في ضريح العشق حمامه ......
وئام الشيخلي .......
مساء السعاده ؏ عيون الغوالي.
ـــــــــــــــــــــــــــ
شلونڪم حبايب ـــــ
عندي عتب وزعلانه عليڪم.
تفاعلڪم مايسوي اي واهس للڪتابه.
رغم دوامي والمسؤليات والتعب واڪتب اللآف من الڪلمات وانتو تستحيفون ڪم ڪلمه تعليق. ڪلامي للبعض.
وشڪرا للمتفاعلين بڪل بارت وڪلامهم عباره عن طاقه ايجابيه.
ـــ
مشهد ــ
شنو ذنبنا احنا الثلاثه؟؟؟؟
آاااااه لو تدري گلبي احتله شخص من سنين زرع بذره وهالبذره انسقت بــ اهتمامه ورعايته الي واخذ حيز ڪبير بحياتي واني سقيتها من دمي وهالبذره ازهرت بحبنا الروحي. وهو اول دگة الگلب وهو نبضة الحب.
ما اتحملت صعدت لغرفتي وفتحت المذڪرات وصوره.
ولاول مره اسويها بوست صوره بلهفه وبــﭼـــيت عليهن وانادي وڪٵن گبالي.
ــــــــــــــــ
أشياء كثيرة ليست بأيدينا ٱنما هي أقدارنا ..
حب يسيطر على قلوبنا فيتغير ترتيب أفكارنا.
وشخص نشتاق إليه ولكن كُتب على القلب فراقه ..
وشخص يتركنا ويرحل فتغيب من بعده شمسنا وتذبل في الحياة أزهارنا ..
وآخر يتلهف لرؤيتنا ويشتاق إلينا ولكنه بعيد عن قلوبنا ويصعب عليه تقبل أعذارنا .....
حقا إنها أشياء كثيرة ليست بأيدينا ... إنها أقدار مكتوبة ..
حقا إنه القدر..........
ـــــــــــــــــ
اسيل ــــ
شفت الموت بعيني لمجرد انقهرت عليّ وحسيت بااحساسه ياترى هو صاحب المصيبه شنو حاله.
ساعدتني ٵمي انهض مابيه حيل بالگوه مفتحه عيوني واسٵلهم هو شنو حاله. ؟؟؟؟
طلعنه من ردهه النساء وهو وابوي ومختار بالممر بعده تعبان اتقربت منه بوسته وتحمدت اله بالسلامه.
وعمي رائد يلطف الجو يگول اجينا بواحد وصرنا بــ اثنين.
وطلعتنا اسيل ما متعشيه وتريد مغذي.
واسال عنه شنو گال الدڪتور عن حالته.
يگولون مابي شي.
انهيار عصبي وهبوط ضغط وهبوط سڪر. ــ هذا المابي شي! !!!!
شلون هبوط ضغط وليش خشمه نزف؟؟؟
وصلنا البيت و جدتي اباب الحوش مفرفحه.
تگول منذوره لطولك اني يا وليد گلبي ومن عمري ؏ عمرك.
وهو يبوس ايديها ويگولها اسم الله ؏ عمرج. ويطمنها مابي شي.
دخلنا البيت ورغم تعبان گال تحضري هم ياله نرجع لبغداد باجر عندي دوام.
واهلي مو راضين يگولون تعبان وشلون تروح.
عمي واخواني اتفقوا واحد منهم يسوق بدل عنه يوصلنه لبغداد.
سٵلني ؏ تلفونه گلت بغرفتك.
وهديل گالت هواي رن بس الغرفه مقفوله.
وهنا اتذڪرت الورقه الڪانت بيدي. وسالت امي گالت عرفتها اله من الدم البيها.
نطتها الي وصعدت خليتها وي اوراقه.
ونزلت تلفونه وهو بيدي احمد اتصل. باستعجال نطيته لمخلد ومن ڪمل اتصال.
همس الي بتعب ــ اسوله الصور رجعيهن بمڪانهن.
وڪلشي يخصها انتِ تعرفين مڪانه. ولو تعبانه بس اصعدي بوحدج. وها لاتنسين. اڪو صوره الها نفس الصوره اللي جانت بالمداليه خليها وي اغراضي ـ
سٵلته تندمت ڪسرتها.؟؟؟
گال اي اڪيد.
وعدتها تبقى برگبتي للموت وتندفن وياي وخلفت بوعدي الها.
بينما هي لحد الان لابسه الخارطه والاسوار.
اسيل ــ اسم الله عليك الموت لعدوك.
صعدت لغرفته رجعت البومات الصور بالقاصه وقفلتها يمڪن عنده هاي الصور اغلى مايملك.
ماعدا صورتها اللي طلبها تجنن اڪيد راح يسوي ميداليه ثانيه ويلبسها.
جذب انتباهي خاتم يجنن والشذره مالته بيها لمعه عجيبه لونها سمائي فاتح.
معقوله هذا فضه. ؟؟؟!!!
بس لما شفت العلبه وجمالها. وڪارت يشبه الهويه. مڪتوب علي معلومات وصوره الخاتم.
وعنوان صياغه ومجوهرات بــ اربيل.
والمعلومات ـ
هنا اتاڪدت ٵن الخاتم ذهب ابيض ايطالي الوزن مثقالين وثلاث غرامات.
والشذره الماس بلجيڪي. ومعلومات عن النوع ونسبه النقاوه.
صدمني سعر الشذره وعدت قرائته اڪثر من مره مڪتوب سعرها اربعه مليون.
اتذڪرت صديقتنا همسه اللي انخطبت قبل اسبوعين وخاتمها الماس سعره مليونين يمكن حتى العميد وصله خبر.
وتغريد تگول لازم نڪثر الها مبررروك لان هي تعشق حرف الواو وهواي تصرف واوات تقريبا بڪل ڪلمه تخلي واو.
وتگول هذا اغلى خاتم بالعراق ڪله.
ومن البنات اڪدن الها اڪو اغلى.
گالت اذا اڪو اغلى اعتبروني اني اشتريته.
موستحيل اخلي وحده تلبس خاتم اغلى من خاتمي.
اتنهدت وحسيت صدري اتجرح واني اگول ياريت لو صايره مسك من نصيبه فدوه الها الملايين والالماس مايلوگ الا الها.
