#قيود_العوف
بقلمي : ريتَا
لتنسَون التصويَت + التعليق بين الفقرات قلبي 💚.
- {رَبَّنا وَلا تُحَمِّلنا ما لا طاقَةَ لَنا بِهِ}
شبابات صوتوا دوسوا علىٰ النجمَة 🤏🏻
<___________________________>
جُمان: شفتَها منزلَة مواعين المطبخ كُلها والطقطقة محتلة المكان وماما بنصهم ودتنظف بيهم وصلت قريب منها صفگت الها والتفتت ألي وگالت
-امل: ها ماما جُمان اجيتي
-صار ساعة أصيح بأسمج وماكو تالي اللگاج مسوية وليمة هنا
-امل: ما اسمع من الطقطقة ملتهية
-جُمان: تچيت ظهري علىٰ الكاونتَر وگلت بحرشَة
اي اشوا اني گلت يمة انخطفت أمولة راحت اخذوها وبَعد منيَلي أمولة اني
هزت أيدها وضحكت بوجهي وأردفت ..
- امل: شلونچ بأمتحان اليوم لتگولين مصخمتها حتى ما اصخم وجهج
-مصخمتها شنوو ؟ افاا عليج يوم
-امل: عفية وكفو مجاوبة مو ؟
- جُمان: ماما اني اتوقع اخذ 3 من 20
صفنت بوجهي لثواني رفعت ايدها بيها الچفچير يا اندهرنا راح انكفخ ماكو محال...
- امل: تاخذين 3 ولج جمينة تاخذين 3 !!
- جُمان: والله ماما صعب كُلش بقيَت صافنة ومفهيَة
واني دارسة كُل هلدراسة تالي يجي كُل شيء عكس الدرستَة
- امل: جُمان تفكرين بشيء انتِ ولاهية عن دراستج ماچنتي هيج تاخذين 3 ولج الكسوليي ..
- جُمان: لا والله ماما بس مثل ما گلتلج الي درستَة ما اجانة والي مادرستة ولا القيت عليه التحية صار گبالي يعني اني غلطانة ادري ادري هسة گليلي أمولة شنو الغدا شو مغلسَة بس لا ممسويتلنة غدا وطابَة بنص المواعين !
فرت وجهة علىٰ الهوسة وهزت راسها..
-امل: اي والله اللتهيت تعال شيخلصني !
-جُمان: عاشَت أيدچ ماما ناكل جدورة
-امل: دتعاي خل نخلص الهوسة هاي هم كسولي وهم تريد اكل غير ناس ..
-جُمان: لعد اموت !!
-استحي شوية حسسيني ضايجة لسانج يخوط اذانج اليشوفج يگول ماخذة درجة كاملة .
-جُمان: اني اسفة اني اعتذر طاح حظي زين يووم زين
-لا مو زين روحي بدلي وتعالي وياي
-جُمان: يبوو يبوو مسحولة من الدوام وراح انسحل هنا هم ميصير هذا اضطهاد والقران .
-امل: لچ اني بشبابي
جُمان: قاطعتها وگلت ايي ماما انتِ بشبابج چنتي فلفل بس يگولون ألج ع شيء ترحين ركض ماما ومتتعاجزين بعد حارة فلفل أنتِ فلفل
-امل: أنتِ هم فلفل
ضحكت ورفعت حاجبي ..
-امل: اي بس فلفل بارد مو حار يلا فضينا يالمسعدة خلي نخلص هاي الهوسة لو تشتغلين بكثر ما تسولفين چان من زمان مخلصين بس هذوة
-جُمان: شحچي وياج بعد فلفل امري لله
-بلكت هذوتج هاي بالامتحانات .
رفعت ايديها ازلغ بوجهي وهي تضحك بدلت ملابسي واجيت يمها..
