قريري العيون

البارت خمسه وثلاثون

مساء الورد والياسمين عليكم فراشاتي 🦋🖤

قريري العيون

بقلم زهراء علي

ممكن تعليق للفقرات وتصويت+متابعه

مشاهده ممتعه

. يوماً ما ستزوركم أفعالكم ، فلا تفجعوا منها .🥀

..........

حازم راح من صفحة الرجال وانا من صفحة النساء
وصفلي مكان كال هنا نلتقي بس تكملين
هزيت راسي بأي
رحت توضيت واجيت دخلت للحضره
هنا بهذا المكان الطاهر ناس تتقصده لتبرك والزياره والي عنده مريض والي عنده حاجه يجي يذب همومه هنا بهاذا المكان الطاهر
شعور راودني غير شي وانا ادخل للحضره الشريفه دموعي كامت تنزل على وجهي بحركه
لزمت شباك بيدي

حجيت اجيتك سيدي مهزومه من هول الدنيا وأهلها
دخيلك ياسيدي ومولاي لا تردني من بابك
دخليك من الدنيا وكاسها المر الدنيا جرعتني المر  من زغري وانا ماعندي اي طاقة تحمل بعد
دخيلك يامولاي ماعرف شنو اسوي ولا اعرف اتصرف ولا اعرف شنو الي ينفعني ولا شنو الي يضرني
كن معي ولا تتركني طرفة عيناً ابدا
بجاهك عند الله ياسيدي تقضي حاجتي وينصلح سلام ومايرجع لذيج الدروب الموزينه
ماعرف كبل اجه اسمه على لساني وانا ادعي فجأه

دعيت ربي يهديه على درب الصالح ويسد بوجها كل دروب الحرام ويرزقه لذة حلاله ويحرمه لذة معصيته
مسحت وجهي ب اللهم صلي على محمد وآل محمد.

رحت لغير صفحه صليت صلاه الزياره وسبحت قريت قرآن وقريت حديث الكساء
حسيت براحه نفسيه غير شكل وتمنيت ابقى هيج دوم
إقرا وامسح على بطني حته ابني يتبرك بهاي الأجواء الدينيه الطاهره

كملت وطلعت لكيت حازم منتضرني بلمكان الي تفقنا عليه

حازم: الزياره مقبوله أن شاء الله

ورده: منا ومنكم

حازم :تعاي نشوفلنه مكان نكعد بيه شويه
هزيت راسي ومشيت وراه
كعدنه بل صحن مال الضريح والجوو جان يخبل دافي جان طلوع الشتاء
بقيت ساكته واباوع على الناس والعوائل الي كاعده والي تصلي والي جايبه وياها اكل وكاعده تاكل
جانت مره عجوز كاعده يمي وجها ابيض وبوجها دك هذا الي اغلب حجياتنا داكته على وجوهن وأديهن
تسبح بسبحه زركه ولابسه محبس بيدها  الشذره مالته زركه ومزغرف بذهبي
وعطرها يجنن مال عمبر  الي ميطلع من الملابس
لازمه السبحه وتسبح وتباوع عليه
كل ماارفع راسي الكيها تباوع عليه. بعدين ستحيت كلت ليش تباوع عليه

حازم :راح اجيب شي ناكله. مأتخر عليج ضلي بمكانج

ورده: اي

حجت الحجيه  بابتسامه وهيه تأشر على حازم براسها:أخوج

ورده:  اي

الحجيه:  الله يحفظه منين جاين

ورده هم من القضاء بس بيتنا بل قريه مال ال............

الحجيه:  هااا عرفته
باوعت عليه وكالت  انتي حامل
تعجبت بلبدايه وين عرفت حازم اخوي و شلون عرفت انا حامل بعدين نتبهت على عباتي شويه زالفه عن بطني بس هم زغيره موكلش حته ابين حامل

هزيت راسي ببتسامه
ورده:  ايي خاله

الحجيه:  الله يحفظه الج وتكومين بالسلامه بجاه محمد وآل محمد وبجاه ابن الأطهار الي كاعدين هسه برحابه

ورده: الله يحفظج خاله شكرا ولله خجلتيني

أجت بنيه شابه بيدها طفل وكلت للحجيه
هاج مصطفى خاله اريد اروح أزور هناك يبجي ماخلاني