سديت العلبه وضميتها وي الخارطه الذهب واسوار ناعم ونازك واضح شذرته الناعمه الماس وخلخال ڪلش حلو وهذني مڪتوب وصلهم صياغه بالڪاظميه. وڪلهن ذهب ابيض.
درج ڪامل بڪنتوره عباره عن ٵشياء تخصها. وڪلش مرتبها.
من فتحتها العطر ملى الغرفه. من ڪثر العطور الموجوده بيها.
ڪملت وحضرت جنطة ملابسه ونزلت ڪان يمنا احمد. وهو يلوم بيهم ليش مااتصلتو عليه وگلتوا احنه بالمستشفى.
يحجي بقهر وحرگه گلب.
هديل وطيبه محضرات جنطتي وامي تستعجلني اڪل لگمه وتوصيني ؏ مخلد.
ڪملنا وطلعنا احمد ويانا هو يسوق. وامي تبوس مخلد وتوصي بنفسه. هي وجدتي وڪل اهلي الا الحنين حتى ماتحمدلله بسلامته.
وخبصنا بحفيد ابو غدير حالته خطره. ورايج جاي عليهم.
ومن شاف احمد يهز ايده مو عاجبه ودايم يذڪرنا احمد بصق بوجه ابو غدير. والمفروض ما يدخل بيتنا هاي اهانه النا.
ومن يدخل لبيتنا ٵحمد ويطلع جدي يسوي مشڪله.
بس ما احد يسمع اله والڪل يحبون احمد ويقدروه ويتسحق التقدير.
ومخلد رغم بعده التعب واضح علي يتقوه گدامهم ويبتسم ويطمنهم هو بخير.
ويوصيهم ؏ فراس اللي صايرين يضمونا من نطلع لان يبجي ورا مُـــخلد.
ومُـــخلد يذڪر امي عن موعد مراجعته ينزل للبصره ياخذهم.
ومختار يگول نريدك سالم ڪلشي ما نريد بعد.
الطريق ڪله ڪلام احمد وي مخلد يهون عليّ .
اللي يشوفه يحس بي يتمنى هو يشيل الالم عنه.
وڪلماته طالعه من صميم گلبه وهو يگول لمخلد انت غيث وليث واغلى منهم.
انت الروح وحق الخلقها وانت اغلى منها.
ومخلد يرد اريدك دايم ابو ياسر.
بس حال مُـــخلد ماتعبر عنه ملايين الڪلمات ولاتگدر توصف شعوره حسراته تگطع الگلب.
شغل اغنيه لا لا لاترحلين ــ اللحن عجيب والڪلمات اجمل.
بصعوبه ينطقها الڪلمات وهو يسمع الاغنيه گال لااا ماخانت ولا عافتني بــ ارادتها.
ٵحمد طفى المسجل ويطلب منه يهدٵ ويگول ڪافي مُـــخلد حرام عليك شوف حالك.
ومُـــخلد رد وحالها.؟؟؟؟؟
زينه مو ابو ياسر؟؟؟؟
وينها الزينه شباقي منها بس العيون ولونهن.
احمد ــ وحالك مو احسن من حالها ناقصك قهر وهموم واجي ازيدها عليك.
ما ڪافي شعوري بالعجز ملبك مربط مابيدي اي شي اقدمه الڪم واني اشوفڪم گبالي تتعذبون.
اتعس واسوء شعور شفته بحياتي هو شعور العجز.
عاجز تقدم خدمه لانسان يستحق روحك.
ڪان احمد متاذي ومقهور وهو يگولها.
و مُـــخلد رد بقهر شبيدك؟؟؟
شنو اللي تگدر علي وقصرت بي.
بس ماتوقعت هذا حالها دمرني حالها.
اني دمرتها اني مااحد دمرها الا اني.
مو گلت الك من رجعت من السفر قررت اعيش حياتي لخاطر الحواليه امشي ايامي بلا هدف.
اعتقها لوجه الله وهي ڪانت مقرره تدفن مذاڪراتها.
ڪان هسه نست وڪل هذا ما صار.
ڪان تقبلت حياتها وعاشتها مرتاحه.
قابل ماخذيها للاعدام ــ الولد وبعمرها ومن خيره الشباب ـ
سٵلت عنه يعجزون عن وصفه ومن سنين طموحه يدرس تخصص عيون يعني حبه الها مو جديد.
اذا يشبه ابن عمه ابو يزن او اعمامه ماشاالله ياربي.
يعني ليش هذا حالها. ثلاث شهور مو اڪثر حولتها لانسانه ثانيه.
ٵحمد ــ ردت اقاطعك من گلت ڪان هسه نست وعاشت حياتها.
بس انت ڪملت وگلت ليش ما متقبلته وراضيه وهو بڪل هاي الصفات؟؟؟
وليش تغير حالها بثلاث شهورر؟؟؟
هو هاي صفاته واڪثر.
انت جاوب ؏ هذا السؤال الجواب يمك.
ولو تگدر تنساك ڪان نستك من طلبت منها النسيان برسالتك اللي قضت عليها.
وانت بنفسك قريت الذڪريات وشفتها ازدادت تعلق بيك وما گدرت تنساك.
وبيوم اللي طلبت ادفن المذڪرات اجت وسامحتك لولا.
وبعد ما انقبلت جامعه گالت الك بنفس اللحظه تندمت لان ردت ادفنهن اي لولا.
طريقتها بحفظهن ؏ شنو تدل؟؟؟؟
رحمه لروح اهلك ڪافي تلوم نفسك وتعذب حالك.
مُـــخلد ــ وحالها؟؟؟ خايف علي يااحمد واني شفت وعفت من دنياي شفت ضيم وغدر الا مليت.
بس هي الشفافه الترفه شلون تتحمل ڪل ما اتذڪر حالها اتمزق اشلاء.
وابـد مالوم خوالها رادوها ابينهم حقهم والله.
بس المشڪله مو گادر استوعب هي راحت خلاص.
مو گادر استوعب حياتي بدونها. يومي من بدايته لنهايته يبدي بيها وينتهي بيها وهي مو يمي.
اردد اسمها اتذڪر ڪلماتها اباوع لصورها.
شمس الشروق تذڪرني بيها الورود بــ انواعها القمر بليله التمام يذڪرني بيها.
المطر والفراشات وحمام اللوت و الماي و دجله وشط العرب.
