" نـيـران أبـو ذيـبة "
بقلم ، نـبـأ الـسـلطـان
الـحلـقه الـ ١١
......
غضـب : ثبتت اقدامي ووگعت الطاسه من أيدي وطاحت للكاع ..التفت على ياسر
- چـا، منين اتلكاها منك من صفعات الدنيا من گسرت أبوي ؟يعني من تشوف انسان كتوم وما يحجي وذابها على الصامت اكيد اكو شي خلاه هيج يصير انه حسب ما فهمت اعتبرتني مغرور
ياسر : اي ليش كلها تحبك وابوي دوم يعيرني بيك يكول غضب احسن منك حتى بدراسه
غضـب : اذا انتة مو زين انـي شعـلية هذا هم ضيم الوكت شمرك علية ..عفتة ونزلت من الدرج حمدت الله وشكرته ما وكعت وصار بية شي هاي دعوات حبوبتي وامي الي
رجعت سويت الخبطه من جديد وشلت طاسـه واخذها ياسر ومشى ،
اخذت يوميتي من ابو ياسر ومشيت اتسوكت لاهلي مخضر ورجعت مشي صافن بدنيتي يوميه شامرتني يوميه تصدمني بشخص ما اتوقعتها من ياسر هاذا التصرف الرذيل.. ضليت اسأل بنفسي شمسويله اني ليش يكرهني هيج ؟
رفعت راسي للسما ونزلت دموعي تذكرت ابوي جان يوصيني دائما
_- بوية مهما صار لا تصير حاقد ؟
_-بوية مهما صار وياك سامح الشخص الي غلط بحقك رب العالمين يسامح احنه منو وما نسامح !.
فركت صدري وتنهدت بحسرة وصلت البيتنا وانه ما حاس لاكاني عمي امير جان هستوة جاي من الشغل
أمير : ها بوية شون حالك اهلك شلونهم اخيوتك
غضب : الحمدلله عمي كلهم بخير
امير : تشتغل عماله وليدي
غضب : اي عمي جا شنسوي
امير : تعال بوية ادخل تغدى يمنا ساعه ٣ الضهر والدنيا نار تعال وليدي
غضب : لا عمي مشكوور وعلي اريد اروح اسبح انام ساعه ارتاح
امير : على راحتك بوية تعالوا لية بليل نتعلعل عند الشيخ عثمان
غضب : ان شاء الله اجيب الولد واجيك ،، وصلت بيتنا فتحت الباب ودخلت هدوء صنطه البيت
ذبيت حذائي وخليت المسواك بلمطبخ على السله الجبيرة امي دائما توصيني اخلي عليها
رحت الغرفتي طلعت ملابسي وسبحت انتظرت شعري ينشف ورحت اصلي حتى غدى جانت نفسي مسدودة ما اشتهيت
لفيت راسي ونمت الغرفه مرتبة وهادئه وباردة وريحة المسج بيها وماي الورد حلوة
حسيت على أيـد ناعمـه تتلمس بوجهي فتحت عيوني بعدني نعسان وتعبان .
شفتها قموورة كاعده يم راسي ومخليه وجها بوجهي !..
_- ماما دول ادعد
غضب : لزمت ايدها صغيرونه وناعمه وبيضه حليوة ، بستها وشميتها كتلها
_- روحـي حبيبتي كليلها غضب دعد ؟
_- لاح الوح؟
_- اي عفية بنيتي ،، فتحت باب الغرفه وراحت تركض لامي
كمت اني غسلت وجهي ورحت كعدت يمهم
كالتلي حبوبتي ..
