المخلص "باللهجة العراقية "

البارت الثلاثون

المخلص..
البارت الثلاثون ..
بقلمي رسل..
rasolaa7

انستا Rasolaa7

تعودتك
شهامة، وخوف ومكابر
تعودتك
محبة وليل ومسامر
تعودتك
خليل وخل

عريان السيد خلف..

-هسه شخبصتني بمرتك ما عليك مدللة وما عليها شيء
انت بس طاوعني واخذها ولا من احد شاف ولا من درى والبنيه حليوه وصغيره يبوي وعود لا تقصر قابل انت اول واحد ياخذله اثنين هي فترة وعود سوي الي تريده..

-سجين ونبتت بنص كلبي مو مجرد كلمات دخلت لاذني ثانيه وحده شعلت صراع بداخلي بين الي اروح
واهجم عليه لو انتظر ويا اما تبرد نار كلبي يا اما تشتعل اكثر لو سمعت رد اقسى من هالكلام..

-حسيت دخت وروحي دخلت بدوامه ذبيت الصينية بالكاع وبقيت واكفه بلحظه وحده شفافي ابتسمت وعيني نزلت دمعتها من بعد ما سمعت الرد على هالكلام..

-جنت قبل اكول لامي ما اتزوج الا واحد حلو وجنت ارسم واخلي مواصفات ببالي حالي حال اي بنت بفترة مراهقتها او حتى بفترة شبابها  مثلا جنت اريد زوجي المستقبلي يكون حلو وانيق وهاي اهم شيء عندي لا جنت افكر انو لازم يكون رجال وسند ولا جنت افكر انو لازم يكون مسؤول عن مره وبيت كل همي جان كون اخذ واحد حلو واتباهى بي مثل الي يتباهى
بحاجه عزيزه عنده..

-وجانت امي تكلي لا هلا  برجال شخصيته مو قويه
ولا هلا برجال ما عنده مسؤولية ولا هلا برجال ينطي بمرته ويقلل من قيمتها يم الي يسوه وما يسوه ويدوس عليها وعلى كرامتها..

-كلام جنت اشوفه عادي وحتى ما اهتم لو افكر بي  وارجع التفكيري من اشوف مسلسل لو فلم واتخيل هيج حلو وهيج شعره ويحبني وكل ما يتصل عليه وكال احبج واعيش باحلامي البعيده عن الواقع وعن جوهر الرجال الحقيقي..

-بس وخطين تحت هالكلام بس اليوم عرفت شنو معنى دعوات امي وشنو معنى كلامها الرجال مو شرط يكون حلو ولا شرط يكون اغنى واحد ولا شرط يرفع صوته ويشخط بسياراته ويستعرض بعرضه لا الرجال الي يفرض شخصيته الرجال الي يصون مرته حتى وهي
غايبه عنه الرجال الي كلمته وحده والاهم من هذا الرجال الي يحجي كلمته كلمه حق وما يتردد ويجامل
ويكسر الخاطر والاهم من كل هذا ما تهونين عليه وعلى كلبه يخاف الله بيج ويشوفج نصه الثاني الي الله كمله دينه بي..

-امسح دمعه وتنزل الثانيه وعلى وكفتي واحسه كب نار
من سوالف ابوه صاح بصوت مليان قهر وغصه مكتومه من الطفوله لهذا اليوم غصه تكونت نتيجه الكتمان والتراكمات وجميع الخيبات..

-انت حاسب نفسك اب قسم بالحق استحي منك
والله يطيح حضي بساعه الي بيني وبين الموت شعره وفكرت بيك صرت بين عيوني وفكرت لو ميت واني رافع صوتي عليك قبل كم يوم شنو راح يكون حسابي
بس انت بكل موقف تثبت بي انت ما تستحق حتى كلمه البويه مني..

