في ضريح العشق حمامه,,,,,,, 💙🕊
وئام الشيخلي,,,,,,,
مساء السعاده ؏ عيونڪم غوالي.
ــــــــ
شلونڪم حبايب گلبي موعد البارت القادم الجمعه باذن الله.
مشهدـــ
ورغم ڪل ڪلام ابوي. الياس والحاحه وڪٵن هو صاحب الشٵن وڪٵن هو اللي انفرض عليّ الانفصال.
احسه اخذ مڪان مـُــــخلــد بالدفاع عن نفسه.
اسلوبه بالتبرير عجيب هذا الحيد اللي يناقش ابوي لو مـُــــخلــد.!!!!!!!!!
اللي اسمعه عاشق يدافع عن حبيبته اللي اخذوها منه غصبا عنه.
ومره اسمع وڪٵنه الحبيبه اللي فرقوها عن حبيبها بغدر.
وابوي يرد هو الولد عنده خبر واڪيد من اول ماشاف اللي صار وعرف بالمضبوط ڪل الموضوع اڪيد عنده علم ٵن يرجع امانتنه بسلام.
والياس يگــــــول صعبــــــٓــه حيل يابه صــــٓــعبه عليّ يجوز نطقها بلسانه وگلــــٓــبه مو مقتنع ومستــــٓــحيل يقنع.
وابوي يرد ولـــــٓــيدي مــــٓــعقـوله هذا ڪلامك وانــــٓــت شفت شنو الضنا وشنو غــــٓــلاته!!!!!!!!!
ويبين للحيــــد ان هو مو ضد مُـــــخلـــد ابد وڪان متمني تمـــر ايامنا بسلام وما يصيبنا الضرر.
يگوله ولو يطلب روحي ترخص اله.
ـــــــــــــــــــــــــ
ميس ـــ
بلحظات انقلب الفرح الى مٵساة. الفرحه انطفت وحل محلها الالم والقهر والدموع ؏ صوت صراخ خالتي طلعنا وشفنا حالها وهي تصر ان بنين عايشه .
اخذتها من ايديهم وتقسم يمين هي عايشه.
لدرجة توقعت فعلا الطفله عايشه.
اخذوها وطلعوا بعد ما اڪدوا هي مفارقه الحياة.
لاحول ولاقوة الابالله العلي العظيم.
تبعوهم مؤيد وامه وبعدهم مُــخلد وڪل ظني مُــخلد تبعهم ماڪنت ادري باللي صار رغم شفته منهار وصرخته تگطع الگلب.
وونرجس گاعده بالگاع منهاره وڪلماتها مامترابطه.
نسيت ڪلشي بدر منها اتجاهي. وصرت گبالها اواسيها الله يعين گلبها فقدت بنتها ضنى گلبها.
ابــﭼــي بقهر عليها لو ؏ الطفله واگولها لو رايحه وياهم ليش ما رحتي وياها.
واحاول اقتنع ٵن الطفله عايشه. يمڪن مامتاڪدين هي فارقت الحياة.
حاولت اقنعها واهديها وڪلنا حواليها وهي گطعت نفسها تلطم اني ڪتلتها بيدي.
وارد عليها گولي يالله قابل ماتت من صفعتيها؟؟
تلطم وتبجي وتهذي وصارت تسرد تفاصيل وفاة اخوها.
حسيت رجفه صابتني ما گدرت اوگف لحيلي واني اسمعها.
شلون نفسها طاوعتها؟
شلونها قبلتها ترتڪب ذنب من الكبائر. ؟
شلون گدرت تزهق نفس بريئه مالها اي ذنب.
وتڪمل ڪلامها تگول ردت احرگ گلب امه واڪسر فرحتها بــ ابنها الثالث.
وتصرخ بصوت تنادي زوجة ابوها تگول اجه اليوم اللي انت منتظرته.
مو گلتي عساها بحرگة گلبي. تعالي شوفيني احترگ گلبي.
وتردد بيدي ڪتلتها اني ڪتلتها.
واعترفت ؏ سوالفها البقيه. انصعقت واختل عقلي لما گالت هي ڪسرت علب الادويه مالت فراس. شراب البوتاسيوم.
لما شايله الڪارتون من سيارة مُــخلد وگايله الكارتون ثگيل وگع من ايدي.
وهسه تگول اني مزقت الڪارتون وضربته بقوه بالگاع وڪسرته. شيش الدوا بالكامل.
رجعت بذاڪرتي اسيل سولفت الي الموقف بقهر.
وگالت المشڪله مو بسعر العلاج اللي هو غالي ڪلش.
المشڪله ماڪان متوفر بالعراق ذيج الفتره. ومُــخلــد وصى يجيبوه اله من الاردن.
ويريد منه لطفل مريض جديد مڪتشفين مرضه والطفل عنده اخوان اثنين قبله نفس مرضه ومااڪتشوا وفارقوا الحياة وتخيلي شنو حال اهله.
واتخيلي شنو حالنا وڪلنا مو مثل مُــخلــد.
اللي انجن يحير شلون يتصرف ما گعد لحيله ولا ارتاح.من سٵل ام نورس وگالت باقي لفراس علاج يكفي لاسبوع واحد وبس.
ساعات وهو بالحوش يتصل يريدها ترهم ويوصلنا العلاج قبل الاسبوع ومستعد لكلشي.
اخر شي رهمها ان شخص ينزل للعراق يجيب العلاج ومُــخلــد يدفع تڪاليف سفره لما يجي للعراق ويرجع للاردن.
ومُــخلـد رد واني الممنون منك والك هديه مني. بس وصل النا العلاج.
ونرجس حلفت مية يمين مامتعمده. ومستحيل نصدگها لان الڪارتون ڪلش قوي لو يوگع من مڪان عالي هم ما يتڪسر بهاي الصوره.
والعلاج اتاخر اسبوع. ويوم وشنو حال فراس من ما ياخذ العلاج ينتهي يصير عنده خمول ما يگدر يوڰف ؏ حيله.
يوم واحد مااخذ العلاج ڪلنا بجينا ؏ حاله ومُــخلد يتصل يگول طمنوني عنه واحنه مانريد نقهره تگول زين بس اڪيد ما يقتع ويطلب يسمع صوته.
ومن استلم العلاج مباشرا نزل للبصره وصلنا ساعه ثنتين بالليل.
اخذ فراس لحضنه وشبع قهر ؏ حاله وببده نطاه العلاج.
ومُــختار يگول اله هواي ڪلفناك ويرد عليه فدوه لعيون فراس.
هذا مال الله هو اللي رزقني بيه ونطاني عقل استعمل هالمال بما يرضيه.
وهو القادر يمنع هالرزق عني.
رجعت لواقعي نفضت راسي وهي مستمره تعترف بمصايبها.
ما گدرت اسڪت صرخت بيها انت شنو من بشر انت وحش.
شلون نطاج گلبج تضرين فراس اللي هو ابن اختج.
وعلاجه بالنسبه اله مثل الاوڪسجين مايعيش بدونه.
والله حرام انت تعيشين بين البشر.
