المخلص "باللهجة العراقية "

البارت الثاني والثلاثون

المخلص..
البارت الثاني والثلاثون..
بقلمي رسل..
rasolaa7

انستا  Rasolaa7

من لگيتك
چن لگيت الكون
محبس من عَقيق
وحآير بيا چف أضُمة..

-ساعتين تقريبا وندك الباب فتحته وجانت عمه ام المخلص نظراتها ما عرفت افسرهن وهي تباوعلي استغربت رجعتها البيتي وحتى نسيت روحي واني صافنه عليها هي دفعتني وطبت والتفتت عليه..

-سدي بابج وتعالي وياي عندي حجي وياج..

-ما كدرت افسر نظراتها ولا حتى عقلي كدر يستمجع
معلومات فرضيه عن الي ممكن تحجي بي قفلت الباب
وتنهدت بطني مغصتني ما اريد كلام يرجعني النقطة
الصفر ويخليني اطلع منا واني الي انطيت وعد للمخلص ما اطلع بعد لو شنو الي يصير..

-يارب الروح مو حمل قهر وكلام جارح بعد تنهدت
واردد اللهم قوة اللهم صبر..

-جانت كاعده بعيد عن علاوي زفرت واستغفرت الله
وكعدت بصفها منتظره كلامها وهي طولت بصفنتها
وكانو تفكر هواي قبل لا تحجي بكلامها الي قلقني لان
ما متعوده منها وما جامعنا كلام من قبل..

-شلونها علاقتكم انتي وابني؟!..

-بهتت وما اعرف شنو ارد من طولت بسكوتي هي
ابتسمت تطمني خابصني بيج ويكول ام السان وام السان وين السانج يا امي..

-هديت شوي من شد الاعصاب والله عمه مو سؤال ما متوقعته يعني ما اعرف شحجي حجيتها وافرك بيدي
متوترة كلش منها زينين ماشيه امورنا..

-خليني اني احجي وانتي اسمعي اذا هيج خلي اكلج
ابني شنو واني شنو الي اريده منج يوم اسمعي مني
ولا تقاطعيني خوش..

-هزيت راسي بـ اي مستمعه الها..

-ابو تراب تربيتي وتربيه اخويه صح جان يقسي عليه لان تربيه كبل وهذا اسلوبهم بس سوا رجال وعلمه يصير خشن وكلمته الي مسموعه وياخذ حقه من اكبر واحد ما يهاب بشر وما يخاف كلبه بس من ربه..

-بس انكسر وكسرة الكلب ما تطيب يا امي ابني تعبان شايف ضيم بحياته لو احجيلج منا الشهر ما نخلص وكله بكوم ومصيبة مرته وطفله بكوم
الي بعينه هاي شافهم شلون يتذ.. بحون من يومها وابني انطفت الحياة بعينه ذب روحه بشغله اغلب الاوقات ما جان ينزل يبقى بدوامه ويناوب عن جماعته كلبي يحترك عليه والا اتوسله يجي اشوفه يلا يمر علينا يوم
والثاني يرجع الشغله ووين ماكو منطقه مشتعل بيها الجو وذب روحه بيها..

-ما شفت ابني عايش مثل البشر عيشته تزوهرت لو غمضت عينه يحجي بيهم ويجيني تالي الليل مهموم
ما شفت ضحكته وراحة كلبه وحتى عافيته بس من عرفج كلما نزل وكال يوم عوض من الله الكلبي الملجوم والله يوم ابني جان بدون روح وشوفتج ردة روحه..

-يوم ماكو منها كلبها شايل حنيه الكون كله وعيونها متروسة قوة متحديه بيها كل ضروفها محد يكدر للسانها وداخلها ضعيف طفله وتريد الي يدللها نظره من عيونها انترس امل وتردلي روحي اشوفها بالكاميرا لو مشتعل وكل تعب الدنيا بيه ابرد وابتسم..

