في ضريح العشق حمامه .....
وئام الشيخلي ..........
مساء المحبه ؏ عيون الاحبه.
بارت هديه لعيونڪم الحلوه. راووني تفاعلڪم والا بعد ماانطي هديه.
ــــــــــــــــ
شلون الغوالي ـــــ
مشهد من البارت القادم ـــ
اووف يا دائي اووف.
سمعيني صوتج گولي اي شي صيري الي الدوا.
بس رب العزه يعلم مدى حاجتي لسماع صوتج هسه.
مجاعة شوگ بيه..
وعطش ملگه..
وطف حنين..
وتعب مگيود وسبي..
گلي ياحوت شدعيت او الله سد جوعك نبي..
حسرات بگلبي بگد حسراته واڪثر حاسه بحاله.
بس مالي قدره انطق اي ڪلمه.
گال مسك. ــ هااااا
غاليتي ــ هااااا
رويحيتي ونبضه گلبي المتعوب حد الويل. ــ هاا عيني هاا سلامه گلبك.
ـــــــــــــــــــــ
نختار دائما البقاء مع من يرتاح القلب لهم ونجد سكينتنا بقربهم.
فالروح تميل دائما لمن تجد أمنها وامانها معه ..
والعقل يميل لمن يفهمه
فلا نشعر بالفرح والسعادة إلا مع أرواح وقلوب صادقة نقية نتعامل معها بكل عفوية..
نتحدث كأننا نتحدث لأنفسنا دون إعداد أو ترتيب..
فالراحة مع روح تشبهنا وعقل يفهمنا ....
ـــــــــــــــــــــــــ
المها ــــــــ
التراكمات قد تجعل الشخص يقسو رغم لين قلبه، أو يكابر رغم شدّة حبه.
بعد سقوط النظام وكل الاحداث والضروف اللي مرينا بيها محمد يكابر وميريد يخلينا نشاركه باللي يفكر بيه ولايريد يقصر تجاهنا.
وشغله بمحلات الجملة ويه خواله ابدا ماتركه وخلال هالفترة ايضا گدر يحصل راتبه التقاعدي واحنا مرتبين امورنا وحياتنا رغم متطلبات الحياة واولادنا وجامعاتهم.
وحتى بعد ماتعين الياس وينطينا راتبه حتي يغطي تكاليف دراسة اخوانه مكدرت اتصرف بيه بــ اي شي يخصنا وكنت اجمعه اله والحمد لله اللي جمعته كفى مصاريف زواجه.
والرزق هو من رب العباد واحنا حامدين الله وشاكريه.
ورب العزة قال في كتابه ولئن شكرتم لازيدنكم.
وهذا اللي حمدت ربي وشكرته الاف المرات عليه.
محمد وقع عقد الشغل باستيراد محركات السيارات بنفس فترة زواج الياس.
لذلك كان قرارنا ان راتبه يبقى اله بالكامل بٵ اعتباره اصبح مسؤول وعنده عائلة وزوجته احق منا براتبه ولازم يبدون يخططون للقادم من حياتهم بنفسهم.
لكن الياس رفض وزعل وصار نقاش طويل عريض بينا.
من كلنا انت وزوجتك احق گال اني ممقصر بشي وياها وان شالله ما اقصر بيوم.
انتهى نقاشنا بان ينقسم الراتب بالنص.
لكن اللي تفاجئنا بيه ان الياس منطي اخوانه اربعتهم مصرفهم بالكامل رغم عطله مو دوام وكذلك مرام حالها من حالهم ولما نبهته ميصير وهذه زوجتك لازم تختلف عن الباقين.
وبقا هالحال ومرت اشهر وبدينا سنة جديدة وتفاجئنا برغبة الياس ان يشتغل شفت مسائي مع شركة بريطانيه اهليه ،
وثلاث ايام دوام كامل واللي المفروض هي اجازته ،
يعني بدل ما دوامه اسبوع باسبوع يصير عشر ايام دوام واربعة نزول. وهاي غير التعب المضاعف علي.
رفضنا اني ومحمد رفض قاطع.
ومحمد عرض عليه ياخذ راتبه بالكامل بدل هالتعب وهو بين النا ان ممحتاج الراتب.
وانما يريد يتعمق بشغلة الحفر وبنفس الوقت يتعلم لغة ويضيف لنفسه خبرات للمستقبل.
مع ذلك محمد رفض رفض تام. وحسينا انزعج وهو يگول فرصه ما تتعوض.
واني تناقشت ويه مرام عسى ولعل تكدر تغير من رايه واني اعرف شلون تعد الايام حتى ينزل وهو اسبوع فكيف اذا صار عشر ايام.
وصدمتني لما عرفت هي موافقة وراضية ونفس ڪلامه تگول يڪسب خبرات وهو رايد هالشي. وتتوسل بيه وتگول اقنعي عمو محمد لخاطره فدوه خاله نزل لڪرڪوك وهو ضايج.
وميس گالت هي دخلت مدرسة الياس شتتوقعين منها ڪلشي تتحمل لخاطر الشي اللي يحبه هو.
وبقى الياس ڪل ماينزل اجازه. يلح بهالموضوع لدرجة التوسل ويگول مابقى وقت والفرصه تروح عليه. والف من يتمناها.
ولما يأس من موافقتنا وسط ابو مصطفى وهذا حال ولدنا لما يريدون شي يعرفون المن يتوسطلهم.
وكان كلامهم واحد وكأنهم متفقين ثلاثتهم ابو مصطفى ومرام والياس.
ٵن الغايه يتقن لغه وتزيد خبراته.
واڪيد محمد ما يگدر يڪسر ڪلمه ابو مصطفى وافق وهو يگول امري لله ـ بس تعب عليك ياابني. والياس يگول مابيها اي تعب.
اشتغل الياس وكنت اشوفه شلون ينزل تعبان لكن ابدا ما خلانا نحس بتعبه ودوم يبين النا ان هو مرتاح ومستفاد خبره بهالشغل.
هالموضوع خلاني محتارة وصار اكثر من توقع ابالي اذا محتاج ليش ميرجع ياخذ راتبه كامل، واحنا الحمدلله بغنى عنه.
واكثر احتمال صار ابالي ان ممكن الياس ديفكر يشتري سيارة خصوصا ان سيارتنا صار متكفي اذا ردنا نطلع ڪلنا.
وابو مصطفى يدز سيارته بيد مصطفى واصلا كان يتعمد ايام نزول الياس يترك. سيارته ابابنا ويترك مفاتيحها عند الياس ويگول اريد اتمشى او اصعد بالمواصلات السيارة احسها تكسرني.
اخاف نحتاج نطلع او شغله لان سيارتنا دوم لو عند محمد لو انس يگضي بيها احتياجات البيت.
ويتحجج يگول شوفي اخوالي اوراس وادريس ــ شباب متجدد لان قله يستخدمون السيارات الا للضروره يحبون يمشون.
