ولا تنسون التصويت تقدير للتعب
#ذنوب_على_قيد_الغفران
#البارت_الواحد_والعشرون
فهد : كمت نزلت جوه اشرب ماي البيت هدوء الابره اذا تذبها تسمع صوتها دخلت للمطبخ وجان اشوف مرت فيصل نازله بملابس النوم دنكت راسي بسرعه وصحت شنو هاييييي
ساره : فزيت ... لفيت الروب على جسمي بسرعه اسفه ماعبالي انتو كاعدين
فهد : درت وجهي .... موعيب عليج تنزلين هيج وين كاعدين ببيت دعاره احنه امشيييييي ولييي لغرفتتتتج هو الصوج مو بيج صوج التيييس رجلج الي خلاج تنزلين بهالمنظر يييييييله ولي ليش واكفه
ساره : بخوف حاضر حاضر ... صعدت ركض فوك يمه هذا شبي شدعوه شكد عصبي
فيصل : شبيج
ساره : بارتباك هيج ماكو شي
فيصل : وين الجاي
ساره : حسيت نفسي تعبانه ماكدرت اوكف فصعدت
فيصل : خلص ارتاحي اني اكوم اسوي جاي لروحي
ساره : لزمته بسرعه لا لا خليك يمي حباب كلش تعبانه
فيصل : ماشي
فهد : يعني مو وضعيه هاي انوب الواحد حتى ابيته مياخذ راحته شهالهيلكه هاي وين كاعدين احنه ومن شوكت الجناين ينزلن بهالمنظر هذا وكأن هالشي جدا عادي اصلا اخواني شلون يقبلون ما ادري شربت ماي وصعدت لغرفتي حتى انام ورايه دوام الصبح
_____________________
الساعه 7 صباحا
غنى : كعدت الصبح سبحت وبدلت واطلعت مريت على غرفه فهد ... ابتسمت بهدوء والله مكانه خالي طلعت من الشقه قفلتها ورحت يم المصعد لكيت ثنين ولد واكفين يمه درت وجهي اريد انزل من الدرج ... سمعتهم يحجون
: اكول شو استاذ فهد هالايام هواي جاي نشوفه على غير العاده
: يجوز عنده شغل بالعماره
: اي شغله بالطابق الرابع بس تصدك خوش شغل الله يقوي
: شنو قصدك
: هيج يله تعال
غنى : امشي واتذكر كلام هذا الولد شنو قصده حاولت افهم كلامه بس مستوعبت شي معقوله يقصدني الي لالا شنو يقصدني اصلا فهد من يجي محد يشوفه ... نفضت الافكار الي ابالي ورحت للعبريه صعدت متوجهه للكليه اول ما وصلت كعدت اراجع شويه ودخلنه للامتحان .... يارب كون الاسئله سهله يارب
جعفر : شبيج غنى ليش ترجفين
غنى : استاذ خايفه
جعفر : خليت الورقه كدامها اهدي انتي شاطره واكيد راح تجاوبين لتخافين الاسئله سهله واني موجود اي شي تحبون اوضحه بالاسئله ماعندي مانع
غنى : شكرا استاذ سميت بسم الله وباوعت للورقه قريت الاسئله وحسيت مي بارد ونزل على كلبي ... اخذت القلم وبديت اجاوب كملت اول وحده الحمدلله ضلينه فتره كاعدين وسلمنه اوراقنه وطلعنه
جعفر : شلونج بالامتحان
غنى : عاشت ايدك استاذ الاسئله كولش سهله
جعفر : ابتسمت الاسئله مو سهله انتي شاطره ... وانتي نرجسو شلونج بالامتحان
نرجس : ما مجاوبه وبالعباس اذا رسبتني ياجعفر اخلي ابويه يطردك من البيت انت شنو الله مسلطك علينه بلاء شهالاسئله ادري جابر بن حيان احنه ليش اسئلتك صعبه حرام عليك هاي اخر سنه صمطت ابهاتنه
جعفر : بحده ادبسزز حيوانه شنو صمطت ابهاتكم بسيطه خلي نرجع للبيت واعرف شسوي وياج اذا ما ارسبج اطلع مو خوش ادامي
نرجس : اصلا انت مو خوش ادمي
جعفر : خزرتها ولج
نرجس : انت اسمك جعفر موخوش ادمي شبيك
غنى : هذا العرك كله واني واكفه على جهه ميته من الضحك .... خرب يومج نرجس شلون تلاسنه وهو يتخبل من تلاسنه همزين ماكو احد بالقاعه
نرجس : طلعنه ... انتي ضحكي ضحكي
غنى : ههه والله العظيم شكلكم تموتون من الضحك مكدرت اسيطر على نفسي
نرجس : دتعاي خلي نكعد وسنكري براحتج ... رفعت ايدي الله لا ينطيك ياجعفر يا ابن جليله عساك باسهال معوي يخليك اليوم كله بالحمام على هالاسئله هاي
غنى : عززه بعينج نرجس على حساب الامتحان تدعين على اخوج هيج
نرجس : ولج مو انتي متدرين بي يسوي خباثه ويانه يجيب الاسئله صعبه
غنى : ليش والله اسئلته سهله
نرجس : طبعا عندج سهله مو انتي مهكره الكتاب كله تعلميني بيج
غنى : ضحكت والله عندج مصطلحات مدري منين تجيبيها ديله تعاي نروح يم اروى
نرجس : اي يله
______________________
فهد : دكيت الباب ودخلت ... صباح الخير
غانم : ابتسمت صباح النور هله بالسبع شلونك
فهد : كعدت الحمدلله انت شلونك
غانم : والله جنت شايل هم وخايف عليك بس الحمدلله عدت سلامات
فهد : اكدر اعرف ليش خليتني مختفي كل هالفتره السالفه مافهمتها بشكل واضح منو الي مبلغ واصلا شمدري اني بالاستخبارات
غانم : مو صعبه يعرفون هذوله ايدهم طويله وسهله عليهم يطلعون اي واحد واحمد ربك لو ما احنه متسترين على هويتك تستر تام جان انت هسه بخبر كان
فهد : ليش
غانم : مو الي مبلغهم كايل الي تسبب بالقبض على هالعصابه ضابط يشتغل بمركز (...)بس منو ما عرف لهسبب كتلك اختفي وبلغت انو انت وكم ضابط رحتو انذار للبصره حتى الشبهه تطلع منكم
فهد : معقوله واحد من الشرطه
غانم : لا طلع فراش يشتغل هنا بس ما اكدر اتحرك خطوه وحده ضده قبل ما اوصل للي اريده
فهد : بابتسامه جانبيه ... تريد تراقبه حتى تعرف وين مكان هالانذال بالضبط مو
غانم : عفيه بس انت تفتهم ... احنه ساكتين عليه ب
لكي يسويله فد عمله تدلينه عليهم والله متحلف بيهم تحلفه بس عد الله خبرها
فهد : اي ... اباوع دخلو جماعتي
مهيمن : هله بابو الفود شلونك
ايمن : بضحكه شلونها البصره
فهد : هله بيكم والله طلعت البصره على بعد نص ساعه من بغداد تخيلو
الشباب : ههه
عمر : شخبارك صار اسبوعين وجهك ماشايفي ... بس تدري راسنه بارد لا اكو واحد يصيح ولا يتعارك
فهد : وراكم وراكم لو تطلع نخله براسكم ما اعوفكم
حيدر : مبروك الترقيه فهد
فهد : باستغراب اي ترقيه
غانم : اجه كتاب بترقيه الضباط ومن ضمن المترقين انت فمبروك تستاهل
فهد : الله يبارك بيك ... باوعت للشباب وانتو
عمر : احنه بعد كتابنه ماوصل
حيدر : ولا راح يوصل الاستاذ فهد اولى منه احنه بيش كيلو
فهد : كمت من رخصتكم اني اروح اشوف شغلي بدل هالحجي الماله داعي ... باوعت لعمر اريد اسم الشرطي الي مشتكي عليه فورا
عمر : هاي بعدك متذكر السالفه
فهد : بهدوء اعتقد كلامي واضح اسم الشرطي الكه على مكتبي وفورا ... طلعت من المكتب دخلت لمكتبي وبديت اشتغل ... شويه واجه عمر انطاني اسمه كمت دزيت عليه اجه للمكتب
: سيدي ردتني
فهد : تعال استريح
: كعدت خير سيدي
فهد : كمت وكفت كباله دنكت اني شوكت معتدي عليك
: هاا
فهد : عبالك ماراح ادري مو تره ماكو سالفه تنضم بالمركز اول وتالي توصلنه الاخبار ... احجيلي ليش كايل للشرطه الي وياك اني معتدي عليه واني ماشايفك غير مرات معدوده وحتى ما متعامل وياك
: سيدي والله جانت بابة شقه ما ادري شلون دره المسوؤل
فهد : رفعت حاجبي بابه شقه كتلي ... زين شنو رأيك نسوي الشقه جد
: بارتباك ش شنو
فهد : جريته من قميصه ... شوف ولك تره اني روحي خلصانه وما ناقص هسه الزمك اخليك جنازه والله لتخليني اشد وياك واخليك تستقيل روح اسأل الي قبلك شسويت بيهم من لعبو بذيلهم اني محترمكم ومخليلكم قيمه انتو هم احترمو نفسكم والله العظيم اذا اسمعكم جايبين اسمي حتى لو بمدح انعل والديكم فتهمتتتتتتتتت
: فتهمت فتهمت سيدي
فهد : دفعته يله امشي اطلع وحسك عينك صوتك اسمعه
: حاضر سيدي
فهد : طلع واني رجعت اكمل شغلي اجاني اتصال شفتها مروه اول تالي تخابرني ... الوو
مروه : هلوو فهد شلونك
فهد : هله بيج مروه خير مخابرتني خو ماصاير شي
مروه : لا ماكو شي بس طلعنه من وكت اليوم و جاي اخابر على حارث بس ميرد
فهد : تردين امر عليج
مروه : اي ولو زحمه عليك