الموسيقى الهادئه الاغاني اللي توصفها لو اشعار عريان اللي تمثل حالي وحالها.
مذڪرتها وصورها والفيديوات وهي تڪتب حرف اسمي ؏ جبل ازمر وتحاوط الحرف بالاسوار اللي جبته الها.
لو الفيديو وهي تغنيلي ردلي نوم عيوني واحلامي البريئه.
وڪاتبه عنه ذكرى مدرستي طلبت اغنيه عن الوطن واني غنيت واقصد بيها وطني.
لو صوري اللي راسماتهن صديقاتها.
تعب مُـــخلد. وهو يگول مااتخيل يومي بدونها.
شعور قاتل ومميت لمجرد اتخيل مسك راحت مني وصار ملك لغيري.
ڪل ڪلمه يگولها بتعب واني شبعت بــﭼـــي.
وخايفه لايرجع ينهار مثل انهياره البارحه.
وبعده مُـــخلد. يردد اسمائها اللي يناديها بيهن ويگول اقنعوني راحت مني اريد احد يقنعني مسك طلعت من حياتي.
ڪلش تعب وٵحمد يتوسله ويبـــﭼــي واضح من صوته.
ياربي شنو حالي واني اسمع صوته يبــــﭼـــي.
شگد صعب واني اسمعه بس الاصعب حال مُـــخلد اللي اختنگ لو يبــــﭼـــي ارحم.
دائما نسمع ـــ
الأصعب من البكاء فقدان القدرة عليه. وهذا حال مُـــخلد.
ورجع احمد يلح عليه وهو يشوفه اختنك ويتفس بالقدره يطلب منه يراجع طبيب عيونه اللهم خارج العراق ويلگي حل لتحجر دموعه ويگوله صدگني لو تبجي ترتاح.
و مُـــخلد. يگول شلي بيها الراحه وهي راحت راحت احمد رااااااااااحت. انتهى مُـــخلد وهو يگولها.
وگف السياره وفتح الجام ونطاه ماي ويگوله الله يبرد گلبك.
شرب رشفه من الماي وگال الحل بيدها.
واحمد يطلب منه يرتاح.
وهو ڪمل يگول اذا عاشت حياتها واتقبلتها يمڪن اگدر اعيش بجسدي والا روحي هاي ما عادت تهمني.
عسى ولعل اذا اتقبلت حياتها يفارگني طيفها وتغادر احلامي.
اللي يحبني يدعيله تنساني وتعيش حياتها مااريد اڪثر.
احمد يتحسب ؏ اللي فرقهم. ومتٵذي حييل.
ومن وصلنا لبغداد اڪيد الڪل وصلهم خبر مخلد متخربط وعن حاله.
من جدي ابو غياث لڪل اخوالي وزوجاتهم و ولدهم اجو اتحمدوله بالسلامه.
وجدي ماقبل احمد يروح بقا ؏ العشا واجا حسام اخذه.
ومرت الايام ومخلد رجع لنفس وضعه يڪابر وٵلمه بداخله. وگدامنا الڪل هو بــ احسن حال.
بس من يجي الليل بس رب العالمين يعلم بحاله.
ومثل ما توقعنا مصدر الغدر واساسه من ابو غدير.
بعد مااتصل مهند وفهمنا شلون متصل عليّ عزام ابن ابو غدير.
بعد زواج مهند اللي صار حديث الساعه عند العمام وخاصه بيت ابو غدير.
شلون مهند اخذ وحده اصغر منه وحلوه ومثقفه ودارسه.
ويگولون يعيد امجاد ابوه من اخذ ياقوت.
وبيوم نزل ڪرم للبصره وسمعهم بسيره مهند وزواج مهند.
وگال خال زوجه مهند ڪان واحد من اللجنه المناقشه لصديقي.
وبيوم حظوري لمناقشته عرفت ان اخوها واختها طلاب بجامعتنه.
الشهاده لله مدح بيهم وگال اڪو شبه بينهم وبين خالهم.
وهنا ابوي سٵل شعجب مهند ما اخذ الدڪتوره؟ ؟
ڪان رد ڪرم ماادري والله.
بس هاي صغيره وبعدها مامتخرجه.
راح الموضوع وانسى.
وبعد اسابيع نزل ڪرم البصره وگال ولد صديقي عجبته البنيه اخت زوجه مهند وگال لاخوها ورفض مباشراً .
والشرقيه نيوز يمنا. نرجس ـ وڪانت زعلانه يم اهلها.
گالت هاي متقدم الها مخلد ــ وانطت الــ سي ﭬـــي. ڪامل.
واڪدت ان مُـــخلد لسه رايدها وينتظر تڪمل جامعه ويرجع يتقدم الها.
وابوي وتعرفه من سمع متقدم الها مُـــخلد شافها فرصها.
وگال لڪرم دام هاي صفاتها ليش ما تتقدم الها. وتعرف اڪيد ابوي دام الموقف بي مُـــخلد ڪرم صار عنده بس هو وبس ـ
ومن يومها گلت لــ ڪرم السالفه هاي انساها.
واتوقعت انسد الموضوع.
وانصدمت بيوم سمعت منعم وابوي بخصوص الموضوع.
والله والله ماادري شلون وشوڪت جايبين عنوان اهلها ومڪملين تخطيط. ورايحين لاهلها ومرفوضين.
والمناقشات والبيت يضرب يگلب شلون مرفوضين.
ومن امي تسولف عن رد البنيه عليهم حسستني حاشاها دلاله وراده عليهم.
وما دخل عقلي ڪلام امي وزوجه منعم.
اللي ڪل يوم يزيد علي ڪلام جديد.
ومن سمعت الڪلام انغثيت والله وعاتبت ڪرم.
اللي جان مقهور وضايج شلون مقارنته بــــ مُـــخلد وتگول تاج راسه مثل ما امه متبليه بالڪلام.
عزام يگول حسيت بالڪلام اڪو مبالغه ورجعت لاختي منال بما ان هي حضرت وياهن.
وطلبت منها تحجي الحق بعد ما بينت الها حرمه فعلهن اذا مزيدات بالڪلام. ورب العالمين مايوفقها بڪل حياتها وشوفي غدير ومشاڪلها وحياتها ڪله لان ما تخاف الله.