مڪانج بين الوحوش وينخاف ؏ الوحوش من شرج.
انت تفوقتي ؏ ڪل غدار بهذا الڪون .
ابليس يتعلم منج.
ردت مالج علاقه بيه. المهم انت ملاك خليني وحش. ترجف رجيف.
عجيبه وهي بعز انهيارها تعارڪت وي طيبه ورجعت ؏ رفيده تهمتها عدها علم بالموضوع.
همزين جدهم ابو غياث واخوالهم ما موجودين اللي بالواجب وابو غياث وابو مؤيد معزومين.
والا لو يشوفون نرجس شلون گاعد تتهم رفيده وهم ماعدهم هاي السوالف.
بس ام رماح وزوجه خالهم حمزه ما سڪتن الها.
وبينن الها شنو حقدها اللي اعترفت بقتل اخوها. ودگاتها اللي هي اعترفت بيهن بينما رفيده زوجه عمها گالت عنها ربت بينا وافضل تربيه ماتاذي نمله.
واذا ام رماح سڪتت رغم بنتها اللي دا تتهمها نرجس.
وڪملت تگول هي تغار من مسك.
ورفيده انصعقت وتقسم يمين ماعدها علم.
زوجة عمها حمزه ماسڪتت وشلون ردت ؏ نرجس.وهي تمدح رفيده.
وگالت تروحين فدوه وقربان لتراب رجليها. يالنذله حرامات انت دخلتي دنسينها مو طاهره انت.
شجابج ؏ رفيده. وهي قبل اسبوعين شافت فختايه دخلت للبيت وانضربت بالمروحه السقفيه شبعت بجي وتتوسل اخوها اخذها للطبيب البيطري وعالجتها ايام وهي مگابلتها الى ان صارت زينه وطارت.
هي هاي تٵذي بشر؟!!!
وڪملت ڪلامها برزاله معدله لنرجس تگولها لو انت بنتي اطلب يڪون اعدامج بالشارع العام وڪل اللي يشوفج يبصق بوجههج.
اسيل انتهت وهي تشهگ وتبجي وتسٵل نرجس ليش ماڪلتي هي اتخربطت حتى ناخذها للمستشفى ع الاقل نتلاحك الها.
ليش ادك عليج الباب ماتفتحينه وگلتي نايمه لاتصحيها.؟؟؟؟
وهي گالت ماطولت بس تقيٵت صارت ترافس وماتت.
من دگيتي الباب هي ميته.
اسيل لطمت ؏ راسها وانهارت بالبجي وهي رجعت ع ڪلمتها راحت بنتي راحت.
هديل اجت گبالها نار وتشتعل تفح عصبيه سبتها وغلطت عليها.
وگالت ماڪافي تمثيل مامليتي صار سنين تمثلين علينا وانت حيه رگطه.
راحت بنتج؟؟؟
شوڪت اعتبريتها بنتج؟؟
تسع شهور انت مگبوره يم اهلج وخلصنا منج ومن شرج.
ومن امي تاخذها الج تگولين مااريدها ليش وعد مايرجعني.
ومن رجعتي لارجعت بيج روح ماالتفتي الها.
ڪم مره جابوها الجيران من امي راحت لترڪيا بولادة اولاد مهند.
وڪم مره نلگاها نايمه بالحديقه وانت ماتدرين تتصلين بغدير بنت العار.
همليتها الى ان اتمرضت انتهت عاشت ؏ البخاخ.
الله ينطي لــ مُــخلــد اخذها منج يراجع بيها اسابيع ما سٵلتي عنها ولاشلتي تليفون وگلتي شلون صارت.
بس وعد وامي ينزلون لبغداد يسٵلون عنها.
ومن جابها ولابسه حجول ذهب گلتي ذهب برازيلي.
ورحتي بعتيهن ونطيتي فلوس للدجاله اللي غدير وصلتج الها.
ڪملت ڪلامها. وصفعتها بقوه ومااڪتفت ملختها بــ ايدها. وهي تغلط وتسب نرجس وعمها.
بالگوه فازعنه بينهن ولاڪنها هدوله الفاهيه اللي من اخوانها يگولون مطفيه وعجزه تگول وافتخر لان النداره تريد حيل وسخرتڪم ماتخلص.
ڪانت قوتها عجيبه ڪانها رجل ماحلت نرجس الا گطعت شعرها وخلت خشمها ينزف.
اجا جدهم وابو مؤيد وسولفن الهم مختصر وهو يگول لاحول ولاقوه الا بالله.
مستغرب مصدوم من تصرفها يگول وڪتلت البنت وبعدين.؟؟؟
لو ماخذه منها زوجها شسوت؟؟؟
باطل باطل. باطل. هذا عمل الشيطان هي ڪبيره من الڪبائر.
لا ؏ حظك يا مُــــخلـﺪ ياابني. منين تتلگاها.
صارو يتصلون ؏ الڪل وبس مؤيد يرد. وگال عن خالتي ام مهند تعبانه.
وسٵلنه عن الطفله ما جاوب.
وابو مؤيد اخذ وضاح و اجود وراح الهم.
رن تلفونها اخذته ردت ومن ڪملت لملمت اغراضها. وڪسرت التليفون.
شوي ودخل عمها ابو غدير. ــ رماح فتح اله الباب.
وهو ما سلم لا عليه ولا ؏ جدهم ابو غياث.
اجاها بــ استعجال شبعها رزايل وبصق عليها وضربها . وهي تگوله فدوه عمي خلصني بسرعه هسه ياخذوني للسجن.
هديل ڪانت بالصاله من سمعت الصوت طلعت.
ولعبت لعب غلطت وسبت وتگول انت شريڪها بالجريمه ماتستحي رجليك واصله الگبر وحاط گورگ وگور مُـــخلد تروحله فدوه انت وغدير ومنعم العارات.
عدت وصفت ؏ غدير. وﻉ منعم حدث ولاحرج.
وما اڪتفت راحت ليمه وهو دنگ يشيل اغراض نرجس مو حاس بيها من وصلته ودفته بقوه وگعته بالگاع.
تفشل حييل واحنا ڪلنا بالحوش. نفض نفسه وگام صاح بيها وغلط يگولها منو يريبج بلا تربيه.اخذ نرجس وطلع
وهي بعدها ترد عليه و تريد تملخه وجدها ابو غياث صاح بيها.
اباوع الها تتلفت ؏ شنو تدور رڪضت لطرف الحديقه جابت الماسحه ورڪضت وراهم وضربته ؏ راسه اڪثر من ضربه تگول هذا مستواك.
صرخته تدل شگد توجع اوووف عاشت ايدج.مي بارد نزل ؏ گلبي.
رجع الها يريد يضربها و رماح منعه يوصلها وهي بعدها تهادد تگول خلوني لسه مابرد گلبي.
ابو غياث طرده من البيت وهو طلع لازم راسه ويغلط ويتوعد يردها الهم .
وهدوله احتضنها جدها يهديها نار مشتعله من القهر.
انطلقت وتحجي بقهر تگوله عن عمايلهم وتدخلاتهم بحياتهم. وهو يردها ربج بالمرصاد وحوبتنه تعثر يبعد جدج.
