"وأد القلوب "
بقلمي: وردة خُزام
في الليلة التي أخبرتني فيها أنك تحبني ، نمت فوق السطح فلم تسع غرف البيت أجنحتي ..!
★★★★★★★★★★
بــــــــارت 2️⃣8️⃣
طلعت من الغرفة دااقفلها وفجأة تخلت ايد على حلگي وجرتني للغرفه سحل، مااشوفه منو لان اجاني من وره ضليت ارافس برجليه واحاول اوخر ايده من حلگي ،همس بأذني
- اهددي اني همام بس احجي وياج
رخت اعصابي، جريت نفس براحه، هو وخر ايده عني بسرعه ابتعدت عنه نترت بي ..
- شبيييك همام!!!! وگفت گلبي تريد تحجي تعال مثل البشررر شنو اله داعي هالاكشن مالتك؟
- شبييييك صافن بوجهي شكوووو؟ شنو گدامك كائن غررريب ترا لعبتها لررروحي
قاطعني بنتره: ييييي تختلفييين، لج انت مثل الملاك الي نزل من السما على گلبي، اني من يوم الي شفتج وبالي وعقلي مو ويااااي، نازز انطيني فرصة اعوضج وتعوضيني، وداعت شريفه بنت الحسن اعشق التراب الي تمشين عليها
من لحظة الي عيني شافت طولج واني عقلي وگلبي تعلگ ابغداد ..
گمت اسوي درب بغداد عبالك وره البيت يوميه اني رايح في سبيل المح شكلج لو اشوفج ولو خطف، لحدما شلتوو وهنا
گام يقبض ايده ويضرب بالهوى .. وهنا اني اتبهذلت احوالي ضاعت اخباارج عبالك فص ملح وذاب!
تقرب لزم ايدي بثنين اديه بحنيه ويباوعلي عيونه مدمعه وتتوسلني: خلي نصير اصدقاء اول؟ تتعرفين عليه تعرفيني ومعتب اذا ماتعلگ گلبج بهمام
ضليت ساكته ومااعرف اوصف شعوري خجل ع فرح ع خوف، تجربتي السابقه تخليني اخاف واحسب الف حساب يلا انطي گلبي
بقيت مدنگة وساكته دنگ راسه الي بحيث عطرة ترسني عطررة قووي لدرجه احس اصبت بدوخه مد ايده اخذ خصله من شعري وخلاهه وره اذني ..
يحجي همس: شلعبتي بحالي تربعتي بگلبي ترربع! .. من ذيج اللحظة وضحكتج تارسه اذني، ذبيتج ع بيتكم واني مسطور احس اجيت البغداد همام وطلعت همام ثاني..
سكت يتنفس سريع باوع بعيني ورجع كمل :اخ يهالعيوون الرصاصيات استقرن بجذوع گلبي هيج دگن بالجذذع
- كيكاتي؟ دنطقي عاد حتى لو بحرف شنو اتخورستي بوويه
اني يا انطق حرف جسمي كله تبند وگلبي يرركض، رفعت عيني اله وحجيت بثقه عكس وضعي:
- ماافيدك اني
- لييش
- اذا تتقرب مني تتعب اني بنية منحوسه، عاجبك تجيب النحس لحياتك؟
رجع يحجي همس عبالك يعرف بيه هنا افقد التوازن على جسمي:
- اني قابل بهالنحس ينوور حياتي
حجاهه مبتسم ووخر بعيد .. مد ايده بجيب بنطرونه طلع علبه دنك يفتح بيها
طلعها كلاده زنجيل وبنصها حرف M
- راح انزل كدامج اذا نزلتي ولابستها معناهه انتي وافقتي بوجودي بحياتج
خله العلبه بأيدي وطلع وسد الباب وراه ..
گعدت ع الجربايه اجر نفس بقوة، وبداخلي شعووور حلوو وفرح لمجرد وجود انسان يحبني ومنتظرني كل هالسنين .. بس هالشعور سرعان مايتبدل للخوف من اذكر ماضيي
وگفت گبال المرايا والعلبة بأيدي اباوعلها واني مبتسمه ايدي بدون تفكير انمدت واخذتها لبستها واني اتلمس الحرف والابتسامه على شفافي، عگدت حاجبي بسؤال والظاهر الفرحه او الخوف طغه عليه وهسه يلا اجه ابالي؟
ليش حرف الM ؟!!
واني بهوسة افكاري دك التليفون بأيدي همام.
بس فتحت خط كال: يلا نزلي
- اا هما..
قاطعني: اششش ماريد اسمع شي اريدج تنزلين واخذ جوابي
سديته اتصلت نغم انطيتها رفض واخذت جنطتي ونزلت جوة ..
دامشي واحس بتوتر وارباك كأنه داانطي موافقة زواجي مو فقط صداقة ..
بس شافني بسرعه اجت عينه على ركبتي شاف الگلادة اتسعت ابتسامته ورفع راسه ليفوك بأمتنان
اجتني نغم تمشي سريع والقلق بوجها:
- يما شبيج يولي وجهج اصفر!
جاوبتها مفهية: ها
- وضعج حيل معاجبني يوجعج شي؟ شو اوضاعج مخربطة
- ها لا مبيه عمري
شلت راسي باتجاهه الابتسامه شاگه حلكة شك لاارادي ابتسمت على ابتسامته ونسيت حتى سؤالي ..