ومن يبدا الربيع الى فصل الخريف منامهم بالليل بالسطح.بدل المڪيفات والسبالت.
ادري هاي حجه يترك سيارته لالياس اخاف يحتاجها وهو بيده بنى شخصيته واعرف بي.
لكن اللي ممفكره بيه ومحسبتله حساب. بعد اشهر من شغله وي الشركة خصوصا العقد كان راتبه عالي ومغري.
ان كل اللي حصله جامعه وصاير مبلغ يغطي تكاليف دراسة انس بالاردن مبدئيا.
وهذه رغبة انس اللي گال النا قبل فترة ورديناه اني وابوه الله كريم.
انس هذا طموحه وهذه رغبته مصارح بيها الياس اللي مشجعه عليها ان ميكتفي بان يكون ميكانيكي طائرات وانما كابتن طيار.
ومتخرج من الاڪاديميه الملڪيه الاردنيه. وهي افضل اڪاديمه بالشرق الاوسط.
واكيد بتشجيع من عبد الله ابن اياد الموجود بهذه الاكاديمية.
اني ومحمد كان ابالنا ان بعد فتره من التخرج نهيأ امورنا ويسافر وماتوقعنا يسافر بعد التخرج مباشرة.
ومابين انشغالي والغصة بگلبي من فراگ وسفر ميس اللي صار بسرعة صار عندي هم فراگ انس وسفره.
وكل نظري متوجه لمسك شلون تتحمل فراگ اقرب اثنين الها وشلون تمشي ايامها بدونهم.
وٵني اشوفها بيوم فٵجئا الياس بالخبر هي عيونها متشخصه لانس وحتى ما رمشت.
وبعدها هزت راسها ورمشت عيونها عده رمشات وڪٵنها تستوعب الخبر.
ابتسمت وگالت حلو ڪابتن طيار شي حلو ويلوگ الك.
بس حسيت بيها اختنگت تمنيت تنهض من يمنا وتبـﭼـــي عبرتها بدل ما تڪتمها هواي اخاف عليها من الڪتمان.
نظرها اله وهو يتهرب من نظراتها.
يهمس الي شلون بيها وربي شايل همها.
واني مااريد اگوله هذا الڪنت خايفه منه ومن اهتمامك الزايد بيها وتعلقها بيك. مااريد الومه واني اشوف حاله شگد متاذي عليها.
وارجع اباوع الها تڪابر وڪان الدموع تنذرف من گلبها وتبين بملامحها.
ام ڪرار ڪانت يمنا وڪلش حست بيها صاحت عليها جماره. وهي انتبهت الها.
ٵشرت الها تروح يمها اخذتها لحضنها وگالت الها تدرين ليش اسميج جماره.
لان الجمار يصير بلب النخله بگلبها اللي هي مبارڪه ومن ثمار الجنه.
شلون انت غلاتج بگلبي من اول يوم اجيت بي لبيتڪم وانت عمرج ما مڪمله سنه. مجلبه برگبه ابوج. ماتقبلين تنزلين بالگاع.
والجمار ابيض بلون الحليب وصافي مامخلوط باي شي وما مغشوش وطعمه حلو وطيب.
مثلج ٵنت صافيه وحلوه وطيبه ومحبوبه.
ابتسمت حبيبي وام ڪرار احتضنتها بقوه. وتگولها انت جماره گلبي.
وام عادل ڪذلك تسميها جماره. وڪلش تحبها.
اوس لازم يدخل التحشيش بالموضوع يسٵلها اذا انت شاطره. تذڪرين محاضره حضرناها اني وياج لــ دڪتور عبد الحميد الهيتي من طلع عن موضوع المحاضره.
وشرح عن فؤائد الجمار.
وشرح عن المعادن اللي يحتويها الجمار الفائده والاهميه.
گالت اي اتذڪر وباقيه ابالي.
وهي لح عليها تجاوبه واحسها خانگتها العبره.
وبعده يلح يگولها اذا جاوبتي ابوج بطل.
ماجاوبته.
وهو شرح النا بطريقه حلوه عن الجمار.
مر اليوم وعيوني اتابع مسك واويليي ؏ حالها وضيم حالها.
مخيم عليها الحزن وعيونها مغرغره دموع وما بـــﭼـــت. تڪابر.
والياس اه الياس يوم بعد يوم يثبت النا هو فعلا بمثابة اب ثاني لاخوانه ويفكر بيهم قبل مايفكر بنفسه ،
وهالشي من طفولته رغم هم اعمارهم متقاربة ولكن دوم بتصرفاته وحنيته يثبت. عقله اكبر من عمره،
وحتى لجين ڪان الياس ماينقطع عن زيارتها والها مبلغ مخصص من راتبه كل شهر ينزل يطمئن عليها ويعتبر هالمبلغ حق وامانة امها.
وحتى بعد الموقف اللي خلونا بيه اخوان محمد اللي مخلصنا منهم حتى واحنا بعيدين.
بس شرهم وضررهم لاحنا.وماصدگنا انتهت قضية ابنهم ــ لو ما الحزب اللي ينتميله موفق كان انحكم مؤبد. او اعدام.
لكن تدخلت اطراف تخص الحزب وصار اخفاء لبعض الجرائم ـ وانحڪم عشرين سنة.
ورغم الخلافات بين الاخوان و الاخوات ساجده تگول موفق ورط ابني وڪنا عايشين ومرتاحين والاخت تگولها اي عيشه هاي عيشه الفگر ومن رجعنا جبنالڪم الخير ويانا.
وبسبب ڪثره المشاكل ابنهم الثاني زوجته طلبت الطلاق ومشاڪل بين اهلها وبيت بيت عادل.
وفعلا تم الطلاق وبعد المشاڪل لازم يتحدون لان باتحادهم يضرون غيرهم.
ورجع ضررهم امتد للجين.
بعد حادثة اختطاف لجين قبل سنوات اعمامها ماقبلوا بگعدات العشائر ورادوا حقهم بالقانون واكيد شخص مثل موفق يگدر يخلص نفسه مثل الشعرة من العجين وبالمحكمة قلب الامور ضدهم لصالحه وان ما كان خاطفها انما هي استنجدت بيه.
وانقذها من ظلم ومعاملة عمتها اخت ابوها اللي عايشة وياها.
وبكل صلافة عين ما اكتفىوا انما رايحين يطلبوها لابن عادل اللي مطلگ زوجته.
وعادل يهدد ان هي بنت اختنا واحنا اولى بيها من الغريب وماعدها عم اللح اللي ينهى عليها وصاير اصطدام ومشاكل بين الطرفين واصله لحد التضارب بين ابو لجين وعادل وشكوى بمركز الشرطة من عمام لجين ان هالشخص اتهجم علينا.
واخذ فتره بالسجن لحد ما موفق بعث جماعه وطلع ڪفاله.
