" وأد القلوب"
بقلمي: ورده خُزام
بــــــــارت 3️⃣1️⃣
تقربت شلت الغطة منه بخوف لگيت خشمة طاك دم ومغمض عيونه رايح .. ركضت عليه وخرت الغطة وجريت راسه الحضني ..
- همام .. همام دتسمعني؟ فدووة افتح عيونك دخيلك لتخبلني
فتح عيونه خفيف ويون: ناز راسي رح ينفجررر
-گووم اغسلك
جريته اگوم بي، گوة سندته ثگيل، اخذته للمغسله غسلتله وجهه عيونه يفتحهن ويسدهن والوجه اصفرر
رجعته امشي بي وچني عصفوره يمه وهو ثگيل وذاب حيله عليه، اخذته گعدته ع الجربايه ، جبت الاكل وگعدت اوكل بي شلع كلبي ميقبل ياكل جبرته على شكم لگمه
دفع ايدي گال كافي شبعت
عفته وگمت ترست طاسه مي ومنشفه شافني ابتسم بتعب: ماكو داعي ترا
رديت عليه بدون مااباوعله: لتدخل معليك
اخذت اديناته غسلتهن ووجهه وهو بس صافن عليه ويبتسم، كملت رحت جبت بندول وگلاص مي انطيته شرب ساكت
- هسه اذا تريد تنام نام براحتك .. واذا تحب تسبح ف اا هياته الحمام اخذ راحتك
- اي اريد اسبح
- طب اسبح واي شي تحتاجه موجود يمك حتى فرش اسنان جديده ومناشف، وملابس اذا تريد اجيبلك من مهيمن
- ياريت والله من البارحه بذني الملابس
هزيت راسي وشلت صينيه الاكل دااطلع وصاح ..
- نازز
التفت نعم
- بس انتي مااكلتي شي
- مو مهم مجوعانة
تقرب مني ويگولي: ميصير تبقين بدون اكل
- ابعدد عني رجاءاً .. رجعت خطوة ليورا .. هسه من انزل اكل
عفت الاكل بالغرفة وطلعت للسطح ،اخذتله بجامة من الحبل وتيشيرت ملات مهيمن ،بعدني فوك وتذكرت ماقفلت الغرفة وراي!
نزلت اركض واحس كلبي راح يوگف من الخوف ومن الركض، دخلت الغرفة محد قفلت الباب وگعدت بظهر الباب گوة اجر النفس
اجاني يركض جان لسه واكف بمكانه: شبيج نازز! شو جري نفسسس
دفعته بأيدي: اششش لا احد يسمعك
- خوفتيني شبيج هيج تركضين!
- نسيت الباب مفتوح
-باوعلي بتفاجئ: بس هاي!
هزيت راسي وگمت من يمه خليت الملابس ع الجربايه: هذني ملابسك ادخل اسبح
اخذهن ودخل يسبح ... رجعت گعدت لازمة گلبي وروحي فايتتني لو داخل واحد من اخواني وشايفينه بغرفتي؟!!
رفعت راسي صورتنا اني ورفل گبالي .. گعدت اعاتبها واشكيلها حياتي بعدها، هواي امرار تجيني اخلي راسي ع المخدة واتمنى لو اني بحلم وافز طفلة لا مازن ولا موت رفل ولا فراك ابني ولا همام طلع بحياتي وخلاني احبه واتعلق بي! …
طلع من الحمام صفنت بي: كل الظيم بصفحه وهذا بصفحه ثانية
جريت نفس وگمت: تريد شي اني نازلة جوة ..
ردلي وهو ينشف بشعره: لا اشكرج
نرلت جوة لگيت احمد ومهيمن وعمر يلعبون بلي، گعدت العب وياهم وسألتهم:
- امكم وابوكم وين؟
عمر: مرت ابوج وزوج امج طلعوا يتونسون طلعة رومانسيه ياب
- هههههههههه وانتو محترك گلبكم لان سناگل
احمد: اي والله طاگنه الجفاف وواصل للعظم
-ههههههههه احد لازمك متزوج
- اهوووو راح تبدي بكليشتها المعتادة
ضحكت وضلينا نلعب تأخرنا بالساعه ونص، جعنا گالو كومي سويلنا تجواعه
مقبلت
اخر شي گمنا اربعتنا للمطبخ
الحلو بأخواني ميستنكفون يشتغلون بالمطبخ لو مثلا يكولون هذا شغل بنات .. ابدد ايدهم وايدي لحدما كملنا وبسطنا بالمطبخ وكعدنا ناكل ..
كملنا وتطشروا كلمن لغرفته واني هم صعدت الغرفتي. فتحت الباب على كيييف لگيت همام هم نايم ...
خفت لا هم رجع صعد ضغطة!
تقربت يمه باوعت لخشمه مانازف خليت ايدي على گصته ماكو حراره ،كعدته بسرعه كعد
- شسالفه خوفتني عليك شكد تنام!
ابتسم: تخافين عليه؟
وخرت عنه: لا خفت لا تموت وابتلي بيك
عفس وجهه ضاج
- البيت فرغ الكل طلعوا .. تگدر تروح هسه
عافني ونزل بدون ميباوعلي، طلعت وراه حتى ماالتفت ،حسيت نفسي اختنگت رغم زعلانه وضايجه منه بس مااعرف ماهان عليه، گعدت بالحديقة اصفن، انوب فتحت اغنية شمسين ولا اراديا گامت دموعي تنزل وي كل كلمة من كلماتها ..
ماحسيت الا على احمد يگولي: ارگيله؟
مديت ايدي مسحت دموعي وجاوبته: اي
ابتسم بوجهي بدون ميسألني شي وليش ابجي .. وهالشي حييل احبه بأخواني متفهمين وميدخلون بخصوصياتي او يحرجوني، يوگفون وياي ويواسوني ويطبطبون عليه بس من دون ميحسسوني بالاحراج او يلحون لمعرفه سبب بچيي او ضوجتي الا في حال اني حجيت الهم ..
راح لشوي واجه معمرها وجايب حبشكلات، كعدنا ندخن سوه، لهناك واجو عمر ومهيمن وهم كعدوا يدخنون ويانه ..
ل 12 يلا اجو الكبلات ماما وبابا وجايبين وياهم كرزات وحلويات وتجددت السهرة سوالف وضحك وتحشيش ولعبنه محيبس انوب طوبه للخمسه يلا كلمن راح لغرفته ينام ..
نمت ماگعدت الا ب 5 العصر وهم مو من وحدي گعدت؟
جروني عمر ومهيمن من فراشي جرر ومن ضليت مجلبة بفراشي هددوني ينزعوني بجامتي يلا طفرت خايفه لان مااستغرب منهم مخابيل كلشي يسوون ..
نزلت تغديت مدري تريگت مدري تعشيت المهم اكلت وجبة ..
كملنا وگعدنا نباوع فلم رعب، ومهيمن كعد بصفي كل ماتطلع لقطة تخوف انطي مهيمن راشدي بحيث خدوده صارت حمرر لحدما كام جاب النعال وكتلني كتلة تسوه عمري ..
مرت يومين والثالث وهو ماكو لا يتصل ولا يراسل، صحيح اني ماسامحته وضوجته بس نفسيتي تعبت لمجرد وجوده واتصالاته الي حتى ماارد عليها تحسسني هو وياي ويمي ..
ال 3 ايام صارن اربعه وخمسه گضيتها اشرب منوم ومااكعد الا سَـآعــهْْ لو ساعتين ..
6 ايام وهو ماكو واني مخلصتها نوم .. گعدتني امي ورزايل وكفخات يلا گمت، وكفت احس راسي يريد ينفجر من كثر النوم والمنومات الي اخذها وماما مستمره تفتر داير مدايري: كافي نوم مو راح تخيسين، ادري اكو بشر هالكد ينااام!
واني ساكته ماارد .. اخذتلي ملابس ودخلت للحمام سبحت شوي صحصحت، طلعت شسورت شعري وعجبني اسوي كيرلي طلع يجننن
اخذني الواهس خليت مكياج ولبست بنطلون جينز وبدي اسود وكعب اسود .. باوعت لنفسي طلعت خلقة ثانية!
طبت ماما تصلي ع النبي: اييي خوب يوميه وهيج اعتني بروحج شبيج يحضي!
-حجيت بدلع ورمشت بعيوني: حلوة مامي؟
- تخبلين يمامي
- بس هاا ترا اني اسووق؟
- هاهيه ماكو كل اشكال
نزلنا واني سقت السيارة وشغلت اغاني بعلوو صوتها واغني واتمايل وي الاغنية وماما تضحك وتصور بيه..
وصلنا للمول صفيت السيارة ونزلت لفت انتباهي سيارة صافه نفس سيارة همام؟
بقيت اباوع داير مدايري ماشفته .. طبينا للمول، دنمشي وگالت ماما
- ترا اكو اشخاص منتضرينه
- عگدت حاجبي: اشخاص؟ منوو!
لزمت ايدي وتگولي: امشي وياي ومعليج
تمشي وتجرني وراهه الا ان لمحت من بعيد همام ومرة گاعدة يمه متوسطة بالعمر فتحت عيوني على وسعهن: ماما وهمام؟؟؟
وصلنه يمهم واني لسه متفاجئة وهي تجرجر بيه، عافت ايدي وتقربت سلمت عليهم، عليه وعلى المريه وگعدت ..