مدت أديها وأخذته منها. وكامت تبوس بيه وتحجي ويا
تعال ليه بيبي حبيبي اسم الله يكلبي ليش تبجي
سكت طفل بحضن بيبيته

جنت اباوع على طفل ومندمجه وابتسم ويا  حركاته الي يسويها

الحجيه:  ان شاء الله باجر يصير وليدج ويفرح كلبج وتنسين كل همومج بيه

رفعت راسي وكتلها:  الله يخليج خاله

الحجيه :زعلانه من رجلج انتي خاله وابتسمت

نصدمت وفتحت عيوني على كبرهن كلت هاي وين تعرفني انا عمري ماشايفته ولا هيه شايفتنيي

ورده:  خاله انتي تعرفيني انا ماعرفج

أبتسمت وهيه دير بسبحته بثقل على على معصم ايدها

الحجيه: اصبري عليه اصبري موبيده

جسمي كله كام يرجف رغم الجو زين بس كلامها خله كل جسمي يرجف

ورده: خاله فدوه انتي تعرفيني

بتسمت وهزت راسه ب لا

الحجيه : عرفت من عيونج

ورده اندهشت من كلامها كلت هاي شلون تعرف انا ورجلي على خلاف.

ورده:  اي خاله كلامج صحيح وادعيلي اموري تنحل لان تعبت

ماعرف شنو الي ذكرني بل حلم الي حلمته وانا نسيته صار فتره اشو كبل تذكرته

ورده:  خاله تعرفين بل احلام يعني تفهمين المنامات

أبتسمت وكالت: ايي كولي  شنهو منامج

نطلقت اسولف عليه على الحلم الي شفته

جانت تباوع على وجهي وتبتسم
وتهز براسها خفيف

بقت صافنه شويه وكالت

الحجيه: خير ان شاء الله المنديل الأبيض الي نطته الج المره وكالتلج هذا  من سلام
وأنتي تكولين عصرتيه وضميته لكلبج بقوه. هذا طفل والبياض بلحلم طفل. وراح يجي الدنيا وينسيج كل همج ان شاء الله
بعد رجلج بل حلم وكلام المره تكلج يكول يرجع بس موهسه
معناتها ترجعين اله وتعيشون بخير وسعاده بس موهسه

كل جسمي قشعر وهيه تحجي وتفسر كله كلمه كلتها

ورده:  زين خاله انا اكلت شي بلحلم وجان طعمه كلش حلوووو

الحجيه:  ان شاء الله هاي طعم الحياة السعيده الي منتضرتج

بقيت مصدومه وبين مصدكه وبين مامصدكه

الحجيه  هااا وين رحتي  ماصدكتي مووو
رديت بخجل

ورده: لا خاله بس شويه مصدومه لان انا جنت متخبله واريد اطلك منه

الحجيه: يمه هذا الحجي جنتي تحجينه بدون وعي  الله ينولج الي بالج  وتبتسم
إنا الي دهشني بيه الابتسامه. إلى مرسومه على وجها
عمري وحياتي مشايفه هيج انسان من يبتسم هيج حلووو
بهاي الحضه اجه حازم جايب بيده علاكه

حازم:  تعاي ورده
وراح كعد شويه عنا يعني بمكان فارغ شويه مو مثل هذا الي كاعدين بيه

أبتسمت للمره
ورده:  من رخصتج  خاله انا اروح

حجيها لهسه يرن بأذني
معقوله تنصلح حياتي انا وسلام
وسلام يكوم يحبني وانا احبه ونعيش بخير