ولهذا السبب عمامها اخذوا قرار لجين تقطع علاقتها نهائيا باخوالها وماتوصل بغداد ولا النجف كل اللي يربطها امها وامها ماتت وهي شحصلت منهم غير الاذية والمرض والخطف اللي تعب نفسيتها.
ولما الياس راح مثل كل مرة يطمن ؏ لجين تفاجأ بالكلام والاحداث وعمامها مسمعيه كلام ياريت تتركونا بحالنا وماكو شي يربطنا بنتنا عدنا وبنتكم ماتت.
وملمحين بالكلام ان الافضل تنسحبون من حياتها.
لما الياس كان يتكلم عن الموقف اللي صار وان گايلين اله ان ياريت تنسحبون لحالكم بدون احراج للطرفين.
حسيت شگد متأثر ومقهور هاي عمته اخت ابوه اللي من فتح عيونه للدنيا وشاف حنيتها وحبها الهم وهم ڪانوا يحبونها مثل حبهم الي.
ومع ذلك كلي فخر بموقفه وكلامه وي اعمام لجين وابوها.
من راد عليهم ــ اتمنى هالكلام مايشملني اني وابوية واخواني لأن تعرفون احنا شنو وشنو موقفنا من عمامي.
و اطلب منكم تتحملوني هالخمس دقائق اللي اجي أأدي بيهن امانة عمتي هي صح ماتت بس روحها عايشة بينا وعدها بذرة امنتنا عليها منكدر نقطع صلة الرحم واكيد انتو تعرفون صلة الرحم معلقه بعرش الرحمن.
اما عن اعمامي وتصرفاتهم احنا مامسؤولين عنها وياريت ماتشوفونا مثلهم.
الله سبحانه وتعالى يگول ــ
(لاتزر وازرة وزر اخرى)
مو نجي احنا البشر نحاسب انسان بلا ذنب ؏ اخطاء غيره وان كان يقربله.
لا ابن يتحاسب بذنب ابوه ولا اب ينأخذ بذنب ابنه كل انسان وعمله.
واشڪر حسن ضيافتڪم الي خلال الدقايق اللي اشوف بيها بنت عمتي واطمئن هي بخير وأأدي امانة اني قطعتها على نفسي. واعتبرها واجبه عليه.
اعمام لجين جدا معجبين بالياس ورجاحه عقله وكلامه.
وڪان ردهم عليّ عاشت ايده اللي رباك.
دعيت ربي يحفظه ويحمي وي ڪل الشباب.
وڪان وي ٵنس خطوه بخطوه بتجهيز ڪل امور سفره.
وانس اني مدركة ان سفره ماكان لتحقيق حلمه فقط وانما هروب من شي ثاني.
لاهو اللي گادر يتجاوزه وينساه ولا يكدر يتنازل عن عزة نفسه وقراره ويرضخ للطرف الثاني.
مستحيل يروح من بالي بعد زواج الياس لما ڪانوا مسافرين الياس ومرام وقبلهم ميس وبعدهم بــ ايام سافر محمد واني ومسك نتناقش وقصيت الها قصتها ورجعنا لعبنا مسابقه شعريه اني وياها. و؏ صوتنا دخل ٵنس ولعبنا المسابقه الشعريه اني وياه.
من اول بيت شعر ابتدينا بي وڪل بيت شعر ڪان يرد عليه بي ـ يعبر عن حاله.
ورغم شگد حفظت ابيات شعر وي محمد ومن الالفيه ما گدرت اسبقه والنتيجه ڪانت تعادل.
لذلك اشوفه تمسك بــكبريائه وقبلها تمسك بينا وماتنازل عنا وعن وجوده بيننا لخاطر مشاعره. وانسانه تمناها واختارها گلبه.
سافر حبيبي وصديقي واخوي الصغير ودعته بدموع عيني.
ودعيت من ڪل گلبي ربي يوفقه بحياته ويجعل اله بڪل خطوه سلامه..
وشايلين هموم بگد جبال لــ مسك.
واني اتذڪر حالها. لما خبرنا انس بتحديد موعد السفر كل انتباهي راح الها. شنو حالي من شفتها مصدومة وفاتحة عيونها بشدة وبدون ماترمش او تغمض.
شبعت قهر ؏ حالها. لذلك توقعت يوم الوداع يكون صعب وبالضبط صار مثل ماتوقعت.
واليوم ڪلنا انظارنا عليها اشوفها تكابر الم روحها وتضغط ؏ نفسها وتبين ان الامر عادي عدها رغم احسها شگد مختنگة ومقهورة.
وبعد ماودعناه وراحوا وياه محمد وابو مصطفى واوس والياس يوصلوه للمطار ومسك رفضت تروح وياهم.
شفتها دخلت للاستقبال اقرب شي عليها من الباب. رحت وراها وحالتها صعبة تعتصر روحها ٵلم.
ورغم احنا مانقبل تبــﭼــي ودايم نحلفها ماتبـــﭼـــي حتى لاعيونها تتٵذى بس اليوم تمنيت دموعها تنزل حتى تفرغ عبرتها.
كلت الها ماما ابــﭼــي وفرغي اللي بصدرج حتى ترتاحين.
اوووف ماما هالڪلمتين گالتها بحروف متقطعه. مختنگه وترتجف وتعابيرها ڪلها تبـــﭼــي بدون ماتذرف دموع.
اتوسلها وگلبي وجعني واني اشوف حالها مسك حبيبتي ابــﭼـــي ترتاحين.
نطقت وين الراحه اخذ روحي انس.
وراح بالي واني اسال نفسي كٵنَ التاريخ يعيد نفسه والمواقف تتكرر وڪانما المواقف نعيشها مرتين.
ماأشبه اليوم بالبارحة وما أشبه وداعي لارشد بوداع مسك وانس.
وتوقعت يصير مثل ماصار بيه بعد ما تدهورت احوالي بين ايدين امي ونجلة لما سافر ارشد وحس بيه ورجع حتى يطمني وافرغ العبرات اللي خنكتني ؏ صدره.
وصار اللي توقعته ورجع انس وكأنما حس بمسك هي مو بخير ورجع حضنها وهي انهارت ذاك الوڪت صارت دموعها تجري باحضانه.
وكال الها بطلت ماروح دام متاذية وبقت بحضنه وكلنا حواليهم والعيون ؏ ساعاتهم خايفين يتاخر ؏ الرحلة.
وهي تكابر ومن بين شهگاتها تطلب منه يتوڪل ؏ الله ويسافر.
وتكول مابيه شي اني بخير والحمدلله وانت هذا مستقبلك ورغبتك ربي يوفقك.منتظره اسمع اخبارك الحلوه.
وهو ماقبل يطلع الا هي تروح وياهم كال الها بدلي وتعالي ويانا للمطار.
راحت وياهم ودعته من المطار. ومن المطار وصلوا الياس للڪراج توڪل لڪرڪوك لدوامه.
ورجعت جسد خاوي وروح غايبة بالتفكير ومهمومه.
ڪلش اثر بيها سفر انس. وبين عليها.
