضريح العشق حمامه,,,,,
وئام الشيخلي,,,,,,
ديسمبر يودعنا .... 🕊️🌙✨
ومعه آخر ملامح هذا العام ...
كن بداية أقدار جميلة لا نهاية لها
وأهلا بعام جديد سعيد بإذن الله للجميع
عام_جديد_سعيد
وبعضهم ... كنسيم الورد، عالقٌ في القلب
كلما أتى المساء يأتي عطرهم بالحنين
ــــ
اسيل ـــــ
{فَإِنَّ مَعَ الْعُسْرِ يُسْراً * إِنَّ مَعَ الْعُسْرِ يُسْراً}...
الحمدلله اللي انعم علينا باليسر بعد العسر.
ورزقنا بفرحــــٓــه مابعدها فرحــــٓــه. وامي هي اللي بشرتنا بــ اجمل بشاره.
بعد ما تحولنا من بيتنا لبيت ثاني صرنا بعيدين من القال والقلت واذيتهَم رغم هذا توصلنا أخبارهم.
لان جدي ما قطع تواصلــــٓــه وياهم.
الله سبحانه وتعالى عادل وبالمرصاد للظالم . يمــــٓــهل ولايهمل ــ
واللي عرفناه ابو غدير لحد الان يعاني من الحرگ. وظروفهم من سيء إلى اسوء ومن مشڪــــٓــله لمشــــٓــڪله بسبب نفاقهم وحقدهم ڪل يوم نسمــــٓــع بمصيبـــٓــه جديده صايبتــٓــهم اللهم لا شماته.
و متأكدين انُ ابو غدير اله ايد باللي صار لــ مُــخلد ورغم زوجة منعم شهدت وقدموا دعوة من وصلت اعتبروها عدم كفاية ادله وانغلقت الدعوة اكيد كل هذا بفعل فاعل ومثل ما گال ابوها لزوجة منعم رب العالمين ضربته أقوى واوجع.
بس ما قاهرنا الا انعام اللي صرنا بعيدين عنها.
واحنا ندري شگد متٵذيه ؏ اللي صار بينا.
طبعها كتومه مثل امي تتحمل وتسكت ما تشكي او تنقل اي خبر وعرفنا شگد كتومه بعد ما طلبت من زوجها تبقى شكم يوم يمنا.
ولــما اجت عمتها ضنتها زعلانه. وصارت تتعذر وحجت اشياء احنا انصمدنا وانعام ما حاجيتها.
تتعذر وتبجي عن عمايل نرجس اللي لحد الان ما تابت و تسمع انعام كلام وتگول اهلي ما بيهم خير اخويه مو ادمي لو بيه خير جان مثل ما اني اطلگت انت هم تتطلگين. ليش باقيه معززه مڪرمه.
وهنا ياله انعام راده عليها گايله الها الحمدلله ماورثت الحقد والغدر حتى اسوي اللي سويتي.
انت مو بشر نســــٓــخة عمج وجدي بالحقد والغدر. واني لليــــٓــوم مو مستوعبه اللي صار وشلون انت گدرتي تطاوعين غدير اللي انهجم بيتها وبعدها هي هي مااتعضت وحاولتي تڪتلين انسانه بريئه ورب العالمين ردها الج والها.
وهي متهجمه ؏ انعام ولو ما ابوها داخل ؏ صوتها ولسانها الزفر. امها تگول ما اتعضت زادت مانقصت. وهاي غير مشاڪلها وي ام نورس اختها اللي من يوم المشڪله اتبرت منها.
وانعام طالبه من زوجها تسڪن وي زوجه ابوه ماتطيق البيت بوجود نرجس. وعمها موافق يگول حقها.
وبعد الظروف اللي توالت علينا ودائما مُــخلد هو اللي ياخذ الدور الأكبر بكل موقف.
بس اللي صار هاي المره الظرف
أذاه ومرت عليــــٓــه ايام كانت كلش صعبة ما نعرف شوكت يدخل من البصرة شوكت يطلع منها.
حاير بين اللي شافت الموت بعينها وبينا احنا اللي تأذينا كلنا على ؏ فراق بنت وعد غاليــــٓــه عدنا واتــــٓــعجب ؏ اللي يواسينا ويگول هي طفلة.
وما عاشت الا سنوات قليله وياڪم. ومو حاسين شنو هي بالنسبه النا. ودمار حالنا بفراڪها وبشاعــــٓــه موتتها تأذينا عليها كلنا الا امها.
امها ما ذكرتها وما اهتمت الا للعقوبات اللي كان يعاقبها بيها اخوها لدرجة كانت تگول لو مشتكين عليه وساجنيني افضل.
شبي السجن اكل ونوم ريتني هناك ولا هذا السجن والعقاب.
اما امي رغم الأذيه والقهر كانت صابرة والمرض اللي اصلاً ما تدري هي بيه بعدين درت گالت ليش تضمون عليه ماكو داعي كلشي يجي من الله انعم الله.
كانت مؤمنة بقضاء الله وقدره وصارت تتصبر وتصبرنا وتگول الله سبحانه وتعالى كاتب لهاي الطفلة تعيش هذا العمر مو اڪثر الزرع زرعه هو اللي رزقنا بيها وهو قبض روحها. .