فهد : بس اني هسه بالدوام يله لتشيلين هم هسه اخابر علي يمر عليج
مروه : هاا لا ماكو داعي لعد راح ارجع ويه وحده ويانه
فهد : عليمن تكلفيها هسه علي يجيج هو دوامه قريب عليج
مروه : لا شكرا هسه راح اروح ويه صديقتي زحمتك فهد يله باي
فهد : لا ماكو زحمه باي ... سديته ورجعت اشتغل
مروه :افففف ... خابرت شهد الووو الخطه فشلت يفهيمه
شهد : شنو ماقبل يجيج
مروه : لا بس طلع بالدوام وكلي راح اخابر علي يجيج
شهد : شكد فكر انتي ... يله مو مشكله نفكرلج بخطه ثانيه
مروه : الله يستر من خططج الفاشله
شهد : هسه صارت خططي فاشله نسيتي سالفه المختبر القديمه لو لا .... اصلا لو ما اني مطلعتلج هالخطه ماجان فهد وصلج ولا استفردتي بي
مروه : ضحكت ديله خلي اروح باي
شهد : باي
_____________________
غنى : كاعدين بالمحاضره الاخيره ونرجس بس تحجي اريدها تسكت ماكو مستمره بالسوالف
نرجس : سمعتي اروى اليوم اخوها الصاك يجي ياخذها
غنى : كافي سكتي راح تنتبه الاستاذه
نرجس : ديله عاد هي شلونها
الاستاذه : نرجس كافييي شكد تحجين بعد اذا اسمع صوتج اطردج بره
نرجس : ما سويت شي حتى تطرديني اصلا جنت اتناقش ويه غنى بالماده لان مداستوعبها منج
الاستاذه : متستوعبيها شنو اني هنا الاستاذه مو غنى عندج شي ترديله توضيح كليلي اعيدلج الشرح مو تضلين تحجين ويه زميتلج
نرجس : ست غنى تعرف توصل المعلومه اكثر
غنى : خزرتها ... همست كافي نرجس حرجتيها
الاستاذه : انتبهو رجاءا وخلو منقشاتكم وره المحاضره خوش
غنى : خلصت المحاضره وطلعنه للبيت راحت نرجس واني طلعت اتمشى للشارع العام امشي وما احس غير سياره تصف كبالي نزيت اباوع هاي سياره فهد
فهد : نزلت الجامه الله يساعدهم
غنى : تنهدت وكفت كلبي والله
فهد : كلشي مابيج .... باوعتلها هاا راح ترحين عبريه
غنى : اي
فهد : رجعي لمكانج واني اوصلج
غنى : لا شكرا فهد روح لاروى منتظرتك هي وبتول يله اني اروح موحلوه وكفتنه هنا ... باي
فهد : ديربالج على نفسج
غنى : صار
فهد : حركت السياره للكليه وصلت لكيتهن واكفاتلي بره صعدن
اروى : شلونك فهد
فهد : الحمدلله
بتول : يمه متت من الحر اعلك التبريد فهد
فهد : تره الجو بعده بارد وينج وين التبريد
بتول : والله حاره فهد شوف وجهي صار احمر
فهد : باوعتلها وين الحمار بالموضوع ؟؟
اروى : خليت ايدي على حلكي ... يله فهد حرك تره ميته من الجوع
فهد : يخسى الجوع هسه ثواني وانتي بالبيت
اروى :
بعد كلبي
فهد : وصلنه للبيت نزلنه قفلت السياره ودخلت سلمت وصعدت لغرفتي سبحت ونزلت لكيتهم صابين الغده كعدت حتى نتغده
سعاد : فهد باجر اريدك تروح ويايه حتى نرجع مرت اخوك
فهد : واني شكو بمرت اخويه
سعاد : مو ابوها يعزك وميرفضلك طلب
فهد : شنو ثارد وياا للعجز ويعزني ... تردين روحي انتي والحجيه قنعنها
فيصل : فهد لخاطر ربك روح حاجي ابوها لان مطنكر وميقبل ترجع واني اريد مرتي
علي : وانت اذا تريد مرتك ليش تزوجت
فهد : يله جاوب
فيصل : باوعت لساره ... موضوع زواجي الثاني لحد يدخل بي والاء مرتي وام جهالي مردها لازم ترجعلي
ايمان : هذا عين العقل ابني لازم ترجع مرتك اذا مو لخاطرها لخاطر جهالك
سعاد : اسمع فيصل اذا رجعت الاء ساره تطلع
ساره : شلون شلون يمه والله باحلامج نايمه على كلبج وبهالبيت ما اطلع منه اله اصير جنازه
فهد : ذبيت الخاشوكه بهدوء ... اشو انتن تحجن بكيفجن وحده تطرد بكيفها والثانيه متقبل تطلع ... مو جنجن رحتن زايد خلن كلامي حلقه بأذنجن بهالبيت اني الي اقرر منو يبقه ومنو يروح فتهمتن لو اعيد
ساره : لا عيوني شتعيد افتهمنه كلشي ولا تضوج انت
فهد : باوعتلها صفح وكمت غسلت واجيت كعدت ... اجتني رساله من غنى فتحتها لكيته مصوره كدر دولمه وكاتبه "اليوم سويت الغده دولمه وتذكرتك" ..... ابتسمت مراسلها
سعاد : اباوع لفهد مدري منو راسله وحلكه انشرك من الاذن للاذن ... والله سالفتك مو خاليه يا ابن ايمان وياخوفي يطلع الي ابالي صحيح
بتول : فهد ضحكنه وياك تره ضايجين
فهد : سوالف كبار بعدج صغيره
ورده : هيهييي دي كبهتك طارت في السما
فهد : ورده تأدبي
ورده : مالك يمرسي ما انت كنت عسل وزي الامر مالك مكنت كويس حصلك ايييه
فهد : ضحكت بصوت عالي ولج انتي وتالي ويه سوالفج المكسره هاي بعد ماكو تلفزيون
ورده : لا والله هاي حولنه على اللغه العراقيه
ايمان : اسمها لهجه يحظي
ورده : نفس الشي يمه
فهد : كتبت لغنى تره شهيتيني
غنى : اضملك ؟
فهد : لا شتضميلي ما اكدر اجي اليوم بس اطلبج تسويلي من اجي
غنى : صار
فهد : عندي سالفه وياج بس مو هسه احاجيج بيها لان مالي خلك من يصيرلي مجال احاجيج
غنى : ماشي
فهد : كمت صعدت لغرفتي بدلت ونمت
_______________________
بعد اسبوع
غنى : صار اسبوع على روحه فهد ولسه ماشفته بعد ... كضيت هالاسبوع ملتهيه بين الامتحانات الي مدتخلص وبين خالتي الي شكل سفرتها مطوله لا وهواي هم .... من غير تلمحيات واحد من سكان العماره كلما يشوفني يذبلي حجايه والمشكله الحجي كله شفرات وما افتهم شي ابد .... طلعت اذب الزبل وشفت ود والحجيه اشواق ... سلمت عليهن بس جان سلام ود شويه ثكيل يجوز اني اتوهم دخلت للشقه سديت الباب وكعدت اقره حياتي عباره عن روتين ومرات فهد يخابرني يسأل عليه او يحجيلي عن يومه وهالشي كان كفيل بأنو يغير مودي
_________________________
ايمان : يمه شبيك تفرفح
فهد : يمه يعني ميصير مو وضعيه هاي مرت فيصل ما مخليه حشمه واحترام لأي احد بهالبيت ... الف مره كتلج حاجيها على لبسها ماكاعده وحدها هي وياها تلث زلم
ايمان : حاجيتها يمه تكلي صار وترجع على لبسها ولا جني حاجيتها شسويلها يعني
فهد : شوفي اني بعد ما اتحمل تره اكل لفيصل وساعتها هو يتصرف شنو مرته تنزل لافه روب نوم على جسمها لو تلبس كدامنه تراكات حتى داخليات ماكو جواهن مو وضعيه هاي مره ثنين عشره غلست بس لهنا وكافي الى متى اضل خال راسي بالكاع مو ركبتي انكسرت من وراها
علي : صحيح حجي فهد يمه مرت فيصل كلش اوفر بلبسها حتى حجابها مو صحيح تنزل مطلعه كذلتها وين كاعدين احنه حتى لو اخوان رجلها بس مهما يكن الاحتشام مطلوب
ايمان : يايمه فهموني شسوي مو طلع شعر بالساني واني احجي وياها وهي تنطيني الاذن الطرشه
علي : وتالي يايمه شلون نبقه هيج متضايقين بالبيت
فهد : على حسب كلامكم هو مو جان مكعدها بمشتمل ليش ميرجعها لهناك ويفضنه
ايمان : باعه يحظي اول ماجابها لهنا راح باع المشتمل
فهد : مسحت على وجهي متنهد سمعوني زين اقسم برب العزه اذا تكررت كدامي هيج مواقف اسحلها كدام الكل واغسلها غسله بحياتها ما شايفه مثلها تره لعبت روحي اصلا بالبيت ماراح ابقه رايح للحجيه احسلي شنو عايزني اني ... عفتهم وطلعت
ايمان : يعني اخلص من الاء تجيني الانكس منها وتالي ياربي
فهد : رحت لبيت جدي دفعت الباب ودخلت لكيت الحجيه كالعاده متربعه بالكاع ومدري شتسوي ... سلام ياحلو
ياسمين : شلت راسي .... منك من الشيطان اول تالي تجي يمي
فهد : بست راسها حقج عليه بس والله مجال ماعندي الشغل هاتكني ما الحك احك راسي خاصه هالاسبوع
ياسمين : ياحبيبي ارحم روحك مو كلشي شغل شغل انطي فنتك لنفسك تره الراحه لازمه
فهد : عمي ما اريد راحه بس شويه خلي مشاكل البين تخف لان طلعت روحي
ياسمين : هم بعدها سعاد تسوي مشاكل
فهد : ليش من شوكت سعاد وجهالها كعدو راحه دومهم مجزعينه