قسمة : غضب يمة انه باجر رايحة للزيارة تروح وياي
غضب : لا حبوبة عندي شغل وما بيه حيل بعدين اخذي حسن
قسمة : خوش يضربك حريشي
غضب :حبوبة والله عندي شغل وبيني وبينج هم اريد ازور بس تدرين شغل وما فارغ
كركان : جااا وانة
قسمة : شبيك انت ولك
كركان : اريد اروح وياج
قسمة : يبوووو خوش
غضب : ابو صماخ صماخك جنه دعامية بيكم المن مولي
كركان : هاا جا بس حسن والله الا اروح
غضب : الغسل لهالحلك
حياة : شبيك انت شرايد منه خله يروح
غضب : جا شرايد منه يطبه طوب الريلين ريليه والكاع كاع الله
سمعت الباب كمت
غضب : اتفضلل
سلمان : زاد فضلك بوية
غضب : استغفر الله شعنده هذا فتحت الباب
هلا حياك الله
سلمان : محييك الله قسمة وين
غضب : جوى ليش محتاج شي فوكاها تحجي باسمها احجي عدل
سلمان : لا بس ايت اطمئن عليكم خاف محتاجين شي
غضب : يا الله يا الله منين جتك المحنة تالي وكت ما انريد شي روح الله وياك
سلمان : هاا جا شگالولك علية
غضب : يگولون الباطل ما يدوم
سلمان : اي يكولون صح شقصدك ولك
غضب : لا ما قصدي شي بس حبيت اذكرك الباطل ما يدوم
سلمان : بارتباك....... وتذكرني ليش ششايفني ولك
غضب : شيطان
سلمان : ايا ابن اللذين ازلف ولي من يمي قسمةة وينج الله بالخير
قسمة : هلا الله يجويك
سلمان : شلونج شلون اليهال
قسمة : بنعمة فضيلة شعجب اليوم مريت
سلمان : عاد بيت العزيز انتم وين حياة بوية الله يساعدج اطلعي نشوفج
حياة : هلا ابو هاني شلونك
سلمان : الحمدلله الله شاهد ماكو فرغة اجيكم تدرون بعد طلايب وسوالف تشيب الراس
غضب : محد عتب عليك ابو هاني هاي شفت اهلي امشي يلا روح
سلمان : افا عليك بيت اهلي انتم
غضب : لا اهل ولا غيرة عيني روح منا ترى روحي واصله للستار
سلمان : المهم بوية اني مستعجل هاي كم فلس تحتاجونهن واي شي تردونه ودولي واحد من الولد اني حاضر
غضب : شكرا ابو هاني ما محتاجين شي خيرنا مكفي وموفي واني عندي شغل خليهن الك يجوز تحتاجهن
سلمان : لا وروح الغالي ما يرجعن
غضب : لا تلح كتلك عدنا والله من نحتاج مو بعيد عني انت واجي اكلك
سلمان : صفن بوجهي. تمام بوية تمام براحتكم يلا في امان الله
غضب : الله وياك
طلع سلمان واني بودي هسة احط جيلة بي
غضب : يمة اني طالع وخاف اطول رايح للبستان
حياة : ولك دير بالك على روحك يمة
غضب : صار
حسن وكركان : نروح وياك
غضب : هاا لا ما تروحون ضلوا هنا خاف يجي احد اني ما اطول
طلعت من البيت والف فكرة وفكرة براسي السويته غلط لو صح زين اني مو لازم اخذ حقي شلون راح اخذه واني وحيد
استغفرك الهي استغفرك الهي نفضت الافكار ومشيت بدربي هناك والتقيت ب عايد رفيجي
عايد : السلام عليكم
غضب : وعليكم السلام
عايد : شلونك غضب شخبارك
غضب : بشنو راح يهمك اذا عرفت
عايد : ابن عمي واسأل عليك بيها شي
غضب : اتوكل وليدي ماعندي عمام
عايد : غضب بس اسمعني فدوة افهمني والله ما رايد شي منك
غضب : بنفوذ صبر ، هاا احجي شرايد
عايد : ارد اصير صاحبك واخوك اني تدريني وحيد وولد اعمامي الله يسلمهم مثل فروخ الجلبة خيرهم نكس
غضب : هالمثل ينطبق عليكم خيركم نجس
عايد : تمون غضب تمون بس اني ما بايدي شي الشور كله بيد ابوي واعمامي ونسوانهم كفيلك الله عايش عيشة الجحيم وياهم
غضب : استغفر الله الهي هسة شرايد فضني احجيي