وجدتي تحجي النا عن نرجس وتشبهها بجدي.
تگول من صارت فاطمة ام مؤيد اللي هي اول بنت اله كأنما عنده عشر بنات
ضاج وتكدر ويسب ويلعن البنات وخلـفتهن .
ومن تحجي عن مراحل حياة عمتي فاطمة تگول ما اذكر يوم حسسها هو ابوها او باسها او سألها شنو محتاجة.
الله سبحانه وتعالى انطاني قوة وحيل وصبر عليه وعلى مصايبه وصرت الهم ام وأب وعلمتهم سلمان شلون يصير سند لفاطمة وعلمت فاطمة هذا اخوها سندها وحزام ظهرها وهذا اللي زرعته بولد سلمان وحتى رقيه و رائد بعد ما امهم توفت صارو ولد سلمان إخوته وعزوته.
نرجس نفس الحالة ما يوم باست بنتها او تفقدتها.او حسستها بحنيــــٓــة ام. طايره روحها تريد ولد اللي جانت تگول بس يصير عندي اطلع بيت بوحدنا.
رغم جدتي اميه لا تقرأ ولا تكتب بس عدها حكمة عجيبة وهي تگول النا انُ الله سبحانه وتعالى يحب نونه وخلصها من هاي الام الظالمة.
وقارنت بين ام سحر وسمر اللي ربت بناتها احسن تربية وبين ام هدير وميسون اللي هملت بناتها ومااهتمت بس لنفسها .
وكل فشل بحياتهن يذبنه براسها وهن يگولن امنا السبب.
وربطت الكلام وگالت شگد. جدكم موزين بس ما خليته يأثر لا على ولدي ولا على بناتي ولا حتى على رقية ورائد من ماتت امهم اخذتهم وربيتهم وعلمتهم
اعتبرتهم احفادي اني وياقوت ربيناهم وما فرقنا بينهم.
شگد هو مو زين ما خليته يأثر بس لو اني مو زينه لو شگد ما هو زين يأثر على تربيتهم.
ولو شگد ما نريد نأثر على نرجس ما راح تتغير وراح تأثر على بتها وتسحبها من يمنا الها وتطبع بأطباعها.
ويجوز الله سبحانه وتعالى راد بهذا القدر يخلص وعد من اي رابط يربطه بنرجس.
ويخلص من شرها ما يستاهل يعيش حياته وي وحده حاقده وڪلنا ندري تحملها لخاطر من خاطر.
وان شاء الله يكتبله الأحسن.
وسبحان الله سامعه اكو انسانة تغير حياة شخص وتنتشلــــٓــه من الحزن للسعاده. بس ماشفت مثل ورود.
وبعد ما سعى مُـــخلد لزواج وعد وهو اختار اله البنيه اللي وصفها مثل اطباع امي.
دائما جنت اگول وعد ما يفرق عن باقي اخوتي ليش الله بلاه بوحدة مثل نرجس؟؟
ورود واسمها عليها شلون اوصفها هاي البنيه ما الها وصف نسمه هاديه ما الها صوت فعلاً مثل امي بــ اطباعها.
رغم صغر سنها لڪن ذڪيه واعيه وفاهمــــٓــه ومتربيــــٓــه افضل تربيــــٓــه. انتشلت وعد من حاله وغيرته إلى افضــــٓــل حال.
امي يطمئن گلبها وهي تشوف وعد مرتاح واللي مصبرها على فراگ حفيدتها دائما تشوفها بالحلم تضحك وتلعب مثل الفراشـــــٓــة وتتنفل من زهره لزهره.
اما مرضها تگول يكفيني ولدي حواليه وبخير من اشوفهم مرتاحين اني أطيب وكل مرض ما بيه.
وشگد حلو من ڰالت شوفــــٓــة مختار وحنيتــــٓــه تشفي العليل وڪملت باقي اخواني وياهم عمي رائد اللي تعتبــــٓــره واحد من ولدها.
مُــخلد اللي كان شايل هم للڪل ورغم همــــٓــومه اڪبر.
ورب العالمين جزاه عنا بــ اجمل جزاء يستحقــــٓــه و بموافقة أهلها انمحت كل همومنا اللي راحت وهاي الفرحة اللي احنه منتظرينها وتطيب جروحنا وتشافينا.
ورغم خلصنا من التدخلات جدي بعده يسوي مشاكل لأبويه بس اهون من قبل وكل كلمة والثانية يگول لأبويه اني ما راضي عليك وابويه بين اللي يرضيه وبين يسوي كلشي يشوفه لمصلحتنا احنه.
فرحتنا لـــمُـــخلد مابعدها فرحــــٓــه.
و من دخل جدي وگال وافقو ينطونه؟؟!
صدمنا عبالنا يتغير عبالنا يفرح گال هو هذا اكو عقل براسه يقصد مُــخلد.
مكيف وانتن محتفلات هي لو بيها خير ابن خالها ليش عافها مو جانت مخطوبه اله وما قبلو ينطوها لڪرم وصار يحجي كلام يهد جبال من بشاعته.
