مساء الورد والياسمين عليكم فراشاتي 🦋🖤
قريري العيون
بقلم زهراء علي
ممكن تعليق للفقرات وتصويت+متابعه
قبل لانبدي بنات ليش المسبه بالخاص يعني انا بشر حالي حالكم وعندي مسؤليات وضروف يعني تدخلن وتغلطن عليه وعلئ اهلي ليش حسبي الله بكل وحده غلطت. يعني ابني مريض متعافيه انا
للبعض يعرفن نفسهن اكو فراشات شگد حبابات يدخلن يسئلن علي ويتفقدني خومابيه شي لافيو البنوتات الحبابات
مشاهده ممتعه
"""""""""""""""
رواء
بهاي المده كلش تعبت نفسيتي وبس افكر وادعي رحيم مايخذلني احبه ياربي احبه ومن شفته كم مره حته ميباوع عليه ومهموم ضليت حته مااطلع لحد مااجت الدوامات اهلي جابولي تلفون. هل سنه سادس لازم اشد حيلي واحقق حلمي
أم رحيم اجتنا علمود ورده لان سائله رحيم وكايل الها سلام زوجته حامل وراح يصير اب خطيه اجت وجابت جكليت وياهه
استقبلتها امي واحنا دخلنه سلمنه عليها
قدمت الضيافه وكعدت
أم رحيم: تسلمين خاله الله يخليج شمعه ضاويه وربي يدزلج ابن الحلال الي يسر گلبج وخاطرج
ستحيت وانا اكول بگلبي خاله ابنج الايسر گلبي وخاطري
رواء: مشكوره خاله
ام رحيم: ورده خاله اشوو ذابله وجهج مثل لون لكركم
خاله مايطونج اكل شني ههههه
ضحكنا كل احنا ورده بقت ساكته بس تبتسم دومها مبلوع لسانه
وامي تكلهه اجيب وحط كدامها واتوسل بس اكلي
أم رحيم: شكد الج خاله
ورده بقت ساكته ولتفتت لاامي
ام سلام: هسه توهه شهر وجم يوم
أم رحيم :الله يكومها بلسلامه وان شاء الله الولد صالح
ام سلام: بعد عمري رحم الله والديج شلونكم خيه اخباركم وليد المرحوم شلونه
أم رحيم: بخير الحمد لله بس يخيه مشلوع كلبي على ابن المرحوم وهناك جهال تضربه وأمه فقيره ومالها احد بس إخوانها وكلمن لمرته
وذيج المره طاكينه ومشكوك حلگه سودعليه لابد سمعتو من سلام اجانا يله لزم رحيم يريد يهد يتعارك وياهم
ام سلام الله ستر وأمه خطيه شابعه ضيم لان هيه فقيره
أم رحيم : ام سلام انا ماارتاح لمن اشوف حفيدي كدام عيني
راح رحيم وتعارك وياهم ونطوه الولد وكلوله اخذ ابن اخوك ولا تراوينه وجهك وبعد ممنوع توصل هناا
رحيم دشيل الولد وجيبه ليش ماسمع امه تصرخ بل حوش وتركض وراه حافيه وتكله اروحلك فدوه خويه اموت بدون وليدي خليه اليه ماكدر على فركاه
خويه دنيا كسرتني بعد ماتحمل عوفلي وليدي
يكول يمه ماعرفت شسوي طحت بين نارين بين نار إخوانه وانتي وبين نار امه الي تكسر لكلب
تسولف ودموعها تصب على خدودها
خيه ام سلام ردته يعقد على لبنيه عاد علمود جاهل مو علموده
تسودن ومقبل وكال لا تعيدين هاذا الموضوع وخله وطلع ويومين مارد للبيت
وكوم وخابر على اخواله همه الهم تأثير عليه ويحبهم ويحترمهم ويسمع كلامهم
اخوي الجبير داك عليه وكاله غداي باجر يمك
وثاني يوم اخواله ثنينهن اجوو
وتغدو وكملو
عاد فتحو السالفه وياه
هوه كبل خزرني مارضى شرار يطافر من عيونه كام
خاله كله باوع عليه خالي امك ماله علاقه