واني لسه واگفه فوك راسهم مصدومة، المرة گامت الي تحضن بيه وتبوس: يمه فدووة لله لك وين لاگيها هاي؟ حقك من تخبلت علينا
من خلال كلامها عرفت هاي امه الهمام ..
حتى ما بادلت المرة السلام من گد ما متفاجئة بماما!
باوعت الها وخزرتها، احنه اهل العيون الملونه خزرتنا تصير تختلف، ماما دنگت وابتسمت ..
حجه هو: اگعدي ناز نتفاهم
حجيت واني على وگفتي واهز برجلي: ليش اكو شي بيناتنا نتفاهم عليه!
- دگعدي ويصير خير
خجلت من امه گعدت
حجت امه وتباوعلي وتبتسم: ام نازز احنه رايدين ناز لهمام .. ونريد كلمة منج حتى نمشي عليكم
توهه ماما دتحجي .. گتلها: ما موافقين
باوعتلي وابتسمت: فدوة الهالوجه حقج بنيتي الي سواه بيج همام مو شوي
- مع الاسف عليج خالة هيج مربية ابنج!
المرة استحت دنگت ماعرفت شترد
همام خزرني
حجيت: گومي ماما نروح
باوعتلي ماما بعصبيه: انلصمي وسدي حلگج
ورجعت التفت لأمه: هاهيه ام همام البنية الكم
احس نار كامت تطلع من اذاناتي صحت بيها: شنوو بكيييفج تصرفيين!!!
- ولج نويززه انتي تحبي لا تنكرين! من زعلتي منه لليوم كالساع راكضين بيج لمستشفى وهاي اغنيتج الخابصتني بيهاا شمسين مدري گمرين والدموع تكت شهرتينا جري عددل نويزززان.
نزلت عليه ذيج النزلة دنكت متفشله وهو يضحك بشماته ويرگصلي بحواجبه ويغامزلي، احس كرامتي انسحك عليها سحك
عاد صدك انلصمت وانجبيت وهو يضحك متشمت، ضلت امي وامه يسولفن بينهن واني اكل باضافيري من الفشلة وهو يباوعلي مبتسم بنصر الازررك!
بس الحجي بيناتنا كشخة وشخصية، ردت بس افلت استحيت من بعد سحله امي:
كتلها: ماما حـ اروح اشتري ملابس
- روحي حبيبتي
مديت ايدي اخذت جوزلانها
گالت: لا هالسالفه مو زينة مو تخلصين فلوسي
ضحكت وطلعت صفطة حمر خليتهن بجيبي وانطيتها الجوزلان وهي خطيه راحت روحها على فلوسها يمكن، حيييل تستاهل تسوي مخططات هي والازررك مريم خاتون!
گمت افتر بالمول ومابنفسي شي اشتري هيج .. حسيته يمشي وراي تجاهلته سويت نفسي ممنتبهه اصلا .. ماحسيت الا لزم ايدي
التفت اله: خيررر؟
ردلي مبتسم: انتي الخيرر كله
نترت ايدي منه: دعووف ايدي لا ادووس ابطنك
لزم گلبه ويسوي حركات مال واحد متوجع ويصيح اااخ كلبي
- شبييك؟
- ما يتحمل هذا الحب وهذا الجمال كله ولج انتي تختلفين عن البنات بكلششششي
ابتسمت: شلوون بله؟
- بكلششي بكلامج بلبسج بمشيتج انتي جووهرة ويا حضي من اكتسبتج
- كملت تصفيط؟ يلا عوف ايدي لا اكسرها لأيددك
- انتي ليش ماعندج انوثة؟
- الا رب الانووثة عيوني
- اي وااضح كلشش من كلامج
- وبعدين صدووك تعال شنو هالمخططات من وراي شطبگك على امي!
ابتسم وتدنه همس بأذني: حتى ترضين عليه كلشي اسوي
- بس اكرهك
- حقج
احس ورثت من القهرر شنووو حقييي!!
اخذ ايدي باسها : بس انطيني فرصة وداعت شريفه ميت بدونج! بس هالمرة افهميني ناز جاي اتعذب شفت الموت بعيني بيني وبين الموت شعره وحده وحق ربج
- اسم الله عليك لا تحجي هيج
ابتسم: اروح فدوة للحنينه ولج هو اني شمخبلني بيج غير هالحنييييية!
يبعد روحي ولج مشتاقلج حرام عليج راح اتسوودن
ابتسمت خجلانه وهو طاير مامصدك تصالحنه
راح وياي اشتري ملابس وساعه السودة الي اخذته بيها خبلني تخبببل لا هذا محلو لا گصيير لا مدري شنو يبووو اخر شي كضينا ثلث ساعات واني كلشي مامشتريه
لحدما خابرتني امي تكولي: تعاي ابوج خابر يكول تعالن عدنا خطار
كتلها: منوو؟
گالت: مادري
سديته منها سألني: ها؟
- حـ اروح ماما دا اتگول عدنا خطار
- بس ماشتريتي شي
خزرته .. ضحك بصوت عالي: جعل محد غيرج يخزر
- يلا باي
دامشي تقرب مني اكو خصله صايره على عيوني خلاهه وره اذني: شعرج يموت ناز ديربالج تگصين شعرايه وحده منه!
يحجي ويباوع بوجهي وعيونه ذبلانه: اذا تگصينا معناهه متحبيني
يحجيها مميل راسه ينتظر اجابه مني واني احس اطرافي ثلجت مادري شجاوبه
حجيت مرتبكه: اا با باي
- محروسه بالله محروسه بعلي
مشيت خطوتين ورجعتله وهو على وگفته يباوعلي گال
- ها يروحي؟
- دنگت العب بطرف شعري وخجلانه: همام تحبني؟
- دخيلج يا شرييييفة وتسألني؟ امووت ع التراب التمشين عليه وداعت عافيتي
ابتسمت واحس گلبي طاير بسوالفه وغزله، مشيت مسافه وصاح
-ناززز
التفت الناس تباوع خجلت كتله: هااا
- صاح احببببببج
يبووو تعالو دوروني احس معت من الخجل مااعرف وين اضم وجهي
الشباب ضلوا يضحكون واكو بنات اثنين خفيفات ومدري شلونهن گالن : دگوليله احبك شگد بخيلة!
خزرتهن ودرت وجهي اكمل طريقي رجع صاح ...
- نازززز
يرربي شيخلصها اليوم ،اشرتله هاا؟
صاااح والضحكه تارسه وجهه: اموووووت على ربج الخلقققج
رجعت اله وهو هم اجه يمشي عليه ..
- عفية همام شبيك ترا والله استحي
- ارووح فدوة لليستحي اكلهننن ذني الخدود الحمررر الي وردن من الخجل
اخذ ايدي ويصيح تعاي تعاي
- لا همام عفية وين ماخذني ماما تنتظرني
يجر بأيدي ويگولي: اششش تعاي وبدون حرف
اخذني على صفحه، طلع علبة من جيبه فتحها وطلع حلقة نازززكة بششكل اخذ ايدي ولبسنياهه
حجيت: حلقة؟
-اي حلقة حتى محد يباوعلج يعرفونج مزوجه يعرفون انتي ملك همام وبس
- حجيت بفرح: تجننن حبيييت
- واني هم حبيت
- شنو؟
- حبيتج
ضحكت بخجل وگتله: ترا احبك!
- وحگ علي اتنفسج
اخذت ايده بست باطنها بحنان: الله لا يحرمني من هالعيون
يباوعلي بامتنان شلون الي محصل على كنز احسه وده ميخليني لحظة
اتصلت ماما گال انطينياهه
اخذه حاجاهه: ها خاله
مدري شحجت وياه
وهو ردلها: اي جبتها جبتها
سده يضحك ويگولي: يلا امشي لعابتي امج خطيه تنتظرج
لزمني من ايدي ومشينا لماما .. امي بس شافته لازم ايدي خزرته وگالتله:
- ايددك ولك مو شفتني اطيتك مجال!
ضحك وگاللها: هاج خالة هاي امانة عندج لحدما اتصير على ذمتي ديري بالج عليها
هزت ايدها ماما: والله عمي خوش بنتي الكبرتها بدم گلبي جاي حضرتك ع الحاضر توصيني عليها
ضلوا يداهرون هو وماما وامه بس تضحك على سوالفهم، سوالفهم هواي دوخونا عاد گتلها
- ماما يلا تأخرنا
بالگوة شلعت ماما صعدت بالسيارة .. دااصعد اني ومااحس الا جرني ولزمني من خصري وگاللها:
- خاله
امي عيونها صارت بگصتها عاطت بي: وجعةةة عووفها لا انززلك!!
صافنه على ماما ومااحس الا حاط شفته على شفتي
انصدمت من تصرفه بقيت متصنمه بمكاني وماما تخبلت نزلت تركض وراه وهو يركض
ياااابه حطلك بطن واضحك على منظرهم، هو يركض وهي تركض وراه واني وامه خربنا ضحك، راحو مسافه بعيده اختفو من عيني شغلت السيارة ورحت وراهم
واباوعلك ماما واگفه مگطوع كعبها وتلهث
كتلها : دصعدي صعدي
صعدت وهي تنعل بي وتسب واني خربانه ضحك انوب التفتلي اضحك دارت عليه ترزل بيه
رديتها اضحك: ادري عاتبه عليج تصالحينا لعد اتحملي مو بعيده بعد يومين اشيل توم
اني گلت هيج وهي انجنت كامت تضرب بيه وترزل ادبسززز طالعة عينها ماتحترمني!