هنا ابويه ما سكت وجدتي هم گالت اله نرجس اخذت اللي تستحقه وابو غدير نايم مستشفى والحرگ ماكل جسمه وهذا جزء بسيط من حقه وغدير هجمت بيوت وربك هجم بيتها.
انت شوكت الله سبحانه وتعالى يشوفنا بيك يوم.
وابوي انجن وهو يگوله شلون تحجي على البنيه انت حتى ما شايفها بأي بحق تحجي عليها ومنو گالك عافها ابن خالها شتعرف عنهم اصلاً.
عرفنا واضح الكلام منين وشنو مصدره ومنو تسول الله نفسه ويقذف المحصنات غيرهم هم.
ابويه هنا قطع عليه كل طريق وخصمها اله من الآخر.
وگال اله اني رحت للنجف ورحت على علماء ومشايخ وشكيت حالي وياك تعرف شنو كان ردهم هذا مو عقوق الوالدين.
مثل ما انت الك حقوق وعليك واجبات هو هم اله حقوق وعليــــٓــه واجبات.
وعندي استعداد اجيب عالم ديني للبيت وتحجي انت بيش اني مقصر وياك واني احجي اللي عندي وشوف شنو يحكم بينا.
و انطيك اياها من الاخير حتى لا تگول ما راضي عليه.
رائد خطبتله البنيه اللي يريدها رحت الهم وأخذت الشيخ جابر وأخذت شيوخ وناس وجهاء ورحت اتعذرت عن اللي سويته انت وشلون كسرت بخت البنيه وشلون حجيت عليها والحمد لله انطونياها وعقد عليها شرعا وقانونا.
واكملك اياها طيبه انطيتها ان شاء الله بس تكمل شغلة مُـــخلد يعقدون.
تحجي شتسوي سوي. هاي بنتي ربيتها وي بناتي اني وامي واخوي واهل بيتي.
وروح گولهم تعالو انهو عليها واريدها من الله يطلع بيهم رجال ويجي ويوگف اسويها كاتل ومكتول كافي وصلت حدها.
جدي صرخ بــ ابوي وهو يگول شلون يجون بعد عملتك اللي سويتها.
انت ما تستحي من تگول الهم انطيها الڪم بشرط لو تدفعون حق رباتها لو من تتعيين راتبها لامها.
ليش انت جوعان لو امها جوعانه مااستحيتوا.؟؟؟
فشلتوني گدام خلگ الله.
ابوي جر نفس وگال. هذا اختبار الهم وتدري بيــــٓــه مو جوعان ولا امها جوعانه.
اني واخوي و ولدي نگدر نصيغها بگد وزنها ذهب وننطيها لابن عمها لو ڪان يستحقها. بس مايستحقها.
ڪل هالسنين ما شفناهم ابن اخوك اللي راح وگال الهم عليها وشوڪت؟؟
من سمع ابن خالتها رايدها. مو المفروض تفرح الها تروح بمڪان ترتاح بيــــٓــه وهي منو واللي رادها منو ابن بنتك هذا .
بنتك اللي مابيوم حسستها هي بنتك ــ الله يحفظنا امي اللي عوضتنا عنك.
مو المفروض تمنع تدخلــــٓــه وتگوله اثنينهم اسباطي وانت تدري اللي رادها يستاهلها رجال طالع من ظهر ارجال.
لو حقدڪم ؏ بيت ابو غياث بعده ما خلص ولا راح يخلص.
وازيدك بعد حرمت ؏ رعد وهديل لاانطي لعشيرتي ولا اخذ منهم.
الله رحم حالنا بسحر وام نورس بغلاة بناتي. وڪافي بعد ما نريد من هالعشيــــٓــره شي.
وبعد هذا الكلام جدي نفس كلمته ما راضي عليك والله لايوفقك انت و رائد.
وابوي رد ــ ربك عادل ومايرضى بالظلم مثل ماانت الك حق عليه ارضيك وماقصرت بحقك.
اولادي الهم حق عليــــٓــه واجب عليه اڪون وياهم واختار الهم الصح.
والتفت النا وگال انسو ڪلشي وافرحو لــ مُــخلد وان شالله ربي يتمم اله ؏ خير.
راضي عليــــٓــه الله يرضى عليــــٓــه ويهنيــــٓــه ويسعــــٓــده بڪل حياته.
ــــــــــــــ
مسك ـــ
روح كد ما بيك وارجع
تلكه حبك مستمر
الشمس متغير تفاصيل السمر
مثل متطش الاشاعه بروحي حبك منتشر
أمنت عطري بقميصك وانتظر
الملكه بالظلمه نميزه امن العطر
وانتظرتك وانتظرتك
بعد هم راح انتظر.
بشرتني الماســــٓــه بــ اجمل خبر وقبل لا ارد التفتت لصوت ٵنس وڪلماته بفرحه هذا اللي ڪان لازم يصير. مُــخلــد يستحقها.
واني مع تقديم موعد الزواج.
حقه مُـــخلــد تعب هواي وانتظر بما فيه الڪفايه.
راح بالي لما ڪلهم سٵلوني نفس السؤال وڪل واحد سٵلني بطريقته الخاصه.وبــ اسلوبه المختلف عن اي اسلوب اخر.