وفاجٵتني منال بالڪلام شگد ٵمي واقبال ضايفات ڪلام باطل والبنيه مو هذا ڪلامها.
والتلفيق والزياده اللي موصلينه لابوها يضربون عصفورين بحجر.
لابوها يحسسونه حشاه ان هو ما رباها.
وبذڪرهم لــ مُـــخلد ومقارنتها بي يگطعون الطريق ؏ مُـــخلد.وخاصه بعد ما تٵڪدو هو بعده رايدها.
هوست وتعارڪت وزعلت عليهم.
وخليت ڪرم يسمع ڪلام منال وقرر يعتذر منها.
وبعد ايام يگول رحت اعتذر منها وحسستني اني مو رجال وحملتني ذنب مو ذنبي وما قبلت تسمع مني. وڪلامها قوي يدگ بالعظم.
صدمتني بردها والڪلام اللي ڪاتبته بورقه ونطته الي.
وصديقاتها اثنين ڪملن اللي هي بدته وڪٵني اجرمت.
واجاني ڪرم مقهور اڪثر من قهرته الاولى وهنا گلت اله انت تحملت ذنب امك وابوك واللي سويتوه ولفقتوه ؏ البنيه مو قليل.
وتدري ابوي شنو قرر يگوله اخطب من الجامعه دڪتوره لاتفڪر لابعمام ولاخوال.
ممنوع تاخذ الا دڪتوره وحسسها انت مو بحالها من رفضتك.
بعد تفڪير ابوي وانت اعرف بي وبحقده ـ
مخلد بعد ما سمع هذا ڪله ما نطا اي رد فعل غير حسبي الله ونعم الوڪيل عليهم.
وبيومها اجانا ابو صديقه الله يرحمه وامه. وهالاثنين ڪلش مڪانتهم عند بيت جدي بحيث من يجون يگعدون بالصاله ويانا مو بالاستقبال.
وشنو حالهم من عرفوا التفاصيل وان اللي يريدها راحت.
ابو همام يلومه ليش ما گلت قبل لاتخطب اني اعرف شلون اخليهم يوافقون.
يتگطع قهر وهو يحجي و مُـــخلد من شاف حاله يبين اله عادي وهو مؤمن بقضاء الله وقدره خيره وشره.
وبهاي الايام تحدد زواج ريان وعمر ابن اخو ام اجود.
وهنا غيرت رٵيها وطلبت حفله حنه بسيطه وابينا والعرس بالبيت.
بعد ما ڪانت مقرره هواي امور للحفلتين هي وام اجود.
وعمر گالها خايف تتندمين بعدين. وڪان ردها ابد مااتندم.
طبعا ريان حنينه بشڪل وخاصه ؏ مهند و مُـــخلد تعزهم وتحترمهــــٓــم بشڪل وتتمنالهم ڪل الخير.
وفعلا حفله الحنه ما ڪانت اڪثر من ساعه وعاديه جدا. وما ڪان عدها اي فرحه.
وحفله العرس بالبيت حلوه ڪلش امه ماقصرت بالترتيب والتحضير.
ودعتنا ريان اللي جانت اخت الي وهواي هواي تعلمت منها بحياتي.
دعيت ربي يسعدها ويوفقها. ويسعد ڪل بنت.
ـــــــــــــــــــــــــــ
مسك ــــ
سألت الموت هل يوجد شيء اقوى منك فأجابني بهدوء فراق شخص تشتاق له كل دقيقه ·
وهذا حالي بالضبط هالڪلمات تمثل حالي بڪل ماتعنيه ڪلمه الشي الاقوى من الموت.
من بعد ڪل اللي صار والظروف اللي اجتمعت وڪلها ضدنا.
ڪل ما نقترب خطوه يجتمعن ضدنا قدر وغدر ويبعدنا خطوات.
بس هالمره غييير غيير.
بات طريقي لا يصل اليكَ بات منفصلااا عنكَ تماماااا
فــ تشابكت سبلي مع ذاك الذي ارديت قلبه عشقا لي!!!!!!!!
هالمره اجتمعت الاقدار والغدر من ڪل جانب.
من جهه عمي وافڪاره الجهنميه والحاحه ؏ الصلح وي ابوي وصاير حنين زايد عن اللزوم وعنده استعداد يجي لحد بيتنا ويجيب شيوخ عشاير ويعتذر من ابوي.
ومو لهنا وانتهى الموضوع لااااا يعتذر ويطلب السماح ويعترف بٵخطائه ويرد ڪل حقوق ابوي اللي اخذوها منه ظلم وبهتان.
وحتى البيت مالت ابوي مرممه من جديد ويريد يرجعه باسم ابوي.
والاراضي الزراعيه اللي باعها ڪلها مستردها ويريد يقسمها بالحق.
وحتى حق عمتي الله يرحمها ومعترف هو اذاها وحقها يرده الجين.
وبعد هاي ڪميه اللطافه والحنيه المبالغ بيها اللي ڪلش ما لايگه الهم.
وڪان رد ابوي اثار عليّ بعض الشيوخ وهم يگولون هو جنح للسلم والصلح وٵنت راح تتحمل اثم قطيعه الرحم.
بعد ما رد عليهم اتاخر الوڪت واجو متاخرين فات الاوان.
وماتلتقي طرقنا الا بمحڪمه رب العزه هو يحڪم بينا بيوم القيامه.
بعد اللي صار بــ اهل بيتي واللي عاشوه اطفالي يسبب التقارير الڪيديه اللي ابعدتني عنهم وفقداني لروحي اختي واللي صار لبنتها لجين. من رعب وذعر ودمار لحالتها النفسيه وابتعادها عنه. مايعوضه ملك الڪون ڪله ما محتاج اراضي ولا بيت ولا اموال.
الله مغنيني الحمدلله.
ورفض صلحهم وگعدات بالنجف ومشاكل ودي وجيب. اعتبروا ابوي مايريد صلح. ومشڪله الها اول مالها اخر.
سبحان الله اللي خلق عمامي وعمامه نفس الحيل والمڪر والغدر وحوش بشريه حسبي الله ونعم الوڪيل ؏ الدقايق ارددها.
تناصفوا الغدر اثنينهم وشارڪوا بجريمه تفرقنا بمڪرهم وحيلهم. وغدرهم. النا.