-ما استحيت على عمرك انت وشيباتك ذني صارلك كم يوم تمثل وتبيع حنيه براسي وهاي تاليها
شمنتظر مني والله يابه احجي شنو منتظر مني امشي وراك على عمى عيوني واضيع روحي وره النسوان حتى اصير مثلك هيج تشوف نفسك قدوه حتى ابنك يقتدي بيك..

-عيد بكلامك كتلي الي تريده يصير وكدام الله وخلكه
الي اريده تطلع منا وبعد ما تشوفني وجهك عسى ما يكلولك جعفر راح انزله بالكبر ما ابريك الذمه لو وكفت
على ترابي..

-كم مره كتلك البنيه بالف نذر والف ياعلي يلا حصلتها
انت شعبالك وهيج تحجي عبالك مثل الي عندك وسهل
تبيع وتشتري بيهن بالفلوس لو شنو خلي افهم لان مخي
وكف تعب فكري وياك..

-اطلع برا فضحتني والله استحي اكول هذا ابوي
كل يوم طالع بسالفه عوجه وين تريد توصل ورجع صاح بي بكل صوته.. احجي لا تسكت لا تخبلني احجي مو دمرتوا حياتي الله يدمرك هم انت وهم ذيج
الي سافرت شتريد مني شتريد طالبني بثار لو الله ما خذني ولا سالفتك العوجة هاي..

-هيج عندك مشاعر المرة سهله وتلعب بيها انت هم تعرف الله من شمرت هيج كلام يابه غلطان روح قشمر غيري  اني مو تربيتك اني تربيه الحجي ابو عمار الي علمني المرة الزينه تاج
والي يحب ما يكسر خاطر محبوبه
والرجال المعدل كلمته وحده مو يسمع من فلان وعلان
ويهجم بيته..

-روح يابه روح عساها بختك رجفه جسمي هاي وارجع اكولها الك تفهم عاد ما تفهم مشكلتك البنيه احبها والي بالك ما اخذها لو ينزل وحي عليه ومن اليوم لا انت ابوي ولا اني ابنك مو تهدد تفصلني من العشيره
روح افصل وريحني..

-الفرق بينهم كارثه بهاي اللحظات جعفر الي اعصاب
وكلامه بصوت كل البيت سمعوا وابوه الي هادىء بهدوء مستفز..

-تمنيت عمو هنا بهاي اللحظات ويدخل يطلع اخوه لان
جعفر على حافه الانهيار وعلى لحضه يوكع من طوله
وهالشيء واضح من نبره صوته الي مليانه قهر وخيبه..

-وهنا قرر الاب صاحب الافكار المسمومة يكسر صمته من صاح على ابنه بغضب.. تطرد ابوك علمود مره كلب ابن الكلب اذا ما طيحت حضك لا وفوكاها يرفع صوته تربية شوارع صوجي اني الي خليتك هنا
والله صوجي لو من البداية حابسك يمي جان ما رفعت
صوتك عليه ولا رادتتني بوجهي..

-يابه اطلع منا لا تخليني اسوي شيء يغضب الله وعباده اطلع الخاطر الله شنو هسه تذكرت والي محمضه على كلبكم روحوا شوفولها واحد قشمر مثلكم وطلعوني من راسكم لا احرك البيت عليكم بليله ظلمه وحك علي..

-هنا عمار جان توه راجع وشافنا يم الباب اني وخاله اشر شكو؟!..

-من شاف دموعي وصوتهم العالي واخر كلام جعفر دخل يمهم وصارت الاصوات عاليه الى ان عمار طلع
عمه بعد ما صاح بي.. عمي الخاطر الله ما تشوفه مريض تريد تجلطه شنو انت ما تفكر روح عمي روح
وازين شاربي هذا اذا خليتك تعتب الباب وتشوفه..

-طلع من البيت وهو يسب ويغلط على جعفر واني رجعت بخطواتي وصعدت فوك الي صار اكثر من طاقتي شنو الي مسوينه لهذا الرجال وهيج يكرهنا
وليش هيج حاقد عليه ومصر يزوج ابنه والله العظيم كلامه نار وحركت كلبي حرك حسبي الله ونعم الوكيل عليك على فرفحه كلوبنا هم اني وهم جعفر..