الاب الروحي وخالو ابوهيا وتوٵمي ودڪتورنا الفنان والحيد وجدو عبدلله
لڪن مضمون السؤال واحد.
عن مدى تمسڪي بــ مُــخلــد وبعد ڪل اللي صار.
گادره اتحمل ظروفه واڪمل الطريق اللي بديناه سوا؟؟؟
وقبل لا اجاوب يذڪروني احنا وياج احنا السند الج ولو احتاجيتنا بيوم راح نڪون عندج وي التفاتة نظرج.
واوس ڪان يفاجٵني بالڪلام عنه وحبه اله ولشخصيته وعجيب دفاعه اله وصرت اعرف السبب.
وبعدين يحولها مزح يگول علمود المهر.
ما لحگت افڪر بشي غير اردد الحمدوالشڪر الك يارب.
اريد اوصل لغرفتي واسجد لربي سجدة شڪر.
وبعدها افڪر بالباقي ونغزه بگلبي ليش الخوف يجي وي الفرح مباشراً
لو بس اني هذا حالي ؟؟؟!!!!
الله المعين ما اريد اتذڪر ڪل فرحه محسوبه عليه حساب والها ثمن وبڪل مره يڪون الثمن غالي ويڪلفنا ايام من عمرنا.
تفائلوا بالخير تجدوه. گلتها بداخلي واستنشقت واحس جرح بصدري.
هيام دخلت لبيتنا دموعها تتسابق تسمح دمعه ينزلن عشره.
ضمتني لحضنها الحنينه وما ينفهم من ڪلماتها اي شي الدموع بشهگات. وما عاد تخلص عبرة صدرها.
هيام ــــ
ورب أخ أصفى لك الدهر وده .. ولا أمه أدلت إليك ولا الأب.
هواي نسمع بحياتنا عن مواقف الاخ اللي ما ولدته امك.
واني بالذات شفت هذا الشي بعيني بحڪم امي ڪانت امانه عند شخص ٵئتمنها بــ اجمل معاني الامانه وڪان گدها.
وشاءت الاقدار ارجع اعيش ابينهم واشوف ڪل القيم بــ اجمل صورها.
مايوم حسيت اني ماعندي ٵخ بالعڪس رغم صغر سنه واني اخذه بيدي للمدرسه واخاف عليه من الطلاب هو ڪان يحسسني هو اڪبر مني وهو السند.
وڪبر وفعلا بڪل موقف ڪان الي اخ وسند.
اما مُــخلد هالانسان اعجز عن وصفه من اول موقف اله حسسني هو اخ وتوالت المواقف. وبڪل مره اشوف بي الشخص اللي ماشفت اله مثيل.
وگلتها ودائما اگولها ولاخر يوم بعمري اگول ماشافت عيني شخص يملك نفس صفاته واجمل صفه الايثار.
يفيض حنيه ؏ الحواليه بعز احتياجه.
رجعت لهذاك اليوم اللي احمد سولف الي عن اللي صار بالمستشفى من تعرض مخلد للانفجار..
شنو حال احمد وهو يحجي من طلع مُـــخلد من العملية الأولى بالرغم من ٵن الوقت اللي سولف الي بي كان متشافي وصحته زينة..
وعدني احمد يفهمني السبب بوگفــــٓــة ابو الحسن لجانب مُـــخلــد بهاي الصوره.
لاحظته شگد متأثر وعيونه دمعت يگول لما طلع من العملية وكان بغرفة الافاقه واني قريب منه وابو الحسن.
كان يتمتم بكلمات بالبداية كانت مو مفهمومة بعدين شويه شويه بدت تنفهم كلماته.
واني امسح بوجهه بدت دموعه تنزل امسح وحده تنزل ثانية بدأ يتمتم بكلمات يوصف بيها مسك واني شايل هم لا ابو الحسن يفهمها..
صرت حتى اغطي على هذيانه تحت تأثير البنج احجي كلمات سلامتك يا غالي ريت الوجع بيه ولا بيك حتى كلماته لا توصل لمسامع ابو الحسن لان كان قريب منه ومهتم كلش بيــــٓــه خاصة بعد ما شاف حال الياس اللي ڪان يتوسل بس حتى يدخل وياه لصالة العمليات هواي تأثر بهذا الموقف.
كلماته صارت واضحة وهو ينطق بأسم مسك وكلام كان موجه لأمه.
امه اللي تعبت وشافت ما شافت الظاهر كان كلش خايف عليها وقلق ويمكن هي اخر شخص كانت على باله قبل الانفجار.
كان كلامه عبارة عن وصيه يگلها بيها اذا غمضت عيني عن هاي الحياة لا تبجين ولا تحزنين ولا تنوحين روحي موجودة يمها اذا احتاجيتي الي كلشي بيه وكل صفاتي تلگيه يمها اذا اشتاقيتي لشوفتي صورتي تلگيها بعيونها.
احمد لهنا وسكت دموعه نزلت ما يگدر يكمل باقي الكلام گال كافي لاتلحين عليــــٓــه .
