مساء الخير ...
#أجرام_مستباح_لثلاث_ندبات
بقلم الكاتبة أيلول
ins: t8_fe3 للتواصل
𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒
- عِيونها مَثل البَصࢪه حَتى بالشِتا تَچوي .
................................................................
جــــمرة ::- دفرته حيل برجله شهك وصك سن على سن غمض عــــــيونة بقوة موجوع يصيح من بين اسنانه
::-لا جــــمرة
سحب نفسه سند ظهرة على تاج الجرباية موجوع واني بــــس اباوع مافاهمه شبيه يأشر على رجله جلبت بزنده خايفة
::- شبيك أبــــــهر ما ضربتك حيل
::-اصاابعي جــــمرة رجلي
- درت عيني الرجله اشوف اصابعه مطبوكات ليجوة كلهن متشنجات ردت انزل من الجرباية وافتر حتى اعصرهن خليت ايدي على بطنة حتى انزل ما ادري فوك العملية صيح ولزم بطنه نزلت محتارة اروح الرجلة لو اشوف بطنه
كعدت بالكاع اعصر اصابعه واعدل بيهن وهو روحه شاطت من الوجع وين يله رخت الاعصاب وبدن يرجعن
درت عيني اباوعله ساند ظهره على تاج الجرباية ورافع راسة ليفوك مغمض مسحت على رجله وحجيت خايفه
::- هــــا أبــــــهر راحت؟
- فتح عيونه يباعلي تشخط بياضهن بشرايين حمر ابتسم هز راسة اي ومد أيــــدة يرفعني من الگاع كعدت بصفه على جرباية رجع سند راسة ويباوعلي
::- شكد حنينه؟
- بلعت ريك اباوع لعيونه الما فارگت محجر عيني اجه ببالي قسام
::- من كضيت قسام شسويتله؟
- راسا تغيرت نظرته ورجعت عكدت حاجبة ابتسم
::- ليش؟
::- هيج احس أريـــــد اعرف
::- المهم مات اعرفي هل شي يكفي
::- شلون مات؟
- رفع أيــــدة سواها مثل السلاح وخله اصبعه براسي يباوع لعيوني
::- هيج
::- ما عذبته؟ مو حركني ليش ما حركته؟
::- هههههه صايرة مجرمة
::- تعلمنا منك
- نزل أيــــدة من راسي الخدي دفعتها اباوعله حيل متغير شكلة ولا مبين هذاك المجرم
::- يله احجي شسويت بيه
::- كتلته بدون تعذيب وراه جهنم حرامات اخفف عذابة بتعذيب الدنيا
::- جهنم وراك هم
- ابتسم رفع شعره من كصته رجعه ليوره ورجع يباوعلي
::- ليش اروح الجهنم شمسوي؟
::- شمسوي؟
- هز راسة اي
::- اذا انتِ تسامحيني مايبقى عندي ذنب عظيم انتِ ذنبي العاشگة
::- ما اسامحك لو بينك وبين الجنة بــــس هل ذنب
- بلع ريك جر نفس بشوغة
::- عيشيني بأمل مسامحتج ميخالف اقبل
- دنكت اهز راسي لا ورجعت اباوعله
::- شلون انسه شكد جنت حقير وياي تتذكر من جنت تكعد على صدري حتى افتح حلكي وتبلعني الحباية تتذكر من تكلي اسطرج وما اخليج تعرفين يمينج من يسارج وسويتها تتذكر من حركت شال امي لان متعلقة بيه تتذكر من شردت منك البيت الحجية ولحكتني عاملتني برعب وبأجرام ومن اتوسل بيك حتى اشوف مصطفى وتكلي من اموت يله تشوفينه بست ايديك وكتلك بــــس المحه حتى لو من بعيد وعاندت وما قبلت الحد ما مات وانا بحسرة شوفتة
- شهكت ابجي كعد على حيلة بــــس يريد يلزمني دفعته ابجي
::- جــــمرة وغلات دره مو عناد جنت خايف عليج خايف اطلعج لان قسام عرف بيج نقطة ضعفي وبس راد ياخذج مني حتى يسيطر عليه ردت الهي بسالفة واخذج دبرتله شغله ومن اخذتج توفى اخوج ردتج تشوفينه وحك عيونج ردت تشوفينه .
