مساء الورد والياسمين عليكم فراشاتي 🦋🖤
قريري العيون
بقلم زهراء علي
ممكن تعليق للفقرات وتصويت+متابعه
مشاهده ممتعه
..........
رواء
خليت السجينه علئ بطني وانا اشهگ فجئ باوعت علئ شباك المطبخ صارت السما بوجهي استغفرة الله وشمرت السجين
رجعت صعدت وهم للصبح انا ابجي واعاتب بلسبحه مخليتهه جوه مخدتي حته من انام اضل اشم بيها الفها علئ ايدي أذن الفجر كمت كوه السبحه بيدي جريته كل قوتي وكطعتها بلنص الخرز مالها اطافر بكل مكان
كافي كااافي عوفني ماريدك اطلع من رأسي كمت توضيت وانا اناجي ربي يخلصني من الاانا بيه ويبرد النار المشتعله بداخلي
مرن 5ايام وانا يوم عن يوم حالتي تسوء سامر اخذلي اجازه واهلي حايرين بيه مرات افقد اضل بس ارمش
افقد النطق والاحساس واحلامي كله اشوفه كاعد يمها لويبوسها لو يتغزل بيها اكعد اصرخ
امي تكول هذا ضرر وشكد توسلت حته اروح وياها للساده وتزورني ماقبلت
لتحقو
بنفس اليوم فتحت تلفوني ساعه كامله ماسكت من الاشعارات والمكالامات اريده يهدئ حته اشوف كلهن منه شاف جهازي نفتح كبل اتصل كطعته وحضرته وحضرته من البرامج بس دموعي ماسكتت دخلت علئ الاستديو طلعت الفيديوهات اليدزلي ياهن ونصهن لفضل شاكر
اسمع وابجي
مريم: حنوشه فدوه كافي راح تموتين ولله شبيج شنو يوجعج داومت كوه اخذني سامر بالسياره
وحته من يحجن وياي صديقاتي احجيلي كلمتين واسكت
ماعرف شلون امشي واكعد واتحرك احس كل حواسي متجمده الا گلبي مجمر مايبرد ضليت ادعي ليل ونهار ربي ياخذ روحي مأكدر انتحر اريد هوه يرحمني وياخذ روحي
وره جم يوم سمعنه من قرايبنه ورده جايبه صارلهه 15 يوم
ابوي وامي كامو يحجون وامي خابرت السلام كلتله
ابوي كله باجر اروح اجيبهم انا
تمنيت ورده تجي بلكت التهي وياها ويا الطفل
ثاني يوم غبش ابوي وراح عليهم يجيبها اجانه الضهر ماطول وهوه تعبان متعارك ويا عمي ومامخليه يرجعهم
ام سلام: يمه عمت عيني لاشفناه لاشميته هذا وليد الغالي وجاسم يحرمنه منه يسلام يمه ياحضك الاسود بلبدايه يصيح اخذوه ابنكم هسه مايرضه يريد يحرمنه منه
ابو سلام: كافي يامره روحي طالعه وگلبي كضني لاتكولين لسلام وينقهر وهوه هناك
مريم: بابا حلو شنو اسمه
ابو سلام: بعده زغير بابا اسمه باسم امه مسميته
رجع سلام
وسمع وصارت هوسه شكبرها
راد يروح ويتعارك ويا اهل ورده
وابو كوه سكته ولزموه هوه وسامر
ابويه كاله خل نشوف وين توصل ويا عمك
ثاني يوم سمعت اجه رحيم بلستقبال گلبي ضل يبز بيه
ماريده ولااريد اشوفه ولااسمع صوته ركضت فوك
كعدت مثل كل يوم ابجي
ثاني يوم داومت وداني سامر لمحته واكف براس الشارع عباله عود راح اجي مشي مثل كل مره درت وجهي ودنكت
سامر: هلا صباح الخير
رحيم :صباح العافيه ضلعي