عايد : غضب اني مليت والله مليت ما لي لا اخوان لا اهل صح تشوفني عايش بالبيت بس اهلي عدواني والسبب لأن ادافعلك دوم وهمه غلطانين واكلهم هذا غلطكم بس ما يرضون
غضب : نار كرهي الكم كلكم يجي يوم احرگكم بيها يجي يوم اشعل بيكم هاي النار يجي يوم واشربكم من المر الشربته ياهووو كتال ابوي هاااا لو عندي اعمام ينشد بيهم الضهر اضل هيج ساكت لو عندي كلب ابن كلب يريدني هاك شوفني وحيد بس وروح ابوي ريحتي هيل وصيتي وصيت ابوي ما انطم
ولا راح ينطم
غافل عنكم بس اخباركم يمي الهوى التتنفسونه عندي واعرفه احسب يوم يوم وساعة ساعة حتى اسويكم فرجة للديرة كلها واكلهم خيون ما مات خيون كتلوه اخوانه
عايد : سووي كل شي. غضبب سوي حرموك وحرموني هذااك ابوي سليمان يدهن بضلعة فلووس ومفاطيح هذولاك اعمامي الطمع عمى عيونهم لاا وانطيك الاكبر يريد يلوفون عليكم ويقسمون الكيعان وحلال ابوك بينهم وهذا اقتراح سليمان النجس
غضب : وتحجيها بويهي وتكووولها لزمته من رگبته خنكته ونمت على كلبة وللكك اليوم ادفنك هنا والله وروح ابوي اضيعك ضربته كله فقد الوعي
من شفته هيج كمت منه نزلت بالناظم اكو بطل ترسته وطلعت غسلته
غضب : اكعد لك عساك بالموت
غسلت خشمة ووجهة وعى على نفسه
عايد : حجيت من حركة گلبي اني عايش بضيم بحياتي ما عشت طعم الامومه والاب بحياتي مخلصها مشاكل وكرامتي تنهان وتنداس واكول ميخالف ابوي وامي يمونون اهم شي ما اضل ساكت راح يورطون انفسهم ويورطوني واني ما اريد اكل الحرام واسكت
غضب : كووم يلا ولي لاهلك
عايد : ما عندي اهل
غضب : والكواويد الياكلون مفاطيح بزود ابوي
عايد : طردوني لان دافعت عنك
غضب : بين الما مصدك والمصدك ...عمامي ما خلوا ثقة بگلبي اتجاه كل شخص
غضب : استغفر الله امشي اروح لاهلي
عايد : وانت
غضب : شعليك
عايد : اريد وياك
غضب : مخلفك وناسيك ابن الرگعة تولي لاهلي لو اروح اريد اولي للبستان
عايد : لا خلص روح اني اضل هنا انتضرك
غضب : خوش مشيت خطوات مسافة
عاايد
عايد : سّم ( آمر)
غضب : تعال يلا
عايد : فرحت كلش نسيت الضرب ونسيت كل شي رحت ركض ويا
غضب : شذكرك بيه هسة
عايد : ليش هو اني ناسيك حتى اذكرك بس مجبور هاي امي وابوي يكلولي نغضب عليك ليوم الدين اذا وصلت يمه واذا حاجيته بس بعد ما ظل صبر خلي يغضبون اني ما اريدهم كفوا ووفوا
غضب : هاااا
عايد : والله
غضب : تندمت ضربته اعرفه بس هو الوحيد من بينهم المظلوم والما راضي ببس مو بايدي ذنبة ان ابوه عمي
اهخخخ يا حيف اعمامي 3 بس واحد خير بيهم وولد
عايد : غضب شبيك
غضب : لا ما بي شي
عايد : وين نروح
غضب : للبستان
وصلنا للبستان صار هواي ما جاي لهذا البستان صار المفضل عندي لان يطل على الشط وريحته تذكرني بابوي ابوي دوم يجي بي ويصير بي
غضب : تعال امشينا على حافة الشط
عايد : خوش
مشينه وكفختنا نسيم وريحة الشط
غضب : احب هالريحة تذكرني بابوي
عايد : اني هم وبيني وبينك دوم اجي لأن عمي جان الوحيد هو اليساعدني غضب تدري اني احب ابوك واحب امك واحبنكم اكثر من حبي لابوي وامي واهلي الحرموني منكم وحرموني من شوفة حبوبتي
غضب : بيتنا شمرة عصى ما تتكلف اذا تجي
عايد : يخوي والبلوة العندي
غضب : الله كريم شتريد مني هسة
عايد : خلني تحت ايدك ذراعك ذبني بالموت جدامك ما اكول باطل اني اهلي عافوني وطردوني غضب تصدكني لو لا حبكم متلبس بروحي وروح عمي مالي كل ذنب بكل شي من واحنا صغار امي تجويني اذا اتقرب الك وخلتني اكرهك واكره امك هاكك شوف اثار الحرك