- بقيَنا نرتب الهوسة وانظف هاي ماما كل اسبوع تطلع البيت وهَو نظيف يلهث بس وين متقتنع اذا متگعُد كُل اسبوع تغير مكان الگلاصات ومكان القنفات وتصلخ البيت تصلخ مترتاح
أخذت جهازي فتحتة ولگيت المسجات تتطاير كووومة مسجات من منار اقراهن واضحك رسالة معصبة بيها ورسالة هادئة تكسر وتجبر ابتسمت ورديت عليها وهي بسرعة جاوبتني طلقة مو بنت ..
- منَار: جُمان مو گتلج خابريني
-جُمان: نسيييت غير لگيت امي گالبها عاليها واطيها وفتت بنص الجدورة
-منَار: والله الهن خلگ اني اماعين اكلي اتعاجز اغسلهن
-جُمان: عجوزيييييييية يمتىٰ تبطلين العجز
-منَار: يااا والله انييي ماا احب اللزم شيء غير المخدة ولو بيدي حتى الكتب مااا اللزمهن عاد عفية لتگليلي اماعين وشغل وانوب دراسة والله خو گليلي انتحرييي احسن
مسحت علىٰ وجهي وگلتلها
-جُمان: عمي لتشتغلين الله يقرضج
-منار: يله عاد الي يشوفج يگول كفو وانتِ القلم اذا يوگع تخليني اني انزل اجيبة ..
ضحكت مأيدة كلامها صدك كلمن عن عيبة عمىٰ..
-منَار: اي عيني ليش متجاوبيني اول ماا ادز الج عود ؟
- جُمان: لعددد شداحچييي غير اللتهيت ونسيت
-منَار: هاي اني عايشة ومنسيَة لو اموت شلون
-جُمان: لا من تموتين اتذكرج وكل خميس اثوب الج
-منَار: كُل أسبوع مرة !! سويَها ع الاقل مرتين بالاسبوع
هيچي اجوع بسَرعة اني
-جُمان: شعندنا عيني بالاسبوع نثوبلج مرتين
ع راسج ريشة حالج حال الوادم بالاسبوع مرة وكُل خميس
-منَار: من صحنج من تاكلين ذكريني وثوبيلي منه يالفگر
هسة معلينا جُمان هايَة سارة شگد مكروهة ايع شگد تسوي مشاكل للبنات وتچذب وتذب تُهم عليهن والله داحسها دتخرب سمُعتهن
-جُمان: أحد گلهن صادقنهة وامشن وياهن وجيبن السمعة لنفسجن !!
-منار: ماعرف
-جُمان: منَار سارة هنَة الي مرافقاتها هنَة الي قابلات وراضيات إنهُ تكون سارة من ضمن دائرة معارفهن بعديَن هنَة يعرفن سارة شنو ؟
-منار: ليش هلمجتمع غررريب !!
-جُمان: كل مُكان بيه الزين وبيه الشين ! أحيانًا البيت ألي انتِ ساكنة بيه نفسة يكون بيه شخص تصرفاتة صح و واعي وشخص خارج عن الطريق الخلل بالأشخاص مو بالمُكان !
-منار: كلامج يحتاجلة گعدة واتربع بيها لحظة لحظة تربعت ايي كملي كملي من تتفلسفين تخبلين مثل خالتي امل ماخذه طبعها كملي كملي...
-جُمان: لو كل أنسان بهذا الكون يراجع نفسة ويدرك أخطاءه ويلاحظ وين جاي توصلة ويصحىٰ علىٰ نفسة ويتوجه أتجاه صح چان صرنة بخير بس كل هذا يبقىٰ اختيار وإرادة من هذا الشخص ..
