في ضريح العشق حمامه ......🕊💙
وئام الشيخلي .........
مساء الورد والياسمين ؏ عيونڪم غوالي
ــــــــــــ
شلون الغوالي ـــ
ان شالله بخير وصحه وسلامه.
مشهد ـــ
سلمت سلام عادي وتعديتها وهي بڪل عين صلفه تگول شدعوه الله الجبير اعتبريني سحر وسلمي عليه مثل ما سلمتي عليها وشارگه حلگج. عبالك سولفت الج نڪته.
شدعوه من وصلتي ليمي عبالك شفتي ملك الموت. اللي جاي ياخذ روحج.
اشو اخذتي مُــــخلـﺪ واخذتي بعد عليمن ضايجه مني ومغثوثه.
وين تروحين من عذاب ربج واخذتي من بنت عمته اليتيمه اللي ڪل املها هو.
طيبه تدعي وتتحسب عليج ليل ونهار اخذتي ابن خالها حبيبها منها.
ــــــــــــــ
ـــــــــــ
قال ــــ
وعبرنا ذلك الخط اللاهب
الذي أحرق قلبينا
ليلا و نهار
وتشابكت أيادينا أخيرا
في ضوء الحقيقة
أمام عيون الجميع
في وضح النهار
ليكمل قلبينا الطريق
لنمضي معا باقي المشوار
أيا لهفة أرقت أنفاسي
وكأني غريق
وأنتِ أول نفس من الهواء
وَ كأنّك ِدَهشةُ العُمرِ......سَقطَت علىَ أيّامي
بموسمِ الجَفافِ....
فأثمَرَ نبضٌ صااادقٌ ......كتبتُهُ بكلمّات...
وَ كُنت ِلرّوحي ميّنااااء !!
أصبحتُ أرى بصوتِكِ ...وَ أشتمُ رائحة عطرك ِ ..
وَ أترجمُ أنفاسكِ ...
وَ صرّتيَ لقلبي كل الأمان .....
وَ أزفرُ العُمرَ ماضياً ،
للحظةٍ تجمعُني بكِ .....خارج الخيّاااال !!!
اڪو لحظات نتمنى يتوقف الزمن عدها. ونتمناها ما تخلص. هذا حاله اللي ڪل مااحاول ارجع للصاله يگول وييين؟؟؟
وبعدني ما شفتج.
ليش اللحظات اللي انت قريبه مني تڪون مثل لمح البصر. شبسرعه خلص اليوم.
اتحججت بردت وياريتني ماگلت بردت.
افااااا رويحيتي بردانه غير اضمها بروحي.
نزع سترته وخلاها ؏ اڪتافي وڪفوفي بين ايدي متمسك بيهن. يدلكهن بين ايديه يدفيهن.
توسلته اريد ارجع يم ٵمي ـ ضحك وگال امري لله.
يدردم عليه يگول صار سنين يمهم ڪافي الباقي حصتي.
استحيت ادخل للصاله بقيت يم البنات وهن يحضرن العشا.
خالتي اجت يمي وتعبر عن فرحتها بينا ونصحتني وتوصيني من ڪلامها وڪلام مُـــخلد ڪلش واضح اڪو مشڪله صايره عدهم ورجعتلي بنفس وصيتها السابقه في حال اجتني اي رساله مااصدگها او اي ڪلام يفرق بينا.
وبعد ما صبوا العشا وتعلوله ياله طلعنا ومن وصلونا للباب تقرب ويگول شبسرعه خلص هاليوم.
اگول ذڪريني غاليتي مو عمو گال الجناسي هم نغيرهن الى متزوجين لولا.؟؟؟؟؟
يقلد صوتي من يگول عمو.
يعني اسبوع الجاي باذن الله ويحتاج الهن شي اسبوع ياله يڪملن. اذا مو شهر.
البرنس طلع صدگ مهند يتعلم منه.
گلت لاتطمع زايد اباااد ما گال عمو .
واگول بداخلي هنيالي بيڪم انت وعمك.
وصلنا البيت ومو حاسه باللي حواليه وبالي ڪله يمه واتذڪر ڪلامه لهفته فرحته ابتسامته وادعي ربي يديمها علينا.
وقبل لاانام وصلتني رسالته تصبحين ؏ خير حمامتي واحلام سعيده اني محتلها بالڪامل اولها ومنتصفها ونهايتها.
ابتسمت واگول وي نفسي من يوم يومك احتليت گلبي واحلامي وڪلشي بيه صار ملك حصري الك.
رديت برساله ونمت براحه وفعلا محتل احلامي. وصحيت ؏ رسالته الصباحيه اللي تزيدني نشاط واني اقرا ڪلماتها.
رسائله جزء مهم بيومي بما ٵن مايگدر يشوفني ڪل يوم واتصاله وقته قليل يگول مااريد اشغلج عن دراستج ويضحك يگول هذا من ضمن الشروط.
وبالاسبوع الثاني بيوم ڪان دوامي بالجامعه طلعنا من المحاضره والبرنس گبالي.
نورت الجامعه فدوات لهيبته وشخصيته وحضوره اللي يلفت الانظار.
و؏ گولة هيوم ليش هو ڪل من شال ثلاث نجمات ؏ ڪتافه گال اني نقيب.
اڪيد لا هذا الذيب هذا.
فرحت واني اشوفه واتذڪرت لما ڪنت اشوفه قبل وشنو امنيتي. حمدت ربي وشڪرته ؏ نعمه العظيمه.
وصلت ليمه سلمت وصديقاتي سلموا عليّ .
وبعض طلاب قاعتنا سلموا وهو يرد سلامهم بڪلماته الحلوه.
واڪيد ماتفوتهن فايته شلة الشغب اجن سلمن. وشلونه سلامهن الــ هيلاوووووو وحرف الواو وصل لباب الجامعه وشخبارك وياهلاوووو نورتنا. وووووووو.
الله لاينور ايامجن ــ
صديقاتي المقربات ماعدهن هالميانه وياه.
بحيث صار هو يتراجع ويشتت نظره عنهن.
ورقاء تهمسلي اعصابج دكتوره الدخان طلع من اڪتاف الستره.
ريلاڪس. شــــٓــهيق زفــــٓــير.
روحي وي سيادة النقيب. واني افترسهن الج.
اليوم انعــــٓــل شيبه الما رباهن يولووووو. مگصوفات الآجل.
ڪتمت ضحڪتي و مشيت وياه فرحانه بشوفته يسٵل عني متلهف ويگول الله يرضاها زوجتي شرعا وقانوا وصار اربع ايام ما شايفها. ميت من شوگي الج وخرقت الاتفاق.
مايدري اني مثله وميته من شوگي اله وما صدگت شفته وعبالك مو اربع ايام ماشفته وانما اربع سنين.
گال هاااا غاليتي وين وصلتي.
ابتسمت وگلت ؏ ڰوله الماســــٓــه انت خرقت ڪل الاتفاقات.
بس ماادري ليش حسيت بعد اڪو سبب ومو بس اشتياقك اللي جابك.
ضحك وگال والله مشتاگ الهم بيت ابو حماده.
و عليج نور ڪل الاسباب جابتني واڪيد منهن اللي ابالج.
اخاف اڪو شخص اباله ينظر الج نظره اذڪره هذه ملڪة مملڪتي.
اموت ؏ غيرته واحنا نمشي ويگول شلون قهر اجي اشبع قهر ابتعد نفس القهر وين اضمج من عيونهم.
وارد عليّ همَ وينهم؟؟؟؟؟
مو گلت الك مااشوف الا انت.
بــ ابتسامه طالعه من صميم گلبه وگال وماعندي ذره شك بس مو بيدي اغار عليج.
اغار من نسمات الهوا اللي تلاعب خصلات شعرج.
استنشق وگال الله طالعه من گلبه براحه ــ
اجمل شي لما تتمنى امنيه ونشوفها بعيده المنال وربك يحققها الك.
جنت اگول اوووف هم يجي يوم و تصير حمامتي ملڪي ونمشي گدام الڪل بوضح النهار واني مفتخر هذه امنيتي هذه صبر ايامي وتعب سنيني.
بعد ما جنت يجيبني گلبي الهايم بيج اسرق نظرات وارجع.
بقا شوي وطلع للسياره ورجع. نطاني الاقراص وگال النسخ الاصليه موجوده عندي.
واحد من الاقراص مڪتوب خاص جدا جدا.
اخذه گال بعدين شاهديه والافضل نشاهده سويه.
رديت ان شالله.
يباوعلي يگول شگد احب هالصفه بيج.
مسك ــ ياصفه؟؟
گال ماعندج الحاح وفضول.
صفنت عليه وگلت مو انت گلت بعدين نشاهده ماڪو داعي الح.
گال ان شالله. ونطاني وي الاقراص مسڪه الورد طبيعيه بداخلها ڪارت وعلبه ڪاڪاو. وسلم ويوصيني بنفسي ويحسسني هو الامان والسند والحبيب وطلع.
نظراتي تتبعه ويلوموني ليش اعشقه ويگولن افڪارڪم راح تڪون مختلفه وتتعبين وياه.
وهو مهتم بــ ادق التفاصيل اللي اعشقها.نظري يتنقل بين مسڪة الورد وجمالها وبينه وجماله خطواته ومشيته بثقه وهيبته.
ياجمال التعب اذا ڪان وياه ڪلمه منه ونظره لعيونه ڪفيله تزيح عني ڪل التعب.
وسبحانك ربي اللي ڪانن يقارنن بينه وبين مصطفى ويسار. طول ما احنا نمشي بالجامعه هن قريبات منا وانظارهن ما نزلت عنه.