-هي تحجي واني ما كاعده على الكاع لا والله عبالك
طايره شكد حلوه نظرته عني وشلون حلو يعكس صورتي لامه الي تحجي مبتسمه وفرحانه الفرحة
ابنها طمنتني نضره الرضى الي بعيونها كلش..

-ما اجيت اكلج هالحجي لان هذا هو يعكسه بتعامله وياج جنج ما سمعتي مني اني من كتلج بس حتى تشوفين انتي شنو مكانتج عنده وما دام ابني مرتاح وياج عندي بالدنيا هاي بس يا امي انتي عرفتي قصتنا وعرفتي شكد وكفت وربيت وصبرت ويا ابوه وتالي دار وجهه وراح يدور حضن ثاني..

-الرجال مثل الطفل مو يعني عقله ما نضج لا بالعكس
كل فعل منهم يصدر من نفسهم محد يضربهم على ايدهم
بس مثل الطفل بتعلقه يتعلق بالشيء واذا شافه سهل يمل منه اني اخاف الله بيج من صرتي مره لابني واعرفج ما عندج احد الي يعلم وينصح يا امي هذا الكلام مخليته ترجيه الزينب وحتى شذى وان شاء الله انتي لان بعد صرتي وحده منا وبينا وجوهرج عكس تربيتج وانتي شنو ما انكر ما حبيت دخلتج علينا بس الوكت جان متكفل بيج وبين للكل معدنج شنو..

-ما راح اكلج تعبي ولا اقسي ويا وليدي بس يوم علمي انتي مره وما مجبوره تتحملين اكبر من طاقتج ما مجبوره تنحبسين بهالبيت اربعه وعشرين ساعه خلي يشوف بيج مسوؤلية دكي رجل يوم الشغلك يوم الي ترى هو مو دوامه هذا يناوب عن جماعته دوامه كلش اذا طول كلش يطوله اسبوع لا تحملين نفسج مسؤولية البيت كله علمي وجوده مهم بكل تفصيل خلي راحته
بيته مو شغله والشارع..

-وبنفس الوقت دللي خليج مره ماكو اصعب منج ومره
ام وتدلع ولدها شنو يحب شنو يريد سوي بدون ما تسألينه يجي تعبان من شغله لا تكلبين خلقتج عليه يلبس
ملابسه ايدج خليها ويا صيري امرايته كون وين ما يلتفت يشوفج ويحس بيج ويا..

-صفنت مستغربه كلامها بهاي اللحظات هي امه لو امي وشمعنى كلامها الي احسه مبطن مدري اني نسطرت بس اني اشوفه زين وياي وحتى لليوم ما قلل مني ولا استصغرني لا كدام غريب ولا قريب..

-باوعتلي مبتسمه افتر عقلج جنج زينب ما عنده شيء وليدي لا تخافين بس اني خوفي عليج يشهد الله لان لا الزلم تتامن ولا مكر النسوان يخلص الله لا يراويج شلون يلتفن مثل الحيه على ركبته للرجال وهو يصير
مثل الحمل الوديع وياها وينسى اصله ومرته وبيهم حتى جهاله يبيعهم بس بنظره من مره..

-علمي عليج امي والله يبرد كلبج التفتت على علاوي بس يوم لهنا وتعذريني اني ما احب بذره الحرام اعرف مو ذنبج ولا ذنبه بس يوم الاصل اله حوبته ابنج يبقى يمج حتى ما تنجرحين ما اتقبله اني ولا اريد شوفته وانتي اكثر وحده تعرفين شلون ما اطيق سيره دا.. عش مو عاد بزرهم..

-الدمعه تفتر بعيني عضيت شفتي احاول اصبر على نفسي.. عمه كل الي كلتي على راسي واحترامج من احترام ابو بيتي والله ما تدرين كلامج شلون طمن كلبي اني لا طامعه بيكم ولا رايده اخذه منكم ومخليته كدام عيني بكل خطوه بس الا ابني هو الخط الاحمر الي ما اسمح باي احد يتجاوزه احترامه من احترامي هذا ابني
الي وكل تصرف منه محسوب عليه..