-بقيت بالغرفة وطلعت نار كلبي بالبجي رغم سمعت كلام جعفر الي يبرد الكلب بس مدري شصارلي والله صعب الي سمعته يعني هيج كسر الخواطر هين عنده
بحيث يريد يزوج ابنه ويستغفلني ليش شنو فرقها عني..

-دموعي تزيد من اتذكر كلاماته لامن شاف ولامن درى خوف من الله ما عندك وتريد تستغفلني وتزوج
رجلي ليش بس كون راد على جعفر وافهم هالليش وشنو سبب هاي الملحه..

-كمت غسلت وجهي ورجعت اباوع على وجهي بالمرايا عيوني بسرعه ورمت ومبينه باجيه خليت مكياج خفيف كلش واصبر نفسي بنفسي واني اباوع عليها مو دكتورة لارا الي تضعف على شنو هالدموع
والدراما كله على بعضه كلامه ما مسموع لا من طرف جعفر ولا من بيت عمو ابو عمار..

-سمعت صوت الباب نفتح التفتت جان جعفر الي وجهه
باهت وروحه بخشمه.. مو صحت عليج؟!..

-كمت واني امثل الابتسامه والقوة هيج شخص مقدرني
ما لازم ينغث بكلمه علمود شخص ما يستاهل.. ما سمعتك حبيبي جنت بالحمام تعال اكعد سندته بمكان
العكازه وكعدته وحضنته راسي على جهه كلبه المكان
الي ارتاح بي من خبث وحقد البشر ويريد ابوه يحرمني منه من حرمك الله من شوفت الجنه..

-رفع راسي من صدره وعيونه تتجول بقلق على انحاء
وجهي.. جنتي تبجين؟!..

-لا شنو زعطوطه..

-تنهد.. لارا حافظج كلج على بعضج حافظج حجاها وباس عيوني ما يستاهل دمعه من هالعيون والله انتي بس خلي بينا ثقه لا هو ولا عشره امثاله يكدر يهزني
بكلمه..

-رفعت نفسي وابتعدت عن رجله الي مسويلها عمليه
بست راسه واني فخوره واشكر الله الي انطاني هيج رجال.. كلي ثقه بيك وبكل مره تثبت بيها انت اعظم اختيار اختاريته بحياتي قبل هاليوم من بعد الطب بس
بهالساعه الطب ودراستي من بعدك وهنيالي وهنيال
جهالي لان انت ابوهم..

-فتح عيونه مصدوم شنو جهالي حامل؟!..

-ضحكت.. لا شبيك تعبير مزاجي..

-ما بدر منه غير تنهيدته وحضنته القويه الي لحظات
طويله مرت لا هو الي حجه ولا اني مجرد حضن يداوي جروحنا حضن يثبت قوة حبنا وشكد لازم يكون الرجال سند لمرته والمراة علاج لروحه وجروحه اذا مو هيج لا زواج يستمر ولا بيت يتعمر..

-عمو من اجه وعرف خابر اخوه ورزله وحرمه حتى
من دخلته للبيت الي جان متوتر وكلها زعلانه على زعل جعفر خاله الي جانت ضايجه عليه وعمو الي فوك الساعه هو فوك يمه ويحجي ويا سبحان الي جعله
احن على جعفر من امه وابوه بس هو هذا عوض رب
العالمين الي يعوض شيء بمكان شيء بشكل مذهل..

نورا..

-تركتهم ودخلت بعد الي سمعته ودخل الخوف الكلبي
وحسب الي فهمته الولد الي راد ابوها الـ لارا يزوجها
اله هو الي ميت بالسجن لكوه مطعون وما لحكوا عليه..

-ابو لارا جانوا مطلعينه وره اسبوعين بس الشاب باقي
توقيف لكم شهر لان حسب كلام الرائد صديق علي وجعفر انو بسبب تهجمه عليهم كباله يبقى بالسجن..