ماصدك يجي هيج يوم لان انا كل همي بل حياة اخلص من سجنه ومنه

كعدت يم حازم وحازم طلع لفات من العلاكه وببسي
ونطاني

حازم:  بعدج تحبينها بدون شي لا صاص ولا عنبه

بتسمت وكتله: ايي

انا يوم عن يوم أتعجب من تغير حازم وياي وسئل نفسي كل لحضه والثانيه

حازم: ورده

ورده :  هاا

حازم: ورده ادري بيج كاعده تنصدمين من تصرفي وياج وشلون اعاملج

بيدي لفه خليتهه بلعلاكه وكلت اي ودنكت

حازم: تره انا مااكرهجن وانا  طبعي عصبي وجنت اضربج بهمجيه
وبدون رحمه وانتي كل ذنب ماعدج
ذنبج الوحيد انتي ماتردين تزوجين وهذا حقج ومن حق كل بنيه تختار شريك حياتها
بيوم الي شكيت راسج ضليت مندوم وتندمت بكد شعر راسي
من زوجتي وراهه ب ٣ ايام طلعت للكاع حته اسكي الزرع
سكيت وكملت ورحت يم الحفاره
كاعده تحفر بل مشروع
حته الماي يوصل للكيعان اكوو كم واحد هم واكفين يم الحفاره وانا هم وياهم

وكفت بحافة المشروع الثانيه وانا اباوع على الحفاره شلون تشتغل

وماحسلج الا  طرف المشروع الي واكف عليه  نخسف بيه وتبربد بيه نخسفت بيه للكاع

طحت بلمشروع وطاح هام كامل من المشروع الي انا واكف عليه يعني نهدم

انا  كلت هاي نهايتي بهل دنيا لان الحجار صار كله عليه وحجار كبار وانا غطيت بل ماي
بذيج الحضه بس انتي اجيتي على بالي وكلت راح اموت وانتي زعلانه عليه
كلشي ما اجه على بالي لا اب ولا ام ولا عمل صالح ولا عمل سيئ
خفت من الموت وكمت ادعي بربي اذا طلعت عايش
اعتذرلج واكفر عن ذنبي واطلب منج تسامحيني

وماقصر ربج الوادم كلها ركضت عليه وطلعوني وربج قاسملي اعيش
وهسه اريد تسامحيني وتكونين راضيه عليه
وانا شما ادللج احس نفسي مقصر وياج واحس نفسي مامكفر عن ذنبي

وحته لو سلام مارجعج لا تشيلين هم انا سند الج ول ابنج وابنج اعيشه ملك ولا تهتمين الأحد
وابوي معليج بيه
بعد هذا ابونه لازم نتمحله شنسوي هوه هيج طبعه صعب
وخلانا نتعلم منه السبب الجبير هو التربيه وهوه خلانه هيج نصير كبرنا وتربينا علئ هيج
دمعت عيوني وانا اسمع حجي حازم وتمنيت لو من البدايه هيج واكفلي وممزوجه سلام ومشلوع كلبي

حازم: وحته مصطفى تره گلبه حنين بس هوه يشوفنه جنه هيج نسوي بعد شيسوي بس هوه متندم ومن اتزوجتي كتله انا متندم لان سويت هيج ويا ورده كال انا هم مشتاقلهه وبليل شفته يبجي

نزلن دموعي
أبتسمم بوجهي
حازم:  يله يله كافي استكي  خلي ناكل الفات لا يبردن ويدخلن على وليدج باردات وياذنه

متت خجل من كال يدخلن على وليدج وياذنه

حازم: ههههه اكلج هناك اهل بغداد هم ياكلون فلافل
لو ميحبونها

ورده :ههههه لا شسالفة هيه اكله شعبيه وكل شعب العراقي يحبها وياكلها

كملنا اكل وحازم جمعهم وذبهم بل زبل ورجع عليه

حازم:  يله خلي نروح
طلعنا وحازم اخذني للسوك
حازم: ورده شنو تردين اشتريلج

ورده:  ماريد شي خلي نرجع للبيت لا يرجع ابوي ويسويلي طلابه مالها  اول ولاتالي فدوه

حازم: معليج معليج تعاي

لزم ايدي واخذني يفتر بل سوك

حازم: يله شنو يعجبج اخذي وانا ادفع

كلش مستحيه من تصرفات حازم وماريده يضغط على نفسه حته يرضيني

جان بوكت دخول داعش ولفتوه جان السوك كله بل عسكري
يعني مثلآ حازم اشترى جل لشعره جان غلاف مرقط
حته اكسسوارات البنات والملابس مال البنات والنساء والأطفال

وحازم التفت لكيته يعامل على ملابس مال اطفال تراك سود عسكري
جانت بيه صورة البطل
ابو عزرائيل لمن يكول اله طحين