واني احاول اغير مسارنا ونمشي بغير اتجاه يمڪن حس وابتسم.
ما حبيت تصرفهن وخاصه بعد ما عرفت هو ڪلش عاجبهن لااااا ومسمياته بــ اسم خاص بينهن.
و؏ گوله مناهل وميساء حقهن هن معجبات بي وانت اخذتي منهن.
بعدني ؏ وگفتي وابتسامتي وهن مثلي انظارهن بــ اتجاهه الى ان اختفى عن الانظار.
تجاهلتهن ورفعت الڪارت اقراه مڪتوب بخط ايده اللي اعشقه ــ
If you find true love, know that you have found life. You are my oxygen to this life.
إذا وجدت الحب الحقيقي ، فاعلم أنك وجدت الحياة.
أنتِ الأُوكسجين الخاص بي لهذه الحياة.
ياجمال حروفك مُـــتيمي وانت اوڪسجيني ونبض گــــٓــلبي.
واجني شلة الشغب مسك ممڪن سؤال.
شگد فرق الـــعمر ابينكم؟؟؟
وڪان ردي ــ ؏ گولته هو احنا نفس العمر لان عمرنا ابتدٵ من دخلنا بحياة بعضنا وصرنا لبعض.
وحده منهن گالت بــ ابتسامه مزيفه يااا مسك الظاهر الفرق هواي ومو راضيه تگولين.
واڪيد اعرف اشلون اردها.
گلت اڪيد فرق والدليل انتو المجموعه لاحظتوا هالشي من يوم العقد لليوم.
واڪيد شفتوا بي الرزانه وقوة الشخصيه والهيبه والحضور.
واذا شوي ترجعن الذاڪره قبل ايام سٵلتوا نفس السؤال ورقاء ردت عليڪم.
وصلن يمي ميساء ومناهل.
وميساء تگول شبيهن بسعاد وخواتها.
وهن يگولن ولا شي بس سٵلنا ؏ خطيبها.
وردت ياطلابة خطيبها الماتخلص.
اريد اجيبله ام سبع عيون ــ عينجن منه ترا اڪلتنه اڪل.
اگول ارجعن لمواضيعجن القديمه تحريات ودقه وسرعه بنقل الاخبار. يسار صار فتره ماجبتن اي خبر عنه.
وعوفن النقيب بحاله. ترا صار فتره انتن ماعدجن موضوع الا هو.
ابتسمن وحاولن يغيرن الموضوع بس عليمن ؏ ميساء.
اللي لعبت بــ احولهن وحسستهن هي شايفتهن من التقطن اله صوره بيوم اللي اجه بالنادي.
وعدهن صوره اله من اجه بالوليمه وي حاتم من ڪنا مرحله ثانيه.
اتعذرن وگالن مو بقصد ردنا نشوفه عن قرب.
ميساء تگول ياقرب لخاطر الله وانتن اليوم من شفتنه وحدتجن العداء الرياضي ما يلحگها وبس باقي تاخذنه بالاحضان.
طبعا هالمجموعه من المرحله الاولى نفس الطبع بس ما مرڪزه بيهن وما همني اي تصرف منهن. ولايعنيني.
بس صار اشهر لاحظت تصرفاتهن يحاولن القرب مني وماعدهن موضوع الا هو.
واعجابهن بي نفس حال ﭬـــينوس.
ومناهل گالت ازيدج من الشعر بيت قبل ايام مراويات صوره لــ ورقاء. الصوره الهن ماخذاتها العام يم سيارته.
وصديقتهن فشلتهن من گالت اي وبعد عدة محاولات تثيرن انتباهه وگلتن ممڪن تلتقط النا صوره.
وهو ٵشر الجن تبتعدن وگال ترا زينة البنيه ثگلها بلاها هالخفه هاي. انتن جامعيات عيب هالتصرفات .
ميساء ـــ تلوموني من اسميهن بسعاد وشلتها.
البارحه سٵلن آن عن مصطفى ويردن يتٵڪدن علاقتڪم عاديه لو متخاربين.
اخذت صفنه واني احسب شگد صار ما شايفته.
ومناهل سٵلتني شخباره.
واخباره مبتعد ڪلش وما شايفته صار ايام التقينا بالمنظمه.
ماجاي لبيتنا صار اڪثر من شهر. واللي فهمته حاله صعب بس يڪابر.
ولما مهيمن گايل فتره وتنسى.
وهو راد عليه وين اڪو شخص يحب وينسى.
مابيدي غير الدعاء اله.
ومناهل حولت الڪلام لمزح وگالت اني انسي مسك وعشيرة مسك.
رجعت يم بنات گروبي ورقاء ڪملت التحشيش. وتگول انت شڪو تنسي.
واني وين رحت عنه.
ومن رجعت للبيت بدلت بــ استعجال وخبرت البنات بالاقراص.
وگعدت اتفرج عليهن اني ومرام وانوسه القرص مالت تلبيس الحلقات يجننن هيومه مبدعه بالتصوير ومڪملها التصميم والمونتاج وانوسه تگول اڪو لقطات بعرسنه اخذتهن هيوم يجننون لحد هسه من اباوع الهن اگول مبدعه متعدده مواهب ام ياسر.
فدواتها فعلا متعدده مواهب واجمل موهبه من توصف البرنس.
شارگه حلگي واباوع لما دخل الصاله صايره مجنونه رسمي نظري توجه للباب وڪٵني انتظره يدخل هسه.
مرڪزه حيل واني اشاهد گلبي ينبض بفرحه واردد بداخلي احبك امووت عليك يربي شنو غلاتك ؏ گلبي مالها وصف ولاتعبر عنها ڪلمات.
حرڪاته ابتسامته رهاوته بالمشي خطواته هيبه من ربي.
شنو فرحته وهو قريب مني اباوع واتذڪر هنا شنو همس الي من ڪلام اتذڪره بالحرف الواحد واغنيه ياصايغين الذهب حبيت ادلعها. واللقطات وهو يبلسني الذهب.
واني البسه اجمل هديه من اخواني سندي. ورفعة راسي واللي بعدها هواي تصوير الى ان يطلعون من بيتنا.
خلص القرص وگلت خلينا نعيده. گالن بعدين خلينا نشوف القرص الثاني.
صفنت بين ما انوسه غيرت القرص واني اتمنى ڪل خطوه بحياتنا اصورها واحتفظ بيها.
القرص الثاني يوم عقد المحڪمه يجننن حرفيا والترتيب ولا اروع يبدا من بيتنا ودخولهم النا وطلعتنا للمستشفى والمحڪمه واحنا واللقطات شي عجيب والاغاني اجمل.
وبعدها لما دخلنا بيت جده هنا اريد اتذڪر منو صورتنا.؟؟؟
واللي بعدها تصويرنا بالمطر اني وياه والاغنيه اللي سمعناها احبيني بلا عقد وضيعي في خطوط يدي.
التصوير بطيء ويجنن ويتخلله صورنا اني وياه والضاهر هو طلب يڪون بهذا الشڪل هنا صورنا تتڪرر وي مقطع انا رجلٌ بلا قدر فڪوني انت لي قدر.
وبعدها مقطع من اغنيه ــ انت اجمل قدر لــ صلاح حسن متت بغرام هالاغنيه. ڪلماتها تجنن.
اني مندمجه واتفرج ومرام تهمس لي هاي شوڪت؟؟؟
؏ گوله دڪتورنا الفنان تذاڪرون من ورانا.
هاي شوڪت طلعتوا بالمطر؟؟
من استاذن من خالتي؟
رديت اي غير استاذن من ٵمي .
مرام گالت ربي يهنيڪم تجننون.
اجتني هيومه وعدنا الاقراص واني اتشڪرها تباوعلي ما عاجبها تگول ؏ شنو تشڪريني؟؟؟
ليش انت منو وهو منوو؟؟؟؟
غوالي الگلب انتوو.
وع الاغنيه اللي همت بيها گالت هاي قديمه ڪلش اتذڪر سمعتها بتلفزيون الشباب واني ثالث متوسط.
والي بيها ذكـرى ڪلش حلوه مره گاعدين بالنادي وطلعت هالاغنيه احمد فز وانتبه الها ورجع بنظره الي.
وصارت ڪل ما تطلع هالاغنيه انديرا تجيني طايره تاخذني لقاعة التلفزيون اسمعها.
وين رجعتوني انت والذيب الله شلون ايام حلوه وذكريات احلى.
مر اليوم واني اغنيها لزگت بلساني ومرت ايامي حلوه والاغنيه ماتروح من بالي اسمعها بالحاسبه.
واتصلت بي حبيبي والنغمه تجننن لو ادري هاي النغمه مخصصها الي ع الدقايق اتصل فدوات لذوقك.
مبتسمه واسمع واغني وي النغمه.
ياامرأة اعطتني الحب
بمنتهى الحضارة
وحاورتني مثلما
تحاور القيثارة
تطير كالحمامة البيضاء
في فكري اذا فكرت
تخرج كالعصفور من حقيبتي
اذا انا سافرت
تلبسني كمعطف عليها
في الصيف والشتاء
أيتها الشفافة اللماحة
العادلة الجميلة
أيتها الشهية البهية
الدائمة الطفولة
انتهت النغمه وهو اتصل وبلــــٓــهفه سٵلني قبل لايسلم يعمري بيج شي؟؟
لان مامتعــــٓــود اني اتصل. ابديت اعجابي بالنغمه المخصصها وگلت ردت اسمعك مقطع الاغنيه اللي لازگه بلساني وحتى امي واوس سمعوني واني اغنيها ناسيه نفسي .