اتصل بابا گال جيبن عشه وياجن
سألته منو عدنا؟
گالها: گرايبنا من العمارة
اخذنا ويانه صواني مشويات وقوزي ودجاج وخبز ..
وصلنا اباوع اربع شباب واگفين ابابنا ووياهم مهيمن، دخلت جوة اني ومهيمن هو الي نزل علاليك الاكل
دخلت للبيت لكيت مرة جبيرة بالعمر ووياهه اربع بنات تطلع اعمارهن تقريبا بگدي واكبر
سلمت ع الحجيه شلونج بيبي
وباوست البنات الي اصلا مااعرفهن بس مبينات عرب من خلال حجيهن ولبسهن
دخلت ماما وراي هم سلمت وگالت لحگيني للمطبخ
رحت وراهه نرتب بالاكل واسألها
طلعت المرة اختها لوجه الطاوة والبنات حفيداتها وكذلك الولد ..
سألتها شعدهم جايين؟
- عدهم شغل ابغداد والظاهر مطولين هنا
نفخت متذمرة: اووف بس ماما ترا مااتحمل اني معلمه اصلخ واغني وارگص يعني ما حـ اخذ راحتي
- وين وين شو وجهج جنه بوومه!
- ها العفو نسيت حضرتج تصالحتي وي الافندي
كملنا العشه وبدينا ننقل الاكل للصالة، سويناهه سفرة وحده احنه صالتنا كلش جبيره، بدينا ننقل الاكل والبنات خطيه وياي واحسهن بس يردن يتقربن مني واني هم لانه البنات كلش لطيفات عدا كلامهن الي نصه ماافهمه حجيهن عمارجي حيل ..
كملنا صب الاكل ودخلوا الولد خطيه مدنگين بالكاع الا ان كعدوا ع السفره .. دناكل وسألني احمد:
- اي نازز شنو اشتريتي؟
جاوبته واني اكل: كلشي مااشتريت ماعجبني شي
- تردين باجر اخذج للكاظم وهم نزور وتشترين الي تردي مناك؟
- لا مو ضروري اصلا ممحتاجه شي عندي كومه ملابس
اثناء مدنحجي اني واحمد صدت عيني على وحده من البنات تباوع بينا وبس شافتني لمحتها دنگت تاكل .. يمي وحده من البنات سألتها:
- هاي اختج؟
- باوعت الها ورجعت گالت: لا هاي بت عمي واهلها واهلي من احنه وزغار توفوا وحبوبة هي الي ربتنا وكبرتنا
- اها .. بس مااعرف شو اشوفها تباوع بحسره او قهر؟
- اي مو خطيه هي ماعدها اخوان جانت وحيده اهلها وتوفوا .. جاي تشوفين ذولة الولد الاربعه؟
- هزيت راسي
- اي ذولة اخواني اني .. وهي دائما من تشوفنا او تشوف اثنين اخوان تنقهر بس تحاول ماتبين
بس مو تشوفيها هيج والله طيبه وفقيره .. رغم اخواني ممقصرين وياهه بس تبقى بعازة الاخو الحقيقي
- لا حبيبتي ادري تره البشر اعرفه من نظرة وحدة وهي مبينه مو حسوده
رجعنا ناكل والولد مدنگين مشالو راسهم ولا رفعوا عينهم باتجاهي ..
كملنا واصرن الا هنه ينقلن الاماعين، نقلنها وغسلنها ورتبن المطبخ واني وياهن .. دنرتب وانتبهت تليفوني يدك، باوعت همام .. فتحت خط
بس فتحت خط نزل عليه رزايل على غلط وكاعده يم الولد ومتدرين بيه وهاملتني وادري بيج طبعج متغيري .. ضليت ساكته لان حتى ماانطاني مجال احجي
ضل يحجي يحجي واني استمع بهدوء الا ان سكت، گتله: كملت؟
تنهد: اي كملت
- شوف اولا ماالك حق تحاسبني وي منو اكعد ووي منو اطلع!
ثانيا شنو قصدك كاعده وي الولد؟ !!
باع انت بمثابة خطيبي على عيني وعلى راسي بس مالت تگعد تشكك بيه ف هنا مااسمحلك، انت المفروض تكون مطمئن وثاق انه لو تخليني بين مية رجال ابقه اني ومااتغير ترا الثقة اهم من الحب ومن كلشي ..
من حجيت وياه هيج حسيته خفت عصبيته وتندم نوعا ما، ضل يگولي لان هو متصل هواي واني ماارد وهو ميقصد هيج ..
بقينا نحجي حجي عادي ،اخذت التليفون وصعدت الغرفتي وكملنا حجي حجينا هواي لان احنه منعرف شي عن بعض بس بدت علاقتنا تطور صارت المشكلة .. حجالي هواي عن حياته واني بالمثل ..
لحد ما اندك الباب ودخلن البنات گالن عادي نكعد يمج؟
كلتلهن: كل الهلا تفضلن
كعدن البنات ردت انهي الخط وياه، گال هو بقي مفتوح واخذ راحتج وياهن ..
سألن: شنو تخابرين؟
كتلهن: لا اكعدن
ضلن خطيه كاعدات يمي ومتوترات، گتلهن شبيجن شنو مستحيات مني؟
جاوبت وحدة منهن وهي مستحيه: مو شسمه انتي تختلفين عنه
- لا اختلافيش شنو هالحجي اني حالي حالجن بشر من دم ولحم وشحم .. ههههههههه ولو وينه الشحم بس لحم وعظم
ضحكن، لشوي سألت الثانيه: اگلج حبابه شتحطين لوجهج وهيج صافي وحلو؟
- ضحكت .. تردن الصدك؟ يجوز انتن تطلعن مهتمات برواحجن اكثر مني ههههه اني هاي طفرة وراثية ،حسب حجي ماما تگول هاي بيبيتها هيج بيضه وحلوا واني ومهيمن طفرنا عليها، اذا ملاحظات اني ومهيمن حيل نتشابه عبالك توم
گالن: اي صدك هواي تشابهون خاصه الشگار
- اي وعيونه هماتين على بيبتها الماما، لان ماما لون عيونها عسلي مو رصاصي
ضلينا نحجي والخط مفتوح، عرفت انه كلهن خريجات وحده خريجة علوم ووحده تربيه والخ تربية رياضة، بس البنية الي باوعت النا اني واحمد جانت بس كاعده وتستمع ابد ماشاركت بالحديث مع العلم كم مرة اتعمد اسالها او اتعمد اخليها تشارك بالحديث بس هي جانت ماهذة جانب الصمت .. لشوي وترخصت كالت انا رايحه انام يم بيبي
كتلها: براحتج
گامت وكمت وراهه قفلت الباب ورجعت هنه عرفن بعيوني اسألة ضلن يتعذرن كالن هي هيج طبعها من وفاة اهلها لليوم صارت منعزلة حتى راجعنا دكاتره بيها بس بدون فائدة ..
شوي وگالن: اكلج شو ضووجاا خلي نعاين فلم
كعدنا نباوع فلم ،باوعت بوجوهن كلها شعر، هنه حلوات وملامحهن حلوة بس اهتمام ماكو،اني وجهي وجسمي كله مسويتله ليزر
صفنت بيهن هنه خطيه مو يمي مركزات بالفلم .. گمت صاحن ووين؟
گتلهن: هسه اجي اخذن راحتجن
رحت لغرفة ماما كتلها اريد شمع
كالت: شتسوين بي
كتلها: اريده
گالت: ذاك هو والجهاز مالته اخذي
رحت اخذته ورجعت ركض الغرفتي شكلت الجهاز وصحتهن اجن ميدرن شكو، وطحتلهن صلختهن صلخ وهنه صراخهن صار يجيب التايه
كملت وجوهن اباوع البنات وجوهن اختلفت 180 درجه صارت تضوي يااخي صدوك الشعر يظلم الجمال!
بس وجوهن طگگت احمر، خليتهن ثلج الها انوب استلمتهن عنايه ترطيب على ماسكات على تونرات، وسويتلهن بجهاز البخار البسامير واثار الحب والمسامات يعني من صدووك طلعن خلقة ثانيةةةة!
تعبي ماراح بلاش بيهن كملنا باوعت الساعه ب 2
شلت البرده باوعت للشارع الولد لسه كاعدين
هالحجي كله وهمام وياي ع الخط .. گلت للبنات شنو رأيجن ننزل يمهم؟
صاح من يمه: دنززلي وشوفي؟ اني قريب على بيتج بيج خيرر انزلي
ماعاندته لان ادري ميتجادل طكة ونص .. البنات گالن: اذا تنزلين ننزل وياج احنه نستحي من الولد، وراح نقيدكم ندري بس تحملونا بين ماتكمل معاملتنا ..