-الله يشهد عليه شكد تعبانه ويا والفضل من بعد ربي للمخلص وعمه نبع عمه هالطفل شنو ذنبه وتنطبع عليه وصمه عار هو بريء منها ومع هذا مركزه على هالناحية قران كل يوم يسمع وتعلم اهمس ادعيه باذنه يلا يغفى ما دام ماشيه بي صح ما اخاف من الباقي..

-تعرفين شكد اكو مثل حالته وروحي شوفيهم اسمهم 
يرفع الراس والي كون عائله والي بار بالي ربوه وهذا اذا دل على شيء فيدل على انو حكمكم مو مقياس لان
هم شذنبهم يا عمه شذنبه وهيج يسمع كلام يهز البدن
والله ما غلطت ولا بعت نفسي قاومت لحد ما فقدت شسوي شبيدي بعد كافي ارحموا بينا كافي كلما احاول
انسى وذكرتوني كافي الله يخليكم كافي شلون يعني نحرك روحنا ونخلصكم..

-ضربت على وجهي ونار اشتعلت بصدري وهي بعدت ايدي كولي يالله على كيفج ويا نفسج يوم لا تسوين هيج بروحج منو حاجي عليه بس كتلج نفسيتي ما تتقبله
ما اكرهه بس ما متقبلته وهاي اني صريحه من ارتاحيت الج اجيت بنفسي متشكره ومعتذره منج بنفس الوقت وما عليج بكلام شذى زفيتها الج البيت بيتج يوم وابني الج لا تهتمين الكلامها فكري بكلامي زين..

-وقبل لا انسى اخذيلج اسبوع اقري سوره النور شوفي
حياتج شلون راح تنعدل مجربه امي انتي مجربه وراح
تشوفين الفرق الي بيها اكثر حتى من روحاتج للطبيبه
داومي عليها لا تنسين..

-مسحت دموعي وهزيت راسي بالقبول وهي رجعت
غيرت الموضوع.. باجر غدانا بيتج خلي نشوف طبخ
الموصلية شلونه..

-ابتسمت هلا بيكم بس شنو تحبون اطبخ بس عمه فدوه شذى لا تجي..

-هي ضحكت ولج استحي ام السان لا تخافين ما تجي
راح ترجع البيتها بعد لا تدعين عليها الدعوه ترجع
على صاحبها وتاذي..

-حجيت بفشله.. مو هي اذتني هواي ما ترحم قاسيه
وكلامها يجرح ويدك بالعظم..

-تهون بس لا تدعين علمودج والله الدعوه ترجع على
صاحبها وهالبنيه الله يهديها تعلوم الما تتسمه..

-سكتت ما حجيت شيء بعد كامت وصلت للباب مثل ما وصيتج هزيت راسي وهي راحت رجعت يم علاوي الي غافي بوجهه مليان برائه
احارب الدنيا لعيونك واذا محد تقبلك شنو يعني عندك اني اضمك بنص روحي منهم بسته وهو تململ رجعت
دكيت على ضهره نومته وكلامها ينعاد براسي شكد مره حقانيه وشكد ارتاحيت من ناحيه رضاها على علاقتنا بس اوف شكد ماثر عليها موقف رجلها..

-ثاني يوم تغدوا يمنا واني طايره من الفرح من اشوف
نظره الرضى بعيونها ومن تبتسم اشرتلي اكعد بصفها
كعدت وعمه نبع فرحانه واجزم انو هي الي حجت وياها مو بس المخلص كرصتني من رجليه وهي تضحك.. ما شاء الله شهالبياض مسودنه وليدي ام السان
ابتسمت خجلانه واكل وشعور حلو بداخلي..

-يومين وبالليل بين الي نايمه وبين الي صاحيه حسيت صوت القفل نفتح بعدها صوت مشي فركت عيني اريد اكوم والنوم بعيوني مسويلي اغراء رجعت سمعت صوت وكمت وبطلعتي من الغرفه ركضت واني اشوفه لازم بطنه ومحني يتقيأ بدايه الصالة..