خالي احنا علمود ابن اخوك ليش تخليه يربى عد ناس غرب وحدر أدين من هب ودب ويشبع مدمغه
رحيم خالي رحمه لهلك غير يم امه واني ممقصر كل شهر ادز كلشي ومن غير لفلوس الي ادزه
وإني زواج مازوج ليش محد يفهمني شلون ازوج مرت اخوي اشوفه صعبه صعبه ياناس
خاله كله مابيه شيء على سنه الله ورسوله ولا عيب ولا حرام
وانته راح تلم ابن اخوك من الضياع وأمه صدكني متبقي طول عمره كاعده بدون زواج وهيه بعدها زغيره
وحتلو هيه متقبل تتزوج إخوانها بزوجونها
أم رحيم: جيرانهم ابو سيف مطلك وعنده كومه مال جهال وكل ساع وخطبها
وإخوانها كل شويه واجوها طايرين زوجي زوجي وذبي ابنهم عليهم
همه يربوه وهيه لا حول ولا قوة شابعه مكفخه منهم ومن نسوانهم
يم اسمع مني ولم ابن اخوك ولا عرس ولا طربكه بس أعقد عليه
وانته بغرفتك وهيه يمي هيه وابنها
خواله ايدو كلامي وكلوله كلام امك صدك
أعقد عليها ولا توصلها ولا توصلك
خل اخوك يرتاح بكبره على ابنه
احسن ميزوجون امه ويربي عد الغرب ومنعرف شيسون بيه مايسون
خيه ومرضى وماقنع كال لا تحجونها ولا اسمعكم. ماتزوجها
خواله عصبو وكلوله جاين مناك لهنا حته نلم ابن اخوك
وأنت ماقدرت جيتنا معناتها احنا كل قيمه مالنا عدك
خلو وطلعو زعلانين
ام رحيم تحجي وي كل كلمه تطلع منها مثل الخنجر الحار ينخرز بصدري
الرجفه حتلت كل جسمي. عيوني كمت كوه افتحهن
ماعرف شلون اوصف حالتي بس احس اعصابي بددت تتلف وبديت انهار
طلعت من يمهن واني دموعي تصب صعدت فوك بغرفتي
نهاريت كمت ابجي بحركه واملخ بروحي خاف صدك ويزوجونه
أجت ورده دخلت عليه وتفاجئت لمن شافتني
ورده :رواء شبيج منو وياج ليش هيج تبجين شكوو
رواء: مابيه شي ورده
ورده: رواء احنا صحيح مو نفس البطن بس احنا خوات وبنات عم
وإنا اختج واسمعج كليلي شنو الي مزعلج
إنا بحاجه الى من يسمعني وفضفض اله حجيتلهه عن حبنه انا ورحيم
وشلون تعلقت بيه وحبيته وحبني
وهسه يريد يزوج ويعوفني جنت احجي وابجي منهاره
ورده بقت مصدومه وبس تباوع عليه
رواء: راح اموت ورده كليلي شسوي
ورده :بس هيه كالت رافض رواء
رواء :خاف يضغطون عليه ورده ومن الغضط مالهم يوافق
ورده :سوده عليه رواء ريت الوجع لكلبي ولا لكلبج وبجت
رواء: اسم الله انتي بيج الي مكفيج من سلام وسوالفه
حضنت ورده
رواء: انتي. بلسم ورده طيبه وبريئه والله يحبني من انطاني هيج أخيه طيوبه مثلج وفدوه الي حجيته لا تحجينه لاحد
إنا اعرف انتي شنوو بس الحذر واجب
ورده :مستحيل رواء انطي بيج انتي اختي
وتعاي هسه توضي وصلي ركعتين بنية قضاء الحاجه وتفريج الهم والغم والكرب
ابتسمت الها وكمت توضيت ورجعت لكيتها بيدها كتاب زغير
ورده: واقري سورة نوح وان شاء الله ينزاح هذا الهم الي بكلبج. ورب العالمين خلقنا ومينسانا من رحمته وعطفه لو بعد حين
رواء: ونعم بالله حبيبتي
صليت وقريت وهيه هم كعدت تسبح وتقره نزلنه
قررت احجي وياه وفتهم منه
طلبت تلفون سامر على ساس انقل منيمه كم صوره اله والسلام لتلفوني.