سامر: شنو وين رايح
رحيم: رايح اجيب ريوك وصمون من الشارع
سامر: تعال اصعد ويانه انا اوصلك
رحيم: لاانا اروح هذا هوه
سامر: اصعد اريدك بموضوع
صعد شميت عطره وختنگت
رحيم: سلام عليكم
رد عليه سامر وانا مارديت باوعت للمرايه
الزغيره شفته يباوعلي درت وجهي ودنكت ماشلت رأسي وصلنه
سامر: دربالج علئ نفسج حنوشه اذا دختي خل يتصلون علينه ونجيج
هزيتله رأسي ونزلت اسمع رحيم يسئله دخلت
مرر اسبوع بليل رقم دزلي رساله
💬عليج العباس ردي بداعت اهلج ردي عليه لاتحضرين
عرفته رحيم
💬شتريد
💬ولج شنوو شريد اريد رويحتي رواء لاتقسين عليه والله العظيم الليل ماانامه
💬هه ليش انا الانام كافي رحيم عوفني لاتزودها عليه كافي روووح لك انت تعرف شسويت بحياتي انا نفسيتي تحطمت تعبت انخذلت مستحيل اتخطئ وانته تريدني احجي وياك ونرجع من جديد من بعد شنو من بعد زواجك وخيانتك الي لاتكلي انجبرت لا تكول غير شي خلص الصار انته سويته بكامل عقلك ومستحيل اسامحك طلعني من حياتك لاتحاول تجيني وتحجي وياي هاي هيه خليني اعيش بوحدتي وبألمي. مع السلامه الله يسعدك،
وهذا جان اخر كلام الي وي رحيم ودعته وروحي وياه ودعته وانا كلبي نار علي وافكر شلون اتناساه بس مانسيته ولالحضه عايش بگلبي. ضليت دوم اتمرض
من البجي والسهر وفوكاها ادرس
صادفني هواي مرات وحاول يحجي وياي وانا اتشرد منه
مره اجتنه ام رحيم وسئلتهه امي شلونهم رحيم ومرته
كلتلها خيه جنهم اخوان كلمن بغرفه ورحيم بس يشوفها يشرد
كل ليله تمر عليه سم اطلع السبحه الكطعتها لامتهه ومخليتها بعلبه اشتمها واتلمسها وارجعها احس الخيط مالها ذبل ورتخئ من دموعي التنزل عليها
ابوي خابر عمي ابو حنان علمود يكللهم يردون يجون هوه وسلام وامي يرجعون ورده
ثاني يوم عمي خابره وكله خويه يكول ابو حازم لاتجون ولاتعتبون خل يصير عمر الولد سنه وطيكم ياه
سلام راد يروح وغصبا عليهم يرجع ورده
ابوي طاح من گلبه ونام مستشفئ فتره ولتهينه وياه
مرت اشهر وخلصت السادس بمعدل ناصي وماقبلت ادخل جامعه من كملت وراها بااسبوع من كملت اجه رحيم خطبني من اهلي
سئلني بابا ورفضت كتله ماريد اتزوج مرت بعد 3اشهر ورجع خطبني وحاجاني سلام هم رفضت وكتله ماريد اتزوج
وكل ماارفض انا انهار من حبي اله اتمنه انسئ وينمحي كلشي من گلبي وروحي
ابويه كال السلام خليها نصبر ونشوف عمك وين تاليته خاصه من سمعو مرجع علاقته ويا ابو ناصر كلش نقهر وكال ولله بعد ليوصلهم
ورده
باسم فدوه لگلبه ابد مامتعبني النهار كله نايم وبليل يكعد بس مره لو مرتين حته ميبجي بس انا عيني متاخذ نوم خاف يكعد ويكوم يبجي وانا ماادري بيه
مرات من يكوم يبجي حته ماعرف اكله يمه اكله حبيبي
حازم خطيه من يجي من شغل يجيبله حفضات