-كلبي رجف اتقربت منه وخليت ايدي على كصته نار وهو ما بي يحجي كلمه مخنطل وكوه مفتح عيونه ملابسه رطبه من كد ما حرارته مرتفعه حجه بصعوبه وصوت شبه مسموع.. عينيني بس خلي اوكف احس المكان كله يفتر بيه اخ يابه..

-سندته وهو يسحل بروحه مددته على التخم ذبيت التك الثاني مال حذاءه واسمعه يون يربي شلون بيه شسوي
وشبي هيج منتهي..

-رحت للمطبخ ترست الطاسه مي بارد وجبت الخاولي
اول ما خليته على كصته احس سنونه وحده صكت بالثانيه لحاف زمرد بارده يحجي بتعب وعيونه مطفيه..

-كمت جبت لحاف وغطيته وفوكاها بطانيه وهو يرجف من البرد منتهي عيونه تعبانات بشكل واني مربطه ما
اعرف شسوي بهالليل اريد اكعد عمه بس شتسوي..

-يون ويرجف ومبين فلونزا وبالعظام فتحت الثلاجة وما اعرف شنو انطي من علاج اخاف عليه ربع ساعه
وفقد يهذي ويشمر بالحجي واني ارجف عليه..

-صوته يطلع بكل تعب ومن بين كلمه وكلمه يون ونفسه حار.. سيوفي بابا لا توكع تعال هنا حبيبي لا
تركض لج ابنج راح يوكع تعالوا هنا يمي تعالوا رجع
حجه وبترجي.. لك بابا وين عايفني وين
لا تاذي على كيفك خلي التراب صغير ما يتحمل لا تدفنه هنا ادفنه بكلبي لك بابا سيوفي وين رايح بحضني مكانك مو بالتراب..

-اني سمعتها منه لو كلبي نمرد نزلت دمعتي هي كوه الضنا ما ينسي لا من انت صاحي ولا حتى من نايم وتهذي الضنا اغلى من الروح هاي الي شكد عزيزه..

-رجع كمل وكلب الموجه على فداء .. لك فداء راح اشك **** كتلك بارده شكو تعاند كوم شغل البنكه بارده واذا فشرت اشكك شك..

-يلا فشر هذا ادبسز ومسقط مثلك مو مرتك تحبك ابن
القندرة ليش تركض وره الدكتوره هاي ام السان راح
تهجم بيتك اني معليه عود خلي يفيدك الفشار..

-متت ضحك عبالك فاكه البنج مو مريض وتذكرت من جان يتعب بالتنظيم ويخرط بالحجي وهو نايم طبعا متعلمه على الي يحجون بنومهم جانت بنت خالي هم هيج من نتعب نكتشف كل اسرارها بس المخلص كارثه كل شيء يخرط الا اسراره يكول الله يحبني ما فاضح
روحي لليوم..

-رجعت ايدي على كصته نار نزلتها لركبته ايدي بارده وجسمه حار جسمه كزبر ويهذي بارده
غطه بس غطوني..

-كعدت عمه الي نهبطت من شافته ليش ساكته ما ندهتيني اول ما اجه حجتها وتدور بموبايلها بالاسماء
واتصلت واسمعها تحجي ويا فداء ذبته وباوعتلي..

-كومي جيبي ملابس الرجلج فداء راح يجي ياخذه..

-اخذت تراك ورجعت يمها كوه رفعته راسه ما يكدر
يشيله ذبيت قميصه ولبسته رجعت لبسته البجامه نص ساعه وندك الباب وراحت عمه فتحته ودخل فداء سلم
وراح عليه بس خله ايده على كصته صاح.. خرب عشيرتك ابن الك****..

-ولك يمه لسانك انت مو بشغلك حجتها عمه نبع وهو
التفت حك شعره عذريني عمه بس هذا الكلب الجديد
خرب يومه بعلي شبعنا برد ليلتين..