اتذكر بذاك اليوم عشنا برعب مُـــخلد كانت حالته خطره جدا وجروحه قويه وتنزف.
و ابو الحسن هواي تأثر عليه وگال بس
ربي يأخذ يشفيــــٓــه ويگوم بالسلامة مستحيل اخليهم يفترقون.
بهذاك اليوم جان كل همي يعيش ورديت على ابو الحسن كلشي ما اريد من رب العالمين يعيش بعدها لو يريد روحنا ترخصله.
الحمد لله تماثل للشفاء وبعدها بأيام كان موعد العملية الثانية ومُـــخلد بوقتها منهار نفسياً وجسدياً
لان ضربة بأثر ضربة مو هين ومو اي واحد يتحملها.
وهو يستعد للعملية الثانية ابو الحسن موجود حتى يدخل وياه وكلماته كانت عبارة عن طاقة إيجابية.
كلنا كنا منتبهين على اهتمام ابو الحسن لمخلد ترك العيادة والمرضى وبيته ودائما ڪان متواجد وياه بالمستشفى.
عرفت سبب اهتمامه ولو خالو ابو الحسن نعرفه ما يقصر بس الاهتمام واضح.
وخوفه وحرصه عليه وهو يشجعه عرفت سامع مُـــخلــد وحب مُـــخلــد الها..
وقبل العملية الثانية كان يمده بالكلمات الحلوه ويطلب منه يكون أقوى ويفكر بالمستقبل.
انتبه مُـــخلــد من گال خالو ابو الحسن خلي عيون مسك بين عيونك ,
استغرب مُـــخلــد وحالته ڪانت ڪلش صعبه محتاج شخص يرفعلــــٓــه معنوياته.
وخالو ما قصر گال لو عمري يوم ما اخليكم تفترقون ان شاء الله راح اوگفلك ولا تلوم ابوها الله يعينه تعرف شگد غالية عليه وانت صرت من غلاته.
طبطب على اكتاف مخلد وگال الله يسهل الأمور بس صير سبع يا بطل انت گدها.
بعد هذا الكلام دخل مُـــخلــد للعملية اللي ڪانت ناجحــــٓــه الحمدلله.
ومرت ايامه صعبه وبسبب نفسيته التعبانة اخذ قرار وسرعان ما تندم عليه.
احير بيا طريقه اوگف اله وارسم الفرحه ؏ وجهه.
اتدخلت اڪثر من مــــٓــره وڪلمت عمو محمد عنه وهو يبتسم ويگول مااستغرب واني اعرف خاله الله يرحمه اللي ڪانت رتبته عميد رڪن وما ياڪل الا وي الجنود متواضع الى ابعد حد. ويذڪرلي صفاته.
الحمد لله وصلنا خبر انزاحت الغـُـــــٓــمه وراحت الايام العجاف واجانا اليسر بعد العسر وسمعت خبر الموافقة.
وما اعرف شلون اعبر عن فرحتي ابجي اصرخ انطي صدقات لو اوفي نذوري اللي صارت اڪثر من نذور خاله خلود اريد اشوف دربي ما اشوف.
اجيت بــ استعجال واني اطلب منها ممنوع تعترض على هذا الموعد.
او تگول قريب وما بقالي الا ايام لگيتها حايرة والدمعه بطرف عينها ما انطيتها مجال تريد تصعد لغرفتها تبدل ما خليتها.
گلت الها بس لا الج نيه تأجلين الموعد لو تعترضين همست الي انطيني مجال والرب اريد اتوضئ واسجد سجدة الشكر.
ضحكت ورديت عليها توضي وغرفة امج موجودة . واسجدي واشڪري ربج وتعالي.
راحت ورجعتلي بعد دقايق
مستحيل اطلع من بيتهم اذا ما افهم وما اقبل تتحجج بأي حجة.
گلت الها سولفيلــــٓــي كلشي اني اخته حتى اللي ما تگدرين تگوليــــٓــه اله اني اوصله اله بغير طريقة.
اعرف قبل هاي الظروف لما راد يتقدم الموعد وراد يتوسط بس سبحان الله هي هيج صارت بعد.
واعرف شنو حجتج اللي گلتيها.
ردت ــ بعيداً عن كلشي انت تعرفين اني هاي الفتــــٓــره امي واوس وابو الحسن لوما وجودهم ماادري شلون اوصف حالي,
وخصوصا بعد هاي الظروف احس تركيزي مو مثل قبل والمعلومة ما أخذها بسرعة.
والتسمم اثر عليــــٓــه هواي والظروف اللي مرينا بعده هدت حيلي وماادري بعد.
صافنه عليها عيونها مغرغره دموع. والصيام مبين عليها. وبالگوه تنطق.
واتذڪرت بوقت اللي گلت الها مُـــخلــد اله نيه قويه يقدم موعد الزواج وانت شنو رأيج؟؟؟
فزت فزه قوية وگالت لا فدوه لا والرب احس نفسي بعدني ما شبعت من اهلي وما ادبرها زواج ويه الدراسة.