وهي تگول.
شلون اتحمل لاهو شهر واعد ايامة ؏ الروزنامة وكل يوم اشطب اليوم اللي ينتهي ولاهن ايام قليله واعدهن بسلاميات اصابعي.
هواي والرب هواي عليه. لا يوم ولا يومين شلون اصبر بعد مافرغ عليه البيت من ميس وانس والياس اللي صار يتاخر بدوامه ونزوله بس اربع ايام.
بس اللي صار رجعت مسك تڪابر گدامنا وتتقوه مثل ما متعودين عليها.
احتويها حبيبتي ونڪتب اشياء او نتناقش بمواضيع اضافة ان هي انشغلت بمتابعه تقارير ومعلومات تخص دراستها وبوقت فراغها تدرس بالكتاب اللي جابه الها خالها.
اتصالنا بيهم وسماعنا لصوتهم وضحڪاتهم واطمئنانا ؏ حالهم همَ بخير وڪل واحد منهم اله هدف من هذا السفر يزيدنا راحه وفرحه الهم متمنين تدوم ايامهم سعاده.
ومرت ايامنا واكيد مشاغل وامور الحياة الها نصيب من وقتنا وتفكيرنا
ـــــــــــــــــ
انس ــــ
بعض المشاعر خلقت لتبقى
رغم البعد
و رغم إستحالة اللقاءْ ..
رغم وجع الفراق
رغم الكبرياء ..
ورغم الأَمل المفقود بالقربِ يوماً
تبقى فقط لأنها ... خلقت لتبقى داخل القلب .....
أنس ـــ
اغلب الاحيان لما نمر بمكان متعودين بمرورنا بيه يجذبنا برعم صغير لنبتة بالكاد تتفتح للحياة وتكون رقيقة جدا لكن منظرها من اجمل واروع ماتشوفه العين.
مرات تنساه ومرات تبقى متعلق وتنتظر وتراقب لحد مايكبر ويشد عوده ويصير نبات يسعد العين ويفرح الگلب.
حال حاله الحب يبدي بنبضة گلب مرتبطة بنظرة عين تجذب اهتمامنا .
وهذا اللي صار يوم اللي جذب انتباه عيوني ونبض گلبي بخفقان غريب واني اشوف دموعها بعيونها لاول مرة.
رغم هذه مو اول ولا اخر مرة يجون بيها للعراق كــ ضيوف ويسافرون واصلا كنت اغلب الاحيان المح اشتياقها للامارات اكثر.
وتودعنا وڪٵنها طالعه نزهه مو تسافر وتغيب عنا سنه ڪامله بٵيامها وليالها.
اثناء نزولها من الطابق الثاني ابيتهم وهي تسحب جنط سفرهم.
ڪتابي بيدي. خليته ؏ الطاوله وحاولت اساعدها واسألها عن سبب دموعها.
لكن هي كابرت واخفت وضهرت محاياها ابتسامة ورفعت راسها بشموخ وتگول لالا.
ابتسمت وگلت الها هو شنو الــ لالا. ودموعج هاي شنو؟ ؟؟
سرعان ما مسحت دموعي و رجعت طبيعيه مبتسمه.
هيا ــ لا ابدا مو ابجي لكن تگدر تگول تعودت وتعلقت بــ يزن واني ابدا ماشايفه طفل بهالعمر.
وتعرف هالمرة بقينا فترة اطول من كل مرة زواج هيام وولادة انوسه.
كل شي هنا حلو الحنية وعلاقتي وي البنات اللي بعمري بحيث النهار يمر ما اشعر بساعاته.
اتٵلمت بداخلي من حسيت بيها متٵلمه صعبه الغربه بس ولا مره هي حسست انُ هي عايشه بغربه.
هنا فقط حسيت ان هيا مو مجرد انسانه عادية بحياتي و اعجابي اللي يزيد كل مرة بقوة شخصيتها وتفكيرها. السابق العمرها والتأثير الواضح بحياتها من ابوها.
مع هذا حسيت الموضوع سابق لاوانه و يحتاج انطي نفسي وقت اتاكد من مشاعري خاصة واني كنت باول تحضيراتي ودراستي للسادس الاعدادي.
خالي ارشد اله مكانه خاصة بقلوبنا الڪل وبكل مرة ننجمع وياه يحسس كل واحد بينا هو المفضل عنده.
بحيث منعرف اذا اكو فرق او موجود بينا من هو اقرب اله من الثاني. ڪل واحد منه ينادي باسم يدل ؏ حبه وحنيته وغلاتنا ؏ گلبه.
لذلك لهفتنا وانتظاره ينزل للعراق كلنا نفس اللهفة.
لكن مرة عن مرة اتاكدت من نفسي اني انتظرها اكثر من المره القبلها.
و مو بس انتظار لخالي ارشد وصرت اراقب كل تصرفاتها ويوم بعد يوم يزيد اعجابي بيها وشخصيتها وثقافتها لما نڪون موجودين ونتناقش حسيتها رغم البعد تشبهنا باهتماماتها الادبية والقراءة.
ومرة عن مرة صرت المح ابتسامة خاصة بيني وبينها وخاصه لما نجحت من السادس بمعدل عالي بارڪت الي وتسالني عن طموحي وسبب اختياري لهذه الجامعه.
وردت افاتحها بالموضوع واعرف شعورها تجاهي لڪن حبيت اتٵنى شوي وخاصه بوقت اللي استلمنا نتائج ڪانت عمتي مريضه .
ونظرتي لعمتي وهي تصارع المرض خلتني اترك كل شي وحسيته مو وقت مناسب ابدا .
وتوالت بعدها الاحداث حدث اصعب من الثاني خطف الياس ووفاة عمتي. وتوٵمي مسك اللي اجبرتها الضروف تبتعد عنا وداومت بڪرڪوك. ڪل هاي الضروف خلتني ابتعد عن التفڪير بــ اي شي غير الحزن اللي عشناه بهاي السنه ڪبرتنا عمر فوگ اعمارنا.
دوامت المرحله الاولى رغم هي طموحي وحلمي لڪن الحزن طغى ؏ ڪل تفاصيل حياتنا. وخاصه ڪان ختامها تعرض عمنا لــ مسك وخالو ابو الحسن وهيام. وعشنا ليله قلق ورعب عليهم راح تبقى عالقه بجدار الذاڪره لاخر يوم بعمري ـ
لذلك بالعطله من اجونا ما صار بيني وبينها اي ڪلام غير السلام والترحيب من وصلوا بس اللي فهمته هي مصدومه ومذهوله بتصرفات عمنا حقها ماڪو بحياتها وحوش بشريه. وتقارن بعمامها اللي ڪل واحد شايل حنيه ومحبه وايثار مالها مثيل.
ومن سافرت گالت تدري هالمره افتقدت حديثك؟ ؟؟
مايلوگ الك الحزن ولو هو الحزن مخيم عليڪم الڪل.