-منَار: والله جُمان داحسنا مختلفين نمشي وحدنا نگُعد وحدنا ومرتاحين لا صداقات هواية ولا ناس عافطة
-جُمان: من اول مدخلت للجامعة گالتلي ماما جُمان لتختلطين بأي بشر ولا تتعرفين علىٰ اي بنية المظهر خداع بشكل وهذا مكان عام يعني جامع كُل الاصناف
- خلصي محاضراتج وامشي بطريقج حتى ليلوحج وجع راس ولتصيبج خيبة من اي علاقة لأن اغلبها علاقات عابرة اختاري صديقة اوصديقتين واكتفي بيَهم بس عرفي نمطهم واسلوبهم واختبري تفكيرهم وشَوفي شلون يفكرون ؟
-منَار: اني هم جُمان احسَنا جدريَة وغطاهَا
-جُمان: بالضبط لذلك أنتِ الوحيدة الي مكتفية برفقتها
سولفنة شوية وسديت الخط شمرت التلفون وتمددت .. فعلاً ليش الانسان بنهاية يومة ميراجع نفسة ؟ ليش الأنسان يعرف الغلط بس مع ذلك مستمر بيه ويعرف هذا الغلط اله عقاب بالنهاية .
نفضت راسي من أفكاري ومرت الايام علىٰ نفس النمط ، دوام ، دراسة ، بيت ، وبهلفترة بديت أتعلم الحياكة وجاي أتعلم الخياطة عندي رغبة وحب أنُ اتعلمهم ..
مددت رجلية علىٰ الدفاية وفتحت كتابي داقرة رفعت راسي علىٰ خطوات ماما تقربت گعدت يمي حسيت بحلگها كلام هزيت راسي إلها وأردفت ..
- امل: جُمان اكو معمل خياطة ديطلب خياطات واني بالخياطة كُلش قوية وكُل شيء اعرف فكرت اروح اشوفهم
-جُمان: ليش ماما ؟ محتاجة شيء ؟ رايدة شيء راتب أبوية يكفي
-امل: مو قصة احتياج يا ماما بس المعمل كُلة نسوان وياهم جارتنا
أم علي فكرت اروح اشتغل وياهم هم اني الي مخلصة وقتي ونهاري وملتهية بشيء وهم مستفادة
-جُمان: ماما الخياطة مُتعبة اني افكر بيج راح أتعبين ارجوج شيلي هلفكرة من بالج بلاها
-امل: جمون خليني حبيبتي جاي امل يايوم والله من تروحين للدوام واني بين حيطان صدري ينقبض خليني علىٰ الاقل تستأنس روحي بين النسوان اشتغل واللتهي وهم أطور من خياطتي
-جُمان: أفكر بيج أمي
-أمل: شوفيني بين أربع حياطين شسوي خليني اللتهي علىٰ الأقل الوحدة راح تموتني يايمة..
باوعت إلها وبقيت ساكتة محچيت شيء بعد شفتها كُلش فرحانة ومُصرة ع الموضوع وماحبيَت أكسر بواهسَها واعارضهَا بقرارها تحملت كل شيء لخاطري واخاف عليها من الهوىٰ أمنتها بين ايدي ربـي الحبيب وقبلت..
-جُمان: ثاني يوم رحنَا علىٰ المعمل وچانوا ديختبرون ماما بكذا تصميم تگدر تخيطَة وتضبطة وماما ما شاء الله مبدعة بحيث يوميَن ودزو ع ماما تشتغل كُلش فرحت وبدت تشتغل
ومن ثنينا نرجع من دواماتنا نگُعد نسولف عن يومنا وتسولفلي شلون فرحانة وصارو عندها صديقات وشلون حابة المكان أفرح وأرتاح حيل علىٰ راحتهة وفرحتهه لأن أدري امي مُبدعة بالخياطة لو ينحط گدامهة أصعب تصميم تضبطة وتسوي أحلىٰ بعد.
اخخ أمي يا أمي لو تطلب روحي انطيها الها حنينَة بشكل مو طبيعي من اتمرض تحتار شتسوي وتبقىٰ تدعي يندار المرض بيَها ولا فد يوم خلتني احتاج شيء بهلدنيا ..