-دخلت وجانت الوجوه كلها قلقه رحت يم ليلى الي تبجي كعدت بصفها وهي مسحت خشمها.. مصيبه لج
نورا مصيبة وكعت على راسنا الولد مات واهله يردونها دم..

-شنو دم زين احنا شكو هو مو نكتل بالسجن؟!..

-هاي عقليتهم بعد هو ولدنا هم السبب بكل هذا وحسب كلامهم انو ابو لارا طلبنا منه بنيه وراح ابنا يشوفها
وتالي ما شفناه بعد من السجن للكبر وابنا ما يروح دمه
هدر وهسه ابو لارا شارد ما ينعرف وين وهم رجعوا
على كرار وعلي..

-وتالي شنو حلها الهاي السالفه عفيه لا تخوفيني؟!..

-نورا انتي ما تعرفين الطلايب مال عشاير من توكع فوك راس الواحد هذول مبينين حادين سنونهم على الولد بس الله الي يستر منهم هم عود تهديد بس وشلون
زرفوا البيت لعد من يهجمون شلون يارب سترك..

-ابتعدت عنها ولميت روحي صافنه شنو هذا الحظ الي عليه اشرد من الرصاص والحرب والاصوات الي ترعب اشوف حال اتعس كلبي نقبض من كلامها وخوفي زاد اضعاف على علي واهله..

-شوي وارتفعت اصواتهم وجان صوت علي واضح وهو يتوعد الهم كلبي وجعني من كلامه كمت وره خاله
الي ضربت على صدرها.. يريد يجلطني هالولد يلا يرتاح شلون اني بي..

-جانوا مجتمعين بالصالة وخالهم يهدي بالوضع وهو الي تكفل يحلها ويتشاور ويا الطرف الثاني وعلي جان
يغلط عليهم.. خالي ذول يردون حجه والله ما انزل راسي الهم يردون الرائد سليم موجود وهو الي شهد
على كل شيء ابنهم طلع من البيت مابي شيء شمعنى
وره كل هالايام يذبون بلاهم علينا بيهم خير يروحون
على الي كتله وبنص السجن..

-ولك خالي مو بالصوت العالي والعصبيه تنحل الامور
اذا تبقى هيج وعلي ما تروح ويانا وهنا تبقى احنا نزيد
النار حطب لو نطفي الفتنه..

-وهيج استمر النقاش بينهم واحد يصيح وواحد يهدي
بينهم التوتر والمصير المنتظر هو جان الشيء الوحيد
الي بيدنا بهاي اللحظات وخاله تدعي ولازمه تسبيحه
الصلاة على محمد وال محمد الالف مرة باليوم
وحتى ليلى واني نسوي وياها بنيه الفرج من هالمصيبه..

زمرد..

-بالليل فرشت بالصالة وعمه ويانا وعلاوي يلعب فوك
راسنا بالمكعبات ومشغلين التلفزيون على مسلسل بدوي
هذا ذوق عمه نبع الي تحبهم وعلاوي يشيل الريموت 
منها ويتعاركون..

-دك التليفون وجان المخلص رديت عليه وجان صوته
بصعوبه يوصل بسبب الهوا العالي غير مكانه يلا كدرت اسمعه.. الهوسة يمج مو يمي..

-ضحكت هاي عمه نبع تصيح على علاوي لان ياخذ
الرموت منها وهو عباله تلعب ويا..

-اشتعلت عشيرته شكد اشتاقيتله شلونكم؟!..

-زينين بس البيت مو حلو وضوجة بدونك علاوي من يسمع صوت بالتلفزيون يدور بعيونه عليك..

-وام علاوي ام السان ما تدور بعيونها عليه لعد..

-لا لان عيوني على البدو وراسي نسطر منهم حجيتها
وصاحت عليه عمه نبع.. دهر صابج نوب ما يعجبونها
البدو وراسها نسطر كومي منا لا ابتلي بيج..

-وهو يضحك علينه.. ها ام لسان وينه السانج لو بس يمي تكول بيكيسي وخرطت..