رحنه يمهم هو وحسام واكفين واحد بصف الخ .. گلت :
-صباح الخير
ردوا اثنينهم: صباح النور
حسام : ضل بالنه عليج شبيج ناز؟ تعبانه تردين ارجعج بغداد
- لا مبيه شي
حسام: مقصرتي والله تعبناج ويانه هواايه
- لا شدعوة تعبكم راحه .. وبعدين هي اختي قابل غريبه مابيناتنا هالسوالف
ضحك حسام: فلك فلكچ ولا جنج هالطولج حجيج مال عجايز مدبرات عمرهن ب 60، 70
- هههههههههه
اني اضحك وهو يباوعلي من فوك ليجوه ويبتسم على ضحكتي
- حسام يمعود شنو مناوي نتحرك منا؟! ترا ميتة جووع اني
-يلا رايحين
رجع التفت لهمام: خويه همام احنه تعبناك ويانه اخذ راحتك واحنه نتريك ونطلع للمستشفى ..
همام: لا ابو شهد انتم تشلعون عيوني
يحجيها ويباوعلي بنظرة سريعه ويرجع يكمل حجيه وي حسام ..
همام: اني هم مامتريك اليوم ريوگكم على حسابي اني عازمكم
بعد جدال بينه وبين حسام وواحد يتشكر من الخ طلعنه كلنا بسيارته حسام ليكدام واني ونغم ليورا ..
بس حرك السيارة شغل اغنية شمسين ووجه المرايا گبالي فيييت.
شغل الاغنية بعلو صوتها ومن يشوف حسام ممنتبه يغمزلي لو يضل يضحك .. مشغلها ومندمج يغني وي الاغنية انتبهله حسام ضحك وگاله:
- ها ابو الشباب جنك واگع على وجهك
ضحك هو بعلو صوته وكلنا ضحكنا على ضحكته بس الظاهر اني نسيت روحي، تدنت يمي نغم همستلي:
- لا عبالكم انتو الاثنين اني غبية ترا مركزة وادري خوش؟
حجتها وتبتسملي بمكر
- يما منج بعدنا بسم الله قبل دقايق يلا صار شي
-ايي خاف عبالج تضمين عليه
-اطمئني مااضم عليج
ضحكنا ثنينا وهو بسرعه رفع راسه بالمرايا ويباوعلي بنظره عود شكو؟
نغم بسرعه ادنت همستلي:
- دباعي نظراته خطيه راح يموت من الفضول هههههههههه
دنسولف واجتني رساله منه: ها كيكايتي السالفه بيها ابو الهمم مو؟
دزيتله ايموجي ضحك
ردلي: جعل محد غيرج يضحك
نزلنا للمطعم گال هو هذا المطعم الكباب مالته رهيييب اني مجربه .. لسه اذكر المطعم جان اسمه مطعم ثابت.
نزلنا الاكل واني حتى الاكل ماعرفت شنو طعمه من گدما ما هو مركز بيه انوب حتى همام احسه انتبه
كتبتله: فدوة همام لتباوعلي حتى حسام انتبه عليك!
ردلي: انعل والديه
ضحكت ع سوالفه، ورجعت اكل ..
كملنا ورحنه للمستشفى وهم تحاليل وفحوصات لحدما طاح حظنه من التعب ل 8 بالليل واحنه ع جرة وحدة حتى غده ماتغدينا ..
هو انتبهلي حيل تعبت انتهيت كمت رجليه مااكدر اوكف عليهن
گال لحسام: روحوا ارتاحو وباجر نكمل ان شاء الله
طلعنا تعشينا ع السريع ورجعنا للفندق، بس اريد اوصل غرفتي واذب نفسي من التعب.
داافتح بغرفتي شو الممر كله طافيه اضويته!
فتحت غرفتي هم ظلمة ،شغلت لايت تليفوني ودست الدگمة لو تصنمت بمكاني من منظر الغرقةة!!!
عبارة عن ورد احمر ونفاخ وتزيين الغرفة طالعة تجننن وع الجرباية كيكة من هاي الحجم الجبير
ضليت فاتحه حلگي، من صدوك الغرفه تصفن وكلشي بيها يجذب العين، حسيت نفسي عبالك بحلم. طبيت وسديت الباب وراي، نزعت جنطتي شمرتها، باوعت اكو ورقه يم الكيكه رحتلها بلهفة فتحتها مكتوب بيها:
( من ترجعين اتصلي عليه ... همام)
گعدت ع الجربايه مااكذب كلشي بالغرفة عجبني واصلا اتحدى بنية تشوف هيج غرفة ومتعجبها .. بس احس اكو شي غلط! اكو شي ديمشي بسرعه!
ضلت الافكار تاكل براسي كلبي طاير من الفرح عاجبه كلشي جديد دخل عليه .. انسان يحبه هالگد
اهتمام زايد
حب بدون انتظار مقابل
بس عقلي ممتقبل اكو خوف بداخلي، يمكن سببه الخيبة الي عشتها مسبقا؟
يمكن لسه مجروحه وممستعده ابدي حياة جديده؟
واني بهالدوامه الي سطرت راسي ومنا جايه ميتةة تعب .. اتصل هو
-الوو
- شنو لسه مارجعتي؟
- رجعت
-لعد ليش مااتصلتي؟
- ممكن تجي للغرفة نحجي
-دقايق واني يمج
اجوبتي جانت كلها باهته وياه، صدك دقايق واندكت الباب
گمت فتحتله بس دخل نترت بي:
- برأيك شنوو داعي هالحركات كلهااا؟!!!