دزيت رساله وانا ارجف
رواء💬مرحبا
دزيتها وانا خايفه ومنتضره علئ نار ماكو مارد نزلت جوه يم اهلي كعدت شويه بعدين صعدنه انا والبنات انام ركضت كبل علئ تلفوني واجت مريم
مريم: رواء طيني تلفونج خل العب بيه شويه عفيه
رواء: موهسه باجر روحي نامي
مريم: ماا بس شويه شبيج
رواء: مريم ليش تلحين كتلج اريده بااجر
ضلت ادردم وراحت طفيت الضوه وفتحت الجهاز خاب املي من لكيته ماراد علي ردت احضره وفتحهه گلبي ضل يدك سريع رد
رحيم 💬مراحب
ضليت ساكته
رحيم 💬منو
رواء 💬انا رواء
رحيم 💬صددك رواء
رحيم💬شلونج مشتاقلج ليش ماشوفج
رواء💬 يهمك رحيم مو كمت من تشوفني تدور وجهك تضوج مني
رحيم 💬ولله غصب عليه اموت الف موته ولج وجهج يرد الدم بيه شلون اضوج منج انتي روحي تمشين بدمي الهوئ الاتنفسه يشهك باسمج احبج
ضليت ساكته ونزلت دموعي وانا ابجي خايفه من المستقبل المجهول
رحيم 💬يروحي انتي ليش ساكته احجي
ضليت مستمره ابجي
رحيم 💬شبيج حنوشاتي راح اتصل
رواء💬 لا لا البنات يمي
رحيم 💬كومي بغرفه فارغه
كمت وانا خايفه رحت لغرفة سلام وقفلت الباب كلت بسرعه احجي وياه وسده
رواء 💬اجيت بغرفة سلام
اتصل بسرعه فتحت خط
رحيم: الو يروحي شلونج
رواء: زينه
رحيم: الله يعلم شكثر مشتاقلج
ضليت اشهك
رحيم: شنوو جاي تبجين يغسلني كون دموعج حنوشاتي ليش تبجين
رواء: رحيم انته راح تزوجها موو احجي لاتشلع گلبي وانا رحيم تعوفني
رحيم:ولج رواء شلون اعوفج امي كلتلج موو وداعت عيونج ماعوفج ولج انتي رويحتي انا فطنت عليج جنتي زغيره وانا انتضرج يوم يوم تكبرين تذكرين من جنه ندرسجن انا وسلام وتكولين لسلام انته كسولي رحيم يدرسني من جنت زغير احسج انتي ملكي والي انتي ملك رحيم تذكرين من اول ماكمتي تكبرين وتنهزمين مني تضمين روحج ولج جنت اجي اريد بس المحج بس اكحل عيوني بشوفتج شلون اتنازل واعوفج منتضرج يوم يوم لو مااخوي وعضيدي سلام لوماهوه وسامر واكفين بعيني جان من زمان ماخلي طريقه مااوصل بيها الج كلمه منج تهدي روحي وتسكن جروحي. تدرين شكد فرحت هسه الكاع مسايعتني وتدرين ليش اتلفئ النضر الج مجرد يفكرون هذا التفكير احس اخونج بيه ماراح اتزوجها ولاتفكرين وتقهرين روحج رحيم مالتج الج يعمره انتي ودنياه
رواء: وعد رحيم مراح تخذلني فدوه اخاف يغضطون عليك