وذكرتلي موقف صاير بالجامعة ان طالبة وياهم كانت حامل وهم گاعدين بالقاعة والدكتور يشرح ما متحمله ومتقيئه
وتگول الدكتور انتقد هاي الطالبة وانتقد اي طالبه جامعية تتزوج بوڪت الدراســــٓــه وڪلامه ڪلش اذاها من يمي ردت اتخربط.
ومثل ما توقعت ست الحسن گالت تذڪرين دڪتور عبدالوهاب وذڪرتلي اسم الطالبه.
واني حالتي اتعس وي صداع الشقيقه.
اي حبيبتي توقعت.
مو شرط حالتج تڪون نفس حالتها. ومن ناحيــــٓــة صداع الشقيقــــٓــه حقج.
اخر شي گلت الها وهاي ابسط منها ماكو اكيد مُـــخلــد فاهم وضعج.
و دارستج شگد صعبة من غير الم راسج والشقيقة اكيد هو ما يفكر بطفل الا تتخرجين. هاي هم حليتها.
اهم شي ما تحرڪت من يمها الا تأكدت ونهيت الموضوع و موعد العرس راح يبقى مثل ما هو راده.
ــــــــــــــــــــــــ
مسك ــ
بعدني مذهوله وافڪاري مضطربه واڪذب اذا اگول مو خايفه من شي يعڪر صفو فرحتي.
واعد ؏ اصابعي الايام شنو الحگ اسوي بهاي الايام.
وقرب يصير شهرين اني ما شايفته.
ميس تگول شنو اللي ما تلحگين عليه مثلا.
جهاز البيت ناقصه اثاث الغرفه وڪم حاجه هم يڪملوها.
وجهازج شبه ڪامل وڪله مارڪات راقيه و؏ ايدي اني مجهزته.
رديت ان شالله خير.
ولليل اجه جدهم ابو غياث واخوال مُــخلــد يتشڪرون من ابويه واخوالي موجودين اتعللوا لوقت متاخر وابو غياث ڪل شوي يڪرر شڪره وممنونيته من ابوي ويتعهد ما يمسها الا هوا الرحمن وبعيوني اخليها وغلاتها من غلاة وحيدتي.
وبعدها بيومين جابوا المهر حتى اڪمل تجهيزات وهو طلعت اله شغله ويريد يسافر للاردن ومن يرجع يتحدد موعد العرس.
وذاك الوڪت اتذڪر يتصل ويسمع صوته.
شڪد ڪنت ناويه اعاتبه وزعلانه من تصرفه وڪٵن متعمد ما يريدني اشوفه ولا اسمع صوته.
وي جملة ملايين الهلا غاليتي اتذڪرت اني وعدت نفسي لا الومه ولا اعاتبه ؏ شي بعد العذاب والايام الصعبه اللي عشناها واحنا بعاد عن بعض.
فهمني سفره ضروري للاردن ايام ويرجع ان شالله.
گلت خير ان شالله ترجع بالسلامه.
گال زين الحمدلله توقعت تزعلين عليه او تعاتبين.
يعني يتحارش گوه گلت ليش تفتح ؏ نفسك جبهه انت بغنى عنها.
واذا اريد ازعل واعاتب ايام ما اخلص عتابي وياك.
گال مو مشڪله اقبل بڪلشي بعتابج بزعلج بالملامه بس من نڪون سوا عاتبيني وازعلي عليه براحتج.
ردت اگول مشتاگه اشوفك بس گلت بداخلي مستحيل يسافر اذا ما يمر اشوفه.
واڪيد يدري ميته من شوگي اله.
يذڪرني مابقى شي ايام مو اڪثر ان شالله ونڪون سوا.
رديت ان شالله واحاول ما ابين خوفي.
منتظره ثاني وثالث يوم ما اتصل ولا اجه وسواها فعلا وسافر بعد اليومين وي الولد شريڪهم بالمعارض. وسفرهم بر مو جو.
وعرفت بسفره لما بعث الي صوره بــ اماڪن ويسٵلني هاي وين؟؟؟؟
ومنها عرفت بتفاصيل سفره من يمي دخت لما عرفت الرحله من بغداد لــ عمان تستغرق تسع ساعات.
مستسهلها يگول مو بعيد ترا نفس الطريق من ڪرڪوك للبصره ويمڪن اقل .
بعد ڪلامي وياه ورجعت اباوع للصوره لحيه خفيفه گلت مجاز اڪيد.
گال اي بعد ثلاث اسابيع وتنتهي اجازتي.
وهل علينا العيد وحضرة جنابه عيد بالاردن.
واتصل يعايدني و يقسم يمين
يگول مشتاڰ وروحي هايمه وصورتج صرت اشوفها بڪل وجه يلاگيني.
ومستمر اتصالاته بـ ايام العيد الثلاث وبداخلي زعل ڪبير عليه ما شايفته من يوم المناقشه.
وهو يگول شفتج ڪم مره ومن بعيد اذا شفتج عن قرب اترك الدين والايمان اضمج بگلبي واخذج من اهلج وحتى عرس ماڪو.
خلص العيد. ومُــخلــد ما رجع من سفره.
وبعده بيومين گاعده بالحديقه العصر وبيدي محاضراتي. اجاني ياسر جاب اساور يگول صايره ثگيله گلت لامي بعد مابيه اشيلها.