-حجيت بضوجه.. شوكت تجي بعد ما اريد عمه نبع
اريد انام بحضنك اشتاقيتلك وهاي عمه نبع تجذب عليه
اكلها كمليلي السالفه تباوع على البدو يا سالفه تحجيها
وتوكف على النص وتخلي فضولي مشتعل..

-هاي غير سالفه هاي نبع الريحان دخلتيها بالنص شكو
كولي اشتاقيتلك خليني بحضنك ودك حلوك بنت الاوادم
تهيج المطي بهالليل..

-اني شعليه انت سرسري اني شحجيت وانت وين وصل تفكيرك مال سرسريه بطلت ابقى على البدو مال عمه نبع احسن..

-اي شعلت عشيرتي والبدو احسن روحي زمرد روحي منا لا اذب ضيم كلبي بيج حجاها واني سديت التليفون
بوجهه ضجت دك رفضته رجع دز رساله.. اني اعلمج
ام السان اذا ما شلعته بعضه هذا السانج بس خلي
ارجع يصير خير..

-ذبيت التليفون مبتسمه حتى رسالته وتهديده سرسريه
مثله رفعت راسي عمه نبع خازرتني يا ستار ياربي
ها عمه شسويت؟!..

-تتشكين مني ولج ام عطوب روحي شوفي منو الي يكملج السالفه..

-كعدت يمها وابوس براسها وادغدغ بيها وهي تدفع بيه وعلاوي خربان ضحك علينا التفتت عليه.. انت شكو تضحك يمه الوليدات يمه شلته وخليته يبوس بعمه نبع
يلا تصالحنا تريد تزاعلني وهي ما كملت سالفتها حتى
هذا هو اطك من الفضول..

-خلصت مسلسها واشرتلي اطفي التلفزيون واني طفرت طفيته وعلاوي خليته بنصنه ويشرب بمميته
وهي مددت.. اي وين وصلنا هسه انتي شكو تنبشين
بالماضي ايام ولت وراحت ولا تكعدين راحه..

-عمه اني سألتج سؤال انتي حجيتي على النص شلون لعد غير اعرف ليش هي هيج تكرهه اخوانها وبس تسوي مشاكل..

-يا يمه سالفتها سالفه هاي هي غير من اخذت جهالها
وردت الاهلها اخوي بعد ما سأل عنها ولا عن اولاده
المسمومه اخذت عقله وما خلت عنده فكر..

-تمرضت شهر بالمستشفى بوكتها جانت شذى اضن بالمتوسطه وين يخلونها جابوها يم اخوتها وام ابو تراب
ما قصرت وياها يا عمه هيج الله دخلها بكلبها صح هي
لسانها ما ينرد بس ما تصيحلها الا يمه تعلقت بيها وحتى علاقتها باخوانها جانت زينه..

-بس من مات اخوي عمت عيني عليه صارت المشاكل
والكطع جان مسجل البيت باسم الجبيرة عبن يعرفها
هي الي تلم اولاده وهي بنت الاصول..

-ويا يمه هالبنيه حاقده على حقد امها حقدهن على رجلج
شلون تهادد وياهم ورجع حك امه واخته من عيونها للمسمومه وهالتشوفين زارعه بنيتها هنا بس حتى تغث
ابو تراب عمت عيني عليه طردها جم مره وامه الله يسلمها ما ترضى وماشيه بوصيه المرحوم اولاده كلهم
هالبيت الهم..

-صفنت على حال الدنيا شكد غريبه ولو شكد ما طال
الظلم بيها لابد ينتصر المظلوم شكد معناة عاشوا هم ابو تراب وهم امه واخته سنين وهم بعاد عن ابوهم ولو يجي يشوفهم امهم ما تطلع وصبرت وكبرتهم ووصلتهم
وتالي رجع الحق الها بعد سنوات عجاف بعد تعب ووحده بعد بيت نهجم وحتى نكهه الحق ما تهنوا بيها..