اتمنى برجعونا السنه الجايه تڪونون تجاوزتوا هالمرحله.
بگد اذيتڪم وحزنڪم اني اتاذيت عليڪم.
من بعد ڪلامها صرت اعد الاشهر انتظر مجيئهم وهالمرة قررت افتح الموضوع.
وبجيتهم فاتحت ابوية لكن لمحت بعيونه عدم قناعة ومع هذا صار خبر عند خالي.
لكن ماتعمقنا بالموضوع. وانه سابق لوقته اكمل دراستي بين ماهي تخلص الاعدادية.
وبهاي الزياره وكل نزول الهم للعراق من نجتمع سوا ونتانقش بموضوع معين حسيت افهمها وتفهمني واكو شي مشترك بيننا وصرت اراقب كل تصرف وحركة منها وشفتها دخلت عقلي قبل گلبي ـ
من سافروا ودعناهم منتبه لــ مسك لما گالت الها اڪثر شي اڪرها بحياتي هو لما افارگ شخص او اودعه ويسافر احس روحي تنسحب من جسدي.
ابتسمت والتفتت الي وگالت وانت؟ ؟؟
گلت ڪلش عادي عندي لان المسافر مامهتم وشابع ضحك وما مصدگ يفارگنه بعد ليش انقهر علي.
گالت الصراحه حلوه ــ واجمل مابيك الصراحه و ــ وابتسمت.
انس ــ وشنوو. ؟؟؟
گالتها بـ. ابتسامه هو اجمل مابيك الصراحه وشنو بعد؟ هذا الفرع ترك ـ
بس اني ضد المثل اللي يگول الكتاب واضح من عنوانه.
يعني لاتحڪم ؏ ابتسامتي انُ ٵني ما مهتمه وعادي عندي لما اودعڪم واسافر.
اني مع الحڪمه اللي تگول ــ
لا تحكم على الكتاب من غلافه ...
Don t judge a book by its cover..
ولو اناقشك بيها يحتاج ساعات وراح اقنعك بمدى صدق هاي الحڪمه اڪيد.
نهايه النقاش راح يڪون الدليل ـ
قول عز من قائل سبحانه جل وعلا ـ
أَيُّهَا الَّذِينَ آَمَنُوا اجْتَنِبُوا كَثِيراً مِنَ الظَّنِّ إِنَّ بَعْضَ الظَّنِّ إِثمٌ ....
ڪلش عجبتني لباقتها بالڪلام واسلوبها واتقانها للغه الانگليزيه.
گلت الها اقتنعت.
وهي ردت الحمدلله.
ودعونا وسافروا. واني دوامت المرحله الثالثه وهي سادس اعدادي.
ذڪيه جدا ومستواها العلمي ماشالله عالي.
متيقنه من نفسها تحصل ؏ المعدل العالي. وراسمه لنفسها هدف وتسعى بالوصول اله.
وفعلا نجحت وبمعدل عالي. اتصلنا وبارڪنا الها وڪانت فرحانه بثمره تعبها.
ومنتظرين نزولهم للعراق ومتلهف جدا صرت اعد الايام من گد اشتياگي الهم واشتياگي الها عبر مراحل.
مااصدگ دڪتورنا متعدد المواهب يطربنا باغانيه اللي يبدع بااختيارها وڪلها ؏ الجرح.
استلمنا نتائجنا وڪلنا ناجحين قبل ايام من نزولهم للعراق حتى يحضرون خطوبه الياس ومرام.
قررت المح وامهد للموضوع بيني وبينها. من ڪانت تسولف عن طموحها والجامعه. وهي تتحضر لحفله حنه مرام.
جمالها وملامحها المرسومه وهي تتشارك ابعض الملامح بتوأم روحي مسك.
وجمال فستانها زادوا جمال ابتسامة الرضا اللي ارتسمت بوجهها واني المح الها بتردد و اصارحها بمشاعري تجاهها.
وابوها اقترح يتقدم زواج الياس بما ٵن هم باقين فتره. والڪل ايدت قراراهم.
وقبل العرس بكم يوم فاتحت ابويه بالموضوع.
وردت يصير شي رسمي خصوصا اني سنة اخيرة واتخرج.
تمنيت يڪون بينا ارتباط رسمي قبل موعد رجوعهم للامارات. بما ٵن هي السنه تداوم جامعه ــ وهذا اهم سبب.
واسباب اخرى. منها بعد ما سمعت من خالتي عنيده متقدم الها اڪثر من شخص هم اولاد اصدقاء ابوها بالجامعه والشرڪه.
وحسبت بين ما هي تتخرج اكون هيأت نفسي واموري لحياتنا القادمه .
لكن اللي صار ان ابوية طلب مني اتأنى وافكر زين مرة ثانية ولما صار علم عند خالي كان نفس الرأي.
واستغربت الصراحة معقولة خالو ارشد مموافق ينطيني بنته او ابويه ميحب يرتبط بخالو.
وليش اشوف بعيونهم نظرة عدم القناعه بالموضوع ،،
ونصحوني افاتح هيا واشوف رايها بمسٵله الارتباط او اوسط امي تسٵلها.
لكن اني حبيت اكون سيد نفسي واتكلم وجها لوجه يمكن مرات اذا صار وسيط متوصلك فكرة الطرف الثاني مثل المواجهة وجها لوجه. وخاصه اني لمحت الها وشفت ابتسامه ورضا منها.
وصار الكلام والفرحة اللي بعيونها ماتنوصف وحسيت بجراتها وهي تردني بكلمات ماكنت متوقع اسمعها وان هي تحبني اضعاف حبي الها.
وبعدها لفت انتباهي حركتها وهي تضرب كف بكف وي مرام وضحكتهم مع بعض الحركة اللي مافهمت تفسيرها بوقتها.
اعتقدت ان هذه البداية ممكن تجعل الامور تجري بسهوله وعلي مرامي.
لڪن ......
كآن صوتُ تحطمِ قلبي غير مسموع ،
أمآ الآن...!
كبر جِرَحهُ ،
وأصبحَ ينزفُ بهدوءً شديد ..
ــــــــــــ
هيا ـــــ
انا ذاك الفرع الجديد من شجرة بيت عتيد ،،
انا حجر كريم لخاتم اصيل
انا لؤلوة في بحر. عميق ينبض حناناً ووقارا.
انا الدرة الثمينة في تاج ملك وزادها شرفا ونسبا وجمالا.
ابي هو الخاتم والبحر والملك،،،
وحيدة ما يشاركني احد بدلال امي ومحبة ابوي.
ولكن ــ برغم كل مايتوفر النا من متطلبات الحياة وكل اللي نتمناه يكون بين ايدينا.
تبقى الغربة غصة بگلوبنا.
انولدت وعشت كل تفاصيل حياتي بدبي.
لكن الوحدة شي يأرقني ويتعبني خصوصا بعد ماوعيت للدنيا وفهمت وضع عائلتي وان عدنا اهل وعائله كبيرة بالعراق.