ضحڪت ؏ سوالفه فدوه لعينها صدگ مدنفشه.
طلع يم الباب اسمع صوت اوس يحجي وياه شرجعه من دوامه؟
وگفت لحيلي وشلت اساور بيدي وڪان مصطفى مو اوس وجنطته بيده عرفت هو راجع من سفرة اربيل.
اتفاجٵه وجودي لدرجة ما سلم بس سٵلني شنو شوڪت رجعتي؟؟
مسك ــ هلا مُــصطفى من وين ارجع؟؟؟
واني وين رايحه لحتى ارجع.؟
ذاك الوڪت اتذڪر سلم واعتذر. ارتبك وتلبك.
وگال تعبان والله ودايخ اعذريني ماسلمت .
سٵلني عن اوس ـ
رديت بدوامه وعنده خفاره اليوم شعجب مااتصلت بي؟
گال تارك تليفوني بالبيت مااخذته وياي.
سٵلني منو موجود؟
رديت امي ومرام وجداتي.
دخل سلم بــ استعجال وطلع.
فهمت سبب سفرته لاربيل هو واصدقائه من قبل العيد بيومين وايام العيد وبعده بيومين وتارك تليفونه بالبيت .
ما يريد يسمع اي خبر وڪل ظنه موعد زواجي بالعيد.
واني سمعت اوس لما اتصل ؏ صديقه وطلب مصطفى وهو يعاتبه ليش ما ماخذ التليفون حتى اتصل بيك.
وشوڪت قررت ورحت وانت اڪدتلي ماتروح وياهم.
اوس عبالك مضيع ضايعه بهذا الاسبوع ما متعود ما يشوفه وما يتصل بي.
شنو اگول مابيدي غير ادعيلك ربي يبرد گلبك.
واني اتذڪر ڪلام انوســــٓــه عنه تگول فوك القهر والملامه اللي تحملها.
من شاف حالج ؏ مُـــخلــد وفهم انت ڪنتي موافقه من اول مره تقدم صار يلوم نفسه ومحملها ذنبج وشابع قهر عليج.
يگول اني عميت بحبها وماشفت طريقي. هي ليش سڪتت؟
ليش ما گالت الي بــ اي طريقه حتى ازيح الغشاوه من عيوني وافتح.
ومن گايلــــٓــه اله شلون تگول الك صعبه.
ڪان رده ڪلنا نعرف شنو مسك وشنو اخلاقها مستحيل تتغير نظرتي عليها.
بالعڪس ڪبرت بعيني بڪل تصرفاتها.
ومنتظر اليوم اللي اشڪرها لان ما قبلتلي اعيش بخداع.
لو صاير هالشي ڪان اني ما سامحتها مااقبلها انخدع بحياتي هاي حياة مو يوم ويومين.
مشڪلتي حاليا بس احتاج الوقت لنسيانها.
مرت ايامي واسبوع ڪامل بعد العيد ياله مُـــخلــد خلص شغله بالاردن ونزل للعراق.
واول ما وصل اتصل بيه يطمني عنه.
وشلونه حالي صار اڪثر من عشر ايام شلون ما احاول اتفائل بالخير اڪو نغزات بگلبي تخوفني ڪلش.
خايفه عليه اڪثر مماخايفه ؏ نفسي. ڪلما يتصل اگول اله اقرا بسم الله الذي لايضر مع اسمه شيء.
لو اگول لامي فدوه ادعيله. خايفه من عناده وتحدياته وخاصه بعد ماتاڪدت سبب سفره مو بس شغله تخص معرض السيارات وانما عنده سياره موصي عليها قبل اشهر و واصله بالمعرض اللي بالاردن ويڪمل اوراقها ويجيبها.
وبعد ما عرفت هاي السياره من سيارات السرعه. حلفته يمين مايسوقها هو بالطريق ومن ڪثر ما لحيت وخايفه عليه اختنگت بدموعي.
انجن من سمعني ويحاول يهديني گال شلون راح تخليني اترڪها بالاردن ما نجيبها.
وبعدها اقسم الي يمين مايسوقها ليوم العرس ياله ارتاحيت.
ڪل ما يتصل يگول اڪو امور ڪان المفروض نتناقش بيها.
شايل همج هواي هواي. دخولج بحياتي راح يتعبج حسرات وآاااهات يگول مو گادر اتحڪم بــ اعصابي واثور ؏ لا شي.
يمڪن وصلت حدي وطاقة تحملي نفذت.
ويرجع يگول بگلبي اضمج لو بعيوني مو مستوعب انتهت ڪل العوائق وما بقى الا ايام ونگون سوا.
اڪتفيت بالجهاز اللي مجهزينه خاصه بعد ما فهمت ان هن ذوق الماســــٓــه وذوقه هو غير الهدايا اللي جايبها من سفره.
وزوجات اخواله وريان اجوني اڪثر من مره يشوفون احتياجاتي ويساعدوني بالتجهيز. واني بالدوام.
وٵمي فهمتهن مڪتفيه باللي مجهزي وڪل يوم ينزل موديل شڪل.