ياسمين :
ميخالف يمه تحملهم مهما يكن يبقون اخوتك وامانه ابوك
فهد : هزيت راسي .... كعدت فتره يمها وطلعت خابروني الولد حتى نروح للملهى رجعت للبيت سبحت وبدلت وطلعت
ساره : كاعده بالصاله وشفت فهد نزل اباوعله لابس قميص نيلي وبنطرون اسود ويفر بالسويج مال السياره
فهد : يمه اني طالع
ايمان : براحتك يمه بس مو تتاخر واذا تأخرت خابرني
فهد : ماشي طلعت اخذت سيارتي ورحت للملهى وصلت وره فتره صفيت سيارتي ونزلت ... دخلت لكيت الشباب كاعدين على نفس الطاوله الي دائما النه
مهيمن : الواحد يسلم بالاول
فهد : اشرت للنادل .... مو شفتكم الصبح شنو كل ساعه نسلم
ايمن : صدك عود ليش تجي اخر واحد
فهد : انتو جنكم ماشايفين تجون اول الناس شسويلكم
عمر : دهاك اشرب
فهد : ما اشرب من واحد وهالنوع مو مااحبه
عمر : بكيفك
مهيمن : تدرون منو شفت هنا
فهد : منو
مهيمن : اللواء جميل
فهد : ليش هو مو مزوج
عمر : واذا مزوج شكو بيها
فهد : شكد عقول نكسه انتو اذا هو مزوج المن يجي لهنا عليمن تزوج اذا يخون مرته
ايمن : يعني تقنعني اذا تزوجت ماراح تجي لهالمكانات بعد
فهد : طبعا لا لان اذا تزوجت اكيد راح اكون مكتفي بزوجتي بحيث ما ادور وراها
مهيمن : الله عليك .... وداعتك هذا بس حجي باجر عكبه نلكاك تندب حظك هنا
فهد : لتخاف مو بس حجي المستقبل يثبتلك هاي اذا تزوجت طبعا
عمر : هههه عرفت راح تحجي هالحجايه
فهد : رفعت الكاس يله انجبو خلي نتابع الفقرات ... ماشاءالله كل الراقصات اليوم يعانن انتفاخ بالعضلات الخلفيه
الشباب : ههههه
فهد : ضليت كاعد ساعتين وطلعت لفرح وصلت للبيت فتحت الباب ودخلت لكيتها كاعده
فرح : شفت فهد دخل عليه ... كمت بسرعه بسته وحضنته مشتاقتله هواي صار فتره طويله ما شايفته ... شتاقيتلك حبيبي
فهد : طبطبت على ظهرها شلونج
فرح : الحمدلله ... تفضل اكعد
فهد : شلونج بهالفتره خو ما احتاجيتي شي بغيابي
فرح : لا حبيبي خيرك سابق كلشي ما احتاجيت غير شوفتك
فهد : كومي سويلي جو صار فتره كلشي ما محصل
فرح : باسف مااكدر حبيبي مريضه
فهد : لعد عليمن خبصتيني تعال وتعال اذا انتي مريضه
فرح : يعني انت تجي لهنا بس علمود تتونس
فهد : فرح نرجع نعيد ونسقل بالموضوع اني اجي لهنا حتى ارتاح واذا انتي مريضه ليش تخليني اجي
فرح : يعني ميصير تجي لهنا حتى نكعد نسولف نحجي موكلشي نومه نومه
فهد : فرح احنه تزوجنه على حساب النومه الي ماعاجبتج والا لو اكو غير سبب المن مبقي زواجنه مؤقت
فرح : على طاري زواجنه راح تجدد العقد
فهد : هزيت راسي
فرح : شكد راح تجدده
فهد : مااعرف لسه ما مقرر
فرح : اكوم اسويلك عشه
فهد : لا ماكو داعي راح اروح
فرح : فهد ما صارلك حتى ربع ساعه شنو السالفه
فهد : من تخلص اجازتج خابريني واجيج خوش يله تعاي سدي الباب ... طلعت منها باوعت للساعه شفتها بالدعش بعد وكت مااريد ارجع للبيت ... حركت سيارتي خلي اروح اشوف غنى هناك هدوء يمها واني مالي خلك الهوسه وصلت للعماره صفيت سيارتي ونزلت ... دخلت للعماره صعدت للطابق الرابع صار بوجهي مازن واحد مأجر شقه هو وجماعته هنا
مازن : هاا استاذ فهد شلونك هالايام هواي جاي نشوفك هنا
فهد : ببرود ليش عندك مانع بهالشي
مازن : لا عمي لا مانع ولا شي العماره عمارتك وانت حر بيها عن اذنك
فهد : دخلت للمصعد صعدت للطابق الاخير ضليت فتره بالمصعد اصعد وانزل استغفر الله هسه هذا منين طلعلي .... رجعت نزلت للطابق الرابع فتحت الشقه بسرعه ودخلت اسمع صوت تلفزيون بالصاله اكيد بعدها كاعده طبيت للصاله شفتها كاعده على التلفزيون رافعه شعرها كبايه عاليه وتاكل بوشار ... اباوعلها لابسه دشداشه قصيره سوده صارت عيوني على رجليها للحظه عبالي لابسه جواريب بيض ما اصدك هذا لون بشرتها معقوله اكو بشر عدهم هالدرجه من البياض ... هااا شو بعدج كاعده ... اني حجيت هيج وهي خطيه فزت فزه
غنى : بسم الله فهد صدوك تحجي حيصير بيه سكر من وراك
فهد : ضحكت خويفه شبيج تقربت منها اباوع لحلكها صار ابيض ... دشوفي وجهج شلون صار شجاج ... صبيتلها كلاص ماي هاج شربي
غنى : شربت مي ... شعندك هنا
فهد : رفعت حاجببي ليش متقبلين
غنى : لا عادي هلو بيك
فهد : كعدت ... شعجب اليوم مصيفه من جنت هنا مكبعه اربعه وعشرين ساعه
غنى : باوعت لروحي عززه نسيت اني شلابسه رحت ركض للغرفه بدلت وطلعت
فهد : ابتسمت ليش بدلتي
غنى : هاا بردت
فهد : اخذت طاسه البوشار ... شجاي تابعين
غنى : فلم
فهد : عليج الله ... اقصد شنو نوعه
غنى : رومانسي اجتماعي
فهد : البوشار عايزه شويه ملح
غنى : كعدت من شفتك وشفتني تكول الاكل عايزه ملح
فهد : اباوعلها كعدت بنهايه القنفه خليت الطاسه على الطبله ونمت بحضنها
غنى : فتحت عيوني شنو هاي فهد
فهد : تعبان لعبي بشعري
غنى : كوم فهد لتروح تنام
فهد : لا ما انام بس خلي ارتاح شويه
غنى : اباوعله غمض عيونه ... خليت اصابعي بشعره و
ين جنت
فهد : بالملهى
غنى : وكفت اصابعي ... بالملهى ؟
فهد : غمضت عيوني اي ليش مستغربه تحسسيني وكأنو اول مره تدرين
غنى : فهد هالشي غلط وحرام
فهد : بهدوء ما اتقربلهن بس اباوع
غنى : حركت ايدي على شعره بس تشوف اشياء ميجوز تنشاف اضافه انك تشرب والشرب حرام
فهد : اني ماشارب كدام احد ولا مسوي دعايه بهالشي ولا شجعت احد يسوي
غنى : بهدوء بس يبقه حرام ... بصراحه لو يرجع بيك الزمن هم تسوي هالاشياء
فهد : لا طبعا
غنى : تنهدت بضوجه ... دتدمر نفسك يافهد وشنو تاليتك ماادري .... ليش اجيت لهنا
فهد : بخفون ارتاح هنا البيت كله مشاكل واني مالي خلكهم
غنى : والى متى تضل تتهرب منهم
فهد : ما اعرف غنى ما اعرف
غنى : ضليت العب بشعره ... اكول فهد انطيني الريمونت من يمك ... مجاوبني باوعتله نام .. ياا صدوك يحجي نام .... ابتسمت على شكله انمدت اصابعي من شعره لوجهه اباوعله عيونه مسحوبات ورموشه طوال سؤال دائما يخطر على بالي الولد ليش رموشهم اطول من رموش البنات مع انو البنات يحتاجن الرموش اكثر .... تلمست لحيته مبين هواي معتني بيها مافديوم شفتها مامرتبه لاهي ولا شعره ... سحبت ايدي منه اجيت اكوم كلب جسمه وحضني من الجانب .... تصنمت بمكاني وحسيت كهرباء صارت باطرافي ... زفرت وحاولت ابتعد بس ماكو ما اكدر اذا هو شكبره جنه غول .... ضليت كاعده على التلفزيون وهو نايم ... والله لو واحد غيرك جان انطيته كفخه كسرت خشمه على هالطلعه هاي ..... خلص الفلم وفهد لسه نايم خطيه مبين عليه كولش تعبان الله يساعد كلبه مشاكل البيت والمسوؤليه كلها على راسه سمعت صوت موبايله اخذته شفت مكتوب امي ... فهد فهد خاله ايمان تدك عليك يمعود اكعد
فهد : فتحت عيوني واخذت الموبايل فتحته ... بنعاس الووو
ايمان : الوو هاا يمه وينك تأخرت وشبي صوتك
فهد : بخشونه نايم
ايمان : وين نايم
فهد : غمضت عيوني بحضن غنى
غنى : سديت حلكه عزززه بعينك فضحتنه
ايمان : بحضن منو فهددد وينك وين رحت
فهد : وخرت ايدها هاا يمه نايم عد صديقي اخذتني الغفه هسه شويه واجي فد ساعه
ايمان : ماشي يمه لتتاخر الساعه بالوحده هسه
فهد : صار ... سديته ورجعت نمت
غنى : شهالجفصه الجفصتها فهد احمد ربك ما سمعتك شكلت
فهد : جريت اذنها حيلل منو يجفص
غنى : اوي فهد خلعت اذاني
فهد : والله انتن البنات سوالفجن مكسره مكضياتها اوي واوي عبالك واحد جاي .. ي......