وينذڪرون ڪل يوم ؏ لسان امي وابوي واني حبيتهم من ڪثر الڪلام عنهم وحنين اهلي واشتياقهم الهم. واتصلاتهم المستمره بيهم.
ماكنت بحاجة شي اهلي كنت كل عالمهم وكانوا الي كل دنياي.
كنت استغرب استقبال و وداع بيت جدي النا بطفولتي.
يستقبلونا ابكاء ويودعونا ابكاء وحسرات.
واني ڪنت اتٵثر هواي بالايام القليله جدا اللي نبقى بيها بالعراق. لان ابقى ايام بعد رجعونا للامارات واصواتهم عالقه بمخيلتي واسمعها بوضوح.
خاصه اول ما اغفى بحيث اصحى ادور للشخص اللي ڪان يڪلمني واڪثر صوت ڪنت اسمعه ويبقى عالق بذهني ايام وايام هو صوت جدو عبدلله وبيبي ثريه.
وسفرات ابوية المفاجئة للعراق كان يسافر وحده وبين فترة وفترة كانت جدتي عنيدة وجدي يبقون فترات طويله واكيد كانت من ضمن اسباب اشتياقي للسفر للعراق لما يفارگونا.
ابوية اللي بنى شخصيتي وكياني خطوة خطوة من طفولتي وتأثيره بحياتي ڪبير كان كل شي بالنسبة الي ابد ما ترڪني احس بالوحدة او الغربة كان ياخذني وياه دائما للجامعة ويعرفني ؏ الاطفال بنفس عمري ،
و دائما ياخذني مهرجانات او مسارح شجعني امارس كل هواياتي الرسم والقراءة واللغة الانكليزية تعلمتها بعمر صغير واكيد أكثر هواية احبها والاقرب لگلبي هي الفروسية.
كان ياخذني حتى اشوفه شلون يتسابق ويستعرض وبعمر العشر سنوات دخلني ميادين الفروسية.
من الطفولة كنت احب القصص واهلي عودوني يوميا يقصون عليه قصة شخص معين.
ولما كبرت وتعمقت علاقتي بيت جدي عرفت ان كل قصة ڪانوا يقصونها عليه اهلي. كانت لواحد من اعمامي او. اولادهم ،،
حتى قصة عمتي نجلة رغم تغييرهم لبعض التفاصيل.
ولما كان يصير لحديث عن شي بالماضي ابتسم لان عندي معرفة سابقة بهالاحداث.
حتى تواريخ الميلاد باليوم والشهر والسنه لاعمامي وعمتي واولادهم كلها كنت على حافظتها.
وڪل ما اكبر يزيد تعلقي وتأثري بابوية وشخصيته وعمله.
خصوصا واني اشوف اجتهاده ونجاحه لان كان دائما ياخذني للشركة اللي يعمل بيها او للجامعات اللي عنده محاضرات يقدمها.
هذا الامر اللي جعل كل طموحي اكون نسخة من ابوية حتى بتخصص الدراسة والعمل.
وتعلمت منه ومن ٵمي حب اهلهم والاشتياق الهم.
وعيت للحياة اڪثر وصرت اشتاقلهم واتمناهم قريبين منا.
وبعمر الــ 12 سنة صارت الاحداث اللي سبقت سقوط النظام وصار يقلقني حزن امي وابوي وترقبهم وقلقهم المتزايد من الاحداث والاخبار.
واحنا نشوف الاستعداد للحرب ؏ العراق وڪل التفاصيل والاسلحه اللي اعدوها لهاي الحرب.
الشي اللي صار تمرض ابوي واحتارينا بيه وشنو علته اللي حيرت الاطباء.
وصار شبح انسان دخوله للمستشفى واستمرار صحته بالتدهور وانهيار امي.
خلتني اوعى للدنيا من وكت، كنت بظله ما ٵفكر بشي لكن هسه صار الوقت ابني شخصيه قويه متتأثر بأي ضرف يمر بيها.
وبعد استقرار الاوضاع سافرنا للعراق والحمد لله الواقع مو مثل ماتهوله الصحافة وان كان صعب لكن اهون بعض الشي.
وبعدها صارت النا سفرات منتظمة لزيارتهم كل سنة وبكل سفرة كان يصادف مناسبة.
واولها زواج ايناس وحسام وابوي ڪان
سبب بتقديم موعد الزواج.
وبعدها بسنة زواج هيام وولادة يزن بنفس اليوم.
وهذه السفرة كان الها اثر كبير بداخلي بقينا فتره اڪثر من شهر تقريبا صرت فعلا اتمناهم قريبين مني الڪل.
تعلقي بــ يزن ورؤية طفل بهالعمر شي جديد واحساس ولا اروع ولان سفرتنا كانت طويله كان تعلقي اكثر ولاول مرة احس بحزن وقهر لوداعهم وسفرنا.
وصار بعد كل جية النا المح هالاهتمام والنظرات وصرت اترقب واعد الاشهر حتى اجي للعراق. رغم انعدام الامن والامان.
احس الحياة بيها حلوة لان بيها جزء اخر من عيلتي ولمة الاهل و البنات وسوالفنا خلتني اتلهف.
لكن اجي كــ ضيفة مستحيل اكدر اعيش حياتي هنا.
وخاصه بعد الاحداث اللي توالت والمت واحزنت بيت عمتي واحزنتا عليهم.
من خطف الياس سفر ابوي للعراق واجانا جدو ادريس يبقا يمنا واتصالنا المستمر بيهم ايام وايام وماڪو اي خبر عنه. و؏ البعد حاسين بعذابهم وتدهور حالهم.
الى ان عثروا علي واني دخلت بصدمه شلون يڪون عمه هو الخاطف عقلي مو مستوعب هالشي.
وازادات صدمتي لما شفت اذيته وحاله وڪٵن طالع من انفجار بعد ما اجانا وي بابا للعلاج.
وحالته ووضعه ماباقي جزء من جسده ما متضرر.
تسائلت بقهر شنو اللي يخلي عمتي باقية بالعراق ليش متطلع مثل غيرها من العوائل اللي طلعوا يبحثون عن الامان.
وتوالت بعدها الاحداث الاصعب وفاه عمتهم ـ ومحاولات لاعتقال عمو محمد وبعدها ابتعاد مسك عنهم ومرضها اللي اساسه وبدايته ڪانت بسبب الضروف اللي صابتهم.
ومن بعدها محاوله خطف مسك واصابه عمي ابو الحسن.
ڪل هذا واني اتسائل ومستمره بسؤالي ليش باقين بالعراق؟ ؟؟؟
شنو ينتظرون بعد يصير اڪثر من اللي صار.
واللي مٵرقني ومتعبني شلون عمهم هو سبب اذيتهم؟ ؟؟!!!!
معقوله ماحن گلبه ؟؟
واللي صار بعدها لما تضررت عيون مصطفى بسبب انفجار وهالشي خلاه يخسر طموحه وحلمه بالعبور.