واباوع لحال ابوي اللي تعب حييل تعب وشگد يحاول يبتعد عنهم ما يخلص من مشاڪلهم.
طايره روحي عليّ هواي قسى عليه بزعله مني.
نزلت من غرفتي وشفت بيده السجلات مالت محلات الجمله يشتغل بيهن وحمودي حبيبي بصفه يهومش يريد القلم من ايده.
گعدت بصفه حس بيه وما اعار الي اي اهميه.
شگد صعبه عليه هالمعامله. وجع الي گلبي.
گلت بابا ـ
رد ـ هاا بدون ما يباوعلي.
تحولت گباله وسحبت ڪف ايده وتمسڪت بي بقوه. شگد محتاجه اله اتقوه منه.
وٵني افهــــٓــمه واقسم اله والرب مانطقت بحرف و الڪلام اللي تٵول عليه.
وتربيتي احسن من تربيتهم واعرف حدودي.
مستحيل انطق بحرف عڪس اللي تربيت عليّ .
وجبت عمري وعندي ٵنت الشخص الاول بڪل حياتي.
بڪل خطوه اخطيها احسب الف حساب الك اولا.
يعني مو معقول انطق بهيج ڪلام وخاصه بعد ما شفتها المره شلون حاقده وماتخاف الله.
گال اي وڪل هذا ماعندي شك بي.
بس من شفتيها ماتخاف الله وحاقده المفروض ماتردين عليها اي رد غير انج رافضه.
وانت لابن خالج اللي هو فعلا تاج راسهم.
هاي الجمله لو گايلتها الها ٵجي وابوسج من راسج.
هذا ابن سامي اللي بذراوه الحرب اذا تاخرت باجازتي يجيني للوحدات يسٵل عليه. ماسواها لا اخ ولا اب.
وبڪل شده وگعت بيها هو اول الحاضرين وڪلمته اني عندك اني اخوك اني سندك ميل عليه.
هذا صدگ تاج الراس ابن حزام الظهر ابو المواقف والوگفات.
ردج فسح الهم المجال يٵولون ڪلام ماله صحه.
وهم ابينهم عداوات عسى نار تاڪل حطبهم.
المفروض تڪتفين بــ رد امج وجدتج عليها.
زعلت عليج اي.
وشنو تتوقعين ردي علي بعد ما سمعت من امج وٵمي.
مو ٵني الاسڪت عن الحق.
ولا اني الافسح المجال لانسان حاقد مثله يطعن بتربيتي لبنتي.
اڪيد رديته بــ رد يسوى عمره.
وبينت اله انت ما گلتي هالڪلام وبنتي عندي ثقه بڪلمتها لان ما ربيتها تڪذب يعني الخلل باللي نقل الك الڪلام.
واذا عندك مشڪله وي عمامك عيب عليك تدخلنا بوسطها.
وحسسته بشناعه فعل زوجته ونظرتنا الهم شنووو. ومتندم لان سمحت الهم يدوسون عتبة بيتنا.
وصار يتعذر ويريد يجيب ناس ويعتذر.
بينت اله مايحتاج اعتذار واذا النا حق يمهم مسلمهم بيد الله.
گلبي خلصان من اخوي ومشاڪله الما تخلص.
يجوني ناس نسخ مستنسخه منه. الله يڪفيني شرهم ويبعدني عنهم بعد المشرق عن المغرب.
والجمل الاخيره اللي نطقها ابوي ڪانت نهايه املي.
من گال نطيت لمهند ورغم الولد مابي قصره والڪل مدحته.
بس من عرفت هواي عن جدهم وطبعه وعن حياتهم.
الصراحه بگلبي خوف ؏ الماسه لايلوحها طشار من حقده.
وما مستوعب طبيعه هالبشر شنو؟ ؟
شايف اشڪال البشر وشايف غدر ومڪر وحيل وحقد بين الاخوه والعمام.
بس جد يحقد ؏ احفاده وما يتمنى الهم الخير لااااا هذا الشي ماشفته بڪل حياتي .
شتان بينه وبين جدڪم عبدلله. الله ينطي صحه وعافيه. ويديمه.
اللي بس شوفته تزيل الهم والغم واخوالج مو اقل منه و ولدهم ڪذلك.
؏ الاقل مرتاح انتن مو بعيدات عليه و؏ الاقل مطمئن من جانبجن.
استمع اله وگلبي انمرد من ڪلماته الاخيره.
اخذني وضمني لحضنه ـ احتضنته بقوه اريد اشبع من حنيته. المهم صالحني وڪلشي بعده يهون.
بوسني وابتسم بوجهي واني بجيت مسح دموعي ويگول غاليه ابوها انتِ ـ
اول تالي تردين حتى وان ڪان ردج بحق وانت الصوتج ما ينسمع.
ڪفش راسي حمودي وابوي يضحك. لان يبعدني منه وهو گعد بحضنه.
ارتاحيت لان صالحني ابوي وخفف عليه حمل ثگيل ڪنت شايلته.
ولساتهم صابرين عليه. ومنتظرين ردي. اللي صرت اشوفه لايسمن ولايغني من جوع.
مابقت عندي طاقه تحمل وبكل طريقه احاول انقاذ نفسي من المصيبه الاني بيها.
وما بقا الي الا حل واحد هو اواجه مصطفى واخلي هو ينسحب.
وحتى هذا الحل ماجاب نتيجه.
وحالي ماٵعرف بشنو اوصفه. ٵحتاجيت انس ومنتظره نزوله لان هو توأمي الروحي. وڪل ٵملي بي. يفهمني من النظره بدون ما احجي..
تمنيت ولو عندي جرئة واگدر أفهمه سبب رفضي بس مستحيل مهما تكون العلاقة روحيه بينه بس يبقى السبب مستحيل اگدر افصح عنه اله.
بس احاول اقنعه بڪل طريقه مااستسلم لازم اوصل لحل.
وينه وعدي لــ مُـــخلد وينه عــهدي ياربي ساعدني.
تبعت وانشل دماغي من التفڪير الڪل مو فاهمين عليه وحدي اعاني واللي فاهمين عليه ما بيدهم اي شي.
كأنه كُتب علينا العيش هكذا ، مُعلقين في مُنتصفِ الأشياء كلها ، لا نحب مايحدث ، ولا يحدث مانحبه.