- شنو هالحجي البيت بيتكم شوكت متجون اهلا وسهلا
نزلن هنه واني ضليت اتوسله حتى انزل ماقبل
كتله هاهيه ماانزل شلي بدوخه الراس
شوي وهو نعس كال اني رايح انام بس لو دريت يا ناز نازلة جوة لا تلومين الا نفسج
كتله: اطمئن ماانزل
سده وراح .. ضليت بالغرفة افتر مانعسانة وضايجة والبنات نزلن گلت هسه هو نام قابل شمدري دخلي انزل يمهم شوي
نزلت يمهم لكيت السهرة عامرة كرزات وحلويات واركيله وواحد من الشباب صوته يموووت بي بحة جنوبية رهييب
رحت كعدت بين احمد ومهيمن واخذت الاركيله وكمت ادخن، والبنات على جهه كاعدات يكرزن
الولد والبنات همه شافوني ادخن فكوا عيونهم وواحد يباوع بوجه الخ!
ضحك احمد: ههههههههه عادي يابة هذا اخونه متعود يدخن ويانه
ضحكوا بس لسه الصدمة بوجوهم
ضلينا بالساعتين ضحك وسوالف وتدخين والولد يغني ع الطلبات، طلبت منه اغنية شمسين وغناهه .. بهالحجي اني مطمئنه همام نام
دزني عمر على شغلة لغرفته صعدت جبتها ومريت بغرفتي رحت للتليفون والگي يدددك
فتحته واشوفلك 30 مكالمة
اني من النوع من اجذب الجذبه تبين بصوتي ماادبرها انكشف انكشف
انطيته رفض بس الخوف دب بگلبي لان اني الي عبرت حجايته هالمرة ..
انطيته رفض ورجعت اتصلت عليه وصوتي يرجف، بس فتح خط نزل بسيفونيته المعتادة انعل واشعل ماخلة احد سلم منه ..
حجيت معترضه: شبيك شكوو ترا جنت نايمة
-جنتي نااايمة موو جنتي نايمة بت ال *
عطت بي: ما اسمحلك تغلط فاهم!!!
بقينا اني اجر وهو يجر .. هالحجي كله والباب مفتوح نسيت اقفله ومنطيه ظهري للباب واحجي ..
تجاوز كلش بالحجي على بابا وعلى ماما اخر شي سديت التليفون بوجهه درت وجهي وانصدم وحده من البنات واكفه بالباب وتضحك
دخلت تضحك كالت: منو هذا؟
- اسولفلج ويبقى بينا
- اي طبعا احجي
حجيتلها كلشي عن علاقتنا ومشاكلنا وصولا للمشكلة هاي .. گالت هو صح انتي غلطانه بس هم مااله حق هيج يتجاوز
- شسوي اني هم احبه وادري بي ميقبل ومع ذلك نزلت
- ميخالف كعدي وياه واتفاهموا فهمي هالعصبية والانفعال الزايد توديكم لمشاكل يجوز متنحل والغلط والتجاوز ميحل مشكلة بالعكس يزيد الطين بله
- بعدنا ما بيناتنا تفاهم نتصالح يوم ونتعارك عشره
ضل هو يدك يدك .. كالت جاوبي خطيه
- لا مااجاوبه
- زين خلي اجاوبه اني واگله ناز تخربطت خلي نشوف الحب شيسوي تحجي وتغمز
صدك فتحت خط وسبيكر
- الوو
اجاهه صوته: ناز وين؟
- اتخربطت وخشمها نزف دم وهسه وضعها مو تمام متكدر تحجي وياك
نتر من يمه: شو انطيانياهه بلا زحمة؟
اخذته خليته ع اذني گال: ناز نزلي جوه اريد اشوفج
- انت وين
- اباب الشارع
- تمام دور من وره واعبر ع الحديقة
سديته منه والتفت الها: عفية باعي شكلي تمام؟
- ههههههههه يمعوده جذبنه جذبه دشوفي وجهج شلون مضوي خلي نسوي اصفر
- ها ... ضلمة ضلمة ميبين
رجع اتصل انطيته رفض ونزلت اركض، كلبي كام يوجعني قوووي بس ماهتميت كملت ركض، طلعت من باب الترك لمحته واكف جوه الشجره، ركضت عليه شمرت روحي بحضنه وگلبي احسه موتني وجع
صاح: الله الله شبيج حبيبي!
-گلبي همام
- اخذج مستشفى شبيج حبيبي ؟
- لا هسه ارتاح واصير زينه
كعدني بحضنه خليت راسي على صدره، يلعب بشعري وگال
- جنتي نايمة؟
- لا
- نزلتي مو
- هزيت راسي بـ اي
- تنهد ليش تعانديني نازز وتالي!
- اسفه اخر مرة
- ناز شوفي شعرج لبسج معقولة محد بيهم باوعلج!؟
- سكتت
-حاجيني ناز لا تسكتين
حجيت بندم: حقك
- لخاطري بعد لتعاندين شلعتي الگلبي وداعة شريفه
- شددت حضنتي اله: صار متنعاد بعد
بقيت بحضنه وحاطة راسي على صدره حجيت من بعد صمت:
- همام
- عيونه التشلعيهن
- بداعتي بعد لا تحط من هذا العطر
عنكش وجهه: ليش ولج!
- مااحبه
- ولج تدرين هذا اوصي مخصوص من اربيل يجيبولياه؟
- اييييع هسه ع حوره
ضحك وعصر خدي :صار تأمرين بعد مااخلي منه
- رمشت بعيوني بأنتصار: عفية بحبيبي
شال شعري خلاه ع وجهه ويردد يراحه گلبي انتي
- حجيت بدلع: هم اشتاقيتلي
-حبيبي انتي لو ثوولة لو تستثولين
ضحكت .. احبك تراا
تنهدد احلفيلي ماتتخلين عني مهما كانت الاسباب
- مااعوفك الا اذا تخوني
ابتسم وضل يتأمل وجهي
ضليت بحضنه الا ان غفيت .. نمت نومه من نوومة ماحسيت الا وهو يهمس بذاني
- كيكايتي؟ نازتي اكعدي حبيبي طلع الضوة
فتحت عيني باوعتله ابتسمت تمغطت
گال: اسف يروحي عذبتج بنومتج گومي يلا طبي جوة
گمت وكفت وانطيته ايدي گومته وكفنا طول بطول گال
- رايح للنجف بوجهي
- عفست وجهي ليييش؟
- عندي شغل ليفوك راسي
- اوك ديربالك على نفسك وانتبه للطريق
- ابتسم :شنو ماراح تودعيني؟
- مو هياتني دااودعك
- لااا مو هيج، غمز وشبگني حيييل جعصني وخله راسه برگبتي ويشم جر شعري على وجهه ويجر نفس منه
يشم مغمض عيونه وگال: ناز
- همم
- اريد خصلة من شعرج
ابتسمت: اوكف دقيقة هسه ارجعلك
طبيت اركض صعدت الغرفتي البنات نايمات الا مريم گاعده منتظرتني بس شافتني گامت
- ووينج ولج منتظرتج خفت عليج لا احد من اهلج يشوفج
- اشرتلها اششش هسه اجيج
رحت طلعت مقص كصيت خصله ونزلت اركض واتختل
بس شافني تقدملي واني اركض: نازز انتي مخبلة شلون هيج تركضين!!
امووتج بعد لا عدتيها
انطيته الخصلة ابتسم واخذها ضمها بكفر موبايله باسني براسي ونزل على ايدي باسها وخدي وراح ..
ضليت صافنه بمكاني اباوع وراه .. مااحس الا واحد گمزني طفرت ليفوك واباوع لنها مريم الادبسزز وگفت كلبي!
التفت خربانه ضحك
عطت بيها: ومرررض وكفتي گلبي
- ترگصلي بحواحبها وتغامز: هلا هلا حنج واگعه ومحد مسمي عليج خيه
جريت خصله من شعري العب بيها واضحك بخجل عشتوو
غمتني وطبت جوة .. رحت وراهه لغرفتي لگيتها تشوخر، حجيت بصوت ناصي:
فلك فلكج شبسرعه نمتي!
رحت لفراشي تلفلفت ونمت ..
ثاني يوم فزيت محد بالغرفة، جريت تليفوني دازلي
" صباح الخير كيكايتي "
جاوبته وضلينا نتراسل بالنص سَـآعــهْْ وراهه سديته منه وگمت سبحت ونزلت جوة
الحجية والبنات گاعدات صبحت عليهن
ردلي: صباح الخيرات
اباوع المرة الجبيرة تباوعلي تدنيت لمريم: شبيها بيبيتج اليوم؟
ضحكت .. حبوبتي من نضرة وحدة تعرف شنو مستقبلج
- الله عليج صدووك؟!!
- والله شبيج
دنحجي وحجت الحجيه: انتي عقد قرانج جريب ومن البشر اليهواه گلبج .. مستقبلج چنه وياه بس راح يكسرلج گلبج
خمشني گلبي كمت ابلعم حجيت بخوف: شلون يعني يكسرلي گلبي؟
- اشوف جدامي طفل صغير وياه وهذا الطفل يكون من نصيبج انتي الي تربيه على ايدج واتعبين عليه وتكبرينه ويصيرله مستقبل يزهي بسببج
- يعني شنو مداافهم عليج بيبي!
ابتسمت بوجهي: تفهمين يبعدي تفهمين كلشي بس بوكته المناسب
بس راح تتعبين حييل وهالكلب الابيض ينجرح مرات و مرات ..