امي ابتسمت واوس دگلــــٓــي طبل ولعب بــ احوالي. ايام ماارفع نظري اله واتهرب منه.
ضحك فدوات لصوته يگول سمعيني بالله.
قربت التليفون للحاسبه وسمعته ــ
انت غرامي الوحيد والحلم انت البعيد الگه مثلك اني وين يالڪلك شوگ وحنين انت اجمل قدر والله اجمل.
بفرحه يگول هواي بنت گلبي هواي ما اتحملهن.
هم انت متصله وهم تسمعيني انت غرامي الوحيد.
اوصفيلي شلون خجلتي لما سمعج اوس؟؟؟
مسك ــ خليها سڪته اغمي عليه الا شويه.
ربي لايوگع عباده بين ايدين اوس. والرب لاردت حالي.
ضحك وگال دا اتخيل حالج شوڪت اسمع ڪلماتها بصوتج.؟؟
مو بس عمتي واوس يسمعون.
مسك ــ اعتزلت الفن مُـــتيمــي ڪانت محاوله فاشله.
گال مجرمــــٓــه انت. قسما بذات الله ميت من شوگي الج.
وروحي هايمه بيج ڪافي بُــعد وربي تعبت وانت بعيده.
اريد اخرق اتفاق واطلب من عمي اني اوصلج للجامعه.
گلت مايقبل اڪيد. وهو ڪمل ڪلامه يعبر عن حاله واشتياقه.
وختمها يگول ڪرريها معذبتي واتصلي خليني افرح واني اشوف الشاشه تضوي بصورة عيونج و وليفــــٓــة الروح يتصل بك.
رديت بعيوني.
نهيت الاتصال وبعدني دايخه بڪلماته
ميس اتصلت وگالت مشغول خط الگلب صار ساعه اتصل.
عم حماده وموده اڪيد.
رديت اي هو.
گالت خلي هيوم تراسلني.اتصل عليها ماترد. سالت علينا وعن اخبارنا واڪدت عليه اروح اكول الها.
نهيت الاتصال و اتصلت بهيوم وهمات ماردت.
نزلت للصاله وسٵلت مرام وينها بيبي گالت گاعده بالباب وي ام هادي.
واني طلعت اخذت حمودي ورحت لهيوم گاعده تدرس اولادها ومخبوصه تگول التلفون اخر مره شفته بيد رواسي بس هسه وين ماادري.
اشرتلي ؏ الحاسبه وگالت شوفي اذا حساب احمد مفتوح اخرجي منه وسجلي دخلول بحسابي.
الباسبورد اسم رواسي وتاريخ ميلادها .
التفتت الها وضحڪت ليش رواسي مو قبلها زلم اثنين شنو هالتفرقه هاي.
نظرتها ما عاجبها ڪلامي وگالت هاي منو المتڪلم مددلله العشيره.
افتحي الحاسبه وشوفي الشاشه صوره رواسي وملفات صور تلڪين الها هاي غالية ابوها وازيدج علم يگول ڪون اخت تشبهها.
فدوه لعينها رواسي ابن الحلال ابذڪره دخلت الصاله وبيدها الوان ميسر ودفتره لاعبه بــ احواله.ماليته شخابيط.
فتحت الحاسبه حتى اخرج من حساب احمد. جذب انتباهي الدردشه مالته وي البرنس.
احمد ڪاتب راح تگول لـ مسك.؟؟؟
وهو راد لا مااگول الها خليها مفاجٵه. ولو هي عينها مليانه وما يهمها ملك الڪون.
واحمد يٵيد ڪلامه ويگول ڪلش عيونهن مليانه الله يحبنا وضعهن بطريقنا.
وهمزين گلت الي تريدها مفاجٵه حتى ابلغ هيام ماتگول الها.
والبرنس راد ــ اي بلغها ولو ماتحتاج توصيه ام ياسر.
وصل سلام الها وللاولاد.
خرجت من الحساب ماحبيت اسحب المحادثه واشوف شنو المفاجٵه ولا اثارني الفضول حتى اعرف شنو هي.
يڪفيني هو واشڪر ربي ڪل دقيقه.
فتحت حساب هيوم ونطيتها الحاسبه واخذت ياسر درسته شوي بدل عنها. هو شاطر وذڪي ماشالله بس هواي تلح عليه بالدراسه.
ڪملت مراسله وگالت ميوس تنزل للعراق قريبا؟؟
شو ما گلتي.
رديت هي من يوم العقد گالت انزل قريباً ولحد مانزلت بعد ماادري القريباً مالتها شنو تقصد بيها.
مستمره ايامنا الحلوه ومن اروح الصبح للجامعه او يڪون الدوام سريري بالردهات من اوصل او اطلع مُـــخلد يتصل يطمٵن وصلتي دخلتي وينج وين صرتي.؟؟؟
ماادري حرص زايد لو خايف عليه من شي.
وهاي غير يوصي اوس عليه واوس يرد عليه بــ رد حلو ويرجع يلتفت عليه ويگول جيب المهر اول مره وبعدين وصيني ؏ ام عطوب ــ
يقوس شفايفه ويگول شلون ابتلاء.
وبيوم رجعت وڪان الدوام سريري بـ ردهات المستشفى. وطبعي اتاثر بڪل حاله اشوفها وافڪر بصاحب الحاله واشيل همه خاصه اذا ڪان طفل اشيل همه وهم اهله.
ودايم اشيل بجيوب اللاب ڪوت قطع حلوى. واليوم لما نطيتهم اجاني طفل بلهفه وهو يگول عمه واني.
قبل لا انطي وصلتني امه وهي تگول لاتنطي فدوه لعيونج الحلوات السكر عنده مرتفع.
وهو يگول اخذها لزيودي يقصد اخو.
ياربي شنو حالي واني اشوفه الحزن خيم ؏ ملامحه الحلوه وعيونه دمعت.
گطع گلبي جبت جنطتي ونطيته اقلامي ودفتر صغير اسجل بي ملاحظات . وفلوس خليتهن بين اوراق الدفتر. وڪتبنا اسمه اني ؏ اول ورقه.
ماحسيت فرح بيهن مثل لهفته لقطعة حلوى ربي يشفي ويعافي ويشفي ڪل مريض.
رجعت للبيت ومايروح من بالي سولفت لامي الموقف وهي تدعيله بالشفاء وگالت اڪو حلوى لمرضى السڪري تڪون قليله سڪر اجيبها وخليها يمج احتياط لمثل هيج موقف.
نمت واحس نفسي ڪلش تعبانه ماصحيت الا ؏ صوتها تگول مُــــخلـﺪ اجه ويسٵل عنج.
اريد استوعب ابالي احلم وهي مثلي متفاجٵه تسٵلني عندج علم.؟؟؟
اتذڪرت اني الصبح مااخذت تليفوني وياي ومن رجعت ما شفته نهضت اخذته ڪان ؏ الطبله باوعت للشاشه عدد الرساله والمڪالمات يوضح سبب مجيئه.
قربته لٵمي ابتسمت وهزت راسها. گالت بدلي ونزلي شوفي.
يمه اوس هسه يطالبه بالمهر تلاحگي لحقوقج.
بدلت وبالگوه ڪاتمه ضحڪتي ڪل سوالف اوس اجت ؏ بالي وڪملها عليه من نزلت يگول عزااا بعين عدوج من شڪله اعصاب وعيونه بگصته شنو مسويه انتِ؟؟؟ .
شنو مصخمه شنو مفينه؟؟؟
ويرجع يگول امه تحبه لو داعيه عليه بليله القدر وانت صرتي قسمته.
شو مغلس ؏ المهر اني ردت اگوله اريد سيارتك بدل المهر. بس خفت منه.
اوس يسوي نفسه معصب يگول هيج شڪله.
نصيحه اقري وجعلنا من بين ايديهم سدا ومن خلفهم سدا.
يرجع يگول اذا صار الڪم ولد واڪيد يشبه ابوه اعصاب من هسه اگولها الج بنتي ما انطيها الڪم.
ليش يمه انطيها لابن ام عطوب وابوه اعصاب.
يسوي حرڪات ويگول الله يعينج اني صار عندي خفقان من شفته معصب انت شلون.؟؟؟
والرب خفت ورجف گلبي من ڪلامه.
ياربي شلون راح ادخل واني مااگدر اڪتم ضحڪتي.
ڪملها يگول وينها امي خليها تمشطلج عطوبج لاتخرعين الولد. ويصير بي شمره ــ وجيب الفصل ودي الفصل.
اخذ الضيافه من ٵمي وسبقني وقبل لايدخل الاستقبال يسوي نفسه مقهور عليه.
دخلت بعد اوس سلمت ؏ البرنس ومن رده لسلامي عرفت معصب.ومباشراً سٵلني وين تلفونج؟؟؟؟
رديت هاااا.
اوس قرب الطبله والضيافه يمه وطلع قرب يمي ويگول اجاك الموت ياتارك الصلاه.
لاتنسين ذڪريه طولتوها سويتوها بلا ملح.
جاوبت اوس بجديه اي ان شالله. بس ضحڪتي شلون اڪتمها.
طلع اوس وهو تحول من مڪانه واجه قريب مني گال ضحڪينا وياج دڪتوره.
گلت شلونك.
گالها بــ استهزاء بالخيييير. استنشق بقوه. وزفر غلط ؏ نفسه وسبها.
وعاتبني ؏ التليفون لان ناسيته يگول عقل ما بقى براسي. ونهائي ما حسبت حساب انتِ ناسيته بالبيت.
اتصلت ؏ ورقاء گالت رجعت مسك وماتدري اذا انت ناسيه تليفونج وگالت هسه اتصل عليها واردلك خبر.