-دنك على المخلص وسنده واسمعه يفشر بس بهمس
وذاك منتهي والله لو صاحي جان كسره نزله كوه يسحل
بي وعمه رادت تروح ويا بس ما قبل التفت عليه.. لا
عمه البنيه لا تخلينها وحدها هي ابره ومغذي وراجعين
ان شاء الله..

-رجعت فوك اخذت ملابسه خليتهم بالغسالة مسحت
الكاع وكلبي وفكري كله يمه وين يلا رجعوا وهو منتهي كوه يمشي واني عيني عليه مبرطمه الاذيه مو اله هذا قوتي وحيلي..

-فداء ما تركه للصبح هو ويا جان عنده ابره بالكانيولا
هو ضربها اله وخطيه يغفي ويرجع يفز يتحسس حرارته تالي من تطمن عليه يلا راح..

-اما ابو تراب خلص هذا اليوم كله هو نايم وعمه كوه
تجبره ياكل شوي شوربه علاوي كتل روحه عليه يريد
يمه كوه سكته وطلعتله العابه فداء مرتين اجه تطمن
عليه ومن يروح يضل يتصل..

-ثاني يوم جان احسن بس صوته مبحوح من الفلونزا
جنت كاعده قبله وصافنه عليه شكد مشتاقتله يربي وشكد طول بدوامه هالمرة..

-فتح عينه الي منعسه من المرض ابتسم وفتح ايده
واني اتقربت لحضنه دفعني.. لا تنعدين..

-رجعت حشكت روحي بي.. ميخالف مشتاقتلك..

-والله ما ينلام فداء من يفشر يعني من مريض تتموعين
وتطلع سوالفج السرسريه..

-ضحكت وحاضنته شيحجي خلي يحجي فرحانه بي
ويجي على بالي كلام عمتي وانترس امل اي هذا مالتي
الي اني وابني وبس لا شذى ولا حثالاتها ياخذنا مني..

-وين صافنه عيونج شبيها؟!..

-ما بيها شيء..

-اي ما بيها بس مليانه قلق وحجي؟!..

-تنهدت واخذت ايده نمت عليها ابد لا تعوفني ابد جنت ضايعه ومشتته وانت الي لميتني ضايعه ولكيت روحي بيك وراحتي يمك هنا وبس..

-صفن عاكد حاجبه.. امي شنو حجت وياج؟!..

-ابتسمت وعيني تدور بالمكان هذا وين يخلي الكاميرات يربي.. امك حقانيه وهواي تخاف الله هنياله الي عنده هيج ام رغم تمثل الصرامة بس حنيتها ما تكدر تخفيها بس شيء واحد بيها جرحني متمسكه بمبدا
بذره الحرام ما تنصلح دمعت عيوني مو ذنبه شلون بيه تعبت والله تعبت واني اصيح مو ذنبه طفل ومحد يرحم
بحاله من يكبر شلون..

-متاذي لا تخافين من اليوم اذا سمعت كلمه ابن الحرام
هنا لو جوه البيت احركه فوك راسكم هواي لحيتوا
بيها..

-ركز بعيني وسحبني عليه اكثر صرت جواه وبعده تركيزه على عيوني يحجي بمكر.. تشتاقيلي من اروح
مو وهنا تتهزمين يحجي ويدغدغ بيه ولحيته توها طالعه تجكجك بوجهي..

-حجيت بدلع.. اي والله شكد اشتاقيتلك بعد بس تطول
اخذ ابني ومتشوفنا بعد..

-عاد متعلمه ام السان وهالمرة الرحله وين يحجي مستهزئ..

-ترى احجي صدك ميصير هيج ما تكول عندي مره
وبيت كاتل روحك عالشغل لازم بي بنات حلوات وهيج حتى تناوب عن جماعتك..

-ضحك وعض شفته.. حلوات شنو يشكن **** المطي..

-عزا بعيني كوم روح خلي يفيدنك كوم والله عرفت واني اكول هذا ليش يحب شغله ونحجي على فداء طلعت اضرب منه..