ورده :يااا حازم شسوي

حازم: غير اشتري هدوم لوليد اختي

ورده :هههه الله شكد حلوات حازم بس منو يكول وليد يجوز بنيه

حازم: واذا هم تلبسهن

ابو المحل طفر من يمه  يرهم بناتي ولادي

حازم: بشكد ابو الشباب

كله سبع ألاف
طلع حازم خمس ألاف وخله وياها الفين ونطاهن للولد
شفت بقت بس الفين ووياهن كم ربع بقن بجيب حازم رجعهن لجيبه

خلاه الولد بعلاكه ونطاه لحازم

حازم :تردين شي بعد ورده

ورده: لا حازم خلي نرجع للبيت انا تعبت كلشي ماريد

حازم:  يله خلي نتوكل لهلنا
مشينا مسافه
واكو عجوز كاعده تجدي ملابسها مششكه وحالها يبجي  نكسر كلبي عليه
ورده:  حازم اطيها شي كسرت خاطري

طلع حازم الف ونطاها
حازم:  عطايا قليله تدفع بلايا كثيره بس احنا البشر مانفتهم
ماعرف كبل حجيت بكلبي الله يحفظ سلام ونتبهت على نفسي
تعجبت بروحي ليش اليوم ثاني مره اذكره ودعيله وهسه ذكرته لانو الناس كلها تسولف عن داعش والجاي يصير وشبابنه الجاي تروح

حازم :خلي اشوفلي تكسي توصلنا للبيت
حازم كل شويه يوكف سياره حته توصلنا للبيت
ويطلبون الفين او ثلاثه
حازم يكلهم بس نعبر الجسر شسالفه هلكد

عرفت حازم ماباقي بجيبه كروه كافيه

ورده :حازم خلي نمشي مشي

حازم: يابويه ونلج ولاده بنص الدرب وتعال يمعمي احتار
لا سولفينها ابدد هسه اشوفلنه سياره
حته لو ستوته

ورده: الله حازم عليك الله ستوته خلي نصعد بيها اريد اضوك شلون الركبه مال ستوته

حازم :هههههه  افه تردين تضوكين ركبة الستوته من باجر اعوف الكليه و اشتري ستوته وخليج تشبعين ضوك بل ستوته

بقينا نمشي وانا كوه كمت امشي ماكدرت بعدين حازم وكف ستوته وصعدنه بيها
حازم صعد على صندوك وانا وره
يبووو غير كام يشيلنه ويدكنا بل ستوته منا لمن وصلنا اهلي احس نفسي زبده من كد الخض مال ستوته

وصلنا لهلنا امي جانت تنتضر بلباب واكفه شافتنا من بعيد جاين
وصلنا يمها

ام ورده:  وين رحتو شو بطيتو وكلت هسه يجي ابوكم ويسوي فلك بينا

انا متت من التعب وبطني كامت توجعني رحت كبل سبحت ونمت

كعدت على ماسه وهيه تكلب بل ملابس الي شتراهن حازم
وتيصح يمه يخبلن يمه فدوه رحت ولج وريده ماصدك يجي هاذا النونو زغيرون حته اشبع العب وياه وحته للسروح أخذه

ورده: هههههه لا أخاف عليه ماخليه يروح وياج حته كبل ابني يطلع شرير ولسانه طويل مثلج

ماسه: منيلي فقيره انا

اجت فاطمه وضلن يسألن بيه على الزياره وحجيتلهن كلشي
من طلعنه جانن طالعات للسروح
العصر ابوي اجه وانا كبل رحت ضميت روحي بلغرفه
منا لمن ثاني يوم الصبح

رواء

سلام كل هاي الفتره مريض وماله خلك احد ومن ينزل من الدوام نهار كله بغرفته
غرفته القديمه كال بعد ماريدها احسها تخنكني من إدخللها
عدنا غرفه ثانيه خاليها مخزن للأغراض الي منحتاجه

نقلنا لاغراض لغرفة سلام القديمه المحترگه
وفرغنه هاي من كلشي

اشتره هوه ورحيم صبغ وشغلات الي يحتاجونها بتعديل الغرفه
رتبوها وصارت تخبل   سلام كلشي ماشتره كال من ارجع ورده
عود اشتري غرفه جديده