زين انت رجعتي للبيت ليش مارديتي لا رساله ولا اتصال.
اتعذرت وفهمته وضعي اليوم وگلت ڪملتها عليه انت هسه.
فرحت لما ٵمي گالت مُــــخلـﺪ اجه والصدمه لما اوس گال معصب.
فك شويه من عصيبته وگال والله صدگ گال معصب لو تتشاقين.
اي والرب گال معصب واقري من سوره يس ــ وجعلنا من بين ايديهم سدا.
ضحك ومسح وجهه ويگول وينه خليني اشڪيله منج.
عدل گعدته ودار وجهي بــ اتجاهه بعثرلي شعري وهو يگول قسما بذات الله ميت من شوگي الج.
مااعرف شلون اجيت اسوق السياره لحد بيتڪم.
رن تليفونه صوته يگول اي وادلل وجايك. لا رحمه يمعود.
نها الاتصال وگف لحيله گال صديقي محتاجني.
باوعي بعيوني شوي. باوعت بعيونه خطف بوسه من بين عيوني وگال ماڪو وصف لاشتياقي الج.
ذڪرته مااڪل شي من الضيافه گال دايمه ان شالله غير مره.
رويحتي انت لاتعيديها ترا روح ما ضلت عندي ما بقت فڪره سوداويه ما خطرت ؏ بالي.
اخاف عليج يعمري انت وروحي اخاف من غدرهم ما مٵمن ابد. گالها بتعب.
متت قهر عليه وحسيته شگد متٵذي وشگد خايف عليه وشلون ينطق الڪلمات.
مسك ــ اسفه.
مُــــخلـﺪ ــ ابويه ٵنت عادي المهم انت بخير.
مسك ــ لاتحرمنـــي منها.
التفت الي مبتسم ومرڪز بملامحي وگال شنو هي اللي مااحرمج منها.
ابويه انتِ؟؟؟
هزيت راسي بـــ اي ــ اموووت ؏ لمعه عيونه من يبتسم.
نظره للباب سحبني تحت جناحه الايمن وياها حسرات باسني بجبيني وگال شوڪت تخلص السنه واشهر.؟؟
واضمج بروحي بنت گلبي.
طلع وامي واوس وبيبي گالوا بعد وڪت وابقۍ ؏ العشا وهو اتشڪر واعتذر لان اجه ووضح الهم هو ضل باله عليه ڪلش لان ما ريت عليه.
طلع واوس طلع وياه يباوعلي واشرلي يضحك.
وبعد ما طلع ٵمي نبهتني ما اغفل عن التليفون.
وفرحت لما اشوفها تشڪي بحاله وتگول راح تشلعين گلبه انتَ .
وزادو محامين دفاع البرنس حتى امي صارت وياه.
و استلمني اوس تصنيف من دخل للبيت ويگول الله بلاه بيج هالمسڪين جاي مايشوف طريقه حتى مي ما شرب يسٵلني بلهفه وخوف عليج. والله شنو حضرة جناب الفاهيه ناسيه تليفونها.
قبل فتره ام هادي ضربت مثل السبع ياخذ فاهيه وجگه يمڪن تقصدج. ماعندي شك تقصدج.
والعڪس السبعه تاخذ فاهي واجڪم واجلك لان متقدم لمنار اجڪم وهي گالت المثل.
شو ڪسرت بگلبي گلت الها ارفضوا ونزوجها لنسيبنا الجديد.
وگالت ونعم الراي اني ليش احبك واگول انت خيرة ولد محمد.
وهسه شافته وگالت موافقين يگبع وياخذ.
من صدگ انتفضت واگوله لا عيني لا لا تصير خير براسي وهو يضحك عليه.
خلف الله عليك و؏ ام هادي و؏ حفيدتها.
وهو يگول نطيت ڪلمه ما اتراجع.
صعدت لغرفتي اشوف التليفون ڪم هائل من الرسائل والمڪالمات.
والرسائل يسٵل مره رويحتي وغاليتي ومره لخاطر الاسلام وين انت ومره لخاطر ربج وينج ماتكولين اڪو ـــو يغلط ؏ نفسه و؏ عمو. بس اشوف عمو افتن اله واراوي الرساله.
ورساله ورقاء هي مگصوفه هي مگموعه هي مصگوعه وين انت والولد نشف ريگو ونشف الدم بعروگوا.
ضحڪت واني اقراها اتصلت بيها ردت وهي تضحك.
تسال هاا شصار المسڪين وجد ضالتهُ .
سولفت الها وتگول اي وبعد.
اگولها ڪملت تگول وبعد.
يمعوده هاهي عاشو عيشه سعيده.
ضحڪت تگول والله بالي يمه لان حسيته ڪلش مقهور وانت الفاهيه نايمه.
وتوقعت بعد هاي قهرته يسويها مثل الام العراقيه من تضيع ابنها بالسوك تبجي علي ومن تلگاه تبسطه بسطه معدله وين اليوجعه.
ڪلامي مو اعتباطا لا ابد عن تجربه مرتين ضيعت ٵمي مره بالسوگ ومره لحگتها من راحت لفاتحه.
وبالمرتين عود اني مسيطره متمسكه بعبايتها ومن اباوع بالوجه اشوفها مو ٵمي واصرخ. يمه اريد امي.
وتجيني ملهوفه مفرفحه عليه وبعدين تجر نفس وتستلمني بسطه معدله عاد گلت توبه مااطلع.
شبعت ضحك ؏ سوالفها تگول شڪو عليج اضحڪي ومُــــخلـﺪ بالضيم حاله.
شلون اثنين هي واوس اليوم طلعوني ڪسر.
ثاني يوم اتصل توٵم روحي ويسٵلني عن اسم طالبه بالمرحله السادسه. اسمها بشرى جمال وشلوني من سٵلني ڪنت متمدده گعدت لحيلي واريد اعرف سبب سؤاله بسرعه.
يضحك ويگول لحظه يمعوده اني افهمج لاتفترسيني.
انت عرفتيها بالاول؟؟؟
رديت اي اعرفها.
گال خاطبها ڪرم شعجب ما وصلڪم خبر؟؟؟
سٵلته انت علاقتك بي عاديه.
گال اي هو مختلف ؏ اهله هو وعزام واعتذر بعد فتره وماله علم بنوايا اهله وما راضي عليهم بڪل تصرف.
و ما مقصره انت منه مفترسته الا شويه.
ضحك يگول شلون ورده وجوريه وفراشه وحمامه وتتحول لبوه مفترسه وتفترس.
شلون ماادري.
بس ڪلها بجهه وغيرتج يبووو اعشقها غيرتج من تتحولين لبوه مفترسه.
رديت اصلا مااغار.
ضحك بصوت عالي يگول لا هاي امي الغيوره اللي افترست ﭬــينوس.
عزااا ڪاشفني.
ياله هو بعد ڪشفني گلت لاتجيب اسمها ؏ لسانك والرب ازعل.
ضحك ويگول توبه اخر مره عوفج منها
شلونها البنيه؟؟
رديت حبابه اذا فعلا خوش ولد يستاهلها.
گال اي خوش ولد.
وڪمل المڪالمه يتغزل ويضحك.
بعد ايام نورتنا الماسه واجازتها اڪثر من شهر. يفرحتنا بيها وبــ اطفالها اللي يجننون صايرين.
واول ماشافتني تباوع للخاتم وتبوسني تگول ماتتوقعين شنو سعادتي وفرحتي الڪم وبيڪم.
بيومها اتعللنا اني وياها والبنات هيام وانوسه ومرام واسمى وسن وآن لوقت متاخر.
شگد قبل ڪانت تحشش وتصنف صايره مضاعف وڪل شوي تگول ڪلمه و تذڪر تگول اسحب ڪلامي بــ تريله. لو سولفيها لخوالج.
لو حڪم وامثال شبعنا ضحك ما حسينا بالوقت.
هيومه گالت جيبوا التليفونات ممنوع وحده تراسل لو ترد ﻉ اتصال.
باوعت الها بتمسڪن وسن نفس حالتي تگولها منو اختج الصغيره.
گالت شلون مشڪله نقطعه ضعفي البصره واهلها.
اسمى تاشر ؏ نفسها. وهيوم گالت فدوه لعينه الغالي ابن الغالي ابن عم امي يمون علينا.
بس المخطوبات عادي المتزوجات ممنوع.
ميس تگولها يبعدهم من البصره ومطعم بغدادي امرؤ القيس.
موضوع يجر موضوع ضحڪنا هواي ؏ سوالف مهند اللي ميس صايره نسخه منه.
ومن جبناها ؏ موضوع الحيله.
گالت من رحنا شهر عسل للسليمانيه يتغزل وناسي نفسه وطلع بطريق رون سايد ما انتبه الا المرور گباله.
نزل بــ استعجال وفتح البونيد مالت السياره يمثل ان بيها عطل ويحجون وياه ڪردي ما يفهم عليهم.
وهم حارو وياه يردون يفهمون شنو عطلها. دعفس بيها ؏ اساس واشتغلت.
وما گصوا اله وصل.
ومن صعد للسياره يضحك يگول لافهموا عليه ولافهمت عليهم. يمڪن سبوا الاغاااا واني گلت رحم الله والديڪم.
وڪملنا بسوالف وتوٵم روحي ڪل شوي يتصل يسمعني اغنيه لو مشتاق لصوتي لو يراسل.
وثاني يوم الماسه تسولف الي عن حال مُــــخلـﺪ بالايام اللي عذبتنا اثنينا اتگطع گلبي ؏ حاله بينما هو يگولي عنها ايام وراحت دام نورتي حياتي وصرتي بــ اسمي نسيتها. بس ابد ما مبين علي ناسيها عساها تنذڪر ماتنعاد.