مافد يوم خلتني أحس اني يتيمة أو بدون سند صارتلي أب وأم صارتلي ظهر وسند وشوكة بعين كل شخص يحاول يمسني لو بحچاية .. علمتني وقوتني انطتني دروس خلتني أعرف الناس أعرف الخير من الشر علمتني علىٰ الدين ...
الحلال حلال والحرام عمرة ما راح يتحلل .. علمتني أصبر ولو ردت شيء وصارت روحي بيه بس مو خير ألي اتركة وأتجه غير أتجاه وحتىٰ لو كنت ماحابة الشيء لكن دامة حلال ومسموح بيَه
چنت اقتنع بيَه واحبه
- احترم الدين وأحترم كُل الفروض الي ربنا فرضها علينَا ما اتغاضىٰ عن كلامة ولا اتغاضىٰ عن الي أمرنا بيه
مشيت علىٰ مبدأ ..
- ألدين الابتعاد عن الحرام ليس الابتعاد عن الحياة
جاي نمشي اني ومنَار بالجامعَة كل وحدة بأيدهة قهوتهة بهلبرد ومجرشين تجرش نمشي ونسولف .. طخني واحد بكتفي ومشَىٰ ما شفَت شكلة وحتىٰ مااعتذر رمشت بعدم استيعاب شكوو هاي ثاني مرة تصير وياية وماعرف شكل الشخص ..
-منَار: يا گبر وبصفة مطي شبَي هذا ؟
-جُمان: حَتىٰ مااعتذر ولا وگف
-منار: شنو ذنبي ابدي صباحي بناس عديمة ذوق وعافطة ..
-جُمان: يله يمكن ديمشي وما انتبه .
-منَار: اي اثول غير
-جُمان: ول ول انتِ العالم متخلص من لسانج
-منار: والله لحد يوصل يمنة ويطخنة عااااد واحنة نسكتت
-جُمان: يبووو
-منار: هااا هااا قبل لا أنسىٰ
-جُمان: شكوو ؟
-منار: صدُگ جُمان خطوبَة أختي لُمىٰ الخميَس يعني اكيد اكيد تجين
وما اريد اعتراض داعزمج من باب الاحترام عشتوا هههه شوفي داحترمج شووووك
-جُمان: يعني شگول شكراً علىٰ احترامج ست منار
-منار: لا ولوا هذا واجبي
-جُمان: شايفيَن كُل الخير ان شاء الله ضحكت وگلتلها
أفكر والله تدريَن بيَه ما أحب الهوسَة الي تصيَر بالمنُاسبات
وگفت وصفگت ايديَها وگالت بنبرة استهزاء وهي تعوج بحلگها تقلدني لو ييدي ومو عيب من العالم افر وجهة براشدي تنرفزني من تقلدني بنفسي ابچي حيوانة يامنار..
-منار: أفكر أفكر گومي لچ أفكر شنو لعد شنو تعوفيني وحدي بهيچي يَوم بعدين هيَ هاي الهوسة تصير كُل سنتين مرة قابل يومية خطوبة وعرس
صارت تلعلع يبوو راديو اشتغل يم راسي وگعدت ترطن وتقنع بيَه لحد مادخت وأصلًا اقتنعت غصباً ما عليه وحچيت ..
-جُمان: بَس أجي أجي ورجلي فوگ راسي همينَة بس بسس
ضحكت مرتاحة وصارت وتغنَي اجيبَك للدرب گتلَك اجيبَك وتطگ أصبع .. سكتت وصفنت بوجهي وكأنُ جاي تتذكر شيء بعدهة نطقت وگالت بحماس..
- جبنَالك جص مال عگادة جبنَالك حصَوة ومصيَادة
-جُمان: هاي شدتسَولفيَن منين الج هذن
-منَار: هاي بگتهن من الفيس لعد اني شمعرفني بيهَن
رجعت للبيت وفاتحت ماما بالموضوع فرحت اتصلت بيها خالة ام منار وعزمتهة ومن عرفت ماما راح تروح اقتنعت أكثر يله شسوي أتحمل هلاجواء بالأخير اني رايحة لخاطر منَار ما أريد اكسر بخاطرهة ..