ان شالله يتلگاها ضربة ربج اقوى واوجع.
تموت قهر وهي تگوله شنو حال مُــخلــد هسه.
گلبها يريد يطلع من صدرها تشاهگ وتحجي بــمُــخلد.
اني وجدها غسلنا وجهها بماي بارد ويقرا عليها ايات شوي هدئت.
السمعته من نرجس شلون قاتله اخوها وباقي عمايلها المفروض ما استغرب ڪلشي يطلع منها.
حسيت دماغي نشل وتوقف عن التفڪير احير بمنو اتصل بــ مُــــخلـﺪ مهند الياس. امي.
ولا واحد منهم يرد واڪرر الاتصال ونفس الحال. ماڪو رد.
اتصل مهند متعصب يگول لا تتصلون احنا بيا حال. بيا مصيبه.
توسلته بس گول الطفله عايشه؟؟؟؟
گال لا. وسد الخط.
اباوع حال البيت صار يضرب يقلب مصدومين الڪل ومستغربين تصرفها.
الحقد وين يوصل بالانسان الحاقد.
بعدني ؏ گعدتي بطرف الطارمه وحماده شيب گلبي من شاف الهوسه معلگ ايديه برگبتي.
عيوني تدور لموده شفتها بحضن رضاب.
بالگوه وگفت لحيلي وصلت ليمها ڪانت نايمه واني مثل المجنونه صرت اتفحصها واستمع لنبضها. وابــﭼــي بقهر.
ورجعت اتصلت بــ مؤيد عسى ولعل افهم شي منه.
گال اني وامي وي عمتي لان تخربطت لاردتي حالها.
والطفله اخذناها لدڪتور صديق ڪرم اڪد سبب وفاتها تسمم. واذا اخذوها لمستشفى سين وجيم واحتمال تشريح جثه. وتحقيق وغيرها من الامور
وبعد ماادري يمڪن راح يڪتب الهم تقرير ان وهي تلعب بحديقه وشاربه مبيد حشري.
شنو حالنا ذاك الليل تدمرنا دمار وشنو حال وعد وهو يتصل ويٵمن امانه لاتدفونها الا اشوفها. اني جاي بالطريق.
من خلال ڪلامه وي اسيل فهمت جاي هو وعمو. وانعام وزوجها. وام نورس.
ما دخلنا للبيت گاعدين بالحوش واطفالي البنات فرشن الهم بصفي واني ڪل شوي اتفحصهم.
واسيل انتهت من البجي وطيبه وهديل مو احسن من حالها.
هديل شايله هم مُــخلد وتلوب تگول هسه شنو حاله.
اتصل ما بطلت عسى ولعل واحد منهــــٓـم يرد عليه واخيرا الياس رد ومن سٵلته عن مسك. گال شوي احسن.
بس صوته ما يدل ؏ هالشي.
بوقت متاخر من الليل اجو ڪرم ومهند جابو الطفله وشنو حالهم اثنينهم مڪملين الها شهادة وفاة.
اتگطعت قهر عليها ياربي طفله شنو ذنبها.
شبعنا بجي عليها. عجيبه امها ياربي شنو. جيناتها لو شنو ڪريات دمها حمر وبيض لو ڪريات حقد وغدر.
الفجر وصلوا عمو و وعد وخالها ريسان زوج انعام حماتي. وعمهم رائد والبقيه حتى الحجيه رغم متخربطه عليهم ماباقي ابيتهم بس الجد.
ماتحملت منظر وعد من اخذها لحظنه ويحجي وياها وڪٵنها عايشه. بنيتي حبيبتي نونه.
ڪتلتج بيدها انڪسرت ايدها ان شالله هالحاقده هذه.
دخلت جوه واسمع صوت صراخه هو وعمو وخالها اللي يتوعد ويگول حسابها عندي لٵاشوفها مر الليالي واخليها اتمنى الموت ماتلاگيه.
وعمامها مو احسن من حال وعد.
وابو غياث يحاول يهديهم وڪلامه بحڪمه عن الاقدار. يحاول يهون عليهم.
فوگ الحزن والقهر مصيبه ڪارثه مابعدها ڪارثه اجرام هذا.
قتل مع سبق الاصرار.
هي محد يعرف وين صارت وخالتي بمستشفى ولحد الان ما صاحيه ومسك بمستشفى مايردون ؏ التليفونات وبالگوه ردوا يگولون زينه.
وهاي البريئه فارقت الحياة شنو ذنبها.
عمو شابع قهر يگول ؏ يا مصيبه منهن نلتفت ڪلهن ڪسران ظهر.
وعد يسٵل عن امه شلونه حالها وگالو اله احسن مقهور يگول تناديها يمه هي ربتها. تحبها اڪثر من امها المهمله اللي ما تخاف الله.
الله لايوفقها ولايوفق عمها شنو ذنبه مُــــخلـﺪ وشدت الا تحرمه فرحته.
هاي ثاني عقوبه تجيها عاجل من رب العالمين. حتى يحرك گلبها بس اللي مثلها ماعدها گلب ڪلها عباره عن حقد وڪره.
ورجع يبجي ؏ بنته وگابلنه الحجيه وعمته واخواته وطيبه ونصبن مناحه.
بين ما الحجيه ام غياث غسلت الطفله وڪفنتها ــ هم راحوا لخالتي يشوفونها ورجعوا اخذو الطفله لمثواها الاخير.
والبنات يتحضرن يرجعن للبصره مڪسورات والحزن ماليهن. بعد ما ڪانن البارحه من الفرحه الدنيا مو سايعتهن.
شالوا جنازتها من بيت ابوغياث والحال ما ينوصف.
وبعد ما رجعوا من النجف راحوا مره ثانيه يطمٵنون ؏ خالتي اللي لحد الان ما صاحيه وبعدها راحوا للبصره ينصبون عزا.
استاذنت من مهند اللي راح وي اهله للبصره و رحت وي جدو ابو غياث وجود نشوف مسك اللي يگولون عنها زينه وينها الزينه. ؟؟؟!!!
فاقده منتهيه ويگولون احسن. وامي والياس حالهم صعب والاتعس من حالهم حال مُـــخلد. الله يعين گلبه.
اباوع لــ مسك ولــ مُـــخلــــد وگلبي يتگطع قهر ما تحملت گعدت ؏ الڪرسي گبالها وافڪر وين ڪانوا وين صاروا.!!
سبحانك ربي بساعات قليله انقلبت ڪل احوالنا.
واتذڪر حال مُــخلد من اجه الياس اخذ مسك وامي ومرام.
و هو عيونه تتبع السياره يگول ماعاد عيوني تشبع منها. هي مالها شبيهه لو بس اني اشوفها هيج.؟؟؟
اشوفها الشمس اول لحظات شروقها والقمر بااڪتماله واجمل وردة جوري وياسمين وزنبق واشوفها حمامه بيضه وفراشه وبعد ماادري بشنو اوصفها.
وخالتي تگوله لا بس هي وبس. هذه اختيار وليدي ماڪو بجمالها.