جاوبني مستغرب: ليش ماعجبتج المفاجأة؟
-عوفج من عجبتني .. انت شتريد مني بالضبط!
- اريدج مرتي وام بيتي
-هه وانت شعرفت عني حتى تتزوجني؟ باع احاجيك انت ليكون شفت لبسي والسبورتيه مالتي عبالك من ذني الدايحات! .. لااا غلطان ترا لا اللبس يرمز الهالشي ولا الاحتشام
- لا نازز انتي شجاي تحجين؟الظاهر فهمتيني غلط اني اريدج الج لذاتج لا يهمني ماضيج ولا يهمني لبسج وركزي على كلمة ماضيج!
انا اعرف كلشي عنج ك ل ش ي ومتقبلج مثل ما انتي، مااريد منج غير گلبج يكون ملكي
- مو بهالسهولة، اعذرني اگولكياهه بس اني مصارلي نص شهر اعرفك شلحكت حتى احبك اني يادوب هسه اتقبلك ك صديق ومو مقرب هم صديق عادي
- زين ليش هالحجي متگولي بوجهي ليش عيونج متحطيها بعيوني وتحجييين!
اني جنت افتر بالغرفه الملم واحجي وياه رغم الغرفه مرتبة مابيها حته بس الهي نفسي ..
- لحظة اني غلطت وياج بشي؟ اعتذر اذا غلطت بشي بس ..
- لا حشاك بس أفهمني اني داگولك الخلل بيه اني
- ليش شبيج شو جنج كيكة
استغفرت بداخلي اني وين وهو وين ..
- اني طبعي صعب مراجيه بأي لحظة اختلف عليك واگلك اطلع من حياتي، اني انسانه لسه اثار الماضي تلاحگني مااكدر اورط انسان ثاني وياي
تقرب وهو يكولي: لا نازز انتي مو هيج ولا هاي شخصيتج .. الي بي انتي اليوم هو نتيجة ضروفج والي مريتي بي، صدگيني من ترتاح نفسيتج ترجع طبيعتج
- اي بس اني نفسيتي محترتاح
- ترتاح وياي
رحت گعدت ع الجربايه، اجه كمبص جوه رجليه ..
- نازز اسمعيني خلي احجي .. ناز الي مريتي بي هواي وصعب على اي انسان يتحمله ف كيف اذا جانت طفلة مثلج! .. اصلا زين منج لسه بعقلج، من تعذيب مرت اخوج الج لحرك رفل الي جنتي تعتبريها روحج الثانية لزواجج بالاجبار والي مجرد مابديتي تتأقلمين تفوجئتي بكمية المشاكل من عيالج وزوجج واتبعها طلاقج وهذا جان القاضية عليج!
كل هالامور والمشاكل بقيتي تكتميها بداخلج شي على شي ،شي على شي الا ان انفجرتي وتسبب عندج انهيار عصبي، تعرفين ليش هيج صار وياج؟
هزيت راسي ب معنى ليش واني مركزة وياه
-الانهيار صار وياج لان كبتي بداخلج محاولتي تحجين الاحد حتى يخفف عنج محاولتي تصرخين بصوت عالي الا ان تطلع كل السلبيه الي بداخلج .. بقيتي تكتمين بداخلج وبالتالي تأذت نفسيتج بالزايد.
هالشي اگدر اشبهه الج مثل الزجاجه هي الها فد مقياس محدد بحيث لو زاد عن حده تفيض ويطلع هالشي للخارج .. ف مثلا ف النفرض الزجاجه سعتها لتر واحد وانتي جبتي لتر ونص بقيتي تديرين بيها تديرين الا ان انترست والزايد فاض .. الي صار وياج مثل هالزجاجه تماما!
كل انسان بينه عنده قدرة تحمل بحيث لو زادت الامور عن حدها ينهار .. زين معقوله ربج يريد هالضرر لأنسان؟
معقوله هو يقبل بأنه ننهار وتنهدم حياتنه؟
طبعا لا ... وبالدليل هو يگول "لا يكلف الله نفسا الا وسعها "
يعني هو من المستحيل يحملنا فوك طاقتنا وخله گدامنا الحلول بس احنه من ننصاب بمشكله او مرض ننسى هالشي ..
ف انتي لو بوقتها جنتي تفضفضين وتحجين الاحد مجان وصلت حالتج للي هي عليه اليوم؟ مزاجيتج ونفسيتج التعبانه ماهي الا نتيجة كبت للماضي واثاره ..
زين اسألج سؤال: ماگدرتي تحجين لشخص .. صعب عليج تفضفضين لان ادري مو بسهوله واحد يحجي الي يحس بي لآخرين ..
اكو شي اسمه دكتور نفسي ليش مااهلج عرضوج عليه؟
مثل ماكل مرض احنه نتعرضله نروح لطبيب مختص بهالمرض .. ف الدكتور النفسي هم انوضع لهيج حالات.