گعدت ثاني يوم مارحت للدوام غياب يعني أكيد مو جديدة عليه طلعت من الغرفة وصارت بوجهي ماما صفگت وحچت بعدم رضا ..
-ملكة الغيابات
-أهم شيء ملكة
-أمل: يله زين تسوين اني هم اليوم مارحت للمعمل مالي خلگ ورجلية توجعني ..
-جُمان: شكوو شبيج شنو يوجعج ؟ أخذج للطبيب
-أمل: ههههه شبيج ولج
-جُمان: لا تخوفيني وتسكتين شنو اليوجعج
گعدت علىٰ القنفة وهي تضحك فتحت أيديها وصاحت ألي رحت إلها أمشي قلقانة عليها ..
-أمل: مابيه شيء ولج ماجاي تشوفيني يله بعد أحسن همزين اثنينة مارحنة تعالي خليني أشبع منج
گالتها ولمتني حضنتني حيل تشم بيه شم ، گـلبي تضاربت نبضاتة غمضت عيوني مدمعة شبيه دمعت قابل جديدة أول مرة امي تحضن بيه .. شنو شعوري ماعرف بس ما أريد أبتعد عنها استنشقت عطرهة مدمعة ..
-جُمان: الله
-أمل: شنو ؟
-جُمان: ريحة المسك تهب تهب منج
ضحكت وشدت علىٰ حضني أكثر ، شعورنا بهليوم مختلف محد تريد تترك الثانية ومحد تعرف شكو وليش بقينة فترة علىٰ هلوضع لحد ما أذن ونهضت توضيت ورحت أصلي خلصت شفت مفاتيح الجنان گدامي فتحتة دورت علىٰ دُعاء الجوشن وبديت أقرأ ..
-يَا مَنْ لا يُرْجَى إِلَّا فَضْلُهُ ، يَا مَنْ لا يُسْأَلُ إِلَّا عَفْوُهُ ، يَا مَنْ لا يُنْظَرُ إِلَّا بِرُّهُ ، يَا مَنْ لا يُخَافُ إِلَّا عَدْلُهُ ، يَا مَنْ لا يَدُومُ إِلَّا مُلْكُهُ ، يَا مَنْ لا سُلْطَانَ إِلَّا سُلْطَانُهُ ، يَا مَنْ وَسِعَتْ كُلَّ شَيْءٍ رَحْمَتُهُ ، يَا مَنْ سَبَقَتْ رَحْمَتُهُ غَضَبَهُ ، يَا مَنْ أَحَاطَ بِكُلِّ شَيْءٍ عِلْمُهُ ، يَا مَنْ لَيْسَ أَحَدٌ مِثْلَهُ . (( سُبْحَانَكَ يَا لَا إِلَهَ إِلَّا أَنْتَ ، الْغَوْثَ الْغَوْثَ الْغَوْثَ ، صَلِّ عَلَى مُحَمَّدٍ وَآلِهِ خَلِّصْنَا مِنَ النَّارِ يَا رَبِّ ، يَا ذَا الْجَلالِ وَالإِكْرَامِ ، يَا أَرْحَمَ الرَّاحِمِينَ .
بقيت ساعة أقرأ بيه ودموعي تجري شگد بيه خشوع ، شگد عظيم ومن يقراه الأنسان يدرك عظمة ربه أحب دُعاء الجوشن الكبير أحسه حنين بكل مرة أقرأه يقربني لربي أكثر..