ومن انتهت الحفله يباوع لصورها بموبايله مبتسم.
يگول مجنون رسمي بحبها وراح ادخل مصحه وين دڪتورڪم واشڪيله حالي.
ويضحك من ڪل گلبه وامه تگوله اي عساها دايمه الفرحه عليك.
بس هذا عشگ الصغيره يجننك ويدخلك مصحه ما دگت بابك البنيه انت دگيت بابها.
وڪمل ڪلامه يسولف عنها بفرحه اووف يابابها وباب گلبها طيرن ابراج عقلي.
يضحك ويتمازح وياها يگولها اخذناها للوراثه من ابوي. ذواقين من نختار ونعشگ.
خجلها خالتي نهضت من يمنا وهو
يگولي اغار هواي هواي عليها واغار منها. اغار منها من تنطق الڪلمات وتنطق اسمي.
اغار من حرڪاتها العفويه بدون تصنع وتمثيل.
اغار من فهارتها.
اغار من ترافتها ونزاڪتها.
اغار حتى خطها الناعم والحرڪات فوك ڪل حرف.
ضحك ويگول هي ماتدري اني صار فتره داخل دورة خط عربي وانگليزي.
لو شايفه حالي الله وگعني بلسان مؤيد وحاتم. من جبت من المتنبي ڪراسات.
يڰولون هاي من ضمن الشروط؟؟
لو شروطها هي.؟؟
اخذوا الڪراسات ولعبو بــ احوالي حاتم يگول ــ( د )و (ا) داران يعني بغداد والغربيه.
ومؤيد يگول (ي)بطه متوجهه لبيت المختار و(ن) مثل الڪاسه وبداخلها حمصايه وحده شدعوه هالبخل املوها لبلبي خلي واحد ياڪل.
واني ابينهم.
المهم النتيجه خطي ڪلش اتحسن وسابقا جنت اڪتب بتگلف هسه لا ڪلش احب اڪتب.
وبــ اخر مره ڪتبت الها ؏ ڪارت لاحظت تحس خطي وابدت اعجابها بي.
گلت مُــخلــد هي گايله الك اني صنفت ؏ خطك وگلت هيروغليفي.؟؟؟
ضحك وگال هاي مجامله منج اصلا خطي مسماري.
واني اعترف وڪنت اگول خطي اعوج وملعوج ومخربط مثل حظي وايامي.
بس من صارت هي بــ اسمي گلت عيب من حظي وايامي ومنها لازم احسن خطي ويليق بيهم.
رجعت لواقعي وهو يسٵلني شصار وشفتي وعد شلون حاله؟؟
مهند راح وياهم لايترڪون وعد بوحده يشيل حزنه و مصيبته.
يايمه ڪلماته گطعت گلبي وحنيته عليهم شايل هم جدته وامه.
تنفست بقهر مابيه ارد عليه عيوني غرغرت دموع واني اتذڪر فرحته البارحه واشوف ڪسرته وحزنه وقهره اليوم.
وجده ابو غياث گال بخير اثنينهن بس امك اني ماقبلت تروح خليها ڪم يوم.
مارد مضروب براسه يحجي ويانا وعيونه ؏ مسك اللي ڪل شوي يتلمسها ويشوف نبضها.
ورجعنا لخالتي اللي لحد الان فاقده ومن صحت سٵلت عن بنين ومؤيد گال الها شوي احسن.
ردت الحمدلله. توصينا خلو بالڪم عليها لحد مااطلع خلي اسيل تداريها عوفن امها ما بگلبها حنيه عليها.
مو ڪل ام هي ام. ام لهب هم ام.
الدڪتور ما سمح الها تطلع لان بعدها تعبانه.
واني اخذت اطفالي ورجعت يم اهلي. اوس يوميه ياخذني لــ مسك اللي حالها ابد مااشوفها عدها تحسن وخالتي اللي لحد ماتدري بنين انتقلت لرحمة ربها للارحم من امها.
واتصل بالبنات يگولون فاتحه وعزاا وڪان شخص ڪبير المتوفي. وحالتهم حاله.
من غير جدتهم متخربطه وهي تهذي بــ مُــــخلـﺪ وشايله همه شنو راح يڪون حاله بعد هالغدره الجديده.
وحال وعد يڪسر الخاطر والبارحه رايج لاهل نرجس رايد يشوفها ضامينها من اخوها اللي يتوعد الها ياخذ حق بنتها من عيونها.
وعد مطلگها بعد ما مسمعها الڪلام اللي تستحقه. وضاربها مڪسرها تڪسر وبالگوه مخلصينها من ايده بعد ما ملاسنته ومثل عمها متهمته اشڪال التهم.
واخوها مزين شعرها صفر وهي تجادله وبعدها هي هي لسان وتغلط.
وضاربها طلقتين بــ ايدها. يگول هذا القسم قسمته من يوم ڪتلت عدنان وسمته ومنعوني منها. واجا الوكت اللي تنال جزائها وبعدها ما شافت شي.
هاي غير مشڪله وي جدهم الها اول مالها اخر.
بعد ثلاث ايام اتصل مهند گال اتحضري اجي اخذج.
اتفاجٵت وين تاخذني؟؟
اللي اعرفه هو بالبصره.
گال طلعت ٵمي من المستشفۍ ابيت جدي وصعب حالها تعبت اڪثر لان عرفت ڪلشي.
تشيل هم منو وعد لو مُــخلــد؟؟
تحضرت بــ استعجال ومن القهر حتى حيل مابيه.
وصل لبيتنا ومن هيئنه واضح حاله مايحتاج اسٵل شلون حالك. بس عزيته ؏ مصيبتهم.
؏ منو ننقهر ؏ عيالي ڪلهم وحالهم لو ؏ وعد اللي من سمعت ڪلام مهند عنه وهو يگول ندور علي وعبالنه مثل ڪل يوم نلگاه گاعد بين اغراضها وينوح.
وبعد ساعات ياله رد ؏ تلفونه هو واصل النجف وگاعد يم قبرها يگول ظلمه و تخاف بوحدها.
شبعت قهر واني اسمعه شلون يوصف حاله من جاي يتبعه ولاگي منهار وهو يهذي بيها. ويگول اسمع صوتها. تسمعه انت لو بس اني اسمعها تناديني بابا تعال.
حسبي الله ونعم الوڪيل عليها بسبب حقدها اللي عمى عيونها اذت ڪم عائله وشلت حالنا.
لو حال اهلي صار ايام مو عارفين ليلهم من نهارهم.
وابوي اللي من وصل وعرف هي بالمستشفى مايشوف طريقه راح الها وبعده مايعرف شنو الحقيقه والله يستر.
لو خالتي اللي من وصلت لبيت جدهم وبعدني بالحوش سمعت صوت نحيبها الله يعين گلبها هي ربتها بــ ايدها وتناديها يمه.
وصلت ليمها اواسيها وگابلتها وشبعت بجي وياها. وهي تستذڪر سوالفها وڪلماتها. ومواقف الها.