غنى : لطمت على خدي عزززه فهددد شهالفظه هاي مو عيب عليك دفعته من رجليه كوووم بعد لتحاجينييي والله زعلت شلون تتلفظ هيج لفظه كدامي
فهد : لزمت ايدها هه اسف يله تعاي بشرفج لعبي بشعري ايدج غفتني
غنى : ماكو يله كوم ارجع لبيتكم خاله ايمان بالها يمك
فهد : كمت الله يطيح حظج دومج تعاندين عدلت قميصي وين مفاتيحي
غنى : اخذتهن تفضل
فهد : والموبايل
غنى : هذا وياا تفضل
فهد : تره البوشار عايزه ملح
غنى : دفعت ظهره ضاحكه ميخالف اني اكله روح
فهد : انطيج وصفتي السريه
غنى : هههه لا شكرا خلي وصفاتك الك يله روح لتطلع حجج
فهد : صدك لا كالو البيت بيت ابونه والغرب يطردونه
غنى : يله يله اطلع مع السلامه
فهد : درت وجهي عليها هاا تعاندين شو اله ابقه
غنى : لالا اسفه حقك عليه روح حباب ليشوفك واحد من الساكنين
فهد : مديت ايدي بجيبي طلعت ورقتين ... تفضلي
غنى : لا فهد كولشي مااريد مكتفيه الحمدلله
فهد : خليتهن بايدها يله سدي الباب مع السلامه
غنى : مع السلامه
_______________________
صباحا
اروى : كاعدين بالحديقه نراجع محاضراتنه ... ولجن كافييي لوك لوك لوك متشبعن
نرجس : انتي انجبي باوعت لغنى ولج البارحه اجانه ابن الزفره يخبل يخبل
غنى : ابتسمت خو انتي كل الزلم عندج يخبلون
اروى : خليت القلم بحلكي عندي احساس بيوم زواج نرجس راح تغتصب رجلها وتسويله اعاقه مستديمه ... لو من كد ما تجلب بي تخلص طاقته ويروح بيها الرجال
نرجس : ركعتها بالملزمه الله يطيح حظج شكايليلج ما شايفه
اروى : حركت حواجبي ليش يعني انتي شايفه
نرجس : يبووووو يحجايه رجعي لمكانججج ولج والله صاير بيه تصحر كلشي ماكو
غنى : ضحكت على سوالفهن دومهن يتناكرن
اروى : ضلينه كاعدين نسولف حتى المحاضره نسيناها ..... شويه ومااشوف غير اجت وحده تركض و سحلت غنى من حجابها .... يااا
*******************
يتبع
#ذنوب_على_قيد_الغفران
#البارت_الثاني_والعشرون
اروى : ضلينه كاعدين نسولف حتى المحاضره نسيناها ..... شويه ومااشوف غير اجت وحده تركض و سحلت غنى من حجابها .... يااا كمنه بسرعه
غنى : كاعده ويه البنات ومااحس غير وحده تجرني من شالي درت وجهي عليها شفتها منو هاي ... شبيج هديني
نرجس : دعوفيها شنو طفله انتي
: انتي انجبي جريتها سمعي ولج فكي ياخه عن مرتضى احسلج والله مياااااااخذج لو تمووووتين
غنى : وخررري عني يامرتضى يابطيخ ... وخري الطلاب دتباوع علينه عيب علييييج
: دفعتها ....بصوت عالي شنو خايفه من الطلاب ام الزززززلم ... خلييي يعرفوج على حقيقتج هاااي الي مسويه روحهاا شريفه ضلت تركض وره مرتضى لمن عافني واجه يخطبهااا حقيييييره احجيييي شسويتيله وخليتي يعوفني
غنى : ضليت صافنه بوجها ... انتي شدتحجين يعوفج شنو اني اصلا شعليه
: مسويه روحج بريئه مو تصدكين كلبي تكطع على برائتج ... هاي كدام الطلاب غنى بواكه زلم ومتستحي مرتضى جان ناوي يخطبني وعافني من وراها لتخافين حبيبتي مياخذج والله ... ولج ذوله صيتهم عالي ميكلبون الفكور المكاديه الي مثلج ولج حتى هدومج تسحتل تردين مرتضى يخطبج الج لج بابا اصحي على روحج
نرجس : امشي ولييي منا وانتو ليش واكفين تباوعون يله فاركو ماكو شي سوء تفاهم وصار بين صديقات يله امشو
اروى : اباوع اجن بنات اخذن هاي البنيه الي تصيح واعتقد راح يوصل الحجي للعميد وتصير مشكله لان الطلاب ميسكتون رغم عدد قليل تجمع واغلبهم مافهمو السالفه .... صارت عيني على غنى سوده عليه شالها مخربط وشعرها طلع اباوعلها كامت ترجف ... تقربت عليها غنى حبيبتي ختولي لتهتميلها
غنى : دفعتها واخذت جنطتي وطلعت
نرجس : وين غنى تعالي مشيت وراها
اروى : عوفيها نرجس خلي تروح راح تنفجر اذا بقت هنا
غنى : طلعت اريد اهج من الكليه كلها على هالموقف الي تعرضتله .... صادفني مرتضى
مرتضى : بخوف شبيج غنى ليش هيج صاير بيج
غنى : بدموع وخرررر عنييي
مرتضى : شبيج فهميني
غنى : بجيت روح يامرتضى حسبي ياالله ونعم الوكيل عليك الله لا يوفقك وعسى حوبتي متتعداك بسببك سيرتي حتصير على كل لسان عفته ومشيت احس دموعي تيزاب وتنزل على وجهي طلعت من باب الجامعه وين اروح يمكن حتى عبريه ماالكه هسه طلعت امشي ودموعي يجرن خابرت فهد ... شويه وفتحه ... تنشغ الووو فهد
فهد : هااا غنى شبيج
غنى : تعال فهد حمووت والله
فهد : كمت شبيج احجي لتخوفيني
غنى : هزيت راسي باجيه فهد الله يخليك تعال اخذني مااكدر اتحرك بعد
فهد : وينج انتي هسه
غنى : يم الشارع العام مال الكليه
فهد : يله جاي انطيني دقايق واني يمج .... سديته بسرعه واخذت غراضي وطلعت دخلت لغرفه غانم لكيتهم متجمعين .... اعتذر على المقاطعه بس سيدي لازم اطلع
غانم : خير شبيك فهد
فهد : ماعندي وقت اجيت ابلغك راح اطلع
مهيمن : عدنه تحقيق بقضيه فهد وين رايح
فهد : طزز بالقضيه عندي شغله اهم يله اني رايح طلعت بسرعه اخذت سيارتي حركت بانزين ومشيت بسرعتي ... ياربي شصاير بيها وليش هيج تنشغ وصلت للشارع العام لكيتها كاعده على الرصيف ... دكيتلها هورن ونزلت
غنى : شفت فهد اجه يركض
فهد : بخوف شبيج منو مسوي هيج بحجابج احجييييي
غنى : تبجي وترجف
فهد : خلص خلص تعالي بالبيت نتفاهم ... اخذت ايدها وصعدتها بالسياره ... رجعت صعدت حركت متوجه للشقه ... شبيج غنى طلعي الدره مو شلعتي كلبي
غنى : ابن عمتك حيموتني وين اهج حتى اخلص منه
فهد : مرتضى ؟ شسوالج هالكوا....
غنى : بدموع خلي نوصل واسولفلك
فهد : وصلت للعماره ونزلنه غنى صعدي انتي واني شويه والحكج خاف يشوفنه احد سوه ... شو باوعيلي مسحت دموعها يله نزلي
غنى : نزلت وصعدت للشقه فتحت الباب ودخلت ذبيت جنطتي وكعدت شويه واجه فهد
فهد : كعدت يمها بس فهميني شبيج وشسوالج مرتضى قسم بالله اذا مسويلج شي انعل والديه ... لزمت اديها احجيلي غنى عفت دوامي واجيتج طاير كد ماخفت عليج
غنى : بدموع شوف جنت كاعده ويه البنات ومااشوف غير وحده تتهجم عليه لعبت بيه جوله ذاك الغلط وذاك الحجي كدام الطلاب طلعتني وحده ساقطه ومعندي اخلاق كله بسبب مرتضى
فهد : شلون يعني
غنى : سولفتله كولشي اباوعله ضل صافن
فهد : كمت وداعه امي لزوعه العافيه وهاي الثانيه بس انطيني اسمها اذا ما اخليها تهج من الجامعه كلها اني ما اتسمه فهد
غنى : لزمته بسرعه اكعد فهد لتتهور الله يخليك
فهد : بعصبيه شنو ما اتهوررررر لج هالسافل حتى بالجامعه من خلصتييييي من سوووالفه شسويله اذبحه واخلص منه يعنييي حتى يعتقج
غنى : بدموع فهد كولشي لتسوي اني خابرتك لان مقهوره واجيت اطك مكدرت احجي كدام البنات بأي شي ملكيت روحي غير متصله عليك
فهد : حاوطتها باديه حاضنها خلص اهدي كافي بجي باوعي لروحج شلون ترجفين
غنى : حضنته وبجيت فهد تعبت والله تعبت الى متى اضل هيج لا بحياتي مرتاحه ولا بدراستي مرتاحه بس اريد اعرف المشاكل ليش مواطنتني هيج ... ان
ت كلي شلون حخلي عيني بعين الطلاب بعد وبأي عين حداوم بعد الي صار
فهد : مسحت على شعرها ... مادام انتي ما مسويه شي انعل امه وابو الي يدنالج لو يسمعج حجايه .... خلص اهدي اني يمج مااعوفج والله
غنى : ابتعدت مباوعتله بدموت متعوفني
فهد : ابتسمت من شفتها مبرطمه مسحت دموعها ما اعوفج نايم على كلبج لحد ما تكليلي كافي انت شكد لزكه عوفني
غنى : ابتسمت من بين دموعي
فهد : اي ضحكي حتى تبين غمازاتج عفيه مو غمازات عبالك حفره انتي كلشي عندج زايد عن حده
غنى : تشهك كد مابجت ... شلون يعني
فهد : بياضج زايد عن اللزم وشعرج طوله زايد عن اللزم وغمازاتج واضحه زايد عن اللزم كلشي بيج زايد عن الحد المطلوب
غنى : عن الشقه فهد هسه شنو اسوي اني