- رحت
بعد ما جان كاعد جوة رجليه ويحجي بكل رزانه وعلم ووياهه حنيه جانت طاغية على كلامه .. رفع نفسه الي لزم ايديه ثنينهن بأيد ويسأل ولمعه بعيونه:
- رحتي دكتور نفسي؟ باعيلي هنا لتديرين عينج احجيلي شو
- اي من تأزمت حالتي كُلش عرضوني اهلي على دكتور نفسي، وبقيت اتعالج عنده فتره بس ابد ماشفت تحسن بحالتي ف تركته
- اي خوب غيروا ليش تركتي فدمرة؟
- مادري
وخرت ايدي منه وبقيت العب بأضافيري وهو احسه عيونه الحنينة تتأملني
شگد اگول على احمد حنين بس همام مااعرف احس حنيته اقراهه من عيونه
بقينا ع هالوضع وهو ساكت بس يتأملني، حجيت:
- همام انت دتخوفني منك
بس حجيت هيج كام على حيله ودنك عليه گرص خدودي
- لج تخافين مني؟ تخافين من البشر الي يجي من النجف لبغداد بس علمود يشوفج من بعيد، وهم لو يشوفج لو حظه يبنچر
انتي ملاكي اني من شفتج بس حسيت بطعم الحياة وعرفت عندي گلب
نازز لا تصيرين وياهم عليه خليني ارتاح، اني وياج عرفت الراحه لا تحرميني منها
ضل جسمي يرجف من قربه عليه ودگات گلبي اسمعها على گدما قويه، احس كل كلمة حجاهه نبتت بگلبي نبت، بقيت مفهيه بوجهه ماحجيت شي
دنك لأذني همس: ها ملاكي موافقه؟
روحي ماعت بحركته هاي تيهت اعلومي، رجعت همستله
-موافقه
رفع راسه مبتسم رجع دنك باسني براسي
- احبج يراحته لهمام من بعد تعب سنين
وخرت عنه وحجيت: همام
-عيووونه التشلعيهن
- اطلع
صفن بوجهي وطگها بضحكه: ها يعني هاي طردة عينك عينك
-ضحكت: اي طردة لان وجودك هنا غلط
-لا مو غلط امشينا نطلع انتي بعد 3 ايام ترجعين خلي اروي عيني منج
- ياا همام كل عقلك وين نروح بهالليل
- عندج ثقة بيه؟
- ابتسمت ورديت بثقة: اي
- خلاص لعد
اخذ ايدي بأيده يريد يطلع ..كتله
- تعال خل نگصص الكيكه الي مالها مناسبه اصلا ههههه
گصصنا الكيكه وكلني منها .. تذكرت حرف ال M.
- صدُك همام ليش حرف ال M ؟
- جرر حسره وگال: بكل بساطة لأن انتي ملاكي الي الله دزلياه من بعد تعب
بتسمت وسكتت .. رجعت سألته:
- ليش حبيتني؟
- ضحك والله هذا السؤال تسألي لهذا الاستاذ
يأشر على گلبه ويضحك
- لا عليك الله جاوبني ليش اني يعني بنات النجف كلهنن ماوگفن بعينك واجيت لبغداد وحبيت؟
- هي مو بنات النجف ما وگفن بعيني بس الگلب وما يهوى، والظاهر گلبي ذواق خوش يختار ويصيد صيدات
يحجي ويغمز ... كمل:
- غير هذا كله لگيت بيج برائه طفلة، شكد الدنيا طيحت حظج بس بقت برائتج وروحج النظيفة
اني مخلصتها بس اوزع ابتسامات ماعرف ارد عليه
طلعنا بالسيارة شغل متخيلة بسهولة انساج نور الزين
يسوق ويباوعلي عطت بي: انتبه للطريق لتسويلنا حادث
ضحك وركز بالطريق .. اخدني ع الشط بكوفي گال: شتشربين؟
- كلشي مااريد بس ارگيله
فك عيونه بوجهي متفاجئ: صدددك؟
- لعد شنو اشاقة وياك
- هاي اول مرة لو شنو؟
جريت تليفوني شوفته فيديوات الي اني وخواني ندخن اركيله ومصوريهن
محجه شي بس حسيته ضاج او مادري هيج فسرتها .. نزلنا اراكيل وكعدنا ندخن اني وياه .. وهو بس اباوعله الكي صافن بيه بتعجب ومن يشوفني يبتسم ..
اني الاركيله صح ادخنها بس بسرعه ادوخ منها. شوي وگمنا بس صعدنا بالسيارة ذبيت نفسي ونمت مادري بالدنيا بعد ..
گعدت لگيت نفسي على نومتي بالسيارة والجو كاشف، وهو يباوعلي ومبتسم
تمغطت وكتله: ليش مگعدتني
- غير شكلج يخبل وانتي نايمه شبيه مخبل افوت هيج منضر عليه!
ضحكت وفتحت الباب :يلا تصبح على خير
ضحك: يا تصبح على خير كولي صباح الخير .. انتي الخير كله
صعدت الغرفتي كبل نمت ....
گعدت على صوت الباب والساعه ب 3 العصر
رحت ركض فتحت الباب همام
- يمعوده ضل بالي عليج كله هذا نووم؟
دخل للغرفه واني رحت غسلت وجهي ورجعت يمه:
- شعجب اجيت
- شكلتي عيدي؟
-ها
- عيدي الي گلتي
- خفت .. كلت شعجب اجيت
- اااخ اني .... استغفر الله وهي تگولي شعجب اجيت!!
ضل يمي بالغرفه وموبايله ماسكت احترك حرك.
هو خطيه ذب نفسه ع الجربايه وجرها نوم يمكن من عفته الصبح لسه مانايم ..
اني اخذت موبايلي وكعدت ع صفحه اكلب بالمواقع وراسلت شهد حجيت وياهه شوي .. نغم راسلتها رايحين الصبح وراجعين ماعدهم شي ..