سكتت ورجعت كملت: انتي يا يمه حصتج من هالدنيا اربع شمعات، وهالشعر الحلو راح يكسي الحجاب ويجمله
گمت افر بأذاناتي من الخوف
همست لمريم: شو كلشي مافهمت لاصتها عليه بيبيتج
- هههههههه وداعتج بيبيتي ما تخطى بشي ابدد جنت مثلج استهزئ بيها بس جربتها اكثر من مرة
ابتسمت: مايعلم الغيب الا الله
كمنا اني والبنات نضفنا البيت وسوينه غده، اجو الولد صبينا الغده وكعدنا ناكل وام حيدر الحجيه طگتها صفنه على احمد .. والله شوي وجان تگوله
- زواجك جريب
ضحك احمد مستهزئ: اي سهلة حجيه سهلة
عاطت بي: شنهي ولك تضحك عليه!
ضل يتعذر احمد وهي مااهتمت كملت ..
- راح تخطف من جدامك وهذا عقلك شايفه الخابصنه بي؟
الا تسلبه الك تصير لا ليلك ليل ولا نهارك نهار تخليك هيج هيج حاير بزمانك
ضحكت: بيبي شسالفتج اليوم منو كضيتي گلتيله راح تعرس
باوعتلي معاجبهه هزت ايدها ورجعت لأحمد وتأشر عليه
- شايف هالفصمه هاي؟ زواجك يصير بسببها بس انت يحميد ماتكعد راحه تعذب المكروده تمرمرها تمرمر تخليها تتمنى الموت وماتلگيه
احمد ياكل ومامنطيها اهتمام
- بس هاي البنية وراهه سر جبيير .. رجعت اشرت عليه
- وهذا السر عمرك مراح تعرفه والسبب هاي!
تحجي وتأشر عليه بأتهام عوزها ماتكوم تكسرني بعوجيتها خلتني احس روحي مذنبه
دخلت شهد جافته تفاجئت متدري عدنا خطار
كالت السلام عليكم
واجت گعدت يمي وتأشرلي منو؟
اشرتلها تگعد بعدين ..
ام حيدر شافت شهد وطكيلج صفنه شطولها عليها
گالتلها: انتي اشوف براسج قبعه
شهد حطت ايدها ع راسها وتكولها وينها بيبي وينها؟
ضحكنا عليها .. گتلها: ووجع شبيج تاخذ خيره
سمعت هيج لو هي طفرت ع الحجيه: كملي بيبي كملي قبعة تخرج قصدج موو؟
- اي بس زواجج يصير قبل القبعة واشرت عليه .. زواجج بسبب هاي
هنا كلهم باوعولي وطگوها بضحكه
گال عمر: شنو ناز صرتي ام عباس السحارة زوجتي العشيره كلها
- رفعت اكتافي والله مادري علمي علمكم شو ياهو التلزمه وگالتله تعرس والسبب هاي
نط مهيمن: بداعة الخوة مرة عيونها سود
نط الثاني: بعد اخوج مرة طويلة ورشيقه وشعرها قصير
مديت ايدي هاكم بوسو
اخذها مهيمن تفل عليها ورجعها، رجعت مسحت تفلته بهدومه
شهد عجبها الوضع مركزة وي الحجيه صاحت:
- اششش شو سكتوو .. يلا كملي بيبي
الحجيه ماكالت باطل بعدهي مكنكه على نفس الراوتر
- ايي راح يصير عدج اطفال ودربج بعيييد وبسببج امج راح تتعذب
صحت: اللهم صلي على محمد هالمرة مو بسببي
خزرتني الحجيه انلصمت
رجعت كملت: اميمتج تتعذب عبن تشوفج لابسه بدلة العرس وواگفه بصالة جبيرة وحايرة ومنتظرة شخص
شهگت شهد وضربت صدرها: صخام الصخمني يعني زوجي ينهزززم!
ضحكنا عليها وعمر نصب عليها خطيه خزرتنه شهد
- لا رجلج بصفج يصبر عليج، بس واحد عزيز على گلبج حيييل اعز من امج وابوج
- وهذا الشخص بنية ولد؟
- صفنت وگالتلها بنية
- منوو بيبي؟
- مادري مادري .. يلا كافي دوختوني ميلو عني ميلوو شوو
رجعنا ناكل ومن كملنا الشباب نقلوا اماعين الاكل للمطبخ واحنه استلمناهه غسلناهه، نغسل ونرتب سوه ونضحك ونحشش بسرعه كملنا ..
دنصفط بالاماعين المغسولة صفت بصفي شهد :
- اخذتلج خيره؟
- اي بس مافهمتني لاصتها عليه الي يريده كلبج تزوجيه ووياه طفل
صفنت بوجهي شهد شوي وجان تعيط: عزاااا يعني شنوو همام متزوووووج!!!
- وسممم طورشتي اذنيييي
شدراني .. بس لا يمعوده هي خيره قابل صدگتي كلها خرافات وخزعبلات واصلا حرام
- لوت بوزها: اي هم صحيح
رجعنا نشتغل، جابتلي شهد موبايلي: هاااج يدك عليج خبصنا
ضحكت واخذته منها دزيتله رساله ( حبيبي شوي واحاجيك حاليا مشغولة)
شاف الرسالة وبقه يدك، جاوبته والبنات يمي
- الوو هلوو حبيبتي شلونج
ردني يقلد عليه: هلا حبيبتي اني زينه انتي شلونج
- ضحكت .. اوووي شگد مليقة انتي يربي
- اوووووي وانتي شگد حلووة دخيل شرررريفة
- ضحكت بصوت عالي وحجيت بدلع .. مشتاقتلج حَــيآتـي
- دعدلي حلگج حياتي لا اجي اشگج
- اوووي مو دا اگوولج لئيمة
- اي هو صوجي حبيت بغدادية فاهية وتتنعوص براسي
- ضحكت بدلع
عاط بيه: نازز بطلي مياعه لا اشگج
بعدين تعاي حضرتج هيج تتمضحكين گدام الولد!
- لا وداعتج حبيبتي بس بنات يمي
- نازز
- بدلع روحها
- دشوف وتزعل من ردت اغتصبها؟
- ضحكت اوووي
- ومررض شبيج شاربة شي اليوم
- اي شاربة ببسي
ضحك .. رجع كال: ناز؟
- ها
- اريد اجي اخطبج
- مو وكت هذا الموضوع حبيبتي
حسيته ضاج: ليش متردين فرحتنا تكمل؟
طلعت من يمهم وكتله: لا حبيبي مو وقت هالموضوع هسه
- ليش شعدج؟
- همام خلي اتعرف عليك بعد
- مااكدر اصبر بعد والله اليوم مرتين الله ستر جان مسوي حادث بسببج
- يااا اني شعليه
- ولج تتخايليلي وين مااروح كافي اريدج يمي وبحضني وغرفتي
- فدوة همام لا تلح گتلك خليني براحتي واتعرف عليك اكثر
- اني شايف البنات هي الي تستعجل الولد بالخطوبه اشو اني هسه اتوسل بيج ومتقبلين
- حجيت بدلع: واني مثل البنات؟
ضحك لا والله انتي ملاكي غير عن البنات
سولفنا شوي وراح...
رجعت يم البنات، مشت الايام اسبوعين مرت اني وهمام ساعه نتكافش ساعه نتغازل .. البنات بعدهن لسه عدنا، الولد رجعوا بس هنه والحجيه بقن يمنه ..
كاعدين كلنا بالصالة وشهد عافسه وجهه وتصيح نازز ضووووجة
كتلهن سهلة
صعدت الغرفتي عندي ام بي ثري صغير جبته ربطته ع الجهاز وشغلت معزومه وگومتهن رگصن
كلهن ركصن الا شهد الي جانت تصيح ضوجه مقبلت كاعده، شهد الي بس تسمع معزوفه جسمها يهز من وحده اتوسل بيها مترگص!!
ركصنا اني والبنات، واني خو ع گولتهن بنات الملاهي ميلحگنج بالركص!
دنرگص واجو مهيمن وعمر، البنات استحن كامن وحده تردم الثانية وراحن گعدن .. واني تلگيتهم اهز جتف
عمر تلگاني يطك اصبع ومهيمن يهوس
صرت بنصهم واركص، البنات عود مستحيات حمن كامن يركصن ع الكعده وشهد ابد ولا تحركت.
ارگص ومنطلقه لحدما حسيت دگات گلبي بعد مااسيطر عليهن، اريد اكعد مالحگت وگعت بالگاع ..
اجن البنات يركضن عليه وطفنه، مهيمن خلاني بحضنه وعمر جاب مي غسل وجهي، وعاطوو بشهد
- گوومي جيبي علاجهااا
ركضت شهد جابته، اخذه منها مهيمن شربني لشوي جريت نفس طبيعي
حجه عمر: فيفو عبدو لازم تعتزلين حالتج اصبحت خطيرة
ومهيمن يرده: لا ولك هذا ددك فلووس شلون تعتزل
ماكدر ارد عليهم حيل تعبانه كمت منهم وصعدت الغرفتي .. اول ما طبيت الغرفه دك همام
جاوبته بتعب
اجاني صوته: ها فيفو عبدو عود اوصيج على نفسج لا تركضين. لا تنسين علاجج وحضرتج مفتحتلي ملهى
ضفنت: هذا شمدري!