وزادي حزني وقهري لما طلعت الدرجات وڪانت درجاته عاليه.
وكل ما اسمع بوضع جديد ومشكله يزيد خوفي من العيشه بالعراق.
كل هذا زاد يوم بعد يوم قناعتي ان من سابع المستحيلات اعيش حياة دائمية بالعراق.
لكن افكارنا وقناعاتنا ممكن تخسرنا شي مو ببالنا نخسره.
ومن صار موعد نزولنا للعراق نحضر خطوبه الياس. اللي صار خطوبه وحنه وعرس.
وبين فرحتي بنجاحي ومعدلي العالي وفرحتي بنجاحهم والفرحه صارت افراح ولما تجمعنا للمناسبة كــ بنات وصار الكلام وسوالف سهر ونقاش.
وڪلمه مرام واني اشوفها وفرحتها مايوسعها الڪون.
ان اجمل شي بالحياة لما يدگ گلبك لانسان وتحبه وبالمقابل تلگاه يبادلك هالشعور.
فرحت لفرحها احبها ڪلش وقريبه لگلبي واثناء ڪلامها نظري صار ؏ الشخص اللي دگ گلبي اله.
واجمل شي صار بحياتي لما صارحني هو.
ٵنس اللي كنت انتظر هالخطوة منه يمكن حتى اكثر منه فرحت بمبادرته وفرحتي ماتنوصف.
وبعد ڪلامه وياي وردي علي كانت قريبه مني مرام وضربنا كف بكف من فرحتي واني اگوللها هسه حسيت باحساسج وحبج لــ الياس وهو اول دكة لكلبج فعلا اجمل واروع احساس وشعور.
ابتسامتي مافارگتني الى ان انفتح الموضوع بصورة رسمية وطلبوا من عدنا نتناقش سوا.
فاجٵني ڪلام انس وهو يطلب من اهلنا والكل متواجد بصالة بيت جدي ان يكون ارتباط رسمي ع الاقل حلقة وعقد سيد.
لكن اللي لفت انتباهي الفرحة الباهته بوجه ابوي وعمو محمد وڪل اهلنا ليش ما اشوف بعيونهم فرحه نفس لهفتهم وفرحتهم وقت ارتباط انوسة وحسام ،والياس ومرام.
بعدها احس مثل اللي يرمي الكرة بملعب الثاني وهم يكولون اكعدوا اثنينكم واتفقوا شلون ترتبون وضعكم بما ان انتو كل واحد عايش ببلد وعدكم دراستكم وارتباطاتكم.
انتقل انس لجانبي وكعدنا بمسافة شوية عن الجميع وساد الصمت بينا لدقايق.
ومن بعدها ڪسر حاجز الصمت با ابتسامه وگال اي ـــ
واني گلت اي ــ
صدك والله شلون وضعنا واحنا كل واحد ابلد وين نعيش بعدين.
انس ــ ابيتنا غير يعني وين.
هيا ــ تقصد هناااا
بالعراق! !!!!!!!!!!
انس گالها بضحڪه لا بـ امريكا لعد وين قابل بيتنا خارج العراق ؟؟؟؟؟
هيا ــ ليش احسك ماعندك جديه بالڪلام.
خلينا جادين بالنقاش وانت تعرف كلش زين اني مااگدر اعيش بالعراق اقصى شي ممكن اتحمله هنا شهر يجوز شهرين لكن استقر مستحيل.
امي وابوي وحياتي. والاستقرار والامان طموحاتي كثير اكو امور واسباب تمنعني اعيش هنا.
اختياري لهاي الجامعه اللي مالها اي مستقبل هنا بينما عدنا هي الرقم واحد.
هنا حسيت بأنس تفاجئ وكــ ٵنَ ميعرف اني ما اگدر اعيش بالعراق.
وٵني توقعت عنده علم ولما لمح الي وصارحني هو حاسب حساب لهذا الشي.
ويمڪن لهذا السبب شفت برود ابوية وعمو محمد تجاه موضوعنا معناها مدركين ان هالشي راح يكون نقطة اختلاف بيني وبين انس.
وصار نقاش بينا وكلام اخذ وعطا وكان اسلوبه جدا مقنع بالنسبة لو انسانة تگدر تعيش بالعراق وعدها استعداد لهذا الشي.
لكن اني ما ٵقتنعت واني اول خط احمر بحياتي هو مستحيل اعيش هنا.
وصرت افهمه طموحي والجامعة اللي ناوية ادخلها والتخصص اللي ادرسه ماله اي مستقبل هنا.
وبعد كلام طويل وهو يوجد بدائل للحلول واني مااقتنعت.
گال والحل شنو اذا انتِ مو ناوية تقتنعين بڪل هذا؟ ؟؟؟
زين ليش من وافقتي شنو ڪنتِ متوقعه؟ ؟؟
گلت اني مااعتبر انتهت الحلول وافقت وفرحت لان اكيد اكو حل يرضي جميع الاطراف.
وخلينا نتبادل الكلام ليش مو انت تجي تعيش بالامارات وانت الك طموح ونية تدرس اكاديمية طيران وهالشي متوفر وفرصتك اكبر بيها ومستقبلها افضل من العراق.
هنا حسيت بــ أنس انصعق. وانعقج وجهه وكانه انسان ثاني معرفت افسر تعابير وجهه وردة فعله وكال مستحيل اترك اهلي. واتخلى عنهم.
انس ـــ
اجمل شي بالحياة الحب ،،والاجمل لما تكون دگة الگلب لانسان يبادلك هالشعور،
لكن .....
مو بسهولة انال اللي نريده ويكون من نصيبنا.
مرات نكون جدا قريبين من اللي نحبهم ومابيننا فواصل او مسافات ومجرد ماتعرف ان المقابل يبادلك نفس المشاعر تعتبر ان الطريق سالك.
لكن بالحقيقة تنصدم لما تحاول اتمم باقي امورك وتلاحظ ازدياد المسافات وتعاكسك الظروف لدرجة تستسلم وتتاكد حلمك صار بعيد.
الحب تضحية وبعض التنازلات، ، نعم صحيح. لكن مستحيل هالتضحية تكون علي حساب اهلي.
مو ابن محمد والمها. اللي يتخلى وينسي اهله شكد عانوا ماعانوا حتى اكون اليوم بهذا المكان واكون انا.....
هيا ــ زين اني ليش تطلب مني اتخلى عن اهلي.
ليش متعتبر السفر بداية حياة جديدة وتحقيق طموح وابوية اكبر مثال سافر وڪون حياة وحقق طموحه واللي وصل اله حاليا لو باقي بالعراق ميگدر يحقق جزء بسيط منه.
ولو نفرض گدر يحقق شي هنا بالعراق فـــ اڪيد مو بسهوله.