مستمره سلسله ايامنا الحلوه بوجود الماسه واطفالها بينا وخاصه موده اللي جننتنا بتصرفاتها وهالمره ابوي اللي گالها الماسـة ابوها بعد ما ننطيها الج. ماتگعد الا بحضنه وتبوسه وتنادي جدو بلغتها المڪسره. وتنام بحضنه.
حماده محبوب بس لساته متعلق بــ امه ڪلش.
وبيوم رجعت من الجامعه والماسه گالت عيالي جايين من البصره و گالو باجر نسوي حفله ابينا لــ اسيل خطيه ما احتفلت بالبصره.
ـــــــــــــــــــــــ
اسيل ـــ
اصعب لحظات بحياتنا هي لحظات الانتظار ،خاصه اذا كان شي مصيري، مابين ترقب وقلق وخوف وتوتر كان هذا حالنا واحنا ننتظر رد اهل مسك ع خطوبة مُـــخلد اللي ماترك شخص ممكن يكون اله تأثير اذا ما اخذه وياه.
وبگد ما الرد بالنسبة لـــ مُـــخلد مصيري نفس الاهميه بالنسبة النا ويمكن اكثر لان هالمرة اذا خسرها منعرف شنو ممكن يصير.؟؟
سابقا انهار وحالته ووضعه دمرنا دمار وبقدر اذيته احنا اتٵذينا ؏ حاله.
واڪثر لما نشوف نفسنا عاجزين وما بيدنا شي نقدمه اله ونخفف عنه حزنه وٵلمه وهو بعز الالم والحزن يٵثر ؏ ڪل اللي حواليه.
بقرارة نفسي كنت اعرف هو استعجل كثير بهالخطوة لان مصار الها فترة فسخت من ابن خالها. ولاتخرجت من الجامعة وڪان هذا من اسباب رفضهم لما اتقدم من الاول.
وحتى هو يعترف باستعجاله ، لكن هو يسابق الزمن ويكسر الظروف او الامور اللي ممكن تحدث وتبعده اكثر عنها.
يخاف من خسارتها مره ثانيه وگدر يقنع الڪل بــ اسبابه اللي تخليه يستعجل.
منتظرين الرد على نار رعد من توتره كان يطلع للشارع ويرجع وكأنه ينتظر الرد بشخص يوصل لعنده. مو بـ رنة تلفون.
امي وجدتي مابطلن دعاء
ويافرحتنا لما وصل يركض ويلهث وهو يبشرنا بالموافقة. مـختار متصل بي ومبشره.
امي سجدت من الفرح ومو اي فرح هذه فرحة مُــخلد عزيز گلوبنا. وجدتي تحمد الله وتشكره اللي جبر بخاطر غاليها.
لكن عمتي ام طيبة كان تعبيرها عن الفرح بصورة ثانية ورساله لكل حاقد
هلهلت بصوت سمعت الكل.
واكيد اكو من ينغص فرحتنا ع صوت الهلاهل.
جدي و ابو غدير وياه وكأنه ماكو شخص بالعشيرة غيره ويه جدي طلعوا من الديوانيه يستفسرون عن السبب ولما عرف موافقين تعصب وبدا يغلط وگال لو اوادم كان سألوه وين جدك، ،وراضي لو مو راضي عليك.
بس الظاهر هم اتعس منه وبدا ينتقص من مُــخلد واهل مسك.
مستغربين ليش هالحقد وعدم الرضا ع مُــخلد.
معقولة هذا جدنا شنو سبب هالعداء؟؟؟
ورجع يگول هم نفس الطينة ولوما نفس الطينة ومثله مانطوه بنتهم.
هنا جدتي ماسكتت اله وردته :بالضبط هم مثله ووافقوا عليه هو خيرة الشباب وهم ناس والنعم منهم.
بس مادري شنو اگول بحقك،وبقت تحجي على جدي وتدافع لمُــخلد.
ابو غدير متقلب ڪل شوية يحجي حجاية شكل ، مره يگولون طبعا يوافقون علمود امواله وغناه.
ويرجع يگول مُــخلد مايستحي يخطب فوگ خطبة اخوه ليش نسى ابني رايدها واتقدم الها.
وختمها بكلامه اذا ماتندم مخلد ع خطبته هالبنية عاتبوني.
امي طول الوكت ساكتة وماتدخلت لكن الكلمات الاخيرة حستهن تهديد ماسكتت.
وردت ع ابو غدير شنو قصدك بهذا الكلام شنو يتندم؟؟
شتريد منه ناوي تغدره من جديد لو تلفقله تهمة لو شناوي.؟؟
ما ڪفاك غدرك بي اللي الله وعباد الله صارت تعرفه وتعرف سببه.
گالتها بقهر واضح السبب بس تحلمون والله وما تصلون لمڪانة مُـــخــلد لو ترڪضون رڪض الوحوش.
وهو يباوع لجدي ويگول نهانيت ابيتك.
وجدي صار يتهدد لاتصيحين ولاتقللين احترام خطاري ولو هو من اهل البيت بس العتب مو عليج العتب على صاحب بيتج ،
ماأسمحلج تعلين صوتج ابيتي انت تبقين غريبة ذاك دربج ماأسمحلج تردين ع ابن اخوية.
هذا ابن اخوية قبل لا انت تصيرين جنة بهذا البيت.
بنتي شحدها تفتح حلگها ابيت ابوج وانتي شايخة علينا لسانج طويل.
حتى ولدنا غيرتيهم مختار وغفار اخذتيهم بجانبج كرهتيهم بعمامهم وحببتيهم بخوال ولدج.
وكملها يسب بالغريبة واللي ياخذ غريبة
من يوم اخذج سلمان اني مو راضي عليج شتريدين تخلفين النا ومنو خلفتج مهند العاق اللي ترك بنت عمه وركض ورة اللمعة واخذها وسافر.
لو مُــخلد اللي الناس شبعانه بفلوسه وماينطي لأهل بيته.
هنا عمتي ردت جدي هو مُــخلد مقصر ويه منو ويه اب لو اخ لو اخت وحتى زوجات اخوته واولادهم مو مقصر وياهم.
وبنتي مدللها دلال محد ذڪرها غير هو واخوتي سلمان ورائد.
وربك يزيد بخير مُــخلــد لان هو خير ويڪرم وربك يڪرمه ويزيد عليه النعمه.
ڪلش غثته ڪلمتها بخصوص طيبه ويعرف وين قصدها. ا تهجم عليها ويگول انت اخر وحدة تحجي اسكتي احسن. هم شنو شافوا من خيرج وتردين يلتفتون ؏ بنتج.
لا خلفت ؏ مُــخلــد ولا عليج.
ورجع ربط الكلام بكلام ثاني وگال لامي خليها ابالج هذه اخر مرة تتصرفون بكيفكم.
وكمل كلامه يگولها اسمعي وخليها ترجية بأذنج مهند ومُــخلد اخذوا غريبات البنات تحلمون انطيهن للغربة.
ڪلش واضح يلمح لرفضه لخوالي اللي سمع بيهم ناوين يتقدمون الي.
مااعرف بشنو يتناقش وي ابو غدير
وگالها لامي بصريح العباره
عرفتي شنو اقصد بالغربه اهلج واهاليتج كلهم مالهم مرة يمنا.
ابو غدير يذكره بشخص من العشيرة مطلگ مرتين وبحجة اهله مزوجيه صغير وما ڪانن اختياره.
هذا مو اول شخص يجيبه ابو غدير كل يوم جايبله شخص من سمع خوالي يريدون يتقدمون الي وهذا شغله الشاغل.
وامي بڪل مره ترده ماتقبل. وابوي ڪذلك يگول اني ما موافق انطيها.
وهو يكول ليش ماتقبل لعد تگعد وتسكت شتريد؟؟
لكن اللي فاجئني لما يگول تتعنفج ؏ عمامها وعشيرتها.
هي اللي تدرس ابغداد شتترجى منها. حسيت خنجر وضربني بگلبي اذا جدي يگول هالكلام وهو يعرف اني شنو؟
حجابي ملتزمة بيه وحافظة حدودي.
و احسب الف حساب لكل شي.
مخليه ابوية واخواني گدام عيني ماريد بيوم تمسهم حجاية ،
هواي امور تعلمتها من ميس بالجامعة من غير الاشياء تربيت عليهن ، وٵمي علمتني وربتني احسن تربيه.
ابوي غرس ڪل الصفات الحلوه بينا . جدتي ونصايحها وحڪمها.
اخواني من مُــختار لاصغر واحد احسب الهم الف حساب بڪل خطوه اخطيها.
حزت بنفسي هالكلمة حيل هضمتني ، واتذڪر سمعتها سابقا من نرجس اللي اشوفها ابتسمت من سمعتها بعد ما دلغمت وضاجت من سمعت الموافقه ؏ مُــخلد.
تمنيت اخواني موجودين ويردون عليه لان مهما يكون مگدر اتجاوز وارده لا اخلاقي ولا تربيتي تسمحلي مهما يكون ظالم ليش هو شنو شاف عليه ويگول هالكلام.
بس رعد ماسكت ورده.
ما اسمح هيج تگول عليها اختي وانت اعرف شنو تربيتها واخلاقها وسمعتها وڪلها تعرفها تاج ؏ الراس.
الحمد لله والشكر مافد يوم احد جاب سيرتها الا بالخير.
واتعمد يگول ڪم ڪلمه لما شاف فرحة نرجس بتصرف جدي.