فهد : حاولت ابين هادئ كدامها مع انو اني صاير بارود من جوه .... طبطبت على ايدها لتشيلين هم باجر داومي ولا كأن صاير شي وموضوع مرتضى وهالبنيه عوفي عليه
غنى : شلون اعوفه عليك اصلا معندي قابليه انو اداوم من وره الفشله الي تفشلتها
فهد : غنى تعب اربع سنين تردين تضحين بي على حساب الناس صدك تحجين هاي اخر سنه الج حاولي تضغطين على نفسج وتكمليها وساعتها شتردين تسوين سوي اذا ناسيه اذكرج احنه تزوجنه على حساب نخلص من اهلج وحتى ميدمر مستقبلج هم
غنى : شسوي فهد كلي راح اتخبل المشكله اني ما مسويه شي لأي احد ليش ديصير هيج ويايه
فهد : انتي مو مؤمنه ومتدينه لازم تعرفين انو هذا اختبار من الله يعني اني الي كلشي ما افتهم بالدين اعرف اكثر منج
غنى : تنهدت اعرف هذا اختبار بس شوكت ينتهي
فهد : ينتهي ينتهي وتصير سوالف
غنى : غمضت عيوني
فهد : جريت ايدها مقربها عليه
غنى : بارتباك شدتسوي
فهد : وخرت خصله من شعرها خليتها وره اذنها ملاحظه اذانج جبيره
غنى : لزمت اذني ... جبيره شنو
فهد : هيج غلسي اشاقه وياج
غنى : باوعت لملابسه ... صدوك فهد انت شلون اجيت مو عندك دوام
فهد : هو اني من سمعت صوتج شلون تبجين بقه دين براسي حتى شغلي عفته واجيتج عبالي شو شبيج
غنى : اني اسفه عطلتك عن دوامك بس جنت منهاره ومأجه على بالي غيرك
فهد : طز بالدوام يمعوده همزين ماطلع بيج شي كومي جيبيلي ماي نشف ريكي
غنى : كمت جبتله ماي واجيت تفضل
فهد : اخذته شمسويه غده
غنى : مدفونه
فهد : شنو هاي مدفونه دافنتمن ولج
غنى : ابتسمت المدفونه نفسها الشيخ محشي ... احمي الغده لو تروح
فهد : باوعت للساعه بالوحده اله ربع متسوه اطلع بعد ... لا باقي هنا ... خابرت علي الوو علي من تطلع مر على اروى اني مااكدر اجي اي عندي شغل اكمله وارجع خوش الله وياك
غنى : حروح اصلي ... تصلي ؟
فهد : شلت الكوشه شمرتها عليها امشي ولي عن وجهي
غنى : ااخ خلص براحتك نارك تاكل حطبك
فهد : امشي ام الحطب انتي ووجهج هذا
غنى : رحت غسلت وجهي وتوضيت طلعت بدلت وصليت كملت وكمت دخلت للمطبخ لكيت فهد نازع قميصه ومنطيني ظهره واكف على البراد .... هاا نتغده
فهد : باوعتلها ادري صلاه لو شنو صارلج نص ساعه شجنتي تسوين
غنى : شلت شعري شلون ابطل يعني ما اصلي
فهد : ديله تعاي حمي الاكل خلي اتغده واطلع
غنى : بهدوء اي هسه
_____________________
بتول : علي فهد ليش ما اجانه
علي : صار عنده شغل
اروى : مو وضعيه هاي شغله راح يدمره حتى للبيت مجاي يجي من وره هالشغل
علي : هذا باب رزقه خو مو يتساهل وياا
بتول : ملاحظين فهد هالايام هواي ينشعل اصلا صاير نادرا مينشاف
علي : قابل هو بكيفه اكيد لو بأيده يجي للبيت بس مو بأيده
اروى : سوده عليه الله يساعد كلبه على هالشغل ولو كله من وره مسوؤلهم الحقير كل ساعه مكلف فهد بشغله
علي : ديربالج تحجين عليه خوش رجال .... وصلنه يله نزلن
بتول : نزلت بسرعه دخلت ... خاله وين خالتي سعاد
ايمان : وعليكم السلام ... روحي تلكيها بغرفتها اكيد
بتول : صعدت ركض فوك فتحت الباب ودخلت ... خاله تعاي لحكيلي يمكن كلامج صحيح
سعاد : خير شكو
بتول : مسحت على وجهي خاله فهد مو علساس يجينه طلع عنده شغل ودزلنه علي ... بس اريد افتهم شهالشغل الي يخلي يبقه بره البيت وميرجع
سعاد : اهدي شبيج
بتول : خاله كلنه ندري دوام العسكريين ينتهي بحدود ال 2 او 3 وهسه بال2ونص وفهد ماهو ياشغل هذا فهميني
سعاد : من كتلج عنده وحده ما صدكتي
بتول : ميهمني اذا عنده وحده او لا اخاف يطلع مزوج
سعاد : لا هذا ذكي ميورط روحه ويتزوج بالسر ولو يريد زواج جان تزوج اشو كلشي حاضر عنده ... بس اني الي خايفه منه يطلع الافندي جاي يراهق بهالعمر
بتول : شنو قصدج
سعاد : قصدي ياخوفي فهد يطلع يحب
بتول : ههههههههه
سعاد : قزرقط شبيج
بتول : والله جنت ضايجه وضحكتيني يا خاله ملكيتي غير فهد يحب
سعاد : ليش ميحب شنو مو بشر
بتول : بعد التعذيب والاهاين الي كلاها وهو صغير تتوقعين بقه عنده كلب لا ويحب هم يخاله بسوالفج القديمه ماخليتي شي اسمه مشاعر عده
سعاد : عسى بالمرض اني شعليه المهم عندي
فهد يتزوجج الج بالغصب بالرضا المهم يتزوجج
بتول : انتي ليش هيج مصره على زواجي من فهد
سعاد : حتى اامن مستقبل الج يغبره ... لزمت ايدها تخيلي بتول تخيلي هالبيت يصير الج والعماره تصير الج وكل الاملاك الباقيه تصير تحت تصرفج اذا تزوجتي فهد .... ولج والله تعيشين ملكه بس لو تتلحلحين
بتول : ابتسمت وفهد يصير زوجي ويضل يحبني
سعاد : اي طبعا اذا حبج فهد حتى تكدرين تخلي ياخذج ويسافر بره
بتول : لمعت عيونها ... ياريت خاله ياريت قابل اني ما اتمنى
سعاد : ابتسمت .... تمني تمني اول وتالي كلشي راجعلي وراجع لجهالي
________________________
فهد : بهدوء سمعيني غنى باجر ترحين للدوام واي موضوع متفتحين تسوين نفسج مثل الاطرش بالزفه وديربالج تنطين فرصه لمرتضى يحاجيج
غنى : هزيت راسي ... تدري فهد اني متندمه لان سامحته
فهد : هو صوجج بسبب تصرفج هو فكر انو لو شما سوه وياج راح تسامحي لان سواها اكثر من مره ولكه العفو منج فعادي يكررها مره وثنين وعشره
غنى : بخوف واذا تعرضلي شسوي
فهد : حتى اشك ....
غنى : غطيت وجهي كارثه انت اقسم بالله
فهد : اكلج اني نعسان متجين تلعبين بشعري
غنى : لا بله
فهد : اي والله بشرفج جاي من الدوام جدي مستلك واريد انام وذاك اليوم من فليتيني بسرعه نمت
غنى : ابتعدت لوره ... تعال
فهد : نمت بحضنها
غنى : اباوعله كام يتأوهه ... شبيك فهد
فهد : جسمي يوجعني من التعب
غنى : اني اسف... بعدني ممكمله قاطعني
فهد : غنى احنه اخوه واصدقاء مابيناتنه هالرسميات يله اشتغلي تره تتعاقبين
غنى : خشنت صوتي حاضر سيدي
فهد : ضحكت عفيه
غنى : ماكو دقايق ونام مبين عليه تعبان كولش ... رجعت جسمي على القنفه وغمضت عيوني وبعدها محسيت على شي
بعد مرور اربع ساعات
فهد : غافي وسمعت باب الشقه يندك كمت شفت غنى غافيه ... ندستها غنى غنى الباب يندك
غنى : هممم هااا
فهد : كومي شوفي منو اني طاب جوه
غنى : فركت عيوني وكمت شفت العين السحريه هاي ود ... اخذت شالي لبسته وفتحت الباب
ود : السلام عليكم
غنى : وعليكم السلام اهلا وسهلا
ود : بيج اكثر ... تفضلي
غنى : شكرا بس شنو المناسبه
ود : بما انو انتي بنيه وكاعده وحدج تذكرتج وجبتلج كيك
غنى : اباوع عليها تباوع لجوه درت على شنو دتباوع درت وجهي لكيتها صافنه على سلاح فهد ... عضيت شفتي بتأنيب يربي شلون سالفه هاي ... بارتباك ماكو داعي ليش زحمتي نفسج
ود : ببرود لا ماكو زحمه يله باي
غنى : باوعتلي بنظره ابد مو حلوه ... غمضت عيوني معقوله متقصده ... سديت الباب ودخلت ... صحت لفهد يطلع
فهد : منو
غنى : فهد اعتقد ود عرفت
فهد : شلون يعني
غنى : شافت السلاح
فهد : اخذت قميصي عادي اذا سألتج كليلها اخويه جان عندي
غنى : تنهدت فهد لتفهم قصدي غلط بس جيتك لهنا مو نظاميه احس كل الي ساكنين يدرون
فهد : شدراهم اذا اني اجي باوقات كلها تكون بالدوام او نايمه
غنى : يعني تقنعني العماره كلها هنا تداوم وتنام بالوقت الي انت تجي بي
فهد : اعتقد انو اني مامجبور اكعد اوضح لجنابج ولا مجبور اكعد اجذب كتلج اجي باوقات ماموجود بيها احد
غنى : والله فشله هسه شتكول
فهد : شنو شافتج ويه واحد بوضع ... سكتت استغفر الله غنى عقلي خوش ولتضلين تشيلين هم لهذا ولذاك خلي ثقتج بنفسج عاليه وبطلي تخافين من كلشي تره محد اله سلطه عليج ولا لازم سيف على ركبتج ... وهسه تعالي شوفي اكو احد اريد اطلع
غنى : مديت راسي ماكو احد
فهد : يله اني رايح ديربالج على روحج بعد ما اجي وعود اتواصل وياج عن طريق الموبايل