معقولة توصل بيه مخلي كاميرات ابيتي؟
گمت ادور بالغرفة عاط: ووووينج مو احاجيج
- فزيت ها ها وياك
- وجعااا شبيج متجاوبين
- دا ادور بالغرفة خاف حاط كاميرات
ضحك بصوت عالي: بربج صدك ناز؟
- والله
- لا اطمئني محاط شي
- لعد شمدريك جنت اركص؟
- رد ابرود: شي ميخصج
ضل يرزل شلون مااهتم لنفسي ومدري ايش ضجت سديت التليفون منه وضليت متمدده ع الجربايه
دقايق وطبت شهد بيدها تليفونها مدته الي:
- هاج همام ع خط
خزرتها واخذته منها
اجه صوته: بالله يناز اذا مجريتي عددل ادفنج وانتي عايشه افتهمتي
حجه هواي واني مالي خلك حجي تالي سديته منه، بعده التليفون بأيدي دز رسالة
(ديري بالج عليها اذا صار بيها شي انتي حصتي يا شهد!)
قرتها شهد وبرطمت: شذنبي هسه اني شذنبيييي
- ذنبج بت اختي
- امدااني هو اني ليش مااحضره
ضحكت
- بس تدرين ناز رغم سوالفه والمكافش البينا بس احبه احسه مثل اخويه الجبير، مثل مهيمن عمر
- اممم ضيگت .. صدوك هو همام شمدري اني اركص؟
- شهگت: مو اني جذاااب مو اانيييي
- شبيييج احد گايلج انتي؟
بس والله من هاي رعصتج اكدتي على روحج التهمه
- ناز والنبي يدك عليج ومتجاوبيه وراسلني ناز يمج؟
كتله ناز دتركص
جان يگول افتحي كام اشوفها
ها ترا ماقبلت خاف تگولين بس هددني وگال اعرف مديرج اخلي يرسبج
انجبرت وفتحتله وهو شاف كلشي عاد ..
شوي وطلعت هي واني نمت ..
للمغرب گعدتني شهد مبرطمة، افرك بعيوني واحجي:
- شكووو مگعدتني شبيج
حجت مبرطمة شوي وتبجي: ناز بالقرآن اذا متگولين لهمام يفك مني انعل والديكم انتي وياه!
- نفخت هففف شبي انوب شسوالج؟
- حضرت جنابج نايمة وهو كل خمس دقايق مخابر ويزامخ ها گعدت؟ وينها ماگعدت
اخر شي شو عاط بوجهي امشي گعديها موزين تنام المغرب!
يمعود متقبل احد يكعدها
يگولي: اذا متگعديها انشر رقمج واكتب ارمله جادة للزواج
انوب اخر شي انفعلت گامت تحجي وتبجي، دتسولف واتصل هو
- هاج هاج سمعي بأذنج راح افتح سبيكر
صدك فتحت سبيكر وگالت: الوو
رد عليها: احجي عدل لا اعدلج حلگج
عاطت بي: شبيك شبييييك!!!!
-بيه دم ولحم .. خلصيني گعدتيها؟
- سوت حلكها بحركة عناد وكالتله: لا
- امم وليش يا ست شهد
- ماعاجبني
- حلووو گلتيلي معاجبج مو؟ استلمي المعجبين چا
صررخت: لااااااا هاي يمي والله
ضحك: من البداية وصيري حبابة
اخذته منها: ها حبيبي
-يروحه الحبيبج ضل بالي يمج
- لا عمري ليضل بالك جنت نايمه
- صليتي؟
- لا
- يلا گومي توضي وصلي يلا ابوية انتي
- ابتسمت صار حبيبي هياتني گايمه
سديته منه وگمت توضيت وصليت وشهد واگفه فوك راسي تدردم عليه
نزلت جوة لكيت البنات كاعدات والحجيه وامي وابويه
بس شافوني صاحو: هاي اجت ناز تعاي تعاي
رحت گعدت: ها شكو شبيها ناز؟
حجه مهيمن: تروحين ويانه للنجف؟
باوعت لشهد: تروحين؟
- اذا تروحين اروح
- هاهيه لعد بس كون نبقى براحتنه مو بنفس اليوم نرجع
حجه بابا: لا اجازة نبقى يومين ثلاثة هيج شي
- اوك لعد
ضلوا بابا والولد يسولفون بينهم ع السيارات ومن هاي سوالف الزلم ..
سألت ماما: ماما شنسوي عشه؟
گال مهيمن: اني راح اجيب من بره
- خوش بعد احسن
تعشينا وكعدنا شوي وراهه كلمن راح لغرفته لان ورانه طلعه من الصبح باجر ..
الصبح طلعنا للنجف، نزلنا بفندق همام لان حسام حاجيلهم عن الخدمة ممتازة بي ومريح .. طبعا هو محاجيلهم عن همام بشكل شخصي بس ع الفندق بشكل عام ..
اني منطيته علم بجيتنا، لكيته واكف اباب الفندق ينتظرني لابس اسود ونضارة سوده ويگلب بموبايله مامنتبهلي
نزلنا اني ومهيمن وعمر وشهد لان احنه اجينه بسيارة وحده والبقيه وي بابا ..
طلعت تليفوني كتبتله: فديت الابس اسووود
بسرعه رفع راسه، اجت عينه گبل بيه ابتسم وصافن بيه
رجعت كتبتله: كافي حبيبي حلگك حـ ينشگ شهرتنا
طبينا اني وشهد وعمر للفندق ومهيمن ضل ورانه يصف السياره ..
تعديت منه كلش قريبه مد ايده لزم ايدي واني ماشيه..
حجزنا غرف النا وللبنات ولأهلي واني وشهد صرنا غرفة وحدة
صعدنا للغرف وهو واگف على جهه ويباوع بيه
دخلنا الغرفتنا خليت غراضي وكعدت ارتاح حجت شهد:
- همام صدووك شخصية وهيبة
- شلون اكتشفتي بله؟
- عزااا لج وگفته تخبل ماشفتي شلون ذني البنات واكفات ومفهيات بي؟
- احس النار صعدت الراسي: يا بنات ذني!!!
- ياا شبيج ذني المقابيله واگفات معقولة ماانتبهتي!
- حجيت ابرود عكس النار الي صارت جوايه: لا
بهالحظة لو الزمه ارش عليه نفط واحركة متت متتت
ضلت شهد تحجي بمواضيع متفرعه بس بالي مو وياهه علك بهاي السالفه، والله ربع سَـآعــهْْ واتصل
اييييي الله جابك
فتحت خط وماتحملت صحت بي: كلشي تعوف من ايدك وتجي هسسسه بسررررعة!
- رد عليه مستغرب: شكو شصاير!
- دا اگولك تعاااااال
سديته بوجهه اغلي اغلي افتر بالغرفة وشهد تخرط بخدودها وتلوم بيه: عزا بعينج اليوم يذبحج ولج شسويتي!
صحت بيها: اششش سدي حلكج
شوي واندك الباب رحت فتحته طب عاكد حواجبه
قفلت الباب واجيت حجه هو: شبيج نازز خوفتيني بيج شي؟
يحجي ويمد ايده يتحسس خدودي وگصتي
حجيت واني مكتفه اديه لصدري واهز برجلي :
- منو ذني اليباوعلك؟
صفن بوجهي: ها
- منوووو ذ ن ي الي يبا و علككككك!!
- شبيج تخبلتي منو ذني مجاي اعرف شتقصدين!
- شهد تگول بنات واكفات يباوعلك
انطه نظره لشهد وخزرها ورجع باوعلي: هنه گ *** اني شعليةةة
- هه هنه لوما شايفات بيك مجال يباوعلك فهمنننننني!!!
- صاح طورشتي اذاني شبييييج تخبلتي؟ اني شعليه اذا هنه يباوعن .. شفتيني اباوعلهن احجييييي
ديحجي وتشكلت عيني بقميصه عايفه مفتوح وصدره طالع، اتدنيت
ادكم بالقميص واحجي: قسما بالله اذا مرة ثانية عفت قميصك هيج اجيب سجينه واشوهلك صدرك المتباهي بي افتهمت؟
- لمحته ضحك وسرعان ماضم ضحكته: طولج شبر ونص وتهددين؟
تستهزء بيه موو؟
نزلت دموعي ماسيطرت گمت ابجي واضرب بي واصيح انت منطيهن مجال انت عاجبك المنظررر
ضل يتفاده ضرباتي انوب لزم اديه اثنينهن بأيده حسيتهن راح ينكسرن عاط:
- شبيج شبيييج تخبلتي جاي اگلج وداعت شريفه ماشفتهن مادري بيهن!!
تتوقعين انتي موجوده گبالي وعيوني تشوف غير عيووونج؟ حاجيني لا تسكتين
باوعت بعيونه كتله: اي تسويها
صفن بوجهي ابتسم: مشكلتي اكره روحي من تبجين بس بنفس الوقت احب لون عيونج من تبجين ويخبط احمر ورصاصي احس روحي اشوف منظر خلاب
ابتسمت ودنگت امسح بدموعي
- يمن اروح فدوة لهالابتسامه دضحكي شبيج چنج عجوز ماكلين عشاهه
- هاي اني عجووووز؟
ضحك بصوت عالي خله گصته على گصتي ويباوع بعيوني:
شبيج بويه اليوم مشتهية تعاركين ؟
گامت شهد تسوي: احم احم نحن هنا
باوع لشهد خزرها: بسيطة بسيطة يشهد
باسني بخدي وطلع ..