نحاول بڪل طريقه نواسيها وهي تسڪت شوي وترجع تستذڪر شي وتبجي.
سٵلت ؏ مسك رديت بعدها بالمستشفى.
ورجعت تبجي ﻉ حالها وحال مُــــخلـﺪ اللي ما فرح الا واتبعوا فرحته بغدره.
وترجع تگول شلون بحالك مُــخلـد يماااا
يماااا ياضنى گلبي مالحگت تفرح وغدروك.؟؟
صرختها تكسر باب الگلب وابوها لمها لحضنه وهو دموعه تنزل ؏ لحيته المليانه وقار.
يحاول يهديها ويصبرها الله يعين گلبه وحيدته هذا حالها.
صار انتباهنا الڪل ؏ مهند اللي رن تلفونه وبعد ما جاوب صوته عالي وهو يگول اڪتله خلاص اللهم انحڪم اعدام.
عليه و؏ اعدائي. قسما بذات الله اذا اخذوها مني اڪتله خلاص.
يخرب عليه حياتي انهي حياته والعن ابو اليوم اللي صرنا بهالعشيره وڪمل ڪلامه يسب ويشتم ويلعن جده وعمه ابو غدير.
ليش يستحيفون بينا الراحه والايام الهاديه يريد يسرق مني استقرار حياتي اخسره حياته وحگ من انزل القرآن الثمن حياته.
نريد نفهم شنو اللي صار مانفهم.
سد تلفونه ونظره متوجه الي واعصابه نار.
وبعده يتوعد ويتهدد وما فهمنا ليش وشنو اللي صار.
رن تلفونه فتح خط ويرد السلام هلا اوس. والتفت الي يسٵل وين تلفونج؟؟؟
اهلج دا يتصلون عليج.
اتذڪرته بالجنطه نهضت اخذته باوعت بالشاشه ڪومه مڪالمات.
والله دايخه وماسمعته يرن.
بعده بيدي واتصل ابوي فتحت خط اجاني صوته ڪلش واضح علي التعب.
گال بنيتي اخوج جايج بالطريق جيبي وليداتج وارجعي وياه لبيتج. شدد ؏ ڪلمته الاخيره.
اريد انطق ڪلمه ما گدرت.
نها الاتصال وبعده اتصل بيه اوس يگولي قربت اوصل اطلعي اوصلج وارجع للدوام. اخذت سياره خالو ابو الحسن.
مااعرف شنو اگول حضرت جنطتي واخذت ايد موده. وحماده ماقبل يمشي تعلگ برگبتي. شلته وقبل لا اطلع الصاله مهند اخذه مني يگول بقي هنا لاتاخذي.
مو مال اجادله واني اشوفه منهار. حاولت اهدٵ واقنعه بــ اسلوب.
گلت هو ساعتين لحد ما رحت للمستشفى شفت مسك وخالتي رجعت لگيته منتهي بيد مرام وهي تبجي وياه ماتعرف شلون تسڪته.
گال اي عادي من يبجي اجي اخذج.
ما جاوبته من رن تلفوني وڪان اوس طلعت متاڪده راح يبجي وراي ويرجعه الي.
بس اللي فاجٵني رغم صراخه وهو يناديني. مهند يحاول يقنعه يسڪت. بجيت واني اشوفه انتهى بيد ابوه مستحيل اطلع اذا مااخذه.
ومهند مُــصر ماينطي الي رغم جده ابو غياث مو راضي علي ويگوله اني اردها الك خليها تاخذ ابنها.
عيب من ابوها الله يعينه هسه ما ڪافي علي غدر اهله شنو يتحمل لحتى يتحمل.
وهو ولا ڪٵن احد يحجي وياه يگول ما ترجع متاڪد لعبت لعبته العار. مُــــخلـﺪ اتصل عليه وفهمني.
لعبها صح النذل اتصل ؏ ابوها وشبجها.
رجع اوس اتصل رديت علي يگول ياله عيني اتٵخرت.
ابو غياث ترك مهند اللي محتضن حماده ومايقبل ينطي.
والتفت الي يگول اني اجيبه الج والله ولازم اجي اني والولد نحاول نهون الامور الله يعينه ابوج .
مااقتنعت واني اشوفه يناديني ماما.
انتهيت ياربي ساعدني شلون موقف صعب للموت مايروح من بالي واني بين وبين وبين.
ابني يصرخ يگطع الگلب ومهند بحياتي ما شايفته بهذا الحال.
واني فقدت الاحساس بڪلشي.
اريد ابني ومااريد افترق عن مــهند ومااريد اڪسر ڪلمة ابوي.
هنا خالتي نطقت بصوت تعبان ــ مهند انطي الولد لامه لاتعيد مٵساة اخوك بــ ابنك يمااااا.
اويلي عليك و؏ هضمتك مُــــخلـﺪ يماااا. اويلي عليه و؏ نار فراڰك لليوم تجوي بگلبي ياضنا گلبي.
ما ڪفاهم حرموك مني رجعو غدروك.
ڪملت ڪلماتها واتخربطت.
ناديت ٵوس يشوف حالها نقلوها للمستشفى.
ويسٵل مهند والكلام ابينهم مهند مايعرف شنو حالها.
ومن مؤيد فهمت هي صاير عدها ذبحه صدريه بس ما گايلين الها.
وصار مهند يلوم بنفسه مقهور ؏ حالها.
بقينا يمها ومن شوي استقرت حالتها اخذت اطفالي ورجعت لبيت اهلي وابوي بعده ما راجع للبيت.
للعصر ياله رجعوا وشلون حال مسك اي معالم حياة ما عدها.
حيلها بايد حتى ما نطقت حرف تتهرب بالنوم ودموعها تشڪي حالها.
وابوي واضح عليه التعب والظاهر ما عنده القدره يفتح موضوع.
بحياتي ماخفت من مواجهه ابوي الا بهاي اللحظات.
اعظم واشجع رجل شافته عيني. هو الامان والامن لارواحنا. ليش هالخوف اللي عندي.
احاول اجمع الڪلام ويضيع مني.
شنو راح يسٵلني ياترا؟؟؟؟
راح يگول ليش ما گلتي عن اللي سوته نرجس؟؟
لو شنو اللي يريده مني.؟؟
تنهدت انگطع نفسي احس صدري مجروح.
وين ما ٵلتفت قهر وارجع افڪر شنو راح يسٵلني وارتبهن بدماغي.
اولا النجاة في الصدق.
وثانيا اگوله انت نصحتني قبل زواجي ماانقل اي ڪلمه من بيت عيالي لخارج البيت.
وعلمتني انت الصمت احيانا اقوى وابلغ من ملايين الكلمات ــ
وعلمتني ــ أرقى أنواع عزة النفس هو الصمت .. في الوقت الذي ينتظر منك الجميع الأنفجار بالكلام ..
كثيراً ما يكون الصمت أبلغ من الكلام.
استغفرت ربي فرڪت وجهي تعبت تعبت حيل حسبي الله ونعم الوڪيل ؏ ڪل ظالم وغدار وما يخاف ربه.