- مسحت عيوني ارجف ماكو وجع ينسي رفعتله ايدي اراويه الحرك
::- وهذا الحرك بسببك هم شلون انسه وجعه شلون انسه شوغت روحي من حركني
- جريت التشيرت من صدري ارجف وابجي
::- وهذا لليوم احس بحرورة الزيت تاكل روحي لليوم
- افتريت وانا ابجي نطيته ظهري ورفعت التشيرت نزعته بــــس بقى بأيدي
::- شوف ظهري شوف نتائج الادمان العيشتنياه شلون انسه شلوت اسامح
- شهكت فازة من حسيت شفته على ظهري يبوسه من مكان المكان
::- ابهررر
- لماني بحضنه غمضت عيني متشنجة واحاول افلت روحـــــي منه رفع وجــــهة على كـــــتفي يهمس بخفوت
::- ابوسهن الحد ماينمسح اثرهن من روحــــــج
::- عوفني
::- جــــمرة
- دفعته ابتعدت لبست التشيرت ودرت اباوعله رجع ليوره واني مقابيلة باوع الرجلي ورجع باوع بوجهي
::- حتى رجلج بيها اثر بسببي الومج وادري حقج ما تسامحين.
- حجاها وكعد عدل دنك على رجلي ردت اسحبها بسرعة لزمها
::- لا ابهرر
- دنك شفته يبوسها على طول الحرك روحـــــي ترجف وكلبي نار احس نار تطلع منه
::- ابهرر
- سحبتها منه لميت رجليه امسح بدموعي واباوعله مدنك عينه
::- أبــــــهر لا تلزمني جاي اضوج منك اكثر
::- نطلع؟
- حجه وهو مدنك رفع عينه الي عاكده حاجبي بلع ريك مسح وجــــهة گـــــال
::- أريـــــد اطلع ويا دره بــــس هي تخاف تجين وياها؟
::- ليش تخاف؟
- رجفت شفته ونزل عينه مختنك كوه يحجي
::- ما ادري هسه من عرفت اباذر وغدير راحوا للزيارة كالت خلي نروح يم ام مصطفى احسها تخاف تبقى ويا ولد وحدها حتى لو اخوها
::- لا ما معقول يجوز ضاجت شنو تخاف
::- تخاف جــــمرة اذا منجمعين كلنا تجي بحضني واحسها ما تريد تفاركني اذا بقينا وحدنا احسها تخاف مني وحتى ويا اباذر هيج تتصرف مرات بالليل أريـــــد اكلها تجي تنام يمي أريـــــد اخليها بحضني مثل من جان عمرها خمس سنين الكاها قافله الباب وراساً تصيح منو من اكلها اني تبقى ساكته وما تفتحلي الباب
- بلعت ريك ساكته وهو مختنك وعيونه يلمعن بدموع حيل مقهور
::- احم وين نطلع؟
- ابتسم مسح وجــــهة گـــــال
::- بكيفجن نتمشى وين مايعجبجن
::- خوش كوم اطلع يله خلي اكول الامي
::- تستأذنين؟
- هزيت راسي اي ضحك ووكف فتح الباب وطلع طلعت وراه كعد يمهن امي كاعده يم دره وبأيدها دفتر وقلم سدته من طلعنا التفتت عليه كتلها
::- ماما تعالي اكلج
- وكفت تباوعلي وتباوع الأبـــــهر اجيت يمي تحجي همس
::- هــــا ماما؟
::- راح اروح وياهم يريد يطلع دره
- باوعتلي ساكته
::- هــــا خوش؟؟؟
- هزت راسها موافقة رجعت للغرفة لبست وطلعت وكف هو كالها
::- دره تعالي نطلع انا وانتِ وجمرة
- التفتت عليه ابـــــتسمت وكفت يمها امي تباوعلي بقلق دنكت وطلعنه وراه وكف يم المغسله بلل ايديه ومسح البنطلون رجع غسل ايديه وباوع بالمراية رفع شعره مشطة باصابعة صارت عينه عليه درت وجهي گـــــال
::- يله
- مشينا وراه أجر تكسي تعامل وياه ووكف اشرلنا يله فتح الباب صعدت ودره صعدت بصفي سد الباب وراح گدام ساكتين كلنا شوية وفتنا بازدحام والرجال اليسوق ضاج بقى يحجي على الحكومة والأبـــــهر متجاوب وياه ويكله
::- هو العراق صار كله عصابات
- والرجال يردله اي واللـــه صدكت كاله
::- الحكومة تصيح يا روحـــــي والشعب يطبه مرض شيسوولهم ونوب كل حزب اله عصابه
- واللـــه ردت اكله وعصابتك هم كوه كاضه الساني نزلنا الرجال وراح وكف بيني وبين دره تمشينا ساكتين نباوع للناس تتمشى وناس كاعده على شط واكو يبيعون چرك واكو چاي شارده بافكاري والتفتت من حسيت ايد بأيدي اباوع الدره افترت بجهتي لزمت ايدي وتباوعلي مبتسمه بقيت اباوعلها ساكته اختفت ابتسامتها نحرجت رادت تسحب ايدها لزمتها وابتسمت هم حجيت