وحته أخذنه للمستوصف لقحناه
عمره اسبوعين واجه عمي عارك ابوي يكله نسمع من الغربه ورايد يرجعني وابوي مارضه طلعله باسم شافه ورجعه وماخلاني اطلع اسلم عليه عمي خله وراح وهوه زعلان حته ماي ماشارب
ابوي رجع علاقته وياابو ناصر وكل يوميه وكال حرامات ولله خسرنه ابو ناصر علمود اخوي وابنه وانا اعرفهم مابيهم خير هذا باع ديرته وراح يركض وره النسوان
صار ٤٠ يوم من جبت وكمت على حيلي وكمت اساعد امي بشغل البيت ومرات اذا ابوي مو هنا هم اساعدهه على شغل بل بستان
واساعد البنات على الحلال هيج خفايف هنه مايقبلن بس انا گلبي مايطيني أشوفهن تعبانات وانا كاعده
ماسه وفاطمه كبل يجن من الحلال كبل على باسم وخصوصاً ماسه تشلع خدوده بل بوسات تطلع روحه للولد
ويطلع برطمه ويكوم يبجي منها
ورده: ولج شلعتي خديداته وجعتيه هاي مو بوسه هاي شفطه
ماسه: ولج مااشبع منه روح خالته هوه وبعدين شعليج انتي انا خالته وبكيفي
ورده :ياااا نوب شعلي خراعة خضره هنا غير امه انا
طلعته من كاروكه وكمت ابوس بيه واشم بيه
خليته بل كاع وحليت اكماطه وهوه كام يفتح بأديه رجليه فرحان
لزمت ايده وكمت ابوس بيها زغيره وناعمه
تنهدت بداخلي وانا كل شويه اذكر سلام
وكول معقوله لهسه ماعرف انا جبت ومسئل على ابنه ولا فتقده
كلبي كل يوم يشتعل من الغيره
اخاف يرجع العذراء واكيد هسه عذراء صفالها الجووو
وبعدين رديت على نفسي هيه انا هناك وهيه ماخذه راحتها على الآخر بدون مستحى
خليتله ماي بلممه مالته وخليته بحضني وكمت اشرب بيه
شرب شويه وبعدين خليته على فراشه بلسله
وتمددت يمه وانا بالي مشغول بسلام كل شويه وكلت شلون صارت رجله صار زين منها لولا
تفكيري كله صاير بيه وشتاقيتله وي كل حركه يسويها باسم جان بدي انا وسلام نشوفها سوه وهوه يحب الاطفال
ذكرت لمن كلي نربي ابنا على حب الله وانا ماادنالج ولا اوصل حدج والي تردينه يصير
بس بنفس الوقت ماكدر انسى خيانته اليه
استغفرت ربي وكلت الله كريم
مرت الايام وتعودت اكل لباسم ماما وصار روحي من الدنيا فدوه لگلبه وكل مايكبر يحلى شعره ثخين وأسود وهوه ابيض وعيونه كبار وسود ورموشه أطوال كلش يشبهني وحلكه مثل الفراوليه ويخبل مثل الملاك
كل يوم اسبحه ولبسه ابيض وخليله كحل لعيونه يطلعن يخبلن
امي خلتله شذره مال محبس بشعره كالت من العين يمه
حازم يموت عليه ومصطفى اول مايجون عليه يشيلون ويبوسون بيه
وهوه فدوه لگلبه اي واحد يصيحه كبل يذب نفسه عليه مايستغرب من احد
صار عمره ٦ أشهر وهوه خفيف. من عمره ٣ أشهر كام يكلب
كمت اسويله شوربه وبديت اوكله يوم عن يوم تعود وكام حته صدري مياخذه يريد ياكل وانا هم مابيه حليب
بشهر السابع طلعله أسنان وانا طايره من الفرح بيهن كلساع اباوعلهن. بلثامن صار يوكف ويطيح