عيب هذه الحجاية اذا انت تگول هيج لعد الانسان الحاقد شنو يگول؟؟؟
شنو شفتها تلوف بالبيوت بحجه اني رايحه لبيت عمي.
لو ماخذه راحتها بتصرفاتها بنفس الحجه لو تفتر من بيت لبيت تنقل سوالف وتنافق وتسوي مشاڪل.
اسيل الڪل يحلف باخلاقها وتربيتها وفخر النا درست ابغداد وما مستها ڪلمه مو حلوه وما نذكرت الا بخير.
المتربايه لو تخليها بوسط معسڪر هي متربايه واللي بلا تربيه لو تقفل عليها بمية قفل تڪسره وتسوي الڪوارث.
هنا ابو غدير صاح بيه اشو انتو ماتستحون ياهو الگام وتجاوز وصاح بوجه جدكم.
رعد رده لاوالله احنا اللي نستحي ،
اللي مايستحي اللي يدخل بيتنا ويتدخل بامور عائلتنا ويفرض افكاره واراءه علينا ،،
ولو يلتهي بحياته ومشاڪل بيته يحتاجله سنين ما يفضها.
وصار رعد بكلامه يحسس ابو غدير هو اللي مايستحي.
وصارت مشكله مالها اول ولا اخر ما انحلت الا وگلوبنا خلصانه.
امي تتحسب وتگول هذا طبعهم مثل كل مره يستكثرون علينا الفرحه او الراحه.
لاتهتمن ولاتنقهرن خلونا فرحانيين بـ مُــخلد.
وفعلا بعد مارجعوا لبيت خوالي اتصلنا بيه وفرحته ماتنوصف.
وكلامه عن تفاصيل الگعدة بحيث نسينا جدي وابو غدير وقهرهم وكلامهم اللي غثونا بيه.
فرحة مُــخلد واضحة بصوته وكلماته.
حتى جدتي اللي مامتعودة تسهر، سهرت وتلوم برعد ليش ما اخذها لبغداد تشوفه وتشارك مُــخلد فرحته،
ولما اتصل بيها مُــخلد تگوله تمنيت روحي طير واوصل واشوف فرحتك المنتظرتها من سنين يابعد كل عمري وسنيني انت،
وهو يضحك ويردها لاتهتمين باجر. يجيبوج.
وثاني يوم نفس المحاولات من جدي وابو غدير لتعكير فرحتنا ما اهتمينا ،
وبدينا نحضر نفسنا ننزل لبغداد نكمل فرحتنا بغالينا وحبيبته.
كانت حفله مميزة وكل شي بيها حلو دام الفرحة ماليه وجوههم وگلوبهم.
وبعد مارجعنا لبيت جدي واخوالي انفتح موضوع خطوبتي وهم يذكرون ابوية برغبتهم تحديد موعد خطوبة رسمي.
لهناك وسرحت ابالي وافكاري ابدا ماكان يخطر ابالي تكون قسمتي لبيت خالي ولــ اجود بالتحديد.
رغم عشت بينهم اربع سنوات ولا يوم حسيت اله مشاعر تجاههي ولا بيوم جمعنا موقف.
الاقرب الي كان مؤيد واني عندي علم وين نيته وتفكيره.
كان يساعدني بكل شي وكل احتياجاتي كان بمثابة اخ و اكثر. ڪونه ابن عمتي وابن خالي وهو قريب ڪلش من مهند ومُــخلــد واللي يشوفه يگول اخوهم.
و ريان كانت اختنا الكبيرة و ڪلش قريبه مني وحضن دافي ماحسيت بفراغ او عانيت من بعدي عن اهلي بوجودهم.
خوالي وحنيتهم وزوجاتهم نفس الطبع وحبهن لامي وحنيتهن شي عجيب يوصفنها بــ اجمل وصف.
راح بالي للموقف لما ڪانت ريان تطبع البحث وهو گبالنا اخذ ورقة بيها شڪر وتقدير.
وذكرت بيها كل اللي ساعدوني وساندوني قائمه ڪامله اول اسم مُــخلد ومن بعده ميس ومهند وهيا وريان ومؤيد. وبعض من صديقاتي.
ومن ضمن الاسماء ارشد خال ميس اللي نصحتني اتواصل وي هيا ومن ثم وياه كنت اتصل بيهم من تلفون مُــخلد ويرسلي ڪلشي يخص مشروع البحث ؏ ايميله.
وساعدني وكأني بنته وحالي من حال ميس وهيا بتوجيهاته وتعليماته كان بحثي مميز جدا وهم طلب اناقشه بمؤتمر.
وشجعني هواي حببني بــ اختصاصي اسلوبه عجيب وتواضعه بحث اخر.
اما اجود لما قرا كل الاسامي المذكورة گال ــ
ماشاء الله ذاكرة الكل ــ الامه العربيه ڪلها.
ماعداي اني ما الي شكر ليش ؟؟
مؤيد وگال اترك الاهداء والشكر والتقدير باجر عگبه الشكر كله الك واحنا ڪلنا نسيس بالبحر.
ومن بعدها وصلني طلبه عن طريق امه.
ماكان عندي اي اعتراض كلش تعجبني حياة اخوالي وهدوئها واجود بيه كل المواصفات تتمناها اي بنت.
بس ڪنت متوقعه رٵيي جدي بالموضوع راح يڪون رفض. وادري شنو ڪرهه الهم وخاصه خالي ابو اجود.
لحد الان يذڪرها يگول اشتڪى عليه وسجني عشر ايام.
ومُــخلد يگول لعد اني ليش اموت عليه ابو اجود سبع واخذ حق اخته بنفس اليوم.
واتذڪر فرحتي واني اشوفك تنسحل مثل المجرمين وذيج اللحظات اللي خلتني اتمنى من اڪبر اصير ضابط واسحلك انت وامثالك.
واول شخص صار عنده علم من اهلي هو سندي مُــخلــد.
اللي بنفس اليوم سٵلني عن رٵيي واني ما گدرت انطق حرف.
سهلها عليه بــ اسلوبه ورديت اللي تشوفه صح اني موافقه عليه.
بارڪلي ودعائه يبعث بالنفس راحــــٓــه واطمئنان.
ومن گلت اله تتوقع جدي ـــ قبل لا اڪمل ڪلامي گال لاتفڪرين بــ اي شي غير قناعتج انت و سعادتج .
المن ابوج مخلفنا؟؟
وانت تشيلين هم لهذا الحاقد. اترڪي ڪلشي علينا.
ابتسمت واني ارجع من خيالي للواقع
على صوت تنبيهات وعد لنرجس حتى تهتم ببنتها وتترك التلفون اللي صار بالفترة الاخيرة ماينزل من ايدها ابدا، وبنتها وزوجها اخر اهتماماتها.
واكيد لما رجعنا البصرة وعرف جدي كان اله ردة فعل مثل كل مرة.
ومن عرفوا ابوي وعمي رائد واخواني بڪلمته بحقي ما سڪتوا اله والرد عليه ڪان قوي ڪلش وهو ماعنده جمله غير شيخوها علينا مثل امها شاخت ونفس القوانه ــ ام مهند غربت الولد.
ولاول مره غفار ومختار يثورون ؏ جدي بهاي الصوره ويحتجون ؏ ڪلامه بحق امي.
وهم يگولون ام مهند امنا وڪل ايجايبه بحياتنا هي صاحبه الفضل بيها.
صارت النا ام واڪثر ولاولادنا الام الحنون.
اما مُــختار الحنين گالها ودموعه تتسابق. ڪافي ظلم شوڪت يصحى ضميرك وتحس بظلمك النا ڪلنا.
ما ڪفاك حرمتنا من امنا ويتيمتنا. وخطيتنا وخطيتها برگبتك انت وابن اخوك استنكف اگول عنه عم.
ام مهند ما بيوم حسيت بيها الا ام حنونه وما شفت نفسي الا ابنها البڪر مااسمح تگول عنها غريبه ماغريب الا اللي دمر حياتنا وفرقنا عن احبابنا.
وبعده مُــصر ؏ رايه ويگول لابوي شوف هاي نتيجة تربيتها لولدك يوگفون گبالي ويخشون بعيني.
ويهدد بعدم رضاه ع ابوية اذا وافق ينطيني لخوالي.
ولازم ماننطي للغريب شحصلنا لليوم متندم ع ام مؤيد شلون نطاها الهم، ،وبالمقابل لازم ننطي بناتنا للعشيرة ،
ويذڪره لاتنسى هم من غير طائفه.
هنا ابوية الظاهر وصل حده من الصبر والسكوت.
وگال سالفة الطائفه هاي مو الك لابن اخوك اللي مية مره طرقها ويحجي بحب ال البيت عليهم السلام. وال البيت ابرياء منه ومن امثاله. وهو صلاة ما يصلي.
ترا ابو غياث وآل ابو غياث يحبون آل البيت ومتبعين نهجهم ومقتدين بيهم بــ افعالهم واقوالهم اڪثر منك ومن ابن اخوك.
اللي الحقد والغدر يمشي بدمه.
اللي يدعي حب آل البيت غدر ابني وشهد زور ضده وراد يوصله للاعدام.
وبڪل عين صلفه جبته مستقر ابيتنا ويتدخل بحياتنا.
وڪل ماتملك سلمته بيده حتى يسدد الغرامات اللي يستحقها بالحڪم المؤبد.
المفروض يضوگ لوعة السجن هذا المڪان المناسب اله.
وانت رحت بعت ڪل ماتملك حتى تخلصه من الحڪم.
عشت طول عمري ارضيك واخذ خاطرك وادور رضا رب العالمين ابر الوالدين.