::- حلو المكان مو؟
- ضحكت وهزت راسها اي والابهر يمشي بصفنا ساكت افترينا هواي بــــس نباوع الحد ماكعدنا على مصطبات بقينا بس اني وياها وهو راح يشتري اباوع لعيونها وراه ومبتسمه تتأملة
::- دره
- التفتت عليه عيونها تلمع ::- هــــا
::- تحبين اخوانج؟
::- هههه اكثر من روحـــــي تدرين ما صار هواي اعرفهم بــــس مدري شلون دخلو بثنايه گـــــلبي
::- حتى هم حيل يحبونج أبــــــهر جان يبجي عليج وكل تفكيره بيج
- ابـــــتسمت ودنكت تمسح عيونها ورجعت باوعتلي
::- وهسه كل تفكيرة بيج جــــمرة اتمنى ترجعين اله
::- صعب ارجع يمكن اگدر اتقبله صديق قرايب بــــس زوج ما اكدر.
- سكتت من اجه الأبـــــهر اخذنه چرك حار من أيــــدة كعد بصفي مبتسم الدره كالها
::- اكلي يا روحـــــي
- وهي ابـــــتسمت اله واكلت واني لازمه الچركاية بأيدي ساكته عاف البأيده على جهه واخذ البأيدي قسم منها وقربها الحلكي اكلت گـــــلبي يدك حيل من يقسم واكل جزء منها الجزء اليبقى ياكله هو ويرجع يقسم من جديد
الحد ما كملت كلها كتله
::- شبعت
::- شوية بعد
- قسم من مالته اكلتها وهزيت راسي
::- كـــــافي
- مسح حلكي وكعد عدل اكل يباوع للشارع...
غـــــدير ::- كعدنا يم قبرهم لأول مره ما نبجي لأول مره نسولفلهم فرحانين وكأنوا كاعد يشوفونا گـــــال بــــسام
::- عـــــلي مو جنت واعدنا اذا صاروا اطفال تسميهم على اسمنا هههههه باوع هذا التحليل وصيتك حامل باول طفل النا ضناي يتسمى باسمائكم
- حجاها وباوعلي مبتسم وعيونه مدمعه هزيت راسي اي مسحت دموعي
::- گمرة عـــــلي يا روحـــــي لو تــــدرين شكد متمنية وجودج وياي بــــس الحمدلله على كل حال انتِ بمكان احسن واجمل بالف مره من الاني بيه
- اجه بــــسام يمي خلينه مي وبخور وطلعنا الطريقة كله لازم ايدي ومخليها على شفته حيل فرحان بــــس وصلنا كتله كبل اروح اكول العمه
هستونا نزلنا بالباب ونزلت سمر من سيارة زوجها غمتني تضحك وتصيح
::- راسج قاطين شعندج لاحكتني
- تقربت اباوسها اضحك ::- جاية البيت عمتي مو البيت ابوج
- دخلنا ثنينا نضحك وهي تكلي
::- اي عمي هي نــــهله اخذت ابوي ضلت على البيت
- طلعتلنا عــــمة بوجها اليرد الروح سلمنا وفتنا عـــــمو كاعد بالصالة والجهال مفترين عليه وكتبهم كدامه وسمر تعاركه لان مايكوم يسلم عليها يكلها دنكي وهي تكله
::- صوج نــــهله متعبتك بوية صاير ما بيك حيل توكف
- ضحكنا ودرنا على عــــمة ثنينا اني وسمر حجينا بنفس الوقت
::- اني حامل
- درت عيني السمر وهي تباوعلي وعمه بــــس صافنة كالت
سمر ::- دنجبي
غدير::- اني الحامل ترا
::- لا واللـــه اني
::- اني هم واللـــه
نــــهله ::- اللهم صلي على محمد وال محمد
غـــــدير ::- ضحكنا وعمو يصيح
::- توازيتن الا ويا مرتي
- وسمر تدك وتلطم تصيح
::- شلون بيه انا حتى على ابو بريص متنمره خاف يطلع راس ابني مخسف شسوي انفخة بالبم
نــــهله ::- حل حتى مره الثانية من اكلج لا تتنمرين تسمعين مني
::- خيبة سكتي مني نهيله اتبادل وياج اذا ابنج حلو تطينه الي وتاخذين العندي شنو اذا طلع راسة مخسف ما اريده يـــــمة نوب يطلع خشمه نفس خشم ابوي ايععع يبوي صخام اذا زنجوري مثل زوجي ايععع ما اريده ابدله وياج هــــا متفقين؟
نهله ::- شنو اني كايلتلج تنمري على العالم شعليه
- هزت ايدها ولمت رجليها تنود وتصيح
::- شوف حظي يا عالم يا عالم خيبه خاله حتى من اشوف جلب بالشارع اتنمر عليه بزونه اتنمر عليها صخام بوجهي راح ابني. هسه يطلع مخلط لا هو حيوان لا هو بشر ويكلوله هاي نتيجة تنمر امك على ما خلق الله من الله يطيح حظي
غـــــدير ::- متنا ضحك عليها شوية ورجعنا البيتنا.