نزل ٵنس للعراق لخاطري ـ
وگعد يوصف مصطفى مثل ما همَ وصفوه وأكثر ويعتبرني محظوظة وكأن اني ما اعرف مصطفى او غريب عني..
ما اني اعرف كل هاي الصفات
واعرف كل البنات يتمنون يرتبطون بشخص مثل مصطفى الا اني.
و مو انتقاصاً من شخصيته ولا تقليل من شأنه بس شسوي لگلبي اللي ما قابل يقتنع بغير اللي سڪن گلبي.
تمنيت الرفض يتم تمنيت يقتنعون بوجهة نظري لان خوفي على مصطفى ينظلم اكثر من خوفي على نفسي..
وحتى ولو ما ارتبطت بأي شخص ثاني مستحيل اتقبل فكرة اني احب من جديد..
يمكن البعض يگدر اذا عاش تجربة وانجبر بضروف معينة يرتبط بشخص ثاني يتأقلم ويه وضعه وينسى..
الا اني اعتقد مستحيل انسان يحب مره يگدر يحب مره ثانية هذه وجهة نظري مستحيل احب شخص ثاني غير مُـــخلد
ولا اتقبل شخص ثاني غيره.
واللي صار ڪله خارج ارادتي وفوگ طاقتي ومالي اي اختيار بي.
تمنيت انطق حرف عن سبب رفضي..
والوحيدة اللي گدرت افهمها السبب هي بيبي وكان ردها عليه خلاني اتندم لان نطقت هذا الكلام..
وارجع اگول لااااااا اني ما طلبت منه ينزل حتى اسمع منه ڪلام سمعته بــ اتصاله.
حاله حالهم يظنون گلبي خالي ومابي اي شخص وخاصه وهم يشوفون رفضي لڪل شخص اتقدم. ومن اتقدملي مصطفى راح استقبله بــ يا مرحبااااااا
وافرح واگول ياڪُــبر حظي بيك.
ٵنس ترك دراسته اللي الڪل يگولون صعبه وصعبه حيل وجاي علمودي.
اي ما لازم اسڪت لازم افهمه بصوره واخرى.
وبعد تردد وحيره وارتباك گدرت ابين اله مو مثل ما هم يظنون اتخيل حالي ياسندي اني مستحيل اتخيل مصطفى شريك حياة اني اشوفه مثل مااشوفك.
والاندماج والتفاهم اللي ابينا لان اشوفه مثلك.
هنا ٵنس استوعب ڪلامي واتفهمني وجر حسره قويه وطلب مني اڪمل.
ڪملت ڪلامي ملامحه تغيرت فرك وجهه ويبلع ريجه ويستغفر وگال شلون شده ياللهي.
تناقشنا وهو يعيد المواقف وڪلشي صار هالفتره.
وگال الله يعينج وشلون انجمعت ڪل هالامور ضدج.
ورغم هدوئه وحڪمته هو هاي ثاني مره يڪررها ليش ابوي سڪت لابو غدير وهذا ڪان رٵيي الياس همات ما قبل يسڪت اله وگال خلي يجيب الناس اللي يگول عنهم ويجي يعتذر وگدامهم نبين قباحة وشناعة عمله.
بس ابوي ڪان رٵيه اللي مثل ابو غدير عديم احساس حتى اذا تهينه يبتسم وڪٵنك مدحته ما ذميته.
هالنماذج ياڪثرهم الله يبعدنا عنهم ويڪفينا شرهم.
اباوع لحال انس صار بحيره من ٵمره. ويگول ما متوقع هذا حالج.
ومتيقن لو ابوي يدري هاي نظرتج اله مستحيل يوافق بلا ما يرجع الج من يومها ولو شايفه حاله بيومها تعرفين غلاتج عنده ومو بسهوله وافق.
مسك ــ شوڪت صار هالڪلام؟؟؟
وليش وافق بدون ما يسٵل عن رٵيي.
ٵنس ــ لا مسك بيومها ما نطا موافقه.
مسك ــ شوڪت اجو وٵني وين مادريت ولا سمعت؟؟؟؟
ٵنس ــ اتذڪر امتحانات فاينل بيومها اجو جدي واخوالي وانتن سلمتن وصعدتن تدرسن انت وميس ومرام.
واحنا گعدنا بالحديقه الموضوع ڪان بين الجد والهزل وابو الحسن اللي فتح الموضوع وڪملوا خوالي وجدو عبدلله و بوڪتها گال اجه الوقت الاطلب بنتي منك.
ولو شايفه حال ابوي والله گال مجرد ڪلمه گلتها احس تسحب روحي من جسدي ما انطيها صغيرتنا هاي.
خرجنا من الموضوع ورجعنا. وتحول الڪلام وخالو ابو الحسن طلبج.
وبعد ڪلامهم جدو علي اللي گال اڪيد يوافق ينطيها ومنو الاحسن منڪم. حتى ما ينطيها.
وابوي متردد وبعده يگول صغيره وشلون؟؟
ورد خوالي مستغربين ڪلمة صغيره يعني بعمر المها من اخذتها؟؟؟
وبعدها ڪان ڪلامهم جيتنا اليوم مجرد ناخذ منك ڪلمه والباقي الى ان تتخرج وخالو ابو مصطفى گال لا وضيف سنه ؏ تخرجها الى ان يتخرج مصطفى.
ومن طلعوا اخوالي وصار الڪلام بين ابوي وجدي علي اللي ما راضي ؏ رد ابوي عليهم.
ويذڪره بڪل فضل الهم علينا ڪان المفروض تگولهم عيوني الڪم ومنو الاحسن منهم وتنطيها اله.
و؏ الاقل اتٵمن من ناحيتها هي عند اهلها اللي يستحقوها.
لو غيرك واحد يفرح بطلبهم وابوي ڪان رده شلون افهمك مااشوفها ڪبرت بعدني اشوفها ذيج الصغيره التبجي من اللتحق المشاغبه اللي لعبتها بالماي والبزازين.
وحتى اذا من تتخرج هي او هو مااشوفها صارت بعمر تتحمل مسؤليه.
وبعده نقاش دار بينا احنا وابوي واختصرها الج بما ان اللي طلبج ابو الحسن وهو قريب منڪم اثنينڪم متوقعين عندج ميل اله وثقتنا بيج عاليه ونعرف انت شگد حافظه حدودج وما تتعدينها.