تغدينا وخلصنة شلت المواعين نظفت البيت ماقبلت أمي تسوي ولا هلگد ولا تشيل إلها عودة ماريدها تتعب خلصت كُل شيء واجيت الها
-جُمان: أشو متمددة لعد متنهضين تغيرين ملابسج وتتحضرين ؟
-أمل: والله يوم أشو مابيه أنهض حتىٰ ومالي خلگ مدري شكو
-جُمان: لتگولين ماراح ترحين ؟
-أمل: تعذريلي منهة يوم والله مابيه روحي انتِ
تململت وگعدت وجهي محتقن بس فعلاً حسيتهة تعبانة ومالها خلگ ردت أبقىٰ يمها بس ماقبلت وگالت منار راح تزعل اتنهدت ونهضت احضر نفسي گعدت گدام المراية صافنة مرت ربع ساعة صافنة باللا شيء وفكري بعيد ..
فزيت علىٰ رسائل منار .. فتحت كنتوري اختاريت لبسة حلوة ومحتشمة خليت مكياج خفيف وأكثر من خفيف هم ملامحي أبد ميرهم إلها المكياج القوي المكياج الخفيف دائماً يلوگ لوجهي ..
خلصت رشيت عطري وطلعت حذائي واتصلت يبوو منار ماكو مجال ماكو صبرر چنها ماما ..
-منَار: ها شنو مخلصتي صدُگ لو گالوا المعاريَس ثنين والمخابيل الفين دفضيها يمتىٰ يجي السايق عليَج
-جُمان: خلصَت والله هاي دقايق خل يجَي ع مايجي مخلصة اني
عشَر دقايق تقريباً ورجعت خابرتني منَار گالت السائق واگف بالشارع بيتنهم قريب علىٰ بيتنا بس بعد تعليمات أمي هاي أتصلت بيها وگالت إلها وتعليمات فلفل أمل متتخالف ..
لبسَت البشَت فوگ ملابسَي وحجابي وسلمَت علىٰ ماما وكُل شوي اباوع الهَا ساعَة احضنهَا ساعَة ابوسهَا واتغزل بيَها لحد ما طردتني هيَ وگالت يلا روحي عيَب تأخرتي
- گلبي مقبوض وماحابة الروحة بس ماگدرت اكسر بخاطر منَار
وخصوصاً هيَ هوايَه أصرت انوا احضر واكون وياها بس غير افتهم شبيه هيج احس وجهي ميگصة الموس حتى واني مشايفتة شبيه شبيه رايحة عرس مو فاتحة ترىٰ...
وگفت ماما بالباب مشيت مسافة وگفت باوعت إلها أخذت نفس وصعدت دقائق و وصلت توني نزلت من السيارة داعدل بحجابي واشوف منَار واگفة بالباب وهي تضحك رمقتهة بنظرة أستفهام..
-منَار: عيَن الحارة الحمزة يطفيهَا وعيَن الباردة كُل الهلا بيَها
چانت منَار تحفة طالعَة جمَال ونعَومة ولابسَة فستان اسَود قصيَر
واكسسوارات فضيَة ومكياجهَا شيء علىٰ شيء چان يجننننن
دخلت وياها بيتهم مخبوص وأصوات الدي جي عالية حيل شگد أكره هذا الصدىٰ وصلوا اهل العربس وصار المُكان زحمة نسوان كومة عقدوا الهم وكُلها تهوس وتهلهل .. لبسوهم الحلقَات وبقَوا البنَات كُلهم يرگصون ومنَار كُل شوي تگًلي
-منَار: شبيهن غير ينطني مجال ارگًص اني اخت البنية
احتلن البيَت احتلال نَوب كُلها تطافر يمعودات نريد السراميَك حيتفطر
فطست ضحك عليّها معصبَة وتدردم وهي ناعمة وتنتر نتر وجهة محتقن شگد حلوةة بيومهة طالعة بقت كل شوية تزفر وتحچي من بين أسنانها وهي تباوع أخر شيء حچت بملل ..