ليش تعتبر اللي يسافر يتخلي عن اهله يعني هسه ابوية بنظرك تخلي عن اهله ؟؟؟؟
انس ـــ لاتقارنين بيني وبين خالي كل واحد وضروفه وتفكيره وهدفه بالحياة.
ثم خالي تزوج امج بالعراق وبعدها يله قرر يسافر يعني ماجبرها او هي فرضت رايها عليه هو اللي اختار السفر اما اني مستحيل اعيش واستقر بدوله ثانيه بعيد عن اهلي.
وكلمة المستحيل يمكن البعض يكولها. يبرر لنفسه عدم تحقيقي شي بس اني اكولج و اعبر حدود المستحيل واذا اكو شي اكبر من هالكلمة اكولها.
افضل الموت ولا اعيش ابلد يضمنلي المستقبل والحياة المريحة مقابل ابتعد عن اهلي.
وصار انس يتڪلم عن امه وابوه وشنو يعنون اله وشنو مكانتهم بحياته لدرجة حسيت اني شي ثانوي باهتمامه وان ممكن يتخلي عني.
لذلك نهيت الموضوع وگلت لا اني اگدر اتخلى عن اهلي واعيش بالعراق ولا انت تگدر تترك اهلك وتعيش بالامارات.
اذن دروبنا مختلفة وماتلتقي وخلينا ننهي كل شي دامنا بالبداية حلو الاتفاق.
ليش انطيك امل اني مو گدة او اوعدك بشي واحاول انفذه واني ادري راح اظغط ع نفسي وبالاخير ما اكدر اڪمل.
خلينا ننهي ڪلشي ونعتبر شي ماصار .
رد هذا هو فعلا ڪلامج صح.
هنا البقية انتبهوا لكلامنا ونقاشنا وگالو بعد وكت ممكن تتغير الامور هسه الكلام سابق لاوانه.مو هيج تنهونها.
رغم عمامي متأكدين ويعرفون بيه ما اگدر اعيش بالعراق.
عمو محمد گال اني ماعندي مانع اي واحد من اولادي يريد يسافر او يعيش بغير محافظة او يستقل ابيت خاص كل واحد بحريته ما افرض عليهم شي.
هنا رد انس خلاني اتاكد اني مو ذاك الشي الاهم بحياته مثل ما اني رسمت ٵن ممڪن يسوي المستحيل علمودي لما گال ـــ
لا اني هذا قراري وهذه قناعتي ماممكن اعيش ببلد ثاني بعيد عنڪم.
وبعد هذا النقاش ماادري ليش حسيت نظراتهم اليه بعتب.
انحرجت وحبيت اعتذر توجهت لعمو محمد وبسته وگلت اله عمو اتمنى ماتزعل مني. لان اني هم الي حياتي وناسي اللي ما اگدر اتركهم.
رد الله يقدم اللي بيه الخير منا لتخرجڪم يحلها رب العالمين.
بعد ما انتهي نقاشنا وسافرنا فكرت ان ممكن تتغير الامور لصالحنا بعد مايتخرج او تتغير الافكار والمواقف والاراء لان دوام الحال من المحال.
وداومت المرحله الاولى من الجامعه واني ؏ امل يتغير الحال.
وصار موعد سفرنا حتى ننزل للعراق ونحضر عقد قران اسمى وعبد العظيم وكنت كلي لهفة وترقب لشوفة انس رغم نقاشنا انتهى بان طرقنا ماتلتقي لكن كان عندي امل بالتغيير.
ولما وصلنا وتقابلنا سلم واتحمدالنا بالسلامه بس ما عرفت افسر نظرته ولا ڪٵن سنة مرت على فراگنا.
ملامح وجهه وهدوء شخصيته الدائم صعب تفهم اذا كان متاثر او متجاهل المقابل.
ولما صار الكلام من عمو نجم عن اللي تقدم لــ ميس وانرفض وجاري النقاش بالموضوع وعمو محمد رافض ـ
وعمو نجم يبين ان ميحب اي شخص ينڪسر خاطره.
وڪل متقدم يعتبره واحد من ولدنا وما يحب ينكسر خاطره حسيت ان الكل ينظرلي نظرة المذنبة وان اني السبب.
زين اذا فعلا مثل ماسمعت ان انكسر خاطره وانقهر وينه وين التاثير ولامبين متاثر او مقهور ولا كأن موضوع انفتح وصار بيه كلام وكانه اكتفي بكلمة كل شي انتهى وردي اله كل شي انتهي هذا هو.
كنت اعرف بي طموح ويريد يدرس بعد التخرج اكاديمية طيران واكيد من افضل الاكاديميات بالشرق الاوسط هي الاڪاديمات الموجوده بـ الاردن والامارات.
كنت متوقعه ان يدرس بالامارات ويقرب المسافات.
ويمكن يشوف نفسه يگدر يعيش هناك او. لا.
ولما عرفت ان قرر يسافر ويكمل دراسة بالاردن.
هنا كانت الضربة القاضية شنو فرق الاردن عن الامارات هذا سفر وهذا سفر ليش ماقدم بالامارات وشاف الوضع او يكدر يقرر ع اساس الايام اللي يعيشهن بيها.
حسيت بقهر وان فعلا تنازل عني ومتجاهلني واني مو بباله او من مخططات مستقبله.
واذا هو يريد يخطط للمستقبل ويحقق طموحه بعيدا عني.
بعد اللي صار فڪرت انُ افضل قرار اتخذنه لما نهيت ڪلشي قبل لايبتدي.
عندي حياتي ومستقبلي اللي اسعى احقق طموحي واسير ؏ خطى مثلي الاعلى ابوي واڪون مديره اعماله واڪمل دراسات بالجامعه وما اتوقف عند حد معين....
ان كنت جبل فـ انا القمه
يصعب عليك الوصول اليها
وان كنت عزيز النفس والهمه
فـ انا العزه اللي تتمناها .......
يتبع ـــــ
حبايب تعالوا نسمي هالبارت بارت المواقف، ،،
وتنطوتي رايكم وتجاربكم عن كل موقف اذا مارين بيه او سامعين عنه ،،
رايڪم حبايب ـــ
1/موقف الياس تجاه انس وتضحيته في سبيل يحقق حلمه،؟؟؟
2/ موقفه تجاه لجين وعدم تخليه عنها وصله الرحم؟ ؟؟؟
3/موقف اعمام لجين وقرارهم بقطع العلاقات ؟؟؟؟
4/موقف انس وتمسكه بقراره،؟؟
5/موقف هيا وتمسكها باهلها ودراستها ؟
وبالنهاية نگول الحب يعيش ويستمر. على بعض التنازلات والتضحيات ولكن،،،،،،
منو يبتدأ التضحية والتنازل اولا ؟؟؟؟
انس؟ ؟
هيا؟؟؟
لو راحه تڪون نهايه قصتهم 💔؟؟؟؟
ارائكم تهمني ♥
لاتنسون التصويت 🧡
محبتڪم ــ وئام الشيخلي........💞