جــــمرة ::- مليت احس بــــس أريـــــد ارجع لان بــــس ساكتين درت عليه كتله
::- أريـــــد ارجع
- هز راسة ساكت أجر سيارة ورجعنا نزلنا بباب بيتنا عفتهم ودخلت لكيت امي تغسل بالكراج
سلمت عليها وفتت ادريــــــس واكف بالمطبخ من شافني ابتسم همست
::- هلو
::- هلو بيج بابا حبيبتي
- سكتت فتت للغرفة بدلت وكعدت ساكته بــــس صافنة دك تليفوني صوت رسالة سحبتها تمددت وفتحتها كاتب
::- حتى البزونه الاخاف منها الزمها واربيها اذا تردين
-باوعت للرسالة ساكته نزلت البرده طفيت النت وعفته غمضت عيوني هادئة حيل وافكر حسيت امي دخلت يمي غمضت عدل وسويت روحـــــي نايمه جرت الغطا فوكاي حسيت دفو ايدها على خدي شكد حنينة لمسة ايديها
طفت الضوة وطلعت سحبت التليفون شغلت النت اكثر من رسالة فتحتهن
::- تعشيتي جــــمرة؟
::- زين بــــس افتحي الرسالة وميخالف لا تردين
- كتبتله معليك دز
::- تعشيتي؟
::- لا
::- اسويلج عشا؟
::- شنو تغريني؟
::- لا ابد بــــس لان تحبين انا اسويلج اكل هــــا شتكولين؟
- سكتت دك التليفون بأيدي جاوبت الغرفة الاني بيها ظلمة وهو مشتغل ضوة كاعد على جرباية بدون تشيرت ومن كد الدخان صايرة ضبابية
::- وينج خلي اشوف وجهج
::- ما أريـــــد تشوف وجهي ولا وجهك
::- اجيج جــــمرة؟
::- شتسوي؟
::- اوكلج اسبحج انومج بحضني
- بلعت ريك ساكته مغمضة عيني واتذكر كل ليلة نمت بيها يـــــمة حجه بصوت هادئ
::- راح اسويلج اكل وانطيها الج من السياج تمام؟
::- خوش
::- تبقين وياي لو اسد الاتصال؟
::- ابقى
- ثبت التليفون على الميز لبس تشيرت اخذه وطلع للمطبخ قفل الباب وفتح الثلاجة التليفون بأيده باوع للتليفون
::- اشويلج دجاج شيش تحبينه؟
::- ثنين مو واحد جوعانه
- ضحك مكيف وهز راسة اي طلعها خلاها بالمي ومنتظرها تموع رجع للغرفة اخذ شي ورجع للمطبخ ساند.ظهره على كاونتر رغم مايشوفني عينه مافاركت شاشة التليفون شغل جكارة جر منها نفس ونفخة على التليفون
::- صاير تشرب جكاير هواي قبل مره تشرب وشهر لا
- ابتسم هز راسة اي وجر نفس زفرة وحجه ببحه
" هي بــــس الجكارة تصبرني افارگ شفتج"
::- انجب
::- تدللين انجب ميخالف
::- انـــتَ حيل ادبسز
::- شترديني انتِ اصير
- سكتت ماعندي كلام سحب نفس وزفره بهدوء عــــــيونة على الكامره همس
::- اتمنى اخلي جكارة بين بشفتج واسحب دخانها
::- لا تمسلت خوش؟
::- خوش ما امسلت بعد
- سكتت ناكره شعوري كعدت على حيلي اباوعله كصص الدجاجة سوه شياشة ثنين وخلاهن على الطباخ لبست تشيرت طويل وطللعت للكراج. كعدت بالمرجوحة ريحة الشوي صارت ببيتنا
::- طلعتي بالكراج؟
::- اي
- ابتعد بعد ما بين بالتليفون مدري وين راح رفعت راسي فازه على صوته مجلب بالسياج مبتسم
::- جــــمرة
::- انزل هيو
- ضحك ونزل رجع يحاجيني من الاتصال
::- اكو طرشي اخليلج؟
::- لا
::- زلاطه خضرة؟
::- لا ما أريـــــد
::- اسويهن لفة لو اطفر وياهن اوكلج؟
- سكتت شفته خلاهن بصحن وصينية باوعلي گـــــال
::- روحـــــي طفي الكامرات