غضب : يحجي بعبرة ودمعة بعينه صح عايد فرق شاسع منهم رفع ردانه وشوفني اثار الحرك ورفع سروالة وراواني الخياطات
عايد : شووف هاي ريلية مخيطة لان ابوي وامي شكو شي يمهم يطكوني بي
وروح عمي يوم من الايام ضربني ابوي بالصخرية على ضلوعي على ايدي كسرها الي ومع ذلك متحمل
غضب : الله كريم السنين جاية ونشووف ياهو الربحان
عايد : واني وياك يبن عمي
غضب : انت تدرس مو
عايد : اي
غضب : مستواك شلونه
عايد : والله بس بالاسم ادرس درجاتي مزفته
غضب : قانوني ماكو اخو بدون دراسة وما يتعب على روحة
عايد : انت فصل واني البس
غضب : متأكد
عايد : جربني
غضب : شور الله وشورك ما خسرانين شي
زين وين عايش هسة
عايد : يم بيت خالتي
غضب : هااا هم نفس الطينة لو طينتها حرية
عايد : طينة وساحگها باسكل
غضب : قصدك زر.... وساحكها باسكل
عايد : ههههههه تبقى امي ترى
غضب : ما تنلام عز الله صرت حنين
عايد : انت شتكول
غضب : حنين بس وادمك طايحة حظ
عايد : الله كريم. تدري شكد مشتاك لعمتي وحبوبتي
غضب : يلا كوم امشينه غربت الدنيا
عايد : يلاا كمت بحماس اريد اشوفهم واكعد وياهم اريد اشوف نفسها عمتي ما غيرها الوكت والحقد
غضب : عايد مظلوم حيل بس ما راح اعوفة حقدي لأهلة مو اله
وصلنا للبيت دكيت الباب
اجاني صوت كركان
كركان : ياهووو
غضب : افتح الباب
كركان : هو انت ياهو
غضب : هههه استغفر الله افتح الباب يلا
كركان : لا ما افتحه
غضب: ابو صماخ بالعباس اطفرلك افلش صماخك جنه دبة غاز
عايد : هههههههه.... افتح الباب يخووي
كركان : انت هم ياهو
عايد : اني عايد
كركان : عايد ياهو
غضب : لا اله الا الله ولك افتح التبن
كركان : انتم ياهو
غضب : تفتحه لو وعلي اطفرلك
كركان : لا لا هاي راح افتحه
غضب : فتح الباب كركان ولگفته
غضب : ليش تخبث
كركان : هسةةة شبيك واحد ما يتشاقة وياك هللووو هللووو هذا عايد شتريد
غضب : اكل تبن
يمةةة تعالي اجانه عايد
حياة : سمعت حس غضب ردلي روحي بس فاجئتي من كال اجه عايد
طلعت اتلكاهم
حياة : واني اكول اليوم الشمس منين طالعة هلا بعد عمتك
عايد : تشوقت اشوف عمتي واحضنها
طلعت تشع نفس ما هي حنيتها وطيبتها ووجها النوراني
رأسا بجيت وحضنتها
حياة : يااا يااا شبيك بعد امك هاي عود انت الزلمة تبجي شبيك يمة عايد
عايد : عمة والله حرموني منكم وعيشوني بجحيم
حياة : يا بعد عمتك العيون اوسع من البيت يمة
عايد : ريحتج ما تغيرت ههههه
حياة : احب. عايد كلش جان يموت علية دوم يجي اسويله حنية من اخبز ياكلها
غضب : يلا طبوا جوى نضل هنا برايكم
دخل عايد وركض لحبوبتي
حضنها ويبجون سوية
عايد : دخلت البيت وشفت النور كاعدة روحي ترف عليها
انصدمت من شافتني
قسمة : عيدي هلا بريعان گلبي هلا يبعد امك هلا بطوايف طوايفي
عايد : ابجي واناشغ وابوس بايديها واشم بيها
ما اتمنى هاللحضة تخلص بودي طول عمري حاضنهم واشبع منهم وحنيتهم
غضب : منضر عايد خلالي امل ووجوده يمي شفته ششلون يبجي ومتلهف
غضب : هههههه كافي بوية راح تموتون رواحكم من البجي
قسمة : شلونك يحبوبة اميمتك ابوك شلونهم
عايد : بنعمة وخير وطمع
قسمة : وليش ما تيينة