غنى : متجي ؟
فهد : اي انتي مو تكولين جاي يصير حجي خلص لعد بعد ما اجي يله مع السلامه
غنى : بهدوء مع السلامه سديت الباب ودخلت .... اخذتني رجليه للبوفيه طلعت الجفيه مالته قربتها مني اخذت نفس بقوه منها وغمضت عيوني ... بس كليلي شجاج ياغنى
________________________
جعفر : اكول نرجس سمعت اليوم صايره مشكله بين غنى و طالبه من غير قسم وعلساس البنيه ضاربه غنى كدام الطلاب شنو السبب
نرجس : هاا ما ادري
جعفر : ليش حسب الي سمعته انتي جنتي موجوده وكت العركه
نرجس : اي صحيح بس ماعرفت شنو سبب المشكله
جعفر : معقوله نرجس دين الفضول تفوتلها فايته لا وموضوع يخص غنى وتسكت
نرجس : جعفر انت هسه شتريد
جعفر : اريد اعرف شنو سبب المشكله واني ادري بيج تدرين والسالفه مو هينه بس انتي متكتمه على الموضوع
نرجس : شنو عدنه عمليه تسليم مخدرات ونتكتم على الموضوع اني ما ادري ولا اعرف شنو سبب المشكله كاعدين واجتي وحده جنها هايشه هايجه هجمت على غنى الي صارت جنها عصفور مبلل شنو سبب المشكله لا اعرف ولا ادري ولا اتكلم .. خوش عفته وكمت ... الحمدلله كدرت اسيطر على لساني بس ااااخ لو ما ادري بغنى تزعل جان سولفت لجعفر وخليته يرسب مرتضى هالكورس كله ... صحيح ماعرفت تفاصيل الموضوع بس الي اعرفه مرتضى سبب الي صار وهالبنيه تخصه
___________
فهد : كاعد وسعاد كل ساعه تذبلها حجايه واني مغلس اريد اعرف وين تريد توصل
سعاد : اي فالزواج استقرار وراحه بناء حياة جديده
ايمان : صحيح
فهد : بهدوء وبعدين ... باوعتلها ام فيصل لنلف وندور دخلي بالموضوع
سعاد : لكيتلك مره تجنن جمال وادب واخلاق وشهاده بس يراد توافق
فهد : وهالمره بتول بت اختج مو
سعاد : هاا لا لا
فهد : اي اي بتول اني اكلج ... شوفي ام فيصل زواج ما اتزوج ولو اريد هاي امي موجوده الله يخليها ويحفظها هي تخطبلي ما احتاج مساعدات تطوعيه من احد
سعاد : انت مو كبرت بعد منو تقبل بيك شوف الشيب ذاك وينه مبين براسك ... عوف الشيب انت كرجال ماعندك رغبات متريد تحس نفسك حالك حال المتزوجين
فهد : من ناحيه هالموضوع لتخافين طاقتي المخزونه متروح بالحمام اعرف وين افرغها وبالنسبه لرغباتي فمو شرط تكون بت اختج الي تلبيها اني وين ميعجبني اروح افرغ
ايمان : غمضت عيوني شلون ويه هالولد الي لسانه فالت وكل حجايه يكطفها عبالك قنبله .... يمه فهد اني تعبت وياك وبعد موضوع الزواج ما افتحه شوكت ما تريد تزوج اني حاضره واروح اخطبلك اكثر من هيج شسوي بعد
فهد : بست ايدها وهو هذا الي اريده تعوفيني على راحتي ... كمت
سعاد : وين
فهد : عفوا ؟
سعاد : استغفر الله هيج ماكو شي
فهد : طلعت صارت بوجهي ساره واكفه تغسل الطرمه ورافعه الدشداشه لفخذها نزلت راسها وصحت انتيي وتالييي وياج يمعوددده انتي ما عايشه وحدج بهالبيت احتشمي شويه
ساره : نزلتها اسفه والله ما انتبهت
فهد : ياخويه مو لعبتيها لرواحنه انتبهي للبسج لخاطر محمد وياج زلم ليش تخلينه نهج من البيت رجاءا خلي لبسج محتشم على الاقل بس بوجودنه وسوي الي تردي اذا احنه ماموجدين عسما تصلخين يطبج عرج
ساره : ضليت صافنه كلاني وشربني بكشوري ... هذا شبي شدعوه هالكد بارود الي يشوفه يكول عنده ثار وياي .... ابتسمت بس خطيه يجوز لان بعده مامتزوج ويشوف هيج مناظر يتسودن ههه
فهد : طلعت اتمشى لبيت جدي دفعت الباب ودخلت ... دكيت الباب الخارجي قبل لا ادخل اخاف البنات هنا
ياسمين : تفضل
فهد : طبيت شفتها كاعده هي وعمتي نسرين ومرتضى ابتسمت اجيت والله جابك ... السلام عليكم
الكل : وعليكم السلام
فهد : بست الحجيه شلونج
ياسمين : هله بعد كلبي
نسرين : يالكاطع ولك كول عندي عمه اخابرها اسأل عليها اشوف شمعتازه شتريد
فهد : حقج على راسي بس وقت ماعندي وداعت مرتضى
مرتضى : الي يسمعك يكول رئيس وزراء
فهد : قصدك رئيس جذب ونفخ مثل الناس مو
مرتضى : شنو قصدك
فهد : حجيه عادي اروح لغرفتج
ياسمين : اي يمه اخذ راحتك وين متريد تروح روح بيتك هذا
فهد : كوم مرتضى اريدك بشغله
مرتضى : شنو هي
فهد : دكوم وافهمك السالفه
مرتضى : كمت دخلت وياا للغرفه ... شكد ما اني اكرهه بس اخاف منه لان ايده والضرب جان يجنزنه احنه ومنذر من جنه صغار لهسبب اكرهه ... كعدت شكو
فهد : كعدت كباله ... مرتضى من الاخير فك ياخه عن غنى
مرتضى : عفوا وانت شكو اني وحبيبتي
فهد : كور ايده بقوه لحد مابين بياضها .... اني وياك نعرف غنى مو حبيبتك ولا راح تصير ... وحجيك هذا كله جذب ... عوف البنيه بحالها احسلك هاي اني جاي احجي وياك بهدوء فحاول تستوعب كلامي
مرتضى : اروى كلتلك لو غنى احجي
فهد : ميخصك منو كلي اصلا مو مهم منين عرفت المهم تعوف البنيه بحالها وتبطل تركض وراها من مكان لمكان وعملتك اليوم وياها يراد واحد يوكلك تبن عليها
مرتضى : يا اخي لتدخل اني وحبيبتي ننجاز انت شكو ابن عمها تعودك شعليك انت اني احبها وراح اتزوجها
فهد : زنكته من قميصه ... شوف ولك غنى مو حبيبه احد ولا راح تصير البنيه كافيه خيرها شرها وما مأذيه احد ويتيمه واليتيم اله حوبه ... خاف ربك وعوفها بحالك يا اخييييييي متريدددك هي كووه
مرتضى : يادين محمد انتتتتت شعليييك
فهد : اله عليه وننننننص راسك اكسررره بعد اذا تقربلتها اقسم بأعز ما املك يا مرتتتتضى اذا سمعت بيك طاخ اظفرها والقران اطلع بروحك وما اهتم لو اذب عليك قضيه واخليك تعفن بالسجن وانيي مو رجااال اذا ما نفذت كلاميي فتهمت
مرتضى : احجي شنطتك وهيج تدافعلهااا هااااا
فهد : ضربته كله براسي خشمه طك دم ... لك انت لو تحبها صدك ماجان حجيت عليها هيج بس انت راغبها وعبالك تقبل بيك فتره وتزحلكهاااا حبيبي غنى مو من هالنوووع هاي تحطك جوه حذائها وتعبر عليك بدون متهتم لتشوفها مؤدبه وهادئه عبالك فقيره تره اذا تخليك براسهااا محد يخلصك منها غير ربك ... شوف يا مرتضى اقسم بديني اذا تعرضتلهاا بعد اراويك نجوم الظهر بعز الصيف فتهمت
مرتضى : بألم ... ليش هيج منتفض وترجف عليها
فهد : دفعته وكع بالكاع ... حجي زايد ما اريد غنى تعوفها وتقطع كل وسيله تواصل بينك وبينها ولو اني متأكد حظرتك من كلشي بس الحذر واجب ... كلامي يتنفذ بالحرف الواحد حتى ما اضطر الجئ وياك لغير اسلوب خوش ... والي صار اليوم هو مجرد درس الك لا اكثر ... فتحت الباب وطلعت
مرتض
ى : كمت من مكاني باوعت لروحي متألم خشمي طاك دم وفكي ورم .... عساها بأيدك الكسر يا سافل ... اخذت كلينس مسحت الدم عن خشمي وطلعت
نسرين : شبيك يمه شهالدم
مرتضى : يمكن تخربط ضغطي وطك خشمي دم
ياسمين : شبي وجهك ولك ... شنو تعاركت انت وفهد
مرتضى : لا لا حجيه عليمن نتعارك كعدنه نسولف وهذا وجهي من قبل لا اجي هيج انضربت اليوم
ياسمين : بعدم تصديق ... كتلي انضربت قبل لا تجي دكعد اشرب جاي
مرتضى : هسه بس اغسل
ياسمين : طبعا ابنج يجذب فهد ضربه من طبو جوه
نسرين : لا يمه ابني ميجذب
ياسمين : ليش واحد من المعصومين وميجذب دكعدي راحه
نسرين : والله يا يمه عندج طلعات
______________________
ايمان : كاعدين اني وبناتي بالصاله وطبت آلاء هي وجهالها تفاجئنه من دخلت علينه
آلاء : السلام عليكم
الكل : وعليكم السلام
ايمان : كامن البنات بوسنها وهي هم تلكتهن ذاك الملكه الله يهديها
آلاء : طبو ماما طبو هذا بيتكم
ورده : شعجب رجعتي مو علساس جنت ناويه تطلكين
آلاء : كعدت لا حبيبتي هاي لان جنت عصبيه حجيت هيج شنو ترديني اعوف الجمل بما حمل لغيري ماعيب
اروى : بدينه برحمه الله
ساره : نزلت من فوك شفت ضرتي ... خليت ايدي وره ظهري ... ياا حبيبي فيصل وين جنت ضل بالي عليك تدنيت بسته
فيصل : خزرتها