ساعتين يمكن وگعد شعره مخربط، حجه بصوت مبحوح من النوم:
- شسالفه شارده عني مترر لا تخافين مااغتصبج
- شهگت من حجايته عطت بي: يا ادبزز (هاي مثل متكتبها ناز بالحرف هههههه متگول ادبسزز لاا تگول ادبززز)
هو حجاهه بشقه واني هم شو هذا مااحس الا عيوونه مگلوبات حمرر وگمز عليه يصررخ:
- ولج شكلتي هذا منو الادبسزز؟ !!
- اني بگت طن هوى بس مابينت: انت الادبزز
نزل على حنجي عضني بكل قووته گمت اكمز من الوجع شاغت روحي
هو تبدلت ملامحه كام يضحك ويرفع حاجبه بشيطنه ويگولي:
ليش متسكتين ترا نحول ع الكرز؟
صررخت بي بحركه: دنجب
مدري شبيه تخبلت ع الغلط ومنا هو وجعني حيل گام يمشي عليه واني ارجع ليورا لحدما وصلت للكوميدي بسرعه جريت المسدس وحطيته براسه
- بيك خير تقربلي!
هو تخبل صدك صار عصبي: ولج وتالي شلوووون بلسااانج ترا گوة لازم روحي عنج نازززز!
ايدي متاخذ عليج لا تستغلين هالنقطة وانتي شنو عبالج تخوفيني بمسدسج؟
جرني من زندي حيل
- والخلقج هسه وبهالحظة اگدر ... لج بابا اني احبج مااكدر اذيج لتطلعيني من طوررري لسانج لزززمي.
عافني وراح ع المرايا فلشها بأيده كامت تكت دم، اني خنست صدك تجاوزت بالحجي متعوده على اخواني والساني ماخذ وهو استفزني .. ضليت خانسه
لشوي كتله بخوف: همام ايدك
نتر بيه: طبني مرررض اني كلشي ولا تطولين السانج ناززز
سكتت رحت جبتله منشفه بللتها ونضف ايده يُشتغل وهو مثكل وجهه، بس فد حلوو شكله من يمثل الزعل گزگزت عليه. كمل اخذتهن للحمام ورجعت گعدت يمه وهو داير وجهه مني زعلان عشتوو
- همام
- نترر بيه مو عيونه التشلعيهن
خربت ضحك هاي هو من اصيحه يرد عليه تشلعين عيوني لو عيونه التشلعيهن ... ف هو عود زعلان وديجاوبني هيج
اريد اسكت من نوبه الضحك ماكو وهو كل مااتصد عيني عليه اباوعله كاتم ضحكته لو يضحك من جوه ليجوا .. اخر شي مااتحمل انفجر بالضحك على روحه ..
المهم اعتذرت منه ووعدته متنعاد بعد وتصافينا ..
گمت لملمت الغرفه صارت هوسه ردنا نطلع اتصل مهيمن.
رحت بزاويه الغرفة وجاوبته لان هو يفتح كام
بس فتحت خط صررخ بيه:
- ها نووويزة الدايحة ام الشوارع گ * بر *ب ك
يبووو تخزيت وتعزيت كام وجهي ينطي الوان كدام همام يبووو يبووو عزا بعينك ابو وجه الفاهي
همام اباوعله خربان من الضحك ع الجرباية
صحت بي: خاب كوون ووجعه شتريد!
- مشتاقلج
- واااضح الاشتياق عليك حتى راح يطلع من الشاشة
- المهم هسه اني خابرتج اريد اراويج شغلة بس اوعديني تهدين اني اعوضج وداعتج .
- گلبي لعب من حجايته .. كتله اوك
دار الكاميرا على غرفتي وبالتحديد المرايا لا تخبببببلت!
مكياجي كله مكسررر ومنثور بالغرفة
شهگت والنار صعدت براسي ودي اطلعله من الشاشه واسحله من كفشته:
- لا يا عااار يا ادبززز هاي شمسوي ولك ابوو وجه الفااااهي ابو الوصخ ارجع لو لا؟ والنبي الا اكلك بسنوني لك مهيمن ليييييش
- وووجععع مو اني والله! ... لگينه البزونه بغرفتج ولاعبه جوله مامخليه شي صاحي بحبايب گلبج
اني نسيت همام هنا نزلت بالغلط والفشاير ويبوو ذاك الحجي الي ما ينلبس عليه ثوب من حرگه گلبي، لحدما جزع مني وهو يقنع ويهدي اخر شي سده بوجهي
كعدت بالكاع فتحت رجليه وگمت ادك عليهن والطم واصيح مكيااااجي لك مهيمن ريتك ميت ولا مكياجي يتكسرر، الكفشه صارت هالكبرها حتى شعري عفشته ..
ماانتبهت على روحي غير على صوت ضحكه همام وهو مگابلني وواكع بالگاع من الضحك
عاد اني الله وجابه الي اذب ضيم گلبي بي:
- عليييييييمن تضحك ااانت عليييييمن لك مكيااجي كله ماركه من لبنان وايران تدري لو لاااااا
تضحك عليييمن فهمنيييي
تقرب گومني گوة لازم ضحكته ويمثل عود ضايج مثلي:
مسح دموعي: اهددي هاهيه مصار شي فدوة الج المكياج اني اجيبلج الاحسن منه وعيونج الحلوات
تعاي شو يلا غسليلي وجهج الحلو حتى نطلع نفتر شوي
طبيت غسلت وجهي وبدلت ملابسي وطلعنا ..
فترينا هواي بشوارع النجف وراهه اخذني لكوزمتك كل شغلاتهم ماركات .. اشتريت تعويض عن مكياجي الي راح عساهه بحضج وابختج البزونه. وراهه اخذني لمجمع اشتريتله اني من فلوسي اكثر من قطعه ملابس وساعه وعطر هديه مني يصيرن سوه بوكس واحد ...