-باس شفتي وكرص فخذي عيونه هايمه وذبلانه.. من وراج لا تخلين الواحد يضوك لا يشوف..

-خزرته روح السرسري روح بعدما احجي وياك وخرت ايده وحتى حضنك بعد ما اريده وجذب ما مشتاقه الك وخلي يفيدنك الحلوات وهذا صديقك اذا ما حجيت المرته زلم طالعه عيونهم..

-هاي كله وبعد ما تحجين وياي اويلي الله سحبني عليه وقيدني بحضنه رجليه لامه رجليه ويبوس بيه.. بالزلك
وهاي وين تفكر عندج السان بس ما عندج عقل يا حلوات بابا بالطين والتراب ومكابل الجريديه وزواغيرهم ولد الكلب..

-نوب مخبله سويتني ما ابقى ولا دقيقه لا شنو هذا بيتي
كوم اطلع برا كوم صوج الي منتظرتك مو صوجك..

-ابو تراب وهو يضحك.. اويلي الله شكيتي كلبي وطبيتي بي وترديني اطلع شلون وانتي بنص روحي..

-هديت وخليت عيني بعينه.. تحبني حجيتها بهمس وهو داخ دفعته وكمت اضحك وهو عض شفته اصبريلي..

-للعصر واجوي فداء ومرته شكد احبها هالبنيه مليانه طاقه وحنيه اخذتها وكعدنا بالغرفه واشوف عيونها بيهن حجي واني افكر بالطبيبة احجي لو لا زين اني ليش مركزه هيج بس والله انقهر عليها هو رجلها منين
يعرفها وليش حتى المخلص جاب سيرتهم بنومته يربي
تعب اوف اخاف تصير الهم مشكله بسببي..

-فزيت على صوتها وهي تسألني.. شلونج والله بالي يمج بس مالي خلك حتى اخابر هاي من طرحت حتى بيتي هملته وصار يومين من رجعت بعد رزايل من امي شبعتني وبيتج ما ينعاف والطفل يروح يجي غيره..

-صحيح كلامها لا تسوين هيج بنفسج ارتاحي فتره ورجعي سوي طفل..

-هو هم هيج بس فداء يخاف يكلي ما اريد عوفي من شاف حالتي..

-اكلج انتم عندكم من اقاربج اقاربه طبيبه؟!..

-اشو هاي ضحكت كالي فداء رجلج يكله ام السان راح
تهجم بيتك اي حبيبتي هاي بنت عمته وعلاقتهم طيبه ويانا البنيه هي هيج روحها حلوه ترى ما تكلب رجلي
ابو الفشار نخطبت بعد..

-واني نازله عليهم وكلما فتحنا موضوعهم وهددت المخلص بصديقه والا اروح واكول لمرته هو ينلام بيه
عمي اعترف ام السان..

-ضحكت ورجعت صفنت بوجهي بعدج ما متقربلج مو؟!..

-تنهدت وهزيت راسي بـ اي..

-انتي حاولتي؟!..

-حاولت كم مره بس والله ما اكدر محد يحس بيه محد
عبالكم اني راضيه بحالتي بس مو بيدي اختنك وترجع
عليه ذيج الايام موقف موقف وارجع اعيشه من جديد..

-كافي يا عيني ميخالف تهون بس انتي هم جربي ضغطي على نفسج والله مو علمود شيء بس هو هم
وما تخلصين منه اذا ما قويتي حالج..

-زين جربي غيري بشعرج اهتمي ببشرتج تجين وياي على يوم للصالون بلكي تتغير نفسيتج..

-تنهدت وافكر بكلامها وبكلام الطبيه والفكرة  الي بالي خلي اروح واجرب ما خسرانه شيء بس كون ما اتفشل ولا ارجع النقطة الصفر يارب..

-اتفقت وياها انطي خبر لابو تراب ونروح وبالي هواي
خطط لبدايه جديدة بداية طالبتها من الله يقويني وينسيني همي والقلق الي بيه..

نورا..