امي كالت وليدج نادر وشاطر لا تحجين يم احد اخاف عليه
إنا مخليه بركبته اية الكرسي حته ينحفظ من العين
وقبل لا انومه اقري علئ رأسه قرآن
وعدنه ام بي ثري زغير وصيت حازم جابلي رام وترسه قرآن وجابه
كمت اشغله واخلي صوته ناصي وخليه يم راسه من ينام
صرت احرص عليه من كلشي
هوه هادئ فدوه لكلبه ابد مايبجي لو يتحسس يضحك للهوئ
مره حازم اجه يصيح معصب
ام ورده :خير شكوو
حازم :ابوي يكول لازم تبني حضيره يريد هوه وابو ناصر يشاركون ويجيبون حلال يخلوه ربايطي
امي شهكت
ام ورده : منو يبنيه عمال لو احنا
حازم :ديري بالج عمال يكول انتم شعدكم
امي بقت تحجي وكالت ولا أمد ايدي انا مريضه وكلساع اموت موته ويريدني ابني ولا احط ايدي وشيريد يسوي خليه يسوي
حازم معصب وخله وطلع
إنا بقيت مقهوره على أمي وحازم
لان البناء مو سهل وخطيه هوه عده دوام
ثاني يوم خطيه حازم ومصطفى
جابو تراب وحازم كل يوم يكص من التراب ويسويه دائره وينكعه
بل ماي وبعدين يصير طين وخليه عليه تبن ويركه برجليه هوه لو مصطفى وامي تشتغل بديها هم
وانا انكل على راسي بل طاسه واخلي بل قالب مال طين
وارفع القالب حته تصير ابلوكه
أبوي بس واكف يتآمر علينا واذا احد غلط بشغله كبل يكوم يصيح
وخصوصاً انا وحازم
إنا اكمل الشغل واروح اغسل من ابطين واروح لباسم بالي يمه اوكله واشربه هوه صدري مياخذه بطل منه
يضل ابوي يصيح اذا عفت الشغل واجي يمه
اخليله فراش واخليه اله على طيور الجنة ويضل يباوع وهوه ساكت
صرت اموت من التعب بل نهار من كد الشغل لازم نسوي طين ونخلي عليه تبن وننكل للقالب
ونكص ونرجع ثاني يوم نكلب البلوك حته ييبس من الجهه الثانيه
ونخليه ٣ايام ونرجع نصفطه على غير جهه
استمرينا شهر على كص البلوك وانا تعبت من كد الشغل وأديه راحت ونترست جروح وجهي صار اسود وشاحب من التعب وشغل الي من الصبح لليل
حته ابني مااشوفه بس بليل
الشهر الثاني بدينا بل بناء
وإنا حيلي ينهد من اشيل طابوكه على كد ماهيه ثكيله ماسه وفاطمه للحلال واحنا نشتغل بل حضيره انا من يصير وكت الغده اروح اسبح واخبز وسوي غده
خطيه حازم ومصطفى حته مايذبون ملابسهم لان بس يتغدون وينامون شويه يرجعون يشتغلون. وحازم يداوم ويرجع بوجها علشغل
و كام مايطلع للسوك مثل قبل وابني حته حفضات ماعده ولا ملابس ملابسه الخيطتهن امي صارن زغار عليه
واكو كم مره من صار اجن الأمي تاديت واجب خلن بكماطه فلوس
صارت دلاعته ١٣٠
وهم نطيت حازم جابله ملابس
هسه صارن زغار عليه
والبقيه حفاضات كمت اودي وي حازم
خطيه هوه مايقبل بس انا اكله انته شعدك هوه شغل يشتغل بس بلعطل
بقينا نبني ٣اشهر يله خلصنا منا لمن خلصنا احس نفسي نحسبت وي الأموات