-بسبب نزوه من ابوهم وبسبب كيد النساء نحرموا من
جو العائله نحرموا من هواي تفاصيل يشاركها بيهم
ابوهم والي يقهر انو هو بقرارة نفسه معترف ويعترف
انو المرة المعدلة والصالحة هي امهم وموصي هي الي
تلم شمل اولاده وهي الي تحافظ عليهم..

-عمه جانت تحجي واني فصلت افكر بموقف خاله شنو من صبر وتضحية عندها ما ينلام من يسميها بنت اصول لا رضت بالظلم ولا بهذلت اولادها وتالي بقوتها
وصبرها رجع الحق الها وحتى البيت الي تركته من سنين صارت هي المالك اله وهم الي نزل عندها..

-فزيت من صفنتي وابتسمت على المنظر جان تليفون
عمه نبع بيد علاوي ويبوس بي يخلي على حلكه وانترس لعاب اخذته منه ودمعت عيوني من شفته يبوس بالخلفية الي هي صورة ابو تراب وعمه نبع..

-تنهدت بقهر والتفكير بحد ذاته بهالموضوع متعب الى
درجة يهلك الروح قبل المخ هالطفل الي تعود يسمع
من عدنا كلمه ابوك وناشر على ابو تراب لو كبر
واكتشف حقيقته ومنو ابوه شنو رده فعله لو شذى حقرت ويا وحجتها بوجهه ما كدرت اتخيل الموقف
اختنكت عفتهم وكمت دخلت للحمام وفتحت المي ونخلط صوته ويا صوت شهكاتي..

-كلما اكول صفت حياتي يطلع شيء يعكر عليه شوكت ارتاح اخ ياربي تعبت من التفكير تعبت ولو شكد ما حاولت ما افكر علاوي ياخذني التفكير بي غصب بجيت هواي بجيت هالساعه الي اخلصها كل يوم بالحمام ابجي احسها مواساة الروحي المجروحه..

-غسلت ورجعت يمهم غطيت علاوي وعمه تباوعلي بقهر وكلي امرج الربج ما ينسى عبد من عباده كومي
يمه صلي ركعتين هدي بيها رويحتج ما يفيدج البجي
بس يذبل هالعيون الحليوات..

-كمت مديت سجادتي وسويت مثلما طلبت مني اصلي
ركعتين واحجي ويا ربي اطلب منه يبرد كلبي يتكفل
اموري ويحفظ عائلتي كملت والتفتت عليها ممنونه
من هالمرة الي الله يحبني وعرفني عليها..

لارا..

-صاحب الحظ العاثر احيانا حتى مع استقامته يبقى
حظه عاثرا..

-الانسان حياته بين الحلوه وبين المرة بس الي اعيشه
حاليا فوك طاقتي تفكيري وقلقي على جعفر من جهه
كلام عمي من جهه ثانيه والاكبر والي زيد همومي
تفكيري باهلي الي شوفه بابهم مسدود والباب متروس
اثر رصاص والبيت شبه مهجور تكسر روحي وتشعل النار والقهر بكلبي..

-هذا البيت الي ربيت بي هذا البيت الي احتضني من طفله منبوذه الى ان طلعت منه عروس وراسي مرفوع
باخواني الي لليوم واحدهم ما رفع صوته عليه الي
لليوم اتذكر كلام بابا احمد من يصحيلي بابا من يرسخ
بعقول كرار وعلي المسؤولية تجاه اختهم وتجاهم بيتهم..

-غسلت وجهي ورجعت استفرغ احس نار بمعدتي اريد اتقيا أحشائي بس حتى اطلع هالالم الي لازم معدتي من سمعت بالخير لليوم روحي فرفحت والسبب منو السبب
ابوي والله ما عندي وجه الي اباوع بي على اخوتي وامي من بعد عملته الخايسه يرجع يشرد ويذب
بلاءه على اخواني الي لو صار عليهم شيء تنتهي امي والله اعرفها كلش زين تنتهي ما تتحمل..