اروى : ماعجبني تصرفها يعني احنه كاعدين واكو اطفال شنو هالتصرفات هاي شنو زعنه المستحه لهلدرجه
ساره : شلونج ضرتي هاا شو رجعتي
سعاد : شنو راجعه لبيتج ام الوصخ
ساره : فيصل اسمع امك شتحجي
فيصل : كافي يله شنو راح تتعاركن ... آلاء حبيبتي كومي ارتاحي فوك
آلاء : باوعتله صفح وكامت صعدت لغرفتها
ساره : كعدت ااه يمه ظهري ... عفيه ورده انطيني كلاص ماي
ورده : مو كدامج الدولكه شهالتنعوص مدي ايدج وصبي لروحج
ايمان : ورده تأدبي شنو جلدج يحكج
فيصل : اي صارلها فتره محد كاتلها جلدها كام يصيح عليها
ورده : اكول صوصو متروح يم آلاء مو احسن من كعدتك يمنه
سعاد : خزرتها اذا فهد ميعرف يأدبج تره اني اادبج
فهد : نزلت تأدبيمن ؟
فيصل : ورده وحده ما مؤدبه ومتحترم
فهد : بله مو عيب عليك رجال شكدك شكبرك حاط عقلك ويه عقل الجهال
ورده : اني مو جاهله
فهد : انتي اكلي تبن ومن احجي لتقاطعيني صايره قليله ذوق ويرادلج تربيه
ورده : كمت وكفت كباله مستهضمه ... بعد ما احبك وان شاءالله يصير بيه مرض ويخلصك مني عفتهم وصعدت لغرفتي
اروى : شجاك وياها فهد تره جانت تشاقه
فهد : تنهدت انتو تطلعون الواحد من طوره ... درت وجهي وطلعت كعدت بره ... كلام مرتضى نرفزني اليوم ما اعرف شلون كدرت الزم نفسي وما اشوه وجهه هسه عليمن كاتل نفسه عليها ما اشوف بيها شي يخلي يستقتل عليها غير اخلاقها ... طلعت موبايلي شفتها متصله اكيد تلكيها مطلعه كتاب لو محاضره دينيه وكاعده تسمع اعرف سوالفها ... خابرت الولد كتلهم يجون يمنه مخنوك مااريد اطلع كمت طبيت جوه ... علي راح يجون حارث ومحسن سوي النراكيل
علي : صار
منذر : شعجب راح يجونه كل مره احنه نروحلهم
فهد : مابيه حيل اطلع ... اروى صعدي لغرفتي جيبي الدومنه من الكنتور وتعاي بسرعه ... هاج المفتاح
ساره : ليش تقفل غرفتك تره احنه بيت واحد
فهد : اعرف بس كمت اقفلها حتى الحشرات متكدر تدخل بغيابي لان اذا اني موجود يخنسن بمكانهن وصوتهن مينسمع
سعاد : باوعتله ودنكت ... ابن سالم ينضم عليك شي
فهد : اجو الولد وطلعنه كعدنه بالحديقه
محسن : لعد مرتضى وينه
سامر : يكول ماله خلك
فهد : اخذت نفس من النركيله ماعرفت شبي
سامر : لا والله بس رحتله شفت وجهه مورم
محسن : خير ياساتر شبي
سامر : علمي علمك
علي : بشر حارث شوكت تعرس
حارث : غير تخلص اخت الشفيه حتى نعقد
محسن : خليها على راحتها لاحك على شلاع الكلب
سامر : احنه سوينه عميله تبادل اخذنه بتكم وراح ننطيكم بتنه
حارث : الله يساعد كلبي بس
محسن : شكلت ولك
فهد : ضحكت انتو من غير شي اربعه وعشرين ساعه مناكر انوب صرتو نسايب لا كملت السبحه
حارث : لا شكو بيها اخذ بت عمي اني اوله بيها من الغريب
فهد : يمعود اني اتخبل من زواج الاقارب اشو شهد تشبه عمي مهدي بس نسخه انثويه شراح تشوف بيها الواحد يتزوح غريبه احسله هم يغير النسل كافي نفس الاشكال تستنسخ
محسن : فهد ما اسمحلك اختي حلوه
حارث : اي صدك شهد تخبل
سامر : اشو انت تتغزل باختنه كدامنه احترم شويه
حارث : باستهزاء العفو العفو
الشباب : هههه
_____________________
غنى : كاعده من السته الصبح وحاطه ايدي على خدي خايفه اداوم كل شويه تجي حسبه ابالي ... اخر كمت بدلت وطلعت ... وصلت للكليه نزلت امشي احس الطلاب كلها تباوعلي دنكت راسي وكملت طريقي شفت البنات كاعدات صباح الخير
اروى : صباح النور البارحه الوقت كله ادك عليج ليش متردين
غنى : مجان عندي قابليه احجي ويه اي احد
نرجس : حاجاج مرتضى
غنى : لا ومااريد اسمع اسمه نهائيا
نرجس :
ماعرفتي البنيه ليش هيج سوت تره كل الي نعرفه انو العركه بسبب مرتضى بس ليش انتي ماحجيتي
غنى : هذي حبيبته واجتي تتعارك ويايه لان عافها اني شكو بيهم ماادري تحسسني وكأنو اني كتله عوفها
اروى : خو هو ابن عمتي وميصير احجي عليه بس يربج مو راحه دومه يسوي مشاكل وماخلصانين من مشاكله لا بالبيت ولا بالجامعه
نرجس : مرتضى والده متوفي مو
اروى : اي الله يرحمه يكولون جان خوش ادمي بس هذا مدري عليمن طالع
نرجس : خاف على امه
اروى : ضحكت انجبي ادبسزز لتحجين على عمتي
نرجس : شراح تسوين هسه نونه
غنى : تنهدت اغلس على الوضع شريد اسوي يعني مجبوره اضل ساكته لان اي تصرف اتصرفه هسه ينحسب عليه ... وامانه اذا حاجاجن مرتضى ابد لتنطنه مجال
نرجس : دخلي يجي وشوفي شسوي بي
اروى : هسه عوفن مرتضى اكلجن خلي نطلع سوه اليوم
نرجس : وين
اروى : نروح للمنصور هم نتونس وهم نتعشه بره وباجر اني ماعندي امتحان فاكدر اطلع
نرجس : اني ماعندي مانع بس خلي اكل لاهلي
اروى : وانتي نونه
غنى : اني شنو ؟
اروى : ترحين ويانه
غنى : لا شعندي رايحه روحن انتن
نرجس : ماعليج بيها تروح
غنى : شنو هو بكيفج كلت ما اروح
نرجس : واني كلت ترحين الى متى تضلين حابسه روحج
اروى : حبيبتي نونه اذا على خالتج عادي كليلها اريد اطلع ويه صديقاتي واحنه مراح نطلع وحدنه اني راح اخلي واحد من اخواني ياخذونه واذا امي قبلت خو بعد احسن
غنى : القصه مو على خالتي اني مااحب اروح لهيج اماكن اضوج
نرجس : اني اكلج هسه خلي نكلها نروح نزور تلكيها اول وحده مبدله
غنى : وانتي تجيبين زياره الاماكن المقدسه للمولات والتجمعات السخيفه هاي
اروى : غنى خصم الحجي ترحين يعني ترحين كلتي اي كلتي لا ترحين
غنى : باوعتلهم يعني بكيفجن
البنات : اي
غنى : ابتسمت خلص هاي لخاطرجن ... بس كللي بيش الساعه نطلع
نرجس : الساعه بالخمسه امر عليج اني وجعفر
غنى : بسرعه لالا شنو تمرون عليه ... اني اجي وحدي
نرجس : ليش يعني
غنى : بارتباك مو خالتي تضل تحجي واني مالي خلكها فاني اخذ تكسي واجي لتخافين
اروى : ماشي لعد خوش نلتقي الساعه بالخمسه بالمول ياسلام اليوم اقط فهد خوش قطه
البنات : ههه
غنى : بدت المحاضره وكمنه
نرجس : نونه اذا محتاجه فلوس تره عندي لتستحين احجي
غنى : ابتسمت لا حبيبتي عندي لو احتاج ما اتردد اطلب منج ... يله تعالي دخلنه للمحاضره شفت مرتضى وجهه مورم ... اللهم لا شماته مبين متكول خوش كتله
________________________
فهد : كاعد ودخل مهيمن
مهيمن : هذا التقرير راجعه وشوف شنو بي
فهد : فتحته شنو قضيه جديده
مهيمن : اي
فهد : خير هالمره شكو
مهيمن : وحده كاتله رجلها جابوها للمركز هسه
فهد : ليش كتلته
مهيمن : علمي علمك رافضه تصرح بخصوص اي شي المعزايه كاتلته وذابته بتنور الطين
فهد : دخلي اشوف التقرير وبعدين عود نشوف
مهيمن : تدري خفت اتزوج
فهد : بهدوء ليش
مهيمن : تخيل اذا فد يوم مرتي وصتني على حاجه وماجبتها يمكن تكتلني مثل هاي وتلكوني بالتنور
فهد : ابتسمت طاحظك رجال شطولك شعرضك تخوفك مره
مهيمن : اذا ربك ذاكر بالقران ان كيدهن عظيم شلون متريدني اخاف
فهد : دطلع بره اطلع
___________________
غنى : واكفه كدام الكنتور اباوع شنو حلبس يعني منين طلعلي بسالفه المول اني وجهي وجه مول ... هسه اني شجاني و وافقت اول تالي اسمع كلامهن .... افف اخذت فستان مال طلعه لونه اسود بي حزام عريض داير مداير الخصر ... اخذته لبسته ووكفت كدام الف شالي باوعت لروحي لا بأس اخذت جنطتي وطلعت كعدت بالصاله منتظره مكالمه منهن حتى اطلع
________________________
اروى : نزلت من فوك بسرعه شفت امي وساره كاعدات ... يمه عفيه اريد فلوس
ايمان : شكد تردين
اروى : ورقه
ايمان : ورقه تصرفيها كلها
اروى : لا اكيد بس مو كتلج راح اطلع ويه البنات اسوك فكلت اخذ ورقه اصرف كفايتي وارجع الباقي
ساره : لتنطيها خاله هسه تصرفها كلها شنو هالتبذير هذا ورقه كامله تنصرف بطلعه وحده
اروى : اجيت اجاوبها سمعت صوت فهد وراي
فهد : وين ست اروى شو كاشخه
اروى : همزين اجيت ستوني اجيت اخابرك عبالي طالع