- عفت التليفون على المرجوحه ورفعت راسي الكامرة بيها ضوة احمر دخلت للبيت طفيتهن وصار بوجهي اسمر طالع من الحمام خفت خاف شافني راساً كتله
::- شعندك كاعد
- أشر على غرفتة وحجه ::- هسه راح انام
- هزيت راسي ساكتة وطلعت لكيت الأبـــــهر كاعد بالمرجوحه هو وصينية الاكل وكفت گدامه رفع راسة يباوعلي
::- غسلتي؟
- هزيت راسي لا وكف سحب ايدي للمغسلة طبكهن بأيده غسلهن ونشفهن بقميصة رجعني من ايدي للمرجوحه كعدت
وكلني ساكت شوية وسأل
::- بعدج ترحين للدكتور؟
::- احس بعد ما احتاج بــــس مرات اروح
::- أريـــــد اخذ دره شتكولين خوش دكتور ؟
::- اي بفضلة كرهتك
- ضحك خله اللفه بحلكي اكلتها وحجيت
::- وروح ويا دره انـــتَ تحتاج دكتور اكثر منها
- باوع بعيني همس
::- اذا اروح ترجعيلي؟
- هزيت راسي لا
::- شنو اسوي وترجعين؟
- سكتت دايره وجهي منه
::- جــــمرة بــــس عيشي وياي مثل قبل من جنا سوا بــــس هيج
- ضحكت ودنكت رجعت باوعتله
::- لو يصبوك ذهب
::- كليلي شسوي حضني بدونج بارد الوب الليــــل كله على ريحتج
::- ابقى هيج تعذب مثل ما اني تعذبت مو كتلك الا اخليك تحبني واكسر كلبك
::- سويتيها وحلفتي تسجنيني وفعلاً خليتي أخـــوي يسجني لوعتي گـــــلبي ضعف لوعاته وما الومج على كل هذا انا ظالمج اكثر وشما تسوين حقج
بــــس باوعي انتِ مو تردين تعذبيني تعالي عيشي وياي ولا تخليني الزمج هيج اتعذب اكثر
::- هههه شنو عبالك اني ينضحك عليه بكلمتين؟
- هز راسة لا مبتسم
::- سنايبر انتِ منو يگدر يغشج
- عفته وكمت للمغسلة غسلت ورجعت نزل الصينية بالگاع وصار بالنهاية كلش دك على رجله
::- تعالي تمددي وخلي راسج هنا
- سكتت كعدت على مرجوحه اباوع للحديقة ساكتة سحب زندي عليه ما اعترضت تمددت راسي على رجلية وهو يحرك المرجوحة بهدوء غمضت عيني خله أيــــدة جوه حنكي حاضن وجهي بيها وايده الثانية بشعري
::- احبج انا جــــمرة
- بلعت ريك ساكته نزل أيــــدة الركبتي يحركها بهدوء يحجي بخفوت
::- اعشگج وحگج وحگ عيونج
- كلبت نفـــــسي خليت وجهي ببطنه مغمضة وساكته خله أيــــدة على ظهري يحركها على كيف مثل الام من تنوم طفلها الحد ما غفيت
حسيت روحـــــي نرفعت جلبت برگبتة مغمضة الحد مانزلني على الجرباية فتحت عيني كوه اباوعله همست
::- روح
-ونكلبت مغمضة حسيته سحبني من ايدي
رجعت فتحت اجر أيدي منه نزع التشيرت وتمدد سحبني عليه
::- روح
::- ما اعوفج
::- اني اعوفك روح
- رجع راسي الصدره
::- اشش نــــــامي لا تفكرين بشي بــــس نــــــامي
- غمضت تـــــعبانة ونعسانه احس أيــــدة متخلله بشعري وبوساته براسي كل شوية يهمس
::- هنا راحتي يمج هنا اعيش بحضنج
- فزيت ما لكيته اتلفتت ادور كعدت عاصره راسي بين ايدية طلعت من الغرفة امي وزوجها كاعدين يتريكون غسلت وكعدت يمهم گـــــال
::- صباح الخير بابا
- باوعتله همست ::- صباح النور
- درت عيني الامي ابـــــتسمت كالت
::- تتريكين؟
- هزيت راسي لا اباوعلها تصبله چاي وتقرب الصمون يـــــمة دغيتها برجلها