ونعرف شنو مصطفى واڪيد مايتعدى حدوده.
فڪان ڪلامنا والنعم منه والله يقدم اللي بي الخير. وماڪو شي رسمي بوڪتها حتى ياخذ رايج.
ومثل ما صار وي مرام الموضوع ڪان بس عند الڪبار وهي ماعدها علم الا بعدين عرفت.
وبيومها نزلتي ليمنا واوس يهدد بيه وميس يگول ممنوع احد منڪم يضرب السره ويتزوج قبلي ان اڪبر منڪم مو بحجه تتخرجون.
والتفت وگال وانت؟؟
وانت گلتي اطمٵن من ناحيتي باقيه ؏ گلبك.
اتذڪرت هاليوم وذاك الوڪت حالي بالضيم لان ڪان مُـــخلد اله شهر او اڪثر من اتقدم وانرفض.
وهنا اتذڪرت بيبي ڪانت ابيت اخوها واني اگول هي بعد فتره ياله ابوي گال الها.
بعدها ڪمل انس ڪلامه ويفهمني تصرف الڪل هو حبا بيه ومافهمو عليج.
وابوي حسب ما فهمت من الياس بسبب الظروف اللي اجتمعت والشخص اللي تقدم وعمامي وسوالفهم. خلته يوافق وما ياخذ رٵيج.
وارجع اگولها الج الله يڪون بعيونج صح هم منتظرين ردج بس ڪلهــــٓــم ؏ يقين انت ماتڪسرين ڪلمه ابوي بعد اللي صار ڪله.
زين اسٵلج انت حاليا تگدرين ترفضين؟؟؟
مسك ــ لا وخاصه بعد اللي صار بالنجف وابوي گايل نطيتها لابن خالها ومنتهي الموضوع.
ٵنس ــ صح واڪيد ما اقبلها ترفضين وتطلعين بالصوره المو حلوه حاشاج.
بس هذا مو اخر الحلول لااااا.
خلينا نمسك العصى من الوسط.
الايام گدامج اعتبري نفسج بمرحله اختبار.
واووووف يقهري عليج ليش الظروف ڪلها اجتمعت وجبرتج ؏ هالشي.
عقد محڪمه لاتعقدين اڪيد راح تعقدون عقد سيد.
والاشهر گدامج وفڪري گدرتي تتقبلين مصطفى شريك حياة خير ؏ خير.
واتوقع راح يضهر الج حبه اللي ماعندي ذره شك بي وراح تڪونين قريبه منه اڪثر وبعد هو واسلوبه وطريقته بــ احتوائج.
واذا العڪس تنفصلين عنه واني اول واحد راح اڪون لجانبج. لو اعرف اواجه الڪل. انت فوگ ڪلشي.
هاي اذا مو مصطفى هو اللي راح يطلب ينتهي ڪلشي لما يشوف حالج ونظرتج اله.
يمڪن حبه الج عمه عيونه وما خلاه ينتبه لڪلمتج من گلتي الهم اشوفه ٵخ المفروض يخلي تحتها ميه خط.
بس الايام الجايه هي تثبت اله ڪلشي وهو ذڪي ماتعبر علي.
تنهدت والحسرات گطعت گلبـــي وگلت هو ذڪي اي بس هو ينهي ڪلشي لا.
لان اني بعثت اله گلام وي ٵنوســــه رغم ما رضت عليه بس وصلته اله.
ٵنس ــ شنو رده؟؟؟؟
مسك ــ گايل اترڪي الموضوع وخلي عليه.
واتوقعت راح ينسحب وينهي ڪلش بس هو لا تمسك اڪثر برٵيه وما واجهني ابتعد حتى لايسمعها مني. تٵذيت واني اگولها.
ٵنس ــ ممكن مصطفى فهم عليج وما گدر ينسحب لان صعب بعد ما الڪل عرفت وگعدات اللي صارت شنو يگول غيرت رٵيي؟؟؟
مسك ــ لا ٵنس لا. مصطفى هالمره حسيته اناني المفروض من يوم اللي گلت اشوفه ٵخ ينهي ڪلشي.
ليش احسه استغل المواقف لصالحه ويدري مااگدر اڪسر ڪلمة ابوي وخاصه بعد اللي صار.
ٵنس ــ لا مسك مو ٵناني ولاحياته ڪان اناني. مصطفى يحبج والله اعلم شنو تفڪيره.
واثنينڪم هادئين ما ينفهم عليڪم.
ماادري شنو اگول عن نفسي لو ماشفت هيا وحبها الي. وتعبت وتٵذت لما انتهى البينا نفس اذيتي وتعبي مستحيل افڪر ارتبط بيها.
وانطيج معلومه هي حاليا بين نيران انطت ڪلمه وموافقه وهي ما تتخيل نفسه تعيش وماتشوف ابوها ڪل يوم.
والباقي بيد رب العالمين شنو ڪاتبه الها ومقدره علينا نشوفه.
وارجع واگولها الج موقف خوالي واصرارهم عليج هو حبا بيج يتمنونج ابينهم. مثل ما صار وي هيا وحملوها الذنب والملامه وان هي املتني وشگد دافعت الها مااقتنعوا رغم ڪلش يحبونها.
بس رادوها قريبه منهم ومالو عليها شوي مثل ما هسه تحسينهم مالو عليج لخاطر مصطفى.
مسك ــ يمڪن صح ـ بس هيا تحبك يمڪن بقدر حبك الها.
ورجع سٵلني لو انت بمڪان هيا شنو تختارين؟؟؟
مسك ــ اختار ابوي واحاول اقنعك بوجهة نظري.
ضحك وگال لازم متفقات انت وياها. زين اذا مااقتنعت.
ومستحيل اقتنع ڪل ما ينفتح الموضوع يصير ابين عيوني ٵمي وڪلامها عن اخوها وقدوتها بالحياة واشتياقها اله. لو دموعها بيوم هيا گالت مااگدر بدون ابوي وهو تگولها حقج.
لو حالج بيوم اللي سافرت.لو حالها.
لو بيدي امحي اياما اللي عانت بيهن واستبدلهن بفرحه.
مو انوب اجي اني اڪملها و اسافر واعيش حياتي بدوله امن وامان وراحه والزوجه اللي اختاريتها واترك ٵمي وابوي وانت واهلي وناسي.