ماهمني الا ابوي وحاله احسه مڪسور ظهره وبسرعه يبين عليّ القهر.
اباوعله وهو قريب من مسك ويناديها غالية ابوها زينه ان شالله.
تهز راسها اي.
رن تليفوني ڪان مهند. يسٵلني شصار؟؟؟
رديت ولا شي وبينت اله حالة ابوي وتعبه.
گال مُــــخلـﺪ متحطم متدمر منهار يمشي ويستند ؏ الحيطان. مڪسور ظهره محني ما يمشي بــ استقامه.
مُـــخلــد اللي نعرف هو دخل للبيت من عطره اللي سابقه.
انرعبنا من قميصه اللي ڪله دم من طالع من المستشفى من القهر خشمه نازف وضارب السياره.
يگول اخذت من ايدي مااشوف طريقي وتخيلي حاله؟؟
مُــخلــد اللي محد يسبقه وينافسه بالسياقه.
وڪملت علي من شاف امي وحالها مايدري هذا حالها.
اويليييي ؏ حالهم اللي اثنينهم لليوم مانسو ذيج الايام.
وصل الصاله وسمعها تنوح تراجع ما يريدها تشوفه بهذا الحال.
بدل قميصه ودخل بس شلون يخفي يبين عليه.
ومن شافته بـﭼــت بقهر وشلون حالهم.
تصبره لو يصبرها تواسي لو يواسيها. شنو حالهم اثنينهم.
ابوج موصله فڪره خلاص ينتهي ڪلشي بينه وبين مسك.
لان هذا اتفاق بينهم وشرط من يوم المشيه والعقد.
يكسرون باب الگلب اثنينهم يصبرها ويواسيها وهي تگول شلونها گبل لاتسلم روحها لباريها توجعت صرخت نادتني يمه؟
بجتنا ڪلنا.
حسره طلعت مني گطعت انفاسي واني اباوع لــ مسك دمعتها ماخذه مسار ؏ خدها وماادري وين وصلت بــ افڪارها.
فرحتها بي وڪانها ما مصدگه صارو لبعض تحير شلون تعبر عن فرحتها وعن حبها اله وڪلمتها واخيرا ضحكت النا الدنيا وضحك النا الحظ.
واخيرا ترك الحداد والسواد ولبس الابيض.
شوفي شگد لايگ اله القميص الابيض.
واخيرااا ضحڪت النا دنيانا. وصارت ايامنا ورديه.
اوووف واجاڪم اللي يعڪر عليڪم صفو ايامڪم الورديه.
تگول احبه بگد العدد اللي بعدها ماتوصلوا اله العلماء.
حبي اله ما لانهايه وما ينتهي لاخر نفس بيه.
سٵلته وينه هسه مُــخلــد وشنو حاله؟؟؟
گال وينه. الله يڪون بعونه يشيل هم منو لو منو.
يريد يشوف وعد ما شايفه. وباله يم جدتي رغم ما يدري عن حالها.
يوصل ويشوفها اخاف گلبه ناقص صدمات.
صدگ متعوب گلبه ومتعوب حظه شوڪت يرتاح ماادري.
يادوب سبح وغير ملابسه وطلع هو وخالي ابو مؤيد ومؤيد وياه وٵمي رغم حالها وتعبها اصرت تروح وياهم.
ما يگدر يسوق السياره مؤيد راح يسوق بداله.
ردت اروح وياهم وحلف عليه يگول ابقى حل مشڪلتك شنو ذنبڪم انتو.
گطع گلبي وهو يگول لاتاخذ حماده من امه.
و سوي المستحيل ورجعها.
ختمها وهو يوصيني ؏ نفسي واطفالي ويگول گلبي نار ويخوفي لا اخسرج.
معناها بس الله يستر شنو اللي راح اسوي قسمت ؏ المصحف الشريف. خوالي شهود.
اذا ابوج ماقبل ترجعين الي بسبب اللي صار ابو غدير ونرجس موتتهم ؏ ايدي.
هو شنو اللي بقالي واخاف اخسره؟؟؟؟
ما يهمني لادراستي ولامستقبلي ولاحياتي بعدج انت.
رديت ماادري مهند ماادري توڪل بالله.
رد بقهر والنعم بالله.
نهيت الاتصال وياه واباوع لحال اهلي عبالك ڪلهم مرضى مو بس مسك.
اجه خالو ابو الحسن يسٵل عنها ثنا گبالها ورفعها وهو يتمازح وياها يحاول تگعد عباره عن جسد خاوي من الروح.
ولليل اجو اخوالي واللي لاحظته مايعرفون الحقيقه ولاابوي خبرهم اللي يعرفونه عن حالها تسمم غذائي.
بس مااصدگ خالو ابو الحسن مايعرف الحقيقه.
ماتٵخرو اخوالي يمنا گالوا خليها ترتاح تعبانه.
حاسه ابوي نظراته عليه وڪل شوي اتوقع راح يسٵلني.
الياس صار موعد دوامه طلبت منه يبقى احس احنا الڪل محتاجينه وخاصه ابوي ڪلش بحاجة وجوده.
گال بعيوني وبلا ما تطلبين مفڪر ابقى.
اتصل وگدر يرتب اجازه. وحاولت افهم منه شنو اللي ناوي ابوي يسٵلني عنه.
اگدر اواجه الياس وافهمه سندنا وذخر ايامنا ابونا الثاني.
بس ابوي صعبه حيييل مااگدر اواجهه .
تناقشنا وفهمته ڪلشي بمصداقيه. وبڪل ڪلامي حاولت ابرر لــ مـُــــخلــد وحسيت بالحيـــد مهضوم علي ولحيت بكلامي عنه.
لان ادري ابوي مو ظالم ويحرم اطفالي من ابوهم او يفڪر يطلب مني اترك مهند او انفصل عنه.
بس مـُــــخلــد ومسك بقاءهم سوا بعد اللي صار اشـــــبه بالمستحيل.
گال لاتفڪرين بــ اي شي. شنو ذنبج انت ولا ذنبهم.
ولاتلومين ابوي الله يعينه اترڪي ڪل شي عليه.
ابقــــي هالفتره هنا لحد ما يهدٵ ـ الله ستره البارحه ضغطه صعد من القهر. بعد اتصال عمهم.
واحير انقهر ؏ ابوي لو ؏ مُـــخلد؟؟؟!
اثنينهم حالهم يقهر.
ابوي غاليته وروحه مصدوم باللي صار.
ترا ڪارثه وفعلا غدرهم اقوى من عمامي.
وشوفي شلون عمهم ڪملها ويتشفى ويتشمت بعد هذا ڪله.
وبين المسڪين اللي ماله ذنب بڪل اللي صار واشوف اڪثر واحد اتاذى.
لو تدرين من القهر عليه شنو گلت لابوي وخليته مصدوم بكلامي.
ميس ــ شنو گلت؟؟؟
گلت لاتخليهم يتشفون بــ مُخــلد ويفرحون بڪسرته.
وما گدرت اڪمل اڪثر وهو گال مو مستوعب اللي صار ومجرد التفڪير بمحاوله قتلها غالية ابوها شنو حالي.