علاقتي انا ورحيم مثل العسل
وهوه حجالي عن زوجة اخوه وشلون عايشه
وكال انا  مستحيل ازوجها لان ماكدر
بس امي اكلت راسي
وكل يوم يفتح موضوع ابن اخوه وشلون امه تحجي عليه وحته تزعل منه لان مايسمع كلامها

كتله رحيم دربالك تفكر هيه تفكير وتزوج  مرت اخوك وتربي ابن اخوك ولله اموووت. ماااكدر

بقه يكلي لا وانتي عندي بل دنيا كلها
انتي روحي وكلبي
كتله انا ما اريد اصير انانيه
واكلك عوف ابن اخوك بشوراع وجوه ادين نسوان

وبنفس الوقت حبي الك يخليني انانيه ماقبل تزوج غيري

ورده
مشت الايام ومرت 3اشهر ومره امي خطيه كاعده وحده تحوك سعف حته يسقفون بيه ساقيف للحلال

البنات سارحات ومصطفى وياهن
وحازم بلدوام
كملت شغل البيت وكلت خلي اروح اساعدها مادام ابوي موهنا هسه هوه يدري الدنيا حاره و امي مريضه خطيه وخصوصاً بعد وفات خالي امي فد مره نتهت صارت ضعيفه والضغط كل شويه يصعد ودوم تطيح وحته سكر صار عدهه وعيونه كامت ماتشوف بيهن

وكل هذا محد عاذرها ولازم تكوم بشغل البيت والحلال لان البنات ضلن كله يسرحن مايلحكن

درت وره البيت ورحت وراها للبستان حته اعاونهه اخذت بطل ماي بارد ومشيت

لكيتها تحوك وتبجي وتنعه على خالي الله يرحمه
كعدت يمها

ورده:  هاج يمه هذا ماي بارد جبته الج وبسج يمه
عيونج راح تعمه ومحد بحالج ولا احد يكلج شلونج

مسحت دموعها
ام ورده:  شسوي يمه من ضيم كلبي غير

ورده:  يمه خلي اعاونج كملت شغل البيت

ام ورده:  لا لا يمه روحي ماتكدرين انتي وخاف ابوج يجي وتدرين بيه يدور زله عليج

ورده: يمه انا شنو ذنبي شنو الي سويته وهيج يعاملني اذا هوه زوجي مايقبل يرجعني انا شسوي

تحسرت بتعب
ام ورده: يمه انا ماريد مشاكل واريدج تسلكين هنا بستر منا لمن الله يفرجها ويجيج رجلج ويردج واخلص من
ابوج وطلايبه وشكوكه الي ماتخلص
سمعته البارحه يحجي وي عمج  ابو حنان  يكله عمج ابو سلام  كايل بهل يومين يجي رجلها ياخذها وأن شاء الله ربج يحلها ويتمم عليج. وعلى وليدج.
وهسه يمه ردي للبيت لا يجي على غفله ابوج ويتعارك وياج

امي من كالت بعد يومين يجي سلام ياخذج
ماعرفت افرح اخلص من جبروت ابوي وحكمه عليه وقساوته
لو أحزن راح ارجع لسلام وأكيد بعده على سوالفه هوه وعذراء
كمت كوه خليت ايدي بل كاع وكمت
صرت بشهر السابع بس صرت دبه مال طرشي على كولت ماسه صرت شسمني
خليت ورجعت للبيت هسه اريد ادخل وشفت رقيه جايبه سله مال خضره شايلتها على راسها
صاحت عليه من بعيد

رقيه: ورده ورده

لتفتت يمنه ويسره خاف ابوي اجه

ورده:  هلا رقيه
خلت الي بيده على الحايط مال الحوش واجت تقربت يمي

رقيه :عاش من شافج اخذ اخبارج من ماسه شلونج شخبارج حبيبتي العنون شلونه

ورده:  زينه الحمدلله بخير انتي شلونج

رقيه:  بخير خايبه مشتاقتلج وعلي وعندي شكد ضيم بكلبي اريد احجيه الج بس وين ياحسره وانتي بسجن زويرا
ضحكنا ثنينا
ورده :لا سجن ابو غريب  احسن