::- ماما وكليني
- قسمت صمونه وكلتني رفعت عيني اباوعله مادري شنو جانت غايتي مجرد تصرف سويته وبنفس الحظة تندمت من شفته مبتسم وگام لمطبخ جاب كوب الي حسيت بندم. تريك وطلع بقيت ويا امي افتر وراها اشوفها دايخة وكل شوية تلزم بالحايط
::- ليش ما تكعدين
::- هسه اكعد بــــس اكمل شغلي
::- كليلي اني اسوي اكعدي
- ضحكت طفت الطباخ واجت يمي كالت
::- كومي ادرسي ليش ماتدرسين وين جمره الجانت شاطره رغم تعبها ليش هسه ماعدها شي ورغم هذا ترسب
-دنكت ساكته بقيت يمها شوية ودخلت ادرس طلعت وه فترة لكيت يمها دفتر تخطط دوائر بالسرا وتكتب بيهن ارقام من شافتني عافت القلم وابتسمتلي تقربت يمها
::- شجاي تسوين
::- هاي الج وهاي الدره
- اخذت الورقة منها ما فاهمه رجعت باوعتلها
::- شنو هاي
::- قضاء صلاة
- شمرتها بحضنها ما قبلت
::- من اكبر اقضي
::- هسه شعندج جــــمرة؟ منو ضامن عمره الباجر؟
- دنكت ساكتة كالت
::- ما اجبرج انا ادليج على الطريق الصح وانتِ بكيفج تردين.تمشين بيه تردين لا مــــحد يتحاسب مكان احد بــــس من خوفي عليج
::- خوش كليلي شسوي
::- راح ادكلج هاي الورقة بالغرفة كل ما تصلين صلاة صلي قضاء وياها واشخطي على رقم وانا احسبلج متفقين
::- شلون يعني
::- يعني مثلاً ويا صلاة الظهر الواجبة من تصلين وتكملين صلي من جديد قضاء ما في الذمة وانا كاتبتلج الصلاة والارقام كل صلاة تصلينها اشخطي على رقم مثلاً صليتي صلاة الصبح مرتين قضاء تجين الحقل صلاة الصبح تشخطين على رقم واحد ورقم ثنين وهيج كل ما تصلين تشخطين على رقم
::- خوش وزين شنو دره انتِ كتيلها
- ابـــــتسمت هزت راسها اي
::- كتلها تقضين الفاتج كيفت كالت اي بــــس علميني علمتها وخططتلها هاي الورقة وجاي اعلمها على الاحرف بــــس تضبطهن شوية اعلمها على القرآن
::- لعد الأبـــــهر لو يخلص عمره يصلي مايقضي الثور عمره كله ما مصلي
::- لا حول ولا قوة الا بالله راح تتحاسبين بمكانه شعليج منه؟
::- لا بــــس اكلج هو ثور مايصلي
::- جــــمرة عيب عليج
::- شكتلج هسه اني واذا كلت ثور قابل غلطت
- فكت عينها كعدت عدل ودرت وجهي ساكته شوية وكالت
::- ترجعين اله ؟لو تنفصلين؟ ما أريـــــد تبقين هيج مايمشي عندي هل وضع جــــمرة يا تكولين ما اريده ومن باجر يطلكج وما اخليه يلمح حتى طيفج يا تكولين زوجي واريده وترجعيله سوالف لقائات وتالي الليــــل ويبات بغرفتج هل حجي يمي ما يمشي
::- ما اريده
::- تطلكين؟
- جريت نفس گـــــلبي يوجعني هزيت راسي اي
جرت تليفونها من يمها اتصلت على غـــــدير فاتحه الصوت وتباوعلي احس روحـــــي تنطحن بين نارين وثنينهن صعبات بــــس جاوبتها غـــــدير كالتها
::- الأبـــــهر يمج؟
::- لا راح للشغل
::- وديلي رقمه
- حجتها وسدت الاتصال شوية ودك تليفونها رسالة مسحت وجهي ايدي رجعت ترجف حيل اتصلت ويا صوت الدكه گـــــلبي يدك اجه صوته بلهفة
::- جــــمرة؟
::- لا اني ام مصطفى شلونك عــــمة؟
::- اهلا وسهلا عــــمة شلونج شخبارج
::- الله يخليك ويحفظك.