رحيم: لا ماعليه بيهم يحجون ويسكتون رواء ردت افاتح امي بموضوع زواج بس كلت هسه. يكولون مودكيت رجل ماتزوج خليها هاي الفتره وانتي كملي السادس يروحي
رواء: ماشي رحيم هسه جريت نفس
رحيم: اروحلج فدوه يله وعديني ماتبجين بعد بس اضحكي انتي يلوكلج بس الضحك
ضحكت خفيف
رحيم: اروح فدوه لهل ضحكه
خجلت منه
رواء: يله راح انام باي
رحيم :الله وياج حنوشاتي نوم العوافي
سديته منه وطلعت ركض الحمدلله سامر بعده جوه بلستقبال
سلام
هاي المره من التحقت جان أصعب التحاق عندي
كلبي مهموم وعقلي تعبان
وزوجتي الي معرفت احبها واصونها ولا اداريها كسرت ضهري
ولد صديقي هم من بغداد انا وياه ورحيم نلتقي سوه اسمه محمود عمره ٢٦ سنه مزوج وعنده 4 بنات
صديق ونعم الصديق صارلي سنه نعرفه انا ورحيم ومافد يوم شفنه عليه زله انسان صايم مصلي وشاب خلوق
جنه انا وياه ورحيم سويه بس رحيم من تغير صعوده ضلينه انا وياه
كل عاده انا وياه نتخابر ونتفق على المكان الي نصعد منه الدوام
بس هاي المره كسرت تلفون وانا صعدت وهوه بعد ماعرف عنه شي وصلنا هناك وطلع واجبنا لكركوك الحويجه
تحركت قواتنا وشفت محمود بيده سلاحه وياشر عليه من بعيد
أبتسمت اله صحت عليه
سلام: شوكت وصلت
محمود : هسه قبل شويه
نقلنا على طريق الحويجه كركوك
والقوات الامنيه كلها ايد وحده حته تحرر أراضي العراق
خلال ساعات كاعد تحرر الأراضي بسواعد الابطال
من بعد ١٠ ايام بل دوام قبل صلاة الصبح بشويه كاعدين نسولف اني ومحمود وكم ولد ويانا رحيم اليوم نزل
شاعلين نار وملتمين عليها نتحمه. انا مبتعد شويه عن ناار ودخن
لان احس النار شابه بكلبي وماحس بأي برد. ناااار وشابه بكلبي على ورده
واشتياقي والندم دمرني ولعب بيه لعب
محمود: سلام تقرب على النار خويه تحمه ليش كاعد بعيد وبس تحش بهل جكاير ادري غرگانه السفن
سلام: هااا ابو زنوبه الورد لا خويه انا دافي ماعندي شي بس انت تدفى راح يبدي واجبك
وهناك ماكو حطب ولا صوبه كلشي ماكو
محمود: اي والله هسه البرد يجمدني هناك وتلكاني صاير قالب ثلج
اكلك ماتجي تلزم وياي واجب سلوم بداعت الي سالبه عقلك وكلبك
سلام : هههههه ماكو هيج شي لا سويلي سالفه وبعدين انا هسه خلص واجبي اريد اروح ارتاح شويه
محمود: علينا سلام شفتك لمن فتشنا البيت ندور وره على جماعه. لمن دخلنا لغرفة النوم