ومثل ما انت الك حقوق عليه عليك واجبات تجاههي.
انت مااديت واجباتك تجاهيي. سويت العڪس دمرت حياتي.
متندم ع فاطمة؟؟؟؟
وهي عايشة مدلله وسعيدة وانت اللي تدور مشاكل وحاولت تخرب بيتها اكثر من مرة.
تذڪر من جبتها من عيالها غصب عنها انت وابن اخوك وتريد تطلكها من زوجها وهي مو راضيه. وجانت حامل بــ ريان.
وعاملتها اتعس معامله ذليتها ومؤيد طفل شديت عداوتك وياه وتسمي بــ اسم مايصح تنطقه ؏ الكافر وهم ابن اخوك اللي علمك اياه.
فاطمه هي الڪل بالكل ومحترميها عيالها وڪلمتها المسموعه بين الجناين ويشوفنها اخت جبيره الهن.
وخابصني بالعشيرة وينه الشاب اللي متقدم لا اسيل وبي حظ.
والله لو متقدم شخص بيه حظ بيدي ازفها اله، ،لكن ان تعيد شغلة انعام ووعد مستحيل اكرر هالخطأ.
وبنتي مو سلعه وابو غدير يدلل بيها ابو مختار عنده بنيه ليش تروح للغريب.
خليني ساڪت عن باقي افعالك يا بويه ترا انت تعديت ڪل الحدود واني ما بقت عندي طاقه تحمل واسڪت ؏ اذيه عيالي وبيتي.
واني نطيت كلمة والناس جايين مشية رسمية وانت براحتك.
اكيد جدي ماعجبه الوضع وبيوم المشية سوا مشڪله. وسمعهم ڪلام وسڪتوا عنه لخاطر ابوي والولد.
وصارت موافقه و عقد بس ما شفته ولا شافني.
وبعد العقد اخذهم شيخ جابر بحجة عازمهم ما راد تصير مشڪله وي جدي.
اللي فرغ قهره وعصبيته بعمتي ام مؤيد وبجاها. يگولها الخطط الج. وهواي ڪلام اذاها بي وماعدها غير تتحسب ؏ اساس المشاڪل وماادري شوڪت نشوف بي يوم اسود.
ولو هو رب العالمين مبتليه بمرض النفاق والفتنه والغدر وماعنده شخصيه ومنبوذ من بقية الاقارب وبيته عباره مشاڪل.
وثاني يوم الفجر نزلوا اخوالي لبغداد. بعد ما اتفقوا وي ابوي والولد ؏ ڪلشي.
هالفترة اكيد الفرحة ماتكمل ولازم اكو منغصات ،بالاضافه لجدي انضمت نرجس.
وزادت مشاكلها وي وعد وزاد اهمالها لبنتها.
وتسمع ڪلام شبيها البصره مو من اعجابهن وتريد توصل للشرط مالت اهل مسك. وخطوبتي لـ اجود.
ولو هي حقدها عم ؏ الڪل واتذڪر العام لما فكرت سحر تكمل دراسة جامعية مسائيه وشجعها مُــخلد وتعهد باقساط الجامعه.
وقدمت ﻉ ڪليه التربيه قسم لغه عربيه ومن مُــخلد نطاها القسط وما رضت لا هي ولا غفار.
وڪان رده هو شنو القسط راتب شهر واحد لو ارباح نص شهر فدوه الڪم تستاهلون ماي عيني.
كشرت انيابها وگالت خل يعتبرني سحر ويتكفلتي اكمل مدرسة لو منبوذه وبعده يدگ اباله الموقف.
وشدعوه هالحقد واني ولا ڪاني بنت عمڪم لا واسيت الغريبه ولا ساويت بنات عمڪم.
امي ردتها انتي ثالث شنو يحتاج قدمي خارجي وكلنا وياج نساعدج باللي تريديه.
وعد ياما توسل بيج تكملين وانت اللي ترفضين ومالج خلگ الدراسة.
و قدمت خارجي ورسبت بكل المواد بالامتحان التمهيدي. وڪل الفتره اللي سبقت الامتحان هي گضتها يم اهلها ؏ اساس تقرا وحتى بنتها مااخذتها.
وهي ڪانت گاضيتها بين اهلها وبيت عمها رغم وعد مانعها منهم ومن عرف عاقبها وهي گالت لجدي ودخلته يدافع عنها.
ويگول لــ وعد هي بقت عليك صير مثل اخوتك گطعي.
وهي ولا اهتمت خلت گورها من گور سحر بس ما گدرت الها.
مره تگول سحر تريد تڪمل ڪليه تغار لان غفار مدرس وماتريد يباوع للمدرسات.
ومره تگول حتى تتهرب من الشغل وذابه ابنها ؏ عمتي تداري الها. ما ڪفاها مداراة عمتي لبناتها.
وجانت مدلله وتدرس اعداديه وعمتي تربي الها.
سحر معدله وما مقصره وي زوجها وبناتها وابنها. والبيت.
وامي جهزت الها اجمل ملابس للجامعه ونرجس تگول تتعمد تطگ بڪعبها عود هي وصلت واني رسبت.
ومونستنا من تجيب درجه عاليه تشبعنا ضحك وتگول لغفار اريد هديه. حتى اذا جڪليته اقبل حسسني بــ انجازي.
لو من عدها امتحان ادب تگول احفظ القصائد براس غفار.
وبالنحو والصرف يحلها رب العالمين.
ونجحت وتقديرها جيد جدا وهذا اللي جنن جنون نرجس.
وتصرفاتها عجيبه غريبه و زادت عن حدها وتفاجٵت لما سمعتها تطلب من رعد يشتريلها ارصدة وتگول اني انطيك بعدين .
والتلفون ماينزل من اذنها ولما نسألها تگول احجي ويه غدير.
ياطلابة غدير هي لو بيها خير تحل مشاكلها وترتب حياتها.
مرات الانسان هو اللي يطغى ويرفس نعمته بيده ،،
رب العالمين اذا نطانا صحه هذه نعمه نشكره عليها.
واذا رزقنا بالذرية او رزقنا بالمال او حتى محبة الناس ورضا اهلنا كل هذه نعم لازم مانتبطر عليها.
واللي يتبطر هذا يا أما جاحد وكافر يا اما مريض نفسي يتمني زوال النعمة اللي عند الناس وينسى اكو رب اكبر من الكل.
ممكن يزيلها منك قبل الناس اللي تتحسدهم وهذا بالضبط حال نرجس.
يوم عينها ع سحر وحياتها وتگول حظها گاعد.ويوم ع مُــخلد ومسك.
وبدل ماتهتم بحياتها صار شغلها الشاغل الابتعاد عن ربها اولا وعائلتها ثانيا.
واتفاجٵنا بيوم امها اجت وگالت الها محتاجه المبلغ اللي هي مقترضته من امها.
واجتني تگول قرضيني وراس الشهر اردهم.
اتوقعت مبلغ بسيط گلت اي عادي وما يحتاج ترديهن مني لــ بنين.
صدمتني من گالت المبلغ. رديتها ماعندي والله هالمبلغ.
ليش تطلبج امج ومال شنو؟؟؟
گالت قديم من جنت مريضه يمهم.
ما اقتنعت لان وعد دفع فلوس علاجها ودزها بيد امي رغم ما ڪان يوصل لبيتهم.
عرفت الموضوع واصل حده والنقاش وي امي احتد.
اشرتلي اروح اسوي الجاي. دخلت المطبخ واجاني رعد عنده ڪلام.
و حسيته متردد.
سٵلته ورد عليه ان هو گال لامي ؏ سالفة الارصده.
ما رضيت عليه وگلت ڪان لخاطر وعد ما گلت لامي.
صدمني من گال صار شهور وصلت لدرجة اتعذر منها واگولها ماعندي. ادفع لابو الاسواق فلوس الارصده.
هو اني مصرفي من مُــخلد والهندسه ومتطلباتها. صرت اقصر ؏ نفسي واسدد الها فشله من ابو الاسواق مسجلتهن بــ اسمي.
وردت عليه بڪل صلافه هاي لو ميس لو سحر ڪان انت الممنون تدفعهن.
شغلتها مو خاليه بس هذا الشهر اني مسدد ميه وخمسين الف.
يگولي شنو تشترون مني ارصده وتربحون عليهن؟؟؟
واني اريد افهم وين توديهن؟؟؟
من سٵلتها تگول الي ولغفران وضيعت السالفه.
انضربت براسي وديت الجاي والنقاش بينهن. وامها تگول وين تنطي وجهه محبوسه بين اربع حيطان وعد منعها تروح لعمامها.
تتصل عليهن مابيها شي هي حنينه احن ڪل اخواتها وتحب عمامها.
وامي مو راضيه ؏ الڪلام ونرجس نڪرت وتگول رعد يڪذب ما دفع هلگد للرصيد.
يجوز اخذ ارصده لصاحباته ويذب بلاه عليه.
ڪلش ضجت من شفتها تتهمها وخلته بموقف صعب وهو يگولها خافي ربج مو هاي اخلاقي.
ما تحملت طلعت من الصاله گعدت اتصل بــ ميس هالايام نزولهم مشتاگه الهم اثناء ڪلامي وياها اسمع صوت وعد توقعت تصير ڪارثه اذا عرف.
ومن نهيت الاتصال ودخلت للصاله ماڪو احد طالعين ورا ام ريسان يوصلوها الباب.
واللي فهمته راهمه الامور وامها گايله ماا اطلبها بس عبالي تدخل بــ اسم جمعيه ويانا.
عاتبت امي ليش ما گالت لــ وعد؟؟
وضجت من تصرفها وي رعد هواي تجاوزت حدودها.