جــــمرة ::- تحجي وتباوع بوجهي دنكت روحـــــي ترجف كالتله
::- شوكت عندك فراغ
::- تفضلي عــــمة محتاجة شي كولي؟
::- لا بــــس يا ريت باجر تجيب سيد وتطلكون ما راهمه باقية معلكه
جــــمرة ::- رفعت عيني ساكته وهو صوته اختفة وامي تباوعلي فترة سمعت طكة الجداحة يـــــمة وخنكة صوته بينت هو جاي يشرب جكاير كالها
::- عــــمة اريدها اموت بدونها
::- ما معترضة يـــــوم انا ما أظلم بختي ولا اوكف بطريقها بــــس ما تريدك وهم ما أريـــــد اضيع بنتي من جديد.
::- ادري حقج بــــس كليلي شسوي تذبحوني اذا تبعدونها عني حاجيها انتِ كليلها شنو التريده الشروط التخليهن انفذهن لو بيهن تاخذ روحـــــي
بــــس لا تخلينها تعوفني وليرحم والديج. حاجيها
جــــمرة ::- دنكت اكل بشفتي احس عيوني نار تطلع منهن وامي بــــس تتحسر كالتله
::- حجيت ووضحت شسوي اجبرها؟
::- زين اطلب منج اسبوع اسبوع واحد اخذها منج وره هل اسبوع ارجعها الج اذا بقت بنفس قرارها يصير التريده
::- وين تاخذها؟
::- بمكان هي تحبه
::- يعني؟
::- مزرعة بالحله لا تخافين قابل راح اخطفها باوعي اخواني يمكم وين اروح كلشي عرفتوا عني بــــس أريـــــد ارجعها الي ووعد اذا وره
هل اسبوع بقت بنفس القرار اطلكها وابتعد وبعد ما اضغط عليها بشي
جــــمرة::- باوعت الامي شفتها ساكته مقتنعه صيحت
::- ما اروح وياك الباب الشارع طلكني حتى صديق بعد ما اريدك
::- جــــمرة
::- ما اريدك أبــــــهر ما اريدك
::- عــــمة شكلتي
نــــهله ::- سكتت محتارة هي راسها والف سيف وتصيح عليه ما اريدك وهو عايفها ومركز وياي ما مهتم الكلامها كتله
::- الله كريم
- سديت الخط منه وهي كعدت على جهه تغلط عليه وتمسح بدموعها نوب شوية باوعتلي وصاحت
::- ابو النوادي
- عفتها كمت للمطبخ صيحت بصوت عالي تسمعني
::- ابو النسوان
::- من يطلكج يتزوج ومن تصير عنده مره تضبه مايباوع الغيرها
- دارت عليه خازرتني درت وجهي صاحت
::- اي عود خلي يتزوج هي منو تقبل بيه راسة هيج صاير وكصته جنها مستطيل وحواجبة مغطيات عيونه
::- شبيه مرتب عين الله عليه ويحفظة من كل شر
- وكفت تريد تجي يمي اعصاب وترجف عفتها وشردت يم الجهال نطيتهم فواكة ورجعتلها بــــس لمحتني رجعت تغلط عليه بعد ما حاجيتها بنتي فيوزاتها طابكات.
غـــــدير ::- بــــسام حجز عند دكتور تجميل يعالج الحرك البرجل دره والبحنكها والابهر اخذلها موعد عند دكتور نفـــــسي حاطينها بروحهم اذا كعدنا ناكل ما تلحك تمد ايدها للصينية ثنينهم يوكلونها واني وياهم وهي الهل يـــــوم تخجل
نبهتني عــــمة على القراية كمت اكعد يمها اعلمها وعمه هم تعلمها وبسرعة تفهم حيل حبابة وهادئة
والابهر ورده فقير ومؤدب بشكل
الساعة 3 يجي بــــسام من دوامة والابهر بـ 7
واكفين اني وياها بالمطبخ نسوي كيكة وندك هورن بـ الباب هي ركضت للشاشة شافتة بــــسام اجت تركض للباب صاحت
::- اباذر
- فتحتله الباب دخل السيارة وهي سدت الباب واجت وراه نزل سحب ايديها ثنينهن باس باطنهن وخلاهن على وجهه منا ومنا
اباذر ::- شلونج عمري
- ابـــــتسمت تسحب ايديها مني رجعت بستهن حضنت كتفها ودخلنا
غـــــدير ::- وكفت مبتسمه عاف دره واجه حضني يضحك ودره طابكه ايديها تباوع بخجل كالها
::- نطلع حبيبتي؟
- هزت راسها لا وباوعتلي
::- غدوره عدها وجع ما يصير تفتر هواي من تصير زينه نطلع
غـــــدير ::- هي تحجي وانا ودي اكلها كزكزت عليها تنكرط وبسام شالها من خصرها يفرها ويضحك وهي مجلبة بيه بخوف نزلها حضنها يبوس بوجها ويعصرها بحضنه حيل.