بهاي الفتره وليدي كام يمشي فدوه لطوله وصرت أعلم بيه
يكعد بلتواليت لان حفاضات ماعندي ولا عندي فلوس وقبل حازم يجيبلي وهسه حازم
مهدود حيله بشغل وماعنده
وحته امي رادت اكثر من مره تاخذ من ابوي وتودي وي ابن جيرنا بس انا مااقبل أكلها لا يمه
هسه راح يكوم يمشي وانا أعلمه
وكل عاده امي تكوم تحجي على بيت عمي وعلى سلام لان مايدز مصرف لأبنه
ذبيت حسره ولمت سلام لان صدك ميفكر بابنه ويدزله مصرف
كملنه الحضيره وسقفناهه واليوم انا وحازم وامي كاعدين نشتغل بل معالف
حازم يشتغل وانا وامي ننكل اببلوك والطين
الساعه ٩صبح تقريباً شويه وسمعت صوت واحد يصيح حازم
صحت على حازم كتله: ياهو هذا الي يصيح حازم
طلع حازم من الحضيره وصاح :ياهوه وينه
ورده: صوت جاي من يم بيتنا
حازم: هاااااا ياهو هنا هنا تعال
ونله سيف صديق حازم جاي وبيده باسم شايله
إنا كلبي نخمش كلت يمه وليدي اضنه طالع بره ولاكيه سيف وجايبه
سيف :ولك حت الفروخ سمعتني وانته ماكو شسوي اليوم ماخلصت العماره صارلك ٣اشهر دك بيه
حازم: شفتك هل كل يوم تكول خلي اكطع على صويحبي اعاونه على شغل
سيف :والعباس هم انا ماكاعد النهار كله اركض بل عيشه سوده اكلك منيلكم هذا الفرخ شو يخبل
اول مره اشوف فريخ حلو
حازم: هذا ابنك افه نسيته
سيف :العباس عليك لا جذب قصدك المرمر احوالنا
شنهي بعدهم هنا ماردت امه
حازم: لا يخوي بعدها ماردت وهسه انته شعدك جاي شتريد
رد سيف بدون مايجاوب على سؤال حازم
وهوه شايل باسم ويبوس بيه
لزم رجل باسم
سيف: خاب عثرك اخو زينب ليش الوليد بليه قندره ورجليه داخل بيهن شوك من قندره على راسك
حازم: يلبسونه ويذبها خ...... لا تاكل من صباح الله
هوه اصلا بسومي ماعنده حذاء
رفع ايده سيف
سيف: شلونج خاله ام حازم عويفيتج شلونها
والتفت عليه وبسرعه دنك
ام ورده: هلت خاله يبعد كلبي شلونك شخبارك امك شلونها مريتك
سيف: بنعمه
باسم شافني وكام يشمر بروحه عليه نزله سيف واجاني يركض
حضنته وبسته وشلت شعره عن عيونه لان شعره طويل ونازل علئ عيونه
حازم :شرايد احجي عندي شغل اريد أكمله لا تكطعني
سيف: والله خويه عندي طعامات وأريد وياي تنثرهن باجر اذا ماعدك شغل
حازم: سهله بس عاوني اليوم على المعالف واروح وياك باجر اعاونك
سيف :يابه تامر
ورفع دشداشه وشكلهه وكله يله شسوي كلي
إنا من شفت سيف راح يشتغل ويانا اخذت باسم ورجعت للبيت
ذبيت حسره ولمت سلام لان مايفكر بينه معقوله مايطك گلبه علئ شوفة ابنه لازم يسوي المستحيل حته يرجعنه
سيف بقه يمنه على الغده حازم كله لاتروح ضل تغده هنا
وباسم كل شويه يروح يمهم وذاب روحه بحضن سيف
وسيف مكيف عليه وكل شويه يكل لحازم راح أخذه اليه
وليدي هذا
حازم يشاقه يكله اخذه جاا وذا اخذته غير ابنك