سولفت اله عن هدوله شلون ضربته وهانته لعمهم گال عاشت ايدها.
يستاهل اخوها تنتفض علموده.
جر حسره قويه وگال تمنيت اشيل من همومه الله يعين گلبه.
بعد ڪلامي وياه طلعوا للحديقه ابوي والياس وموده تبعتهم شالها يبوسها.
اڪثر من ساعه هم بالحديقه وماعرفت شنو الڪلام اللي دار بينهم.
اجاني حمودي يتمتم عــــٓــمه تعاي بابا.
اخذ ايدي وطلعنا ڪانت موده نايمه بحضن ابوي گال تعالي بنيتي اخذيها بمڪانها تنام مرتاحه.
سمعت اطراف الڪلام يتناقش وي الياس بالموضوع. حقه يشوفه اخ اله. وسند وحزام ظهر.
وشلونه الياس ماشالله علي ڪلامه حڪم ودرر . اب ثاني النا.
عرفت من الياس يگول حيره والله بس هو المسڪين شنو ذنبه.
وابوي يرد ليش هو هين عليه ولا اني محمله الذنب. ولاعاتبته ولاسمعته ڪلمه تڪدر خاطره.
ڪلشي حسبت حسابه وفڪرت بي بس توصل لدرجة محاوله تنهي حياتها.
لااااا هذا اللي نهائي ما خطر ؏ بالي.
لو صاير عليها شي شگول ذاك الوڪت.
اعاتب منو. واحاسب منو؟؟؟؟؟
يحجي بقهر وٵلم عن حال مسك اللي ڪلنا نعرف غلاتها عنده واتفاقه وي مـُــــخلــد.
دخلت للبيت اسمع رنة تلفوني ڪان مُــــخلـﺪ يسٵل عن مسك بلهفه قبل لااجاوب ؏ سؤاله يسٵلني سؤال اخر. شگد خايف عليها.
اخر شي گال مشتاگ اسمع صوتها اريد اطمٵن هي زينه حتى لو بس اسمع صوت انفاسها. وهي ڪانت نايمه وتعن .
يوصيني بيها سٵلت عن الڪل يمه يگول شلونهم.
والبيت مخيم علي الحزن ومابي بس صوت البجي والنحيب ومشاڪل الاغاااا.
ورجع يگول قربي التليفون يمها اريد اسمع انفاسها.
گلت خليها باجر من تصحى اني اتصل بيك.
گال تعباااان فدوه وطايره روحي عليها.
امري لله مااريد ينقهر اڪثر ويسمعها تعن.
قربت التليفون وهو يسمعها ويناديها بالڪلمات اللي متعوده عليهن.
يبووووو شلون قهر حست فتحت عيونها وبجت وتحاول تڪتم.
بعدت التليفون وگالت گوليله زينه.
وصي بنفسه امانه وصي بنفسه. .
بشنو اوصي وبشنو اوصيج وانتو ارواحڪم متصله ابعضها و؏ البعد حاسين واحد بالثاني.
ثاني يوم نفس الحال ومسك ما دوامت لان ڪلش مابيها حيل.
ومهند مابطل يتصل ويسٵل شنو اللي صار.
ولليل اجو جدهم ابو غياث وابو رماح وابو اجود ومهند.
يسٵلون عن مسك وصحتها بس مافتحوا اي موضوع.
بعدهم گاعدين والڪلام عادي واسيل اتصلت عليه تسال شنو اللي صار؟؟؟
گلت بعدهم گاعدين وماڪو شي.
ڰالت لو تدرين شنو صار مُــــخلـﺪ روحه بخشمه والدنيا طالعه من عينه.
وابو غدير بڪل عين صلفه مستقر يمنا ماشالله عود يواسينا ؏ حزنا.
وهو يرقص ؏ جراحنا ويذرلها الملح.
ماعرفت شنو اللي صار بينهم و صارت مشاجره و مُــــخلـﺪ خله دمه بطوله.
واڪيد جدي صاف وي ابن اخوه. وشنو سوا من مشڪله بس مـُــــخلــد ما رد علي بحرف.
وبعده اجه منعم هاد يگول وينه اللي صاير رجال و مد ايده ؏ ابوي اليوم اڪسرله ايده.
وطلع مـُــــخلــد وگال اله انت ابن ابوك وتعال. اشوفك منو اللي صاير رجال واعلمك الرجوله ؏ اصولها.
دخل ومثل ابوه يلعلع بس لسان وڪاتلتهم نجماته.
يگول انت گبل شلونك وصارت عندك نجمات وغلط ؏ مـُــــخلــد.
والله لو شايفته بس مـُــــخلــد سحب ايده ولواها ورا ظهره صار يرافس ويصرخ مثل الطفل. ومابي خير صار يغلط.
لوا ايده الثانيه ومده بالگاع وداس ؏ صدره.
وهو يتهدد يشتڪي علي ويخسه بالسجن.
هنا مـُــــخلــد رد بضحڪه مستهزئه. وگال سبحان الله تعرف السجن يخيس. لان خست بي وتخزيت وانفضحت.
شتان بيني وبينك ــ اني انسجنت بتهمه باطله وشهاده زور من ابوك اربع شهور والله حق الحق بكلماته وطلعت برائه ومرفوع الرٵس.
الا انت اللي زيفت وزورت ودخلت ابوك مصحه شلون قبلتها اعتبرته مجنون. ودفعت فلوس وصلت بيك حتى تحتال ياله تحصلها الفلوس.وخسرتوا ڪل شي تملڪونه.
وربك بالمرصاد انسجنت انت سنه ڪامله وبتهمه بشعه او مجموعه تهم وحده اتعس من الثانيه قسما بذات الله اخجل انطقهن.
تدل ؏ ان انت حيوان مو بشر ياقذر يا منحط ياسافل .
والنتيجه خست بالسجن وخسرت اللي جنيته و تعب مال سنين اللي بنيته بالحرام. واللي اساسه حرام ماله بقاء بنيته ؏ جرفٍ هار وانهار بيك.
مااريد اڪمل الباقي واذڪر انت شنو ڪنت تسوي وربك ردها الك.
ورجعت صفر اليدين لااااا ومطلوب وتحول حوالات وتسدد.
اجو اخوانه اخدوه واتعذروا من مـُــــخلــد.
وجدي يگوله حاقد من يوم يومك راضع حقد مثل خوالك وهواي ڪلام غلط بس مـُــــخلــد ترڪه ودخل يم جدتي.
حاله يموت قهر ماگدر يصعد لغرفته.
شلون يصعد وهو من صارت اله ڪبر صورها وعلگها بالغرفه.
وڪل زاويه من الغرفه تذڪره بيها غير لو تروح من باله لحظه. الحزن ماليه وبالقدره يتنفس.
اخاف ناقصني قهر شبعت قهر وهي توصف حاله بغرفه جدته وبعدها تصبره وتگوله الك هي الك.
بقيت ؏ تواصل وي اسيل. وبين القهر عليهم وبين قهري ؏ اختي اللي حتى بعد ما استعادت صحتها. تگول ترڪيزي واستيعابي صفر.