شلت قلم حمره وكتبت اسم وضحك
سلام: ههههه هاي زوجتي وحبيبتي بس أخيك قصر وياه وكسرها وذلهه وهيه بعدها عروس
محمود: على بختك سلام ليش ولك هاي مرتك تعرف شنوو مرتك الها مكانه جبيره تصونها وتحميها وترد اعتبارها مو تذلهه
سلام :اوف ادري ابو زنوبه كوم واجبك فات عليه ربع ساعه
محمود: مو صوجك صوج الي ينصحك ابو لمصايب
كعد على جذع مال نخله بل كاع ممدود
محمود: اريد ابدل ولبس بسطالي راح البسلي زوجين جواريب احس البرد يكص بيه يدخل من وره البسطال انا كلشي ولارجليه ههههه
سلام: ههههه تعال دفيهن. علئ النار والبس
هوه جان لابس حذاء بوت
رياضي توه كعد ايريد يلبس
وصوت الطلق كام يمطر ماعرف منين يجي
لزمنه سلاحنه وكلمن اخذ موقعه
ودارت اشتباكات بينا وبين دواعش اسمرت 5ساعات محمود بعيد عني بيني وبينه صارت بنايه
سكت صوت طلق ولوضع هدأ شويه
كمنا واحد يصيح على ثاني فلان عايش فلان عايش
إنا اول مصحت باسم محمود بس محمود ماكووو ولايرد
كلبي نغزني وركضت للمكان الي بيه محمود
وصلت ولكيته مدد ودمه تارس الكاع
ذبيت سلاحي وركضت عليه
لزمته وصحت
سلام: محمووود لا محمووود تسمعني انت بطل تعييش بس اتحمل
جان يون بكلمات ما مفهومه
صحت عليهم يخابرون الاسعافات بسرعه
بس هوه ماطول خمس دقايق واستشهد بحضني
استشهاد محمود هد حيلي كله
سلام: لا محمود ليش يخويه تهدني وتروح مافكرت ببنياتك يتيتمن بدون. الابو هيج ياخويه ياامحمود يارفيجي. وينك رحيم تعال شوف السبع اليوم امدد ودمه بطوله
ودموعي تنزل احسهن جمر
بسته بكصته وعيونه مفتوحه سديت عيونه
سلام: مودع ب الله حبيبي يابطل ياشهم
............
إلى أبناء وطني الراحلون
مالكم ها قد رحلتم مستعجلون
احقاً أنتم لنعيم الجنه مشتاقون
أم سئمتم من وطن قد عشت فيه معذبون
أرحلو ف والله أنتم لأن في ضيافه الرحمن منعمون
أعان الله قلوب امهاتكم فقد عميت منهن العيون
أعان الله تلك الأرملة التي صفعها الدهر لملعون
انطبقت عليكم الآيه فأنتم عند ربكم ترزقون
تفطرت قلوبنا على فاجعتكم وسئمنا العيش في وحل ضنون
هل ستفرج هل سنموت. أم سنبقى أحياء ميتون
أصدق ماعندكم به انكم ستبقون في قلوبنا حاضرون
وفي ادعيتنا وصلواتنا مذكورون
نسأل الله أن يرزقكم جنات فيها خالدون
فأنتم اليوم فعلاً لا خوف عليكم ولا تحزنون 💔💔
............