راح سيف لهله وباسم مجلب بيه يريد يروح وياه
وسيف ماخذه وياه كايل لحازم بس اوصله وياي للبيت ورجعه
اجه حازم وكلي وانا تسودنت شلون يقبل سيف ياخذه وياه
بله بعد مارجعه اليه لو ياخذه ويسجله باسمه وياخذه مني
حازم: شوف شلون تفكر بويه تخبلتي انتي لان مجلب بيه وهوه خطيه ماعده جهال كال خلي أخذه وياي شويه ورجعه
دكيت روحي
ورده: هسه تروح تجيبه
حازم: ولج عيب شيكول عليه الولد هسه هوه يجيبه ويجي وخلاني اتحركن وطلع
بقيت الوب وگلبي ناااار على باسم
ام ورده : وين يروح غير عد سيف وسيف خوش ولد واكيد راح يوديه لمريته تشوفه ويجيبه لا تخافين عليه
وصدك الغروب كلش ولن سيف جايبه وجاي مصطفى طلع عليه واخذه منه وجابه اليه ركضت عليه حضنته حيل وكمت ابوس بيه بخدوده
نتبهت على رجله لابس حذاء شركز جلد
ورده: ماما منو جاب هذا الحذاء واشرله علئ رجله
باوع عليه وأبتسم وكال بببا بببا
ماعرف شنو صارلي من سمعته هيج كال
ماعرف شلون طلعت مني وضربته على حلكه بخفه ورده: لااعيببب لا تكول هيج كول عمو
باوع عليه وطلع برطمه بزعل وجنه يكلي ليش ضربتيني لان هاي اول مره اسويها
ضجت ما كدر اسمعه يكول بابا لغير سلام حضنته حيل على كلبي
ورده: نكسرت ايدي ولا امدهه عليك حبيبي انته يروح امك وعمرها
ثاني يوم حازم راح وي سيف يعاونه على الشغل بل كاع
ام ورده: اكلج ورده انا راح اروح لبيت الشيخ اشوف مرته يكولون الشيخ مريض والامه كلها مكلوبه عليهم
ديري بالج على البيت وعلى ابنج مو تخلينه يطلع وهاي السيارات تارسه الشارع كلها جايبه على بيت شيخ
خاف دعمه سياره يمه
احنا بيت الشيخ قريب كلش على بيتنا
ورده :خوش يمه راحت امي وانا كملت شغل البيت وسبحت باسم
ولبسته دشداشه امي خيطتها اله لان ماعنده ملابس
مشطت شعره ولبسته حذاء وضل يلعب وانا رحت اغسل ملابس
العصر حازم كال راح اروح على بيت شيخ لان شيخ مريض وكل الوادم راحت
إنا وسيف راح نمشي ورده حضريلي الحمام
حضرتله الحمام سبح وباسم يباوع عليه ويشيل بدشداشته عود هم بدليلي حته اروح وي خالي
حازم: خالي اكعد وين تريد خل روح شوف سيف مااجه
وباسم راح ركض للديوانيه
حازم مشط شعره وخله عطر وطلعت شحاطته مسحته
حازم :عدل عدل بعد اخوج ولج هسه الأمه كلها هناك لازم أخوج يطلع بيه لمعه شويه
ورده: هههههه تخبل انته والملابس تكشخ بيك موانته
حازم: ام بسومي الذهب عيونج التخبل هههههه
ابنج تأخر كومي شوفيه وين راح لا يمشي على صفحه
طلعت اشوف باسم رحت فتحت الباب الي يطل على ديوانيه
وشفت سيف مخليه بحضنه ومنطيه تلفون وباسم يباوع
رجعت وكلت لحازم اضن سيف موجود لان شفت شحاطه بل باب
حازم: هاا يله انا اروح تعاي اخذي ابنج
وكفت وره الحايط حته حازم يجيب باسم
شويه وصاح