هيا جابت البدلات اثنينهن رفضت اشوفهن الا ليوم العرس. خلتهن بڪنتور امي.
وبقيت مصره رغم ڪرستين والبنات لحن يشوفنها عليه وڪرستين تگول حتى اذا ما عجبتج اصمم الج اجمل بدلة عروس.
وخالتي اميره گالت تجننن عليها عبالك مفصله عليها تفصال.
ودخلن شافنها وابدن اعجابهن بيها.
ما دخلت وياهن لغرفة امي بقيت بالصاله.
عجيب الخوف اللي ماليني رغم الڪل حواليه وخاصه امي اللي ڪلش حاسه بحالي و بخوفي.
وحتى هي احسها خايفه رغم شگد تبين الي لازم اتفائل وماافڪر بشي سلبي. وتگول ان شالله الجاي افضل من اللي راح.
بعد العسر يسر ان شالله.
وابوي آاااااه ياابوي وحاله وڪٵنه تندم وافق ؏ موعد العرس.
نظراته تلاحقني وين ما اڪون طول اليوم قريب يضمني اله ويدعيلي بالسعاده وراحة البال.
ينصحني ويوصيني بيه ويگولي رُجل ويستحقج.
دموعي مغرغره بعيوني بس اغمض تنزل بغزاره.
وهذا اللي صار بيوم اجتنا امه بس شفتها من شباك الصاله وامي تلگتها تهلي بيها وترحب جابها مهند.
ماتحملت دموعي تنزل بغزاره وشهگات شگت صدري ودخلت لغرفة امي.
اسمع صوتها تسٵل عني وما گدرت اطلع اريد عبرتي تخلص. ماتخلص.
دخلت امي گالت خالتج موجوده بالصاله ـ مااستغربت حالتي طلبت مني اهدٵ ومسحتلي دموعي. وطلعت طلبت مني ما اتاخر واطلع.
دقايق وطلعت من شافتني نهضت وفتحت ايدها وڪلماتها ڪانت ڪفيله تخليني انهار بالبجي وهي نزلت دموعها قبلي.
احتضنتني واختطلت دموعنا ابعض. اتذڪرت ڪلامه عنها من يگول تشبهج بهواي صفات نازڪه وترفه ومدلله. هاديه ومالها صوت بقمة عصبيتها صوتها هادئ ــ انجن من المره اللي صوتها عالي.
اثنيجن نفس الجمال انت وهي مثل بغداد. وعيونج نهر دجله.
وماذا عن عيناها.....؟! عيناها كبغداد جميلة... وفي عيناها وبغداد اموت عشقا,
صوت امي تگول ڪافي گولن يالله وتفائلن بالخير.
مسحت دموعها واخذت ايدي بصفها گعدت.
سڪتت وبعدها دموعها تنزل ؏ وجناتها بسڪوت.
مرڪزه بيها واتذڪر ڪل ڪلام انذڪر عنها.
من ترمش بين رموشها معلگه قطرات الدموع.
ما مصدگه ومثل حالي تگول گلبي يوجعني.
اريد الايام ترڪض ويجي هاليوم بلمح البصر وافرح واني اشوف فرحته باللي تمناها گلبه وتعب وصبر سنينه.
ساعات بقت يمنا واضح شگد تعبانه وشگد خايفه وتدعيلي وتوصيني.
واتحدد يوم العرس ـــ
الإثنين2012/09/03
16 شوال 1433
اسمع تحضيرات البنات ليوم العرس ولا وڪٵن اني صاحبه الشٵن. فرحتي مخلوطه بخوف.
رن تلفوني جاوبته بلــــٓــهفه گال غاليتي افتحي الباب اجيت اشوفج بس لاتعاتبيني اليوم.
؏ الاتفاق خليها من نڪون سوا.
ادري حقج عليه والله.
يتبع ـــــ
البرنس يگول
تاج وعلى رأس السنة محبوبتي خليتها
طفلة وعلى ايدي من الصغر مثل الورد ربيتها.
من كَد ما دمها حلو أم العسل سميتها
ما عاد يحلالي عطر من يوم مشتميتها
اشتاق حتى لو نمت ويا الحلم شديتها
بطبشور كَمت اكتب غزل هيج على حايط بيتها.
من ردت احلي للعسل فوكَ العسل بديّتها
فد مره صدفت بالشقى مدري شكَلت غثيتها.
جريت حسرة من بجت لا روحي احس جريتها
من كَلبي مدري اشطلعت فد شي حلو رضيتها
والصبح يم رأس السنه واكَف تجي تانيتها
ماشة شعرها ضيعت سألتني أمس ملكَيتها؟
كَلتلها ماشايفها ابد واني جذب ضميتها
ضحكتها مساحة تعب ما تخلص اتمنيتها
مرات اموت من البجي لو بيها الم حسيتها
من كثر غيرتها علي اني اعترف اذيتها
شوفوني إذا مو هل سنه بركَع عرس غطيتها.
و مو زلمه و انعد ع الزلم الا أخذ الحبيتها.
رايڪم بالذيب؟؟؟
اوصفوه بجملــــٓــه بس لاتتغزلون زياده 😒
وئام الشيخلي,,,,,,, 💞