نوارس
بهاي الاشهر المرت
كلما يلتحق رحيم يجينه سامر تعودنه عليه
رحيم قدملي خارجي وخطيه اجو هوه وسامر جابولي كتب ودفاتر وقرطاسيه كامله
جنت فرحانه ودموعي تنزل مااوصف فرحتي
وبيبي هم دموعها تنزل ودعيلهم
وتكلهم انتو ملائكه الله يعوض كل انسان اتئذه بيوم ونحرم من شي
انتم الله عوضكم تجبرون هليتيمه
يوم عن يوم سامر يدخل لگلبي واحاول اسيطر علئ مشاعري. بس هوه هم اشوف بعيونه الحب الي من يحجي وياي عيونه تلمع
كمت ارسم ورسمي صار كلش حلو مره جاي ارسم اجه بالي وجه سامر كاعده بالطرمه والاوراق يمي متناثره رسمته باقي اعدل عليه ونفتح الباب البره انا مكعده بيبي بلباب يم مريه يكعدن يسولفن. نفتح الباب ودخلت بيبي وسامر كايدها طفرت جوه لان لابسه دشداشه قصيره ولاشال
كلت يابيبي غير تكول شلون تفوته ياا انا الثوله ماكتلهه كاعده بلطرمه وين تدري بيه هيه بدلت وطلعت اخذت مي ورحت
نوارس: شلونك سامر
سامر: اهلا وسهلا الحمدلله انتي شلونج
نطيته مي
نوارس: بخير
رحت صبيتله عصير وكليجه جنت مسويه
وديتهن اله وطلعت الم هوستي البره
لملمتهن علئ سريع ودخلت كعدت يمهم شويه
راح سامر وبليل قبل لاانام تذكرت طفرت علئ حيلي
بيبي: اسم الله شبيج يمه
نوارس: لابيبي مابيه شي اريد اروح للحمام
بيبي: فززتيني عبالي مدري شبيج يايمه
طلعت وانا ادور بغراضي ماكو الرسمه وين حطيتهه انا من يجي سامر انثول كلش دورت دورت مالكيتهه كلت جوز طارت بلهوئ لا والحظ اي ولله
سلام
نهدم حيلي من بعد استشهاد محمود وماضلي واهس بل دنيا
خلال تفقد صفوف العساكر للأسف ٧ شهداء ومهند الثامن خيم الحزن على كل عسكري. وكل واحد بينه يفكر انو هم راح يستشهد ويفكر بااطفالهم واهاليتهم وبنفس الوقت زادو قوه وإصرار لأخذ الثأر من ايدي داعش القذر
خلال يومين كدرنا ناخذ ثار الشهداء وسحكناهم سحك
دخلنا عليهم للبيوت لكيناهم مصلخين ويردون يلبسون ملابس نسائية حته ينهزمون الك..........د
شبعانهم طن كتل قبل تحقيقات
خلينا صريخم ماله والي
صعدت فوك للبيوت ونزلت علم داعش ورفعت علم العراق وخليته يرفرف بسماء العراق
أديت تحيه
ورفعت ايدي سويت علامه النصر
وحترك الجوو بل طلق احتفال بل نصر واخذ الثأر حررنه 5مناطق محتلينها
وكت الاستراحه مالتي رحت سبحت وتوضيت حته اصلي اريد ارجع الربي واستغفر وكفر عن ذنوبي
مادري بأي لحضه استشهد
انا ماخذ مصلايه وياي قبل بس من زوجت ورده
لكيتها مخليه مصلايه زغيره وتربه وسبحه. مرتبتهن بكيس زغير ومخليتهن بجيب الجنطه
طلعتهن من الجنطه وبستهن وضميتهن لكلبي
ودعيت ربي يغفرلي ذنبي ومااخسر ورده
فرشت المصلايه وصليت
وسجدت الربي وانا كلي امل رب العالمين مايرد احد من بابه
صليت ركعتين وهديتهن الروح محمد رحمه الله عليه وصليت ركعتين ليونس ولكل الولد الي ستشهدو
فتحت القرآن وقريت سوره يس وهديتها الروحه الطاهره
وعلى جميع أرواح الشهداء الأبرار
وسوره الفاتحه على أرواحهم الطاهره
كملت ورفعت أديه ودعيت
(يامن يملك الدنيا والآخرة اغفر لمن لايملك لا دنيا ولا آخره)
حرمت شيبتي عن النار بحق محمد وآله الأطهار
كملت ولميت المصلايه هيه وسبحه والتربه ورجعتهن للجيب مال جنطه مالتي
ذكرت جنطة محمود رحت سألت الولد عليها كالو موجوده بل همر
رحت للهمر وفتحت الباب وطلعته وخليتها بحضني بألم ونزلن دموعي يتبع ....
تصبحون علئ الف خير 🦋💙