منَار: جُمان الظاهر انغزينا واني ماگدر ما ارگص وهذن مينطن مجال اضيَع بيناتهن تعالي نروح نرگُص بالحمام اشرف النَا
-جُمان: هَـو أني أعرف ارگص كتفَي ما أعرف اهزة
-منَار: اوف يا گلبي مَا بيَچ خير رگص متعرفين لعد شتعرفين
لج اني بس تطكني كئابة اللف الشال واشغل ساجدة وانعل ابو الضوجة
-جُمان: مااا اعرف علمينَي شو
ما گالت شيء اجت وگفت گدامي وهَي تهز بكتفها وتگول
-منَار: هيچ هيچ دحركي كتفج وحدة يتحرك
حركت كتفي وصرت چني واحد لازمني وديحرك بيه
-جُمان: ههههههههههههههههه يااا ولچ شنو هاي شلون تهزين ماا اعرف اني مداتضبط ويايَة اشووو
رفعت خصلة من شعرها بأصبعَها وگالت
-منَار: حبيبتي امكانيَات مو كلها مثلي
-جُمان: استقري ياصافيناز
حطت ايديها علىٰ خصرها وگالت
-منَار: يااا وصافيناز شنو تروحلي سبَع فدوات اني بس الج ولزوجي اهز
نهضت اختها ترگص وهي تأشر إلها بمعنىٰ تعالي اخذيني وتتوسل بيها بنظراتهة أجت أخذتها وما ارتاحت اله من هزت اجتني رادت توسلت بس ماكو اني ما ارگص وماعرف أصلًا..
-منار: لچ اخوي علاوي يهز كتف أخلي يعلمج؟
-جُمان: ادبسيييز
-منار: هههههههاي
قَرب يصير المَغرب وراحوا النَاس بقيَنا بس اني والبنات صديقاتها وقرايبهَا بالي يم ماما صرت اللوب تبَاركت الها وسلمَت عليهم واترخصَت منهم حتىٰ أرجع بس منَار گالتلي انوا ابن عمَها مموجود هسة ..
-منَار: جُمان انتظري فد نص ساعة ويجي ياخذج
-جُمان: لاقلبي قرب يصير المغرب اني اروح وحدَي
-منَار: لا خلي اروح وياچ اوصلج اني وارجع
-جُمان: هاي شنو يعني توصليني وترجعين وحدج
اني اروح وحدَي هوَ هذا البيَت قريَب قلبي لتخافيَن
أصريَت أنوا اروح ماگدرت أنتظر گـلبي نار علىٰ ماما خفت تصخن لو يصير بيها شيء لأن تعبانة كانت بعدني أمشي رفعت نظري لاحظت بَدت تظلم الدنُيا لو ممتأخرة هيچي وجاية من وقت شوي أفضل محد بالشَارع واني وحدَي أمشي وبيَتنا صار بعيد بهلوقت ..
دقت طبَول بگلبي من الخوف صرت ارمَش بسرعة فكرت ارجع
بس گلت لا والف لا هو شكو خليني امَشي هسة اوصل صرت اسولف بيني وبين نفسي ..
سميت بالله ومشيت سرحت بتفكيري مافزيت وأنتبهت الا من اعترضت سيارة طريقي بلعت ريگ عاگدة حواجبي سدت طريقي كله التفتت وراي محد محد ياربي المُكان فارغ ولازم اعبر هذي الدربونة حتىٰ اوصل فرعنا..
بقيت واگفة بس رجلية صارت مثل الخرخاشة من الرجيف منين اشرد وين اروح بيا طريق والطريق انسد ارجع واركض خاف يلزموني هذول منين گـلبي راح يوگف ليش اعترضولي يارب سترك سترك...
تصنمت بمُكاني برعب من شفت اشكالهم بعد ما اگدر اوگف درت وجهي بهلع وخوف ركضت بكل قوتي بس سُرعان ماحسيت أحد قيدني من الخلف هزيت راسي من صار شيء علىٰ حلگي صرخت صرخة منها ثواني بقيت اشوف الي گدامي وبعدها انتهت الرؤية عندي...
يتبع....
<______________________>
حسَاب الانستا 💋.
rita.almukhtar