بالضبط مثل حالي من تمرضت بالخامس اعدادي وڪل المعلومات انمحت من دماغي والنتيجه نجحت بقرار.
افتح المحاضره احس الماده مو دراستي ولا افهم منها اي شي.
وقتها بين محاضراتها وماادري فڪرها يم داستها لو يمه. وهي من يوم اللي تخربطت وطلعت من المستشفى مااستخدمت تلفونها. ليش ماادري.
واللي اعرفه عنها هي ماتقرا ڪلمه اذا ماتڪتبها بس اللي شفته مڪتوب بخط ايدها ڪلماته. اللي يگولهن الها.
ومحوطه ڪلمه ٵبويه انتِ . وڪاتبه وينك؟؟؟
ودموعها تنزل بسڪوت ـــ حسبي الله ونعم الوڪيل ؏ اللي وصلڪم لهذا الحال.
انقهرها عليها لو عليّ اللي اعرف اخباره
من اسيل وعرفت بعد المشڪله اللي صارت لــ مـُــــخلــد وي بيت ابو غدير مشتڪين عليّ. لان ابو غدير متاذي وسنونه مڪسره وخشمه. ونايم مستشفى.
وعمه رائد مامقصر بالدفاع عنه والفضل لله سبحانه وتعالى ثم رعد اللي مصور منعم من دخل لبيتهم ويتهدد ويغلط. واڪيد انقلبت الامور ضدهم وانردت دعوتهم بدعوه ومـُــــخلــد طلع منها.
والاقوى من هذا ڪلامه وي بيت عمــه ابو ريسان وهو يگولهم ڪل مصيبه صارت ومشڪله وڪم عائله اتاذت الذنب برگبتڪم الڪل امها وابوها واخوها.
انتــــو خدعتوا وعد وخطيته برگبتڪم الى يوم الدين.
من قتلت اخوها وانتم ؏ يقين من هذا الشي وصرتوا متاڪدين هي قتلته.
وهذا الفعل ما يطلع من انسانه سويه. بس يطلع من انسانه حاقده وماعدها مخافه الله.
هنا المفروض تعيدون تربيتها وتشوفون شنو اللي دفعها لارتڪاب جريمه من الكبائر. الخلل بيڪم وبيها. مو هاي ام نورس يمنا صار سنين لحد هسه تستحي من عدنا وهي اڪبر منا.
واللي مثل نرجس ماتصلح تڪون زوجه وام وتقود بيت. المفروض تبقى ابيت ابوها واڪفي الناس شرها.
انتو شنو اللي سويتوا؟؟؟؟؟؟؟
تسترتوا ؏ جريمتها واڪدتوا هي بريئـــه من التهمه اللي انسبت الها.
افعى خلعت ثوب وارتدت ثوب جديد. وصارت تمثل شخصيه جديده.
وكملتوا ڪلشي حسب الاصول وطلبتوا من وعد يعجل بالخطبه لان طالت وتصير مو حلوه.
خدعتوا وغشيتوا بالوقت اللي المفروض تنهون ڪلشي انت بمڪانك وبنتنا عدنا.
انتو دخلتو بــ اسلوب وحيله وتنازلتوا عن ڪلشي بس ياخذها بحجة احنا عمام مابينا.
والنتيجه مايحتاج اگول لان شفتوها بعيونكم مصايب مو مصيبه وحده.
مع الاسف ماشفنا من عمامنا الا الشر والغدر الخداع والمڪر والغش.
نڪسوا روسهم بعد ڪلامه وگالو اله هي هم خسرت ڪلشي و تعوقت ايدها وبتروها للساعد. واخوها يگول بعدها ماشافت شي هاي البدايه.
مـُــــخلــد رد ــ بعديش.
فعلا بعديش؟؟؟!!!
وبيوم اجونا اخوال مـُــــخلــد وجده واڪيد بخصوص الموضوع وڪلام بالساعات وڪانت النتيجه ابوي طلب منهم ٵن مُــــخلـﺪ ينهي ڪلشي واڪيد اقنعهم بڪلامه وفهمهم هذا اتفاق وانت ياابو غياث شاهد ؏ هذا الڪلام.
واللي اوله شرط اخره نور.
بعدنا ؏ البر مثل ما دخلنا بالمعروف نخرج بالمعروف.
وڪل واحد منڪم يخلي نفسه بمڪاني ويحڪم.
و ردهم ڪان حقك ولو احنا بمكانك اڪيد يڪون موقفنا مثل موقفك.
وقبلها محاولين يبررون ان هو ماله ذنب ومحاولين يثنون ابوي عن قراره.
وابوي ختمها يگول ان اني ما حملته الذنب. ولا انبته ولاعاتبته وخاصه بعد ما شفت حاله. وهمَ حاليا بمصيبه والله يڪون بعونهم ويعينهم عليها.
مو اسبوع لا اسبوعين وبعدها ياريت يجي يطلك وڪلشي ينتهي واني نطيته خبر وگال الله كريم.
ـــــــ
يتبع ــــــ
بعد اللي صار نريد نتناقش بعدة امور ورأيكم اكيد مهم بكل فئاتكم،
بعيدا عن الحب وشخصية مُـــخلد.
بناتنا الشابات لو كنتم بمكان مسك شنو يكون موقفكم تتمسكون لو تتركون.؟؟؟؟
واكيد صار واضح الفرق بين حياة مُــخلد الصاخبة اللي ماله ذنب بيها وحياة مصطفى الهادئة؟؟؟
رأيكم كـ أمهات بموقف المها تجاه مُــخلد لاحملته مسؤولية اللي صار ولا انتفضت بوجهه ولاسمعته كلام ولا قارنت بينه وبين ابن اخوها
شنو ردة فعلكم لاسامح تعرضتوا لهكذا موقف ،؟؟؟؟
رايڪم بــ موقف محمد وسحب ميس من عيالها؟؟
رغم هو سابقا لما زعلت المها وطلعت من البيت تاذى وبقى الموضوع يحز بنفسه.
رٵيڪم بــ موقف الياس، ،،ورفضه لخذلان مخلد وانكساره؟؟؟
والرأي الاهم بنظركم، ،العقاب اللي اخذته نرجس ع ايد اخوها كافي لو كان المفروض تدخل سجن ،،؟؟؟
لان بالنهاية يبقى مجتمعنا عشائري وصعبة دخول البنت سجن، ،
غدر اعمام مُــخلد فاق غدر اعمام مسك،
برأيكم شنو السبب الانسان يكون بهالحقد ويدور اذية الاخرين، ،،
التفاصيل والاحداث صارت شائكة بين العائلتين ياترى ينفصلون مُـــخلد ومسك؟؟؟
لو ينتصر حبهم ويكملون؟؟؟؟
وتوقعاتڪم بــ طريقهم القادم ممكن يصادف مطب اكبر يكون كفيل فعلا هالمرة بانفصالهم؟؟؟
لو هاي اخر غدر وطعنه؟؟؟؟
وئام الشيخلي,,,,,, 💞