-طلعوا خالهم وولده علمود الكعده وهو يوصي بيهم محد ينفعل رايحين نتفاهم مو نزيد النار حطب والي يحجي ينطرد كدام العشاير..

-كرار شكد اصر يروح بس ما قبل.. وليدي وين تروحون ما عندي ثقه بيهم وكلامهم مخربط يشمرون منا ومنا ويتمنون بس حجه عليكم تريد تفجع امك بيك
لو تريد السالفه تكبر..

-رجع على علي.. خابرت على صديقك الرائد دلي
بالعنوان وخله يلحكنه..

-طلعوا والقلوب كلها تدعي واشوف علي متوتر يروح
ويرجع وكل شوي وطالع عينه على البستان طلعت يمه
خليت ايدي على كتفه فز.. الله شبيك هاي اني..

-شمطلعج روحي يم البنات بويه..

-طلعت وراك عوف البنات شبيك ما عاجبني وجهك
قلق صاير شيء؟!..

-شصاير يعني لا تخافين ماكو شيء وهاي اني يمج عليش هالقلق كليبي تعالي نكعد هنا..

-كعدت يمه وهو مخلي ايده وره ظهري وعينها علينا
هو ما يشوفها بس اني خوفتني نظراتها وعبالك هو راجع الها من اجينا لليوم وهي تخزر بيه وما طايقتني
ولو وكفت ويا علي تراقب وتخزر بعيونها عبالك بايكه
شيء منها..

-عكد حاجبه والتفت وين اني اباوع وهي طبت بسرعه ما خلته يشوفها.. منو؟!..

-ما ادري غلست وهو عيونه تغفي الليل بطوله ما نايمه
كلما افز اشوفه كاعد هالمشكله هدت حيله بالتفكير
كمت واخذت ايده كومته وياي.. بس ساعه وحده غمض بيها ترتاح مو زين والله راح يهبط ضغطك شوف عيونك نكلب لونها..

-هو يجيني النوم وما غمضت كلبي ما مرتاح نورا مشتعل نار..

-لا تخاف ان شاء الله ماكو شيء وتعدي بخير..

-ما خايف منو ذول الجريديه واخاف منهم بس خايف
على كرار على خالي وولده لا يغدروني بيهم فكري
كله بيهم ما مرتاح..

-كول يا الله والخاطري بس شويه غمض اخذته للغرفه الي نمنه بيها يمهم وهي تخزر هو ما منتبه الها بس اني كلبي لعب منها شنو هالصلافه ولاحكتنه من مكان المكان..

-فرشت فراش وخليت مخده بحضني واشرتله ابتسم بتعب يربي كاسر كلبي شكد ماثر هالموضوع عليه خله راسه بحضني وايدي تمشط بشعره خفيف وافرك براسه يحب هالحركة حيل تعلم عليها من سوه العمليه..

-غفى بسرعه واني ما نطاني كلبي ابعده من حضني رجعت راسي على الحايط وفكري مشغول شوكت تفض هالسالفه اخاف تكبر وذول حادين سنونهم منين طلعت هالسالفه الي تكدر الخلك..

-مرتين اندك الباب خفيف وراحوا واني ما كدرت اكوم
اما علي ذب نفسه عبالك صار شهر ما نايم يشخر بتعب
وما يدري بالدنيا..

-من الملل رجعت غفيت وما فزيت الا على صوت يرعب جمدت بمكاني وهو طفر على حيله الشعر مخربط والعيون جاحظه فتح الباب بسرعه واسمع
صرخة ليلى واصوات هوسه وبجي.. علي الحك
كتلوا كرار بس هالكلمه ضلت تتردد ابالي خليت ايدي
على اذاني ودموعي تنزل ما اريد اسمع شيء كافي
قهر كافي اتهسرت واردد بس كافي....

يتبع....

لا تنسون التصويت وتعليقاتكم الحلوه حبايبي..
تفاعلوا فجروا البارت حبايبي بالتعليقات حتى اكتب
بارت الكم اسرع..

اللهم صل على محمد وال محمد❤️