اجت شهد گمزت يمي ووجهه خوف : يعني شنو قصده ناز؟
رفعت كتافي ب مادري
ضلت تفتر بالغرفة خايفه واني بداخلي خربانه ضحك على شكلها تطكطك باصابيعها وتدعي عليه .. والله صدك ماكو ربع ساعه ودك تليفون شهد رقم غريب
باوعتلي خايفه: رقم غريب!
- دجاوبي يجوز وحده من صديقاتج
فتحت خط وسبيكر اجاهه صوت رجال: شهد؟
گالتله: بلي منو وياي
- مو انتي ناشره رقمج ارمله ومستعده للزواج
هو كال هيج وشهد كامت تخرط بخدودها
اني وگفت على حيلي حاصرتني الضحكه سدته بوجهه، وتوالت علينا الارقام يسكت واحد يتصل الخ ..
كتلها يمعوده دطلعي الخط وكسري واني اخلي همام يجيبلج غيره
كعدت بنص الغرفه تملخ بشعرها وتجر زيكها شلون العجايز وتدعي على همام: عساهه بحضك يهمام بيش مفاولي ارملة؟
ولك حيوان جان كتبت مطلقة بيها مجال ولك ارملة مرة وحددةة
هي گالت هيج بعد ماتحملت تمددت بالگاع من الضحك وهي تخازر بيه ودها تگطعني بمكان همام
لشوي واجه همام جايب علاليك بيده وهي تهجمت عليه تدعي وتغلط وهو يضحك عليها ويحجي براحه
يگولها : هسه ارتاح گلبي، يااخي مارتاحلج مدري ليش
وهي تتهدد تريد توصله واني لازمتها
كتله: ليش هيج وياهه حبيبي خطيه
ردلي: ختولي بسببها نزلت دموعج
حجت من يمها وتخازر بينا: اي مو ع اساس دموع الاميره ديانا الي نزلت
ضحكت: حبيبي جيبلها خط غير هذا
- صااار بس لخاطرج مو لخاطر هاي، يحجي ويباوعلها بطرف عينه
متتت جنهم توم وجيري
تقربت منه بسته بخده: شكرا
مااحس الا انرگعت بشي قوي لطشني بهمام لطش
لزمني خاف اوكع باوعنا ولنها شهد شمرتنا بالمخده
الضربه اذتني جانت قويه كتلها: شبيج!!
- تبوووسينه وهو قبل شوي مسويني ارملة؟!
هنا اني وهمام وكعنا بالكاع من الضحك وهي تصيح: اي اضحكوا اضحكوا
طلعت من الغرفة تنافخ وركعت الباب وراهه، ضلينا بس اني وياه بالغرفة باوعلي بمكر
وخرت بعيد كام يتقرب عليه واني ارجع الا ان انردمت بالحايط
لزم اديه اثنينهن رفعهن بأيده وحده فوك راسي ودنك وجهه برگبتي جسمي كله كزبر وعطرة مغيره يجنن احس شوي ويغمه عليه
گوه حجيت: اطلع همام
حجه ووجهه بركبتي: طالع بعد مااتحمل
بسرعه طلع وسد الباب وراه ..
ضليت ع وگفتي متبنجة بمكاني، طبت شهد تباوعلي بأستغراب: شبيج!
- حجيت مفهيه ها
- ناز احجي شبيج مو ع بعضج
- مدري
- شسوالح هذا الخقيرر ضربج مووو
راحت هاده اليوم اذا مااكسر ايده
جريتها :تعاااي منو كالج ضربني
- لعد شبي وجهج مدري شنو من لون لابس!
- عطشانه وجوعانه
حجيتها واثنينا صدت عينه ع العلاليك الي جابهن همام
كعدت شهد تفتح بيهن صاج دجاج وكنتاكي وحلويات وبباسي ووياهن ورقه مكتوب عليها ((بس لناز))
قرتها وتفلت عليها: تففف ابو حلك بس لناز امداك وامدن ناز مدري منين تجيب هالشكولات
ضحكت عليها وكعدنا ناكل، اكلنه كوومه وشبعنا وبقت العلاليك مترسه جايب هواي
بيدي قوطيه الببسي اشرب وكتلها: وين نودي هذا الباقي حرامات نذبه نعمة الله
- واذا انطينا الهم راح يسألون منين جبتنه
- وتالي
- راح انزل جوة بلكي الكه مگدي بالشارع انطي اله
- اوك
طبيت للحمام وهي راحت نزلت بالاكل .. سبحت وطلعت لكيت شهد گاعدة ع الجرباية وصافنة بغير عالم
ندستها: شبيج اليوم احنه نگضيها صفنات دخيلك رَبي
- ناز لگيت فارس احلامي
- عكدت حاجبي شنوو!
- واكف يم همام لج يخبل اسمر وكشخه يبووو معت معت اريده حبيته معليه ناز معليه
- دكلي نعل وسدي حلكج ممنوع الحب وهالخرابيط
باوعتلي مبرطمه: شلون بله حلال عليج وحرام علينا
- باعي لا تگعدين تقنعيني بهيج عمر اكو حب انتي مراهقة هالسوالف لا الج ولا لعمرج اهتمي بدراستج وبس!
واذا عليه ف اني انجبرت امشي بهالطريق بسبب اهلي، شهوده اريدج تحققين حلمي الي ماكدرت احققه
- شنو حلمج نازه؟
- انتجيت ع الميز وابتسمت لمجرد اتخيله: دكتوره اسنان
- اووي صدووك ناز جنتي تتمنين تصيرين دكتوره اسنان؟
- اي
- هم تتمنين يرجع الزمن بيج؟
- يوميه قبل لا انام افكر اني بحلم وهسه اگعد والكه روحي ذيج الطفلة ادرس واحقق حلمي
- وهمام؟
- شبي
- تحبينه
- ابتسمت: همام هو الشي الوحيد الحلو بحياتي احس رب العالمين دزه تعويض الي، سبحان ربج يحرمج من شي يعوضج بشي ثاني لا يمكن الله يظلمنا او يعوفنا مهمشين بس نتوكل عليه ونسلمه امرنا راح يتكفل بحياتنه ويا محلى الكفيل
- يعني حـ تشرطين عليه وره الزواج ترجعين لدراستج
- لا مو شرط اقترح اقتراح وافق خير ع خير موافق انتي تحققين حلمي
حجيتها وابتسمت گرصت خدودها
- كامت حضنتني وتبوس بخدودي: اوعدج احققلج هالحلم وتفتخرين بيه واصير الدكتوره شهد عيوني
- ابتسمت: تدرين من اباوعلج احس اشوف روحي بيج
- شلون
- احاول احقق كل البنفسج احلامج مرات ابخل على نفسي في سبيل ارضيج ومااخلي شي بنفسج
حضنتني حيل وتگولي: انتي امي
- ههههههههه ونغم وين راحت
- ضحكت بشيطنه: ذيج مرت ابوي
- ههههههههه نعلعله بليسج
انفتح الباب ومدت راسها مريم: واني محد يحضني؟
فتحتلها ايدي الثانية اجت شبكتني وعيونها مدمعه كالت:
- ناز صعبه عليه فراگج كلش تعلقت بيج احسج قريبه ع روحي
- يروحي والله من هسه اني شايله هم
- عمري ماصار عندي صديقات ومن انتي دخلتي حياتي صار الها معنى ثاني احبج
حضنتني وشهد الغواره حضنتني من الجهة الثانية بوستهن: الله لا يفرقنا يارب
طفرت مريم من حضني: يااا نسيت ترا راح نطلع للأمام علي ع يله بدلن
كمنا بدلنا لبست بنطلون وقميص عريض وحجاب شهد گامت تصوفر
- طلعتي جنج زليخة يولي
طلعنا من الغرف كلنا طلعة وحدة نزلنا جوة شفت همام بالصالة بس شافني وگف ع حيله
ابتسمتله وعبرت
شهد يمي ندستني: هذا شبي بس يصفن جنه مطي
- عطت بيها: انجبي لج مااسمحلج
- لوت بوزها اي لأني مامجذبه غير
صعدنه اني وياهه ومريم ليوره، بالسيارة وافتقدت تليفوني دورته ماكو طلع ناسيته بالغرفة .. وهمام حـ يتصل عليه شلون؟
كتلها شهد انطيني تليفونج
فتحته وانطتنياه: دخلت ع المحادثة بينها وبين همام اخر شي دازه الهمام التسجيل الصوتي الي جنه نحجي عن حلمي
خزرتها وشمرت التليفون عليها، هو جان كاتبلها ( الا اخليها اشهر طبيبة بالعراق ع عنادج)
انطتهياه واخذت تليفون مريم دزيتله مسج
وصلنا للأمام علي اشتريت عبايه اني وشهد واخذنه صور انوب طبينا زرنا
واگفه اتأمل المكان واجتي فراشة بيضة وكفت ع خدودي، مااعرف شحسيت بوقتها احس بدني كله قشعرر، وعيوني دمعت، بقيت مااتحرك والفراشه لمدة خمس دقايق هي ع خدودي
وراهه طارت، رحت لزمت الشباك وابوس بي وادعي بگلبي اجني ثنين نسوان دفعني بكل قوتهن
كتلها: شبيج خالة هي عركة مو مكان مقدس هذا واله احترامه
جان تعوج حلگها والتفتت ع المرة الي بصفها: شوف تحجي ع الاحترام وهي لابسه عدسات ومحمرة وضاربة المكياج والله يا الله
- ابتسمت بوجها: مراح ارد عليج احتراما للمكان الي واگفين بي وانتي حكمي منو بينا الي بينت صاحبة احترام!