حازم: أم باسم باسم راح يروح ويانه مجلب بسيف وراح ناخذه
كلبي صار مثل نار من تصرفات باسم
باسم طبعه هيج اي واحد يشوفه كبل يجلب بيه وخصوصاً اذا صاحله وباسه
ابد مايستغرب من احد غريب لو يخاف مثل بقية الجهال
مره اجو ناس على بيت عمي ابو حنان يشترون حلال
وهوه جان هناك ويكول عمي ابو حنان راح سلم عليهم
واحد واحد وزلمه كايل لابو حنان
هذا ابنك
عمي ابو حنان كايله لا ابن ابن اخوي
كايله زلمه هذا معدل من زغره
إنا كلت مو الك لان ولدك مايسلمون حته لو يسلمون يسلمون بس حجي ميصافحون
نفخت بعصبيه وقررت بعد ماخليه يطلع الأحد
رحت سويت عشا ونضفت البيت
وخليت ماي وثلج بل ترمز
صارت الدنيا الغروب اجه الحلال هم لميته وي لبنات
ماسه:مشمش گلبي وين
ورده :راح وي حازم وسيف لبيت الشيخ
ماسه: اشو السلاله كلها طايح حضها هذا عليمن طالع
ورده: سدي حلكج ولج لا أحد يسمعنا. ويصير كتلج عمل شعبي
ماسه: خوش سكتنا بس انا مامجذبه
وخصوصاً على رجلج ابو صماخ الي ابنج صار عمره سنه وهوه ماكو لا سئل عليه ولا كال حته مصرف مايدز اله هسه تلكينه مزوجله وحده من بناتهم وعايش وياها احسن عيشه
نغزني گلبي من كالت ماسه هيج وكلت يسويها سلام ويزوج
وخصوصاً بعدما كتله انا ماريدك ولعبت نفسي منك
بقيت افكر بحجي ماسه وكلبي معصور
ذكرت عذراء شلون جانت ذابه نفسها على سلام اكيد هسه تزوجها من وراي وخلفتله حته مايسئل بعد علينه ولاعلئ ابنه
بقيت لليل وانا كلبي معصور من كلام ماسه يعني سلام يزوج
ويعوفني يمه اكتل روحي ولا اشوفه مزوج
اذن الاذان وحازم ماكو وحته أبوي هم جان بشغل و رجع وحازم ماكو
صلينا وتعشو همه وانا كلبي يلوب على ابني
شويه ونل حازم جاي وجايبه
كبل طفرت وأخذته من حازم
وحضنته
ورده: وين جنتو ليش تأخرت
حازم :ضلينه للعشا مسوين عزيمه وبقينه تعشينه بعد وي الوادم
طلع من جيبه ٢٥ حمره
حازم: هاج هاي مالت باسم
ورده: منين
حازم: ابنج راح لشيخ ومد ايده وسلم على شيخ وكعد بصفه
وشيخ كال ولكم المن هذا السبع هذا معدل وابن شيوخ وابن دواوين من زغره
وكتله ابن سلام ابن حامد آل....
رد شيخ ونعم مية هلا بيكم وليدي
وشيخ مد ايده على محفضته وخلاها بيده
ورده: يمه ولك فشلتني وشلون تأخذهه موعيب
حازم :شبيج وياه خليه يتعود من هسه يسلم مو يطلع فاهي ويتلبد مثل نسوان
شمر نفسه بحضني وكام يفرك بعيونه يريد ينام
أخذته بدلت ملابسه وفرشتله فراش نومته
ثانييوم عمي سامع بل شيخ مريض وهم علمودنه وجاي واجانه
وهم حاجه ابوي علمود يرجعني بس ابوي مقابل. كايله ورجلها الشفيه مگرم ليش مايجي حته ماسئل علئ ابنه لايكول ومتعركين هوه وعمي وعمي كلبه كايم يوجعه وحته ممناقش ابوي مخلي وماشي
السبحه مالت رحيم الي عد رواء 😔💔
تصبحون علئ الف خير 🦋