دراستي هاي ؏ اعصابي متحملها.
يعني نهائي مااقتنع.
مسك ــ ماادري صعبه حييل.
ٵنس ــ اي فعلا صعبه. راح اگولها الج ومااحد يدري عن شي. بعيدا عن موافقتها المبدئيه طلبت منها تفڪــر اڪثر.
وخلال هالفتره اللي هي تفڪر بيها مابينا لا اتصال ولامراسله حتى تاخذ راحتها بالتفڪير اڪثر وتقرر قبل نزولهم للعراق.
توافق او لا.
واني راح احترم رايها شنو ما ڪان يڪون ولو حساب نفسي.
مو اول ولا اخر شخص بالعالم مااخذ اللي يحبها گلبه.
الظروف تحڪم والاكبر منها حڪم القدر.
وقل لن يصيبنا الا ما اڪتب الله لنا.
حسيته انقهر ڪلش وهو يگولها ــ شبي حظنا اني وياك مو راضي يگعد وي اللي نحبهم؟؟؟؟؟
بس والرب ما راح اسڪت وراح احارب لخاطره يستاهل مي عيوني.
ورجع لموضوعنا وهو يطمني ويذڪرني اني وياج سندج ومايبعدني البعد شوڪت تحتاجيني عيوني الج.
بس فڪري اڪثر يمڪن تتغير نظرتج عنه وگلتها الج ماعندي ذره شك بحبه.
وعن نفسي اتمنى تڪونون لبعض وافرح من ڪل گلبي اشوفڪم متلائمين ڪلش واحس مشترڪين بهواي صفات.
وربي يقدملڪم اللي بي الخير ان شالله.
اتنفست براحه وارتاحيت لڪلام ٵنس لان فعلا ما ٵگدر اڪسر ڪلمه ابوي وهو بعيوني شي ڪبير.
بعد ايام سافر وهو يوصيني بنفسي ويوصي الڪل عليه وخاصه ٵمي.
الكل حاس بيه اني تعبانة بسبب الظروف والمشاكل اللي صارت بسبب عمي
لان حاولو من جديد يرجعون النهوه او اكون هدية صلح المصطلح الجديد اللي اخترعوه..
والنتيجه من هذا وافقت مجبوره وبشروطي اللي عسى ولعل تفيدني بشي لو اني دا اقنع نفسي بيها .
ماادري تاهت عليه.
واجت من صالحي ولادة هيام وانوسه بنفس الاسبوع..
هيومه جابت بنوته نسخه منها والڪل محتفلين بيها. والفرحه مو سايعتهم. خوالي واهلي.
اللي عبالك اول طفل يصير الهم ومعروفين بحبهم للبنت وفرحتهم بيها.
وهيام الڪل يعتبروها اول حفيده لحجي عبدلله.
وعيالها مو اقل من فرحتنا. وهاي اول بنت لعيالها . ماشالله ڪل وحده عدها ثلاث ولد . وڪلهم متمنين هالبنيه علمود راميا.
وانوسه جابت ولد ــ وفرحنا ڪلنا الها بالحفيد الجديد. عبدالرحمن.
وازادت فرحه اخوالي واهلي وفرحه بيبي ثريه تختلف عن ڪل فرحه.وتگول اولاد حسام يڪبرون ويصيرين اخوان اله ولاولاد اعمامه.وعمته.
استغليت هاي الفرصة وطلبت يجيبون الحلقه البسها بدون حفله.
بعد ماسمعت بالاستعدادات للحفله. مالت خطوبتنا. ومن ضمن المدعوات للحفله زوجات اخوال مُـــخلد ــ عازميهن لمن اجن يبارڪن لهيوم وانوسه بولادتهن. وسمعت جايات ڪلهن وياهن اسيل وريان.
واڪيد صار اعتراض. ؏ طلبي ـ
واني ڪان رٵيي ــ مو سبب الاستعجال بالخطبه لڪثره الخطاب ـ
اذن البس حلقه وحتى محد بعد يگدر يجي ويتقدملي..
بما ان مصطفى راد كلشي يتأجل بعد ما نتخرج والڪل عرفت اني مخطوبه اله..
مسألة الحفلة مو ضروري لأن الكل عرف مصطفى اجه خطب وابويه والكل موافق وصل الخبر للكل لأهل النجف وكركوك والموصل خلي يجيب الحلقة البسها وماكو داعي للحفلة..
صار إلحاح قوي ومو راضين ؏ طلبي. الكل يريد حفلة ويردون يفرحون بينا.
والتحضيرات ويردون الحفله صخمه بعطله نصف السنه. حتى الڪل معطلين والحفله بقاعه ويعزمون ڪل الاقارب والاصدقاء.
واني اسمع التحضيرات وڪٵنها مو حفله خطوبه.
لااااااا مستحيل مستحيل البس فستان فرح وافرح وهو بس رب العالمين يعلم بحاله.
لااااا والف لاااااا اموت وماانطقها نعم قبلت.
لان اني مو راضيه. لاعقلي ولا گلبي راضين.
ومستحيل انطي ٵمل لــ مصطفى يفڪــر احنا نڪمل وي بعض واني اشوف فرحته اللي بحياتي ما شفته بهيج فرحه.
وڪلام البنات وهن يگولن لو شايفه من وصل خبر موافقتج شنو حاله وشنو ڪلامه عنج. ودموعه وشهگته.
شفت اي شفت فرحته وڪلامه وصلني عن طريق خالتي نجله. اللي فرحانه النا وتعبر عن غلاتنا عدها. هذا اللي ربته بيدها ويناديها يمه وفتح عيونه عليها وع حنيتها.
اتذڪره من مره بجت بسڪوت وهي تسبح بمسبحة زوجها الله يرحمه انتبه الها من بينا ڪلنا بوس دموعها ومسحهن ويضم نفسه بحضنها.
تعبت واني افڪـــر واڪرر ڪلمة المستحيل.
ومن اتذڪر ڪل حفله خطوبه وشنو يصير ــ يلمسني يلبسني الحلقه يبوسني ويسمعني ڪلمه احبج وانت اللي تمنيتها.
لاااااااااا طلعت مني بصوت وياها دموع مو گادره اسيطر واڪتمهن.
يتبع ـــــــــ
وئام الشيخلي .......💞