كملنا وصعدنا بالسيارة اتصلت نغم
وينج
كتلها يم صديقتي
گالت: امممم ديربالج لعد
رحنا تعشينا وبقينا نسولف ع الطاوله وبنفس المطعم اكو ارگيلات نزل هو ويدخن اني مادخنت لان توني ماكله تضل تلعب نفسي ..
خابرتني شهد،
- الوو
- شلونج ناز
- هلا بحبيبتي
- وينج اليوم شعجب ماخابرتي؟
كتلها: طالعه
عدلت شعري ماعرف شلون اجت ايدي ع السبيكر انفتح.. حجت هي
- ويامن بس لا وي هذا الازرك؟
ضحكت بفشله وهو ضحك واشرلي اشش
كتلها: ييي
- ولج انت ماتوبين اني شوصيتج؟ مو گتلج ديربالج منه
- شلون يعني ادير بالي
- عاطت بحرگه: امداااني ولج بله خدرج اخذج اغتصبج
هنا همام خرب من الضحك وهي خطيه مستمرة متدري اني داكه الناقصه بيها.
ضحكت
كالت: جديات نازز ترا مداشاقه اني هذا الازرك ولا ارتاحيتله
جاوبهه هو من يمه: اطمئني خالتج بالحفظ والصون
هي بس سمعت صوته رأسا سدته
متنا ضحك عليها، واني دااضحك شفته صافن بيه ارتبكت وخجلت دنكت
گال: نازز
رفعت راسي: ها
-اوعديني متعوفيني
- ليش اعوفك
- مو السبب بس اوعديني مهما صار بيناتنا من مشاكل متعوفيني
- ابتسمت .. وعد مااعوفك
اخذ ايدي باسها، كتله: باجر بالليل احنه نرجع
تنهدد جر حسره: ادري
- اا بس يعني راح اشتاقلك
- ضحك .. مااخليج تحسين انتي بمحافظة واني بمحافظة كل يومين اني يمج هاي اذا مو يوميه
- ضحكت .. همام عادي اليوم تاخذني الرفل؟
- كلش عادي
ل 1 طلعنا گال يلا اخذج لرفل
تمشينا للسيارة وصلنه فتحلي باب السيارة
- يلا اصعدي يا اميرتي
ابتسمت: شكرا يا اميري
ضحكنا گال مو جنه عشنا الدور كلش؟
- ييي ههههههههههههههه
صعدنا السيارة گبل شغل شمسين ومبتسم ويدندن وياهه
- متفهمني شنو قصتك وي هاي الاغنية؟ماصعدنا سياره اذا ماشغلتها
ابتسم ودار وجهه ليكدام واصابيعه تتحرك ع الستيرن بشكل نقرات
- بيوم الي صعدتوا بسيارتي من جان الجلب يركض وراكم؟
- ضحكت اي
- بوقتها يمكن انتي مامنتبهه بس جنت مشغلها اني .. ومن يومها هالاغنية صارت تذكرني بيج خاصه هالمقطع (اذا طلعت شمس فوت انت للبيت .. لأن شمسين معناهه اختركنااا)
هالمقطع بالضبط جان مشتغل من شفتج، ومن يومها صدك صرتي مثل الشمس الي نورت حياتي رغم عدم وجودج وياي ..
يحجي واني مبتسمه، كتله: همام؟
- اتحبني؟
- جرر نفس حييل: لج انتي هذا النفس الي اشهگة وداعت شريفه بنت الحسن
احبج بربوگتي
- اوووي همام شنو بربوگتي
- ضحك شعليه اخوج هو يسميج بربوك
- اخوي سخيف
ضحك .. گال: اگول نازز؟
- امم
- باجر عرس صديقي وعازمني والقاعه مختلط تروحين وياي؟
- وبصفتي شنو اروح وياك
- بصفتج مرتي
ابتسمت واحس فرحه لمجرد هالمفرده تنسبني اله .. كتله: مادري اشوف
- دحجي ولج شتشوفين هي خيره خوما خيره!
- ابتسمت بدلع: اي اروح
ابستملي بأمتنان وجر ايدي باسهه
وصلنا للمقبره غسلت القبر وشغلتها شموع وقريت قرآن، احجي وياهه بداخلي وغصه بكلبي هالمرة مابجيت اكتفيت بالحجي وياهه. گتلها: رفل حبيت !،يمكن الدنيا اخيرا راح تبتسملي، رفل لو تشوفي شلون يعاملني ويتوددلي باعي هيانه اجه وياي، رفوله ادعيلي تستقر حياتي انتي اكثر وحده تدري شكد عانيت ادعيلي ارتاح.
دنك رفعني ابتسم وگال: وهاي گدام رفل اوعدج اصونج واكون الج سند لآخر نفس بيه
- حجيت مدمعه: ومتخوني همام؟
- ناقص من الزلم اذا سويتها
-ومتهملني؟
- اووف ولج قابل توصيني بيج؟ انتي بت گلبي گبل لا تصيرين حبيبتي
ابتسمتله وشديت على ايده والفرحه تارسه كلبي وروحي لأول مرة اجي لرفل واني مامكسوره لاول مرة اجيها واني الفرحه تارسه روحي ..