رقيه: هههههه صدك  ورده شوكت ترجعين لسلام
بعدين شنو الخلاف الجبير البينج وبينه
حته شمرج هل شمره وماسئل عليج صار ٥اشهر

ورده :ههههههه لست ادري

رقيه: هههههههههههه غير تستغر ام الفصحى

بيقنا نسولف بمواضيع عاديه لان صار شكد  وحده مشتاقه لثانيه

ورده: اكلج حنان شخبارها بتها شلونها

رقيه: زينه ماصار مده من رجعت لرجلها
هيه وعمتها كل يوم عركه ورجلها خيه مايحل رجل دجاجه فقير وهنه ثنينهن الكاع ماتحملهن

شويه وسمعت صوت ابوي صاح
رقيه كبل نهزمت
وانا سويت روحي ألم بل ملابس كلت يجوز متشافني

لكيته بل باب وبيده عكاله وعيونه مخنزره عليه وصاح كدامي طبي جوه
كلبي كام يرجف من الخوف

ورده: والله جنت ألم بلملابس
لان عرفته شافني انا ورقيه لمن واكفين سوه
كلت بلكي يصدك بس هوه ميصدك لو ينزل نبي بعد
لزمني موتني بل عكال وي كله ضربه اصرخ وصوتي يطلع السابع سما من كد الوجع خليت أديه علئ بطني احمي طفلي وعفت وجهي صار الضرب عليه وتشيغ روحي

يضرب بيه ويحجي ويغلط عليه
ابو ورده: مسويتلج ديوان وكاعده بل شارع ماتستحين بت ال..... انا شكلت وشحجيت اليوم اذبحج واخلص منج يل عار انتي عار ورجلج اكبر عاار وساقط
يحجي ويسب بسلام وبيه

فرفحت بين أديه كمت اصرخ واصيح والله ماسامحك
انا  شنو ذنبي
هيج تعاملوني واذا سلام عار وتدري بيه عار ليش زوجتني اله

ضربني على وجهي بكل قوه

ابو ورده لسانج ياعار وسحك راسي بنعال ماله وبكل قوه احس راسي نمرد بل كاع

نوارس

وره الحادث الصار عدهم بعد مكدرو يجون يمي ومريم تدرس وياي رحيم يجي ياخذني للمتحان كملنه الحمدلله
وتم قبولي دخلت ناجحه

مرت فتره مشايفه سامر

فد يوم انا مفعله فايبر حته اراسل البنات منه

لكيت رقم دازلي هلو
دخلت علئ صورته وشفته سامر

رديت 💬هلوات

راسأ رد 💬شلونج عرفيتني

نوارس 💬تمام وانته اي من صورتك

سامر 💬مشتاقلج

سكتت وايدي ترجف

سامر 💬طگ گلبي عليج بس ملتهي ويا اخوي ومريض

نوارس💬الحمدلله علئ سلامته الله يشافيه ان شاءالله

سامر 💬بيبي شلونها

نوارس 💬ههههه زينه تسئل عليك

سامر 💬اجيكم ولله هاي الايام

نوارس 💬كل الهلا بيك

سامر 💬موكتلج انتي سباعيه تنجحين

نوارس 💬هههههه اي

سامر :مامشتاقتلي

سكتت واخجل ارد رجع كتب

سامر 💬لاتستحين ادري بيج مشتاقتلي

عزه ولله يفشل الواحد ضحكت

سامر 💬احبج

يمه گلبي ضل يدك بكل سرعته بعدني ماراده وجان يخلص النت مالتي

ولله عيب هسه شيكول وكته وكته هسه
والدنيا ليل طفيته ونمت احسن من ماضل لازمته ومقهوره يتبع......

__________________

مشهد من البارت القادم

:احجي عدل هذا اخوي الماجابته امي. حزام ضهري وتاج الرأس

:اطلع بره كو....   سا.....    ابن ال.....
انعل ابوك لابو الطاكم مره جايبلي مزبله وجاي

:يشرفك ويشرف اهلك وعشيرتك وبتك الك اشبع بيها وابني الي

تصبحون علئ الف خير فراشات 🦋💙