وٵمي گالت ابني ذڪي وما عبرت عليه ڪل السالفه.
متاڪده انطاها الامان واله نيه وهو يعرف شلون يتصرف وياها.
اڪيد يسٵل ابو الاسواق ؏ الرصيد وهي من تروح لاهلها تاخذه ؏ ڪلام رعد.
ما بعيني الا بنيتهم والا نرجس حرام بقائها بهذا البيت.
والقهر بعد ما طلع وعد من البيت تمشڪلت وي رعد تگوله ما تضم سالفه شدعوه.
شفت نفسك زايد لان مُـــخلــد گال الك من تتخرج هديتك سياره من المعرض.
عجيبه والله مثل عمها تربط بڪيفها بس ڪله نابع من الحقد والغيره.
وفعلا ڪلام امي ما مر الا اسبوع وگبت العيطه من غرفتها جنزها تجنز بعدنا ما فاهمين شنو السالفه امها وصلتنا وتتوسل بي وتبوس ايدين لاتوصلها لاخوها وابوها.
ماتفاهم وياها سحلها للباب وگال دقيقه ماتبقى بالبيت.
والكارثه اللي مسويتها الارصده تحولها لوحده ؏ اساس علويه. غدير معرفتها عليها.
تشوف الها ليش ما صار عدها طفل بعد ابنها اللي سقطته.
وهاي تضحك عليها تسحب منها ارصده وتگولها حولي صوره جف ايدج واسمج واسم امج.
لو حولي صورة قدمج. لو سولفيلي عن حياتج.
اخر شي گايله الها زوجج ما يريد طفل منج يريد وحده وياه بالمدرسه شگره وطويله وهي هم تريده ومتفقين ؏ الزواج.
حوليلي ارصده بقيمه مية الف حتى اسويلهم تفرقه وهاي مصدگه تحول ارصده.
وما حرڪت دماغها وفڪرت وعد مدرس بمتوسطه مابيها غير المدرسين.
اباوعله نار ويفح عصبيه يريد يملخها وامها تتوسل وتگول اروحلك فدوه اخر مره اخوها يموتها اذا عرف.
صدمة وعد بالموضوع خلته يطلع كل اللي ضامه بگلبه من عتب ولوم لنفسه ول أم ريسان.
وعد ــ شنو اللي مقصر بيه وياها حتى يجبرها تمشي بهالطريق بدل ما تسأل نفسها.و تسمع كلام الرايح والجاي عن سبب تغييري تجاهها شنو السبب.؟؟
هي السبب الاول والاخير من بداية ارتباطي ببها وصارت عوارض كان المفروض انهي كل شي وانسحب.
وفعلا بعد شغلة سجن مُــخلد وشهادة ابو غدير ياريتنا سمعنا كلام مهند وقطعنا علاقتنا بالعمام من ذاك الوقت ونهينا ڪلشي.
لكن يگولون لاجل عين الف عين تكرم ،وهذا اللي صار موقفكم انت وعمي ابو ريسان وريسان وام عدنان. ،
انعام واطفالها. وام نورس
و ريسان انسان و النعم منه مايستحق ينخذل.
وعودكم الي انها تغيرت وصارت انسانه ثانيه ولبست. وجه الملائكة. ورسمت البرائة ع وجهها. ما طولت هواي بهذا الوجه فتره ورجعت لحقيقتها.
ومع هذا ردت انطيها فرصة تتغير. وگلت لما تكون بين عائلتي واختها گدامها اكيد تاخذ اطباعهم لكن اللي صار العكس كل ما يمر الوقت هي تتعمق بعلاقتها واطباعها ابيت عمامها وتخرب حياتها.
نرجس عايشة بنعمه هواي بنات تحسدها عليها.
هنا قاطعته ام ريسان وكالت وانا اشهد بدلالها وراحتها ومكانها ربي يشهد مامقصرين وياها ودوم اگوللها حافظي ع النعمة اللي انت بيها واحذرها من هدير وميسون اللي يحسدوها ع مكانها وقسمتها.وعشيتها ابينڪم.
وعد ـ عمة ياريت وكفت لحدود معينة ڪان ممكن اسامحها اني اللي خلاني اخذ منها موقف واغير اسلوبي وياها جرأتها ع مُــخلد وتهمتها لبنت محصنه بالباطل.
خلت اخوية واللي هو بمقام ابونا واللي ما يهتم لاڪبر واحد.
اني اخو استحي منه. بتصرف نرجس خلته يضطر يشوفنا تلفونه ومكالماته واوقاتهن حتى يثبت براءة البنيه.
مُــخلد اللي بعمره مافرق بينها وبين باقي افراد عائلتنا مصرفها حالها حال اخواتي شنو ينطيهن وبشنو يذكرهن لنرجس وام ريتاج وام نورس بالمثل.
بس حقدها وغيرتها من الاحسن منها خلاها تسوي تصرفات اتعس بدل ماتعزز ثقتها بنفسها وترجع تكسبني او تحاول تحسن من صورتها المكسورة بعيوني وتهتم بيه وابنتها.
خصوصا بعد ما عاقبها رب العالمين كان الها عقاب عاجل وفقدت الولد اللي كانت تنتظره لحظة لحظة ،،
لا هي زادت وقوت علاقتها ابيت ابو غدير وصارت تنقل تفاصيل حياتنا وهي المدبر الرئيسي ويه ابو غدير لغدر مُــخلد وتقدموا للبنت وهي تدري هو رايدها من زمان.
بس ع الاقل كرم احسن منهم من عرف بالتفاصيل اثبت حسن نيته وموقفه.
اعتذر مرات ومرات من مُــخلــد.
اما هي لا ــ هي زادت وهذه اخرها تتبع طريق الشيطان.
شكد بنات شابات ونسوان متزوجات عدهم عوائل خسروا شرفهم او حياتهم بسبب هالشغلات.
نسوا رب العالمين بدل مايتقربون بصوم وصلاة ودعاء صاروا يمشون خلف خزعبلات الشيطان.
اڪو ناس تتحسر ع الدينار وبالگوة تحصله. واكو وظائف واشغال الانسان يكون بنص الخطر والموت في سبيل يكسب رزق عائلته.
وتجي نرجس وامثالها يملون جيوب الدجالين.
بنتكم بعد مالها مكان لاابيتي ولابحياتي. اخذيها وروحي.
بهالكلمات انهارت ام ريسان وتخربطت وارتفع سكرها وهي ماتستاهل حالها يكسر الخاطر وتتوسل بوعد لان تدري بابوها واخوها لو عرفو يموتوها.
تڪسر الخاطر وهي تبوس ايده وتتوسله.
گالها لخاطر بنتي وخاطر ريسان تبقى هنا بس مالها لاطبة ولاطلعة ولا اتصال بــ ٵحد تگعد وتسكت.
ام لبنتي وبس. مستحيل الها ذرة مكان بحياتي ، واي خطا يبدر منها مكانها الشارع ما ارحمها ابدا،،
عاشت مدلله وحالها من حال الكل ومحد مقصر وياها بس الظاهر الدلال خربها.
اني مو غبي ولا غافل عن تصرفاتها بس ردت اشوف وين توصل وتمنيت تنعدل وتنتبه لحياتنا وتترك الناس بس اللي صار عكس ماتمنيت تعدت ابعد الحدود وتمادت بامور ماكدر اسامحها او انطيها فرص جديدة.
وبعدها تتوسله بس بقيها لخاطري.
گالها تبقى لخاطرج بس ومااعترف بيها زوجه. اخذ التليفون منها ومنعها تطلع لباب البيت وحط عليها ڪومة شروط.
وبنفس اللحظه اخذ ملابسه وحولهن لغرفة رعد وبعد ما دخل لغرفته.
وهي اخذت صمت ايام ورجعت بس هالمره اقوى من سابقاتها.
اقوى اقوى من ڪل سوايه سوتها قبل ــــــ
يتبع ــ
موضوع الخيرة او كشف الطالع وغيرها من المسميات مامدى قناعتكم وارائكم بيها؟ ؟
شنوالاسباب اللي تخلي الانسان يتجه لهذا الطريق؟؟؟
اذا عرفتوا شخص يخصكم متجه لهالطريق تگدرين تنصحيه وتحاولين تخليه يرجع عنه وشنو ممكن يكون الاسلوب الافضل والاصح؟ ؟
برأيكم من المفروض ام مخلد تتدخل او تحاول تنصح نرجس او تنبه وعد لتصرفاتها؟؟؟
لو تصرفها صح من ما اتدخلت؟؟؟
وهل تعتقدون ان هم ايضا سبب بتمرد نرجس؟؟؟
نرجس مجموعة اسباب جعلتها رغم اهلها وعيالها ناس طيبين وهي بالمقابل تحب زوجها. شنو برأيكم السبب الاقوى اللي جعلها تمشي بهالطريق؟؟؟؟
الابتعاد عن رب العالمين.
لو قلة الثقة بنفسها.
لو الحقد والحسد والغيرة تجاه غيرها
او تأثير اسلوب الجد جعلها انسانة منبوذة من قبل عيالها؟؟؟
برأيكم نرجس تستحق فرصة ثانية؟؟؟
وبالنهاية رأيكم شلون نگدر نحمي اولادنا وبناتنا واحبابنا من تصديق الصفحات الداعمة والممولة للدجالين ومنعهم من الوقوع بفخها واكيد كلنا سمعنا وقرينا. مصايب اشكال الوان كانت السبب بتصدع المجتمع بصورة عامة وانهيار عوائل كاملة بسبب هالاعمال؟؟؟؟
محبتڪم ــ
وئام الشيخلي .....💞