للسبعة اني واكفة بالمطبخ اسوي عشا بــــسام نايم وهي كالت راح اغسل ملابــــس بــــس سمعت الباب ندك اجت تركض تمسح ايديها وتصيح
::- اجه الأبـــــهر
- ركض فتحتله الباب بــــس سد الباب هم سحب ايديها مو مثل بــــسام يبوس بــــس باطنهن الأبـــــهر يبوسهن وجه وكفة وحتى اصابعها يبوسهن واني عيوني بــــس يردلهن حجه حتى يدمعن بيهن دموع زايده
دخل للمطبخ حاضن كتفها بأيدها علاكة وهو بأيده علاكتين گـــــال
::- شلونها ام بيتنا
- ضحكت ::- الحمدلله انـــتَ شلونك
- رفع علاكه الي اخذتها منه وبقت بأيده وحـــدة گـــــال
::- ميت من الجوع
::- دقايق ويكمل
::- اباذر اجه؟
::- اي بالغرفة نايم
- هز راسة خوش سحب أيــــدة من كتف دره كالها
::- نسويله ازعاج نكعده؟
::- هههه اي
غـــــدير ::- طفيت الطاوات ورحت وراهم اكيف على هيج سوالف وكفنا اني ودره بالباب والابهر دخل سحب الغطا على كيف تمدد وياه وهو نايم جفي على وجــــهة خله أيــــدة بشعره يحركها ضحكت بــــسام تحرك. يون وابهر كوه لازم ضحكته ما اسمع بــــسام شيحجي والابهر مات من الضحك فز بــــسام يباوعله ويفرك بعيونة دار وجــــهة باوعلنا بالباب
سحل الأبـــــهر للجرباية يتعاركون بضحك كاله
::- كوم غسل يله نريد نتعشى
غـــــدير ::- رجعت للمطبخ كملت العشا وكعدنا.
جــــمرة ::- ثاني يـــــوم داومت مالي خلك روحـــــي ولا اركز بمحاضرة ولا اكو امتحان ناجحة بيه ولا مصادقة احد مدري شسوي اروح واجي
كعدت بالكافتريا صافنة وحسيت احد يمي رفعت
راسي شفتة اباذر وجــــهة مقهور وكفت خايفة
::- شكو
::- الأبـــــهر نسجن
- فكيت عيني على وسعها ما مصدكة گـــــال
::- بــــس تجين تشهدين ويطلع لان اكو احد گـــــال هو خاطفج
- جريت كتبي ارجف واحجي بخوف
::- منو گـــــال وين هو هسه
- مشه كدامي حيل مقهور مدنك وبس يدخن طلعنا من الكلية صعدت ويا بالسيارة خايفة وكلبي يرجف طلع من الازدحام وكف بركن نزل من السيارة وانا اباوعله. ساكته راساً صعد الأبـــــهر باوعت بعينه هادئة وكلبي يدك بقوة حرك السيارة وانا عيني عليه
::- شسويت
- دار عينه الي ورجع باوع للطريق همس
::- خطفتج
- درت عيني للباب بسرعة فتحته والسيارة تمشي لزمة سداه ووكف السيارة جر ايديه طابكهن وانا احجي من بين اسناني
::- والقرآن الكريم اسبك مسبه مــــحد سامع بيها وخرررر عني
- ما اهتم مبتسم جريت ايديه حيل اصيح من شداهن بــــس ردت افلتهن تخبلت ضباهن حيل
يتبــــــع⋆𓍯
الكاتبة أيـــــــلول⋆𓄼𓂁
ليش البارت قصير؟ لان عندي تخرج وجاي احضرله ما الحك اكتب 🤭💚