رجعنا للفندق واحنه ثنينا الابتسامه مفارگت مبسمنا، تمددت بفراشي وغمضت عيني واني كلي راحه، بس من الفرحه الي بيه احس ميجيني نوم
تگلبت منا رجعت منا منمت .. بهالاثناء دك عليه
- الوو
- اوووويلي الله شوف الصوت يشرررريفة
نعسانه يبعدهم كلهم
-ضحكت منو همه
- اهلي وعشيرتي وناسي واخواني بس الحنينه لا خط احمرر عذرينا
- هههههههههه منو امك؟
- اي هاي عزيزة روحي
ضل يسولف لشوي شافني طفيت كلشش گال: يلا ملاكي روحي نامي فصلتي من الرئيسي
- اوك باي
- اووكفي
- ها!
- همام يحبج
-اممم
ضحك وسده واني شمرت التليفون بصفي ونمت بكل ررراحه ...
الصبح كعدت على نغم حطتني ودك استجواب مكافحه الارهاب مو مثلها خلتني كتيت الاول والتالي يلا فكت ياخه مني ..
نغم: ديلا رجعي نامي احنه راح نروح للمستشفى نسوي فحص نهائي يچيكون وضعي ونرجع حتى من الفجر نطلع لبغداد بأذن الله ..
راحت هي واني احس اختنكت لمجرد ذكرت طاري الرجعه، داارجع انام وتذكرت العرس الي عزمني عليه، عزااا! ماعندي شي البسه شلوون؟
انوب نغم طلعت يربي
كمت على ملابسي طشرتها كلها بالگاع ماكو شي ينلبس مال حفلة، حيل احتاريت وصلت بيه گعدت ابجي شكله هسه فشلة واني منا وعدته اروح وياه.
لگيت ماكو غير اتصل على نغم .. اتصلت عليها وسولفتلها وهي خلصتها عليه بس اممم و امممم تالي طگت روحي عطت بيها وقفلت التليفون.
بقيت بمكاني مبوزة لحدما غفيت على الملابس الي طشرتها ..
كمت على صوت الباب، من اجيت للنجف لليوم صاير الباب المنبه مالتي مااصحى الا على صوت التركع مالته ..
فتحت الباب همام بس شافني عقج وجهه بعدها لانت للحنية:
- ها شبيها اميرتي عيونها حمر؟
- حجيت مبرطمه :ادخل
عفت الباب ودخلت كدامه واني دامشي لزم ايدي حطها على شفايفه باسها:
-شبيج يروحي
- دنگت ابجي متفشله منه
- افااا شبيها ملاكي تبجي منو مزعلها
- ماروح للعرس
- همم ليش؟
- ماعدي ملابس
اخذ ايدي جرني للحمام وگفني ع المغسلة
- غسلي وجهج بين مااجي ثواني
عافني وراح، غسلت وجهي وطلعت،دنكت الملم بالملابس شكد عيب طب بهاي الهووسه،
دا الملم ودخل بيده علاگه كال:
- عوفي من ايدج وتعاي يمي
راح كعد ع الجربايه رحت يمه حجه:
- ادري ماعدج ملابس هاج هاي جبتلج فستان قيسي على گدج؟
- گمزت عليه: اوووي فدوة العمرك
- تشلعين عيوني
طلع ،فتحت العلاكة فستان اسود طويل وردان من يم البطن مخصر فد شي!
يجنن يجنن، باوعت للعلاكة اكو بيها بعد شي، مديت ايدي كارتون حذاء احمر
لبست الفستان اجه عليه فيت ولبست وياه الحذاء يمي مكياج هم خليت .. باوعت النفسي بالمرايا طلعت وحده ثانية .. تقربت بست روحي بالمرايا يمااا فديتني
كملت وفتحت الباب اتبسمر بمكانه وبس عيونه تاكلني وتكص بيه من فوك ليجوا .. تقرب يمي حيل يحجي وعيونه مسبله:
- كل عقلج اخليج تطلعين من باب الغرفة وانتي هيج؟
- راحت ابتسامتي: شقصدك
- هاهيه بطلنا منروح
عطت بعلوو صوتي: شنوووووو لاااا عفيةةةة هماااام
راح كعد ع الجربايه ويحجي بكل راحه وبرود:
- اششش صوتج كلت منروح يعني منروح حتى اني هم بطلت
- تحجييي صددووك انتتتت لعد ليش خليتني بدلت وفرررحت
- لج بوويه مخبل اني اطلعج هيج والعالم تباوع لطولج؟ اني اريد كلشي بيج بس عيني تشوفه
تعاي تعاي كعدي مقابيلي خلي اشبع عيوني بهالطلة التسحر
مديت البوز شبرر وضليت متخوصره وواكفه فوك راسه وانافخ وهو قفل اصلا راح تمدد يعلن عن نهاية الكلام ...
بقيت مبوزه عليه لشوي هو طلع، باوعت لنفسي ليش اخلي هالكشخة كلهاا تروح حرامات؟
نزعت الحذاء وشديت خصري شغلت ساجدة خاله ويا خالة
وكمت اركص لحدما تعبت ووكعت بالكاع مهدوده ..
للعصر رجعت نغم وجايبتلي وياهه غده كعدت اتغده ونسولف، تحجيلي على فحوصاتها الي طالعة سليمه 100%، وادويه كاتبيلها .. انوب سولفتلي من خابرتها اثاري همام يمها وسامع كلامي وياهه ..عن طريقها عارف اني ماعندي ملابس للحفله ..