فهد : كعدت شتردين
اروى : اريد اروح ويه صديقاتي للمول
فهد : وحدج ؟
اروى : لا اخلي علي لو امي تروح وياي
فهد : علي طالع وامي ما اعتقد تروح ... كعدي طلعه ماكو وحدج شنو تطلعين بدون رجال وتفترين بالمولات وين كاعدين احنه بلندن
اروى : انتحبت فهد الله يخليك لتخرب طلعتي مو تواعدت ويه البنات حباب لتفشلني
فهد : ويامن راح ترحين
اروى : ويه نرجس وغنى قابل اكو غيرهن
فهد : اني اخذج
ايمان : بصدمه انت
فهد : شبيجن تباوعلي اني اخذج حتى اامن خو ما اخليج ترحين وحدج
اروى : فهد + طلعه ويه نسوان ما اصدك انت تطلع طلعه بيها نسوان
فهد : بهدوء هسه اخذج اني لو طلعه ماكو
اروى : لا لا ميخالف تعال ويايه انت
ساره :
خاله خلي اروح ويه اروى والله بحياتي ماشايفه مول
ايمان : يمه اخذي مرت اخوج وياج خطيه
اروى : بس
ساره : حبابه حبابه
اروى : بضوجه ماشي .... راحت ساره بدلت واجت ووراها اجه فهد لابس قميص اسود وبنطرون اسود ... هله فهد لابس اسود هسه يخلي مزاجنه هم اسود
فهد : يله
ساره : خاله اذا كعد فيصل كليله اخذت فلوس من محفظته
فهد : شنو انتي ترحين ويانه
ساره : بابتسامه اي
فهد : والي تروح لمكان عام تخلي حمره حمره صدك تحجين
ساره : هسه امسحها
اروى : خابرت البنات بلغتهن وطلعنه وصلنه للمول شفت نرجس واكفه بره رحت سلمت عليها اني وساره
ساره : شلونج حبي
نرجس : هلو بيج حبيبتي منو هاي اروى شو مشايفتها
اروى : مرت اخويه فيصل
نرجس : هاا
ساره : يله خلي ندخل
اروى : منتظرين صديقتي غنى هسه تجي وندخل
نرجس : واكفه ويه البنات واجه فهد اخو اروى يمه جماله لابس اسود اروح فدوه شهالهيبه ياربي
فهد : باوعت عليهم شو غنى ماهي
غنى : السلام عليكم
اروى : درنه وجهنه عليها وعليكم ... وين صرتي
غنى : باوعت لفهد الي كلب وجهه مااعرف ليش ... مو بيت خالتي بعيد فتأخرت
ساره : هي هاي صديقتج
اروى : اي هي هاي نونه اعرفج هاي مرت اخويه فيصل ساره
غنى : هلو ساره
ساره : هلو بيج
فهد : يله خلي ندخل .... دخلنه للمول هنه راحن لمجمع مال ملابس نسائيه واني دخلت لقسم الالبسه الرجاليه اشتريلي جم حاجه ... اباوعلهن كلهن طوال وخشنات بس غنى ناعمه صاير جنها دوده بيناتهن ... اخذت جم قميص واشتريت قاط وطلعت لكيتهن بعدهن بنفس المكان ... شكد اكره هاي السلعه مال النسوان يلزكن بنفس المحل وتالي ماكو يطلعن ايد وره وايد كدام
اروى : بنات يله نحاسب
ساره : ليش ما اشتريتي شي غنى
غنى : بهدوء معجبني شي
نرجس : يله ... طلعنه احنه والبنات وفهد ورانه يمشي ضلينه نفتر فوك الساعه ومنسمع بس تافأئف فهد مبين عليه جزع من فراتنه
ساره : اكلجن اني تعبت وجعت خلي نكعد
اروى : فهد خلي نصعد للمطعم حتى نطلب شي بارد والجوعان ياكل
فهد : تنهدت يله
غنى : صعدنه على الدرج الكهربائي وهاي ساره موتتنه ضحك متعرف تصعد بي وتخاف ... وصلنه للمطعم كعدنه اني طلبت عصير ونرجس وساره طلبن اكل واروى اكلت موطه فهد كاعد على طاوله ورانه حتى طلباتنه هو جابها ما قبل وحده تكوم بس مدري شبي كالب وجهه عليه
ساره : اكول غنى انتي شتخلين لوجهج
غنى : شنو قصدج
ساره : اقصد يعني انتي هيج بيضه من الله بدون شي
غنى : هزيت راسي
ساره : هنيالج واني اخلي بهالكريمات وارجع لوره وماجاي اصير ولو لنص بياضج صدك حظوظ ناس عدها رباني وناس تعاني
نرجس : قل اعوذ برب الفلق شجاج يمعوده
ساره : تره اني ما احسد شبيج
غنى : ابتسمت عادي حبيبتي احجي الي تردي لتتقيدين ... وبالنسبه للبياض تره مو مقياس للجمال ياما اكو بنات سمر بس ملكات جمال
ساره : زين سؤال جسمج ابيض من وجهج لو لا
اروى : ساره شهالاسئله تره عيب
ساره : غير بنات بيناتنه شبيج
اروى : ميخالف صوتج تره فهد ورانه
نرجس : اكول قبل شويه شفت محل مال اكسسوارات شنو يجنن ... بس ماكتلجن لان جنت جوعانه وتعبانه ومالي خلك فره بعد
اروى : اي خلي نكوم نشوفه اني اريد اشتري ساعه لورده همزين ذكرتيتي
ساره : اني هم خلي امشي رجليه
غنى : اني مالي خلك تعبت انتن روحن واني انتظرجن
نرجس : لا غنى حبابه كومي دشوفي انتي اشتريتي بس قميص دكومي شوفي وتونسي هاي شوفي هسه راح اخابر جعفر حتى بين ما يجي هو احنه نشتري الي نريده
غنى : لا والله تعبت ما اكدر انتن روحن
اروى : ماشي براحتج ... رحت يم فهد ... فهد احنه راح نروح لمحل الاكسسوارات
فهد : متشبعن متملن لعبتن روحي
اروى : شبيك فهد هي طلعه ومره كل سنتين تخلينه انت
فهد : وينه المحل
اروى : جوه هالطابق حتى تكدر تشوفنه منا هذا كبالك شوف كدامك راح نصير
فهد : دروحي .. بس لحظه عندج فلوس
اروى : اي عندي ماصرفت الورقه كلها ... احنه منتاخر هسه نجي لان غنى راح تبقه وحدها
فهد : ليش متروح وياجن
اروى : تكول تعبت
فهد : هزيت راسي
اروى : يله بنات نونه احنه منتاخر عشر دقايق ونجي
غنى : براحتجن .... راحن البنات طلعت موبايلي اكلب بي لبين ما يجن حسيت على واحد مر من يمي شلت راسي شفته فهد ... هلوو
فهد : ببرود منو جابج لهنا
غنى : اخذت تكسي
فهد : باستنكار ... واجيتي ويه التكسي وحدج
غنى : تره انجبرت اجي تكسي قابل العبريه تجيبني لهنا وبعدين تره ابو التكسي رجال جبير
فهد : بعد ممنوع هالشي يتكرر فتهمي
غنى : ماشي ... يعني انت هسه كالب وجهك على حساب جيتي
فهد : حضرتج تطلعين وتطبين بكيفج مافكرتي اصلا انو تكليلي
غنى : ليش انت مو كلت محد يدخل بالثاني شبيك فهد هاي مو حجايتك ... اباوعله سكت
فهد : ليش الجبه هيج مخصره عليج شوفي خصرج شلون مبين
غنى : استغفر الله فهد شبيك هذا فصال الفستان واني ملابسه شي ضيك بالعكس اصلا كل ملابسي عريضه
فهد : تشربين شي
غنى : تنهدت اذا ميعجبه الحجي يغير الموضوع ... لا شكرا عصيري لسه ما كملته
فهد : شكد فاهيه دخيل الله
غنى : باوعتله صفح ورجعت اكمل عصيري ... شفت مجموعه بنات اجن كعدن بالطاوله الي بصفنه ... اباوعلهن شنو هاللبس عززه اني من يمي استحيت ولو اني شعليه اتدخل بحياتهن هذا شي يخصهن ... شلت راسي شفت فهد عينه على وحده بيهن هي هم كامت تباوعله ... فهد
فهد : لا رد
غنى : اباوعله هذا صفن ... رجعت باوعت للبنيه جانت سافره ولبسها هشك بشك بس حلوه او طن المكياج خلاها هيج ... ضجت من نظرات فهد الها صحت فهد
فهد : اخذت نفس من الجكاره هاا هاا
غنى : رفعت حاجبي ... تحب اكوم اجيبلك رقمها
فهد : عفوا
غنى : بهدوء ... اكول عليمن هي تباوعلك وانت هم تباوعلها وتتحسر اكوم اجيبلك رقمها حتى ترتاح
فهد : لو اريد انطيها رقمي ما استعين بيج
غنى : قبضت على ايدي بقوه
فهد : حلوه مو ؟
غنى : عفست وجهي وين جمالها
فهد : ضحكت تره احلى منج
غنى : والله عيب عليك تباوع لاعراض العالم تقبل واحد يباوع على خواتك
فهد : اختفت ابتسامه ... اكيد ما اقبل بس اذا تلاحظين هي انطت مجال لو مدنكه راسها ماجان رفعت راسي عليها بعد
غنى : سكتت عنه ... حسيت نفسي مستهضمه معقوله بنظره اني لهلدرجه قبيحه بحيث يكلي هالبنيه المدري شلونها احلى منج ... يطبه طوب هو وياها اني اصلا ليش ضايجه ... وافق شنن طبقه
فهد : شبيهن عيونج
غنى : عدلت نظارتي مابيه شي
فهد : دكت اروى ... الوو هاا وينجن نزلتن للطابق الاول استغفر الله غير تكولن ... يله هسه جاي انتظرني يم البوابه خوش ... كمت يله غنى خلي نطلع وحسبي حسابج اني اوصلج الدنيا ليل هسه
غنى : ماكو داعي هسه اخذ تكسي
فهد : اني جاي ابلغج مو اخيرج يله تعاي
غنى : طلعنه اني وياا نزلنه من المطعم ... دنمشي وصادفتنه وحده شفت فهد وكف ... شبيك فهد ليش وكفت باوعت على نظره شفت عينه على البنيه مبين يعرفها ... منو هاي فهد
فرح : بصدمه فهد
***********
يتبع