-غسلت وجهي وطلعت احس مروره بحلكي وجان
جعفر واكف بالباب يباوعلي بقلق يحجي يسال عن حالي واني ما اكدر ارد تعبانه وهالمرة روحي الي توجعني بس كون اشوف ابوي بعيني بهاللحظة الا
الاطلع ضيم كلبي كله بي..

-رجعت للغرفة وهو وراي مددت وتغطيت معدتي  ماذيتني حسيت على ايده تمسح على شعري بعده عن
وجهي ونشف وجهي مدد بصفي وسحبني لحضنه
حضنته حضنت طفله ولكت حضن امها بجيت بصوت
وهو يصبر بيه..

-كافي والله دموعج شكن كلبي نعلعلا ابهاتهم
هسه ما تكليلي ليش تبجين ما بيهم شيء والله خابرت
علي وحجه وياي والله ما عليهم شيء..

-ابويه السبب جعفر تفهم يعني شنو هم شنو ذنبهم وهيج يجازيهم يوم ما قصروا وياي ما وكف هذا بعينه شلون
يشرد وهيج يخلي الخطر عليهم شذنبهم يربي..

-لوما جريدي ما يشرد ويضم راسه كافي عاد شو مسحي هالخشم شوف الشفايف يربي هاي كلها من تبجي هيج تصير حلوه شبي حضي لعد..

-ابتسمت وامسح بدموعي.. هندي صاك شبيك بعد..

-هذا الزراك الما عاجبج يدفعون عليه فلوس ويكعدون
جوه الشمس ساعات على اقل اجاني مجاني..

-منو كال ما عاجبني فديت زراكك حبيبي انت حجيتها
وهو كرص خشمي.. والله فد لوتيه انتي باسني ورجعني
لحضنه وهو يسب بروحه لان رجله ما تخلي يتوكح..

-عيني للصبح ما اخذت نوم وهو كاعد وياي فكري
يم اهلي الي وكعوا بمصيبة بس الله يخلصهم منها..

نورا..

-يومين واحنا هنا بالبصرة الولد اعصاب وخالهم يتشاور ويا الناس وذولاك قافلين وحادين سنونهم ومتهمين علي هو الي داز واحد يكتل ابنهم..

-اما علي خالهم منعه من الطلعه لان راد يرجع البغداد
وياخذ ويا الرائد الي جان وياهم خاله من سمعت تخربطت ومنعته ما يروح لان روحته راح تعقد الامور..

-الاوضاع متعقده والخوف والقلق بكلوبنا لاول مره اشهد على حياة العشاير وعلى كوله ليلى اصعب من حياة الشرطي والحرامي وفعلا كميه السلاح الي تسلحوا
بي الولد والترقب بثت الخوف بكلوبنا وعبالك دقت ابواق الحرب..

-بس مع هذا خالهم جان موصي الكل ما يتحرك الا بعلمه ما راد يخسر دم وانما تنحل الامور بالتفاهم والديه لان بالاول والاخير مو هم السبب بموت الولد..

-من بعد هاليوم طلب الخال العشيرتين يجتمعون ووياهم شيوخ وناس كبار عسى ولعل تنحل الامور
بس الي فاجانا وعقد الامور وخربط كل الاوراق هو
اتصال واحد من لارا الي جانت تشهك بالبجي وهي
تحجي ويا اخوانها بقهر..

-مصيبة علي لا ترجعون بعد فدوه اروحلكم والله يكتلونكم وحتى  بيتنا كتبوا عليه بالصبغ الاحمر..

-مطلوب دم.. مطلوب دم.. عباره توشحت بها بعض
البيوت وذهب البعض ضحيتها هُجرت بيوت وتركها 
ساكنيها تدمرت نفوس وعوائل بسبب هذا العباره....

يتبع....

لا تنسون التصويت وتعليقاتكم الحلوه..
ارفعوا البارت حبايبي بتعليقاتكم..

اللهم صل على محمد وال محمد❤️