وخرت منهن رحت صليت وقريت الزيارة وقران .. ضلينا تقريبا ساعه كاملة داخل الضريح وراهه تجمعنا دنطلع والتفت شهد ع الشباك
جان تگوله بكل حركة گلب: يا علي اريدك تكف همام عني حاطني اباله
ضحكت: دمشي امشي
جريتها مشينا خطوتين ورجعت التفت ع الشباك
- يا علي ترضاهه هذا الازرك يگول عليه ارملة ترضاها؟ عاد لو كاتب مطلقة بيها باب وجواب
جريتها اضحك: ولج امشي كافي
طلعنا لكيناهم مكملين ومنتظرينا، سأل بابا گال:
- ها هسه وين نروح؟
حجينا اني وشهد سوه: نرجع للفندق تعبانين عود بالليل نطلع
بابا گال: احنه راح نرجع للبيت مهيمن تبقى انت والبنات
مهيمن گال: هاهيه بكيفهن
مريومه كالت اني ابقى وي ناز وشهد هماتين
رجعوا البغداد كلهم بقينا بس اني وشهد ومريم وابو الهمم ..
همه طلعوا البغداد واحنه رجعنا للفندق، دخلت للفندق ادوره بعيوني ماكو ماشفته ضجت حيل
صعدنا للغرف، وانصدم بغرفتي عبارة عن شموع ونفاخ وورد وكيكة بالنص مكتوب عليها (( نورتي النجف يوم الي تطبيلها وانتي عروستي)) .
گالت مريم: والله طلعت مو هين يا هماموو
شهد عقجت وجها: ايييع اصلا ذوقه خايس مثله
الفرحه الي بداخلي ماابيعها بكنوز الدنيا ركضت للتليفون بلهفه خابرته
بسرعه اجاني صوته: هلا بأميرتي هلا بملاكي هلا بروحي
- اوووي شنو هالمفاجئة الحلوووة همام! ليش تكلف نفسك هيج
- افااا بعدج ماشفتي شي والله لخلي ذولاك الناس يموتون بقهرهم يحجي ويضحك عود يقصد شهد وهي تهز بايدها وتغم بالتليفون
ردت عليه من يمها: ع كيفك شاه روخان
رد عليها يضحك: للأسف ما اگدر ارد ع الارامل مرتي تغار عليه
هي تخبلت كامت تنكز بمكانها رجع حجه وياي متجاهلها
- ناز
- گلبي
-انزلي حبيبي اريد اشوفج
- ها مو شسمه خاف مهيمن يشوفنا
- لا حبيبي لتخافين يمي بس انزلي
-اوك
لبست نعال الحمام ووصيتهن اذا مهيمن سئل عليه گالن اصلا منفتح الباب لحد متجين ..
من تجين رمشي علينا نفتحلج
دااطلع وهمستلي مريم: ديربالج ناز حبابة
طمنتها ونزلت لكيته منتظرني بالصالة بس شافني وگف مبتسم اخذ ايدي ومشه گدامي
حجيت: ووين
- اشرلي اسكت
صعدنا بالمصعد طببني لغرفة هنا گمت ارجف اتذكرت سوايته
حجيت بخووف: شتريد تسوي!
- لتخافين يروحي بس اريد اسولف وياج، مد ايده اخذ خصله من شعري خلاهه وره اذني .. اريد اشبع من هالوجه
تقرب لأذني همس: ناز گلبي مايتحمل بعد اريدج
- اا اصبر همام حباب مااحس نفسي مستعده
صفن بوجهي جان ينترر ايدي بعصبية انوب رجع عصر زندي:
- اكووو احدد بحياتج غيري؟
- تفاجئت شديحجي: ش شنوو!
- چا ليش ماتقبلين اخطب اكووو نعال بحياتج احجيييييي
دموعي كامت تنزل وساكته، جر تليفوني راد يفتحه بي رمز
صاح: فتحي الررمزززز
- اني صافنة بوجهه ودموعي تنزل شبي مو قبل شويه شحلاته؟
رجع صاح: افتحي الرمززز اگلجججج
- واذا مافتحته شتسوي؟؟
- هه يعني عدج غيري
اكو مرايا بالغرفة هجم عليها كسرها بيده
كتله: انت مو صاحي انت مررريض نفسي
تخبل هجم عليه خنگني دفعته مني وصحت بي
- شبيييييك همام تخببببلت ولي منيييي
دااطلع جرني من شعري: شكلتي عيدي گلتي ولي؟
صحت بي: اييييي
مااحس الا جايبني براشدي فر راسي فررر
دموعي كامت تنزل عشره عشره مصدومه مصدومه من تصرفه المفاجئ شبي انكلب ساعة الساعة!
طلعت من الغرفة اركض صعدت لغرفتي اركض وخشمي ينزل دم بس مو يمه ولا مهتمه گلبي احسه دينعصر وغير عن كل مرة عصرة ووجع اول مرة يصير وياي
تعبت ماكدرت اكمل الدرج كعدت ع باية الدرج ونفسي كوة اجرة واشهك
گمت اسحل بروحي بطلاع الروح وصلت الغرفة دكيت الباب ماكو ادك ادك محد يفتح وتليفوني بقه يمه
رجعت ادك اجاني صوت مريم: منوو
- اني
بس فتحت الباب شمرت روحي بحضنها اشهك هنه من شافني هيج تخبلن ضلن يسالن شكو منو وياج شصار ..
اني بس حاطة ايدي ع وجهي وابجي
كومتني شهد غسلت وجهي ومريم فتحت القرآن وتقره بوجهي
لشوي هدأت من البجي وهنه يباوعلي وبوجوهن الف سؤال، گمت ع حيلي
كامن وياي كتلهن: يلا نروح منبقى هنا بعد
ضلن يكولن ارتاحي هسه وبعدين نروح ..
مارديت عليهن رحت لحمام دخلت جوة الدوش ودموعي تنزل وي المي
طولت بالحمام لمن طبت عليه شهد بدلتلي وطلعتني
رحت تمددت ع الفراش بدون كلام .. غفيت يمكن ربع سَـآعــهْْ وكعدت بس فتحت عيني رجع براسي الي صار
كمت لكيتهن خطيه اثنينهن مگابلاتني وكاعدات، لبست نعالي وداطلع صاحن: وين رايحه
- المهيمن
رحت الغرفته دكيت الباب فتحلي يغفي مبين جان نايم
- ها ناز
- خلي نرجع
- ليش بيج شي!
كتله مبيه
ومشيت لغرفتي بدلت ملابسي والبنات بدلن كملنا ورحنه المهيمن لگيناه مكمل وواكف ينتظرنا
گال: يلا خلي نتوكل اني نازل قبلجن اشغل السيارة
نزل قبلنا واني والبنات نتمشى ع كيف وراه، اجيت فرحانه للنجف ورجعت احس هموم الدنيا كلها ع ظهري، خطيه هنه لسه ماحجيتلهن ولا يگدرن يسألني من يشوفن وضعي هيج وباقيات بس يباوعلي بقلق وخوف.
وصلنا للصالة مال الفندق جان كاعد بس شافني اجه بأتجاهي
- ناز نازز اوگفي
اتجاهلته وعبرت ولا كأن هذا همام الي قبل ساعات اني ارجف كلي بسبب قربه!
صعدنا بالسيارة الطريق كلة ساكتين لزمنا السريع هنا صارت السيارة صمت عارم مهيمن الي منتبه ع الطريق، مريم الي صافنه بالشارع وبين فترة والخ تباوعلي تطمن وترجع .. ،شهد الي لازمه ايدي وتباوعلي بحزن رغم متدري شصار حتى .. ماتوقعت هاي اخر نظرات الهم، ماتخيلت ولا واحد بالمية الي راح يصير!
كل واحد بينا باله بمكان وفجأة كلنا فزينا بضربة قوية هزت السيارة هزز سيارة ضربت سيارتنه ،كلشي مر بثواني لا اقل من الثواني، صياح البنات مهيمن الي بس يريد يسيطر ع السيارة كل الي اذكره انگلبت بينا السيارة وراهه بدت تسود الدنيا بعيني ...
فزيت جسمي كله يأذيني باوعت الكل يمي امي ابويه احمد عمر.. الوجوه حزينه والاجساد مكتسيها السواد
ضلت عيوني تدور وتتأمل بس الحقيقة وحده ولا يمكن تتجمل ماكو مهيمن لا شهد لا مريم …
يتبع …
8000 كلمة 🔥🔥
اذا متتفاعلون وتقدرون هالتعب اكتلها الروحي قسم 😭😭😭😂🤍
يلا فجروووو ♥️♥️♥️🔥🔥🔥