عايد : حبوبة شنو جديدين عليج نفس الطينة ما تغيرت ما يخلوني اجي ويهددون كفيلج الله عايش بظيم يمهم ولا جن اني ابنهم هاج شوفي الجويات والخياطيات بكل مكان
قسمة : سودة بويهي يحبوبة كسر بايدهم ييمة
عايد : الله كريم يمة الله كريم طردوني من البيت ولا واحد سأل عني عايش عند خالتي بهالجم يوم شوفتني نجوم الضهر
حياة : يبعد امك هذا بيتك ما شاء الله بيت جبير وواسع وهذول اخيوانك واني اميمتك ولا يهمك غضب يشوف شغلة
غضب : مخلفة وناسي
حياة : غصبا عليك
غضب : هههههههه تامرون بوية عايد اخيي ان شاء الله وان جان صار مثل ذاك الخوش ولد الكيبل والصوندة موجودة
كركان : ياهو هذا
غضب : واحد يعرف روحة شتكول حسن
حسن : اي يصيحولة ابو صماخ
كركان : انجب حسيون
قسمة : ههههههه بدة المناگر بدة
غضب : يمة ترى مصاريني تعاركت
حياة : اوكف اوكف صخام ولك شبيك غضيب هسة انتبهت لهدومك وانت عايد شبي خشمك هذا بي دم طالع منه
غضب : تههههههه ديلا بالله بوية ماكو شي بس هيج شوية لعبته لعبة بدون قصد
قسمة : ولك انت ما تصير ادمي للا والله ليش تطك اخيك
عايد : حبوبة عووفي اخوي يمون
حياة : على ابو اخوي يمون انت يومية مكسور بيك شي اسأل هذولة
كركان : اي خايب وعلي هذا شلون هذولة جماعة القايد تكول يشتغل وياهم اذا لزمك من رگبتك خوب الكلة خل يسولفلك عليها حسن خشمة لحد هسة مورم صارلة مدة
عايد : ما يحتاج هالتشوف خشمي اني هم فلشة الية
قسمة : اي يمة هذا ثور بس ينطح
غضب : هااا
قسمة : ويعا جا هذا الصدك مخلصها بس تنطح وهو بس الثور ينطح
غضب : انت هم مستهترة ينرادلج شويب يضب براغييج
قسمة : هههههههه امداك وامدة حضي
غضب : ولكمم صلاتكم يلا شني انطيتكم مجال يلا كل واحد يكوم يصلي وانتي قسمة شنو اخذج الواهس شو انت تخلصينها صلاة من العصر للعشا
قسمة : يااا شمالة هذا امشي ولي اختك الصغيرة اني
غضب : كتكوته قسمة
قسمة : خاب ناوشنياه خل امعطة بعضة هالخبل هذا دفوت ولي من يمي
حياة : ههههههه اباوع لمناكرهم واضحك وعايد عمت عيني علي منطلق وياهم
طلعت اخبز بالتنور الطين احب خبزة ثمر
عايد بعدها گرصتج جنها لوحة رسم شكبرها
حياة : ههههههه اي بعدها
عايد : نسيتي شي
حياة : لا يمة ما ناسيتها هياها شوفها عزلتها الك دولجتها صغيرة اسويها حنية
عايد : عيوني دمعن وبجيت
حياة : خايب انت ناوي علية يمة والله خلص دمعي
عايد : عمة بحياتي ما وكفت يم امي وسوتلي هيج وحسستني هي امي وكل ما اكلها تضل تزامخ لان تدري انتي عودتيني عليها
حياة: ما لك علاقة بالحجي ولا تشيل بگلبك عليها امك صح غلطانه بس الله يصلحها وينبهها وصدكني يجي يوم وكلها تصير كلب على گلب
عايد : لا عمة ما شايل بگلبي بالعكس احبها بس هي ما يوم حبتني
غضب : لان بربو.......
حياة : غضيييب بطل هاي النسة شنو ولك فززتني واكل تبن لا تحجي هالحجي عمتك هاي
غضب : ما حجيت الغلط
حياة : امشي لك ولي يلا
غضب : تطردني ولك
حياة : اي اطردك عدل اسلوبك
غضب : تدلل ابو خدود المالحات
حياة : عشتوا تروح فدوة لهن
غضب : على شنو اروح فدوة على المملحة البيهن انت تدرين هسة اذا اجيب الخاشوكة واكرف ويهج اطلع كيلو ملح من تخبزين وماكو ملح افركي ويهج يطيح صم كامل
حياة : يبوووو انجب يلا
غضب : غير عسل هن مو خدود
عايد : بعد كل هذا الملح صارن عسل
غضب : والله عسل بس عسل بي ملوحة ؟
يتـبع ...
نبــأ السـلـطـان ..
((( اشبعكم ملوحه ))) 🤣🤍