كملت غدة ودخلت سبحت وحضرت جناطي لان بالفجر نرجع .. گعدت اباوع بالتليفون اجه همام ومحمل علاليك اكل وحلويات
فتحتله الباب حجه:
- تستقبليني اني وعلاليگي؟
- ضحكت: علاليگك اي بس انت لاا
- ضحك گال: ها خفت الطناگير
ضحكت وطبينا گعد بالكاع وطشر الحلويات وصفط الاكل يمهن ومشتري شموع انوب كام شغل اغنيه واجواء
ابتسمت على سوالفه هو يحضر ويرتب واني واگفه اباوعله
كمل وراح شغل اغنية ع بالي حبيبي
اجه تقرب مني لزمني من خصري: ملاكي؟
- عيونها
- ابتسم تعاي ناكل ميت جوع
گعدت بعيد عنه مد ايده سحبني: اگعدي بصفي لتفارگيني ابدد
باوعت بعيونه كتله: عيونك بيهن لغز
- شلون
- اني اقرة العيون ترا بس عيونك احس بيهن لغز مااكدر افك شيفرتهن
صفن بوجهي ساكت
- الصفنه مو الك يحلو
- ها لعد المن؟
- جفصتها بكل ثقة: للمطي
عض شفته حييل ويصبر على روحه: شلون بييج انتي؟ وتالي وي لسانج الي يدربي كل سالفه والاكبر منها
ضحكت ضحكه شلون ضحكت المصريات ..كال:
- دخيلج يا شريفه حتى ضحكتها مشبوهه
گعد ياكل ويسويلي لفات وياه لو اني اسويله لفه واوكله وهو طايرر بيه، حتى اني عشت وياه ايام من اجمل ايام عمري، دلال واهتمام وحب لدرجه طمعت بالقرب منه وصرت ماريد ارجع لبغداد ..
شخصيته ماكدرت ادرسها عدل بس حسيتها متناقضه وكل شوي بمزاج بس يمي يكون مرح واهم شي صبور على خبالاتي وجفصاتي ..
گعدنه نلعب محيبس والي يخسر ياكل راشدي
خسر هو صلخته براشدي خليته صافن على قوة الراشدي
واني هم صفنت هاي الايد الزغيرونه معقوله تطلع منها كل هالقووة! ،گمت اطكطك گلت اجاني الموت
الي يحير انوب ماينطي ردة فعل لا هو الي مرزلني ولا هو الي معبرها بس صافن بوجهي
عيشني بعذاب واني اشوف وجهه انكلب كلت راح احصلي كتله اخر شي ماتحملت بجيت
لف ايده حاوطني گال: والله عرفتج راح تبجين
- ليش ماانطيت ردة فعل خليتني حتى النفس گوة اخذه
- ضحك عرفت نقطة ضعفج بعد
- اي عفيةة اذبحني ولا هيج تسوي
- يلا كافي ولج خل انكمل لعب
ضلينا مندمجين ضحك وسوالف ولعب لحد الساعة 1
حجه هو: نازز رايد اطلب طلب ولاترديني بداعتي
- شنو
- اريد ابات يمج
- سكتت ممقتنعه
- محتاجلج والله، بس هالمرة خليني انام مرتاح
باوعت بعيونه تتوسلني كتله: اوك
تقربت يمه: تعال
اشرتله على رجلي اجه حط راسه، بقيت العب بشعره وهو مغمض عيونه وساكت، نزلت ايدي اتلمس رموشه الثخان، مررت اصبعي خفيف على خشمه وصلت لشواربه قريب شفايفه همس وهو مغمض:
- لهنا وبس ترا يصير حجي اني مامسؤول عنه!
ضحكت ورجعت لشعره
- ابيع عمري لهالضحكه
بقيت العب بشعره لحدما حسيته غفه، ماهانلي اوخر راسه ويفز بقه على رجلي وامسد على شعره، سويت تليفوني صامت خاف نغم تتصل ويفز
ضليت ل 3 على هالحالة، اتصلت نغم رديت بصوت ناصي
-الوو
- ها عمري گاعده
-اي
- يلا تعاي نتريك ونطلع ..
- تريگوا انتو ماريد اني .. هسه اجيب غراضي،وانزل
على كيف شلت راسه خليته ع المخده، تجرأت ودنكت بسته بخده وبراسه وهمست بأذنه
- انت اجمل شي صار بكل حياتي
كمت دورت بغراضي لگيت ورقه مال تحليل لنغم كصيت الجزء الي مابيه كتابه واخذت قلم ايلاينر وكتبتله
(مهان عليه اگعدك شفتك تعبان بس حابة اگولك هاي اجمل ليلة بحياتي وانت احلى شي صار بعمري لليوم .. احبك )
عفتها يم راسه واخذت جنطتي وطلعت ...
اباوعله لابس قاط طالع يجننن، واني جنت لابسه فستان احمرر فوك الركبه، واگفة يمه ونرگص سوه مااحس الا شهد گرصتني وهمست:
- شوفي منو وراج يمعزايه
التفت واشوف همام قطرة دم مابقت بيه عيونه حمررر والشر يتطاير من عيونه،گمت ارجف عزا لا يفضحنا گدام العالم ماعنده مانع يسويها والنبي!!
لشوي وصلتني رساله منه :عقابج هالمرة غيررر
يتبع ...
البارت صار حيل طويل 5000 كلمة ف تعبت من الكتابه ونشرته بدون تدقيق ف انتو غلسوا اذا اكو سحك 🔥🤍
++ ملاك مالها احداث بهذا البارت حتى تتساوه الاحداث ف ان شاء الله ع البارت اليجي تكون موجوده ..